أبوحراز للتقبيل 00 قال لعدم التفرغ قال

لم أكن اتوقع اطلاقاً أن بقريتي الوادعة قراء كثر لسودانيز
جمعتني بهم مناسبة حزينة يوم أمس
شباب في منتهى الروعة والبراءة
التقوا بي في هذه المناسبة
ووجدتهم يقرأوون لكم ولي بعمق
ولم أكن اتوقع أنني بلغت مثل هذه الشهرة
فإنني أكتب دائماً في صمت
حتى العزابة معي بالمنزل لايعرفون ماذا كتبت
هؤلاء قرأووا كل مداخلاتي ومعظم بوستاتي المتواضعة
لكنهم جميعاً اتفقوا في شيء واحد
هو لماذا أطلق على نفسي { أبوحراز }
وبقدر مابررت لهم موقفي وأن هناك ظروف كثيرة حتمت اختيار الاسم
لكنني لم اصل الى نتيجة
قرأت في ابوحراز
وتجمعني ذكريات رائعة بهذه القرية الوديعة الجميلة
طبعاً ذكريات ذكورية كلها
فالكلية من النادر في وقتنا أن تشاهد بها أنثى
لدرجة أنني عندما وصلتها في اول يوم
قلت أنني ربما دخلت عن طريق الخطأ
فقد توقعتها أنها كلية تابعة لوزارة الدعوة والارشاد
وأوشكت أن أحمل حقائبي وأعود لأهلي
لأنني بالطبع لا اصلح أن أكون مأذوناً أو مؤذناً !!!
هل من السهولة تغيير الاسم بعد هذا العطاء المتواضع ؟؟؟
يريدون اسماً يحمل اسم قريتنا ويحلق بها في الفضاء الرحب
رغم أن هناك بقريتي من هم أكفأ مني
وأكثر مني خبرة
وأغزر مني علما وأدباً وذوقاً وثقافة
ما رأيكم أحبتي لأن ماركة { ابوحراز } أصبحت ملككم وملك القراء في جميع أنحاء العالم

أخي الكريم أب حرز
كل عام وأنت وأهل قريتك الظالم أهلها بخير
ورطتك مع أب حراز هي مثل ورطتي مع الملا عمر وإن كانت حرازتك أو حرازاتك أفضل بكثير من خوست وجبال تورا بورا فأنت في أسوأ أحوالك تخاصم فصل الخريف كما يقول المثل السوداني – حرب الراز للمطر – وحرب بكسر الحاء والراء وتسكين الباء على طريقتنا العامية. أما ملاي عمر فهو حارب العالم أو يحاربه العالم لا فرق.
التغيير جيد في كل شئ عدا في الـ Nickname أو اللقب في هذا المنتدى فأنت أصبحت أب حراز شئت أم أبيت وأنا ما أنفك لقب الملا يطاردني مطاردة الـ CIA لفلول طالبان في جبال كرري فسوف تبقي أب حراز هنا وسوف أكون ملا في هذا المنتدى لكين الرسول عليك يا أب حراز كان ما غيرت لينا صورتك دي إن شاء الله تخت صورة جردل بس عليك الله غير لينا الصورة دي ، وأنا بصراحة لا أجد رابط بين اللقيمات والصقط – البرد – لكين كل ما أشوف صورتك الخايف عليها دي ونحن ما خايف علينا بحس يشئ من البرد فهل أنت من مواليد برج الشتاء ولا شنو

صـباحك خـير ان شـاء الله
وانت كمـان يا الملا عمـر...

فقط أحـاول هنـا اظـهار تضـامني مـع ورطـتكـمـا!!

مـني عـوض خـوجـلي

صباحاتكم بيض زى حليب غنم اب حراز

قول للجنيات الحلة ديل:احمدوا الله مااتسميت ليكم (اب فرار)

اقتراح : عدل الاسم الى:ابو حراز-فرع قريتكم.أو

خت صورة القرية عليها اسمها بدل صورتك الخايف عليها زى ما قال اخونا الملا عمر

تحياتى

مهيرة
هسي بتعرفي تحلبي الغنماية ؟؟؟
والله تلقاك ماشفتيها الا في التلفزيون
قال حليب ابيض قال
اب فرار عديل
كويس ماكنت ليهم اب كعبول
طبعا دا حيوان بهيمة وعوير لدرجة ماعادية
بغير على مرتو
وهو الحيوان الوحيد البمشي وراها
وبمسح آثار مشيها في الأرض
تقول هيفاء وهبي
وقالوا ياويل البتعرض لزوجته في الطريق
يعفصو عفصة عدوك
ياريت لو كل الرجال يغيرون مثل ابوكعبول
نسوانا مشكلة 00 تغير عليها تقول دا واحد معقد ومتخلف
ماتغير عليها تقول ما بحبني
ياجماعة نحن نسوي شنو ؟؟
الصورة لو غيرناها والله تاني مانلقى اي زباين
زول واحد قال لي انت وسيم 00 طبعاً هو فتحي البحيري
لأنو شين 00 عشان كدة الطشاش في بلد العمي شوووووووف
قال وسيم قال

منى
ماشاء الله 00 عيني بااااااااااردة
برضو تقول لي ست النفر؟؟؟
تاني تطير في السماء 0 لكن براها المرة دي
شكراً على التضامن والمرور
ورطة الاسم اشبه بورطة الاغتراب
يعني اغتراب السجم دا ورطةكبيرة جداً
الواحد بقى زي الركشة لاقادر يلم في المغتربين السمحين
ولاقادر يلم في ناس السودان
طبعاً الركشة مارضيانة تكون موتر ولاقادرة تكون أمجاد

الملا عمر
قلنا نحاول نبيع الاسم
يمكن يجيب دخل كويس
والواحد يمشي يشوف ليهو طريقة عرس
طبعا قرفة للنهاية من ست النفر
خلاص عاوزين نشوف ناس جاكلين وسوزان وسمر ومي
تطير ست النفر وأمها في السماء الأحمر
قال ست النفر قال
غشونا الجماعة
وهسي ياماطلعت موديلات حديثة من ناس هاي
هاي دي طبعا السلام الجديد
ونحن ست النفر لاهاي ولا هاواي
أول ماتجي من السفر تعمتك لحد مانفسك ينقطع
كمان شنو 00 واحدة قبل كم يوم قالت لي أم الخير أخبارها شنو
قلت ليها كمان جابت ليها أم الخير00 نحن ناقصين وللا ناقصين
زمان كان عاجبني اسم { ابوالقنفد } لكن واحد خطفه بسرعة
رغم اني أكره { القعونجة وابوالقنفد } لدرجة ماتتصورها
طبعا معليش نحن في أهل العوض بنقول للضفدعة القعونجة والجرادة قبورة
عندنا واحد زايد واحد يساوي اتنين

أبوحراز
لك التحية
حتى لا تفقد نصيبك من الشهرة فأبق على إسمك. وإن كان لا بد فغير الإسم إلى أبحراز ... فالأخير أنسب وأطرب...
لك التحية
الحلاوي

أما بالنسبة للصورة أختلف مع الملا عمر . يجب إبقاءها كما هي فهي تذكرنا بالزمن الجميل.
يا أخوي بالمناسبة دي .. الصورة دي اتصورتها متين ... قطع شك قبل مايو !!!!

الحلاوي الله يجازيك
ياخي معقول تكون الصورة من زمن مايو ؟؟؟
ياخي دي قبل اربعة سنوات يوم دخلت المنبر
لكن والله عندي صورة في الابتدائي
ياخي والله لو مالقيت الاسم مكتوب عليها نهائي ماكان حا اصدق انها صورتي
اول شيء الجلابية ولا زرارة مافيها
والجضووووووووم ماشاء الله بس حدث ولا حرج
طبعاً الشعر كل واحدة في حته
والسفنجة كمان ظهرية على قول اهل العوض
الجلابية كرفسة تقول أكلتها بقرة
طبعاً دا خلاف الغبشة
وبعد دا كلو الولد عامل فيها مبتسم

ابحراز زي ما قال الحلاوي

اتارينك انت قريت كلية ابو حراز الزراعيه

ده اسمو فت

عشان انا عارف انو في ود............. مافي كلية

علا يكون سووها بعدي غايتو

المهم كل عام وانت بخير وام الخير بخير

عباسكو
كل عام وانت بخير
ياخي شوف لينا طريقة نجي الامارات
والله سافر معاي كم واحد من السعودية
وجوهم نايرة وجضيماتهم فايرة
حتى كلامهم بيختلف من كلام المغتربين في السعودية
وناس هاديين وراضيين
بعدين جيوبهم ماشاء الله
قريب حانعمل لينا كلية
بس انشاء الله تكون للنساء فقط
زي كلية التربية حنتوب
مايقوم يعملوها لينا زي كلية المحيريبة التقنية
شوارب بالكووووووم

بدرالدين شنا أبوحراز
تبادل كُرْضُمْ بُرْضُمْ؟؟؟

بدر الدين شنا
كرضم وبرضم 00 الاسبيرات دي شنو 00 مافهمت أي شيء
ياخوي انت مبدعات سلطنة عمان ديل الجاهن شنو
لازم تتفقد النسوان ديل لأنك ماشايف شغلك
وين سوما وبت الجزيرة والدكتورة نهى ؟؟
طبعاً مرة الوالد قال لي والله انت ماشايف شغلك وماعليك أي { تكل }
كان عندنا جدنا كدا مريض شوية وقالوا لي نوم معاه وأاذا اتضايق تقوم تصحينا من النوم
طبعاً عمك دا { يكح } الليل كلو وكل خمسة دقائق عاوز يشرب
اها زي الساعة 12 سمعت صوت الحفلة
طوالي { ختيت فيهو البطانية ومليت ليهو الجردل موية } وقلت ليهو الموية في الجردل ياجدي كان عطشت أملأ كرشك زي ماعاوز 0
قام قال لي { انت ماشي وين } ؟؟
قلت ليهو انا راقد قريب منك هنا
اها مشيت الحفلة { وعاينت خير } زي مابقولوا السعوديين
طبعاً لمن رجعت لا لقيت جدنا ولا لقيت أي واحد
تاريهو ابن اللذين اتضايق بالليل وقاموا ودوه المستشفى 0والراجل للأسف اتلحس
الغريبة كان نصيح 0

أخي الكريم أب حراز
مررت مرور الكرام بعنوان مقالك وبعد قراءة ثانية راعني العنوان فتخيلتك نافخ جضيماتك كجوز طمام مشرعاً إيها للتقبيل غير أن روعي سرعان ما زال بعد أن أخبرني أخ وصديق عزيز قضي نصف عمره في دول الخليج مغترباً ويعيش الجزء الأخير من عمره يصارع قسوة الحياة ، فقال لي لا فض فوه أن التقبيل هو قبول شراء العين بما فيها وما عليها فإن كان دكان عجلاتي أو ساعاتي أو كنتين أو حتى حلاق بمعداته وأدواته وفي بعض الروايات أو أنواع التقبيل بعمالته ، وقال لي أيضاً لا فض فوه أن التقبيل لا يمكن أن يكون بالمعني الذي ذهبت أنا إليه فكيف لشخص سليم العقل أن يقبل جداراً أو باباً لا بل يذهب أبعد من ذلك ويدفع لصاحب العين مقابل تلك البوسه في باب دكانه أو حيطة صالون الحلاقة خاصته.
طبعاً أنا على أتم الإستعداد لقبول عرضكم بتقبيل إسم أب حراز لإثرائه هذا المكان بجميل الكلم وعذبه وبما إضفاءه على هذا المنتدى من روعة لا تخلو من الطرفة والثقافة والإبداع والإمتاع فقلد أثريت الكثير من جوانب الحوار هنا وكانت مقالتك في مجملها إضافة جيدة ومفيدة وممتعة ، وبلا شك إن كان هناك مأخذ عليك فهو أنك بعد غربتك تنكرت لست النفر وتخيلت إقترانك بهيفاء أو ديانا أو كلوديا أفضل بمائة فرسخ من إقترانك بست النفر الصابرة ، وهو بلا شك تطلع وإن كان غير مشروع لأن الأمر أولاً وأخيراً يتعلق بالعلاقات الإنسانية ، أما أحلامك التي تمثلت في شرائكم بنطلون جينز ساعة شروعكم في الإغتراب والتي كبرت وربت حتى جاوزت إمتلاك عربة فارهة ودار فخمة وحياة يسيرة فهي مشروعة بكل المقاييس

