حفرة دخان سكينة بت ود جيب الله

حفرة دخان سكينة بت ود جيب الله


10-08-2010, 11:31 PM


  » http://sudaneseonline.com/cgi-bin/sdb/2bb.cgi?seq=msg&board=134&msg=1305915431&rn=0


Post: #1
Title: حفرة دخان سكينة بت ود جيب الله
Author: طارق جبريل
Date: 10-08-2010, 11:31 PM


(1)

سكينة يا الحبان مرتا زيني وليها رفقات دايما متلمات في الخير..
الشي السمح في الحلي أليلن..
ان بقى في خبر شين في الحلي تلقاهن واقفات ومتحزمات...
وفوق دة ودة خبارات الحلي كلها عندهن..
ليل ونهارن مع بعض...
الخضار يمشن سوا..
ابن بقت دايرات يدققنلهن مريق ولا قمح يمشن سوا ويقعدن في بنابر الطاحونة
لامن الحسين ود بابكير يدققلهن دقيقن ويرجعن لي بيوتن..
اصلو كل شي يسوينو مع بعض..
حتى الطلح أليلن والشملات والنُطُع خاتاتنو عند سكينة..
ان بقى في مرتا في الحلي شاكلتلها وحدي فيهن الله قال بي قولها
سرهن كله بيناتن..
أهلن بقوا أهل بعض..
إن بقى واحدي فيهن جاها زول من البلد تاني يوم يتلمن عندها
وكل واحدي تجيب صينيتها وقهوتها ويكرمن الضيف أليلا
الماهن مع بعض كدي شن مع انه كل واحدي فيهن راسها براهو
تسمعن يتغالتن تقول بالله حا يمعطن بعض..
شويتين تسمع فيهن يشربن في قهوتن..
لا تعرفن متحاربات لا تعرفن متصاحبات..

Post: #2
Title: Re: حفرة دخان سكينة بت ود جيب الله
Author: طارق جبريل
Date: 10-08-2010, 11:33 PM
Parent: #1


(2)

سكينة بت حُومد احمد ود جيب الله
جات الخرطوم مع راجلها من مروي..
شايقيي مشلخة تلاتة شلوخ عرااااااض..
لونها قمحي وليها مساير جادعاهن لي وراء
وليها شلاليف مدقوقات بالأسود
وليها عيونا غلاد ونخرة سوالا فيها زمام
سميحي تحمد ربها... ورجليها دايما ممسحاهن بالكركار..
ودايما تراري وتشبه روحها..
عندها المحن.. دايما تلقى النسوان متلمين فوقها..
عند حسن بتاع الخضار ياخدن ونستن معاها ويقطعن زييييين حتين يمشن علي بيوتن..
راجلها من طريف نوري.. شغال عطشقي في السكة حديد

Post: #3
Title: Re: حفرة دخان سكينة بت ود جيب الله
Author: طارق جبريل
Date: 10-08-2010, 11:34 PM
Parent: #2


(3)

خادم الله بت عبد الله ود صالح..
مرتا مرهة وطويلي..
وليها يدينا طواااااااال
وضُعُووووويفي ان بقى ما الشطور وشوية لحيمات من لاااوراااا كان تبقى علي خشبة الأبلكاش..
ومشاطها آآبتخليهو يتملو تلاتة شهور وكل مرة تنادي فاطني بت خليل فشان تنقضو وتمشطها من جديد
دنقلاويي من ناوا...
عندها لسان اطرق وغالات ودايما حسوسها مالات الحلي..
ان بقيت قلتلا السماء دة ازرق وفوق اللرض.. تقولك وحات نضري السماء احمر وما بعيد بالحيل
راجلها ابن عمها وشغال عامل في الهيئة القومية للكهرباء والمياه...


Post: #4
Title: Re: حفرة دخان سكينة بت ود جيب الله
Author: طارق جبريل
Date: 10-08-2010, 11:35 PM
Parent: #3

(4)
البتول بت محمد كُبُر..
من ركابية بارا..
سمممممممحي وعاجباها روحها
ليلها ونهارها تخت في الحني وتلقط في حواجبينها
والكتفين دايما عريانات حتى تحت التوب تشوف فيهن يلمعن من الدلكي
ومن تصبح تلتخ وشها باللخوخة حتى تشوف دايري تسوي شنو في التُكل أليلا..
انت بقيت نغزتها بي شي ماهو ياهو تقولك: قادر الله أنا بت بارا بت الرمال والتبلدي
تدخل بيتها دة ان بقيت من شربت القهوة بالهبهان واكلتلك شي آآبتخليك تمرق من عندها
راجلها من النهود مغترب في قطر.. شغال مع الجيش القطري


Post: #5
Title: Re: حفرة دخان سكينة بت ود جيب الله
Author: طارق جبريل
Date: 10-08-2010, 11:36 PM
Parent: #4


(5)
آمنة بت محمد أحمد ود الخواض..
جعليي من سقادي..
ليلها ونهارها وصيف وشتاء لابسي الأبيض
تقول الناس القاعدين يموتوا في الدنيا دي كلهم قرايبها
راجلها ود عمها خضرجي في سوق الزنك في الخرطوم
مرتا كريمة وصينيتها دايما ملياني وخمجانة
لكن يا ويل نسوان الحلي ان بقت ماتلها زول وما جن باكنها
وكتين تتشمطلها مع مرة من الحلي.. تلقى النسوان كلهن يجرجرن فيها
فشان يدخلنها بيتها.. وتسمع فيها تكورك: انا بت الجعليين بت سقادي تقولي لي كدة
اصلها غير اللوم والحِدْ آآبتعرف شي..

Post: #7
Title: Re: حفرة دخان سكينة بت ود جيب الله
Author: طارق جبريل
Date: 10-08-2010, 11:37 PM
Parent: #5



(6)
السُرة بت حاج النعيم
رباطابية من ابو حمد
لسانها علي ود الزومة
اصلو لا بيعجبها العجب ولا الصيام في رجب
اي شي في الحلة عندها فيهو راي
وليلها ونهارها تنقنق
وتحب القطيعة والخبارات زي عيونا
الشمار دة تفتش عليه من بداية الحلة لي نهايتها
فشان كدي وكتين تجي تنوم تسمع الشخير أليلا لي الشارع التالت
ممصرنة من لحم الدنيا وليها رجلين مكلوجات ومعوجات علي مفرمة الخُضرة
متزوجالا جعلي من بربر عندو كارو يشيلبو السلع من السوق العربي لي دكاكين القطاعي

Post: #9
Title: Re: حفرة دخان سكينة بت ود جيب الله
Author: خالد المحرب
Date: 10-08-2010, 11:41 PM
Parent: #5

الله يجازيك يالسنجك والله ضحتنى ضمه كدى بى نضمك التقول بتقولو
عديل كدى مو بى الكتابى

Post: #20
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:15 AM
Parent: #9

Quote: الله يجازيك يالسنجك والله ضحتنى ضمه كدى بى نضمك التقول بتقولو
عديل كدى مو بى الكتابى


شيخ المحرب كيفنك ابوي
ورمضان كريم
ا زول سكيني مرتا قاهري يعلم الله

Post: #6
Title: Re: حفرة دخان سكينة بت ود جيب الله
Author: محمد أبوالعزائم أبوالريش
Date: 10-08-2010, 11:37 PM
Parent: #2


طارق كيفك ....

سكيني الخرابة دي ما عندا خبر رمضان والاّ شنو؟

هسي دي ساعة حُفرة دخان؟

الناس يتسحّروا وهي في البوخة الأولى والبوخة التانية؟

أمرنا لله ... أها جرينا بنبرنا وقعدنا.

____
رمضان كريم ياخ

Post: #8
Title: Re: حفرة دخان سكينة بت ود جيب الله
Author: طارق جبريل
Date: 10-08-2010, 11:40 PM
Parent: #6

Quote: طارق كيفك ....

سكيني الخرابة دي ما عندا خبر رمضان والاّ شنو؟

هسي دي ساعة حُفرة دخان؟

الناس يتسحّروا وهي في البوخة الأولى والبوخة التانية؟

أمرنا لله ... أها جرينا بنبرنا وقعدنا.

____
رمضان كريم ياخ

ود ابو العزايم كيفنك ابوي
ورمضان كريم
وتصوم وتفطر علي خير
نحن باقي مع سكينة دي رمضانا لي يوم الخميس
ياخي سكينة حفرتها دي بتشغلها بالليل بس

Post: #15
Title: Re: حفرة دخان سكينة بت ود جيب الله
Author: أيمن التوم حسن
Date: 11-08-2010, 01:33 PM
Parent: #8

Quote: سكيني الخرابة دي ما عندا خبر رمضان والاّ شنو؟


Post: #21
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:16 AM
Parent: #15

ايمن التوم كيفنك

Post: #10
Title: Re: حفرة دخان سكينة بت ود جيب الله
Author: naeem ali
Date: 10-08-2010, 11:42 PM
Parent: #6

انتوا في المغرب شغالين بالتقويم الصيني ولا شنو..؟؟
لحقتوا باصاتنا..


__________
كل عام وانت بخير يا حبيب

Post: #22
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:18 AM
Parent: #10

Quote: انتوا في المغرب شغالين بالتقويم الصيني ولا شنو..؟؟
لحقتوا باصاتنا..


__________
كل عام وانت بخير يا حبيب

نعيكم كيفنك ياخي
نحن في المغرب نعشق الفلاتة يا حبيب
هلال ما ظهر نهي صيام

Post: #11
Title: Re: حفرة دخان سكينة بت ود جيب الله
Author: محمد المرتضى حامد
Date: 10-08-2010, 11:53 PM
Parent: #6

أبوالعزائم ،
سيبو،
إنت زعلتك قصة
Quote: راجلها من النهود مغترب في قطر..
ولا شنو؟
أمشي اتسحَّر ، قالوا الأربعاء يوم صومكم ، نحن الخميس ، عشان كدا كلامك ده ما بيمشي علينا ،
الجمعه زاتا.







تنويه:

هذا البوست برعاية المطافي والدفاع المدني.

Post: #23
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:19 AM
Parent: #11

Quote: هذا البوست برعاية المطافي والدفاع المدني


ود المرتضى رمضان كريم
يا حبيب البوست دة الدخول ليه على مس}ولية صاحبه

Post: #12
Title: Re: حفرة دخان سكينة بت ود جيب الله
Author: الامين موسى البشاري
Date: 10-08-2010, 11:57 PM
Parent: #6

طارق جبريل

رمضان كريم ... يا فلاتة المغرب
عــارف العامية حقتنا ماف احلى منها والله
هسي أنا بقرأ في كلامك دا وبتخيل إنك بتقولو قدامي

تحاياي

Post: #13
Title: Re: حفرة دخان سكينة بت ود جيب الله
Author: معاوية الزبير
Date: 11-08-2010, 00:03 AM
Parent: #12

لكن يا طارق إتلوّمت مع السرة الرباطابية دي ياخ

بعدين تقول رباطابية من أبو حمد ، يعني حا تكون رباطابية من السويد !

إتصلح معانا ياخ عامل رمضانكم السمح دا الحايبدأ الخميس وللاّ الجمعة وللاّ السبت

ونحن دخلنا في العشرة اللواخر

Post: #14
Title: Re: حفرة دخان سكينة بت ود جيب الله
Author: عبدالمجيد الكونت
Date: 11-08-2010, 11:44 AM
Parent: #13

قريبي طارق جبرين
انتوا بالجد رمضان ده وصل عندكم ولا ما وصل لا اسع

سكينة زااااااااااااتها ماها نصيحي

Post: #16
Title: Re: حفرة دخان سكينة بت ود جيب الله
Author: motaz
Date: 11-08-2010, 07:50 PM
Parent: #14


تتجازى يا ود جبرين
ياخي ضحكت جنس ضحك
تعرف الحِلة حقت ناس سكينة دي سودان عديل ماشاء الله
كل القبايل فيها،، ودي روعة السودان وجماله
،،،،،،
لحدي هنا كويسين
باقي الكلام جيبو لينا بعد العيد
هههههههه

ورمضان كريم

Post: #17
Title: Re: حفرة دخان سكينة بت ود جيب الله
Author: معاوية عبيد الصائم
Date: 11-08-2010, 08:05 PM
Parent: #16

غايتو يا طارق لو انت قاصد خادم الله بت عبد الله ود صالح حبوبة حبوبتى النعمة بت صالح الكبير خالة الطيب ود كلتوم بت الحسانى الاخوه الصغير حطاب المات فى شفخانة ام سنط سنة 1955

يبقى ده كلام غير مقبول البتة !!! ويعتبر تشهير ولغة تشفير

المطلوب تفتح بوست اعتذار طويل وعريض للمذكوره ؟

ويا حفرة ما دخلك طلح ولا شاف


ونيتى سليمة!!!!

والدليل رمضان كريم

7ع

Post: #28
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:27 AM
Parent: #17

Quote: غايتو يا طارق لو انت قاصد خادم الله بت عبد الله ود صالح حبوبة حبوبتى النعمة بت صالح الكبير خالة الطيب ود كلتوم بت الحسانى الاخوه الصغير حطاب المات فى شفخانة ام سنط سنة 1955

يبقى ده كلام غير مقبول البتة !!! ويعتبر تشهير ولغة تشفير

المطلوب تفتح بوست اعتذار طويل وعريض للمذكوره ؟

ويا حفرة ما دخلك طلح ولا شاف


ونيتى سليمة!!!!

والدليل رمضان كريم



يا حبيب ما تتصلبط ياخ

رمضان كريم يا حبيب
بس ناسي ديل مستعارين

Post: #18
Title: Re: حفرة دخان سكينة بت ود جيب الله
Author: الفاتح الجنيد
Date: 11-08-2010, 08:11 PM
Parent: #16

يا طارق اخوى حفرة دخانك دى شعلة اولمبياد رمضان والا شنو !!!
رمضان كريم عليك

Post: #19
Title: Re: حفرة دخان سكينة بت ود جيب الله
Author: ذواليد سليمان مصطفى
Date: 11-08-2010, 09:28 PM
Parent: #18

http://www.electronicsudan.com/cgi-bin/sdb/2bb.cgi?seq=...334410&func=flatview

Post: #30
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:29 AM
Parent: #19

شكرا يا ذو اليد ورمضان كريم

Post: #29
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:28 AM
Parent: #18

Quote: يا طارق اخوى حفرة دخانك دى شعلة اولمبياد رمضان والا شنو !!!
رمضان كريم عليك

والله يا ود الجيد بعد شويي حا تولع تفوت الاولمبياد

Post: #27
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:26 AM
Parent: #16

Quote: لحدي هنا كويسين
باقي الكلام جيبو لينا بعد العيد
هههههههه


معتز كيفنك ابوي
ورمضان كريم
غايتو يا الحبيب انا بدخل بالليل
الذ احل فيه الرفث

Post: #26
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:24 AM
Parent: #14

Quote: قريبي طارق جبرين
انتوا بالجد رمضان ده وصل عندكم ولا ما وصل لا اسع

سكينة زااااااااااااتها ماها نصيحي

قريبي كيفنك
يعلم الله المغاربة فلاتة بس
غايتو ترانا صايمين الخميس
وسكيني دة اسكت خلها كلو كلو

Post: #25
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:23 AM
Parent: #13

Quote: لكن يا طارق إتلوّمت مع السرة الرباطابية دي ياخ

بعدين تقول رباطابية من أبو حمد ، يعني حا تكون رباطابية من السويد !

