سيب رسالة ... انا زهجانه!

كم احسد الانسر ماشين!
تخيلوا لو ممكن نعمل لينا انسر مشين يكون شغال لما نكون زهجانيين والقرفة هي الراعي الرسمي لامسياتنا!
لما تقابل زول ومزاجك متعكر زي موية الضميرة تدوس زرارة وصوتك يلعلع بضحكة غبية ما مفهومة وتقول : (أهلا! انا ما موجودة حسي.. سيب اسمك وتلفونك وبرجع ليك قريب!) طبعا انت لا بترجع ولا بتسمع الرسالة من اصلوا ... بس حنك منك وعشان تقدر تلوم الناس اللي ما بيتصلوا بيك وتقول ليهم: ما اتصلت! كنت سبت رسالة!؟
ايييه .... تقعد متحكر في الصالون ويدك مكنكشة في الريموت كنترول وهات يا تغير قنوات بسرعة الضو .. تقول ساكيك زول او الريموت حيشرد منك ... تدي شرف النقنقة لقناة one وتحشر روحك في الكنبة وتابع مسلسل الاصدقاء friends تتغبن لما تكتشف انو صداقاتك كانت كرتون وانت و اصحابك يا دوووووب تلحقوا تلي تبيز وفاتكم كثير ...
اكد حغير القناة ... ووش بت سممممحة منور الشاشة ... وبتحب ليها زول وهو بيحبها وماشين في شارع سمح والناس اللي في الشارع سمحين والسماحة منداحة وما في زول شين غيري انا وفتوحي ولد اختى!!! تقلب على الجزيرة طوالي او العربية ...برضو بنات سمحات وبتفهم!!! غشوانا ساي انو السمحات غبيانات وخلونا نبرطع ونتشدق بأنو (السمحة الاخلاق) وحسي قنوات السجم جابت لينا سماحة عقل !! نطير وين؟؟؟ مرقنا من كلوا يا ود امي...
امشي قناة السودان، ملجئي وملاذي لما السماحة تكتر علي و اعاين عمري واتحسر .. ويا قلبي اتصبر!!!
يا سلام على القناة!!! وشوش غبشانه والوان بهتانه! انا بجامتي وشوشتي اسمح من اسمح وحدة فيهن!! ودعايات تخليك تصرف نظر عن المنتج وتحس بانو انت محظوظ انك ما اشتريته!!!

عموما ... انا حسي مافي ..

ماشة اسرح شعري وجاية ...

بجيكم صادة بعد حين ومين

عزاز بنت عمي
في الانتظار
واصلي
عافيلقو سلاملقو

عزاز

Quote: تخيلوا لو ممكن نعمل لينا انسر مشين يكون شغال لما نكون زهجانيين والقرفة هي الراعي الرسمي لامسياتنا!

دة البيحصل معاى تماما.
مرات الواحد بيزهج يتكلم كلمة واحدة و متضايق من روحو.
الأنسرماشين أحسن علاج لتلافي الكلام المسيخ وقت الزهج لي زول ما عاوزة تتماسخي معاهو.
واصلي

الجد ابو جهينا عندنا؟ يا مرحبا يا مرحبا

معقولة انت كمان بتجيك حالات مساخة؟ انا قلت الحالات دي حكر على الشينين اللي زينا...

الواحد بيبقى قضيييييم ولئيييييم والكلام مسيخ مسيخ تقول متسوك بطين! العجب كان جاك زول امسخ منك ومسخ عليك الدنيا، تعمل شنو؟ طوالي تديهو (مساخة مضادة) وتطمم ليهو بطنو وتخليهو ينقطع يطير (على وزن منقطع النظير)...

الله لا يمسخ لينا دنيا لا يمسخ لينا كلام ...
اللهم لا تجعلنا من المسيخين اللي بيمسخوا
اللهم لا تسلط علينا المسيخين
اللهم حلي ايامنا بسكر الفواكه والـ equal (عشان الرجيم) وبالتمر والعجوة لو نقصت المؤنة ونشف الحال ..

آمين آمين

آالو !
اخوي حمزاوي هكر في؟ لقيت منك اتصال فرحني شديد ... تعال راجع!

الاخت عزاز
سلام.
والله انا ما قايل الناس المبدعين زيك كدة بزهجوا لدرجة ما يدوروا الناس.انا قايل لما الزهج يجيك نطلع منه بخاطرة او قصة او حاجة جميلة ومعبرة.
ان شاء الله ربنا يسلمك ويسلم الجميع من حالات القرف والزهج التى تضر بمسيرة الحياة ولا بأس من حلات زهجن تعيد صياغة الحياة الى الاجمل وتجبرنا على اصلاح المسار.
ولك الود
والف باقة ورد

اخوي المعتمد...

اهلا بيك في جهاز الانسر مشين بتاعنا المتواضع ...
جر ليك سلك واتفضل، البيت بيتك ...

مين اللي مبدع يا راجل! كدي قول بسم الله !
الشناة، الشعر المكنكش، الكدايس بالاضافة للغربة، والاقامة الخضرا ، ناهيك عن الحالة 13 موستحيل تجيب ليها ابداع إلا كان ابداع الخالق في الملامح الما مفهومة في ساعات التجلي...

اشكر لك دعواتك الصادقة، انشاء تكون ساعة استجابة، والكدايس اللي في راسي دي تدق تأشيرة نهائي وتشتت شمالا نحو الشمال (اكيد نحو الشمال لاكين تقول شنو؟)

اهديك الفين باقة ورد هولندية والفين عقد فل وياسمين توزعهم بالصلاة على النبي على حبانك وحبانهم ...
تسلم على المرور ...

عزاز كيفك
لديك رسالة هامة ... ارجو مراجعة الانسر مشين فوراً

أخوي عاكف ...
سلامات وفوقهم سلامات...
ازيك؟ رأيت فيما يرى النائم قنديل الانسر مشين بيرف قلت نشوف منو اللي بيخبط ... لقيت جنابك على اعتاب بوستنا المتواضع ...
يا مرحبا ..
شد ليك سلك واعتبر البيت بيتك ...

والله الانسر مشين ده لم الاخوان، حقو يعتمدوه في القمم العربية السنة الجاية!!!

الرسالة فحواها شنو يا ربي؟؟؟؟

بينما انا منهمكة أخضب شعري بدهن الكركار واسرح مسايري لمع في رأسي أو لمع على رأسي سوعال: ما هي العلاقة بين الكديس والكآبة؟

الاتنين بيبتدوا بحرف (ك) ؟ لا
طيب، يمكن علشان الكديس بيخربش والكآبة بتخربش؟ برضه تاني لا.....
لانو شعرنا بيقيف زي ضنب الكديس واحنا زهجانيين؟ قطع شك لا !!!

وهنا ولد سؤال من رحم (انو ما لقينا اجابة) اهن، السبب شنو؟

في المرات القليلة المعدوة بعدد حبات الرمل التي اصبت فيها بالكآبة تصم آذاني دائما مواء قطة من النوع اللي بينونو من نخرته داك ويعقد بيتفاصح في الكدايس اللي في راسي وهاتك يا موو موو نيييييييع نيييييع !! بقوم انا اقوص ظهري وببقى شبه كديسة جارتنا ام الضو ( على فكرة ولدها لا ضو ولا حاجة! ولدها ضلمة عديل لاكن تقول شنو في الناس اللي بتغالط الحقايق؟)

عموما ...
حاول تجاوب و أدخل معنا في السحب على كديسة رومية شعرها بيهفهف في الهواء وبتشرب الموية من غير صوت...وتاكل اكل نضيف وعندها باسبورت بدمغة، وبتزور الدكتور اكثر مني!! اللهم لا حسد !
وسائل المساعدة:
الاتصال بكديس
ادارج اجابتين ...


مولاحظة:
الكدايس (الجربانة والنظيفة) والمكتئبين و عوائلهم واللي بيصاحبهم لا تحق لهم المشاركة ...

الأستاذة / عزاز
واضح إنو القرفة دي يتاورك بين الفينة والفينة!!! ودا شي طبيعي جداً. قالوا المابيقرف ما بيفرح!!! لكن أقيفي أسألك لو اكتفيتي بخاصية كشف رقم المتصل مش أفضل من الآنصرينق ماشين؟؟ أنا شخصياً بفضل أرد علي كل المتصلين لمان أكون زهجان وقرفان. أكيد حتلاقي واحد منهم يفك ليك الخمسمائة بتاعة القرفة!!! أما في حالتك الآنصريينق ماشين حتضطرك تسمعي المكالمات المسجلة بعد ما تخف القرفة!! بس حاسبي ما يطلع ليك واحد صوتو يسبب ليك قرفة سرطانية تزمن معاك!! مش أحسن ليك تردي على الناس والما بعجبك تقولي ليه أنك مشغولة بكتابة مقال عاجل أو عندك بصلة في النار وإنك حترجعي تكلميه وبعدين تكبي الزوغة والطناش على الرغم من أن الكذب خيبة!! بس الأعذار على أفا من يشيل!!!
بس المحيرني يا عزاز قرفتك دي نقول من شنو؟؟؟ ما اعتقد أن القنوات الفضائية غير السودانية وما يبث فيها من وجوه ما بقدر أسميها سمحة، ممكن تكون نضيفة، هي سبب هبوط المورال!! زمان كنا بنسمع بفلانة الزهجانة من عدم العرس!! لكن دي ما أظنها مشكلة كبيرة وأنت قطعت شوط بعيد كان ما تكونوا كتبتم الكتاب وما عزمتمونا!!!
صدقي يا عزاز أنا عكسك تماماً ما بحب أرد على الهاتف عندما يفاجئني الفرح أو عندما اختلس منه لحظات!! على الأقل ما أصادف واحد يفسد علي هذه اللحظات المسروقة النادرة!!!
بس القناة السودانية ما أظنها حل دي حتفاقم ليك العيا ولو حصل ولو ودوا الواحد ماي كلينك ما بتصلح!!!
بطلي القرف وتفاءلي شوية ولك أسوة في قولة المفكر الإيطالي جرامشي الشهيرة التي تقول Pessimism of the intellect optimism of the will تشاؤم الفكر وتفاؤل الإرادة
شكراًً

خالد فضل

الاستاذ خالد فضل ...
سلامات ندية ...
الحكمة اللي بالانجليزي غلبتني كلو كلو افهمها خليك من اني اقراها .. عموما معاك حق، للضمان يعني !!

