Post: #1
Title: المحطة الجاية بالله ؟!
Author: عزاز شامي
Date: 10-26-2008, 05:23 PM
-احكي لي بالله ... آخرتها شنو يا صاحب؟
-احكي ليك شنو؟ ما ياها .. مالك؟ فترتي خلاص؟
- فترت بس؟ فتّــرت الفَـتر ..!!
الدّواير دي ما ممكن توسع حبة بس؟ الهموم محتاجة نفس ... حنيت عليها بس، تقول شنو الولف ... داير الدايرة توسع حبة بس .. حبببببة علشان تلم لي كراعي الممدد برة في المطر ... العمر كله نصي بردان و نصي التاني عرقان، لا البرد طفى اللهيب لا العرق خفف تعب ... العرق و اقف بين البين مالح .. و الملح فوق الملح فترنا لمن نسينا طعم آآآآآي شي إلا الملح!
- بالله من أول السكة تعبتي؟ و طيب في آخر السفر حيبقى حالك شنو؟
- دايرة ارجع محل ما جيت .. النبي في طريقة ارجع؟
- ما كان بقى حالنا !! دي سكة اتجاه واحدة فقط!
- ياخي السألني منو قبل ما يرميني في اللجج؟
- و السأل الجابك منو علشان يسألوك؟
|
Post: #2
Title: Re: المحطة الجاية بالله ؟!
Author: عزاز شامي
Date: 10-26-2008, 05:24 PM
Parent: #1
******
الهلمة دي مجرد قطر ... قطر بخاري .. قطر سريع، دي مشكلتك انت تصنفو زي ما عايز
تذاكر .. تذاكر ... شهادة ميلاد و النازل برضو ليهو تذكرة مكتوب فيها شهادة وفاة
أول القطر سواق جا من أول الحكي و آخر القطر عربة خالية بتبدي بيها عربات تانية،
عرباتو ظروفنا، منا الدرجة اولى و منا الدرجة تانية و منا الدرجة تالثة و منا المسطحين النايمن فوق
ممددين بطول السقف، احلامهم ممدوة في العربات التحت
وفوقهم السما الضنت عليهم بكثير من عالم التحت (المرتاح)
بس برضو الله كريم و اداهم وسع السما فضا من غير سقف للأمنيات و الاحلام بلاش ... و الما بيحلم منو؟؟
|
Post: #14
Title: Re: المحطة الجاية بالله ؟!
Author: عزاز شامي
Date: 10-26-2008, 06:38 PM
Parent: #2
****
يا صاحب ... شواق القطر منو؟؟
- اوششششششششش!!! جنيتي؟؟
- في شنو؟
- بتسألي منو ليه؟
- دايرة اعرفه!
- ليه؟ تعرفيه ليه؟
- موش من حقي اعرفه؟
- و العرفة شن تفيدك؟
و اتكيت على شباك القطر افكر ... هو صحيح ... حستفيد شنو من عرفة سواق القطر؟
|
Post: #3
Title: Re: المحطة الجاية بالله ؟!
Author: عزاز شامي
Date: 10-26-2008, 05:27 PM
Parent: #1
*********
الباعة المتجولين، تسالي، شاي، طرح و مقاشيش ...
لا التسالي تسالي .. و لا الشاي روق دماغ .. و لا المقاشيش قشت تعب .. و التراب بيتسللنا .. بيتسللنا
المهم ... ديل الناس البايعة الوهم ... بيمروا بكل الدرجات، يشوفوا الكل و ما ينوبهم منهم إلا ذات القيمة
حق الشاي ..
و الحسرة في الدرجة الاولى...
شماتة في الدرجة الثالثة
و حسد لناس التانية
ناس التانية ... اهم حاجة ...!!
الواقفين في النص نص .. بين هنا و هناك و الهنا و هناك ما وشين للهنا الكبيرة، بس دايرين عمرين علشان نلف الهنا الكبيرة و نعرف انو هناك ياهو الهنا ... بس مين بقبل بـ (هنا) حقتو ؟؟
النص نص بيتعالوا على الدرجة الثالثة و بيشفقوا على المسطحين فوق ، وكل صغير ليهو الأصغر منو يحقر بيهو .. ولو صغرت حالك شديد، ما تيئس، تحت لسه فيه، صدقني القاع سحيق و السما أقرب ..!!
أما الدرجة الأولى قصد باكر، لما القروش تكتر، و فيها بنلحف عشمانين في الجاي (بكرة بس يبقى معاي قروش إلا اركب درجة أولى!) الدرجة دي فعلا أولى، لانك بترجع بيها تاااااااني للأول في مدرسة الدنيا!
الفارق معاك شنو؟؟ موش حطتك هي هي؟ البيصل ليها قبلك منو؟
|
Post: #4
Title: Re: المحطة الجاية بالله ؟!
Author: عزاز شامي
Date: 10-26-2008, 05:29 PM
Parent: #1
******
الكمسارة انواع، ونفس الكمساري ببقى انواع .. ماهل في الأولى و ممكن يتكي على الباب لغاية ما تقوم تمد يدك بالمعلوم
في الثانية الكمساري بيتململ، ينفخ في زهق (ما تخلصنا ياخ!)
في الثالثة بيكمل الصبر (شنو؟؟ ما معاك راكب ليه؟)
ناس فوق اللي هم اصلا تحت التحت، ما في ليهم إلا اللعنات و والدعاوي بأنهم يقعوا زي ورق الخريف و (نرتاح منهم و من قرفهم!)
قرفونا في شنو؟
قرفونا بهمهم؟
الدنيا ناقصة هم؟
لاكين انحنا جبنا همهم متين إلا لما بقى واقف قدامنا لابس جسد .. ؟؟؟
|
Post: #5
Title: Re: المحطة الجاية بالله ؟!
Author: عزاز شامي
Date: 10-26-2008, 05:33 PM
Parent: #1
********
طقطة الكمساري ... تهدية القطر ... السندات، الوشوش البرة القطر، هي وشوش لناس جو القطر بس الغفلة يا مؤمن .. الغفلة تقول شنو؟
تنزل محطة؟ ماشي وين؟ حياتك هنا في القطر ..!!
زهجت خلاص؟ داير تغير مناظر؟ يا حليك يا جاهل .. يا حليلك يالغبيان من حال القطر ..!!
القطر كان وقف بيك، بيقيف بيك براك، تنزل منه انت براك، و الوشوش الشفتها من الشباك بره هناك تركب مكانك
تملى فراغك و تخلي ليك الفضا البرة، تملاهو انتظار ..!! بالله موش اخير منو القطر؟
موش اخير منو حسدك لناس الاولى و شفقة لناس الثالثة؟ خليك من الفوق الهم تحت تحت، ديل ليهم الفوقكم كلكم ...
بس رد علي ... ما كان اخير تبقى في حتتك؟
|
Post: #6
Title: Re: المحطة الجاية بالله ؟!
Author: طارق جبريل
Date: 10-26-2008, 05:33 PM
Parent: #1
متابع
|
Post: #19
Title: Re: المحطة الجاية بالله ؟!
Author: عزاز شامي
Date: 10-27-2008, 10:47 AM
Parent: #6
طارق . حبابك ألف
انا زاتي متابعة الحاصل و ما عارفة النهاية ..!!
|
Post: #7
Title: Re: المحطة الجاية بالله ؟!
Author: عزاز شامي
Date: 10-26-2008, 05:34 PM
Parent: #1
*******
تعال نحاول نمشي جوه القطر، ننتنقل نتمشى امكن نلقى مدخل ...
رجعوك ليه؟
قالوا ما شبه الأولى!!
ليه، الأولى ليها شبه؟ ولا بيركبها المعاهو ؟؟
المعاهو شنو يا الغبيان!
(كلنا .. كلنا) وشدد لي في اللام و رسم دايرة تشمل القطر (كلنا ما معانا بس البصيرة قسم!)
|
Post: #8
Title: Re: المحطة الجاية بالله ؟!
Author: محمد عبد الماجد الصايم
Date: 10-26-2008, 05:35 PM
Parent: #1
يمين بي طريقتكـ دي إلا تنزلي آخر محطة!!
ياخ المحطة الأولى ما كملناها!
|
Post: #9
Title: Re: المحطة الجاية بالله ؟!
Author: khaleel
Date: 10-26-2008, 05:59 PM
Parent: #8
ناس عزاز اللذاذ
كلامك حلو زيك
|
Post: #21
Title: Re: المحطة الجاية بالله ؟!
Author: عزاز شامي
Date: 10-27-2008, 06:50 PM
Parent: #8
ود الصايم ...
بالله انت نزلت قبل كده في محطة؟؟ بعاتي يعني 
اوموما ...انا محطتي لسة ما جات و لا بعرفها جاية متين و لا دايرة اعرف
ووقت تجي، بلاقي روحي انا و قفتي برة القطر لا ايدي لا كراعي ...
|
Post: #10
Title: Re: المحطة الجاية بالله ؟!
Author: عزاز شامي
Date: 10-26-2008, 06:15 PM
Parent: #1
*****
- الحق الحق !!! ناس أولى اتشاكلوا! قالوا دايرين يخلوا الأولى عربة واااااحدة بس! درجة اولى بس!
- وباقي القطر؟؟
- قالوا يتحرق!
|
Post: #11
Title: Re: المحطة الجاية بالله ؟!
Author: عزاز شامي
Date: 10-26-2008, 06:18 PM
Parent: #1
******
درجة تانية هاجت و ماجت ... انحنا لينا حق في القطر ..!!
ناس ثالثة تعاين ساي، مستغبية الاتين .. لسان حالهم (شوف بالله! فوق شنو ؟؟ موش ياهو نفس القطر؟؟)
ناس فوق -الهم تحت التحت بما حوت - ما فارقة معاهم ..
هم أصلا برة حسابات القطر ... !!!
|
Post: #12
Title: Re: المحطة الجاية بالله ؟!
Author: عزاز شامي
Date: 10-26-2008, 06:21 PM
Parent: #1
****
- بالله عمرك شفت زول بيكابس يركب القطر ده؟
- تخيل لا!
