سؤال محيرني..

Post: #1
Title: سؤال محيرني..
Author: tmbis
Date: 06-27-2005, 04:50 PM

هل هذه المساحة تولد الكراهية والعناد ..
ام الحب والتسامح؟؟

Post: #2
Title: Re: سؤال محيرني..
Author: Hatim Elhassan
Date: 06-27-2005, 04:54 PM
Parent: #1

يا ولدى الدروب ركابه بحر التيه

ما تسال كتير
بتتلحس

واحد صاحبك فى المتوسطه

Post: #3
Title: Re: سؤال محيرني..
Author: tmbis
Date: 06-27-2005, 05:05 PM
Parent: #2

ما عشان اللحسه دي زاتو
قلنا نسأل
لانو الواحد بقى كان شاف ضلو بزازي ليهو بلبد ليهو في الشارع التاني

Quote: واحد صاحبك فى المتوسطه

واحد
وصاحبك
وكمان في المتوسطة ؟؟

انت قصدك شنو عندك مشكلة قديمة معاي والا شنو ؟؟

yashoogy(at)hotmail.com
اجدع هنا إذا بتقدر

Post: #4
Title: Re: سؤال محيرني..
Author: مصدق مصطفى حسين
Date: 06-27-2005, 05:10 PM
Parent: #1

تمبس ..... ســــــــلام ..

Quote: هل هذه المساحة تولد الكراهية والعناد ..

من المفترض أن تكون الإجابه : لا

Quote: ام الحب والتسامح؟؟

من المفترض أن تكون الإجابه : نعم

لكن الحاصل شنو ؟؟؟؟ الله تعالى أعلم .

Post: #5
Title: Re: سؤال محيرني..
Author: tmbis
Date: 06-27-2005, 05:38 PM
Parent: #4

والله يا مصدق
واظن
وعلى ما اعتقد
المسألة عاملة زي الجلابية الانصارية .. تخش فيها طوالي بتقبلك.. ماشي قدامك زي الراجع وراك مفترض تكون نعم تطلع لا ..
ومفترض تكون لا تطلع Yes

بس الترزي لازم يكون حريف
والقصة جايطة.

Post: #6
Title: Re: سؤال محيرني..
Author: humida
Date: 06-27-2005, 05:45 PM
Parent: #5

عارف يا صديقي تمبس
الشخصية السودانية تحب الجو العكر
شخصياتنا النمطية اتخذت وضعية الشجاعة
في مواقف استفزازية ..
من حريق المك نمر الي اقرب شكلة مع كمساري
اظهار البطولات يأتي دايما في خضم الجوطة
اضرب وبعدها نتفاهم .. قانون شفع الحلة
جهلك ما يميزني ..
فأن كنت افقه كل شئ فلا داعي لوجودك ..
شخصيتك مرتبطة بجهلي ..
ولله في خلقه شئون .. اللهم لا شماتة .. !!

Post: #7
Title: Re: سؤال محيرني..
Author: tmbis
Date: 06-27-2005, 06:03 PM
Parent: #6

يا حميدة
الكلام ده سمح .. ومنطقك سليم كالعادة
لكن
ليه ما نصوغ قوانين جوانية تحتم علينا .. الضبط والربط بتاع الجيش
يعني قبلما نضرب ليه ما نكبح جماح يدنا المطلوقة دي ؟؟
اللسان البنسلو مترين ده ،، ما نخت في بالنا انو في مليون لسان زيو؟؟
وقبال ما نشرع في الخصومة البتجيب العناد
ما نخت في بالنا انو الطرف التاني ده ما بيستحق القصة دي
وممكن براحه نوصل ليهو الفكرة
مش ممكن ؟؟

Post: #8
Title: Re: سؤال محيرني..
Author: humida
Date: 06-27-2005, 06:30 PM
Parent: #7

طيب ..
ما انت/وا تصوغوا القوانين دي ..
اجي انا اطلعها ليكم شمار في مرقة
تتغاظوا
تمدوا لسانكم ..
اقوم انا أمد يدي ..

ياخي ما قلت ليك احسن نتضارب بالاول .. !!

Post: #18
Title: Re: سؤال محيرني..
Author: tmbis
Date: 06-29-2005, 00:43 AM
Parent: #8

Quote: ياخي ما قلت ليك احسن نتضارب بالاول .. !!

ما المحيرني الضرب ده زاتو يا حميدة ومدان اليد
يعني تاني مافي حل غير كده ؟؟

Post: #9
Title: Re: سؤال محيرني..
Author: Elnasri Amin
Date: 06-27-2005, 11:43 PM
Parent: #1

سلام تمبس
حمدلله على السلامه

بالنسبه للسؤال بتاعك...