الملا عمر
اشكرك على هذا الكلام الرقيق الذي أخجل تواضعي وإن كان سيكون له وقع جيد وأثر كبير في النفس لو أتى من الجنس الناعم 00 لك التحية وأنت تحلق بنا بكلماتك الرائعة لنعيش في عالمٍ آخر ينقلنا بعيداً من هموم الحياة وبؤسها وشقائها 00 لنترك كلوديا شفر وديانا حداد وهيفاء وهبي واليسا وروبي وفيفي عبدو 00 طبعاً كما تعلم اغلبهن قمن بعمل افطار صائم في رمضان الماضي وهو مايسمى { بالموائد الرمضانية } أذكر أنني كنت معزوم وخرجت قبل المغرب بقليل فوجدت أحد الأخوة المصريين ذاهب لمخيم تم اعداده لإفطار الصائمين وهذا الكريم حاتم الطائي عندما أخذته معي بسيارتي لايصاله عزمني معه فقلت له والله انا مستعجل فقال لي { خلاص حا أحوش ليك معاي محل قبل ماترجع } يعني عاوز يحجز لي مكان 00 تبخرت ياسيدي الأحلام 00 وفي كل يوم اصبحنا نقدم بعض التنازلات 00 اذكر أنني أول ماحضرت السعودية كانت أحلامي كبيرة جداً ووصلت منتهى البلاهة في اليوم الثالث عندما ركبت النقل الجماعي وقلت وأنا في طريقي للطائف { يازول بس شيل ليك باص زي دا وارجع } شوف العوارة كيف 00 وكل ما الواحد يلم ليهو قرشين يقوم ينط السودان 00 اها دي ولدت ودي حملت ودي أجهضت ودا عاوزين يطهروه 00 وعمك عاوز يمشي عمرة 00 وأمك عاوزة تحج 00 وأختك جاها عريس علاوة على ناس حيطة وقعت وبكاء في كاب الجداد وعرس في ركبتي زاغت 00 يعني في الآخر تبقى في الطريقة التي توصلك سواكن 0 تصدق قطعة ارض عند أهل العوض دفعت سعرها ثلاثة مرات ؟؟ كل ماترسل القروش ياكلوها 00 يعني لو كانت في المنشية أو الرياض الواحد مابتأسف عليها 00 تعرف سعرها كم ؟؟ والله مليون وسبعمائة خمسين الف ؟؟ وكلفتني آنذاك ستة الف ريال 00 والآن ناوي اتبرع بيها جامع 00 أخير نلقى لينا قصراً في الجنة ساعة ماعاوزة ترفع راسها فوووق واصبحنا نحلم أحلام اليقظة فعندما سدت كل الطرق في وجهي حلمت بان أجد لي مائة الف ريال ماتنقص ولاهللة { يعني القاها في واطاة الله الواسعة دي } وكنت أعيش في دائرة الانفصام هذه لأكثر من ثلاث سنوات وبعد أن سافرت السودان ورأيت الاستثمار في الخرطوم رفعت أحلامي وتمنيت لو وجدت مليون ريال 00 هو أنا خسران حاجة ؟؟ مش الأحلام دي بدون ضرائب ؟؟؟
قال نقل جماعي قال 00 هسي عاوزين لينا { رقشة }

مش كويس ما دفعناك Royalty
وانت فاكر المسألة لعب
دي أبوحراز تكتب وتتبرك
قال يغير الاسم قال ... والله أياهو ...

أبو حراز

القابض على ( حرازه ) كالقابض على سلك كهربا عريان.
فأقبض عليك حرازك و عض عليه بالنواجذ .. فقد عرفناك شجرة وارفة الظلال و إرتبط إسمك بها إرتباطا وثيقا ( و لا فكاك ) ..

و كل سنة و إنت غابة من الجمال

سلام يا أبو حراز
والله وما طالبني حليفة
إنت كنت واحد من اقوي أسباب إشتراكي فى هذا المنبر
لأنو سنة 2002 كنت برة السودان وكان البورد دا هو السلوي فى الغربة
وبالذات كتاباتك فى المنبر الحر وقتها ( آنذاك )
وأنا من هذا المنبر بقول ليك حافظ علي صورتك دي وعلي إسمك دا نسبة لإرتباط ذاكرة الكثيرين بهما
وإن كان صورتك مش ولا بد
لكن علي قول المصريين أدي الله وأدي حكمتو

ملحوظة
حكي الأصمعي أنه وجد إمرأة جميلة جداً فتشوق لأن يري زوجها وتوقع أن يجده مناظراً لها فى الحسن بيد أنه ( والله بيد أنه دي من بيت الكلاوي ) بيد أنه كان دميماً ( وما في داعي نقول دميماً جداً عشان ما نجرح شعور ناس ) فقال لها : كيف وإنت بكل هذا الحسن ترضين بهذا الزوج فقالت له : يا هذا لعلي قد أذنبت يوماً فعاقبني الله به أو لعله قد أحسن يوماً فكافأه الله بي ، فكيف لا أرضي بحكم الله فى الحالين؟
مع مودتي
فضل كرار ( ود الحصاحيصا )

ابوجضيمات كيف معاك؟؟؟؟؟؟؟؟

ياللخو جضيماتك ديل اهلك في الضلمه بعرفوك
حتى لوكتبت باسم سوسو او لولو

تعرف انا اول ماشفت خليقتك دي قلبي اكلني
وماغبيتني تب وكان اول موضوع اقراه ليك مشيتك لي ودمدني وشفطك للشاي والرياله سايله
قلت الزول دا زولنا تب بس فيهو شوية لمعه
ودخلت البروفايل عرفت باقي تفاصيلك


يعني اذا ناوي تغير

اكتب عثمان الخليفه ابراهيم

وقع ابوحراز لغاية ما الناس تتعود
رغم اني ارى ان الناس ستعرف اسلوبك المميز في الكتابه دون عناء
هسي يقبلوك ولا يقبلو منك
شوف دا بالله

الاستاذ / المسمى ب ابوحراز

تحاياتنا والى الارض الطاهرة ابوحراز ، باين عليك اخذت بركات اهلنا الصالحين

فقط لفت نظر ابوحراز ليست للتقبيل ، وحقيقه حجزت هذا الاسم من جميع ابناء ابوحراز

اعضاء المنبر ، فاحمد الله انك حجزت هذا الاسم الشرف الكبير ، انا من ابوحراز ( غرب )

ولنا ذكريات بكليه ابوحراز الزراعيه منذ ان كنا اطفال والى الدراسه الجامعيه وبعدها

على العموم حافظ على هذا الاسم وعض عليه بالنواجز

استاذنا كمال مبارك
ابوحراز من القلب الى القلب
ومن الأعماق الى الأعماق
ومن الأهداب الى الأهداب
لم نقل أنها للتقبيل وانما الاسم الذي دخلنا به
وربما لاتعرف مدى تعلقنا بها ومدى وقعها على قلبي ومدى محبتها ولولا ذلك لما اخترتها من بين آلاف الأسماء التي كانت امامي وقتها
وأتمنى أن أكون قد حملت مسئولية ذلك
وأن أكون قد أعطيتها ولو ربع قطرة من محيط عطائها
ابوحراز غرب اقرب الى الكلية كنت أمر بها يومياً
طبعاً لم اكن أذهب للقباب نهائياً طيلة وجودي هناك
بل كان لي غرام كبير مع النهر
هذا النهر العاشق والذي يتلوى عندما يمر بأبوحراز
أجلس هناك الساعات الطوال
وأتأمل في هذا النهر المتغطرس الذي يعشق هذه القرية وساكنيها
كان العميد محمد بابكر نقد 00 كان طالباً وعميداً واستاذا وأباً للجميع
كم أتمنى أن أقابل هذا الرجل المخضرم
فقد قال لي ذات يوم : انت زول الله ساي ماتقوم تطلع في المسرح وتتكلم أمام وزير التعليم العالي
نحن عاوزين لينا واحد شيطان
ولكن بعد أن قدمت كلمتي كافاني كثيراً وأصبحنا اصدقاء
كان هناك حيدر ابراهيم الناير
وذكريات كثيرة
يكفي أن كلية ابوحراز لم تكن بها كافتيريا
هل تذكر بص الكلية الأغبش الذي يذهب الى مدني كل خميس
اول قصة حب حقيقية كانت في ابوحراز ولكن تزوجها أحد الشيوخ
لهذا أكرههم كثيراً
لك التحية والتقدير ولكل أهلي وأحبابي هناك 00

زول ساكت
والله شاي مدني دا كل ما اتذكره أموت من الضحك
صدقني كل أهل العوض مفروض الواحد قبل مايمشي المدينة يدوه دروس في الأوتوكيت وكيفية التعامل بحضارة مع الشاي والأكل وهلم جرا 0
طبعاً الشاي عندنا نحن كله مع بعض في الكفتيرة ومن الكانون للكباية المخربشة ومنها مباشرة للفم المليء { بالريالة } وأحياناً { الطحالب }
وعندهم الشاي بطريقة عجيبة جدا 00 الصينية شكلها مختلف ويضعون السكر في مكان وكذلك الشاي والملعقة والحليب 00 هل يوم رأيت ملعقة وأنت تشرب الشاي عند أهل العوض ؟؟ أذكر في نفس هذا البيت دخلت بنت صغيرة وهي في مثل سني كانت تشكو من { مغص } نقول له نحن شيء آخر تماما 00 هم يسمونه مغص 00 المهم شكت لأمها وكل ذلك تم أمامي وكنت استغرب فيما تقول وكأنني قادم من كوكب آخر 00 وبعدها مباشرة رايت امها تذهب للدولاب وتحضر منه حبوب بيضاء وتأتي بكأس ماء وتعطيها حبة واحدة 00 طلبت منها ان تعطيني الحبة الأخرى لكنها رفضت وقالت لي : لمن يجيك المغص نديك 00 وجلسنا ثلاثة ايام ولم يات المغص للأسف 00 اقول ذلك لأنه كان معنا مساعد طبي يسمى { عوض الكريم } دا عجيب جداً طوالي عنده زجاجة خضراء بها مادة اشبه بالجير وعليها كوز ابيض مطرقع أول ماتأتيه يعطيك { جغمة } من هذه الزجاجة 00 طبعاً هو يعرف أن اغلب الأمراض هو التهرب من مادة الرياضيات 00 بعدين لو عاوز تموت مابيديك راحة ومابيضحك نهائي الا في آخر الشهر 00 وبيفطر مع المدرسين باستمرار 0الرغريب انه حافظ جدول الحصص لكل الفصول 0

فضل كرار
لك التحية على هذا الكلام الجميل
مفروض مادام أنا كنت ليك سبب على الأقل تساعد في تسويق الاسم
قلت لي الراجل شين جداً { دميم } الظاهرة دي كتيرة جداً في السودان 00 تشوف الواحدة جميلة جداً تحرضك وقتها على رؤية زوجها 00 وبعد أن تراه تصاب بالدهشة { أبوالقدح } عديييييييل 00
من وين انت في الحصاحيصا 00 ماشفت خلقتي دي هناك 00 طوالي المغرب دا برنامجي 00 جمب الاستاد بشرب قهوة جوار المطعم بتاع الكوارع 0 بعديها بلعب كوتشينة مع أزهري دياب وللأسف بسببه اتغلبنا اكثر من مرة لأنو مابشوف كويس سبعة الأسود يفتكرها ولد ديناري ويقوم يجرها خمسين 0الفترة الصباحية تلقاني دائماً مع عماد بندي في مركز دبي للكمبيوتر 00 طبعا العمارة كلها بنات 00 بعد الساعة 12 مع عمك السر في عمارة الأوقاف محل الموبايلات 00 والوقت الباقي بأركويت مع ست النفر طبعاً وهنا يمنع الخروج حتى اشعار آخر !!! مرات بمشي نادي النهضة عشان فيهو معارض ومنتديات ثقافية وكذلك لممارسة لعبتي الشهيرة { تنس الطاولة } ايضاً عندما تكون عندي قرفة اكثر من اللازم للنيل المتمرد المتغطرس لأكتب بعض الخواطر ومنها لنادي الموردة على الخط السريع 0وقبل رجوعي أمر على بقالة قريبة من النادي فهي البقالة الوحيدة التي أشرب منها ببسي باستمرار 00 تعرف ليه ؟ لأنها البقالة الوحيدة بالحصاحيصا التي تبيع فيها فتاة جامعية في منتهى الأدب والذوق والأخلاق !!!! أوعى تمشي هناك !!

ابوجهينة
لافكاك دي ذكرتني بعمنا { اب تالولة }
طبعاً كتبت عنه بوست في بداية دخولي المنبر
الراجل قدر ماحاول انو المجتمع يزيح عنه هذا اللقب السيء ولكن لافكاك
وكان عندما ياتي لأي مناسبة يطلع السكين من ضراعو ولو في أي واحد ضحك الرماد كال حماد 0
طبعاً كان عاوز يجي عمرة
وقام اتصل علينا هنا
ونحن بيني وبينك نسينا اسمه الأصلي
اها في التلفون معاك عمك أمحمد ود أحمد ود جاه النبي
طبعاً قالها أكثر من عشرين مرة
وفي كل مرة نقول ليهو جاه النبي منو
أمحمد ود أحمد منو ؟؟
أها لمن زهج وهو كان محتاج شديد لشيك العمرة
ياجماعة عمكم { اب تالولة } !!!!

