هل سيشيّع السوداني الفوضى الإجتماعية لمثواها الأخير ؟؟

هل سيشيّع السوداني الفوضى الإجتماعية لمثواها الأخير ؟؟


04-12-2003, 06:41 AM


  » http://sudaneseonline.com/cgi-bin/sdb/2bb.cgi?seq=msg&board=105&msg=1137262790&rn=1


Post: #1
Title: هل سيشيّع السوداني الفوضى الإجتماعية لمثواها الأخير ؟؟
Author: ابوحراز
Date: 04-12-2003, 06:41 AM
Parent: #0

كثيرون منا 00 وانا من يؤمهم
تووووووووووووش ندخل الى البيوت دون إستئذان
لانسمح للمرأة حتى بأن تلفح ملاية على رأسها
سلام ياناس البيت
وقبل ان يستفيق أهل البيت يجدون الضيف وقد انتصب أمامهم بكل شموخ
الزيارات بلا مواعيد
والأكل بلا مواعيد
يوم فجأة لقيت واحد داخل الساعة 6 صباحاً
شايل فتيل الدواء معاه
قال عاوز خمسة آلاف يشتري بيها دواء
اديتو عشرة عشان تاني مايجي
العصر لقيتو ليك متكئي على الكرسي والسيجارة خضراء الدمن لافيها قصبة
قلت ليهو : شكيتك على الله كان الملفوفة دي قروشي
وبعض الضيوف عندما يأتون اليك يعيثون في الأرض فساداً
تجد الملاية وكأن بقرة قد أكلتها وإجترتها
مكرفسة زي الجدادة
والتمباك وما ادراك ما التمباك مرمي في كل مكان
دا غير قشر التسالي وفووووووووول الحاجات
تعزم ضيف واحد
لكن لمن تفتح الباب تلقاهو جاب معاه خمسة
ولمن تكشن المرة البصلة يزدادوا تسعة وعاشرهم من يوصلهم للبيت
تدي الضيف جلابية عشان ينوم بيها
الصباح يلبسها ويتوكل
خاصة لو كنت جايي من دول الإغتراب
يفتكرها هدية
ويخلي خشمك ملح ملح
كان نسيت الجزمة في البيت تجي تلقاهم لبسوها
والقميص لبسوه
والبنطلون لبسوه
والإحرام لبسوه !!!
و ال 00000 لبسوه برضو 00 بقصد الشال ياجماعة 00 قال شال قال
ياجماعة بكره الشال لدرجة ماتتصوروها
ولمن البسو بتجيني كارووووووشة اليوم كلو
لأنو يذكرني بي ناس السكوت الجماعي
عاوز اطلع من النص شوية
السكوت الجماعي وعرفناه
النقل الجماعي وعرفناه
الزواج الجماعي وعرفناه
الرقيص الجماعي وعرفناه
النزوح الجماعي وعرفناه
الثراء الجماعي وعرفناه
أها الموت الجماعي في طريق الخرطوم مدني دا يطلع شنو وسببه شنو ؟؟؟
نواصل موضوع العبث في الحياة السودانية
والغريبة لو مشيت ليك بسيارة افراج مؤقت
تصحى من النوم تلقاها مليانة نسوان على رجال
اها ياجماعة في شنو
يقولوا ليك ماشين كاب الجداد
حاجة كلتوم ماتت
لايعرفوا برنامجك كيف 00 ولايعرفوا الزيت كيف والكهرباء كيف والكفرات كيف
المهم بس عليك تسوق 00 وتسمع مدائح شيخ جلال
تمشي معاهم للبكاء
وانت ماعارف أي شيء
وبعد كدا تدفع في الكشف