اعتقد الاجابه تكمن فى تقبل الاخر...

الشغلانه تبدا بالشعور بعدم الارتياح

تتحول تدريجيا للغيظ

يصبح الشخص الاخر "غياظ جدا ويسل الروح"

شويه شويه تتحول "لكجين" و عدم ود

اخر مرحله وهى الكراهيه

وهنا تبدا اللبلنتيات والفاولات و الخشونه غير القانونيه

لكن ياعزيزى من الجانب الاخر ...
كم من صداقه تولدت بسبب هذا المكان!!!
وكم من معرفه ومعلومه ولحظات جميله ومفيده نعيشها يوميا هنا...

كدى خليها فى المفيد
صديق الموج عندو اغنيه ابحث عنها منذ فتره
بالله شوف لى الموضوع ده معاه , اظنكم فى بلد واحده

Post: #10
Title: Re: سؤال محيرني..
Author: معتز تروتسكى
Date: 06-27-2005, 11:57 PM
Parent: #9

Hello!

Post: #22
Title: Re: سؤال محيرني..
Author: tmbis
Date: 06-30-2005, 00:27 AM
Parent: #10

Hi

Post: #19
Title: Re: سؤال محيرني..
Author: tmbis
Date: 06-29-2005, 01:00 AM
Parent: #9

النصري
كيف الحال ؟؟
Quote: اعتقد الاجابه تكمن فى تقبل الاخر...

Quote: الشغلانه تبدا بالشعور بعدم الارتياح
تتحول تدريجيا للغيظ
يصبح الشخص الاخر "غياظ جدا ويسل الروح"
شويه شويه تتحول "لكجين" و عدم ود
اخر مرحله وهى الكراهيه

بعدين في مرحلة فركشت البوستات يا نصري دي مالك نسيته
مغيوظ منك ممكن افركش ليك اي حاجه كويسه ممكن تقوله..مع انو بيني وبين نفسي اكون مقتنع اساسا انك كلامك ده فيهو صاح كتير وربما اتلاقى معاك في كم نقطة فيهو..
Quote: لكن ياعزيزى من الجانب الاخر ...
كم من صداقه تولدت بسبب هذا المكان!!!
وكم من معرفه ومعلومه ولحظات جميله ومفيده نعيشها يوميا هنا...

هنا الكلام الجميل يا نصري .. بنقدر عليهو ؟؟ حتى ولو اضعف الايمان الاختلاف بشجاعة إن اختلاف وجهات النظر لا تفسد للود قضية..
بعدين صديق الموج ده ما بالساهل يتلقي .. وكان اديتني الاغنية.. بجيبه ليك من ايده

Post: #11
Title: Re: سؤال محيرني..
Author: حمزاوي
Date: 06-28-2005, 01:03 AM
Parent: #1

تمبس نسيبي
صباح الخير

الحب والكراهية
انت وابناءنا الطيبين في الرياض غرستوا شتلة المحبة
ونحن العجائز بناكل ثمار غرسكم
وتآلفنا وتحاببنا واصبحنا اسرة واحدة

ولكن حوش بكري كبير
برضوا حبينا فيهم ناس وآلفناهم
ولكن هناك حالات شاذة
يقومون بعمل الشيطان
ينطبق عليهم قول الله جل جلاله
أَلَمْ تَرَ أَنَّا أَرْسَلْنَا الشَّيَاطِينَ عَلَى الْكَافِرِينَ تَؤُزُّهُمْ أَزّاً (مريم : 83 )

Post: #21
Title: Re: سؤال محيرني..
Author: tmbis
Date: 06-30-2005, 00:25 AM
Parent: #11

حمزاوي
ابو النسب..
Quote: يقومون بعمل الشيطان

يا ابو النسب

مرات الشيطان ده بنتونس معاهو عادي
وعندنا فوقو هو زاتو
راي..

يا اما بقى شيطان عاقل زيو وزي الناس
يابعنا القضية
واتشيطنا عليهو..

وزي ما عارف
دائما لك احترامي وتقديري

Post: #12
Title: Re: سؤال محيرني..
Author: أحمد الشايقي
Date: 06-28-2005, 01:49 AM
Parent: #1

الأخ الكريم علاء

كيفك يا حبيب

Quote: لكن ياعزيزى من الجانب الاخر ...
كم من صداقه تولدت بسبب هذا المكان!!!
وكم من معرفه ومعلومه ولحظات جميله ومفيده نعيشها يوميا هنا...