ود أحمدمالو اسم دا زي { ودعكر }
اتحداك كان تعرف { ودعكر }
قال تتبرك قال
والله بيني وبينك الواحد لو اعتمد على الاسم دا وبقى زول بخرات أفضل مية مرة من منتدادا
يا أخي واحد حيوان عندنا شغال الشغلانية دي يمكن دخله في اليوم 200 الف جنيه والشهر 6 مليون
عندو علاج كله 00 طبعا صورته بالموبايل وكنت عاوز أنزل موضوع ساخر عنه لكن ماعرفت أنقل الصورة لجهاز الكمبيوتر 0
طبعاً أنا مشيت ليهو شافني لابس كويس قام قال لي إنت مسحوووور
قلت ليهو طيب ساعة أنا مسحور ليه مابرفس ؟
قال لي سحرتك { واحدة } وبترفس هي براها ؟؟
عشان كدا ياولدي كلما انت تتضايق معناها هي قاعدة ترفس
قلت ليهو ياريت لو عرفتها عشان نرفس مع بعض
قال ترفس قال !!!

الجميل أب حراز
ما وريتنا الأسم العايز تغير ليهو!!
مبدئياًً مرفوض

محمد السر
رايك شنو في { أهل العوض }
طبعاص واحد قبل فترة زعل خالص مني
لأني قلت ليهو وين يا أهل العوض ؟؟
قام قال لي : نحن ما أهل العوض 00 نحن { أهل بلة }
يعني هو من النيل الأبيض
قلت ليهو لحنتها يعني ؟؟ ماكلو سوق أم دفسو
قال أهل بله قال
في أسماء ظريفة 00 مثلاً الواحد يمكن يكون ابو القدح
ولو عاوز يقشر يقول ابو القنفد

Quote: وقلت ليهو الموية في الجردل ياجدي كان عطشت أملأ كرشك زي ماعاوز 0

ياخوي دا جدك ولا حمار البختو ليهو الموية في جردل دا؟؟؟
أما قصة كرضم برضم دي سمعتها هنا في عمان خاصة لمن واحد يكون داير يبادل ساعته مع ساعة زميله (يعني زي ما تقول إنك تقبل التبادل بكل علاته) إما أن تكون رابح أو خاسر
فأنا لمن عرضت عليك العرض وهو أن تقبل التبادل إسماً وشكلا (الإسم والصورة المصاحبة)
لا إله إلأّ الله عطشتني ناولني جردل جدك دا
أما بخصوص حريم السلطنة الذكرتهن فأنا بعرف سوما فقط معرفة عن قرب مع إحترامي الشديد للأخريات

الله يجازيك يابدر الدين
جدي دا الناس يزوروه الآن في المقابر
قال الصورة المصاحبة قال
نتبادل الاسم بس

رايكك شنو يا أبوحراج

نويبي
الحراج هنا في السعودية هو محل لبيع الأشياء المستعملة والقديمة جداً
معانا عمك دا لو عاوز يموت مايشتري حاجة جديدة
جنو قديم في قديم
حتى المداد نفسها ماشاء الله من زمن المهدية
وبعدداكلو عندها مساخة ماعادية
قبل أيام { قد } أضنينا 00 كل يوم يقول لينا عاوز يمشي الاحراج
قال عاوز ليهو دولاب مستعمل
عليك امان الله اختار ليهو دولاب واحدة عجوز تكون ماتت ليها 40 سنة
سعره 20 ريال فقط
وصاحب المحل نفسو قال الدولاب ليهو هنا 4 سنوات مافي حد اشتراه
المهم صاحبك قال ياهو دا بس دولابي
أها قلنا ليهو لازم تعمل ليهو تنظيف من الصراصير والحشرات
اها عمك بينظف فيهو وجد في أحد الأدراج { 38 } الف ريال
شوف ليك عكتلة بتاعت عجايز 00 هسي دا حظ شنو ؟؟؟

ابوحراز
تناهت إلى سمعي تلك الأخبار عن أهلنا والحادث المؤلم الذي وقع لهم ، ربنا يرحم الموتى ، ويشفي الجرحى ،،، ويتولاهم جميعا برحمته ...
زيي زي شِدر الحراز مقاشر الخريف ...
أبو حراز دار أهلي العركيين أصحاب القباب العالية الذين علّموا القرآن وعلوم الدين ، ثم انتشروا في الجزيرة فكانت قراهم العديدة ، وسكنوا طيبة ، والمدينة عرب ، الطلحة ود الطريفي ، مهلة ، ودربيعة ، ود الضو العركيين ، عبود ، المناقل ، الكريمت ، معتوق ، وأينما حلّوا كان الدين وكان الخلق الرفيع ،،،، هم أهلي وأهلك ، وأهل كل السودانيين الذين يعرفون قدر العلم والعلماء ... أبو حراز بلد الشيخ يوسف أبو شرا ، والشيخ المصوبن ، والشيخ ود يونس ، وأبوعشة التور ، والعليش ،،،، أبوحراز منبت الشيخ حمد النيل ، وأبنائه البررة ، وعلى رأسهم الشيخ عبد الباقي أزرق طيبة ... أبو حراز القرية السياحية التي إذا وجدت اهتماما من الدولة لكانت تكون من أفضل المناطق السياحية في العالم لما تحتويه من آثار دينية وحكايات وروايات ... أبوحراز زميلنا في المنبر سيظل كشجرة الحراز التي تقف أمام مشرع حنتوب التاريخي قبل الكبري ويتسع ظلها للعشرات ، أبوحراز رغم احتجاج أهلنا سيظل أبوحراز ، فلا فرق بين أبوحراز القرية وود ربيعة ، كلهم أهل ، وكلهم للجزيرة .. لا تبع وإن أعطوك الذهب ... والتحية لأهلنا في ود ربيعة ...

الكريم / ابوحراز

نعتذر للشاكوش كان غيرك اشطر اعرف مجموعه كبيرة من طلاب الكليه تزوجوا من

حور ابوحراز ( حور حقيقى وليس حور الترابى ) ،

باين عليك انت دفعه المزيع الكتبى بقناة الجزيرة ، لو قلن لك فى هذا الوقت

انا كنت بالمرحله الابتدائيه هل تصدق ، حقيقه زمن جميل ، وكان العميد نقد

له طرائف وكان صديق الجميع جميع اهل ابوحراز يزكرونه حتى اليوم ،

تشرفنا بالمعرفه .

الاخ / ودقاسم

اضافه الى ماكتبت عن ابوحراز ، ثالث ايام العيد تم تكريم احد ابناء ابوحراز

بالرياض الاخ / محمد مبارك من هذة الارض الطيبه اتى من صلب ابوشراء ودفع الله

المصوبن من صلب ود الطريفى والعركى راجل الدرب من العليش القلب القطن عيش من بياع

المطر الشيخ حمد ود الشيخ دفع الله المصوبن القلب التمساح حجر ، من صلب الشيخ حمدالنيل

قاهر الانجليز حفيدة ازرق طيبه هؤلاء هم بناء تقابه ابوحراز ومنارة تدريس القراءن

بل فاليبقى الحراز و تبقى الصوره بي جضوما
كل سنه وانت طيب و سيك سيك معلق فيك

ايهاب
مشكلتك كبيرة جداً الله يكون في عونك
من يوم عرست بقيت مابتكتب ليك غير سطرين
حكايتك شنو 00
نحن قلنا أحسن نفرغ الفينا كلها وبعداك نشوف موضوع العرس
معانا واحد اتزوج مدرسة واصبح محرم معاها هنا
طبعاً ماكل مجان شارب مجان ساكن مجان صاعود مجان كلو مجان
لأنها هي التي تعمل وصاحبك بقى زول عدة وملايات
كل ما امشي والله اشفق في حاله
يغسل العدة 00 يجي يكوي الملايات ومن ثم يكنس الصالون
كمان ايام الوحم قالوا ليهو تشيل الملايات تمشي تكويها عند العزابة
مرة قام قال لي { والله نحن الليلة صرفنا الماهية } !!
قلت ليهو يا اضينة قول المدام صرفت الماهية
هسي جابو ليهو ولد
والله أخير الوحم من الولادة
المدام اشترت ليها عربية بتاعت طفل البسحبوها سحب دي
وختو ليهو الوليد
وكل يوم يسوق فيه
عليك أمان الله هي ماشة تتقدل سااااااااااااااااااي
قلت ليها عافي منك
قال بدل سكن قال !!!

كمال مبارك
محمد الكبير الكتبي كان قدامنا بفترة طويلة
أنا حضرت في الرمق الأخير للعميد المخضرم نقد
وأذكر أن المتألق محمد الكبير الكتبي أتى الينا أكثر من مرة لتقديم بعض الاحتفالات بالكلية منها حفل تخريج بعض الدفعات 0
واذا كان يدخل سودانيز اون لاين أتمنى أن يتذكرني فقد حضرت اليه في اذاعة ام درمان وكان رئيساً للقسم السياسي وقتها وعرفته بنفسي وقلت له اريد أن أجري اختبار صوت فذهب معي للأستاذ عمر عثمان فكاني عندو وقام صووووووف 00 هذا موضوع كبير سأتطرق اليه في مناسبة اخرى 0
العليش القلب القطن عيش
ياخي دا ظريف جداً 00 ليش ما كان يقلبو لينا ملايات
والقلب التمساح حجر 00 برضو لو قلبو كبري كان اراح الناس خاصة في ابوحراز والقرى التي حولها 0
انا طبعاً كنت اسكن في داخلية الشيخ دفع الله 00 عندي سريرين ودولاب ملابس واللبن كان بالجرادل 00 سبحان الله 00 بس قلت ليك المصيبة الكلية كلها مذكر وجمع مذكر سالم 00 زرنا في الرحلة العلمية مصنع الكناف وكلية الزراعة ابونعامة طبعاً حمدنا الله على النعمة اللي نحن فيها لأنو طلاب ابونعامة كانوا شينين جداً وعندهم غبشة غير عادية 0 والباعوضة قدر القبورة
لكن برضو ناس كريمين ضبحوا لينا عجل
لقينا الراس مافيهو لسان !!!

ود قاسم
نعم الحادث كان مؤلم جداً
وسقط فيه خيرة شباب أهلنا
جميعهم من أسرة واحدة وبيت واحد
ولكن ايماننا بالله يطمئننا بأن كل شيء مكتوب في لوح ومسطر
نسأل الله لهم المغفرة جميعاً
هكذا دائماً عاداتنا في السودان عندما يموت قريب لنا نركب على البكاسي المتهالكة
ويكون العدد فوق مايتصور المرء
ولكن في النهاية كل شيء مكتوب

هذه اللوحة التي رسمتها عن ابوحراز بريشة قلمك فعلاً هذا ماشاهدته
فهذه القرية جميلة جداً
وأهلها طيبون وكرماء
ونساؤها جميلات حد الروعة
خاصة في ابوحراز شرق وأرجو من أخينا مبارك ان لايزعل
صحيح أن بأبي حراز شرق نساء وكأنهن قادمات من الجنة
شعر منساب حتى الخصر
وعيون مخضبة بالسواد
ونهود ثائرة وكأنها تتاهب للخروج في مظاهرة عارمة
ولكن أغلب هذا الصيد الثمين يحظى به هؤلاء الشيوخ وأبنائهم
أذكر أنني امتعضت من ذلك وحكيت لأحد اصدقائي بالكلية يسمى { عاطف عثمان }
فقال لي : بامكانأن تحظى بأجمل من ذلك ولكن عليك بالجلابية الملونة
يعني حتى الدراويش لايتزوجون الا الجميلات 00 تسمع درويش تقول الراجل زاهد
لكن الحكاية لمن تجيب ليها زواج تجدهم ناس عزالين جداً
عاطف عثمان هذا من الصدف الغريبة جداً أنه درس الابتدائية بودربيعة وكان من أعز الأصدقاء
وحدث له فقدان في الذاكرة بعد ان أنهى الثانوي
استمر هذا الفقدان ثلاث سنوات على ما اعتقد
وبالطبع وضعني في الارشيف مع كل الجماعة الذين محتهم ذاكرته
وقد اتعبني كثيراً وأنا استرجع له حكاوينا وذكرياتنا
فقال لي والله خلقتك دي نهائي ماقابلتني
عليك امان الله عشنا ست سنوات مع بعض وكان يفطر معي طيلة هذه المدة وذهبت معه الى بيتهم أكثر من عشر مرات
لكن بيني وبينكم الواحد محتاج فعلاً يفقد الذاكرة ولو مؤقتاً لينس بعض المواقف الصعبة
تحول هذا الرجل أخيراً الى { أنصاري سنة } من العيار الثقيل
فهل عندما افقد الذاكرة ساكون مثله ؟؟

