يا محبى كرة القدم - الما شاف هدف رونالدينو أمس تانى ما يشوف أى كورة

فى الدقيقة 83 من مباراة المرحلة 12 من الدورى الإسبانى، بين فريق السحر والإبداع الفريد برشلونة، متصدر الدورى، وفريق فياريال وترتيبه التاسع فى الدورى
إنتقلت الكرة من أقدام لاعبى خط وسط برشلونة لتصل إلى المهاجم "إيزيكويرو" بديل اللاعب الايسلندى "جوديونسن"، سدد إيزيكويرو تجاه المرمى وصدت الكرة وعادت إليه مجددا وهو فى مقدمة خط 18، مررها بدوره إلى لاعب الوسط الموهوب "زافى" والذى قام بدوره برفع الكرة صوب جهة اليمين أمام مرمى فياريال حيث كان الساحر المدهش الخلاق "رونالدينو" يربض فى منتصف خط 18 والمرمى إلى يساره
تلقى رونالدينو كرة زافى بصدره وهو فى نفس المكان، ثم التف يمينا بمقدار 180 درجة والكرة معلقة فى الهواء ليستقبلها بعد أن اصبح المرمى على يمينه تقريبا هذه المرة وهو فى وضع شبه جالس ثم ليرسل الكرة بيمناه فى والى الجهة الخلفية من جسمه لتسكن فى سقف مرمى فياريال على يسار حارس المرمى

لم يكن أى إنسان فى الملعب أو خلف شاشات المشاهدة يتوقع ما قام به هذا الكائن العجيب الذى يسمى رونالدينو، وأنا شخصيا أظن أنه كان يطبق طريقة أو نظرية خاصة به ومن إبتكاراته التى لا تنتهى، وقد اندهش كل من كان موجودا داخل الملعب ، لاعبون ومشاهدون من ردة فعل رونالدينو وطريقة تعامله مع الكرة

أعتقد أن أوساط ومحبى ونقاد وحتى لاعبى كرة القدم وفى كل العالم، سوف يتحدثون طويلا عن هذا الهدف الفريد حقا

أتمنى أن يشاهد كل من يستمتع بفنون كرة القدم هذا الهدف الفريد، وهو الرابع فى نتيجة المباراة، بعد أن أحرز رونالدينو فاتحة أهداف برشلونة فى الربع الأخير من الحصة الأولى

هكذا يمكن أن نسمى كرة القدم فنا وإبداعا وخلقا، وهكذا يكون المتفردون الموهوبون، وها هو رونالدينو يكرس وبشدة مفهوم أن كرة القدم تلعب العقل لا بالقدمين

حتما وبالتأكيد، لن أكون قد نقلت ذلك الإدهاش حسبما تم وبالطريقة التى حدث بها، فليس من رأى وشاهد كمن سمع، سوف تعاد المباراة فى مساء يوم الإثنين غدا غالبا، بل ربما يصبح ذلك الهدف ايقونة تعلق فى أى شاشة مشاهدة حول العالم، وأتمنى أن يشاهده محبو كرة القدم ليروا بأعينهم شيئا يشبه الإعجاز

هذا نوع من الخَلق الإنسانى البديع، هو نوع من إبداعات البشر حين يمتلكون الموهبة العالية وحين يصقلونها بما يجب وما هو مطلوب وبالطريقة السليمة الصحيحة

لذا فهى شئ جدير بالإحتفاء والتأمل والإعجاب

وكرة القدم حين تصبح بهذا الرقى وهذا الإبداع، تتبوأ بالفعل مكانتها بين اسمى وأرقى الفنون البشرية

يلا يا شباب...اهل الفيديو...خسمتكم بي الله كان ما جبتوه هنا

معليش يا نِزار حسين

إكتشفت إنه العنوان بيدى إيحاء بإنه فى شى Visual
فى الموضوع ممكن الزول يشوفه

المشكلة إنه أنا زول أمى فى أمور التقنية دى

لكين أقول ليك شى

لو بتشوف الجزيرة الرياضية، شوف أى نشرة أخبار فيها وأكيد حتشوف الهدف وبقية الأهداف كمان

حاجة ما عادية أبدا

هندا الفيديو

مجنون دا ما نصيح

رونالدينهو

ياروعتك يالساحر

تعرف يا كييقا

الزول يا يشوف كورة زى دى يا كمان ما يشوف أى حاجة

ولا شنو بالله

شكرا يا ماجد يا مبدع

بالله هسه إنت ذاتك مش زى رونالدينيو العجيب

وفعلا والله زى ما قلت إنت يا ماجد

الزول ده ما نصيح تب

ريحتنى الله يريحك دنيا وآخرة ياخى

ممكن بعد كده يا نزار تستمتع بالإعجاز الكروى الساحر

يا اخوانابرضو ما شوفنا الهدف عبر اللنك الموجود
افيدونا افادكم الله

ودي واحترامي
ناصر موسى

تحياتى يا ناصر

الرابط بشتغل على ال RealPlayer

جاول مرة تانية

ولو ما اشتغل أخونا أيمن جبارة برضو نفحنا بهدية جميلة

يا ريت تشوف وتستمتع

يا مطر ..
وينك ياخ ما ظاهر ..

وصفك لهذا الهدف لوحدة ابداع ..
يا ليت هذا الهدف يعيد للفتي الأسمر بريقه ونجوميته ..
فمنذ كأس العالم ومستواه في تراجع ..

ليك علي ألبد ليك قدام التليفزيون عشان أجيب ليك اللقطة دي ..

إزيك يا معتصم

يا ملك النقط نقط نقط

كيف بالله

إنت ما عرفنى أنا عيان ياخ

"العيا" ده إلا الزول يموت ولا شنو

يعنى الواحد إلا يغنى ليكم

فى الطيف أو فى الصحيان زورنى

أوع يكون ما شفت الكورة دى بس؟

بعدين الهدف أهو أخونا ماجد حسون برانا بيهو
الله يديهو العافية والسعادة

أمنية:

إن شاء الله يا معتصم يكون فى مباراة بين برشلونة ونجوم القلقالة

ورونالدينو ده يلم فيك

ياخى على الأقل يروح ليك "الفلايت المزمنة" دى

مشكور يا ايمن على الهدية السمحة

يا جكسا كيفك ..
انت لسه متوعك ما قلنا ليك أعمل بالوصية ..

Quote: أمنية: إن شاء الله يا معتصم يكون فى مباراة بين برشلونة ونجوم القلقالة ورونالدينو ده يلم فيك ياخى على الأقل يروح ليك "الفلايت المزمنة" دى

تعرف يا مان الفرق بينا وبين الناس دي الفكر العالي في التعامل مع الكرة والتوقيت المناسب لحظة الاستلام والتمرير ..
والإحتراف والتفرق التام لأجل الكرة ..
كده شوف الزول دا طلع من المدافعين لحظة تمرير الكره ليهو وتعامله بعين الفنان معها كيف ..
وهنا بعيب على الدفاع عدم تغطيته للاعب زي رونالدينو يعرف كيف يحرز الأهداف وفي أي زمن من عمر المباراة ..

قطع شك لو كنت واقف في محل المدافع الكاشف صاحبي دا كان (طقيته) ليك جبت خبره ..
هكذا نتعامل مع الخصم ..
قبل كم يوم كنا بنتناقش في حال كرتنا وسبب تدهورها يعني انت لما تجي داخل مباراة كأنك داخل معركة مسألة حياة أو موت والخطط دي بنرميها هناااااااك محل قامت بينا الحافلة ..
دا غير جيش الإداريين العاملين فيها مدربين والباقي معروف ..
الله يعينا بس يا حبيب ونشوف أولادنا محترفين في برشلونة وأرسينال وهلمجرا ..

خليك متابع الدوري الاوروبي كله وأستمتع ..

والله يا اباذر اخجلتا تواضعى

انا من المتيمين بى برشلونة ولمن جا الود العجيب ده اتهبلتا عديل

نقدر نقول انو 70% مارادونا

العفو يا ماجد ياخى

إنت فاكر الشى السويتو ده هين ولا شنو

أنا برضو من عشاق برشلونة

من ايام مارادونا وخريستو استويشكوف البلغارى ومرورا بريفالدو ورماريو وكلويفرت وكوكو

قربت أقول ليك من ايام يوهان كرويف

بعدين شنو حكاية 70% من مارادونا

على بالإيمان رونالدينو أعظم لاعب كرة قدم منذ خلق آدم عليه السلام

ولو جا لاعب أحسن منه، إلا غايتو يكون جان وما أظن يكون بشر

شكرا ليك تانى يا حلو

الله الله الله الله الله الله الله الله الله الله

هذا سحر هذا سحر وهذا ساحر هذا ساحر

البرازيل عملاقة كرة القدم طول الدهور
ولن تتنازل عن عرشها رغم شعبطة واجتهادالطليان
والألمان والأرجنتين وفرنسا انها البرازيـــــــــــل يا رفاق
وانه رونالدينو ..

الله يخليك يا ابوذر ..


يااااااااااااااخي الود ده (كــكو عديل كده)
لا حول ولا قوة الا بالله .. ياخي ده مجنون ..

اوه اوه اوه اوه اوه ونحن برضو معاك يا يوسف سيف ..
وعطنا اياها عطنا اياها

واليعملو رونالدينو اجمل اجمل اجمل اجمل

نحن نشوف ســــــــــــــــــــــــــــــــــــحـــــر

كيفك يا جمرى

يا زول طليان شنو وارجنتينيين شنو

البرازيل دى حاجة غير عادية ومافى زيها أبدا ولا حيجى

هسه عمك دونجا جهز فريق بس اديهم كم سنة كده وشوف حيعملو ليك شنو فى العالمين

شفت يوسف سيف بقى يكورك كيف

ولا ريكارد، على بالإيمان آمن عديل كده بالكورة وأكيد عمره كله لاعب أو مدرب ما بكون شاف جنس عمايل الود ده

[U]قووووون يخلي الواحد يرجع يتابع الكورة من جديد

مشكورين علي هذا الهدف البديع

بالله برضو تاني تقولوا لي هلال مريخ ؟؟؟

وكلتشي وايداهو!!!!!!! محترفين !!!!


سيظل هذا الهدف الصاقعة يدرس للأجيال القادمة لعشرات السنوات ..



قووووووووووووووووون عجيب !!!!!

تحياتى يا اباعثمان وكيف الحال

Quote: قووووون يخلي الواحد يرجع يتابع الكورة من جديد

ده الكنت أنا عايز أقوله والله

من زمن طويل والواحد كفر عديل كده بالكورة، اللهم إلا شوية إشراقات هنا وهناك

لكين برشلونة ورونالدينو وإيتو وديكو وبقية العباقرة، خلقو معنى جديد لكرة القدم
وأجبرونا نرجع تانى نتابع ونهتم

وزى ما قلت إنت الهدف ده ما حينتهى كده، وأكيد ليهو ما بعده

هدف أكثر من رائع ذكرني قون عبد الحميد السعودي

تسلم ياحباره

والله يا محمد فرح لو عبد الحميد السعودى جاب هدف زى ده يكون برضو زول ما عادى

وبالمناسبة دى السعودى ده فى ياتو فريق لأنه الواحد ليهو عقود طويلة ما متابع كورة السودان

Quote: وبالمناسبة دى السعودى ده فى ياتو فريق لأنه الواحد ليهو عقود طويلة ما متابع كورة السودان

السعودي من أفضل المواهب السودانيه الحديثه وهو نجم هجوم المريخ العريق....
وده الرابط بتاع الموقع بتاع نادي المريخ خش وشوف أحمل الأهداف حتستمتع
********http://www.almerrikh.com/*******

شكرا يا محمد فرح على رابط المريخ

الشى المؤسف فعلا هو إبتعادنا عن البلد وتفاصيل الرياضة فيها ومن ضمنها كرة القدم

وبينى وبينك حتى لما كنا بتابع ومهتمين، ناس كورتنا "قهمونا" وسدو نفسنا بالآوت بت الضعيف والمخجل فى بعض الأحيان، عشان كده الواحد نفر منها تماما

نأمل إنه ربنا يحسن الأحوال كلها ونرجع تانى نشوف لاعبين مبدعين

Quote: وبالمناسبة دى السعودى ده فى ياتو فريق لأنه الواحد ليهو عقود طويلة ما متابع كورة السودان

السعودي من أفضل المواهب السودانيه الحديثه وهو نجم هجوم المريخ العريق....
وده الرابط بتاع الموقع بتاع نادي المريخ خش وشوف أحمل الأهداف حتستمتع
********http://www.almerrikh.com/*******

هدف عادي ساي ،، ماشوفتو هدف زين الدين زيدان في نهائ كاس اوربا 2001 في ليفركزن؟

متعصبين كتلونيين ليس الا


وكما اوفسايت

والله يا عبد اللطيف ما هدف عادى

تعرف الإعجاز أساسا وين؟

اما رونالدينو إستلم الكورة وثبتها بجسمه، أى لاعب عادى كان رد فعله إنه يصوب مباشرة تجاه المرمى

الحارس منتبه ورونالدينو فى لحظة تثبيت الكورة كان فى اتنين من دفاع فياريال بقو حوله

عشان كده رد الفعل الغير عادى حصل لما لف جسمه والمدافع الجنبو بقى مشلول تماما وما حيقدر يتصرف أى تصرف، والحارس بعد داك إلا يخمن بس الزول ده حيعمل شنو، لأنه بقى ما عارف رونالدينو حيعمل إيه

وزيدان معلم كبير وكبير جدا مافى شك، لكين رونالدينو حيظل فلتة ونكهة ما عادية فى عالم الكورة

الحارس لرونالدينو :-
ما بدورلو مسوح ظلمك باااين
جافيت النوم زمني الخااااين

ديشاااااااك!!
الحارس ده بدورلو مسوح

اباذر

Quote: تلقى رونالدينو كرة زافى بصدره وهو فى نفس المكان، ثم التف يمينا بمقدار 180 درجة والكرة معلقة فى الهواء ليستقبلها بعد أن اصبح المرمى على يمينه تقريبا هذه المرة وهو فى وضع شبه جالس ثم ليرسل الكرة بيمناه فى والى الجهة الخلفية من جسمه لتسكن فى سقف مرمى فياريال على يسار حارس المرمى

وصفك براهو قون
تسلم و الف لا بأس عليك.

