Post: #1
Title: إلي عزاز الشامي .. يجدها بخير
Author: خدر
Date: 08-10-2010, 11:35 AM
رمضان كريم يا اختنا و صديقتنا , و ربنا يبلغك و الوالدة و الاسرة رمضان و كل الافراح و انتو في اتم الصحة و العافية و تصوموا و تفطروا علي خير. لاحظت غيابك ولا اعلم اسبابو و اتمني انو يكون غياب عارض . انت واحدة من الاقلام المهمة هنا يا عزوز , اتمني عودتك و علي وجه السرعة , إفتقدت قفشاتك , مواقفك الواضحة . فيما يخصني .. انا كنت مشغول بإمتحانات حارة جدا و الحمد لله خلصت و نجحت , و اطمئنك ( من شدة ما فاضي اليومين ديل بقيت اكتب 3 بوستات في اليوم  )
كل سنة وانت طيبة يا بت الناس الكويسين
يا فنانيين , نادوا معاي عزوز دي
|
Post: #2
Title: Re: إلي عزاز الشامي .. يجدها بخير
Author: Hussein Mallasi
Date: 08-10-2010, 11:40 AM
Parent: #1
نعم .. يجدها هي والدتها بخير.
|
Post: #3
Title: Re: إلي عزاز الشامي .. يجدها بخير
Author: GamarBoBa
Date: 08-10-2010, 11:40 AM
Parent: #1
| Quote: ربنا يبلغك و الوالدة و الاسرة رمضان و كل الافراح و انتو في اتم الصحة و العافية و تصوموا و تفطروا علي خير |
تسلم يا فنان ويجدها بخير
|
Post: #4
Title: Re: إلي عزاز الشامي .. يجدها بخير
Author: معاوية عبيد الصائم
Date: 08-10-2010, 11:41 AM
Parent: #1
يا خوى ربنا يجمع الزميلة عزاز الشامى
انت عيدك وين يا الاخو !!!
ناوى حج و لا لا
برضو شايف ود جبريل عازمك عيد
المهم جهزنا ليك احرام الحج
مودة رسمية
|
Post: #6
Title: Re: إلي عزاز الشامي .. يجدها بخير
Author: خضر حسين خليل
Date: 08-10-2010, 11:47 AM
Parent: #4
والله انا زاتي يجدها بخير يا خدر
ياعزوز امرقي ياخ وياريتك تدي اشراقة لكزة وانتي جاية
مشتاقين والله
|
Post: #5
Title: Re: إلي عزاز الشامي .. يجدها بخير
Author: محمد صباحى
Date: 08-10-2010, 11:46 AM
Parent: #1
| Quote: كل سنة وانت طيبة يا بت الناس الكويسين |
خدر
مبروك النجاح و يا رب من نجاح ل نجاح
|
Post: #7
Title: Re: إلي عزاز الشامي .. يجدها بخير
Author: محمد عبد الماجد الصايم
Date: 08-10-2010, 11:54 AM
Parent: #5
نفس الشعور .. والقرقر الفوق دا!
|
Post: #8
Title: Re: إلي عزاز الشامي .. يجدها بخير
Author: Yassir Tayfour
Date: 08-10-2010, 12:05 PM
Parent: #1
والله يا طارق كل يوم أقول أسأل منها الأصحاب والصاحبات، ولكن مع الجهجهة الحاصلة علينا دي ننسى. أتمنى ان تكون هي ومن حولها بخير..
____
عزاز البت النجيضة، مشتاقوون!
|
Post: #9
Title: Re: إلي عزاز الشامي .. يجدها بخير
Author: هواري نمر
Date: 08-10-2010, 12:10 PM
Parent: #8
| Quote: و ربنا يبلغك و الوالدة و الاسرة رمضان و كل الافراح و انتو في اتم الصحة و العافية و تصوموا و تفطروا علي خير. |
شكرا يا فنان
وكل سنة وانت وجميع الصحاب والصاحبات بكل خير
ورمضان كريم...
تحياتي واحترامي..
لك و للاخت عزاز
|
Post: #10
Title: Re: إلي عزاز الشامي .. يجدها بخير
Author: Amira Elsheikh
Date: 08-10-2010, 12:14 PM
Parent: #9
ياعزوز ياجـميلة...
