«لاركو» و«كلوب» و«جزمة زيزي» في العمارات

«لاركو» و«كلوب» و«جزمة زيزي» في العمارات


06-04-2013, 11:26 AM


  » http://sudaneseonline.com/cgi-bin/sdb/2bb.cgi?seq=msg&board=134&msg=1399324304&rn=38


Post: #1
Title: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 11:26 AM
Parent: #0

يا الحبيبين ونحن في الثانوي العام قاعديلنا في حجار قدام بيت ناس بابكر الشايقي..
انا وبابكر وخالد الغنماية والخرابة عوض ود كريمة.. قوم يا بابكر الجن وهو كان بيدرس مع
أولاد العمارات ونحن نعافر في امتدادنا دة.. قوم اضهب واتظارف وقول لي أولاد العمارات
نلعب معاكم مباراة ودية ونجيكم في العمارات.. اها اتاريهو ولاد المصارين البيض ديل عندهم فريق هناك
وعندهم كدارات وفنايل ولباسات وشراريب كمان.. وبوكو خجلان مننا.. البيجي الدافوري لابسلو عراقي
واللابسلو بنطلون مشروط من لااااورا واللابسلو فنيلة حمالات ومعاها لباس ساوينوا من باقي الدمورية
حق المرتبة.. اها يا الحبان قام قالنا نشوفلنا طريقي نجيبها علي الاقل فنايل.. قوم يا عوض ود كريمة
قولنا نشتري صبغة هدوم وكل زول يجيبلو فنيلي ونصبغن فشان نكون مجيهين قدام ولاد المصارين البيض ديل
اتوكلنا علي الله شلن من هنا.. وفريني من هنا وقرش من هني شلناهن وجبنالنا صبغة من السوق الشعبي..
ومشينا علي نيمة خادم الله وجبنالنا كانون وطشت ولعنا الفحم وكل زول جابلو فنيلي.. الناقصة كُم
والمجحمطة.. وإن كان لي أنا جبتلي عراقي قدييييييم ومهلهل وكفيتو لامن بقى جنب صُورتي..
سخنة الصبغة في علبة نيدو كبيري وقلنا كدي جلغناها في الفنايل في الطشت وبي عود نيم
صوتناهن زيييييييييييييين.. لامن اتلونن.. وكتين شريناهن في حبل بين النيمتين لا عرفناهن
بنو فسو (بنفسجية) لا عرفناهن كُحليات..
المهم يا الحبيبين جاء الخميس واتغدينا غدايا بدري.. الماكلو سخينة.. الماكلو لوبي عفن..
والضاربلو فاصوليا بيضة.. وقلنا كدي اتلاقنيا ولبسنا فنايل الجن دي..
وأصلو إن بقى للكدارات.. أحمد كلوب اتشنط في الكلوب حقو.. الخير فططت لبسلو كبك مصوفن
وعوض كريمة شوف عيني لابسلو جزمة زيزي حقت محاسن أختو.. وأنا لابسلي كبك الرجلين فيهو شمال..
وخالد اللارا جابلو كدارة ما فيها سنتيميتر الا وهبشو النقلتي.. بس علي وشوش المجارمة في الافلام المصرية
والنعيم فينا لابسلو «لاركو»..
والعجب الشراريب.. أصلو مافي شرابا متل اخوهو.. ووحدات مصوفنات ضومة ضومة ومقدقدات
والاصابعين مارقات منهن علي جنى التمساح وكتين يمرق من البيض..
قلنا كدي اتوكلنا ومشينا كداري علي العمارات ونغني ونصفر والماكلين اللوبي النغمات تمرق منهن من لاااااتحت
لامن وصلنا العمارات إنكان نلقالكم القيامي قايمي.. الميدان يلمع ومحددنو بالجير.. وشوف عيني عندهم عراضات
وبي شبكاتن.. قادر الله..
والناس منتظرننا والمتفرجين بي كراسيهم.. وكمان الحكم لابس اسود في اسود.. وبُطان العمارات حلات الدنيا عليهم
لابسلهم فنايل حُمور ولباسات بيُض وشرابات ليهم زيقين حُمور علي التلتوار.. وكداراتم تلمع في الشمس..
وفوق دة ودة كمان عندهم مدرب... صلاتي علي محمد.. سالمناهم ودخلنا نسخن نتجارى كدي وكدي
وهم مرصوصين مع بعض ويسولوم في حركات زي ناس البوندسليغا..
نحن اتلمينا وقلنا لازم نغلبم الحناكيش ديل.. بهناك المدرب صاقعلهم: باص/خانة وافتحوا اللعب
وهني انا اقول لي ود قطبي وياسر البزار: انتو المهاجم البتشوفوا فرفارة قنطروا لي وانا (...) أم حلتو..
بدينا اللعب يا الحبيبين والكوف وكاع اشتغلت.. شي عفيص وشي قريص في الضهر وتحت تحت: احي أنا..
واتاريهم بالمشجعين حقنهم.. لكن ربكم رب الخير البيغسلوا العربات في العمارات كلهم جوا يشجعوا فينا
وكمان الغفراء حقين السفارات وشابكننا ليك: اركب... قشو ... ماهن مغبونين الخرابين
يا الحبيبين قشيناهم ليك خمسة واحد ونص فريقهم ماشي يعرج.. قاموا قالولنا نحن عازمنكم شاي في بيت
هيثم.. اها مشينا علي بيت هيثم دة لقينا الكراسي منظمات والزهور دي ماليي الدنييي..
وحاتكم ورود يفتحن النفس.. باقي نحن في الامتداد غير «صباح الخير» مانا عارفلنا ورود شي
وقال كدي احمد كلوب مرق رجلو من الكلوب بالله الريحي علي التركين المعفن وبي دودو..
فسراع فسراع حصلناهو لامن رجعها تاني..
وعلي التعترو خالد اللارا لابسلو لباس دموريي وجاء يتمطى إن كان نسمع اللباس قال كررررررررررررررر
نان تاني هو قام من بوكانو..
وجابولنا البستي كولا وشويتين جابولم كيك وترامس ألات شاي..
بي لبن يشهنك تتصور جنبهن..
وحات نضري الكبابي بقينا نشوف وشنا فيهن..
والمساكين شغالين: يا هيثم ناولني السكرية.. أمجد جيب الكيك من جوة.. حاتم شوف الطربيزة في الصالون..
ونحن معاوية طمبل باي شابكنا: دسيسين ياخ.. عضة زي العضة..
مشينا متنبلين لي بيوتنا يومين باقيلي ما اكلنا ..
ووكتين جونا في حلتنا داك أصلو يوما كان برااااااااااااااااهو