دا كلام في المليان وخلينا في الجانب دا بس انت والأخ النصري أمين

مع التحية لك ولزوارك بالبوست الدافئ

Post: #13
Title: Re: سؤال محيرني..
Author: ابو جهينة
Date: 06-28-2005, 02:18 AM
Parent: #12

تمبس

Quote: هل هذه المساحة تولد الكراهية والعناد ..
ام الحب والتسامح؟؟

الكراهية و العناد و الحب و التسامح : خشوم بوستات تماما كما أشياء كثيرة عندنا خشوم بيوت.

البوست هو الذي يحدد إتجاه بوصلة هذه المشاعر و الأحاسيس ..

ؤبس

Post: #24
Title: Re: سؤال محيرني..
Author: tmbis
Date: 06-30-2005, 00:38 AM
Parent: #13

الريس
( ابوهوندريلا.. )
Quote: البوست هو الذي يحدد إتجاه بوصلة هذه المشاعر و الأحاسيس ..

يا ابوجهينة
يعني المسالة زيما قلت زمان انا
عملية
( تنميط )؟؟
مرات ياابوجهينة بتكون في اقنعة مرحلية..وكم ( وش ) ونضارات لزوم ( اللوك )
دي يتعاملو معاها كيف ؟؟

Post: #23
Title: Re: سؤال محيرني..
Author: tmbis
Date: 06-30-2005, 00:30 AM
Parent: #12

اخونا الصبوح
أحمد الشايقي

والله دائما يا الشايقي ماسكين ومكنكشين
ومقديمن السبت قبال الاحد
والنية بيضاء
بس الدخان الحاصل ده شنو .. ما معروف ؟؟؟!!!

Post: #14
Title: Re: سؤال محيرني..
Author: waleedi399
Date: 06-28-2005, 04:01 AM
Parent: #1

تامـبا ..
Quote: هل هذه المساحة تولد الكراهية والعناد ..
ام الحب والتسامح؟؟
هل تعني ما تقول (مساحــة) ..
اما تعني القابلـة(الدايـــة)؟؟؟

Post: #15
Title: Re: سؤال محيرني..
Author: معتصم دفع الله
Date: 06-28-2005, 04:20 AM
Parent: #14

Quote: هل هذه المساحة تولد الكراهية والعناد ..
ام الحب والتسامح؟؟

أيهما أقـرب إلى نفس الإنسان ؟..
لهذا كان السلوك الإنساني ..
وكانت الدروس والمواعظ ..
هكذا كانت الدنيا ..
الخــير والشـر ..
الحب والكراهية ..

إلــخ ..

Post: #16
Title: Re: سؤال محيرني..
Author: عمر محمد عبد القادر
Date: 06-28-2005, 04:28 AM
Parent: #15

Quote: اجدع هنا إذا بتقدر

تمبس انت من زمن الجديع .. هس تغيرت المفردة لي ( ارموا قدام ) تهليييييييييييييييل .. تكبييييييييير .. عليكم الله يا شباب ارموا لينا قدام تمبس دا ...

ود الباوقة

Post: #29
Title: Re: سؤال محيرني..
Author: tmbis
Date: 07-01-2005, 03:38 AM
Parent: #16

يا ود الباوقة
انت زاتك قديم ولاحقني وجاي
ارمي قدام دي الجماعة ودوها المتحف الوطني

بقت ظاهرة
والشعار
حبيبي تعال .. تعال نتلم مدام الريد اختلط بالدم
ودي طبعا فيها امكانية رقيص عالية جدا وما بتحتاج ( كورس ) كتير

Post: #28
Title: Re: سؤال محيرني..
Author: tmbis
Date: 07-01-2005, 03:14 AM
Parent: #15

Quote: أيهما أقـرب إلى نفس الإنسان ؟..
لهذا كان السلوك الإنساني ..
وكانت الدروس والمواعظ ..
هكذا كانت الدنيا ..
الخــير والشـر ..
الحب والكراهية ..

معصتم..
كلاهما مستوطن من النطفة الاولى الحب والكراهية
الخير والشر
واحكم على ذلك ببقية الشي وضده
وعاء واسع بداخلنا .. ما كان الشي الا وكان ضده
لكن
انسانيتنا التي ميزنا الله بها عن كل المخلوقات وما وهبنا من عقل برغم صغر حجمه مقارنة باكبر ما من حولنا من اشياء،كان الوسيلة الفعاله لترتيب الامور كبيرها وصغيرها
هناك حالات خاصة لا يحاسب فيها وهو برئ ( العقل )
إذن يا معتصم
صاحب العقل يميز
وإلانسانية دائما تجبرنا على الانسانية ..وتدفعنا في الاتجاه الصحيح

Post: #32
Title: Re: سؤال محيرني..
Author: معتصم دفع الله
Date: 07-01-2005, 04:21 AM
Parent: #28

تمبس يا شقيقي

إذا كنا نميز العقل ..
ونحكم الضمير لما كان كل هذا ..
الخير والشر موجودان في كل مكانٍ حولنا ..
والداعي للخير كفاعله ..