إتصلح معانا ياخ عامل رمضانكم السمح دا الحايبدأ الخميس وللاّ الجمعة وللاّ السبت

ونحن دخلنا في العشرة اللواخر

ود الزبير كيفنك ابوي
وكل سنة وانت طيب
يا الحبيب الرباطاب ديل عندي معاهن المحن
ياخي احب محطاتي لي كريمة كانت ابو حمد دي
عندكم عجوة وشاي بي لبن يمين يجهجه

Post: #24
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 00:21 AM
Parent: #12

Quote: طارق جبريل

رمضان كريم ... يا فلاتة المغرب
عــارف العامية حقتنا ماف احلى منها والله
هسي أنا بقرأ في كلامك دا وبتخيل إنك بتقولو قدامي

تحاياي

ود البشاري رمضانك كريم
يا الحبيب الذ من كعويج كلامنا مافي

Post: #31
Title: Re: حفرة دخان سكينة بت ود جيب الله
Author: Yasier Elsayed
Date: 12-08-2010, 00:47 AM
Parent: #24

ود جبريل الزول العجيب
والله ياطارق كلامك السمح دا كنت منتظر بيه رمضان يعنى
غايتو غتاتك فى الشوائقة مافى

تحياتى ورمضان كريم

Post: #34
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 01:04 AM
Parent: #31

Quote: ود جبريل الزول العجيب
والله ياطارق كلامك السمح دا كنت منتظر بيه رمضان يعنى
غايتو غتاتك فى الشوائقة مافى

تحياتى ورمضان كريم


ياسر كيفنك
عاد يا الحبيب رمضان شويي عندنا فيهو وقت
باق السنة نتجاري علي الكوامر

رمضان كريم يا الحبيب

Post: #32
Title: Re: حفرة دخان سكينة بت ود جيب الله
Author: حبيب نورة
Date: 12-08-2010, 00:58 AM
Parent: #24

ود جبرين
وحاة سيدي خمّيتنا ساكت
ياخي قاعدين منططين عويناتنا كيف الضب الفوق الحيطة

ياخ عليك الله باقي القصة
وبعدين البوست دة شكلو كدة ما رمضاني

أوعك ترفعوا بالنهار

خلينا نجي نفرّق بيه المويات

Post: #35
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 01:05 AM
Parent: #32

Quote: ود جبرين
وحاة سيدي خمّيتنا ساكت
ياخي قاعدين منططين عويناتنا كيف الضب الفوق الحيطة

ياخ عليك الله باقي القصة
وبعدين البوست دة شكلو كدة ما رمضاني

أوعك ترفعوا بالنهار

خلينا نجي نفرّق بيه المويات

حبيبها كيفنك ابوي
عاد انا بكتب بالليل بي توقيتنا
سجمك ان بقت الصباح عندكم
والله الا تقضي

Post: #33
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 01:02 AM
Parent: #24

كدي قبل ما نبدأ فشان ما يجي يتصلبط فيني زول
الاسامي الهني دي كلها مستعارة



(7)
-كو كو كو
سكينة: منو الفي الباب
- آمنة: امرقي يا خرابة الخضار بيكمل علينا
- سكينة: اصبري اللفح توبي جاياكي
- آمنة: استعجلي خادم الله والبتول ام لخوخة والسرة قبيل سبقننا
- سكينة: عاد هن بيقدرن يلاكي امسكي القفة النسد الباب
دحين ام توب لبني وتجدع في يدينا علي ستاير الرطشة دي منو آآآمني
- آمنة: منو غير البتول البتتفدع ما ياهو مشيها
- والله عفيت منها دايما نايري وقلبها ميت
- آمنة: نان قلبها كيفن آآبيموت الراجل يشيل ويخم ويرسلها من قطر.. تسكت تحمد ربها
- سكينة: كيف اصبحتن.. حسن ازيك
- حسن بتاع الخضار: اهلا بالشايقيي القاهري
- سكينة: الشق اليقطع لهاتك
- حسن: ههههههههههههه والله اماني مداعاتك ماها سمحي
- سكينة: كدي خلني من النضمي القاطع اللهجي دة
الخضار دة مالو مضبلن كدي والعجور علي ضُنب الكديس كدي
- حسن: وحاتك يا الشايقيي جايي من توتي هسي
- السرة: توتي اليخموك فيها هسي دي خضرة دي ولا الجرجير الممصرن دي يودوهو وين
- حسن: عاد أنا زرعته يا السرة
- البتول: هوووي شيلن خضاراتكن فسراع انا دايراكن في غرض
- خادم الله: (بصوت عالي) في شنو يا البتول.. لا يبقى ناس قطر هههههههههه
السرة: اها قامت علي الطروقيي شيلي خضارك وتعالي منجري

شالن خضارن وغشن احمد الجزار شالن لحمن وجن ماشات

-سكينة: البتول مالك خير
- البتول: خير يا الشايقيي.. الراجل جايي باكر ودحين انا دايري اجهز
- آمنة: انت من بتين ماكي جاهزي ليلك ونهارك تتلتخي وتمعطي في كرعينك
- خادم الله: اها قمتي علي طروقية الجعليين
- سكينة: ههههههههه يا اخوانا روقو النسمعها دايري تقول شنو

وقفن النسوان الخمسة تحت نيمايات ناس خادم الله وكلو واحدي شايلالا قفة
المارق منها عجور والطالع منها ربطة خضرة والفيها بصلا اخضر
البتول: يا اخوانا الليلة ولعوا الدخان بدري دايري آخدلي تلات اربعة كبات في الطلح
والرسول يا سكينة تشدي معاك الحلاوة في علبة النيدو الكبيري
السرة: قادرة الله باقيلي ماكي دايري تشهديهو.. يا خرابة الراجل بيجي فتران هههههههه
- آمنة: انت عاد بري منكن
- خادم الله: باقيلي داير تعدمي الجسم الصوفاي.. الخوف بعد دة كله مواسيرك يشرشرن
من لااااااااااتحت وتبقي زي نقاع الزير مع جية الراجل ههههههههه
- سكينة: بري بري بري منك يا خادم الله اصلها طروقية الجن
- السرة: ههههههههه عاد ان نقاع الزر حقها بدا بكرة يمين الراجل عل يسعر ضُمة ضُمة
- البتول: انتن جنيتن انا الاسبوع الفات يا دابي نشفت
- آمنة: قادر الله باقيلي ظابطاها مع جية الراجل
- البتول: لا تكتروا الحجي شي.. الليلي دايري اتفسخ واتمعط زين فشان كدي ابدوا بدري
- خادم الله: (اخدتلها سفة من حقتها) بت الغلفا مكوفري باقيلي
.....


Post: #36
Title: Re: حفرة دخان سكينة بت ود جيب الله
Author: ابراهيم الرشيد عبدالرحمن وراق
Date: 12-08-2010, 10:20 AM
Parent: #33

ياقريبى...

والله ضحكت لامن اتشرقت ومعاى بنوت فى المكتب

يضحكن من ضحكى والشمار كاتلن الا مانى قادر

اقولهن فى شنو.

الله يجازى محنك يا طارق

رمضان كريم

Post: #37
Title: Re: حفرة دخان سكينة بت ود جيب الله
Author: أيمن دياب
Date: 12-08-2010, 11:20 AM
Parent: #36

Quote: - خادم الله: (اخدتلها سفة من حقتها) بت الغلفا مكوفري باقيلي

رمضان كريم ياطارق جبرين..
مافي طريقة سفة من حقة خدوم؟؟

Post: #38
Title: Re: حفرة دخان سكينة بت ود جيب الله
Author: هواري نمر
Date: 12-08-2010, 11:27 AM
Parent: #37

ود جبرين
سلامات...ورمضان كريم!
الا مع نضميك ده,شكلو رمضان السنة دي رايح رايح


الا نشوف (اطعام مسكين ســـــــــــــــاي)
الله يجازي محنك يا الخرابة.

Post: #39
Title: Re: حفرة دخان سكينة بت ود جيب الله
Author: عمر قسم السيد
Date: 12-08-2010, 12:28 PM
Parent: #38

الاخ طارق

احييك على السرد الجميل

والتوفيق في اختيار الشخصيات بدقة متناهية

لكن سكيني اظنها - مرتاً - فاطر وجاســر

Post: #43
Title: Re: حفرة دخان سكينة بت ود جيب الله
Author: إدريس محمد إبراهيم
Date: 12-08-2010, 01:07 PM
Parent: #39

Quote: وقفن النسوان الخمسة تحت نيمايات ناس خادم الله وكلو واحدي شايلالا قفة
المارق منها عجور والطالع منها ربطة خضرة والفيها بصلا اخضر
البتول: يا اخوانا الليلة ولعوا الدخان بدري دايري آخدلي تلات اربعة كبات في الطلح
والرسول يا سكينة تشدي معاك الحلاوة في علبة النيدو الكبيري
السرة: قادرة الله باقيلي ماكي دايري تشهديهو.. يا خرابة الراجل بيجي فتران هههههههه
- آمنة: انت عاد بري منكن
- خادم الله: باقيلي داير تعدمي الجسم الصوفاي.. الخوف بعد دة كله مواسيرك يشرشرن
من لااااااااااتحت وتبقي زي نقاع الزير مع جية الراجل ههههههههه
- سكينة: بري بري بري منك يا خادم الله اصلها طروقية الجن
- السرة: ههههههههه عاد ان نقاع الزر حقها بدا بكرة يمين الراجل عل يسعر ضُمة ضُمة
- البتول: انتن جنيتن انا الاسبوع الفات يا دابي نشفت
- آمنة: قادر الله باقيلي ظابطاها مع جية الراجل
- البتول: لا تكتروا الحجي شي.. الليلي دايري اتفسخ واتمعط زين فشان كدي ابدوا بدري
- خادم الله: (اخدتلها سفة من حقتها) بت الغلفا مكوفري باقيلي
.....



طارق رمضان كريم .. وكل عام وأنتم جميعاً بخير ...

يا طارق أنت زول وصاف لامن غلط ياخي ... ياخي التقول مرايا بس ... ياخي أنا حسيت بي نفس النسوان ديل وعرقن البينّز من روعة حكيك يا طارق ودقة وصفك ... غايتو ما نسحرك بس عيني بارده .. لكن عندك خيال خصب وسرد غاية في الامتاع مع الاهتمام بكافة التفاصيل الصغيرة والتي اعتقد إنه يكمن فيها سر الابداع ...

Post: #46
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 00:46 AM
Parent: #43

Quote: طارق رمضان كريم .. وكل عام وأنتم جميعاً بخير ...

يا طارق أنت زول وصاف لامن غلط ياخي ... ياخي التقول مرايا بس ... ياخي أنا حسيت بي نفس النسوان ديل وعرقن البينّز من روعة حكيك يا طارق ودقة وصفك ... غايتو ما نسحرك بس عيني بارده .. لكن عندك خيال خصب وسرد غاية في الامتاع مع الاهتمام بكافة التفاصيل الصغيرة والتي اعتقد إنه يكمن فيها سر الابداع ...

حبيبنا ادريس كيفنك ياخي
رمضان كريم تصوم وتفطر علي خير
الله يجبر بي خاطرك يا حبيب

Post: #45
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 00:42 AM
Parent: #39

Quote: الاخ طارق

احييك على السرد الجميل

والتوفيق في اختيار الشخصيات بدقة متناهية

لكن سكيني اظنها - مرتاً - فاطر وجاســر

عمر كيفنك
شكرا للاطراء يا حبيب
وسكينة مرتا زيني ياخي علي تحب الحياة

Post: #42
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 12:53 PM
Parent: #38

Quote: ود جبرين
سلامات...ورمضان كريم!
الا مع نضميك ده,شكلو رمضان السنة دي رايح رايح


الا نشوف (اطعام مسكين ســـــــــــــــاي)
الله يجازي محنك يا الخرابة.


انت يا الحبيب عاد لغو الحديث آآآآبيسوي شي

Post: #41
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 12:52 PM
Parent: #37

Quote: رمضان كريم ياطارق جبرين..
مافي طريقة سفة من حقة خدوم؟؟



عاد خادم الله عندها صعوطا يكهرب

Post: #40
Title: Re: حفرة دخان سكينة بت ود جيب الله
Author: طارق جبريل
Date: 12-08-2010, 12:51 PM
Parent: #36

Quote: ياقريبى...

والله ضحكت لامن اتشرقت ومعاى بنوت فى المكتب

يضحكن من ضحكى والشمار كاتلن الا مانى قادر

اقولهن فى شنو.

الله يجازى محنك يا طارق

رمضان كريم



يا قريبي كيفنك
ورمضان كريم
اسكت فتو ليهن يا الحبيب
واليحصل يحصل

Post: #44
Title: Re: حفرة دخان سكينة بت ود جيب الله
Author: اشرف السر
Date: 12-08-2010, 06:57 PM
Parent: #40

يومين من رمضان متفن هنا
اها ما فطرتو لسع؟

تعال تم الخرابة دي آ جنا جبرين
كلامك موهط تب

Post: #47
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 00:48 AM
Parent: #44

Quote: يومين من رمضان متفن هنا
اها ما فطرتو لسع؟

تعال تم الخرابة دي آ جنا جبرين
كلامك موهط تب


ود السر كسفنك ابوي
انا غايتو قاعد اجي اكتب بعد الفطور
مع الدخاخين دي مانا دايرين نبوظ صيامنا

Post: #48
Title: Re: حفرة دخان سكينة بت ود جيب الله
Author: اشرف السر
Date: 13-08-2010, 04:20 AM
Parent: #47

في فتوى حايمة الأيام دي انو الدخان ما بفطر ولا حاجة
بس نوع دخانك دا ما اظنو (مشمول)*






* مشمول دي من الشملة

Post: #49
Title: Re: حفرة دخان سكينة بت ود جيب الله
Author: الفاتح ميرغني
Date: 13-08-2010, 04:42 AM
Parent: #48

السمح والزين طارق متابعين نضميك الحنين .

رمضانك مبارك وكل سنة وأنت طيب.

Post: #50
Title: Re: حفرة دخان سكينة بت ود جيب الله
Author: عبدالحليم حامد النعيم
Date: 13-08-2010, 05:49 AM
Parent: #49

..
أول شئ ... رمضان كريم عليكم
..
تاني شئ ... إن بقت زي قصة عوض ... وما عندها نهاية

... والله علي أركب واجي واعضيك في صـلعتك الكبيري دي ..

.. يا اخي ما تقعد تشحتف في روحينا دي اصلا ما فضل فيها شي

أرقد عافية يا دكتور

Post: #51
Title: Re: حفرة دخان سكينة بت ود جيب الله
Author: أحمد الصديق
Date: 13-08-2010, 10:40 AM
Parent: #50

رمضان كريم يا طارق

الله يجازي محنك

أها صمتوا وألا لسـا ؟؟

Post: #52
Title: Re: حفرة دخان سكينة بت ود جيب الله
Author: Hadeer Alzain
Date: 13-08-2010, 11:14 AM
Parent: #51

ود جبريل المنخوج ديمة
نخجي الليل وبوستاتو عرفناها!
حفر الدخان شنو فينا في نصت نهار رمضان ؟!!

بعدين نسوان الحلة ديل كان تدي كل واحدة
فيهن لون، عشان ما تجهجهنا معاك ياخ !

حكي جميل ومغرق في الواقعية والجمال والله
الطيب صالح قريبك مش ؟!


تسلم
ورمضان كريم
تصوم وتفطر على خير إنت والأسرة الكريمة

Post: #57
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 12:05 PM
Parent: #52

Quote: ود جبريل المنخوج ديمة
نخجي الليل وبوستاتو عرفناها!
حفر الدخان شنو فينا في نصت نهار رمضان ؟!!


عاد النخجي دة ان بقى ما مشى علي حفر الدخان شن طعمو


Quote: بعدين نسوان الحلة ديل كان تدي كل واحدة
فيهن لون، عشان ما تجهجهنا معاك ياخ

عاد اجيبلي بوهية واكشحها فيهن ولا كيفن


Quote: حكي جميل ومغرق في الواقعية والجمال والله
الطيب صالح قريبك مش ؟!

رحم الله شيخ الطيب (الخال) داك زول ما بيتلحق كله كله


بت الزين..
تصومي وتفطري علي خير
وكل سنة وانت واحبابك بخير

Post: #60
Title: Re: حفرة دخان سكينة بت ود جيب الله
Author: Hadeer Alzain
Date: 13-08-2010, 04:35 PM
Parent: #57

Quote: عاد النخجي دة ان بقى ما مشى علي حفر الدخان شن طعمو

يا كبير المنخوجين .. ياخ دي بوستات خم رماد وعيد .. وكدا !


