Post: #1
Title: مسابقة ملكة جمال السودان في اكتوبر 2005م
Author: ahmed haneen
Date: 03-31-2005, 04:38 PM
مسابقة ملكة جمال السودان في اكتوبر 2005م
بدات الإستعدادات لتنظيم مسابقة اختيار ملكة جمال السودان
والتي تقرر ان تقام تحت اشراف وزارة السياحة خلال شهر اكتوبر القادم
وقد بدأت وكالة فن وموضة الأفريقية وهي الجهة المنظمة للمسابقة
في انتاج ومضات إعلانية للتعريف بالحدث والذي يقام لأول مرة بالسودان
وافادت الوكالة بأن التصفيات سوف تبدأ في شهر سبتمبر لإختيار ثلاثين فتاة
تتراوح اعمارهن بين 17 و 28 عاما ليتنافسن علي اللقب الأول في تاريخ
السودان
هذا وقد سمحت الوكالة باشتراك السودانيات بالمهجر
وتجري هذة الأستعدادات بسرية تامة ووسط اجراءات امنية مشددة وقد تحدد فندق
الهوليدي فيلا مكانا لأقامة الحفل الختامي ،، والذي تم احتكار بثة مع مجموعة صالح
كامل ART ( النيل الأزرق)
ويجدر بالذكر ان وزارة السياحة قد حددت بعض المواقع الأثرية لتصوير بعض المشاهد
الخارجية ،،،
انتهي الخبر
حتما سوف اعود للتعليق
|
Post: #2
Title: Re: مسابقة ملكة جمال السودان في اكتوبر 2005م
Author: ahmed haneen
Date: 04-01-2005, 01:26 AM
Parent: #1
تعريف بالجهة المنظمة لهذا الحدث
هي منظمة فن وموضة الأفريقية وبق ان نظمت مسابقة
ملكة جمال الجزائر في عام 2002م وقد حاولت مع التنسيق
مع منظمة ملكة جمال العالم تنظيم مسابقة في نيجريا
وتم الغاء المسابقة بعد احتجاجات من مسلمي نيجريا
يتبع
|
Post: #3
Title: Re: مسابقة ملكة جمال السودان في اكتوبر 2005م
Author: bint_alahfad
Date: 04-01-2005, 01:36 AM
Parent: #2
الاخ احمد حنين
السلام عليكم ورحمة الله وبركاته
غايتو المسابقه ده لو كانت بالزى الاسلامى ولجنه التحكيم أمرأه فكلمونى عشان اقدم ليها 
وفى امان الله
لا اله الا الله
|
Post: #4
Title: Re: مسابقة ملكة جمال السودان في اكتوبر 2005م
Author: Mohamed Elbashir
Date: 04-01-2005, 01:47 AM
Parent: #1
مسأولين من الخير يا جماعه دحين أكتوبر الجاي ده مش واقع في عز رمضان !!!
أنشاء الله بس المنظمين مفكرين يعملوها بعد الأفطـار أو يكون عندهم فتوي جاهزه عشان الناس تدك رمضان لزوم الحضاره النزلت علينا من السما فجأه
عيش كتير تشوف كتير
تحياتي
محمد علي
|
Post: #5
Title: Re: مسابقة ملكة جمال السودان في اكتوبر 2005م
Author: ahmed haneen
Date: 04-01-2005, 01:49 AM
Parent: #1
الأخت المحترمة
بنت الأحفاد
تحياتي الصباحية
نعم هنالك حديث يدور في اروقة اللجنة المنظمة
بأن يترك امر اللبس والأزياء لأختيار المتسابقات
حيث تعطي لهم فرصة الظهور بملابس تعكس ثقافات مناطقهم
وقبائلهم ،،
وضمن هذا يتاح لك الفرصة للمشاركة بالزي الإسلامي
انت اعمليها واكيد سوف تفوزين وانا من هسع صوتي
مضمون ليك  
|
Post: #7
Title: Re: مسابقة ملكة جمال السودان في اكتوبر 2005م
Author: bint_alahfad
Date: 04-01-2005, 02:47 PM
Parent: #5
| Quote: انت اعمليها واكيد سوف تفوزين وانا من هسع صوتي |
الاخ احمد حنين
السلام عليكم ورحمة الله وبركاته
انا خايفه افوز بعدين المستنيرين يطعنو فى لجنه التحكيم ويقولو اللجنه ده ظلاميه عشان كده جاملت بنت الاحفاد
بعدين يدوهم سنه كامله يجهذوا فيها ده كده كل بنات السودان حيضمو الفوز
يعنى ممكن يجهذو من حسى فى الكريمات واللاذى منو....