Quote: الحارس ده بدورلو مسوح

صاح والله يا سعد الدين

تعرف الحارس مشكلته إنه بعد ما رونالدينو عمل الحركة الجهنمية دى

المسكين راسه ضرب تماما وتلقاهو إحتار وقال يا ربى الزول المسلط ده ناوى على شنو

اها بعد ما شاف الكورة ماشه عليهو قام نط وكقرب يكسر ضهره

شكرا ليك يا سعد

الغالي أخوي ابوذر
سلامي وإحترامي وإشتياقي

ربي يمتعك بالصحة زي ما متعتنا
وحقيقة لأنك فنان حرَّك فيك هذا الهدف أشياء فأنت رونالدينو الحرف والمتعة

على الموعد

بدر التمام الحبيب

كيف الأحوال وأريت حالك زين

سحر الجمال والإبداع الإنسانى يا بدرنا تلقاهو فى كل محل وكل مجال

الإنسان كائن مبدع بطبعه، بس كيف يعرف ويقدر يطلع الإبداع الجواهو

وموعدنا اللقيا والمحبة يا جميل

أبوذر بابكر

شكرا على الوصف الاثارة.

و الهدف جميل. ورونالدينهو ساحر.

شكرا ليك إنت

يا شهاب يا وهاج

على مشاركتنا المتعة والإثارة

ودمت طيب وسعيد

ياسلاااااااااااااام
الصديق ابو ذر
قد افتتحت بهذا البوست البديع
يومى هذا
ويا للجمال والسحر والابداع
متى يرتقى اللاعبون
الى هذا المستوى المدهش حقا
لا ادرى لماذا تذكرت فى هذه اللحظة
اللاعب ..ابو العز
عندما كان يلعب لفريق
هلال الحصاحيصا
قبل الانتقال لفريق الهلال العاصمى
كان يجيد العاب الهواء
ومنها يحرز اهدافا غالية وساحرة
الله يجازى الكان السبب
فقد انهت الرياضة الجماهيرية
الكرة بالسودان
هل من عودة هل
مرة ثانية وثالثة
الله يديك العافية يازول يافنان

العزيز منعم سيد أحمد

تحياتى والمنى الطيب ليك

لابد لنا يا منعم جميعا أن نعتمد مبدأ ومفهوم إنه الكورة بتتلعب بالراس مش بالقدمين

القدمين عبارة عن أدوات أو وسائل مناولة ليس إلا

والله يا منعم الواحد مرات بالصدفة "بعتر" فى مباراة سودانية، مش تحزن وتضحك فى آن، كمان يصيبك القهر والغبن من طريقة اللعب واساليب التعامل مع الكورة

بعدين الأهم من كده كله، إنه مشاريع زى دى لازم الناس تنتبه ليها من البداية، يعنى الإهتمام الجاد بالأطفال والرياضة المدرسية والناشئين الخ

ولا يهمك يا صاحبى

عسى ينعدل الحال ولو بعد حين

يا اباذر يا اخوى ما داير ازعلك

لكن مارادونا سبق الراجل ده بالحركة دى قبل عشرين سنة

شوف

مارادونا

بالله يا ماجد ما تتلكلك معانا عليك الله

مارادونا على العين والراس

صحيح هو راجل فنان

لكين بالله عليك زى العمايل البعمل فيها رونالدينو ده
مارادونا ولا غيرو بقدرو يعملوها

بعدين ظروف وملابسات "الحركة" دى تحديدا، بتختلف طبعا عن حركة مارادونا

يعنى كسر التسلل بطريقة ساحرة والوقوف فى نقطة محددة والتخلص من المدافعين، وإختيار زاوية التسديد وتقدير المسافة

دى كلها حركات رونالديناوية بحتة

سيبك ياخ من مارادونا

بعدين عندى ليك سؤال "بيرسونال" جدا

زمان كان عندنا عمنا فى السوق العربى، ايام الزمن البهى

إسمه "محجوب حسون" كان صديق الوالد والأهل كلهم، راجل أنيق وطيب وكريم، وكان عنده محل خياطة راقى جدا فى العمارة الكان فيها "اجزخانة فكرى" ومحلات "ابونضارة" بتاع القماش

الزول ده بقرب ليك ولا تشابه اسماء بس

الأخ الفنان ابو ذر :

حقيقة ولظروف الدوام ما قدرت احضر المباراة وبما انني معروف بعدم حبي لي الزول الإسمو رونالدينهو ده بعد الكورة التلفونات تطاقش واي زول شبكني ما شفت قوون الزول ده الليلة ؟؟
وجيت الليلة شوفت البوست ده وقلت الشي البيخليك تتكلم في الكورة ده الشديد القوي..
وحقيقة لمن قريت وصفك قلت معناها الهدف ده اسطوري وما شفنا زيو قبل كده ..
ولكن للصراحة فالهدف ليس بقدر هذه الضجة ولا هو بالهدف الشاذ أو بالهدف الذي يمكن ان يقال لا يحرزه إلا رونالدينهو ..
الهدف عبارة عن لعبة مقصية هوائية "دبل كيك" بعد التهيئة عن طريق الصدر ..
ودي حركة عادية دوماً ما يقوم بها معظم المهاجمين وخصوصاً المحترفين ..
الهدف جميل ولكنه ليس بقدر الضجة ..
ولو كنت من المتابعين فحتى محلياً في دورينا في السودان تم إحراز اهداف مشابهة له بالكربون من اقدام لاعبين عاديين واخرهم كان هدف السعودي في الهلال وقبله سجل تبري الهلال في مرمى الخرطوم 3 بنفس الطريقة وقبلهم كلهم سجل الوالي رحمه الله في الدورة العربية هدف اجمل بكثيييييييييييير من هدف رونالدينهو بلعبة مقصية تفوق الخيال..
ولو كنت من المتابعين لبرشلونة من زمان فتابع الهدف الذي سجله ريفالدو وهو لاعب في برشلونة والهدف كان صورة طبق الاص%E

الأخ الفنان ابو ذر :

حقيقة ولظروف الدوام ما قدرت احضر المباراة وبما انني معروف بعدم حبي لي الزول الإسمو رونالدينهو ده بعد الكورة التلفونات تطاقش واي زول شبكني ما شفت قوون الزول ده الليلة ؟؟
وجيت الليلة شوفت البوست ده وقلت الشي البيخليك تتكلم في الكورة ده الشديد القوي..
وحقيقة لمن قريت وصفك قلت معناها الهدف ده اسطوري وما شفنا زيو قبل كده ..
ولكن للصراحة فالهدف ليس بقدر هذه الضجة ولا هو بالهدف الشاذ أو بالهدف الذي يمكن ان يقال لا يحرزه إلا رونالدينهو ..
الهدف عبارة عن لعبة مقصية هوائية "دبل كيك" بعد التهيئة عن طريق الصدر ..
ودي حركة عادية دوماً ما يقوم بها معظم المهاجمين وخصوصاً المحترفين ..
الهدف جميل ولكنه ليس بقدر الضجة ..
ولو كنت من المتابعين فحتى محلياً في دورينا في السودان تم إحراز اهداف مشابهة له بالكربون من اقدام لاعبين عاديين واخرهم كان هدف السعودي في الهلال وقبله سجل تبري الهلال في مرمى الخرطوم 3 بنفس الطريقة وقبلهم كلهم سجل الوالي رحمه الله في الدورة العربية هدف اجمل بكثيييييييييييير من هدف رونالدينهو بلعبة مقصية تفوق الخيال..
ولو كنت من المتابعين لبرشلونة من زمان فتابع الهدف الذي سجله ريفالدو وهو لاعب في برشلونة والهدف كان صورة طبق الاصل ان لم يكن أجمل من هدف رونالدينهو ..
ليس المقصود هنا تبخيس الهدف ولكن فقط للفت الانتباه حول ظاهرة صارت ديدن جميع من يشاهد رونالدينهو ..
فكل ما يفعله رونالدينهو يراه المشجعون ضرب من الخيال وسحر للكرة بينما يقوم بنفس حركات رونالدينهو لاعبون كثر ولا احد يلتفت لهم ..
في مرة من المرات حاول رونالدينهو تفيوت الكرة من خلفه فكان ان اصطدمت بظهره (زي ناس برشم ) ولكن شائت الصدف انو الكورة بعد ان ضربت في عنقرته جائت امامه فما كان من الجميع إلا وقال روناليدنهو قااااااااااااااصدة !!!!!!!!!!
بل صارت من اللقطات التي توزع في الانترنت والموبايلات !!!!!!!!!!
معقولة بس!!!!!!!!!!!!!!!!!
رونالدينهو منذ كأس العالم وحتى الان لم يقدم اي شئ يذكر ورغماً عن ذلك تجد الجميع يتحدث عنه وعن الاداء الممتاز (رغما عن انه باهت) له ..
وبالمناسبة رونالدينهو للمتابعين له سيجدون ان اداءه صار مكشوفاً وحركاته واحدة لم يأتي بجديد مما جعله مكشوف للمدافعين وانا احتار كيف يتصرف المدافعون برعونة واندفاع مما يتحي لرونالدينهو تطبيق حركاته المكررة عليهم !!!!!
لا اعتقد ان حركات رونالدينهو ستنطلي على مالديني أو على ايالا أو على فيردناند أو على نيستا !!!!!!
رونالدينهو لاعب مهاري ليس هناك نقاش ولكنه من المستحيل ان يصل للدرجة التي يمكن ان نقارنه بماردونا !!!!!!!!!!!!!!!!!!
حالياً ومن وجهة نظري الخاصة أرى أن ميسي اللاعب الارجنتيني افضل من رونالدينهو بمراحل فميسي لاعب إيجابي وطيلة الموسم الحالي والسابق ظل يقدم مباريات بنسق مرتفع ومراوغاته ايجابية للحد البعيد ولم اشاهد اي شخص يستطيع انتزاع الكرة منه !!!!!!

عموماً الهدف جميل ولكنه ليس نادراً أو مستحيلاً او يؤكد ان اللاعب خيالي !!!

تحياتي ...

إزيك يا عمر الفاروق

وكيف الأحوال

أنا عارفك طبعا خبير فى أمور الكورة دى أما نحن فناس بنتابع الجماليات واللعبات الملفتة
عشان كده داير تاكلنا حنك ساى

أمس كان الجماعة بتكلمو عن الهدف فى قناة Infosports وفعلا قالو هدف ريفالدو أجمل من هدف رونالدينو ده، بس أنا مركز على نقطة واحدة محددة ومصر عليها، وفى رأى المتواضع هى الممكن تعمل الفرق والتميز فى الشغلانة كلها، ألا وهى

معظم المهاجمين الأحرزو أهداف بالطريقة دى، وكانت جميلة قطعا، معظمهم استقبل الكورة استقبال سليم سواء بالصدر أو الرأس أو القدم، ويا إما سدد مباشرة تجاه المرمى وهو مواجه الحارس، أو كان "مدى ضهرو" للمرمى وعمل Backward

ديل الوضعين الاتنين الجات منهم معظم الأهداف

لكين تعال شوف حاج رونالدينو عمل شنو

الزول ده استلم الكورة واتنين مدافعين كانو جايين منقضين عليهو

مع استلام الكورة وفى نفس اللحظة وبى نفس الحركة، رفع الكورة أعلى جسمه شويه عشان يدى نفسه مجال يناور ويدور ناحية اليمين، يعنى هو كان عارف عايز يعمل شنو، ولآنه المدافع فى اللحظة ديك بقى قدامه تقريبا والحارس شايف وملاحظ كويس، رونالدينو فكر إنه "يحييد" الاتنين وفعلا نجح فى الحتة دى واصبح المدافع والحارس خارج الموضوع تماما بدليل غنه المدافع ما شاف إلا الكورة وهى بتمر قريب من راسه والحارس شافها وهى ماشه تجاه الزاوية اليسرى بتاعة مرماهو

دى الحتة العملت الفرق

يعنى كل الأهداف الحلوة البتقولو عليها جات من طريقتين فى الألعاب الهوائية

يا فى وضع مواجه للمرمى أو عكسه، فى الوقت الفيهو إنه رونالدينو هو الإختار وخلق الوضع الأمثل