Quote: في أسماء ظريفة 00 مثلاً الواحد يمكن يكون ابو القدح ولو عاوز يقشر يقول ابو القنفد

يا زول إنت جنَّك أبَّهات كدي مالك.. رايح ليك شافع ولا شنو؟
ياخي نحنا إتعودنا أول ما نلقى (أبو حراز) أو (بدر الدين شنا) أو (صديق الموج) أو (تماضر "الله يطرها بالخير") في بوست بندخل طوالي متأكدين حا نلقى نكتة ولا تعليق ظريف.. أنا هسة الضحك الأنا ضحكتو في مداخلاتكم الأخيرة دي إنت وبدر الدين لو دفعتوني عليهو قروش كان ِغنيتوا
قال أهل العوض قال

عشان ما ننسى يابدر الدين شنا
طبعاً جدنا دا كان متربي على اللبن والسمن
والغريب انو كان نهائي في الشتاء مابيشرب مووووووووية
قلت لي واحد ميكانيكي معانا هنا في السعودية
قلت ليهو جدي دا والله نهائي في الشتاء ماقاعد يشرب موية
قام قال لي { جدك دا أصلو فلوكسواجن } ؟؟
طبعالأول مرة أعرف انو السيارة الفلكسواجن مافيها لديتر بتاع موية
بعدين حصل مرة كان سايق الحصان وهو راجل قوي جدا
قام الحصان الغبيان دا رفس جدنا
تصور في النهاية الحصان بقى ماشي { يضلع }
مرة بالليل برضو في { وتد } بتاع البقر كان في الأرض
الوتد الغبيان برضو قام { عتر } لي جدنا دا
قام الوتد انكسر وصاحبك ولا اترنح ماشي عادي كأنه وطا ليهو في صندوق بسكويت
ومعروف طبعاً قصته مع الحرامية الهمباته
ديل كانوا بيقطعوا الطريق للناس في نص الليل
وانتظروا صاحبنا دا كان جايي متأخر من الخلا
طبعاً كان في أمطار وخيران موية
واللصوص ينتظروك بعد الخور عشان تجيهم نجيض من التعب
الحمار { حرن } ماقطع الموية
قام جدنا شال الحمار فوق كتفه
اها الحرامية قاموا جاريين
قال همباته قال
برضو عندنا فلاتي اسمو فكي أبكر دا مكره الحلة حياتها
اها جدنا دا سمع بيهو
قام بكرة مشى الجزارات مش عشان يشتري اللحمة
عشان { يضبب } العكاز حقو
أها قال للجزار عاوز تحجز لي {000000 } عشان أضبب العكاز
قام قال ليهو والله اشتراها الليلة حاج ابكر الفلاتي
قام جدنا قال ليهو : وانا مضبب العكاز لمنو } ما لي فكي ابكر دا

Quote: أنا هسة الضحك الأنا ضحكتو في مداخلاتكم الأخيرة دي إنت وبدر الدين لو دفعتوني عليهو قروش كان ِغنيتوا

كل سنة وإنت طيب يا محمد السر وربنا يديم الإبتسامة بالإشتراك مع العافية في دورة حياتك ياخي
لك ودي وخالص معزتي

Quote: كل سنة وإنت طيب يا محمد السر وربنا يديم الإبتسامة بالإشتراك مع النجمة الكبيرة العافية في دورة حياتك ياخي

بدر
تسلم يا فنان وكل سنة إنت وأسرتك بألف خير

العزيز أبو حراز
السلام عليكم ورحمة الله
شكراً يا خي علي الكلام الطيب
وبعدين يا خي إنتي طلعت قريب جدا
أصلو عماد بندي دا صاحبي شديد
وبعد الصحوبية نحن نسايب
لأنو أسامة بندي متزوج مننا

لكن البرنامج ما عندك ، والله حاسدك علي البرنامج دا عديل كدا

وعلي حسب توقعي إنك الآن فى السعودية ولو حصل توقعي دا خاب وكنت فى السودان فيا ريت نحظي بي شوفتك فى الخرطوم أو فى الحصاحيصا
مع مودتي
فضل كرار

الأخ فضل
أكيد تكون شفت خلقتي دي في الحصاحيصا
يومياً أنا مع عماد بندي
ايام أحداث وفاة الدكتور جون قارانغ دي مابيور
بعدين برضو عندنا واحد تزوج في جدة واحدة من عائلة بندي
ناس محترمين جداً وخلوقين
طبعا البرنامج صراحة إدمان عديل كدا
يعني كل يوم انا بمشي اتفرج على الناس البياكلوا الكوارع
لأني لا آكلها
وأذكر يوم تضايقت جداً لأنني ذهبت ووجدت الناس منتظرين الكوارع
لكن للأسف يومها كانت هناك أمطار بالحصاحيصا
المهم الجزارين ماضبحوا
صاحبك بتاع الكوارع مشى اليوم التاني واشترى كوارع ناس رفاعة !!
أحب الجلوس مع المهمشين وأصحاب المهن البسيطة
اتحدث معهم في كل شيء
وهناك شخص يبدو انه معتوه ولا عامل فيها مجنون ماعارف
المهم عقدني الراجل
لأنني أول ما اصل ياتيني ويمسك اصابعي ويعمل فيها حاجات غريبة جداً
وبعديها مساج في الكتف والرقبة وعيييييييك
المهم بحاول اتخارج
لم استطع ان افهم اي شيء
اتناول باسطة من محل بجوار نادي النيل
وربما تعرف القصة الشهيرة لصاحب المحل الذي تهجم على أحد المنازل
الآن تجرى محاكمته تحت اجراءات مشددة
ولا أدري ما الذي دفعه لذلك رغم ثروته الهائلة
البنطون يمثل لي رمز كبير جداً
أحيانا أذهب عصراً واركب الى الضفة الأخرى وأعود ثانية
يعرفوني جميعهم
وكذلك يعرفون المساطيل
والفرق بيني وبين هؤلاء
أنني اعشق النهر حتى الثمالة

اب حراز انا خاشى فى نفس المشكلة
ياود امى

اب قـــــوتة اهلها محتجين قالو لى انت ما من اهل البلد الاصلين لان جدى وهو جدى العاشر جاءها مهاجر من منطقة ناس سجيمان واستقر معهم وناسبهم وخالطهم فولد له ولد اسمه عشكوب كانت له ثروة بقريه هائلة فتسيد عليهم..وبقى راس وساس وشاية وراية وسقدة وتقدة ولقدة..وجمل شيل كوكاب وسكين وحرب ودرقة...نحن لقيناها باردة
بعدها فلسنا جنس فلس..بعنا فيه حتى حمارنا للخيدر...اها الله فتحها علينا انا اتشالقت وقمت مشيت الهند وكان اسمى جميل وظريف ( احمد صديق) اسم زى بحر الرجز عشان فى المدينة كم احمد قامو سمونى ابقوتة..اسم زى شعر الخواض ومن يومها تابعنى هذا البعبع المخيف...ومن طرائف هذا الاسم..واحدة زميلتنا بت شرط من بنات العاصمة..نزلت اجازة..ومشت السوق الشعبى..كل ما تعاين تلقى مواصلات ابقوتة...سفريات ابقوتة...ابوقوتة للنقل...ابقوتة للحديد والصلب مجموعة ابقوتة التجارية...ابقوتة للمدارسة الخاصة...ابقوتة التقنية..شركة ابقوتة العربية للاتصالات والانترنت...اها زولتك دى من ما وصلت (ناغبور) مدينتنا الهندية..لمت فى عوازيم وجكيس ودلع..حمودى تعال قتقت اقعد هنا..قتقت انا عازماك جكن تنورى...قتقت بكرى تجى تشترى لى موتر..قتقت انا معجبة بشعرك...انت يا قتقت ولد فلتة..انت ياقتقت..مبدع...استمرت سنتين كدا.. سببت لى مشاكل مع زملاى.المريدن لها .وانا فى حيرة من امرها البنت دى العاجبها فى شنو...ياربى انا بقيت امير خان..ولا شاروق خان..فى يوم من الايام قالت لى انتو ناوى تسوى شنو بعد التخرج قلت ليها اغترب ..فى دول الخليج عشان احسن وضعى...قالت لى والنعمة فى السودان تخليها لمنو..قلت ليها ياتو نعمة..الحواشة وعند اخوى..وحمارنا اللخدير..وبعناه زمان
يالله بقرتنا بتكون ولدت ولا شنو..نعمت شنو يابت الناس...قالت لى البصات بتاعتكم..وانتى شوفتيها وين قالت لى ..فى حاجة بتندس ياشيطون ..موجودة فى السوق
الشعبى..شفتها انا وبابى لما كنت مودعة عمتى الذاهبة. الى القطينة..
يابت الناس انا زول مسكين عجلة فى صغرى ما ركبتها..ولا كارو موية ما عندنا
والله ياحروزة حلانى منها الجليل الرحيم...لما شبكت فيها رونى..ورونى دى ياود امى
هندية..شعرها بجر بالواطه...من البراهمن..هى معجبة بى لانها اول مرة تشوف ليها واحد زنجى..وقالت لى هى تبى تتصور معاى...اها الصورة بس حلتنى من زولتى العويرة دى
خلاص
قبل لى معاك ابقوتة
لو لقيت زبون لابحراز
وعليك الله زورنا فى
abuguta.com/db
خالص ودى لك

يا لهذا التداعي المدهش والسرد المبدع
ويا لك من إنسان

أعتقد إنك من الناس المتصالحين مع نفسهم للآخر
ويا بختك
ربنا يحفظك

تعرف يا أبوحراز النيل الإنت بتحبو دا
مسكين جداً
ليه؟
لأنو نحن ما بستاهلو
لأنو القليل بس مننا هو البعرف قيمتو
مرة فى المواصلات واحد كا بيتونس معاي قال لي أنا لو كنت محل النيل دا كان رجعت من الحدود
قلت ليهو ( عشان يوضح أكتر : ليه ؟ )
قال لي لأنو ما مقدرنو
هسع عليك الله أمشي جنب البحر مركب ساي ما تلقاها ولا زول مهتم بيهو

لكن برضو فى النفس شئ من حتي يا أبو حراز

عشان ما تتداعي براك ح أحكي ليك الموقف دا
في يوم خميس من شهر تسعة سنة ألفين وتلاتة كنت فى رفاعة لحدي الساعة عشرة بالليل
الأيام ديك كنت لاقيت واحدة فى الخرطوم
جات تتدرب معانا فى الشركة
قعدت معانا إسبوعين بس
وأنا كنت مسافر مصر وهي ح تسافر بعدي كندا
يعني فراق طويل
ما كان بيناتنا حب بالمعني لكن ممكن تقول انا كنت معجب بها جداً
وهي يا ابوحراز تبارك الخلاق كأنها مغنطيس تجذب أي زول مهما حاول يعمل تقيل أو مامهتم
وأنا كنت بشبها بي رشة العطر
لأنها بتخلي أثرها فى المكان بعد ما تمش
المهم يا زول ما أطول عليك
زي ما قلت ليك كنت فى رفاعة وكانت الساعة عشرة بالليل
جيت البحر لقيت البنطون جاي بي جاي
وأنا نازل عليهو
الموبايل رنة بي رسالة منها
رسالة مناكفة لكن بتقطر عسل
إنشرح صدري ورديت عليها بي نفس النوع
ردت علي ورديت عليها
ردت علي ورديت عليها
وكان القمر فى كامل إستدراتو والبحر رايق والنسيم عليل
وأنا مدنقر علي الموبايل
وهي عندها مقدرة علي كتابة رسيايل الموبايل بسرعة رهيبة يعني ما بتخليك ترفع رأسك
المهم تكتب وأرد
تقرأ وتكتب وأنا أرد
إتخيل لحدي ما رصيدي كمل
قمت رفعت رأسي
ألقي ليك البنطون وصل الحصاحيصا قبل نص ساعة تقريباً
والبنطون فاضي والعمال وشوية الركاب نزلو ليهم زمن
هيه يا أبو حراز
زمن
والله يديك العافية
سلام

