حيوها معي : فراشة تحلق بالجميع !!.

((** خضــــــــــر ود عمى عطاالمنان ..سلااااام يا عشاالضيفان ..
حبابك جدول الوديان .. حبابك مقنع الامات .. عشا البايتات ..
التحايا ليك متل غناك السمح .. يا جرف ملفح بالخدار .. ومدمدم بى تيراب الجدود.. مروى من نفسهم وعرق جبينهم .. التحايا ليك حجا حبوبات .. كلامك سمح بالحيل .. يشيل الاهة ويبقى دليل .. يرجع لى ديارنا رعيل .. يفرش الخدرة جمب النيل .. يهديك غناك المحكر فى دواخل اهلنا الطيبين .. انت منهم وفيهم ..من وسط اللمة ..ذكرتنى ورجعتنى لى قعدة عصرية .. وضل ضحاوية.. وجبنة متكية .. بهديك دعوات .. وامانى حبوباتنا الحنان .. يديك العافية .. ويخدر ضراعك .. ويديك الفى مرادك .. وين ما تقبل يا خدر ياود بلدى ..
التحايا ليك ممدودة بى طول بحرنا.. ورويانة زى قيفو الاخدر..
وشكرا ليك .. حواشات وجروف .. وتسلم يا سقف الاهل **)) .


انتهى .

****************************************************

كانت تلكم يا سادتي / سيداتي / آنساتي ..
هي كلمات تحلق بالانسان في فضاء بلا اجنحة ..
فضاء بهي .. زاه .. باهر .. مضاء بثريات المنى .. بقمر يراقص رمال شاطئ ذهبي . فضاء قرمزي .. تتمايل أطيار أغصانه طربا.. وتتغنى جداول مياهه باشجان الزمان الراحل منا كفراشات حاصرتها رياح بحر عاصف ..فأبت أزهاره الا ان تركع بين يديه..طالبة اذن بالرحيل الى حيث .. لا عواصف .. لا بروق .. ولا رعود .
***************************************************

تلكم كانت كلمات :
انسانة .. فراشة ملونة .. جاءت الينا بالامس وهي تبشربمقدم خريف عامر .. وخير وافر .. وذلك في زمان االجدبوالقحط المميت ..
وذلكم ما خطها يراع شفيف .. يستحم في بحر من الود الندي ..
يغسل من عيوننا غشاوة طالما شكونا منها .. يصرخ في وجه زمن أغبر ملأ دروبناعفاره .. وغطت ملامحه الكالحة سموات حياتنا ..
يراع ملأ دنيانا بروائع الالحان وشجي الموسيقى .
************************************************

أنها فارسة الكلم القادمة الينا .. وهي ترقص أمامنا بسيوف أجدادنا اللامعة .. ودعوات حبوباتنا الرائعات حقا ..انها تحمل تحت ابطها عبق ماض تليد .. وفوق رأسها صفيحة عطر يفوح : ألقا.. سموا .. رفعة.. وبين يديها المعطاءتين : فن .. فكر .. ابدع ..
أصالة .. عبق تاريخ ..ونفحات حاضر ..واشراقات مستقبل لن تكونه الا هي .
****************

حيوها معي ..
صفقوا لها ..

أنها سليلة مهيرة .. تلكم الرائعة أبدا : " ســــــومـــــا..
وقد كان ذلكم في عقدها الذي طوقت به أعناقنا جميعا ..
في بوستها الفريد : (( ليه بتنكر ؟؟ )) .


فهل أنتم معي ؟؟؟؟؟؟ .


خضر عطا المنان

انا اول من احيها معك استاذنا الفاضل تستحق التحيه تلك الفرشة التى تدعى سوما ...... احيها معك اخى خضر وابصم بالعشرة على التحية كما ابعث لها بى خمس نجوم لتلك الكلام الجميل الذى قئل من اجلك ***** اهداء هذه الخمس نجوم للرائعة سوما فى اناً من لؤلؤ
السمؤل

السموأل :

نجومك المضاءة وصلت وهي الأن تنام في حضن الفراشة سعيدة تغني .