بعدين الرواكيب القلتهم ديل ناس ايالا فى فالينسيا ومالدينى فى ميلانو وحتى كانافارو هسه فى الريال أو أو تيرى الإنجليزى، ديل كلهم وبكل سهولة ممكن رونالدينو يفوت منهم

مرة سمعت "باريزى" قلب دفاع ميلان الزمان داك وكابتن المنتخب الإيطالى كان بتونس فى قناة Rai الإيطالية، فى النسخة الإنجليزية منها، كان بضحك وقال إنه أحسن حاجة ما حضر زمن تييرى هنرى بتاع الأرسنال ورونالدينو بتاع برشلونة، لأنه عارف إنهم كانو "حيعولقوهو"

وشكرا ليك على الحضور السمح يا زول يا سمح

اباذر كيفك

ابدا والله ما بعرفو تشابه اسماء

لانو اسم حسون ده نادر حبتين

المهم

انتا عارف زى رونالدينهو ومارادونا ديل زى الفنانين

يعنى ما ممكن نقول ود الامين احسن من وردى كل زول طعمو براهو

بس امكن ان نفسيا عندى مارادونا ده ما بحب اقارن بيهو زول

تعرف سنة 86 قونو العجيب داك فى انجلترا
طبعا انا اساسا بكره الانجليز (فى الكورة طبعا) اها عندى صاحبى غياظ قاعد معانا بحضر فى الكورة وبعدين كيتا فينى بشجع انجلترا , المهم انا اعصابى بايظة والله الزول ده لمن مسك الكورة انا ماسك فى صاحبى ده واكورك لمن ساطهم كلهم وجاب القون

اها دى لحظة ما انساها ابدا

لكن رونالدينهو زاتو ياخ قال انو لمن كان صغير بقلد مارادونا
اها انتا داير تغاط الراجل زاتو

مودتى

Quote: الأخ الفنان ابو ذر : حقيقة ولظروف الدوام ما قدرت احضر المباراة وبما انني معروف بعدم حبي لي الزول الإسمو رونالدينهو ده بعد الكورة التلفونات تطاقش واي زول شبكني ما شفت قوون الزول ده الليلة ؟؟ وجيت الليلة شوفت البوست ده وقلت الشي البيخليك تتكلم في الكورة ده الشديد القوي.. وحقيقة لمن قريت وصفك قلت معناها الهدف ده اسطوري وما شفنا زيو قبل كده .. ولكن للصراحة فالهدف ليس بقدر هذه الضجة ولا هو بالهدف الشاذ أو بالهدف الذي يمكن ان يقال لا يحرزه إلا رونالدينهو .. الهدف عبارة عن لعبة مقصية هوائية "دبل كيك" بعد التهيئة عن طريق الصدر .. ودي حركة عادية دوماً ما يقوم بها معظم المهاجمين وخصوصاً المحترفين .. الهدف جميل ولكنه ليس بقدر الضجة .. ولو كنت من المتابعين فحتى محلياً في دورينا في السودان تم إحراز اهداف مشابهة له بالكربون من اقدام لاعبين عاديين واخرهم كان هدف السعودي في الهلال وقبله سجل تبري الهلال في مرمى الخرطوم 3 بنفس الطريقة وقبلهم كلهم سجل الوالي رحمه الله في الدورة العربية هدف اجمل بكثيييييييييييير من هدف رونالدينهو بلعبة مقصية تفوق الخيال.. ولو كنت من المتابعين لبرشلونة من زمان فتابع الهدف الذي سجله ريفالدو وهو لاعب في برشلونة والهدف كان صورة طبق الاصل ان لم يكن أجمل من هدف رونالدينهو .. ليس المقصود هنا تبخيس الهدف ولكن فقط للفت الانتباه حول ظاهرة صارت ديدن جميع من يشاهد رونالدينهو .. فكل ما يفعله رونالدينهو يراه المشجعون ضرب من الخيال وسحر للكرة بينما يقوم بنفس حركات رونالدينهو لاعبون كثر ولا احد يلتفت لهم .. في مرة من المرات حاول رونالدينهو تفيوت الكرة من خلفه فكان ان اصطدمت بظهره (زي ناس برشم ) ولكن شائت الصدف انو الكورة بعد ان ضربت في عنقرته جائت امامه فما كان من الجميع إلا وقال روناليدنهو قااااااااااااااصدة !!!!!!!!!! بل صارت من اللقطات التي توزع في الانترنت والموبايلات !!!!!!!!!! معقولة بس!!!!!!!!!!!!!!!!! رونالدينهو منذ كأس العالم وحتى الان لم يقدم اي شئ يذكر ورغماً عن ذلك تجد الجميع يتحدث عنه وعن الاداء الممتاز (رغما عن انه باهت) له .. وبالمناسبة رونالدينهو للمتابعين له سيجدون ان اداءه صار مكشوفاً وحركاته واحدة لم يأتي بجديد مما جعله مكشوف للمدافعين وانا احتار كيف يتصرف المدافعون برعونة واندفاع مما يتحي لرونالدينهو تطبيق حركاته المكررة عليهم !!!!! لا اعتقد ان حركات رونالدينهو ستنطلي على مالديني أو على ايالا أو على فيردناند أو على نيستا !!!!!! رونالدينهو لاعب مهاري ليس هناك نقاش ولكنه من المستحيل ان يصل للدرجة التي يمكن ان نقارنه بماردونا !!!!!!!!!!!!!!!!!! حالياً ومن وجهة نظري الخاصة أرى أن ميسي اللاعب الارجنتيني افضل من رونالدينهو بمراحل فميسي لاعب إيجابي وطيلة الموسم الحالي والسابق ظل يقدم مباريات بنسق مرتفع ومراوغاته ايجابية للحد البعيد ولم اشاهد اي شخص يستطيع انتزاع الكرة منه !!!!!! عموماً الهدف جميل ولكنه ليس نادراً أو مستحيلاً او يؤكد ان اللاعب خيالي !!! تحياتي ...

عليك الله شوف الزول الحاقد ده

لكن بينى وبينك ميسى رهيب
(ما تزعل بنهظر معاك )

Quote: رونالدينهو لاعب مهاري ليس هناك نقاش ولكنه من المستحيل ان يصل للدرجة التي يمكن ان نقارنه بماردونا

دقيقة دقيقة

دى ما شفتها

غيرتا راىى انتا ما زول حاقد على العكس والله زول تنفع مدرب

فعلا مارادونا ده زى مذنب هالى بجى كل 70 سنة بس اكتر شويىه كل 140 سنة

الاخوة المتداخلون
بوست لم اجد فيه غير المتعة الكروية الرهيبة
وخاصة من راعي البوست ولو انو شوية متحييز لفئة رونالدينو
والكابتن ماجد حسون الذي متعنا باللنك بتاع ماردونا متعك الله بالصحة والعافية بس طلب صغير من الكل لو وصلتونا بلنك يوصلنا كمان للفنان زين الدين زيدان عشان تكون حكاية المتعة كملت
ولكم الشكر على ما استمتعنا به من مشاهد كروية رايعة

ودي واحترامي
ناصر موسى

ليونيل ميسى

الفتى الماسى الرهيب

ده لسه يا عمر ويا ماجد ما طلع العنده كله

نحن خاتينو لليوم الأسود

أنا زمان ما كنت بريد الأرجنتينيين

لكين ولدنا ميسى العجيب خلانى أغير رأى

وبرضو هسه أنا كان لقيت لى طريقة نضمى مع "خوان لابورتا"

حأطلب منه طلب واحد

إنه يكابس ويجيب لينا "ريكيلمى" الارجنتينى، لاعب وسط فياريال

وكان والله برضو مفروض يسجل لينا "بابلو إيمار" الود الارجنتينى الحريف

ما عارف ناس فالينسيا فرطو فيهو كيف وخلوهو يمشى سرقسطة

لكين ما دام الساحر معانا وإيتو معانا وديكو معانا وبويول معانا

ما همانا

هجمة مرتدة

عمر الفاروق ده "طابور خامس" لى ناس "سانتياغو برنابيو"

عليك الله فريق يلعب فيهو بيكهام ده يقولو عليهو فريق

المحترم ابو ذر:
أول حاجة بحب اثبتها للناس إنك ومن خلال كتابتك الحالية اثبت لينا بما لا يدع مجال للشك إنك بتفهم في الكورة احسن مننا بي مراحل ..
وانا شخصياً عندي نظرة في الناس الرايقين وكلامهم ما كتير بتلقاهم بيعرفوا في الكورة اكتر من الناس التانية ..
تعرف يا ابو ذر معانا هنا واحد معولق إسمو " صلاح شتات " بيعرف في الكورة كويس جداً بس عندو عيب وااااااحد إنو بيشجع البرازيل ومتعصب في الاراء ويا كلامو يا بيديك بي الجزمة !!!!!
وبالرغم من كده ما بيتكلم فيها كتير لكن اخوك عندو نظرة ثاقبة تجاه الناس الزي ديل ..
أها يا الحبيب انت من النوع ده ..طلعت زول ما سااااااهل واتحداك انت من النوع البيكون حافظ اسامي اللاعبين في كل الفرق والنوع البتحلل الكورة بس مع زول مقرب ليك وفاهمك كويس
بالمناسبة اثبت لي إنك بتعرف كورة شدييييييييييييييييييييييد من خلال عبارة واحدة بس :

Quote: وكان والله برضو مفروض يسجل لينا "بابلو إيمار" الود الارجنتينى الحريف ما عارف ناس فالينسيا فرطو فيهو كيف وخلوهو يمشى سرقسطة

شفت الكلام ده ما بيقولوا اي زول !!!!
ايمار من اللاعبين الما بيعرفهم اي زول وايمار انا زييك كده بعتقد فيهو وبحب كورتو لي اقصى درجة وكنت من مشجعين فالنسيا بسببه ..
ايمار لاعب غير محظوظ فهو صديق داااائم للإصابة ومن المستحيل ان يكمل الموسم دون ان يغيب 4-6 شهور..
ايمار لاعب مهاري في منطقة المناورة وداخل خط ال18 وبيحاورك في كباية ..
ريكلمي كان من اللاعبين الذين راهن عليهم النقاد كقنبلة للتسجيلات لهذا الموسم ولكن تمسك فياريال إضافة للاداء الاخير في كأس العالم وإضاعة ضربة الجزاء في الوقت الحساس مع ارسنال ادت لقلة اداء اللاعب ..
عن نفسي يا اباذر صراحة لا احب منتخب البرازيل وتوقفت عن تشجيعها منذ العام 90 بعد ان ودعت افضل لاعب من الزمن الجميل وفريق الاحلام " كاريكا" ومن بعدها لم اشاهد السامبا كما 82 و86 ..
كنت من محبي برشلونة عندما كان يمثله 9 من الهولنديين واحببته اكثر في وجود نجم لكل عام في تسجيلاته ولكني الان في طريقي لتركه بسس رونالدينهو فانا صرااااااااحة كده ما بحب الزول ده نهااااائي لأنو بيهضم حقوق ناس تانيين اداءهم افضل منه بكثيييييير ..
بالنسة لي مقارنتك الاهداف يا ابوذر فانا بقول ليك شايف انت حللت من وجهة نظرك واديت رونالدينهو هالة كبيرة في التفكير ربما هو نفسه لم يكن يقصدها وهو لعب الكورة والسلام ..
دي دايماً بتزكرني بي القصائد زمان يقوم الاستاذ يشرح لينا ويقول ليهو كلام عجيب ويقول لينا يا سلااااااااااااااااام بالله شوفو الشاعر ده كان خيالو كيف..
كنت دائماً بقاطع الأستاذ وبقول ليهو :
" انتو عرفتو كيف انو الشاعر قاصد كده ؟؟!!! والله يا استاذ تلقاهو ولااااااااا جايب خبر لي كلامكم ده !!!
كام باريزي يا ابوذر حقيقي وده البيخليني دوماً اقول انو مارادونا افضل بكثييير من بيليه لأنو بيليه جا في زمن كان بيجبد ليهو اربعة لاعبين بي البيضة ويقيس الخامس زي التمثيلية
مارادونا جا في زمن الخطط الدفاعية واللعب العنيف والتنظيم الكروي ورغماً عن ذلك حاور انجلترا كلها من لندن لحددددددددددي اسكتلندا..

Quote: عليك الله فريق يلعب فيهو بيكهام ده يقولو عليهو فريق

اقول ليك حاجة حا تصدقها؟
انا من مشجعي فريق مانشستر لدرجة الجنون وبالرغم من إنو بيكهام كان الكابتن إلا إني كنت بشوف إنو اكتر واحد ما بيشبه الفريق وتمنيت خروجه عن التشكيل وللأسف بيكهام مشى الريال هو ورنالدو فطممو لي بطني من الفريق ..
بيكهام بينفع في الكورة السودانية بتاعت الشوت شوت دي اما سيدنا رزق (رونالدو) فعامل زي الكديسة بي سبعة أرواح !!!!
عموماً هاك نظريتي في تشجيع الفرق العالمية :
اي فريق فيهو برازيلي بكرهو ما عدا ميلان فانا احب كاكا جداً واشعر به برازيلي من الزمن الجميل وكذلك أحب لوسيو المدافع!!!!!
بحاول بي قدر الامكان ابعد من الفريق البيكون فيهو اللاعب البرازيلي هو اللاعب المؤثر ..
أحب جداً اللاعبين الارجنتينيين ولدي معتقد بأن البرتغالي كرستيانو رونالدو افضل بكثير من رونالدينهو الايام المقبلة ستثبت ذلك ..