Post: #2
Title: Re: «لاركو» و«كلوب» و«جزمة زيزي» في العمارات
Author: محمد المرتضى حامد
Date: 06-04-2013, 11:37 AM
Parent: #1

Quote: والمجحمطة..

مبالغه..

ياخ نورت والله..

Post: #4
Title: Re: «لاركو» و«كلوب» و«جزمة زيزي» في العمارات
Author: omer osman
Date: 06-04-2013, 11:44 AM
Parent: #2

هههههههههههههههههههههههههههههه
اتاريهو الهامش ده قريب مننا للدرجة دي
جنابو عمر عثمان ع/سكان مثلث الراحات (الخرطوم 1 و 2 والعمارات)


Post: #9
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 11:50 AM
Parent: #4

Quote: هههههههههههههههههههههههههههههه
اتاريهو الهامش ده قريب مننا للدرجة دي
جنابو عمر عثمان ع/سكان مثلث الراحات (الخرطوم 1 و 2 والعمارات)

احي انا
الهامش دة ما كسركم خلاكم ترقدوا كاويق

Post: #19
Title: Re: «لاركو» و«كلوب» و«جزمة زيزي» في العمارات
Author: omer osman
Date: 06-04-2013, 01:25 PM
Parent: #9

Quote: احي انا
الهامش دة ما كسركم خلاكم ترقدوا كاويق


ههههههههههههههههههههههههههههه
ديل نسابة شنو البشيلو حال الزول في الاسافير ههههههههههه

Post: #24
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 04:39 PM
Parent: #19

Quote: ههههههههههههههههههههههههههههه
ديل نسابة شنو البشيلو حال الزول في الاسافير ههههههههههه

ما قلنا ليكم اتصلحوا معانا ياخ

Post: #5
Title: Re: «لاركو» و«كلوب» و«جزمة زيزي» في العمارات
Author: محمد عبد الله الامين
Date: 06-04-2013, 11:45 AM
Parent: #2

Quote: وعلي التعترو خالد اللارا لابسلو لباس دموريي وجاء يتمطى إن كان نسمع اللباس قال كررررررررررررررر
نان تاني هو قام من بوكانو..

ههههههههههههههههههه
إبدااااااااااااااااااااع وتخيلت الكورة كاني كنت بشجع فيكم
تسلم ياود جبرين ....

Post: #25
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 04:40 PM
Parent: #5

Quote: ههههههههههههههههههه
إبدااااااااااااااااااااع وتخيلت الكورة كاني كنت بشجع فيكم
تسلم ياود جبرين ....

محمد عبد الله كيفنك ياخ

Post: #7
Title: Re: «لاركو» و«كلوب» و«جزمة زيزي» في العمارات
Author: saidahmed shami
Date: 06-04-2013, 11:46 AM
Parent: #2

شكرا يا قريبي علي الاستراحه الجميله

Post: #26
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 04:41 PM
Parent: #7

Quote: شكرا يا قريبي علي الاستراحه الجميله

اووووووووووه نسايبنا الجوا يسألوا مننا في شبا

Post: #8
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 11:50 AM
Parent: #2

Quote: مبالغه..

ياخ نورت والله..

اوووووووووووووه جميلنا الذي بالسلطنة
ياخي كيفنك ونعلك طيب




تليشة:
ياخي من الجحمطة ما تعرف نفسك لابس فنيلة ولا جلدك

Post: #3
Title: Re: «لاركو» و«كلوب» و«جزمة زيزي» في العمارات
Author: Mohd Ibrahim
Date: 06-04-2013, 11:41 AM
Parent: #1

You made my day



Thnx

Post: #6
Title: Re: «لاركو» و«كلوب» و«جزمة زيزي» في العمارات
Author: علي محمد الفكي
Date: 06-04-2013, 11:45 AM
Parent: #3

والله يا طارق لما تسخى
بتتجلى وتكون جميل شدييد
وحلو زي اولاد العمارات ..
( دي انا بالغت فيها )
منتظرين قصة رد الزيارة

Post: #11
Title: Re: «لاركو» و«كلوب» و«جزمة زيزي» في العمارات
Author: ياسر منصور عثمان
Date: 06-04-2013, 11:54 AM
Parent: #6

مبااااااااااااااالغة يا طارق..

ذكرتنا بالفنائل المصبغات صبغة ابو مرين

والكبك واللاركو والكدارة جلد التيس. والباتا..

اييييييييييييه

ايام

Post: #29
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 04:44 PM
Parent: #11

Quote: مبااااااااااااااالغة يا طارق..

ذكرتنا بالفنائل المصبغات صبغة ابو مرين

والكبك واللاركو والكدارة جلد التيس. والباتا..

اييييييييييييه

ايام

ود منصور باين عليك قديم لامن معتت

Post: #13
Title: Re: «لاركو» و«كلوب» و«جزمة زيزي» في العمارات
Author: humida
Date: 06-04-2013, 12:03 PM
Parent: #6

كروكس .. هو التطور الطبيعي لجزمة زيزي ..


Post: #30
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 04:45 PM
Parent: #13

Quote: كروكس .. هو التطور الطبيعي لجزمة زيزي ..