اشكرك انو انت نبهتني انو انا مفروض اكون اتخطيت هاجس البورة ومفروض ما اكون مرتع خصب للكدايس ... بس تصدق بايه ؟ البورة واحشاني وعازي علي فراقها! ده احنا عشرة عمر يا راجل والعشرة ما تهون إلا على اولاد الحرام!
سألتني ليه انسر مشين؟؟؟ علشان دايره صوتي يكون بنفس النبرة من غير ما تشوبه شائبة كديسية !! انا بعيد عنك شفااااااافة زي ورق كيس الدكان! زي شبك النملية الجديدة... رقراقة زي السفن اب .... انفعالاتي بتظهر في صوتي في عيوني في نكشة شعري! يعني المتصل حتجيهو صدمة عاطفية لو سمع صوتي! فحافظا على الصورة العامة والبرستيج تقوم تعمل ليك رد آلي بصوت ملعلع وابتسامة شليقة وخفة ورشاقة والبت عاملها فيها اشراقة !
وتكون مرحلة الكدايس حك عليك انت بس والناس اللي رماهم البخت وكانو مقربين منك!

عكسك انا تماما عندما يزورنا النبي واكون فرحانه!!! واي ! ممكن ارد على تليفون الجيران واشيل السماعة لو رن التليفون في المسلسل ولو لاقاني زول في السوق تليفونه بيرن ممكن ادخل ايدي في جيبه ارد !!!
وبكل لطافة وظرافه : آلووووو !!! تقول برنامج على الهوا .... وبتتفتح نفسي على الكلام وممكن اشد سلك الونسة 15 يوم بلا انقطاع!
عموما الحالة دي حصلت مرتين في الماضي واخدت الاحتياطات اللازمة انو ما تحصل تاني وافرح قدر ده !
ده حتى اسمه بطر!!!

و تسلم على الطلة ...

كديستكم ما شبه كديستنا وكديستنا بتشبه كديسة كديستم....

صباح الخير ونحيكم من بلد الكدايس ...

نبدء الارسال ....

صباح الخير ياعزاز وربنا يهدي الكدايس

إنتي في بورتسودان ولا شنو؟؟ بلد الكدايس دي رمز أم دلالة على حاجة تانية؟؟؟ ياخي الكدايس أنا بكش منها عديل!! رباب بنتي (أصغر وليداتي) بتحب تربي الكدايس لدرجة أنها أقنعت كل أفراد الأسرة والجيران يهتموا بدميتها الحية والسؤال الأول دائماً عن كديستك كيف يارباب؟؟؟
إنشاء كديستكم تشبه روحها!!!
على أي حال ياعزاز أنا بمشي ليك حكاية التواضع بتاعك دا واعتذر عن اقتباس مقولة جرامشي باللغة الإنجليزية عشان الترجمة العربية ممكن تخل بالمعنى!! بس القصد بسيط جداً وما ظنيتو يفوت عليك وأنت صحفية بهذه القامة!ّ! يعني لو نحن كنا جادين في إصلاح الحال وأخذنا خطوات عملية لتحقيق ذلك سنطرد الكآبة إذ سيصبح الأمل كبير في الوصول إلى دنيا تسعنا جميعاً ومعانا الكدايس الزرق كمان!! أما إذا استوعبنا التفكير والتساؤل والتزمر دون أن نفعل شيئاً فمصيرناالتشاؤم والتنشنة!! حكاية الكآبة والدبرسة والزهج ذكرتني واحدة زميلتنا كانت كل يوم تقول ليك (الليلة أنا قايمة علي الشناه) وهي أصلها شينة خلقة!! بس عايزة تقول أنها في بعض الأيام بتكون ملهلبة بس عمرنا ما شفنا يوم من الأيام التي تتكلم عنها!! بس معنوياتها دائماً عالية ونجحت في اقناع الناس بالأمر الواقع والتعايش مع شناتها!!
لما يدخل الهاتف المرئي ممكن مشكلة الناس الزهجانة وتففها منكوشة وما طايقها تبص في المراية!! ألو التلفون يرن يقوم يبص على الشاشة وبعداك يتصرف حسب الصورة التي تظهر له!! إن كان بعاتي أو بعاتية يخلي الأنصرنق تقوم بالباقي أما إذا كان الصورة (حرف) يشاور عقلو ويتخذ القرار الصائب!! وطابت أزمانك وعمت صباحاً

خالد

لاستاذ الفاضل خالد ،،،
صباحات ورد وخالية من الكدايس والتعكير ... كنت بهزر معاك بخصوص المقولة، انا باكل عيشي من ترجمة الرطانة حقتهم للعربي وبالعكس!

رباب بنوتك، الله يحميها ليك، ذكرتني طفولتي لما اتقمصت شخصية ام لثلاث عرايس باربي! أي زول يزورنا وما يسألني منهم بشنفه وبشيل حسه باللوم والعتب!

صدقني يا اخوي انا متفائلة ومتشالقة ومعنوياتي هديد، زي ما بيقولوا اهلي المحس... بس تقول شنو؟ الحياة كبيرة صحيح ولامة الكل... لا احب التوقف كثيرا في محطات الحزن لان لو فعلت رجولي حتتعمس ويغلبني المشي تاني!

انت عارف انو الموضوع وما فيه انو تقنع نفسك بأنك سعيد حتى وانت ما سعيد! لي صديقة مصابة بسرطان المعدة وانتشر للرئة والغدد اللمفاوية .... في كل مرة ازورها ونضحك ملئ صدورنا بتعليقاتها على الادوية و تساقط شعرها وخطرفاتها في نوبات الألم ... تذكرنا كم هي محظوظة انها ولدت في عصر التخدير والمورفين والمكيف وان حياتها كانت ستكون اكثر إيلاما من غير هذه المخترعات!!!
كل مرة اخرج من عندها اعنف نفسي على جحود النعم و أولها الصحة! وبسأل نفسي: ما بخجل اقول عندي قرفة؟

دمت طيب وحياتك مليانة أمل وتفاؤل وندى وهدى وامينة وفاطمة ...

الأستاذة/ عزاز
طابت أزمانك بكل الفرح والتفاؤل
لزوم الشرح دا شنو ؟؟ الحكاية كلها دردشة في دردشة!!! هو بالله زول مدبرس زي البتتخيليه إنتي في بوستاتك الظريفة دي بقدر يكتب كلام زي دا كله خيال وإبداع خلاق!!
في الحقيقة أول مرة أعرف إنك تحفظين جسدك وروحك معاً بامتهان عمل الترجمة هذا المهنة التعيسة التي كانت قدري منذ باكورة عمري!! ألله يعينك عليها!! هي جميلة لو انحصرت في المجالات التي تهويها وتحبيها مش ترجمة موضوعات جافة!!
الأستاذة عزاز هل تصدقي إنو أنا ما شككت ولو للحظة أن القرف والكآبة التي تتحدثين عنهما يخصانك أنتي شخصياً!! بل أنها قفشات خفيفة الظل تنم عن شخصية ساخرة مبدعة واسعة وخصبة الخيال.
لكن بيني وبينك القرف حاصل !!! بعدين تعالي الناس الباقيين ديل ما عندهم مشكلة مع القرف ؟؟؟ يعني أنا وانت راس ضاربين الديش!!
متعك الله بالصحة والعافية والعفوية بت الرضي ود مهلة!!!

عزاز .. صاحبتي الزمان.. والله ساءلة عنك سؤال شديد وافتقدت بوستك الظريف داك مع اخونا عمر الفاروق..
طبعا ضحكته معاك من بديتي.. واكتشفتي غشونا كيف بي قصة انه السماحه دليل غباء.. وحاتك انا شخصياً طلعت من المولد كله بلا حمّص ولا زيت زاتو... بس امسكي قوي في (السمحة الاخلاق).. وحرري سوقك



عليك الله ادينا طله هنا.. وورينا رأيك.. متأكده عندك بهارات جميلة تضيفيها.. ما تقومي تشاكليني وتقولي لي اعلانات.. وحات الله المرتب قرضته كله...

هل تقبل المرأة شريكة في زوجها؟]

اختاه، مريومة اللذيذة ..

اين انت يا فتاة؟ اطلت الطلة لمن قلقنا عليك واتوغوشنا!

انحنا اتغشينا برضانا، هاها ها ها(قهقهة عالية صاخبة) !!
نمرق من كلو افهم من كدا؟
يعني انحنا نقبل نلاقي القرقد، نتلفت نلاقي القورة المقورة، نجري .. تلاقينا السكاكات المكعوحة!!! كان في حل تاني؟ والاسباب كثيرة اللي حامياني؟

سوقي مشاهو لي يا مريومة ربك الكريم اللي عينه ما تنام بس على مين! الاخلاق دي انا ما كرهتها العيشة، كل يوم والتاني اذكر خطيبي بنعم الله عليهو وانه الله اصطفاهو وانه حيعوضه خير في الأخره وان الرفيق قبل الطريق والدنيا دي رحلة...
شوفتي، اخلي عرقه ده يصب ويشعر بأنه في جهاد وانو ابواب الجنة حتتلقفه بعد عمر طويل !!! بقى يستعجل العرس زي الزول اللي داير يا خد ابرة العضل ويخلص .. قالوا الم ساعة ولا كل ساعة! داير يواجه مصيره

مريومتاه...
اوعك تستلمي وتفتكري الحرب انتهت! واصلي كفاحك كان تكون لنا بين الحسناوات كلمة!!

انا جاية اشرب شاي المغيرب معاك بهناك

@@@عاد لاكين موضوعك ده جاب لي المغسة! انا لا اقبل لا اقبل لا اقبل لا اقبل لا اقبل وما تضطريني اطلع مظاهرات ويودوني الكشة!!! لا اغبل لا اغبل لا اغبل ، اها قلناها بالسوداني لزوم السودنة والهوية

عزاز سلام... وان شاء الله الزهجه فكت...

اتصلنا ...وما لقينا زول... لما تجي اعملي لينا (باك)...

والموضوع ظريف يستحق المتابعة في الفضائية الزهجانيه

ولا فضائية الزهجانين

تحياتي ...,,,,,,,,,

[

Quote: وما في زول شين غيري انا وفتوحي ولد اختى!!!