بالجـد مفتقدنـك,,,,,
الاجـازة الممنوحـة خلصت,,,
وكـل سنـة وانت والوالدة وكـل البتحبيهم طـيبين
|
Post: #11
Title: Re: إلي عزاز الشامي .. يجدها بخير
Author: خدر
Date: 08-10-2010, 01:58 PM
Parent: #10
كما لا يفوتني ان اخبرك انو :
- ليبيا اعلنت مساء امس انو رمضان بكرة.
- المؤتمر الصحفي بتاع حسن نصر الله بتاع امس كان مريب جدا.
|
Post: #12
Title: Re: إلي عزاز الشامي .. يجدها بخير
Author: عزاز شامي
Date: 08-10-2010, 02:47 PM
Parent: #1
خدر يا خدر ... تخدر ايامك و تورق سويعاتها بكل ما هو جميل انت ومن ذكروني على البعد هنا أو في مكان ما في هذه البسيطة،،
انا بخير .. اتنفس .. و اصبح و أمسي و ليلي أقصر من ليالٍ مضت في السابق، نهاري و صباحاتي طويلة نسبيا، جلها عمل مضن، و بال مشغول، و جري و سك معايش ما جبارة بس مملة و روتينية ... يسلمني النهار لفافة تعب لـ ليل هادئ، مجاز و حقيقة اقضيه نوما وحلما بغد اعلم يقينا بأنه لا يأتي، أو أنه أتى ولم اتبينه ... لا يهم، كان جا شن طعم مجابدة ام قدود؟
على ذكر القراية ام دق، ألف مبروك وان شاء الله نجاح تلحقه نجاحات، اتمناه نجاحا تكر خلفه اشراقات انتظرتها أو تفاجئك، أيهما أقرب لنفسك.....
ابشرك يا خدر أنا ايضا نجحت و تعديت صخرة ظننتها أكبر من الالتفاف حولها، و هاهي الارض منبسطة لمزيد من السك سك ورا الفرص وما تبذله لنا الحياة على استحياء أو نقلعه منها رجالة – أو نظن كذلك – وبعد اسبوعين من البحلقة في صفحة السكريبت قررت ابدى درب القراية تاااااني، ادمنت الزحمة و ضيق الوقت بعيد عنك! وذلك الخوف من الامتحان و ترقب النتيجة و كتابة essay ورا التاني، وهانا احاول اقناع جامعات مختالة بنفسها لم انت جديرة بالالتحاق بها و دفع نصف مرتبي وأكثر مصاريف دراستي ولا انسى ان اشكرهم في نهاية الكتابة بعميق شكري و امتناني لاختيارهم لي لادفع لاضل اراواح في تلك المنطقة الاثيرة بين الفلس و الكفاية ...
أمي بخير، عملت عملية للعيون بعد ان قاربت على فقد نعمة البصر، عادت فرحة يا خدر، سمعت صوتها بعد طول صمت تداري فيه خوفها من أن تكون عبئا على وهي لا تدري انها سبب حياتي و نكهتها ولولاها لتمنيت الموت بلا استحياء ... عملت العملية في القاهرة، حيث شبت هناك في زمن مضى سريعا، لا اكاد اصدق رواياتها عنه لولا صور اهترءت اطرافها تبدو فيه وجوه هادئة وعيون لامعة و شوراع نظيفة تظللها الاشجار و في زاوية ما "اتومبيل" ابيض، دائما "الاتومبيل" في الصور لونه ابيض .. قد يكون رمادي او اصفر او حتى بمبي واستحال ابيضا في صور لا تميز الألوان ... هال أمي ما آل اليه ميدان التحرير و فسحة العتبة و شوراع قاهرة أخرى لا نعرفها نحن ... فرحت بدعوات المارة متى ما رأوها تتكئ علي "سلامتك يا حجة! ما تشوفيش وحش رب" و محنة صوت لا تتبين مصدره في الزحام "بشويش .. على مهلك يا ست الكل" و لا تفوت فرصة لا تخبر فيها فردا من الشعب المصري "انتو ناس طيبين بس بقيتو كتير!" اتونست مع الشغالات في العمارة و صلت في الحسين و طبخت غدوات، أو طبختو أنا بالانابة بتوجيهاتها لانو اختك كانت مولينكس متعددة الاستخدامات و باقطع البصل لشرحات متساوية و بعصر الطماطم لآخر قطرة ... و مشت زارت اهلها و رجعت ومعاها شريك و كعك ... ماما كويسة يا خدر، نفسها في الدنيا و كفاية علي، كفاية على شديد، لو فاتتني اقلق علي، بس ما دام هي طيبة ... انا بخير...