هنا يا شقيقي ..
نحارب في طواحين الهواء ..
معارك طاحنة في غير محلها ..
والسبب معروف لدينا ..

بالحب وحده تكون الحياة لا بالخبز ..
تعال نجرب مره واحدة نحب ..
شوف الدنيا دي حا تبقى حلوة كيف ؟ ..

أحبك يا صديقي ..

Post: #35
Title: Re: سؤال محيرني..
Author: tmbis
Date: 07-01-2005, 04:47 AM
Parent: #32

موووووف
اول حاجه
Quote: أحبك يا صديقي ..

وكوته من الاصدقاء فلترناها من هذه المساحة..

نحيا بخبز اللحظات السعيدة بينهم وإن كان ( فتات )..

اما الطواحين ( وموتوراتها ) إلى الجحيم.. ما عادت هناك مساحة للاحتمال..
تذكر يا معتصم
ما عادت هناك مساحة للاحتمال..

Post: #27
Title: Re: سؤال محيرني..
Author: tmbis
Date: 07-01-2005, 02:58 AM
Parent: #14

وليد
Quote: Quote: هل هذه المساحة تولد الكراهية والعناد ..
ام الحب والتسامح؟؟

هل تعني ما تقول (مساحــة) ..
اما تعني القابلـة(الدايـــة)؟؟؟

انا بقصد
القابلة علي امنياتك

Post: #17
Title: Re: سؤال محيرني..
Author: محمد الامين احمد
Date: 06-28-2005, 04:38 AM
Parent: #1

تمبس

هى مساحة تكشف المستخبى ، و فى ناس و احزاب كتييرة انطبق عليهاالمثل

"كنا فاكرين تحت القبة الشيخ"

تحياتى

Post: #30
Title: Re: سؤال محيرني..
Author: tmbis
Date: 07-01-2005, 03:45 AM
Parent: #17

يا محمد الامين

ولسه ياما ح نشوف .. بس انت اقعد وفتح عيونك
احذر ما تقوم تدقس دقسه خفيفه كدا
لانو ( العفش داخل البص على مسؤولية الناس المفتحين )

Post: #20
Title: Re: سؤال محيرني..
Author: عادل ابراهيم عبدالله
Date: 06-29-2005, 01:10 AM
Parent: #1

ياهو دا السودان..
تمبس
سؤالك في حد ذاتو اجابة!
محبتي

Post: #25
Title: Re: سؤال محيرني..
Author: وليد شريف
Date: 06-30-2005, 10:02 AM
Parent: #20

Quote: هى مساحة تكشف المستخبى

الاخ تمبس استعير كلمات الاخ محمد الامين احمد واضيف

كن جميلا ترى الوجود جميلاً

وليد شريف

Post: #33
Title: Re: سؤال محيرني..
Author: tmbis
Date: 07-01-2005, 04:23 AM
Parent: #25

( وليد ) شريف
Quote: كن جميلا ترى الوجود جميلاً

ما خلاص الكلام كمل
تاني في شنو يتقال اكتر من كده؟؟

Post: #31
Title: Re: سؤال محيرني..
Author: tmbis
Date: 07-01-2005, 04:05 AM
Parent: #20

عادل ابراهيم
كيفك ؟

بتفق معاك بس نحتاج نظرة فاحصة صغيرررررة بي تركيز عالي جدا..

ليك الود كلو

Post: #26
Title: Re: سؤال محيرني..
Author: AlRa7mabi
Date: 06-30-2005, 11:43 AM
Parent: #1

تمبس ..

