،، نــجـــااااااضــه ،،،،،

،، نــجـــااااااضــه ،،،،،


12-21-2007, 07:53 PM


  » http://sudaneseonline.com/cgi-bin/sdb/2bb.cgi?seq=msg&board=135&msg=1207287422&rn=0


Post: #1
Title: ،، نــجـــااااااضــه ،،،،،
Author: محمد سنى دفع الله
Date: 12-21-2007, 07:53 PM

نجااااااضه
جانا العيد، أكملنا إستعدادنا الترحيبي بي كل النا س . فرحة العيد واللمـه وضحـك الأهـل والأصحاب ، لازال يتردد في غرفنا الخالية من العيد الفـا ت ، والفا ت فا ت في يدينو سبعة
لفا ت .وانا راسي لافي من هسي ، ودايخ سـبـعـه دوخات ، عقلي المفتوح على الخيا ل .
فاتح أبوابو لي آخر تقليعا ت ـ نجاااضه ـ
ماذا سيفعل فينا هذه المره ـ نجاااضه ـ وأختو نجاااااضه تووـ حلاة الدنيا عليها سماحة
واخوها جميل القسما ت ياسلام عليهم وهم داخلين كل بيت ماشاء الله عيني بارده
اسمهم ما مهم الأسماء.. لانو اسمهم لاينطبق على افعالهم ..مهما وضع لنا أصحاب الألسنيا ت
دلاله للأسماء ومعانيها وجمالها، ووقعها ,لن يجدوا من نبيلها سوى ــ نجااااضه ـ
زوجتي لها طول بال في التعامل مع الأطفال الحلووين ، لكن مع ـ نجاااضه ـ تـفتـح عـيونـها
وتصمت وتصن وتطير منها الكلمات , والونسة, وتقعد زي البكمه . زي الما بتعرف تتونس ..
نجاااضه ـ ونسة شنو المعاهو ..
نجاااضه ـ التقول هو واختو محرشين : زي البقولوا ليهم أسمعو هنا ما تكسرو ولا تخربو
نحن ماشين بيت عمو.. وهنا،، لاهللو ولا نططو ,عادي واقفين..هناك في بيت عمو ,كســرو وحتتتو ,
ودمروو ..متل ما عايزين .. يبتسم نجاااااضه ونجاااضه توو ـ بسمة يا حلاة الدنيا عليها
واقفين هااااديين الهدوء الذي يسبق العاصفة ، عاصفة شنو ،، قول تـســونامي ،،،
توســنامي شنو . ! بخجل لو اطلقو اسمو على ديل ..المفروض يغيروا اسم العواصف
والزلازل وحتى مقياس ريختر يبقى مقياس ، نجاااااضة ـ
بيوميكانيك ، ما طفل عادي ومعاهو نجاااضة توو ـ ديل لو اجتمعوا ممكن بي بساطة اعملو كارثة ، كارثة بت الناس دي .. ممكن تستعين البلدية بي خدماتهم ، لازالة كل المباني القديمة.
دايما ما يدخلو البيت وفي عقلهم غير البريئ خــيــته خــتريـه انا شاكي انو ديل ناس كبار لكن متنكرين في هيئة اطفال ,ياربي اكون صاح ؟ ما علينا بدخلو البيت واحد بياخد الميمنه والبت
بتاخد يسار البيت وببدوا الهجوم بدون ما يستعملو المربع الإنجليزي ده مش تقدم في الهجوم
الكاسح حالتو ابوهم ولا اشتغل في الدييش كان نقول الشغل ده شغل جينات وكده ..وهم في طريقهم الى المجد بمروا على كل زوهرية معطك معطك وكل شتلة عطرية زيطك زيطك
وكل نبته ظلية نيفك نيفك وعلى كل طاولة بها كتاب اودبدبوب فجكك فجكك..الولد بالزات تقول
أرســـطو هو بكون ارسطو لحدي ما ارص الكتب على الأرض .. لكن اول ما يمزق الوراق
ورقة ورقة بتحول الى عدو الحروف والكلمات والأرقام .. الكتاب المبزعو واكرفسو تقول فرمتو
مكنةلحمة ,عندوقدرة هو اختو على الفرم والعجن والتمزيق نادرة ..اطلعو على الكنب شئ عادي
لكن الماعادي بمشو وبجروا على حافته امهر بهلوان سيرك او متمرن في فرقة الأكروبات هاوي
بالنسبة ليهم ..وهم ماشين بنزلوا اللوحات الفنية من على الحيطة . طبعا عشان نعيد ترتيبه ، برموا كل العرايس واللعب والتحف وراهم وهم ماشين لي قدام دون النظرللخلف بي غضب او
بي فرح ، واهلهم ؟ سالتوني من اهلهم الزي الماجو معاهم ..لايهشو ولابنشو ..الساعة الجا العصير ، امسكو ليك كباية العصير واتجووها على الطاول الزجاج ،توج توج .لمن الطاولة تقول واااااي ونحن نقول وااااي من الضحك مع امهم وابوهم على خفة دم نجااااطة وتووو,,
المرة الفاتت في الموول نجاااضه لازي اختو بي عربة البضائع وتووووش في التنزيلات على
المكرونه والشعيرية نزلوها الأرض ..قبل ناس هاجوج ماجوج الجايين من سقط لقط ارتبوها
كانو راكبين عربية تاني ( غاريي ) ومتوجهين صوب هرم تنزيلات المياه الغازية نزلوها الأرض والبيبسي والكولا طرقشت والعمال طرشقوا من الزعل والموية بقت ترش في الناس مجانا ونقطة موية ما نزلت على نجاااضه ولا نجااضه توو ـ وهم بغنو في اغنية (الكولا ))
لننانسي عجرم ـ دي الدنيا حلوة...ـ الفيها نجاااضه ونجاااضه توووــ
اتمنى ان تعيدو على خير وكل سنة طيبين طيبين ــ

Post: #2
Title: Re: ،، نــجـــااااااضــه ،،،،،
Author: Muna Khugali
Date: 12-21-2007, 07:57 PM
Parent: #1

ولامن ربنا يساعدنا ونجي راجعين..
نقو ليك كل سنه وانت طيب يا أحلي أخو..

Post: #3
Title: Re: ،، نــجـــااااااضــه ،،،،،
Author: محمد سنى دفع الله
Date: 12-21-2007, 08:04 PM
Parent: #2

كل سنة وانت في العافية
وعام سعيد وعمر مديد
ومنتظرينك انا ونجاااضه
مودتي

Post: #4
Title: Re: ،، نــجـــااااااضــه ،،،،،
Author: بله محمد الفاضل
Date: 12-21-2007, 08:09 PM
Parent: #1

رغم كل هذا العذاب الذي يصنعونه بنا ولنا
إلا أننا لا نعلم كيف سيكون طعم وشكل الحياة دونهم



كل عام وأنت والأسرة بخير
وكفاكم الله شر كل ما يأتي منهم ومن سواهم

Post: #5
Title: Re: ،، نــجـــااااااضــه ،،،،،
Author: محمد سنى دفع الله
Date: 12-21-2007, 08:16 PM
Parent: #4

بله
العيد سعيد عليك
اجمل الأطفال
الأشقياء برغم الشيطنة
لكنهم حلويين وممتعين
بكره الجملة البكتبوها في الشهادة
هادئ الطبع وحسن الأخلاق
جملة مكررة دون وعي وفهم
والطفل حينما يمرض تسكن حركته ولا يتكلم
النشاط والحيوية هي عنوان الطفل الصحيح ومعافى
وكما قلت نهواهم بشيطنتهم وضحكهم الصافي
وعيدك مبارك
وتحيات نجااااضه


Post: #6
Title: Re: ،، نــجـــااااااضــه ،،،،،
Author: احمد معتصم الطيب
Date: 12-21-2007, 08:43 PM
Parent: #5

السنى الفنان
عيدمبارك

عندى نجاضه لسع
فى اللفه ربنا يحفظو ويكبرو وينجضنا زى نجضاضك الحلوين
الله يحفظم ليك قول أمييين..دا من هسع ظاهرة علية
علامات النجاضه الله يسترو من نجاطوو الجاية. هسسسع
مامقصر تب الله يديهو العافية ويديكم أنتو كمان..
وبنقول ربى ماتحرم بيت من الاطفال ربى ماتحرم بيت من النجطاااط

كل عام وأنتم بخير وربنا يحفظم ليكم ويحفظكم لهم..

Post: #7
Title: Re: ،، نــجـــااااااضــه ،،،،،
Author: محمد سنى دفع الله
Date: 12-21-2007, 08:55 PM
Parent: #1

احمد معتصم الطيب
العيد مبارك عليهم
وربنا اخليك ليهم
واتربوا في عزك
ابقو نوووجاااض
ده المطلوووب
ابقو تجاااضات
ده المرفوض
اتمنى لهم النجاح والتوفيق
وانجضوك على نار دافيه
عيدك سعيد وعمرك مديد
واولاد في العافية
ولك مودتي


Post: #8
Title: Re: ،، نــجـــااااااضــه ،،،،،
Author: Alsa7afa_30
Date: 12-21-2007, 09:09 PM
Parent: #1

إلى كل النجاضـات
.
.



Post: #9
Title: Re: ،، نــجـــااااااضــه ،،،،،
Author: محمد سنى دفع الله
Date: 12-21-2007, 09:20 PM
Parent: #8

خسام الصحافة كم
ياروعة لك الحب كلو
دنيتنا الحميلة تربعت على قلوبنا
وقلوب الأطفال زمنا طويلا
ومازالت
وهي اغنية من الحان الملحن العبقري
يــوســـف حـسـن الصـــديـق
وشاركوا فيها مغنيات كانوا اطفال وقتها ولم يكونوا نجاااضات
والأن هن امهات لهم المودة والمحبة
ولك تهاني العيد ومشاعري النبيلة
وسلامي وعيد سعيد

Post: #10
Title: Re: ،، نــجـــااااااضــه ،،،،،
Author: Amir Omer
Date: 12-21-2007, 09:47 PM
Parent: #1

والله يا سني ضحكت لما (إتفنقلت) لي ورا

Quote: وهم في طريقهم الى المجد بمروا على كل زوهرية معطك معطك وكل شتلة عطريةزيطك زيطكوكل نبته ظلية نيفك نيفك وعلى كل طاولة بها كتاب اودبدبوب فجكك فجكك

الموسيقى التصويرية بتاعتك دي عشتها معاك حتة حتة لحدي
ما أتخيلت نفسي قاعد في طرف الكرسي وفاقد التركيز في الونسة
ومتابع نجاااااضة ونجااااضة 2 وأعصابي بايظة!

عارف زي نوع نجااااضة ديل تقوم تجمع ليهم الحاجات الأنت ما عايزها كلها
وتختها في المخزن .. وأول ما يقولوا ليك جايين زيارة تقوم يا حبيب تدخل
الحاجات البتخاف عليها المخزن وتطلع ليهم الحاجات الأنت ما عايزها وتقعد
مُستكييين وتستمتع بالمنظر فجخك فجخك


قلت لي طرشقوا الببسي؟ هههههههه

Post: #11
Title: Re: ،، نــجـــااااااضــه ،،،،،
Author: محمد سنى دفع الله
Date: 12-21-2007, 10:17 PM
Parent: #10

انت يابتاع الموسيقى اقعد اتنفقل لي
ةنحن هنا مفنقلين من عمايل نجاااضه
كيفك ياجميل ربنا اخلي ليك النجاااضه بتاعتك وتتربى في عزك
وحأعمل بي فكرتك دي الظاهر عليك كنت نجاااضه
ياخي دي فكرة مجنونة
من بكرة الم الحاجات المنتهية وفي امل اكسر معاهم
وتكون مشاركة مني واعلمهم خبرات جديدة
خايف اقولوا لي باعمو الحاجات دي قديمة
وهتا حيكون مع دهشتي صوت موسيقى
كككككككككنق

Post: #13
Title: Re: ،، نــجـــااااااضــه ،،،،،
Author: نادية عثمان
Date: 12-21-2007, 10:22 PM
Parent: #11

ده برضو اسمو سناريو النجاض !!

السنى

موش قلت بتجى القاهرة ياخ ؟!!

Post: #14
Title: Re: ،، نــجـــااااااضــه ،،،،،
Author: محمد سنى دفع الله
Date: 12-21-2007, 10:27 PM
Parent: #13

ناديا
التحيةوالمودة
وفي البال الجية
والمرة دي من اول يوم معاك
كل المحبة واتمنى مايمر عليك نجااضه
وعيد سعيد

Post: #12
Title: Re: ،، نــجـــااااااضــه ،،،،،
Author: نادر السوداني
Date: 12-21-2007, 10:22 PM
Parent: #10

الظاهر يالسني اخوي نجااااضة ونجاضة 2 ديل نجضوك نجاضة الجن
الاطفال صديقي العزيز هم احباب اللة والطفل عندما يكون نجيض زي نجاضة
بيكون عاوز يلفت الانتباة والناس الحولة تكون مركزة معاة وفي الغالب زي
حالة نجاااضة ازا لقت اهتمام بيكون عالم وازا لم يلقي الرعاية والمتابعة بيطلع مجرم عديل كدة ها ها ها

Post: #15
Title: Re: ،، نــجـــااااااضــه ،،،،،
Author: Alsa7afa_30
Date: 12-21-2007, 10:28 PM
Parent: #12

Quote: بيطلع مجرم عديل


Post: #16
Title: Re: ،، نــجـــااااااضــه ،،،،،
Author: Amir Omer
Date: 12-21-2007, 10:31 PM
Parent: #1

Quote: بيطلع مجرم عديل كدة


دي فرويد ما سبقك عليها يا نادر

Post: #17
Title: Re: ،، نــجـــااااااضــه ،،،،،
Author: محمد سنى دفع الله
Date: 12-21-2007, 10:42 PM
Parent: #16

عارف يانادر اخوي
الزي نجاااضه
ديل بعدين بكونوا هادين الطباع
وببقو مساكين لمن احننو بدون حنه
لكن زي ماندهش حسام الصحافة
وزي ما اميرو اندهش بي صورة فرويديه
اتمنى ان لايطلعو مجرمين لانو لو طلعو مجرمين
اعذبو الناس جنس عذاب
ديل مجرمين نجاااضات
دووم دووم دووم

Post: #18
Title: Re: ،، نــجـــااااااضــه ،،،،،
Author: Mohamed Ahmaed Olyesh
Date: 12-21-2007, 11:04 PM
Parent: #17

وانا جيايك تماما
ويا نجطتك يا نجطتني
عليش

Post: #22
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 06:26 AM
Parent: #18

البشوفك بعرف تماما انك شفت ومغدده
وانك كنت نجااااضه كبير
نجاااضه من النوع الموقف الحلة على فد رجل
ولمن تلقى مرة جااااره ولده بيد واليد التانية
بتعدل بيها في التوب اللابسه باهمال واضح
لمن نص التوب جاري بالواظه
اعرف الود ده داقيهو النجاااضة
عليش
وامكن
امكن
كنت هادي الطبع
مسكين شلولخ
مودتي وعيدكم سعيد
وكل سنة طيبين طيبين

Post: #19
Title: Re: ،، نــجـــااااااضــه ،،،،،
Author: الملك
Date: 12-21-2007, 11:04 PM
Parent: #1

كل سنة وانت طيب

..
..
الله يخليهم ليكــ

"انت ذاتك نجااااضة "


بتكون!!زمان

Post: #20
Title: Re: ،، نــجـــااااااضــه ،،،،،
Author: Nader Abu Kadouk
Date: 12-21-2007, 11:58 PM
Parent: #19

السني
كل سنه إنت والاسره بخير

واحد صديقي بقول نجاضه مرادف للمرأه

صديقي ركز معاي

ودابكدوك

Post: #24
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 06:47 AM
Parent: #20

ابوكدوك
ياسلام ياصديقي سكنت بانت غرب
وصديقي حسن ابوكدوك
من اسمك بتكون عندك الف حكاية
في ذكريات الطفولة والاولاد الشياطين
لكنك جيت اليوست قايلني
بتكلم عن البنات السمحات البنجضو الزينا
نجااض
قول لي صاحبك
ديا نجاااضـة بالتا
يعني بتتقري نجااضتتون
ديك يتاء التانيث
ودي النجاااضه بالها وممكن تكتبها بالألف نهاية الكلمة
والله اعلم
المهم انت معانا ولا مع الخيانة
حتكي لينا المجاااضات العندكم ولا انت كنت نجاااضه
ولا صاحبك هو النجاااااضه
شاور عقلك ونحن منتظرين
مودتي وعيد سعيد

Post: #164
Title: Re: ،، نــجـــااااااضــه ،،،،،
Author: عثمان دغيس
Date: 01-15-2008, 10:01 AM
Parent: #24

ربنا ما تحرمنا من النجاضات ديل

بالله أنا كل يوم وأنا جاي على البيت من الدوام أكون شايل هم إني كيف إتخارج منهم وألقى لي فرصة أنوم فيها بعيدا عن الضوضاء
لكن اليوم اليكونوا فيه مع خالهم علي سند أم هلا هلا تمسكني وما أقدر انوم من كترة الهدوء !!!

ده يسموه شنو يا السني طمنٍي !!