عزاز
اسه فتوحي ذنبو شنو !!
طيب كيه فوق شناتكم و انتقاما لاحساسات الوجية فتوحي
هاكم الحلاه دي

نانسي عجرم

هيفاء وهبي

واليسا طبعا


كيييييييييييييييييييه

حسي بالله ياخدر الحلاوة هنا وين؟؟؟ اللون زي قرد الطلح والعيون مكبرنهن بالظلال والألوان والرموش مزروعات زراعةّ!!!
البنات ديل لو فعلاً بنات يقولوا عليهن ما كان أولاد عمامن يركبوا طياراتم لحدي عندك ويضبحوك ويقطعوك حتت!!
يا اخوانا الجمال موجود في كل مكان لكن الجمال الأصلي في السودان!!!
الجمال جمال الروح والأخلاق!!!
خالد

تصدق بايه يا استاذ خالد انا ارتحت لك لله في لله !!!

فعلا .. فين الجمال اللي بتقول عليه يا خظر؟ شاور لي عليه اصلي مش شايفه

السمحة الأخلاق والدواخل الجميلة والاخلاق العالية والشفافية و20 طريقا للسعادة !!!

كام مرة لازم افكركم بالكلام ده يا اخواني!!!

اها، داير سمحة سماحة ديل ولا بنت قلبها طيب حنونة رقيقة تشيلك في الحارة وتصبر على فقرك وتتحمل لئامة النسيبة وارتفاع الضربية؟!؟!

اخي خظر (بالطريقة الكويتية كية فيك) الذي يحب ان يكوي الناس ...
سلامات مسقعة ...
كرمشت مشاعري يا خظر...
شكيتك لالله الخلقك وبدعك ...
ما حرام عليك؟ اقوليك كدايسي قايمة علي تقوم تجيب لي جنس ده؟؟؟؟!!!!
الاهي وانت جاهي يا خظر يا ام خظر عروستك تكون حوصا، قرعا، غبشا، ربشة، معمشة وتصاحب الكدايس ...

وكاتب الاسماء بتحت ليه؟ بغباهن؟ ولا ما بعرفهن؟ ديل قاطعات فيني عرق أديييييل كده! الشافع لما يبتدي يتكلم بقى يقول الي.. الي..سا!!!

اختي outcast ...
(سلامتك من الاوت كاستنه يختي! انت مواطنة درجة اولى امتياز)
سلامات ندية ومسكرة وما مسيخة ...
هو شوفي من ناحية ما فير اند لوفلي ، فعلا ما فير... بس بكرة الوضع يختلف، امسكي في بكرة دي قوووووي ....يعني بكرة ممكن في الجنة بنت بيضا وشعرها ناعم سبيبي وركبتها بيضة ممكن تكون قاعدة جبني ، لصقي ؟؟؟ ما اعتقد! ربك كريم وعادل.. هو العدل ما في الأرض، قولتك الله نزل ابونا آدم ليه؟ عقاب ليه...


بعدين ما تخافي على رجالنا، والله الواحد منهم لو تاه ولا لحق ليهو واحدة من السمحات ديل علا تقطع تذكرة مخصوص وترجع ليك الراجل وفوقيهم بوسة وتقولك (كان الله في العون، انا ما اخشش النار في الاشكال دي ) وتعود الامانات إلى اهلها ...

تفائلي... فالغد أحلى، بمساخته برضو أحلى، على الاقل اليوم عدى وامبارح بقى ذكرى الله يرحمها ...

الأستاذة عزاز
أشكرك على إحساسك المطمئن!! لكن ما لله لله ولما قيصر لقيصر!! دي برضو ما حتخليني أفوت ليك طعنك السافر في خلقة الرجال السوداييين الأشاوس!!! ما قلنا الكلام على المرجلة والنخوة!! والله نحنا أخوان فاطنةمعروفين بشهامتنا وسمو أخلاقناالملكية!!! لكن بيني وبينك مسألة العنصرية دي واردة حتى عندنا في السودان ... بس إنشاء الله السودانيات يكون رضيانات بمصيرهن معنا!!! تعرفي مرة زعلت من زوجتي عندما قعدت عن الدفاع عن الرجال السودانيين وهي تستمع إلى جارتنا الباكستانية تقول لمجموعة من السودانيات في العمارة وفي حضور جنسيات أخرى تقول لهن (ليه رجالكن شينين كدا مع أنكن أنتت حلوات) ... أخوك طبعاً زعل وقلت ليها سكوتكن معناه إنكن بتفتكرن أنو نحنا فعلن ما قدر مقامكن وأحسن تفتشن ليكن عن شركاء غيرنا إنشاء شركاء الإيقاد!!! بس راغب علامة كفاني مشقة الرد على حواء السودانية!!! السلوى أنو ما في زول برضا بيكن!!!
عزاز قالوا في المثل كل زول عاجبو الصارو (يعني من صرة) وكل فوله وليها كيال!!! وهناك ملايين الأمثال المطمئنة--- غايتو الزول يموت موتو!!!
الرجال السودانيين بالمناسبة برضو بسخروا من زوجاتهم!!! واحد قالوا مهنتو ما بتسمح باستقدام زوجته فلجأ إلى أحد المكاتب التي تحت الطاولة!!! فطلبوا منه صورة الجواز والفلوس مقدماً!! فقام أخينا مادي الجواز ومعاه ألف ريال، فبادره الموظف قائلاً ياخوي دا شنو دا!!! الفيزا بخمسة آلاف ريال!! فما كان من السوداني إلا أن سحب الجواز والألف ريال قائلاً باستتكار ( ليه أنا عايز استقدم لبنانية؟؟)
بالله دا ما منتهي عقدة الدونية والجحود؟؟؟

خالد

اخويا ايهاب ..
وجدت رسالتك .. حبيب اعمل باك ليك ...
الزهجة راحت وقامت رجعت تاني! حسي في كديس قرفة ساكيني ليهو 5 ساعات بس ما اديته فرقة ودافنة نفسي في الشغل... يا انا يا الكديس ، يا الشناة اللي بقت علينا !

قناة ذوي الكدايس (الشينين) (خلي بالك من شينين دي كية في خضر ) يسعدها ان تواصل ارسالها واستقبال رسائل المشاهدين/المستمعين/القراء ...

Quote: اها، داير سمحة سماحة ديل ولا بنت قلبها طيب حنونة رقيقة تشيلك في الحارة وتصبر على فقرك وتتحمل لئامة النسيبة وارتفاع الضربية؟!؟!

يا عزاز

دايرين الاتنين

مالن تقال ما بتشالن

السماحة والطيبة متباريات


ارجوك

واصلي زهجك فينا

اخي الحالم قرجة...

مراحب .. شد ليك سلك واتفضل الانسر مشين مشينك ...

قلت لي داير الاتنين؟؟؟؟

الاتنين ماف! يا ده يا ده ! وتقال تقلة في الدنيا دي ...

يا سمحة يا طيبة، يا سمحة يا صبورة..

يعني عليك الله لو الوحدة سمحة وطيبة وظريفة تعرس ليها سوداني ليه؟

Quote: يعني عليك الله لو الوحدة سمحة وطيبة وظريفة تعرس ليها سوداني ليه؟

رضينا بيهن قامن اتعززن

علينا

العزيزة عزاز ..

و الله not fair ... و انا ما هامانى سماحة اللبنانيات ديل .. كان جيتى البلد دى تشوفى جنس سماحة ..تكرهك فى شكلك دة ... و الغريبة زمان غاشننا قالوا الخواجيات مبشتنات و ما بهتموا بى روحهم (طبعا مرجعيتهم كانت بنات منظمات الاغاثة .. لكن ديل بنات من شاكلة براها .. مثقفاتيات ساى .. اما البنات العاديات ديل .. لا تقولى لى دلكة و لا دخان .. ديل نص حياتهم فى ال Hair & Nail Salon ..

وشكرا لخالد فضل لرفع المعنويات .. وكدة ... و مزيدا من الامثلة المطمئنة من فضلك .. مع انه العولمة دى نشفت اى شئ مطمئن فى العالم دة.

قرجة .. السمحة البصبرها شنو ؟؟؟

Quote: قرجة .. السمحة البصبرها شنو ؟؟؟

طبعا شناتنا


اختي السغيرة

اوت كاست

اذكر ونحن طلابا بالجامعة كنت اذهب بعد انتهاء المحاضرة الاولى لرؤية نفيسة وكانت غاية في الجمال ...وكنت اكتفي بنظرة من بعيد واذهب.

الى ان حانت يوما فرصة للحديث معها...وكان ذلك اليوم اخر يوم اشوفا فيهو ....قولي لي لييييه ؟


ايوااااا يا ستي بقول ليك ليييه

لاني ببساطة شفتها كاملة وبصراحة كانت نفيسة في صورتها الكاملة بشعة وبس


عزاز

كيف معاك عفريتة المعنويات دي ؟

اخويا الكبير قرجتون ...(ون بتاعت التنوين)

ما قصرت تب!

بس تاني كان ليقتها واطة ما ترفعها!!!

كدايس عزاز















اخبار متفرقه
مهرجان بترا للجمال يمنح هيفاء وهبي أوسكار الجمال والفن

اكثر من 200 فني في مهنة تجميل السيدات يشاركون بالمهرجان

أعلنت اللجنة العليا لمهرجان بترا للجمال الدولي الثالث و المقرر اقامته
في نهاية مايو أنها ستمنح الفنانة اللبنانية هيفاء وهبي جائزة 'اوسكار
الجمال والفن' تقديراً لعطائها في مجال الفن والجمال.
ـــــــــــــــــــــــــــــ

صور اليسا في كليبها الجديد


انتهت الفنانة اليسا من تصوير كليبها الجديد لاغنية " حبك وجع" وهي من البوم "احلى دنيا".

اخرج الفيديو كليب المخرج سليم الترك وشاركها فيه الشاب ايمانويل وهو نفس الشاب الذي شاركها كليب "اجمل احساس".




واما عن فكرة الكليب :
تكون اليسا امراة متزوجة ولديها طفل وينفصل عنها زوجها.