انا مشيتى للسودان قبل سنتين شفت انو اى بنت هناك ممكن تكون ملكه جمال فى لحظات
انا حتى ما عرفتا نفسى لما بنات اهلى عملو لى بعض الرتوش
بعدين لو تم اختيار ملكه جمال السودان على الشكل بس تبقى ده مصيبه
عندى اقتراح انو لجنه التحكيم والحضور يكونو نساء فقط
ويتم ترشيح بنت من كل منطقه من خلال صديقاتها , مدرساتها, جاراتها الخ
والترشيح يكون على اساس الاخلاق ومساعده الناس والتزام الفتاه وتفوقها الدراسى وبرها بوالديها واحسانها لأهلها ومن ثم الجمال
ذلك لأن الترشيح من خلال الشكل الخارجى فقط لا يعبر عن ثقافتتا كما ان مفهومنا للجمال مختلف عن
المفهوم الغربى للجمال
وف امان الله
لا اله الا الله
|
Post: #6
Title: Re: مسابقة ملكة جمال السودان في اكتوبر 2005م
Author: ahmed haneen
Date: 04-01-2005, 02:09 PM
Parent: #1
اخونا ود البشير
كلامك مظبوط
واكتوبر حيكون رمضان
وقد تم تحديد موعد احتياطي
وهو نهاية نوفمبر
والفكرة ما زالت في البدايات
ودعنا نحيا ونشوف
|
Post: #8
Title: Re: مسابقة ملكة جمال السودان في اكتوبر 2005م
Author: EXORCIST7
Date: 04-02-2005, 00:26 AM
Parent: #1
إنا لله وإنا إليه راجعون.
.........لو دخلوا جحر ضب لدخلتموه......صدق رسول الله صلى الله عليه وسلم
إنها ثقافة الجسد وأسواق نخاسة المرأة ، لماذا يركزون على الجسد ومن هنا المدخل إلى إفساد المرأة السودانية وجعل جل همها فى فن تعظيم الجسد وإبراز مفاتنه فلا القيم ولا الأخلاق ستكون المعيار....أخ ...بخ.....من بلد تنعق بما ليس فيها إنها فتنة السفور....أسفرى ...أسفرى ولا تتبرجى
إنها الطاهوية مرة أخرى فاليمرح ياسر وقبيله ...فالسفور دين المرأة الجديد ومسابقات النخاسة !!!! ثم ماذا ؟
لا تتبعوا خطوات الشيطان.... هانحن نتبعها خطوة خطوة.....ولسان حالنا إنها خطى عرضها علينا الشيطان فخطوناها...
فليحذر الذين يخالفون عن أمره أن تصيبهم فتنة أو يصيبهم عذاب أليم. صدق الله العظيم
سوف نحتاج إلى جراحى تجميل فى السودان وأبشركم بإزدهار الجراحة التجميلية فى السودان...فالمعايير معروفة فلن ترضى إمرأة بما قسمه الله لها من جمال أبدا......
رفقا بقوارير السودان... يا رجال السودان
هذة المسابقات سوف تكون سببا للتمرد فى بعض أقاليم السودان
فلا تعمقوا أسباب الفتن فى بلد خزان الفتن فيه سد عالى !!!