Quote: عمر الفاروق ده "طابور خامس" لى ناس "سانتياغو برنابيو"

في وجود القاطرة البشرية رود فان نيستروي وعودة راؤوول لخانته الاصلية في الهجوم فالريال قاااااااادم بقوة وستنتهي اسطورة البرشا إن شاء الله فقط لو تدونا ميسي

تحياتي..

كيف الحال يا فاروق

وشكرا ياخى على الإطراء السمح، لكين صدقنى نحن عنقاله ساى فى الكورة، ما تشوف النضمى الكتير

Quote: تعرف يا ابو ذر معانا هنا واحد معولق إسمو " صلاح شتات " بيعرف في الكورة كويس جداً بس عندو عيب وااااااحد إنو بيشجع البرازيل ومتعصب في الاراء ويا كلامو يا بيديك بي الجزمة !!!!!

يا زول إنت البوديك للمشاكل شنو

ده زول خطر جدا، قبل كده كاتل ليهو زول، كويس إنه بديك بالجزمة، كدى تانى لما تلاقيهو أهبش "ضراعو الشمال" تلقاهو لابس ليهو سكين

أعمل حسابك شديد معاهو

تصدق يا عمر أنا لو قلت ليك فى المنتخبات بشجع منو ما حتصدق

هولندا

الفريق الما محظوظ فى الدنيا دى ابدا، ولو فى منتخب مفروض يحتكر كأس العالم مفروض يكون المنتخب الهولندى، ناس لعبهم طاعم والفريق الوحيد الدائما تشكيلته صاح، لكين تقول شنو

والهولنديين برضو هم الخلونى اشجع برشلونة من زمان، من ايام فيليب كوكو والإخوان دى بور وكلويفرت

كنا مأملين عليهم فى ألمانيا هم والتشيك، والإتنين مرقو ساى المساكين

إيمار يا عمر لاعب هميم وذكى وحريف ولو كان لقى مهاجم زى إيتو أو هنرى أو نستلروى ممكن يهزمو أى فريق مية/صفر، بس زى ما قلت إنت حظه بايخ جدا زى ميسى

فى لاعب تانى عايزك تنتبه ليهو وتشوف لعبه، وهو "دانييل الفيس" لاعب اشبيلية، مع إنك ما بتحب البرازيليين، لكين بالله بس شوف لعبه وقول لى رأيك، نسوى شنو يعنى، البرازيليين الله خلقهم "جوان" بتاعين كورة، رضينا ولا ما رضينا

Quote: كنت دائماً بقاطع الأستاذ وبقول ليهو : " انتو عرفتو كيف انو الشاعر قاصد كده ؟؟!!! والله يا استاذ تلقاهو ولااااااااا جايب خبر لي كلامكم ده !!!

اها كمان عايز تداقرنا فى أرزاقنا ولا شنو

ده كلام صحيح مليون المية والله، وفعلا القاعدة الأساسية فى قراية الشعر وتذوقه، إنه كل شخص ممكن يفهم المعنى بشكل مختلف من الباقين، وحتى عند أكتر الشعراء المغرقين فى المباشرة والوضوح والواقعية، برضو المعانى ما بتكون حسب ما هو ظاهر

طيب أهو طلعت إنت كمان فارز الشعر أحسن مننا

أما عن البرتغالى رونالدو، فأنا رأى فيهو إنه لاعب حريف برضو، بس أهوج شوية، ومفروض بعد ما بقى يلعب مع الإنجليز يكون عرف كيف "يجضم" الشغلانة، وممكن مع شوية تعديل فى سرعة وطريقة لعبه، يكون لاعب مميز جدا، ومفروض يكون أقرب أكتر لمنطقة خط 18 زى فرناندو توريس عشان وهناك فعاليته حتزيد

راوول أمس يا عمر سرق ليهو هدف سمح والله ووجع ليك كانيزاريس حارس فالينسيا خلاهو ينضم برا راسه، الخبرة فعلا مهمة مع إنه راوول خلاص فى اللحظات الأخيرة وأنا بعد كده ممكن أجرى اسرع منه

وشيلو شيلتكم ساى بعد كده، شايف زامبروتا دخل فى جو البارشا وبدا يظهر وجهه الحقيقى يا دوبك، لكين "ترام" بقى عبارة عن راكوبة بس، وكلما يستلم كورة أنا أقرأ آية الكرسى

وبصراحة، الريال هسه ما فيهو غير المدافع الشاب سيرجيو راموس

الباقى كله فته ساى

وودعتك الله

مقارنة بين زيدان ورونالدينهو

الإتنين رهيبين، بس زيزو غير،،

http://www.youtube.com/watch?v=_ikK97WlJzY&mode=related&search=

وإليكم هذا الهدف الاسطورة الذي يعتبر أجمل هدف سجله لاعب بفانيلة ريال مدريد منذ زمن بوشكاش وديستفانو الى الآن ويتصدر برنامج ال to goals لأجمل 10 أهداف سجلت في تاريخ ريال مدريد،،

المبارة النهائية بين ريال مدريد وباير ليفركوزن في جلاسكو (كأس أوربا) في 15 مايو 2002م ، وكان الباير يضم نخبة من النجوم العالمية منهم لوسيو البرازيلي والألماني مايكل بالاك وبيتر شيك أو ليمان لا أدري ،،

أجمل هدف ، وفي نهائي أجمل بطولة ، وأسمعو أجمل تعليق وإن كان لا نفهم اللغة الأسبانية بس الإنفعال نهديه للرشيد بدوي عبيد
http://www.youtube.com/watch?v=8hb907ef03g&mode=related&search=

Quote: ولكن للصراحة فالهدف ليس بقدر هذه الضجة ولا هو بالهدف الشاذ أو بالهدف الذي يمكن ان يقال لا يحرزه إلا رونالدينهو .. الهدف عبارة عن لعبة مقصية هوائية "دبل كيك" بعد التهيئة عن طريق الصدر .. ودي حركة عادية دوماً ما يقوم بها معظم المهاجمين وخصوصاً المحترفين

..



الله يجازي محنك يا ود الفاروق..
دائما تهضم حقوق الناس ..

إزيك يا حاتم

ياخى عمر الفاروق ده ما تشتغل بيهو

زى ما قلت قبل كده، الزول ده "طابور سابع" كمان مش خامس

تعرف اصلهم ناس "المان يونيتد" ديل الأيام دى راحت عليهم

وعمك فيرغسن خرف عديل وبقى "يدرب" بره من راسه

ناس تشيلسى جننونهم ليك جن وبقو ليهم بعبع عشان كده بقو لايصين ساى

ما تسمع كلامه

شكرا يا عبد اللطيف على إثراء الساحة بالإبداعات الجميلة فعلا

المشكلة تعرف أنا ما قادر اشوف الفيديو فى الرابط، بقول لى الفلاش بلاير عندك ما شغالة ولما أحاول أنزلها تانى يقول لى، فشلت

اتذكر أنا شفت هدف زيدان المقصود بعد نهاية كأس العالم وبعد زيدان ما أعلن الإعتزال، كان جايبين برنامج توثيقى عنه ومن ضمنه كل أهدافه تقريبا

فعلا هدف ساحر جدا

طبعا أنا بالنسبة لهدف رونالدينو ده، كنت مركز على طريقة إحراز الهدف أكتر من عموميات جمال الهدف ككل، ياما فى أهداف جميلة ومن كل المستويات، بس أنا لسه مشدد على روح الإبتكار وما زلت مصر إنه الطريقة دى، الإستقبال والتثبيت وتغيير الوضع ثم تقدير الزاوية والمسافة، لسه مصر إنها كلها حاجات جديدة

وزى ما قلت لى أخونا عمر الفاروق

كل أو معظم الأهداف الجميلة الجات من ألعاب هوائية، تلاحظ فيها إما يكون اللاعب فى مواجهة المرمى أو يكون "مديهو ضهرو" وفى حتة مهمة برضو لو لاحظتوها، إنه اللاعب دائما بكون زى المستعجل أو المتلهف عشان يصوب وينتهى من الموضوع، لكين رونالدينو فى الهدف ده، أخدت راحتو تب وهيأ وعزل الوضعية العايزها "على إيدو"

أنا بس كنت مركز على الحتة دى

كدى ورونا طريقة نشوف بيها الفلاش بلاير السجم ده

قون زيدان ده كان مجنون فعلا..مبالغة!

Quote: قون زيدان ده كان مجنون فعلا..مبالغة!

دا يا ابو السعود في نظري اجمل هدف في تاريخ كرة القدم،، أقول في نظري،،
تحياتي وشكرا على إنزال الفيديو،،

الاخ الجدع جدا / عبد اللطيف بكري أحمد
والله كتر الف خيرك
وبالجد انا هسة في غاية الانبساط وخاصة لاضافتك للساحر الفنان ابو ثلاثة ارجل كتال الكتلة زيزووووووووو والله بكل امانة انا لم ارى في في عالم كرة القدم ساحر بهذا المستوى فحقا انه اللاعب الكامل فهو يمتلك كل المهارات وناخدها وحدة وحدة
قناص
قلاع
افضل من يرمي باص
مهارات وفنيات تعلو بك حتى السماء
راس ما بعدو راس وشوفو اهدافو الناتجة عن طريق الرأس وللمثال ليس للحصر
http://www.youtube.com/watch?v=UOrcxwKAlOU&mode=related&search=
واخيرا وليس اخرا كتال كتلة
ولي عودة ما دام الكلام دخل الحوش وجاب ابو الزوووز

ودي واحترامي
ناصر موسى

ايواااااااا

كويس يا ناصر

أنا كنت قايلك معانا، اتاريك مع "الخيانه"

خلى بالك جواسيس الريال بدو يظهرو واحد واحد

لا جد والله زيدان واحد من عباقرة كرة القدم وحيظل كده للأبد

أكتر حاجة ملفت عند زيدان هى قدرته على الإحتفاظ بالكورة

لما يكون ماسك الكورة، إبليس ذاتو ما حيقدر يشيلها منه

وبعد داك برضو المقدرة الفائقة على التمرير الصحيح، يعنى نادر جدا جدا جدا زيدان يمرر خطأ إلا بس يكون اللاعب الماشه ليهو الكورة، هو الخطأ

زيدان عنده مشكلة واحدة بس فى حياته كلها

هى إنه ضل الطريق ومشى ريال مدريد

محله الصحيح كان هناك، هناك هناك

فى الشمال الشرقى

فى كاتالونيا حيث الأناقة والسماحة والفنون والجمال والناس الحلوة

هناك فى الكامب نو

مأوى الأفئدة وقبلة الملائكة

شكرا يا سعد الدين على السخاء والكرم والندى

ولو أمكن بالله تشوفو لينا طريقة عشان الفلاش بلاير ده يشتغل عندنا

ما قدرت اشوف الكليب، ويبدو إنه عندى حاجة ناقصة فى الجهاز

الأخ / أبو ذر،،
والله ياخ شكرا على هذه الدوحة الوريفة ، وشوية الناس تروح عن نفسها بعد هذا العناء اللانهائي من ساس يسوس وقتل يقتل ،،

Quote: المشكلة تعرف أنا ما قادر اشوف الفيديو فى الرابط، بقول لى الفلاش بلاير عندك ما شغالة ولما أحاول أنزلها تانى يقول لى، فشلت

والله عاد لازم تدبر حالك وشوف الشباب (تمبس وصحبه) يدلوك على الطريقة ، لأن الهدف صراحة تحفةوالتعليق : مباااااااالغة،،
تحياتي ،،

زيدان كان الرجل المناسب في المكان المناسب فحقق الإنجاز والإعجاز ..
ريال لولا تلاعب البرازليين المدربين به لكان الافضل حتى الان ..
وريال لولا إقالته لمدربه ديلبوسكي وفيرناندو هيرو لكان حتى الان في مصاف الاندية ..
زيدان واحد من معجزات كرة القدم ..يحيرني زيدان في طريقة إمتصاصه للكرة ولا أقول تثبيته لها ..فزيدان يشعرك بأن في رجله أو كدارته مغناطيس جلدي كاسراً كل قوانين الفيزياء في قوانين التجاذب ..
زيدان حتى اخر لحظة كان يقدم فناً كروياً راقياً فحتى ركلة الجزاء التي سددها لا تشبه ركلات الاخرين ..

زيدان حاجة تانية ..