لحظات اعلانيه و نواصل
مراسلكم بلبنان
خظر

على الرغم من محاولات (خظر) المستميتة لإذكاء نار الغيرة والحسد في قلبي تجاه الحسناوات أعلاه إلا أنني لم أحسد أليسا على نعم الله وووجها الحسن وذوي عريض المنكبين الشلولخ المنكشح في حياتها ...
ولم يرمش لي رمش ولا ارتفع لي حاجب من الدهشة حيال فتنة هيفاء وهبي وهيافتها (طولها الفارع علشان ما تقولوا غايرة) اللي هي فيها ...
حتى الكديس الرشيق ، لم يحرك عقلي ويحفزني على مواصلة الرجيم ....
قاومت نفسي الأبية كل محاولات الاستثارة الجمالية وغضضت الطرف عن السماجة المتفشية والمستشرية وواصلت حياتي كما قدر لها أن تسير ..
وفي غفلة مني ومن كدايسي الافتراضية،
عدت لحالة الحسد من للعين الانسر ماشين!
هذه المرة ليست لصد المكالمات الخارجية ولكن لصد سطوات الكدايس المتحلقة من حولي ومن شمالي من خلفي وتركت اليمين لملائكتي الرحيمة تخفف عني...
كدايسي تفتقر لابسط مقومات الاتيكيت وحس الليقاة ، لا تنبس تهاجمني في احرج المواقف وتجعلني أدور حولها وحول نفسي عكس عقارب الساعة ....
احتاج لضبط مواعيدها وابقاءها خارج غطاء شبكتي الانسانية في الوقت الحالي، لذااحتاج لجهاز انسر ماشين يرد ويجاوب بالنيابة عني ويستجيب لاستفزاز الكدايس ويغني على ليلاهم وهيفاهم. وعندما اعود ذات تجلي، سأعيد الشريط لاستمع لراسائلهم اللطيفة الممتلئة بالمشاعر!
لا أضمن أن أرد عليهم في القريب العاجل او المتأخر، ولكن أنا عملت بأصلي واتحت لهم فرصة التعبير عن مكنوناتهم ....

*الرجاء تقديم العروض خلال مدة أدناها 60 ثانية بتوقيت كوكب الأرض و أقصاها 10 سنوات ضوئية.
*يراعى كتابة العروض على ورقة فلوسكاب وش وظهر بقلم ازرق صغير 2 ملم.
*الرجاء توضيح خدمات ما بعد البيع والتعويض عن المصائب ...

العنوان
المرسل كما هو موضح في متن الإعلان.

Quote: على نعم الله وووجها الحسن وذوي عريض المنكبين الشلولخ المنكشح في حياتها ... ولم يرمش لي رمش ولا ارتفع لي حاجب من الدهشة حيال فتنة هيفاء وهبي وهيافتها (طولها الفارع علشان ما تقولوا غايرة) اللي هي فيها ...

وانا بشهد ليك يا عزاز .. روحك رياضية خالص ،،

واخلاقك عالية جدا جدددن ، مش قالوا المهم الأخلاق

.................................................
.................................................
.................

..........................................
.......................
.........

.........................
...............
..

Quote: حاول تجاوب و أدخل معنا في السحب على كديسة رومية شعرها بيهفهف في الهواء وبتشرب الموية من غير صوت...وتاكل اكل نضيف وعندها باسبورت بدمغة، وبتزور الدكتور اكثر مني!! اللهم لا حسد!

ارجـو ان يكـون توجـهك شـمالا الي حـيث نكـون!

ولكـديسـتك ذات الشـعر 'اللي بيهفف' أهـديك اغنية عبـد الحليم حـافظ 'بتلـومـوني ليه' والتي تغـني للشـعر الحـرير عل الخـدود يهفهف ويرجـع يطـير!

امـا بالنسبة للحسـد ..هـو يتكـرر مـع الطـيـور ايضـا حـتي وهي مـذبوحـة!
كـنت في مصـر في اجـازة مـع الأسـرة..وعنـد رجـوعي للنـدن قـامت أمي بشـراء عــدد كـبير مـن 'أجـواز الحمـام' وبـدأت في حشـوه بالرز كمـا أحـبه..جـلسـت تسـاعـدها ابنة خـالتي والتي لم تغـادر مصـر علي الإطلاق وتتمـني السـفر منها..

قـالت ابنة خـالتي في اسـتنكار وحسـرة..

'معقـولة الحمـام يسـافر لنـدن وأنـا لأ'!

وحـشـتيني ياعـزاز!

مـني

الجميلة منى ...
اشتقت إليك كثيرا يا سيدتي النبيلة ...
ألا يمكن أن نعيد عقارب الزمن لمرة واحدة على الأقل؟

اهدي بنت خالتك السلام، واخبريها أن للسفر معنى مجازي ...
زماااان، قبل أن أكون مرتعا خصبا للكدايس والسنوريات،
كنت أحلم بمدينة من حلوى، سكانها لعب و فتياتها يبتسمن في خجل....
لا هموم ، لا تعب، أظنني كنت احلم بالجنة...
ووصلت مرحلة الطواف في سن صغير!
تغيرت أحلامي تبعا للظروف ،
واصبح السفر يحملني لمدن أحلامي ...
مرة أريد السفر للقمر
ومرة لجبال الألب
تارة أريد أن أسير حافية القدمين على رمل ابيض على شاطئ بعيد
وتارة أتوق لصخب المدن، ضجيج البشر، وكل ما يدل على الحياة ...
أيام أحن للمدن التي زرتها وأتذكر ووجوه من مروا بي بها، ولسبب ما أحن إليهم!
أيام أخر، لا أود مفارقة أريكتي وفنجان قهوتي البارد...
ومرات عديدة لوطن أعيد صياغة تعريفه كل يوم ...

Quote: ................................................. ................................................. ................. .......................................... ....................... ......... ......................... ............... ..

أخوي علي الحلاوي ...
بالله الكلام ده حصل متين؟
وحات العشرة زول كلمني مافي!

أخوي طمبس ،
أنت ما كلموك؟
أنا بطلة الأولمبياد لبضعٍ وعشرين سنة متواصلة في الروح الرياضية!
وأخلاقي تناطح السحاب ترفعا عن صغائر الأمور، خسوساتجاه من حبى
الله الأخريات من نعم...
هي الحياة علمتني يا بني،
تجري جري الوحوش غير رزقك ما تحوش!
ايييييه دونيا!
وعجبي ...

Quote: غشونا ساي انو السمحات غبيانات وخلونا نبرطع ونتشدق بأنو (السمحة الاخلاق) وحسي قنوات السجم جابت لينا سماحة عقل !! نطير وين؟؟؟

بجيك صادة بعد حين ومين !!!

سلام اهل الدار

الاخت العزيزة عزاز تحية ليك ولي ضيوفك وكدايسك وكدايسم

والله بالصدفة عترت لي كديستكم وقلتا اسلم بس يا ريتني ما جيت عليك الله يا عزاز جنس كدايس خدر ديل ما هم البجيبو الكاروشة عديل كدا؟

وزي ما بقولو البشوف كديستو تهون عليهو كدبسة غيرو

بس انتي يا عزاز كدايسك ما متوحشة زي كدايسا ليناوحاتك يا بت امي مرات كدا بقومو علي ومعاهم نفيس اقرب اطقع واجدع يس اهلك الانجليز ديل تهبش زول والله تلقى كديستك تلوك في لبانته وتمشط شعيراته عشان كدا بقيت والله التلفون كان ما نضمتي ما اجاوبك لانو الانسرنج حقتي لماتفتح بسمع كلام الزول المتصل في ناس كدا وحاتك ما بهبب ليهم عشان كدي كان اتصلتي رققي صوتك شويه امكن الكديسة تحن و اجاوبك لووووووووووول

Quote: ما حرام عليك؟ اقوليك كدايسي قايمة علي تقوم تجيب لي جنس ده؟؟؟؟!!!! الاهي وانت جاهي يا خظر يا ام خظر عروستك تكون حوصا، قرعا، غبشا، ربشة، معمشة وتصاحب الكدايس ...

والله دي عجبتني جنس عجب لانو شفتا فيها فتات احلامي وبقول مع خضر اميييييييييييييييين

شكرا عزيزتي عزاز على البوست خفيف الظل ويديك والمعاك الف عافية وربنا يكفيك شر الكدايس و اولاد الحرام اصلو الاتنين ديل بتشابهو وبجيبو النكد

تحياتي وودي

عبدالله

أخويي عبدالله ..
مرحب بيك وشد ليك رسالة and feel at home
اعتذر شديد الاعتذار عن تعتير كديستي المهرطقة ،
بس انا كنت مرسالها تجيب لي كرم ديانا لأنو عندنا
عرس الليلة والوش محتاج صيانة ...

أما فيما يخص دعواك،
قال الحكماء قديما: قل من فتاتك أقل من كديستك ..
وبالإطلاع على مواصفات فتاة هواك، اتضح بما لا يدع
مجالا للشك بأن كديستك تتمتع بقدر عالٍ من الشفافية
ولا تتوسم المواء ثيابا لتسمى في القواميس قطةً...
وعليه،
تبدو كديستي مسربلة في اللطافة إلى حد بعيد ....
اعنف تصرف يصدر عنها هـو الصمت المطبق والنظرة
الحادة تتلوها تنهيدة حارة كحرارة نيسان...

أختي ممكونة..
مشيت وين يالطيبة؟
ماشة وسايباني لمنو؟
انا قاعدة لغاية حين ونص ما تتأخري ....

**انافي تمام الساعة حين شوكة

لكم التحية والتجلة
في الحقيقة خدر صاحبي في هولندا
وعزاز زميلة في البورد بس وين ما عارف

لكن انتي ما ليك حق تزهجي لاسباب عدة
وكمان ليك الحق تزهجي لاسباب عدة
وكمان خدر مستفز لية ما عارف
لكن لانة احسن مننا
وعايش في جو صحي
انحنا قاقدنة

عزاز
انحنا زهجانين ولك التحية
وخدر
انحنا
بيستفزنا الجمال والحاخات الحلوة

ولكم التحية

وفرصة سعيدة للجميع

أخوي طارق ،
انا يا سيدي من سطان الشرق الأوسط وبالتحديد في بلاد الحرمين ...
يعني أنا بوردابية من الرياض بس الحالة بتاعتي مخفية
لاعتبارات كثيرة حامياني ...

أما فيما يخص خظر،
فهو داير يفقع مرارتي بس ما اكتر.. مع الأخذ بعين الاعتبار
أن ده هدف نبيل يشاركه فيه 0.3% سكان الكرة الأرضية وكل
من التقيت بهم خلال العشرين سنة الماضية ، فهم يحاولون
عن طيب نية بإظهار الجمال في مخلوقات الله ولكنهم لا يدركون
حجم النتائج العكسية على روحي المعدنية ونفسية كدايسي ...
انا ما زهجانة والله!
الزهج حالة اتعديتها من زمن! احنا ناس بنلعب في التقيل
انا beyond زهج ، انا ultimate زهج ...

يعني الزهج ده مجرد مراهقة ملل ...

