الكراس.. والقلم الأبيض..!!

الكراس.. والقلم الأبيض..!!


02-10-2006, 12:49 PM


  » http://sudaneseonline.com/cgi-bin/sdb/2bb.cgi?seq=msg&board=117&msg=1204818504&rn=0


Post: #1
Title: الكراس.. والقلم الأبيض..!!
Author: عبد الله عقيد
Date: 02-10-2006, 12:49 PM

الكراس
أدوني الـ نكتب
خُتّو اللمبة
بشيش.. ما تلهلِب
وجيبو لي
القلم الـ.. ابيض

- ابيض؟!
لآ
أبيض ما بيظهر

- بس جيبوهو
اللكتب هسي
وبعدين بِظهر
لمّن بكرة الكراس يقدم
ويبقى بياضو سواد
يتفحّم..
قلمي بيظهر
ناصع أبيض
وتجي تقراهو الناس تتعلّم
...

- نان يا أبلم..!
أيه الفايدة؟
بعد ما وجه الصفحة يسوِّد
والكراس يتبهدل ويقدَم؟

...
- دي حاجة تضحِّك
مين الأبلم؟
هسِّع ما قلنالكم بِقدم
وصفحتو تصبِح ليلا أظلم..!
...
جيبو الدفتر
جيبو.. النكتب
يمكن باكر نلقى البِفهم


ود عقيد

(بوست بدل فاقِد)

Post: #2
Title: Re: الكراس.. والقلم الأبيض..!!
Author: عبد الله عقيد
Date: 02-10-2006, 12:54 PM
Parent: #1

أوعا تجيبو القلم الأحمر
أوعو الفتنة البينكم
تَعَمَر
ما تفتكرو الكوع يوم يِحِما
وكل بصير
يتبهدَل ويَعَمى
بتطلعوا بعدها
قوزا أخَدر
لأنو الأحمر لون الدم
ريحة الفتنة
الما بتنشم
والدم للفتنة قريب..
ود عَم
والأرض بتشرب..
ما اظن تروى
وبعد ما تخرب
ما اظن تعمر
أوعو تجيبو
القلم الأحمر

Post: #3
Title: Re: الكراس.. والقلم الأبيض..!!
Author: عبد الله عقيد
Date: 02-10-2006, 12:55 PM
Parent: #2

طيب..
جيبو القلم الأخضر
نكتب بيهو الأمل الأخضر
جيبو نزين بيهو المشهد
يمكن باكِر
ما تتجدد لينا مناكِر
نصبح نلقى الطائر غرّد
ونلقى الورِد الزاهي اتورّد
والحريّة بدت تتمرّد
ويخلو من الرصّاص المحضر
يتم الريد والغايب يحضر
نجمع دايما.. ما نتفرد
نقلع توب الخوف نتجرّد
جوّة النيل ننزل نتبرّد
ونطلع منو وروحنا شفيفة
قلوبنا نضيفة
ودربنا أخضر

Post: #4
Title: Re: الكراس.. والقلم الأبيض..!!
Author: عبد الله عقيد
Date: 02-10-2006, 01:21 PM
Parent: #3

هذا النص كتبته في بوست سابق
وما تلاه من خواطر، جاءت استجابة لبعض المداخلات..
البوست الأصلي حذفه الأخ بكري لذا أردت إعادة
نشر هذه النسخة.. بدل فاقد..