Post: #23
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 06:39 AM
Parent: #19

الملك والناس رعية
العيد مبارك عليك النجاااضه الكبير
هو في نجاااضه قدرك
تذكر يوم الحفلة العلتوها لينا لمن خطفت الكاميرا وصورت روحك من قريب
وكمان عرضت الصورة في البوست الكان مفتوح
دي حركة ما بعملها غير واحد نجااااضه
انت ملك الجاااضين والنجاااضات
وانا لي هسي نجااضه
ومرات زوجتي بتقول لي
انت براية كبير
وحقو اعملوك شعار البري الغير برئ
عيد مبارك
ومودتي لمن تجي تاني بقصص النجاااضات

Post: #21
Title: Re: ،، نــجـــااااااضــه ،،،،،
Author: د.نبراس
Date: 12-22-2007, 00:29 AM
Parent: #1

استاذنا الجميل ,, السني دفع الله ,,

كل سنه وانت طيب ,,
واطفالك زايدين نجاض ,,
لكن والله نجاض الاطفال ده اجمل انواع النجاض على الاطلاق ,,
مخلوقات صغيره كده وملامحم دايما مستديره ,,(عيونم مدوره وجضومم مدوره وهلم جرا)
مرات بكونوا فصيحين كده ومحرجين !! (بكسر الراء مش فتحها,هنالك فرق)
التلقائيه والصدق ده بيزيد جمالم ,,
لما يطلقوا العنان لضحكاتم , بتحس انو كلو يهون قصاد الضحكه دي ,,
وامتع شي انك تسأل ليك طفل سؤال كبير ,,
زي تعرف شنو عن الديموقراطيه مثلا !!
وتبدا الحيره تترسم في عيونو , ويمكن يقول ليك بعرف انها
ما حلوه !!

اما نوعية قطع وخرب و(مزق) دي نوعيه كمان غريبه ,,
وفعلا بيخلوني اشك انهم كبار متنكرين على هيئة اطفال !!

ربنا يحفظم على جميع هيئاتم واشكالم ,,
ويكتر لينا منهم دايما ,,

ويكتر لينا منك انت كمان ,, ومن كتابتك السمحه ,,

Post: #26
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 07:57 AM
Parent: #21

د. نـبـراس
الأجمل
العيد مبارك عليكم
وربنا اخلي لينا كل اطفال السودان
اجمل حاجة في الدنيا الأطفال الشياطين
والنجااااضات لحد ما نقابلهم(( وجهالوحا )))
زي ما قراها واحد صاحبنا كان نجاااضه
وجها لوجه تلقي نفسك قدام نجاااضة
وتبقي في التحلك منو شنو
نجاااضة طفل إستثنائ
قل وجوده في هذا العالم
لكن المكان البكون فيهو
بخلي منطقة الحدث منطقة كوارث
طبعا اجمل ضحك في الدنيا ضحك الأطفال
نحن كان لمن نكون شغالين مسرحية اطفال
كنا بنموت من الضحك من ضحك الأطفال
فبل يوم كنت مشارك في اختفالات العيد
واثناء ما شغال عدت بت صغيرة
مسكتها بصورة عفوية خالص
واوقفتها بجانبي
وجدتها مطيعة وبعد ما كملت كلامي التفت اليها
وقلت ليها اسمك منو
برطمت ورطنت بيحروف وهمهمة لكن بثقة وصوت وواضح
اااايييهههوووي وبث
اسمك آآآيه ولا ايات ولا شنو
ااااايه ووهووووشونشوونش ايوه وبث
وتعالي مع ضحك الناس سالتها عن حال البلد
وهل هناك امل في تطور البلاد من خلال التداعي الأركلوجي
وتعالي شوفي الأجابات
عارفة في سؤال
قالت لي الأجابة 12345
واناطبعا عرفت انها قاصدة انها بتتكون من خمسة محاور
وبقيت اقول المحور الأول
وشوووووووووتجاوب
المحور الثاني
وشوووووووووووهاك ياكلام
وكانت الروعة زاتها
لكن قطع شك البت دي ما نجااااضه نجااضه انتي الخليتني صرفت الكلام ده كلو وعيد سعيد

Post: #25
Title: Re: ،، نــجـــااااااضــه ،،،،،
Author: Abuelgassim Gor
Date: 12-22-2007, 06:58 AM
Parent: #1

أستاذ السنى
العيد مبروك
والله دى اتقطعت فيها غديل
بايوميكنيك ماخده من العبث حبتين
أعمل حسابك يمكن أبوهم (مايرهولد).
مخلصك / قور

Post: #27
Title: Re: ،، نــجـــااااااضــه ،،،،،
Author: هاشم أحمد خلف الله
Date: 12-22-2007, 08:02 AM
Parent: #25

الحبيب السني كل سنة وانت طيب وصدقني ده اول بوست افتحو من هذا الصباح
وربنا يجمل أيامك ويسعدك ومن تحب يا غالي .

Post: #29
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 08:13 AM
Parent: #27

هاشم هشومه
بتكون كنت نجاااضه لمن كنت صغير
مقبولة منك العيدية
واتمنى يكون قراية البوست الأول كانت فاتحة خير عليك
لكن ده ما بحلك
عايزين حكاوي النجااضات زمان
وهل كنت هادي الطباع ولا نجاااضه
يلا قوتك معانا
وعيد سعيد

Post: #28
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 08:08 AM
Parent: #25

الدكتور الألمعي
والود الحافظ عهود المودة
والصداقة الوفا
ابوالقاسم قور
البايومكنيك دا لو شافو اصحابه كان خلوها
كيفك والعيد
كل عام وانت بالف خير
الرجاء ارفع لينا بوست عثمان عندي كلام كتير ما قلتو
اما بوست التور والكمبو تور
جايهو بالمهلة
لك مودتي
ومنتظر منك حكايات الطفولة ونجاااضات زمان
ومودتي
عيدك سعيد

Post: #30
Title: Re: ،، نــجـــااااااضــه ،،،،،
Author: سلمى الشيخ سلامة
Date: 12-22-2007, 08:22 AM
Parent: #28

السنى الحبيب كل يوم وانت بالف خير
نجاااااضة لكن
عارف طارق اخوى كان نجاضة بطريقة قديمة شوية
كان عنده نبلة
النبلة دى بطلع بيها فى راس البيت
والماشى كله فى غضب طارق ورحمته
وقول حريف كمان
الحلة كلها تبكى الشفع بنات واولاد (ما بيعتقش )
ولما الناس يجو يشتكو لامى منه
تفتش فى البيت ما تلقى النجاضة
اتاريهو فى راس البيت يا فردة

طبعا البشوف طارق هسى وزمان مافى اى علاقة
هسى هدوء لمن غلط

لكن يا السنى متذكر جملة سارة بت طارق اخوى

دى عندنا ما عاوزاها
ما نجاضة ؟

ياخ مشتاقين وقاسم بسلم عليك اتصل فى العيد
وانت تقول عاوز التلفون وما تتصل
هسى دى ما نجاض عديل ؟
ياخ مشتاقين عديل كده

Post: #32
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 08:33 AM
Parent: #30

ياسلمى سلامة وسلامة ليك العيد
الناس البدورو نجاااضه جو جو جو جو
ورقصة للصباح
اول حاجة ما تدوري هجوم نجاااضه
انت ما اديتيني مفتاح الخط
وانت عارفة ما اعرف افك الخط إلا وعندي مفتاحو
وياستي جبت داك يالبرنامج الماخمج
اتكلم معاك بالتلفون مجانا بس الكم يورو البدفعهم بداية السبوع
يلا البوست ده حقك ليك اللحم ولينا العضم
وماتخلي نجاااضه الا وتنجضي لينا هنا
محبتي الأزلية
بعني محبة بيض ساكت
لانو ازلية من زلالي
والله اعلم
عيد مبارك

Post: #31
Title: Re: ،، نــجـــااااااضــه ،،،،،
Author: هند محمد
Date: 12-22-2007, 08:29 AM
Parent: #1

استاذ السنى ربنايخليهم ويحفظهم ليك ..

كل عام وانت واطفالك بألف خير وصحة وسعادة ..

وربنا يحقق الآمانى ..

Post: #33
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 09:34 AM
Parent: #31

هند العيد مبارك عليك
وكل سنة طيبين طيبين
اطفال السودان كلهم اطفالي
وتابعي معانا في العام القادم
موقعنا
آصحاب آصحاب
موقع لكل اطفال السودان في كل مكان
مودتي
وعيدكم مبارك

Post: #34
Title: Re: ،، نــجـــااااااضــه ،،،،،
Author: Abuelgassim Gor
Date: 12-22-2007, 10:12 AM
Parent: #1

يا سلمى بت الشيخ سلامة
العيد امبارك عليك
بمناسبة نجرت السنى للاصوات فجكك فجكك فجكك
هسى البقر دا وسط الطين ماشى فجغق فجغق فجغق
هسى عليك الرسول أستاذ السنى دا ما مضيع نفسو ساآآآى تقولى لى دى سوسير؟
هها فجكك فجكك ، زعطك زعطك ، نيفك نيفك نجرت السنه الجديده
لك كل الود
قورك الكوز المعفن أبدا من أجلك حتى يرث الله الأرض وما عليها


Post: #38
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 03:37 PM
Parent: #34

ابو القاسم قور
شايف سلمى لسه ما دخلت ليك
لها الندخل لبي جوة البيت
شايف بقرك ديل والجو الجميل ده
والطبيعة الساحرة دي
الم ليك فيهم نجااضه
الا البقر ده كلو يوحل في الطين دة
ما تقول لي البقر عندو حوافر ولا شنو ما عارف
والله نجااضه اسك ليك البقر ده كلو زي اشهر يقاري عندكم
وادخل بي البقر الفجقيبه
اخلي ليك البقر اوحل فوجبوخ فوجبو خ
وتجي تفج البقر من الطين اوحل تاني
لانو نجاااضه بكون اختار الحتة االميعه زي اشطر مهندس زراعي زلا بتاع مساحة
والبقر عشان اطلع تاني الا احي الصيف والأرض تجف حتين اطلع
ده نحاااضه
تحسبو لعب

Post: #35
Title: Re: ،، نــجـــااااااضــه ،،،،،
Author: نهلة عمر
Date: 12-22-2007, 11:55 AM
Parent: #1

استاذنا السنى سلامات

كل سنة و انت طيب و ربنا يخليهم ليك يكبروا و يبقوا عاقلين و هادئين

الاطفال بى نجاضم نعمة كبيرة من ربنا و ان شالله ربنا ما يحرم زول منها

جريهم و حركتم و جنهم هو روح البيت و احلى حاجة فى الدنيا

انك تصحى الصباح على فرفشتم و حركاتم المجنونة ربنا يخليهم ليك

طبعا اختك كانت نجاضة من الطراز الاول و بينى و بينك الطفولة دى لو

بقت فيها نجاض شن طعما؟؟؟

Post: #39
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 04:05 PM
Parent: #35

نهلة عمر
العيد مبارك عليك
أجمل ما في الوجود الأطفال
قلت لي لمن كنت صغيرة
كنتي نجاااضه
ورينا العينة للشقاوة
وكيف كاتن الحال
لازم نعرف
عشان نرد ليك
نعرف كيف كان طعم
نجاااضتك
مودتي ومنتظرين

Post: #36
Title: Re: ،، نــجـــااااااضــه ،،،،،
Author: د.محمد حسن
Date: 12-22-2007, 12:01 PM
Parent: #1

الزول الظريف السني

زي نجاااااااااااااااضة ون وتو

ديل انا مصنفهم من احفاد الهكسوس والتتار

اعداء الحضارة الانسانية

كل سنة وانت طيب

-

Post: #37
Title: Re: ،، نــجـــااااااضــه ،،،،،
Author: طلال عفيفي
Date: 12-22-2007, 03:21 PM
Parent: #36


السني السمح ، كل سنه وإنت طيب ..
مشتاق ليك شديد والله ..

تحياتي لأحلام ..


Post: #41
Title: Re: ،، نــجـــااااااضــه ،،،،،
Author: Osman Musa
Date: 12-22-2007, 04:33 PM
Parent: #37


استاذ السنى
عيد مبارك
الله يديك العافيه ويطول عمرك
وتحضر جديد جديدن يا سنى
_
يا سنى فى واحد نجاضة
الصباح بدرى حبوبتو ماتت
والناس تبكى .
والشافع النجاضة كان ببكى
وبقول يمكن حبوبتى دست قروشى وين ؟
صاحبك كان ممسك حبوبتو القروش . واى واى
الليلة يا قروشى .
الليلة يا قروشى هوى ..
يا زول صاحبك عمل عمايل عجيبه وكان محتج احتجاج
شديد على المصارى الما بتتم طراده

Post: #44
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 09:40 PM
Parent: #41

عثمان موسى
الولد النجاااضه
الظاهر عليك انت ود حبوبتك
ربنا ارحم حبوباتنا الحلوات
وحجايات
مهما كان الأطفال نجااضات
لكن ليهم العذر في جهلتم
اجكي لينا عن نجاااضه
من النجااضات الحولكم وما بكلم زول
ليك المحبة
وعيد سعيد

Post: #43
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 05:44 PM
Parent: #37

طلال تيتووو
سيد البيوت الونسة
والأحلام الملونة
محبتي
وتقبل تحيات
احلام
وامنياتها
عيد سعيد
لكل الحلويين

Post: #42
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 05:34 PM
Parent: #36

د. محمد حسن
التحية والمودة
عيد مبارك
زي ما قلت ديل
الهكسوس
لكن فكرة امير عمر
نخبي كل الكنوز
وبعد رحيل الهكسوس
نطلع المخبى ونكون حافظنا عليهو
وارجع جيش الهكسوس بدون نصر ولا خسائر
وبدون غنائم
مودتي
وعيد سعيد

Post: #40
Title: Re: ،، نــجـــااااااضــه ،،،،،
Author: هجو الأقرع
Date: 12-22-2007, 04:06 PM
Parent: #1

الاخ الرائع ابو النجاضات ، كل عام وانت وهم ومن يعز عليكم بالف خير وسعادة ..... اخى طبعا التسوى تلقى فما عليك إلا ان( تسكت ساكت ) لانك( نجضت )اهلك فحان دورك ، اللهم لا شماته ، والله يا ود السنى ما عليك إلا ان تاتى الى دخان عشان تشوف النجاض الكلكى و لا بس ملكى كمان .... بعدها سوف تحمد الله على النسائم التى بطرفك ، اسال الله لهما الحفظ والتوفيق ، اخى الكريم حصنهم صباح مساء ، وربى ما تحرم بيت من الاطفال .

Post: #45
Title: Re: ،، نــجـــااااااضــه ،،،،،
Author: محمد سنى دفع الله
Date: 12-22-2007, 09:58 PM
Parent: #1

هجو الأقرع
العيد مبارك عليكم
وكل عام والجميع بخير
قلت لي كيف انا كنت نجااضه
تجااضة الشوية دي
اتا كنت تيتان زي مابقول وانا صغير
اول حاجة ما كنت بعرف اتكلم لحدي عمري 8 سنوات
بتصدق واول ماعرفتالكلام وما سكت لليلة
بقيت براي ..صغير وكبير براي
وبجي دخان عشان اقابل النجااااضات
ما يطلعو نجااضات من دخان ساكت
لك المحبة والسلام
وكل سنة طيبين طيبين

Post: #46
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 06:49 AM
Parent: #45

اختا لينا كانت جنها وجن الأطفال النجاااضات
بتصبر على الواحد منهم مرة ومرتين
لكن التالته بتنبهو ولا بتشتغل بي امو ولا حاجة
في امهات باردات لابهشن لابنشن
التجاااضه في عوسو وهي تعاين
اها اختنا دي ما كملت كل التحذيرات
بتقوم تمسك النجاااضه
وتقول ليهو تعال ياحبيبي نديك حلاوة
ونجاااضة بمشي معاها
اها مع الحلاوة تديهو ليك قرصة
لمن اصرخ والحلاوة تبقى ليهو مسيخة
وتقعد بعد داك مالك ياحبيبي
في شي قرصك الملة قرصتك
ونجاااضة بي كده نضنمنو اقعد زي
نص ساعة بدون مشاكل
لكن في نجاااضه مش لو قرصتو

بوقف حال البيت على فد رجل

Post: #47
Title: Re: ،، نــجـــااااااضــه ،،،،،
Author: معتصم دفع الله
Date: 12-23-2007, 09:39 AM
Parent: #1

ياخي دي نجااااضه بي مزاااج ..
طاااخ ..
طيييخ ..
ضربو دقشو رماااه ..

الأولاد الصغار ديل عندي ليهم طريقه حلوة شديد في التعامل لمن تغيظني أنا زاتو ..
عشان كده ببقو أصحابي من صغار لغاية ما يبقوا كبار ..
كل سنة وانت طيب يا ود أبوي ..
وإن شاء الله كده زي ما عايز ..

Post: #48
Title: Re: ،، نــجـــااااااضــه ،،،،،
Author: Mohamed Abdelgaleel
Date: 12-23-2007, 10:34 AM
Parent: #47

العزيز السني - العيد مبارك عليك
كان العيد .. وكنت اسير صوب بيت خالي محمد ومعي نصر
الدين حمد وكنا في التاسعة نمني النفس بقروش زوارة
الفكي الأمين التي كانت تضج بالعصاير والعنكولويب
والفول السمح (كملو وشالو) .. وفي بعض أطراف الزيارة
أطفال يلعبون القمار ونجاضات كتار .. أصبح على بعد
أمتار من البيت ونحن حالقين جبنة جديدة فالحلاقة كاريه
كانت بالقروش ولم يكن م لزوم تضييع القروش فيما لا طائل
من ورائه حسب قناعات أهل ذاك الزمان تكرد الشعر مرة
كل ثلاثة شهور والسلام ..