فضل كرار
السرد اكثر من متواضع وأشكرك كثيراً على الاعجاب لهذه الكلمات البسيطة
يعجبني في الحصاحيصا أن النهر يلتف حول خصرها
وأنها كثيراً ما تغسل فخذيها بالنهر
أذكر أن عروساً رائعة الجمال أتى بها أهلها الى هناك
كنت في حالة من التأمل
لديهم طقوس رائعة ولا أدري ماكنهها
تاتي العروس لتغتسل من النهر
كنت بالضفة الأخرى برفاعة
أتأمل منظر الشمس وهي تعزف سمفونية الغروب على أوتار النهر
كشفت العروس عن ساقيها المكتنزات بالجمال والروعة والخيال الخصب
ودخلت بخطوات واثقة وبدأت تشرب منه
صدقني 00 حسدت النيل وقتها على هذا الجمال !!!
لهذا كثيراً عندما أجده يتلوى أعذره لأنني أعرف أنه في حالة من العشق !!!
أعجبني اسلوب { رشة عطر }
لدي قصة مشهورة جداً حدثت بجوار النهر
تسمى { سألتني قارورة العطر هل أنت متزوج ؟؟ } نشرت بمجلة الشرق الأوسط
فهذه الفتاة الرائعة التي قمت بتفصيل هذه القصة على مقاسها
صدقني تتحول كل أنفاسها في لحظة ما الى قارورة من العطر
وكنت أخاف حينما تذهب معي أنه لو اشعلت سيجارة
ستحترق الحصاحيصا ويحترق النيل ؟؟؟؟
كانت إمراة مختلفة ومتمردة

اب قوته
كثير من أجدادنا كانوا بلا طموح وبلاهدف
جميعهم يمشون على طريقة { القناعة كنز لايفنى }
لدي منهم كثيرون كانوا بالفتيحاب
وعندما ماتوا لم يتركوا لنا أي شيء
وأصبحنا الآن نجهد أنفسنا من أجل أن نحظى بقطعة ارض نائية في صالحة أو في الحتانة 00 وحتى لو وجدناها فكيف يتم بناؤها ياترى ؟؟
لدي جد آخر هذا كان فالح بس في الزواج
كان يرعى بماشيته وكل ماذهب لقرية تزوج منها
قبل فترة سمعنا بالصدفة أنه تزوج في قرية بالجزيرة وترك هناك مزرعة ضخمة جدا مليئة بالخضر والفواكه قيل أنها أتته منحة من الشريف يوسف الهندي
ذهبنا لأهل هذه القرية حتى نتشمم الأخبار وتتغير حياتنا بعدها
وجدناه فعلاً قد تزوج ولم ينجب
تعرف ماذا ترك ؟؟ { شجرة قرض } ومن المضحك والمبكي يسمونها باسمه حيث يقال لها { شجرة ود النور } !!!
شوف الناس تخلد ذكراها كيف 00 عمارة ابو العلاء 00 مجمع الشيخ مصطفى الأمين 00 ابراج صلاح ادريس 00 عمارة الخواض 00 وزولنا نحن شجرة قرض !!!! والمضحك ايضاً أننا سمعنا أن له زريبة كان يربط فيها حماره في موفع عمارة المعاشات بمدني !!!!!! طيب ياحيوان ساعة بتربط حمارك هنا مش كان تسجلها باسمك لك وللأجيال القادمة ؟؟ قال معاشات قال !!!!
ساعود لاحقاً للحنكوشة بتاعتك 00 قال بابي قال !! يازول حاول ارتبط ليك بواحدة تقول ابووووووووووي عديل !! طبعاً أكيد بتقول مامي !!!

الأخ اب حراز

ياخى انت بين جنتين

أهل الكمال
وناس الجمال

فبين اب حراز و الحصاحيصا تكتمل الرؤيا

اها تبيع بى كم ..؟؟

Quote: فبين اب حراز و الحصاحيصا تكتمل الرؤيا

معتصم الطاهر
أدهشتني هذه العبارة الجميلة واسكرتني وجعلتني اترنح من فرط جمالها ما بين ابوحراز والحصاحيصا 00فعلاً تكتمل الرؤيا وتكتمل الدهشة 00 لكن الأجمل من كل ذلك هذه الابتسامة الناصعة الساحرة
اريد أن أسألك : عندما ابتسمت هذه الابتسامة هل كانت أمامك إمراة أم رجل ؟؟
وهذا يذكرني بصديقي المغترب الذي تزوج واتى للسعودية وأنجبت له زوجته طفلاً رائعاً وبعدها قامت النار في صاحبنا كل يوم يقول عاوز يرجع السودان سألته حينها : اها قول مشيت جاتك زوجتك وطفلك جاريين عشان يستقبلوك في لحظة واحدة أها أول شيء بتسلم على منو ؟؟؟

الاخ ابو حراز
أولا هاك دى من الحصاحيصا

زول زى مدينة
فاضلة وحَنِينة
مشارع خصيبة
شوارع أمينة
مراقِد رحيبة
كحُضْن الحبيبة
صهيلها وأنينــا
***
لأنك حبيبى ..
ولأنّك مدينة ..
يوم حصّلتك ..
بتنَـقِّع من قِـرَب الهَمْ الحاصِل
تَلَقِّطْ من جَسَد الأرض الشوك
بِتْكِيل من داخلك زاد متواصل
وتْستِّف فى النّاس الذوق
عِرِفْتَك .. حبيبى ..



وثانيا :
دى الزولة القاعدة قدامى فى اللحظة دى :

الى زولة وتقبل اللام فيها التأويل الى جيم سقيا ..


قَبِلِك ..
نِسيت الكلام الأباجِد
عِمِيت العيون السَوافِر
مسافِر .. وما لاقى جِيهة
رَميت الأكُف البِتَفرُك ..
صقيع القليب البِكابِِر
ناكر هواه يرتجيها
لِقِيت .. الحدايِق تبادر ..
ترسّل غصونها ..
تَسَائل خُدودِك أزاهر
تنضِّـر وِجيها
لِقِيت الحقائق .. تجاهر
تَنَزّل جَلالِك فى طور الجمال
سماحة البِنَيّة الوجِيهَة .."
.. مُمَغنَطْ أجيها ..

Quote: دى الزولة القاعدة قدامى فى اللحظة دى :

معتصم الطاهر
يا خي والله اول مرة اعرف إنك زول جرسة
يعني أول ماتهرشك المدام طوالي تعمل فيها قصيدة
والله عافي منها
يعني لو هرشتك مرة تانية أأو اتكرفست كيد حاتعمل فيها ديوان !!!
لكن وبعيداً عن الرسميات
فإن كثير من النساء على هيئة قصيدة جاهزة
تحرضك أنوثتها ورقتها وأنفاسها بان تكتب فيها الف بيت وبيت
عندما كنت في فترة المراهقة
كتبت لواحدة من بنات أهل العوض خطاباً رائعاً
ختمته بأغنية وردي الجميلة والمسكرة
وقلت لها : { البرتكان نهدك مدردم }
وكتبت معه خطاباً آخر لوالدي اريد منه المصاريف المدرسية
وللأسف الشديد وضعت خطاب المحبوبة في ظرف الوالد
بينما وضعت خطاب الوالد في ظرف المحبوبة
وكانت النتيجة أنه لم تصلني مصاريف حتى نهاية دراستي
كانت صدمة للوالد
فقد ذكر أنه كان يعدني لخلافته في المسجد وخلوة لتحفيظ القرآن
ولكن خابت كل ظنونه بعد هذا البرتكان
والله من يومها اصبحت اشوف البرتكان دا مربع ومستطيل
قال مدردم قال !!!!

ابحراز
لك التحية
تغيير الاسم خيار مرفوض تماما
لا تفكر تغيرو..
بس يمكن تكتب الاسم التاني
(ويا ريت يكون اسمك الحقيقي)
كتوقيع..

وبالمناسبة والله اتكيفت من جدّك..
قلت لي الهمباتة قدّو؟؟

Quote: قام جدنا شال الحمار فوق كتفه اها الحرامية قاموا جاريين قال همباته قال

Quote: أبوحراز للتقبيل

يا زول إنت بى جدك؟ ألا تخشى المحرفين الذين يفهمون من الحديث ظاهرة؟ والله ورطتك مع عنوان بوستك ده أصعب من ورطة الملا عمر مع إسمة.

الصاوي

فـوق علشان البوسـت ده فيـه بسـاطـة تسـعـد قلبي وتمـلأ البورد نقـاء..

مـني

منى خوجلي

Quote: فـوق علشان البوسـت ده فيـه بسـاطـة تسـعـد قلبي وتمـلأ البورد نقـاء..

دائماً القلب المليء بالصفاء والنقاء يرى الأشياء جميلة

الصاوي
شكرا كتير
اذا كان البوست جميل
فالشعار الذي تضعه أكثر جمالاً وقد هزم بوستي 14 / صفر
طبعاً 14 صفر دي نتيجة مباراة كانت بين السعودية تقريباً وفريق غريب جدا
الفريق دا اسمو { مكاو } وهي دولة صغيرة بجوار الصين
الغريب فيها حلبة كبيرة جدا لسباق الفورمولا {1}
أكثر شيء أغاظني المدرب 00 بتاع مكاو
فكل مايدخل في شباكه قوووووون يقوم ينط ويكورك زهجان من اللعيبة
يقال أنهم في مباراة أخرى اتهزموا 25 / صفر
لنرجع للشعر الذي يحمل في أعماقه خيرة من مبدعي هذا البورد
لهم التحية على ابداعهم
وعلى اثرائهم منتدانا
وسنكون تلامذة لهم
ونتمنى أن نسير على دربهم حتى نبدع مثلهم يوماما

عبد الله عقيد
لك التحيات النواضر
الغريب لدينا خال كل واحدة من أخواته أسمت ولدها عليه
طبعاً حاتقول لي دا شيء طبيعي
لا 00 اي واحد سموه عليهو ماااااااااااااات !!!
اها خلينا الاسم في محله
أجدادنا الله يرحمهم
لديهم بساطة غريبة جداً
وقد أخذنا الكثير من بساطتهم
ولكن لانريد أن نأخذ من عوارتهم شيئا
فالطريق الذي سلكوه يختلف عن طريقنا نحن
تحياتي لأهل الرياض ولجمعية الصحفيين 00 بالله تديني موقع الجمعية
لأنني غيرت الجهاز واختفت اشياء كثيرة جداً
وأهم شيء عندي موضوع الأراضي
ماتفتكرني عاوز اقرا لي جريدة

أخي الصاوي
أنا أول الذين يحرفون القول عن موضعه في مقامكم هذا وأنا من الذين يفهمون الحديث من ظاهره ، لكين قول لي إنت بس كيف لي أن أقبل أب حراز قبلة واحدة على عجل ناهيك عن تسعة وتسعين قبلة بتمهل.
أقبل أب حراز حالة كون التقبيل يتمثل في تنازله طواعية عن إسم الشهرة بمقالاته وست النفر وإرثه عن جده لإمه عليه رحمة الله. أو ن يمثلنا في ألومبياد بكين الشتوي في السباحة أو التزلق على الجليد

أخي الملا
لاتبقى عليك حكاية أخونا المعاق والمعتوه نفسياً وعاطفياً
كان يشاهد فيلماً رائعا يتحدث عن أدغال افريقيا وكيفية حياة الأفيال هناك
الفيلم يبدو لي من بطولة الفنانة الجميلة الساحرة جداً نيكول كيدمان
وزوجها الوسيم توم كروز
صديقي الذي يشاهد الفيلم كان مدمنا على التقبيل
وقدحاول متابعة لقطات ايحائية لنيكول كيدمان
كان يريد أن يقبلها بأي ثمن
ولصق على شاشة التلفزيون
وبدأ يتربص بها
الى أن جاءت اللقطة الرائعة التي كان ينتظرها
وضع شفاهه على شاشة التلفزيون
ولكن تفاجأ بان اللقطة اتت سريعاً لغوريلا ضخمة
كان يستفرغ حتى الصباح
قلت له تستاهل فأنت في حاجة الى علاج مكثف

أبو حراز
السلام عليكم
يا خي برحة علينا شوية
البوست من كترت الكلام عن الذكريات الجميلة
والنيل والحصاحيصا والعطر
لامن بقي معطر
وأها النديك دي كمان بإعتبارها قاسم مشترك
قالوا:
يمتلئ القلب بالحب مثلما تمتلئ الزجاجة بالعطر
ولكن قد يفرغ القلب من الحب مثلما تفرغ الزجاجة من العطر
ولكن تبقي بالزجاجة رائحة العطر
مثلما يبقي بالقلب عطر الذكريات