Quote: عاد اجيبلي بوهية واكشحها فيهن ولا كيفن

يا طارق قصدي مداخل القصة .. بس هسه توو ليت
يعني كان سكينة بت حُومد ست الحفرة تديها لون أحمر
وخادم الله بت عبد الله تلونها أخضر .. وهكذا دواليك
اللون الأحمر طشش عيونا مع الصيام دا
ونأسف للإزعاج وللمقترحات الرمضانية المخستكة !


يديك العافية ونشوفك خير خلف لخير سلف وما كتيرة عليك!
قول آمين







Post: #61
Title: Re: حفرة دخان سكينة بت ود جيب الله
Author: احمد محمد بشير
Date: 13-08-2010, 04:36 PM
Parent: #60

الدخاخيين دي قامت تاني


لكين المرّة دي دخاخينك عينة يا ود جبرين








تسلم

Post: #62
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 04:41 PM
Parent: #60

Quote: كبير المنخوجين .. ياخ دي بوستات خم رماد وعيد .. وكدا


رماد تقيل يا بت الزين


Quote: يا طارق قصدي مداخل القصة .. بس هسه توو ليت
يعني كان سكينة بت حُومد ست الحفرة تديها لون أحمر
وخادم الله بت عبد الله تلونها أخضر .. وهكذا دواليك
اللون الأحمر طشش عيونا مع الصيام دا
ونأسف للإزعاج وللمقترحات الرمضانية المخستكة !

هو انا كوني عملت ليك الاحمر دة شايف نفسي بقيت مبدع


عاد الحلقات الجاية الا بعد الفطور ما بنقدر نقضي

Post: #65
Title: Re: حفرة دخان سكينة بت ود جيب الله
Author: Hadeer Alzain
Date: 13-08-2010, 05:11 PM
Parent: #62

Quote: هو انا كوني عملت ليك الاحمر دة شايف نفسي بقيت مبدع

أهم شي الإحساس دا! !
لا كان كدا عفيناك من التلوين وواصل فينا بأحمرك دا يا مبدع


Quote: عاد الحلقات الجاية الا بعد الفطور ما بنقدر نقضي

هههه ..
بعد فطورك إنت ناس أمريكا والبلدان المجاورة يعملو شنو ؟!


تسلم

Post: #95
Title: Re: حفرة دخان سكينة بت ود جيب الله
Author: طارق جبريل
Date: 18-08-2010, 04:22 PM
Parent: #65

Quote: لا كان كدا عفيناك من التلوين وواصل فينا بأحمرك دا يا مبدع


الله يقلعك

Post: #56
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 12:01 PM
Parent: #51

Quote: رمضان كريم يا طارق

الله يجازي محنك

أها صمتوا وألا لسـا ؟؟


ود الصديق كيفنك
ورمضان كريم عليكم
صمنا بعديكم بي يوم يا الحبيب
شغل فلاتة أصلي

Post: #55
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 12:00 PM
Parent: #50

Quote: أول شئ ... رمضان كريم عليكم
..
تاني شئ ... إن بقت زي قصة عوض ... وما عندها نهاية

... والله علي أركب واجي واعضيك في صـلعتك الكبيري دي ..

.. يا اخي ما تقعد تشحتف في روحينا دي اصلا ما فضل فيها شي

أرقد عافية يا دكتور


ود ناس النعيم كدي قول بسم الله
مالك جايي طاير بي نمرة أربعة
انت الصلعة دي قايلها ساهلي
ياخي القصي بقت اسطايل ووجاهة
تصوم وتفطر علي خير يا حبيب

Post: #54
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 11:58 AM
Parent: #49

Quote: السمح والزين طارق متابعين نضميك الحنين .

رمضانك مبارك وكل سنة وأنت طيب.


ود ميرغني الزين
رمضان كريم يا حبيب وكل سنة وانت طيب
المسانيح المعاك ديك (بهاء وحيدر) اخبارهم شنو

Post: #53
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 11:56 AM
Parent: #48

Quote: في فتوى حايمة الأيام دي انو الدخان ما بفطر ولا حاجة
بس نوع دخانك دا ما اظنو (مشمول)

ود السر عاد دي فتوة السرور

Post: #58
Title: Re: حفرة دخان سكينة بت ود جيب الله
Author: عمر التوم
Date: 13-08-2010, 12:21 PM
Parent: #53

ود جبرين رمضان كريم
Quote:
(5)
آمنة بت محمد أحمد ود الخواض..
جعليي من سقادي..
ليلها ونهارها وصيف وشتاء لابسي الأبيض
تقول الناس القاعدين يموتوا في الدنيا دي كلهم قرايبها
راجلها ود عمها خضرجي في سوق الزنك في الخرطوم
مرتا كريمة وصينيتها دايما ملياني وخمجانة
لكن يا ويل نسوان الحلي ان بقت ماتلها زول وما جن باكنها
وكتين تتشمطلها مع مرة من الحلي.. تلقى النسوان كلهن يجرجرن فيها
فشان يدخلنها بيتها.. وتسمع فيها تكورك: انا بت الجعليين بت سقادي تقولي لي كدة
اصلها غير اللوم والحِدْ آآبتعرف شي..


غايتو ارجى اللوم الجاييك

-------------------
واصل الامتاع

Post: #59
Title: Re: حفرة دخان سكينة بت ود جيب الله
Author: السيد المسلمي
Date: 13-08-2010, 03:41 PM
Parent: #58

يازول عليك الله واصل وتم الفلم دا !

ـــ
بقو علينا إتنين .. شحتفة وصيام ..

Post: #64
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 04:43 PM
Parent: #59

Quote: يازول عليك الله واصل وتم الفلم دا !

ـــ
بقو علينا إتنين .. شحتفة وصيام ..



انت يا حبيب في كوريا دي صايمك دة دحين مقبول

Post: #63
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 04:42 PM
Parent: #58

Quote: غايتو ارجى اللوم الجاييك



عد يا الحبيب انا جبت شي من عندي
الجعليي ألتكم ليلها ونهارها حادي

Post: #66
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 05:12 PM
Parent: #63


(8)
النسوان مشت كل وحدي علي بيتها..
الشدتلها باميي.. والسوتلها خضرة .. واللايقتلها لاريق... والكوجنتلها بطاطس
مع المغربيي كل وحدي فيهن شالتلها بوقجي ألت هدوم وتوب جارات قديم وبرطمان كركار ومشن علي بيت سكينة
- خادم الله: قشيرة كيفنك أها طلحك دة مكسر ولا لليلي
- سكينة: مكسر من امبارح يا ست اللفحي
- السُرة: الرسول خلني اللاخدلي كبة أنا قبلكن باقي مخروقتي واجعاني
- البتول: هي مخروقتك دي ما لقت توجعك علي الليلي
- السُرة: مشيت استحمى في الحمام المن تالاكي وانزلقت لامن سروالي انشرط كرررررررررررررر
- سكينة: هن سراويلك شن طعمن العلي خيمة البكاء ديل
- السرة: (تضحك بعمق) وحات نضري يا سكينة سراويل الجن ديل تقول ضاربن شيطان
- البتول: كيفن.. مالن النبي يا السرة
السُرة: يوما نعافر انا والراجل الغبيان دة في الضُلمة.. قوم يا الغبيان لبس سروالي ودخل استحمى
وساق الكارو أليلو ومشى علي السوق العربي.. وكتين بقى يعتل في البضاعة ألت الناس
قوم ارفع العراقي أليلك وسط النسوان.. ههههههههه.. إن كان يلقى نفسه لابس السروال أليلي ومندلي منه المطبقة بي الجلد أليلا
- سكينة: هي سوووووووووووود علي نان شن سوا هههههههههههه
السُرة: السوق كله يضحك عليه وقالولوا: باقيلي امباح الليل كله انت تحَفِت ههههههههههههه
والله جاء دعاني جنس دعايا ههههههههههههه
- البتول: انت نان يا خرابة ما تلمي سراويلك عليكي وسط معافرة الجن دي
- السُرة: أنا شن عرفني تراهو يلكزني وندخل علي الأوضة الفاتحي في ضهر بيتك ديك هههههههه
- خادم الله: اصلو يا كافي البلا ماكُن قاعدين تولعوا النور وكتين يأذن الفجر
- السُرة: إييي نور شنو... حق الله بق الله كل زول يمشي علي شغلو هههههه
- البتول: بري بري بري منك عاد... ماكي مرة شي
- سكينة: قومي يا البتول ادخلي انت اللولا فشان نطفي نور الحوش دة
النسوان كلهن كل واحدة قلعت هدوما ولبسن تيبان الجارات المقطعات ديلك وبقن يشربن في قهوتن
- البتول: احي احي .. الخرابة .. طلح الجن دة ماله كافر كدي
- سكينة: دة قولك.. جايبو معاهو ابو محمد من الصعيد.. بالله الكبة فيهو تمرق جسمك زي الجبص
- خادم الله: عاد الليلي اتجبصي زين باقي الراجل جايي... انتو آمنة لليلي ما جات
- السرة: يبقى ماتلها زول... هههههههه... هسي تجيكن دمعها علي نقاع الزير وتقولكن: جاني خبر العدو هههههههه
- سكينة: حرام عليكي يا ام لسان اطرق انت... يديك الجات من الزقاق
- محمد ولد سكينة: يمة... يمة (من جهة الزقاق)
سكينة: النجما التقطع مصارينك مالك
- محمد ود سكينة: يمة عندي بكرة امتحان في الحساب داير اشيل شنطتي من جوة
- السرة: انت الجنا مالك مداعاهو خليهو يجي يدخل يشوف الشي الدايرو
- سكينة: نان انا من الصباح قلتلو ان عندك شي في الاوضة طلعو قبل تمغرب
- البتول: (من تحت الشملة وراسها مارق والدخان طالع من جنب رقبتها علي البخار البيطلع من حلة البريستو): تعال يا محمد حبيبي ادخل شيل شنطتك امك دي باقي خرفت
- سكينة: يا فقر تعال شيل نصيبتك دي واوعك تجي بي هنا تاني
.....


Post: #67
Title: Re: حفرة دخان سكينة بت ود جيب الله
Author: محمد أبوالعزائم أبوالريش
Date: 13-08-2010, 08:44 PM
Parent: #66

Quote: النجما التقطع مصارينك

غايتو (النجما) دي كان ما كنا بنسمعا من أُمّاتنا ... ما كنت فهمتها.
وأصلاً ما كنت قايلا بتتكتب.

Post: #68
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 10:58 PM
Parent: #67

Quote: غايتو (النجما) دي كان ما كنا بنسمعا من أُمّاتنا ... ما كنت فهمتها.
وأصلاً ما كنت قايلا بتتكتب.

ياخي معناها انت قديم خلاص

يا حبيب كيفنك

Post: #69
Title: Re: حفرة دخان سكينة بت ود جيب الله
Author: محمد أبوالعزائم أبوالريش
Date: 13-08-2010, 11:10 PM
Parent: #68

Quote: ياخي معناها انت قديم خلاص


نان قديم أنا والاّ الكتبا؟

غايتو مع نسوانك الفُجَّر ديل ... الله يستر علي صيامنا.

Post: #70
Title: Re: حفرة دخان سكينة بت ود جيب الله
Author: طارق جبريل
Date: 13-08-2010, 11:24 PM
Parent: #69

Quote: نان قديم أنا والاّ الكتبا؟

غايتو مع نسوانك الفُجَّر ديل ... الله يستر علي صيامنا.


عاد اصبر لامن يدخلن في الغريق عاد
باقيلي انا وانت حا نقضي مع الستوت

Post: #71
Title: Re: حفرة دخان سكينة بت ود جيب الله
Author: طارق جبريل
Date: 14-08-2010, 01:34 PM
Parent: #70

اللهم اني صايم هسي

Post: #72
Title: Re: حفرة دخان سكينة بت ود جيب الله
Author: طارق جبريل
Date: 14-08-2010, 09:29 PM
Parent: #71

(9)
الشافع يا الحبان دخل مهجوم لقى النسوان نصهن الفوق كله في السهلة
شال شنطتو وجاء مارق لقى خالته البتول مارقي من الشملي
ضحكلو ضحكي خبيثي وخت ايدو فوق عيونه وقام جري علي الحوش البيغادي
- البيتول: ولدك يا سكينة باين عليه ماهو ساهل شي.. حدرلي زييييين هههههه
- سكينة: ترب ابوهو عاد.. وكتين يقوم علي الخمج.. ووووب علينا
- خادم الله: هو منو الفيهم الماهو خمجان...
- سكينة: قومي يا السرة الطلح دخانه قاجي
السرة قامت وقلعت توب الجارات المهرود داك
الكرعين مكلوجات وضُعوووويفات علي كُنش العصيدة
مشت قدام آمنة وغتست تحت الشملة
- آمنة: النبي فيك يا السرة.. الراجل دة شن عاجبه في عضيماتك ديل ههههه
- البتول: حرام عليك يا آمني وحات ربي السرة ليها وجيها صبوح وتتراد
- السرة(من تحت الشملة ممرقي نخرينها بس): عاد فراغك وحات ربي وكتين
يهيج ويقعد يجوعر تقولي الراجل معرس تاجوج في زمانها
- سكينة: كدي كدي كدي علي الرباطابيي.. انا اختك يا السرة
- البتول (تلايق في الحلاوة فشان تمعط تحت يدينها): باقيلي الراجل قاعدي ترسليهو لي شغلو مهضلم
- السرة: وكتين يكون ليله ماشي زي العجب يقوم الصباح يلبس ويقولي: انا ود عمك يا السرة
- سكينة: انتو في السرة دي ولا خادم الله النامت دي ههههههههههه
- السرة: الكزيها بي عود طلح الخرابة لا يبقى ماتت
- سكينة: حرام عليك يا السرة الله يخليها لي وليداتها
سكينة قامت علي البتول تشيلها في الحلاوة وتقلب فيها يمين وشمال
-سكينة: عاد بعد الهركي دة باكر الراجل دة ان ما بقيتي رقدتيهو خل ماكي مرة شي
- البتول: وحاتك علي اخليهو يعوعي ههههههههههههه
حنان بت آمنة جات داخلة من تالا الزقاق وتصفق: يا ناس البيت ازيكم
-سكينة: حبابك اتفضلي
- حنان: انتو اصلكم طلحكم دة ما بتخلوهو.. يمة انا ما اجي المغرب البيت القاكي تدخني
- خادم الله (صحت من نومها): اييي حنان كيفنك انت من متين هني
- السرة: هي حليل ابو داك
- خادم الله: انت يا آمني دحين بتك دي ما تمت الحول لليلي مالها لليلي ما تقلت شي
- حنان: خالتي خادم الله ماني دايري الد انا ارتاحي
- سكينة: كيفن يا بتي عاد الكلام دة لااامتين مصيرك تسويلك ولاد
- آمنة: نان هي تسويهن كيفن الولاد ديل مباري راجلها وراجلها مباري الانتخابات
والحزب الفلاني ويسقط فلان ويعيش فرتكان
- السرة: من تحت الشملة: الخرابة لا تبقي بقت شوعيي كافري
- خادم الله (بلت اصبعها بي لسانها وختتو في الواطة ونفضتو): قبلها وحدها كافري ضمة
- سكينة: لا تسمعي كلام خالاتك المخرفات ديل.. يا بتي مصيرك تلدي
- السرة: يبقى الخومري ألت امها ميمي ومايصي
- آمنة: عاد فراغك خومرتي انا يحكوبها
- السرة: تعالي يا بتي اديك فتيل أليل خومرة يمين تجيبيهم تيمان
- سكينة: قدر خومرتك انت يا المخرفي
- السرة: وحاتك الراجل من يشمها يقوم ينكرش وتبقالو صلاة العشي دي بعيدي
انا ان ما الخومرة ألتي دي كان جبتلي تلاتة شفع الفرق بيانت كل واحد فيهم عشرة شهور
- البتول (ميتة من الضحك) باقيلي تتشوبحي من من تمغرب للفجر
- حنان: ارتاحن انا لاني كافري لاني دايري ألد تمن دخانكن
- خادم الله: الرسول يا حنان الدني خميس ما تجدي تاخديلك كبي وتمشي تراري علي راجلك
- حنان: يا خالتي والله انا ما جاهزة والراجل منتظرني بهناك في البيت
- السرة: بنرسلو ونقوله حا تدخني.. هو الدخان دة دايرلو جهوزيي
ما تتقولعي وتغتسي تحت الشملي
سكينة: البتول اتمسحي بالكركار الطلح دة كافر بيشقق جسمك
خادم الله: باقيلي دايرين ترسلوها عروس للراجل
- سكينة: ياخي الراجل ليهو سنة بعيد خليها تعيش حياتها
- السرة: نان هي الغبيانة ما براها ابت تمشي معاهو
- حنان: ياخي كملوا دخانكم دة
- آمنة: خلاص انتهينا يا بتي كملي فنجان القهوة أليلك فشان نمشي
- سكينة: الله يعدلها عليكن ويطرح البركة فيكن
كملن دخانن وكل واحدي مشت علي بيتها
.....