العزيز ناصر،،

Quote: الاخ الجدع جدا / عبد اللطيف بكري أحمد والله كتر الف خيرك وبالجد انا هسة في غاية الانبساط وخاصة لاضافتك للساحر الفنان ابو ثلاثة ارجل كتال الكتلة زيزووووووووو والله بكل امانة انا لم ارى في في عالم كرة القدم ساحر بهذا المستوى فحقا انه اللاعب الكامل فهو يمتلك كل المهارات وناخدها وحدة وحدة قناص قلاع افضل من يرمي باص مهارات وفنيات تعلو بك حتى السماء راس ما بعدو راس وشوفو اهدافو الناتجة عن طريق الرأس وللمثال ليس للحصر واخيرا وليس اخرا كتال كتلة ولي عودة ما دام الكلام دخل الحوش وجاب ابو الزوووز

شوف والله أول ما أسعدني هو (إنبساطك) ،، وعفويتك في التعبير عن هذه الفرحة،،
تعرف :
كنت دائما أهم بأن أكتب لزيدان عن أنني المعجب رقم واحد لفنونه في العالم،،
وكنت ((بيني وبينك يعني)) أدك الشغل أيام لعبه في اليوفي لأن الدوري الإيطالي كان توقيت بعض المباريات سيء ، وكنت أستمتع بفنون زيدان بشكل لا يصدق وكنت أدل الناس عليه ولكن لم يكن يصدقون ما أحكيه عنه،،
أبني عمر الآن (7 سنوات) له فانيلة زيدان ، فرنسا (أزرق - أبيض - ) ، وزيدان ريال مدريد أسود أبيض أزرق ،، أمه (للأسف تشجع برشلونة وبعدين عندنا كلام عن الام البتشجع برشلونه دي ذاتها ،، خليها لوقت تاني،) قالت ليه كرهتنا البيت وانت لابس فانيلة زيدان أكتر من زيدان نفسه،،
تصدق لما الريال يتغلب عمر بنوم تحت السرير ،،
أحكي ليك شوية عنه : عندنا صديق عزيز جداً (برشلوني أكتر من بيول)) (مسمينو تحت تحت كدا : لابورتا) وبعدين الرجل كبير ومحترم وبيتو مقاطعة كاتلونية(حريم على رجال) وبالأوامر،، جانا لابورتا دا زيارة في البيت بعد فوز الريال بهدفي راؤل ونتسلروي، وطبعا الراجل كبارة وماقادرين نشاغلو بالهزيمة وكان والله ودنا نفتح الموضع وماعارفين مدخل،، فجأة دخل عمر في المجلس (ولابس زيزو طبعاً) ومباشرة رافع أصبعين للابورتا وقال لعمنا : ((طقطقة : إتنين زي السم)) والله البيت عايز ينفجر من الضحك شماتة في لابورتا ،، والأخير زعل بالجد وقال لعمر (وطبعاً يعنيني أنا وبقية المدريدتستا) : الحمد لله البقيتو تتفاصحو،،

رونالدينهو لاعب ساحر مافي شك لكنه يهتم بالفوز ويجيد التمثيل امام خط 18 ويفتعل ضربات الجزاء ، ومعظم فوز برشلونة يبدأ بعد أن يهب الحكم لهم من تلك الهدايا ،، وبرشلونه ماخد هالة أكبر من حجمه وهو فريق الرجل الواحد ،، يعني لو جينا ذكرنا لاعبين منه أمثال : موتا ، بيول ، أوليغر ، أدملسون ، ازكوير ، غوديونسن ، جيوفاني وبيلتي وإكزافي تلقاهم لاعبين عاديين جدا ولا يقدمون كرة جميلة : نقر بأن لهم ميسي ثم ميسي ثم ميسي ثم إنيستا ثم رونالدينهو ويمكن نضيف إليهم ديكو إذا تحسنت أخلاقه، وإيتو إن تقمص شخصية اللاعب الكبير وبعد عن التصريحات المتعجرفة التي تقوده في اليوم التالي للإعتذار،،

شكرا ناصر ،، وفعلا فقدنا رقم هائل في عالم كرة القدم وكنت قبلها أشيع للأخوان بأنني سوف أعتزل الفرجة مع إعتزال زيدان ، لكن العزاء في قناة ريال مدريد التي تتحفنا بإبداعات زيدان في الزمن الجميل ،، خاصة برنامج top goals

شكراً ابو ذر ، وشكرا للجميع ونأسف للإطالة خارج الملعب،، والدوري الإسباني هو فعلا متعة حقيقية لو كانت قناة الجزيرة تتميز بالحياد خاصة الأخضر بريش الذي تدفع له القناة لكي يمارس هوايته في تشجيع (البارثا)
تحياتي ،،

العزيز عبد اللطيف

Quote: الحمد لله البقيتو تتفاصحو،،

والله عمنا لابورتا ما قال إلا الحق

بعدين أنا والله قلبى مع عمر وليدى، معنى كده الموسم الفات مله المسكين قضاه تحت السرير

نحن بعد كده ذاتو ما عايزين غلب الريال، بنفك ليكم ناس خيتافى وسلتا فيغو والجماعة ديل

أنا بس هسه منتظر مباراة اشبيلية والريال عشان نشوف الرواكيب بتاعينكم ديل حيعملو شنو

اها كمان النقول ليك سر

ناس برشلونة، بى تحت تحت كده يعنى، وحسب ما سمعت

إتفقو إنهم تانى يفتحو للريال ويخلوهو يفوز عليهم

قالو ياخى ما عايزين مشاكل مع ناس الحكومة والملك

على الطلاق يا عبد اللطيف المبارة الفاتت الفاز فيها الريال على برشلونة دى

لو حصل العكس

كان قامت حرب أهلية

غايتو شمو نفسكم شوية الموسم ده، سمحنا ليكم

نحن برضو الكبار

Quote: رونالدينهو لاعب ساحر مافي شك لكنه يهتم بالفوز ويجيد التمثيل امام خط 18 ويفتعل ضربات الجزاء ، ومعظم فوز برشلونة يبدأ بعد أن يهب الحكم لهم من تلك الهدايا ،، وبرشلونه ماخد هالة أكبر من حجمه وهو فريق الرجل الواحد ،، يعني لو جينا ذكرنا لاعبين منه أمثال : موتا ، بيول ، أوليغر ، أدملسون ، ازكوير ، غوديونسن ، جيوفاني وبيلتي وإكزافي تلقاهم لاعبين عاديين جدا ولا يقدمون كرة جميلة : نقر بأن لهم ميسي ثم ميسي ثم ميسي ثم إنيستا ثم رونالدينهو ويمكن نضيف إليهم ديكو إذا تحسنت أخلاقه، وإيتو إن تقمص شخصية اللاعب الكبير وبعد عن التصريحات المتعجرفة التي تقوده في اليوم التالي للإعتذار،،

والله بالغت عديل كده

ديل عليك الله لاعبين عاديين، بعدين رونالدينو ولا إيتو براهم بقدرو يعملو جنس الشغل ده

كدى شوف الأيام الجايه دى حيعملو ليك شنو مع فيدربريمن الألمانى

والله يا عبد اللطيف بالرغم من ده كله

أنا قاعد أحن على ريال مدريد
ولسه مصر، ما فيهو غير "سيرجيو راموس" فى الدفاع ومرة مرة كده روبينيو

مامادو ديارا ما بطال، لكين كانافارو، العامل فيها بطل العالم ده

ده خلاص البنزين بتاعه أنتهى، بقى عتالى ساى

زى
"ترام" بتاعنا كده

برشلونة وتشيلسي وجهان لعملة واحدة ...
تشاهدهم فتستغرب كيف يحققون الفوز !!!!!
فقط اختلف معكم في نقطة أن برشلونة هو فريق اللاعب الواحد فبرشلونة لا يعتمد على رونادينهو ..والاغرب ان برشلونة يكون خطيرا في وجود إيتو اكثر من رونالدينهو ..
قودينسن اللاعب الوافد لا يشبه برشلونة ..
إقزافي لاعب ممتاز وسافيولا لاعب لا يجلس في دكة الإحتياط..
اجمل ما في برشلونة هو الحارس الشعيرية
بالجد غايتو برشلونة ماشة معاهو بالبركة في موضوع الحراسة ده مرة تدق في رجلو مرة في بطنو ومرة في العراضة ومرة تمرق ..
الشي البيحير اكتر إنو ريكارد ليس بالمدرب الفلتو ولا هو بالمدرب الشاطر لكن الظروف خدمته (رغما عن حبي لريكارد اللاعب) ..
اتوقع نهاية اسطورة برشلونة هذا العام بعد التخبط في تسجيلات اللاعبين ..
وبمناسبة التسجيلات فانا مصدوم جدا لحال فريق اي سي ميلان المتهالك والذي بدا يتدهور بصورة مريبة وبدا يدفع الثمن من عجرفة برسكلوني الذي صرح بعدم حوجته للتسجيلات فاضاع معظم لاعبي اليوفي (السيدة العجوز) خصوصا في خطي الوسط والدفاع ..
وهنا لابد ان نحيي اللاعبين بوفون و نيدفيد وديلبيرو للصمود مع النادي الذي يتصدر حتى الان للدوري وهو قادم بقوة دون تأثير وهذا درس للجميع ..

فقط وللجميع اقول تذكروا بأن هناك شياطين حمر في الأولترافولد حيث مانشستر يونايتد قلعة النجوم كيف لا وهو الذي لعب له كانتونا واشمايكل ..

عرجت بالبوست ولكني شعرت بأنني اكتب لأشخاص يعشقون البطولات الأوروبية ويعون ما يكتبون فزادت متعتي ونسيت نفسي..

كيفك يا فاروق

Quote: برشلونة وتشيلسي وجهان لعملة واحدة ... تشاهدهم فتستغرب كيف يحققون الفوز !!!!!

مع الإختلاف الكبير طبعا بين البلوز والبارشا

لكين تحقيق الهدف ابدا ما قاعد يجى بالصدفة، وإنت عارف الكلام ده يا عمر، لكين نقول شنو إنتو "خرف فيرغسن" الظاهر جاتكم العدوة بتاعته

Quote: قودينسن اللاعب الوافد لا يشبه برشلونة .. إقزافي لاعب ممتاز وسافيولا لاعب لا يجلس في دكة الإحتياط.. اجمل ما في برشلونة هو الحارس الشعيرية

قودينسن يا عمر لاعب هداف وبرضو بعرف يخلق الفرصة وعايز زول يمونه كويس، يعنى لما يلقى الفرصة ما بضيع حتى الأهداف المن زوايا صعبة، ما شفت الهدف التانى فى مباراة فياريال

بعدين عنده ميزة برضو ما بطالة، إنه شديد جدا فى الهروب من التسلل

إنتو لكين بتصبرو، خليهو شوية يتأقلم مع أجواء برشلونة ويوريكم بعدين

زافى لاعب عاقل ورزين، ياخى ده الزول الوحيد من كاتالونيا البصفق ليهو ناس مدريد

بعدين فالديز الحارس صاح عنده هفوات، لكين حسناته اكتر من المساوئ، وياما انقذنا من أهداف والله لو كان واقف "ياشين" ذاتو ما كان صداها

بعدين يا عمر بطلو الحسادة عليك الله، هسه ريكارد ده الزيو منو بالله، أوعى بس تقول لى محظوظ، بطولة الليغا، بطولة الشامبيون ليغ، قهر عتاولة الكورة فى اوروبا، ارسنال وميلان وتشيسلى، معقول ده كله حظ وتوفيق بس

أنا زيك برضو، والله مبسوط وسعيد بفتية اليوفى وحبهم للفريق، وكلها كم شهر ويرجعو للكالشيو تانى ويردوا على الناس كلهم، وفريق فيهو زى ندفيد اصللا ما بتجيهو عوجة

ياخى هسه أنا بفكر "اجندك" وأجيبك معانا للكامب نو

والله حظك يتغير وصحتك تتحسن وربنا يرضى عليك دنيا وآخرة

قال أولدترافولد قال

العزيز عمر الفاروق
تحياتي وياسلام على كرة القديم بدون تعصب أعمى،،

- أوافقك في كثير فريكارد مدرب محظوظ ومجامل لبيول لأبعد حد ،،
- الشياطين الحمر تركتهم بعد إعتزال إيريك كانتونا اللاعب المفتري بصحيح والأسطورة،، وكرهتهم الآن بعد رفضو إطلاق سراح كريستيانو رونالدو للريال ،، ياخ البرتغالي دا فظيييييع،،
- تعالو شيلو بيكس ، كفانا ads.

Quote: وبمناسبة التسجيلات فانا مصدوم جدا لحال فريق اي سي ميلان المتهالك والذي بدا يتدهور بصورة مريبة وبدا يدفع الثمن من عجرفة برسكلوني الذي صرح بعدم حوجته للتسجيلات فاضاع معظم لاعبي اليوفي (السيدة العجوز) خصوصا في خطي الوسط والدفاع .. وهنا لابد ان نحيي اللاعبين بوفون و نيدفيد وديلبيرو للصمود مع النادي الذي يتصدر حتى الان للدوري وهو قادم بقوة دون تأثير وهذا درس للجميع ..