علي الطلاق دي 26 / صفر
والمغالط يجيب واحدة زيها أو أقل منها شوية
صقع ولا ما صقع؟

حكاية صقع ولا ما صقع دي بحكيها ليك مرة تانية
لكن هسع خليني النحكي ليك عن صاحبي معتز الماجدي
24 سنة صحوبية
رغم إنو هو هسع فى الرياض وأنا فى الخرطوم لكن كأننا مع بعض
المهم
طباعنا قريبة لي بعض
وقواسمنا المشتركة كتيرة
وإن كان هو أحسن مني فى حاجات كتيرة جداً
فى أوائل التسعينات
كان فى لستك تركتر قادم شوية من بيتهم وهو أول بيت فى الحلة الجديدة بالحصاحيصا من ناحية الجنوب الغربي
يعني من بيتهم بيحاوطنك السكة حديد وميدان الأهلي وشارع الخرطوم مدني
كنا فى الإجازات بنقعد فى اللستك دا لحدي نص الليالي
بنتكلم فى شنو ما مهم المهم نكون مع بعض
وآخر الليل يقوم يقدمني علي الإمتداد لحدي الحد الفاصل بين الحلة الجديدة والإمتداد
وهناك فى حجر كبير نقوم نقيف فيهو إلا ما شاء الله
كأنو قعادنا فى اللستك ومشينا ما كفانا
يااااااااااااااااااه
زمن والله
تخيل فى الخرطوم سكنا سوا في بري
في سنة 98 كان فى التلفزيون جابو مسلسل أوشين
كان بجيبو فى السهرة يوم الأحد ويوم الأربعاء
وهو من 64 حلقة
ما تتخيل كنا بنحب المسلسل دا قدر شنو؟
لي درجة إنو أوشين لما ولدت ولدها الأول تاكيشي ناس الشغل بكرة جو هنوني وشغالين فيني مبروك مبروك
نرجع لي معتز
كان عندنا فى البيت تلفزيون أسود وأبيض بجيب حاجة واحدة بس يا صورة يا صوت لكن الإتنين سوا لا يمكن
وكنا لما أوشين تبدأ
نشغل التلفزيون صورة بس
وكان عندي شريط كاسيت موسيقي كورية
نقوم نشغلو مع التلفزيون
ونطفي النور
علي الطلاق
المتعة الكنا بنلقاها
ما بتتوصف
كدي حاول إتخيل معانا المنظر والجو كأنك معانا وحاول وصف
سلاماتي

فضل كرار

Quote: يمتلئ القلب بالحب مثلما تمتلئ الزجاجة بالعطر ولكن قد يفرغ القلب من الحب مثلما تفرغ الزجاجة من العطر ولكن تبقي بالزجاجة رائحة العطر مثلما يبقي بالقلب عطر الذكريات

كلام رائع جداً وجميل
الآن بعض النساء قنبلة على هيئة قارورة عطر
وكثيراً اتمنى عندما التقي بإمراة من هذا النوع اتمنى أن تنفجر في اي لحظة
شخصياً لا أنسى أوشين
فقد أطلقته لقباً على أحد العزابة
لم ار أحداً مثله يتجرس من الميز
فقد عمل لنا { حلة } بتاعت عدس يمكن قدر البرميل
ملأها عدس لآخرها وذلك من أجل العشاء
وبقى كل يوم العشاء عدس لمدة 34 يوم
اها أنا كنت بقول ليهم أكيد { العشاء أوشين } لأنو المسلسل كان يعرض في ذلك الوقت وكانت حلقاته كثيرة جداً وكان عدسنا أكثر منه !!!
الراجل المسكين لحد الآن يطلقون عليه { أوشين }
الحيوان دا في بعض المرات بيكون كسلان من غسيل { العدة } أها بيجي متأخر وماعاوز يغسل أي صحن 00 يقوم يسخن الطبيخ واثناء الطبيخ شغال يقوم يجيب ليهو { رغيفة } ويعطنها في { الحلة } وياكل بالطريقة دي لحد العيشة ما تنتهي 00 لقد اتعبنا كثيراً في الميز الى أن فرج الله علينا وعليه ويومها فرحنا كثيراً لهذا الخبر السعيد فقد أحضر زوجته ورحل من العزابة
الآن يقطع البصل بمزاج
ويعمل الطبيخ
ويغسل العدة { صحن صحن } وملعقة ملعقة }
مرات يعزمن معاه يوم الجمعة
اها يستاذن ويقول ياجماعة 00خمسة دقائق بس أكمل عدتي وأجيكم

الأخ أبو حراز
سلاماتي

حكاية صقع ولا ما صقع ؟( بكسر القاف ) تقول
واحد من أهلنا أهل العوض جوهو سبعة ضيوف زي الساعة إتناشر بالليل
قام رحب بيهم وفرش ليهم 7 سراير وقال ليهم صقع ولا ما صقع؟ قالو ليهو صقع
قام جاب ليهم 7 قرعات موية وقال صقع ولا ما صقع؟ قالو صقع
قام جاب ليهم 7 أباريق و7 مصلايات فروة وقال صقع ولا ما صقع؟ قالو صقع والله
وبعد داك دخل جوة البيت ، أها الضيوف بي جاي قعدو يقولو والله الزول أب صقع دا أسي يقوم يصقعنا بي 7 خرفان أو 7 عتان أو علي الأقل 7 جدادات
وفضلو منتظرين ومنتظرين لما الفجر طلع وهو ما جاء مارق عليهم
صلو الصبح
بعد شوية جاهم وقال ليهم صقع ولا ما صقع؟ قالو ليهو دا صقع ولا جننتنا جن؟
قال ليهم إنتو عرب مطرطشين تجو لي زول كورجة فى نص الليل وداير تتعشو؟
سلاماتي

Quote: إنتو عرب مطرطشين تجو لي زول كورجة فى نص الليل وداير تتعشو؟

فضل كرار
اعجبني كثيراً هذا الموقف والأجمل منه هو تصرف هذا الشخص مع هؤلاء العرب المطرطشين 00 فعلاً أهل العوض يجعلوك في حيرة من أمرك 0 طبعاً يمكن الزملاء بالبورد بيفكتروا ان اهل العوض هم فقط من الجزيرة
لا 00 بل هناك أهل عوض كثيرون جداً من مختلف أنحاء السودان
وكل شخص لايتصرف حسب الأوتوكيت هو { أهل عوض بدرجة وزير } حتى لو سكن المنشية أو العمارات
أذكر أن مريضاً حضر للمستشفى بامدرمان والله حضر معه أكثر من 36 مرافق
وبعد لحظات امتلأ المستشفى بالعكاكيز
وانتظروا هذا المريض الذي سيتم قطع اصبعه
ولو كان عاوزين يقطعوا { رجلو } كان الحلة كلها اتت معه
كل أهلي الذين يسكنون الخرطوم يعانون كثيراً من هذه الظواهر
زيارات من غير مواعيد
أكل من غير مواعيد
وأجمل شيء في أهل العوض أنك حينما تسأله اتغديت ؟؟ طوالي يقول ليك لا
اتعشيت ؟؟ لا 00 فطرت ؟ لا
لدينا أحدهم لولا أنه مهندس وفي مركز ووظيفة مرموقة لترك العاصمة دون رجعة
كل أهله من أهل العوض
والمشكلة أن أمه من مكان ووالده من مكان آخر
وكذلك زوجته نفس المشكلة
والله الزوجة المغلوبة على أمرها كثيراً ماتكون حافية القدمين
تمشي تعمل القهوة لي ناس الحجاجاب يجوها ناس ودربيعة
تنتهي من ناس كاب الجداد يجوها ناس الشرق وهلم جرا
في يوم واحد كان معاهم { 41 } شخص
الغداء يستمر من الساعة 3 حتى السابعة مساء
وبعد كدا يبدأ التوصيل للعيادات
واحد وجع ضهر
وآخر وجع عيون
وهناك أوجاع أخرى لاداعي لذكرها
دا غير ناس { جاتني وردة } طبعاً بكسر الواو بت اللذين دي

وعـن اهل العـوض الحـلوين كتبت يـومـا..

قـرر مصـطفي أن يـتزوج..تقـرر أن تكـون الخـطوبة وعقـد القـران فـي شـنـدي..مـازال مـوسـم الأفـراح مسـتمر وآيـة تكـمـل 4 أشـهـر مـن عمـرهـا..
تـم دعـوة الأهـل والأصـدقـاء للسـفـر لشـندي..كمـا طلبت مـنـار..سـافر معنـا الفنـان محمـد إسـماعيل وفـرقتـه..سـافـرنا جمـيعا مـاعـدا أبي والذي كـان معهم قبـل اسـبوع.. وكـذلك مامـا عاشـة التي لاتحب الزحمـة ولا شـقـاوة السـفـر!
تحـركت البصـات فـي الصـباح والفـرح يغمـرنـا جمـيعـا..وجلسـت آية فـوق أرجـلي تنظـر للجميع بدهشـة ثـم فـجـأة تصـفق بيـدهـا وتهـز رأسـهـا علامـة الرقص..تتنـاولهـا عمـتي ثـم احـدي الجـارات وفـجـأة افقـد الأثر لـهـا فقـد وصـلت لآخـر البص!
بعـد مسـافـة ســاعتين تقـريبـا هـاجمتنا الأمـطار الغـزيرة وكـان ذلك فيضـان 1988 ..كـان مـوقف مخـيف وغـريب فـي بدايتـه..بعـد جـهـد كـبير
تمكنـا مـن الوصـول لإحـدي القـري وكـانت الميـاه كـالبحـار تحيط بكـل شـئ وتغـرق كـل شـئ!..
قـاربت السـاعـة عـلي الخـامسـة وكـان كـل الهم فـي سـاعتهـا كيف يصـل العـريس لمـواعيـد العقـد!!بالطـبع لم نكـن نـعـرف مـدي الأمطـار والضـرر الـذي سـببته فـي كـل المنـاطـق!
حـذرنـا السـائق..إذا قعـدتـو جـوه البص السـيل ممكـن يشـيلكـم بالبص.. ولـو نـزلتو الرمـال فيهـا ثعابين وعقـارب!!
وجـدنـا مسـاحـة مـن الأرض مغطـاة بالرمـال ..نـزلنـا جميعـا وجلسـنا عليـهـا وآيـة في حـضـن أمـي..ثـم بـدأ سـكـان القـريـة والتي تبـدو معـدمـة بسـبب الفقـر فـي الحـضـور لنـا لطـمئنتنـا والترحـيب بنـا ودعـوتنـا للـدخـول لمـنـازلهـم..ثـم رجـعـوا لنـا بعـد قليـل بصـوانـي الكسـرة والمـلاح واللحمـة! أخجـلونـا بكـرمـهم..كـانت هنـاك مجـاعـة عـامـة والبـلد تعيش علي الإغـاثة..الـدقيق معـدوم وثمـن الخـروف فـوق طـاقـة الأغلبيـة ومـع ذلك هـاهـم يخـرجـون مـاعنـدهـم وربمـا كـان آخـر مـاعنـدهـم..والأمـطـار قطـعـا سـتضـاعف مـن شـح المـواد التمـونيـة وعلي الرغم مـن ذلك لم يتردوا فـي اخـراج مـاعنـدهـم!

تـأكـدنـا تمـامـا أنـه لاسـبيل للحـراك..نـام بعضـنا داخـل البصـات والبعض الآخـر جلس يغـني ويسـتمع لمحـمـد إسـمـاعيل وشـاركـنـا في ذلك العـديد مـن أهـل القـرية..ثم نمنـا..لنستيقظ بعـد قليـل..لم تتـوقف الأمـطـار وعلينـا الآن أن نتصـرف..توترت أمـي لسـببين المـدعـوين ومـاقـد يصـير لهم وحـال أبـي و جـدتي فـي الخـرطـوم..نحـن منعـزليـن مـن العـالم..
تحـرك مـصـطفي.. احسـاسـه بالمسـئـوليـة كـان عـاليـا..تركـنـاه يـذهب لمـركـز الجيش هنـاك..
قـررنـا جمـيعـا أن نتحـرك فـي اتجـاهـات مخـتلفـة..نعـدي هـذه البحـار ثـم نتجـه شـمـال ونسـير فـي المياه مسـافـة وسـوف نجـد بعـد ذلك لـواري مـوصـلات تدخـل الي شـندي المـديـنة..هكـذا شـرح لنـا أحـدهـم الطـريق..
إبن عمـتي عـادل حسـن حمـاد شـاب صـغير.. ضـخم بصـورة واضـحـة حمـل آيـة فـوق كـتفـه وعنـدمـا رأيتهـا معلقـة هنـاك اطـمئن قلبي!
وصـلت الميـاه الي صـدر بعضـنـا! وفـي وسـط كـل هكذا يتسـابق نحـونـاالعـديـد مـن السـكـان باللقيمـات والشـاي وأقـداح العصـيدة مـع العـدس.. مـاكـل هـذا الكـرم? وهـذه الطـيبـة..وايثـار الغـير علي النفس?

هكـذا كـان السـودانيين فـي القـري وأطـرافـهـا فـي عـام 1988..فهـل مـازالـوا علي هـذه الطـيبة?

بتنـاليلتنـا فـي مـنزل العروسـة بعـد حـفلة اسـتمرت لسـاعـات فـي النـادي..وفـي الصـباح وبعـد الشـاي والقـهـوة..تحـركـنـا راجـعيـن للخـرطـوم..قـالوا هنـاك طـريق أفضـل.. البحـار فيه أقـل!!

