الرجل الدلاليك......

نتمنى ان يعود ملاسى
ليثرى البورد بقصصه الجميلة

Quote: الرجل الدلوك ........او الرجال الدلاليك مقدمة لا بد منها كثيرا ما يتبادر الي ذهني كلمات شائعة فافكر في تصريفاتها و علي سبيل المثال كلمة , دلوكة و طبعا دلوكة معروفة للجميع بانها الة ايقاع شهيرة, بس مرات بيطلق لفظ دلوكة للهجاء كما نعلم, و سؤالي هو هل يمكن ان نطلق علي الذكر لفظ دلوكة ام ان الاصح لغويا استعمال لفظ دلوك و دعوني اقص عليكم قصتين من و حي الخيال القصة الاولي: ما دام الحكاية قصص في قصص خلوني انا برضو احكي ليكم قصة ... هي قصة برضو خيالية الا ان ابطالها لم يموتوا بعد مرة كان في واحد اسمو عم دفع الله ... عم دفع الله دا كان بيلبس الجلابية بدون سروال – تتصوروا – المهم كان بيركب العجلة و يمشي يقعد في ركن مستشفي الدايات الشمالي الشرقي في بداية الشارع الذي يربط الموردة بالاربعين و ينتهي عند استاد المريخ ... يعني قصاد كلية المعلمات كدا. كان عمنا دفع الله عندو حجر كبير تحت النيمة مسجلو باسمو طوالي يتكل العجلة و يقعد في حجرو دا. طبعا الضهر الحركة بتكون خفيفة في الشارع دا و ما بتلقي فيهو غير بنات امدرمان الثانوية و بنات كلية المعلمات و بنات المدارس الوسطي راجعين بيوتهم... المهم عم دفع الله كان عندو حركة غريبة بيعملها, تتصوروا كان بيتلفت و لمن يلقي الشارع فاضي مافيهو غير بنات المدارس ديل ... كان بيرفع ليهم الجلابية ... تتخيلوا زول زي دا ... المهم يوم شافو ليك صارقيلة لمن كان راجع من مركز شباب امدرمان, و صارقيلة دا من اولاد العباسية - طبعا كل واحد من اولاد العباسية كان عندو اسمين اسم في شهادة الميلاد و التاني في الحلة _ قام اخونا صارقيلة دا خلي ليك عمك دفع الله واقف و جر ليهو الجلابية من ورا و شرطها ليك بطولها... و لك ان تتخيل منظر دفع اللة – المرة دي بدون عم طبعا – المهم داك كان اخر يوم دفع الله يقعد في الحتة ديك و اختفي تماما... الا انو بالتاكيد شاف ليهو جلابية تانية و حجر تاني و تحت شجرة تانية و قدام مدارس تانية و مشي يمارس نفس هوايتو العجيبة دي ..... لكين اكيد برضو حيلقي ليهو صارقيلة تاني ..... ملاسى

Quote: القصة التانية: الواحد بيتذكر قصص غريبة ... فالقصص الخيالية تحفز الذهن لانتاج قصص اكثر خيالا .... اها كدي هاكم القصة الخيالية دي برضو .... مرة كان في واحد جارنا استاذ, و الاستاذ دا كان محترم في الحلة احترام شديد خلاص. و لمن الناس تقول استاذ العطا الكلام كان بيقيف ... اخوان استاذ العطا الصغار كانوا معانا في المدرسة ... و هو كان برضو استاذ في المدرسة ... و كان في حصصو كلها بيركز علي مكارم الاخلاق و الالتزام السلوكي و الامور الزي دي كدا. المهم ما اطول عليكم, يوم انا و جقود و مصران _ و زي ما قلت ليكم كل زول عندو اسمين في حلتنا – كنا راحعين من المسرح القومي و قلنا نمشي الموردة نتعشى سمك... بعدين و قدام حديقة الريفيرا _ طبعا الكلام دا كان قبال 83 – نلقي ليك زولنا الما بنغباهو, استاذ العطا ذااااتو .... لقيناهو ليك واقع في الواطة طينة و كان بيعزف و قميصو مليان نغمات ... ما تتخيلوا الصدمة كانت كيف.... المهم رفعناهو و تكلناهو و هو ما قادر يقيف, و نحنا في الحالة ديك قام بال في روحو .... تتخيلوا .... جقود و مصران قعدوا يضحكوا و قالوا ليهو يا استاذ لو ما بتقدر عليهو بتشربو مالك. المهم و بصعوبة شديدة لقينا تاكسي و وصلناهو البيت. و انا من الزمن داك و لي الليلة ما بقدر اعاين لاستاذ العطا في عينو و اعتقد هو برضو ما بيعاين لي .... لكين تتصوروا و رغم مرور اكتر من 25 سنة علي الحكاية دي الا انني ما زلت متألما ... فان تري استاذا محترما كاستاذ العطا في ذلك الوضع ليس بالشيئ الهين و ان ينهار لك مثلا اعلي هكذا في ثوان شيئ لا يمكن التعبير عنه ... بس تعرفوا لحسن الحظ – او سوءه ما عارف - ناس الحلة ما زالوا علي احترامهم لاستاذ العطا لانهم لم يشاهدوا ما شاهدته انا .... ملاسى