لك التحية باحسن منها يا حبيب .

خضر عطا المنان

العزيز خضر

سوما تطيعها الحروف و تعصي من يريد قول فيها يساويها او يدونو منه

فقل سوما تكون قد قلت كل شئ
ســـــــــــــــــوما
بت البلد الاصيلة

عزيزنا نصار :

لقد قلت فأجدت .

فالفراشة بأمثالكم تحلق في فضاء بلا حدود .


خضر عطا المنان

الحنين خضر ود عطا المنان .. ما زال جودك وكرمك يغمرنى ايها السودان المتمثل فى بساطتك وشهامتك
وفى كرمك الفياض بلا حدود .. التحايا لك ايضا بلا حدود .. من ترابنا للسحاب .. وبهديك شدر الهشاب..

***
شدر الهشاب ..
اتشابا لي ضل السحاب
داير المطر ..
خايف اليباب ..
شاف ليه غيمه .. قال سراب .
ماظن تمطر كوم تراب ..
فجأة انهمر ..من غير حساب ..
بل الندى وعطر هضاب ..
بكت السماء..
رحل الرهاب
دنت الطيور من
الضباب ..
ركت تحت رسمت رحاب
رحل اليباس رحل الخراب ..
شدر الهشاب فرهد طرب
من تانى بى عودة الشباب
جدع صميغاتو ورقص..
رقصة غريب عاد للوطن بعد الغياب
********
سومــــا ... اسماء الجنيد مسقط


السمؤل .. التحايا والامنيات ليك لا بتتبدل ولا بتتحول..
بهيدك عبيرك النافح من زهرات كلامك .. والنجوم الوشحتنى بيها .. بهديك الفضاء السابحه فيه بى كنوزو وجمالو .. وبهديك الطيبه الجواك ..
والشكر ليك موصول.. والسلام من الاول يا سمؤل.. تسلم كتير..


نصار الحنين .. سلام يا ضل البيوت ..
نصار اسمح لى اهديك عديلة عرسك .. ونذكرك بايام فرحتنا بيك البتكبر كل يوم .. وربنا يجعل ايامك كلها فرح يا رب
والتحايا للمدام .. وهاك جزء من العديله وبرسها ليك كلها ان شاء الله لما اشوفك يوم اون لاين
****
نصار العريس ..
نصار النجيض الليله قام بدر..
عقد العزم لا اتوانى لا اتاخر..
حلف اليمين بالله قام كبر..
دق السدر اتحى واتجمر..
لف توبو للضراع شمر..
بين الدروب يتمايل يتمخطر..
كاس الفريق من دغشه داك بكر..
مد الرجل.. فى الخطوه زاد اكتر..
قاصد السمحه ..
الفى الخدر محروسه بى عسكر
بت الاصول..
غزال الباديه والبندر..
وقف خطوة ما اتنين..
وجمب الباب واتسمر..
قال يا لطيف..
ربى الكريم تستر..
القى الرضا..
وافوز بالغاليه ما اخسر..
بى ترحاب دخل ..
وقليبو من جواه يتنطر..
لاقى اب شنب ..
فوق عنقريبو الماكن اتحكر..
كيف بدا بالكلام.. كيف انتهى ؟
ما اظنه يتذكر..
بس المهم نال المراد ..
حمد الله واتشكر..
من دربو داك ..
فك العنان ولى رجلو ما فكر..
زف الخبر والفرحه فى العينين..
دموعا السايله تتقطر..
***********\تحياتى من تانى والبقيه طبعا انت سمعتها لووووووول فيها ناس حسن وسنارك وبشار وعمك جيلانى .. وبى شقر واختك سوما .. كدى ناخد اذن الذكرناهم لو وافقو بنزلا كلها .. ههههههه
تحياتى وامنياتى لكم جميعا
الاخ خضر والاخ نصار والاخ سمؤل
والشكر ليكم باقة مجرتقه ..

(( تحياتى وامنياتى لكم جميعا
الاخ خضر والاخ نصار والاخ سمؤل
والشكر ليكم باقة مجرتقه ..)) .