اسـتمـرت الرحـلة سـاعـات ثـم قـرر سـائقـي البصـات أن نتـوقف قليلا للـراحـة..نزلنـا نستكـشف مـاحـولنـا..كـانت القـريـة صـغيرة ومـنازلهـا بعيـدة مـن بعضـهـا..حـضـر أحـد الرجـال وطـلب أن تذهب كـل النسـاء لمنزله للراحـة..ثـم أشـار الي أحـد البيـوت حـيث وقـفت زوجـته وأطـفاله..همـمنـا بالنـزول لكـن أتي صـوت مـديحـة قـائلا..يـا جمـاعـة مـاتمشـوا كـلكـم ..بالطـبع كـانت خـائفـة علي امكـانيـة الأسـرة..جـاء صـوت الرجـل أعـلي مـن صـوتهـا ..حـرم..مـافي واحـدة تقعـد هنـا!!
ذهبنـا مـعـه وعنـد وصـولنـا أخـبر زوجـته..شـفتي دي قـالت للنسـوان شـنو? ثـم أشـار لمـديحـة..قـالتلهن مـاتمشـو خايفة مـن تكـلفتنـا! ضـحكـت زوجـتة وهـي ترحـب بنـا ترحيبـا غـير متصـنع...تكـلفـة شـنو مـرحب بيكـم ياسـلام.. يأهـلا اتفضـلو أقعـدوا..ثـم اتـو لنا بالماء لغسـل الوجـوه..وكـعادتـهم أهـلي السـودانين ذبـحـوا احـدي أغنـامهم..أكـلنـا شـكرناهـم وتـوكـلنـا علي الله وتحـركـنـا..
كـانت تلك أول مـرة اسـافـر فيـها بالبر داخـل السـودان..وكـان جمـال الرحـلة يكـمـن فـي وجـود الأهـل والأحـباب..وفـي المناسـبة نفسـهـا والأهـم مـن كـل ذلك هـو طـبع آيـة الحـبـوبة فـهـي لاتبكـي الا نـادرا ولفـترة قليـلا..الجمـيع فـرح بهـا ويتسـابق علي حمـلهـا!
وصـلنـا حـوش بانقـا..وقف السـائق لشـرب الشـاي..فـجـأة تـذكـرت أن عـم أحمـد الزيـن عم والـد إبنتي يسكـن فـي تلك المـنطـقـة..سـألت أحـد الرجـال عـن مـنزل جـد ابنتي..هـو رجـل طـيب وكـثيرا مـاضحكـنـا معـا فـرصـة أسـلم عليـه مسـافـة الجمـاعة يخلصـوا شـراب الشـاي..
وقبـل ان اتحـرك مـن البص إذا بأهـل آية يأتـون جـريا لمقابلتنـا وحلفـان بأن نـذهب للمنـزل معهـم..وقـد كـان!
وفـي مـنـزل كـبير واسـع دخلنـا..وأهـل آيـة يتـوافـدون علينا للسـلام والتهنئـة بالسـلامـة مـن الامـطار والطـريق وعقـد قـران مصـطفي..
تـم تـوزيعنـا علي حـوشين واحـد للرجـال والآخـر للنسـاء..وكـذلك علـي الحمـامـات!
عنـدمـا انتهينـا مـن الحمـام وجـدنـا الحـوش مليـان سـراير وعنـاقـريب والدهـان والأريـاح علي طـربيزات تنتظـر اسـتعمـالنـا لهـا!
آيـة نـامت بـعد الحمـام والرضـاعـة والتنفل يـن أذرع أهـلهـا..الحمـد لله نسـتطـيع أن نسـافـر الآن ..تسـافـروا وين عمـك أحمـد حلف طـلاق نبيت هنـا..ثـم جـاء صـوت زوجـة عم أحمـد..اليـلة ترتـاحـوا مـعـانـا..ممكـن تسـافـروا بكـرة مـن الفجـريـة.. وبينمـا هـي مستغرقـة فـي الحلفـان تـوافـدت النسـاء للحضـور للسـلام وكـل منهـن تحمـل صـينية كـسرة كبيرة..ذبح عـم أحمـد لنـا عجـل احتفالا بوجـودنـا!

سـمعت شـخـيرا يأتي مـن أنحـاء الحـوش المخـتلفـة..رقـدت بجـانب ابنتي وضـممت رأسـهـا الصـغير الي صـدري..جـريت طـرف الملايةعلي جسـدي..ونمـت!
يا جمـاعـة قـومـوا العشـا جـاهـز..وبأعـين نصـف مغمـضـة تحـركـنا مـن سـرايرنـا..واذا بنـا نسـمع..أصـوات الغنـا ومحمـد اسمـاعيل يغـتي للرجـال مـع المـوسـيقي ..بختهم عنـدهم طـاقـة غير عادية!

اشكـركـم وتشـكـركـم آيـة علي تهنئتكـم المفـرحـة..

وشـكـري المتـأخـر أيضـا لكـل أهـل شـنـدي..وأهلنـا فـي كـل القـري
التي إهتمـت بنـا وأطـعمتنـا وسـاعدت بكـل الطـرق لأن تسـهـل لنـا رحلتنـا..أمـا عم أحمـد الزيـن..فلك ولأسـرتك وجـيرانـك كـل الـحب مـني ومـن آية

ارجـو ان لا تضـايقك طـول الصـفحـة المنقـولة مـن

اليوم حـبيبتي آيـة بلغت السـابعة عشـر

Muna

الأستاذة مني
السلام عليكم
والله شعرت بخجل من إستهزائنا بأهلنا أهل العوض
لأنهم دي طبيعتهم القاموا عليها ودي تعاملوهم العادي فى الريف
ونحن لو مشينا ليهم فى قراهم ما بقصروا معانا تب
وهم بتوقعوا إنو نحن نعاملهم بالمثل عندما ياتوا للمدينة
لكن
المدينة وما أدراك ما المدينة
دي سلبت مننا كل حاجة جميلة
حتي إنسانيتنا
وبقينا حاجة تانية
وحوش الكبير يأكل الصغير
نسأل الله العافية
وأن يستمر أهل العوض علي ما هم عليه
لأنهم الخير والبركة
ولك الإحترام

طـبعا احنـا كـلنا بنتريق ونضـحك علي اي زول مـامـن المـدن..وانـا زيك لكـن بنعمـل كـدة ومـافي وعينـا الا فكـرة التفـوق بسبب ما مكنتنا منه المـدنية وحـرمتهم مـنه...
وطـبعا بنفس المستوي أهـل العـوض برضـه بيضـحكـوا علينـا سـاعات..
وياويلك لـو قعـدت براك معاهم وهم زعـلانين منك في حـاجـة! رقتهم وكـرمهم ده كـوم..والبيقـولو كـوم براهـو..واهـل العـوض بيكـونوا عارفـين تمـام انـا قاصـدة شـنو..
عشـان كـدةtake it easy

لك التـحايا الجميلة أخـي الاسـتاذ فضـل كـرار



مـني

تعرفي يامنى
عندما نكون في الخرطوم يقولون لنا أنتم كرماء جداً
لكن بس مشكلتكم بتزورونا في أوقات غير مناسبة
طبعاً عندنا واحد ولده تزوةج في الخرطوم
مشى سجل ليهو زيارة
طبعاً كان متزوج موظفة تعمل في مركز مرموق
وعمك { أهل العوض } زارهم في البيت
طبعاً كان مستغرب جداً في الشاي
حليب في كأس + ملعقة + براد شاي سادة + كبابي + شاي ظروف
طبعاماقعد ولا يوم
تعرفي ليه ؟ لأنو كان بيشرب الحليب بالجردل
أما بالنسبة للكرم فهذا موضوع آخر
جدنا لايترك لنا { كسرة } بالمنزل
خاصة يوم السوق
لدرجة ان والدتنا كانت تغدينا من الساعة 11 صباحاً
فلو حضر فإنه يقضي على الأخضر واليابس

وأهل العوض غير الكرم الشديد عندهم فراسة
وذكاء فطري لا حد له
كان عندي جد الله يرحمو ويغفر ليهو
كان همباتي عديل كدا
وكريم كرم وسكرجي درجة أولي
والسكر ( بفتح السين والكاف ) زمان كان رجالة
وكان مصاحب المرحوم يوسف نور الدائم والد الشيخ الجليل الحبر
يوم جدي واقف لمبة وماشي علي خلوة الشيخ يوسف
وهم كانوا واقفين لصلاة المغرب والشيخ يوسف إمامهم ودخلوا فى الصلاة
جاء جدي جرا عنقريب جمبهم وقعد فيهو يبرم في شنبو
وقال بصوت عالي : هسع ح يقرأ ( إذا زلزلت )
الشيخ يوسف من الضحك لمن قطع الصلاة وجاء قال ليهو والله يا الأمين ( إسم جدي ) كنت ح أقراها بس إنتي عرفت كيف؟
قال ليهو عشان فيها ( ومن يعمل مثقال ذرة شراً يره ) وطبعاً إنت ح تقصدني بيها عشان سكران وما قاعد أصلي.
الله يرحمك ويفغر ليك يا جدي

فضل كرار
السودان بلد سياحي وجميل جداً
لكن دائماً أقول لأصدقائي أن السياحة في السودان لن تنجح
هذا بالطبع ليس لعدم وجود مقومات
ولكن نسبة لهذا الكرم الذي يفوق حد { العوارة }
السائح يدخل الى بلدنا بالف دولار فقط
ويرجع لبلده بعشرة الف دولار
كل ما مر على قرية { جخ } ضبحوا له خروف الضحية وغنماية اللبن
حتى وزير السياحة عندنا يستضيف السياح في منزله عدة ايام
وعندما يمروا على البجراوية والمناطق الأثرية يتكالب الناس على خدمتهم
يبيتون عند هذا
ويتعشون عند ذاك
اما اذا دخل سوق أم درمان
فإنه ياخذ التماسيح والجلود والثعالب 00 كل ذلك مجانا مع ابتسامة ساحرة
أذكر أن أسرة استضافت سايحاً عندها لأكثر من شهر
بل أن أقاربهم كانوا يعزمونه يومياً
والرجل اصر على أن يشتري خروفاً لكل منزل استضافه
واحتج الجميع قائلين أن هذا ليس من شيم السودانيين
لكنه اصر رغم كل هذا
ذهب لسوق المويلح واشترى عشرة خرفان
وعندما اراد دفع المبلغ
قال له صاحب المواشي : والله مادام انت ضيف عندنا
علي { بالحرام } ماتدفع ولا مليم 00 شوف العوارة دي كيف ؟؟
قال سياحة قال !!!

صـباحكـم خـير

وطـبعا في قصـة عـن اهـل العـوض لازم احكيها ..
كـنـا نسكـن في شـقة تقـع في الطـابق الثـاني في عمارة مكـونة مـن أربـعة طـوابق ..
جـائتني حـاجـة (....) الطـيبة لتقضـي ايام معنـا..كـان لهـا قـريب يسـكـن في الطـابق الأرضـي تعـودت ان تنزل له بمسـاعـدتي باسـتمرار..
استيقظـت حـاجة (.....) التي تتـوه في مترين لـو كـانت بمفردهـا واسـتعـدت للخـروج..

علي وين ياحـاجـة?
نـازلة اسلم علي وليـدات (...)
طـيب انتظـري اوصـلك!
لالا عنـدك شـغل اقعـدي خـلصيه ..
خـلاص كـويس ..اعملي حسابك وانتي نـازلة السلم..

بعـد فـترة فتحت الباب لأن لغرض مـا..واذا بي اجـد حـاجـة (....)
نـازلة السلالم مـن الطـابق الأعـلي وعلي وجـهها عـلامـات حـيرة شـديدة..

الله كـنتي عنـد منـو فـوق?
اظـني رحت..انـا نـازلة للوليـدات!

كـان النزول والصـعـود عنـد الحاجـة له نفس الشبه مـادام علي سـلالم!