- كلهم بيجوا باكين و مدمعين ... حزن على الفارقوهو و لا الجاي ما معروف ... بس انحنا اللي في القطر بنكون مبسوطين ... ناس جديدة و عشرة جاية نتسلى ... الرفقة مهمة في السفر
- و النزول يا صاحب؟
- النازل بينزل من سكات ... ما بيعاين وراهو ... و الوراهو جرسة و كدر ...
تقول خلااااااص يعني من حلاوة العيشة في القطر؟؟
|
Post: #17
Title: Re: المحطة الجاية بالله ؟!
Author: emad altaib
Date: 10-26-2008, 06:53 PM
Parent: #12
ـــــ
Quote: الباعة المتجولين، تسالي، شاي، طرح و مقاشيش ...
لا التسالي تسالي .. و لا الشاي روق دماغ .. و لا المقاشيش قشت تعب .. و التراب بيتسللنا .. بيتسللنا
المهم ... ديل الناس البايعة الوهم ... بيمروا بكل الدرجات، يشوفوا الكل و ما ينوبهم منهم إلا ذات القيمة
حق الشاي ..
|
|
Post: #22
Title: Re: المحطة الجاية بالله ؟!
Author: عزاز شامي
Date: 10-27-2008, 07:05 PM
Parent: #17
عماد الطالب ..
حبابك معانا في القطر ...
|
Post: #13
Title: Re: المحطة الجاية بالله ؟!
Author: عزاز شامي
Date: 10-26-2008, 06:30 PM
Parent: #1
*****
و في الريدة و غيرها من أحوال الحياة ...
ياهو نفس الحال ...
ناس ثانية تحب ناس تانية و تعشم في حب أولى .. و ناس أولى مشغوله بروحها ...
وناس ثالثة تكابس ... في المعايش و في ضيق الكراسي و الكتوف الشايلة تقيل ..
الشبابيك الفاتحة في الخلا، صوت مآذن و صوت كلاب، و احيانا كده صوت ولا حاجة كده!!
- و الونسة شنو؟
- حكاية البعاتي الجا دخل شال بنية و فات ...!!
|
Post: #15
Title: Re: المحطة الجاية بالله ؟!
Author: ابو جهينة
Date: 10-26-2008, 06:48 PM
Parent: #13
عزاز
بنيتنا الغالية
في الريدة و غيرها من أحوال الحياة ...
ياهو نفس الحال ...
ناس ثانية تحب ناس تانية و تعشم في حب أولى .. و ناس أولى مشغوله بروحها ...
وناس ثالثة تكابس ... في المعايش و في ضيق الكراسي و الكتوف الشايلة تقيل ..
الشبابيك الفاتحة في الخلا، صوت مآذن و صوت كلاب، و احيانا كده صوت ولا حاجة كده!!
- و الونسة شنو؟
- حكاية البعاتي الجا دخل شال بنية و فات ...!!
****
طيب في ناس بتكون فوق سطح القطار .. ديل أباطم و النجم في المال و المآل .. يعني حتى في الريدة حظهم كدقيق نثروه في يوم ريح ثم قالوا لحفاة أجمعوه..
أنا ال بيغيظني البيسدوا المزيرة في درجة تالتة و رابعة .. لو ختيناهم في غربال الريد .. ديل لا بيريدوا لا بترادو ... يعاينوا بس لل بيجي يشرب من أخمص القدمين لحد الحلقوم ..
سرد ممتع سافر بي بعيدا
|
Post: #23
Title: Re: المحطة الجاية بالله ؟!
Author: عزاز شامي
Date: 10-27-2008, 07:35 PM
Parent: #15
Quote: طيب في ناس بتكون فوق سطح القطار .. ديل أباطم و النجم في المال و المآل .. يعني حتى في الريدة حظهم كدقيق نثروه في يوم ريح ثم قالوا لحفاة أجمعوه..
أنا ال بيغيظني البيسدوا المزيرة في درجة تالتة و رابعة .. لو ختيناهم في غربال الريد .. ديل لا بيريدوا لا بترادو ... يعاينوا بس لل بيجي يشرب من أخمص القدمين لحد الحلقوم .. |
تخيل يا ابو جهينة، الحب ده احوالوا عجيبة !!
القلة، و القلة خشم بيوت، ما بتأثر فيهو بالعكس بتزيد الحبايب حنية و ولف ...مرحلة (ما بعد الحب) و احتياجات تلك المرحلة و سككان الحلم بتاع الدرجات الفوقنا و الهرب من التحتينا البيجيب الكافية و نبقى في سد احتياجات ما لا نحتاجه أصلا!
الناس الاباطها و السما ما في شيء تخسروا و الحب بيسد فرقة الشالتو الدنيا منهم بليل ولا بصباح ما عارفة ولا هي ما ادتهم زاتو علشان تشيل ...!!
الريدة يا ابو جهينة شريعة .. ليها فروض و ليها رسل .. قالي واحد منهم زمان انو البيسدوا الزير ديل عاصين وخارجين من الملة ..!!
|
Post: #16
Title: Re: المحطة الجاية بالله ؟!
Author: سارة علي
Date: 10-26-2008, 06:48 PM
Parent: #1
ههههههههههههههههههههههههههههههههههههه
ياخ انتي لذيذة...
بوستيك دة اعملي ليهو لنك وودي بي هناك....
|
Post: #24
Title: Re: المحطة الجاية بالله ؟!
Author: عزاز شامي
Date: 10-27-2008, 07:39 PM
Parent: #16
سرورة اضحك الله سنك دوما
البوست ده علشان يمشي آآي حتة محتاج ليهو محولجي
|
Post: #18
Title: Re: المحطة الجاية بالله ؟!
Author: عزاز شامي
Date: 10-27-2008, 07:33 AM
Parent: #1
****
- وسواق القطر؟
- اوششششششششش!!! جنيتي؟؟
- في شنو؟
- بتسألي منو ليه؟
- دايرة اعرفه!
- ليه؟
- موش من حقي اعرفه؟
- و العرفة شن تفيدك؟
- و اتكيت على شباك القطر افكر ... هو صحيح ... حستفيد شنو من عرفة سواق القطر؟
|
Post: #20
Title: Re: المحطة الجاية بالله ؟!
Author: DKEEN
Date: 10-27-2008, 10:49 AM
Parent: #18
سواق القطر عرفوهو ناس الدرجة الاولى وعملوهو حاكورة..
قالو نحنا بي اسم سواق القطر حنعمل شريعة القطارات..
نخت فيها اول مانخت انو الحاكمية لي السواق..
وكل شي يتم هنا في هذا السفر الطويل باسم السواق لا سواق إلا هو..
البنقبلو بنقلبو بي اسم السواق ..
والبنرميهو بره بنرميهو بي اسم السواق..
وقامو عشان تنفيذ المخطط ده ..
في ليلة غائمة لابدر فيها استلموا كل تابلتات المحطات الجاية ..
وجابو ناس من جماعة (فوق القطر الذين لايملكون شيئا سوى جلاليبهم البالية) جابوهم من جنوب وشمال وغرب وشرق القطر وكترو تحديدا من غرب القطر ..
ومسكوهم مفاتيح انجليزية وقالو ليهم الفتح خشمو من اي درجة كاشنا من كان القموه هذه المفاتيح في فمه..
حين اصبح الصبح في ذلك السفر الطويل
كان كل شي كل اعد بدقة ووجد الناس في مختلف درجاتهم ان القطار قد تم استلامه بالكامل باسم السواق مالك القطار ..
ووجدوا ناس درجة اولى هم وكلاء السواق في القطار الذي يتجه الى مالاجهة معلومة..
قام واحد من ناس درجة تالتة قال ليهم:
وانتو منو الفوضكم تتكلمو بي اسم سائق القطار..
انتو عندكم مفتاح القطر ده ولاشنو؟؟
قامو عليهو ناس غرب القطر المستجلبين من اعلى وختهو في خازوق الدرجة الاولى..
صرخ احدهم من الدرجة الاخيرة التي تعج بعمال صيانة القطار:
انتو منو القال ليكم ذاتو انو القطر ده فيهو سواق..
ان القطار يسير بلا هدى منذ زمنٍ بعيد..
وجم الناس لقوله وحوقل البعض وبسمل..
|
Post: #25
Title: Re: المحطة الجاية بالله ؟!
Author: Emad Abdulla
Date: 10-27-2008, 07:46 PM
Parent: #20
عارفة ..
نميري كان بيركب فوق راس القطر ..
بيركب ( قرع ) ..
و يتضرع فوق راس القطر و القطر ماشي .. ماشي ..
نميري ما بيقع و القطر ماشي .. نميري حديد و زول مميز عليم الله .. و براهو ..
منشى و يلمع و نضيييف ..
و ناس نحنا بي تحت : الشعب الرعية .. شغالين هتافات بإخلاص للزول الكبير ده ياخ ..
كبير و مميز و بيعرف أي حاجة ..
و هو ماشي في راس القطر قرع .. و يكبر يكبر يكبر .. و نحنا نصغر نصغر ..
في ناس بدل ما تهتف ليهو كانت بتسرقها عادة المهمشين في الأرض و العايشين في الدنيا دي سمبلة ساكت ..
يقوموا بدل يهتفوا للريس السمح و مندي و كبير ده , يقوم يصرخوا و هم جارين حذا القطر : أديني رغيفة .. أديني رغيفة ..
شفتي فضيحتنا يا عزاز ؟؟
شعب نفسوا صغيرة فعلاً و دني .. و ما بيفهم في الأصول و لا الإتيكيت .
هو نحنا زاتو كنا راكبين ؟ .. هو في شعب بيركب ؟
الشعوب " صُنِعَت " لتُركَب ..
ليركبها الكبار .. و يدلدلوا رجولهم و يقولوا للشعب : عرت .
الشعب حمار .. الشعب قطر .. الشعب كارو .. المهم يتركب توكيدا و عملاً بمقولة : كلٌ لما أعِدّ له ..
كلو يركب : المصايب الكبيرة .. و الرؤوس الكبيرة و البلاوي الكبيرة و المقالب الكبيرة و البلالين الكبيرة و البراميل الكبيرة و التماسيح الكبيرة و اللياقات الكبيرة و الكروش الكبيرة و الكلمات الكبيرة و الأبواق الكبيرة و الأفكار الكبيرة و القنابل الكبيرة و الدلاليك الكبيرة و الخذلانات الكبيرة و البعاعيت الكبيرة الحيرات الكبيرة و الأسئلة الكبيرة و التوهانات الكبيرة و الأحزان الكبيرة و المتاهات الكبيرة و الفوضى الكبيرة و أم دلدوم الكبيرة .. كلو يركب .
