طـال ليل القطيعة....مـتى سـتشـرق شـمـسـكـم؟؟

أخوتي وأخواتي
المحبة والسلام
بـهـنـس أشتاق اليك وصورك الخلاقة!!
أبوذر وقصائدك النديات
محسن خالد وشخصياتك التي تعيش معنا وتتنفس هوانا
منصور المفتاح ودراساتك التراثية
شذى بله إيزابيلا والحروف المكتوبة بحبر العسل
عثمان محمد صالح والكتاية الجن والجن الكتابة
نادية الشاعرةالتي تاهت في شوارع القاهرةمن الحسين الى حدائق الخالدين
مطر قادم جاء الخريف ولم تأتي والمطر
عماد عبدالله والبني الضارب جذوره في اعماق ذاكرتنا وثمرة إستوى وعيا أصيلا في بصيرتنا
طلال عفيفي ولونك الأزرق الملوكي أكتب للرعية منناولون صباحات السماء الزرقاء بلون البهاء
عصام المركز 16 قبل الخريف جاهز افرح واعدل الصورة لي شمس بكرة
تعالوا أحبتي للكتابة الجن والجن الكتابة
.......طلع من الكتابة النكد..
كل ينادي حبيبه ....

صباح الخير يالسني
تصدق إني كمان مشتاق للناس ديل ، لبهنس على وجه الخصوص ،
لكلماته الساحرة وتجربته العميقة في الحياة العجيبة دي .
يا سلام على بهنس .

عجيب أمره هذا المكان !!
مرات تلقاه غرقان في فيوضات المحبة والكتابة العفية زي
صبية بنت عشرين .. ومرات كمان ، زي ما إنت شايف ، يغيب
عنه الندى والياسمين ..

كل الناس القلتهم ديل يا سني ماليننا بالشوق إليهم ،
يا ريت يجوا هنا ، تاني وبسرعة ، ويجعلوا هذا المكان
أكثر عماراً ..
جاتني في اللحظة دي صورة تماضر ، وين هي ؟

يا صاحب ..

أنا زي طلال .. مشتاق لتفانين بهنس ..
و إيزابيلا ( مش شذى بله ) ..
سلمى داوود ..
خدر
تماضر
محمد الحاج
شيري
الجريفاوي
و منو و منو و منو ..

كلما تحاصرنا الشناة ..
نحتاج للناس دي أكتر ..
( طـال ليل القطيعة....مـتى سـتشـرق شـمـسـكـم؟؟ ) ..

يا رهق .

سلام يا صاحبي الجميل ..
و لطلال و كتاباتو التي تخت الرحمن في القلب .

عارف يا طلال الظاهر سرى خدر الكبر
في شرايين تماضر لقت الدنيا من حولها لافة
في عرس الصغار الكبرونا
والكبار الماعايزين إصغرونا
قالت احاول اجي بي مدخل جديد
عارف يا طلال
تماضر أختي
تمثيلة زي ونسته
وونسته زي تمثيله
وكتابته تخلي قلبك إشيح وانت بتقرا فيها
وينك يا تماضر
تعالي طلعينا من الوحلة النحن فيها

Quote: كلما تحاصرنا الشناة .. نحتاج للناس دي أكتر .. ( طـال ليل القطيعة....مـتى سـتشـرق شـمـسـكـم؟؟ ) ..

ايوه..كلامك وكلامهم صح..
وآخرين كثيرين..
لكن أعتقد أن مع بعدهم..
فهناك أيضا من يفكر في البعد..
فوجع الأعصاب متزايد هنا..
كيف يمكن ارجاع الجمال وانقاذ باقيه دون خلق احساس بوصايه؟

حبي لكم جميعا ..

منى خوجلي
العزيزة
الله ابعد عننا وعنكم
تعب الأعصاب وقل النوم
والقباحة والشنا والخوفا
والتردد والتكلان
اجمل حاجة في الموقع ده انو ديوقراطي حتى الطيش
ما بنخلي لي اي زول
والعايز امشي
بنقول ليه اقيف شوية وإتأمل
ماشي وين مروح
اي واحد هنا بفش غلو
واي واحد هنا بوصل فهمو
اها نحن علينا بالناس الفهمهم
بريحنا وبضيف لينا وبلهمنا
معاي نادي على الناس الفهم وجميلة

عماد عبدالله
شـــوفـت كـيـف بـتـحاصـرنا
القباحه والشــنا
ناس زي ديلبغـــسـلوا
جــوانا القباحه
وبتمرونا إخلونا نتلاصف
من جديد