لو جاوبتك - بأثر رجعي - .. جوابي بكون ( يقيني )
بس الآن ممكن أقطع ( اليقين ) بالشك

ملحوظة : هذا الأمر ينطبق على الإجابتين

تقبل تحيات من الزمن الزمااان؟؟؟

رحمابي

Post: #34
Title: Re: سؤال محيرني..
Author: tmbis
Date: 07-01-2005, 04:34 AM
Parent: #26

؟؟؟ رحمابي ؟؟؟؟؟؟؟؟؟؟؟؟؟؟؟
معناته نعممممممممممممممم كبيرة جدا
لي هنا
Quote: ام الحب والتسامح؟؟

وبي يقين الدنيا كلو

والملحوظة التانية:
الايام الجميلة في الخاطر دائما .. وائما انت حضور فيها

افتقدك وصوت صفصف واخواته
حاجاتي في البروفايل ..
قاعد وراجيك

Post: #36
Title: Re: سؤال محيرني..
Author: الزوول
Date: 07-01-2005, 05:03 AM
Parent: #1

السلام عليكم

أخي تمبس

Quote: هل هذه المساحة تولد الكراهية والعناد ..
ام الحب والتسامح؟؟

الأجابة حسب رأيي الخاص وبصراحة

نعم ... هذه المساحة تولد الكراهية
خصوصا
ً عندما تعرف أن أناساً كنت تظن انهم يحبونك ( أو على الأقل لا يكرهونك )
يمقتونك ..بل ويكرهون اسرتك وأهلك وقبيلتك والأرض التي تمشي عليها.
هل تركوا لك شيئاً غير ان تبادلهم بالمثل..
يصرون أن يحملونك وزر الظلم الواقع عليهم
حتى لو كنت مظلوماً أكثر منهم
لا يرون الاك سبباً لتخلفهم وتهميشهم
حتي وان كنت أكثرهم تهميشاً وتخلفاً
فهذا لا يهم ..المهم انتمائك العرقي
الا تظن انك لو تُركت لتعيش في وهمك انهم أخوتك ... افضل ؟؟
ألا تظن أن عدم معرفة ذلك أدعى للحب والتسامح ؟؟

Post: #37
Title: Re: سؤال محيرني..
Author: tmbis
Date: 07-02-2005, 05:26 PM
Parent: #36

أخي العزيز الزووول
اولا
دعنا نحي اختلاف وجهات النظر المبنيه على قاعده ثابته اساسها احترام الآخر وتقبله فقط في حدود شريطة الا يتجاوزها بشطط..يكشف عن اسواء ما يمكن أن تحويه النفس البشرية ..
ربما سياسة خلط الاوراق
أو الفهم الخاطي للكثير من الامور البديهية التي يحاول البعض نسفها من الواقع الحياتي دون الاستناد إلى فهم سليم وعقلاني .. هما السبب في كل هذه المعضلات..
دعنا من هذه المساحة الالكترونية ..
هل يمكن مجرد الهمس بمثل هذه المفاهيم الغريبة في واقعنا..؟
إلى كم من الزمن يحتاج حاملي هذا الفايروس المدمر إلى نشره بين المجتمعات المتعافية؟
لا عليك ..
انتظر هنا وهناك وستري الموات ..
تفاءل بعمق فهناك واقع اجمل غير محكوم .. بباص وورد وشعارات وهمية..

شكرا يا زوول
وفي بالي أن مداخلتك جزء من كثير مما يحملها البعض في هذه المساحة . وبعض آخر لا يعرف عن هذا السايبر واسقاطاته.

Post: #38
Title: Re: سؤال محيرني..
Author: tmbis
Date: 08-16-2005, 00:34 AM
Parent: #37

موسم رفع بوستات الواحد..

..
.
بي ضراعو..

Post: #39
Title: Re: سؤال محيرني..
Author: Amira Ahmed
Date: 08-16-2005, 00:50 AM
Parent: #38

الأخ العزيز تمبس،

جئت للتحية والسلام ... وربما أعاود لاحقاً إذا اتضحت لي فكرة يمكن أن اسهم بها في الإجابة على تساؤلاتك.

لك مني كل الود وصادق التحايا،

أميرة

Post: #40
Title: Re: سؤال محيرني..
Author: tmbis
Date: 08-16-2005, 01:07 AM
Parent: #39

الأخت العزيزة
أميرة أحمد..
مليون مرحب بوجودك
واتمنى فعلا حضورك هنا للاضافة المتأكد انها ح تكون مميزة..