وجدنا عبدو محمد نايل 8 سنوات وكان ولد نجاضة يمسك
حجرا بيده وقال لينا بدون سبب أمشوا من جنب بيتنا..
فسخرنا منه ولم نكترث وخطونا نحوه قاصدين دار خالي
محمد الذي كان يدخل يده في جيبه ويوزع على الأطفال يوم
العيد توزيع من لا يخشى الفقر .. لكن عبدو النجاضة تراجع
خطوتين وفكه فينا الحجر .. بحركة لا شعورية زغت من الحجر
فأصاب نصرالدين وطار شلال الدم من صلعة ملساء .. فلا عيدية
ولا زوارة ولا طمأنينة مع النجاضات وتبقى الذكريات الحميمة

Post: #52
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 01:36 PM
Parent: #48

محمد عبد الجليل
الذي نحب
اهلك وكل الحلوين
عيد مبارك رافلين في السعادة
شاكرين حامدين
والعافية تغطيكم
يا اخوي البوست ده كمين وانت وقعت فيهو
ده معمول ليك مخصوص كان تظهر ونتقالد بي شوق سنة
شرك منسوج من شرايني
قلوبية مضفورة من خيوط هواي
وبي صبر صياد
حارس عصفور هواك
وجيتنا ومعاك عبدو النجاااضه
ونصرالدين المفلوق غصبا عنو لانك ذواغ
وينك يازول ياهادي الطباع وحسن الأخلاق
وانت الشهادة ما محتاج ليها من النجااضات الزينا
وين اولادك وبناتك الفتحت ليهم فلبك وبيتك
للمعرفة والمتعة العميقة
للونسة والغلوتيات والحجى والناشيد الشجية
وينك ياتؤام الروح يا أنا
احكي لينا عن النجااضات
وعن طفولتك الشقية
عن بهجة ايامكم والشقاوة المشوطنه
اقوليك سعيد بي طلتك
اكون كذبت على احساسي
العمرو ما غاب علبهو فلبك
يا عصفور
احبك لله

Post: #49
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 11:10 AM
Parent: #47

معتصم الظريف
ماوريتنا الطريقة الخاصة بتاعتك
في التعامل مع النجاااضات
والا طاااخ طووووخ
نشربك الزي ما حصل شي
بالله يامعتصم
احكي لينا عن شقاوتك ونجيضك لي بيتكم
ولا جيكم يعني داير تثنعني
انك كنت هادي الطبع حسن الأخلاق
ده بعدك
منتظرينك

Post: #50
Title: Re: ،، نــجـــااااااضــه ،،،،،
Author: نهلة عمر
Date: 12-23-2007, 12:15 PM
Parent: #1

أستاذ السنى فى داعى للاحراج؟

ولله النجاض كان بى قرونو شى فى البيت و شى فى المدرسة و قصص

حبوبتى الله يرحما كانت جنها كل ما تشوفنى تقول لى يا بت جيبى موية

و أنا الموضوع ده كان موترنى خالص خالص

قمت يوم و على حسب البراءة و كدة قلت حبوبة دى انا اديها درس تانى اصلها ما ترسلنى لى موية

أستنيتا لمن نادتنى كالعادة يا بت جيبى موية

مشيت جبت كباية استيل و هاك يا شطة و يا فلفل و اديتا المويا طبعا عشان ما تكتشفا من لونا اذا

وديتا فى كباية قزاز(شفت التخطيط ده محبوك كيف؟)

ان شاء الله جرعة موية واحدة و العلقة الاخدتها للآن ما نسيتا و هذا غيض من فيض

اها لقيت طعم النجاض كيف (شطو و فلفل اسود ما بنبلع صاح؟)

تحياتى لكل النجاضين و أقول ليهم نجضو ساكت بكرة كلها تبقى ذكريات

Post: #55
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 01:51 PM
Parent: #50

لكن يانهلة
كنت نجاااضه
موقفة البيت على فد رجل
وامكن اكون ما بقغد زاتوو مش .؟؟
كلامك صاح الزول النجاااضه وهو صغير
بكون عندو شخصيتين
واحدة نجاااضه والتانيه هدايييييه
عندي اخوي حسان في البيت هاديييي
واخوي اسامة في البيت نجاااااضه
لمن اخوي سعد مسى المدرسة سألو الناظر
انت ياولد زي حسان ولا اسامة؟؟؟
فكر واجاب بكل هدؤ زي خسان
فرد الناظر اطلع برة برة برة ررررررررة
وكان حسان نجااااااضه في المدرسة
لكنانت بالغتي في الشطه شطه دي فوتي فيها الوراك والقدامك شطه
واخذ يردد شطه شطه لامن جنه
فعلا كنت نجاااضه

Post: #51
Title: Re: ،، نــجـــااااااضــه ،،،،،
Author: bushra suleiman
Date: 12-23-2007, 01:28 PM
Parent: #1

شكراً يا ود السنى .. كل سنة وانت والمدام بخير وعافية .. وتتحقق الامانى
يادوبو كدا الواحد عيدّ ..


Post: #58
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 04:43 PM
Parent: #51

الشاعر الفنان
بشرى سليمان
العــــــيد ســعـــــيد
وكل عام وانت والجميع
بالف خير
لك الحب كلو وحلوة الصورة
مودتي
منتظرين نجاااضاتك
اكان شعر او نثر

Post: #53
Title: Re: ،، نــجـــااااااضــه ،،،،،
Author: المكاشفي خضر بشير
Date: 12-23-2007, 01:46 PM
Parent: #1

كل عام وأنتم بخير،،،
واحسن من كدة في العمر ده في؟،،
اظنك بتذكر في أيامك ساي بس لونتها

Post: #59
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 04:47 PM
Parent: #53

المكاشفي خضر
كل عام زالجميع بالف خير
لونت ايامي وكتبتها
لون ايامك وارسمه لينا
هنا وخلينا نفرح بي شقاوتك
تلقاك كنت نجااااضه
احكي لينا البوست حفك
وانت من ناس البيت
عيدك سعيد

Post: #54
Title: Re: ،، نــجـــااااااضــه ،،،،،
Author: إيمان صالح
Date: 12-23-2007, 01:48 PM
Parent: #1


العيد مبارك عليك يا ود السني
اريت الدنيا دي كان كلها نجاضين ونجاضات بس




ايمان

Post: #61
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 04:55 PM
Parent: #54

ايمان صالح
العيد سعيد
كل الأماني الطيبة
عارفة المتعة في الكتابة بالبنفسج مش
من اجمل الألوان
والناس البتكتب بالبنفسج هم روح الفرح
وين حكاياتك ورواياتك عن النجاااضين
منتظرين
مودتي وعيدك سعيد

Post: #56
Title: Re: ،، نــجـــااااااضــه ،،،،،
Author: معتصم دفع الله
Date: 12-23-2007, 04:04 PM
Parent: #1

Quote: بالله يامعتصم
احكي لينا عن شقاوتك ونجيضك لي بيتكم
ولا جيكم يعني داير تثنعني
انك كنت هادي الطبع حسن الأخلاق
ده بعدك
والله يا ودأبوي أخوك كان منجض ليك البيت كلو زي الما حصل حاجة ..
وكنت كاواي شديييد وغيااااظ خلي الطبق مستور ..
ود أخوي الصغير زول نجاااض خلاس دا عنده جرس معلقو لناس البيت طوالي ..
واي حاجه عنده بس طقشك بردلب طوالي ..
يوم قلت ليهو ياخي خليك زول كويس وهادي وما تعمل جوطة في البيت ..
وكان عملت اي حاجة انا بزعل منك وبقعد ألاعبه ليك وأونسه ..
أها من ما أجي داخل بعمل فيها رايح وزول كويس ..
وبعد ما أمشي يواصل مسلسل النجاض المعتاد بس دا بعد نزل الجرس الداقيهو ليهم وهدا شويه ..
غايتو هسي ماشي كويس ودا كلو خايف من زعلي منو

..
.

Post: #60
Title: Re: ،، نــجـــااااااضــه ،،،،،
Author: khatab
Date: 12-23-2007, 04:48 PM
Parent: #56

..
. انجضضض
. عيون عيون عندك
. يا انجضضض
.الحلوووين
..
. بعد اذن الاساتذه الاصدقاء
. الشاعر والفنان
..
. رايك شنو فى النجاضضضين الكبااار!!
.
. كم ممتع هذا الحكى ..
. يا حليل مشروعنا داك .. وبرنامج يومى كامل
. تشرف عليه انت عن احبابك الاطفال
.. المحرومين عن الرعايه البرامجيه ّّ!!!
..
. لك الورد..المدام والضيوف
.

Post: #64
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 06:40 PM
Parent: #60

خطاب
يايها الرفيق الحالم
كل لجظة من حياتنا
كانت بقدر امالنا واحلامنا
لم نحقق سوى الأعمال الجميلة لم ولن نندم
على ما فعلناه
لاننا لم نعمل سوى الأشيا الجميلة
خطاب ما اجمل الأحلام
وين حلمكم بالفضائية
وين احلامكم
احلم
كل حلم في يوم بصبح خقيقة

Post: #63
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 05:42 PM
Parent: #56

كده البوست بقى حقك
بلا ادفق حكايات
يامعتصم البهجة
كنت نجاااضه
وبها المحرية فيك
معتصم واصل البوست
بتاعك عدييييل

Post: #57
Title: Re: ،، نــجـــااااااضــه ،،،،،
Author: kamal ali
Date: 12-23-2007, 04:17 PM
Parent: #1



لكن النجاضه ماعندكم يالسنى .

نجاضة الشفع ونجاضة العجرماب

بالمناسبه العجرماب اهل نانسى ديل قالوا عندهم فرع فى السودان

تقدر يالسنى تنكتم لينا وتورينا من وين .

كل الود ..

Post: #66
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 07:03 PM
Parent: #57

كمال علي
نجاااضه من امدرمان
منجض الناس صغير وكبير
مرحب بيك في دنيا النجااااضات
العجرماب ديل بطن من العجرباب
وديل الكانو بعملو حلاىة المولد زمان
اولاد عجرم وعجرب اها ناس عجرب قعدوفي بلادنا وعجرم ساق اولادوا وطفش
ناس بقولو رجع الريف المصري وناس بقولوا دقش افريقيا
لمن ظهرت نانسي وعرفنا انو جدها بعد وصل مصر قطع البحر ومشى لبنان
دي فصة الغجرباب والعجرماب
احبك عجربي وعجمي
واحب امدرمان

Post: #62
Title: Re: ،، نــجـــااااااضــه ،،،،،
Author: تماضر الخنساء حمزه
Date: 12-23-2007, 05:02 PM
Parent: #1

السني كل سنة وانت ونجاضاتك بخير

غايتو بي وصفك ده كان لميت نجاضاتي على نجاضاتك بقلبوا الحيكومة دي

Post: #67
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 07:24 PM
Parent: #62

البت النجاااضه
الخنساء
اخت الرشيد
الرشيد منو ؟انا عارف
كلامك صاح
طيب ما تنفذي لمي نجاااضاتك
وانا برسل ليك نجاااضاتتي
اخليهم اعملوا الماقدروا عليهو الأولين
لكن اقدروا نجااضاتك انجضوا النجاااضات المنجضضننا زي ما نجاااضاتي
نجضيين المنجضنهم
تجي تناجضيني وانا اناااجضك
المناجضة ولا الرفيق النجاااض
مودتي

Post: #65
Title: Re: ،، نــجـــااااااضــه ،،،،،
Author: معتصم دفع الله
Date: 12-23-2007, 06:55 PM
Parent: #1

يا ودأبوي خلاس خليت لي البوست دا ..
عارف كده ح أنجض ليك حنانو زاتو
شقاوة الصغر دي لذيذة شديد وأهلنا زمان كانو حنان ..
وأخوك تربية حبوبات يعني يدقونا بي جاي تقوم تجري لي حبوبتك تعمل ليك نظام ترضيات طوالي ونهير للكبار يا أولاد خلو الشفع ديل في حالهم ..
أها لما يكون في زيارات خاصه يقروا علينا فروضنا والتوصيات واللاذي منو، في اليوم داك بنكون مؤدبين والواحد مكتف يديهو تقول في مدرسة وكان قمت دقشت ليك كباية ساي قبل ما تنكسر تلقى مليون عين بتحمر ليك
في حاجة ما تفوت عليّ وعليك انو أطفال زمان كانت مساحة الحرية مفتوحه ليهم بمعني انو أي مكان ملعب لهم واللعبات الشعبية شايعه في الوقت داك لذلك كنا بنشغل وقتنا بيها وأي بيت في الحلة حقك وفي المساء بتكون مع حبوباتك وونسات فاطمة السمحة وحجاوي الزمن السمح ..
وبرضو الشقاوة والنجاضه كانت مكتوبه لينا ..

..
.

Post: #68
Title: Re: ،، نــجـــااااااضــه ،،،،،
Author: محمد سنى دفع الله
Date: 12-23-2007, 09:36 PM
Parent: #65

ماهي دنيتنا الجمبلة
كل الحب لأطفال السودان
من أجل ملاعب خضراء
من اجل مدارس بها الكتاب والمناشط
من اجل بيوت ما فيها نجاااضة

Post: #69
Title: Re: ،، نــجـــااااااضــه ،،،،،
Author: محمد سنى دفع الله
Date: 12-24-2007, 05:16 AM
Parent: #68

من اجل عودة مجلة الصبيان
لنرسم شخصية نجاااضه
من اجل مجلات للأطفال
وبرامج الأطفال حتى لايبقى في تجاااضه بين اطفالنا


Post: #70
Title: Re: ،، نــجـــااااااضــه ،،،،،
Author: احمد العربي
Date: 12-24-2007, 06:14 AM
Parent: #69

السماء
الممطره ابداعا
تعرف الواحد لو لقاك في العيد ده
كان فس فس فس اتريح بيك
ويطلع للعالم دي باجمل عطر
وينجضم نجاض شديد
لك الود والنجاضين ليهم القلب
واجمل ام هناك لها السماء

Post: #74
Title: Re: ،، نــجـــااااااضــه ،،،،،
Author: محمد سنى دفع الله
Date: 12-24-2007, 09:32 AM
Parent: #70

احمد العربي
مرحي حبابك في دنيا النجاااضات
ومعان بالصوزة والرسمة
والجكايا
يلا ارمي لي قدام مع النجااضات
ولا انت عارف تلفونك معاي انجضك نجاااض قبورة
تعال بالحكايات

Post: #71
Title: Re: ،، نــجـــااااااضــه ،،،،،
Author: يسرى صلاح
Date: 12-24-2007, 07:05 AM
Parent: #69

استاذ/ السني

كل عام وانت بالف خير وكل سنة وانت متالق
وحسب خبرتي الممتدة لاكثر من 12 عام مع النجاضات
نجاضات البيت مابيكونو نجاضات في البيت الا اذا
كان في نجاضات في زيارة لاهل البيت في الحالة دي بتكون
المنافسة شديد بين النجاضات الداخلية والخارجية
الكل بيحاول يثبت مهاراتو وخبراتو في رفع كثافة الام
والاب مع العلم بان النجاضة الداخلية في وجود النجاضة الخارجية
مابتقدر تعمل عليها كونترول حافظا علي مشاعر والد ووالدة النجاضات
الخارجية .

الله يخلي ليك النجاضات الداخلية ويكتر ليك الخارجية عشان نلقاك في سوق
واقف ماشي وبتقول واي النجاضة جننتني .


وكل عام والنجاجيض بخير


ابومناع


Post: #72
Title: Re: ،، نــجـــااااااضــه ،،،،،
Author: ضحيه ابراهيم
Date: 12-24-2007, 08:14 AM
Parent: #71





الاخ العزيز السنى

كل سنه وانت طيب وعيد مبارك وكل عام كل النجاضات بخير. اليك هؤلاء النجاضات الذين نجضونا نجاض الله اكبر حمودى وبرهووم
هذا البهووم له من النجاض مايدهش ويصيبك بالذهول فله مواقف مع والدته عجيبه وله عداء خاص مع التسريحه وكل مايجده بها يطرحه
ارضا وخمجك خمجك من عطور وكريمات وادوات زينه فجغ شديد وذات يقوم قام باكل احد الكريمات وهااك ياجرى ويامستشفى وغسيل
معده وعييييك. اما حمودى فهو قد سلم الرايه لى برهووم واصبح اقل نجاضا منه.
اللهم احفظهم جميعا واحفظ كل النجاضات وكل عام والجميع بخير.