جيت انت

Post: #28
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 04:43 PM
Parent: #6

Quote: والله يا طارق لما تسخى
بتتجلى وتكون جميل شدييد
وحلو زي اولاد العمارات ..
( دي انا بالغت فيها )
منتظرين قصة رد الزيارة

يا علي نان هو «بوليغ» نصاح


الله يجبر بي خاطرك يا حبيب

Post: #10
Title: Re: «لاركو» و«كلوب» و«جزمة زيزي» في العمارات
Author: أيمن الطيب
Date: 06-04-2013, 11:54 AM
Parent: #3

خمسة واحد يا كبير


ياخ مشتاقين,,,

تموت فى حكاوى الهامش

Post: #12
Title: Re: «لاركو» و«كلوب» و«جزمة زيزي» في العمارات
Author: ياسر منصور عثمان
Date: 06-04-2013, 11:55 AM
Parent: #10

بس البعرفو..اولاد العمارات كانوا شفوت ولعابين في الكورة ..

ما زي اولاد الذوات اليومين ديل..

Post: #14
Title: Re: «لاركو» و«كلوب» و«جزمة زيزي» في العمارات
Author: عبداللطيف شريف على
Date: 06-04-2013, 12:34 PM
Parent: #12

Quote: قلنا كدي اتوكلنا ومشينا كداري علي العمارات ونغني ونصفر والماكلين اللوبي النغمات تمرق منهن من لاااااتحت


شكرا طارق جبريل ..

شرط الضحك المصارين وفتتن ...


كب المداد ورش الجداد ..

نفس الملامح والشبه ..

نحن فى هامش بحرى (شمبات والمزاد) تتطابق الرؤى والتطلعات معكم

مركزنا الصافية اطبعا وناس اللذاذ (ايام ليها جضوم )..

Post: #15
Title: Re: «لاركو» و«كلوب» و«جزمة زيزي» في العمارات
Author: د.نجاة محمود
Date: 06-04-2013, 12:42 PM
Parent: #14

والله لكن يا ود عمي الا تراكم غلبانين ونحنا ما عارفين...

يديك العافية يو ميد ماي دي...

Post: #16
Title: Re: «لاركو» و«كلوب» و«جزمة زيزي» في العمارات
Author: أيمن الطيب
Date: 06-04-2013, 12:56 PM
Parent: #15

الحدى الحدى

Post: #17
Title: Re: «لاركو» و«كلوب» و«جزمة زيزي» في العمارات
Author: Sayed Bekab
Date: 06-04-2013, 01:21 PM
Parent: #16

Quote: بالله الريحي علي التركين المعفن وبي دودو
مبااااااااااااااااااااالغه مع انو تركينا ده ما بنرضا فوقو ..... قولتا لي الشاي و الكيك عضه زي العضه LOL

Post: #41
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:33 AM
Parent: #17

Quote: مبااااااااااااااااااااالغه مع انو تركينا ده ما بنرضا فوقو ..... قولتا لي الشاي و الكيك عضه زي العضه LOL

يا سيد ياخ نحن كنا شايفنها عضة زي العضة

Post: #18
Title: Re: «لاركو» و«كلوب» و«جزمة زيزي» في العمارات
Author: سامى عبد المطلب
Date: 06-04-2013, 01:24 PM
Parent: #16

Quote: وقال كدي احمد كلوب مرق رجلو من الكلوب بالله الريحي علي التركين المعفن وبي دودو..
فسراع فسراع حصلناهو لامن رجعها تاني..
وعلي التعترو خالد اللارا لابسلو لباس دموريي وجاء يتمطى إن كان نسمع اللباس قال كررررررررررررررر
نان تاني هو قام من بوكانو..


ود جبرين الله يجاى محنك ، ههههه ههههههه مبالغه
وما تقول ناسي طلبى عليك النبى تم لينا قصه كل بت سمحه بتحب ليها طلبه بناى

Post: #42
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:35 AM
Parent: #18

Quote: ود جبرين الله يجاى محنك ، ههههه ههههههه مبالغه
وما تقول ناسي طلبى عليك النبى تم لينا قصه كل بت سمحه بتحب ليها طلبه بناى


يا حبيب والله طلبك دة يسويهو الجليل

Post: #20
Title: Re: «لاركو» و«كلوب» و«جزمة زيزي» في العمارات
Author: محمد المرتضى حامد
Date: 06-04-2013, 01:25 PM
Parent: #16

في قضية كبس الجِبَّة ، قيل أن كَبَس كان من الشفوت ومتخصص (فرتيق) حفلات وحاول القيام بذات الفعل فدخل حفل عرس في أحد بيوت أمدرمان الشهيرة ، وبالطبع انتهى الأمر بتلقيه طلقة من مسدس صاحب الحفل أردته قتيلا ، وللصدف أن ذلك كان مصير معظم العاملين فيها شفوت، وكتب عن الموضوع الأستاذ شوقي بدري قائلا:*

Quote: وكبس قتل في حفلة عرس آل خاطر وكان فرتقة الحفلات شيء عادي إذا لم يكن هنالك فتوات في الحلة ليحموها . وعندما دخل كبس بيت اللعبة قال جملته الشهيرة ( النسوان والأفندية بي جاي) وحتى بعد أن أشهر العم خاطر مسدسه لم يتراجع كبس واضطر العم خاطر قتله ودافع السيد محمد أحمد محجوب رئيس الوزراء السابق عن العم خاطر وقد كان محمد أحمد محجوب محاميا .
عندما سأل المحجوب الشاهد : انتوا لمن جيتوا الحفلة كنتوا كايسين مشاكل ؟ وانتوا منو ؟
فقال الشاهد : أنا ودوماس والمرحوم كبس وقدوم زعلان ورأس الميت . فقال المحجوب للقاضي : سعادتك دي أسامي ناس أولاد ناس ما عايزين مشاكل ؟

هسه يا طارق إنت جاد في كلامك ( انا وبابكر وخالد الغنماية والخرابة عوض ود كريمة) كنتو ماشين تلعبوا كورة ؟