انا طيبة و بخير، بعدت شوية، ولكني بخير، انعم بهدوء اتمنيته لي زمن، واغوص في كرسي المتفرج بكسل لذيذ، بتشيلني الهاشمية مرات اعلق، و أرجع تاني أقول بلاش، الكلام هنا بندق في بحر، بندق في بحر يا خدر ... البحر ده جا جاهز، بمويتو ....بسمكو الصغير (المسالم-الحالم-الطيب-الخلوق-الكافي خيرو شرو) و باسماك القرش و الدلافين و حوت واحد احد ..... بالطحالب و اكياس النايلون و الجمبري و القرديس (موش هو الجمبري برضو؟) و السلطعون (ما بعرفوا بس بيكون في منيو المطاعم) و محار في جوفو لؤلؤ و كمان باغات فاضية، و بفضل British Petroleum بقى في بقعة زيت تحمر فيها الطعمية …..بحر جاهز من مجاميعو، هوا قبلي و على اربعة شوارع ... يا تقع و تشوف درب السمك الليلك وين..... يا بل راسك، في دوامات متربصة بك!
ويا خدر يا اخوي،، لا قبل لي بالدوامات، و الدوام لله، و انا كائن نهري، اطمئن بمعرفة منبعي و مصبي، البحار لا تناسبني، تخفيني؟ لا اعتقد، ولكني كبرت- أو انا أصغر- ايهما اقرب لفضيلة توخي الحذر– من خوض تجارب مثبتة نتائجها بأمل تغير مآلاتها و كل عدتي هي "نفسي" التي املك ...ولا أملك غيرها، و نفسي اعرفها، و اقبلها، و املكها، و غيري لا أعرفه ولا أملك تغيره ولكني أملك محاولة أن أقبله، أو أدرب النفس، وهو أمر عسير .. عسير ... عسير ... ولكن الله يدينا القدرة و نحاول ... الرحلة دي قصيرة شديد، و المهام فيها كثيرة، و الوقت ضنين، و النفس أمارة بالخير و الشر و قيادها صعب، و درب الخير قليل و دروب الشر ختالة و تلمع والتجارب لم توجد عبث، و اهمال دلالتها من دلالات الجنون، و لو دقتني عتبة الباب مرة، بكون ساهية لو دقتني مرتين بكون طايوقي فاضي و استاهل ... يرضيك طايقوي يكون خاو على عروشه أو يكاد؟
.....
شكرا يا الخدر، و شكرا يا السمحين و السمحات، السألتو، اتمناكم بخير و بعافية، و كل سنة و انتم طيبين و رمضان كريم و تصوموا و تفطورا على خير و دائما لامين و تامين و حبانكم حواليكم و حالهم طيب ..
وكثير من محبة و شكر،،
عزاز
|
Post: #13
Title: Re: إلي عزاز الشامي .. يجدها بخير
Author: عزام حسن فرح
Date: 08-10-2010, 02:58 PM
Parent: #12
صدق الله العظيم
حين قال
< وَعَلَّمَ آدَمَ الأَسْمَاء كُلَّهَا ... > البقرة 31
|
Post: #14
Title: Re: إلي عزاز الشامي .. يجدها بخير
Author: محمد عبدالرحمن
Date: 08-10-2010, 03:07 PM
Parent: #13
اضحكك الله سنك ياعزام ...
|
Post: #15
Title: Re: إلي عزاز الشامي .. يجدها بخير
Author: esam gabralla
Date: 08-10-2010, 03:46 PM
Parent: #14
طفشوها و قعدو
احسن ليها ما ترجع .... بلا قرف
|
Post: #16
Title: Re: إلي عزاز الشامي .. يجدها بخير
Author: خدر
Date: 08-10-2010, 06:42 PM
Parent: #15
الغالية عزوز يجدها بخير و شكرا لساعي البريد
الف مليون حمدلله علي سلامة الوالدة و قولي ليها مبروك وحمدلله علي السلامة عجبتيني و سريتي بالي انك إستخدمتي المولنيكس كما يجب و عجبنا و سر بالنا ايما سرارة تطبيعك مع المصاروة تطبيع الشجعان , و طمنيها عليك ياخ و خليها تتأكد انك كويسة و مبسوطة معاها و انك بدونها ما بتسوي , انا عارف انو القصة دي صعبة لكن انت إتحرفني غايتو . هجرة السجم دي يا صديقتي ما عارفين والله آخرها وين , خسيمك النبي قولي للوالدة طارق لي اسه قلبو بنقبض لمن التلفون يضرب و انو امو حردت الاتصال بيهو لانو بتخلع و انو بقت دمعتو قريبة مع انو جعلي (تجميع الخرطوم ) و انو تاريخو مع الموت سيئ. انا عمري ما حضرت موت عزيز وده المخوفني اكتر, اعزائي كتار يا عزوز. خليها تدعي لي (امك دي بتكون دعوتها فاتحة علي السماء) اني ما افقد عزيز و انا بعيد.
