نانسي تـُزهِر

Post: #1
Title: نانسي تـُزهِر
Author: طلال عفيفي
Date: 05-20-2008, 09:32 AM

الفن : هو ما يجعلك ترفل في معناك الخفيف .
يذكرك – ولو سهواً – بكونك إنسان ولك مشاعر وناس على الجانبين (مخاصمين وأصدقاء) ..
ويرجع بك إلى وجدانك الأول : صوت الموسيقى وأحلام العمر ..
الفن : صديقك الطيب الذي يلهيك عن الوقائع حيناً ، ويغمسك فيها ، حيناً آخر ..
يفتح بصيرتك على ما لا تراه بالعين المجردة ، ويفج في قلبك الدروب التي ظننتها خاسرة :
هو البطل ، والحبيبة ، والحاجة الأشهى من النوم ..

كانت البلاد السودانية ترفل في حظها السيء وتنام مكتومة ، وعلى جنباتها نيران عسكرية
وفحش سياسي ، وتغول على حقوق الناس ، وعربات مدججة من كل الجهات ترفع السلاح (بدلاً
عن ممارسة مهنتها الأساسية : النقل !)

كانت المراكب المصفحة والبيانات العجيبة الكاذبة (من الطرفين) تتوارد ، ظهر في أسواق
البلاد شريط " نانسي " : مختارات من شعر محجوب شريف ، وأغنيات الكحلاوي وبدائع العزيز
يحيي فضل الله ..

كانت الموسيقى تحف على الجانبين بلطافة وهدوء ، ونانسي : عرفت كيف تفاجئني بصوتها
الجديد الطازج ..
صوت منخفض ، وأداء شجي ، وروح سليمة ..

رفقة !!
إسم قصيدة ... حاله ...
كتبها يحيي فضل الله ، وتناولها ضياء الدين ميرغني باللحن والتحنان ، وحين تسمعها
تنبت في قلبك – يا صديقي – زهورالمحبة والحنين ..
موسيقى خفيفة ، ومدخل عجيب وساحر ينهض على إثره صوت البنت المغنية ليصول
في القلب ويجول !

يبدو أن " نانسي " مليانه بالأحوال : محبة الأصدقاء ، الحنين للوطن ، وعشق الغناء !
فقد إستمعت في غنائها ، على شريطها الجديد ، إلى هذه الأحوال ، وخفق قلبي من تاني ،
وعرفت أن الحياة ممكن تستمر طالما أننا نكتب الشعر ونلحن الكلمات ، ونغني ..

حين إستمعت لأغنيات نانسي (وصوتها) ، شعرت بأني إنسان : له في الهوى والمحبة شؤون
وتصاريف ، وشعرت بأن لي قيمة ذاتية ، وأن فؤادي : عادي ، ويخفق !
(ومتى الفؤاد في الخفقان إطمأن ؟ )
إطمان حين وجد بنتاً تـُغني..
فنانسي قدمت لنا ، وسط الحرب والضغينه ، والكلام الفاضي ، حاجة بسيطة بتشبه الحلم :
الحلم بمعناه البسيط وسيرته الطيبة ..
الحلم بمعناه العالي : القادر على التحقق ..

فما ضيرنا لو كنا ناس من أبناء قبايل وجماعات ، بس ، بتحمينا الذاكرة والمسلك
الجميل ؟
وما لأغاني الكحلاوي وكلمات محجوب شريف تضيع لو ممكن نغنيها ؟

إستمعت لشريط نانسي وأغانيها في ظروف صعبة وعصيبة وفضاء متوتر ،
لكنها أعادت لأذني الروح ،
ولقلبي التعبان ، القلب :
لا للمدافع
والقهر

نعم :
لي
ولك
وللروح

نعم للبساطة والحلم العادي المستريح :
ناس
حقوق
مشاعر
وعواطف

شعرت في أداء نانسي ، بروح داخلية ، وإنسانية خلابة ، ترفع مستوى الوجدان ،
وترتفع به !
ألحان زي العجب !

مزيكا خفيفة
توزيع تمام
صوت نادر
وأداء :
منقطع النظير !

Post: #2
Title: Re: نانسي تـُزهِر
Author: طلال عفيفي
Date: 05-20-2008, 10:28 AM
Parent: #1

Post: #26
Title: Re: نانسي تـُزهِر
Author: فيصل نوبي
Date: 05-20-2008, 07:15 PM
Parent: #2

طلال

بتحضر بروفات كمان !! يا بختكـ و يا سعدكـ و يا هّناكـ ..
ياخ المرة دي حاســدكـ عديل كده

_
أستميحكـ عُذرا في إستخدام إحدي الصور في البروفايل..

Post: #27
Title: Re: نانسي تـُزهِر
Author: طلال عفيفي
Date: 05-20-2008, 10:13 PM
Parent: #26

سلامات يا فيصل ..
والبروفات عندها طعم غريب ،
ممكن تسمع المقطع الواحد ألف
مره ، من غير ما تزهج ..

انا كمان مرات بقعد أراجع
حياتي وبقرب أحسد نفسي !!

Post: #36
Title: Re: نانسي تـُزهِر
Author: حسين محي الدين
Date: 05-21-2008, 09:18 AM
Parent: #26

Quote: يا بختكـ و يا سعدكـ و يا هّناكـ ..

والله الواحد محتاج للحاجات الحلوة دي
الدنيا بقت مسيخة جدا
والجري الكتير ده ما شايفين ليه نتيجة

طلال
شكرا للمساحة العذبة

Post: #3
Title: Re: نانسي تـُزهِر
Author: singawi
Date: 05-20-2008, 11:05 AM
Parent: #1

طلال عفيفي

البريد الشيخ أنا ياناس بريدو

أتاريني بريدك وأنا ما عارف

مشكووور سيدي على ما خططت بحق السلطانة نانسي عجاج ذلك النغم السماوي

تحياتي وأطيب أمنياتي

Post: #5
Title: Re: نانسي تـُزهِر
Author: almogira alemam
Date: 05-20-2008, 11:23 AM
Parent: #1

مشكور يا طلال

ما قدرنا نجلس معا بعض لنا لقاء

Post: #6
Title: Re: نانسي تـُزهِر
Author: طلال عفيفي
Date: 05-20-2008, 11:49 AM
Parent: #5

سنجاوي
شكراً على المحبه ..
شكراً كتير ...

مغيره ..
أكيد الله هيكرمنا ونقعد ،

تحياتي

Post: #8
Title: Re: نانسي تـُزهِر
Author: عبدالله وداعه الامين
Date: 05-20-2008, 12:17 PM
Parent: #6

طلاب حبيبنا

تسلم ياخ ويسلم احساسك

تعرف انا امس لحدة الساعة 4 صباحا وبسمع في الشريط

ورفقة كووووووووم براهو فيها شغل جميل شديد كلمة ,, لحن ,وتوزيع موسيقى

شيء جميل وشكرا لي نانسي وهي بدينا الحاجات الجميلة في وقت عجيب

مودتي ومحبتي ولك التحايا

Post: #9
Title: Re: نانسي تـُزهِر
Author: طلال عفيفي
Date: 05-20-2008, 01:06 PM
Parent: #8

Quote: تعرف انا امس لحدة الساعة 4 صباحا وبسمع في الشريط

وانا كمان بسمع طول الوقت ..
وكأنو شايلاني سحابه ..