*
http://albrkal.com/vb/showthread.php?t=3039

Post: #21
Title: Re: «لاركو» و«كلوب» و«جزمة زيزي» في العمارات
Author: omer osman
Date: 06-04-2013, 01:34 PM
Parent: #20

Quote: قيل أن كَبَس كان من الشفوت ومتخصص (فرتيق) حفلات


كدي يامولانا خلي عماد عبدالله والا اى واحد من الديامة القداااام يجي يحكي ليكم عن (حنان لبط) الديامية هههههههههه
برضو كانت بتفرتق الحفلات

Post: #22
Title: Re: «لاركو» و«كلوب» و«جزمة زيزي» في العمارات
Author: محمد المرتضى حامد
Date: 06-04-2013, 01:52 PM
Parent: #21

Quote: (حنان لبط) الديامية هههههههههه
برضو كانت بتفرتق الحفلات

دي يا جنابو اللي ورد في الأساطير أن أحدهم حاول يشيل سفَّه من حُقَّتا بدون إذن منها فأمرته مُعَنِّفة بعبارتها الشهيرة إياها؟


Post: #23
Title: Re: «لاركو» و«كلوب» و«جزمة زيزي» في العمارات
Author: محمد أبوالعزائم أبوالريش
Date: 06-04-2013, 02:15 PM
Parent: #22

Quote: دي يا جنابو اللي حاول واحد يشيل سفَّه من حُقَّتا بدون إذن منها فأمرته مُعَنِّفة بعبارتها الشهيرة إياها؟


والله ما فاضل ليك إلاّ تجيب العبارة الشهيرة.

مرتضى إزيّك.

ود جبرين .......... ما بسعلك.

Post: #45
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:40 AM
Parent: #23

Quote: ود جبرين .......... ما بسعلك.

حبيبنا الذي في الدوحة
ازيك ياخ

Post: #44
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:39 AM
Parent: #21

Quote: كدي يامولانا خلي عماد عبدالله والا اى واحد من الديامة القداااام يجي يحكي ليكم عن (حنان لبط) الديامية هههههههههه
برضو كانت بتفرتق الحفلات


Post: #43
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:36 AM
Parent: #20

Quote: هسه يا طارق إنت جاد في كلامك ( انا وبابكر وخالد الغنماية والخرابة عوض ود كريمة) كنتو ماشين تلعبوا كورة ؟


يا حبيب نكون كنا ماشين نشتت الكورة
بعدين الوداك المنبر حقنا بتاع البركل شنو

Post: #40
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:33 AM
Parent: #16

Quote: الحدى الحدى


Post: #35
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 08:25 PM
Parent: #15

Quote: والله لكن يا ود عمي الا تراكم غلبانين ونحنا ما عارفين...

يديك العافية يو ميد ماي دي...

هامش يا بت ابوي وحاتك
بس شايلين الصبر ساااااااااااكت

Post: #37
Title: Re: «لاركو» و«كلوب» و«جزمة زيزي» في العمارات
Author: يحي قباني
Date: 06-05-2013, 00:34 AM
Parent: #35

Quote: سخنة الصبغة في علبة نيدو كبيري

علبة نيدو قال !!!

النيدو لقيتو وين يا ود جبرين ؟؟؟

قول ( كنتوش ) فيك الخير ...

Post: #46
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:41 AM
Parent: #37

Quote: علبة نيدو قال !!!

النيدو لقيتو وين يا ود جبرين ؟؟؟

قول ( كنتوش ) فيك الخير ...

انت يا ود قباني قايل علبة النيدو دي شربناها لبن
جبناها من كوشة الجبل ياخ
اخوك كان عنده خمسة غنمايات وتيس في قلب الخرطوم

Post: #34
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 08:16 PM
Parent: #14

Quote: شكرا طارق جبريل ..

شرط الضحك المصارين وفتتن ...


كب المداد ورش الجداد ..

نفس الملامح والشبه ..

نحن فى هامش بحرى (شمبات والمزاد) تتطابق الرؤى والتطلعات معكم

مركزنا الصافية اطبعا وناس اللذاذ (ايام ليها جضوم )..

الحال من بعضه يا عبد اللطيف

Post: #32
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 05:01 PM
Parent: #12

Quote: بس البعرفو..اولاد العمارات كانوا شفوت ولعابين في الكورة ..

ما زي اولاد الذوات اليومين ديل..

يا ياسر لو اولاد العمارات كانوا شفوت
نحن شنو يعني رباطة

Post: #31
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 04:47 PM
Parent: #10

Quote: خمسة واحد يا كبير


ياخ مشتاقين,,,

تموت فى حكاوى الهامش

يا عمك الناس شابكننا هامش هامش
والله نحن فتنا الهامش دة بهناك






شوق شديد يا حبيب

Post: #27
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-04-2013, 04:42 PM
Parent: #3

Quote: You made my day



Thnx

ود ابراهيم عرب عرب ياخ
نحن ناس هامش سااااااااااكت

Post: #33
Title: Re: «لاركو» و«كلوب» و«جزمة زيزي» في العمارات
Author: Hashim Kassala
Date: 06-04-2013, 05:03 PM
Parent: #27

غايتو يا ود جبرين انت من زمن الدمورية البصبغوها انا برضو من ذاك الزمن لكن نحنا ما كنا بنتشوبر كنا بنلعب مع غلابة زينا وكن بنتفق معاهم انو نحنا حنصبغ أحمر.
بمناسبة الاحذية دي
قالوا عمك جا الخرتوم ومتعود ينزل في بيت ود اخوهو الذي يعمل في شركة باتا وفي واحدة من زياراتو حا داخل البيت وسأل من ود اخو قلوا ليهو شركة باتا سفرتو لندن عشان يعمل دكتوراه قال ليهم باتا دي دايرلا دكتوراه قدرك تلبسا ما قدرك تخليها