Post: #73
Title: Re: حفرة دخان سكينة بت ود جيب الله
Author: خالد المحرب
Date: 14-08-2010, 11:04 PM
Parent: #72

Quote: كملن دخانن وكل واحدي مشت علي بيتها
.....


مع تمنياتنا لهن بليله سعيده

الله يجازيك والله قاعد تضحكنا بى الصح

طبعا اشيل واطبع وعندى صاحبا لى سنجك
كل يوم بديه نسخه

Post: #74
Title: Re: حفرة دخان سكينة بت ود جيب الله
Author: طارق جبريل
Date: 15-08-2010, 00:37 AM
Parent: #73

Quote: مع تمنياتنا لهن بليله سعيده

الله يجازيك والله قاعد تضحكنا بى الصح

طبعا اشيل واطبع وعندى صاحبا لى سنجك
كل يوم بديه نسخه


شيخ المحرب كيفنك ابوي
يا زول دي اول كبة في الطلح
لليلي في كبات جايات

تحياتي للسنجك المعاك

تسلم يا حبيب

Post: #75
Title: Re: حفرة دخان سكينة بت ود جيب الله
Author: شهاب الفاتح عثمان
Date: 15-08-2010, 01:15 AM
Parent: #74

رائع !.

Post: #76
Title: Re: حفرة دخان سكينة بت ود جيب الله
Author: اشرف السر
Date: 15-08-2010, 04:27 AM
Parent: #75


عاد لا حول لا قوة
خليتنا نتجوعر من كتابتك المشاترة دي
دحين الكلام دا بتجيبو من وين ؟

مجنون وحات الله ماك نصيح




--
كملن دخانن وكل واحدة فاتت علي بيتها
وانا بقيت حاقص في البوست دا على الاعمى المسكوه عكاز طلح



Post: #78
Title: Re: حفرة دخان سكينة بت ود جيب الله
Author: طارق جبريل
Date: 15-08-2010, 11:09 AM
Parent: #76

Quote: عاد لا حول لا قوة
خليتنا نتجوعر من كتابتك المشاترة دي
دحين الكلام دا بتجيبو من وين ؟

مجنون وحات الله ماك نصيح


ود السر يا حبيبنا
ياخي هي من يومها كتابي مشاتري

يا حبيبنا بت ود جيب الله مرتا ماها ساهلي
لامي نسوان الحلة في الطلح وفي النصايب المن تالا الطلح

Post: #77
Title: Re: حفرة دخان سكينة بت ود جيب الله
Author: طارق جبريل
Date: 15-08-2010, 11:07 AM
Parent: #75

Quote: رائع


حبيبنا شهاب كيفنك ابوي
الله يجبر بي خاطرك يا حبيب

Post: #79
Title: Re: حفرة دخان سكينة بت ود جيب الله
Author: موسي عيسي
Date: 15-08-2010, 11:24 AM
Parent: #77

ود جبرين يا حبيب و الله لي ثلاثة ايام بضاير ساي

من حفرتك دي خوفا علي رمضاني دا الشي التاني

الواحد عزابي قلت حفيرتك دي تقوم ترجعني البلد

لكن لمن شوفتك كترة المناداة بالحوش الكبير قلت

يا موسى السترة والفضيحة متباريات كده نمر علي

صحبي دي و انشاء الله الرهيفة التنقده ! لكن يا صحبي

و الله نضميك حلو حلاوة العجب خلينا نشوف لي جنقور فركه

و نتسلف لي شمله من ناس جلا ديل و اتوقعنا قريب انشاء الله

بعد المغرب ياني المعسكر بس وسع لينا و البوخه الاولي دي انا

متبرع بيها لصحبي الرشيد انشاء الله بس ما يعمل توم و شمار ؟

فتك بعافية !!

Post: #80
Title: Re: حفرة دخان سكينة بت ود جيب الله
Author: اشرف السر
Date: 15-08-2010, 03:55 PM
Parent: #79

هههههههههههاااااا


صاحبك موسى دا ظنيتو مسخوت
شايف الخرابة بقا فيها دخان رجال وكدا

اها خسمتكم بالبوخة الاولى
باقى بحر الانجليز دا سوالي رطوبة

Post: #88
Title: Re: حفرة دخان سكينة بت ود جيب الله
Author: طارق جبريل
Date: 18-08-2010, 12:39 PM
Parent: #80

Quote: صاحبك موسى دا ظنيتو مسخوت
شايف الخرابة بقا فيها دخان رجال وكدا

اها خسمتكم بالبوخة الاولى
باقى بحر الانجليز دا سوالي رطوبة

ود السر لا تعصر علي موسى صاحبي دة
باقي الايام دي قاعد عزابي

Post: #81
Title: Re: حفرة دخان سكينة بت ود جيب الله
Author: طارق جبريل
Date: 16-08-2010, 01:03 AM
Parent: #79

Quote: ود جبرين يا حبيب و الله لي ثلاثة ايام بضاير ساي

من حفرتك دي خوفا علي رمضاني دا الشي التاني

الواحد عزابي قلت حفيرتك دي تقوم ترجعني البلد

لكن لمن شوفتك كترة المناداة بالحوش الكبير قلت

يا موسى السترة والفضيحة متباريات كده نمر علي

صحبي دي و انشاء الله الرهيفة التنقده ! لكن يا صحبي

و الله نضميك حلو حلاوة العجب خلينا نشوف لي جنقور فركه

و نتسلف لي شمله من ناس جلا ديل و اتوقعنا قريب انشاء الله

بعد المغرب ياني المعسكر بس وسع لينا و البوخه الاولي دي انا

متبرع بيها لصحبي الرشيد انشاء الله بس ما يعمل توم و شمار ؟

فتك بعافية !!

حبيبنا موسى عيسى
لكن لقيت حالتك متأخرة خلاص
يا اخوي اقطع ليك تذكرة وامشي اخد ليك كبة كبتين
وصاحبك الرشيد خليه سااااكت جرسته براها

Post: #82
Title: Re: حفرة دخان سكينة بت ود جيب الله
Author: البادي النور
Date: 16-08-2010, 01:51 PM
Parent: #81

ود جبرين ..

يا ود أمي الله يجازي محنك .. حفرتك دي من يوم سمعت بيها وأنا خايف منها .. لكن هسه قلبي زادت دقاته ...

وحات سيدي الحسن إت ماك نصيح .. وحاته إت مجنون ضمه ...

وقالوا علي شقي ومجنون ...

Post: #83
Title: Re: حفرة دخان سكينة بت ود جيب الله
Author: كمال الشادي
Date: 17-08-2010, 01:07 PM
Parent: #82

لا حولالالالالالالالالالالالالالالالالالالالالالالالالالالالالالا

Post: #90
Title: Re: حفرة دخان سكينة بت ود جيب الله
Author: طارق جبريل
Date: 18-08-2010, 12:41 PM
Parent: #83

Quote: لا حولالالالالالالالالالالالالالالالالالالالالالالالالالالالالالا


يا خرابة انت حي
رمضان كريم عليك وعلي وليداتك

Post: #84
Title: Re: حفرة دخان سكينة بت ود جيب الله
Author: كمال الشادي
Date: 17-08-2010, 01:07 PM
Parent: #82

لا حولالالالالالالالالالالالالالالالالالالالالالالالالالالالالالا

Post: #85
Title: Re: حفرة دخان سكينة بت ود جيب الله
Author: عوض الصديق
Date: 17-08-2010, 02:07 PM
Parent: #84

ودجبريل رمضان كريم

انا بقيت متابع مسلسل رمضانى واجد بس

لو قعدت ترد على المطاميس
بتروحلنا رمضان بى بحلقتين

اجزي محنك

الكاميرا دا خاتيها ليهن فى الزقف

Post: #87
Title: Re: حفرة دخان سكينة بت ود جيب الله
Author: عامر تيتاوى
Date: 17-08-2010, 02:20 PM
Parent: #85

ود جبرين
للسلام والمتابعة وفروض الولاء
الامتداد بخير
لنا عودة

Post: #92
Title: Re: حفرة دخان سكينة بت ود جيب الله
Author: طارق جبريل
Date: 18-08-2010, 12:44 PM
Parent: #87

Quote: ود جبرين
للسلام والمتابعة وفروض الولاء
الامتداد بخير
لنا عودة



تيتا يا حبيبنا
رمضان كريم
وكل سنة وناس (عشوشة) بالف خير
والله حسدتك

Post: #91
Title: Re: حفرة دخان سكينة بت ود جيب الله
Author: طارق جبريل
Date: 18-08-2010, 12:43 PM
Parent: #85

Quote: ودجبريل رمضان كريم

انا بقيت متابع مسلسل رمضانى واجد بس

لو قعدت ترد على المطاميس
بتروحلنا رمضان بى بحلقتين

اجزي محنك

الكاميرا دا خاتيها ليهن فى الزقف


ود الصديق كيفنك
رمضان كريم يا الحبيب
الكاميرا انا خاتيها من تالا الراكوبة الجنب الحفرة

Post: #89
Title: Re: حفرة دخان سكينة بت ود جيب الله
Author: طارق جبريل
Date: 18-08-2010, 12:40 PM
Parent: #82

Quote: ود جبرين ..

يا ود أمي الله يجازي محنك .. حفرتك دي من يوم سمعت بيها وأنا خايف منها .. لكن هسه قلبي زادت دقاته ...

وحات سيدي الحسن إت ماك نصيح .. وحاته إت مجنون ضمه ...

وقالوا علي شقي ومجنون ...


البادي ود النور
كيفنك ابوي
يا زول حفرة سكيني دي موهطي وزيني
انت بس اسكت كسرلنا الطلح

Post: #93
Title: Re: حفرة دخان سكينة بت ود جيب الله
Author: طارق جبريل
Date: 18-08-2010, 12:47 PM
Parent: #89

(10)
إتلمن النسوان تاني يوم عند بتاع الخضار زي عادتن.. وهن جايات في الطريق بدن ونستن
- خادم الله: انتو الخرابة البتول ما جات للخضار.. لليلي غاتسي مع الراجل
- سكينة: نان راجلها يا دوبو جاء وين تطيريها انت
- السُرة: النصيبي خلوها مكوفري ههههههههه
- آمنة: اها شن دايرات تسوّن ليها في الصباح دة
- سكينة: نوديلا الفطور ونتحمدلها بالسلامي.. ولا شنو قولكن
- آمنة: أيي اعوج.. كل واحدة تسويلا شي ونملالنا صيني ونمشي نوديها ليها ونجي علي بيوتنا
- السُرة: عديلة.. دة ان بقت هي فضتلكن ولي اكلكن دة
- سكينة: نحن بعد نوديهو ليها هي حرة.. تاكلو ولا تخلي
- خادم الله: نان باقيلكن هي فاضيي لي اكلكن دة هههههههههه
- سكينة: اها قمتي علي الطروقييي .. هههههههههه

اتلمن النسوان عند سكينة وملنلهن صينيتين كباااااااار
شي سكسكانية وشي شعيرية وشي قراصي بالدمعة
وشي لحمة ألت صاج وشي طعميي... وشي ملاح نعيميي
وشالنلهن صندوق أليل بيبسي ومشن عليها
كل اتنين شايلاتلهن صينيي

كو كو كو كو
- السلام عليكم
- راجل البتول: اهلا مرحب اتفضلوا... اتفضلوا..
حمدلله علي السلامة
بركة الجيت طيب
حبابكم حباكم... اتفضلوا
وجاتن البتول من لا جوة
- البتول: والله ما كان في داعي لي دة
- خادم الله: باقيلي ماكي كنت دايرانا نجي... لا يبقى سويتيلك حُفري ألت دخان هني للإجازي دي
- البتول: غايتو أصلي ما بسألك
- السُرة: الخرابة اتكشكشتي كلك دهب.. صلاتي علي محمد
- البتول: فضلة خيرك يا الحبيبة
- خادم الله: انت في الدهب ولا شوفي الخرابة لابسالا فستان كله عريان
- السُرة: اتبنيها من اوراكها باقيلي ماها لابسالا شي من تحت القاهري دي هههههههههه
- سكينة: اييي شوفيها مَفَندري الصِدير كيفن قدامها.. آآبعرفها سوتلو شنو
امبارح وانا بشيلها في الحلاوة كان علي المنقايي الممصوصي
- البتول: انا عاد وووووووب علي من لسناتكن
ضحكن كلهن ودخلن علي البرندة اللاجوة
البتول قدمتلهن العصير وقالتلهن لامن نفطر نديكن الحلاوة
- سكينة: فطور شنو نحن جينا نتحمدلك بالسلامي ونمشي
- البتول: وحات نضري وحدي فيكن تطلع من هني تاني لا أناضمكن لا شيتين
- السُرة: البتول انت جنيتي... نحن غُوربة كمان
- البتول: وحات امي تمشن وما تفطرن تاني لا بيني لا بينكن
نادت رجلها شال صينية الفطور عشان يفطر مع اخوانه الجو يسلموا عليهو
والنسوان قعدن في برندتن دي يفطرن ويقرقرن
- خادم الله قامت علي الطروووقييي: اها الشفع سويتولن شنو.. باقيلي رشيتوهن بي جمكسين
- السرة: وحات نضري الخرابة دي ماها نايمي شي.. شوفي عيونها واقعات كيفن
- آمنة: اييي شوفي الشلاليف مجلبطات احمر شلاليف
- سكينة: هي سووووووووود علي.. انتن دايراتنها تقولكن شنو يا المخرفات
- البتول: الرسول آآآسكينة امسكيهن مني القاهرات ديل
- آمنة: قبيل قلنلكن اتبننها في اوراكها... هههههههه
- سكينة: والله حمد لله على السلامة
كملن فطورن وهن مارقات البتول جابتلهن كل واحدة فستان أليل بيت
وعلبة حلاوة للبُطان وبخور الند... هي تحلف وهن يحلفن
وهن طالعات جات داخلي مدينة بت حسب الرسول
سلمن عليها وسلامها لي آمنة كان مسييييييخ وقاطع اللهجي
- خادم الله: انت يا آمني المرة دي مالها مدتلك طرف اصابعيها
- آمنة: اييي خليها ماها نصيحي
السُرة وسكينة شافن في بعضن!!!
وكل مرة مشت علي بيتها

Post: #94
Title: Re: حفرة دخان سكينة بت ود جيب الله
Author: موسي عيسي
Date: 18-08-2010, 01:05 PM
Parent: #93

المسخوت ود جبرين و الله بكلامك دا يوم بتعوك ليك زول

شفت صحبك ود الشادي ما رقتو إلا حفيرتك دي و كلامك البفطر دا

والله انا لو باريت كلامك دا ياني المتصل عليك من البلد بكره !!

انت يا شقي الحال الكلام دا بتمرقوا من وين .....