Post: #80
Title: Re: ،، نــجـــااااااضــه ،،،،،
Author: محمد سنى دفع الله
Date: 12-24-2007, 11:14 PM
Parent: #72

النجاااضه
ضحية
انت زاتك ما نجااااضه
اولا برهومي طبعا حنفرد ليهو
بوست لي وحدو
من حكاياتو العجيبة
هووومي طفل متعدد المواهب
ويبحث عن هوايتو التي سوف تقوده الى المستقبل
فهو باحث في كل شي يجده امامه
متجول مثل والده في كل الطرق
يمكن ان يمشي من اول حديقة البدع الى القرية التراثية
دون خوف او وجل
شجاع لايهاب
ده نجااضه بوعي
اجكي لنا

Post: #75
Title: Re: ،، نــجـــااااااضــه ،،،،،
Author: محمد سنى دفع الله
Date: 12-24-2007, 05:06 PM
Parent: #71

ابومناع
العيد مبارك
سموك ابومناع شدة ما منع
وعاملين ليك قطايع
ياخي ما تحكي لينا
حكاية النجاضه
العندكم
عشان نحكي ليك نحن
طيب غنية
للأطفال النجااضات
منتظرين

Post: #73
Title: Re: ،، نــجـــااااااضــه ،،،،،
Author: عمر سعد
Date: 12-24-2007, 08:36 AM
Parent: #1

طبعا المغتربين مصنفين

نسوان سمان ورجال كضابين شفع قليلين ادب

الجزئية الاخيرة دى انتة الدايرة مش هههههههههههههههههههههههههههههههههههههههههههههههههه

يوم يا السنى مشيت بيت ناس اللة يجبر خاطرهم وقاعد فى الصالون والصالون ملان رجال جو اتنين نجاضات كدة

واحد سلم على الناس كلهم والتانى جانى عديل وقف جنبى قلت الود معجب او يمكن بشبة عمو بعد شوية اخد دقيقة دقيقتين

وبدا يقرصنى فى يدى وانا ازحها يقرص التانية ازحها اودى يدينى وراء يلف المهم الود نجضنى نجاض قبور

وقرصتو حارة جدا جدا وكل مرة ابوهو يقول ليهو يا ود عيب دى بتدينى كدة دقيقتين راحة من القريص

بعدة بيبداء بنشاط الوقفة المهم كل مرة اقول ليهو انت ما تمشى تلعب برة عندهم عجلة سمحة يقول لى لا ما بمشى

طيب امشى جيب لى موية لا ما بجيب ......المهم لعبنى دو تريس مع انو اول يوم يشوفنى ..........................

فى النهاية مشيت العربية وقعدتة فيها وقفلت القزاز وشغلت المكيف واستنيت لحى ما اختى وزوجها طلعو .....

شفت النجاض دة لاقاك قبال كدة .....واللة لو نجاض كلام ساكت بقبل بيهو يا السنى اخوى

Post: #82
Title: Re: ،، نــجـــااااااضــه ،،،،،
Author: محمد سنى دفع الله
Date: 12-25-2007, 01:03 PM
Parent: #73

بالغاتا فوككا
ياعمر سعد دي قولة الدكتور : عوض دكام
اتحاشيتها تماما
لكن انت ختيتا بالعرض
غايتو ربنا اسامحك هي في العموم
وزي مابقول عوض دكام كلام مجرد كلام ياعوض دكام
يعني معظم المغتربين وليس كلهم
مش قاصد كده..
اما النجاااضات ديل
واصل لينا قصصهم
ديل فعلا النجاااضات الجد جد
قلت لي قفلوك في العربية
والليلة يالسايق العربية
وبقية الأعنيةالخ

Post: #76
Title: Re: ،، نــجـــااااااضــه ،،،،،
Author: صلاح شكوكو
Date: 12-24-2007, 06:19 PM
Parent: #1

....

صورة أولى

نحن في التربية محصورون بين مغتربين يظنون من ( باب الخطأ)
أن تربية خاطئة قد تربوا عليها فيحاولون تغيير الوضع بتراخي
معيب يؤدي غالبا الى مفسدة ..
فإن كانت أدوات التربية السابقة معيبة إذن فهم نتاج تلك المرحلة
فليبحث كل منهم عن العلة والعيب الذي تركته تلك التربية فيهم..

الصورة الثانية

أما أهل الداخل فإن للتربية عندهم منابع عدة إذ أن كل الأسرة ببنيانها
تشاطر في هذه التنشئة بتوازن طبيعي فينشأ الطفل متشربا لكل الألوان
ومختزنا العقل الجمعي الذي ساهم في التنشئة .

نجاض النجاض
====
زرت أسرة ربها يعمل مهندسا في البترول .. قدم لي كوب من العصير
لا أدري أي نوع من العصير كان هو .. الإبن والبنت وبالتناوب يمرون
أمامي فيرتشفون ( بخشومهم ) مباشرة من الكأس والأب كأنه مسمر في
شاشة التلفاز لا ( يهش ولا تنش ) .. والغريب أنه بعد برهة قال لي :-

ما تشرب يازول مالك ؟؟

إندهشت طبعا لعدم الإحساس وعدم الشعور .. فإن كان الأطفال هم
فلذات كبده ويمكنه أن يلعق (( لعابهم )) بحكم الأبوة والضمى ..
فهذا لا يعني أن يكونوا بذات المعيار لدي الآخرين ..

فإن كان الرجل في قمة الوعي الإجتماعي وفي هذه الوظيفة المرموقة
وهو بلا أدني ( قرني إستشعار ) فما بالكم بأم العيال المحننة والمعطنة
التي كنت أظنها منشغلة عنا بالتلفاز تقول لي :-

(( ماتشرب واللا عشان العيال شربوا منه )) ؟؟؟

طبعا دهشت لعبارة (( العيال )) وأي عيال هم ديل ( راس الهوس )
طبعا لم أشرب .. وحتى لو فكرت أن أشرب فلكم أن تتصورا أن
ظهري كان مطية لعبث من نوع عجيب فقد كنت (( صينية أو دوارا ))
يتقافزون خلفي وأمامي و ( يتساككون ) حتى خيل لي أن هذا اليوم
هو أحد أيام القيامة من شدة الصخب والضجيج ..

لم أسمع في كل هذا الهرج والمرج إلا جملة يتردد صداها بين الحين
والآخر وتخرج خجولة بإستحياء وهي (( الأولاد ديل لما يشوفو ليهم ضيف بجنو )) ..

يجنوا ؟؟ هو ديل محتاجين ؟؟

ولم أدخل ذاك البيت مرة أخرى منذ أن أدبرت عنه ..

ولكنني كثيرا ما اسمع الناس يفرزون بعضهم البعض .. من خلال مدى
( شقاوة ) الأبناء .. مما يجعل الأمر يستلزم مقدرة على السيطرة
أو على الأقل برمجه بنسق آخر حتى لا يصنفك الآخرون من باب الشقاوة .

أعجبت برجل
====
إرتحل بأسرته الى لندن .. كان له بنت وولد الولد في الرابعة وأخته
تصغره بقليل .. كنت أعجب من هذا الهدوء والإنسجام والجمال .. بل كنت
أتخوف عليهما وحينما سألته أرشدني الى طريقتة السوية والعملية والواعية
في التربية ..

لكنني سأفرد حيزا لبعض الإرشادات للآباء في بوست منفصل ..

----------

شكرا جميلا أخي السني على هذا الخيال الصافي
وأدرك أم نجاضة شخصية هلامية لكنها حاضرة وبكثرة
----------
رغم أن ( النجيض ) كان تعني الفلاح والحذاقة والنجابة
وعلو الكعب لكن يبدو أنه أصبحت تعني دارجيا ( كعب )
لأنفصال العلو عنها .

(( منجض الناس نجاضة ))

..





...

Post: #77
Title: Re: ،، نــجـــااااااضــه ،،،،،
Author: Amir Omer
Date: 12-24-2007, 06:49 PM
Parent: #76

Quote: الإبن والبنت وبالتناوب يمرون أمامي
فيرشفون ( بخشومهم ) مباشرا من الكأس والأب كأنه في شاشة التلفاز
لا ( يهش ولا تنش ) .. والغريب أنه بعد برهة قال لي :-

ما تشرب يازول مالك ؟؟


شكوكو والله ضحكتني كما لم أضحك من قبل هههههه
المنظر قدامي كأني شايفوا وشايف شكلك مستغرب
من الحاصل .. ودا الظاهر عليك وأنت بتحكي هسي

Quote: زرت أسرة ربها مهندس في البترول

Quote: قدم لي كوب من العصير لا أدري
أي نوع من العصير كان هو


بالتأكيد عصير "بترول"

يديك العافية

Post: #78
Title: Re: ،، نــجـــااااااضــه ،،،،،
Author: Mohamed Idris
Date: 12-24-2007, 07:43 PM
Parent: #77

العزيز محمد السني
والمتداخلون
كل عام وانتم بخير
ممكن البوست ده (ينط) خطوة لي ق دا م
ويكون الكلام عن
هل التعامل مع الاطفال
(بالدق والتنهير او النهير )
ام بالللامبالاة
ام بي منطق
يعني تعاملهم حسب الظرف المعين
ممكن اخصائيي تربية الاطفال يساهمو في البوست
ده وتديه شوية نكهة علمية كده
وللا شنو ؟
مودتي

Post: #87
Title: Re: ،، نــجـــااااااضــه ،،،،،
Author: محمد سنى دفع الله
Date: 12-27-2007, 08:05 AM
Parent: #78

محمد ادريس
التحيات النواضر
العيد سعيد عليك
ممكن البوست انط الف خطوة
بالمناسبة البوست ده اتعمل مخصوص عشان
نتكلم عن التربية وبالذات في الغربة
وكيف بتحصل التحولات
التربية من اصعب الفنون وكعلم صعب التعامل معها دون
التعامل معها بأبداع ..
لابد لعلماء النفس والمهتمين من التدخل في هذا البوست
ومدنا بمقترحاتهم وتوجيهنا التوجيه السليم
شكرا لك يامحمد ادريس
وتمنى من المهتمين بالدراسات الحديثة في التربية
ان يساعدونا
والبوست مفتوح لكم

Post: #86
Title: Re: ،، نــجـــااااااضــه ،،،،،
Author: محمد سنى دفع الله
Date: 12-25-2007, 09:32 PM
Parent: #77

ياأمير ويا شكوكو
قلت ليكم البوست ده بتاعكم
انا ادوني فيهو خلو قلم
ورفضت
كلمونا عن طفولتكم انتو
كيف كنتو نجاااضات
وبعدين شوفو لينا النجاااضات التانين
لانو ماشين على كلام ادريس
واقتراحو بدراسة الحالة
والبحث عن اسباب التنجيض لينا

Post: #84
Title: Re: ،، نــجـــااااااضــه ،،،،،
Author: محمد سنى دفع الله
Date: 12-25-2007, 03:31 PM
Parent: #76

اخي وحبيبي
صلاح شكوكو
النجاااااضه عندك
ده بنسميهو ادب المدائح
فعلا ياصديقي
المصطلح نجاااضة بقى ليهو علاقة
بي قلة الأدبوانت غرف انو بقى في اباء وامهات فاقد تربوي كتير
وعاملين فيها بتاعين تربية حديثة
والدلع ياهو الدلع ..
وجميل منك وانت تعرض لنا نموذجين
واحد سلبي والتاني إجابي
شكرا لك وواصل معانا والبوست ملكك
مودتي

Post: #79
Title: Re: ،، نــجـــااااااضــه ،،،،،
Author: صلاح شكوكو
Date: 12-24-2007, 10:05 PM
Parent: #1

....

Amir Omer

Quote: شكوكو والله ضحكتني كما لم أضحك من قبل هههههه
المنظر قدامي كأني شايفوا وشايف شكلك مستغرب
من الحاصل .. ودا الظاهر عليك وأنت بتحكي هسي


الأمير ( أمير عمر )
لك التحية والود

والله لم أدرى وقتها أأضحك أم أبكي ..
كان موقفا دراميا درماتيكيا بكل ما تحمله
الكلمة من وصوف .. في غياب تام أو تغييب تام
للإحساس والشعور ..

ولك ألف حق في أن تضحك كما يحلو لك وأن تستغرب ما وسعك
وأنت مجرد قاريء للموقف ... إذن كيف تراني وأنا جزء من
واقع الحال الكئيب الذي أحمله كلية للوالدين اللامبالين
بما يدور حولهم .. والذين ضاقت أعينهم عن رؤية الموقف بكلياته
فقد غيبوا وعيهم بمقولة (( الحرية اللا محدودة للأطفال ))
دون أن يبصروهم بحدود المتاح واللا متاح .. المعقول واللا معقول
نسوا أن في اللغة كلمة إسمها (( لا )) وتجاوزها يعني خطا أحمرا
نسوا كل ذلك معتقدين أن تربيتهم كانت على نحو غير سوي فتمردوا
على أنفسهم حتى ولد جيل فوضوي لا حدود للمعقول عنده .. حتى صاروا
في نظر الآخرين مجموعة من المتخلفين .. أو القادمين من كوكب غير مأهول

هل تراني كنت سأشرب ؟؟
ولو شربت كيف كنت سأوصل رسالتي لهم ؟؟
ولو شربت مجاملة أو حياءا كيف كان سيكون موقفي ؟؟
رغم إمتناعي .. هل تراهم فهموا شيئا ؟؟
وإن فهموا ماذا هم فاعلون ؟؟
هل تراهم قادرين على إحياء بعض خلاياهم الميتة ؟؟

(( خليها في سرك .. وربك يلطف ))



...

Post: #81
Title: Re: ،، نــجـــااااااضــه ،،،،،
Author: tarig almakki
Date: 12-25-2007, 07:10 AM
Parent: #1





النجاضة أسيل
الأغنية المفضلة: " بلة يا بلة "
المشروب: " بسي " بيبسي
الهواية: النجاض
نجاااااااااااااااااااااااااااااااااااضة

Post: #83
Title: Re: ،، نــجـــااااااضــه ،،،،،
Author: tarig almakki
Date: 12-25-2007, 02:31 PM
Parent: #1

جارتنا عندها وبد بتها نجاضة النجاضة
صاحبنا من أول يوم في الروضة حشر ليهو مصاصة نبق في نخرة شافعة وهاك يا ضرب كل يوم ضارب ليهو جملة شفع وأصبح سفاح الروضة . . بعد كمين يوم كده المديرة إستغنت وقررت تديهو الصالح العام . . الأم جابت الأجاويد وجات وهاك يا تحانيس والسيدة المديرة رضت تحت الضغط قالت خلاص يرجع . . المرة قامت تودع الأم والأجاويد أتاريهو أثناء المفاوضات النجاضة كان بيربط في التوب في رجل الكرسي ووردلب جات في الدايمة .. ولي يوم الليلة نجاضة تاني ما دخل روضة القلم .

Post: #85
Title: Re: ،، نــجـــااااااضــه ،،،،،
Author: عبدالكريم الامين احمد
Date: 12-25-2007, 04:19 PM
Parent: #83

لعوالم نجااضة حضرنا
وتحياتي لكل الاطفال النجاض مثل صديقنا نجضنا...
وجاييك يا السني ببنجوس النجيض نجاضة تحير الما بتحير
بنجوس شليق وحركتو ماشاء الله زي مروحة التربيزة وكلو كلو لا يرسي علي بر
واربعة وعشرين ساعة مدور الا في لحظات النوم واللحظات التي يود ان يلعب بها في مزاجه...
كانت امه دعوه الي الذهاب معها اي الغيط والحواشة
ولكن توفقت عندما لاحظت ان نجاااضة (بنجوس) بنجض التيراب نجاض قبورة
وبدفنو كلو في حفرة واحدة وبعمل فيها رائح
ايضا تخصص نجاضة في سرقة هدوم الذين يسبحون في الترعة(بدسها زي السلامة عليكم ويعمل فيها نائم)...
منع من الحضور اي الحواشات وضرب
ولكن وقبل وصول الجميع الي غيط الحواشات يكون( بنجوس) قد سبقهم وبكون منتظرهم في شجرة مطرفة
ونعود

Post: #94
Title: Re: ،، نــجـــااااااضــه ،،،،،
Author: محمد سنى دفع الله
Date: 12-28-2007, 09:35 AM
Parent: #85

وين النجاااااضه
بــــنــــجـــــوســـــٍ
النجض الحلة كلها
يلا يا كيكي

Post: #89
Title: Re: ،، نــجـــااااااضــه ،،،،،
Author: محمد سنى دفع الله
Date: 12-27-2007, 08:35 AM
Parent: #83

طارق المكي
اسيل النجاااضه
ولمن تكبر تنجض البتنجضو
قبلنا بيها في نادي النجاااضين
لكن مش شايف مش باين عليها علامة النجااااضين
احفظها الرحمن وتتربى في عزكم
ولك مودتي

Post: #88
Title: Re: ،، نــجـــااااااضــه ،،،،،
Author: صلاح شكوكو
Date: 12-27-2007, 08:19 AM
Parent: #1

Quote: واقتراحو بدراسة الحالة
والبحث عن اسباب التنجيض لينا


أخوي السني
لك التحية

واصل سردك الممتع .. وبعدين لما الناس تكتر
ح نفتح باب الإقتراحات .. وبالمناسبة هناك
كثير مما يمكن أن يقال ..

واصل بس ولم لينا أكبر عدد من النجاضات والمنجضين
والمنجضات ..

--------
شكرا لجعلنا أهل دار
--------

Post: #90
Title: Re: ،، نــجـــااااااضــه ،،،،،
Author: صلاح شكوكو
Date: 12-27-2007, 11:29 PM
Parent: #1


نجاااضة فلاشية ..



شوفا العفرته دي



...

Post: #91
Title: Re: ،، نــجـــااااااضــه ،،،،،
Author: صلاح شكوكو
Date: 12-28-2007, 00:20 AM
Parent: #1



نجاضة أجنبية


...