Quote: الدلوكة التالتة: مرة سنة سبعين جا اب عاج شندي , طلعونا من المدارس و طوالي علي محطة السكة الحديد نلقي ليك اب عاج طالع ليهو في راس عربية من عربات القطر يضرع التقول اسد .. و طبعا قعدنا نهتف مع الجماعة ... و كانو طبعا جنبنا بنات الثانوي و نحن مبهورين بيهم و عايزين نلفت نظرهم بأي طريقة يسألنا الهتاف الاكبر ابوكم مييييين فنرد هاتفين نمييييييييييييييري ثم يسأل اخوكم مين فترد بنات الثانوي نميييييييييييييييييري حبيبكم مييييين فتقل حدة الهتافات قليلا نميييري .... رئيسكم مييييين ..... نمييييييييييييييييييييييييييييييييري الي اخر المنمنة المعروفة للجميع و كان التنافس الشريف حينها فيمن يسمع صوته اعلي ... و رجعت البيت و انا صوتي رايح الا انني كنت في اشد حالات السعادة و النشوة لان صوتي كان عاليا بما يكفي ... الا انني لا استطيع ان اصف شعوري عندما لوح في اتجاهنا محييا ... و الغريبة تاني يوم في المدرسة كنت محط انظار و احترام جميع الزملاء عشان صوتي اكتر صوت انقرش فيهم ... ملاسى

ملاسيات .......

الوالده والدكتوره بيان سلامات ونهارك سعيد
اخاطب معك واضم صوتي اليك بعوده صاحب الكيبورد النقي ملاسي

بيان
قال محمد المهدي المجذوب : وفي ضرام الدلاليك ... يعني الدلاليك برضو عندها ضرام!

ما اشبه الليلة ب بعد غدٍ ....




تحياتي و احترامي يا بيان و انور

الابن الحبيب انور

رجل والرجال قلائل ربنا يحفظك ويرعاك
وشكرا لك
لاحقاقك الدائم للحق
ربنا يكبرك بعقلك وفى ميزان الحسنات

مرحبا بك اخى حسين

ومرحبا بصورة ملاسى الاب عليه الرحمة
وتحياتى واحترامى لك

الاخ ابو ساندرا
وقد يكون ضارب الدلوكة اشتر
مثل الرجال الدلاليك
ومشايعنهم
فياتى الضرام اشترا مخالفا...ومختل الايقاع
فما ابخسه من ضرام هذا الضرام الاشتر المخالف المختل الايقاع
بخس مثل الرجال الدلاليك ومشايعنهم

وتحياتى لاسرتك الجميلة

والله يا خالة ليك كل معزة واحترام بس انشاء الله ود اختك ما يطلع ليك دلوك او دلدول

الابن العزيز سيف
حاشاك يا ولدى من جنس دى صفة
الرجل الدلوك دى ماركة مسجلة لعينة محددة
انت يستحيل تكون منهم.. حماك الله ورعاك

دعوة من أعماقي للتصافي ..العفو والعافية

بيان
سلامات
الاخ ملاسى افتقدناه كثير خاصة هو واحد من النباشيين
يحفر يطلع ليك بوست انت عايز تدفنو .
وبعدين اخونا كبسيبة الحمى طارت ليه فى راسو ولا شنو
شافوا شايل بوستيه وحايم ولا هرشو.
كبسيبه مافى زعل من حد الحكاية دا منبر حر ويكون فى
تقاطع فى الاراء ودا شى طبيعى روق الجاز .