مجرد دخولك هنا بهذه الاريحية اجابة في حد ذاته ..
طبعا بعد بداية الفوضى بتاعت المرة الفاتت

Post: #41
Title: Re: سؤال محيرني..
Author: عمران حسن صالح
Date: 08-16-2005, 02:03 AM
Parent: #40

Quote: هل هذه المساحة تولد الكراهية والعناد ..
ام الحب والتسامح؟؟

العزيز تمبس
أتابع معاك لمعرفة الإجابة ولي رأي الآن في أن تساهم أنت في بث الحب والتسامح بقليل من الموسيقي التي فقدناها علها تزيل قليلاً من التوتر الذي يعترينا

Post: #43
Title: Re: سؤال محيرني..
Author: tmbis
Date: 08-16-2005, 03:09 AM
Parent: #41

العزيز عمران ..
سلامات ..
وما زلت في الانتظار .. لي رد يبرد القلب .. ودائما احترم رائك ووجهة نظرك
كنت عايز اجيب ليك طارق العوض لانو من ( السناجك ) البرتاح ليهم ..
لكن الامكانيات ما جاهزة
وبهديك الصوت المتسامح .. الموهبة سعد الحــاج وفيهو نوع من الطمأنينة والتسامح..
واهديه معاك برضو لاختنــاأميرة أحمد

Post: #42
Title: Re: سؤال محيرني..
Author: قرشـــو
Date: 08-16-2005, 02:24 AM
Parent: #1

Quote:
هل هذه المساحة تولد الكراهية والعناد ..
ام الحب والتسامح؟؟

العزيز تمبس

يسعد صباحك بكل جميل

المساحة دى بوابة مفتوحة كل واحد بجيها ويشوفها حسب عين طبعه

عشان كده فى ناس بتملاها محبة ومودة

وناس ثانية بتحاول تحولها لميدان صراع ضد الكل

وكل الما معانا ضدنا وحايمشى النار

Post: #44
Title: Re: سؤال محيرني..
Author: tmbis
Date: 08-16-2005, 03:42 AM
Parent: #42

العمــدة العزيز قرشو..
ولحظاتك بكل خير وسعادة..
..
.
Quote: عشان كده فى ناس بتملاها محبة ومودة
وناس ثانية بتحاول تحولها لميدان صراع ضد الكل
وكل الما معانا ضدنا وحايمشى النار

لي فترة بسيطة يا عمدة كنت بعتقد أنو الصراعات الحايمة في المساحة دي عبارة عن تصفية لي تراكمات قديمة يعني ناس بتعرف بعض من سنين فترات دراسية أو مواقف حزبية معينة وفجأة الناس دي انقطعت من بعض لاسباب الهجرة أو اسباب أخرى وظلت الامور معلقة بيناتهم وما اتحسمت .. اها لما اتلاقت هنا وبي لغة العصر وامكانية الرد الفوري وسرعة توصيل الفكرة والمعلومة بدات مسالة تواصل ما انقطع قديما.. وإذا تعمقت اكتر بتجد أنو في ناس هنا بتناقش في مشكلات أو آراء اكل الدهر عليها وشرب وبقت في ارشيف الحياة العامة يعني غذا رجعت بيها للسودان ربما يفتكرو انك جاي من العصر الحجري أو من ( اورانوس ) ..
لكن الاعتقاد تحول لي قناعات محددة بتصب في تحاه الشق التاني من اجابتك إنو في ناس هنا بتدير صراع ضد الكل من أجل لاشئ غيرإنك بتخالفني الراي وبالتالي النار طوالي زي ما قلت ومستعدين طبعا يخسرو كل شي حتى احترامهم لي نفسهم في صالح انهم يكسبوا قضيتهم الخسرانة بي كل المعايير..

Post: #46
Title: Re: سؤال محيرني..
Author: زول ساكت
Date: 08-16-2005, 04:16 AM
Parent: #44

لكن الصور ماتقول لي

اخير مية مره من ام قجه

Post: #50
Title: Re: سؤال محيرني..
Author: tmbis
Date: 08-16-2005, 10:03 AM
Parent: #46

زول ساكت..
..
قمنا بتعديل الحلاقة وغيرنا من الحلاق ( الاردني ) لي حلاق سوداني مية المية
وعليه
لكريم عنايتكم الحلاقة الجديدة بي مقاسات وابعاد مختلفة تجدونها عند أول مقابلة ..

ولا سكتت مقصات ( الحلاقين )

Post: #45
Title: Re: سؤال محيرني..
Author: waleedi399
Date: 08-16-2005, 03:48 AM
Parent: #42

قرشـــــو
Quote: وكل الما معانا ضدنا وحايمشى النار

تاااااااااني يعني .. وتبقى النار نارين

يحشر المرء مع من يحب يا قرشــو ..

Post: #47
Title: Re: سؤال محيرني..
Author: Hozy
Date: 08-16-2005, 04:19 AM
Parent: #1

كدي وريني زول واحد كده من ناس البورد ده
ممكن يقدر يكره تمبس ده ؟؟؟!!!!!!!