هو راجل البتول كان مغترب وين في السعودية ......ك................ا.........ك

Post: #96
Title: Re: حفرة دخان سكينة بت ود جيب الله
Author: طارق جبريل
Date: 27-08-2010, 02:49 AM
Parent: #94

موسى عيسى يا حبيب
اخيرلك ترسل لي ولادك


(11)
اتلمن يا الحبان النسوان يوم الخميس بالصباح
فسراع فسراع شالن خدارن ولحمتن ومشن علي بيوتن
- سكينة يا آمنة افطري بدري وتعاليلي فشان نحصل السوق قبل يقفل
- خادم الله: ايي يا آآآمني وحات الله انا عدماني السكر والزيت
- البتول: هي ودعتكن الله بعدين بجيكن لي قسيم الميز
- السرة: الرسول يا البتول تجيبي معاكي القهوة
- البتول ابشري
مشن علي بيوتن فطرن وسكينة وآمني مشن علي سوق الجمعة
والسوق المركزي فشان يجيبن الميز أليل الشهر
شي زيت وشي سكر وشي صابون بدرة وشي صابون حجر
وشي ملح وشي بهارات
قريب الضُهر جات سكينة وآمني مع بتاع البُكسي محمد
ختاهن جنب الدرابزين والنيمايات المن تالا بيت خادم الله
ادنو كوز مويي وجرن بنابرن وختن سكينة في وسطن
وكل واحدي جابت عدتها التشيلبها الميز
النسوان متفقات كل واحدة جايبالا عدي في لون
اللزرق أليل آمني واللحمر أليل سكينة واللخدر أليل السُرة
واللصفر أليل خادم الله والبنوفسو (البنفسجي) أليل البتول
آمني فتحت شواويل السكر وختتن جنب سكينة
وسكينة بقت تملا الكوريي وتمسحها وتكب في كل جردل لامن وزعت السكر
ونفس الشي سوتو في صابون البدرة وقسمن صابون الحجر
- سكينة: ياخواتي خلني الننجم شويي ونشرب قهوة البتول
- خادم الله (بعد ما جغمتلها جُغُمي من القهوة): آآلرسول يا آمني مدينة
يومداك مالها سلامها كان قاطع اللهجي كدي معاكي
- السُرة: يعني ماكي عارفي مالها زعلانها
- خادم الله: يخربني وحات ولادي
- السُرة (ختتلها سفة ونفضت يدها): الخرابة ولدها ما كان داير حنان بت آمني
- آمنة: عرسها بلا يخمها
- خادم الله: ولدها محمد الطويل ابو تفي داك
- سكينة: ايي ياهو
- خادم الله: نان مالك حميتيها ليهو
- آمنة: نان يا خادم الله ارمي بتي
- خادم الله: كيفن
- آمنة: الولد ماهو شغال اعرسلو كيفن.. كمل قرايتو وقعد
- السُرة: نان يشتغل كيفن هو ينوم ويفنقس لااا نصت نهار وضُراطو يصم اللضان
- سكينة (ميتة من الضحك): نان انت سمعتي ضُراطو وين
- السُرة: انت باقيلي جنيتي الكرقي ألتي المن تالا التُكل ماها ملاصقاهم..
يوما اسمع في الطووووووووووووط طوووووووووط.. مديت راسي من فوق الحيطي
لقيتو مفنوس ومادي صلبو علي الضُل ويضرط
- البتول: الله يقلعك انت ههههههههه.. حمدت ربي ماني ملاصقاكي
- آمنة: عاد ارمي بت لي جنس الطووووووووووط دة
- خادم الله: اتاريها وكتين شافتك عيونها بقن يرمشن متل دلقان الطاحونة
وكتين الدقيق يجي نازل
- آمنة: هي كدي.. خلننا النكمل ميزنا دة ونمشي علي أهلنا
كملن وزيع الميز وجوا البُطان من المدرسة سالموهن
- سكينة: تعالوا يا الحبان كل واحد فيكم عندو عندي حلاوة حربة
- البتول وقفت علي حيلها: بعدين بدري عليكن الله دايري آخد كبتي
وامشي فسراع علي بيتي..
- السُرة: قادر الله باقيلي ماكي مشهداهو الخرابة.. بتكتليهو
- خادم الله: باقيلي تتفدع قدامو وتهزهز في المخدات الشايلاهن وراها ديل
والراجل يقعد يجوعر.. ماني شايفاهو ختالو كرسي برة من جا
- سكينة: وووووب عليكي قامن عليكي.. امشي علي بيتك ولااابعدين
- البيتول: عاد انا بقدر عليهن هههههههههههه
.....


Post: #97
Title: Re: حفرة دخان سكينة بت ود جيب الله
Author: طارق جبريل
Date: 27-08-2010, 11:22 AM
Parent: #96

اطلعيلي لاااااااافوق لامن افضالك من الفطور حق الصفوة في الرباط

Post: #98
Title: Re: حفرة دخان سكينة بت ود جيب الله
Author: Nun Osman Yousif
Date: 27-08-2010, 04:58 PM
Parent: #97

يا سلام يا طارق جبريل...ابداع لكن..انت القصة دي جايبة من حلتنا ولا شنو...النسوان ديل كلهم بعرفن :)
واصل,
نون بت سارة

Post: #99
Title: Re: حفرة دخان سكينة بت ود جيب الله
Author: طارق جبريل
Date: 04-09-2010, 01:26 PM
Parent: #98

Quote: يا سلام يا طارق جبريل...ابداع لكن..انت القصة دي جايبة من حلتنا ولا شنو...النسوان ديل كلهم بعرفن :)
واصل,
نون بت سارة

بت سارة كيفنك
يا زولة الحلال كلهن شغالين دخاخين وقطيعة

Post: #100
Title: Re: حفرة دخان سكينة بت ود جيب الله
Author: طارق جبريل
Date: 04-09-2010, 02:01 PM
Parent: #99

النسوان يا الحبان مشن علي بيوتن وفسراع فسراع غدن وليداتن ورجالن
وجن زي عادتن علي بيت سكينة وشايلات بُقجن وتياب الجارات المقطعات ديك
- آمنة: سكينة حبيبة قساي كيفنك يا بت امي الليلي جبتلكن حنان معاي
- سكينة: حباب الجعلية وحباب حنان الفنجريي
- خادم الله: باقيلي نوت علي الولادي
- سكينة: خدوم الطرقة قولي بسم الله خلي البنيي تتوهط
- السُرة: قلنالكن من زمان اقرصنها في وركها ولزمنها الواطة
- البتول: بري بري بري عاد منكن
- سكينة: حنان يا بتي خالاتك مخرفات خليهن في خرفن دة
- حنان: عارفاهن يا خالتي سكينة.. هن خرفن من هسي
- السُرة: الرسول آآآآحنان بتي مالك ماكي دايري تلدي لي هسي
- حنان: يا خالتي السُرة ماني دايري اتهجر بالبُطان من هسي
خليني استمتع بي حياتي ياخي انا وراجلي
- خادم الله: اييي شوف المطرطشة نان المتعي دي مو ياها البُطان
دحين الله ما قال القروش والبُطان سمحين
- حنان: خالتي خدوم قرآن شنو دة القاطعاهو من راسك دة
الله قال المال والبنون زينة الحياة الدنيا
- خادم الله: انا شن عرفني بيهو تراهو عمك وكتين يجي من الجامع
بسمع فيهو يقرأ في القرآن ومرات يبقالي قاعد يقول البُطان
- آمنة: هي حليل ابوي داك ان بقى دة قرآنك هههههههههه
- السرة: هي وين تعرفلكن القرآن ليلها ونهارها تاكل وتلوغد في التركين هههههه
- خادم الله: عاد فراغك .. ابوي ماهو فكي
السُرة: انتي يا البتول الليلي مالك مكوضمي.. الفي شنو
سكينة شافت في البتول وبقن يضحكن الاتنين
حنان اتقولعت وهي ماشي علي الحفرة ألت الدخان قرصتها السُرة في صُلبها
وقالتلها: كدي كدي كدي عاد ليه حق الراجل ماهو داير يجيب البُطان من هسي
اتاريهو لاقي النصايب العلي لُقمة البكا ديل يتهوززن قدامو وهو يجوعر
- حنان (دخلت تحت الشملة): غايتو ما بسألك يا خالتي السُرة.. ماك نصيحي شي
- خادم الله: انتو بنات الهرمي ديل (سكينة والبتول) ساكتات كدي باقيلي عنهن فهم
- سكينة: والله عندنا فهم علي خايفات من لسناتكن
- آمنة: الرسول في شنو يا الشايقيي
حنان قامت من الحفرة ودخلت امها آمنة ومدتلها بُرطمان الكركار
اتمسحي يا بتي الطلح دة كافر بيشقق جسمك
حنان قعدت في بنبر امها زي الله ما خلقها وقعدت تتمسح
- سكينة: هووووووووي دايري اقولكن شي الرسول لا تشيلن حال البتول
- السُرة: انت ما تقولي تولدينا
- سكينة: البتول حامل
- خادم الله: ايووووووووووووووووووووي كدي كدي.. انا عارفاها الحفري دي
غير البُطان ماها قاعدي تجيبلنا شي
النسوان بقن يغنن ويصفقن: السمحة حد الريد.. جيبيلو الوليد
السرة قامت ترقص ونصل منها توب الجارات المهلهل داك والشطور بقن يتلولحن
علي مُعلاق اللبن.. وسكينة ميتي من الضحك.. السرة مشت علي البتول وادتها الشبال
بدل تضربها بي شعرها ضربتها بالشطور.. والنسوان انفقعن ضحك
- خادم الله: باقيلي ليلكن ونهاركن كنتو تحفروا فشان كدي حملتي فسراع
- سكينة: خدوم الطرقة قمتي علي الجن.. ما قلنالك المرة من قبيل خجلاني
- السُرة: (ولعتلها سجارة برنجي) عاد البتخجلها شنو وكتين تشوبح في رجلينها
ماها عارفي الشوبيح دة قاعد يجيب البُطان..
تاني رجعن لي غناهن ورقيصن وصفقتن.. وحنان قاعدي وسطن ميتة من الضحك..
كملن دخانن وباركن لي البتول وقرصنها في أوراكها زين.. ومشن علي بيوتن

Post: #101
Title: Re: حفرة دخان سكينة بت ود جيب الله
Author: معاوية عبيد الصائم
Date: 04-09-2010, 02:25 PM
Parent: #100

المتعة حاصلة يعلم الله
يا ممسخو


يوجد لدينا طلح وشاف
بسعر الجملة

ناسف للاستغلال البوست
للاعلان

اسعار خاصة جدا للصفوة

Post: #102
Title: Re: حفرة دخان سكينة بت ود جيب الله
Author: معاوية عبيد الصائم
Date: 04-09-2010, 02:42 PM
Parent: #101

بشرى سارة

تحت الطبع !!!

كتاب حفرة دخان سكينة
وساونة ريماز التخينة ؟


تاليف مسخوط البورض

Post: #103
Title: Re: حفرة دخان سكينة بت ود جيب الله
Author: طارق جبريل
Date: 04-09-2010, 02:56 PM
Parent: #102

Quote: بشرى سارة

تحت الطبع !!!

كتاب حفرة دخان سكينة
وساونة ريماز التخينة ؟


تاليف مسخوط البورض

يا شقي الحال مالك داير تجيب لينا كفوة

اسمع حقي في دعاية الطلح يجيني طرد شاف

Post: #104
Title: Re: حفرة دخان سكينة بت ود جيب الله
Author: عرفة محمد سعيد
Date: 04-09-2010, 09:27 PM
Parent: #103

جبريلا اخوي

عساك طيب

تعرف دخلت ومرقت مع النسوّن ديل وقلت ياربي

النسوّن ديل ما عندهن اي شغلة بلا الدخان والنضمي؟
وجنياتن ديل اصلن ما قاعدات يناغموهن ولا يذاكرولن؟
و رجالن ديل ضhاني طرشة بلا رويجل البتول ساعة قالهن اتفضلو ما سمعنالو صوت !!
شكلك رابطم في ساقية في شان يجيبو حق الخدار والطلح..
خصمتك بالله اكان ما مشيت علي ديوان الرجال داك وختيتلنا كاميرتك وصوّر انشوف قاعدين يقولو في شنو؟
والنبي كان ما تشيل كاميرتك علي محل الشفع
حتقول لي العنوان عن حفرة دخان سكينة ماااا في مشكلة رجعنا ليهن تاني اصلنا قاعدين ومحكرين

Post: #105
Title: Re: حفرة دخان سكينة بت ود جيب الله
Author: طارق جبريل
Date: 05-09-2010, 10:59 AM
Parent: #104

Quote: جبريلا اخوي

عساك طيب

تعرف دخلت ومرقت مع النسوّن ديل وقلت ياربي

النسوّن ديل ما عندهن اي شغلة بلا الدخان والنضمي؟
وجنياتن ديل اصلن ما قاعدات يناغموهن ولا يذاكرولن؟
و رجالن ديل ضhاني طرشة بلا رويجل البتول ساعة قالهن اتفضلو ما سمعنالو صوت !!
شكلك رابطم في ساقية في شان يجيبو حق الخدار والطلح..
خصمتك بالله اكان ما مشيت علي ديوان الرجال داك وختيتلنا كاميرتك وصوّر انشوف قاعدين يقولو في شنو؟
والنبي كان ما تشيل كاميرتك علي محل الشفع
حتقول لي العنوان عن حفرة دخان سكينة ماااا في مشكلة رجعنا ليهن تاني اصلنا قاعدين ومحكرين


اوووووه بتنا الزيني عرفة
ياخي كيفنك وكيفن الوليدات
نعلكم طيبين
ياخي الرجال قاعدين بيظهروا رهاب رهاب كدة
والبُطان يظهروا وين مع السجن الانفرادي مع الطلح دة
تسلمي يا بتنا
وكله بنصوره ليكي بس انت اصبري

Post: #106
Title: Re: حفرة دخان سكينة بت ود جيب الله
Author: معاوية عبيد الصائم
Date: 05-09-2010, 02:44 PM
Parent: #105

مجموعة ريماز للثقافة العصرية تحتج
احتجاج منقطع النظير لدى لجنة الكتبة
الحنكايش .وذلك لاستخدام مسخوط البورض
مفردات بالية من عصر كسح زمااااااااااااان
وتطالب بنسخة( مترجمة) تواكب الوضع المفردى
والثقافى السائد
باعتبار ان صاحب الخيط بعيد كل البعد عن
وعى وفهم ريماز التخينة ؟


انا شخصيا معاوية الضعيف مضامن
مع المثوقفة ريماز التخينة

وعاش نضال جكس الساونة اب قطيعة اااامنة

كاتب حجرى بعيد عن السائد الموضوعى
الزمانى و المفردى؟؟؟؟؟

Post: #107
Title: Re: حفرة دخان سكينة بت ود جيب الله
Author: طارق جبريل
Date: 05-09-2010, 10:21 PM
Parent: #106

Quote: مجموعة ريماز للثقافة العصرية تحتج
احتجاج منقطع النظير لدى لجنة الكتبة
الحنكايش .وذلك لاستخدام مسخوط البورض
مفردات بالية من عصر كسح زمااااااااااااان
وتطالب بنسخة( مترجمة) تواكب الوضع المفردى
والثقافى السائد
باعتبار ان صاحب الخيط بعيد كل البعد عن
وعى وفهم ريماز التخينة ؟


انا شخصيا معاوية الضعيف مضامن
مع المثوقفة ريماز التخينة

وعاش نضال جكس الساونة اب قطيعة اااامنة

كاتب حجرى بعيد عن السائد الموضوعى
الزمانى و المفردى؟؟؟؟؟

اها يا حنكوش جدة

Post: #108
Title: Re: حفرة دخان سكينة بت ود جيب الله
Author: طارق جبريل
Date: 10-09-2010, 00:40 AM
Parent: #101