ضربت لي ابوي قلت ليهو نجحت يا ابوي و جبت ليك شهادة جديدة , قال لي ما عاوزها عاوزك انت , قلت ليهو اجيك بكرة قال لي لا تعال في العيد و جيب لي معاك اولاد الكــلب, ولو تعرفي انا بحب الراجل ده كيف تتحيري انو صبرنا علي الـ 13 سنة كيف ؟ قررت انو امشي اعيد معاهو و رئيستي المباشرة تضرب راسها في الحيط , عندها عدد واحد ميديكال ريبورت مكرب يتيح لي الخرطوم ببراح.
ما قاعد اغني اليومين ديل , بنوم و بصحي و بكتب في سودانيزاونلاين , بعيد عنك في الغربة دي الايميل و سودانيزاونلاين دي بسدوا لينا خانة زيارة الرحم , و انت عارفة زيارة الارحام فيها مُتعة و فيها مغسة و الواحد بهبش كايس الاجر.
والله يا عزاز مشتهي ونستك لكن مستعجل شوية باكر داخل رمضان و رمضان هنا بعيد عند بنصحي من النوم و نصوم لحدي ما اليوم ينتهي الساعة 6 نرجع البيت نقعد نرجي في الاذان بتاع الكمبيوتر داك لحدي الساعة 9 و نص بعد داك نفطر, فكرت كتير جدا انو ادي الكمبيوتر بيانات اي مدينة بتصلي المغرب الساعة 5 بتوقيت هولندا و ابحث عن مُفتي للقصة دي (لو جنبك مُفتي مستنير شوفيهو لي بلاهي)
علي سيرة الدوامات ويأفوخك العنيد, لا استطيع ان افتي لكني اوافق بلا شروط علي خياراتك , البني ادم مننا يا صديقة معجون طاقة و مزاج فأهنائي براحة البال و لا تحرمي ارحامك هنا من حلو الطلات. هذا و رمضانك و الوالدة الكريمة كريم
|
Post: #17
Title: Re: إلي عزاز الشامي .. يجدها بخير
Author: عمر عبد الله فضل المولى
Date: 08-10-2010, 08:38 PM
Parent: #16
شكرا الاخ خدر لهذه المساحة التي تستحقها الاخت عزاز
وكل عام وانتم بالف خير
|
Post: #18
Title: Re: إلي عزاز الشامي .. يجدها بخير
Author: مرتضى احمد عبد القادر
Date: 08-11-2010, 00:02 AM
Parent: #17
| Quote: انت واحدة من الاقلام المهمة هنا يا عزوز , اتمني عودتك و علي وجه السرعة , إفتقدت قفشاتك , مواقفك الواضحة . |
|
Post: #19
Title: Re: إلي عزاز الشامي .. يجدها بخير
Author: صديق الموج
Date: 08-11-2010, 00:33 AM
Parent: #18
النجيضه غايتو احيييييييييى انا
لكن من شنو؟؟؟زول يسالنى مافى
لاخدر لابقية الاوغاد،،،
|
Post: #20
Title: Re: إلي عزاز الشامي .. يجدها بخير
Author: ALZOLZATOO
Date: 08-11-2010, 00:49 AM
Parent: #19
خدوري
الله يجازي الكان السبب
ياخي في بوست المعيار في ناس نشفوا ريقها
عشان كده يمكن تكون في فترة استجمام او بتجهز في حاجات رمضان
تحياتي
زاتوووو
|
Post: #21
Title: Re: إلي عزاز الشامي .. يجدها بخير
Author: أحمد الصديق
Date: 08-11-2010, 01:13 AM
Parent: #19
أخوي طارق
رمضان كريم
عليك الله ما تقطع منها الجوابات.