*****************************

كمان ليك مننا كلنا باقة حب تبللها عطور تفوح فخرا بك ..

تعطر دروبك أينما حللت يا سيدتي الجميلة .. تتغنى بأحرف

نديات خطها يراعك المسربل بالحنين .. والشوق .. والمنى .


لك الود سوما .


خضر عطا المنان

العزيز خضر

الحديث عن سوما ورطة و دخول فى الاضافر
شفت التحليق وصل لي وين
و العمق وصل ياتو اعماق
و نحنا ناس لا ارتاشت لنا جنح
و لا الفنا الاعماق اللامحدودة
نحنا يا اخوي بنقر في شبر
موية

يديك و _وسمونا_ العافية

عزيزنا : نصار
كلامك دا :
(( شفت التحليق وصل لي وين
و العمق وصل ياتو اعماق )) .

دا ذاتو قصيدة محلقة بلا جناحين .. وانما حروف تتكئ على مراقي

طيب مشاعرك .. ولطفك .. وعمق انسانيتك .. ولكنها تبقي هذا

( الفراشة ) الملونة هي صاحبة الفضل لمنحنا هذا الفضاء الرحب

للتحليق معا في سموات ابداع شجي بلا منتهى .

لك المحبة يا سيدي .

خضر عطا المنان

الاخوان .. نصار وود عمى عطا المنان ..
التحايا لكم اطنان..
كل ما اجى اتاوق فى ونستكم دى القى روحى بتلبد بالراحه خوفا من كلامكم السمح .. اقول يا ربى تقدرنى ارد بى سمح زيو .. لانى متاكده ما بقدر اجاريكم ولا اساويكم فى سماحتكم المحكره فى جواكم ..
نصار العفو .انت الزيك منو والبقدر ينضم زى نضميك منو وبحصلك فى طبعك منو ؟ الله يديك العافيه يا حنين..

اخوى خضر ..يعلم الله غرقتنى بى جودك يا نبيل .. ان شاء الله يوم شكرك ما يجى .. وان شاء الله فرحان ديمه ..والله بحس دائما ما قادره ارد ليك .. كلو من جمال حروفك الدرر.. كتر خيرك كتير وان شاءالله يا العشا دائما ملفح بالعفيه زى ماك ملفح بالطيبه السمحه
وتسلموا اهلى الحنااااااااان ..

عزيزتنا : ســـــــوما

كلما نظرت الى فراشتك المسافرة هذه بلا توقف .. تذكرت مطلعا
لقصيدة قديمة كنت قد كتبتها قبل سنوات خلت لا يستحضرني منها

الأن الا مطلعها القائل :

مرة شفتك وانتي ماشة
جاية تقدلي زي فراشة
زي صباح طلانا شايل
من نسيم النيل دعاشة.

فلك يا فراشة المنبر ولونه البهي التحايا ممن يعزونك
هناـ وما أكثرهم ـ .. بل من كل من افرد لكلماته مساحة طليقة
لتحيتك معي .

خضر

لسوما التحية
ولحروفها النقية تستجير الشواطيء بالموج والحقول بالزهرة والفضاء بالعطر..
ولك يا خضر الجميل كل أزمنة الصباح القادم إشراقا بك

معز

التحية لجميلة الخلقة والاخلاق
كم انا سعيدة لها وفخورة بنجاحاتها

ومزيدا من التقدم يا نسمة جاية من البلد
محملة بريحة الجروف والطين واللوبيا
تمسنا فتطفئ حرائقنا الداخلية

اريدك انت واريدك انت يا ست البنوت

والتحية لاخونا العزيز خضر لا يعرف فضل الاخرين الا راجلا فضيل

د/ معز :

هذا بعض من فضاءات كم عاشت وهي عامرة بكم .. تسافر بنا
من مرفأ لاخر.. نستحم عنده برزاز ابدعاتكم الندية ونغتسل
من هموم حياتنا ومكدراتها .

التحية لك يا زول يا سمح .