- ديلبيرو قاعد يزيد من رصيدو في الأرقام القياسية بالسيدة العجوز وفعلا الذي لم يشاهد ألكس قبل ستة سبعة سنوات لم يشاهد ابداع كروي ،، وهو اسطورة في اليوفي فأكيد لعبه بالدرجة الثانية مكرمة منه سيذكرها له أنصار اليوفي للأبد،،
- بيرلسكوني أبشرك سوف ينحني الآن بعد إصرار كالديرون على تسجيل كاكا ، وقالها بالحرف الواحد (أكتبو على قبري كاذب إذا مت ولم أجلب كاكا للبرنابيو) - دا طبعا بعد توقيع أكبر صفقة إعلانية في عالم الرياضة 1.1 مليار يورو ،، تصور،،

- تأمل معي عظمة فان نستلروي وهو يعتذر لحارس أوساسونا وقد كان سجل فيه رباعية تاريخية: الحارس قال : أبكاني نستلروي حين أعتذر لي،،

تحياتي ، وواصل إبداعك ،،

أبا ذر ،،

Quote: بعدين أنا والله قلبى مع عمر وليدى، معنى كده الموسم الفات مله المسكين قضاه تحت السرير

والله كانت سنة كبيسة ، مباراة سرقسطة الأخدنا فيها ستة كانت فارق مهم : تعلم بعدها عمر أن الكرة نصر وهزيمة ،، تعبنا عشان نفهمو حكاية الهزيمة دي ، مافي فريق في الدنيا دي بفوز طوالي ،، وفعلا جاء بعدها ريال مدريد وأعطى درس كروي في ربع ساعة 3 اهداف وكانت مباراة تاؤيخية.
تحياتي ،،

من هنا ولي شهر لي قدام انا بلز ليكم البوست ده لي
فوووووووووووووووووق
وحا احاول استغل علاقتي الشخصية مع سيد الحوش
بحكم تواجد باريزونامع الباشمهندس بكري ابوبكر ( يعني بالعربي كده جيران )
ان يضع لنا هذه المظلة الوارفة في اعلى المنبر ليستظل بها الجميع
وتعم الفايدة


ودي واحترامي
ناصر موسى

تحياتى يا ناصر

طلعت "جار البطل"

على وزن "صاحب البطل"

ذكرتنا ياخى ايام الوطنية غرب والنيلين وكبوزيوم

مشكور ياخى على مساهماتك السمحة وتريانة

والموضوع أفتكر ما بالأهمية التخليهو يتصدر هامة المنبر

وكنت بتمنى والله يا ناصر، وبتحسر فى نفس الوقت، إنه الواحد كان يكون ملم ولو بالقليل عن الرياضة فى السودان وخاصة كروة القدم، عشان النقاش أكتر فائدة ويتناول الشأن الرياضى السودانى بتفصيل اكتر

المشكلة إنه رياضيى السودان نفسهم ما عايزين يدونا فرصة عشان الزول يكون عنده ولو الحد الأدنى من الإهتمام

أنا برضو من عشاق ام الألعاب الرياضية "ألعاب القوى" ومتابع جيد وحريص لكل البطولات العالمية، وشايف فى الفترة الأخيرة فى إشراقات مشجعة وكويسة فى المجال ده فى السودان

اذكر أنا كتبت قبل فترة هنا فى المنبر عن الموضوع ده، وبحاول أفتش الموضوع فى الأرشيف وأجيبه ليكم، يمكن يكون نواة للتناول

وليك التحية دائما

Quote: تعلم بعدها عمر أن الكرة نصر وهزيمة ،، تعبنا عشان نفهمو حكاية الهزيمة دي

عليك الله يا عبد اللطيف ياخى ما تضيعو مستقبل الولد ساى

ياخى ريال مدريد شنو البشجعه، الولد ده ربنا بسألك منه يوم القيامة

عشان كده وجهو ياخى وقول ليهو ريال مدريد عبارة عن فريق بتاع عناقريب، بس عناقريب "موسره" بشكل جميل وألوان براقة واسماء لامعة

ما تنسى عليك الله، المسكين ده خليهو يستمتع بالكورة ياخى ويشوف ناس ميسى وزافى، هسه عليك الله لو شاف إبتسامات "لابورتا" دى براها مش كفاية

إنتو ترا الفيكم اتعرفت وفات فيكم الفوات، لكين عمر ده ذنبه شنو

هاك هيلغيرا ده

عايز اقول حاجة :
البوست ده محترم جداً وناسو محترمين جداً ...
عندي إحساس إننا كلنا مستمتعين ونحن بنكتب هنا ..
اول مرة اخش لي بوست القا كل الناس المشاركة فاهمة بتكتب في شنو ..
واول مرة اشوف لي ناس مختلفة إختلاف ممتع ..

كدي نرجع للكلام ده يا ابو ذر وشوف عبد اللطيف:

Quote: أوافقك في كثير فريكارد مدرب محظوظ ومجامل لبيول لأبعد حد ،،

معاي صاحبي بنحضر الدوري مع بعض قلت ليهو مقولة بيضحك فيها لحدي أسة ..
قلت ليهو بيول ده بيلعب في برشلونة زي نظام السعودة
وقلت ليهو عندي إحساس إنو في برشلونة في حاجة إسمها (الكلتنة) وهي كلتنة كل اللاعبين وجعلهم كباتن بدلاً عن الأجانب..
ياخ انا مستغرب جداً كيف يكون بيول وتورام في تشكيلة واحدة !!!!!!!
وهو اصلاً بيول كورتو قريبة جداً لي كورة برشم وحبنّي حقيننا ..
والغريبة جداً يا عبد اللطيف زولك بيول عايز يحاكي المدافعين ولمن تجي كورنر لي برشلونة بتلقاهو قدااااااااام عايز يقد هيد والغريبة هو أقصر من حبل الكضب ..
والاغرب انو اخلاقو في نخرتو وكرتو الاحمر برة وبلينتيهو جاااااااااهز زي علاء الدين جبريل..

نيستلروي قاطرة بشرية وانا من المحبين ليهو بس ياخ عندو عيب وحيد إنو اناني جداً وهو لاعب غير مهاري !!!!
ولولا مشاكله مع السير فريجسون لكان الان هدافا للدوري الانجليزي..
اما كريستيانو رونالدو فهو افضل لاعب في العالم حاليا ودون منازع ..
ياخ شوفت ليك زول عينو قوية ويجيك يقول ليك انا عايز احاورك وبيحاورك ؟!!!
ده كريستيانو ده ...
بالنسبة لي رونالدينهو يا ابو ذر فهاك المعلومة الصاح :
رونالدينهو كان الاقرب لي مانشستر يونايتد في الانتقالات من باريس سان جيرمان ووقفت المفاوضات للاختلاف حول 5 ملايين دولار بعدها دفع برشلونة المبلغ ..
ولكن الطامة الكبرى عندما اكتشف الجميع ان مفاوض مانشستر بعدها انتقل لفريق تشيلسي في ظل احتراف الاداريين في الكرة الإنجليزية ليتم اكتشاف الفضيحة أن الإداري تعمد تعطيل المفاوضات حتى لا يوقع رونالدينهو لمانشستر ويشكل بعبع لي تشيلسي !!!!
شفت الناس دي مشت كيف في عالم الاحتراف ؟؟؟ حتى في الإدارة ..

كل شى عرفناهو يا عمر وعبد اللطيف

كمان دايرين تنضمو فى "بويول"

ناس كاتالونيا بنطقوها "بوجول"

بعدين كدى قول ياتو يوم بويول ده اتسبب ليهو فى ضربة جزاء، بالعكس دائما المهاجمين بكونو هم الغلطانين معاهو، ونادر جدا يتعمد يعيق ليهو لاعب أو يقصده

وين تلقو ليكم لاعب ملهم وأخرقه تمام زيى بويول

مش زى ناس قوتى العوير وسالجادو الشرير

ده الزعيم ياخ، ما تقعدو تنضمو ساى

وأقول ليكم شى، على الإيمان الريال من ما فات منه "هييرو" تانى ما جاهو قلب دفاع زى الناس، ومن الزمن داك يسمو فى البطولات وبقى يتلطش زى السلام عليكم

آخ بس لو كان راموس ده من الأندلس وراسه عديل على كاتالونيا

ده برضو فرطنا فيهو، بخيت وسعيد عليكم

Quote: بعدين يا عمر بطلو الحسادة عليك الله، هسه ريكارد ده الزيو منو بالله، أوعى بس تقول لى محظوظ، بطولة الليغا، بطولة الشامبيون ليغ، قهر عتاولة الكورة فى اوروبا، ارسنال وميلان وتشيسلى، معقول ده كله حظ وتوفيق بس

يا راااااااااااااااااااااااااجل !!!
قول كلام غير ده ..
ياخ لحدي الدقيقة 80 برشلونة مغلوب من ارسنال بي قون كامبل وارسنال لاعب بي عشرة !!!
هو الحظ ده كيفنهو ؟؟؟
طردو يانس ليمان قبل الشمس تغرب
طيب يا ابوذر اسة عليك الله برشلونة ده لو جابو ليهو شوقي عبد العزيز ما بيشيل الدوري بي تيمو ده ؟؟
ياخ تيم جاااااااااهز بس تقول ليهم خشوا العبوا كورتكم البتعرفوها ....
ريكارد ده بيزكرني بي مدرب زمان عندنا في الناشئين بيجي يلمنا في نص الميدان ويقول عايز يدينا الخطة ..
اها نتلم في شكل دائرة عشان نشوف الخطة ..
بس بيقول لينا :
الخطة الليلة هجوم يلا قومو
الكورة الجاية يقول لينا:
الخطة دفاع
اها بس ريكارد ده زيو ..
بالرغم من إنو ريكارد تخرج من المدرسة الفرنسية للتدريب التي خرجت الماكر جداً ارسين فينغر اذكى مدرب ربما اشاهده طيلة هذه الفترة ..
بالمناسبة مورينهو بالرغم من إنو ما لعب كورة إلا إنو زول شاطر جداً في التدريب ويحكى إنو مورينهو بقا مدرب بعد ما جابو جواب فصل لي ابوهو من فريق برتغالي وحينها الفريق مفروض يلعب نهائي ..
شاهد مورينهو الدموع في عيون ابوهو من ديك والراجل خت التدريب في راسو ...
مورينهو مشهور بي إنو احسن مدرب بيسجل ملاحظات واي شي لازم يكتبو في الورقة ..
قبل المباراة دوما يستخدم مورينهو حرب الاعصاب ويقال إنو بيلصق لي كل لاعب البنذ الاتكتب عنو في جرايد اليوم في دولابو ..
السير فريجسون ما خرّف والراجل مدرب كشيف يصنع من الفسيخ شربات فهوهو ساها الاحرف حالياً وهاهو روني ملك الهجوم وهاهو فليتشر وفيدج و اوشي واللاعب الموهو الن اسميث ..
فريجسون لا يهتم بالنجوم بعكس مورينهو الذي يهتم بالاسماء ويكفي انه اضاع اللاعب شيفشينكو وبالاك وخوفي على جو كول والفلتة روبن من عدم الاستقرار في التشكيل ..
ايسيان هو اللاعب الوحيد المميز في تشيلسي حالياً إضافة للحارس المصاب بيتر جيك ..
فنون التدريب العالمية دوما ما ينالها المظلمون في التدريب وهم الالمان والمتابع للدوري الالماني يكتشف شطارتهم ورغماً عن ذلك هم بعيدون عن تدريب الفرق العالمية ..
تيجانا كان مدرب شاطر وهو يصنع من فريق فولهام قوة ضاربة في الدوري الانجليزي ..
المدرب اللذيذ كان هو المدرب فياللي حين كان مدرباً ولاعباً لي تشيلسي ..
يعني عاااااادي جداً تلقاهو مدرب وفجأة يلبس الهدوم ويطلب التغيير ...

لسة مستمتع معاكم ..

ما شاء الله عليك يا عمر

ياخى إنت جد والله كنز معلومات متحرك، وعندك إلمام جميل والواحد إستفاد منك كتير

فى معلومات كتيرة الزول ما كان فارزها والله

لكين قول لى نحن فاضين من عشق البارشا

بس ياخى ولو ربنا يهيدك وتنضم لينا

نكون كسبنا "كادر جماهيرى وتثقيفى" هام جدا

على كلام اصدقائنا الشيوعيين

رايك شنو "نسلفكن" ريكارد ده يمشى يجدد ليكم شباب اليونيتد وترجعوهو لينا تانى

بس يكون سريع

لأنه إحتمال ناس الريال برضو يحتاجو ليهو

كابيللو قال ما قادر يقعد فى مدريد لأنه المكرونة بتاعة الإسبان ما عجبتو

أهاااا يا أبو ذر جيت لحكاية زعيم دي وبتخلينا نقوم نقول ليك دي الوحيدة الما عليها خلاف في العالم ، الفريق أداءه تعبان اليومين ديل أوكي ، بس هو زعيم أندية العالم بالأرقام : وقد نال شارة فريق القرن من الفيفا ،،

Quote: 1- عدد مرات الفوز29 مره وأكثر رئيس حقق لقب الدوري في عهده هو سنتياجو برنابيو-35 سنه-16لقب 2-أكثر مدرب حصل على إنجازات مع النادي هو ميجيل مونيس-9 ألقاب 3-أكثرلاعب حصل على ألقاب مع النادي هو اللاعب خينتو-12 لقب 4-أكثر لاعب استطاع أن يحرز أهداف في موسم واحد هو اللاعب هيوجو سانشيز-38هدف 5-أكثر عدد للإنتصارات بموسم واحد 18 فوز-موسم1987/1988 6-أكثر مده لعبها النادي دون خساره في ملعبه من المرحله 23 في موسم -1956/1957-إلى المرحله25 من موسم-1964/1965(يعني لمدة ثمان سنين) 7-المواسم التي استطاع الفوز بكل المباريات على ملعبه 1959/1960-1962/1963-1985/1986 8-موسم كامل بدون أي خساره 1931/1932 9-أكثر أهداف سجلت بموسم واحد 107 هدف في موسم-1989/1990 10-أكثر موسم استطاع فيه الفريق تسجيل أكبر عدد من الأهداف بملعبه 78 في موسم-1989/1990-بمعدل 4 أهداف في المباراه 11-أقل موسم استطاع فيه الفريق تسجيل أقل عدد من الأهداف بملعبه 8 أهداف في موسم-1994/1995 12-أكبر عدد من المباريات تم لعبها في البرنابيو دون خساره من فبراير-1957-إلى مارس-1965-يعني 114 مباراه متتاليه 13-أكثر لاعب مثل النادي من 1983 إلى 2001 14-أكثر لاعب سجل أهدافاً للفريق ألفريدو دي ستيفانو من موسم -1953-1964-308 هدفاً 15-أكبر فوز بالدوري 11-1 على فريق إلتش في 7فبراير 1960 16-أكبر فوز بالكأس 11-1 على برشلونه في13 يونيو 1943 17-أكبر خساره بالدوري 8-1 من إسبانيول في 3 مارس 1930

