الاعزاء اهالى قرية أوسلى... الفين سلام

اهلى وضريبين دمى
كيفنكم ورمضان كريم وتصوموا وتفطروا على خير يا ربى

الناس المعاى والشايفنى حقانية و الناس الشايفنى متلقية حجج
كلكم ازيكم ونعلكم طيبين شى ونعل مافى زول ابى عشا...

وان شاء الله التمر كان سمح و السبيقات شايلات شى..
وامانى ما فرح وكتين عرف انكم بتقرو البورد
وتتناقشو فى ناسو.. وطمنو العم العزيز انه الجنا (هولفول) شديدولضيض
وصدى اهلو.. اتمنى انه يقرأ الكلام دا ويجى يسلم عليكم..
ومشتهية لى قعدة فى القوز ولعبة وطنبور وبدور اشوف لى جنى
يقيف فى الصف يطير لا فوق يطير يندق... بذكر وكتين كنا نلعب قيرا قيرا فى ضو القميرة.. وشليل وينو..
واسع اغنينة النفوس الطيبى جاتنى فى قلبى وفكرى
وانا والله طارياكم و طارية العشيرة
اها ودعناكم لى سيد الوداعة..يحفظكم الله من الهدام و الرملة
لاتقطعو الجوابات الله لا سد دربكم
[email protected]
بت مورا بيان

ملحوظة
وليدكم عادلنى وانا عافي منو لله والرسول
والدم ما ببقى موية.. وتانى مافى كوف كوف ضمى شى

بيان

يسرني ويشرفني ان اكون اول المستقبلين....والمسلمين عليكي



وبعد داك كل زول يقعد في طرف عنقريبو ويمد قدومو

سجيمان يا ود عمى شكرا ليك

Quote: وبعد داك كل زول يقعد في طرف عنقريبو ويمد قدومو

8

د. بيان مشتاقين (اسلاميا) ورمضان كريم
مالك غطستى ذى الموضوع الرائع الماجاب خبرو زول؟؟؟

تاج السر

وينك
والله التشبيه عندك
غطسنا فى العرق من العتالة واللهضى
.. قلنا نجى نسلم على اهلنا ديل..
ذى غيرنا محل السكن وكدا ورجعنا حلتنا القديمة
وحنينا دائما لاول منزل..
شكرا يا مستنير

ذى غيرنا محل السكن وكدا ورجعنا حلتنا القديمة
وحنينا دائما لاول منزل.......


لوووول يادكتوره يعنى حيطة شيخنا ود الجزولى حيتمها منو بهناك؟؟؟؟
عموما حمدالله على السلامه وحضورك هنا دايما أجمل.....

حافة الغياب
وين بخلى البيت الاول
يا ولدى جيت اجرب الباسورد
وحتلت لكن لسع بليس فى الحيط
والجزولى وعد انه يرسل حاجات
اطمن معاك فى البيت القديم

حمدا لله على السلامه يا دكتورة

ورمضان كريم

عبدالله شكرا ليك
ورمضان كريم

رمضان كريم و حمدا لله على السلامه يا دكتورة

البيحبو كلو كريم يا روضة
وشكرا ليك شديد

تاج السر: التشبيه خطيـــــــــــــــــــــــــــر...

أنور

ياخالة
مش حرام عليك
مسدده بابك دا
لسع العشرة الاواخر ما جاءت عشان الاعتكاف وبعدين البتالصغيرة خليناها...ما تزعلى وتقومى
تحردى من البورد..اها اسى الجنى هوب فل دا تاعباه مالك تقولى دايرة فى شيلة بنتك
فسيخ الدويم عليك الله فى مرة بتتعب نسيبها زى كدا....نسوان اخر زمن..الله يستر ليه
من لبن الطير....
اها مشتاقين زى شوق تاج السر مخلوط بسلام رودا...عليك الله حصل لاقاك شوق زى دا...
دا شوقا مسخن فى كنتوش..ابقى مارقة ...سوى العصيدة وملاح نعيمية...وزورى البوستات وعزى فى البكيات الليها ضل...وماها خمج...
رمضان كريم