خضر عطاالمنان

العزيزة : بيان

باقة شكر أنيقة لك يا أصيلة.

حروفك عنوان لطيب اصلك وكرم فصلك يا سيدتي .

خضر عطا المنان

خضر الحبيب / تسلم يا غالى على التعقيب والكلام المعسول
سوما الرائعة / يذدنى شرف ويسعدنى ان ترسل لى التحايا التى لا تتحول ولا تتبدل ..... ماانت اصيلة وزينة الفراشات الجميلة لك حبى وتقديرى
السمؤل

ابني الوفي : السموأل

كلما وجدت اسمك هنا ادعو لك بطول العمر والتوفيق يا معدن
الوفاء في هذا الزمن الصدئ .. فهذه ( الفراشة ) هي امتداد
لروحك المفضالة يا ابني .

لك المحبة.

خضر عطا المنان

الحبيب خضر عطا المنان


ومن لا يعرف ما سيدى تلك الشتلة المخضرة التى تجعلك تومىء اليها وتقول هنالك سودانيزاون لاين ..

سوما التى عطرت ساحاتنا بحلو الغنا وحلو القصيد وجعلتنا بحق نحس بالوطن الجميل وهانت تأتى لتشكل معها ثنائى لا يوصف بالروعة فقط بل ان كانت هنالك مفردات اعمق فهى لكم وانتم تتغنوا لنا دوما بالوطن وتذكرونا كل ركن قصى فيه لم تسطع فيه الاضواء ولم توجه اليه الكاميرات الكاذبة ...

لكم التحية معا فانتم هنا واحة نرتاح تحت ظلها الظليل ونسعد ونهنا ..

لقد قالت فى حقك الكلمات التى نحس بها ولا نستطيع صياغتها هكذا ولا غرو فهى المبدعة دوما فالف اهلا بعودتها من الاجازة ...

لكم التحية معا فانتما هنا واحة نرتاح تحت ظلها الظليل
ونسعد ونهنا ..

لقد قالت فى حقك الكلمات التى نحس بها ولا نستطيع صياغتها
هكذا ولا غرو فهى المبدعة دوما فالف اهلا بعودتها من الاجازة .

***************************************
عمدتنا بلا منازع : صديقي قرشو :

أنها تحيات مبجلات نردها لك معا ياحبيب الكل .
هكذا أنت مذ عرفتك في سبعينيات قرننا المنصرم
تزداد ـ كما الذهب المجمر ـ كل يوم أصالة وبهاءا.


خضر عطا المنان

الأخ خضر عطا المنان



(أنها سليلة مهيرة .. تلكم الرائعة أبدا : " ســــــومـــــا..
وقد كان ذلكم في عقدها الذي طوقت به أعناقنا جميعا ..
في بوستها الفريد : (( ليه بتنكر ؟؟ ))

تحية صادقة للحرف الأصيل (سوما)

وللمزيد من بديع التغني

والمنى طيبات

أحمد الشايقي

الكريم : ود الشايقي

شكرنا ليك بلا حدود.. ( بالجرانين ..
الا الجواب اتملا بالصفحتين ) .

لك مني ومن ( فراشتناالجميلة ) خالص الود.

خضر عطا المنان

أسندي الشوق
عشان يختار معاني الريدة فيك
أسنديهو
ما أصلو بلاك مايل
مابيعرف لوين
تسوقو رجليهو
أسندي الباقي من خاطري
عشان باكر تلاقيهو
متبسم
فاتح ليك أحضانو
بي شوقك تقالديهو


دي جديدة لنج يالعم خضر

للضيفة الف تحية

طارق ع الأحمدي

الابن العزيز : طارق

رائعة .. رائعة ..

نأمل ان تتحفنا بها كاملة .

وشكرا للتحية لي ولـ ( الفراشة)..
وانا نبادلك التحية ذاتها .

لك وللاسرة الكريمة سلامي .

