(بطاقة معايدة) للعام الجديد

عدَّت سنه
وجيتنا تتاتى تاني
تاني يا راس السنه!
مرة عام
خطَّ الزمن لمساتو
بي الأسى والضنا
ورحلت سفاين الفرحه
فارقت الهنا
والدمعة نازَّة على العيونْ
لا عارفة تنزل.. لا تروحْ
أدمت العُمُر الجروحْ
اترجل الفارسَ الحزينْ
شفقان على فرسو الجموحْ
واتبشتن الوشَّ الصبوحْ
صار مسولَب ومنهزِم
جفلت مطالع الغنوه منو
وانحبسَ النضِم
حزنان على الطفل المضرَّج بالدِما
كايس على الطبشيره
والوان الرسم
كايس لو لي طرحه وهدم
لي اختو مكسورة الخواطِر
لي أمو جبَّارة الكواسِر
لي موطنو المدقوق
وسِم..
__________
وطناً فَرِض
وطناً إصول
وطناً عرِضْ.. طول أو عرِضْ
وطناً.. حرامْ
تنضامْ.. حرامْ
تنسامْ .. حرامْ
الله المحبَّة..
وانت السلام
انت الصلاه
وانت الصيامْ
ووراكَ تترصَّ الصفوفْ
تبقى الإمام
وانتَ العِشِق
وانتَ الهيام
وانت الدروس
وانت التُروس
وانت الفئوس
وانت المهنَّد والحُسام
________
يا وطني.. عدَّ عليك عام
وخطوتك مغروزة في الأرض الحرام
مغروسة في الطين
هيلا..
يللا..
إلى الامام
هات لي إيدك
لي جديدك
وأطلق أسراب الحمام
وادعو الغمام
والمزني
والنهر المدوبي على الدوام
النامِّي مربوع السلام
يجوا بامتثال..
في الاحتفال..
يزدانو بيك في كل عام
ويغسَّلو الحزن المعشعش
من وشيك
أنا شايفو في كفَّك .. عيان
فرحك وشيك
___________
أديني إيدك
خليني أفرح بي جديدك
واتمطق الحب من نشيدك
خليني ألثم جبهتك
وتُراب مسيدك
يا الإنت سيدي
والله سيدك.. يرعاك
يا عالي المقام
يحواك بالفُل والخُزام
يبراك منضوم بالعديلْ
بالخرزة..
والجرتق جديلْ
تتخنَّق الدلوكه
تتخلِف الشُتام
_____________
في شيومنا.. نقطع ليك جريد
ناضرنو في العام الجديد
تبريك وفال
نفرش لك القلب الكبير
تبروقه
نرفل في المديح
في الكرنفال
نغرق نسبَّح للسلام
سلام.. سلام.. سلام
__________
وين السلام!!
وينو السلام
مع السعالي والبوم والبعام
دهمونا في عزَّ الضلام
خلُّو شبَح الذُل يخوجل
في البيوت بيناتنا.. حام
ساويلو طار
والخوف مشبَّح في المضارب والديار
قطّ.. اللبن.. من الضرِعْ
وحرد الثَمَر... عافي الفرِعْ
واستوطن الوطن... الهوام
أفغان .. وشام
شيشان.. وجان
وناس طالبان
ونحن نحلم بالمحبه
نضوقه في كأس الوئام
الباقي أضغاث
واحتلام
___________
بكت الصبيَّه على الفحولة
على الرجوله
سبوها عن قاضي (النِظام)
جلدوها في نُصَّ النهار
حبست دموعه
اتلفَّحت هِدمَ المذله
خنقت لهاته العبره
وانبهَم الكلام
وين السلام!!
وينو السلام
والموت موتّد في المدن
(عرسان) من الوهم المخيَِم
في حشا الأمات
تكتحو بالسخام
وين السلام!!
حرِب..
ضرِب..
نَهِب..
سلِب..
متخومه يالقطط المدوعله
بي دموم (الصبيه)
و(الزاد)..
والعضام
مرجومه يوم الموقف
اليوم العصيب
في منصف العدل البينصف
جُملة الناس والسوام
__________
عند الله..
حقك ما بِروح
يا وطني يا الفارسَ الجريح
خاتاك ما هزَّاكِ.. ريح
لا اتخلل الزِيف المسام
لا اتحلل (الزول) من هواك
مجنونك الكاتلو الغرام
العاشقك ابداً... مصطفيك
بي ريدو دايماً محتويك
ما برضى فيكَ..
وبيكَ يختصر الكلام
____________
يا وطني..
يا النازِف.. وجيعْ
يا بلدي..
يا الراجِف.. فجيعْ
معايا في صحوي المسهَّد
وفي المنام
في مطلع العام الجديد
اتمنى ليكْ..
من قلبي... من جوَّه
السلام

=-=-=-=-=-=-=

ابها الجنرال الرقيق ( دي ذاتا انجاز !!! ) استمتعنا بليلة الامهريات في البلونايل وودنا لو افردت لك مساحات اوسع لتمتعنا بعظيم معرفتك المتنوعة ...وتحية كبيرة لهذه الكلمات عن الوطن العشق والهيام

Quote: وطناً فَرِض وطناً إصول وطناً عرِضْ.. طول أو عرِضْ وطناً.. حرامْ تنضامْ.. حرامْ تنسامْ .. حرامْ الله المحبَّة.. وانت السلام انت الصلاه وانت الصيامْ ووراكَ تترصَّ الصفوفْ تبقى الإمام وانتَ العِشِق وانتَ الهيام وانت الدروس وانت التُروس وانت الفئوس وانت المهنَّد والحُسام

شكرا صديقى ابوبكر ولك منى الف تحيه غى العام الجديد

الجنرال ...

كل عام وإنت بخير ...

لييه ما شفناك في جلسة يوم الجمعة الفاتت ؟!!