إهتموا بتنمية رؤوس النساء فالأمية كبيرة جدا فى بلادنا...ليس بحاجة لهذا الإسفاف !!!
نظموا مسابقات لمحو أمية المرأة !!!
أرجو من الله أن لا تقام هذة المسابقة فى السودان أبدا....
ملحوظة
للصائدون فى الماء العكر....لا تحرفوا الكلم عن مواضعه
وإنى مترقب
والسلام
|
Post: #13
Title: Re: مسابقة ملكة جمال السودان في اكتوبر 2005م
Author: وانجا
Date: 04-02-2005, 05:16 AM
Parent: #8
احمد حنين
والمتداخلين/ات
سلام
EXORCIST7 كتب:
| Quote: سوف نحتاج إلى جراحى تجميل فى السودان وأبشركم بإزدهار الجراحة التجميلية فى السودان...فالمعايير معروفة فلن ترضى إمرأة بما قسمه الله لها من جمال أبدا..... |
لدّى بعض الاسئله أتمنى ان أجد لها إجابة ..
ما هى تلك المعايير المعروفة ..؟
وكيف يكون "شكل" الجمال ..؟
I Have a Dream
|
Post: #9
Title: Re: مسابقة ملكة جمال السودان في اكتوبر 2005م
Author: ahmed haneen
Date: 04-02-2005, 01:16 AM
Parent: #1
بنت الأحفاد
لك الشكر
ومبروك مقدما
جائزة اول ملكة جمال ظلامية
الأخ اكسوس
والله ما فهمت حاجة من كلامك دا
غير جحر ضب
تفاصيل كيفية عرض المتسابقات لم تحدد بعد
دعنا ننتظر ونري ونترقب
|
Post: #10
Title: Re: مسابقة ملكة جمال السودان في اكتوبر 2005م
Author: رانيا بابكر
Date: 04-02-2005, 04:33 AM
Parent: #1
الاخ/ أحمد حنين
تحيه طيبه
انت الناس لسه ما خلت تقليعة "كذبة ابريل" دي لسه؟!!!!!!!!!!
و الله ذكرتني ايام المدارس و الجامعات،كنا بنفتش لينا كذبات عجيبه و غريبه تصل حد انه مافي زول يقدر يقول لينا انتو كذابيين. كن بعد داك خلينا لانه طلعت فتاوي كتيره ما بتؤيد كذبة ابريل و قلنا الحلال بيّن و الحرام بيّن و انتهت التقليعة.
لكن بالجد زي كذبتك دي| Quote: مسابقة ملكة جمال السودان في اكتوبر 2005م |
اول مره تصادفني.
و دمت
|
Post: #12
Title: Re: مسابقة ملكة جمال السودان في اكتوبر 2005م
Author: محمد حسن العمدة
Date: 04-02-2005, 04:45 AM
Parent: #10
الحبيب احمد حنين سلامات
عارف مريت يوم الخميس في الليل ولقيت البوست يا دوب جديد فلبت قلت انتظر رجعتك اكيد لابد ليك فوق راي
بس ح تتفق كيف مع الضلامييين دييييييييييييييييييييييل
ههههههههههههههههههههههاااااااااااااااقرقرقرقرقر والله مشكلة كبيرة موش كدا
لانو شايفك لسه ما وريتنا رايك
|
Post: #14
Title: Re: مسابقة ملكة جمال السودان في اكتوبر 2005م
Author: ahmed haneen
Date: 04-02-2005, 06:51 AM
Parent: #10
الأخت الغالية
رانيا
لك التحية
ابريل شنو يا استاذة
قلنا ليك الشغلة دي في اكتوبر او نوفمبر
المهم انتي جهزي حجابك وزهورك
وانشاء الله الفوز مضمون
|
Post: #20
Title: Re: مسابقة ملكة جمال السودان في اكتوبر 2005م
Author: رانيا بابكر
Date: 04-02-2005, 03:39 PM
Parent: #14
الغالي حنين
تحيه معطره برائحه الرياحين و الورد
| Quote: قلنا ليك الشغلة دي في اكتوبر او نوفمبر |
لكن الاعلان عنها كان في بداية ابريل
على العموم انت عارف لو انا رشحت نفسي الفوز مضمون، و ما تقول اصلو اليومين ديل لافين معاي ملائكه النجاح و الفوز و الحمدلله كثيراً.