المبدعة الدكتورة بيان تحياتي:

عجبتني كلمة دلاليك دي.. وارجو ان تواصلي في تكريس هذا الفن الدلوكي.. ولاسيما وان الدولكة انقرضت في عصر العولمة والانترنت.. ولكن انت تكلمت عن الدولكة.. والدلوكة لا معنى لها من غير الدلاكيين.. الذين يدلكونها دلك..ا فهناك ت دلاكون بالايجار وهم شر البلية..

ضليلم

تلاتة ضلامين حتة واحدة
حاسبو احسن البوست يطس

نوريت الحمدلله ملاسى ظهر ومشى نتمنى انه يرجع ويمارس تاليف القصص
لانها دى قصصو هو وانا بس شركتا ليهو بيها...

الدلوكة هذه يا عزيزى هى آفة هذا المنبر
وذى ما قلت الشيالين ديل مشكلة كبيرة خالس خالس

ترقبوا قصة الديك الممعوط و الثعلب الهرم
قريبا

العزيزة بيان

لك الشكر على نقل هذه القصص الممتعة والتى ابرزت لنا انواع من الدلاليك الرجال الذين تمتلىء بهم الساحة وهم كثر دوماً..

ربما يكون فينا شىء من ذلك وهذه فرصة لمراجعة النفس فما اثقلها بسىء العادات وما احوجنا دوما لمن يضع نقطة الضوء على المكان المعتم حتى نراه ..

فى انتظار المزيد عزيزتى لنستمتع ونستفيد ...
لك تحياتى ...

أبصم معاك بالعشرة يا دكتورة يا رائعة لى عودة الحبيب ملاسى
لك حبى وفائق احترامى
ابنك النجيب / السمؤل

بيان تاني دلوكيات ملاسي!؟ لووووووووووووووووول عاد الله يغفر لينا كلنا دقيناهن في البورد لا خلينا تمتم ولا شتم ..
الاخ ملاسي والله ليك وحشة وما تعرف لكم انا حزينة لعدم رؤيتكم انت والمدام في الاجازة ، لانو اجازتنا باظت بفعل الملاريا كانو قطعنا كل هذه المسافة وركينا طيارة مخصوص وطبعا لبسنا اجمل ما عندنا عشان نلاقي حبيبتنا الملاريا التى لم تمنحنا حتى اسبوع واحد نسلم فيه على الاهل والحبان بس خيرها في غيرها والمرة الجاية انشاالله لم نغادر الا ومعنا الوقاية .. انشاالله قبلتو العزر ..

الاخ السمؤل
سلام و تحية

تعرف زمان في جريدة من الجرايد لمن رسام الكاريكتير يمشي اجازة بتنشر ليهو حاجات قديمة و بيكتبوا تحتها
" كريان في اجازة و هذا من قديمه " ... و انا التعبير دا عاجبني جداً

عشان كدا؛ ملاسي في اجازة و هذا من قديمه ....
و اهديك حكاية المرضي ود ستنا

كما اهديها لصديقي الحبيب عادل الامين ولكل الاحرار



المرضي ود ستنا كان زول شاطر خلاص, بس كان بيحب السفاهة زي عيونو ...
و كان طالب معانا في الجامعة ... و كانت امكانياتو المادية محدودة زيو و زي باقي الطلبة المعانا ... بس دايما كان بيربط اللهو بالجد و دا الكان بيميزو ....

تصدقو كان بيعمل شنو ... كان لمن تكون معاهو طرادة هي المبلغ المقطوع الكافي – حينذاك - لقضاء ليلة سمر لطيفة علي حسب ما كان يسمي هذه الاشياء, كان بيفتح أي مرجع من المراجع البيذاكر منها و يقوم بوضع الطرادة في نهاية الجزء الذي يود قراءته او مذاكرته ثم يبدأ القراية من بداية هذا الجزء و يمني النفس بسرعة الوصول لصفحة الطرادة و يستمر في الكسر بالمعدل الذي يمكنه من الوصول للطرادة باقصي سرعة ...

و عندما يصل للطرادة يكون قد انتهي بالتالي من ما اراد قراءته و استذكاره فينهض من فوره مهما كانت الساعة و ينطلق الي حيث مصارف المال ...

غادر المرضي ود ستنا البركس وركب البرنسة حتي وصل لغايته ... و هناك راي منزلا معلقة علي بابه لافتة مكتوب عليها بخط غير جميل الا انه واضح " منزل احرار " .... خيل للمرضي و علي حسب هواءه الباطني ان احرار هذه تعني ان يفعل سكان هذا المنزل ما يحلو لهم, يعني زي ما يقول ليك الواحد انا حر اعمل الدايرو انت مالك .... و لم يعلم المسكين ان احرار هذة تعني نفس المعني الوارد في المقولة المشهورة بان تجوع الحرة و لا تأكل ب .... الي اخره .....