ابو قوتى يا يابا وين لقيتك لامن اباك
اها انا متنازلى عن توب ام العروس و خاتم الجنيه
قصرتا معاك؟
(هولفول)
برضو متنازلين ليه عن الاشياء اعلاه


كدا صرفنا اتنين

دكتورة بيان
سلامي وإحترامي
حمداً لله على سلامتك وسلامة طلتك وشوفة حرفك ومشتاقييييييييييين عديل كدا
كيف الصيام عندكم هناك؟؟؟
دحين البنوت بقن للصيام ولا إلليل؟؟؟
تحياتي للجميع اسرتك الصغيرة والكبيرة

البدرى ابنكنبة
مشتاقين يا اخى.. امانة ما اتمغست وكتين لقيتك سافر قبلى بزمن قصير
ومشينا اتلمينا ديك يا اللمة فى بوفيه التلفزيون فجعة كدى
جماعتك اتلمو من لاوى لى لاوى.. قاسم ود ابزيد و قسم الله وسامية عبدالله
غالية حسن ابراهيم حماد و ودخيل الله وسهام الخواض..ورابحة حماد
والله ضحكنا كمية من الضحك .. بعدينتى قول كدى يا كشف الترقيات اظهر
اها الترقيات وقعت هبطرش كلهم رقوهم عينى باردى.. وقالو قدمى بالحيل كانت سمح عليهم

تحياتى لك ولاسرتك وللخواجة

يا هلا بهالطلة

البورد نور يا دكتورة

و رمضان كريم فى KL

أحمد داود

معك ايضا اقول التحية لاهلي باسلي ورمضان كريم

الاخ عبدالله
ان شاء الله السلام يصل لاهلك يلقاهم تامين لامين
وسعيدين..
رمضان كريم لك ولهم

ود داؤود
ولد بلدى وأخوى

شكرا ليك
البورد منور بيك
وانا من غير تشجيعك الدائم غير المشروط ولا حاجة
ابقى اخضر ورمضان كريم

تسلمي دكتورة بيان.. كنا فاقدنك ورجعتك افرحتنا شديد.. وكمان معاك بي نسلم على أهلنا ناس أوسلي وكل المنطقة...نكهتك في البورد وحيويتك كانت مفقودة.. أنا كنتا غايب عن البورد شوية بحكم الشغل.جيت لقيتك مافي زعلت.. الحمد لله على الرجعة..
صديق منصوري

ود عمى المنصورى
امانة ما فرح وكتين لقيتك رجعت .. وينك انت بالحيل طولت مننا
شكرا ليك على كلامك السمح دا.. لا تكبر لى راسى شى تخلينى امشى
اناضم الاعداء تانى..وافركهك فرك الويكى
نتمنى نشوفك طوالى وما تغيب مننا

دكتورة بيان

أوسلي من الحرازة للحرازة تحييك

جني جنى أوسلي المجنون

جنى تسلم..

بس اوعى كمال يسمع يقبل عليك..

الغالية نجاة
مرحب بعودتك للبورد

الأخت العزيزة د. نجاة ( بيان )

سلام كبير جدا
رمضان كريم و تصومي و تفطري على خير ..
طال غيابك .. عل السبب خير ..
أرجو أن يكون الوالد بخير .. و بقية الأسرة الكريمة .. و كيف وجدت الأولاد بعد العودة من السودان ..
نرجو أن تتواصل إسهاماتك ( القيمة ) هنا ...نحن في الإنتظار

تخريمة مهمة : ودقاسم بيسلم عليكي كتير السلام .. و بيقول ليكي رمضان كريم و كل سنة و إنت طيبة .. و لأن ( النت ) مقطوع عنده لم يستطع الدخول .. اللهم قد بلغت اللهم فأشهد ..

تحياتي لزوجك و للأولاد ..
أخوك جلال

العزيز جلال
شكرا ليك على السؤال

الوالد كان ينتظر زيارتك بفارغ الصبر كما تعرف انه بعد ان خرج من عطبرة.. لا يسعده شئ قدر ان يرى ناس عطبرة..ولكن تفهم المشغوليات
ربنا يمد فى ايامو و تمشى تشوفو فى زيارتك القادمة...
الاسرة هنا بخير

بلغ اخونا ود قاسم تحياتنا..وكل سنة وهو اسرته بالف خير.. وربنا
يديم المعروف

.. ولك انت كل الشكر والود
فدائما أنت من الاقربين..