مافي محطة جاية يا مواطنة ..
قلنا إكسبريس ..
و بالمرة جري معاك صفارة طويلة للأمة الزاحفة دي .
شعب ترسو صحي صحي .
|
Post: #26
Title: Re: المحطة الجاية بالله ؟!
Author: عزاز شامي
Date: 10-27-2008, 08:50 PM
Parent: #20
كعادتك في كل الكلام .. بتبتدي في نهاية الحكي
يا حليلك يا صاحب ... الونسة فاقدة زول و لسة بعاين على يساري وقت يعز الكلام افتش مكانك تقول لي اختك ست الباستيز: ده خلاص روّح من زمان! كملي ياختي كلمي مافيش إلا انا و انتي!
المهم ...
داير الجد ولا الهزار؟ قطركم ده سلموهو اهل القطر للسواق.. اقرى كلام العمدة أدناه ..
سكيتو القطر و الفي قطر بسفاسف الأمور ...ادونا عيش .. ادونا برتكان .. النبي يا حجة ادينا فكة
شفعكم غلبهم.. ناس تلبو من الشبابيك و الفيهو بقية ذمة سطّح و قال باكر ينعدل الحال ...
قامت ليهم لحى و لسان حالهم (دعوني اعيش) لا لحق العيشة لا هو ادفن مستور
لمن فاتكم القطر و عجاجو غطى الأركان وصحيتو لقيتوهو فاتكم هناك .. عملتو شنو؟
كشحتو بعضكم بالتراب
و انت الخاتي ! لا انت الخاتي! لا لا لا الولية دي هي الخاتية وش البوم!
مشيتو المديرية راجين اشارة ... نشتكي القطر ... شال اولادنا
اولادكم مشو ليه؟ قالوا تعبوا!
تعبوا من ايه؟
يوووووووووووه بقى! يا افندي ما تفتح جروح !! ما جات الاشارة؟؟
وما جات الاشارة ..!!عملتو شنو؟
قول فضل شنو غير سف التراب؟
بس التراب زاتو كمل .. شالوا القطر قبيل ...
اما عن حال ناس القطر ... فده جاي شرحو بعدين
|
Post: #27
Title: Re: المحطة الجاية بالله ؟!
Author: ihsan fagiri
Date: 10-27-2008, 09:04 PM
Parent: #26
عزاز
اعجبني اسلوبك السلس الممتع
بس ناس الدرجه الاولي اختوهم ديل شغالين دواس وما هماه الا روحهم
بس الله يعين ناس تالته
لكي ودي
|
Post: #28
Title: Re: المحطة الجاية بالله ؟!
Author: انعام عبد الحفيظ
Date: 10-27-2008, 09:14 PM
Parent: #1
المحطة الجاية بالله؟!
صحي مافي محطة ولا حاجة
القطر دا ماشي وما بقيف في أي محطات
دا سؤال ليك بالله ؟!
عزاز علينا إزيك
|
Post: #29
Title: Re: المحطة الجاية بالله ؟!
Author: سناء عبد السيد
Date: 10-27-2008, 10:20 PM
Parent: #1
بالله المحطة الجاية الكزيني عشان ما اسرح و المحطة تفوتني
ناس درجة اولى عندهم واحد بجي يصحيهم لمن الواحد فيهم يصل محطته, يعني شغلانته بس يجي يصحيهم عشان بكونوا نايمين في اخر نومة و
ما جايبين خبر الدنيا ما زي ناس درجة تالتة المساكين
ازيك يا عزوز
|
Post: #30
Title: Re: المحطة الجاية بالله ؟!
Author: عزاز شامي
Date: 10-31-2008, 10:04 PM
Parent: #1
Quote: مافي محطة جاية يا مواطنة ..
قلنا إكسبريس .. |
عمدة ..
لعلك طيب؟
جيت و رميت لي كومة (كبيرة) (كبيرة) و قمت جاري و خليتني خاتة الخمسة فوق الاتنين!
يا مؤمن،
آمنت .. آمنت بالله بما كان و ما سيكون ...
شفت حتة الاكسربيس دي تحديدا شفتها وجها لوجه قبل شوية
وقبل شوية دي معطوفة على يوم الجمعة 31 الجاري 2008 ...
فعلا الدنيا اكسبريس!
تكون مطمئن في حضن مركب تجي موجة تشيلك تجدعك هناك بعيد ...
فجأة كده يا اخوي تلاقي اليد الشالتك على كف المحنة تلطشك كف تخليك تلف في مكانك!
فجأة!
المشاعر تركب اكسبريس و تقتطع بيك حدود (انحنا) و تلاقي نفسك واقف على نقطة تفتيش (وحدك براك)
لا معاك بطاقة لا هوية، ما انت خلاص كنت ضامن لجوء في حضن دافي شن بيرجعك للوحدة تاني؟
محطة قطر أحلامك فاضية، ورق جرايد حياتك طاير شايلو هوا بارد، جارف، جارح .. يطير يغطي وشك و تشم فيهو ريحة وهم عشمك ..!!
فجأة تلاقي انو القطر الجابك .. جابك براك، و الركبت معاهم القطر قبيل ما نزلو معاك و ادوك ضهرهم في القطر
حردانين!
في شنو؟
يعميني و يطرشني!
هو مهم زاتو؟؟
القطر ما فارق معاهو البقى منو ولا النزل منو منو ..
رماك تاخ كده على ارض المحطة زي ما بيقع الطبق السخن من يد البت الشترة ، تتكسر حتة حتة، تتشرم، ما مشكلته!
تقوم تتلفت ... تسأل روحك: في شنو؟ ما حسي كنت (انحنا) الرجعني (انا) تاني شنو؟
بري! ترد عليك المحطة و تزح ليك في الكنبة تحت المظلة،امكن يجي قطر تاني تركب فيهو .. أو ما تركب زاتو!
ديتك شنو؟
تموت في البرد؟
تموت في الشمس؟
هو الماتو شوية يهتروا همي كمان؟
الريح جات مارة بفوق،
همست الغيمة:
- هي دي موش ياها زاتها البت ديك ؟؟؟
- ياها زاتها!
- موش كانت في القطر داك؟
- ...
_ ...
تزوووم الريح و تمشي و تخلي السؤال معلق داير اجابة ..
|
Post: #31
Title: Re: المحطة الجاية بالله ؟!
Author: محمد عثمان
Date: 10-31-2008, 10:10 PM
Parent: #30
متاابعة..
بجيك صادى يا عزاز,,
|
Post: #32
Title: Re: المحطة الجاية بالله ؟!
Author: دينا خالد
Date: 10-31-2008, 11:00 PM
Parent: #31
تالته تااااالت يا خيبتها ...........
تالته اوووول غلبتهاااااا ,,,,
ترم ترم تررررررررررم
وخابت القطارات بمن فيها ..
لا ،،، ولا الجاية ولا البعدها خلينا لسسه فيها ...
ـــــــــــــــ
عزاز ؟؟؟
حتى انتى يا بروتس ؟؟ ,,, قالها وعاد الى الحياه
عشان يحددها معاهم ... ما تدفعى دفعت ليك !
|
Post: #33
Title: Re: المحطة الجاية بالله ؟!
Author: عثمان عبدالقادر
Date: 11-01-2008, 04:21 AM
Parent: #1
| Quote: حبببببة علشان تلم لي كراعي الممدد برة في المطر ... العمر كله نصي بردان و نصي التاني عرقان، لا البرد طفى اللهيب لا العرق خفف تعب ... العرق و اقف بين البين مالح .. و الملح فوق الملح فترنا لمن نسينا طعم آآآآآي شي إلا الملح! |
Quote: - دايرة ارجع محل ما جيت .. النبي في طريقة ارجع؟
- ما كان بقى حالنا !! دي سكة اتجاه واحدة فقط!
- ياخي السألني منو قبل ما يرميني في اللجج؟
- و السأل الجابك منو علشان يسألوك؟ |
Quote: - موش من حقي اعرفه؟
- و العرفة شن تفيدك؟
و اتكيت على شباك القطر افكر ... هو صحيح ... حستفيد شنو من عرفة سواق القطر؟ |
| Quote: بالله انت نزلت قبل كده في محطة؟؟ بعاتي يعني |
| Quote: انا زاتي متابعة الحاصل و ما عارفة النهاية ..!! |
يا عزاز هذه الخواطر البريئة ذكرتني بدريدا وليفي ستراوس وميشيل فوكو
والشيخ صموئيل بيكيت. سواق القطر يعينك على ما بلاك .
للأسف تصورت أن المداخلات وتّرت هذه البراءة .
أتمنى مجالستك.
أسمحي لي أن أدعو دكين من هنا لتشريفي في منزلي وأظن الأخ صلاح بشير( شتات)
سيوصلك إلي دارنا.
شكرا.
ابوحمــــــــــــــد
|
Post: #34
Title: Re: المحطة الجاية بالله ؟!
Author: محسية
Date: 11-01-2008, 08:51 AM
Parent: #1
عزاز قريبتي ...
إبداع متأصل ...
ونحنا بدري قنعنا من القطر . ونطينا من الشباك
ولكن سبحان الله جينا في قطر كلو كماسرة ..
الكماسرة أكتر من الركاب ..
بالله واصلي السرد اللذيذ دا
تحياتي وأشواقي ..
فكدوجيكولى
إناوقا سلامني
|
Post: #35
Title: Re: المحطة الجاية بالله ؟!
Author: ASHRAF TAHA
Date: 11-01-2008, 01:11 PM
Parent: #1
أنّدي قطرك ده دفرة
كان يصل
|
Post: #36
Title: Re: المحطة الجاية بالله ؟!
Author: Shiraz Abdelhai
Date: 11-01-2008, 03:21 PM
Parent: #1
أزاز على قول معتز ولدى....