- دوري أبطال أوربا : (تسعة مرات مقابل مرتين لبرشلونا)
-الليغا (29 مرة مقابل 17 لبرشلونا)

لا بقى عاد فى الإنجازات والبطولات دى ما حنقدر نقول أى شى يا عبد اللطيف

الحق يقال

فى دى إنتو "البريمو" طبعا

شايف الأيام دى جماعتكم مخرخرين قالو كيف "اراغونيس" ما يضم راوول غونزاليس للمنتخب

إنتو كمان ما تبقو كعبين للدرجة دى

يعنى هسه راوول تانى عايز يعمل شنو للمنتخب

ياخى دولة فيها أقوى وأمتع دورى فى العالم كله، ولا تصل الأدوار قبل النهائية فى كاس العالم إلا مرة واحدة بس لو ما أكون ناسى

لازم يجو شباب جداد وسيبكم من راوول البقى فته ده

تصدق يا أبو ذر أنا يعجبني جدا اللاعب راؤول لأنه لاعب من طراز فريد،، لاعب سكن قلوب المدريدين وإعجابهم به وصل الحد (وقرضوا على كدا) ، راؤول مهما يكون سيء لا تسمع أحد يصفر أو يسيء إليه،، راؤول تراه يتدرب أكثر من اللاعبين ، تراه يجري في الملعب رغم تراجع مستواه ،، لا يكترث للنقد في الجرائد ولا يرد علىيها ،، راؤول إعتلى سلم المجد الكروي وخلف بتريغنيو في ريادة الإعجاب مدريد،، لا يتكبر على المدربين وشخص مؤدب للحد البعيد ،،

-هو اللاعب الذي لم ينال بطاقة حمراء حتى الآن ولم يخرج مطرودا في أي مبارة للريال وقد لعب منذ عمره 17 سنة،،

- تراه يشحذ همم اللاعبين داخل الملعب ويركض بلياقة لا تعرف الفتور،،
- رغم نجوميته إلا أنه أسري ومحافظ ويهدي جل أهدافه لزوجته وتوائمه ،، ورجل مجتمع من الدرجة الأولى يشبهه في البارسا إكزافي ،، ودائماً يتعامل مع المنافسين بعقلية الكبار، ومتزن في تعليقاته،،
- أكبر هدافي دوري الأبطال ، وأكبر هدافي أسبانيا ، وشوف على فكرة يليه من : فرناندو هييرو ومورينتس،، تصدق؟
-يظهر دائما في المناسبات الكبيرة ويسجل : إلى الآن ثلاثة أهداف في الليغا أتلتيكو مدريد ، برشلونة ، وفالنسيا،،

هذا اللاعب خلوق ويستحق الإعجاب والتكريم من كل محبي كرة القدم الراقية،، يعني موش زي كرويف دائماً يقحم نفسه في تعليقات متعجرفة تسيء للاعبين والإداريين وحتى المدربين ، ويسير على نفس هذا النهج إيتو في نهاية الموسم السابق يوم صاح : الأبطال في برشلونة والأغبياء في مدريد ،، فرد عليه غوتي وراؤول رافضين إدانة تصرفاته قائلين : حقق إنجاز ومن حقه أن يفرح ، وعند الفرح دائماً تتفلت الكلمات ،، هو صديقنا وقد فرحنا لفرحه ، فما كان إلا أن أعتذر لسكان مدريد،، تخيل لاعب أجنبي في دول يسيء لسكان عاصمتها ولا يعاقبونه : بل يصفقوا له حين يسجل ضدهم : أخلاق الملوك ياكتولنيا ،،

نأسف للإطالة ، وياجماعة البورد سامحونا إذا تجننينا على الباندودث،، الكرة لغة جميلة وتباعد بيننا وبين الشقاق والإحتراب إلا في المنافسات الشريفة وبالطرق الشريفة أيضاً،،
ولكم معزتنا ،،

لا تنسى وعدك يالفاروق،،

تحايا وسلام يا عبد اللطيف

أنا متفق معاك والله تماما

راوول لاعب أخلاقه عالية جدا وإنسان مثالى وقائد فذ فعلا

أنا طبعا بحب أناكفكم ساى بس

لكين ما ننسى إنه برضو خلاص فى اللحظات الأخيرة فى الميادين

وكل أول ليهو آخر زى ما بقولو

تعرف لفت نظرى لى حاجة مهمة والله

Quote: وياجماعة البورد سامحونا إذا تجننينا على الباندودث،،

هسه الجماعة تلقاهم يقولو، ياخى كورة شنو ونضمى فارغ بتاع شنو

الناس فى شنو الحسانية فى شنو

وأنا معاك برضو بعتذر لكل الناس لأننا استغلينا مساحة كبيرة متاحة

لكين إن شاء الله هم وبكرى كمان يعذرونا

على الأقل دى أول مرة الزول ينضم فى الكورة

تحياتي للناس الهنا كلها ..

يا مطر والله عمر الفاروق دا يشبكك كده لمن تختنع زاتو ..
ويغالطك لي بكره لمن روحك تمرق اصلو حارس الكورة دي ما بفوت منها شبر ..

بعدين نجي لي رأيكم في العجوز بويل الزول دا مرات يكيفك ومرات تخت يدك في قلبك ..
ولو جينا لحاجة بسيطة بنلقى خطوط الدفاع في الفرق فيها ضعف لدرجة كبيرة ويمكن طرق اللعب هي البتغطي على هذا الاشكال فنجد طريقة 3-6-1 او طريقة 4-5-1 هي السايدة لذلك نجد العددية زائدة في خط الوسط مما يساعد على الرجوع ومساندة الدفاع مع تقدم طرفي خط الوسط لمساندة الهجوم عند الهجمة ..
وفي حالات كتيرة نجد الجماعية في اللعب كتيم ويرك بتغطي على ظهور النجم إلا من القليل ودي بيركز عليها المدربين كتير جداً ..

أتحفتونا بكلام جميل ..
بجيكم تاني لقصة هدف رونالدينو ..

إزيك يا معتصم وكيف الحال

أها العيد معانا السنة فى البلد ومافى طريقة

طبعا إنتو ناس الشغل البراكتيكال ما بنقدر ننضم معاكم

المهم يا زول أنا السنة دى بإذن واحد أحد حأكون عضو مسجل وكامل العضوية فى برشلونة

صلح علاقتك معاى شويه عشان أكلم ليك الجماعة

حأقول لى ريكارد عندنا واحد قريبنا ممكن يمسك ليك خط الضهر وينجمو ليك تماما

تانى راوول ونستلروى ما يشموها

بعدين زى ما قلت عمر الفاروق ده زول عكليته جدا، يا ريته لو كان برشلوناوى

لكين فارز الشغلانة تب وشغله نجيض

تسلم يا عمنا

راؤول غوانزاليس لاعب فنان وحريف ولكنه في الاونة الاخيرة تراجع في المستوى ..
عن نفسي أرى السبب الرئيسي كان في الخانة الجديدة التي حاول المدربون البرازيليون وضعه فيها بعد أن استجلبوا رونالدو في وجود روبينهو فحاولوا وضع راؤؤل خلف المهاجمين في حين انه مهاجم صريح ولاعب قناص يحرز اهداف من انصاف الفرص..
يشاع ان تدهور راؤول في فترة من الفترات كان سببه الصدمة الأسرية (لا أدري إن كانت إشاعة) حين وجد زوجته مع شخص اخر في السكن وحينها ربما كانوا منفصلين (غير متأكد من الخبر) عشان ما يجوني المستنيرين ويقولوا لي نطالبك بإعتذار
راؤول وغوتي عندهم مشكلة زي مشكلة بيول وهو تشددهم في الكابتنية بحكم انهم ابناء النادي وهو الحال في معظم النوادي الاسبانية بحيث يبدو انها شبه قانون عندهم لذا تجدهم اكثر ميولاً للاعب الاسباني اكثر من الاجنبي خصوصا اللاعبين الكبار..
في اسبانيا اللاعب فيرناندو توريس لابع فنان وصغير في السن ..
ريال مدريد يجب ان لا نتجاهل فيه الحارس كازياس الذي يتحمل عبء الفريق حتى والريال في اسوأ حالاته ..
راموس يا ابو ذر لاعب مقاتل وهو من اغلى مدافعين العالم مع ياب استام وريو فيردناند ..
ونلاحظ دوماً ان اسعار الاعبين ترتفع عند المهاجمين ولاعبي الوسط في حين أنه من المهم وجود مدافع من الطراز العالي..
ريال مدريد وبرشلونة يفتقدون لمثل هؤلاء المدافعين خصوصا في العمق ..
فلا نجد لاعب مثل نيستا ولا لاعب في قامة فيردناندوحتى الحبيب توري الساحل عاجي ..
بالمناسبة الريال حالياً ومن حيث الاداء افضل بكثير من برشلونة في وجود المدرب الصارم فابيو كابيلو والذي لا يعرف كبير في الكرة ..
ومع الزمن سيعود الريال لوضعه الطبيعي واراهنك يا ابوذر ان الدوري هذا العام يسعود للنادي الملكي ولجماهيره ..
ولا تنسى ان فارق النقاك سنعوضه في لقاء الاياب في كتالونيا

المطر
اول تبادى داخل اسلم عليك،طولت منك جدا.
تانى شئ: اها اتلاقينا في حب بارسا, تعرف الماتش ده فاتنىlive بسبب المدرسة لكن جيت ساهرت للصباح للاعادة ومشيت تانى يوم الشغل وشي ينعل قفاى لكن مبسوووط... الولد عجيب , لعاب لمن غلط ... شين لمن سح... يضيع القون ويديك ضحكة تمسح كل الزعل.
تعرف المقارنات بين اللعيبة العظام ديل غير ممكنة يعنى مارادونا و بيليه و زيدان و رونالدينهو و غيرهم كل واحد براهو, طعم مختلف, غير انو المستوى والخطط و القدرات البدنية في كل زمن مختلفة جدا، لكن تحت تحت كده مارادونا (God's hand) ما اظن يجى زيو.
في لعيبة ما تفهم نظرية المدربين فيهم شنو، زى سافيولا ده، حريف و هداف و ممتع... يختو كنبة و يلعب قولى!!!!! او جو كول ود زى النبق، انا لو مدرب اختو اول زول و بعد داك اعزل ال10 الباقيين.

عمر الفاروق, بي صراحة طلعت كورنجى اصلى، رغم انك مرة مرة بتصرجا و تناقش زى هلال/مريخ ....

Quote: ياخ تيم جاااااااااهز بس تقول ليهم خشوا العبوا كورتكم البتعرفوها .... ريكارد ده بيزكرني بي مدرب زمان عندنا في الناشئين بيجي يلمنا في نص الميدان ويقول عايز يدينا الخطة ..

اسه ده كلام ده؟ ياتو فريق في الكبار ديل ما تيم جاااااااااهز ؟؟؟؟ و ده الفرق بين المدربين، يعنى زى مورينيو ده من لا شئ جاب لى بورتو الكاس, و ريال مدريد لانو واحدة من مشاكلو التدريب ما قادر يجيب بطولة للان، عليك الله عشان نستمتع زياده نوع الكلام خليهو لما تدورو هلال/مريخ ...
ريال مدريد ده لو فيهو زول عاقل بفكو زى ماكاليلي و مورينتس و فيقو؟ و يشترو بيكهام ،ديل ناس قروشهم محرقة روحهم ساكت....

ابوظ ليكم الونسة بالسياسة, هاكم دى قصة حقيقية, صاحبنا (بعيد عنكم) شيوعى اسمو بهاء من بحرى، في مناسبة و الناس ملمومة و بتونسوا جات السياسة صاحبنا قام يدافع عن الحزب الشيوعى، بعد فترة الونسة خشت في الكورة صاحبنا طلع بشجع التحرير، في واحد مسلط قام قل ليهو" انت يا ابن العم حكايتك شنو؟ مؤيد ليك حزب ما بصل الحكومة و بتشجع فريق ما بشيل الدورى"

اها ...