Post: #92
Title: Re: ،، نــجـــااااااضــه ،،،،،
Author: محمد سنى دفع الله
Date: 12-28-2007, 08:21 AM
Parent: #91

لكن الخواجات
النجاااضات ما عندهم
يعني النجااضين بتساووا
اذا كانو عجم ولا عرب
اذا كانو لاتين ولا سكسون
اسيويين ولا رومان
النجاااضه ياهو النجاااضه
اديك العافية
واغطيك خليت كل الخلايا فيني تهتز من القرقراب
مودتي وزيدنا من نجاااضين برة

Post: #93
Title: Re: ،، نــجـــااااااضــه ،،،،،
Author: خالد العبيد
Date: 12-28-2007, 09:01 AM
Parent: #1

صديقي محمد سني
تحياتي
نحن غايتو عيدنا عينة وخروفنا عينتين!
ابدا ليك بالخروف
طبعا هنا الممنوعات في الذبح كثيرة جدا
مشيت اشتريت خروف من مدينة اسمها "اوبن"
طبعا خروف بلا راس ولا جلد !!
يعني مذبوح جاهز

اها ومشيت اشتريت حاجات الكمونية من منطقة اخرى اسمها قرانفل
من قرانفل يا عزيزي جبنا الكرشة والكلاوي
حكينا راسنا في محطة القطر وقلنا يارب الخروف ده ناقص شنو
اها اتذكرنا القلب وابوالدمام والمصارين
ركبنا القطر على مدينة تانية
جبنا قلب الخروف
واتصلنا المهاجرين القدام شويةوسألناهم:
يا خوانا وين نلقى المصارين والحاجات التانية
قالوا لينا اقنعو نحن من ما مجينا البلد دي ما سمعنا باع
امشو بي حاجاتكم الجبتوها دي

شفت خروفنا بانوراما بس
وكل سنة وانت طيب

Post: #98
Title: Re: ،، نــجـــااااااضــه ،،،،،
Author: محمد سنى دفع الله
Date: 12-30-2007, 06:47 AM
Parent: #93

خالد العبيد
لكن الخرووف ماعندكم
يعني مسافر ليك يوم ونص عشان ترجع بي نص خروف
لكن ما خروف صحي
اصلوا الكمونية غير تزيد ليك الكرسترول ما بتفيدك
والحمة السمينة غير ترفع عليك القاوت مابتنفعك
والكرشة وام فتفت غير تفك اللعب وتجهجهك ما بتضيف شي
اها ياخوي احسن ليك الخروف الصحي الجيتو ده
ومنتظرين منك النجاااضات بتاعين استراليا
مودتي وعيدك سعيد

Post: #95
Title: Re: ،، نــجـــااااااضــه ،،،،،
Author: صلاح شكوكو
Date: 12-28-2007, 01:34 PM
Parent: #1

Quote: لكن الخواجات
النجاااضات ما عندهم
يعني النجااضين بتساووا
اذا كانو عجم ولا عرب


طبعا يالسني دي نجاضة خواجية (( درامية ))
بغرض التصوير .. لأن عملية تصوير فيلم قصير
للطفل يمكن أن يدر دخلا للأسرة ..

شايف الخسائر قدر شنو ؟؟

جكوك تتكسر ..
كراسي جلوس تتوسخ ..
وحمامات تتشبط ..

بس نجاضاتنا على الهواء

...

Post: #96
Title: Re: ،، نــجـــااااااضــه ،،،،،
Author: صلاح شكوكو
Date: 12-28-2007, 01:49 PM
Parent: #1

http://video.google.ca/videopopup?q=http%3A%2F%2Fvp.vid...+Video+-+Full+Screen

أها يالسني شوف الزول دا نجض زولك دا كيف ؟؟
يازول كميرا خفية بتاع شنو ؟؟


..

Post: #97
Title: Re: ،، نــجـــااااااضــه ،،،،،
Author: munswor almophtah
Date: 12-28-2007, 04:13 PM
Parent: #96

السنى كل سنه وأنت طيب وأولادك بخير وربنا يخلى الأطفال
إن شاء الله وإدى أهلهم طول البال وإدى أصحابهم الصبر
وإن شاء الله الجاتهم فى العده ربك يعوضهم فيها ويكفيهم
صدمات السكرى والضغط من الأرضى جو وجوى أرض وبحرفه
وحرفيه عاليه وربنا يداوم الخوه وكل سنه وإنت وكل
الناس بألف خير والله دا موضوع فعلا بيحتاج لإنقاذ
وبيحتاج لماسايا وأركان حرب أشداء حتى يأتى أكله


ولك السلام

منصور

Post: #99
Title: Re: ،، نــجـــااااااضــه ،،،،،
Author: محمد سنى دفع الله
Date: 12-30-2007, 09:23 AM
Parent: #1

منصور المفتاح
يايها الأديب الفاهم
طبعا لمن كنت صغير
شكلك من ادبك وشكلك الهادي
وطولة بالك
وحكمتك
واضح جدا
انك كنت
نجااااضة لامن غلط
ظاهر عليك من الأطفال الكانو بوقفو الفريق على فد رجل
وما خالي طيرة في الهوا ما صيدتها
ولا حيوان ما سكيتو
ولا بني ادم ما دقيتو
بالله ما تحرمنا من ذكرياتك البديعة والغنية بالمواقف
ادينا شوية كل الأجيال الجديدة تستفيد وتعتير
من طفولتك النجاااضه
نجضناااااااااا

Post: #166
Title: Re: ،، نــجـــااااااضــه ،،،،،
Author: salma subhi
Date: 01-15-2008, 10:08 PM
Parent: #99

نوّر الله أيامك يا استاذ السنّي....

Quote: لمن كنت صغيرة


ياااااااا لها من فترة !






كل سنة وانت طيب



.........

Post: #100
Title: Re: ،، نــجـــااااااضــه ،،،،،
Author: محمد سنى دفع الله
Date: 12-30-2007, 09:26 AM
Parent: #1

منصور المفتاح
يايها الأديب الفاهم
طبعا لمن كنت صغير
شكلك من ادبك وشكلك الهادي
وطولة بالك
وحكمتك
واضح جدا
انك كنت
نجااااضة لامن غلط
ظاهر عليك من الأطفال الكانو بوقفو الفريق على فد رجل
وما خالي طيرة في الهوا ما صيدتها
ولا حيوان ما سكيتو
ولا بني ادم ما دقيتو
بالله ما تحرمنا من ذكرياتك البديعة والغنية بالمواقف
ادينا شوية كل الأجيال الجديدة تستفيد وتعتير
من طفولتك النجاااضه
نجضناااااااااا

Post: #101
Title: Re: ،، نــجـــااااااضــه ،،،،،
Author: مجدي عبدالرحيم فضل
Date: 12-30-2007, 09:39 AM
Parent: #100

الفنان الجميل محمد السني دفع الله

كل عام وأنت بكل الخير البتقدموا لينا من مسرح حقيقي ما هو خيال والتحية عبرك لكل الأطفال الحلوين والنجاض أشكال ياربي شكل كل أطفال السودان بالجمال البيشبهنا ودمت ياعزيزي بألف خير.

،،،،أبوقصى،،،،

Post: #102
Title: Re: ،، نــجـــااااااضــه ،،،،،
Author: عواطف ادريس اسماعيل
Date: 12-30-2007, 09:46 AM
Parent: #101

سنسوني !!!

سلامات يا جميل ,,,

كل عام وأنت بالف خير ,,,

بصراحة نجاضة ون وتو عجبوني شديد .. ممكن تلفهم لي في ورقة ولا ترسلهم لي في إيميل ؟؟؟

سلم لي عليهم لغاية ما يصلو !!!

Post: #103
Title: Re: ،، نــجـــااااااضــه ،،،،،
Author: حسن طه محمد
Date: 12-30-2007, 09:55 AM
Parent: #102

ود السني العزيز جدا

ممكن تدخلني في حكاية النجاضة بس عشان في الاول افهم الحكاية شنو وبعد داك نركب المركب لو سمحتو لينا.

مع ودي.

Post: #104
Title: Re: ،، نــجـــااااااضــه ،،،،،
Author: سيد محمد احمد سيدنا
Date: 12-30-2007, 10:28 AM
Parent: #103


الاخ العزيز محمد السنى


كل عام وانت بخير وربنا يحقق امانيكم


وصلتنى الرساله مع الاخ الحاج حامد وقلت


كدى اشوف واحد من بوستاتك واهنئك بالعيد بحثت


لقيت العنوان دا وفكرتكم بتنجضوا الشيه على


ضفاف قطر لكن سارجع اشوف الموضوع فى الصفخة


الاولى وبعدين نشارك فى التنجيض .


تحياتــــى وشكرى على السؤال


اخوك / ســــيد محمد احمد

Post: #111
Title: Re: ،، نــجـــااااااضــه ،،،،،
Author: محمد سنى دفع الله
Date: 12-30-2007, 09:18 PM
Parent: #104

سيدنا
ابو السيد
التحايا والأعياد كلها افراح ممتدة في عمرك
لك الحب والمودة
وربنا اكفيك شر النجااااضه
ومنتظرين مساهمتك
مودتي

Post: #110
Title: Re: ،، نــجـــااااااضــه ،،،،،
Author: محمد سنى دفع الله
Date: 12-30-2007, 07:53 PM
Parent: #103

ماشاءالله
ذاك الشبل من ذاك الأسد
واولادك زينة
ارجع للصفحة الأولى وانت تعرف النجاااضه
بعدين انت معانا في العيد يعني ما شفت النجاااضات
الكانوا بنجضوووفينا على نار هادئه
ولا شنو ؟؟
المهم بعد ما تشوف الصفحة الأولى
لينا كلام

Post: #106
Title: Re: ،، نــجـــااااااضــه ،،،،،
Author: محمد سنى دفع الله
Date: 12-30-2007, 03:07 PM
Parent: #102

شكرا للدلع
وسنسوني وسناسن مقبولة منك
واسامي الدله بتاعتي
عملتها شخصيات كرتونية
سناسن وسنوسني
يعني تاكيدك للأسماء خلامي احافظ عليها
ونجااااضه واختو طالما عجبوك
يلا اكتبي لينا نجاااضاتكم البشبهوهم
ومنتطرين
مودتي

يا عطوةةفه

Post: #105
Title: Re: ،، نــجـــااااااضــه ،،،،،
Author: محمد سنى دفع الله
Date: 12-30-2007, 12:03 PM
Parent: #101

مجدي ابوقصي
لكالتحايا العطرة
والود النقي
نحن اتربينا على الواقعية والطبيعية
والواقعية الأشتراكية والواقعية السحرية
وهسي بقينا في زمن السريالية
لو قالو ليك البحصل لينا ده كنت بتتوقعوا
طبعا لا وابدا لالالا
مهما ساقك الخيال ومهما كانت عندك قدرة على التحليل
ما بتوقع البحصل شنو
زمن سريالي مش ؟؟
اها ده من النجااااض النحن فيهو
ويا ما في الدنيا من
نجاااااااضه
مودتي ومحبتي


Post: #120
Title: Re: ،، نــجـــااااااضــه ،،،،،
Author: الفاتح الجنيد
Date: 12-31-2007, 09:29 AM
Parent: #100

الفنان السنى
تحية وعيدية

نجاض الشُفِّع عرفناهو
بى قرصة ، بى تِحِمِّرة ، تقوم تمرق تفوت ، بى كروه ، بتتحل منو ...
لكن البخارجك شنو من نجاض الكبار ...
يلم فيك واحد فى السوق وانت مستعجل ، والا بعد صلاة الجمعة فى الحراية بتاعة الساعة 2 ديك يقوم يوقفك وهاك يارغى وانت تتململ ،،، تسوى مم مم مم
والا يجيك فى البيت فى الزمن الضايع ، والا يمسكك فى التلفون يهريك بى نضمى كلوا لُقاط
يمرق من موضوع ويدخل فى التانى على طول قبل ما تجر نفسك
والغريب يبدأ ليك فى الاول يقول ليك : ياخى ما أكون ازعجتك !!
وعلى طول يدخل فى المواضيع قبل ما ترد عليه بظرف ( لا ياخى العفو )

أها ده ما أخير منو نجاض الصغار !!!

Post: #123
Title: Re: ،، نــجـــااااااضــه ،،،،،
Author: محمد سنى دفع الله
Date: 12-31-2007, 02:21 PM
Parent: #120

الفاتح الجنيد
نجااااااضه
بتاعك وكبير ده اخير منو النجاااضات الصغار
مقدور عليهو
تقول اممم لمممم وتسمع
لمن انتهي
اممم امممم امممم
والله اخير منها النجاااضات الصغار
دي ما نجااااضه دي ثقاله عديل
لكن بقول ليك حافظ على الأدب
وطولة البال
اديك العافية

Post: #152
Title: Re: ،، نــجـــااااااضــه ،،،،،
Author: مامون أحمد إبراهيم
Date: 01-09-2008, 09:53 AM
Parent: #100

Quote: طبعا لمن كنت صغير
شكلك من ادبك وشكلك الهادي
وطولة بالك
وحكمتك
واضح جدا
انك كنت
نجااااضة لامن غلط
ظاهر عليك من الأطفال الكانو بوقفو الفريق على فد رجل
وما خالي طيرة في الهوا ما صيدتها
ولا حيوان ما سكيتو
ولا بني ادم ما دقيتو

والله ياالسنى دى بالغت فيها , لكن ما نجضتو نجاض !

قرون ضوئيه , زى ماقال جنى !

Post: #107
Title: Re: ،، نــجـــااااااضــه ،،،،،
Author: محمد عثمان
Date: 12-30-2007, 03:17 PM
Parent: #1

ما بطال نتنجض معااااكم..!!

كل سنة و انت طيب اخ محمد سنى

Post: #108
Title: Re: ،، نــجـــااااااضــه ،،،،،
Author: عادل التجانى
Date: 12-30-2007, 04:06 PM
Parent: #107

في احتفالية نجوم الهيلا هوبا بمركز أصدقاء البيئة
جاء الناس من كل حدب وصوب يستمتعوا بنجوم الهيلاهوبا وجلسوا في رواقه شديده منتظرين النكات والقفشات الجميله وفجأه

شفت ليكم شافع نجاضه وطبعاً جرت العادة ألا يذكر اسم (النجاضات) ولكنه واحد من ثلاثة نجّاضات في الدوحة .. ظل يجري من أول الصالة مروراً بالمسرح وطلوعه والنزول منه وبعد شوية جاب معاه شوية شفع وبدأت الضجة .. أنا ما شفت شافع زي دا نجض ليكم ناس الهيلاهوبا .. والغريبة عندما طلبت من أمه أن تهتم بيهو قالت لي بكل بساطه (خليهو ياخد راحتو) .. وبعد شويه جلد ليهو شافع جلد تمام .. فالتفت لها وقلت ليها يا مدام ولدك ده بالغ (ضرب ود الناس) تعرفوا قالت لي شنو ؟

قالت لي كلم ود الناس عشان يضربوا زي ما ضربو

اتحيرت يا جماعه والحقيقه أنا ما عارف حتى الآن النجاضة الولد ولا أمه ؟؟

أفتوني

Post: #109
Title: Re: ،، نــجـــااااااضــه ،،،،،
Author: رأفت ميلاد
Date: 12-30-2007, 06:37 PM
Parent: #108

حبيبنا السنى
كل سنة وأنت طيب
وعيدك والنجاضات وأمهم بخير

ضحكتنى ياخ ولزيزة تلقى البوست وهو عمران

زكرتى واحد صاحبنا ضابط جيش سابق عندو ولدو بتلاتة نجاضات من عينتك دى
مسميه هادم اللذات

يوم فى مناسبة عامة لقيتو قاعد وجمبو ولدو منتهى الهدوء
قلت ليه الراجل الليلة هادئ .. قال لى بكون بعمل تقدير موقف قبل ما يتحرك

كل سنة وأنت بألف خير

Post: #118
Title: Re: ،، نــجـــااااااضــه ،،،،،
Author: محمد سنى دفع الله
Date: 12-31-2007, 06:57 AM
Parent: #109

ضحكت لمن اهتز كرشي
وتخلخلت اضراسي
وصف واقعي يارأفت
ياباهي عامك سعيد
لكن النجااااضه ما عندك
قلت لي بعمل تقدير موقف
ده مانجاااااضه دياشي وفي هو
جيينات دياشية
ده النوع هجوموكاسح وفعلا بكون هدام ملاذات
ده بعوث خراب لي درجة ابوه معترف بي قوة التدميرية
وساميهو هادم اللاذات يعني ده عندو قوة تدميرية
لايوجد بعدها فرح وده من اقسى انواع النجااااضات
بعدين زي ما شايف ابوه زاتو نجاااضه زيو ماسكو
لكن الساعةالبحس انو عليهو اطلاقو الى الحرب بطلقو
وده بخلي ابوه نجاضتة صواريخ
يعني قاعدة اطلاق بشرية
وده الأب النجااااضه والله يارأفت تعبت من
النجاااض
نجضنا انت
صحي الدياشي مرتو اعلى منو بي رتبة
وولدهم النجاااضة بي رتبتين ؟؟؟
جاوب سريع بي مقالة !!!