ناديتك قبيل وما سمعتى بالرغم من انى كوركتا شديد( وانتى عارفه صوتى كيف!!!).....بس الحقيقه انو مافى زول بقدر يسمع الناس المسطحه!!التسطيحه قطعت قلبى يا فرده وقوة الريح شالت معاها القدره على الحلم وبقى فى البال مافى الا سؤال...انا من ناس بكره ولا مصيرى زى صحبى عبد الرازق ؟؟....ركبنا انا وهو سوا وسطحنا وعاملين فيها شفوت بعد ما حلقنا لمرتين متفلهمات فى محطة كوستى وطرنا زي الهوا بمطابقهم وخليناهم يتلفتو زى الطويرات...........ضحكنا كثيرا وشربنا كل ما يمكن ان تحتويه بطوننا المنفوخه من شاى.....فالسلسيون بيسد النفس ويخليك زى القربه!!!.....رقدنا بمزأأأأأأأأج فوق تالته.....ولاهمانا الشكله المدوره بتحت.....ولمن القطر قام عاينت لعبد الرازق ...نااايم نومة ....ما صحى منها تانى...........غفوت لثانيه فقط......ما عارف حصل شنو....بس لقيت الناس بتكورك....والمسطحين كلهم بيصرخوا."فكوا الباكم فكوا اللاكم....وقفوا القطر""...والقطر وقف!!1.......(القطر ده ما بوقفوا الا الشديد القوى).....قفزت أبحث عن رفيقى...ورأيت بأم عينى.بعض من معده وكثير من أحشاء على أغصان أشجار الشوك والعشر على جانبى السكه الحديد...وهناك على جسد ممدد ...لهثت لأرى مع المتفرجين.....جسد بلا رأس....!!!!!دقيقه.ده ما ياها زاتها الفلنه الكحليه ؟؟...وده ما ياهو الرده الما عندو لون حق رزقه؟؟!!!!!آآآآآآآآآآآآآآآآآآآآههههه!!!عبد الرازق...عبد الرازق وين؟؟؟؟؟؟حسيت بأمعائى وطعم السلسيؤن المر والشاى القديم وكل الأكلتو والنفسي فيهو من سنين .....حسيتو فى لساني.......وشميت ريحة اللحم المحروق والشيه التى طالما حلمنا بها معا...انا ورزقه!!!.....ورأيت بأم عينى قفصه الصدرى تتدلى منه بعض من لحيمات ......عندها أصبحت ----بكامل ارادتى------نباتيا!!!انسحبت بهدؤ وواحد من درجه اولى مادي راسو وبقول"ياخ ما أرحكاكم....حركو القطر...يعنى شنو واحد تانى من الصعاليك الفوق ديل انقرض؟؟؟يستاهلو...."!!.....
نزلينى معاك فى المحطه الجايه يا عزاز فقد سئمت السفر وأخاف أن أصل الى آخر المحطات فلا أجد الا سرابا كجثة رفيقى المهترئه ...ويكفينى ما فقدت من احلام...على السطح!!....
|
Post: #37
Title: Re: المحطة الجاية بالله ؟!
Author: عزاز شامي
Date: 11-01-2008, 05:05 PM
Parent: #1
د. احسان،
القومة ليك و شكر متأخر على ورقة كنت قد قدمتيها و رفدتني في ورقة تصب في شؤون المرأة ..
لا تموتي لا تفوتي، قولي آمين ...
Quote: اعجبني اسلوبك السلس الممتع
بس ناس الدرجه الاولي اختوهم ديل شغالين دواس وما هماه الا روحهم
بس الله يعين ناس تالته |
ناس تالتة حيبقوا أولى في يوم ما ... في زمن ما ... حتما في قطار آخر ..!!
ارفقي بي و بجنوني و اخبريني بأن (اولتنا) لم تحت بعد
مودتي،
|
Post: #38
Title: Re: المحطة الجاية بالله ؟!
Author: Khalid Saeed
Date: 11-01-2008, 06:02 PM
Parent: #37
الأخت عزاز ..
تحياتي ،
أنا شأني عجيب في القطار .. أطلقت صرختي الأولى في عربات التانية .. ففرحت روحي فأنا أخاف التسطيح منذ أن كنت علقة ، لبست جلباب أبي الذي كان يعتز جداً بمقعده الذي صنعه بعرق جبينه فوددته أن أكون مثله .. لذا كنت أخاف الخروج من محيط التانية رغم تلصصي من الحين إلى الحين إلى أصحاب الثالثة وكثيراً ماكنت أمد يدي بالماء إلى من هم بسطح عربتنا ، ذات يوم ساقني غدري إلى الدرجة الأولى عندما ضل أحد وجهائها طريقه إلى الثانية وإحتاج إلى مرافق يضئ له عتمت الممرات ، فبين يوم وليلة وجدت نفسي بين ركاب الأولى .. لايفرقون عن بقية الركاب شئ ، هل تصدقي ركاب السطح قد أوتوا الحكمة أما هؤلاء البؤساء غارقون في أوهامهم وتعاستهم لاينصتون إلى بوح الطبيعة ولا تسعدهم الأشياء ..
إنما أكثر ما أدهشي .. إشتراك جميع من في القطار في وجع الروح .. وموت البوح الصادق .. والحب النبيل .. كلهم يهيمون بلا ملال يتمنون قلباً حنوناً يلتحفون به ريثما يهبطون من هذا القطار المخيف ..
هكذا أغدارنا ... نعيهم بلا ملال .. يتلبسنا الخوف كلما أتى الكمساري وبرفقته غلاظ شداد .. لجر أحدنا قائلاً قم ياهذا فهذه محطتك ..
كوني بخير.. لقد أوتيتي سحر البيان .. ولقد هززتي بعنف نخل الحزن فيناً .. فتساقط وجعاً جنيا ..
التوقيع :
راكب مجهول الهوية .. ذو مظهر خداع يصلح لأن يكون في أي درجة من درجات القطار ..بيد أن روحه تهفو إلى أن تحشر في زمرة المسطحين ..
|
Post: #39
Title: Re: المحطة الجاية بالله ؟!
Author: عزاز شامي
Date: 11-01-2008, 06:50 PM
Parent: #1
Quote: المحطة الجاية بالله؟!
صحي مافي محطة ولا حاجة
القطر دا ماشي وما بقيف في أي محطات
دا سؤال ليك بالله ؟!
عزاز علينا إزيك |
نعوم..
ازيك ؟ لعلك طيبة؟
بالله خلاص اعلنوا خبر انو القطر ماشي بلا توقف؟
الحل يا اختي؟ انا دايرة انزل هنا كفاني !!
|
Post: #40
Title: Re: المحطة الجاية بالله ؟!
Author: عزاز شامي
Date: 11-01-2008, 06:58 PM
Parent: #1
Quote: بالله المحطة الجاية الكزيني عشان ما اسرح و المحطة تفوتني
ناس درجة اولى عندهم واحد بجي يصحيهم لمن الواحد فيهم يصل محطته, يعني شغلانته بس يجي يصحيهم عشان بكونوا نايمين في اخر نومة و
ما جايبين خبر الدنيا ما زي ناس درجة تالتة المساكين |
سناء ... الحقي انعام قالت القطر ما بيقيف!
تصدقي و تآمني بالله؟
ناس درجة تالتة دين اسعد ناس بس ما عارفين! ليهم احلام و بيناموا متوسدين امل باكر ..
ناس أولى، احلامهم بتتسمى طمع و أمل باكر مسروق من تعب التانين
موش قالوا يا بخت من بات مظلوم ولا بتش ظالم؟
انا بخير يا خية انت كيف؟ احوالك في قطر الغربة شنو؟
|
Post: #41
Title: Re: المحطة الجاية بالله ؟!
Author: عزاز شامي
Date: 11-01-2008, 07:02 PM
Parent: #1
Quote: متاابعة..
بجيك صادى يا عزاز,,
|
حبابك يا محمد في أي وقت ...
|
Post: #42
Title: Re: المحطة الجاية بالله ؟!
Author: عزاز شامي
Date: 11-01-2008, 07:18 PM
Parent: #1
Quote: عزاز ؟؟؟
حتى انتى يا بروتس ؟؟ ,,, قالها وعاد الى الحياه
عشان يحددها معاهم ... ما تدفعى دفعت ليك ! |
دندونة ...
إذا كففت عن حبك، فسأعود إلى الحالة الهيولية أو كما قال عمو عطيل
غايتو "الهيولية "العلينا دي ما بتمرق بأخوي و اخوك
يا بت انت موش كنت جاية توصليني قمتي ركبتي!!
دفعتي لي شنو؟ حق القطر؟
وحااااتك (و اتكئت على جنب و زحت كباية الشاي بعيد) القطر النصيبة ده مجاني
و الدرجات فيهو وزعوها بدري دغش قبال ما نجي
واي زول يحاول يجي بدري
يلاقي الدرجات برضو اتوزعت و الأولى .. أولى
و ناس تالتة تالتة ..
و البرزخ شايل من الحبايب ألف و اللي يحب النبي يصلي
وعليه،
صري قريشاتك تنفعنا في كباية شاي في المشوار الطويل ده ....
|
Post: #43
Title: Re: المحطة الجاية بالله ؟!
Author: khaleel
Date: 11-01-2008, 07:22 PM
Parent: #42
عزاز
شائفك ما عبرتي مداخلتي الاولي
لكن مفروض تكوني مع العشرين الرفعو المذكرة
لكن الغريبة الرفعوالمذكرة في الانقاذ كانو عشرة وديل عشرين
تكون تنزيلات في تعريفة المواصلات
|
Post: #44
Title: Re: المحطة الجاية بالله ؟!
Author: عزاز شامي
Date: 11-01-2008, 07:30 PM
Parent: #43
خليل ..
النبي تعفي لي .. كورايك درجة ثالثة ما خلتني اسمع صوتك
تسلم على المرور يا اخوي و انا قنعانة في محلتي دي ولا راجية
كشف لا قائمة ...
كلنا، بناس القائمة درجة ثالثة مكرر
|
Post: #45
Title: Re: المحطة الجاية بالله ؟!
