Post: #1
Title: حليوة ليلة المولد للشاعر الفذ محمد طه القدال /اهداء الى العزيز اب شيبا
Author: ابو طويلة
Date: 05-22-2003, 01:29 PM
الشاعر الفذ محمد طه القدال
حليوة ليلة لمولد
بقول غنوات وأقول غنوات
فى البلد ا لبسير جنياتها لى قدام
ولى الولد البتل ضرعاتو فى العرضة
ويطير فى الدارة صقرية
ولو السمحة تلت إيد ومدت جيد
يقوم شايلاهو هاشمية
ويشيل شبال ختفة ريد وفرحة عيد
وريدة روح وحمرة عين وايدية
* * *
ويالولد البشيل مدقاقو
قولة خير على القمره
يقابل الجاية متحزم
ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
* * *
وقبال حول تغّيم غيمة قِبلية
ترش الدارة والحدبه الصعيد الحلة
ويا فرحة بتطارد الصفقة فى النسمة الصعيدية
ويا جهرة نهار الليلة بدرية
رحيح جنياتنا فى الحدبة الصعيد الحلة
* * *
يا سمحاتنا هو لبلب
ويا قمحاتنا هو لبلب
وياللوز الفتق فى الوادى هو لبلب
ويا سمحاتنا هو لبلب
ويالبحر الطمح مدّادى هو لبلب
سألتك بالذى ركز الارض معبد
وسوى الفاس عليها مقام
سألتك بى حشا الأُمات ودمعاتنا
* * *
سألتك بى كبيداتن ودعواتنا
شليل وين راح؟؟
يكون ضل الخريف فاتنا
شليل وين راح؟؟
وزى برق السماك الجابها دغشية
وزى زغرودة البطن الكبارية
مرق من شامة القمره
ومقدم بالعديل يبرا
تعالوا أبشروا آجنيات
شليل ماراح شليل ما فات
شليل عند المسورو حرق
بقالو حصاد
شليل فوق التقانت قام خدار وبلاد
شليل مسدار شليل مشوار
شليل أرضنا يا جنيات
شليل قايم نصاصى الليل
يتمتم ليلو وردية
حرازنا شليل شليلنا دليب
شليلنا دليل على البلدات
بعد درب التبلدية
شليل ما راح شليل ما فات
شليلنا ونحنا همباتة ومهاجرية
مزارع بات على عشقين
تراب بلدو وسماح فوق بت مزارعية
|
Post: #2
Title: Re: حليوة ليلة المولد للشاعر الفذ محمد طه القدال /اهداء الى العزيز اب شيب
Author: ابو طويلة
Date: 05-22-2003, 01:34 PM
Parent: #1
ارجو من الاخوة التصحيح اذا كان هنالك اي غلط كما ارجو من اب شيبا ان يمدنا بهذه الاغنية بصوت الرائع مصطفى سيد احمد وعبره اهديها الى الجميع
|
Post: #3
Title: Re: حليوة ليلة المولد للشاعر الفذ محمد طه القدال /اهداء الى العزيز اب شيب
Author: Elmosley
Date: 05-22-2003, 01:57 PM
Parent: #1
اخي ابو طويله
هذا جزء بسيط جدا من النص اختاره الراحل المقيم ليلحنه
ولكن الجزء الاكبر موجود وسابحث عنه في دفاتري القديمه
وغالبا ما ساجده
وان اسعفنا شيبا به كمان يكون كويس
|
Post: #4
Title: Re: حليوة ليلة المولد للشاعر الفذ محمد طه القدال /اهداء الى العزيز اب شيب
Author: ابو طويلة
Date: 05-22-2003, 02:28 PM
Parent: #1
الاستاذ الموصلي اشكرك على هذه المعلومة وارجو منك ان تقوم بكتابة النص الكامل ولك مني كل الود والتحية
وتحياتي عبرك الى كل فناني بلادي اصحاب الاحاسيس الرهيفة
|
Post: #5
Title: Re: حليوة ليلة المولد للشاعر الفذ محمد طه القدال /اهداء الى العزيز اب شيب
Author: قرنفل
Date: 05-23-2003, 08:35 AM
Parent: #4
ابو طويلة سلام
لك التحية ومهداة لك الاغنية وللجميع
|
Post: #6
Title: Re: حليوة ليلة المولد للشاعر الفذ محمد طه القدال /اهداء الى العزيز اب شيب
Author: SAdo7
Date: 05-23-2003, 10:32 AM
Parent: #1
ابوطويله شكرا للكلمات
ومااجمل حليوه فهى مجاوره لمنطقتى
ولك كل الود
|
Post: #7
Title: Re: حليوة ليلة المولد للشاعر الفذ محمد طه القدال /اهداء الى العزيز اب شيب
Author: ابو طويلة
Date: 05-23-2003, 02:16 PM
Parent: #1
الاعزاء قرنفل و SAdo7 لكم كل الودوالاحترام
|
|