المشكلة يقولوا ليك أكتب الأسماء معاك
وبعد ماتخلص من حاج الصافي وحاج عبدالكريم وشيخ قسم السيد
يقولوا ليك ادفع لينا
والله آمنت بأن السودانيين أرجل ناس في العالم
ياجماعة في رجالة أكتر من كدا ؟؟
واحد ماعندوا حق العربية
وماعندو حق الكشف
بس يلف عمتو ويركب 00 وبعديها ربك يفرجها
والمشكلة يوم تجي راجع بلد الإغتراب
يكشحوك زي موية الغسيل
وينفضوك زي شوال الدقيق
لاساعة 00 لانضارة 00 لا ون مان شو
بس يتركوا ليك ترعة كنانة والرهد وايصال القدوم والمجاهدين وتعمير سواكن وشيكان للتأمين !!! وتبرعوا لبناء مسجد كتير الكواهلة !!!
وضغطي بيرتفع من عبث بعض العزابة
الكباية تلقاها مليانة شاي لبن
ويجيك واحد توووووووووش يشوتها ويرميها في آخر الدنيا
والمشكلة بدل مايرفعها ويغسلها يلحقها يشوتها تاني
تلقى بعضهم طول حياتو مايشتري مرتبة
ولابطانية ولاملاية ولا مخدة
وأكتر شيء بيغيظني
بعضهم 00 لايشتري بشكير ولاصابون حمام ولاشامبو ولا معجون
وكمان يعصر المعجون من النص
بس عايشين سلفقة سااااااااكت
المشكلة واحد معانا أصلع زي دوكة العواسة
وبعد دا كلو بيستعمل الشامبو حقي
قال عشان القشرة قال
***********************
قبل يومين عملنا لينا دمعة دجاج بالليل وختيناها في التلاجة
لمن صحينا الصباح لقينا الدمعة
والجداد محل طار ماعارفنو
طيب مش كان مفروض يشربها ويريحنا
يعني الواحد لازم يحرس الحلة وماينوم ياجماعة وللا شنو ؟؟؟
مرات واحد يجي عمرة يتصل عليك من المدينة
يقول ليك لازم تجيني هسي دي
وانت تكون في جيزان 1700 كيلو من المدينة
أغرب شيء
اعرف أحد اعضاء البورد في جدة
والله قاعدين معاهو 18 في البيت 00 شي مشلخ وشي سادة
العمرة انتهت
والحج انتهى
وبرضو قاعدين
ماعارف عايزين يمشوا بيت المقدس وللا شنو ؟؟
المشكلة كان قاعد ينوم هو والمدام في الكنبة
وبعد دا كلو جابو ليهم ولد 00 سبحان الله
جبتوه كيف دا ياناس ؟؟؟
يعني كان ما الجماعة قاعدين معاهم
كان عوووووووووووك 00 تيمان
***************
أهل العوض وما أدراك ما أهل العوض
الواحد لو عاوز يطلع جنسية يجي يقعد في الخرطوم 37 يوم
تقول عاوز يطلع ليهو بترول
حتى الحمل اصبح عندنا بدون نظام
كل واحد عاوز ريييييييييحة
ترسل لأخوك ريحة الزواج
تلقى قريبتك حملت
نسوان زمان الواحدة لمن يعرسوها
بعد سنتين يادوب تلد الطفل الأول
هسي بس سبعة شهور و10 يوم يجيك طالع زي السوسيو
قال سوسيو قال 00 أنا أمي قالت لي انت طلعت بعد 11 شهر
خلاص 00 العندو حالة عبث وفوضى ماقلناها يقولها لينا
والأهم عاوزين العلاج
ماتبرونا بالأنتي بايوتكس