شكرا لهذا البوست الجميل

Post: #47
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:42 AM
Parent: #33

Quote: غايتو يا ود جبرين انت من زمن الدمورية البصبغوها انا برضو من ذاك الزمن لكن نحنا ما كنا بنتشوبر كنا بنلعب مع غلابة زينا وكن بنتفق معاهم انو نحنا حنصبغ أحمر.
بمناسبة الاحذية دي
قالوا عمك جا الخرتوم ومتعود ينزل في بيت ود اخوهو الذي يعمل في شركة باتا وفي واحدة من زياراتو حا داخل البيت وسأل من ود اخو قلوا ليهو شركة باتا سفرتو لندن عشان يعمل دكتوراه قال ليهم باتا دي دايرلا دكتوراه قدرك تلبسا ما قدرك تخليها

شكرا لهذا البوست الجميل


يديك العافية يا حبيب

Post: #36
Title: Re: «لاركو» و«كلوب» و«جزمة زيزي» في العمارات
Author: Emad Eldeen Ali
Date: 06-05-2013, 00:15 AM
Parent: #1



Quote: انتو المهاجم البتشوفوا فرفارة قنطروا لي وانا (...) أم حلتو..


ياخ وديني متمني ونسه معاك.....


طلع ليك كتاب والله ماك هين

Post: #38
Title: Re: «لاركو» و«كلوب» و«جزمة زيزي» في العمارات
Author: قسم الفضيل مضوي محمد
Date: 06-05-2013, 03:40 AM
Parent: #36


يا ود جبريل تحياتي

تعرف كان عندنا استاذ بلدياتنا من مناطق هامش الامتداد - انتو هامش العمارات ونحن هامش الهامش - اطراف العاصمة

الاستاذ دا كان بيدرس في العمارات - المهم ناس العمارات كان عندهم قطب كبير اتوفى الله يرحمه وعملوا ليه دورة رياضية القطب دا اسمو سمير دقاش

بحكم المدرس داك تم اشراكانا في الدورة الرياضية لفترة تزيد عن 7 سنوات اعتقد -

كنا بنتحرك يوم يكون عندنا كورة من بعد صلاة الظهر - ما نحنا من أطراف العاصمة - وبتذكر كنا بنتحشر في بوكس معروش زي الطماطم - مشجعين ولاعبين

اها لما نصل الجماعة بيقولو عرب اللبن وصلوا

المهم كان عندنا مباراة مع فريق من أركويت - المباراة في العمارات بالقرب من شارع واحد وستين

وكان عندنا لاعب احتياطي دخلوه الشوط التاني - وكان مفلفل شعرو (بوب مارلي) - المشجعين حقين اركويت قالو ليهو

يا عربي امشي سرِّح ليك ابراهيم عوض - شنو مُسرّح لينا بوب مارلي ؟؟؟؟؟؟

--------------

المهم يا ود جبريل ناس العمارات ديل كانوا بيدقوا كفر والله الهلال والمريخ ما بقدوهو زيهم - بيلعبوا كورة لما تحتار انتا زاتك

صحيح انهم حناكيش لكن ناس لعابين وبمرحلوا الكورة وبطقطوقها بصورة عجيبة

Post: #39
Title: Re: «لاركو» و«كلوب» و«جزمة زيزي» في العمارات
Author: حبيب نورة
Date: 06-05-2013, 05:36 AM

بيئة ده !!


أطالب بحذقك من البورض أسوةً بود الصايم ومن لفّ نفس سجارة البنقو القاعدين تلحسوها بالدس :)

Post: #50
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:45 AM
Parent: #39

Quote: بيئة ده !!


أطالب بحذقك من البورض أسوةً بود الصايم ومن لفّ نفس سجارة البنقو القاعدين تلحسوها بالدس :)

هي عاين عربي السروراب دة كمان

Post: #49
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:45 AM

Quote: يا ود جبريل تحياتي

تعرف كان عندنا استاذ بلدياتنا من مناطق هامش الامتداد - انتو هامش العمارات ونحن هامش الهامش - اطراف العاصمة

الاستاذ دا كان بيدرس في العمارات - المهم ناس العمارات كان عندهم قطب كبير اتوفى الله يرحمه وعملوا ليه دورة رياضية القطب دا اسمو سمير دقاش

بحكم المدرس داك تم اشراكانا في الدورة الرياضية لفترة تزيد عن 7 سنوات اعتقد -

كنا بنتحرك يوم يكون عندنا كورة من بعد صلاة الظهر - ما نحنا من أطراف العاصمة - وبتذكر كنا بنتحشر في بوكس معروش زي الطماطم - مشجعين ولاعبين

اها لما نصل الجماعة بيقولو عرب اللبن وصلوا

المهم كان عندنا مباراة مع فريق من أركويت - المباراة في العمارات بالقرب من شارع واحد وستين

وكان عندنا لاعب احتياطي دخلوه الشوط التاني - وكان مفلفل شعرو (بوب مارلي) - المشجعين حقين اركويت قالو ليهو

يا عربي امشي سرِّح ليك ابراهيم عوض - شنو مُسرّح لينا بوب مارلي ؟؟؟؟؟؟

--------------

المهم يا ود جبريل ناس العمارات ديل كانوا بيدقوا كفر والله الهلال والمريخ ما بقدوهو زيهم - بيلعبوا كورة لما تحتار انتا زاتك

صحيح انهم حناكيش لكن ناس لعابين وبمرحلوا الكورة وبطقطوقها بصورة عجيبة

قلت لي يا حبيب انتو بالنسبة لينا ضهاري

Post: #48
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:43 AM
Parent: #36

Quote: ياخ وديني متمني ونسه معاك.....