مالك ياولد

ما تنفعل على اشياء ما بتستاهل
ماتتوقع انه كل الناس تكون على نفس القدر من الفهم والإدراك والقدرة على الاخد والعطاء في أي نقاش

كل الود

Post: #51
Title: Re: سؤال محيرني..
Author: tmbis
Date: 08-16-2005, 10:09 AM
Parent: #47

Quote: مالك ياولد
ما تنفعل على اشياء ما بتستاهل
ماتتوقع انه كل الناس تكون على نفس القدر من الفهم والإدراك والقدرة على الاخد والعطاء في أي نقاش

هوازن
شفتي اخوك بقى انفعالي كيف ؟؟
بس ده من السكات الكتير يا هوزي .. تسكت تتعفص ويطلعو فيك بي لساتك الاندكروزر..
يا تنفعل ويطلعوك مجنون .. شفتي المعادلة دي عاملة كيف ؟؟
..
.
تحياتي لفردة جناحك التانية وقولي ليهو كده ( بتفرتق ) ادونا طله

Post: #48
Title: Re: سؤال محيرني..
Author: nasiradin
Date: 08-16-2005, 04:32 AM
Parent: #1

و الله يا تمبس ما عارف
معلبش
بس كان لقيت اجابه
ما تبخل بيها على أخوك

ناصر البطل

Post: #49
Title: Re: سؤال محيرني..
Author: مهيرة
Date: 08-16-2005, 05:08 AM
Parent: #48

الاخ الكريم تمبس

العمدة قرشو قال:

المساحة دى بوابة مفتوحة كل واحد بجيها ويشوفها حسب عين طبعه

عشان كده فى ناس بتملاها محبة ومودة

وناس ثانية بتحاول تحولها لميدان صراع ضد الكل

وكن جميلا ترى الوجود جميلا

تحياتى

Post: #53
Title: Re: سؤال محيرني..
Author: tmbis
Date: 08-16-2005, 10:43 AM
Parent: #49

الأخت الكريمة
دكتورة مهيرة..
شكرا ان شرفتينا بحضورك..
وتجديني اتفق معك ومع الحكيم العمدة قرشــو..في منظور الجمال الذي نطل به على نفسنا وعلى الدنيــا
لكن
بالمقابل نتسال عن محاولات التغبيش المستمرة هنا ومحاولات تعتيم الصورة .. رغم جمالهــا

Post: #52
Title: Re: سؤال محيرني..
Author: tmbis
Date: 08-16-2005, 10:14 AM
Parent: #48

والله يا ناصر أخوك لحدي الآن بزازي
لالقيت لي اجابة ريحتني لا كمان اقتنعته بالشي الحاصل ده ..
والبوست نام على كده
اها الليلة من الصباح قمته تلتلتو معاي وجبتو هنا .. بس غايتو خليك قريب جدا اكيد بيجي واحد خطير يوقع لينا القصة دي .. علشان الواحد يطلع من هنا مرتاح

بس خايف البوست ده يطلع فالصو زي البوست بتاعك داك وابقى انا قاععد اهضرب وانت برضو بتهضرب

Post: #54
Title: Re: سؤال محيرني..
Author: nasiradin
Date: 08-17-2005, 00:04 AM
Parent: #52

فوق
اها شن قولكم؟
مافى اجابه لحدى أسع مقنعه

ناصر البطل

Post: #55
Title: Re: سؤال محيرني..
Author: zico
Date: 08-17-2005, 08:16 AM
Parent: #54

Post: #56
Title: Re: سؤال محيرني..
Author: zico
Date: 08-17-2005, 09:45 AM
Parent: #55

Post: #58
Title: Re: سؤال محيرني..
Author: tmbis
Date: 08-17-2005, 12:54 PM
Parent: #56

زيكو ..
بركة الجيت .. يعني إلا نوصي ليك ؟؟

شكرا للموقع .. منزل منو تقريبا كم وتمنين صورة ولسه ما كمل

Post: #57
Title: Re: سؤال محيرني..
Author: tmbis
Date: 08-17-2005, 11:20 AM
Parent: #54

لسه منتظرك يا ناصر

Post: #59
Title: Re: سؤال محيرني..
Author: nasiradin
Date: 08-18-2005, 02:42 AM
Parent: #57

أخى تامبا

البت دى عاجبانى شديد ياخى

ناصر البطل

Post: #60
Title: Re: سؤال محيرني..
Author: Badri
Date: 08-18-2005, 03:49 AM
Parent: #59