Post: #175
Title: Re: ،، نــجـــااااااضــه ،،،،،
Author: محمد سنى دفع الله
Date: 01-28-2008, 12:09 PM
Parent: #118

جاين انا ونجاااضه
ومعانا ضحية
وكيكي
الرجاء استقبلونا

Post: #112
Title: Re: ،، نــجـــااااااضــه ،،،،،
Author: محمد سنى دفع الله
Date: 12-31-2007, 05:35 AM
Parent: #108

ماذا نقول
لك اخي عادل التجاني
كيف نفتيك وانت قلت انه واحد من تلاته نجااااضات
في الدوحة
ودي مسألة معقدة جدا
نقوم نفتي اجي نجاااضاتك ده انجضنا صباح ومسا
بعداك نبقى في اليخارجنا
لكن قلت كان كيف ؟؟؟

Post: #116
Title: Re: ،، نــجـــااااااضــه ،،،،،
Author: محمد سنى دفع الله
Date: 12-31-2007, 05:58 AM
Parent: #107

محمد عثمان
التحية والمودة وكل سنة وانت بالف خير
وعام سعيد وعمر مديد
اتنجض مع النجااااااضات

Post: #113
Title: Re: ،، نــجـــااااااضــه ،،،،،
Author: أبو ساندرا
Date: 12-31-2007, 05:47 AM
Parent: #1

يا سنسنة
انت لمن أبو { نجاضة } و { نجاضة توو }
ضبك متلبس
عملت شنو ؟

تلقاك جبت إحلام شاهد








زور

Post: #114
Title: Re: ،، نــجـــااااااضــه ،،،،،
Author: أبو ساندرا
Date: 12-31-2007, 05:49 AM
Parent: #1

Quote: النجاااضه
ضحية
انت زاتك ما نجااااضه


والله أنت ماعارف الناس ديل نجاضتهم منو
عامل عيونك المحوصات ديل
يا سنسنة

Post: #119
Title: Re: ،، نــجـــااااااضــه ،،،،،
Author: محمد سنى دفع الله
Date: 12-31-2007, 08:14 AM
Parent: #114

منو العيونو محوصات
منو؟؟
ابو ساندرا
منو ؟؟

Post: #115
Title: Re: ،، نــجـــااااااضــه ،،،،،
Author: أبو ساندرا
Date: 12-31-2007, 05:52 AM
Parent: #1

كتب عادل التجاني
Quote: اتحيرت يا جماعه والحقيقه أنا ما عارف حتى الآن النجاضة الولد ولا أمه ؟؟


أممممممك
ثم
أمك

أو

أم التيجاني
واللا أنت ولدك الكبير إسمو منو

Post: #117
Title: Re: ،، نــجـــااااااضــه ،،،،،
Author: حسن طه محمد
Date: 12-31-2007, 06:21 AM
Parent: #115


السني أخوي
يادوب رجعت للصفحة الأولي وفهمت ويا ما في الدنيا دي في نجاضات جائزة نوبل عليهم شوية.

ابدأ معاكم بالنجاضة " مجتبي " رغم انو انا نيابة عنه بشكرك علي وصفك ليه بالزين .وهو اذا عايز يشكرك امكن يبتسم ليك بسمة خفيفة كدا لانه حيفتكر انك ما جبت جديد عنه.

مجتبي في اولي ابتدائي

أمس أمه بتذاكر ليه لزوم الامتحانات الايامات دي ( طبعا أخوك برا الموضوع ) . الدرس كان عن العادات الحسنة والعادات السيئة.

عن العادات السيئة جايبين صورة واحد بيدخن. قال لامه دا عندو عادة سيئة زي أبوي .

الغريب اني بدأت في برنامج الاقلاع قبل ما أسمع كلام زي دا .
واول الغيث قطرة .

Post: #121
Title: Re: ،، نــجـــااااااضــه ،،،،،
Author: محمد سنى دفع الله
Date: 12-31-2007, 10:25 AM
Parent: #115

ولدو الكبير اسمو سامح
قصرنا معاك يا بوساندرا

Post: #127
Title: Re: ،، نــجـــااااااضــه ،،،،،
Author: محمد سنى دفع الله
Date: 12-31-2007, 06:16 PM
Parent: #115

في اولاد نجاااضين
كمان في امهات
نجاااضات
والولد ما ببقى تجاااضه
الا لمن القى امو تجاااضه
والله اعلم

Post: #122
Title: Re: ،، نــجـــااااااضــه ،،،،،
Author: طارق عبد اللطيف نقد
Date: 12-31-2007, 12:50 PM
Parent: #1

حبيبنا محمد السني
وكل المداخلين
كل سنه وانتو طيبين مع زحمة الاعياد
والله والواحد ما قادر يركز مع ياتو عيد
الضحية ولا الكريسماس ولا راس السنه ولا الاستقلال
ولامع النجاضات ديل
مع انه لفظ النجاضه بي لغة الرندوق تعودنا عليه00 للفتاة ذات القدر من الجمال والكمال
لكن انا برضو عندي واحد
مرة مشينا مناسبه عامة داخل قاعة
يقوم ينزل مني ويجري ويشاكل الشفع وعندماامسكو واقعدو يملا القاعه صراخ
اضطره افكوا يقوم جاري
الى ان تعبته وفقدته التركيز وبعد شويه ما لقيتوليك
تخيل بعد تفحيص وتمحيص وتفتيش تقل لقيتو وين؟؟؟


لقيتو ليك داخل تحت الكرسي بتاع عازف البنقز
قال لي ده ولدك فأجبته بالايجاب
فقال لي الله يعينك ح يطلع 0000000

Post: #124
Title: Re: ،، نــجـــااااااضــه ،،،،،
Author: حسن طه محمد
Date: 12-31-2007, 03:01 PM
Parent: #122

ختكم دي

في نهاية الثمانينات بمدينة الرياض تعرفت بأحد الاخوة الكرام وقام ما قصر وشرفني في البيت ( الشقة ) ومعاه نجاضته ( والذي أصبح منذ الوهلة الأولي نجاضتي وقبل ما يكون ايضا نجاضة أم العيال ) . ,اخوكم كاتنب هذه السطور ما قصر جايب حلاوة شوكولاته من النوع البسيح في درجة 5 تحت الصفر.

المكان : الصالون وكراسي الجلوس من قماش مستعد يتأثر بهواء النفس.قماش ابيض شديديلمع .
وهاك يا نجاضة من كرسي لكرسي بالطول والعرض سودانا يهز الأرض وفترة الراحة عندو بشوكولاتة وايدينه اتحننت بيها وابوه عامل فيها شاهد ما شافش حاجة ويلز في طاقيته ( بدون عمة ) وراءو قدام .
الكراسي أصبحت لوحة تشكيلية .

الدور بقي عليه وجاه النجاضة وخطف الطاقية وهنا انتصب والد النجاضة وقال ليه جيب الطاقيةدي ما توسخها . الطاقية دي بعشرة ريالات.
هنا قلت : خليه ياخي الكراسي دي بعشرة ملالين بس ما مشكلة !!!!!!!!
بالله عليكم افتوني :- البستاهل جائزة نوبل النجاضة ام ابو النجاضة ؟

Post: #125
Title: Re: ،، نــجـــااااااضــه ،،،،،
Author: صلاح شكوكو
Date: 12-31-2007, 05:08 PM
Parent: #124

Quote: الدور بقي عليه وجاه النجاضة وخطف الطاقية وهنا انتصب والد النجاضة وقال ليه جيب الطاقيةدي ما توسخها . الطاقية دي بعشرة ريالات.
هنا قلت : خليه ياخي الكراسي دي بعشرة ملالين بس ما مشكلة !!!!!!!!
بالله عليكم افتوني :- البستاهل جائزة نوبل النجاضة ام ابو النجاضة ؟


ما عندنا إلا نقول ليك يامنير :-

عين ( الأب ) عن كل عيب كليلة *** وعين ( الحضور ) تبدي لك المساويا


...


..

Post: #126
Title: Re: ،، نــجـــااااااضــه ،،،،،
Author: رأفت ميلاد
Date: 12-31-2007, 05:38 PM
Parent: #124

Quote: صحي الدياشي مرتو اعلى منو بي رتبة
وولدهم النجاااضة بي رتبتين ؟؟؟
جاوب سريع بي مقالة !!!
ياخوى كل من الديش ديل
طبعآ كلهم دبابيرم مقلعة جوة البيت
عنترياتم علينا نحن بس

Post: #129
Title: Re: ،، نــجـــااااااضــه ،،،،،
Author: عبدالكريم الامين احمد
Date: 12-31-2007, 06:30 PM
Parent: #126

لعالم نجااااضة المرح والملائكي عدنا
ودوما نحمل صديقنا 0(بنجوس) ذلك الذي وصفناه (بمروحة التربيزة)
بنجوس في احدي طلعاته النجاضية اتي بامر جلل وسواااها شينة عديل كده..
في عرس احدي حسان الحي كان تجليد الدلوكة وتوضيبها احدي المهام التي كلفت بها(ام بنجوس)
واجتهدت في ذلك كل اجتهاد (جلد عجل) ورسمت فيها قلبين ضماهم غرام وعملت بروفة زي مليون مرة
وبنجوس قاعد يكشف ليها ولعله في سره يقول لها اصبري لي بنجضك نجاض قبورة يا امي....
في يوم العرس والناس جاهزة موية ونور والزغاريد حدها السماء في ذلك اليوم وقبل بداية الحفل
كان نجاضة (بنجوس) قد قرر ونفذ (قد الدلوكة)
لقد (قد)بنجوس الدلوكة يا السني وعملها نملية بس

ضيع رقيص وشتت زغاريد ودبرس بالحبان والجكس
ونجض الفريق كلو نجاض بنجوس

Post: #146
Title: Re: ،، نــجـــااااااضــه ،،،،،
Author: محمد سنى دفع الله
Date: 01-04-2008, 04:41 PM
Parent: #129

عارف يا كيكي
بنجوس النجاااضه
ده ما هادم لذات
ده مفرتق الخقلات
ده اصعب وافوى من اي قوة نظام عام ولا خاص
ده قداد الدلوكة
المهم نحن متأكدين والفرح مالينا
انو نجاااضه بتاعك ده
لامكان له في اي فرقة موسيقية في المستقبل
مودتي

Post: #134
Title: Re: ،، نــجـــااااااضــه ،،،،،
Author: محمد سنى دفع الله
Date: 01-01-2008, 05:19 PM
Parent: #126

صلاح شكوكو
رافت نيلاد
استعدوا بداية السنة
وقه عليكم الأختيار
لتكونو في لجنة النجااااض الأكبر
راجعوا اقتراح الأستاذ حسن طه
مودتي

Post: #130
Title: Re: ،، نــجـــااااااضــه ،،،،،
Author: محمد سنى دفع الله
Date: 12-31-2007, 07:03 PM
Parent: #122

طارق عبد الطيف
النجاااضه بلغة الرندوق
تعني البت الشديدة
التي تنجض الناس نجااض
اما النجاااضة بتاعنا
فهو من ينجض الناس النجااض الجد
على نار هادئة
وكلهم في النجااض بدوخوك واطلعو زيتك
لكن النجااااضه عندك
تحياتي وعيد سعيد
مودتي

Post: #128
Title: Re: ،، نــجـــااااااضــه ،،،،،
Author: طارق جبريل
Date: 12-31-2007, 06:24 PM
Parent: #1

العزيز محمد السني
سنة سعيدة
وانت والنجاااااااااااض بألف خير


والله نجااااااااااااض بس حلوين
هارني هري

Post: #131
Title: Re: ،، نــجـــااااااضــه ،،،،،
Author: حسن طه محمد
Date: 01-01-2008, 07:11 AM
Parent: #128

السني واحباب السني

يا ما في الدنيا دي نجاضين نجاضين بمعني الكلمة حسب توصيف السني وواضح أن التنافس بينهم شديد حسب ما ورد ويرد في هذا البوست خفيف الظل.

عندي اقتراح وهو: تكوين لجنة برئاسة اكثر من تنجضوا من النضاجين لاختيار أحسن النضاجين للفوز بكاس السودان للنضاجين.

رايكم دام فضلكم ،،،

Post: #132
Title: Re: ،، نــجـــااااااضــه ،،،،،
Author: محمد سنى دفع الله
Date: 01-01-2008, 10:10 AM
Parent: #128

طارق جبريل
النجاااض الأكبر
نفرش ليك الورد والبساط الأحمر
ونرش عليك عطر ياسمين
وبعد الراحة وادوخك ضل الشاتي
وفي عز الإسترخاء
ندخل ليك نجااااضه
وتقول واااااااااي
نهريك تاني
ونتمنى ليك تكون معاهم بألف خير

Post: #133
Title: Re: ،، نــجـــااااااضــه ،،،،،
Author: بابكر الزاكي
Date: 01-01-2008, 01:20 PM
Parent: #1

السلام الفنان السني كل عام وانت بخير
كدي اوك حاجه رسل لينا نجاصه عشان تنجص خروف العيد الباقي نصه لسع انتو تعبانيين من النجاصيين ونحن مشتاقيين ليهم
بوستك دا ذكرني صديق نجاص بشكل عجيب كنا ساكنيين مع بعض في دبي كل ليله بينجض فينا من بعد العشاء الي ان تشرق الشمس
في ليله من ليالي النجض العامره في واحد من الساكنيين معنا عنده معاينه للعمل تاني يوم الصباح بدري وكان لازوم ينوم كويس عسان يكون مركز بس صاحبنا النجاض ما اداه طريقه والعندوه معاينه خجلان يقول للنجا ض اسكت عشان انوم وحاول ينوم وضع المخده علي اضانه ما في فايده نام علي بطنه اتكرفس برضوا ماكو فايده حوالي الساعه تلاته صباحا افتكرنا الزول العندو معاينه نام لانه رقد من الساعه11 فسمع من الكلام الدائر انه النجاض دا بكره حا ينوم مع واحد اسمه حمزه اقلب علي الحيطه وقال والله بكره حمزه زي الوقت دا عيونه بتكون موره جنس وريم وانفجرت الغرفه من الضحك حتي الصباح
مع ودي

Post: #135
Title: Re: ،، نــجـــااااااضــه ،،،،،
Author: محمد سنى دفع الله
Date: 01-01-2008, 07:18 PM
Parent: #133

بابكر الزاكي
زاكية دنيتك
وليك المودة
وعامك زي العسل
بعدين زولك ده
عندو قوة ثلاثية
ده
براية زايد نجاااضه
لكن منجطكم نجاااض قبورة
ده السكن معاهو مخاطرة مخفوفة بالسهر والحمى
لك الموده وعامك سعيد

Post: #136
Title: Re: ،، نــجـــااااااضــه ،،،،،
Author: معتصم ود الجمام
Date: 01-01-2008, 07:44 PM
Parent: #135


السني
نجااااااااااااااضات البورد كيف ؟
على وزن زكريا العجب كيف ؟

Post: #138
Title: Re: ،، نــجـــااااااضــه ،،،،،
Author: محمد سنى دفع الله
Date: 01-02-2008, 05:01 AM
Parent: #136

نجاااااضات البورد
ديل لينا زمن
بنجي ي جنب بوستاتوم
وبنزوغ
ما بنقدر على نجاضوم
ديل نجاااضم كده

Post: #137
Title: Re: ،، نــجـــااااااضــه ،،،،،
Author: Alsa7afa_30
Date: 01-01-2008, 11:17 PM
Parent: #1



Post: #139
Title: Re: ،، نــجـــااااااضــه ،،،،،
Author: محمد سنى دفع الله
Date: 01-02-2008, 07:31 AM
Parent: #137

حسام
ود الص7افة
الراقي
ياود ياعسل
كل المنى ليك بعام سعيد
وعمر مديد
ودايما بتختار من الموسيقى
مايطرب الوجدان
ويغذي العقول
وينشط الذاكرة
اختيارك نور ايامنا الماضية
من اصحاب اصحاب
الى ايام اطفال الديجتال
لك مودتي
وشكري وتقديري
واحترامي
ياحسام
يا صديقي

Post: #140
Title: Re: ،، نــجـــااااااضــه ،،،،،
Author: الفاتح الجنيد
Date: 01-02-2008, 09:09 AM
Parent: #139

Quote: الفاتح الجنيد
نجااااااضه
بتاعك وكبير ده اخير منو النجاااضات الصغار
مقدور عليهو
تقول اممم لمممم وتسمع
لمن انتهي
اممم امممم امممم
والله اخير منها النجاااضات الصغار
دي ما نجااااضه دي ثقاله عديل
لكن بقول ليك حافظ على الأدب
وطولة البال
اديك العافية


تعرف ياود السنى

مره واحد نجاضه مسكنى ليك فى التلفون ،،،
وانا جيعان يادوب ختو لى صينية الغدا قدامى الساعة 3 الضهر
الراجل ده عذبنى عذاب قبورة
وانا اسوى إممم إممم إممم
ومرات :
ياسلاااام
بالله !!!
ياخى مامعقول ؟؟؟
مرة قلت ليهو : والله جميل ...
قام قال لى : جميل شنو ؟
أقول ليك اشتريت هدوم العيد للوليدات قمت نسيت الكيس فى التاكسى تقول لى جميل !!!

Post: #141
Title: Re: ،، نــجـــااااااضــه ،،،،،
Author: محمد سنى دفع الله
Date: 01-02-2008, 01:25 PM
Parent: #140

الفاتح الجنيد
ياخي انت راجل من درجة فارس
ياخي انت الإستحملتو
فرسان بس الواجهو فرسان عدييل
ياخي ده نجاااضة وبراي وثقالتو منو وفيهو
ده بتمتع بصفات فريدة غلا (بالغين) ما تجتمع الا في بغل عديل
ده ما هجين من الثقالة والنجاااضه
زي هجانة البغال غال ثم من غال الثقيل ده
ده اتمنى المولى الكيم ما يجمعني بيهو
لادنيا ولا اخره
واليوم البتعرف فيهو عليك واقابلك وبعد السلام والمحنة
بلبسك نوط الرجالة والصبر الجميل
بعد داك بتعرفني على النجاااضه ده من بعيد عشان اتحاشاهو
مودتي

Post: #142
Title: Re: ،، نــجـــااااااضــه ،،،،،
Author: حسن طه محمد
Date: 01-02-2008, 02:55 PM
Parent: #141


السني واحباب السني

احكي ليكم القصة دي وهي واحدة من قصص التنجيض علي نار مولعة نار قدر ما تحاول تطفيها تولع تاني .