حبيبتى ندى
طلتك تعنى لى الكثير والله.. والله انا كنت عايزة اجرب الباسورد بس
لكن كلامكم دا خلانى افكر انه جد عندى اصحاب.. شكرا ليك

الخالة د.بيان

رمضان كريم تصومي وتفطري على خير

كل سنه وانت بالف خير

تحياتي

وليدى السنجك
شكرا ليك وكل سنة وانت بالف خير القابلة شايل قفة الخضار
وينك ما ظاهر؟

أختنا العزيزة الدكتورة بيان

عوداً حميداً ، والبورد نور من تاني ، وعبر البوست الجميل ده بوصي ناس أوُسلي يوصلولي السلام لي أهلي في الكنيسة وماها بعيدي منهم بينم وبينا ناس مساوي وهم زاتم أهلنا في سكتم بيغشوا ناس "علي حمد" وجمبهم مو بعيد "الميجر" يسلموا لي عليهو كتير وفي الكنيسة بقول لهم تغشوا جامع أهلي العوضاب في الحلة التحت بتلقوهم هناك من بعد العصير قاعدين في الخلوة الغربية، ومن هناك مو بعيد لي خلوة البدري كمان تلقوا البادراب والتراتير متلمين يقروا في مصاحفهم ولي بره جنب الدكان وفي ضل النيمه الصبيان يتونسوا ...

والله يا دكتورة رجعتينا سنين وسنين لي ورا ،،، وفرحتينا بي العودة وألف حمداً لله على السلامة.

الشايقى اخوى ما بالله وا مغصتى رحل تلوت الليل

اتمنى ان يصل سلامك لاهلك ويجدهم فى نعيم...

بالله اكتب لينا ذكرياتك

العزيز أبو جهبنة من أكثر المقربين لي ، ومن أكثر المقربين للأخت بيان ، وهو يعلم ويتابع كل تيارات المد والجذر علوا وهبوطا ،، ودائما يصاب بالدهشة مما يحدث ، لمعرفته لكلينا ،،
وقبل عودة بيان بعدة أيام أسررت لإبي جهينة برغبتي في فتح بوست كنداء لبيان لتعود إلى البورد ولنفتح مع بعضنا صفحة جديدة ،، وشاءت الأقدار أن تعود بيان قبل أن أفتح هذا البوست ،، حيث حدثني أبوجهينة أمس أن بيان قد عادت للبورد ، ولم أتمكن في تلك الفترة من صباح أمس من الدخول إلى النت إلا عندما اقترب منتصف النهار ،، وسألت أبوجهينة ، كيف عرفت بعودة بيان ؟ فأفادني أنها أفردت بوست لعودتها ، وقال لي أنه بصدد التداخل في هذا البوست ،، فكلفته أن ينقل تحياتي إلى بيان ، وقلت هي تحيات لله ، إن قبلتها فلها الشكر على كرمها ، وإن رفضتها ، فإن الأيام كفيلة بعلاج الكثير من معضلات الدنيا .. وكنت لا أرجح احتمالا على الآخر ،،
لكن بيان كانت أكبر من ظنوني ، فرحبت وردت التحية بأحسن منها ، ومدت تحاياها لأسرتي ،،
وها أنذا أتداخل في بوست للأخت بيان بعد أن جففنا عنية مداد الكلمات بيننا ، أمد يدي بيضاء ، لا أشعر بهزيمة ، ولا بنصر ولا أنظر إلى نفسي كالخارج من معركة ،، فالمسألة بالنسبة لي ليست أكثر من معلومات نتبادلها ، نأخذها فنستفيد ، أو نتركها حينما نرى أننا لا نستفيد ،، ويبقى ما يجمعنا ،، الوطن ، الدين ، اللغة ، المنهل الثقافي ، وغيرها أشياء عديدة ،، وقد اقتضى المران الديمقراطي أن ندخل ذاك المنعطف ، وكل منا استخدم أدواته ، لكن الإنسان عندما يجلس ويراجع نفسه يجد أن هناك عيبا أو نقصا في بعض أدواته ، أو أن بعض أدواته لم يكن حضاريا ، وهذه إحدى محاسن المران الديمقراطي ، باعتباره حربا كلامية ، تنتهي إلى تحقيق ما هو إنساني دون الانتقال إلى الاشتباك واستخدام وسائل العنف ،،
لك تحياتي ولأسرتك الصغيرة والكبيرة .. وأهلا بك أختا في هذا المنبر ، وفي الحياة كلها ،،