Author: زهير عثمان حمد
Date: 11-02-2008, 06:28 PM
Parent: #44
عزار
أيتها الجميلة لك اجلالي قد تكون المحطة الجاية أبعد من كل الدنيا أن كانت فيها من تعشق وهي في الانتظار وانت تعاني وعثاء السفر وأمتداد الارض أرتعاش المشاعر وأشياء يصعب البوح بها
بالرغم أنك في الدرجة التالتة ولكن لم حسك الانساني العميق جدا ما أحلي ذكرياتنافي زحمة الدنيا
|
Post: #46
Title: Re: المحطة الجاية بالله ؟!
Author: willeim andrea
Date: 11-02-2008, 07:38 PM
Parent: #1
Man like the train
حضور ومشاركه في بوستات الدهشه ..... معزتي
|
Post: #47
Title: Re: المحطة الجاية بالله ؟!
Author: Sabri Elshareef
Date: 11-02-2008, 07:48 PM
Parent: #1
الاخت / عزاز شامي
تحياتي
وتقول الاغنية القطر الشالك انت اتكسر حته حته يا حبيبي
انا عايز اركب معاكن/م في الدرجة التالتة وهي جميلة وعتيقه بها فقراء
بلادي ومجاورتهن/م احسن جوار حيث الكرم الذي يدهشك بان من يركب
درجة تالته ويعزمك اكله درجة اولي فهذا سحر الدهشة الاولي
لوطن مصاب بقيادات اقزام لا استثني احدا
لك الامنيات واتابع الي ان ناكل فول ابو حمد او نلقاه قد كمل ونفتش في مخلاياتنا عن مربه معاها دكوه
والبسكويت يا التمرجي هو غذا الحناكيش يا التمرجي
اتابع واخليك الي ان نلتقي في محطات السفر التي ارهقتنا
والي الان لا اعرف اين المحطة والي اين السفر
|
Post: #48
Title: Re: المحطة الجاية بالله ؟!
Author: عزاز شامي
Date: 12-13-2008, 09:12 PM
Parent: #1
الأرواح الفوق ... سلام
و الجات مارة برضو سلام ..
....
القطر وصل المحطة ..
نزل بشر و شنط و كراتين و بقج .. رصاهم في الرصيف و نادى المنادي: المواصل منو؟
رفع ايدو الغشيم قال داير تاني يواصل المشوار ..
مسكوه اصحابه ... يا زول؟ جنيت؟! موش ياهو القطر الشكيت منو مر الشكوى؟؟
- آي .. بس باقي لي لسه مشاوير ما تميتها
- تمها برجلينك ... موش مشاوريك قريبة ؟
- لا ..لا .. مشاويري في بلد بعيد .... إلا بالقطر!
ورجع تاني و ركب القطر ... الوشوش اتغيرت، الاماكن تشبه البشر، تبدل ملامحها، تشيخ و ينبت في طرفها العشب لو روت ..
كراسي القطر اتغيرت .. قست اكتر ... ضاقت أكتر ..
اتلاصقت الكتوف وبقوا زي موجة عالية واقفة تستنى اشارة من القمر ..
فتش وشها بين الحضور، ياهي زاتها هناك متكية على شباك تعاين لنهر موازي القطر ...
- فلانة؟
- ايوه؟
- ما عرفتيني؟
- لا ... انت منو؟
- انا زولك ... انا (.....)
- ما بعرفك ...!
- لا... بتعرفيني بس انا الضيعت ملامحي من طول السفر ..
.....
|
Post: #49
Title: Re: المحطة الجاية بالله ؟!
Author: Ishraga Mustafa
Date: 12-13-2008, 09:34 PM
Parent: #48
| Quote: لا... بتعرفيني بس انا الضيعت ملامحي من طول السفر .. |
نفسى ارجع تانى للقطر ده
وما انزل..
اكون مشعلقه فيهو كدى ليوم الكريم ياخد وداعتو..
هو فى محطة اخيرة؟
ما اظن.... فى محطة بتتقاطع فيها المصائر
دى كل الحكاية يا صاحبتى
|
Post: #50
Title: Re: المحطة الجاية بالله ؟!
Author: ناهد بشير الطيب
Date: 12-13-2008, 09:54 PM
Parent: #1
عم احمد واخوه صلاح ومعاهم يحى ود حاجة فاطنة
كانوا جايين بالقطر من جهات (ناس طولو)بتعرفيها ياعزاز؟
دى حتة مافى فى الخريطة ماتحاولى تسألى منها
والقطر زاتو مابقيف فيها ....ولا حتى بسند عندها
المهم مسطحين تحت الشمس اتبلت هديماتهم بالعرق والتراب
واظن انه صلاح كان بيطنطن وبيتمنى انشاءالله الدرجة الرابعة ولا ختى
انشاءالله فى الممر اما عم احمد فكان يمد لسانه للسان الشمس اللاذعة
اللى كانت الوكت داك بتشرح ليه عن رهبة نهار المعرض يوم الارض
غير الارض
بجيك ومعاى شايلة كلام كتيييييير عن دميعات اجسامهم والنزلت فيها
قدر اربعين ذراعا
______________
عزاز تسلمى يااصيلة ياخ...
|
Post: #51
Title: Re: المحطة الجاية بالله ؟!
Author: محمد الباقر
Date: 12-13-2008, 10:40 PM
Parent: #1
عزاز شامي.. تحياتي
وكل عام وانتي بخير وضيوفك
| Quote: المحطة الجاية بالله ؟! |
الكلام لو بقى على نزول المحطه الجايه هين...
لكن كعب البكون نازل المحطه الجايه ولا البعدها عشان يشوف ليهو قطر تاني يركبوا
(مجبور لا ايدو لا كراعو)..
تكون عديت حياتك كلها قطارات ومطارات و سفن ولسه اجراس جديدك مادقت..
والزمن ماشي ... و جواك النزيف ماشي..
و ليل الغربه طويييييييييييييييييييييييييييييل
آآخخ من دي غربه ..
ربنا يجازي اللي كان السبب
صدقت يا كابلي.. يوم داك سمعتها..
ماعارف ليه جاني طعمها مختلف و شكلها غير..
زمان الناس .. هداوة بال..
و انت زمانك الترحال..
وتدي ربك العجب لما يوصل..
غرييب .. و الغربه اقسى نضال..
غرييب .. و الغربه سترة حال..
اريتو حالنا ينستر..
|
Post: #52
Title: Re: المحطة الجاية بالله ؟!
Author: عبد المنعم ابراهيم الحاج
Date: 12-14-2008, 04:06 AM
Parent: #51
العزيزة عزاز
كل سنة وانت بخير
والله القطر ده انا متشعلق فيهو..في سلم عربية الفرملة ..مغبر
حالي ونومي خزاز ..الديك في حبل الروح أخير ..ومامعروف
يمكن الواحد يقع قبل ما يصل محطتو..أها زي ما انتي عايزة تشوفي
السواق ..انا داير أشوف الفانوس اللحمر الفي آخر العربات ..
وشاغلني الكمساري بي آلات كوابحو وزنزاتو ..وإحساسو الرأسمالي
وضجيج البواجي الجايي من تأريخ المقدمة بي سواقها مرورا بي
كل الدرجات ..وشايف السكة وراي فراغ ووحشة ودلهمة ليالي سحيقة
إلا البركة في الفانوس اللحمر الحاسيهو وماشايفو ..
لك التحية وايامك عزاز
|
Post: #53
Title: Re: المحطة الجاية بالله ؟!
Author: عزاز شامي
Date: 12-14-2008, 07:52 AM
Parent: #1
الأحبة و الأرواح الصديقة
صباحكم باهي ...
شروق ..
Quote: هو فى محطة اخيرة؟
ما اظن.... فى محطة بتتقاطع فيها المصائر |
تتقاطع مصاير .. تتلاحم أُخر و لكل قطر أجل ولكل نفس ثمن ...
الله يبلغنا قطر السلامة يا خيّة...
|
Post: #54
Title: Re: المحطة الجاية بالله ؟!
Author: عزاز شامي
Date: 12-14-2008, 08:10 AM
Parent: #1
يا ناهد، وهي المدن الساكنانا بتحتاج خرائط؟
هي العرفة محتاجة دليل ...
ارجعي بباقي الكلام وتمي قصة الحالمين الممدين على قضبان القطر ..
بعرفهم ديل انا ..
البيتمنو القليل تقوم الدنيا تشيل قليلهم وما تديهم الحد الأدنى من التمني
و تخليهم (واقف براك و الهم عصف)
|
Post: #55
Title: Re: المحطة الجاية بالله ؟!
Author: خضر حسين خليل
Date: 12-14-2008, 08:21 AM
Parent: #1
قطرنا متين يقوم
يا بنية
متين يا عزوز؟
|
Post: #56
Title: Re: المحطة الجاية بالله ؟!
Author: عزاز شامي
Date: 12-14-2008, 12:59 PM
Parent: #1
محمد الباقر ...
وانت طيب و بخير ..
السفر دايما تعب، شن نسوي؟ جينا مسافرين و ما بين السفر سفر ...
والمحطة الأخيرة ما معروفة وين ...
ما تحصر اجراس جديدك في حتة،
عيش محطتك/قطرك/سفرك/حلك/ترحالك زي ما هو قادر الله ينبت ليك جديدك في محلتك ...
|
Post: #57
Title: Re: المحطة الجاية بالله ؟!
Author: محمد نجيب عبدا لرحيم
Date: 12-14-2008, 02:31 PM
Parent: #56
الأخت الكريمة عزاز
القطر الذي يحمل كل المعاني
الحب والذكريات والسلام والحرية
القطر والمحطة باعوها من زمان
وركبونا الهواء والوهم
وأصبحنا مسافرين بلا طريق
كل عام وانتم بخير
|
Post: #58
Title: Re: المحطة الجاية بالله ؟!
Author: walid taha
Date: 12-14-2008, 02:42 PM
Parent: #1
يومها أذكر اننى صعدت الى القطار من قلب مدينة (بومباي) قاصداً محطتى ولم أكن وقتها أدرى بأن قطارى Super Fast حت رأيت محطتى تمضي أمام ناظرى دون ان يعيرها سواق القطار أدنى إهتمام.
أن يأخذك القطار الى محطةغيرك لعمرى أمر محزن ومدهش معا.
حتى أعود الى محطتى بلغونى انه لا بد من Penalty
عزاز كل سنة وانتى طيبة،،،
|
Post: #59
Title: Re: المحطة الجاية بالله ؟!