تامبا الجميل
عزيزي انتا لمست التسامح والحب والجمال في المساحة دي ومن الناس اللقيتهم هنا أو الناس الجو بعدك ... ودا الخلاك تحب المكان دا ... ودا الخلاك من تاريخ انضمامك ليهو انك تحاول تقدم كل ماهو جميل عشان تساعد في ترسيخ الحب والتسامح وتفرح كتير لما المساحة دي تجمعك بشخص جميل ومتسامح وتسعى لانك تبني بينك وبينه علاقة اجتماعية طيبة خارج نطاق البورد ودا البخليك غيور على المساحة دي ... ياصديقي انا دايماً بلاحظ لانفعالاتك وطبعاً مبررة جداً ويمكن اتكلمت معاك في الموضوع دا قبل كدا... عدد الأعضاء كنتاج طبيعي في تذايد وشي طبيعي انه الناس بتختلف في سلوكها وأمزجتها وطالما انه العدد كبير جداً صعب السيطرة على سلوك الناس خصوصاً انه في ناس هنا أساساً ماليها علاقة بالحب والتسامح الانتا قلتو ومن تاريخ دخولها هدفها الأول انها تحاول قتل الحب والتسامح الموجود بين الأعضاء ... أها ياصديقي بس الواحد تاني يشوف الحتة الفيها الحب والتسامح وين ويمشي عليها وان جاتك الكراهية والعناد لغاية عندك ما تشتغل بيها... مع اني عارف انه دي صعبة عليك لكن ياصديقي حاول تأقلم نفسك على انك تتعامل مع المساحة على انها مساحة افتراضية ليس الا ... تحاول تاخد منها الطيب وتتجاهل الخبيث وصدقني مافي حاجة تستاهل انه الواحد يحرق دمو عشانها.

وبعدين الصور دي علاقتها شنو بالتسامح والكراهية ولا حركات ساي

Post: #61
Title: Re: سؤال محيرني..
Author: Badri
Date: 08-18-2005, 03:58 AM
Parent: #60

أها رايكم شنو في دي أسي ما أحلى من صوركم الفوق دي

Post: #63
Title: Re: سؤال محيرني..
Author: tmbis
Date: 08-18-2005, 05:25 AM
Parent: #60

العزيز
فقــري ( بدري ) ..
تعرف استنادا لي حكمة قديمة ورددوها هنا دكتورة مهيرة والعمدة قرشو ،، كن جميلا تر الوجود جميلا.. تنتهي عندها كل الافتراضات الأخرى .. لكن المكابرة مشكلة في خلق مساحة من الكراهية المتعمدة البدون سبب.. ايوة ممكن تكون هناك نفسيات مريضة دائما تحب تعكير الاجواء بالصعب ان نحتويها بالساهل وتحتاج جهد جهيد واعتقد أنو المساحة كفيلة بخلق نوع من التسامح والمحبة إذا طورنا نفسنا في مفاهيم الاختلافات وتباعد وجهات النظر..
بس بختلف معاك يابدري انو المساحة دي برغم افتراضيته إلا أن الناس البتكتب دي شخوص من لحم ودم ومشاعر واحاسيس ونفسيات والحاجات دي كلهاوبالتالي المساحة دي امتداد لي واقع مهما كان شكل الافتراضيات الفيهو نتعامل هنا من خلال الطرح لكن من غير أن ننسف انسانيتنابكل ما تحمل من مفاهيم داخلية.. ولابد من اخذ الطيب والمساهمة في محاولة تعديل الخبيث حتى لا يطغي ينتشر ويطغي علي الطيب هذا غذا لم نستطع من تحويله لي قيمة مفيدة لنــا جميعا..
Quote: وبعدين الصور دي علاقتها شنو بالتسامح والكراهية ولا حركات ساي

الصورة دي طبعا كانت حركات ساي لكن الآن بعدمــا زودتني بصورة الفنان اساسي المرفقة جاني احساس اني اواصل شغل صور في البوست ده واجيب رسوماتي القديمة عليك الله اساسي احسن مني في شنو؟؟

Post: #62
Title: Re: سؤال محيرني..
Author: tmbis
Date: 08-18-2005, 04:32 AM
Parent: #59

Quote: البت دى عاجبانى شديد ياخى

يا ناصر..
بت جيران ناس منو الزولة دي
شكلها ما غريب على
وفنلاتي دي وصلت لحدي عندكم هناك كمان ؟؟

والله كلام

Post: #64
Title: Re: سؤال محيرني..
Author: Mohamed Adam
Date: 08-18-2005, 10:57 AM
Parent: #1

تمبــس
متكيف من الأغنيه شديد.

Post: #65
Title: Re: سؤال محيرني..
Author: tmbis
Date: 11-17-2005, 00:43 AM
Parent: #64

..