خضر عطا المنان

سوف استلف صفة _الجعولية_ و اشرع في مشروع عرس تاني
اكراما لمهيرة العصر الحديث لأن قصيدها يفوق مناسبة
واحدة و عشما في أن احظو بزيادة
ولا طبظتها يا شباب؟
لووووووووووووووووووووول

نصار :

يازول انت بتتكلم جد ؟؟؟؟؟؟؟؟؟

أديني المرة دي جاي ‍‍‍‍‍‍‍... أكيد ما سمعت الكلام دا ...

أخليك عاقل كما تعودنا منك يا نصار *********

لكن برضو دا ما يمنع نسمع كلنا رأي ( الفراشة ) .

لك الود.

خضر عطا المنان

أستاذ خضر

ظللت مُنذ قراءتى لهذا البوست الجميل موضوعاً ومُحتوىً ، ظللت أحوم أمام بابه وأخشى الولوج إليه من جديد وقلمى عاجز كُل العجز عن توشيح النجمة البرّاقة الأستاذة أسماء بما يتناسب وألقها وروعتها ، فعُذراً لقصر القامة والذى لايتناسب وقامتها السامقة ..

أدعوك لقراءة هذه الحروف

عشان نرجع نتحكر فى الواطه ونتربع
نحسب الفات من الايام نعد اصبع فوق اصبع
نخت العشره جمب العشرة نعد نجمع
نقول للداير الرجعه صمدنا خلاص وما بنخضع
ونقول للتائه مع الدنيا كفايه طمع
عشان نرجع نخر ساجدين نخر نركع
نسبح ديمه فى الرحمن وبى ايدينا نتضرع
نتوسد ليلنا صبر نتحزم نضم ايدينا نتشجع
بعد نرجع نشوف القمره يوم تطلع
نجوم ساطعات لقاء عشاق لعب شفع
ضفاف النيل والخضره جمال الخالق الابدع
حبوبة تحجينا حكاوى السمحه من بلدى تتحلى بالصفات اجمع
وعن والد هميم وكريم يقوم باكريه يحش يزرع
وود حبوبه ديمه جسور لا يوم خاف ولا اتزعزع
وعن فارس دوام حارس لا دبابة لا مدفع
وبعد ارجع اكون سواح فى بلدى اشوف الكنت بيه بسمع
شرقنا سواكن الشامخه جمال سنكات ومصوع
وفى ضفاف القاش اقيف ارتاح وجبال توتيل هناك اروع
وسط بلدى جزيرة الخير عطاها وفير لا بتكل ولا بتقنع
وفى الخرطوم لقاء النيل زى عاشقين متعانقين من المنبع
شمال الفن من مروى منبع التاريخ والمرتع
حكاويهم شعر منسوج فى العايش والودع
غربنا جمال وراحة بال نطوف ونشوف ونستمتع
جنوبنا الحاضر الماضى بى خيراتو جاد ونفع
وبعد أرجع اعانق بلدى بى لهفه عين تفرح وعين تدمع
عين تفرح وعين تدمع .... عين تفرح وعين تدمع

أستاذة أسماء لك الإنحناء

_________________________________________
[email protected]

الفنان : لؤي

يا سلام ...... يا سلام .

يا لروعة هذه اللوحة مع بساطتها المحببة للنفوس .

وكما تقول يا راجل يافنان :

(( أستاذة أسماء لك الإنحناءة )) .

نحن كمان لا نملك الا ننحني لك ياحبيب الكل يا لؤي .


لك المحبة والتقدير مني ومنها ( الفراشة ) .

خضر عطا المنان

وهانحن مازلنا نهيم في الفضاء تحليقا مع ( فراشتنا أسماء ) ..
فنقف معا عند محطة دفعنا الى مرافئها الدافئة الفنان الحبيب
لؤي الرقيق فنقول :

من صباح ازداد وميض
من نهار هامت غيومو
ومن ليالي أفراحا بيض
من تراب رويانة طيب
ومن طمي النيل البفيض
جيتي أنتي ..