(13)
النسوان قبل ما يمشن البتول قالتلهن باكر مسوين كرامة ابو الوليدات
وهو قال بيكلم الرجال في صلاة المغرب في الجامع
- البتول: اوعكن واحدي فيكن ما تجي
- خادم الله: ما دام عازمين الرجال البقعدنا شنو في بيوتنا هههههههههه
- البتول: دة كلامك ابو محمد هسي بيكون كلمهم في الجامع
- سكينة: الرسول آآآلسُرة باكر تجيبي الودع اليلك
- السُرة: سمح جيبن بياضكن بس
- البتول: سكينة الرسول تجيني بدري.. مافي زول بيقدر علي الخرفان ديل غيرك
- سكينة: بس تشرق بجيكي
مشن علي بيوتنا.. عشن وليداتن وكل واحدي مشت علي عنقريبها..
اصبحت الدنيي سكينة سوت الشاي لي وليداتها وابوهم وجري مشت علي بيت البتول
لقت الخرفان يكسروا فيهن والضباح يسلخ في خروف معلق في الباب
سلمت ودخلت لقت البتول تقطع في البصل ومعاها اختها جات من ام درمان بي وليداتها
قالدتها وقعدت في البنبر الكبير وختت طشاشة اللحم وقعدت تنضف في التوم
والبتول جابتلها براطمين البهارات ختتن في طربيزة صغيري جنبها
وجابتلها المقصوصة والكانون الكبير وختت فيهو صاج الشية
سكينة ختت اللحمة في الضاج وكبت فيهو البهارات وغتتو بالصينية
وفي الكانون الصغير جابت صاجد الشية الصغير وقطعت فيهو الكبدة والقلب وكلاوي الخرفان
والبتول تبلت شية الجمر وجابت الشواية والكانون جنب اختها فشان تبدأ تشوي
- سكينة: شية الجمر دي خليها شوية لامن نكون خلاص دايرين نودي الاكل للرجال
- البتول: سمح.. خليني اخلط الجوافة دي عشان الرجال وكتين يجوا يقابلهم بيها ابو محمد
- سكينة: ضيوفكم كتار يا دي
- البتول: بري بس راجل اختي واخوان ابو محمد الاتنين ورجالكن
- سكينة: نان الخرفان ديل كلهن لي شنو
- البتول: بري يا سكينة اخير الشي يزيد وما ينقص
- سكينة: ما شاء الله خيركم كتير
- البتول: الحمد لي الله
شويتين جن آمنة وخادم الله والسُرة وصوت الرجال في النسوان يقرقروا
الفطور جهز.. السُرة قطعت العيش ورصتوا فوق الكسرة في الصواني
وآمنة ملحت ام رقيقة وخادم الله غرفت اللحمة وصحانة الشية بقت تتطاقش
البتول جابت الطُباقة من المخزن وغتت الصينية ودقت شباك الصالون من تالا
المطبخ.. ابو محمد مدة راسو: خلاص جاهزين
-البتول: جاْهز ابوي
- السُرة لكزت سكينة: شفتي بت الغلفا دي تكسر في حسها كيفن
- سكينة هههههههه (مسحت دموعها من الضحك): الله يقلعك يا خرابة
ابو محمد واخوانه جوا شالوا صواني الفطور وصبارة الموية
فطروا الرجال وشربوا شايهم وفرشوا الطربيزة بي ملاية
ومرقوا كوشتينتهم وابو محمد شغال يكاوي في حاج احمد:
والله الليلة اجرك ستين خمسن يا حاج احمد
- حاج احمد: كدي وزع النشوف رجالتك

النسوان قامن يفطرن.. وينضاحكن شربن شاين
ومشن علي البرندة اللاااجوة والسُرة طلعت الودع وفرجخت في الواطة
- السُرة: يلا يا بنات امي ارمن بياضكن
سكينة رمتلها طرادة وخادم الله ريال والبتول ختتلها خمسين قرش
السرة كشحت الودع واحدي منه طارت علي البتول
السكينة سكتت وجرتلها ودعاية جنب التانية وقالت للبتول:
البتول اختي جاييك سفر بس ماني عارفاهو لي وين
- البتول: ان شاء الله يكون لي بارا اشتقت اتمردغ في رملة بيتنا
- سكينة: لا يبقى الراجل داير يسوقك معاهو
- البتول: تراهو من جاء ينقنق قال ما بيقعد تاني براهو
- خادم الله: النصيحي لي الله راجلك لليلي صغير وانت ذاتك صغيري
كيفن قدر يصبر علي فراقك وفراق وليداتو
- البتول: يا خادم الله ماني دايري السفر يعلم الله.. خايفي من
القفلة ألت اختي حسنة في السعودية.. كلما تضرب تليفون تشكي وتبكي
- آمنة: ان بقى راجلك صمم ما عندك حل ياكي المسافري
كملن النسوان رمي الودع وتفسيرات السُرة وتاني جابنلهن شاي
البتول جابت المسجل وشغلت شريط لي عبد القادر سالم
الجابني للبرضا.. العمري ما بنسا
قامت البتول واختها يرقصن في المردوم وباقي النسوان يصفقن
سكينة: يا السرة شوفي الخرابة دي ترهرج في صُلبها كيفن
النصيبة تقول ماهو ملصوق فيها.. يترهرج علي الجلي وكتين يكونوا شايلنوا في الصحن
- خادم الله: بت الغلفا قايلي الراجل داير يخلي الصُلب دا وراهو يمشي
يمين ان بقى خلا الخرابة دة ورجع لي غربتو هاكي (مدت اصبعها الوسطاني لي البتول)
- سكينة ميتة من الضحك: وحات ربي ماها نصيحي المرة.. شوفي الشطور تلولح فيهن
كيفن علي كورة الشراب وكتين يعلقوها الشُفع في النيمايي
البتول تضحك وترقص من اول البرندة لي آخرها والنسوان يصفقن
تمن رقيصن وقامن علي العدي غسلنها ورصنها تاني في المطبخ ورجعن
الطُباقة والكوانين والكُومش للمخزن..
ان شاء الله عامرين يا ناس
يا اخوانا ما بدري
لا لا لا ياخي نمشي نشوف بيوتنا كمان
ومشن علي بيوتن
....

Post: #109
Title: Re: حفرة دخان سكينة بت ود جيب الله
Author: خالد المحرب
Date: 10-09-2010, 00:58 AM
Parent: #108

Quote: اسمع حقي في دعاية الطلح يجيني طرد شاف



وحقى فى رفع البوست يجينى فى باقة قنديلى
ياخ كل سنه وانت طيب ياجميل

Post: #112
Title: Re: حفرة دخان سكينة بت ود جيب الله
Author: طارق جبريل
Date: 16-09-2010, 10:45 PM
Parent: #109

Quote: وحقى فى رفع البوست يجينى فى باقة قنديلى
ياخ كل سنه وانت طيب ياجميل

ود المحرب يا حبيبنا كيفنك ابوي

Post: #110
Title: Re: حفرة دخان سكينة بت ود جيب الله
Author: منتصر الامين
Date: 10-09-2010, 01:28 AM
Parent: #108

غايتو يا طارق جبريل
يوم بتقطع مصران زول بالضحك


متابعين بس ما تفكنا فى نص الطريق
خلينا نشوف اخر حفرة دخان سكينه دى







وكل عام وانت بالف خير

Post: #111
Title: Re: حفرة دخان سكينة بت ود جيب الله
Author: محمد أبوالعزائم أبوالريش
Date: 11-09-2010, 11:34 AM
Parent: #110


دكتور طارق ......... العيد يتبارك عليك.

ياخوي هلاّ هلاّ على الجد .... رمضان إنتهى .... وفضينا لي حفرة الخرابة سكيني دي. ما تقوم تقطعنا في النص.

أصلنا بقينا خايفين من مصير عوض الطّلبة لي هسي ما عرفنا خبرو شنو.

Post: #114
Title: Re: حفرة دخان سكينة بت ود جيب الله
Author: طارق جبريل
Date: 16-09-2010, 10:48 PM
Parent: #111

Quote: دكتور طارق ......... العيد يتبارك عليك.

ياخوي هلاّ هلاّ على الجد .... رمضان إنتهى .... وفضينا لي حفرة الخرابة سكيني دي. ما تقوم تقطعنا في النص.

أصلنا بقينا خايفين من مصير عوض الطّلبة لي هسي ما عرفنا خبرو شنو.

نان انا وكتين كنت صايم واكتب في النصيبي دي
باقيلك اقضيهن الايام ديل مع الستوت

Post: #113
Title: Re: حفرة دخان سكينة بت ود جيب الله
Author: طارق جبريل
Date: 16-09-2010, 10:46 PM
Parent: #110

Quote: غايتو يا طارق جبريل
يوم بتقطع مصران زول بالضحك


متابعين بس ما تفكنا فى نص الطريق
خلينا نشوف اخر حفرة دخان سكينه دى

منتصر يا حبيبنا
يا زول ان بقيت باري النسوان ديل بتضيع

Post: #115
Title: Re: حفرة دخان سكينة بت ود جيب الله
Author: طارق جبريل
Date: 18-09-2010, 02:41 PM
Parent: #113

(14)
الحبيبين كيفنكم


كو كو كو
- سكينة: منو الفي الباب
- خادم الله: البو اليشقك.. افتحي الباب انا قاشر الله
- سكينة: قاشر الله مالك.. متين اصبحت هي
- خادم الله: اريتو خبر السواااااااااااد يا بت امي
- سكينة: وقعتي قلبي مالك يا خرابة
- خادم الله: آمنة ابوها مات والخبر جاها هسي دة
- سكينة: لا حولة ولا قوة الا بالله...وووووب عليها عاد
انتظريني النلفح توبي واجيكي
- خادم الله: اسرعي نغشى البتول معانا
- سكينة: السرة كلمتوها
- خادم الله: اييي كلمتها وقالتلي السفر لي سقادي محمدنا ههههههههه
- سكينة: هي الخرابة دي حتى في البكا تسوط...
عاد ما بيبقى لازم نسافر معاها ياها اختنا
- خادم الله: كدي النغشى البتول ونتفاهم في الطريق
اتلمن النسوان ومشن علي بيت آمنة ولقن الدنيي مقلوبة
وآمنة من شافتن بقت تنطط لااااافوق لابسالا فردي بيضاء
ونصها محزم: حييي وووووب حيييي وووووووب حييي وووووب حيييي وووووووب
حييي وووووب حيييي وووووووب حييي وووووب حيييي وووووووب
اتقالدن النسوان الخمسة يبكن ويتنخجن والنسوان يقوللنهن:استغفروا استغفروا
جاء اخو آمنة وقالهن اجرنا بص بيجي بعد ساعة ونص
اتلمنا السرة وخادم الله والبتول وسكينة وشوشن لي بعضن وكل ويحيدي فيهن
جابت اختها تقعد مع بُطانها في البيت..
ومشن علي بيوتن كل واحدي جابتلها شي.. الجات شايلالا سكر في جرادل
والجابتلها قُفاف ألات دقيق والجابتلها جرادل ألات فول والجابت الويكي
وكل واحدي جابتلها غيار وجابولم شنطي صغويري من البتول ختن فيها
هدماتن وشالن قروشن ختنها عند سكينة وركبن البص مع اهل آمنة
البص ماشي والنسوان يبكن: الليلة وووووب يا صمدنا
وووب علي الما حضرتك يا ابوي.. ووووووب يا علي يا حشاي
هن في الحالي دي لامن وصلن المحمية وعدن بالبنطون علي سقادي
ولقن الدنيي تعوج وتموج.. وآمني نطت من البنطون في الواطة
وبقت تدردق وجن اخواتها شالنها من الواطة غمراني ضُمة ضُمة
النسوان باكن النسوان وطوالي دخلن علي المطبخ ونزلن الفول والدقيق والويكي
والبصل والسكر .. وطوالي اتحزمن في المطبخ قطعن البصل وجابن الشرموط
لي سكينة وبقن يسون في الملحات والسُرة وخادم الله يعوسن في الكسري والفطير
والبتول تملح وترص في الصواني وتنادي للولاد فشان يشيلو الاكل
وقفن لامن غدن الناس كلهم وطوالي شدن الفول فشان العشاء
وجن قعدن جنب آمني في البرش جنب النسوان.. كلما تجي واحدي تبكي
مع آمني يقومن يبكن معاها.. ويستغفرن
-خادم الله: انت دي منو البتتباكا من غير دموع دي وتلكز في راس آمني دي
- سكينة: نان شن عرفني بيها
- خادم الله: شوفيها تلكز في راس آمني كيفن وتقشقش في نخرينها وهن ما فيهن شي
- السرة: باقيلي فشان تشوفها.. باقي الجعليات ما تجيها في العرس لكن ان ما جيتيها
في البكاء عاد الله قال بي قولك
ونسوان من سقادي يقطعن: انت يا دي ديل منن الجنب آمني ديل
- ديل جاراتها قالوا في الخرطوم
- عاد اريتن جارات السرور.. بالله وقفن في المطبخ لامن غدن الناس
- اييي يا بت امي حتى الدقيق والسكر والشرموط جايباتنو معاهن من هناك
- قادر الله عاد دي الجيرة ولا بلاش
السُرة: في اضان خادم الله: انت دي شنو دي الراسمي الحني في قعر رجلها دي
- خادم الله: شن عرفني الخرابة باقيلي جايي عرس
- البتول: يبقى عروس يا جماعة لا تشيلو حالها
- سكينة:اييي عروس شنو الخرابة كانت شايلالا شافع في صفحتها
- السُرة: بري منهن عاد نسوان الزمن دة.. شوفيها راسمالا عقرب في قعر رجلها
- خادم الله: العقرب التلدغها..
- سكينة: هههههههههه مالك عليها
النسوان وكتين مغربت الدنيي سون شاي المغرب ودخلن يطعمن في الفول
ويرمن في الطعميي.. وبعد صلاة العشاء سون العشاء للناس
وبقن صاحيات لامن غسلن العدة.. ومع صلاة الصبح قامن سون الشاي
وجاء اخو آمني وقالهن يا جماعة شكرا ونجيكم في الخير ان شاء الله
البص بيرجع هسي .. بارك الله فيكن
- آمنة: قومن يا بنات امي تمشن علي بيوتكن وولادكن.. الله يعدلها عليكن
قالدنها وبكن زيييييييييييين ومشن علي البنطون وعدن علي المحمية
وركبن البص مع اهل آمني الراجعين الخرطوم.. ووصلن لي بيوتن..
...