Post: #7
Title: Re: نانسي تـُزهِر
Author: esam gabralla
Date: 05-20-2008, 12:12 PM
Parent: #1

يا صاحب البتزهر انت زاتك

و بتعرف متين تزهر ... بالضبط لما تكون الروح معضية

و واقفة في خشم باب النضوب و العطن...

تجى بي كلامك و صورك و نسايمك ...

نسمع غنا نانسي لما نلم فيهو ... و نتمنى يعجبنا لانها على ما يبدو مجتهدة و جادة و منفتحة للجديد والتجريب... مجرد انطباعات

الشكر و المحبة يا طلال يا ابن ام طلال

Post: #12
Title: Re: نانسي تـُزهِر
Author: طلال عفيفي
Date: 05-20-2008, 01:36 PM
Parent: #7

كنت يا عصام ولازلت بفتكر إنو نانسي دي
تلويحة حداثة ، لازم نلتقطا ..
هي إشارة من الدنيا .

Post: #10
Title: Re: نانسي تـُزهِر
Author: هند محمد
Date: 05-20-2008, 01:14 PM
Parent: #1

ماغريب على نانسى كل جميل..مرهفة وبتغنى باحساسها

التحية لك ولها استاذ طلال ولاحساسك الجميل

Post: #14
Title: Re: نانسي تـُزهِر
Author: طلال عفيفي
Date: 05-20-2008, 01:51 PM
Parent: #10

مشكوره يا هند ..
وشكراً لنانسي ...
تعرفي ، انا بشعر إني :
بشوف صوت نانسي ..

Post: #11
Title: Re: نانسي تـُزهِر
Author: عبدالمجيد صالح
Date: 05-20-2008, 01:31 PM
Parent: #1

هل يمكن ان يكون طلال مكسرا - بدون تنوين

مجرد هظار

سلام
عبدالمجيد

Post: #28
Title: Re: نانسي تـُزهِر
Author: طلال عفيفي
Date: 05-20-2008, 10:25 PM
Parent: #11

هل يمكن ان يكون طلال مكسرا (؟؟؟)

يا عبد المجيد ، وهل يمكن أن يكون
غير ذلك ؟؟

سبحان الله يا أخي ، تعرف .. في عالم
من الناس ربنا بيكون في بداية الخليقة
سلمهم مفاتيح قلبك ، وتصادف هؤلاء
الناس على فترات متقطعة من عمرك ،
كل واحد أو وحده من حملة المفاتيح
ديل يفتح قلبك ويرمي جواه حاجه :
هدية صغيرة ، فكرة لامعه ، أمل ،
قماشة شجن ملونه ، وكده بتقدر
تعيش كويس ، بسبب الناس العندهم
المفاتيح ..
مش قال ليك ما معناه في مُحكم التنزيل
إنو في ناس ربنا ختم على قلوبهم ..
ديل بقى ما عندهم مفاتيح واليعوذو
بالله !

Post: #13
Title: Re: نانسي تـُزهِر
Author: Tabaldina
Date: 05-20-2008, 01:43 PM
Parent: #1

..
.

Quote: مزيكا خفيفة
توزيع تمام
صوت نادر
وأداء :
منقطع النظير !

حقيقة أبداع منقطع النظير يا طلال ..
دوما تاتى بالجميل؛

شكرا لنانسي ولمحجوب شريف ويحيى فضل الله والكحلاوى

___________________

وشكرا لناذرالخليفة لانه اول شخص لفت نظرى هنا
لهذا الانتاج الرائع ..

Post: #29
Title: Re: نانسي تـُزهِر
Author: طلال عفيفي
Date: 05-20-2008, 11:35 PM
Parent: #13

فعلاً بيستحقوا الشكر والتقدير يا تبلدينا
وكمان العزيز طارق الأمين ..

الأغاني الفي المجموعة الأخيرة دي ربطتني
نفسياً بأرواح ناس كتار .. ناس يمكن أكون
ما لاقيتم ، لكن خلاص .. بقينا جزء من زي
ما تقول "تجربة شعورية وحده" ..

والواحد ، من هذا المنبر ، بينتهز الفرصة
عشان يشكر الحياة ..

Post: #15
Title: Re: نانسي تـُزهِر
Author: الجندرية
Date: 05-20-2008, 02:03 PM
Parent: #1

Quote: كنت يا عصام ولازلت بفتكر إنو نانسي دي
تلويحة حداثة ، لازم نلتقطا ..
هي إشارة من الدنيا .

يا طلال
هذا بالضبط ما احس ان نانسي تمثله

برق ساطع ـ ولن يخيب ـ لسماء محتشدة بنساء مثلها
قادمات
يهطلن يمناً وبركة على جدب سوداننا فيحلن محل الظلم
لحقول انصاف وتسامح وانسنه

لها عظيم الحب
ووافر التقدير

ولك كثير امتنان ومحبة

Post: #31
Title: Re: نانسي تـُزهِر
Author: طلال عفيفي
Date: 05-20-2008, 11:54 PM
Parent: #15

انتو لقلبي زاد عمره
وليهو المنّ والسلوى

جنوني عيون
عيون لو شافا عطشان السنين :
يروا

ليه ما اجن ؟

شفتي الإنسان يا أماني ؟
شفتي الروح لمن تتعلق ؟

وإنتوا بتقولوا مجنون !

Post: #16
Title: Re: نانسي تـُزهِر
Author: عمر التاج
Date: 05-20-2008, 02:34 PM
Parent: #1

Quote: كانت المراكب المصفحة والبيانات العجيبة الكاذبة (من الطرفين) تتوارد ، ظهر في أسواق
البلاد شريط " نانسي " : مختارات من شعر محجوب شريف ، وأغنيات الكحلاوي وبدائع العزيز
يحيي فضل الله ..

من سمات هذا السوداني الجميل
أنه رغم خوضه بين أشواك هذه الأيام العجاف
تجده يقتطف الورود الجميلة كلما جادت بهاأمثال (نانسي )

Post: #17
Title: Re: نانسي تـُزهِر
Author: Abdel Aati
Date: 05-20-2008, 02:35 PM
Parent: #16

نانسي عجاج

روح جميلة وابداع جميل ...

Post: #32
Title: Re: نانسي تـُزهِر
Author: طلال عفيفي
Date: 05-21-2008, 00:12 AM
Parent: #16

شكراً يا عمر ..
فرصه سعيده ..

بسمع الغنيه دي طول اليوم ،
وطول اليوم وانا بسمعا بشعر
إني بتغسِل ..
بتقلب في الكلام زي طفل وليد
بين يدين أمُو ..

شي عجيب ..

