سلام يمى-هردت لهاتىبالغنوات-مصطفى سيداحمد -حميد اهداءالى طارق اسماعيل ولكم

النص الكامل لا غنية بين الموجة والخزان حلم انسان والمعروفة باسم هردت لهاتى بالغنوات او سلام يمى ويلاحظ ان الراحل المقيم مصطفى سيد احمد قد قام باخذ مقاطع متفرقة من النص الاصلى الطويل جدا وكون نصا جديدا ليغنيه دون ان يختل بذلك المعنى العام للنص الاول وهذا ان دل على شى انما يدل على شاعريةمصطفى كفنان

الاهداء الى العزيز طارق اسماعيل ولكم جميعا






النص الكامل

بين الموجة والخزان حلم انسان
محمد الحسن حميد
******
هَرَدْتَ لهاتي بالغنوات ...
وقُتْ يبُردْ حَشَاك يا امِّي
ومن التّعب البلا صَالِحْ ..
تفيقي ..
تروقي ...
تنجمِّي
تسوِّي مكانسِكْ المطرة ..
تضوِّي البيت وتنحَمِّي
تمرقي صبوحة للجيران ...
قدح فوق ايد وفي ايد أَلمْي
يلاقوك شُفّع الكُتّاب
نُضاف وظُراف بلا النّسْمي
ويغنولِك ...
يغنّولِك غناوي السّابْ
وفي بيّوضة مافي سرابْ
جُبال كَجَبي وفيافي الكاب ...
تميد بالخُضرة منقسمي
ولا غابار .. ولا هو سحاب ..
وتنهجمي .. من الدّهشة
وتحاحيهُن ...
غناكُن نيي ...
غناكنُ نيي ..
غُنا الوهْمي
ويهتفوا زي كلاب الحي ..
على الأغراب
حوافي الصّي وبيوضة
البراسيم فيها مفروضة
خدارا يراري شوف عيني
على الأبوابْ
قماريها
وحواريها
وطواريها
بقت روضة ..
بقت تشرب من الحامدابْ
تشربي عافيي من إيديّ ...
تدوِّي اليوية بي حِشْمي
تسوّي السّي .. وتبتسمي
تشوفي رهاب بُعُد نجمي
واشوفو قريب قُرُب نَضْمِي
اشوف العالم التِّحْتَاني ..
هيلا هوب وقف ناهِضْ
ودكّ عمايد الفوقاني ...
جوه الُّجب رَمى العارضْ
وفي السّابو الدّمَار أفراق
عريق الحب نَبَضْ قابِضْ
مِتِل قَبْض الحروف في اسمي
غناوينا القبيل رَقْرَاقْ
علينا تَصُب بَرِدْ قَارِضْ
أَلُكْ طيناتا من دمّي ..
وارْمُلا من عصب عشّاق ..
أنُطْ تُلُّبْ واجيك عارِضْ
واجُرْ نمَيِّ
أدودي لهاتي بالغنوات ...
عُقُب يبرد حَشاَك يا امِّي
تسوِّي السّيْ وتبتسمي
تسمِّي الشّعب وتعتّصْمِي
بحبل القُدرة تتفرّقْ
ظُلُمةً فيها تتحرّقْ ..
صُرُمةً قالوا ليك قِسْمي
أدودي لهاتي بالغنوات
عُقُبْ يبُردْ حَشَاك يا امِّي
تقلبي الكلمة بي الكلمي
ضُراعِكْ يرْمِي ما يَدْمِي
تقيفي بعيد عن الشُّمات
تكوني اقرب لي من إسمي
واضُمِّكْ بارتياح يا امِّي
أحبِّكْ صَاحْ
وصَاحْ حلمي
ولاكي سعية للضَبّاحْ
ولا شمش الصّباح حِزْمِي
ولا كَتْف السِّلاح سوّاحْ
ولا نزف الجراح ألمي
هيا انحزْمي ..
هيا انخلْقي ..
هيا انعتْقي ..
متين مو دايرة ري تسْقِي
ولا في إيد النّزيف نبقَى ...
ولا في إيد الخريف تبقِي
ولا الفيضان يبدِّع بِكْ ....
ولا في القيفة تنهدْمِي
ولا انْ جَاتْ حارّه تنهزْمِي
ولا يغشى الغُلُب قلبِكْ
ولا تشقِي
ولا انتِ تخافي لا تَدْمِي
ضُراعِكْ يرْمِي ما يَدْمِي