بدرالدين الحلوووو
ود الحــــــلاوييين
اسمك اول الأسماء لكن قبل فترة واحد مسخ علينا السؤال
وكان بفتش عليك
معانا نرجع الطفشو ونثبت العايزين إفزوا
مودتي

محمد

يا سنى

يا دفع الله

يا طعم الله

لأنك عندنا كل الخير

ولأنك مليان بالضوء
الضو المارق منك فيك

ولأنى
بحبك
وافتخر بك
واهوى قربك

تعرف يا سنى

يبدو إنه الواحد مناعته ضد القباحة نقصت
أو يمكن نكون كبرنا و"مكنتنا خفت"

مافى شنا الزول بقى يقدر يحتملها

إلا شناة بدر الدين

الزول النديان التريان داك

أنا قاعد والله بتفرج

وليك يا سنى

جاكا فرح النيل يضمك
مدا إيدو
بشرت فيك الشمس
شالت الغيمات وجاتك
تحلف الأيام وحاتك
يا نداوتك
ويا حلاتك
لماجنب عينيك نقيّل
يكتب العاشق نشيدو
كنا فى ريدك نحمّل
همنا الطامح وريدو

وكان الله مد فى الأيام

بنتلاقى يا سنى

ثم

أحبك
وأموت فى الناس القلتهم ديل

وبرضو عليك الله كورك معاك لى "منوت"

اها

أرقد سعادة وطيبة

يا زول يا بهيج

بكره لما قمركو يطلع
والشمس تطلع
حيقولوا كان في المكاه ده ناس
فيهم طيابه وفيهم حماس (نجم)

أستاذنا السني .. يازول يا
باحث عن الكلمة التخلي
البلد توسع .. تحايا كثيرة

ابوذر
الضو والتساب
الخير والمطر السقى
شقوق الأرض
يازول ياتريان محبة
الكلام الكتبتو مشكور عليهو
وعايزين كلامك الزين
لي كل الخلايق وكل الأحبة
بهجة غنانا

محمد عبد الجليل
مودتي يازول يانسيم
وينك ولا مع الترزي
اكتب لينا عن التعليم
وعن النشاط الشايل الأطفال
وعن الحب المالي الدنيا
وشوف لي وين الحنين ابوجهينة
وين الود القيافة الأقيف مني ود الموج
تعالوا أكتبو
**
سلمى داوود
سلمى الشيخ
سلمى صبحي
خدر
محمد الحاج
شـــــيــري
الجيريفاوي
ما سامعين عماد بنادي
ماسامعين ؟؟؟

ياعم السني ( عم دي عند الخليجيين تجلة وما عمر لاني مولود سنتيين بعد فيضان كام واربعيين .. اطمئن انت لسه صغير).. اها "غبت" وفتشنا عليك وقت مشغول ودحين رجعت فرجع لينا الناس البهية دي كلها .. نحنا الجفاف يبسنا واصلنا يبسانيين وما عندنا لا ملكات (ولا حتي رعية ) شعرية ولا مسرحية واها بنايين وكمان رطانة.. تعرف بهنس دة ريشتو الضو .. شفت واحد ريشتو قوس قزح اهو دة ...اها طلة جاء وعماد جاء .. عثمان ود اختي ايامو خدرة ومفرهدة وبجي كان ما اليوم باكر بجي وشذي بلة الشغل قالت ماخد وقتا كلو وانشاء الله الباقيين "يجو عايدين"

الرطان

عم أبوبكر
الراجل الهمبرييب
ضل ضحى يزيد وإفضل
انت الوحيد الرابط الناس دي كلها
لكن برضك طولت من كتابة التاريخ
وكتابة الفهم العميق
وبقيت تجابد في مضايرة الردود
يارطان وشايل لغة ليها سبعة الف سنة ضوئية
أحبك وأودك
وراجي الناس الحلوة تحت ضلك
أفرد جناحيك لمنا
يازول ياممهول
يابخاته
ارضى علينا