كل المشاهير من السياسيين والفنانيين والادباء والرياضيين وأساتذة الجامعات والوزراء الخ الخ الخ اقرباه رجالا ونساءا . وديل لازم يكونوا من كبار المشهورين المعروفين( انا خايف ود السني يكون قريبه كمان ) . وهاك يا تنجيض:



واحد اخونا من ابطال النجاضة الجد نجض ليك واحد من اخوانا نجاضة جد :

- دكتور احمد ياخي دكتور الفزياء المعروف دا ود خالتي ز
- علي .... لاعب الكورة المشهور دا ابوه ود عم ابوي .
- وزير الاذاعة.. دا امه بتبقي لحبوبتي اختها لكن ما شقيقتها من ام تانية.
- مفتش الأراضي دا مش قريبي وبس لكين برضو صاحبي ولو عندك اي حاجة في الاراضي نمشي ليه سوا ويحل مشكلتك طوالي نحن واقفين.
- دكتورة عشة استاذة البيطرة والقانون دي فظيعة جنها شكل ومرة اتشاكلت مع واحدة زمياتها دكتورة برضو وبس الناس انبسطوا واتلموا عشان يشوفو شكل الدكاترة كيف . والله دكتورة عشةدي لو ما قريبتي ما أزورها اصلو في بيتها.
- قريت كتاب " النجاضة هم احسن ناس " ؟ دا المؤلفه يبقي لاخوي ود عمته ويبقي لي انا ود جدي .
- امبارح حضرت ليك مسرحية " نجاضة " ودي مؤلفها ومخرجها وكاتب السيناريو ليها وموزعهاوممثلها واحد اسمه ود السني . ابيضاني كدا لانه حبوبته سورية وضعيف كدا التقول ما بياكل دا قريبي بس من بعيد .لكن راجل فنان فنان.

وهاك يا نجاضة من النوع دا .

اخونا المستمع في النهاية قال ليه :

اسمع شفت الراجل الراكب الجمل في القرش الاحمر داك . قال ايو شفته.

قال ليه : ببقي ليك شنو!!!!!!!!!!

Post: #143
Title: Re: ،، نــجـــااااااضــه ،،،،،
Author: محمد سنى دفع الله
Date: 01-03-2008, 09:01 AM
Parent: #142

والله لوطلع بعرفو تبقى مصيبة
عارف عندنا واحد نجاااضه
كان لمن اصل البيت
بكتب اسم الفنانين المشاهير
على باب البيت
حضرت ولم اجدكم
محمد الأمين
وينك الشوق فاض بي
ابوعركي البخيت
ونسى انو قدر ما اتحرفن ما قدر اغير خطو
خطو كان بفضحو دايما وابدا ......
مرة قاعدين في لمة قرايبنا وفي غرفة النسوان متلمات نسوان العائلة
واثناء ماهم في عز مجلسهم العامر دلت أم نجااااضة
والجو اتكهرب طوالي مشيت لي زوجتي وهمست ليها :
الدخلت دي ام نجاااضه اعملي حسابك من ولدها قبلها واعملي حسابك منها لانها مابترضى في وريث عرش النجاااضات وفعلا لمت نوبه واضايرت في طرف العنقريب وعدت الثواني والدقائف ولم يحدث شئ وتكهرب الجو عندي يعني حأطلع ىكذاب في نظر زوجتي ونقال كلام ونمام بعد الكلا م القلتو في نجااضه اجي احرجني بالصورة دي شدة ما توترت لمن قربت احرشو لكن قبل ما يبلل العرق جسدي نسمع ليك صرخه من بت صغيرة صرخة انتفض من سماعها كل الأباء الذين خلفوا بنات وجري على الصالة جنب غرفة النسوان
وطبعا انا الوحيد الماجريت طوالي رفعت يدي الى السماء حامدا ربي اني ما طلعت كذاب نجاااضه اشتغل
وركضت ....
وجدنا العم مختار يحمل بنته وهي تبكي ويقلب فيها وهي تبكي والدموع تنهمر والبت تتنهف وكل واحد من اخوان العم مختار اشيل البت واقلبها وحكمة ربنا البت مافيها ولا خدشه ولاضربة انا زاتودخلني الأحباط بعد سمعت كلام العم لالامافي حاجة الظاهر عضته حشرة وتفرقوا الناس والصغيرة تبكي ولفيت راحع
معاهم على الصالون ونظرت الى غرفة النسوان نظرة سريعة ، لمحة ، وهالني وجهه زوجتي محمر ومصفر
على شويةبيج مع طفيان في لمعة القمح، ثم برقت عيونها بريقا اعرفه جيدا يعني انها تحمل في داخلها كلاما ولن تقدر على فتو وتوغوشت وبقى عقلي يودي ويجيب ...
المهم بعد طلعنا وتفرق الجمع وركبنا السيارة عائدين الى البيت انا متوجس من تأنيب زوجتي لي بأنني كذاب اشر وفتان نمام زنيم ، لكن فتحت خشمه فالت ::
كلامك طلع صاح ده ما نجاااضه ده قتال قتله
صحت بكل ما املك من صوتYYYYYYYYYeeeessssssssssss شنو الحصل
انت فاكر البت دي الصرخت عضته حشرة
طبعا لالا وابدا لالالالا
دي كان قاعد جنبها نجاااضه وبلعب معاها وانا براقب فيهم انا قاعده قصادهم الوحيدة الفي الغرفة الشايفاهم بقية النسوان مشغولين في الونسة ومابقدروا اشوفوا الفي الصالة اها الولد ده قال للبت اديني لعبه شايلها في يدها البت رفضت وما عارفة الظاهر انو القاعد قدامه ده نجاااضه المدمر ..اها قالت لالامن هناوالطامة نزلت عليها من هنا،،
بس اشوف ليك نجااضه وقف على حيلو واتلفت يمين وشمال ورفع يدو ونزله زي السوط زيييط على وش البت
سكتت مهجومة لحظة وبعد استوعبت الألم هاك ياصرخة اها قام نجاااضه وجا داخل وبراءة الأطفال في عيونو وقعد جنب امو زي الماسوى شي الوقت الت بقلبو فيها فوق وتحت كان معصور على امو بعد العم مختار رجع البت لي امها الشالتها في حنان البت نعاين لي نجاضه بي حرقةوعيونة مليانه دموع اها قامت ام نجاااضه قالت لي ولدها العب مع اختك خليها تبطل بكا لمن رفع راسو اعاين ليها اشاحت بوجهها بعيدا عنه امها قالت ليها ما تخجلي من اخوك دي حركات البنات الصغار
قلت ليها في سري خجل شنو.. دي خايفة من الحشرة العضتها..
وانا نمت سعيد ذاك اليوم لاني طلعت في نظر زوجتي رجل صادق لايكذب ولا بنجر من خيالي المفتوح
قصص وشخصيات من الأحلام بل من الواقع
نجاااااااضه واااقع عدييييييييل ...

Post: #144
Title: Re: ،، نــجـــااااااضــه ،،،،،
Author: حسن طه محمد
Date: 01-03-2008, 01:44 PM
Parent: #143

سني اخوي
اول حاجة حمدا لله الف انك ما طلعت كضاب وكان ممكن تطلع كذلك بدون اي ذنب تكون قد جنيته .

بعدين تفتكر انو ام النجاضة البي تطلب من نجاضتهايلعب مع شهيدة النجاضة ما عارفاه ؟ اجزم جزما ناضجا وليس نياوانضج من النجاضة ذاته انهابتكون عارفاه زي جوع بطنها بس عايزة تتاشطر علي الباقين لكن قول ليها دورك مكشوف العبي غيرها.

وقلوبنا مع الشهيدة لانها بتكون لي هسه بتهلوس بيه.

Post: #145
Title: Re: ،، نــجـــااااااضــه ،،،،،
Author: محمد سنى دفع الله
Date: 01-04-2008, 08:26 AM
Parent: #144

انا براجع في المواقف
وضح لي جليا انو اي نجاااضه
وراه ام نجااااضه
وعلى هذا الأساس
لابد ان نراجع ورا كل نجااااضه
المؤثرات التي صنعت لنا نجاااضه
فلنحلل
مودتي

Post: #147
Title: Re: ،، نــجـــااااااضــه ،،،،،
Author: حسن طه محمد
Date: 01-07-2008, 09:01 AM
Parent: #145

السني اخوي

صباحكم خير

وسعال : ليه دايما التيمان الصغار واحد بيكون نجاضة جد وواحد منضوج ؟؟

Post: #148
Title: Re: ،، نــجـــااااااضــه ،،،،،
Author: محمد سنى دفع الله
Date: 01-07-2008, 10:34 AM
Parent: #147

تخيل الحكاية دي فيها كتير من الصاح
عندنا في المدرسة تلاته توائم
وكلهم بتنطبق عليهم نظريتك في التوافق النجاااضي
كل تيمان واحد حبرتجي ونجاااضه والتاني هادي الطبع حسن الأخلاق
ليه مش عارف ؟
لكن كده ندور نقد تحليلي
وتنظير سايكولجي في ما ورا النفس البشرية وانقسام البويضة
وتعدد الجينات في الخلية الواحدة
شوفت النجاااض ده كيف ؟؟

Post: #149
Title: Re: ،، نــجـــااااااضــه ،،،،،
Author: حسن طه محمد
Date: 01-07-2008, 02:25 PM
Parent: #148


السني

والله كل ما أقرأ البوست دا وأقرأ كل المداخلات الفيه بما فيها مداخلاتي المتواضعة أضحك واقل شئ اتبسم .

خايف اليشوفني يقول الزول دا مالو . بقيت عامل زي السايقين العربات بينضمو ويرفعو يدينهم وما معاهم زول تاني كانهم مجانين . بس الموبايل بكون مختفي وما ظاهر .

صح ولا ما غلط؟؟؟

Post: #150
Title: Re: ،، نــجـــااااااضــه ،،،،،
Author: حسن طه محمد
Date: 01-09-2008, 06:11 AM
Parent: #149


ود السني الفنان الراقي اللي ما نجاض

تعرف فكرت كتير في حكاية النجاضة دي وكما تعرف وتعلم النجاضة ليس في الأطفال فقط.

لازم في كل مجال تلقي ليك نجاضة ينضجك نضيج.

وزير نجاضة
لاعب كورة نجاضة
فنان نجاضة ( واظنك يا السني تعرف منهم وعنهم الكثير . منتظرين منك أمثلة ) .
في العمل تلقي نجاضة بمعني الكلمة .
في الحي تلقي واحد مكره الناس ولو شافوه من بعيد يخلو ليه الشارع .

بين الأصدقاء تلقي واحد بجيب ليك التنجيض جاهز علي ورق سولفان.

وهكذا يعني المسألة ما مقتصرة علي حبايبنا الأطفال .
بعدين النجاضة دي أنواع . والمسألةفيها تخصص .

وفيهم من حملة الدكتوراة والماجستير وحتي الأمي . يعني المسألة لامة .

كان عندنا في الحي واحد نجاضة في السلام . يديك سلام مليون مرة .

مرة كنا ثلاث واقفين ومندمجين في ونسة ومعنا احد الفنانين المشهورين ( الله يرحمه ).

أتي أحد النجاضات ماري وسلم.
رددنا عليه التحية باحسن منها .
ذهب ثم رجع وسلم . رددنا التحية بأحسن منها .
أتي راجعا للمرة الثالثة وسلم .

وفي كل مرة الونسة يقطعها بالسلام.

هنا ناداه الفنان وساله : تعرفني ؟ قال : لا . بتعرف دا ؟ قال : لا . بتعرف دا ؟ قال : لا

هنا قال له الفنان : طيب بتسلم مالك ؟؟

Post: #151
Title: Re: ،، نــجـــااااااضــه ،،،،،
Author: محمد سنى دفع الله
Date: 01-09-2008, 08:16 AM
Parent: #150

طبعا بهت الذي كفر وما ردعليكم
وده جزء من التنجيييض على نار هادية
في نجاااضات كبار
قطع شك
لكن عايزين نخليهم
لي فهم
خاصة الوزرا
مرة في وزير كان ماسك المحليات
بعدين ودوه التجارة
بعدين شؤون الولايات
عارف ده يوم في نشرة 3
عينوه وزير للبيئةتخيل
الساعة الرابعة بعد فيرد ساعة
كان بتكلم عن البيئة وعن التصحر والحزام الأخضر
والحيوانات والبشر
ونجضنا على نار صحية خالية من الدخان
حفاظا على البيئة

Post: #153
Title: Re: ،، نــجـــااااااضــه ،،،،،
Author: Mohamed Abdelgaleel
Date: 01-09-2008, 01:40 PM
Parent: #151

التيمان كانوا نجاضات معانا في المدرسة
أول شيء شبة تعاريف بس .. لاحدي ما واحد
جاهو رمد ربيعي (هو سموهو رمد ربيع ليه
يا السنى - ونحنا عندنا ربيع في السودان؟)
فرزناهو بيهو من تومو وسميناهـو
التوم الاعمى، لكين ستات الفطور ما بقدرن
يفرزنهن لأنها كبار وحنينات. فطور أربعة
سنين ما فيهن واحد دفع قرش لفطور يتدينوا
وطول السنة تلقا الحجة واقفة والله دا ما
أنا ده التوم التاني، لكين تتخيل يا
السني لما كبروا بقوا مساكين خلاس، أكعب
حاجة النجااااضة البتجي مع الكبر في
العمر وأكعب منها نجاااااضة الزول
البلقاليهو وظيفة تفرض على الناس يصبروا
عليهو .. أكان وزير والله مدير .. يعني
لو رئيس في الشغل بحب ينكت ونكتو بايخة
ما برفع دغتك؟

Post: #154
Title: Re: ،، نــجـــااااااضــه ،،،،،
Author: حسن طه محمد
Date: 01-09-2008, 02:02 PM
Parent: #153


في نجاضة كمان من نوع تاني . ينجض ليك جسمك .

النوع دا من النجاضين اللي دايما بتكلم بايديه.

لو حصل وقعدت جنبه وهو بيتكلم يقوم يمسك يدينك عشان هو يتكلم وانت ما تتكلم واثناء ما هو بيتكلم يجر يدينك ويحاول يثبتم عشان ما تزح من حنبه. يعني استماع اجباري.

طبعا النوع دا من النجاضين ما سمع بحاجة اسمها : حسن الاستماع .

نجاضي الحديث موجودين في كل مجتمع .بس فيهم واحدين ينضجوك من غير مسك يدين وافتكر دا أرحم.

زمان كان عندي نضاجة من النوع البينضج وهو ماسك اليدين ومهمة الهروب منه كانت مستحيلة .الله يطراه بالخير .

يلا احكوا لينا عن نجاضين النضم ودام فضلكم .