Author: Abdlaziz Eisa
Date: 12-14-2008, 04:58 PM
Parent: #58
يا عزاز
سلام
كل عام وانتم بخير
انا دخلت وخرجت.. دخلت وخرجت
ولقيت نفسي من ناس فوق التحت..
التسطيحة أحيانا رائعة..
لك ودي..
عبدالعزيز
|
Post: #60
Title: Re: المحطة الجاية بالله ؟!
Author: زهير عثمان حمد
Date: 12-14-2008, 06:29 PM
Parent: #59
الرائعة عزاز
كل عام وانت مشرقة كشمس بلادي وسرمدية الضياء وأجمل ما فينا من أنسان وكل الاماني الجميلة بعمر مديدلك يأروع أناث بلادي
دوما ما يخطه بنانك هو الاشجان الكاسحة والذكريات التي لاتنفك توقظ أجمل الاشياء لك مني أيتها الفنانة ذات الحضور الانثوي الطاغي التبجيل
|
Post: #61
Title: Re: المحطة الجاية بالله ؟!
Author: عزاز شامي
Date: 12-14-2008, 07:39 PM
Parent: #1
منعم .. عيدك سعيد و صباحك باهي ...
عارف يا منعم، القطر مرات بيحن علينا، بيقيف بينا في محطات قاسية
مرات يجبرنا نغير وجهتنا علشان الجاي أقسى... لو لزاك كمساري من قطرو
و لقيت شنطنك و عزالك مرميات في وش الرصيف البارد ما تأسى، أمكن القطر
كان عارف مصيرو، أمكن تسمع بيهو انحرف عن مساره بمجرد نزولك منو،
أمكن يضيع طريقو، امكن محطتك كانت آخر محطاتو ...
النور الأحمر أخير من السوّاق، على الأقل بتشوفو، بيغيب عنك في الصباح، في الظهيرة،
و يرجع يونس طريقك في الامسيات،
بس السوّاق يا هو السوّاق، قايدك في صبحك و مساك ... وما بتشوفو ..
بس يا ربي في سواق و لا القطر ماشي autopilot ؟
الليلة انا على سفر، رصيت هدومي وطبقتها، و اتوجست من التغيير، وكلمتني نفسي بأن حالي كله سفر، هو السفر شنو؟
موش نقطة بداية و نقطة نهاية و انطباع؟ مايهو حالي طيب!
بسافر في الناس، بسافر في الكلام، بسافر في الأفكار ... ببتديها عزاز و بانتهي عزاز+
مهما قست الكراسي، ومهما ضاقت بي الدرجات، و حرقتني شمس،
برضو بصل محطة و معاي عفشي (+) عرفة الدنيا ...
ابقى طيب ...
و اطمنك ما بتقع قبل المحطة و بتتلقاك احضان و تشيلك كفوف محنة...
|
Post: #62
Title: Re: المحطة الجاية بالله ؟!
Author: عزاز شامي
Date: 12-14-2008, 07:53 PM
Parent: #1
خضر يا قريبي ... انت لسه في المحطة؟
"بنكسر ريح ...المحن
خلي بالك مستقيم
دغري وإن مال الزمن" *
فاتك كام قطر لغاية حسي؟ ولما ما مر بيك لسه؟
النصيحة، انسى الزمن، انساهو و ارميهو و را ضهرك و اكسر ساعتك و اجدل عقاربها و علقهم في شباك التذاكر ...
واتلو معاي:
"إحنا ما مستعجلين ..
إلا ما ب نرجى الزمن
أبقي زي ما هي القماري ...
ما بتدور عن سكن .." *
* حميد (أملى قلبك)
|
Post: #63
Title: Re: المحطة الجاية بالله ؟!
Author: مؤيد شريف
Date: 12-14-2008, 08:03 PM
Parent: #1
العزيزة عزاز
للقطار ذكريات خاصة..ففي عطبرة المولد..ومن لا يعرف القطار في عطبرة لم يزر عطبرة..وأول ذكرياتي معه في أيام الطفولة الباكرة..اخرج الي الروضة متثائبا:فكنت اكرهها وأمقت مراجيحها المتهالكة .. المدرسة الممتلئة بدنا والثقيلة روحا..وما أن أقترب منها واتذكر تفاصيلها المملة اتحول باتجاه عربات القطار القديمة بجوار حي السكة حديد..اختار واحدة اصعد اليها واقضي سحابة يومي هناك الحظ الطريق واجري بين القاطرات وانام قليلا ووو..وفي يوم اراد الله فيه ان ينكشف سري ،،نمت عميقا عميقا وكنت قد وضعت شنطة كراساتي تحت القطار..فجاءت عنزة - عافي منها دنيا واخرة-واكلت كراساتي الا قليلا.. واكتشف سري وعين لي حارسا يمسك يدي صباحا ولا يتركني الا بعد ان يتاكد من انتظامي في الصف - صف المدرسة الممتلئة- وياتي اخر اليوم ليصطحبني الي البيت...
شكرا علي نيشك لهذه الذكريات ...
سلمتي وحُفظتي
|
Post: #64
Title: Re: المحطة الجاية بالله ؟!
Author: عزاز شامي
Date: 12-15-2008, 10:32 AM
Parent: #1
الاعزاء/ات...
عثمان عبدالقادر
محسية
ASHRAF TAHA
Shiraz Abdelhai
Khalid Saeed
زهير عثمان حمد
willeim andrea
Sabri Elshareef
محمد نجيب عبدا لرحيم
walid taha
Abdlaziz Eisa
زهير عثمان حمد
مؤيد شريف
اعتذر عن تأخري في الرد لاختلاف مواعيد القطر و الارتحال ..
سأعود متى ما مد الله في الآجال
ابقوا طيبين ..
|
Post: #65
Title: Re: المحطة الجاية بالله ؟!
Author: السمؤال بدرالدين
Date: 12-15-2008, 11:07 AM
Parent: #1
عزاز
انشاء الله القطر ده مايقيف
لا محطةولا سندة
|
Post: #66
Title: Re: المحطة الجاية بالله ؟!
Author: السمؤال بدرالدين
Date: 12-15-2008, 11:07 AM
Parent: #1
للتكرار
|
Post: #67
Title: Re: المحطة الجاية بالله ؟!
Author: عزاز شامي
Date: 12-18-2008, 05:35 PM
Parent: #1
Quote: يا عزاز هذه الخواطر البريئة ذكرتني بدريدا وليفي ستراوس وميشيل فوكو
والشيخ صموئيل بيكيت. سواق القطر يعينك على ما بلاك .
للأسف تصورت أن المداخلات وتّرت هذه البراءة .
أتمنى مجالستك.
أسمحي لي أن أدعو دكين من هنا لتشريفي في منزلي وأظن الأخ صلاح بشير( شتات)
سيوصلك إلي دارنا.
شكرا.
ابوحمــــــــــــــد |
أبو أحمد،
فتحت نوافذ و أبواب باسماء المذكورين أعلاه من تقدس سرهم و سبروا أغوار النفس البشرية، له منا الشكر و الشماتة فقد ماتوا في نهاية الأمر !!!
من محاسن الصدف أو عكسها أقرأ الآن مسرحية Endgame لصمويل بيكيت و غرقت في سوداوية لجج لا أراها الله لأنسان محشور في بيت عنكبوت كحالي ... عدميتنا و خوفنا من (الخارج) و مساسقة الموت الراجينا هي أزماتنا المتجددة ... ننتصر على احداها لنعلق في الأخرى، وفي آخر الطريق نجد الموت ليطوينا في عبائته و يرحل بنا لما بددنا حياتنا نخشاه (المجهول) ... وحالنا ضعيف يرعى ضعيف، و مستضعفٌ أقوى من مستضّعِفه ...
أرجو ان يلبي دكين دعوتك و لكما الود و التحية ...ُ
|
Post: #68
Title: Re: المحطة الجاية بالله ؟!
Author: عزاز شامي
Date: 12-18-2008, 05:44 PM
Parent: #1
Quote: عزاز قريبتي ...
إبداع متأصل ...
ونحنا بدري قنعنا من القطر . ونطينا من الشباك
ولكن سبحان الله جينا في قطر كلو كماسرة ..
الكماسرة أكتر من الركاب ..
بالله واصلي السرد اللذيذ دا
تحياتي وأشواقي ..
فكدوجيكولى
إناوقا سلامني |
محسية ...
نطيتي من القدر؟! (جيت اكتبها القطر أبت و حلفت و أقسمت ما تتكتب إلا قدر!)
ما دا حال من يقفزون منه يا بنية! تجيك أهوال تقولي أخير لي قطراً عرفتو من قطراً جهلتو ... الكماسرة ديل يا بت أمي ملائكة العذاب بتوع الدنيا .. يعملوا ليك مراجعة أدوار ما سيلي ... يعني (ستشاهدون غداً) على خفيف ..
الله يهون القواسي و يسهل درب قطراً شالك وتصلي لبر الأمان .. قادر يا كريم ..
|
Post: #69
Title: Re: المحطة الجاية بالله ؟!
Author: عزاز شامي
Date: 12-18-2008, 05:48 PM
Parent: #1
أشرف طه ... شكرا على دفرة القطر، بس هو كان واقف؟؟
و أنا أقول المشاهد ياها نفس المشاهد ..!!
|
Post: #70
Title: Re: المحطة الجاية بالله ؟!
Author: Sabri Elshareef
Date: 12-18-2008, 08:03 PM
Parent: #1
سلام علي جمال الحكي والحكايه
والقطر عالم جميل وعمال السكه حديد من دريسه ومحولجيه
وركاب القطر ومحطات غير متناهية لاكمال الحكي
اقرا بس واساعد برفع البوست
يوجد حايين \ات جيدين
التحية لصاحبة البوست عزاز شامي
|
Post: #71
Title: Re: المحطة الجاية بالله ؟!