Post: #35
Title: Re: نانسي تـُزهِر
Author: طلال عفيفي
Date: 05-21-2008, 08:33 AM
Parent: #32

عادل سلامات ..
welcome to the club

Post: #18
Title: Re: نانسي تـُزهِر
Author: mamkouna
Date: 05-20-2008, 05:06 PM
Parent: #1

طلالو..
على الرغم من إنو المعلومات الفي الشريط بتقول إنو الكورال مُكوٌن من..محمد عوض/محمد مصطفى/إسحاق عبد الغفور..
لكن ما بقدر أمنع نفسي من تخيلك وسطهم!
يمكن عشان....
شقي و مجنون!!

--

Post: #38
Title: Re: نانسي تـُزهِر
Author: طلال عفيفي
Date: 05-21-2008, 10:51 AM
Parent: #18

شكراً يا ممكونه ..

غنيه عجيبه وبديعه ،
فيها صدق ، وأحوال ..

Post: #19
Title: Re: نانسي تـُزهِر
Author: امل احمد عمر
Date: 05-20-2008, 05:34 PM
Parent: #1

الفن : صديقك الطيب الذي يلهيك عن الوقائع حيناً

اليوم كنت بحاجة ان يلهيني الفن عن الواقع وتعقيداته التي تغلبنا احياناً كثيرة ..

وعند استماعي لرائعة يحي فضل الله بصوت ملائكي تحمله روح نديانة سموت عاليا بعيدا عن حزني وضيقي ..

ووجدتك يا طلال اليوم تحديدا محتفياً بها .. شكراً لك ولها

Post: #23
Title: Re: نانسي تـُزهِر
Author: Tragie Mustafa
Date: 05-20-2008, 06:05 PM
Parent: #19

طلال
كيفنك يا اخي؟؟
وعساك بخير؟؟؟

وشكرا لاحتفائك بالمتفردة نانسي عجاج.

وشكرا للجندريه وكلماتها الحلوة وطاعمه:
Quote:
يا طلال
هذا بالضبط ما احس ان نانسي تمثله

برق ساطع ـ ولن يخيب ـ لسماء محتشدة بنساء مثلها
قادمات
يهطلن يمناً وبركة على جدب سوداننا فيحلن محل الظلم
لحقول انصاف وتسامح وانسنه

لها عظيم الحب
ووافر التقدير

ولك كثير امتنان ومحبة

Post: #44
Title: Re: نانسي تـُزهِر
Author: طلال عفيفي
Date: 05-22-2008, 11:31 AM
Parent: #23

سلامات يا تراجي ..
ومعاكي بسأل ربنا يستجيب
لكلام أماني .. لأنو واضح
إنو الأمور عندنا ، تحتاج
لتدخل مباشر !!

Post: #43
Title: Re: نانسي تـُزهِر
Author: طلال عفيفي
Date: 05-22-2008, 09:13 AM
Parent: #19

أهلاً وسلامات يا أمل ..
يحيي فضل الله كاتب كتابة جميلة في رفقة ،
شغال على "رفقه " بمشاعر دافية وبتشعري
فيها بنداء صادق ..

يحيي وضياء الدين ونانسي عملوا ثلاثي
فنان بجد ..

Post: #20
Title: Re: نانسي تـُزهِر
Author: ود المايقوما
Date: 05-20-2008, 05:54 PM
Parent: #1

صوت منخفض
وأداء شجي
وروح سليمة ..

فنانة فنانة..

شكرا طلال

وياريت باقي الاغاني ياممكونة ..

Post: #49
Title: Re: نانسي تـُزهِر
Author: طلال عفيفي
Date: 05-23-2008, 11:04 AM
Parent: #20

سلامات يا ود المايقوما ...

هديء من روعك يا أخي ..

(وجه ضاحك خالس)

Post: #21
Title: Re: نانسي تـُزهِر
Author: ابو مهند
Date: 05-20-2008, 05:58 PM
Parent: #1

Quote: الفن : هو ما يجعلك ترفل في معناك الخفيف .
يذكرك – ولو سهواً – بكونك إنسان ولك مشاعر وناس على الجانبين (مخاصمين وأصدقاء) ..

طلال يا شفيف:
كنت في قمة غلياني الداخلي,,, ولكن سرعان ما بداء الغليان في الهبوط حال سماعي لاغنية الرحال المقيم بيننا دوما (الخال) صديق الكحلاوي برواية نانسي....رائـــــــــــعه

ـــــــــــــــــــــــ

في بعض الاحيان نانسي بتعسم الغناء
التعديل لهذه الاحرف (كنت قمة غليلني الداخلي)

Post: #51
Title: Re: نانسي تـُزهِر
Author: طلال عفيفي
Date: 05-23-2008, 12:00 PM
Parent: #21

سلامات يا ابو مهند ..

شقي ومجنون أغنيه ساحره ، وفيها
أمر نادر .. ممكن تكون أغنية من
محب رقيق ، وممكن تكون برضو رسالة
من عاشق رمتالي ، وممكن تكون من
فيوض محبة عاشق صوفي ..

شقي ومجنون باب مفتوح على أحوال
المحبة ، إدخل وعاين ..

Post: #22
Title: Re: نانسي تـُزهِر
Author: الرفاعي عبدالعاطي حجر
Date: 05-20-2008, 06:04 PM
Parent: #1

الاستاذ طلال عفيفي

لك التحية لهذا الخيط الوفي , ونحتاجه في ظل الملتهبات الحالية

نانسي صاحبة طريقة خاصة ولو عايز ألونها أقول لونية لكني أعتقد

أن لها طريقتها على وزن لكل شيخ طريقة فهي إن جاز شيخة طريقة

غنائية رائعة وموفقة أحس بأنها قد ظلمت وأؤمل في قوتها وصمودها

وأعداء النجاح كثر ... مجددا لك مودتي على هذه الإلتفاته في هذا

التوقيت الحااااار جدا ولنانسي كل الأمنيات وكل من كان وراء نجاحاتها .

.......................................................حجر

Post: #53
Title: Re: نانسي تـُزهِر
Author: طلال عفيفي
Date: 05-23-2008, 01:12 PM
Parent: #22

سلامات يالرفاعي ..
انا ذاتي عندي أمل في قوة نانسي وصمودها ،
لكن الأكتر من كده أملي في موهبتا الحقيقية ..

ولسه قداما الدرب طويل عشان تنجز أكتر وترسخ
أكتر ، ونحبها أكتر

Post: #24
Title: Re: نانسي تـُزهِر
Author: محمود ابوبكر
Date: 05-20-2008, 06:21 PM
Parent: #1

طلال
هذه هي المرة الاولى التي استمع الى هذه الحسناء
Quote: شعرت في أداء نانسي ، بروح داخلية ، وإنسانية خلابة ، ترفع مستوى الوجدان ،
وترتفع به !
ألحان زي العجب !

فعلا اصبت كبد الحقيقة
والاجمل توصيفك الرائع
Quote: بفتكر إنو نانسي دي
تلويحة حداثة ، لازم نلتقطا ..
هي إشارة من الدنيا .