جيتي انتي
ولينا بنتي
وفينا عشتي
وصرتي انتي
فرحة للناس الغلابا
وضي مصابيح الضهابا
خير بيرقص في سحابا
وغنوة تاهت في ربابا

وأنا.........
يا نسمة في عز الدغش
يا بسمة فوق اهلي الغبش
من عيونك وين بمش ؟؟
يا فرح زاد السنين
ياشعاع فوق الجبين
أفوتك وين
وأروح وين
يالوحة رائعة على رمش
يا فرحةفي الأعماق تهش
من عيونك وين بمش ؟؟ .

************************

لكم جميعا محبتي وتقديري .

خضر عطا المنان

سلااااااااااام اهلى الطيبين
عذرا للغياب الما بى الليد ولا بالخاطر ..
التكنلوجيا العجيبه حالت بينى وبينكم طيلة هذة المده.. التى احسها سنين غبراء فى عتمة صحراء الغربه اللئيمه.. لكن لم تستطع تلك التكنولجيا المتعجرفه ان تحول بينى وجدانى واحساسى بكم ايها الاهل الغبش .. وكنت سعيده باخضرار جروفى بنسمات كلامكم المن رحيق البلد .. حينما تطوف بخيالى كلمات اخوى خضر .. والحبيبه بيان .. والاخ نصار والحنين لؤى
والشفيف المتواضع د/ المعز وعمدتنا الركازه قرشو .. واخوى السمؤل..وود الشايقى .. وطارق سيد احمد وكثيرووووووووووون .. كم انت سعيده يا سوما بت الجنيد ؟

احبتى لكم العتبى حتى ترضوا فى هذا الغياب الذى طرا لعطل مفاجىء فى الشبكه ..
والحمد لله عدت لكم واسال الله ان تكونوا فى سعاده وعافيه ..آمين ..


مرة شفتك وانتي ماشة
جاية تقدلي زي فراشة
زي صباح طلانا شايل
من نسيم النيل دعاشة


اخوى خضر التحايا والموده..
عارف الابيات الكتبتا فوق دى .. ذكرتنى قصيده كتبتها قبل مده برضو .. وان شاء الله تسمعا ملحنه من اخونا الحنين مصطفى السنى ..


القصيده اسمها طيف**
بتقول ...

. طيف .........
مره شفتك.. وتانى شفتك
شفت صورتك ..
فى كلامك وفى سكونك
فى ملامحك و فى عيونك
فى طيـــــــــوفك
وفى خضرة قطوفك
وفى شرفات قيوفك
فى المياه الجاريه من بستان حروفك
شايله من لون السماء
وخاطفة من لون المساء
شاربة من طين البحر
من حنان دافر كسر
من غيوم رويانه بى موية المطر
وبينى بينك سكه عابرة وكم ممر
وبرضو شفتك ونحن فى ضل الشدر
وتانى شفتك
بينى بينك ..
المسافات والعذر
والغنيوات والذكر
والنجيمات الفجر
والنسيمات العصر
وتانى شفتك نحن بناجىالبدر
شاتلين حنين ناضميين درر
فارشين ورود لوحات تسر
وتانى شفتك ونحن فى اجمل عمر
وبرضو شفتك
يا نجمه بتغازل القمر
سومـــــا
اسماء الجنيد
مسقط ...... عمان

اخى خضر التحيه ليك جرف اخضر..

*****
دكتورنا وشاعرنا العتيق المعتق المعز .. الله يعزك ويعز مقدارك يا فخر بلادى
قرأت لك واستمعت واستمتعت كثيرا بحروفك التى تحلق فى فضاء وعالم آخر غير عالمنا هذا .. وحضرت لك جلسه مع الاخت امدرمانيه فى احدى غرف البالتولك .. وكنت سعيده للغاية حقيقة .. ووعتدك حينها ان ارسل لك بعض من كتاباتى المتواضعه .. ولكن ظروف حالت دون ذلك .. وانا الخسرانه اكيد .. ولكن سوف اعوض تلك الخساره بالكتابه لك قريبا جدا ..
د/ المعز حقيقة اسعدتنى طلتك اليوم .. واسعدتنى عباراتك الانيقه يا كثيف العباره ..
وهذا ان دل على شىء انما يدل على طيبة قلبك وقمة فهمك وبساطتك وتواضعك الباين فى ملامحك ..
الشكر والتقدير لك اخى الكريم ممتد بمساحة قلوب اهل بلدى وطيبتهم ومحنتهم ..
وتسلم يا ود القبايل ..