و دمت
|
Post: #22
Title: Re: مسابقة ملكة جمال السودان في اكتوبر 2005م
Author: ahmed haneen
Date: 04-03-2005, 02:52 AM
Parent: #20
الأخت الغالية رانيا
لك التحية
| Quote: على العموم انت عارف لو انا رشحت نفسي الفوز مضمون، و ما تقول اصلو اليومين ديل لافين معاي ملائكه النجاح و الفوز و الحمدلله كثيراً. |
انت يا صديقتي فاكرا الشغلة معرض زهور
دا موضوع كبير جدا والعرض فيهو يختلف
المهم نصيحة مني ليك
اذا كانت دي صورتك الفي البروفايل احسن ليك تكبي الزوقة
|
Post: #11
Title: Re: مسابقة ملكة جمال السودان في اكتوبر 2005م
Author: مريم بنت الحسين
Date: 04-02-2005, 04:45 AM
Parent: #1
غايته يا أحمد انا جيت ومحضرة مشاعري أشترك.. كان طلعت كذبت ابريل.. ما عارفه زاتو اقول ليك شنو.. لانه ما خطر على بالي انه ممكن كلامك ده يكون كذب.. كدي النشوف
| Quote: والترشيح يكون على اساس الاخلاق ومساعده الناس والتزام الفتاه وتفوقها الدراسى وبرها بوالديها واحسانها لأهلها ومن ثم الجمال |
بنت الأحفاد.. المهم الأخلاق...بعدين يا عسولي انا بطلع منها بكرامتي المسابقه كان انت خاشاها
بنت الحسين
|
Post: #15
Title: Re: مسابقة ملكة جمال السودان في اكتوبر 2005م
Author: bint_alahfad
Date: 04-02-2005, 06:59 AM
Parent: #11
الاخ الكريم EXORCIST7
اتمنى معك الا تقام مثل هذه المسابقه فى السودان ابدا
فهو ما الا تقليد أعمى للغرب
كما ان مفهوم الجمال لدينا هو الحشمه والاخلاق والالتزام وليس الشكل فلا يمكن ان اصف فتاه مهما بلغ جمالها الخارجى بأنها جميله لو لم يصاحب هذا الجمال حشمه ودين واخلاق
فى يقينى ان اى اسره محافظه لن تسمح لبناتها بالاشتراك فى مثل هذه المسابقه لتعرض فتنتها للرجال الغرباء لذلك ستتقدم نسبه بسيطه جدا واكيد هذه النسبه لن تمثل السودان باى حال
مريومه اكيدانتى بتهظرى, انتى صدقتى انو حأشترك فى مسابقه زى ده, غير عدم مطابقه المواصفات عدا الاخلاق واحتمال بر الوالدين, بعتبر مسابقه ذى ده هايفه جدا وابدا ما بتعير عن قيمنا وافكارنا, لكن بينى وبينك لو فى زول مفروض ينسحب تبقى ده انا لانك ماشاء الله تنطبق عليكى الكثير من المواصفات ده
وفى امان الله
لا اله الا الله
|
Post: #16
Title: Re: مسابقة ملكة جمال السودان في اكتوبر 2005م
Author: EXORCIST7
Date: 04-02-2005, 08:33 AM
Parent: #15
الأخت الفاضلة ...بنت الأحفاد
أتمنى ذلك فنحن كمسلمين مطلوب منا غض البصر وعدم تتبع النظرة فالأولى غير المقصودة لك والثانية مع سبق الإصرار والترصد عليك بالسيئات
ومسابقات الجمال العالمية معروف معاييرها / على المرأة أن تظهر بالملابس الداخلية ثم تفحص كل محاسن المرأة ألخ.....:::هذة إجابة للأخ الذى يسأل عن المعايير !!!