الاخت بيان

مرحب بعودتك

وانتهز الفرصة لاشكرك على عزائك الجميل وكلماتك الرقيقة، وعزاء ابراهيم زوجك لاسرتى ولشخصى عند رحيل والدى الحبيب

يازولة الحمدلله رجعتى حتى لا اشعر بذنب غيابك اولا ولتحتلى مكانتك "العصارية" فى البورد تانيا

فقد "فكيتى البيرق" على حد تعبيراتك ، بعد مداخلتى مباشرة...حتى ندمت

ثقى تماما اننا لن نتناقر "للاسف" مرة اخرى ...فقد قلمت المأساة اظافرى ..

ولم اعد ارغب فى مناقرة احد

لك تحيات الاسرة...ولاسرتك التحية

الحبيبة الرقيقة تماضر
شكرا لك كثيرا وأحسن الله عزائكم.. شيخ الدين ابدا لم يكن والدكم وحدكم.. حزننا عليه سيكون مقيما.. لقد دخلنا بيته واكلنا طعامه
جعله الله فى ميزان حسناته
عليه الرحمة والمغفرة.. كنت اود الاتصال بك.. ولكن لم اجد رقمك

يا عزيزتى انا لم اذهب لاجلك
كما قلت لك دائماهناك هذا الحب رغم المناقرات..
ولكن


اننى عندما انسحبت لاننى وجدت نفسى كأنشوطة تخنق كل من ياتى قربى او يحبنى..وقررت ان انسحب حتى لا يتعرض من أحبهم للسخرية و العداء..
ثم حدثت امر ضياع الباسورد كما تعرفيننى شرانية قررت فقط ان اجرب الباسورد.. فكان هذا البوست..
الذى كان سبب صلح مع الكريم ود قاسم.. وعودتك انت لبوستاتى
شكرا ليك كثيرا
وربنا يجبر كسركم و ابونا ما كان راجل ساهل عليه الرحمة

يعنى ما عندك اى دخل بخروجى فاليرتاح ضميرك



اها فى داعى تبكينى؟

اخى الكريم ود قاسم
والله عاجزة عن الشكر وانا اقبل يدك البيضاء بيد ابيض منها (مشروع شكلة واخد بالك؟!)
وتجدنى ممنونة لابي جهينة العزيز..
واتمنى ان نتعافى كلنا ونترك ما حدث خلف ظهورنا...
تحياتى لزوجتك ولابنائك الميامين حفظهم الله ورعاه

الكبار دايما كبار مهما حصل ..
البوست دة عاوز ليهو ضبيحة .. و أنا لها
ود قاسم و بيان ( برسل ليكم رقم حسابي عشان ترسلوا لى تمن الضبيحة )
بارك الله فيكما و وفقكما لما فيه الخير ..
لي قدام .. ملعون إبليس و قبيلته

وعليكم السلام والرحمة

رمضان كريم بيان .....كنا مسافرين كم يوم وجينا ....

كل سنة وانتى طيبة ....

حمد لله على السلامة

نجاة ازيك انشاالله عافية
رمضان كريم ، اللليلة البورد منور
تحياتي لناس اوسلي ..