--
وشكرا لممكونة
لاننا عبرك تمكنا من الاستمتاع بنانسي
اداء متميز جدااا

بس برضوا خايف
يقولوا علي شقي ومجنون
علي مجنون

Post: #65
Title: Re: نانسي تـُزهِر
Author: طلال عفيفي
Date: 05-24-2008, 09:13 AM
Parent: #24

بالله دي أول مره يا محمود ابوبكر ..
بحسد الناس البيتعرفوا على الحاجه
الجميله لأول مره ..
أحلى حاجه البداية ..

Post: #25
Title: Re: نانسي تـُزهِر
Author: عمر ادريس محمد
Date: 05-20-2008, 06:23 PM
Parent: #1

طلال ياطلال

كان وجعنا زمان يزيله مجرد قرص ملتبس الالوان
وعندما صار كما تعلم يحتاج الى حبة اسبرين بحجم
القمر
اهو ..
نانسي تـُزهِر
ولله الفضل

ورفقا بالباب يا احباب

Post: #66
Title: Re: نانسي تـُزهِر
Author: طلال عفيفي
Date: 05-24-2008, 09:25 AM
Parent: #25

وينك يا عمر ؟
وليه بتغيب ؟

عجبتني الفكره :
نانسي حباية أسبرين قدر القمر !

الله يخلي الأبواب ...

Post: #30
Title: Re: نانسي تـُزهِر
Author: REEL
Date: 05-20-2008, 11:52 PM
Parent: #1

برايا. . . ( سحر ما )

بشوق السنين ممكون . . .
ثم
قصص دافئة
و
متباعدة

...
..
.

Post: #68
Title: Re: نانسي تـُزهِر
Author: طلال عفيفي
Date: 05-27-2008, 01:26 AM
Parent: #30

سلامات يا ريل ..

شفتي الدنيا ؟

Post: #33
Title: Re: نانسي تـُزهِر
Author: د.نبراس
Date: 05-21-2008, 01:28 AM
Parent: #1

انشالله اجن ...

وازيد في الجن ....

Post: #69
Title: Re: نانسي تـُزهِر
Author: طلال عفيفي
Date: 05-27-2008, 01:58 AM
Parent: #33

آمين يارب !!

يسمع منك يا نبراس

Post: #34
Title: نانسي عجاج..يابت بيوت الهجعة كيف..و غبار شوارعك ماشي وين..
Author: ثروت همت
Date: 05-21-2008, 06:10 AM
Parent: #1

بلداً هيلي نا..
دموعها.. دموعي نا..
أساها...أساي أنا..
ضميرها..ضميري نا..
كل آمالي نا..
السلام يملاها..يطلع من هنا..
و الحَمَام يتشابى!

امتد صوتها ليحتوي حزن قد تعبأ لينتهك حرمة وطن (هولي نا)...و يعيد له حنانه الداكن الذي فصل فضفاضاً عليه...
اتت بعبق جميل يختزن التوحد بين طياته..لتأكد بأصرار ان الفن و الفن السامي فقط..له اباحية الوصول الي مفصل التفاصيل المحظورة جداً..في الذات.. ليعيد ترميم و تأهيل الجذء الذي ماعادت الدماء تجري في اوردته..
تقدل طفلة حلوة و بين إيديها كتابا..
و الحبوبة تمسح بالحنين أثوابا..
و القمرية تصدح..تستريح دبابة..
و القطر القبيل يمشي و يشق الغابة..
البالمبو يفتح للقلوب أبوابا..
و النُقارة زي أم كيكي و الربٌابة.
يااااا الله يا الله.. نافذة اخري...تدخل البهجة الي النفس بعودة ذكريات باتت متنفس للحنين... و الحنين علي ايقاع سلطاني يسمو بالخاطر الي ما وراء اللحظة..و الادراك..منتوجه للمتلقي.. الارتقاء بالذات الي عوالم لا متناهية من الشجن..
ناس من كل لون ..إتعمٌرت أنسابا
و النيل في الهجير...دوٌزن وتر أعصابا..
سمحة الدنيا..بيك..و بين إيدينا حبابا..
يانا أهل بلدنا و قُدرَتم غلاٌبة.
في وقت اقصاه الان.. ارهقت العنصرية المتبلدة و الصراعات الممتدة من دواعي قبلية و جهوية مضنية جداً... وحدة وطن فبات يشنق علي ساحات المدن علي ايدي ابنائه..

فقط هي دعوة لحلم جميل يتباهي به اللاوعي...حلم مشروع و مباح للجميع...التوحد..من اجل وطن معافي..

رفقـــة..هو عمل انتاجي متجانس الايقاع..يفيض حنيناً صاخباً..يتنقل بالمتلقي بين ايقاعات حديثة و اخري تعود بالذاكرة الي فن جميل قد اندثر..
( شقي و مجنون) نانسي بطريقة ادائها و بصحبة الايقاعات الموسيقية المصاحبة ..تحيل المتلقي لصالح (حواء الطقطاقة) و حكامات القبائل السودانية..اداء جميل و حوارات ايقاعية بسيطة مدروسة بعناية بحيث لا مجال الا للأنصات.

ثم رفقــــــة...و التقطني يا صديقي...(كومـــــــة) شجن...متعة الانصات و الاستمتاع و الارتقاء من (دوخة الارض) الي عوالم من امنيات تجثو امامنا مجسدة بكامل رونقها...محسوسة.. تكاد تكون ملموسة (كمان)...

رفقـــة..ممتعة للنفس في ليالي كُدرت لعوامل مناخية شتوية هنا..و اخري سياسية استوائية المناخ في الوطن...

ثم...
يا رفيـــق الهجعــــة...
و الليالي النجعــــــة...
في شرود النجمــــة...
و القمر الصديقــــــك...
من رفيقـــك...

ليتضخم السؤال..و يتردد في اللاوعي (مسافة تشتهي الغرقان شهيد) لتتكئ علي جدران الشجن وحدك و خلفك ذاك الصوت المؤهل لترتيب الذات...

اوركسترا مكتملة الانوثة...كمدخل طربي شجني جميل.. و (جد... عرف صوتك صداك.. غنيتي... رشحّتَ حلقك لي اذاعات الشجر)..
ايقاعات قمــة الحميمية مع الصوت (المُندِي)...ثم عوالم لا متناهية الاشواق تحاول المضي قدماً في رحلة البحث عن محبوب/ة قد بات القلب مسكناً له/ا... لتتمني سماعه/ا لذات اللحن في ذات الوقت في محاولة مقنعة جداً لارباك العواطف...و امتهان قوة اضافية للابعاد الجغرافية المضنية .

رفقـــــة يحي فضل الله...و ضياء ميرغني...احالتني لصالح بشري الفاضل عندما تجرع كاساً من نبيذ الجنون الكتابي و حاك حياكته المعروفة كمؤلف سماه فيما بعد (البنت التي طارت عصافيرها) فكنت انا البنت التي طارت عصافيري مع تلك الرفقة....(و باقي العصافير الفضلت دي اتبرعت بيها لصالح- ماذنبي)

Post: #52
Title: Re: نانسي عجاج..يابت بيوت الهجعة كيف..و غبار شوارعك ماشي وين..
Author: ثروت همت
Date: 05-23-2008, 12:32 PM
Parent: #34

ثم...