مـني

الأخ أبوحراز
الأستاذة مني خوجلي
السلام عليكم
أدعوكم للإطلاع علي بوست لي بعنوان ( أين ذلك الفتي المحروم؟ )
وقد قمت برفعه خصيصاً من أجلكما
مع مودتي

ويين كنت يا راجل؟

ابو حراز ،أمدرمان ، دنقلا ، حلفا وبالعكس

زمان كانوا بكتبوا فى اللوارى كدة

ترهاقا
ياحليل ايام زمان
ايام كانت اللواري تمثل الكثير بالنسبة لأهل السودان
طبعاً الآن اصبحوا يكتبوا فيها { الله أكبر القدييييييييييييمة }

مكرر

Quote: يا زول إنت جنَّك أبَّهات كدي مالك.. رايح ليك شافع ولا شنو؟ ياخي نحنا إتعودنا أول ما نلقى (أبو حراز) أو (بدر الدين شنا) أو (صديق الموج) أو (تماضر "الله يطرها بالخير") في بوست بندخل طوالي متأكدين حا نلقى نكتة ولا تعليق ظريف.. أنا هسة الضحك الأنا ضحكتو في مداخلاتكم الأخيرة دي إنت وبدر الدين لو دفعتوني عليهو قروش كان ِغنيتوا قال أهل العوض قال

محمد السر كتر خيرك ختيتنى مع الناس الكبار ديل وانا اقبل ذلك من باب التشيه بالرجال

فلاح...وبعدين يا ابو حراز انا لقيت ابو حراز للتقبيل جيت اجرى وقلت الزول الشين

ده الليلة اقبله والثم جضمه العطرى حتى يتورم اكثر...القاها للتقبيل على الطريقة

الخليجية..فقد خاب ظنى ان ابوسك على الطريقة الاسلامية ولكن فعلا انت للتقبيل لانك

تستحق التقبيل على طريقتنا..فالكتابة عندك لها صوت يغطس الى الاعماق,,اقبلك

كثيرا ولك الود..وحكاية تغير لود ربيعة من ابو حراز تذكرنى قصة لخالنا وهو

يتضايق من السفر لحلتنا وهى قريةالصلوعاب غرب شندى يعنى بعد تصل شندى تعبر

النيل الى الضفة الاخرى فى بنطون يجاورك حمار ويعلوك عمبلوق وخلفك عبور

وهو بنطون تختلط فيه رائحة السعوط بالبصاق برائحة الجداد برائحة المعيز والحمير

والقش والودك والقطران وروائح اخرى اعطرها رائحة عرق واحد من اهلنا مخلوط برائحة

عراقى دمورية جديد ..المهم ذهب مرة لقرية اخرى يعتقد اهلها انها احسن حالا من

قريتنا..ولا تختلف عن قريتنا الا فى الاسم والحال من بعضه ويعانون البنطون الذى ذكرت

وعندما رجع من تلك القرية سالناه ايهم احسن القرية المذكورة ام حلتنا الصلوعاب

فقال على الطلاق (خرة وقسموه النص) تسلم ابوحراز سواء ان غيرت ام لم سوف نقبلك

ونبوسك عديل فانت حقيق بقبلنا،،،،

أضحكتني كثيراً ياصديق الموج
والله كل فن السخرية تجسد اليوم عند جدك هذا
وأجدادنا جميعهم كانوا يمتازون بهذا النوع من السخرية
قلت لي الحكاية كلها طلعت سوق ام دفسو !!!
وهذا يذكرني بالسياسي البارع الذي سالوه
ما الفرق بين حزب المؤتمر الشعبي والمؤتمر الوطني ؟؟
فقال كالفرق بين الباذنجان والأسود !!
أشكرك كثيراً على هذا الإطراء 00
وانا برضو استغربت كيف يضعونني مع بدر الدين شنا وتماضر شيخ الدين 00
هؤلاء نحن تلاميذهم
ونتمنى أن نسير على خطاهم 00
فإن أردت أن تمتليء بالدهشة فأقرأ ماتيسر لك من أحرف تماضر
وأنظر فقط الى بدر الدين 00 يالهم من مبدعين 0
لدينا قريبنا توفت زوجته
وبعدها قامت النار فيه 00 كل يوم يقول عاوز يتزوج
أها 00 يسكن هو في قرية مجاورة
طبعاً عمك أي واحدة تتزوجه لابد أن تتعلم غسل الجنازة قبل ماتتزوجه
لأنه في رمقه الأخير
بدينا ليهو بالنسوان الأرامل من عمر 55 فما فوق
المهم كل واحدة نمشي ليها تقول عاوزة تشوفه
أول ماتشوفه تقوم تقول عاوزة اقرا
مافضل لينا بعد كدا الا حاجة بتول
ودي ما اتزوجت نهائي وعمرها فوق الخمسين
وصاحبك بيعرفها حق المعرفة
قلنا اها 00ياعمو 00 رايك شنو في حاجة بتول ؟؟
قام قال :
والله زي الحاجات المطفقة ومصرصرة دي عندنا في حلتنا هناك كتييييييييييييييرة !!!
شوف ابن الذين باقي ليهو يومين وعاوز يتزوج اليسا !!!
قال مصرصرة قال !!!

سلام يا ابحراز

انت ياكا ابوحراز بتاع الكوريق وحاسب على الدماغ يا عم ? ههههه

انا ماش ارفع البوست المعني اهلنا شكلهم نسوا نصر السوداني ابو ريحه سمحه

saadeldin abdelrahman

Quote: انت ياكا ابوحراز بتاع الكوريق وحاسب على الدماغ يا عم ? ههههه

اها انا بتاع الكوريق
الله يجازيك رجعتنا لأيام الجاهلية
ما أجملها من ايام 00 الجماعة طبعاً بدل مايحجزونا
قال حاسب على الدماغ قال
يعني ممكن تضرب في أي مكان الا الدماغ
لكن العوارة دي لقينا في عوارة أصعب منها
لدينا جدود أثنين اتشاكلوا في موية الحواشات بالجزيرة
أها واحد قال لأخوه
علي بالطلاق أغمد عيني ديل وأطقك بالكوريك دا طقة واحدة تاني ماتقوم
التاني قال ليهو : علي بالطلاق تغمد عينيك تاني ماتفتحن
يعني حا يهرسو قبل ما يفتح عيونه
ويبدو أنه يمشي على طريقة هيفاء وهبي { مش حاتغمض عينيك }
أو أنه يذهب أبعد من ذلك على طريقة آصف بن برخيان عندما قال للنبي سليمان
سآتيك به قبل أن يرتد اليك بصرك
وكان يقصد عرش بلقيس ملكة سبا

لووووووووووووووووووول

الله يرحمهم حيين وميتين

والله 00 فعلاً نتمنى الله يرحمهم
لكن بصراحة فكونا في الهوا ساااااااااااااااكت
لاعمارات ولابيوت ولا اراضي ولا قروش
بس فصاحة لسان

هههه يعني ما عايز تترحم عليهم عشان ما سابو حاجه?

لوووول

يا ابحراز انت كوريقك ده جادعو وين
البوست غلبني القاهو
الكتبو منو?

كان لقيتو ولا عارف الكتبو منو الفانا

البوست الله يرحمه
ذهب مع الريح كما يقولون
طبعاً أكيد ذهب الى الارشيف
ومن الصعوبة الحصول عليه
طبعاً أنا مفروض تكون لدي مكتبة بسودانيز أونلاين
لكن المكتبة عاوزة قروش
اها بناشد بكري يعمل مكتبة عشان الكواريك دي الواحد يلقاها بسهولة
لكن عاوزها بالتقسيط
لأنو الراتب يادوب يكفي ست النفر ومن شايعها
لأنو الخشوم كلها هناك مفتوحة في السودان
بكري عووووووووووووووووك 00 اعمل مكتبتي دي عليك الله
بعدين عفصني في رجلي يوم احتفال سودانيز أونلاين بالخرطوم
غايتو حقارة ماعادية
عليك أمان الله ولا معليش ماقالها
اها انا عفيتك بس المكتبه ماتنساها

أبو حراز
نكورك ليكم ما تجو
نجيكم تكوركو

أنا راجيك فى بوست ( أين ذلك الفتي المحروم؟ )

اخي فضل كرار
دخلت على البوست وأعجبني جداً
وتألمت كثيراً عندما قرأت مداخلة الأستاذة منى
اعتصرني الألم من ذلك الطفل في شرق السودان الحبيب
ذلك الطفل البريء الذي لم ير { قطعة جبنة } في حياته
سأعود الى البوست
وتأخري ناتج عن ظروف سفر داخل المملكة

يعني يا ابحراز

لا عمارات لا بيوت
ولا بوست

ناااان الحواشات دي طارت وين !!

saadeldin abdelrahman
قال حواشات قال
هذه الحواشات يا أخي تسببت كثيراً في تعطيل اهالي الجزيرة
صدقني هذه حقيقة
ولا أدري هل التعطيل منها أم من أجدادنا
لكن أحمل عليها كثيرا في ذلك
سابقاً في بداية السبعينات والثمانينات كثيرون منا يريدون أن يذهبوا الخرطوم
اها تقوم تقول ليهم انا مسافر الخرطوم
جدك يقول ليك لشنو ؟يمتعض منك وكأنك ذاهب الى اسرائيل
تقول ياجدي عاوز اشتغل
طوالي يقول ليك انت مطرطش
المخزن مليان عيش
ومليان قمح
ومليان دقيق
ومليان بصل !!!!
ماشي تسوي شنو في الخرطوم؟؟
وياويلك لو قلت تبيع الحواشة بت الذين دي وتشتري ارض في الخرطوم
هنا كأنك خرجت عن الدين الاسلامي
وتصبح مادة للسخرية عند هؤلاء العواجيز
وينعتوك بابشع الصفات
لدينا قريبنا باع الحواشة واشترى ارض بالدروشاب
صدقني لم يتبق لهم الا أن يخصصوا له خطبة الجمعة
لكنه { فلت } منهم
الآن لو باع بيته فإن سعره يشتري نصف مشروع الجزيرة
قال نزرع قطنا قال

Quote: لدينا قريبنا باع الحواشة واشترى ارض بالدروشاب صدقني لم يتبق لهم الا أن يخصصوا له خطبة الجمعة لكنه { فلت } منهم الآن لو باع بيته فإن سعره يشتري نصف مشروع الجزيرة

هههه

ابحراز مع اني بميل للحتة الإتربيت فيها لكن هجرتي دي ما خلت
لينا خشم نناضم بيهو ومعاك في حرية الحركة والتنقل. بس لو كلو
زول باع واشترى في البندر ده.. جزيرة الخير دي بقعد فيها منو..وجدودنا
زمان وصونا.

saadeldin abdelrahman

لك التحية
سأعود للرد عليك

saadeldin abdelrahman
بالطبع أنا ليس من المؤيدين لفكرة الهجرة من الريف
فكثيراً ما يفقد الريفي بعض قيمه عندما يهاجر هناك
ولكن في الوقت نفسه يكتسب صفات كثيرة
وخبرة ومهارات ويختلط بشتى أنواع الثقافات
وهذا يحتم على حكوماتنا أن تعني بالريف
الآن أوشكت الخرطوم أن تلامس كردفان ودنقلا
وهناك امتداد غير طبيعي
ان توزيع الثروة والتنمية على كل اقاليم السودان
يكفي سكان الخرطوم شر هذا الزحف الغريب
يعني لايعقل ابداً أن تسودن الخرطوم
على المسئولين وضع خارطة موجهة للتنمية والاستثمار في بلادي
الاحظ أن الغربيين يحبذون السكن في الريف
لأنك تجد كل شيء
الآن بعض قرانا لاتجد فيها سوى الداية التي تقوم بتوليد النساء
وحتى هذه تجد مقصاتها قد أكل عليها الدهر وشرب
ذهبت مرة لإحدى القرى لفت نظري شيئين
لايوجد لديهما راديو
ولا مكواة لكي الملابس
كل القرية هكذا
قلت لهم كيف تفطرون في رمضان ؟؟
فقالوا : عندما يصعد الدجاج لينام في الرواكيب !!!!
يعني لا اتصور الموقف لو أن هذا الدجاج قد اصابته انفلونزا الطيور
أو كان مزاجه غير رايق ؟؟؟
قال توزيع الثروة قال !!!!

Quote: قلت لهم كيف تفطرون في رمضان ؟؟ فقالوا : عندما يصعد الدجاج لينام في الرواكيب !!!!

ابحراز اخوي

شكرا على الحوار الهادف
ونسأل الله السلامة

يعني الجداد كان قال كدي وابا الـصعدة

الشغلانة تبقا صوم وصال ولا كيف!!

اما المعدات الطبية والعناية الصحية

دي موضوع بحتاج كورس كااامل من حبوب الضغط لنطرقه

خصوصا بعد الحمى النزفية والتي برهنت أن الواقع الصحي المعاش يعود للتمانينات وما قبلها.

لا مسااااااس!!!

saadeldin abdelrahman
آسف جداً لتأخير الرد وذلك لانشغالي كثيرا
وكذلك فتحت لي جبهة أخرى وهي بوست آخر
البوست الذي يتحدث عن ظاهرة العنصرية البغيضة
سوف أأتيك لمناقشة بعض القضايا خاصة هذه الحمى النزفية
يوم امس استمتعت للدكتورة تابيتا بطرس
كلامها وحديثها مطمئن
حيث وصلت الأمصال واللقاحات
واتمنى أن لاتباع في السوق السوداء
وأن تتم عليها رقابة شديدة حتى تصل للمحتاجين اليها
واتمنى ان نقف جميعاً مع اخواننا في كادقلي وغرب السودان عموما
حتى نستأصل هذا المرض اللعين
وعلى السلطات والمسئولين أن لايتقاعسوا في مثل هذه الأمراض والأوبئة
بحيث لايتم التكتم عليها حتى تستفحل