كل الأماني الطيبة يا سيدي وتوشكر على المرور

سلام عزاز والأخوان/ت
عندي في ال CV بتاعي خبرة كم سنه كده As an answer machine
بنفع?

اخوي سعد الدين ....
تبدو سيرتك الذاتية مبدئيامناسبة للوظيفة ولكن هل يمكنك استيفاء
شروط خدمات ما بعد البيع؟
يعني، لو كدايسى بقوا عنينفين وقاموا كسروا الجهاز
هل تعوضني عنه بآخر؟
لو زول دمه من الوزن الثقيل وغلس عليك ممكن تتحمله
من دون ان تفقد رباطة جأشك وتماسكك؟
انت عارف انو العقد لا يدرج الإجازات السنوية ولا العطل
الرسمية ولا أي أجاات اضطرارية لتقديم العزاء أو حضور
السمايات والحوليات؟

يعني عقد تأبيده!

عزاز

بالسوداني لمن يقولو الزول ده عندو كديسه معناها
مزحلق اختي الغاليه..انتي لو كدايسك ديل كده ممكن اكسرهم قبلي
ما يكسرو الجهاز ونبقى في العوض وسكينه

والسدن للددعان

Quote: والسدن للددعان

لوووووووووووووووووووووووووول وتاني لووووووووووووووووووووووووووووول

اضحك الله سنك يا بني ...

لقد ضحكت وقهقهت وبانت نواجذي ...

وقد غلبني اقيف من الضحك كلو لكو وبقيت فرحانة زي يوم الوقفة ....


-- تم اعتماد طلبك لتوريد عدد واحد انسرماشين heavy duty
والتسليم خلال المدة المودحة أعلاه...

شوكرن

عزاز موضوعك جميل بصراحة
ايام الجامعة نا مكونين جمعية اسمها ( جمعية جمال النفوس ) وتضم كل البنات الما سمحات المهم انتي لو شفتي خلقنا المفروض ما نجيب سيرة السماحة في لسانا المهم كنا نكون مع بعض ونقول لبعض لا دي اضيفوها للجمعية بمهنة خبيرة لا دي بمهنة سفيرة النوايا الحسنة لا دي خلوها منسقة اعلان ( نظرا للشناة الشديدة ) وزي ما قلت ليكي احنا اصحاب الجمعية الشناة الفينا تكفي عالم بكامله.
طبعا الموضوع كان دردشة وهزار ما اكثر واحيانا كنا نقول والله فلانة دي فيها نفس بالدنيا وما فيها ؟؟
المهم الحياة بعثرتنا شمال وجنوب ولما نتكلم عن موضوع السماحة والله انا بصراحة بيعجبوني الغربيين لانه بصراحة بحس انو هم مهتمين بروحهم كويس وكل واحدة بتعرف كيف تظهر الجانب الجميل فيها وبالتالي اخفاء العيوب الاخرى وبالنسبة لنفوسهم والله بصراحةانا بحس انهم عندهم انسانية اكثر مننا والواحد لو تابع الافلاموالمسلسلات البتجي في one tv. و Mpc2+3+4 حتلاقي انهم عندهم انسانية اكثر مننا والله وجد الانسانية ما مرتبطة بجنس او دين او ملة على العكس هي احساس من انسان لانسان وبلاه عليكم انا مدمن على برنامج opra وبصراحة لو تابعتو الحلقات الفيه حتلاقى صنوف من الانسانية والبساطة والصراحة الاحنا مدرجةعندنا ضمن باب ( العقد ) يعني عندهم بساطة في طرح الامور
انا اسف ياعزاز انو طلعت عن موضوع الانسر مشين بس بصراحة الحديث وداني بعيد

وبعدين ما عيب ان الواحدة تحسن ( اللوك تبعيتا ) وذلك في حدود عاداتنا واعرافنا

معليش كلامي ملخبط بس اوعدك ارجع تاني ياعزاز

العضو المنتدب لجمعية جمال النفوس العالمية
ملاحظة باب العضوية مفتوح مجانا
العنوان www.جمال النفوس.كوم
شكرا

عزاز

تشوف كدايس اخوك تهون عليك كدايسك

موضوع جميل

اختي عزاز وبقية الناس اللذاذ

خفتا والله اكتبا اللزاز ويقوم واحد منكم يلز لي كديستو وهنا انا بشتغل بالمثل البقول كان كديستك ما كفتك تحرم علي الجيرانوانا كدايسي كفو وزايدين المهم ما علينا بس الجابني راجع يا عزاز انو شايف الموضوع ويه سرح واتلخبت علي الاختساس
وبراي سالتة روحي انو في فرق بين كديسة ونفيسة ولا لاء؟

الله ينجينا من :
الكديسه
ونفيسه
والعيشه التعيسة
والمره الفطيسة
وشرب المريسة
والبهبش الفتن وهي في كيسه
والانصر مشين الرخيسة

كنا عاوز اضيف المره البتدق عريسه بس خفتا والله مش قالوا التاريخ ما بغفر؟
الله ينجينا من كدايس المشتشفيات حقاتنا وكدايس الحكومة والله ديك ما زي حقات عزاز
عزاز شايفة مهجناهن وبجيبو كريم دياناوما بعرفو درب السلخانة

تحياتي تاني وكا الود

عبدالله

Quote: وبراي سالتة روحي انو في فرق بين كديسة ونفيسة ولا لاء؟

تدل أخر الدراسات أن لا علاقة لنفيسة بالكديسة وأن الأمر محض تشابه أسماء ودلالات لغوية مش أكتر ..
المصدر: أنا براي نجرت الكلام ده

اخوي عبدالصمد ...
كم هي بليغة مداخلتك!

بس تصدق بإيه!
شفت ناس اقل مني في حاجات كثيرة وابتلائهم أصعب ..
بس الكديسة دي تحديدا الله ابتلاني بيها بتفرد !

أوردوا ما لديكم يا ذوي الكدايس من الجنسين لتخففوا عني شعوري بالوحدة في هذا الابتلاء!

حامي حما جمال الروح الأخ أيوب ...
اتقدم بطلب عضوية لجمعيتكم الموقرة واطمح بالحصول على منصب المنسق الرسمي أو أي منصب إشرافي رفييييييييع ورشيق ...
طبعا ما براكم الرجال بتصنفونا، للمعلومية فغط، انحنا زااااتنا، بالشناة العلينا دي عندنا تصنيف وأراء عديدة فيكن يا اخواني ...
طبعا بنصنفكم من حيث الشكل وده في الودع السوداني فيه فئة واحدة فقط : الشينيين

الشناة خشم بيوت :
1- شناة مرة
2- -شناة قابلة للهضم

الشناة مرة نوعين:
1- شناة مرة زيادة وشناة مرارتها محمودة لصاحبها
2- الشناة المحمودة لصاحبها

الشناة المحمودة لصاحبها نوعين:
1- يكون عارف وضعه وبيتاعمل على الاساس ده .
2- يكون نوع FFRM

ثم ثانيا، بنظر ليكم من خلال معايير تانيه ممكن تكون:
1- رأسمالية ونفعية .
2- ظل راجل ولا ضل حيطة
3- group behavior ونعمل زي الآخرين ...
4- نادرا ما يتم تصنيفكم من نواحي إنسانية أو فكرية، ولو حصل، غالبا بنكون غلطانيين!
المصادر: دراسة ميدانية في وضع العلاقات الانسانية في المجتمع السوداني- صفحة 0&0@456410 –

نرجع لموضوع الأجانب وتلقائيتهم ... طبعا اكتر حاجة بتلفت نظري في بلاد الفرنجه انو تلاقي ليك زول من التنصيف الأول من الفئة المذكورة أعلاه وطابق ليهو بنت ما تعرف تبداها من وين في وصف الغزل ..وعلى الصعيد الآخر، تلاقي منسقة إعلان في جمعيتكم متلحفة ليها بخليفة سيدنا يوسف ..
بعد تفكير عميق موغل في الفلسفة اكتشفت انو الناس ديل بيعاينو للدواخل أكتر من أي شئ اخر.. مع انهم هم اللي بيتحكموا في مفاهيم الجمال عندينا بس برضو ما بيطبقوها في حياتهم الخاصة ...
لو كنت بتابع برنامج the Swan بتلاحظ انو اغلب الشينات معرسات وعندهم اولاد وهن بهذا اوفر حظا من شيناتنا المحليات اللاتي يعنين من بورة متفشية ونقص حاد في العرض مقارنة بالطلب ...

ثم ثانيا، (كما يصر والد أحد اصدقائي حتى لو لم يقل أولا ):
انت لا لخبطت لي البوستولا شيتن .. بالعكس اثريت النقاش في المسببات الأصلية لوجود الكدايس محور النقاش ...
عد دائما بلخبطاتك

الاخ ت عزاز

اتصلت عليك

قالوا ( هذا المشترك لايمكن الوصول اليه حاليا )

وقالوا ( ان اهاتف الذي طلبته مغلق او خارج نطاق الخدمة حاليا)

نعتذر عن عدم تمكنا من تلقي مكالمتكم نظرا للصيانة الدورية لخط الهاتف

الرجاء الاتصال مجددا فقد تم إصلاح العطل ..

شركة كدايسكو (ذذم)
المركز الرئيسي لفرع كوكب الأرض

العزيزه عزاز الزمان
ازيك ومشتاقين ...شكلك زعلانه منى , لكن انتى ماعارفه الحصل لاختك شنو لمن وصلت.. لك العتب ى ودى ما موضوعنا حسع

الكدايس والزهج والجمال ...
1. ياخى بطلى التواضع والعواره دى ( هو فى زول اسمح منك ) ولا اسمح من بارعه زوجة خدر الثقيل دا( ياخى الزول ما بحمد الله ) كرهتنا بالجمال العربى دا..