Post: #116
Title: Re: حفرة دخان سكينة بت ود جيب الله
Author: الزبير صالح الزبير
Date: 18-09-2010, 03:40 PM
Parent: #115

ود جبريل كيفنك
يا زول انت انتهيت من طلب المونة ديلاك ولا لسة معلقين في السقايل باقي انا طولت ما دخلت المنبر(لظروف كدة )
فلو انتهيت منها رسل لي الرابط علي الخاص

Post: #117
Title: Re: حفرة دخان سكينة بت ود جيب الله
Author: طارق جبريل
Date: 19-09-2010, 10:59 AM
Parent: #116

Quote: ود جبريل كيفنك
يا زول انت انتهيت من طلب المونة ديلاك ولا لسة معلقين في السقايل باقي انا طولت ما دخلت المنبر(لظروف كدة )
فلو انتهيت منها رسل لي الرابط علي الخاص


الزبير كيفنك ابوي
كل سنة وانت طيب
غلبني اتمها وحاتك
باقيلك اسوي شنو

Post: #118
Title: Re: حفرة دخان سكينة بت ود جيب الله
Author: طارق جبريل
Date: 20-09-2010, 10:47 PM
Parent: #117

اطلعيلي فوق لامن اجيكي

Post: #119
Title: Re: حفرة دخان سكينة بت ود جيب الله
Author: خالد المحرب
Date: 20-09-2010, 11:07 PM
Parent: #118

Quote: كو كو كو
- سكينة: منو الفي الباب
- خادم الله: البو اليشقك.. افتحي الباب انا قاشر الله
- سكينة: قاشر الله مالك.. متين اصبحت هي



ود جبرين السلام عليكم
انا زى قشر الله دى جات من صباح الرحمن سكينه لسع متغتيه
بى فنايل السقط هى الجابا بدرى شنو بى الصح كان مى نايمى
زهجانى

Post: #120
Title: Re: حفرة دخان سكينة بت ود جيب الله
Author: منتصر الامين
Date: 23-09-2010, 07:18 AM
Parent: #119

Quote: اطلعيلي فوق لامن اجيكي


أطلعى لا فوق لامن طارق يجيكى

Post: #122
Title: Re: حفرة دخان سكينة بت ود جيب الله
Author: طارق جبريل
Date: 26-09-2010, 12:11 PM
Parent: #120

Quote: أطلعى لا فوق لامن طارق يجيكى



منتصر كيفنك ابوي
الليلة حا انزلك حلقة

Post: #121
Title: Re: حفرة دخان سكينة بت ود جيب الله
Author: طارق جبريل
Date: 26-09-2010, 12:10 PM
Parent: #119

Quote: ود جبرين السلام عليكم
انا زى قشر الله دى جات من صباح الرحمن سكينه لسع متغتيه
بى فنايل السقط هى الجابا بدرى شنو بى الصح كان مى نايمى
زهجانى


يا شيخ المحرب
خادم اله مرتا سنيحي يعلم الله

Post: #123
Title: Re: حفرة دخان سكينة بت ود جيب الله
Author: طارق جبريل
Date: 26-09-2010, 02:07 PM
Parent: #121

(15)
الحريم وصلن مملخات من نقيز البص من المحمية لي الخرطوم
اتلمن في ركن بيت خادم الله يتونسن
- السُرة: يا الله لي... مخروقتي دايري تنقصة ضُمة ضُمة
- خادم الله: نان الهركي الهركناهو عند الجعليات ديل قالولك هين
- سكينة: يا اخوانا الله يرحمه... الابو حار عاد
- البتول: استغفر الله... حمدلالكن بالسلامي... اها الحفرة بتبدنها متين
- خادم الله: الخرابي ضايقي.. قبل الراجل ما يسافر... دايري تعافري ما كفاكي كرشك مليتيها شافع
- البتول: ووووب وووب علي عاد انا من لسانك
- السُرة: ياخي انتو ما تسووهوا باكر الصباح ... خلونا ناخدلنا كبي كبتين قبل تجي آمني ونبقى في الحِد
- خادم الله: اها شوف المكركبي دي كمان... انت فوق شنو كمان.. لا يبقى لليلي تصوطي
- السُرة: يا قشور مخروقتي تاعباني... لكن تعالي هني.. مالي آآآبصوط
- خادم الله: ههههههههههه النصيحي لي الله انت ما فضلك صواطة... كفاكي
- السُرة: نان الصواطي قالولك حرام... وحات الله انا عرسوني صغوووويري باقيلي 16 سنة ما كملتهن
وحات الله الجعلي أليلي دة الخميس الفات مسكت الخرابة اللحمر داك (احمر شفايف) ادتني ليه النصيبي دي (البتول)
وجلبطتة شلاليفي ولبستلي شيتا مهلهل كدي بس صلى عشاه ومشى علي الحوض تفة السفة واتمضمض
يمين يعافر الليل كله وشابكني: انا اخوك يا السُرة... الما عرسك اصلو ما عرس
- سكينة: نان هو بقى فيه حيل علي النصايب دي
- البتول: الخرابة بتجيب اجله... ههههههههه
- السُرة: ايي اجل شنو.. باقيلي الشي قاعد يطول العمر.. وكتين يتملو سبوعين مني وحات ربي ... يبقى مهضلم علي الجرجير الليهو يومين في ضهر الطبق
- خادم الله: هههههههه عاد انت ما بتتقدري.. باقيلي تفندريلو في الشطيرات وتتلولحي
- البتول: ههههههههههههه بري بري منكن انتن عاد
- السُرة: نان شطور الجن ديل من عرسوني الولح فيهن علي المنقايات الدااابن صَفَرَن
- سكينة: باقيلي الجعلي مصرنن لَحَقِن البزديق*
- السُرة: تراهن كان يتمصرَرِنن ويتنفخن بي رضيع الشفع ... نحمد الله غايتو
- البتول: هوووي النمشي نشوف وليداتي وابوهن
- سكينة: خلاص باكر افطرن بدري وتجي تلقني ولعت الدخان... البتول ما تنس القهوة
- البتول: ما بنساها... في امان الله

اصبحت الدنيي النسوان فطرن رجالن وولادن وجن اتلمن في بيت سكينة
السُرة: الرسول خلني الندخن في اللول باقي مخروقتي دي واجعاني
سكينة: تعالي يا الحبيبة ادخلي.. الطلح مولع
السُرة اتقولعت ومشت علي الحفرة والبتول وخادم الله يضحكن فيها
خادم الله: شوفي الرجلين مكلوجات كيفن علي مفرمة الخُدرة
البتول: هههههههههه الله يقلعك يا خرابة بتكتليها
- السرة (من تحت الشملة): كيفن آآبيتكلوجن عاد هن... يا متشوبحات للراجل
يا متشوبحات للولادي.. وان بقن نزلن اللرض تلقاهن حايمات من طاحونة لي بتاع خضار لي سجم
ما كتر خيرن الشايلاتني لي هسي... من قالولي تاتي انا حايمابن ههههههههههه
- خادم الله: نان الشوبيح داير يكلوجن عاد
- السرة: عاد الشوبيح ما كلو فيهن... والعجب الجعلي وكتين تجيهو الحالة... يمين يتهوزز علي شُحنة الأنباز في راس اللوري المعديلو خور
باقيلكن زي جنس دة آآبيكعوجن
- البتول: هههههههههههههههههه يمين ماكي نصيحي شي
- السُرة: انا خليني انت النصيبة أليلك داك يمين مصيتيهو مص... الراجل كلو ما ليهو زايد ممصرن
الرسول الشُع قاعدين تسولوم شنو..
- البتول: جايبلو معاهن دواء كدة قال أليل قحة وكتين اشوفه اداهم ليهم بعرف الهركي داير يبدا.. بالله الشُع يدروخوا وينوموا بعد ربع ساعة
- سكينة: الله قادر.. لا يبقى قاعد يسقيهم عرقي ههههههههههههه
- خادم الله: ههههههههههه وحات ربي بقيتن تمحنن
- سكينة: ايامي اليا دوب ولدت ابراهيم... كان بكاي خلاص بالليل... يقوم ابوهو من وراي يختلو شوية عرقي في البزازة
طوالي يرضعها وينوم للصباح
- السُرة: ههههههههه عفيتو منه... باقي الراجل وكتين يجوعر في النصايب دي آآبيبقالو شيتا قدامه
- خادم الله: انت سمعتن بي خبر منى بت محاسن الفي شارع دكان ابراهيم العربي
- سكينة: بري بري يخربنا مالها
- خادم الله: عاد يا الفنجريات ابدالكن من وين
......
ـــــــــــــــ
* البزديق: القماش البيمسحوا بيهو الصاج

Post: #124
Title: Re: حفرة دخان سكينة بت ود جيب الله
Author: omer osman
Date: 26-09-2010, 02:23 PM
Parent: #123

Quote: الزبير كيفنك ابوي
كل سنة وانت طيب
غلبني اتمها وحاتك
باقيلك اسوي شنو



بالجد ياطارق لازم تاخد الموضوع بجدية اكتر ، يعني ما تبقي كتابة للترويح ساكت في سودانيز او غيرها .......

الموضوع داير تركيز وعزيمة وستصبح قريب ده كاتب سوداني يشار له بالبنان ......

Post: #125
Title: Re: حفرة دخان سكينة بت ود جيب الله
Author: طارق جبريل
Date: 26-09-2010, 05:02 PM
Parent: #124

Quote: بالجد ياطارق لازم تاخد الموضوع بجدية اكتر ، يعني ما تبقي كتابة للترويح ساكت في سودانيز او غيرها .......

الموضوع داير تركيز وعزيمة وستصبح قريب ده كاتب سوداني يشار له بالبنان ......

يا جنابو انت بي صحك
يا حبيب الله يجبر بي خاطرك ياخي
الشي هني كله تخاريف حبوبات

Post: #126
Title: Re: حفرة دخان سكينة بت ود جيب الله
Author: طارق جبريل
Date: 27-09-2010, 10:48 AM
Parent: #125

جاييك

Post: #127
Title: Re: حفرة دخان سكينة بت ود جيب الله
Author: معاوية عبيد الصائم
Date: 30-09-2010, 07:25 PM
Parent: #126

وياجانبو مافى بنان من غير دخان


مورد الطلح الوطنى

Post: #128
Title: Re: حفرة دخان سكينة بت ود جيب الله
Author: طارق جبريل
Date: 01-10-2010, 06:08 PM
Parent: #127

(16)
السُرة: الرسول آآآخادم الله منى بت محاسن مالها
- سكينة: عاد انت ماكي عندك تارا بايت وقديم معاها
- السُرة: يا زولة وين اطيرها الخرابة نقناقي وجنها شكل
- خادم الله: نان هو شيتا بيتقال... وحات ربي شيتا شين خلاص
- البتول: الخرابة شن سوت
- سكينة: دحين هي ماها كانت مخطوبي لي عمر ود بت المنى
- خادم الله: اييي... ما ياها دي النصيبي ذاتها
- سكينة: كيفن
- خادم الله: الخطوبي باقيلي طولت ومحاسن قالت دايري تفسخها وما بتخلي بتها مربوطة في حُبالا دايبي
- السُرة: اييي طولت مخطوبة.. باقيلي تمتلها اربعة سنين
- خادم الله: اييي... اها محاسن بقت تلمح لي بت المنى وتقولها: انت الجنيات ديل دايرين نعرسلهم متين
وبت المنى المسكيني تسكت وتمشي تخليها.. ولدها شغال في الحيكومة بي ماهيتا كعبي شديد
لاهو قادر يلملو قروش ألات عرس ولاهو قادر يخلي البنيي باقي قاعد يريدها من زماااان
- البتول: الله يقلع الريدي دي... جايبالنا النصايب
- السُرة: عاد مرات بتكون سمحي وكتين يتعرسوا الناس
- خادم الله: اها محاسن كل يوم بقت تنقنق في الولد وكتين يجيهم وان بقت شافت امه
في الدكان ولا عند الجزار ولا في اي بُكان ترميلا وتطاعن فيها بالكلام
وبت المنى تسكت تقطع في حناضل القيزان دي في حشاها
- السُرة: ايي اماني ماها فقُر وطاعاني
- سكينة: باقيلي شافتلها شوفتا تاني
خادم الله: ايي ام الحسن بت فضولي قالتي ود اختها قال داير البت
- البتول: اها شن سوت
- خادم الله: البت وكتين الحجي كترت عليها بقت تقابل الولد من لااابرة لااابرة
- السُرة: بت الغلفا.. اها
- خادم الله: قوم الولد ماهو قاعد براهو مع امه واخوانه في السعوديي..
قوم يا شقي الحال جيب البت عندك في البيت.. وكتين امه تكون نايمي
- السُرة: اصلها نومها ماهو تقيل... تقع دُرابايي... اها
- خادم الله: اها البنيي رايداهو.. كل يومين تلاتي تمشي عنده
- سكينة: لا تقوليلي هبشها عاد
- خادم الله: اي هبشها شنو... البت حملت ضُمة ضُمة
- السُرة: قبُلها بت كويريس... اني آمنت بالله...(بلت اصبعها وهبشت الواطة ونفضتو)
- البتول: وووووب علي ووووب علي
- سكينة: دة كلام شنو دة آآآخادم الله
- خادم الله: وحات النبي زي ما بقولكن كدي..
- السُرة: اها شن سوت الفقُر دي
- خادم الله: البنيي مسكيني ماها عارفة انها حامل.. يوم داخَتلهن في البيت
ودوها الدكتور.. قالهن حاملي... محاسن واختها بقن يزغرتن فشان مافي زولا يشك فيهن
- البتول: هي سووووووووووووود علي..
- خادم الله: شالن البت مشن البيت وبقن يضربن فيها لامن قرت وقالتلهن عمر غشاها
وقالها عشان نعرس لازم نسويلنا فضيحي
- سكينة: لا حولة ولا قوة الا بالله
- السرة: اها التخم وتصُر عاد
خادم الله: تراهن بلعن كرامتن ومشن علي بت المني وقالن يشوفن يسون شنو مع ولدها
- سكينة: القصي ماها دايرالا سوا.. الولد يعقد علي البت قُبال كرشها ما تكبر ويبقن في الفضائح
- خادم الله: تراهن قالن دايرات يعقدولم في الجامع يوم الجمعة ويسوِلَهِن غداء للناس والولد يسوق البت ويمشي
- السُرة: نان البت وكتين تلد دايرات يقولن دة ولد سبعة شهور
- البتول: بري بري بري منك انت عاد
- خادم الله: عاد يسون شنو في الفضيحي دي
-سكينة: الله يسترنا ويستر وليداتنا عاد
- خادم الله: آمين يا ربي
- البتول: يا اخوانا دايري امشي... الغداء قرب وابونا بيحب يتغدى بدري
- السُرة: باقيلي دايري تقلبيلك واحد قبُل تلَيِلْ... اماني ماك فاجري
- خادم الله: انت يا السرة بي صِحِك هههههه... نان الراجل تمشيلو كدي مدخنة
ومدلكة وجسمها يراري وريحة الخومري طاقي... وحات ربي علي ينهق عدييييييييل
- سكينة: ووووب عليكي قامن عليكي... انا ذاتي ياني الليلي شايلي الليل قصبة
- السُرة: كدي... كدي... دة الحالة مطهرات.. نان ان بقيتن غولوف يمين كان كواريكن يجيب الطاشي في الخلا
- البتول: ووووووووووب علي ووووب علي... هي ودعتكن الله... ام لسان دي قامت لي طروقيتها
في امان الله... في امان الله
......