Author: عزاز شامي
Date: 12-19-2008, 11:51 AM
Parent: #1
شيراز،
صباحاتك ندية محل ما تكوني يا خيّة ...
| Quote: نزلينى معاك فى المحطه الجايه يا عزاز فقد سئمت السفر وأخاف أن أصل الى آخر المحطات فلا أجد الا سرابا كجثة رفيقى المهترئه ...ويكفينى ما فقدت من احلام...على السطح!!.... |
فترتي من السفر انت كمان؟
نزولنا من القطر ما خيارنا يا صديقة، نزولنا قدر زي ركوبنا أول مرة، قطري الركبتو ده انا كنت واقفة في باب ثالثة بأودع زول
دفروني دفر لقيتني في الممر، مالي مكان، اتلفت حولي ما ألاقي وجه بعرفه ولا وجه بيشبهني، الوجوه كلها نسخة من وجه واحد، مقسومة الملامح بالنص، ملامح انسان و الباقي مسخ ..
جريت للباب دايرة أنزل، جرّوني (البنت جنت دايرة تنتحر) و اتحرزوا علي في العربة الأخيرة و اتحبست لا ايدي لا كراعي!
احاول اقول اني ما زولة سفر، انا يا اخوانا جيت المحطة اودع زول، الريح تاخد صوتي من شباك لشباك، لا سمعوني لا نزلوني محطات كتيرة
تشبهني ..
قالت لي عجوز مكومة فوق كرسي بارد: "اخير قطر ماشي من رصيف بارد"
بارد؟؟ اخير بارد فسيح من دفء يضيق بيك يخنقك يمنعك النفس ...
هربت من العربة الأخيرة، جريت لأول القطر، لقيت أولى في شغل من الحال وشبابيكهم فوقها ستاير مرسوم فيها طبيعة غير الكنت بشوفها هناك
ما عرفوني لا عرفتهم، لا شافوني لا حسو بي .. رجعت تاني افتش عربيتي و المرأة العجوز، لقيتهم فصلوا العربية ووقفت بيهم في نص القضبان ترجي قطار جاي يبتدي مراسم الرحلة الأخيرة ...
حمدت الله على القدرة ... على الجري، على النفس،
ومشيت شابيت للسطح، لقيت شبهي، لقيت الفضا و السما الجارية فوقي...
لقيت برداً فسيح، لقيت هوا ..
اتمددت بعرض العربة، مديت رجولي لأخر مدى، مددت يديني، بقيت زي الصليب، ظهري مسنود برؤوس الناس التحت، بقيت همهم وهم ما همي
بقيت تعبهم، ذنبهم، وخزة ضميرهم كان حي،
و اتحررت انا من كل التعب، من الجري، من النطيط من شباك لشباك اتابع غزال جاري
حسي كل المشاهد ملكي،
الفات مني بشوفو لو اتلفت شمال
و الجاي بشوفوا لو اتلفت يمين ..
ما خافي علي شي،
احمد الله على التسطيح،
احمد الله على الفضا الكنت دايرة افرط فيهو علشان زيف ..!!
|
Post: #72
Title: Re: المحطة الجاية بالله ؟!
Author: osman righeem
Date: 12-19-2008, 07:00 PM
Parent: #1
سواق القطر
انا
محسود علي الكرسي الامامي
و الامه دي كلها ذمتي
كل يوم تتكرر نفس الحكاية
كانت متعه وصارت مهنة
هم الركاب
ناس النوم وناس الاولي
زواده زياده عاملين حساب السواق
والكمساري و المفتش مقطوع الطاري
والغبش اللي وراهم
الباع الهم و اشتري همين
وحق التزكره بالدين
وناس أورنيك ميتين
يتمني القطر ما يقيف
ناس الرابعه النايمين بالفتره
وكل واحد اتوسد كراع التاني
والزير الناشف
والكنب الناشف
والعيش الناشف
والكيس الفاضي
والباع الدحشه وقطع التزكره
ماشي يدور علي الماهية
يحلم تحت الزير
والماشي الجامعة
رافع الشنطه ما تتكرفس الجلابيه
عايز يخلط وعايز يطرح لي بنوت الداخليه
حكالو محمد بنات الجامعه
و كلوا يهون بس نوصل للداخلية
و الحاجه زخام ماشي القاضي
دايري النفقه بالزبطيه
عرس فوقه
الراجل الدون لا قدر عشره و لا هميه
و السواق
و السواق
عايز يوصل
عشان يرجع
وتاني يقبل صاد
ينعل ابو الماهيه
...................
عزاز
كل العام وانت بخير
معليش ما لقيت محل في القطر
قلت اركب شمال السواق
|
Post: #73
Title: Re: المحطة الجاية بالله ؟!
Author: osman righeem
Date: 12-19-2008, 07:01 PM
Parent: #1
سواق القطر
انا
محسود علي الكرسي الامامي
و الامه دي كلها ذمتي
كل يوم تتكرر نفس الحكاية
كانت متعه وصارت مهنة
هم الركاب
ناس النوم وناس الاولي
زواده زياده عاملين حساب السواق
والكمساري و المفتش مقطوع الطاري
والغبش اللي وراهم
الباع الهم و اشتري همين
وحق التزكره بالدين
وناس أورنيك ميتين
يتمني القطر ما يقيف
ناس الرابعه النايمين بالفتره
وكل واحد اتوسد كراع التاني
والزير الناشف
والكنب الناشف
والعيش الناشف
والكيس الفاضي
والباع الدحشه وقطع التزكره
ماشي يدور علي الماهية
يحلم تحت الزير
والماشي الجامعة
رافع الشنطه ما تتكرفس الجلابيه
عايز يخلط وعايز يطرح لي بنوت الداخليه
حكالو محمد بنات الجامعه
و كلوا يهون بس نوصل للداخلية
و الحاجه زخام ماشي القاضي
دايري النفقه بالزبطيه
عرس فوقه
الراجل الدون لا قدر عشره و لا هميه
و السواق
و السواق
عايز يوصل
عشان يرجع
وتاني يقبل صاد
ينعل ابو الماهيه
...................
عزاز
كل العام وانت بخير
معليش ما لقيت محل في القطر
قلت اركب شمال السواق
|
Post: #74
Title: Re: المحطة الجاية بالله ؟!
Author: عزاز شامي
Date: 12-21-2008, 06:55 PM
Parent: #1
خالد سعيد سلامات و اعتذارات كتار لك و لكل من مروا هنا و عجزت عن اللحوق بركب مودتهم،
| Quote: هل تصدقي ركاب السطح قد أوتوا الحكمة أما هؤلاء البؤساء غارقون في أوهامهم وتعاستهم لاينصتون إلى بوح الطبيعة ولا تسعدهم الأشياء .. |
أصدق ... أصدق ..
لاننا جزء من الطبيعة يا سيدي، توشوشنا بما خفي علينا وفي حناياها تُعاد سيرتنا لو انعمنا النظر ...
|
Post: #75
Title: Re: المحطة الجاية بالله ؟!
Author: عزاز شامي
Date: 12-21-2008, 06:59 PM
Parent: #1
زهير عثمان،
انا بنت تالتة، ولتالتة أحن و أعود برغم بهرجة الأولى، وغاية المنى اكون فوق، في السطح محل ترك الطيور و تصافحني الشمس و يغسلني شعاع القمر في منتصف الشهر ...
كن بخير،
|
Post: #76
Title: Re: المحطة الجاية بالله ؟!
Author: عزاز شامي
Date: 12-21-2008, 07:53 PM
Parent: #1
................
صحيت بدري، صحتني هزهزة القطر، أبواب درجة أولى (نوم) تفتح بالتبادل، موية باردة تجيني من الشبابيك،
رؤوس صغيرة تتاوق من الابواب، تسأل أهلها ليه انا نايمة (بره)؟ بره وين؟ ما البره ده هو (الجوه) لي، البره لي (بره) القطر ...
محل الكلاب و العشر، محل الضبع اللي اكل البنية و خلى ضفايرها محشورة بين الحجر ..
ريحة الأرض تحتي رطبة، الكرتونة أبرد من الأرض، جاني (...) جاري من بعيد نط فوقي و اتعداني و جاني راجع ...
- قومي ... قومي.. عربية البوليس عاملين فطور ... الحقي الحقي العيش حار اشتروهو من بربر ...
امسح نعاس ليل طويل بارد في كم قميص وسخ دافي، ما عارفة ياتو النضف التاني ...
- فطور؟ يا حليل ايام الفطور يا صاحب ..!! يا حليل صباحات الكانون و ريحة الحليب يفور يطفي الجمر،
تجي الحجة تنهر الكديسة بلا سبب " انت يا كديس الجن! ما تدفقي اللبن!" تجري الكديسة ضنبها بين رجليها تعاين لينا بحقد و حسد ...
بقينا انحنا الكدايس يا صاحب .. حسي نمشي ينهرونا نجر ضنبنا في الأرض لانو الحيل واقع و الرجلين أكلها التعب ...
رفعت راسي لقيتو مافي ... مشى يلحق فطور البوليس،
فجأة وقف القطر، الناس تكورك، ادى سندة .. اتنين، جرو الجرس ...
- في شنو؟
الشبابيك نبتت فيها رؤوس، و البيبان ادلت منها الرجلين و اليدين زي وحش قصة بمن عمي دهب ..
- الجنى و قع!
- لا ما وقع!
- يا زول اهو داك ليهو راسو مجدوع ...
.....
ادمدمت في الكرتونة، دفنت وشي في أرض القطر، في بطن الوحش الشايل جمر، بصري خرم الأرض،
مشى لآخر القطر، شافو مجدوع (بره) القضبان، دمو جاري يروي التراب ..
.سألتو عيوني:
- ليه يا صاحب؟ ليه تقسى على دمك، ليه تفارق نفسك علشان رغيف حار؟
ردت على حلاوة روح اتحررت من الجسد وقالت لي:
- أموت علشان رغيف ولا أموت شبعان ما عرفت طعم الأمل؟
عمرنا كلو خايفين من (بره) يا ستي، تعالي الحقيني، اديني ايدك، ما علشان رغيف، علشان بس (تكوني)،
ارمي هدومك، ارمي جلدك، ارمي نبضك و الحقيني ... هنا دفا، هنا هوا، هنا (جوه) رحم الكون ...
....
و مشيت معاه ... رميت حملي، و قفلت وراي الباب، تكلتو، بالجبال، بالغيم ، و سديتو بالبحر،
ما دايرة ارجع تاني هناك، محل الجوع، البرد، و القهر، انا مكاني هنا، محل ما كنت، محل ما اتكتب في اللوح،
عند (أمي) في رحم كونها الدافي ...