طلع ليك كتاب والله ماك هين

حبابك يا عمدة ياخي
هو نحن لاقنك وين

Post: #51
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-05-2013, 10:46 AM
Parent: #48

ضربنا يا الحبيبين كيك العمارات السمح العلي «البشاورة» داك وقعدنا نتونس مع ولاد المصارين البيض ديل..
اها قوم يا بابكر قولي: باقليك شنو نعزمهم الخميس الجايي..
يا بوكو انت باقيلي جنيت.. نعزمهم بي شنو... جزمة زيزي ألت عوض ود كريمة دي ولا بلاها..
كدي أدنا سبوعين خلنا النشوف نسويلم شنو السحاسيح ديل..
قام بوكو وقف وقعد يشكر فيهم وعلي كرمهم وقالهم إن شاء الله من هني سبوعين تجوا عندنا في الامتداد..
مرقنا يا الزينين شي يغني وشي بطنو متنبلة ماهو قادر يمشي وشي يقطع في شدر التمرهندي..
وصلنا بيوتنا واستحمينا بي صابون «بيوضي» أليل الغسيل داك وجينا مارقين للحجار ألاتنا
نفكر في الوكرة الورطنا فيها بوكو دي..
انا قلتلم: ناس الرابطة آآآبيدونا شبكاتم دحين انا عندي فكرة... نباري الكويش الفي العمارات وأي خيشة
ألت مكيف نلقاها نلمها وواحدين يكبسوا كوشة الجبل برضو... فشان ما نتفضح انا وعوض ود كريمة بندقش
العمارات فشان بوكو ان لقوهوا حايم بهنوك واااااافضايحنا... الخير فططت واللارا يدقشوا كوشة الجبل
- عوض ود كريمة: نان المويات دايرين تسووا فيها شنو
- خالد الغنماية: كل زول باكر يجيبولي شِلن ان شاء الله من قروش فطور المدرسة
- عوض كريمة: ومن يوم الاتنين كل واحد يختلو باغة في الفريزر..
- أها والمويات دي كيفنها
- عوض كريمة: تلاتة فتايل ألات روح فراولة وكل زول يجيبلوا نص كوريي سكر ونصوتها ونديها ليهم
- أها.. والكيك الاتنبلتوبوا دة نجيبو من وين ونحن البيت السمح فينا مرسلنلهم القرقوش من الشماليي
الخرابين ديل ان بقوا أكلوا القرقوش دة متل عوض ود كريمة وكتين يغتسو في كوباية الشوب يمين
علي نوديهم الحوادث.. يقوم يجيهم تسمم كمان..
- عمر سيوسيوة: ياخي انا بقع لي امي في الواطة تسويلنا بسكويت وبقعد اقابلها المفرمة فشان ما تكورك
- أها دايرلنا حكم يكون سميح كدي..
- بوكو: ودة نجيبوا من وين.. هو محمد عجوز حكم الرابطة قاعد يجي حفيان
- عوض كريمة: ياخي السر كاوندة ممكن يرواج الحتة دي وشايفه عنده قميص أسود عاجبه
- عصام جوطات: الطيب والدرقة الادونا ليها هديي نسوي فيها شنو..
- عمر كشكشة وجمال ابو الريش عليهم يلموا صناديق البرنجي والبنسون.. ونديهن أخت أسامة سلك
تسويلنا فيهن ترتر ونغمتها ليهم وكتين تمغرب.. وين دايرين يشوفوها هُن..
ـ.............
انا وعوض ود كريمة دقشنا العمارات من دغشا بدري يوم الجمعة ما خلينالنا خيش أليل مكيف حايم
قبل صلاة الجمعة قعدنا في ضل النيمة وجبنالنا «مسلة» وخيت دبارة وخيتنا الخيش وسوينالنا شبكات زي العجب
وقبل يومين منى أخت اسامة سلك ظبطتلنا الترتر فوقو صندايق البنسون والبرنجي ومشينا جبنالنا «ركامة»
حمرا وسوينالنا شريطين فوق الفنايل فشان يكونن يلمعن في الشمس..
وقشينا الميدان يوم الأربعاء وكل زول جابلو علبة رماد من تحت الصاج وخططنا الميدان.. وحنسنا امين
الجمعية وجبنالنا كراسي في حوش ناس بابكر ويوم الأبعاء بالليل جبنا روح الفراولة وجبنالنا اربعة جرادل طلس
وسوينا العصير وكل زول شالو جردل وداهو لي تلاجتو..
وكلمنا اولاد الحلة الكبار فشان يجوا يشجعونا..
شوف عيني ولاد المصارين البيض جوا بالعربات ومعاهم المشجعين كمان..
السر كاوندة دخل السنتر بي قميصه الاسود وكمان اداها كوز موية ولبس نضارة سوداء..
ولابس في يده الاستك الاسود بتاع المصفة حقت العربية وثلاثة خواتم..
ونحن مشجعننا كلهم شغالين: يا حنني اجدع لي سفة ياخ... يا مجنق ياخي صعوط المحسي كويس
ود الزهرة خمس لي البرنجاية ياخي ما تتغاتت..
دخلنا نتجاري هني وهني في ميدانا وعرقنا بقى يخُر وريحة الصماح ترمي الصقُر موش أولاد العمارات
دخلوا في صف واحد وشوف عيني يلبسوا في «الشنكارات»... صلاتي علي محمد..
اها يا الحبيبين الكورة بدت ######نت ومشجعننا شغالين: أركبو ... قشو حلاوة لكوم دة.. آآآآآآي سوي ليهو
يا محمد كجاجة اضغطو «الـ.......ة» دة... احي انا يا ألموظ..
غايتو الخوفة الدخلت فيهم ما اظنها مرقت لليلي ههههههههههههههههه..
رشيناهم ليك ستة اتنين.. وسوقناهم بيت ناس بوكو ودخلو يتشطفوا وانا وود كريمة كل مرة نشيل جردل البلاعة
ندفقوا في الشارع ونسب في بوكو: الله «.....» أم حلتك يا بكوكو..
جبنا جرادل الطلس وسقيناهم روح الفراولة وختينا ليهم البسكويت في صواني الألمونيي..
ياكلوا ويتهامسوا... باقيلي البسكويت نشادرو كتير لامن غلبهم يتنفسوا ههههههههههههههه..
قام بوكو يشكر فيهم وقدمنالهم صناديق البرنجي بالترتر..
وكتين جات العربات تشيلهم جاء ماري «حسن صاجات» وقعد يكورك: أحي أنا يا ألموووووووووووووووووووووظ..
ههههههههههههههههههههههههههههههههههه