بت فاطنة

العزيزة د بيان
آسف واعذرينى
اكرر اسفى مع رجاْء القبول والنسيان
انسحابك صعب على
وتسلمى لى


سلام وسلام

العزيز عصام
شكرا ليك على جبر الخواطر..
مافى مشكلة يا اخوى
لقد كنت دائما اخا كريما
وحاشاك الغبا

تحياتى لاسرتك

نجاة محمود

سلامات
وعوافي
الف مرحب د.بيان
ورمضان كريم وكل سنة وانتي طيبة..
ناسف لحضورنا المتاخر ..
بالرغم من انني واحد من الذين تجرعوا سُم الخلافات في هذا المنبر ولكني ساظل قابض علي
احلامي بمنبر نبيل تتكاثف فيه القيم الحميدة وتسمو فيه ارواحنا بغًية منُ في التجويد..
فكان ان خرجنا من صمتنا بهذا البوست ..
دعوة للتسامي فوق الجراح



مع مودتي

ود رملية العظيم.. الرجل النادر المثال والخصال

ابدا الى يوم القيامة لن انسى وقفتك الحقانية
عندما ران الصمت.. وصدحت انت بالحقيقة..
ودفعت ثمنا عاليا.. ولكنك خرجت مكللا بالشرف.

اتمنى ان يرجع اخى بروفسور ود البلد الذى دائما ارى اننى من اسباب ذهابه.. يا ود البلد عليك الله تعال نحن نحتاجك ونحتاج بوستاتك الشحمانة.. التى تعلمت منها ما لم اتعلمه فى اى مكان
والكل يفتقدك ..
اتمنى يا ودر رملية لو افردت له بوستا

سلام يا عشة
كل سنة وانت بالف خير

شكرا على مرورك العزيز

تصدقى ناس اؤسلى اتلوموا ما رسلو لى
لكن برضهم اهلى

ناجى ولدى الحبيب البركة فيكم
بلغ التعازى للاسرة الكريمة
وشكرا ليك على كل شئ يا امير

ابو جهينة
لا بس انا عايزة توب زراق وسفنجة و ريحة بت السودان
الخروف وين القالو سنون

يا اخى ممكن ترسل لى هلى الايميل الفى البروفايل
شاكرة ومقدرة

د0 نجاة
انا والله بتوه مع الاسماء المستعارة دى
ومرات بخش شمال
والرماد كال حماد
ومن عزة وسافرتى
ولا خبر
على كل بركة فى التلاقى
ودعينا نتواصل بعد حادثى الاشتر
وتحياتى للاسرة
وبعد ده نستعد لطباعة الكتب

(سؤآل ايه حكاية الخالة دى)



سلام

الاخ العزيز عصام
مافى مشكلة

لقد اخترت واحدة من لوحاتك كغلاف لكتابى
وان شاء الله الصيف القادم نشرع فى الخطوات العملية

ولا عليك يا اخى مافى مشكلة
نحنا بنعرف بعض من اول الثمانينات
وانا اعتز جدا بمعرفتك
ومافى مشكلة

ايميلى فى البروفايل

(شكرا ليك) د0 نجاة
مع كل مودة وحب الثمانينات






سلام

عصام العزيز
لا عليك ايها الشفيف..
ولك التحيةوالاحترام و انت تسن سنة حسنة بالاعتذار
لانه هنا تسحلك الناس مع سبق الاصرار والترصد
ولا تهتم بالاعتذار
المودة الدائمةوالحب

السلام يا خالة بيان كيفك انشاء الله تمام التمام , مشتاقين يعني شنو الحكاية

العزيز الابن سيف
كيفك وين غائب كدا؟

ماما بيان

رمضان كريم ياغاليه وكل سنه وانت طيبه دايما

والاسرة الكريمه ..

لك خالص المعزة والاحترام



نوف

الدكتورة العزيزة بيان،
أنا من الأعضاء الجدد فأسمحي لي أن أدخل لأكون ضمن المبتهجين بعودتك الميمونة، ومن محاسن الصدف أنني "وسالي" وموعود بإذن الله بسفرة لأوسلي بعد غياب عن السودان دام 10 سنوات إلا من طلة هنا وهناك. وإذا ربنا سهل ومشيت فسأبلغ سلامك لأهل أوسلي من الحرازة للحرازة أو على ألقل المقيمين منهم بأمدرمان، ولك التحايا مقدماً من أوسلي.
عوض الله أحمد الطيب

العزيز العوض الطيب

خطوة عزيزة.. امانى ما فرح من دخلتك دى.. وبالحيل عجبنى كلامك
ربنا يوصلك لاهلك بالسلامة تلقاهم تامين ولامين يا رب العالمين
وارجو انك تبلغهم سلامى من الحرازى للحرازى
وتقولهم مالكم قطعتو الجوابات كدى..