Quote: لكن برضك طولت من كتابة التاريخ

ياعم السني بقدر ما كنا بنحب حصص التاريخ في زمانا وحتي في امتحان الشهادة السودانية القديمةكتير من دفعاتنا امتحنت التاريخ مع العلوم والرياضيات رغم عدم اهميه كرديت التاريخ في الدخول لكلية العلوم ..ربما سرعة تطور الاشياء والكم الهائل من المعلومات الحديثة الان تبعد اولادنا من قراءة التاريخ وامر بالغ الاهمية هو ابناء الشتات والذين يدرسون تاريخ البلاد الموجوديين فيها واكيد ليس تاريخ السودان فلا يشعرون برابط بين تاريخ البلاد التي هم فيها وبيتهم ..المسافة بين اجيال الشتات وتاريخ بلادهم تتسع وبين اجيال الداخل وما توفره المعينات التقنية من معلومات عن تاريخ غير بلادنا كذلك لا تجعل تاريخ بلادنا هو الوحيد في مخيلتهم ...
قراءة التاريخ الم ينعكس علي واقعنا اليوم يكون حدوته .. لا اعني تكرار التاريخ ولكن اثبات ان من بني اجداده مثلا سورا في الصين القديمة يبني الان عالما جديدا في بكين وشنغهاي وتايباي معالم لا تقل شانا عن سور اجدادهم وهكذا من تحدي اجداده ظلما وجبروتا وافدا علي بلده قادر علي تحدي ظلم محلي في بلده ...التاريخ المنبت عن الحاضر يبقي خلفية في ديكور مسرح لا تلائم المسرحية ....

أستاذنا أبوبكر .. يا سني ..
هو الآخر واحد من جند الجمال ..
( إن لله عبادا إختصهم بقضاء حوائج الناس ) ..
و أبوبكر كما يقول أبونا الرئيس الشيخ طه بادي بيقضيلي حاجة ) ..
فهو يقضي حوجتنا للخير و الجمال حيثما استطاع إليه سبيلا .
جميل أخانا أبوبكر حد ان تحسده على هذا الصفاء الذي يشع من كل ما تقرأ له ..
حتى في غضباته القليلات الشحيحات الجميلات .. فهو يلتزم حزب الجمال ..
لغته مترعة بالنبل الحلو و البيان ..
الولد الفارع في إنسانيتو طلال , دائما ما يحرض أبوبكر على إخراج درره ..
ما بيكون عندك سكة غير تمتع روحك بدويتو من الجمال الجمال .
أبوبكر يا صاحبي عجيب في احتفاءه بالناس الحقيقيين ..
و لا يفتر عن الهتاف من جوه روحو لكل شي جميل يقوم به الآخرين ..
و أظنه يؤمن ان في هذه الأمة المنكوبة ما يزال خيرا كثيرا ..
فقط دفنته الهزايم عن يمينه و اليسار ..
لكن لسه عالية خصوبة الأرض الطيبة دي تحت دُرّاب الطمر المنظم ..
و لسه بتشابي بذراتها الطيبه عشان تلاقي سكة تمد راسها للأعلى و جذورها في بطن التربة المسكينة المهملة .
أبو بكر يا صاحب الجمال ..
يا رجل .. إن الناس تحبك .

......
عالية عوض الكريم يا سني ..
واحدة من حزب الجمال ..
أسمع الشغل الناعم ده منها :

(موال ثاني)

مواويل الصبر اهديك
دروب شوقا تسافر ليك
وما توصل
حزن جوفا يصنقر فيك
وما يرحل
وجع قلبا سقاك المُر
وما فسر
مواويل الصبر
ترجاك
تعب قلبا مفصٌد بيك
وما ودر
ضهب دربا بفتش فيك
وما بفتر
مواويل الصبر تحتار
من حبا
أقام الليل
واسري الويل
وبحلم بيك
وما بوصل
مواويل ....الحزن

نعم للجمال يا سني .

.

Quote: و أظنه يؤمن ان في هذه الأمة المنكوبة ما يزال خيرا كثيرا ..

عماد خضر المولي ايامك
البستني لباسا فضفاضا من عظيم قولك ..
طلال او طلة هو اطلالة لزمنه بمقاييس جيله من رسامي الجمال..

انا وفي كهولتي الان ورغم بعد عن البلد وصل الثلاث عقود اعيش هناك باصرار وان جمال كان ومازال هناك لم يذهب وانما هو تحت ركام كثير من قبح افعال بعض من ابنائه والا فما بالنا نبحث عنه بيننا في الاسفير ..؟

امتنا تحتاج الي وقفة قبل ان تقرر الي اي اتجاه تسيير .. هي محتاجة لوقفة مع النفس لتقرر .. امل ان يعطيها بنوها تلك السانحة وحتي ذاك الزمان لا يمكن الا نبقي الشعلة الصغيرة مضيئة ..