****
الحنينه بيــــــــــان
بت الخلاوى والذكر
والحجاوى والفكر
التحيه ليك انتى يا غيمه مطريه .. طايفه ضهريه .. تروى من طرف ..
و تبرد جوفنا من حر الغربه وسمومها..
تسلمى انتى بت امى انا ويسلم قلمك يا خيه فى زمن الهجير..
الحبيبه بيـــــان الشكر ليك حجاوى حنينه ..

****
السمؤل تسلم يا ود القبايل ..
من اصالتك وطبعك يعلم الله
الله يعلى مراتبك ويديك الفى مرادك
وشكرا على الطله من تانى يا ود بلدى ...

****
العمده الاصيل ود قبايل النيل.. يا ضهر الشيل .. والبسند الحيل
تسلم عمدتنا المضرضر ومعطر بى نفس اهلنا الغبش..
ويديك العفيه يا رب .. ما بقدر اقول فيك اكتر من القلتو فينى .. وده وسام وتاج راس والله يا اهل البضربو نحاس .. يعظم شأنك ان شاء الله يا دخرى الحوبات ..
عمدتنا العزيز .. الشكر ليك مطر دغش نازل غزير مليان برد....

*****

اخوى ود الشايقى .. ود النخيل والتمر .. والحنين والوتر.. والكلام المو كتر..
الساقيه والجروف .. وناس المعروف .. وناس البكرمو ضيوف ..
التحيه ليك قدر حنانهم وطيبتهم وكلامهم المروى من رحيق الجدود ..
ود الشايقى شكرا بعظمة نخيل بلادى .. يا ود الشمال العتيق..

*****
الاخ الكريم طارق سيد احمد ..
ما اروعك .. وما اروع حروفك ..
اهديك الدهشه وانت عطرت دارنا بعبق كلامك يا مبدع..
اخى طارق رجاء اتحفنا بكل ما تملك من تحف رائعه يا مبدع من بلادى ..
اخى طارق شكرا غنوة من البلد ..
*****
نصـــــــــــــــار
ذكرتنى نكته ظريفه جدا .. حصلت لى اخونا بدر الدين شنا .. الله يطراه بالخير
طبعا ود اهلنا ومن منطقتنا فى الجزيره .. كل ما يمشى الاجازه بمشى لى ناس البيت فى الجنيد .. وفى آخر اجازتو ضربتو ليك فلسه ظريفه .. لوووول وكان ناوى يمشى الجنيد .. اها صاحبنا بقى كل ما يقعد يقول يا ربى تسهل لى مشية الجنيد ..
مره فجأة كده وقدام حبوبتا لينا حنينه .. كانت راقده وهو فاكرها نايمه .. قال والله يا جماعه حقو الزول يعرس .. هههههههههههه .. حبوبتنا قامت على حيلها وادتو ليك نهره .. قالت ليه كدى القى ليك قروش امشى بيهن الجنيد .. كمان داير تعرس تانى ؟ ههههههههه

اها انت يا نصار دحن يا خوى .. لما تلقى ليك عديله تانيه بعدين اتفاصح لووول .. وبينى وبينك وتضامنا مع عزيزتى المرأة . مافى ليك عديله تانى تب لا تتجوعل ولا تتروبط .. على وزن رباطابى لوول
تسلم كتير والتحايا للمدام الحنينه .. والله يديكم العافيه يا رب..


لؤى الحنين .. العفو يا اخو البنيات .. والله انت الكل فى الكل .. وانت الساس وانت الراس وانت الديمه شايل الكاس .. انا خيتك يا ود القبايل يا لؤى سيد الفضايل..
وبهديك ام الزين يا الحنين . ..