الحبيبة نوف
شكرا ليك يا حبيبة

وكل سنة وانت واسرتك بالف خير

معزتى

الليلى فتح اميلى لقيتلى ايميل من زولا لطيف واوسلاوى قال طالب البلد بعد غياب عشرة سنوات.. نتمى ليه اقامة سعيدة ويلقى ناس اوسلى كلهم تامين ولامين..الفى الخرتوم والفى البلد ووعد انه يوصل السلام من الحرازى للحرازى..

لؤى سعيد تصل بالسلامة

الدكتوره بيان .
التحيه لك وانت تفردين بوست خاص لاهلك واهلى باوسلى
وان كنت سعيدا بهذا البوست الا ان سعادتى قد تضاعفت
لعدة اسباب.
اولها انه اتى من صديقتى اللدوده او قلى عدوتى الحميمه
دكتوره بيان
وثانيها وهو المهم عثورى على صديقى وابن اوسـلى البار
عوض الله احمد الطيب الذى طال بحثى عنه
وثالثها وهو الاهم تصافح العملاقين ود قاسم وبيان وكما
قيل ان الكبار يظلون كبار ولو تقاصر الزمن
التحايا للجميع
لى عودة اذا سمحت الظروف

العزيز اوسلى
بركى بالشوفى..
ومرحب بيك فى بوستك و بوست اهلك
وشكرا لكلامك السمح.. طيب لى شن كلام الدراب وكتين بتعرف للنضم السمح؟

بركة اللميت فى صاحبك ونتمنى دا يكون نادى اوسلى فى سودانيزاونلاين

د. بيان

عودا حميدا وكل سنه وانت والاسرة الكريمه طيبين.

العزيزة دكتورة بيان، لك الشكر والمحبة على كلماتك الطيبة التي روى دعاشها الأصيل أعماق روحي المغتربة فأنعش فيها الزهر وأينع الياسمين.

المحب أوسلي 2، سعدت جدا وأنا أسمع صوتك الحبيب عبر الأثير دغيش اليوم يعيد لي ذاكرتي المفقودة مع الوطن.

كان عهدي بأوسلي الحبيبة قبل عام الردة وقبل أن يضيق الوطن بنا فتسللنا منه وتسلل من بين أيدينا فلم تستطع أن تستوعبنا غربة المسافر ولا ضياع المقيم، وسلمت حينها لشتلاتها الباسقات آخر أضابير رابطة خريجي وطلاب أوسلي بالجامعات والمعاهد العليا ثم واريت جثمان والدي الثري ولملمت ما بقي لي من أسى في حقائب الحزن وكان السفر

الفاضل احمد خليل

شكرا ليك و كل سنة وانت بالف خير

ومرورك اسعدنا وشرفنا

الأخت بيان

عودا حميدا و رمضان كريم

لكى خالص مودتى

الاخت ام در

شكرا لك على مرورك الجميل الذى يعنى لى الكثير
وكل سنة وانت بالف خير..

مودتى

رمال حلتنا العوض الطيب
مرحب ببك

اخر مرة زرت مسقط رأسي أوسلي عم74 وأنا يافع ولكن تظل أوسلي محفورة في الذاكرة بحفيف نخيلهاالباسق وخرير مياهاالعذبة وطيبة أهلها الزينين
ألفين سلام لأوسلى
جني

العزيز العوض

ان شاء الله تمشى وتشرب من موية بحر اوسلى و تتغسل كل الاحزان
ودائما بكرة احلى
ربى يوصلك بالسلامة

مرحب بيك يا جنى
ومعاك بنقول الفين سلام يا اوسلى

الأعزاء جني وبيان وأوسلي 2
ربنا يوصلني أوسلي وسابلغ التحايا للنيل والرمال وللنخيل وللناس الطيبين.

العزيز العوض
آمين
تصل بالسلامة وتلقى الاهل تامين لامين.. ونتمنى ان تستمر تكتب من هناك فى هذا البوست..

up