Post: #2
Title: Re: هل سيشيّع السوداني الفوضى الإجتماعية لمثواها الأخير ؟؟
Author: ود عقاب
Date: 04-12-2003, 07:23 AM

الرائع دوما ابو حراز
قبل شويه قريت انك سوف تعود للكتابه يوم السبت وقلت فى نفسى الزول دا كان ما كتب حاجه الليل ما مارق من النت وعملتها والحمدالله
وحكايه تخلى الزول يضحك حتى يستقيس لكن نسيت ضرب التلفون اصلو انا جنن وجن الضيوف البضربو التلفونات وكان قاطع يقول ليك الموبائل ما شغال وكان قلت ما فيه رصيد يقول ليك شايلو ليه
عليك الله واصل ابو حراز
ودعقاب

Post: #3
Title: Re: هل سيشيّع السوداني الفوضى الإجتماعية لمثواها الأخير ؟؟
Author: ود عقاب
Date: 04-12-2003, 07:28 AM

الرائع دوما ابو حراز
قبل شويه قريت انك سوف تعود للكتابه يوم السبت وقلت فى نفسى الزول دا كان ما كتب حاجه الليل ما مارق من النت وعملتها والحمدالله
وحكايه تخلى الزول يضحك حتى يستقيس لكن نسيت ضرب التلفون اصلو انا جنن وجن الضيوف البضربو التلفونات وكان قاطع يقول ليك الموبائل ما شغال وكان قلت ما فيه رصيد يقول ليك شايلو ليه
عليك الله واصل ابو حراز
ودعقاب

Post: #4
Title: Re: هل سيشيّع السوداني الفوضى الإجتماعية لمثواها الأخير ؟؟
Author: Ahlalawad
Date: 04-12-2003, 07:34 AM

أبوحراز

أولا نعبر عن سعادتنا بعودتك , فحمدلة على السلامة
نقرا الكلام ونجيك مرة تانية

Post: #5
Title: Re: هل سيشيّع السوداني الفوضى الإجتماعية لمثواها الأخير ؟؟
Author: ابوحراز
Date: 04-12-2003, 08:07 AM
Parent: #4

ود عقاب
اهل العوض
لكم التحية والتقدير والتحية لكل الزملاء والزميلات بالبورد
اتمنى ان نناقش سوياً موضوع الفوضى الإجتماعية في السودان
وانا اكتب اليكم الآن وبجواري أحد الزملاء
قال لي : جمال الحياة السودانية يكمن في فوضاها وعبثها
قلت ليهو معاك حق
عارفين ليه ؟؟؟
لأنو دا كان بيشرب المريسة بالجردل
قال لو شرب كاس كاس بجيهو صداع
عشان كدا الجردل الأول دا لازم يقرطعو وهو واقف

قال يكمن قال

Post: #6
Title: Re: هل سيشيّع السوداني الفوضى الإجتماعية لمثواها الأخير ؟؟
Author: ود عقاب
Date: 04-12-2003, 08:20 AM

الاخ ابو حراز
هاك الحكايه دى
تمت دعوتنا من احد الزماء بمناسبه عيد ميلاد ابنه وكانت الحفله فى احد احياء الخرطوم الراقيه الرياض تحديد وكل واحد جايب معاهو اولاده
الشفع نزول على البوفى اكل ولعب وعدم نظام لكن كان هناك احد ابنا المدعوين ليس كبقيه الشفع الشفع يجدوالمناديل هو يقوم يلمها الشفع توسخ هو ينظف فما كان من الجميع ان نتعتو هذا الطفل بعدم الطبيعه فى تربيه يعنى الشافع كان ما عمل فوضه هنا ما ضبيعى
ودمتا
ودعقاب

Post: #7
Title: Re: هل سيشيّع السوداني الفوضى الإجتماعية لمثواها الأخير ؟؟
Author: ود عقاب
Date: 04-12-2003, 08:22 AM

الاخ ابو حراز
هاك الحكايه دى
تمت دعوتنا من احد الزماء بمناسبه عيد ميلاد ابنه وكانت الحفله فى احد احياء الخرطوم الراقيه الرياض تحديد وكل واحد جايب معاهو اولاده
الشفع نزول على البوفى اكل ولعب وعدم نظام لكن كان هناك احد ابنا المدعوين ليس كبقيه الشفع الشفع يجدوالمناديل هو يقوم يلمها الشفع توسخ هو ينظف فما كان من الجميع ان نتعتو هذا الطفل بعدم الطبيعه فى تربيه يعنى الشافع كان ما عمل فوضه هنا ما ضبيعى
ودمتا
ودعقاب

Post: #8
Title: Re: هل سيشيّع السوداني الفوضى الإجتماعية لمثواها الأخير ؟؟
Author: almulaomar
Date: 04-12-2003, 09:57 AM