Post: #157
Title: Re: ،، نــجـــااااااضــه ،،،،،
Author: محمد سنى دفع الله
Date: 01-10-2008, 07:22 AM
Parent: #153

الصديق الغالي
مو
ندلعك شوية
يا جماعة انا قاصد محمد عبد الجليل
مووو
ما تقول لي موو كده !!
عارف في قانو التنجيض
دايما النجاااضه بكون شفت وقليل ادب ولمن اكبر
الغنماية تشيل التحلية بتاعتو
اما بخصوص الربيع
فكان في انت عارف الجو الأوربي كان عندنا بعدين بقى بزح بزح لمن وصل اوربا من عمايلنا
اهو الربيع ده كان في لحدي اعلان الأستقلال في سنة 52
بعدين قام طلع مع الأنجليز
عشان كده الرمد الطبيعي والربيعي اتغير
لي الرمد النييلي
او عمى الأنهار ده لانو ما عندنا ربيع
شوفت النجااااض ده كيف ؟؟
القال ليك أسألني منو ؟
ديل كوم براهم
خاصة البكون قاعد في شباك
والناس بي برة بتقدم ليهو الأوراق
اعاين فيها واقول ليك ليها ما ختمتها في نيالا ؟؟
لا ختمناها
لالاالختم ةما ظاهر ارجع نيالا اختمه وتعال
بعدين الشمس تكون حااااره والراجل الماسك الورقة راسو بكون سخن
بعاين بي هنا ولي فوق وتحت
وبمشي طوالي بكلم نقسو
والناس بعد يومين اقولوا ليك ياخي البلد دي بقى فيها مجانينين كتار
ما عارفين ديل منجضين بث ...لالا كده أسألني دابل؟؟
اها النجااضين بتاعنك الكبار

Post: #160
Title: Re: ،، نــجـــااااااضــه ،،،،،
Author: Mohamed Abdelgaleel
Date: 01-13-2008, 10:17 AM
Parent: #157

Quote: فكان في انت عارف الجو الأوربي كان عندنا بعدين بقى بزح بزح لمن وصل اوربا من عمايلنا


أولا شكرا على التثقيف الصحي يا السنى
ولنرضى بالقدر المر طالما ربيعنا
شالو قطر عجيب

Quote: خاصة البكون قاعد في شباك
والناس بي برة بتقدم ليهو الأوراق
اعاين فيها واقول ليك ليها ما ختمتها في نيالا ؟؟
لا ختمناها
لالاالختم ةما ظاهر ارجع نيالا اختمه وتعال


والله يا السني مرة مشيت اطلع تصديق وشايل الجواز ،
والنهار حار ومعاي أولادي، لما فيني ظابت نجاضة قال لي
جيب البطاقة، واتمسكنت واتظاهرت بالمرض والمولنه وضيق
ذات الوقت وقلت ليهو والله البطاقة في البيت، وقال لي:
البيت وين؟ قال: البيت وين؟ قلت: في النوبه شمال وادي سيدنا
قال لي: أمش جيبو وتعال: قلت ليهو: والله انا مسافر
السعودية بكره يا أخوي ساعدني قال لي: لا، محلك قريب
وتمشي تجيبه وتجي، قلت ليهو: ياخي انا صدقت معاك، كان
ممكن اقول ليك بيتنا في نيالا ، قال لي: والقال ليك
ما تكضب منو، يالله أمش جيب البطاقة، ما مشيت المهم
المشكلة أنحلت لكين عرفت ليه فات الربيع وفضل الرمد

Post: #168
Title: Re: ،، نــجـــااااااضــه ،،،،،
Author: محمد سنى دفع الله
Date: 01-16-2008, 06:36 AM
Parent: #160

ده النجاااض البعلمك الكضب
يا أخوي محمد عبد الجليل
ديل ناس انجضوووووك لمن تكفر
انا ديل بفتكر ناس كويسين
لانو بي صبرنا ليهم بنخش الجنة
قلت لي كان ممكن تقول ليهو بيتنا في نيالا
عارف كان رد عليك
قال ليك : بنتظرك امشي وتعال تلقانا نحن يانا نحن
مع الأعتذار للأغنية
مودتي

Post: #155
Title: Re: ،، نــجـــااااااضــه ،،،،،
Author: صلاح شكوكو
Date: 01-09-2008, 04:27 PM
Parent: #1

Quote: صلاح شكوكو
رافت lيلاد
استعدوا بداية السنة
وقع عليكم الأختيار
لتكونو في لجنة النجااااض الأكبر
راجعوا اقتراح الأستاذ حسن طه
مودتي


جاهزين ياريس .. بس أدونا راس الخيط
وراجعين نعاين أخونا حسن طه إقترح شنو ؟؟

بس لغاية أوبتنا للموضوع هاكم (( النجيض )) الجد .. جد

-------
إسمه ( فاروق ) وجد دجاجة ( ميتة ) في ( الكوشة )
ولأن أمه في ( زيارة ) للمستشفى تحركت نوازع كامنة
لديه فأخذ الدجاجة من ( مكبها ) وحملها الى البيت
وأشعل نارا فحمية .. وسخن بها ماءا وأخذ ( يظعمط )
شعرها وهو مستمتع تماما كما تفعل أمه ..
ثم نظف الإحشاء ( ولا أدري ) كيف إستقام له هذا لكن
المهم أنه فعل ذلك .. ثم أتى بــ( طوة ) وضع عليها
زيتا ثم بهر الدجاجة بما أتيح له .... ثم ( صلاها )
بالنار على الزيت ( حسب رويته ) ..

وقدمها الى المرحومة (( جليلة )) مرفقا معها كذبة
تاريخية بأن أمه أرسلته بها إهداءا إليهم ..

أكلت جليلة وأسرتها الدجاجة رغم أنهم لم يعتادوا على إهداء
كهذا لكنهم وكحال المناطق الشعبية المتشعبة( يهدون الخير
ويأتيهم ) فقد إلتقت الوهراء بأمه لتشكرها على المائدة الطيبة .. وكانت المفاجأة حينما بدت الحيرة على الأم التي نادت ( فاروقا )
وسألته بنبرة تحقيق عن القصة ؟؟
سردها وكأنه يستدعي من أحشاء ( جليلة ) كل ما تبقى فيها
من أثر تلك الوليمة التي أكلت بنهم كبير وهاهي تستدعى من
قاع وجودها بذات النهم الأول ..
------
لا أدري كم كان عمره وقتئذ ولكنه في أواسط المرحلةالإبتدائية

(( فاروق )) الذي كان نجاضة أهله وجيرانه .. أصبح شابا ظريفا وديعا
وكلما ترائى لي وجهه أتذكر القصة وأترحم على جارتنا ( جليلة )
تلك المرأة الجليلة التي ترحمت عليها الطيبة وهي تفارقها
فقد كانت واحة ظليلة ونفسا مطمئنة زاكية وراضية مرضية ..

-----------
ويبدو أنني مع آخرين تعشش الصورة في ذاكرتهم لن ننساها لفاروق أبدا
----------

..
..


Post: #156
Title: Re: ،، نــجـــااااااضــه ،،،،،
Author: حسن طه محمد
Date: 01-10-2008, 06:18 AM
Parent: #155

قوية يا صلاح شكوكو ودا حنضعه في قائمة النجاضين الأكثر نجاضة لانه في النهاية حتكون في جائزة نوبل للنجاضة .

وسيقام الحفل في السويد وسيتم دعوة اكثر رؤساء البلاد تنجيضا لشعوبهم ولشعوب الأرض لتشريف هذا الحفل.

Post: #158
Title: Re: ،، نــجـــااااااضــه ،،،،،
Author: محمد سنى دفع الله
Date: 01-13-2008, 08:59 AM
Parent: #155

صلاح شكوكو
المحية والمودة
شايفك اليام دي مشغول في بوستات
ما حتجيب ليك غير ضغط الدم
ياخوي تعال راجع لينا هنا
نكون اللجنة النصوص عليها
اعادة وترتيب البيت السوداني
لانو ياخوي ونحن بنحتفل
ظهرت ظواهر عايزة اعادة
نظر منها السودانيين الوحيدين في الشعوب
البجو لي اي مناسبة متاخرين
وبقيفو برة الباب لمن المناسبة تقرب تنتهي
تاني حاجة بيجوبو اولادهم لمناسبات البتخص الكبار
والمناسبات البتخص الصغار ما بجو
الاولاد بجو بلقوا روحهم غرباء في مناسبة الكبار
فما بكون ليهم دور ولا حد مهتم فيهم
اعملو شنو غير انجضوووا الناس وهنا بكون الدور عليهم
كبير والتنجيض على نار هادية

Post: #159
Title: Re: ،، نــجـــااااااضــه ،،،،،
Author: محمد سنى دفع الله
Date: 01-13-2008, 10:05 AM
Parent: #158

في حفل الجاليةالسودانية
بأعياد الأستقلال واثناء الناس في الحفل
ظهر طفل نجاااضه نجض الحفلة لي درجة
مقدمة الحفل الفنانة الرقيقة رندا حاتم طلعت من طورة
وامسكت يالشافع النجااااضه
وصرخت في الحفلة ده ولدمنو ؟؟
ياجماعة الطفل بشير اهلو اجو اسوقوه
وطبعا اهلو كانو مرتاحين منو شوية
يعني يالعربي عدييل زاغو منو
نادت الطفل بشير معتز
وهنا ما كان من زوجة معتز القريش التالته
ان قالت معتز ما تشوف ولدك
قال ليها انا ماعندي ولد اسمو بشير
قالت امكن تكون متزوج الرابعة ونحن ما عارفين
سؤال الحلقة منو النجاااضة في ديل ؟؟؟؟

Post: #161
Title: Re: ،، نــجـــااااااضــه ،،،،،
Author: حسن طه محمد
Date: 01-13-2008, 10:26 AM
Parent: #159

يا خوانا سؤال : هل النجاضة أحيانا بيكون ليه الحق القانوني في التنجيض ؟؟


يعني : هل في تنجيض قانوني و آخر غير قانوني ؟؟

بعدما أقرأ الاجابة ، حأحكي ليكم القصة .

Post: #162
Title: Re: ،، نــجـــااااااضــه ،،،،،
Author: محمد سنى دفع الله
Date: 01-15-2008, 06:51 AM
Parent: #161

طبعا في تنجيض قانوني
وده من حق الطفل
انو انجض اهلوا شوية
يعني حاجة كده بتكون ظريقة
لكن اي نجاضه ليهو مساحة حرة
العب فيها وفقا للقانون
ما ميزيد عن ذالك
يصبح خارج القانون وهنا بتيقى في مشكلة
وبعدين الفرق شعرة بين النجاااضة وقلة الأدب
يعني الطفل النجااااضة ما شرط اكون قليل ادب
ممكن اكون نجاااضه بس
لكن القليل ادب ده كوم تاني
وده مشكلتو كبيرة
النجاااضه لمن اكبر بستعدل ومرات ببقى هادي جدا
لكن قليل الأدب عمرو ماببقى مؤدب
ببقى مدلع زيادة وقليل ادب كتيييييييير
والله اعلم


Post: #163
Title: Re: ،، نــجـــااااااضــه ،،،،،
Author: حسن طه محمد
Date: 01-15-2008, 09:37 AM
Parent: #162

التنجيض القانوني

اليكم القصة

في اجازتي الماضية بدأت في اجراءات ترخيص عربتي بعد أن دفعت جماركها من دم القلب ، وذهبت لمكتب الترخيص وأحمل معي كل الأوراق والمستندات الخاصة بانهاء الترخيص عسي ان استمتع قليلا فيما تبقي من الاجازة القصيرة.

هنا بدأ التنجيض علي أصوله .

مررت علي كل الشبابيك اللازمة ( أحيانا تجد الموظف المختص وفي كثير من الأحيان لا تجده وأحسنهم من يكون خارج مكتبه يستمتع بالونسة مع بعض زملائه او معارفه القادمين لنفس الموقع لغرض او بدون غرض.)

كان ذلك في شهر اغسطس وشمسها تلفح الوجه والشبابيك بدون اي مظلات.

دفعت كل الرسوم المطلوبة ابتداءا من رسم الترخيص وليس انتهاءا بدمغة جريح ورسوم سلام ( طبعا رسوم الحرب انقلبت لرسوم سلام ولا أدري سينقلب لرسوم انفصال أم وحدة ) وكل له شباكه .

في نهاية اليوم وفي آخر شباك أفاد الموظف بان الاوراق لا تحمل الختم الخاص لضابط الجمارك رغم ان الاوراق تحمل كل اختام الجمارك الأخري من بارزة وغير بارزة .

ما العمل ؟؟ طلب مني الذهاب لرئاسة الجمارك للحصول علي الختم الميمون للضابط الذي نسي ان يوضع ختمه .

صباح اليوم التالي ذهبت لرئاسة الجمارك .

في الطريق استوقفني شرطي مرور وحرر لي ثلاث مخالفات وهي عدم وجود لوحات - عدم وجود استيكر - عدم شراء لوحات مؤقتة .

حاولت افهامه بانني اقوم باجراءات الترخيص وهذه هي الأوراق وفي نفس الوقت ان جميع هذه المخالفات تعتبر مخالفة واحدة ولكن دون طائل .

دفعت وامري لله .

ذهبت للضابط ولم اجده حيث علمت انه ذهب للتعزية في قريب لاحد زملائه وقد يرجع او لا يرجع لمكتبه .

انتظرت حتي نهاية يوم العمل دون جدوي .


ثاني يوم رجعت للضابط وبعد طول انتظار حصلت علي ختمه الخاص الميمون مع نهاية الدوام.

ثالث يوم رجعت لمكتب الترخيص لاكمال الاجراءات ولم أجد الموظف المختص .
رجعت للمنزل دون جدوي .

باختصار في رابع يوم حصلت علي الترخيص واللوحات وكأني حصلت علي شهادة الدكتوراة من جامعة هارفارد.

السؤال يا سني الحبيب : هل في تنجيض اكتر من كدا ؟؟ علما بانه تنجيض قانوني عليك ان تستجيب له دون اعتراض لان الختم الخاص للضابط يجب وضعه بموجب اللوائح.

يعني التجيض نوعان قانوني وغير قانوني وكذلك من الصغار ومن الكبار !!

الله لا يوريكم مثل هذا التنجيض !!!!

Post: #170
Title: Re: ،، نــجـــااااااضــه ،،،،،
Author: محمد سنى دفع الله
Date: 01-16-2008, 07:28 AM
Parent: #163

لكن يابو علي ده ما نجضك نجاااض
عارف زي ديل
تقول بعزلوهم عزل
الواحد وشوصاري اون ليهو زي كم سنة كده ما ابتسم
ولا باس ليهو طفل ولا عيونو ناغمت عيون امو
ولاحب ليهو جكس
ده لمن ما القى ول انجضوو
بنجض روحو

Post: #165
Title: Re: ،، نــجـــااااااضــه ،،،،،
Author: محمد سنى دفع الله
Date: 01-15-2008, 08:59 PM
Parent: #162

بفتح البوست مابلقى مداخلة عثمان دعيس
برجع الصفحة الرئسة بلقى مكتوب غثمان دغيس
ده نجاااض اسيفيري ولا شنو ..؟؟
افتونا ياناس يا خبرا وين مداخلة الراجل ده وين مشت ؟؟
نجاااضة

Post: #167
Title: Re: ،، نــجـــااااااضــه ،،،،،
Author: حسن طه محمد
Date: 01-16-2008, 06:14 AM
Parent: #165

يكون الأخ دقيس عايز يكتب المداخلة قام واحد نجاضة نجضه ومن شدة النجاضة افتكر نفسه كتب المداخلة وارسلها .

قلوبنا معكم يا دقيس .

دقيس هل بالقاف ام بالغين ؟

سؤال تاني:
هل المهندس احمد دقيس بالمنطقة الشرقية بالسعودية قريبك ام اسم علي اسم ؟

Post: #169
Title: Re: ،، نــجـــااااااضــه ،،،،،
Author: salma subhi
Date: 01-16-2008, 07:02 AM
Parent: #167

نوّر الله أيامك يا استاذ السنّي....


Quote: لمن كنت صغيرة



ياااااااا لها من فترة !






كل سنة وانت طيب


.........

Post: #171
Title: Re: ،، نــجـــااااااضــه ،،،،،
Author: محمد سنى دفع الله
Date: 01-16-2008, 07:47 AM
Parent: #169

سلمى صباحي
هههههههه
شفت ليك مداخلة
زي دي
سلمى صبحي
اوع تقول لي انك كنت نجااااضه
بالمعني بتاع الشقاوة
ما المعنى بتاع الحلاوة
واوع تكوني كنت مدلعة
وجنك بكى وبوقفي البيت على فد رجل
وتاني حاجة معذرتي وحبل السماح ممدود
متلوم ما رديت عليك فوق
لانو استغربت من تكرار الصورة والكلام
الروووب والأسف لي بكرة
واحكي لينا يا نجاااضه

Post: #172
Title: Re: ،، نــجـــااااااضــه ،،،،،
Author: salma subhi
Date: 01-16-2008, 08:00 AM
Parent: #171

Quote: سلمى صباحي

استاذ السني
كيفك....

هسي بعد المداخلتين ديل يا استاذ السني بقيت بت صباحي..!!
وتكررت المداخلة....شقاوة

Quote: اوع تقول لي انك كنت نجااااضه
بالمعني بتاع الشقاوة
ما المعنى بتاع الحلاوة


انت مش لاقيتني وأنا صغيرة مرة....رأيك شنو؟

Quote: واوع تكوني كنت مدلعة
وجنك بكى وبوقفي البيت على فد رجل


هسي بقينا بس شغالين نغير صور البروفايل ولا كمان دي نجاضة ....


......

Post: #173
Title: Re: ،، نــجـــااااااضــه ،،،،،
Author: محمد سنى دفع الله
Date: 01-16-2008, 09:02 AM
Parent: #172

سلمى صبحي
هسي زي الصورة العاملاها دي
ما بتنجض الناس نجاااض
يعني يا تحب البت الحلوة دي
يا تحب الزهوروالورود الأنجليزية
المختارة بعناية...
ما حكيتي عن طفولتك
وضروري جدا تحكي لينا عن اطفالك او اطفال اهلكم النجاااضين
مع مودتي ..

Post: #174
Title: Re: ،، نــجـــااااااضــه ،،،،،
Author: حسن طه محمد
Date: 01-16-2008, 10:54 AM
Parent: #173


ود السني

لحدي ما سلمي تحكي ليك عن نواضيجة احكي ليك عن نضاجة كان جارنا .

النضاجة دا رغم انه كان كبير في السن الا انه من شكله وقصره تقول ولد صغير .

ما مكتفي بالتنجيض بس زايد عليه قلة الأدب + عامل فيها بلطجي وفتوة .

يعني تن الله جيض + فتونة + قلة أدب = ؟؟؟؟؟؟؟؟؟؟

دا كان منجض ليك اولاد الحلةتنجيض ولا أحلي اذا كان أصلا في التنجيض حلاوة.

النجاضة دا متخصص في لم القروش من اولاد الحلة .

طلباته كلها منهم اوامر . بكرة تجيب جنيه عشان نشتري فنايل الفريق ( طبعا هو عامل رئيس الفريق ) ولا الله قال قولتك .

المسكين ما عندو الجنيه ويمشي ينجض امه عشان تديه الجنيه ويجي يسلمه بطيب خاطر للنجاضة .

في أحد الأيام نجضني انا ذاتي بقلة ادبه .

مسكته قلت ليه والله تاني أشوفك قدامي او قليت ادبك مع اي واحد من اولاد الحلة امسكك واربطك واربط ابوك ذاتو معاك.

انا لا كنت حاربطه ولا اربط ابوه .

ما صدقت انو التهديد بتاعي كان سببا كافيا ان اولاد الحلة ارتاحوا شوية من تنجيضه.

لكن راحة مؤقتة لانه النجاضة عارف انا مغترب وقال في نفسه كلها ايام ويسافر وبعد داك انضج بمزاج.