** سبت عثمان ... علي ايقاع الوازا...

عرض التلفزيون السوداني قناة النيل الأزرق حلقة تراثية عن موسيقي وتراث منطقة النيل الأزرق .. استمتعت بنماذج الأستاذ سبت عثمان .من منطقة افدبالنيل الأزرق حيث قبائل البرتاومارست كالعادة التعايش مع اللحن وفي الخاطر مناطق الانقسنا وبراري وسهول المنطقة وطيبة إنسانها وتعايشه السلمي ..
سبت عثمان ..له لونيته الخاصة التي ساهم بها في نقل تراث المنطقة بشكل مختلف من ناحية شكلية الآلة الموسيقية مع المحافظة علي القيمة الفنية والقالب اللحني والإيقاعي .. حفزت تجربة سبت عثمان العديد من الموسيقيين للانتباه لتراث المنطقة .. وكانت تجربة " عاصم الطيب قرشي " من منطقة الروصيرص وخريج معهد الموسيقي والمسرح المتخصص في آلة الكمان .. واجتهد في تجربة شاقة حاول من خلالها نشر أعمال المنطقة بإيقاعاته المختلفة ومعالجته موسيقيا بشكل اكاديمي مع الاحتفاظ أيضا بالسمه المميزة للعمل وقد نجح في ذلك إلا أن التلفزيون وكالعادة يحفز المبدعين دائما بحفظ جهودهم علي ارفف المكتبة. أو اقرب سلة مهملات.

Save @ PC

Save @ PC

سبت غنا هنا برضو

تمبس
يا أخي إنت حكاية ما تنتهي
شكرا على هذا الجمال

شكرا يا علاء..
طبعا نحن محرومين من قناة النيل الأزرق..
وفيك الخير...أخيرا تحصلت علي نوعية من الغناء
لا أملكها..وكم هو غني هذا البلد الجميل...

تعرف ياخال
مشكلتي مع قناة النيل الازرق معقده خالص .. وما حصل حضرت فيها شي كامل لانو لما اصل البيت بلاقي الشخوط الملونه وبعد شوية وشششششششش اها دي احسن منها ما يكون عندكم خالص
اليوم داك فتحت الجهاز لقيت سبت بيغني .. قلت ليهو مافي ليك طريقة الليلة وشبكت الحاجات واديتو مايك .. وكنت خايف ما يطلع التسجيل نضيف لكن انستر معاي وفعلا كانت حلقة جميلة جدا .. ومدهشة وخاصة ان بعرف كتير عن طبيعة المنطقة وعشت فيها فترة .. واتنقلت فيها ..
السودان غني بي التراث .. بس المشكلة كيف الاجتهاد وكيف نقدر نطلعو للعالم .. اذا كنا ما قادرين حتي نوصولو الخرطوم حقتنا دي ؟؟
انا ح اتابع البرنامج دي بي اهتمام لانو شكلو كده بيقدم حاجات جميلة وكل مرة ح الطش ليك حاجاتوالبركة في عمك تنقو اداني سر المهنة وعلمني السرقة

ابوجهينة يا دكتور
مليون سلامات ياخ .. والجمال بيمر من عندك طبعا وبيجيب لينا الباقي
ياريتك لو لقيت ليك فرصة ومشيت علي جهات الانقسنا .. دي ح تنسيك العالم اللفيتو ده كلو غايتو كان اتلاقينا هناك .. انا عازمك رحلة صيد ( اوز بري .. وجداد وادي ) وحفلة بالليل باللوازا .. بس كان ما رجعته تاني ... ما علي

تمبس ..سلامين ..
شكراً على نشر هذا الجمال ..وأتفق معك بأن التلفزيون يحرمنا الكثير الكثير من الإبداع والمبدعين في بلادنا ..
** هذا السبت عثمان أنتمي إلى ألحانه وطيبة وجمال تلك الديار .. خاصة عندما يدعو "حليمة" للرقيص .."حليمة ماكليا أدون هزا .."..
شكراً ..تمبس ..

قيسان

قيسان ازيك شديد خالص
مرة حضرت حفلة بي الطاهر في " اقدي " مشيت قلت ليهو غني لي " انزي تايو " متعني فيها
تاني قلتليهو غنيها .. تتخيل انو غناها لي مرتين تاني يوم مشيت السوق اي شريط لي الطاهر اشتريتو .. وان في طريقي للخرطوم فقدت شنطة السفر وفقدت اشرطة الطاهر ..

منتظر منك اضاءات كتيرة عن سبت ياريت ...

تمبس
أنا قبلان العزومة و مستعد. أها رأيك شنو في إجازة الصيف الجاية ؟
البندقية و العربية علينا ، إنت عليك الباقي.

لالا يابوجهينة

كلو علي انا ده ...تعال بي عضمك بس في زول بيعزموهو بيجيب حاجاتو معاهو ؟
بس الخريف الوزين بيكون ربيان وجداد الوادي ..ممكن تقنص ليهو من خشم الباب ..ود قاسم بيمشي معانا ؟؟والا رايك شنو ؟؟

تمبس
وابوجهينة
ممكن تعزمونى معاكم؟
وما تنسوا انا بت الحتة ديك

تمبس ..سلامين ..
طيب إنتا كان حضرتا حفلة وازا من الصباح وحتى بعد مغيب الشمس في "خور تُمد" بقيسان ..
وتحت ظلال غابة اشجار المنقة..تقول شنو؟؟
..أو أمسية خريفية على انغام ربابة "حسن كرمك"..ورقيص متواصل بنفس ايقاعهم ..
إنها النيل الازرق ..المكان ..كل شيء ما زال بِكراً..الارض والانسان بكل طقوسه وثقافته..

أتمنى ان تقوى النيل الازرق القناة على الوصول الى تلك الكنوز ..و"تنعل إبليس وتقول خير" وتنقل الأشياء كما هي ..والنقل أمانة (ياليتهم يعلمون)..

من ترى يمنحني حفلاً بفرقة الوازا..وعلى رمال خور "تُمد" ..وسط قيسان ..لأرقص من الصباح حتى بعد مغيب الشمس ..كعادتهم ..أو حينما يمازح "حسن كرمك" ربابته الجميلة:
جات شايلة الزخيرة وين ..
وقيسان الجميلة ..وين ..

أقعدوا عافية