ماذنبي...

و من غيره..يعطي تفاصيل الاشياء برغماتيتها...هو المحجوب الذي يتوسد معاناة الغير و يجسدها بأسلوبه المتفرد..
ينتقي كلماته ببساطة كي تداعب خيال الجميع..و برصانة..كي تنصب في خانة الحديد..الذي لا يقبل سوي الانصهار..ليمتزج مع ذاكرة الالم..و يخلد خلفه معاناة شعب كامل...

يا الله كم هو مرهق ذاك المحجوب... اكاد اري ابتسامته البيضاء و ذاته الملائكية تطوف بألاطفال فاقدي الوالدين ممسكاً سنابل قمح و فرحاً و حلوي... ليداوي جرح نازف في دواخلهم..
هو لا غيره...من جند ذاته... لقضايا ظلت كالجثث الهامدة..او الغرف المعتمة.. جهلنا او تجاهلنا مع انشغالنا بهذا الصخب المرهق..المسمي مجازاً بالحياة..و في اجندتي الداخلية (دوخة الارض) ان نسلط عليها بقعة ضوء.. او حتي انكسار لاشعة شمس انعكست علي دموعهم..

شمت محمد نور...الذي مهد لنا(درب الملامة) مع أنفسنا...رسم ايقاعاته بريشة فنان..قد تخير فقط الالوان الاساسية لرسم لوحته..حتي يعطي الفرصة للوصول لمفاتيح اللوحة..
ايقاع خفي يدلف رويداً..رويداً الي داخل حواسنا السمعية..ليأتي مؤكداً لما جاد به المحجوب..

نانسي عجاج...و الحزن المعبأ داخل طبقتها الصوتية...و مقدرتها العالية جداً في التمادي داخل طبقتها الصوتية..(والله اكاد اري صوتها يسير الهوينا متبختراً..يطيح الشجن من جنباته..كوعاء ماء ممتلئ تحمله انثي انهكها السير..فما عادت له قدما... ) سكبت مدلولاً اخر اشد عمقاً..

ما ذنبي...
كلمات..الاستاذ محجوب شريف..
الحان شمت محمد نور..

ثم...
يا زمـــن..
وقف شوية..
اهدي لي لحظات هنية..
و بعدها شيل باقي عمري..
شيل شبابي.. و شيل عينيا..

خضبت امسيتي بلون مغيب..و بسيمات وداع شجية...ربتت علي كتف (الغنا الميّل) و لامست حنجرتها موضع الالم تماماً...فمن منا لا يدعو للزمن بالهداية...و التوقف قليلاً من ركوضه المارثوني..
رددت كثيراً من قبل (كل توقيت زمني قادم يعني التقدم في اتجاه الموت)..لا اريد الخوض في معطيات الفكرة..فلا المكان يسمح...و لا دواخلي (المنتشية تسمح)..و لكن داهمتني الفكرة مجدداً عند سماعي لهذه (الاغنية)..اكرر مرة اخري..ان الفن و الفن السامي فقط..هو محاولة للتحريض علي الغوص داخل ذاتنا..و رغبة في التحاور..و التحاور الشهي جداً مع الذات..بكل اريحية و شفافية..صادقة..و ربط القواسم المشتركة ببعضها البعض..

لحظات هنية..للشاعر ابراهيم الرشيد..هو عمل اخر لراحل ابراهيم عوض تتقنه نانسي بعمق حسي مترف..و المدهش في الموضوع (لا ادري اذا كان الامر مرتب..ام محض صدفة) ان الاغنية وجدت مكانها قبل ماذنبي..فأتت عبارة (يازمن وقف شوية) كتمهيد لمدلول استنكاري لما وصل له حال الضمير (المتبلد) الذي اوصل اطفال ابرياء الي دور الرعاية...فكانت واحة جميلة كمتنفس يهيئ المتلقي لتلقي رسالة المحجوب شريف في ماذنبي..

Post: #55
Title: Re: نانسي عجاج..يابت بيوت الهجعة كيف..و غبار شوارعك ماشي وين..
Author: ثروت همت
Date: 05-23-2008, 03:24 PM
Parent: #52

مــــــــا ذنبي..
يوم مالقيت يا ناس..
الوالدين جنبي..
وروني ما اسمي..

و ما زالت دواخلي اسيرة لصالح هذا العمل....

اللحن... و منذ وهلته الاولي يحيلك لصالح عالم ديزني.. لمسات بسيطة صاغها مبدع البيانو باطراف انامله...في محاولة بارعة جداً منه لسلب الانتباه... و العودة بالمستمع الي زمن الطفولة المترفة...برابط خفي- موسيقى شبيهة بموسيقى ديزني-...و لا ارادياً يتلقي اللاوعي اشارات الخوض في عالم الطفولة..لتبدأ عمليات المقارنة الخفية بين طفولة عشناها بكامل المعافاة..و اخري يعيشها اطفال اوصلتهم ضمائر من لا ضمائر لهم الي مناطق من الفراغ الموحش... و المستقبل الباهت...

ثم الجذئية الثانية..تبدأ نانسي في حوار مؤلم جداً مع ايقاع البيانو.. هي...و ايقاع البيانو...و (غصة) تمضي متكاثرة في النفس مع كل بيت جديد من النص..

موسيقي خفية جداً...(امتهن شمت فيها الاحتراف كي يدع مجالاً للمستمع للاصغاء الي الكلمات بغير تشويش موسيقي ) ثم صوت يعتليه الحنان..و دمع يحيل دونك و دون النظر الا للالم الذي يكمن في النص و تداعيات القضية المتناولة..

ثم...
الطـــــــــــــــــيف

الطيف و الناي...معادلة مرهقة جداً للدواخل...منتوجها (شهقة) مرتفعة الصوت تنم فيما تنم علي الدهشة و الاستجمام الداخلي..ثم (تنهــــــــــيدة طويلـــــــــــة) كمرحلة ثانية...

والله اكاد اري هجير صحاري غرب السودان و وجوه نسوة ذوات بشرة داكنة يلتفون اثواباً خريفية الالوان..تتماوج صورهن امامي بناء علي رغبة ماء مختزن في الهواء بناء علي رغبة الطقس الصيفي..
ياااااااا الله يا الله...

(ستة و ثلاثون) ثانية من صوت الناي المتماوج كمدخل للاغنية..ثم يأتي صوت نانسي محملاً (بحنان الدنيا الاتكوم فيهو)...

اما النوم ..ابّى و جافاني...
و اصبح داجى ساهر
وين حتى الطير رحل خلانى
و ما طيّب لى خاطر .....

الناي..الة مرتبطة بالحزن.. الوحدة و الشجن..الطيف كلمة مرتبطة بالوحدة.. (موسيقي تكتيكة متقنة)هي التي جمعت الكلمة مع صداها الموسيقي(الناي)..براعة مدهشة جداً و خيال (مفتري جداً)مدخل للعبور داخل النفس بأريحية و شفافية عالية..