هل تخيلت ياعماد لو اتفق كل المسجليين في هذا المنتدي والقراء علي لحظة واحدة زمن واحد صباح هنا ظهيرة هناك عصر هناك ومساء هناك وصاحت اصواتهم "بحبك يابلد"..! بلدنا محتاجة الي حب كثير ...
حب كثير عشان البنية السمحة دي "سوميتا" واخواتا واخوانا .. دييل بيستاهلو بلدهم تكون احلي مما هي فيه...

Quote: لو اتفق كل المسجليين في هذا المنتدي والقراء علي لحظة واحدة زمن واحد صباح هنا ظهيرة هناك عصر هناك ومساء هناك وصاحت اصواتهم "بحبك يابلد"..!

يا جميل يا أبوبكر ..
يا جميل .

تعرف يا عماد.. سوميتا(عزة) هي شجرة فرح .. جيل تحسبه بعيد عن اشجان وهموم البلد ومشغول بعالمه المزدحم بمفردات وغناء الزمن تاتي الينا ب"ماهو عارف" للفرح خليل فرح ...اكيد سلمي لما سمتها عزة قصدت انها تكون كذلك ...

عماد ..ايه رايك ؟ نجي نعملها وننادي الناس لقولة "بحبك يابلد" لنجدد خلايا الحب في جسم البلد

سوميتا
الحبيبة الغالية
وينك ؟
طلتك بالدنيا الجميلة زيك
والغنية تمتد بيننا
ورقصة الفرح للفجر الباهي
معاك تطول
جميل مرورك
ياعزة السودان

ابوبكر
عماد
ليه ما نعمل بوست
منفصل ونعلن ليه من الحين هنا
ويفتح البوست ابوبكر ابو الكل
بــحــبـــك يابـــلـــد
ونبدا بالفكرة الأساسية كل واحد اكتب مقطع قصير وجميل ونبيل وعميق عن البلد
وكل واحد اقابل واحد اسالو عن البلد كلام جد ومافي هظار
خلونا نتفق على فكرة جميلة
نحدد اليوم والصباح في داك اليوم قطع شك حيكون أجمل

**
وين د. المعز العجيمي
وين عبير خيري
وين محمد عكاشة

ونحن شمسنا تشرق منك ايها الولد الجميل(... ذات امسية رمضانية في بيتك في القاهرة ، من العام (91) كنت قد دعوت عددا من الاصدقاء لتناول افطار رمضان صحبتك ، كنت قد أعددت الافطار ( علي كيفي ) مكون من( العصيدة وملاح التقلية )بعد الافطار سالوك :
ـالسني العمل العصيدة دي منو؟
فردت بقولك دون تردد
ـ: اخونا سلمي )
مازلت ( اخوك يا السنى ) وساظل احبك ( على كيفى ) واتمنى ان يعود الق السودان لنعود شموعه التى تحترق لاجله، وصدقنى لن تنقطع ليالى الشجو والالفة بيننا

اخونا
المامنظور إنسانا
عيني باردة على الكتابات الجميلة وعميقة وفبل كل حاجة ممتعة
عايز ادخل بالمهلةياأختي الصدوقة
يدك معانا في تحديد يوم لي البوست الرائع بتاع ابوبكر
بنحبك ياسودان
ومعانا نداء للناس الحلوة الزايغة من الموقع
سلمى اهديك محبتي والبنفسج

بــحــبـــك يابـــلـــد ادارة عماد عبدالله واخراج محمد سني دفع الله

"وعزة في الفؤاد دوا يشفي الوبال "
عزة الشافية مريضة
عزة عايزة ولادا ينهضو يجددو القديم ويخلو الخيال
عزة لا كايسة فلوسكم ولا حتي ارواحكم
عايزة بس كايسة حبكم
"بحبك يابلد" كلمتيين بس من كل اركان الدنيا باية لغة واي لسان سوداني حتنعش عزة وروحا ابسماح حيسري كالسيال

بس " بحبك يابلد"

بــــحـــبـــك يــا بــــلـــد
الناس الرايعة
أكتبوا للبلد المحبوب
بـــحـــبك يــابـــلــــــد

بــــحـــبـــك يــا بــــلـــد
الناس الرايعة
أكتبوا للبلد المحبوب
بـــحـــبك يــابـــلــــــد

"بــحــبـــك يابـــلـــد" ادارة :عماد عبدالله واخراج :محمد سني دفع الله

السني طمني

سلام مربع يا قدع.