Post: #129
Title: Re: حفرة دخان سكينة بت ود جيب الله
Author: طارق جبريل
Date: 01-10-2010, 06:09 PM
Parent: #127

Quote: مورد الطلح الوطنى


واله انت وود شيقوق سولكم دكان طلح
يمين علي تغنو في فرد سنة

Post: #130
Title: Re: حفرة دخان سكينة بت ود جيب الله
Author: محمد أبوالعزائم أبوالريش
Date: 01-10-2010, 08:14 PM
Parent: #129


يا ربي بنلحق نهاية الفاجرات ديل قبال الضحية؟

Post: #131
Title: Re: حفرة دخان سكينة بت ود جيب الله
Author: طارق جبريل
Date: 01-10-2010, 11:01 PM
Parent: #130

Quote: يا ربي بنلحق نهاية الفاجرات ديل قبال الضحية؟

والله حسب ((الكبات)) ألات الطلح

Post: #132
Title: Re: حفرة دخان سكينة بت ود جيب الله
Author: طارق جبريل
Date: 11-10-2010, 01:45 PM
Parent: #131


(17)

زي عادتن كل يوم النسوان اتلمن في دكان الخضار..
البتول جات متأخري شويي وعلي مهلتها..
اشترن خضارن .. خادم الله مخروقتها وجاعاها مشت علي ضُل الحيطة ختت قفتها قدامها
وطلعت حُقتها ألت الصعوط ورمتلها سفة في خشمها: هوي انا مخروقتي دي واجعاني دحين بقعد هني لامن تشترن خضاركن
البتول: عليك الله يا سكينة اوزنيلي معاكي طماطم وخضرة وجرجير وعجورايات امشي اجيب اللحم واجي
سكينة: سمح يا بت امي
السرة: ماكي شايفي البتول دي وشها ماهو ياهو
سكينة: ايي من قبيل اعاينلها
السرة: كدي اسأليها وانت ماشات لي بيوتكن انت بتقولك ان بقى في مصيبة واقعالا
سكينة: لا يبقى الحِمل تاعبها
السُرة: نان دي أول مرة تحمل
اشترن خضاراتن وجن ماشات علي بيوتن غشن الدكان شالن العيش
ودعناكن الله .. ودعناكن الله .. لي بعدين
سكينة والبتول ساكنات جنب بعض.. وهن ماشاتسكينة سألت البتول:
وشك دة ماله يا البتول اختي.. الليلي ماكي عاج ب ان ي كله كله.. لا يبقى داسي مننا شي
وقفن جنب النيمايي الفي باب ناس سكينة
البتول: قلبي مقبوض يا بت امي
سكينة: بسم الله مالك.. الفي شنو
البتول: الراجل ماهو دايرني اقعد هني براي .. وقال فتر من القعاد براهو بهناك
سكينة النصيحة لي الله... انت المقعدك هني شنو
- البتول: امبارح بالليل راقد في السرير جوا الولد والبت رقدولوا في صدره وقعد يحكيلم
لمن كان في النهود وكيفن كان بيطلعوا يصطادوا في حمام الوادي والغزلان
والجنيات يضحكوا وهو مبسوط.. لامن ناموا.. جيت اشيلهم قالي: عليك الله خليهم عندي
حسيتبو مهموم لامن جات حداشر بالليل حتى شالهم وداهم لي سرايرهم..
جيت رقدتة جنبو .. قالي : يا البتول لااامتين ابقى انا في بُكان وانتو في بُكان
انا فِتِر يا البتول.. ساكنلي مع اولاد من بارا كل واحد فيهم يجي يدخل اوضته
وتلقي الدموع مرقرقي فوقه وكتين يتذكر وليداته..
سكينة: اها شن قلتيليو
البتول ما قلت شي.. قالي جاء سكن معاهم واحد من حلال الجزيرة
ليله ونهاره يبكي فراق ولده.. يوم ضربولوا قالولم بس تجي فسراع
كان مخلي اخوه الصغير يبيت معاهم في الحوش.. البيت لصق البيت
قوم المرة المطرطشة غلبها الصبر وبقت تنوم مع اخو راجلها لامن حِملت..
سكينة: وووووب علي ووب علي.. دة كلام شنو يا البتول
البتول: قالي المسكين مشى مهموم لقى المرة شردت بالولد واخوه طفش
لاهو قادر يقدم بلاغ فيهم ولاهو قادر يصبر علي ولده كمان.. جاء ستة شهور ورجع تاني
جات المرة بالليل ختت الولاد الاتنين جنب البيت وشردت.. الولد الكبير والشافع يا داب ولدته ليه شهر
اعمامه شالوا الشافع الجديد ودوهو الملجأ ومسكه ولده عندهم.. نزل عقد علي بت خاله وجابها هي وولده معاهو
حلف طلاق ما تنزل الا معاهو... كان داير يجن في درب ولده لامن الله جابو ليهو..
سكينة: اريتها سوات السواد دي نان عاد
البتول: قالي يا البتول انا ماني شاكي فيكي.. بس آآبقدر اعيش بعيد من وليداتي
شوفيلك حل.. اقامتكم جاهزي هناك.. بس اصل ارسلكم تجوا..
سكينة: اقولك شي.. الولد الكبير يأجز مدرسته تشيلي ولادك وتمشي علي راجلك
البتول: نان يا حبيبة قساي الغربة دي من زمان ماباها..
سكينة: ما عندك حل عاد.. وكتين الراجل هناك عايش كويس.. خلي الولاد يعيشوا في خير ابوهم
وكتين يكبروا آآبتقدري عليهم.. دحين خليكي عاقلي.. اصلو الولد فاضلو شهرين ويخلص مدرسة
لا تخلي الراجل براهو وبعيد من وليداتي..
البتول: باقيلي اتوكل اقوم..
سكينة: يا حبيتي قومي لي راجلك.. انت البلد الفقُر دي شن طعمها.. ان كان لي حُفرة الجن دي
بنرسلك الطلح كل شهر..ههههههههه
البتول: نان يا بت امي خوتكم دي دايري ألقاها وين..
سكينة: انت اصلك دايري تموتي.. وكتين يأجزوا ولادك تعاليلنا.. تلقينا قاعدين في البلد الفقُر دي..
البتول: الله يعدل الخطوة.. لكن هو كله كله مابي قعادي الهني دة
سكينة: نان عاد داير يخلي الحلا دي كلها ويمشي كيفن.. انت من جاء الراجل تراري علي العدة الفي الفضية
البتول: الله يقلعك
سكينة: وحات ربي سويتيلك صَلَبن غُلااااااااد وشطور الجن ديل بقن مفنترات ليلن ونهارن.. باقيلك داير يخلي النصايب دي وراهو
البتول: بري بري بري منك انت عاد
سكينة: يوم جاتني صحية بالليل مشيت علي الزير المن تالاكم في نصايص الليل.. سمعتك توجوجي وهو يجوعر.. قلت في نفسي بت الغلفا
ماها محرومي ليها سنة عاد... اتاريها تجي تدخن وتدلك وتمشي علي الهركي......
البتول: هههههه يوم صوته بقى غُلاد غُلاد كدي قلتلو بتفضحنا مع الجيران.. قالي في زول فيهم دافع مهرك معاي...ههههههه
سكينة: عفيت منه... باقيلي من تمغرب وهو يحاحي متين البُطان ينموا.... هههههههههههه
البتول: بري بري اللمشي لي اهلي ان بقيت وقفت معاكي هني ببول في لباسي من الضحك.. يلا لي بعدين
سكينة: في مان الله
....

Post: #133
Title: Re: حفرة دخان سكينة بت ود جيب الله
Author: طارق جبريل
Date: 18-10-2010, 11:22 PM
Parent: #132

بكرة بجيك يا سكينة

Post: #134
Title: Re: حفرة دخان سكينة بت ود جيب الله
Author: معاوية عبيد الصائم
Date: 18-10-2010, 11:29 PM
Parent: #133

المقاس؟؟؟؟؟

Post: #141
Title: Re: حفرة دخان سكينة بت ود جيب الله
Author: طارق جبريل
Date: 07-03-2011, 12:29 PM
Parent: #134

Quote: المقاس؟؟؟؟؟

جوز الموية

Post: #135
Title: Re: حفرة دخان سكينة بت ود جيب الله
Author: عمر صديق
Date: 18-10-2010, 11:32 PM
Parent: #133

دكتور
سلام
وتحايا
وشوق


_________
واخسارة ايامي الفاتت وماتابعت فيها قصتك الجديدة

Post: #136
Title: Re: حفرة دخان سكينة بت ود جيب الله
Author: معتصم محمد صالح
Date: 20-12-2010, 12:40 PM
Parent: #135

تحياتنا ....

Post: #138
Title: Re: حفرة دخان سكينة بت ود جيب الله
Author: طارق جبريل
Date: 26-01-2011, 11:21 PM
Parent: #136

Quote: تحياتنا ....

اوووووووووووووه قريبي الزين كيفنك يابا

Post: #139
Title: Re: حفرة دخان سكينة بت ود جيب الله
Author: طارق جبريل
Date: 26-01-2011, 11:23 PM
Parent: #138

(18)

الحبيبين كيفنكم

راجل البتول اجازتو كملت وبقى علي السفر لي قطر..
البتول مشت علي سكينة تشاورها في السفر بعد ثلاثة شهور بعد الولد يكمل اجازة الكُتاب
-البتول جرت سلك الباب ودخلت: الشايقي كيفنك امي
- سكينة: حباب الفنجريي جيتي في وكتك.. يا دوبي سويت الشاي ادخلي
-البتول: تسلمي يا بت امي.. لا يبقى راجلك في..
- سكينة: لا.. مشى على السكة حديد يشوف القطر مواعيده متين.. قال سايق قطر الأبيض
- البتول: الرسول يا الشايقيي ما بيشيلي شنطة لي اخوي محمد في الابيض
- سكينة: بسم الله كيفن آآآبيشيلها.. أصلو شايلها فوق اكتافوا.. ما ترا بيرميها في عربية السواقين
- البتول: عاد يا حبيبة قساي ماني عارفي أودي جمايلك دي وين.. وكتين تضيق بي قاعدي أجيكي
- سكينة: أفو عليك يا بت بارا.. عاد خوتنا دي باقيلك هيني
- البتول: فشان كدي جيتك يا بت امي.. دايري اشورك في سفري
- سكينة: كدي اشربي الشاي.. خير يا بت امي
- البتول: الراجل خلاص مصمم يسوقنا معاهو .. قال كلهن ثلاثة شهور والولد يكمل مدرسته
ويرسلنا الإقامة والتذاكر.. اها راسي دة من امبارح يودي ويجيب ما عرفتة اقوله شنو..
- سكينة: شوفي يا بت امي.. ها الله ها الله علي الجد.. راجلك لسة صغير وما بيتفات..
وانت ذاتك صغويري.. والولاد ديل بدوا يكبروا.. دحين خليهم يكبروا جنب أبوهم..
امشي يا زولة عيشي في خير راجلك وشوفي الدنيا.. والراجل آآآبيقدر يقعد براهو
وبرضو آآآبيقدر يجيكي كل سنة زي هسي.. اتوكلي يا حبيبة قساي..
- البتول: باقيلك كدي ياختي
- سكينة: ما شايفالي حل غيرو.. الا ان بقيتي دايراهو يعرس فوقك ويسوقها معاهو
- البتول: نان البيت نسويلوا شنو.. نقفلوا كدي ونخليه ما بيتسرق
- سكينة: البيت ساهل.. تستفي عفشك فيهو وتغتيهو وتخليلك سريرين لااابرة
- البتول: لي شنو
- انا بكلم عبد المنعم ود السرة وأحمد ود آمنة يبيتوا في البيت وبالنهار ترانا نحن قاعدين
- البتول: الله يسهلها عليكي شقيش تقبلي.. انا عارفاكي بتلقيلي حل..
- سكينة: يا بت امي نحن البيناتنا هيني.. هو الراجل قايم متين
- البتول: بعد باكر
- سكينة: يعني الليلي نولع طلحنا.. ههههههههه
- البتول: هههههه ايي لانه اهلي واهلو باكر بينكبسوا علينا... ههههههه
- خلاص اغشي معاكي السُرة وأنا برسل لي آمنة وخادم الله
- البتول: خلاص النمشي النكلم الراجل دة بي شيت الولاد ديل
- سكينة: سمح لي بعدين

البتول مشت علي راجلها..
- أنا ما قلتلك شوري الشايقيي دي راسها كبير وقاعدي تريدك
- البتول: ايي والله مرتا زيني.. وانت مافي ايي شي يغلبني قاعدي امشيلا..
- والله الشايقي راجلها ذاته راجل صباح خير... قبل يومين جاني في غرض
وقلتلو ان شاء الله مقضي..
-البتول: خير مالو
- قال عنده ولد اخوه داير يشوفلو شغل في قطر ودايرني اشوفه ليه.. باقي اخوهو محمول
- البتول: وشن قلتلو
- شلت الشهادات ووعدته خير ان شاء الله بلقالو حاجة
- البتول: الله يعدل الخطوة

مغربت الدنيي.. سكينة ولعت طلحها والنسوان بدن يجن..
السُرة جات لافحا هدومها وصعوطها وشايلالا سجارتين ألات برنجي
خادم الله جات وراها ماسكي جضمها عندها ضُرسا قايم عليها وغالبها الكلام
وقالتلهن ماها دايري تدخن.. الضرس ينتح عليها..
آمنة جات داخلي لابسالا طرقي بيضاء..
السُرة: انت يا آمني اختي الحِد دة حتى في الطلح.. غايتو شيتك كلو براهو.. هههههه
- آمنة: نان يا بت امي افك حِد أبوي دة بيشيلو حالي
السُرة قامت علي الحفرة ألت الدخان والمضبقة مدلدلة تحت رجلينها..اتقولعت وجرت البنبر
وختت فيهو الهدوم وولعت سجارة البرنجي ودخلت علي الشملي ومرقت شلاليفها وفيهن السجارة
زي عادم العربية وكتين يطلع في الشرار.. وقالت لي آمنة:
نان انت ابوكي رحمه الله الحِد دة داير يرجعوا.. ما خلاص ليكي سنة تراكي حادي
- آمنة: السرة دايري أهلي يشيلو خالي عاد
- سكينة: النصيحة لي الله يا آمني كفاكي... ياخي عيشي أيامك وابوك ان شاء الله في الجنة
- خادم الله: اييي لا توجعوا خشمكم ساااااااااااكت دي جعليي راسها زي زلط العربيات
- سكينة: خدوم الطروقيي شنها.. انت موش قلتي ضرسك ينتح عليكي
- خادم الله: اها سكتة
جات البتول داخلي شايلا علب صغار كدي فيهن شب ومسك..
- خادم الله: دة شنو يا خرابة العلي سُكر الكحكي دة
- البتول: فضلة خيرك شب ومسك جابو ابو الوليدات.. سمح خلاص
تختيهو تحت أباطك.. يمين ريحة العرق تمشي منك
- السُرة: لا يبقى زي الجابتو لي محاسن اختي من السعودية.. لبختو تحت أباطي
ووكتين عجبتني الريحي قلت اللضرضرلي منو شويي من لاااااااااااتحت..
وانطلقت فيني النارييي،.. وحاتكن زي الطهروني من أول جديد
- سكينة: هههههههههههههههههههه.. نان يا خرابة انت اصلك ما سألتيها بيلتخوا من لااااتحت ولا لا
-السُرة: هههههه انا شن عرفني تراني لقيت الريحي سمحي ولتختو وبقيت أوجوج
وكل شويتين امشي ابول.. قايلي صادني السكري...هههههه
- البتول: ههههههههههه غايتو ما بسألك يا السُرة.. دة يا حبيبة قساي بيلتخوا ويضرضروا تحت الأباطات بس
- خادم الله: قادر الله.. باقيلي الراجل من تحت اباطك آآآبيقوم
- آمنة: هههههه شوفوا أم ضُرس قامت تغزِل.. أماني كلام الشكشكة دا ماهو قاعد يعجبها
- خادم الله: نان انتو طلحكم دة مولعنوا لي شنو مو ياها شكشكة الجن دي
- سكينة: ههههه خدوم قامت علي جنها
- خادم الله: انتو في دة ولا امبارح لامن مشينا الاسبتاليي نشوف ولد شامة بت ود حسين
الولد البيقطع التظاكر قال لي السُرة: قطعتي يا حاجة.. قامت السُرة قالتلو: قطعت أمك يا ود الغلفة
ههههههههه والبص دة كله انفقع ضحك.. الخرابة قايلي نفسها صغووويري..
- السُرة (من تحت الشملة): نان ود الغلفة شايفني بي حنتي يقولي كيفن قطعتة ههههههههه
- خادم الله: نان هو قاصد التظاكر.. ههههههههههه
- آمنة: غايتو ماكن نسوان ههههههههههههه
- السُرة: عاد يا البتول الليلي بدعي مع الراجل.. ياهو خم الرماد عاد...
- سكينة: بت الهرمة يمين الليلة من فوقها ما ينزل
- البتول: وحات الله ماني دايري سفرو انا.. ملالي البيت يعلم الله
- خادم الله: يا حبيبة قساي البيت بلا راجل آآآبيبقى.. دحين سافري مع راجل
- البتول: الله يسوي الفيها الخير
- سكينة: الله يعدلها عليكي.. كلهن تلاتة شهور وتسافري
- البتول: عاد خوتكن آآآبلقاها هنا
- السُرة: ايي خوة شنو امشي اتفسحي مع راجلك وبتجي تلقينا في حفرة الجن دي
....

Post: #137
Title: Re: حفرة دخان سكينة بت ود جيب الله
Author: طارق جبريل
Date: 26-01-2011, 11:19 PM
Parent: #135

Quote: دكتور
سلام
وتحايا
وشوق


_________
واخسارة ايامي الفاتت وماتابعت فيها قصتك الجديدة


هسي ما فات شي يا حبيب

Post: #140
Title: Re: حفرة دخان سكينة بت ود جيب الله
Author: طارق جبريل
Date: 27-01-2011, 10:33 AM
Parent: #137

جاييك