فيا حزن البلد عوك كَرْ
ويا سعد الولد
ضَرْ ضَرْ ...
مع النّسْمِي
و ألِوْ .. قيمة العَمَل عِمِّي ..
وافتحي ظلمَتِكْ للضّي
سِنِّي على النضال إيدي
سوِّكي بالهُتَاف فَمِّي
شوارعِكْ لَيْ ..
دَويها عَلَيْ ..
اذا ما اخر العلاج الكَيْ ...
مراويدِكْ حُمُر صَمِّي
مراويدِكْ حُمُر يا امِّي
بليلتي ... ولا ضبايح طَيْ ؟؟؟
قليلتي ... ولا كُتُر سِمِّي ؟؟؟
وطني ... ولا مِلي بطني !!!!
سُكَاتي .. ولا الكلام النيّ !!!

تسلم ياشيبا
ربنا يحقيق امانيك
عهدك دائما تنشر الفرح الجميل
ما تتخيل انا وقت اسمع مصطفى بتترتب فينى معانى رائعه كيف؟؟؟؟؟؟
عفوا لو فى امكانية ترسل لى ملفات صوت
لاغانى مصطفى اكون شاكرا لك


طبعا ياشيبا لحن مصطفى هذا النص ومعه نص عم عبد الرحيم
وكان طريح سرير المستشفى بموسكو
وكان معه فلاح مصرى يشاركه الغرفة فى المستشفى
وحين سمع هذا الفلاح اغنية عم عبد الرحيم اجهش بالبكاء
وقال للاستاذ مصطفى هذا الاغنية تعبر عنا حالنا فى مصر زمان
بكل تفاصيلها بالرغم فى كلمات ما فهمتها لكن انا فهمت
المعنى العام ولقد اهدى مصطفى هذا المصرى كاسيت فيهو اول توقيع لقصيدة عم عبد الرحيم


نشكرك ونحبك مدام بتحب مصطفى واغانى مصطفى




د.طارق

العزيز طارق

عاطر التحايا

وانت تتحفنا بهذه المعلومات القيمة

يديك العافية

فوق

الرائع شيبا
لك الشكر
ليس على هذه الاغنية فقط
بل على كل البوستات القيمة
وانت تثير فى اشجاننا الكثير

وهذه الاغنية لنا معها وقفات مثيرة

القصة زى ما كل الناس عارفة عشق د.طارق للعملاق مصطفى سيداحمد
كما الكل بالطبع
اها كان معانا واحد بيعزف عود المشكلة ما كان حافظ الاغنية دى
والجميع يطلب الاستماع اليها
وما فى واحد حافظها غير اخوك المسكين
وطبعا مافى داعى اقولك انو صوتى بيطلع العقارب
رغم انو البلد ديك ما شفت لى فيها عقرب
ويصروا الشباب انو انا اغنى ليهم

بعد مدة كل الشباب حفظوا الغنوة و اتحلت انا من الاحراج

ايام
الله يديك العافية

العزيز قليبى المهضلم


والله انا منى ومنك اتحايل عليهم كل يوم

عشان اغنى الاغنية دى



بذكر انا لمن كنت فى الجامعة صدفة

لقيت شباب قاعدين فى النجيلة ما بعرفهم يرددو فى

كورال هذه الاغنية وتحديدا المقطع

البراسيم فيها مفروضة


وقفت جنبهم استمع ولما لاحظونى

قت ليهم واحد فيكم يورينى

يعنى كيف حوض البرسيم يتفرض

ولما لم اجد ردا

تركتهم فى حيرتهم وذهبت الى حال سبيلى

تحياتى

سلام شيبا


كم من لهات اتهردت