الشربوت المفقود ...

النفس أمارة بالسؤ ،
وأنت تمر ما بين شوارع ام درمان القديمة (وجات القديمة تفرح) مابين الملازمين وبيت المال مروراً ببيت الأزهري القديم فود البنا وودارو الشباب الحلو ، تلحظ بسهولة الدم ، الدم المسفوك في عتب الابواب (القنعانة والمقنعة) وستلحظ كيف إنقسم الناس في أول أيام الضحية ( ومن هو الضحية بالظبط?) بين مصدق ومكذب حريص وعارف ومهتم وبين الضحية ، المرض (الكارثي)المرض الحقيقي الأكثر فتكاً بالجزارين المعوزين ، أهل الجلد والرأس، والنساء في البيوت مع إحتمال ضعيف (للإند يوسر) End user الرجال ، الرجال ، الرجال، فالصينة ستحشى باللحم المشوي بالزيت والفحم ، علي مبدأ مفاده مافي سماً عقب النار ، إلا أن سُم وزارة الصحة السودانية سُم شرس ( بمناسبة وزارة الصحة هل مازالت تابيتا بطرس مهتمة بالصحة ؟) حينما كنت أعمل مع أحدي المنظمات الأجنبية العاملة في مجال المياه والصحة في صيف غائظ وفقير ضربت خضرواته الكوليرا ( أي والله الكلويرا التي اصابت زمن الحُب عند ماركيز قبل العولمة وثورة الاتصالات) دعتنا وزارة الصحة لإجتماع تنويري بخصوص المرض للعمل التوعوي ، فقالت تابيتا (أي والله تابيتا المثقفة ترباية الخواجات) حقوا مانقول كوليرا عشان مانخوف ناس !إسمها حُمي الإسهالات المائية!فتأمل الحال. الغريب هذه المرة ان وزراة الصحة اصدرت بياناً غير مفهوم اطلاقاً تحس الناس علي التضحية مع الحذر وصرحت بان المستشفيات مفتوحة اربعة وعشرين ساعة لإستقبال المصابين !!!

أعصابي ، أعصابي ياناس ...

توجس وحيرة شديدة ما بين الأقوال المتضاربة التي تقدم المصالح العُليا علي الناس حول المرض ودرجة إنتشاره جهجهت الفطورات وشهوة العيد وأضعفت عندي رغبةالطعام ، قبل قليل بينما انا في حالي وفي( اليو تيوب) نادى علي جاري يابراهيم ياولد اللحمة دي طلعت ، فشعرت بالغثيان ، طمام البطن ، فقلت مجيباً ، لا لا ياخال انا فطرت العيد الفات ، لكن لوعندكم شربوت ناديني ، ضحك الخال وقال بمرح النسيان ، أنت خايف ساي ، السنة دي سنة الشربوت المفقود ... فخفف عني حملي بالضحكات و أشعلت سجارة بينسون خفيفة ، و فايل (اموي سانغو) مغنية مالي العجيبة وفقعت بيضتان علي نار هادئة ( نص إستواء )، وساندوتش مربة ( إحتمال كبير مدتها تكون منتهية )فانا منذ فترة وحدي ، اكل وحدي واشرب وحدي ، منذ ان سافرت امي "الوحيدة التي تحبني" للحج في بلاد آل سعود (مايغيظني أنني احاول الاتصال بها هناك منذ الصباح والاتصالات مزحومة وهاتفي عضير )المهم دخلت علي فطور العيد(تبعي) ابو مربة وإلتزمت مايلزم ، وقررت ان اكتب غيظي وونسي وتهاني العيد هنا في الإنترنيت ، قاصداً قتل الوقت قتل العيد والجراثيم ومن باب اضعف الايمان قلت النشر النشر ، إلا ان رائحة الشواء جذابة لنفوس اولاد امدرمان القديمة ، القديمة جداً ... حتي الأن مازالت عصافير بطني (قاتلتي تزغزغ)لا أحد يتكهن بماسيحدث ، وليس هناك في حياة سودانكم الغالي مايستحق الحرص عليها، واللحظة اكثر اصراراً والنفس أمارة بالسؤ ،



________________________
علي كُل حال عُدت ياعيدُ ، كل سنة وانتم طيبين وخالين من السُم والحكومات،
والسنة الجاية عريس ياسفيان بشير أوكما يقول المارة من الجيران واهل الحي .

قرمبوز....

انا هنا لا صوت خروف ولا رائحة شواء..

رائحة الوحدة هى التى تملاء المكان ...

كل سنة وانت شنو كدا ما عارفة ...



مع محبتى ...