اها اخونا المرضي لقي الباب متاكى ... قام دفرو و دخل ....... لقي الجماعة راقدين في الحوش ... فقال لهم بلهجة الواثق من نفسه و هو يتحسس جيبه حيث ترقد الطرادة في اطمئنان:

- الراقدين ليها شنو ... انا جيت

انزعجت علوية و سحبت الطرحة لتغطي بها راسها و صرخت بصوت منحبس سجمي بينما رفع صباح الخير راسه من العنقريب نصف رفعة و نظر الي المرضي بعين شبه مغمضة و قال ليهو:

- مرحب .... تعال .... ابقي داخل

ارتسمت ابتسامة انتصار علي الطرف الشمال لفم المرضي ..... و دخل ...

تاني يوم صحو الجماعة الصباح في الداخلية لقو اخونا المرضي نايم و مغطي راسو ببشكير علي غير العادة ... صحوهو ... قال ليهم:

- انا صاحي
- طيب لو صاحي ما تقوم راقد مالك
رد من وراء بشكيره
- امشو انتو انا ما ماشي
- الامتحان يا المرضي
- ما مشكلة بجيب لي ميديكال ريبورت
- يا زول صلي علي النبي و قوم
- انتو مالكم انا داير املحق ... في زول فيكم عندو عندي حاجة ... يلا طشو من هنا
- يا اخينا ما تشيل البشكير دا و تتكلم معانا زي الناس

لكين ما في فايدة لا المرضي داير يقوم و لا داير يشيل البشكير من وشو .... خلوهو جماعتو في الغرفة و هم في اشد حالات الاستغراب ....

ما ان خف وقع اقدامهم و تاكد المرضي من ابتعادهم حتي نهض و رفع البشكير من وجهه و جاب مرايتو المشقوقة و نظر فيها متحسرا و تحسس مكان شنبه الذي فقده الليلة الماضية.... و ردد بصوت حسير ...

انا كان مالي و مال الاحرار


ملاسى
حكاية المرضي ود ستنا ... اهداء لعادل الامين و كل الاحرار ...

الدكتورة نجاة والأخ ملاسي بوست ممتع وظريف.

سيف الدين جبريل

الدكـتورة بـيان ســـلام


تشكري على البوسـت و تشكري على الدعـوة لعودة أخونا و حبيبنا حسين ملاسي


و أهـلا بـيـك و عـودا حـميدا مستطاب أخـونا حسين مـلاسي

ابو الحسين العزيز شكرا لك
نتمنى ان يعود ملاسى عودة كاملة

اختنا العزيزة عشة

تحياتي و احترامي

و الله الملاريا اتلومت معاكم؛ و حرمتنا من رؤيتكم البهية و التي اعددنا لها ما اعددنا؛ و العذر طبعاً مقبول؛ و ان شاء الله الاجازة الجاية ننتظركم في المطار ..

تحياتنا لبيرق و جميع افراد الاسرة الكريمة


و في انتظار صور الامطار و الابقار ....

سلام مربع يا دكتورة
تحية كبيرة أستاذ ملاسي
ومرحباً بكم في دلاليـــــك العرب

د.بيان والإستاذ ملاسي:

بوستكم دا جميل ..وفيه كميه من الدلاليك الحايمه ...الله يكفينا شرهم...

حقيقه دا ابداع قصصي رائع...
مع تحياتي

Quote: و في انتظار صور الامطار و الابقار ....

شنو يعنى انت وعشة بقيتو على

كدا عايزها تفضحنا زيادة يعنى الناس ينسو موضوع الكلاب
والظلامية والهاكر.. ويقعدو يتكلمو عن بقر حلتنا..
انا كدا زعلت منك شديد..

العزيز ايهاب
اللهم آمين
ربنا يكفينا شر الرجال الدلاليك
ويجعل كيدهم فى دلاليكهم

Quote: ومرحباً بكم في دلاليـــــك العرب

ذى الدلاليك الكايسنها الحسانية ابان حملة الدفتار لسباق الحمير

و تحياتي و اشواقي يا سيف الدين؛ و بالمناسبة قرأت في الاضواء لماما صفية عن رسالتك التي بعثت بها اليها ... فعلاً كلام تمام.