Post: #52
Title: Re: «لاركو» و«كلوب» و«جزمة زيزي» في العمارات
Author: محمد عبدالرحيم
Date: 06-05-2013, 11:18 AM
Parent: #51

الله يجازي محنك يا ود جبريل

والله انت تحفة ياخ طلعتنا من جو البورض ونكد السياسة

الي واحة الكل يتمني ان تعود لهم تلك الايام

الف شكر وخالص التحيات يا راجل يا جميل

Post: #60
Title: Re: «لاركو» و«كلوب» و«جزمة زيزي» في العمارات
Author: حامد الغبشاوي
Date: 06-07-2013, 03:56 PM
Parent: #51

Quote: وكتين جات العربات تشيلهم جاء ماري «حسن صاجات» وقعد يكورك: أحي أنا يا ألموووووووووووووووووووووظ..
ههههههههههههههههههههههههههههههههههه


العزيز ودجبرين
لك التحية
روووووووووووووووعة











.....................
واصل انا معاك

Post: #53
Title: Re: «لاركو» و«كلوب» و«جزمة زيزي» في العمارات
Author: حامد الغبشاوي
Date: 06-05-2013, 11:56 AM
Parent: #1

العزيز /
طارق ود جبرين
دحن سردك عجبني جنس عجب


[QUOTE
]والمساكين شغالين: يا هيثم ناولني السكرية.. أمجد جيب الكيك من جوة.. حاتم شوف الطربيزة في الصالون..
ونحن معاوية طمبل باي شابكنا: دسيسين ياخ.. عضة زي العضة..
مشينا متنبلين لي بيوتنا يومين باقيلي ما اكلنا ..
ووكتين جونا في حلتنا داك أصلو يوما كان برااااااااااااااااهو





......................
بس انا راج سرد وكتين جوووووووووووكم عملتو شنو؟

Post: #54
Title: Re: «لاركو» و«كلوب» و«جزمة زيزي» في العمارات
Author: منتصر الامين
Date: 06-05-2013, 01:15 PM
Parent: #53

على اليمين الزيزي دا تلقاك كنت لابسو انت هههههههههههههههه

تحياتي وسلامي يا دكتور

Post: #55
Title: Re: «لاركو» و«كلوب» و«جزمة زيزي» في العمارات
Author: محمد حمزة الحسين
Date: 06-05-2013, 04:37 PM
Parent: #54


الله يجازى محنك بالعافية يا ود جبريل
:
:
:
:
:
مع التحيات لله الزاكيات

Post: #56
Title: Re: «لاركو» و«كلوب» و«جزمة زيزي» في العمارات
Author: عبد المنعم سيد احمد
Date: 06-05-2013, 06:28 PM
Parent: #55

959f23afa8cfaf4d5f96ec627b0e0310.jpg Hosting at Sudaneseonline.com


315406129.jpg Hosting at Sudaneseonline.com

Post: #57
Title: Re: «لاركو» و«كلوب» و«جزمة زيزي» في العمارات
Author: عبد المنعم سيد احمد
Date: 06-05-2013, 06:33 PM
Parent: #56

73403_10151432355037250_2034329446_n.jpg Hosting at Sudaneseonline.com



ودحين دى ماياها عيزومتكم ياود جبريل
ماشفتو باصطة سلا اللت اولاد العمارات كيفنها
ليكن حق يومين ماتاكلوا
دحين مشجعكم ماكان امبعيرة
يجازى محنك

Post: #59
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-06-2013, 12:32 PM
Parent: #54

Quote: على اليمين الزيزي دا تلقاك كنت لابسو انت هههههههههههههههه

تحياتي وسلامي يا دكتور

مونتي يا حبيبنا
لا ياخ انا كنت لابسلي كبك والفردتين شمال

Post: #58
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-06-2013, 12:30 PM
Parent: #53

Quote: العزيز /
طارق ود جبرين
دحن سردك عجبني جنس عجب

حباب الغبشاوي ياخي

Post: #61
Title: Re: «لاركو» و«كلوب» و«جزمة زيزي» في العمارات
Author: garjah
Date: 06-08-2013, 11:05 AM
Parent: #58

Quote: اها اتاريهو ولاد المصارين البيض ديل عندهم فريق هناك
وعندهم كدارات وفنايل ولباسات وشراريب كمان.


ود جبرين

اردب شوق لحكيك الجميل

الغريبة كل هذه الفوارق وبيناتكم شارع وااااحد؟؟؟

انت عارف العمارات دي طبعا حقت موظفي دولة كبار وهم حاليا اما بالمعاش او توفاهم الله وحال اسرهم الان من لم يبع عمارته ومصر على العيش فيها أصعب من حال ناس الامتداد زاتهم طبعا الانقاذ خلقت أحياء جديدة بتاعت مصارين مسخوتة بسرقة المال العام والطفيليين من التجار زي جبرة والمعمورة .

نحن في الشعبية محاطين باحياء زي العمارات وأظرت كمان زي الميرغنية وود السائح من الناحية الغربية والمغتربين والصافية من الناحية

الشرقية

Post: #62
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-09-2013, 09:05 AM
Parent: #61

Quote: ود جبرين

اردب شوق لحكيك الجميل

الغريبة كل هذه الفوارق وبيناتكم شارع وااااحد؟؟؟

انت عارف العمارات دي طبعا حقت موظفي دولة كبار وهم حاليا اما بالمعاش او توفاهم الله وحال اسرهم الان من لم يبع عمارته ومصر على العيش فيها أصعب من حال ناس الامتداد زاتهم طبعا الانقاذ خلقت أحياء جديدة بتاعت مصارين مسخوتة بسرقة المال العام والطفيليين من التجار زي جبرة والمعمورة .