2. الزهج وارتباطه بالكدايس..
تعرفى الزهج دا الاونه الاخيره بقى موضه وكمان حق الناس السمحيين.. يعنى الشينيين ديل اصلو ما بزهجوا لانو ماعندهم طموحات وقنوعيين ومريحين روحهم .. ديل نحن واخواتهن
اما ربط الكدايس بالزهج دا هناك فى بلادنا الفقيره , حيث الكدايس مشرده وعايش فى الكوش.. لكن فى هذا المكان الذى اعيش فيه , والكدايس عندها جواز سفر واكل خاص وتامين صحى وداده افريقيه , ما اظن يربط الزهج بالكدايس هنالذلك وتماشيين مع العولمه , شوف ليكم حيوان او انسان تانى
الانسر ماشين.. صدقينى هو زاتو عله , لانو ممكن اورطك فى مواعيد او التزام او جريمه .. يعنى احسن تكتفى بفصل الجهاز الى حين اشعار اخر

حبيبتى
خليتك عافيه ومبروك والله يتم على خير
و كمبو
اسقتا ارى
خيتك
حلوم

العسل حليمة رقم 2 …
يختي لوم شنو وعتب شنو؟
انا كنت جاية بلدكم دي ضهب ساي ... وانا عارفة المشاغل والهموم ..
وكان نفسي ألاقيك ، لكن طبعا، اختك كالعادة، ما عارفة تقرر تسافر لـ وين ومتين، واديت نفسي هواها تماشيا مع قواعدي في السفر ..

حتى جائني الإلهام!
وغادرت روزندال في صباح ضبابي و أنا أساور نفسي بالبقاء
تخيلي لما جيت امستردام يوم سفري صاحب ود خالتي كان مفروض ينسق لي لقاء مع سيدة في الجالية هناك ، واكتشفت بمحض الصدفة أنو دي انتي !!!

ولكنني ضيعت موعد رحلتي مرتين في ذات اليوم (إشكالية مواعيد ما اكتر والمطار هو الغلطان ما أنا) ووصلت لفيينا بعد الهنا بسنة والشموع أطفت والمولد انفض والحابيب غادروا وأمضيت أمسية استرجع ذكرياتنا مع صديقتنا المستنيرة (منوّرة)…

اهن، نجي لمودوع الكدايس والكاتس Cats
والله يا حلوم، بحليفتها، الجمال ده موضوع نسبي ساااااي .. حصل شفيتني لم اصحى من النوم؟
إذا كانت إجابتك (لا)، أرجو مراجعة التحذيرات المرافقة في كتالوج الاستعمال الخاص بي أو اسألي فردتي (سومة) فقد قاست معي كثيرا ….

أما فيما يخص (خظر)، فاعتذر عن دعائي عليه ويبدو ان الله لم يعد يستجيب لي دعواتي كثيرا بدليل انو زوجته أية في الجمال و الأخلاق ولا تعتريها لمسة من غباشتنا المعهودة … حلال عليك يا سيدي، دعوات الوالدة غلبت دعواتي عليك ...

سيدتي، آلمني ما آل إليه وضع الكدايس في بلادكم العامرة …

كدايسكم لا تعرف معنى النضال ولا تدرك معنى الحياة وتعاني من اتكالية مقيتة!
تجي تشوف كدايسنا الكادحة في لقمة عيشها وتصحى من النجة تزاحم البشر في بقايا الكوش (جمع كوشة)

لذا، من هنا أعلنها مدوية في الأركان الأربع ...
بأنه، التزاما مني بالتضامن مع كدايسنا وقضيتها الملحة، سأصر على تشبيه حالتي الحالية بالكديس
فقدري وقدرها اننا خلقنا سوادنيين

سلمي على كل من بطرفكم وقولي ليهم يرسلوا لي فراولة في برطمان (التركين) اللي رسلته ليهم في العيد الصغير..

عزاز .. إنتي زهجانه ؟؟
ومين سمعك يا بنت الناس الطيبين ..

انا مصاب بحزن من نوع غريب ، حزن مؤلم ،
أنام به وأصحو عليه ..
لا أعرف من رمى بهذا الحجر الثقيل في روحي ،
ولا أعرف إلى متى سأحتمل ..
أشعر بأن وزني أصبح ثقيلاً ، وأن ذاكرتي بدأت تضعف ..

أنظر إلى عيناي في المرآة : لم تعد تلمع ..
وبي رغبة في أن أبكي .. وأحكي .. وأبكي ..

أشعر يا عزاز بهواء بارد يلفح كتفي ..


...
طلال

طلال ود الناس الطيبين ...
مالك يا اخوي؟
الزهج ما بشبهك وما بيشبهك روحك العالية ...
اهو الشوق؟
إذا، اجعله مصدر سعادة، فأنت محظوظ!


شايف الصورة دي؟
دي صورة التقطها انت ذات فرح ..
في كل مكان حولنا يوجد الأخضر واليابس، بس احنا متعودين نمشي على اليابس ونستمتع بالاخضر ..
اكسر القاعدة وامشي واستمتع في ذات المكان ...

طلال..

عارف انا زهجانة ليه؟
لاني اتنفس من فتحات ضيقة
لا هواء
لاشوارع
لا طريق
لا رفيق
نفس الدايرة
تلف
تدور
تتواتر
تتقاطع مع دوائر تانية
وبرجع لنفس المكان
أنا باختصار ...
تعبت من السكون!

مياووووووووومياوووووووووو مياوووووووووووووو
جاتني حالة كديسية قلت انونو

كـــســــــــــرة:

علي قول اخوي اسماعيل وراق دي شعبطة مني ساكت

كل الود لك ايتها الرائعة

أخوي الصادق خليفة ...
صباحك ورد و فل وكورن فليكس ...
الانسرماشين منور والله بمرورك ...

كديستنا تقرأ حالتكم السلام وترد على مواءها بأحسن منه...

يا سيدي الشعبطة بحر واسع، وقد ركز أخونا إسماعيل على جانبه السلبي فقط ..
في شعبطة حميدة تزيد من رصيد فاعلها وهذه إحداها ...

وأمعانا في الكرم، اتفضل قبيلة الكدايس دي مني ليك عربون أخوة ...

طلب صغير: ممكن تعدها علشان ناس الإحصاء ما يجنوني بعدين؟

عزوز..
اولاً ادينى كديسة ارسلها للبشمهندس بكري عشان تخربشو.. لآنو من مدة بطلت ما قادر أعمل اقتباس.. شوفي الرسالة دي:
Error:
Only the originator of this post or moderators are allowed to edit this message. Please go back and try again or contact the webmaster if you believe this is a server error

وكدة أكون حليت مشكلة وشعرت بي الراحة..
أما كدايسي الخاصة فهي من فصيلة قف تأمل.. لما تكون محاوطاني.. سلام الله ما بقدر أقولو .. لا في الهاتف ولا (وشاً لوجه).. دعينا نعقد صفقة .. رسلي لي كدايسك نقايطه وأدفع ليكي الفرق... قولي تم..

ابو الشوش ازيك ؟
اولا استميحك عذرا لانو كدايسي للاستعمال الشخصي فقط وغير مصرح لها بالعمل العام وبتتعشى بدري وتنام....


وبعدين أخونا بكري هو اللي مآوينا ولامينا في حوشه حرام نرسل ليهو كدايس قول نرسل ليهو ورد، قراصة، ملاح تقلية، شوال بلح يعني حاجة تعكس كرم الضيافة...


اما ما يخص كدايسك فهي تتمتع باحترافية عالية ومسيطرة على الوضع تمام، كده الكدايس ولا بلاش!
انا لو رسلت ليك كدايسي انا اللي بدفع الفرق من صحتي مع كدايسك المقرمة دي.. انا يا سيدي ما ليش في النوع ده انا يا دوب على قدي

الو الو ،،، ترن رررن

الأخت عزاز

تحيات طيبات

يا ست البنات المزهجك شنو

وغرقانة في الزهج ونحن منتظرين مشاركتك في ذلك المشروع
الذي ظللت تحلمي به وتحملي همه
وكنا وما زلنا علي الوعد بدعمه
لكن الزهجة الجاتك دي من شنو ياربي

انت عارف يا عزاز زهجة الرطانة دي
ام فتفت ما بتفكا

الآ صحن تركين ومعاه فحل بصل وكيس شطة خضراء

تخريمة

اتمني ان تردي علي التلفون في وقت آخر وتكوني رايقة
وفي جوازك خروج نهائي

عزاز
هاكـ الكدايس الماكدايسكـ

هارلم بلد الكدايس و العفاريت (قصه واقعيه )

ألو .. أهمد هنين ؟
ازيك؟
اختك قااااعدة على قولة طيبة الذكر تماضر شيخ الدين
زهجتي زهجتني ...حاولت افكها بتركين ما نفع..
اكل صيني ما نفع..
برياني ما نفع ...
فول وطعمية بردو ما نفع ...
أم فتفت برضك ما نفع !

المشروع يا سيدي الكريم لحق امات طه وشلت فيهو فاااتحة من زماان وعتبانة عليك ما باكيتني فيهو...
يا احمد يا حنين يا اخوي، انا حسي مشغولة في ندوة عن السلام والتعايش السلمي بيني وبين كدايسي ، اخلص منها اوعدك اقبل على المودوع ...

إضاءة من خلال التخريمة...
الخروج النهائي أمره هين بس امشي وين ؟

أها يا عزوزة...جيتك صادة بعد الحين و المين...لكن الحال في حالو..و الزهجة إتقلبت قرفة..و على المتضررين اللجوء إلى القضاء ..على الرغم من أن القانون لا يحمي المدغلبين...
أهاأأأأأأأأأ...عرفتي مشكلتي شنو؟؟؟؟
بعد الشناة ...كمان في طن زيادة وزن أو كما يتفلهم الخواجات و يقولوا over-weight ..وهو بالأصح كومر-ويت !!!
لك منى هذه الرسالة الطريفة...ارسليها لكل الكومريون و الكومريات البتعرفيهم.


Diet For Stressed Women

This is a specially formulated diet designed to help women cope with the stress that builds up during the day.

Breakfast
1 grapefruit
1 slice whole-wheat toast
1 cup skim milk

Lunch
Small portion lean, steamed chicken with a cup of spinach
1 cup herbal tea
1 Hershey kiss

Afternoon Tea
The rest of the kisses in the bag
1 tub of Haagen-Dazs ice cream with chocolate-chip topping

Dinner
4 bottles of wine (red or white)
2 loaves garlic bread
1 family size supreme pizza
3 Snickers bars

Late-Night Snack
Whole frozen Sara Lee cheesecake (eaten directly from the freezer)

Remember: Stressed spelled backwards is "desserts." Send this to all the women you know or ever knew, and you will immediately lose 10 pounds.