ملاسى الرائع : لك حبى وتقدرى على التعقيب وقصة المرضى الرائعة .. يديك العافية .... يا جميل
السمؤل

ابونا؛ ابو حسين؛ كيفك يا راجل ؛ و الله مشتاقين ...

و طوالي في البال ... اذ لا ادخل دار الرياضة او امر بنادي العباسية
الا واتذكرك؛ انت و تاج السر و بلدي يا حبوب ....

بلدياتنا نوريت؛ دبايوا ....

تحياتي و تقديري يا حبيب نورة؛ و الف شكر.

و شكراً يا ايهاب على الطلة؛ و الكلام الظريف

اعتذر لكل من :

دفع الله ود اب عجلة
الاستاذ " الموسيقار" العطا
و المرضي ود ستنا الذي فقد شنبة من جراء تشنبه ....

لانو الحقيقة قد تفوق الخيال بمسافات .....
و لكم البطيخ حتى ترضو

الاخوة جميعا والاخت بيان
سلامات
برضو دلاليك قولى طرابيش فى كلاب مسعورة يا بنت امى
اعملى حسابك الكلاب كلما تكبر وتعجز نسبة اصابتها بالسعر
تكبر ولا شنو يادكتورة حدثينا ما انت دكتورة ولا شنو .
بس ما تستقيلى عشان مافاضين للحنيس.....

العزيز نوريت

قال لى صديقى البيطرى والعهدة على القائل.. ان السعر يسبب ضباب فى الوعى... فيرى الكلب المسعور كل الاشياء المتحركة كلاب اخرى.. ولذلك يعوى الكلب المسعور عندما يرى القمر يغطيه السحاب فيبدو متحركا..

[email protected]

دا ايميلى ممكن ترسل لى عليه لو امكن

الله عالم وشاهد في ناس دلاليك كتيره عليهم

الاستاذ سيف
دبايوا

Quote: الله عالم وشاهد في ناس دلاليك كتيره عليهم

انت قاصدنى انا وياراجل خليك وازن كلامك.


واعلان انسحابى من مجموعة الضلاليم
الى الضلام ذاتو.....

ولو مالقيت تحانيس وكلمات اطراء لن انتقل.

الاخت بيان
ان شاء الله الامانة وصلت
الكبر كعب يابنتى اشوف لى نظارة
قراية الكمبيوتر بقت صعبة

هالو بيان

كنت أود أن أنتقل بعدتى و عتادى إلى هنا .. لكنى فضلت أن أرابط هناك فى منزل جدى طيفور فى بوسته بتاع جندر غير

نعم التعليم

خليك هناك احثن مع عثفير

بعدبن انا الايام دى كونتامنتد احثن تبعد عشان ما تجيك طوبة كدا ولا كدا.. ولا زول يجى يقول كثرت زير الثبيل الليلم..
ولا زول يقول الحلاوى حمر لى انا ماشى
ويجو الجماعة يغثلوك ويمثروك...

الفاضلة : بيان

عفوا ان جاء مروري من هنا متاخرا.
ولكني أقول :
كم هو رائع الزمن الذي نسوح فيه ( من سياحة وليس سحاسيح !!!)
بين جميل ما تطرحينه يا سيدتي هنا ومايأتي الينا من الغالي
الجميل أبو الملاليس .

فلك وله ودي وتقديري.

خضر عطا المنان

تحياتي و ودي يا خضر و البوست نور ...

و حمد الله على السلامة يا حلاوي ....
شنو صيف قبرص شغلك جداً و لا شنو

من قصص التراث:


كان جدي – الاكبر – لا يأكل ملاح اللوبيا مطلقاً؛ و بل و كان ينظر

للرجال اكلي اللوبيا بشيء من الاحتقار؛ و كان لا يحسبهم في عداد

لرجال؛ فقد كان في نظره ان الغازات الناتجة من هضم اللوبياء فيها

منقصة من رجولة الرجال؛ و انو الراجل - الراجل جد يعني –

لا ينبغي له ان يخرج ريحاً ....


لذا فقد حرم اكل اللوبيا على جميع افراد الاسرة الكبيرة – حينذاك -

رحمه الله و احسن اليه .... فقد كانت له نظريات غريبة ...

و كان – لو ان الله قد امد في ايامه - سيستغرب مما يحدث الان من رياح

صرصر عاتية؛ سواء اكل الرجال اللوبيا او لم يأكلوها .....