*** أم الزين ***

ضلاله بي طرقه
مشروره في حيطة
متكوله بي مرقه
رقراقا بيتاوق
بيناغم ألفرقه
حداها أم الزين
لابساها نص فتقه
بلامه في وجيها
ملتوقه بي لفقه
شايلالا خماره
في حليلة متحرقة
وقودا في اليدين
حازماه بي بتقه
جهالا بي غادي
تشابا في شفقه
تغنى وتهاتي
لصغيره بي رقه
تحجي يوماتى
خايفالو من شرقه
مقسومة في العينين
ما بتعرف ألمرقه
معيشة زى همين
تبداها بي طرقه
وحليلة في منقد
بصلاتها متفرقة
قفيفه مقدوده
مرقوعه بي ورقه
تتناول الفندك
تنادى للرفقة
كريمه أم الزين
بتقسم ألنبقه
حنينه للمسكين
تسقيه بالبقة
دمعاتها جوه العين
فرحانة مى حرقه
تلولى في الكرعين
ما بتعرف النقه
تحجي بالوالدين
لا صرخة لادقه
السمحة نواره
مرسومة ألخلقه
تتفقد ألجاره
بالنية مي زرقة

اسماء الجنيد
مسقط 26/3/2004
سيد البيت والدار كريم المقدار .. اخوى خدر ابقى عشرة على الضيوف والعقاب .. وتسلم يا عشاى ..
فتك بى عافيه .. وبجيكم تانى باذن الله
تسلموا يا اهلى ..

جيتا جيتى يا ست البنوت لى حدهن

البوست دا ذى كباية موية سااااااااااااااااااااقطة
شهر ستة ليى زولا جاى من التحتانية شايل ليه راس حطب
و برسيم...
يلا بالله اعطنونا وارونا بريحة الطين والجروف...
وتعيش سومة يا نسمة جاية من البلد
يا اصيلة....

Quote: يلا بالله اعطنونا وارونا بريحة الطين والجروف... وتعيش سومة يا نسمة جاية من البلد يا اصيلة....

المُحترمة دكتورة نجاة " بيان "

وصفك للرائعة سوما بأنها نسمة جاية من البلد كان لى كالقاموس الذى إهتديت به إلى بعض ماشيدته سوما فينا .

لكِ التجلّة

لسوما ولكِ ولكن/م جميعاً أهدى .. يانسمة .


ــــــــــــــــــــــــــــــــــــــــــــــــ
[email protected]

تعرف يالؤي يازول يا فنان :

دي عايزة ليها كباية شاي باللبن المقنن كدي .. وصينية زلابية
مدببة مغطسة في سكر ناعم .. وقعدة مغربية عند باب حوشن
واسع مفتوح على ميدان كبيركدي .. وناس البيت كلهم متحاوشين
بعض في حلقة ونسةوضحك وفرفشة ....... الخ تلك اللوحة الرائعة.

لك محبتي يا لؤي
ولفراشتنا الجميلة سوما أصدق المنى .

خضر عطا المنان

خضر ياعزيزى

Quote: دي عايزة ليها كباية شاي باللبن المقنن كدي .. وصينية زلابية مدببة مغطسة في سكر ناعم .. وقعدة مغربية عند باب حوشن واسع مفتوح على ميدان كبيركدي .. وناس البيت كلهم متحاوشين بعض في حلقة ونسةوضحك وفرفشة ....... الخ تلك اللوحة الرائعة.

رفقاً ياحبيبى .. يعنى عاوزنا نقوم هسه نمشى السودان ولا شنو ؟

لك وللرائعة سوما كل الوُد


ـــــــــــــــــــــــــــــــــــــــ
[email protected]

((** رفقاً ياحبيبى ..
يعنى عاوزنا نقوم هسه نمشى السودان وللا شنو ؟ **)) .

********************************

لؤي :

ياريت يا عظيم .. وكمان تكون كملت جمايلك علينا لو سقتنا معاك..
أصلي مشتاق ليهو كتير هذا السودان يا لؤي .

مني ومن فراشتنا الأصيلة (سوما) سلام بلا حدود .

خضر عطا المنان

خضر عطا المنان