Quote: أخوي الصادق خليفة ... صباحك ورد و فل وكورن فليكس ... الانسرماشين منور والله بمرورك ... كديستنا تقرأ حالتكم السلام وترد على مواءها بأحسن منه... يا سيدي الشعبطة بحر واسع، وقد ركز أخونا إسماعيل على جانبه السلبي فقط .. في شعبطة حميدة تزيد من رصيد فاعلها وهذه إحداها ... وأمعانا في الكرم، اتفضل قبيلة الكدايس دي مني ليك عربون أخوة ... طلب صغير: ممكن تعدها علشان ناس الإحصاء ما يجنوني بعدي

ن؟

اختي عزاز

تحيه وسلام

كدي ركزي في الاسم بتاعي

حاجة تجيب الكديسة

عموما تشكري علي الهدية

كل الود لك ايتها الرائعة

أخوي ادريس ...



السن واحكامة الشوف بقى تشاش تشاش ا ولدي و اتخلبط علينا الاختساس
وخلطت بينك وبين أخوك الكريم وبركة اللي ما سميتك اسم من برة راسي...

يعني انا من كتر ما احتفيت بيك لمن غلطت في اسمك ...

امسحها في وشي واعدك اكتب اسمك 100 مرة علشان تاني
اتعلم ما انادي الزول باسم أخوهو!

عــزاز شــامي
بعض الزهـج لا يفكـه إلا المزيــد منه
والنار لازم تقابلا نار
الآنسـر مشين تعتمتد الفائدة منه علي الرسالة المسجلة
فإن كانت على شاكلة
خاااف خاااف .. تا را رارا .. خاف من الله على قلبي
فلا شك أنك ستجدين الدعم والمؤازرة من ذوي القلوب الرحيمة.. رحمةً بك
وذوي القلب اللئيمة .. شماتةً فيك

أما إذا كانت مقتضبة علي نسق :
أنا غير موجودة بالمنزل الرجاء ترك إسمك ورقم هاتفك ..الخ
فلا حولة ولا قوة إلا بالله مما ينتظرك

أما إذا دار محور سؤالك عن الكدايس فتلك تعتمد على النوعية والجنس
نًـورد أدناه بعض الأنواع ( مثالاً لا حصراً )
كديس الخلا .. لا يألف ولا يُؤلف ..
كديس اللكوندة .. يقبل الرشوة العينية حتي لا يفقد رقبته ( المدغلبة )
كديس البيت .. يمكن تخويفه بأي ( كلب ) زائر مُقيم او مُعتمـر


وسنوافيك لاحقاً بتفاصيل أوفى وأدق

أما الجنس فيـُقال إثنان لا ثالث لهما ( أشكُ في التعداد الأخير )
زهـج أقصـد ( كديس ) ذكـر وهذا يمكنك التعامل معه حسب معرفتك بنا
زهـج أقصد ( كديسة ) أنثى ودي بكيفك فيها فهي أقسى وأمرُ من الحنظل
زهـج أقصد ( كديس/ة ) الجنس الثالث هذا مثل ( HIV ) يتلون
تصعب مراقبته وعلاجه ( يعني تتحكر وتتمحن وتنتظر يومك )

طبقي قاعدة للكديس مثل حظ الكديستين .. إهتماماً أو إهانة .

حاولي التآلف مع كدايسك وستتعودين عليها وربما تشتركين بها في
المسابقات العالمية



دقيقـــة
حسب الوجبة

Quote: Dinner 4 bottles of wine (red or white) 2 loaves garlic bread 1 family size supreme pizza 3

هنا عندما يُجفف الكديس كل منابع الصـبر
يموت وسيجارته في فمه .. على وزن ( أموت والحسرة في عيني )

اخوي الثابت ثابت ...
فحوى رسالتي لا تستدر سوى بعضا من المساحة وبرحة من الزمن .... عاصرت زهجتي أعواما وراقبتها تتغير تبعا للمراحل، زماااان أيام النفوس صافية والتجربة في سنينها الأولى، كانت الدموع بابا للترويح، مع تواتر الزهجات، خفت جفاف المآقي، فاتبعت مسالك الهروب والانغماس في الفرح الإجباري وإن أعقبتها لحظات من صدق ومواجهة ...
وهاهي الأيام تعلمنا مداخل أعمق للزهج..
تارة اهزمه بالتأمل
وتارة بالقراءة
وأيام كثر بالحوار الداخلي والذي ينتهي غالبا بمصمصة الشفاه على ماض ظننا بأنه الأسوأ ذات تفاؤل...
هل تظن بأن الكدايس تجرأت علي من قليل؟ لقد سمعوا جل كلامي لنفسي ولمسوا مواضع الضعف مني واعملوا فيها كل خربشة وكروا خيطا طويلا من صوف صبري ...
كدايسي ماركة مسجلة باسم مللي، لا تندرج تحت أي من تصنيفاتك الواردة أعلاه ...
أعيتني في تصنيفها، فهي في بعض الأحيان متنفس لي مني وتشغلني بمواءها عن معالجة مللي، واتعذر بها عن حل كل ما سوفته في لحظة ضعف ....
ايييييييييييييييييييييييه
هي الكدايس، ندعوها على مائدتنا، نستأنس بها، ونهجوها على الملأ ...
كم هو جحود هذا الإنسان!

سلام يا ناس

ممكونه

هههه الله يجازيك بالخير يا بنيه
اتي ريجيمك ده في ليهو روشته ?

في حاجات كده ما عرفتها ...اعذرينا غبش سااي
Haagen-Dazs ice cream
Sara Lee cheesecake
دي بتنلقي في زحل ?

أخوي سعد الدين ...

Quote: Haagen-Dazs ice cream

دي كتبتها ممكونة بالانجليزي ومعناها
دجاجة داسيها وعاملها ايس كريم وهي كناية عن الدجاج المثلج

Quote: Sara Lee cheesecake

وده اسم البنت اللي عملت الرجيم: ساره وهي جكس نظيف زي الكيك ...

يا جماعة ما تتعلموا لغات وتريحونا!

صديقتي في الوزن وفي الزهج ممكونة …

أنا الظاهرة أعلاه ما عادت تغريني الرجيمات
لم تعد تقلقني السعرات الحرارية
وتحررت من عقدة الجميز و اصبحت احبني كما أنا رغم انف مقاسات 18-20 واللهث عند صعود الدرج …
اكتشفت انو في علاقة بين زيادة الوزن وخفة الدم، وانا بيهمني جمال الروح وان شاءالله ما حد حوش

انا عموما للضمان بعمل اللي في نهاية الرجيم وببقى زي نمل السكر …

3ozaz 3aalina alshalo noom 3inaina
zai mabtagool al3'onia bita3at nada algal3a
izzayek

dair aslaik
kan ga3da barak
ma ma3ak zool bishbahik
wa zool zaiek
wala zool bitfaham ma3ak
wala fi zool bitkalam lo3'atik
winti ma7bosa ma3alnas dail shahar

tasawi shno




Dia

العزيزه عزاز شامى..
زمنا من الغياب..الطويل

اعتقد اننا نمر بحالة تغير متكامل دون ان ندرى ذلك باحساس الملازمه لما حولنا.وفى قنوات الاتصال خاصة المرئى التى تشدك وتغرس فيك وتخترق مساماتك بما تريد لانها تزرع كل ذلك فى اخاديد العقل الباطن..وتبدا معيشة الانتقاد ..والتطابق الذهنى..والاستيعاب الموجه والانفاذ والرضا بقبول الفكره.. وهذه مثلها مثل فكرة الهروب من الواقع والتستر خلف مستجدات ثم التأقلم على واقع ما..مفروض عليك..ودعينا نتحدث عن تجربه ايام طاغوت النميرى..عندما اتت الانتفاضه الالاف من المتواجدين فى بريطانيا من مواقعهم الى طائرة سودانير الى الخرطوم..اما الان بدات الفكره هجره وارض الله واسعه وكلها وطن طالما توفرت لك ظروف الحياه الكريمه التى افتقدتها فى وطنك وحتى الان بعد سنين الهجره.هل يستطيع احدا ان يمضى هكذا ويقرر ان يستقر وهل يضمن معيشته وعلاجه وتعليم اطفاله وسكنهم واحتياجاتهم..؟؟؟.نحن الان متواجدون فى اصقاع الدنيا حتى فى تاهيتى وسومطره والسكا..وفى جزر المانديف .لان الحياه فرضت ذلك..وواقع الحياه فى الغربه هو يجرقناحتى ندفعه ثمنا فى حياة قاسيه .وفى لحظات سوداويه قاسيه وظروف الغربه وقوانين الغربه وقبول الغربه وبشاعة التصرف الذى يضطهد قيم الانسان والقبول به من اجل ان نعيش فى بلاد كثيره تهدر فيها كرامة الانسان لكن نطأطى الراس من اجل ان نعيش .ها واقع حتى فى كثيرين من الحالات التى تتعتلق بالعمل والاجر.رهيب كلما يجرى ويتم....والكل لينظر الى وجهه فى المرأه ويستعرض صور له قبل 5 اعوام سيرى الفرق انه قد شاخ الالاف المرات. نتيجة للضغوط غير المرئيه ولركوب السيستم لنمط الحياه الغربيه..ثم علينا ان ننظر للآجيال التى ولدت فى الغربه والذين ترعرعوا فى الغربه ,لهم ارائهم وافكارهم وقرارهم.هؤلاء فى الدول الغربيه اما فى الجدول العربيه والخليجيه حتى الطلاب من ابناء السود\انيين لم يمنحوا فرص التعليم الجماعى والسودانيون والرعيل الاول منهم قد\ بنوا الخليج والسعوديه لكن تعلمنا ان نخنع كى نعيش ..هذا هو الواقع المرير.وتعلمنا ان نرخى الان ..وزمن مضى عندما تقول سودانى يقف العالم العربى من الخليج الى المحيط.وهو يرجفون..دعونا ان نسمى الاشياء باسمائها.. انهم يطحنوننا هنا وهناك.وقيمة الانسان ربما تكون محفوظه فى منظمات وسياسات الدول الغربيه لكن فى نطاق الدول العربيه والاسلاميه ليست هنالك قيمه..واعتقد الذين يعيشون فى الخليج والسعوديه يعلمون تماما ما اعنى...ماذا اعددنا لهم هناك..؟؟ الهم الداخلى من المستقبل الى متى..ونحن نعلم تماما ان فى بلادنا لن نجد ما يؤمن لنا واقعا ومستقبلا ولا ضمانا اجتماعيا يمنحنا حق العيشه الكريمه..فزمن اسقاطنا اعتقد انه سيمتد ويتمدد..وسنعيس تناقضات الحاله.بمختلف صورها وهى تتمثل فى اشياء غير الانسر ماشين..فى عمق الدواخل لان كمية الخساره اكبر من ان تقدر بثمن..هى ضياع عمر كامل...
عميق الود..ربما اخذت الموضوع من زاويه حاده كثيرا.. ربما تغضب الكثيرين
عميق الود

تم اصلاح الخطأ واعادة رونق التحيه للاستاذه عزاز شامى..باضافة الهاء بعد كلمة العزيزه.زواشكر الاستاذ عادل على على كشف هذا الخطأ غير المقصود بتذكير اسم عزاز..بدلا عن تأنيثه..ارجو المعذره.