عارف طالما الموضوع ذكريات وناس مشتاق ليهم؟
اها النقول كلام الذكريات:

في الطابق الرابع أو التاني ما عارف .. في عمارة النصر
رجعنا أنا وانت من مطار القاهرة بعد وصلنا زول ما متذكره منو
والساعة كانت تلاتة صباحا ... قبل ما نرجع الشقة غشينا حلويات أبو الدهب
واشترينا فطيره ... ومشينا علي البيت وبي ليلنا داك ما خلينا فيها الحاجة..

كيف يا أمير ... طبعا راسك ضرب وحتقول ده منو ده؟؟ الجاي ناطي جوز طوالي ده؟؟

المهم دفعتي صلاح الدين الأيوبي الراجل أبو قلب ابيض ... الممثل المقتدر .. العازف
الفنان .... الرجل المهذب ... هل تصدق من تلك السنين ما حصل اتقابلنا.....
وبرضو سعد الحريف في الكورة والتصوير ..... طيب خليني أعمل طلب تدخل في البوست ده
وأطلب حضور صلاح وسعد ... ونعيش أحلي ذكريات الجيزة والمعهد في الهرم وناس عادل حربي
وعبد الحكيم ...وعز الدين هلالي ... طبعا عز الدين قريبي انا عشان أقرب ليك الصورة شوية.

المهم يا استاذي المهذب أبو قلب حليب ... لك كل الحب والتقدير ..... طبعا أحلي
حاجة اني دايما بقول انو السني في التمثيل وحياتو العادية ما في أي فرق ... يعني
التلقائية الفي التمثيل هي نفسها تلقائية حياتو ....
اسمع لما تقرا الكلام ده ومعاك الناس الحيقرو ما يقولو اني دفعتك ولا حاجة..... انا دفعتي صلاح.

تحياتي وبلغ سلامي للأيوبي صلاح وسعد .... ويا ريت توريني أخبارهم شنو في الدنيا العجيبة دي.

محمد عبد المطلب.

محمد عبد المطلب
التحيةوالحب
صلاح دفعتك يعمل في قسم التلفزيون بكلية الموسيقى والدراما
وله من الأطفال محمد السني ووالاء وغيداء والبراء
وسعد اصبح من المصورين البارعين ويعمل في شركة انهار التابعة للتلفزيون
مودتي واتمنى ان اسمع عنك كل جميل
واكتب لنا عن الناس العايز تقرا ليهم في المنتدى
محبتي

يا حمالة الفرح
مشيتو وين
انا خايف اليباس ينتشر
وقت ما قادريين نكون في بلدنا ولا نشوف زحمتا وهبوبا وافراحا واتراحا وكواريك شفعا
ما تبقو بجاي ع الاقل نعرف انو موجوديين
سئمنا ان نكون تروسا في ماكنة عمل يومي يستمر سنوات بلا توقف وتموت الاحرف في دواخلنا

يا حمالة الفرح .. اجمع

"بحبك يا بلد"

بفتش على الحلوين العايزين

اسيبو المكان
كل المواهب النادرة هي هبة من الرحمن

الكتابة هنا واجب والبحث عن من يتقنها واجب
يا ابوبكر

جاييك والله يا سنى
عارفك بتحتل المكانة الواعية
فى عقول الناس الطيبة.
اها النشيل عصاتى وجزلانى
والنجيك . من بروكلن الفى كوع الدنيا دى .
لا بد أن ( اخت قدحى فى كشف الذكريات ) .
ولا بد أن نضحك حتى نخفف فزع الرحيل ( وزعل الهجرة الجردقة) .
تحياتى

عثمان موسى
الوعي الصاحي فينا
الغربة بتزيدمن انتباهو
وزي ما قلت
الغربة المسنوحه دي عايزه ليها
مضاد حيوي
الحنين والذكريات
بتقتل الزول عديل
وليك في بروكلين كل شوقي ومحبتي
وكل أمنية
تخفف ليك تعب الغربة
والضحك إلازم ايامك
مودتي

وينك عجب الفيا

وينك احمد ضحية

وين كتاب هذا الزمن الحزين

وينكم ...؟؟

فضيلي والروايات النبيلة !!

وينكم ؟؟

وينكم كتاب الزمن السمح ؟؟

الملا عمر
وتاني بهنس

ناس الشرق
ناس الغرب
ناس الجنوب
ناس الشمال
وينكم كتاب الجمال ؟؟

Quote: [فهناك أيضا من يفكر في البعد.. فوجع الأعصاب متزايد هنا.]

لالالالالا
ياشهاب لالالالالا
لمن انتو بتفكروا في السفر

نحن الراجغين ليها شنو ؟؟

اكتي ولرسم ونزل الصور الجميلة
مودتي