أخونا أبو حراز
لأن الوالد أمد الله في عمره أول من هاجر إلى العاصمة من ناس القرية كان بيتنا عبارة عن بيت ضيافة والحمد لله ، ذات مرة والممرات كثيرة عمي عليه رحمة الله جاتو قبضة في القرية حوالي الساعة الثانية بعد منتصف الليل يقوم يا سيدي يتم إسعافه من القرية مروراً بي عشرين مستشفى ومركز صحي وشفخانه دون أن يتوقفوا في أياً منها والراجل تعبان ، لا ويقطعوا كوبري عديل كده عشان تبدأ المسيرة من بيتنا ويأتي في معية العم عدد ثلاثة لواري سفنجه ولوري واحد قدوم قصير وبص أوستن أظنو أبو إستيف وكمية كده بتاعت بكاسي لمن وقفت قدام بيتنا بقي زي المغلق بتاع مواد البناء أها ده عمي وجاتو قبضه ومال لو جاتو قبضه مخلبية كان جانا كم نفر المهم يا صاحبي دي طيبة القرية شاء من شاء وأبى من أبى.
وفي مرة من المرات عندنا إبن خالتنا وهو من سكان بيتنا منذ أن كان طالباً في المرحلة المتوسطة وإلى أن تخرج من الجامعة وأصبح موظفاً والحمد لله إنو الجكس بتاعنا كلو عرسوه وإلا كان كمان عرس وركلس إلى يوم الدين ودخل في الورثة كمان هذا الإبن خاله وهو منفوش بعد إستلم الماهية أراد أن يكرمنا وليته لم يفعل أنا وشقيقي فعزمنا سينما وعشا وكان اليوم خميس وهو يوم المداهمات واللواري حيث لا يمكن أن تتنبأ بما يحدث فيه حتى صباح الجمعه فحاولت أن أثنيه عن رأيه وأن آخذ حقي نقداً فرفض ذهبنا وفي منتصف الفلم بدأ الفيلم الحقيقي وبدأت خيالات إحتلال سريري تتراءى أمامي وفعلاً وحاتكم بعد وصولنا البيت أى عنقريب أو سرير قدامو مركوبين قطع جنينه وحقة تمباك وعكازين .

أخي أبو حراز بلا شك أن هناك الكثير من عاداتنا سيئ وهناك الكثير منها أيضاً بدأ يتلاشى إلى غير رجعه مع سرعة إيقاع العصر والتطور. ولأنني لا أملك حلاً أو عصا سحرية لتغيير واقعنا قانع وصابر ومحتسب ومفوض أمري لله.

Post: #9
Title: Re: هل سيشيّع السوداني الفوضى الإجتماعية لمثواها الأخير ؟؟
Author: almohndis
Date: 04-12-2003, 07:17 PM
Parent: #8

ابو حراز
فى المنبر
يااخى الف سلامه
اه جيت من بغداد
امبارح معليش الجاتك
فى صدامك.
تعرف يا ابوحراز
لو داير الفوضى
اه الداخليه بتاعت الطلبه
تقوم متاخر تلاقى نزار لبس
القميص ومجدى لبس الجزمة
والفحل يتاهب لبس البدله
ويوم يصل تحويلك اتحاد
الطلبة السودانين كله معزوم
سينما وعشاء فى الشلال

Post: #10
Title: Re: هل سيشيّع السوداني الفوضى الإجتماعية لمثواها الأخير ؟؟
Author: ابوحراز
Date: 04-13-2003, 06:39 AM
Parent: #9

ود عقاب
الملا عمر
المهندس
الفوضى عندنا ضاربة بأطنابها في كل شيء
في الأفراح والأحزان 00
السوداني لايمكنه أن يعمل برنامج يومي لحياته وأتحدى من يقول انه باستطاعته فعل ذلك
ولا حتى يستطيع أن يصنع خطط لمستقبله
معنا جنسيات مختلفة عندما يأتون من الإجازة تجدهم قد نفذوا برامجهم التي قرروا تنفيذها ومن ثم يبدأوون في برامج أخرى
نحن كل شيء فوضى ومرد ذلك لبعض تقاليدنا التي وقفت حجر عثرة في تنظيم حياتنا
وكما قلتم فإن الفوضى من القرية وحتى في المدينة وفي الداخليات وفي المواصلات العامة وفي كل مكان
اما ان تحدثنا عن فوضى الخدمة المدنية فهذه تحتاج لألف بوست
لكننا نريد فقط ان نتوقف في السماية والأعراس وحتى الوفيات والزيارات