نحن في الشعبية محاطين باحياء زي العمارات وأظرت كمان زي الميرغنية وود السائح من الناحية الغربية والمغتربين والصافية من الناحية

الشرقية

قرجة يا حبيبنا
الشعبية دي كان عندي فيها جولات ياخ
خيلاني اولاد ابو دية بيكونوا جيرانكم

Post: #63
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-09-2013, 09:58 AM
Parent: #62

Mageed El Mugabil
Ali Alser
Salah Mustafa
Atef Al-Thami
Mohamed Hassen Abdallah
تسلموا يا حلوين

Post: #64
Title: Re: «لاركو» و«كلوب» و«جزمة زيزي» في العمارات
Author: rosemen osman
Date: 06-09-2013, 10:37 AM
Parent: #63

حكي جميل وطاعم ..فرزنا الزيزي بس ,الا لاركو دي قايلنها كلارك فى الأول
وللأمانة الأدبية ما كان تعكس نتيجة المباراة :)

دمت بخير وزوارك

Post: #65
Title: Re: «لاركو» و«كلوب» و«جزمة زيزي» في العمارات
Author: مبارك النعمه النعيم
Date: 06-09-2013, 11:20 AM
Parent: #64

ياخي
هامشكم عسل عديل كده
اليوم الامتداد من ارقي الاحياء في الخرطوم والبيت فيهو بي الشي الفلاني
والعمارات بقت من الاحياء القديمه

Post: #66
Title: Re: «لاركو» و«كلوب» و«جزمة زيزي» في العمارات
Author: إدريس محمد إبراهيم
Date: 06-09-2013, 11:39 AM
Parent: #65

طارق ود جبرين ....

كيفنك أخوي ....

يعلم الله حديثك كلو سمح ومليان إبداع كالعادة ......


لكن يا المسنوح (حقت ود شيقوق ديك) الله يجازي محنك ساهي ....

Quote: وعلي التعترو خالد اللارا لابسلو لباس دموريي وجاء يتمطى إن كان نسمع اللباس قال كررررررررررررررر
نان تاني هو قام من بوكانو..


صدقني يا حبيب ... أنا الضحك كتلني عدييييل ..... الله يجازيك بس .... والله من كترة الضحك لامن شعرت إن راسي بده يدوش .....

مجنون إنت ياخ ....وماك نصيح أبداً .....

مع خالص حبي الذي تعرف ؛؛؛؛؛

Post: #69
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-11-2013, 09:05 AM
Parent: #66

Quote: طارق ود جبرين ....

كيفنك أخوي ....

يعلم الله حديثك كلو سمح ومليان إبداع كالعادة ......


لكن يا المسنوح (حقت ود شيقوق ديك) الله يجازي محنك ساهي ....

صدقني يا حبيب ... أنا الضحك كتلني عدييييل ..... الله يجازيك بس .... والله من كترة الضحك لامن شعرت إن راسي بده يدوش .....

مجنون إنت ياخ ....وماك نصيح أبداً .....

مع خالص حبي الذي تعرف ؛؛؛؛؛



اضحك يا حبيب ياخي
آخرها كوم تراب

Post: #68
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-10-2013, 04:39 PM
Parent: #65

Quote: ياخي
هامشكم عسل عديل كده
اليوم الامتداد من ارقي الاحياء في الخرطوم والبيت فيهو بي الشي الفلاني
والعمارات بقت من الاحياء القديمه

يا زول دة كلامك بقينا اولاد مصارين بيض ياخ ههههههههههههههههههههههههههه

Post: #67
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-10-2013, 04:37 PM
Parent: #64

Quote: حكي جميل وطاعم ..فرزنا الزيزي بس ,الا لاركو دي قايلنها كلارك فى الأول
وللأمانة الأدبية ما كان تعكس نتيجة المباراة :)

دمت بخير وزوارك

اوووووووووووه استاذتنا روزمين
كيفنك ياخي
كلارك عديل كدة
باين عليك برجوازية متعفنة هههههههههههههههههههههههههههههههه

بعدين الله بيسألني غلبناهم بي جزمة زيزي دي ههههههههه

Post: #70
Title: Re: «لاركو» و«كلوب» و«جزمة زيزي» في العمارات
Author: علي عبدالوهاب عثمان
Date: 06-11-2013, 04:47 PM
Parent: #67

يا سلام على الابداع ..
استاذي طارق أتابع بكل شوق كل حرف تكتبه ..
لا تغيب كثيراً ..
المرة الجاية من عمق اهلنا الشيايقة ..
كنت اتمنى تسجيل بذه الخواطر بصوتك ..
أكيد سوف تحكيها بالتنغيم الشايقي الجميل ..
عندكم جمال لفظى لا يحتاج للحن ..
مليون التحية ليك ..
وانت توقظ الجمال في دواخلنا ..

Post: #71
Title: Re: «لاركو» و«كلوب» و«جزمة زيزي» في العمارات
Author: طارق جبريل
Date: 06-14-2013, 01:28 PM
Parent: #70

Quote: يا سلام على الابداع ..
استاذي طارق أتابع بكل شوق كل حرف تكتبه ..
لا تغيب كثيراً ..
المرة الجاية من عمق اهلنا الشيايقة ..
كنت اتمنى تسجيل بذه الخواطر بصوتك ..
أكيد سوف تحكيها بالتنغيم الشايقي الجميل ..
عندكم جمال لفظى لا يحتاج للحن ..
مليون التحية ليك ..
وانت توقظ الجمال في دواخلنا ..

حبيبنا علي هول ناس عبد الوهاب
ياخي كيفنك ونعلك طيب في عضامك ديل
الله يجبر بي خاطرك يا العزيز
ان ربك طول في العمر بنجي هني نكتب لامن تزهجوا ههههههههه