Post: #1
Title: طيبة كما غناها مصطفى بصوت شاعرها الرائع محمد الحسن سالم حميد
Author: sheba
Date: 01-03-2003, 08:24 AM
كل ما تباعد بينا عوارض
كل ما هواك يا طيبة مكنِّى
تلقى الغربة تكرب الواحِد
بيكى أسمى الشوق .. وأكنـِّى
لمـّا أفوتك من دون خاطر
أو دون خاطر منى تفوتى
بلقى حبايب فى كل حِتـّة
وكل بيوت الفُقرا .. بيوتى
لا غيرت وراك الجِتـّة ..
لا بدلت ملامح صوتى
لا غافلنى وهادن فنى ..
غامل المدن .. الما عِرفتنى
دقن الشوق الصبرو .. مصوبر
للأرياف الكم .. وفّتنى
وللأطفال الناشفة ضلوعا ..
ونازفة بغنى
أطمن روعة .. وأهدّى دموعة
لبسمة بكرة اللاّها تمنى ..
ولا مصنوعة
للاطفال النازفة ضلوعة
وناشفة بغنى
********
أغنى لشعبى ومين يمنعنى
أغنى لقلبى .. إذا لوّعنى
مخيـّر دربى الما رجعنى
إذا طلعنى دخلت القرب ..
ولا الغربة الكدروبية
تنزل غنوتى بى قمرية
أو وقـّعنى فى بطن الجـُّبْ
بطلع يوسف بالأغنية
***********
أغنى الناس الما بتسمعنى
المِنِّى بعيدة .. ومبعدة عنى
ا نادى نشيدا .. وكنت المعنى
الإيدى فى إيدا .. وإيدا بتبنى
فى دنيا جديدة اليوم .. راح تدنى
وأريت غنواتى فى ناس شغالة
تكون سُندالة .. وعود طورية
ضراع رجالة .. كتاب أطفالا
وجملة بالا .. الما مقرية
سدّة مالة.. وبقـّة فالة
فى ليلة الدخلة على أسمى قضية
****************
حبيبة قلبى يا سودانية
يا أسمى معانى فى زول بيعانى
ياود ضكران .. ويابتْ دغرية
وأنا إنْ سامعانى بطـّلت
أغانى غُـبش .. فقرية
وروح غانيانى
هويتك منك يادافعانى براحة إيديا
ويا جابدانى ... قربت عليا
وما بتحيـّر بين الفوق ..
وبين الناس التحتانية
إلاّ مغـيـّر .. ولاّ عبوس ..
ولاّ كفيف الإنسانية
ومنـِّك وين يا كاشفة عينيا
بنور الإلفة .. ضِيا الحنية
وحِلم العالم .. ناس تتسالم
والبنى آدم صافى النية
والأطفال الناشفة ضلوعا
يطمِّن روعا..وتبقى تغنى
غناوى البكرة .. الكم مسموعة
حسيس طنبارة .. مع نـُقارة
صفِقتاً حارة .. ودارة تغنى
فيا حلتنا عليكى تـُرابك ..
وإنتى شبابك زينة الجَنـِّى
أحلى عروس البلد اللّتنا
ولاّ الغُبُش الرّابّة تهنى
ولاّ هدير المدن التصحا ..
وتمحى ظلام الحاصل .. عنـّى
|
Post: #2
Title: Re: طيبة كما غناها مصطفى بصوت شاعرها الرائع محمد الحسن سالم حميد
Author: sheba
Date: 02-23-2003, 06:10 PM
Parent: #1
up
|
Post: #3
Title: Re: طيبة كما غناها مصطفى بصوت شاعرها الرائع محمد الحسن سالم حميد
Author: Arbab
Date: 02-23-2003, 10:08 PM
Parent: #2
شيبا الجميل
وين طيبة بصوت مصطفى , عود او اوركسترا ؟ فى انتظارك يا حيبيب . بالمناسبة دى المرة التالتة اطلبها منك , لو بعرف احرد كنت حردتها
شكرا يا جميل على القصيدة , وانحناءة للانسان حميد
|
Post: #4
Title: Re: طيبة كما غناها مصطفى بصوت شاعرها الرائع محمد الحسن سالم حميد
Author: sheba
Date: 02-23-2003, 10:15 PM
Parent: #1
العزيز ارباب
انت معقول من الناس البزعلو
عموما سالبى طلبك رغم انو الاغنية طويلة وحجمهاكبير ما بساعد فى تحميلها للانترنت لكن انشاء الله لو جزء
كدى انت اتصبر بى حميد شوية
لك الحب
|
Post: #5
Title: Re: طيبة كما غناها مصطفى بصوت شاعرها الرائع محمد الحسن سالم حميد
Author: Arbab
Date: 02-23-2003, 10:46 PM
Parent: #4
اجملنا شيبا
!! لا يا حبيب ..معقول نزعل وانت هكذا رائع
انا بعرف انو طيبة كبيرة , وكبيرة على النت برضو ...بس الشوق ليها
يا شيبا اكبر
لك الشكر على توثيق ذاكرتنا ومحطات الضوء فى دربنا
|
Post: #6
Title: Re: طيبة كما غناها مصطفى بصوت شاعرها الرائع محمد الحسن سالم حميد
Author: ابو يسرا
Date: 02-27-2003, 08:51 PM
Parent: #5
up
|
Post: #7
Title: Re: طيبة كما غناها مصطفى بصوت شاعرها الرائع محمد الحسن سالم حميد
Author: طارق اسماعيل
Date: 03-24-2003, 11:57 PM
Parent: #1
لاقدام
|
|