ولو ردت عليك .. ونستك حلوة وطاردة للملل.
رمضان كريم الأخت عزاز شامي.
|
Post: #22
Title: Re: إلي عزاز الشامي .. يجدها بخير
Author: ALZOLZATOO
Date: 08-12-2010, 00:13 AM
Parent: #21
الاخت عزاز
رمضان كريم وحمدالله على سلامة الوالدة
ياخدوري اجزيت وافيت ومبروك النجاح
تحياتي
زاتوووو
|
Post: #23
Title: Re: إلي عزاز الشامي .. يجدها بخير
Author: محمد المرتضى حامد
Date: 08-13-2010, 11:16 AM
Parent: #22
مبروك النجاح يا طارق
مبروك النجاح يا عزاز
كل سنه وانتو طيبــين 
|
Post: #24
Title: Re: إلي عزاز الشامي .. يجدها بخير
Author: عبد الرحيم محمد عبد الرحيم
Date: 08-13-2010, 12:16 PM
Parent: #23
Quote: الاخت عزاز
رمضان كريم وحمدالله على سلامة الوالدة
ياخدوري اجزيت وافيت ومبروك النجاح
تحياتي |
مع الرحب والسعة
ودبرى
|
Post: #25
Title: Re: إلي عزاز الشامي .. يجدها بخير
Author: كمال سالم
Date: 08-13-2010, 12:27 PM
Parent: #23
تتصور ياخدر فتحت المنبرالعام ولفيت فيهو شارع شارع ما لقيت
حته إرتاح فيها إلا هنا .
يأخ إنت هضبه من الجمال وعزاز تستحق أن يفقدوها ,, تحيه ومحبه
مزدوجه ليكم الإتنين ,, وألف مبروك النجاحات ,, وألف سلامه للوالده
ياعزاز .
خدر إن مد الله فى الآجال موعدنا فى الدوحه شهر ديسمبر ,, أرجو أن
تخطط لذلك منذ الآن ,, تحياتى ,,
|
Post: #26
Title: Re: إلي عزاز الشامي .. يجدها بخير
Author: khaleel
Date: 08-13-2010, 01:17 PM
Parent: #25
Quote: يأخ إنت هضبه من الجمال وعزاز تستحق أن يفقدوها ,, تحيه ومحبه
مزدوجه ليكم الإتنين ,, وألف مبروك النجاحات ,, وألف سلامه للوالده
ياعزاز .
|
خدر وعزاز
انا سيم سيم كلام مال كمال سالم
رمضان كريم
|
Post: #27
Title: Re: إلي عزاز الشامي .. يجدها بخير
Author: Kostawi
Date: 08-13-2010, 06:04 PM
Parent: #26
|
Post: #28
Title: Re: إلي عزاز الشامي .. يجدها بخير
Author: اسماء الجنيد
Date: 08-13-2010, 06:35 PM
Parent: #27
يا سلااااااااام عليك يا خدر وعلى محنتك
والله لي كم يوم لوما السفر والجري يا عزوزة كنت دايرة اعمل زي خدر ده
وينك يا بنية نضميك بطعم الشهد
الف سلامة للوالدة وربنا يمتعها ببصرها ان شاء الله
عارفة يا عزاز اهلنا الكبار ديل وفي السن دي بالزات محتاجين لي نظرهم اكتر من الاكل والشراب وامكن الهواء زاتو
لقلة حركتهم وقلة كلامهم
ربنا ما يحرمهم من عيونهم ان شاء الله
ما تتخيلي يا زوزا لي هسه صوتك بونسني كل ما اطراك
ربنا يخليك للوالده ويخليها ليك بركة شهر رمضان الكريم
وربنا يخليك يا حدر ويخلي ليك الوالد ويخليك ليه وتصلوا بالسلامة وتقضوا ايام حلوة ان شاء الله
وكل سنة وانتو طيبين يا رب
|
Post: #29
Title: Re: إلي عزاز الشامي .. يجدها بخير
Author: تبارك شيخ الدين جبريل
Date: 08-30-2010, 04:54 AM
Parent: #28
والله اختفت تانى ...
وانشالله يجدها بخير مرةً اخرى ...
... المهم ....
|
|