والسلام
|
Post: #17
Title: Re: مسابقة ملكة جمال السودان في اكتوبر 2005م
Author: ahmed haneen
Date: 04-02-2005, 01:39 PM
Parent: #1
اخونا الحبيب
ود العمدة
ما عليك يا حبيب
الظلاميين خلاص بقوا اصحابنا
وحيشاركوا في المسابقة بالطريقة التي يختارونها
طبعا يا حبيب المسابقة حتكون قبال محاكمة لاهاي
المهم لوعاوز ترشح واحدة برضو بنديها صوتنا
وارجو ان اسمع صوتك
|
Post: #21
Title: Re: مسابقة ملكة جمال السودان في اكتوبر 2005م
Author: EXORCIST7
Date: 04-02-2005, 04:09 PM
Parent: #17
وبهذا يبدأ عهد التنوير فى السودان.....النورانيون أصحابنا رواد الحركة الجديدة !!
|
Post: #18
Title: Re: مسابقة ملكة جمال السودان في اكتوبر 2005م
Author: صديق الموج
Date: 04-02-2005, 02:24 PM
Parent: #1
احمد العزيز..انا وسجيمان كنا عايزين نبعت ام الخيرات حقتنا
على امل لو فازوا تقوم تتعاقد معاهم شركة يا بانية لعمل
اعلانات..ما خلاص البترول جاء تانى تسمع مفراكة توشيبا الاطول
عمرا...قرقريبة هيتاشى تعوس الكسرة ارهف من الكلينكس..صاج ال جى
يولع بدون كهرباء والمفاجأة ولاول مرة بالعالم مقاس كسرة
رهافة ومقاس قراصة وارد القرير ويجن ام الخيرات حقاتنا يفركن
ويقولن لا مشكلة والدولارات تقع علينا هبطرش..لكن تحت تحت سمعتا
قالوا حريم المغتربين بعاملوهم جمال عربى على وزن شهادة عربية
يعنى حا يخصموا منهن 15% بدل هوفر و3% بدل نوم زيادة 8% بدل
مكيفات ..عشان كده غيرنا راينا...ونحيا ونشوف عرس يحى،،،
|
Post: #19
Title: Re: مسابقة ملكة جمال السودان في اكتوبر 2005م
Author: سجيمان
Date: 04-02-2005, 02:57 PM
Parent: #18
الموج
| Quote: ما خلاص البترول جاء |
جاء الكم؟
صديق يا اخوي ما نفك اخرانا ساكت... نشوف نضم احمد دا صُح..ولاّ.. ونسة؟....وبعدين نشوف الراي
|
Post: #23
Title: Re: مسابقة ملكة جمال السودان في اكتوبر 2005م
Author: ahmed haneen
Date: 04-03-2005, 06:22 AM
Parent: #1
اخونا الموج
يا راجل اوعك بعدين تنكر الكلام دا
لكن تحت تحت سمعتا
قالوا حريم المغتربين بعاملوهم جمال عربى على وزن شهادة عربية
يعنى حا يخصموا منهن 15% بدل هوفر و3% بدل نوم زيادة 8% بدل
مكيفات ..عشان كده غيرنا راينا...ونحيا ونشوف عرس يحى،،،
وبرضو شايف اللخو سجيمان ما مصدق
لكن
اديكم وصية انت وسجيمان
ام الخيرات حقاتكم ديل الإ تشتركوا بيهم في
مسابقة المصارعة الحرة اليابانية
لزوم الوزن وكدا
|
|