للتطويل ايضا..
كل التقدير

Quote: العزيز عزاز شامى..

عصمت العالِم إزيّك....
ياخي أول حاجة عزاز شامي دي بِت ما راجل... وثانياً هي قالت إنها زهجانة... سمعت ليك بي زول زهجان يدوهو محاضرة قدر محاضرتك دي؟
عزاز كيف حالِك (بكسر اللام)....أفتكر بعد كدة مفروض تختى صورتك عشان مايجي زول تاني يقول ليك "الأخ الزهجان عزاز".
مع الود،

ع ع

الفضلى عزاز
شفتي الزهج والدبرسة يؤديان الى اين .. الاخ العالم افتكرك ولد منتهى الزهج الذي يؤدي الى عدم التمييز
قديما قيل لنا كن جميلا ترى الوجود جميلا لم نسال انفسنا حتى كيف يكون الواحد جميل اقصى امنيات الشينين ان يقال لهم جميليين

احد اخوتي اقصى كلمة مدح لانسان عنده يقول لك هذا شاب جميل او بنت جميلة ومن حيث لايدري جمع الاثنين جمال الصورة وجمال الروح والخلق وبقية الصفات في كلمة واحدة

لكن في هذا الزمن الذي قمنا نحن بتحويله الى زمن كئيب واكسابه القبح والشناة بافعالنا واعمالنا

اما عن الزهج فهو رديف لايامنا فقط اغلقي الهاتف لفترة واذهبي واجلسي مع الوالدة لتحكي لك حكايات زممانهم حيث ساد الطهر والعفاف و الصدق النقاء فكان الزمن جميلا والوجود اجمل

اما اذا لم تكن والدته حاضرة فابتسامة طفل تطرد الزهج زتجلب المرح وتدخل السرور
اا اذا لم يكن لديه من هذا اوذاك يهاتف اقرب الناس الى قلبه وروحه
اما الوصفة الناجعة فهي تلاوة ايات من الذكر الحكيم وخذ اوخذي وصحفكي وانتجعي مكانا قصيا واتلو ما تيسر لك او افزع الى الصلاة تنفل ماشاء لك
ختاما اسال الله لكم الحلاة وعدم الشناة ويبعد عنكم الزهج والقرف .... آمبن

الاخ العزيز عادل على.

والله انا عارف عزاز انها انسه .وعلم على راسه نار..والله كتبتها العزيزه عزاز.. لكن لا ادرى ماذا حصل.اما عن موضوع المحاضره.الطويله..القصد منها ان مسببات الزهج تتلون وتتغير وتتشكل بعدة اشياء ورؤى ..وليس من خلال الانسر ماشين...فقط بل فى تركيبتنا وقهر الظروف
وناسف للتطويل.
ولها ولك ولكم العتبى.

عميق التقدير

أستاذي عصمت العالم ...
لا تثريب عليك في مناداتي بصيغة المذكر، فأنا انحدر من أصول لا تعترف بالفروقات اللغوية بين الذكر والأنثى، فأختي ما تزال تصر على مخاطبتي كصبي!
وتسألني بحنية الدنيا : انت يا عزاز ليه ما بتاكل كويس؟؟؟؟! انت زعلان مني لا شنو؟

**يمكن معاك حق، الغربة المتواصلة بتخلق إحساس متأصل بالزهج... ولكني ولدت وصدرت لمدن الغربة مبكرا ولم أعايش معنى الوطن...
ترى ماذا افتقد؟ أم هو group behavior وخلاص ؟

حتى تحين الإجابة، تحتل كدايسي سقف دماغي وتشبعه مواءا وخربشة!!!

تسلم على المرور وتشكر على الإطالة الممتعة

اخوي ضيا ...
شوف للضمان يعني -، لانو انا حاولت افك الشفرة بس يمكن اكون فشلت -
أنا ما عندي مانع أتحبس مع روحي العمر الجاي كله بس ما تفكوني
مع ناس ما بحبهم (طبعا ديل ما قدرت اصنفها علشان كده الرد عام
وليس له لا لون ولا طعم ولا رائحة (H2oعديل كده) ..
اسألني ليه أنا ممكن اقعد معاي واكون في قمة الاستمتاع ...
أجاوبك ....
لأنو أنا بتفق معاي شديد وبطاوعني وبسايرني ..
انا وانا بنتفق في الدماغ العالية ومعاملة الدنيا بما تستحقه
من الطناش وتحليل المشاكل لعواملها الأولية وغالبا ما نخلص للاتفاق
على الرضى المطلق بالقضاء والقدر ...
انا وانا مهما نتشاكل ونختلف بنتصالح والنفوس بتتطايب و ومالناش
كبير في الفرح وبنصى تاني يوم ناسيين امبارح وبنكون أولاد النهارده ...

علشان كده يحز في نفسي أن اتخيل فرضيتك، لانو الفرضية دي اسعب من الحبس
الانفرادي زاتو ....

الاخت العزيزة / عزاز

Quote: حامي حما جمال الروح الأخ أيوب ... اتقدم بطلب عضوية لجمعيتكم الموقرة واطمح بالحصول على منصب المنسق الرسمي أو أي منصب إشرافي رفييييييييع ورشيق ...

يسر جمعية جمال النفوس العالمية ان تعلن رفضها طلبكم للانضمام الى جمعيتنا وذلك ونظرا لدراسة الموضوع من قبل مجموعة ( تصنيف اللوك ) حيث تبين لنا ان لوككم الواضح بالصورة الموجودة بالموقع به لمحات جمالية وهذا ما يتنافى مع مبادئنا وثوابتنا القائمة على كراهية الجمال وبناء عليه واذا كانت هذه الصورة غير عاكسة للواقع الفعلي نرجو ما ييلي
1- ارسال صورة حديثة عند لحظة الصحيان من النوم ( وذلك تماشيا مع مبدا الجمعية ( السمح سمح ولو قام من النوم )
2- اي مستندات اخرى تؤيد الشناة وجمال النفس

وفي حالة عدم مدنا بهذه المستندات خلال 3 ثوان من وقت هذا الخطاب يعتبر طلبكم مرفوض ( وشوفي ليكي جمعية جمال نفوس غيرنا )

العضو المنتدب لجمعية جمال النفوس
شعارنا جمال النفوس اسمى واغلى

السلام...مبارات السطور فقهتنى بدورلى حلاقه بتحلق بفتح الحاء وتشديد مكسور للام ما بتحلق يعنى ما بتقص بتسكين التاء وضم القاف وتسكين الصاد ولو جيت صاد بفوتنى الحصاد


منصور

تصدق بأيه يا اخوي يا منصور انو أنا اليوم كان عندي اختبار عربي مااااكن ...
تأملتني فيهو (لو) بجاوبها الممتنع لامتناع شرطها بتأمل وإعجاب ...
واحتاروا فيني الجمل الاسعافية ...
وجهجهت ليك منتهى الجموع حتى عادوا فرادا ...

بس كلامك ده،
وحات اخوتي مع الكدايس غلبني افهمه ...

وطبعا اكيد انت عارف انو انا من غير الناطقين باللغة( الأربية ) نظرا لدمائي النوبية ....
لهذا، يا ريت توضح المعنى لأنو انا بتوتر لما ما افهم، مع انو دي الحالة العامة بتاعتي بس أنا بحب أغالط نفسي!

تسلم على المرور واعتبر الانسر ماشين ماشينك وتقدر تستلفه مني في أي وقت ...

سلام عزاز تاني وتحية لي كل الكدايس اسف المتداخلين

والله الجابني وتور كديستي من نومة كلام ممكونة دي

ولي يومين انا والكدبسة بنحسب في حسبة ممكونة دي لانها قالت:

أها يا عزوزة...جيتك صادة بعد الحين و المين...لكن الحال في حالو..و الزهجة إتقلبت قرفة..و على المتضررين اللجوء إلى القضاء ..على الرغم من أن القانون لا يحمي المدغلبين...
أهاأأأأأأأأأ...عرفتي مشكلتي شنو؟؟؟؟
بعد الشناة ...كمان في طن زيادة وزن أو كما يتفلهم الخواجات و يقولوا over-weight ..وهو بالأصح كومر-ويت !!!
لك منى هذه الرسالة الطريفة...ارسليها لكل الكومريون و الكومريات البتعرفيهم.

Quote: Diet For Stressed Women This is a specially formulated diet designed to help women cope with the stress that builds up during the day. Breakfast 1 grapefruit 1 slice whole-wheat toast 1 cup skim milk Lunch Small portion lean, steamed chicken with a cup of spinach 1 cup herbal tea 1 Hershey kiss Afternoon Tea The rest of the kisses in the bag 1 tub of Haagen-Dazs ice cream with chocolate-chip topping Dinner 4 bottles of wine (red or white) 2 loaves garlic bread 1 family size supreme pizza 3 Snickers bars

عليك الله دا كلو ديزرت؟ والله دا استرس ذاتو

وكمان شوفوها تاني قالت شنو:

Quote: Late-Night Snack Whole frozen Sara Lee cheesecake (eaten directly from the freezer) Remember: Stressed spelled backwards is "desserts." Send this to all the women you know or ever knew, and you will immediately lose 10 pounds.

دي انا وكديستي غلبنا حسابة هي بتقول الباوند هنا المقصود بيهو الوزن وانا اقول ليها لاء المصود انك بتخسر 10 باوند استرليني يعني قروش

اها عليك الله يا عزاز ومموكونة ورونا الصاح منولانو نقص الوزن مقدور عليهو بس خسارة القروش حارة


كدايس تجقلب مصايب تحنن

عيونا بتركقش جريوات تسنن

مرايس الفضيلة وتقبل تفنن

سخيلا بيرضع وفارا مسنن

وحالا مكرفس وجنا بجنن

شديق البنية وشافعا بحنن

شيب البخاتة وحليبه المقنن


بسم الله انتو دي دي كديسة ولا دا جنو منو؟

ودي وتحياتي تاني

عبدالله