.....
....
|
Post: #77
Title: Re: المحطة الجاية بالله ؟!
Author: بدر الدين الأمير
Date: 12-21-2008, 08:32 PM
Parent: #76
Quote: و تصافحني الشمس و يغسلني شعاع القمر في منتصف الشهر ...
|
عزاز لك الإعزاز
ذلك المقطع اعادنى لاغنية مصطفانا وكلمات شاعرنا ابوذكرى الذى رحل (منتحرا)
التى تقول كلماتها:
ايها الراحل في الليل وحيدا
ضائعا منفردا
امس زارتني بواكير الخريف
غسلتني بالثلوج
وباشراق المروج
ايها الراحل في الليل وحيدا
ضائعا منفردا
حين زارتني بواكير الخريف
كان صيفي جامدا
وجبيني باردا
وسكوتي رابضا
خلف البيوت الخشبيه
مخفيا حيرته في الشجر
وغروب الانهر
وانحسار البصر
لوحت لي ساعة
حين انصرفنا
ثم عادت لي بواكير الخريف
حين عادت وثب الريح علي
اشرعتي المنفعله
سطعت شمس الفراديس
علي اروقتي المنعزله
ومضت تحضنني الشمس النديه
التي ماحضنتني في الزمان الاول
في الزمان الغائب المرتحل
ايها الراحل في الليل وحيدا
ضائعا منفردا
انتظرني فانا ارحل
في الليل وحيد
موغلا منفردا
في الدهاليز القصيات انتظرني
في العتامير
وفي البحر انتظرني
انتظرني في حفيف الاجنحه
وسماوات الطيور النازحه
حين تنهد المدارات
وتسود سماء البارحه
انتظرني انتظرني
تنهدا: كماقال الخيام:
غدا بظهر الغيب واليوم لى
وكم يخيب الظن في المقبل)
ودوماالمحطات الجاية ظنون
مقبلة او مقبلين عليها وفي تقديرى
أن الاصل في أكثر الظنون هو الخطأ
بعتبار (إن بعض الظن اثم)
|
Post: #78
Title: Re: المحطة الجاية بالله ؟!
Author: عبدالغني كرم الله
Date: 12-22-2008, 05:42 AM
Parent: #77
عزاز..
حقا.. ما أعجب قطارك..
أدخلتنا "القابلة"، وسرب من معطيات، في عربة من عربات القطار..
وأنزلنا حفار القبور (وفي بلدي حفاري القبور)، في محطة من المحطات..
وفي كلا الحالتين، بلا حول ولا قوة.. للركاب الذي ركب، والذي نزل..
ومضى القطار، بعد أن أنزله، وكأن شئ لم يكن..
عميق طربي، لخواطرك/ سردك، تأملاتك، وجنونك، وعشقك، وبوحك، وأنينك، معا..
صباح/مساء/ظهيرة سعيدة..
..
|
Post: #79
Title: Re: المحطة الجاية بالله ؟!
Author: ALZOLZATOO
Date: 12-22-2008, 07:34 AM
Parent: #1
ياعزاز ،
انا حالتي كنت عشمان في تسطيحه بس لمن القطر فاتني اتمنيت بس اخت رجلي في القطر ده
لكن احمد الله البني ادم مابيعرف مصلحتو وين وبعد ماعرفت الحصل لي قطركم شنو حمدالله انو عدى فات
وقطر عجيب يودي مايجيب
والقطر الشالك ا نت يتكسر حته حته
تحياتي
زاتوووو
|
Post: #80
Title: Re: المحطة الجاية بالله ؟!
Author: محسية
Date: 12-22-2008, 07:55 AM
Parent: #1
Quote: محسية ...
نطيتي من القدر؟! (جيت اكتبها القطر أبت و حلفت و أقسمت ما تتكتب إلا قدر!)
ما دا حال من يقفزون منه يا بنية! تجيك أهوال تقولي أخير لي قطراً عرفتو من قطراً جهلتو ... الكماسرة ديل يا بت أمي ملائكة العذاب بتوع الدنيا .. يعملوا ليك مراجعة أدوار ما سيلي ... يعني (ستشاهدون غداً) على خفيف ..
الله يهون القواسي و يسهل درب قطراً شالك وتصلي لبر الأمان .. قادر يا كريم .. |
العزيزة جدا عزاز (قريبتي)
.
.
سبحان الله بعد (النطة) ما لقيت الأرض . ومن اليوم إياه وأنا أدور في فضاء لا مستقر له فلا علمنا لاقدامنا موطئ ولا لهامتنا وطن .
.
.
ونظل (نتاوق) على الأبواب المشرعة .. علنا نجد رغيفا يسكت (الجوع) الكافر.
والقدر ياهو القدر ... مستسلمين ومؤمنين بحكم الله .
ومالي أرى الملائكة في زماننا غير الملائكة الذين نعرفهم .
.
.
.
أخشي أن يطول بكم السفر ..
فلا وصلتم ولا وصل القطار ..
.
.
قادر ياكريم .
أي حاجة ولا السفر يا عزاز .
تراجيديا مجسدة بقلم مبدعة .
واصلي الرحلة .
فالنهايات البعيدة لاتحد
ماليكا سلامجي . أوكاقجكوقا
|
Post: #81
Title: Re: المحطة الجاية بالله ؟!
Author: Zomrawi Alweli
Date: 12-22-2008, 11:22 AM
Parent: #80
ابداع يا بنت ملوك النيل يا عزاز
انتي في مهبط الالهام الفكري محروسة بالفن من كل جانب
ارض انبتت الخليل في صاي ووردي في صواردة ومكي في عبري وايضا العبقري هشام آدم
وهنا تؤانسك المحسية الجميلة فحتما انتي مبدعة.
فواصلي بعد ان تسمعي مني....
قطار الشوق متين ترحل تودينا........
دلفت القطار وانا بين خائف من هذا المارد وبين مبتهج لاني سأرى الخرتوم
زملائي الطلبة المحظوظين بزيارة الخرتوم مرات ومرات بداعي زيارة اسرهم التي سكنت الكلاكلات يراوغون الكمساري ويتشعلقون ويسطحون وممنوع من الكمساري ملاحقة المسطحين.
في سطح القطار عالم آخر منهم من يرفع عقيرته ويحاكي فناناَ دون اجازة صوته وآخر يرمي نكات لا يفهمها الا اهل الخرتوم فنحن قرويون يا عزاز.
ولانني بريليم في ركوب القطار ناهيك عن التسطيح كانت رحلتي الاولى شاقة ومخيقة، القطار متجه لقبلي من كريمة احيانا يأتي الدخان عسكس اتجاه الريح من الجنوب للسمال في ليل سكونه هاديء ومقمر فيظللنا الدخان من ضوء القمر احياناً...
عند وصول القطار الى عطبرة نكتشف اننا وصلنا الى مدينة اجمل من كريمة التي كنا نحسبها مدينة...
العزيزة عزاز واصلي الله معاكي،،
واصلي نحن وراكي,, واصلي يحميك إله العالمين...
|
Post: #82
Title: Re: المحطة الجاية بالله ؟!
Author: showgi idriss
Date: 12-22-2008, 05:30 PM
Parent: #1
كنت مفتكر سواق القطر هو سيد القطر زاتو
ثم عرفت إنو ممكن ينوم زيو وزي اي زول
وكلما اركب تالتة كنت اندهش من سرعة السواق
وكنت بخاف لو نام بينا بحصل شنو
ممكن القطر يمشي بينا لمداين تانية
لما يشمل كنت اقول بنمشي ام الدنيا
ولما يجنب كنت احلم بغابات الأبنوس والبنيات الطوال
انشاء الله كوستي
لكن ولا مرا سيد القطر ما نام
القطر ديما ماشي
وديما واقف
حتى في السند مرات لو عندك واسطة بقيف تنزل عفشك
لو شاحن
حصل ركبتى فرملة
ولا عربية البوستة
ولا دقيتي حنك في السنطور
ولا اكلتي مشاوي
او عصيدة تمر هندي
ولا طعمية سندي
اكتشفت في الآخر إنو سيد القطر
الكمساري بجيوبو الكتيرة
لأنو شايل خرامة
والناس تدسدس منو
وقي لمرات تسطح
هو البحدد بتنزل وين
شوفتى كيف؟؟
|
Post: #83
Title: Re: المحطة الجاية بالله ؟!
Author: عزاز شامي
Date: 12-24-2008, 07:48 PM
Parent: #1
وليام اندريا،
جميعنا نمرر بمحطات "الرجل" فالانسان هو الانسان ...كلا وجهي العملة مسافر برغم تصنيفات القطر ...
كل الود،
|
Post: #84
Title: Re: المحطة الجاية بالله ؟!
Author: osman righeem
Date: 12-30-2008, 04:51 PM
Parent: #1
++
|
Post: #85
Title: Re: المحطة الجاية بالله ؟!
Author: Omayma Alfargony
Date: 01-02-2009, 07:47 AM
Parent: #84
العام 2009
المحطة الأخيرة,,,انها علي قاب قوسين أو أدني,,,
سواق القطر زائغ العينين,,,
ركاب الدرجة الأولي في هرج ومرج يحلفون أغلظ الايمان,,,لن تكون نهاية ولو حتي فوق جثث آخر طفل قطاري,,,!!!!!!!!!!!!!!!.
الثانية,,,متنازعة بين الطمع في الأولي,,,
-فربما تصمدعند سدة القطر_,,, والقفز قبل المنزلق,,,!!!!
أما الثالثة والاخيرة فهي تسبح المولي وتدعوه,,,
أن تصان الزروع,,,
وتمتلئ الضروع,,,
وتتساوي الدرجات,,,
وتتعشي البايتات,,,
ويكفي الله المؤمنين شر القتال,,,
ـــــــــــــــــــــــــــــــــــــــــــــــــ
عزاز,,,
السنة الجديدة جات وانت ماجيتي,,,!!!!
انت وين؟
في ياتو محطة؟
كل سنة وانت بخير وصحة وسلام اينما حللت,,,
محبتي
|
|