اخبرني صديق مازحاً..(تعرفي ثروت شريط نانسي ده ما ينفع انو يتسمع الا في اماكن مفتوحة.. و انتي لافة بعربية او انتي واقفة بيها في الكساندرا بلازا بالمسا و المدينة كلها تحتِك..) احتبست ابتسامة فارهة داخلي و احتسبته عند الوعي (موالياً للجنون) و لكن ما ان استمعت للطيف حتي ادركت تماماً مدي مصداقيته..(غنية دايرة مكان مفتوح عشان تسمعا..) كحد ادني من دواعي السلامة...

طلال..اليك ثم منك ثم الي نانسي السلام
تحياتي

Post: #70
Title: Re: نانسي عجاج..يابت بيوت الهجعة كيف..و غبار شوارعك ماشي وين..
Author: طلال عفيفي
Date: 05-27-2008, 02:51 AM
Parent: #55

شكرا يا ثروت على تبادل المشاعر ..
حاجه لطيفة وحياة النبي ..

يا ريت كنت أعرف أكتب بالتفصيل ده ..

Post: #37
Title: Re: نانسي تـُزهِر
Author: singawi
Date: 05-21-2008, 10:46 AM
Parent: #1

Quote: كتب طلال عفيفي :
تعرفي ، انا بشعر إني :
بشوف صوت نانسي ..

الله .. الله .. اللــــــــــــــه

مدد .. مدد .. مدددددااااااد يا سييييدي

ممكونة

يديك الفي مرادك على الشقى والجنون البليتينا بيهو
تعرفي .. تعودت حين سماعي للسلطانة في أغنية ظلموني الناس
وعندما تجر ظلمووووووونييييييي بدون ما أشعر بلقى نفسي بقول .. تبري وتستبري
أها لقيت نفسي بكرر نفس اللازمة دي في مطلع شقي ومجنون دي
ممكونة .. رفقة بالله .. سمح

Post: #39
Title: Re: نانسي تـُزهِر
Author: كمال ادريس
Date: 05-21-2008, 10:55 AM
Parent: #1

يااللــــــــــــــــــــه ، مبالغــــــــــــــــــة.

Post: #72
Title: Re: نانسي تـُزهِر
Author: طلال عفيفي
Date: 05-27-2008, 05:21 AM
Parent: #39

كمال إدريس
وسنجاوي (تاني)

لكما التحية والسلام ...
والشكر طبعاً

Post: #40
Title: Re: نانسي تـُزهِر
Author: Osama Siddig
Date: 05-21-2008, 01:08 PM
Parent: #1

الشفيف طلال

لك التحية وأنت تخرجنامن هذا الجو القاتم , جو (ض) ضرب و (ق) قتل

حقانحتاج الى هكذا نسمة نستنشقها فى هذا الجو القابض

لك التحايا النواضر

أخوك

أســـــامة صديق

Post: #74
Title: Re: نانسي تـُزهِر
Author: طلال عفيفي
Date: 05-27-2008, 02:06 PM
Parent: #40

الجو القاتم ده يخارجنا منو رب العالمين
يا أسامه يا أخي .... رب العالمين وشوية
أغاني وشعر مما تيسر ..

وربك يديم اللطف ..

Post: #41
Title: Re: نانسي تـُزهِر
Author: Alsa7afa_30
Date: 05-21-2008, 03:53 PM
Parent: #1

Post: #77
Title: Re: نانسي تـُزهِر
Author: طلال عفيفي
Date: 05-28-2008, 11:25 AM
Parent: #41

الصحافة_30 !!
شكراً على إشراكنا في مشاهدة رفقة ؛
وكما مشكور العزيز حافظ خير على
التصوير والإخراج الرايق الجميل .

Post: #42
Title: Re: نانسي تـُزهِر
Author: عمر ادريس محمد
Date: 05-21-2008, 03:59 PM
Parent: #1

نانسى يابتى .. كيف بتقسمى كلمة شقى الملعونة دى لى

شسشسقى

يقسمك الجن

يامبدعة

والله العظيم وكتابة الكريم ياطلال اقول الحق ولا شى غير الحق فى حفلة عرس فى الثورة الحارة الرابعة الكحلاوى بغنى فى شقى ومجنون دى ذاتها دخلت ترقص بنية من جيهة حى السيد المكى اكيد وقطعا واظن ..يالطيف يامسهل كل امر عسير, اول شى الجماعة كلهم اتخجوا .القعد ارضا والبلع السفة, والمات مات وجات لحظة إتلخص الكون فى البنية والكحلاوى وهمسات الرق ووقفت النجوم تتفرج وهو ذاب فى"اساهر الليل برايا برايا برايابرايا"والبنية محلقة فى عالمها - دنيا يازول- ومعاها عيون الناس
يالله بجيك وبتسألنى الكحلاوى دا الله يرحمه طار فوق وضرب الدلجة

أخ

شكيتكم على الله

انا مارق من هنا نهائى

Post: #45
Title: Re: نانسي تـُزهِر
Author: أحمد طه
Date: 05-22-2008, 01:48 PM
Parent: #1

نانسي فوق
وطلال في القلب .

Post: #46
Title: Re: نانسي تـُزهِر
Author: محمد صالح علي
Date: 05-22-2008, 02:27 PM
Parent: #45

Quote: سبحان الله يا أخي ، تعرف .. في عالم
من الناس ربنا بيكون في بداية الخليقة
سلمهم مفاتيح قلبك ، وتصادف هؤلاء
الناس على فترات متقطعة من عمرك ،
كل واحد أو وحده من حملة المفاتيح
ديل يفتح قلبك ويرمي جواه حاجه :
هدية صغيرة ، فكرة لامعه ، أمل ،
قماشة شجن ملونه ، وكده بتقدر
تعيش كويس ، بسبب الناس العندهم
المفاتيح ..
مش قال ليك ما معناه في مُحكم التنزيل
إنو في ناس ربنا ختم على قلوبهم ..
ديل بقى ما عندهم مفاتيح واليعوذو
بالله !

طلال !!!
سلامات يا طلال

و تحية لنانسي

Post: #78
Title: Re: نانسي تـُزهِر
Author: طلال عفيفي
Date: 05-28-2008, 11:47 AM
Parent: #45

أستاذي العزيز أحمد
إنت كمان في القلب والله ..

بتمنى تكون بخير ..

تقبل محبتي الشديدة وتقديري العميق ..

Post: #79
Title: Re: نانسي تـُزهِر
Author: طلال عفيفي
Date: 05-28-2008, 12:11 PM
Parent: #78

محمد صالح
محمد صالح
محمد صالح
مشتاقيــن
ياأخــــي

زمن طويل ، مش كده ؟ ذكريات في طوابق عُليا ،
ونسيم منعش من ناحية البحر .. وزجاجات خضرا
ظريفه وصديقه .. وسينما وأفلام وحكاوي أخر
الليل .. وإبتسامات تزهر في حديقة المساء
على وجوه الحبايب من كل بلد ..