مرمر يامرمر ، ياحرف الأس ،
كُل سنة وأنتي طيبة يا أميرة ، عاملة كيف مع قطر( شايف مجلة الدوحة طلعت والفتوشوب سيد الموقف) ، قاعدة تلمي القروش كويس ؟ لازم تلمي بإمتياز مُش زمان قالوا ما أُخذ بالقوة لا يُسترد إلا بالقوة ؟

خلاص لومافي نزفية وهواجس ومرض في غرفتك المحروسة ، أسمعي المزيكة الفي البوست دي ، مختلفة وبتغير ليك طعم الوحشة والوحدة وريحة ملاك العمل الكريهة ، والباقي تميه تلفونات السودان ، امبده مع الأم والاخوات الظريفات والمستفيد من العيد شركات الاتصالات سلامي أميرة بنت العز والرقص والموسيقي ، والسنة الجاية تشتغلي اكبر عرض في المسرح القومي ومن دون عداد كمان ومحبتك وصلتني كافة غير منقوصة كما انها لن تنقطع ...

ولدنا الغميس ..

تمردتْ عليّ الرغبات يا جاك , قمت لعنت أبو خاش الحكومة الكضابة , و صدقت منشأ شهواتي الأول كحيوان لاحم عتيد ينقاد لغرائزه الدامية في استعمال طواحنه و القواطع .. توكلت على الحي الله و الكاتل الله و سألت عمك ضبّاح الجيران : نحشّر يا حاج ؟؟
قال : حشّر يا زول .. بهمنا الحمريات ديل طب ما فيهن عوجة .. أمدغ ساااااااااكت , الحبة دي ما بتجيك .
فحشرنا للحم حشير من لا يخشى السلخ بعد الموت ..
و بلا شربوت قمنا بالعمل الكبير ..
على أننا افتقدنا للمرارة ..
يمه سكينة قالت :
يوم كدي إنتي يا اللحمة ما غبينا منك , إلا المرارة لأ ..
هو كان ما ساكت مرارة اكتر من مرارة الحيكومة دي عينكم شافتا ؟؟ قادر الله .
و هأنا أنتظر حادثات المساء : يا غِرِق .. يا جيت حازما .

عليه يا وجيه ..
إملأ شر أوعيتك لحما طيبا و شربوتا مباركا ..
الكمدة بالرمدة .
و لا عزاء لعمك الخواجة ملتون و فراديسه المفقودة ..
و السيدة تابيتا و تصريحاتها الفشنك .

و .. هبشك الما ضرّاك .

عُمدة ، أذي الحال ياملحوم ، والله ليك وحشة وحبة زعلة كده ،
غايتو ياصديق عندك كامل الفرصة تتأمل حال البلاد المنكوبة في هذه الأيام ،
ساسعي جاهداً للإتصال بك وتستاهل بدل الشربوت عدد واحد سي دي قناوة ، ووين الأولاد ...

قرمبوز ...

الى وطن معافى وخالي من الامراض ...

كل سنة وانت طيب ..

اميرة بكيتينا عديل ...

ربنا يرد غربتك ...

يا حليل الشربوت والله

Quote: سنة الشربوت المفقود

وسنة حاجات كتيييرة مفقودة!!

كل سنة وشربوت ينتشلنا ولو لى ساعة نغفى فيها وننسى الطعم المر الممكن يملأ الحلق فى العيد
ياكافى البلاء لاباع..لاشربوت..لا ريحة حنا ولا فستاين زاهية، كلها محاولات لصناعة الفرح ما امكن

البركة فى اغنيتك الهدية الجد بالجد دى، بتشرب شربوت وبتنسيك شوية,,, ننسى شنو ونخلى شنو؟!!

ربنا يديك العافية يا ود امى ياقرمبوز ويغطيك ويحفظك

قرمبوز
في السودان وبدون لحمه
دي غربه حارة شديد خلاس ..غايتو دي بقي حالنا طوالي .. اما المفقود .. شربوت بية
الله يخلي لينا سيد خواجه
عندو اي شي معلب جاهز

شاي ومشروم .. بظبطو ليك احلي شربوت في الدنيا
ولو اديتو خميرة .. شنو ليك
كل سنه وانت طيب
وحج مبرور للوالدة

نعوم ، كُل سنة تيبين ، بحاول اضرب ليك تلفونك مابجمع معهاي ! حول هل تسمعني

يا إشراقة ، إذي الحال ، بقول زمان في الغنية بزيارتك بيتنا نور ، سمعتي امو سانغو دي غناية كيف؟ حاجةجميلة وبعمق إنساني فنان ، موش كده ؟ شكراً يا إشراقة علي الأماني الطيبات ، وإنت شاعرة ، تعرفين معني ان تكون المرأة فنانة ، ذات شاعرة ...

قرمبوز
..
..
*

*
شربوت منزلى مصنوع خصيصاً ..للتناول بعد الشواء
"أغرب مافى الموضوع ...حلتنا التى إنقسمت إلى قسمين

"قسم يرى أنه سيتوكل ويضبح"وانا منهم"..والواحد لو مات يموت شبعان
"وقسم يرى أنه سيرى فقط ..مع انه تقاسم مع الاول شية البداية ..!!

..
..


المهم فى الأمر ,, السنة الجاية سفيان نابرى عريس


..

الفاتح وديدى يخطب
كابو يمشى الحج
ماو يحبــ..
..




امنيات مش