واليوم لا أعرف إين أراضيك !

شوف الدنيا يا إنسان !

Post: #47
Title: Re: نانسي تـُزهِر
Author: كمال ادريس
Date: 05-22-2008, 10:05 PM
Parent: #1

هذا البوست يجب ان يبقى فوق مع صحيييييح مجنون ، نطالب باعادتها.شكرا استاذ طلال وممكونة

Post: #48
Title: Re: نانسي تـُزهِر
Author: MOHAMMED ELSHEIKH
Date: 05-22-2008, 10:23 PM
Parent: #47

ابداع

Post: #50
Title: Re: نانسي تـُزهِر
Author: salah elamin
Date: 05-23-2008, 11:22 AM
Parent: #48

القلوب داخل هدا البوست
على مسئولية اصحابها.

Post: #82
Title: Re: نانسي تـُزهِر
Author: طلال عفيفي
Date: 06-06-2008, 01:13 PM
Parent: #50

سلامات يا صلاح
كيف حالك ...
والله الناس مشتاقين ..

Post: #80
Title: Re: نانسي تـُزهِر
Author: طلال عفيفي
Date: 05-28-2008, 12:20 PM
Parent: #48

الأعزاء كمال ومحمد الشيخ ..

نورتونا !!

مشكورين شديد

Post: #54
Title: Re: نانسي تـُزهِر
Author: altahir_2
Date: 05-23-2008, 02:37 PM
Parent: #1

طلال مساك الله بالخير
Quote: رفقة !!
إسم قصيدة ... حاله ...
كتبها يحيي فضل الله ، وتناولها ضياء الدين ميرغني باللحن والتحنان ، وحين تسمعها
تنبت في قلبك – يا صديقي – زهورالمحبة والحنين ..
موسيقى خفيفة ، ومدخل عجيب وساحر ينهض على إثره صوت البنت المغنية ليصول
في القلب ويجول !

وما كان لرفقة ان تصل بكل هذا الالق لولا صوت نانسى واحساسها بها
كنت خائفا ان تكون الظروف التى تناولت فيهارفقة اقسى من القدرة
على البوح ولكن ارادتها القوية جعلت طلبها لهذه الرفقة منفذا لرؤية
اوسع للحياة وتجاوز الصعاب . نانسى لم تكن تغنى فقط بل تتجاوز بها
واقع كامل ملئ بالاسى واعترف انها لم تتجاوزه فقط بل جعلتنا نحن ايضا
ننظر لافق جميل طالما غاب عنا. شكرى لعمر القصاص ايضا
ولى عودات مودتى
ضياء ميرغنى

Post: #56
Title: Re: نانسي تـُزهِر
Author: Kostawi
Date: 05-23-2008, 03:29 PM
Parent: #54

Post: #57
Title: Re: نانسي تـُزهِر
Author: Kostawi
Date: 05-23-2008, 04:07 PM
Parent: #56

Post: #59
Title: Re: نانسي تـُزهِر
Author: bent-elassied
Date: 05-23-2008, 08:59 PM
Parent: #57

ابداع نانسي

ما زال يزهر

كل صباح جديد

بالدرر و الابداع

شكرا طله

Post: #85
Title: Re: نانسي تـُزهِر
Author: طلال عفيفي
Date: 06-24-2008, 11:22 PM
Parent: #54

الطاهر العزيز ..
تقبل مني - أول كلامي : معزتي ومحبتي ..

أما بعد ..
فإننا نحيا في هذه الحياة على أمل ..
وعلى وعد خفيف الإشارة بأن الحياة دي
ممكنة ، بس محتاجه أن نصفو ، لو كان
الصفاء ده ممكن ..

نحن في السودان ، ضاعت بنا الأيام ، وسهكت
أمانينا : أفراداً وجماعات .. وضيعت الدنيا
علينا مساحات كانت من حقنا ..
لكننا بلماضتنا وعفويتنا جابهنا الإمتحان :
بالأغاني ..

عايز أقول ليك إني معجب بتناولك المزيكي
لقصيدة خالنا وصديقنا يحيي فضل الله ..
هذا النص اللطيف المـُعبر عما يحياه ناسنا
من وحدة فردية وخاصة ..
إنت عرفت يالطاهر تعبر بسهولة عن المزاج
التعبان المرهق العكران المحزون ..
وعرفت تلتقط شفرات الناس السودانيين هنا
و"هناك" ، وما أدراك ما هناك ...

يا سلام عليك يا الطاهر .. يا سلام ..
كما إنو يا سلام على يحيي ..

انا متأكد إنو الفن فيالخرطوم هيواصل ، برغم
كل الفوضى والخزعبلات ، ما دام الخيط موصول ،
باللحن والأغاني والشعر الطيب ..

بشكرك على صفا ذهنك ولحنك ..
وتلقاني واقف راجي ألحان أكتر ..

الله يبارك فيك
ويقلق منامك بالألحان ..

Post: #86
Title: Re: نانسي تـُزهِر
Author: طلال عفيفي
Date: 06-25-2008, 00:09 AM
Parent: #85

سلامات يا كستاوي ..
شغال شـُُغل في الصور يا ود الخال !

غايتو صابرين ..

ما عارف ممكن أحكي إحساسي بنانسي كيف ؟
المهم إني فرحان بيها وفرحان بمشهدي ليها ..

والله يديني العافية أعبر عن نفسي وأكتب عنها
أكتر ..

Post: #58
Title: Re: نانسي تـُزهِر
Author: altahir_2
Date: 05-23-2008, 08:39 PM
Parent: #1

ثم...
يا رفيـــق الهجعــــة...
و الليالي النجعــــــة...
في شرود النجمــــة...
و القمر الصديقــــــك...
من رفيقـــك...

ليتضخم السؤال..و يتردد في اللاوعي (مسافة تشتهي الغرقان شهيد) لتتكئ علي جدران الشجن وحدك و خلفك ذاك الصوت المؤهل لترتيب الذات...
ثروت همت
اشواقى تسبق تحياتى
خبرتنى العصافير ان (رفقة)
اخذتك منذ اول وهلة عرفتيها
واحتفيت بها وكل املى الآن
ان تكون قد جاءتك
كما اردتيها
مثلما تمنيتها
مودتى
ضياء ميرغنى

Quote: رفقـــــة يحي فضل الله...و ضياء ميرغني...احالتني لصالح بشري الفاضل عندما تجرع كاساً من نبيذ الجنون الكتابي و حاك حياكته المعروفة كمؤلف سماه فيما بعد (البنت التي طارت عصافيرها) فكنت انا البنت التي طارت عصافيري مع تلك الرفقة....(و باقي العصافير الفضلت دي اتبرعت بيها لصالح- ماذنبي)

Post: #60
Title: Re: نانسي تـُزهِر
Author: ثروت همت
Date: 05-23-2008, 11:13 PM
Parent: #58

Quote: ثروت همت
اشواقى تسبق تحياتى
خبرتنى العصافير ان (رفقة)
اخذتك منذ اول وهلة عرفتيها
واحتفيت بها وكل املى الآن
ان تكون قد جاءتك
كما اردتيها
مثلما تمنيتها
مودتى
ضياء ميرغنى

ضياء ميرغني..

او تعلم..(رفقة) اتت (اجمل من خيال المفتري) فطارت عصافيري.. و نفضت عنها غبار(النمطية).. حتي انها استطاعت ان تأتي اليك بأخباري (اي العصافير)
في بادئ الامر..اتتني بمدلول حياتي انساني عام..و لكن بعد سماعي لها في حلتها الجديدة (الاوركسترية) تغير مدلولها داخلي و اخذت منحني عاطفي..و ظني ان الاخيرة هي مقصد الشاعر يحي فضل الله..

ضياء ميرغني...ازيك
بالمناسبة..انتا زاتك غبار شوارعك ماشي وين!!

Post: #61
Title: Re: نانسي تـُزهِر
Author: bent-elassied
Date: 05-23-2008, 11:31 PM
Parent: #60

في حفل راس السنة 2008 بالنادي الدبلوماسي بالخرطوم

Post: #62
Title: Re: نانسي تـُزهِر
Author: bent-elassied
Date: 05-23-2008, 11:54 PM
Parent: #61

Post: #63
Title: Re: نانسي تـُزهِر
Author: bent-elassied
Date: 05-24-2008, 00:02 AM
Parent: #62

الروعة تزهر بغناء نانسي

Post: #64
Title: Re: نانسي تـُزهِر
Author: jini
Date: 05-24-2008, 00:05 AM
Parent: #1

الناس الأوديو فيزوال!
سمع وشوف!
دا الكلام ودا الشغل!
جمال الوجه والصوت لا يلقاها الا ذو حظ عظيم!
الله يخليها
جنى

Post: #67
Title: Re: نانسي تـُزهِر
Author: Abdel Aati
Date: 05-27-2008, 01:14 AM
Parent: #64

وتزهر.

Post: #71
Title: Re: نانسي تـُزهِر
Author: Maha Bashir
Date: 05-27-2008, 03:05 AM
Parent: #67

سلامات يا طلال...
وتسلم يارب عشان إنت إنسان كريم
ونانسي الجميله خليك كدي فنانه زي ما إنت...
وسمعت نانسي بتغني أغنيه ياصديقي كلمات يحيي فضل الله و الحان ضياء ميرغني
أعتقد هي واحده من أغنيات رفقه....أرفع قبعتي و أنحني لهم جميعا
وبس أقول شنو سبحان الله إبداع عالي وعذوبه منقطعه وربنا يحفظهم جميعا...

وبعدين يعني ياطلال نحنا هسه نسمع رفقه كيف؟
بعني ما معقول ولا شنو؟ شوفو لينا بكري
لما يرجع يجيب معاه كم نسخه و أنا حاجزه منهم
عليك الله ياطلال ولو عارف طريقه تانيه أتحصل علي الشريط أو السي دي قول لي

طلال عن إذنك بس تخريمه عشان مي الاسيد
مي إنت وين؟ أنا فاكره إنك لسه من طياره لطياره
ما تقولي لي إنك في الفاشر؟
و الله شوق شديد ونفسي نتكلم عشان نتم باقي الكلام

مع مودتي للجميع

مـها بشير

Post: #73
Title: Re: نانسي تـُزهِر
Author: عبدالغني كرم الله بشير
Date: 05-27-2008, 09:47 AM
Parent: #71

يالله عليك ياطلال، ...

ياخي اسعدك الله، وفرحك بكل جميل..

والله صابتنا حال من النشوة مع بروفاتكم المغردة..
البت دي عندها منقار كروان، وبلبل وتغرد كيفما تريد، فرحا، وشجنا..

والله اطرتبني، أطربكم الله..

بتغني بإحساس عجيب، جسدها النحيل، يكتوي بكل العواطف التي تغمر الأغنية..
كان الله والرسول واليسوع وماركس والطبري وماركيز في عونها..

حبي، ياطلال، ايتها الفراشة، التي تحلق من زهرة لأخرى...

Post: #75
Title: Re: نانسي تـُزهِر
Author: عاطف عبدون
Date: 05-27-2008, 02:19 PM
Parent: #73

Quote: نانسي تـُزهِر

وتفوح ابداعاً

نانسي .. ضياء .. يحيي فضل الله ... أغنيه أدهشتني

Post: #76
Title: Re: نانسي تـُزهِر
Author: bent-elassied
Date: 05-27-2008, 03:12 PM
Parent: #75

معليش طله

لخرمجة

العزيزة مها

الشوق بحر و الايام كانت جميلة و حوارات قيمة

و الله كان ذكرتيني لما اتلاقينا

و افصحتي عن رغبتك في شريط الفنانة المتفردة نانسي

كنت اديتك بتاعي " ما بغلي عليك"

و برضو ممكن نرسل ليك

رسلي عنوانك علي الاميل بتاعي

و كل الشكر لطلال و مها و نانسي

Post: #81
Title: Re: نانسي تـُزهِر
Author: ثابت محمد
Date: 05-29-2008, 09:45 AM
Parent: #1

الأنيق الأزرق طلال عفيفي

إرتبط حرفك ورسمك عندي بصوت نانسي عجاج .. والله حظك
حتى لو كتبت عن قبيلة الغجر برضو بسمع صوت نانسي .

قلت شنو ؟ نانسي تـُزهِر ؟؟ يااااخ حرااام عليك .. متين نانسي ما كانت مزهرة ؟؟
دي مـُزهـرة منذ أن كانت نظرة عشق في عيون والديها

الشغل ده يا طلال ما شغل الليلة ولا أمس
لالالالا .. ده شي من الإختراق الأول وبدء التكوين

كدي شوف الحمام ده بتشابى كيف

أضــــــــغط برفق لتسمع أغاني رفقـــــة

Post: #83
Title: Re: نانسي تـُزهِر
Author: ثابت محمد
Date: 06-12-2008, 03:24 AM
Parent: #1

من أجل الجمال ونانسي وطلال
تحميل إلبوم نانسي الأخير ( رفقـة )

أضــــغط هنـــا لتحميل إلبوم ( رفقـــة ) للمزهرة نانسي عجاج

وصية
قفلوا أي شيء في أي حتة وأسمعوا وإنتو مغمضين
مااافي حاجة بتستحق تشارككم سماع نانسي
والله جد

Post: #84
Title: Re: نانسي تـُزهِر
Author: محمد سنى دفع الله
Date: 06-12-2008, 05:58 AM
Parent: #83

عارف يا طلال
من طلع البوست
وانا بتحاوم بي بره
خايف عليك من انزل فيك زار
ولا تتلبلش ولا جلدك اهوش واقوم شوك شوك
عارف الحكاية
بنجي وبنحكيها ليك
عافي ليك
من الزار الطلقتو فينا
انا واحلام
ليك المحبة