عصام يا جبر الله

يا البيك نور إقليمك

ويا العارفنى كم بتعب بعيد عنك وبتألم

ثم

يا روحى سلام عليك

يعنى معقول يا عصام تطلع ما بتريد البارسا، دى ما بتجى أبدا

خايل فيك والله العشق الكاتالونى

تصدق أمس الثلاثاء الجزيرة الرياضية أعادت المباراة تانى، وبرضو شفناها بى عيون تانية وتذوق تانى

بقت عاملة زى حفلة الصبحية، مافى توتر طبعا ورفسى زى المرة الأولى

بعدين أنا غلطت فى وقت الهدف الجهنمى ده، الحقيقة كان فى الدقيقة 86 ونص مش فى الدقيقة 83

Quote: تعرف المقارنات بين اللعيبة العظام ديل غير ممكنة يعنى مارادونا و بيليه و زيدان و رونالدينهو و غيرهم كل واحد براهو, طعم مختلف, غير انو المستوى والخطط و القدرات البدنية في كل زمن مختلفة جدا، لكن تحت تحت كده مارادونا (God's hand) ما اظن يجى زيو.

صحيح صحيح يا حاج

عاملين زى الفنانين والموسيقيين والرسامين، كل واحد عنده نكهته وطعمه

هسه بالله "جو كول" ده مش زى طعم الفراولة بالحليب

بعدين إنتو ناسين زول حلو جدا اللى هو المعلم "استيفن جيرارد" الليفربولاوى البسوى البلاوى

زول هادى وأنيق وتشوفه بلعب ويجيب الأهداف زى القاعد يكتب ليهو فى قصيدة

والله غايتو يا عصام ربك ستر، غايتو لو كان طلعت "مدريداوى" كان يكون عليك هدى وكفارة

ولا بالميت كده، إلا تصوم الدهر عشان تمسح الذنب الشنيع ده

هل تصدق بى سبب الريال أنا زمان كرهت ليك غناال Spice Girls

بس "كجنه" ساى للموديل الإسمه بيكهام ده

ياخى "مايكل جوردون" المجنون العجيب داك بتاع "شيكاغو بولز" قال إنه بموت فى برشلونة

تانى نحن نقول شنو

زمان تلقى مكتوب ورا البكاسى واللوارى السفنجة

"خلوها يا حساد"

على الطلاق يفوت منهم "كازياس" ده

تانى ديم سلمان يديهم أربعة

عصام جبر الله :
والله رغماً عن عكلتك معاي لكن الليلة ضحكتني ضحك السنين..

Quote: ابوظ ليكم الونسة بالسياسة, هاكم دى قصة حقيقية, صاحبنا (بعيد عنكم) شيوعى اسمو بهاء من بحرى، في مناسبة و الناس ملمومة و بتونسوا جات السياسة صاحبنا قام يدافع عن الحزب الشيوعى، بعد فترة الونسة خشت في الكورة صاحبنا طلع بشجع التحرير، في واحد مسلط قام قل ليهو" انت يا ابن العم حكايتك شنو؟ مؤيد ليك حزب ما بصل الحكومة و بتشجع فريق ما بشيل الدورى"

والله زولكم ده زول مسلّط خااااااااااااااااااااااااااااالص..
ياخ معقولة في زول بيشجع التحرير !!!!!!
والله زولكم ده بيزكرني اخوي الكبير ما عندو فريق معين بيشجع حسب مزاجو ..
مرة كده أهلي مدني جا الخرطوم عمل شغل كويس بعد يومين لقيت ليك اخوي بيشجع اهلي مدني
بعدها بي إسبوع جا الهلال أداهو 8 ...
معليش للتعريجة والرجوع للمحلية ..

بالمناسبة يا عصام ضحكة رونالدينهو ضحكة مفتعلة وهو لاعب غير مبستم بالمرة ولاحظ ذلك عندما يكون رونالدينهو سئ ويقدم مردود بطال في المباراة تجده لاعب زهجي ونيرفز ولاعب اخلاقو بطالة ...
رونالدينهو من اكثر اللاعبين المهاجمين اللي بنطردوا في المباريات وله حصيلة ممتازة من الكروت الحمراء ..

Quote: اسه ده كلام ده؟ ياتو فريق في الكبار ديل ما تيم جاااااااااهز ؟؟؟؟

مانشستر تيم ما جاهز ورغماً عن كده السير فيرجسون بيعمل منو تيم كل سنة بي شكل ..
بالله عليك يا عصام اسة كان ادوك برشلونة ده ما بتشيل بيهو كأس ؟؟؟
بالمناسبة انا زييك كده بحب جداً جو كول وبخاف جداً لمن يكون لاعب ضد المان يونايتد ..

يا معتصم :

Quote: ولو جينا لحاجة بسيطة بنلقى خطوط الدفاع في الفرق فيها ضعف لدرجة كبيرة ويمكن طرق اللعب هي البتغطي على هذا الاشكال فنجد طريقة 3-6-1 او طريقة 4-5-1 هي السايدة لذلك نجد العددية زائدة في خط الوسط مما يساعد على الرجوع ومساندة الدفاع مع تقدم طرفي خط الوسط لمساندة الهجوم عند الهجمة

تعرف يا حبيب الخواجات ديل ملاعين خلاص ..
يجربوا ليك خطط جديدة ويجو العرب يمسكوا فيها زي الهبل والغريبة الخواجات يسيبوها طوالي..
تعرف يا مان كل العالم لف ولف ولف وجا رجع لي 4-4-2 ولقاها هي الخطة الوحيدة المثلى لاداء المباريات وبعد كده جواها بيقسم الخطة على حسب فمثلاٍ يلعب بي 3 في النص وواحد خلف المهاجمين أو اتنين ارتكاز واتنين وسط مهاجم أو 3 موسط مهجم وواحد ارتكاز ..
الغريبة السودانيين جو شبطوا ليك في اكتر خطة سيئة وفاشلة 3-5-2 والاغرب انها اكتر خطة عايزة لياقة بدنية ونحن اكتر ناس لياقتنا في الواطــــــة ..
تعرف يامان عشان تعرف التجريب ده حاجة ما ساهلة قبل كده حضرت لي شريط بتاع الحصص التدريبية لي فريق مانشستر يونايتد حاجة لمن تخلعك وتخليك تأمن عدييييييل كده ..
بيجيبوا ليك جملة تكتيكية بيعملوها في التمرين لتسجيل هدف والبيخلعك بيقوم الشريط يجيب ليك مباراة تم فيها تنفيذ الخطة دي وجا بيها الهدف بالكربون من التدريب ده ..
من وقتها وانا عرفت ليك إنو ماف قوووون عند الخواجات ديل بيجي حظ !!!
كللللللللللللللللللو تدريب ...
يا حليلنا نحن الكورة تدق في ساقك تخش تضربا هيد من الشهداء تغير في حفرة وتخش تشوتا من الواق الواق تخش ..

الباشمهندس بكري ابوبكر
كتر خيرك كتير
وياها المحريا فيك
والله يرفع مراتبك لي فوق كمان كمان
زي ما اتفضلت علينا برفع هذا البوست عاليا
وشكرا لك مره اخرى

ودي واحترامي
ناصر موسى

Quote: الباشمهندس بكري ابوبكر كتر خيرك كتير وياها المحريا فيك والله يرفع مراتبك لي فوق كمان كمان زي ما اتفضلت علينا برفع هذا البوست عاليا وشكرا لك مره اخرى

تصفيق شديد

وبعده إنحناة وتبجيل للمعلم الكبير بكرى

وشكر شديد لمشاركته معانا فى الإحتفاء بالكورة الأصلية السمحة

وشكر أشد وطأة ليك يا ناصر

وفى الأفراح دائما إن شاء الكريم

العزاز كلكم

تحياتى

بجيكم راجع بعد شوية كده

ولحدى الوقت داك

تأملوا معاى

تأمل فى سطح الراهن الرياضى السودانى

Quote: ريكارد ده بيزكرني بي مدرب زمان عندنا في الناشئين بيجي يلمنا في نص الميدان ويقول عايز يدينا الخطة .. اها نتلم في شكل دائرة عشان نشوف الخطة .. بس بيقول لينا : الخطة الليلة هجوم يلا قومو الكورة الجاية يقول لينا: الخطة دفاع اها بس ريكارد ده زيو

عمر الفاروق والله ضحكتنى ضحك

ذكرتنى فى كاس العالم القبل الفات لمن جابو لينا فى التلفزيون مدربينا يحللو الكورة

الواحد يقول ليك لالا كارلوس البرتو غاطان لاعب بى ارتكاز واحد والمفروض العمق الدفاعى للوسط ما عارف شنو


وهم ياهم زاتهم ناس قومو الخطة الليلة دفاع

والله يا جماعة نجوم الزمن ده محظوظين للتطور الاعلامى الحاصل والله فى لاعبين زى كرويف وبلاتينى لو لعبو اسة يورونا العجب

بعدين فى راى الشخصى مع احترامى لمحبى الريال فريق برشلونة بلعب كورة قدم حقيقية على عكس الربال الانا بعتقد انو فريق بتاع (show business)
يعنى بهتما بالتسويق والعقود الدعائية اكتر من الكورة فى الميدان
والدليل على كدة تفضيلهم لى بيكهام على رونالدينهو
والسبب واضح

Quote: الباشمهندس بكري ابوبكر كتر خيرك كتير وياها المحريا فيك والله يرفع مراتبك لي فوق كمان كمان زي ما اتفضلت علينا برفع هذا البوست عاليا وشكرا لك مره اخرى

وأنحا كمان بندعو ليك يابكري ، وبعد دا عاد تعبت معانا ، عرفنا الدرب وأخونا ناصر حالف مايرد لينا طلب وطلبه عندك عزيز وغالي ،،

أبو ذر الرائع ،،

Quote: هسه الجماعة تلقاهم يقولو، ياخى كورة شنو ونضمى فارغ بتاع شنو الناس فى شنو الحسانية فى شنو

زمان حضرت مباراة في مدينة أم بادر (ام بادر ياحليلة) كانت بين فريق الموظفين وفريق الناس،، والله أضحك في التسمية لمن انتهت المباراة،،
هسي ياخوي ماعندنا اي مانع نعمل مباراة بيننا (الحسانية) وبين فريق الناس ، ويكون الحكم طبيب CARDILOGIST قطع شك حناخدهم كلهم على الإنعاش ،،
كرة القدم متعة ، وأنا أسأل الله المغفرة وجهت أولادي وبناتي لتشجيع الكرة كأهون أمور التسلية هذه الأيام،،
الأخ / ماجد

Quote: بعدين فى راى الشخصى مع احترامى لمحبى الريال فريق برشلونة بلعب كورة قدم حقيقية على عكس الربال الانا بعتقد انو فريق بتاع (show business)

كلامك فيه شيء من الحقيقة ،، كرة القدم أصبحت صناعة ومكلفة ،، من الصفقات التجارية هل تدري أن ريال مدريد لديه 14 ملعب في منطقة بالديبيباس بضاحية العاصمة ولهم ملعب الفريدوديستفانو الآن يستقبل مباريات فريق ريال مدريد كاستيا (الدرجة الثانية)،، وهل تعلم أن ريال مدريد أكثر فريق يبيع لاعبين صغار السن لأندية أسبانية من خريجي المدرسة السنية ، معظم اللاعبين في الليغا تربوا على حساب الريال وتربطهم به علاقات متباينة بين الإمتنان له والحقد عليه ، لذا تجد الفرق كلها تتفانى في مباراة البورصة (ضد الريال) لإثبات الذات ورفع السعر ،،
هل شاهدت هدف روبيرتو سلدادو المعار لأوساسونا في الدقيقة 59 ضد الديبور ؟؟ فقد فضله الكثيرون على هدف روناليدنهو موضوع هذا البوست حيث علل بعضهم أن الأخير أتى والفريق متقدم 3 صفر ومن الطبيعي أن يتفنن اللاعب بهذه الطريقة ، أما هدف سلدادو فوالله حدث يمكنك أن تخلي ليهو بالك في برنامج الليغا الساعة 9 غرينتش على الجزيرة الرياضية،،
هذا التعليق سبقك إليه زيدان يوم أن بيع ميكاللي لشيلسي وجاء بيكهام: قال زيدان : الآن لدينا روولزرويس جميلة الشكل ولكن دون ماكينة،،
الريال فريق غني جدا ويختلف عن الفرق الإنجليزية حيث أنه مملوك بالكامل لمشجعي النادي ويعتبر هذا إنجاز لإدارات هذا الفريق المتعاقبة في تصدر القوائم الإقتصادية لجميع الأندية،،
نأسف أيضاً للإطالة ، وياابو ذر بتلعب في ياتو خانة في فريق الحسانية ،، التدريب لمعتصم إن أردنا تكتيك حديث وعلمي أو الفاروق ومن هسي الخطة دفاع،،

يا ماجد:

Quote: والدليل على كدة تفضيلهم لى بيكهام على رونالدينهو والسبب واضح

كان عندنا في الحلة بت شديدة شدة السنين وتقطع المصارين .. وعندنا برضو واحد شين شديد لكن مرطب رطوبة مبااااااالغة والقروش عندهم زي التراب وهو ابن شخصية معروفة ..
زولنا قام رسل أختو للبت الشديدة دي عشان قال عايز يحبها وكده ..
فما كان جواب البت الشديدة لي أخته :
هههااااااااي ..
قولي لي اخوك انتو كان عندكم الMoney نحن عندنا ال Honey


اها يا ناس برشلونة نحن كمان بنقول ليكم كده ..
انتو كان عندكم الزول البيجيب القروش بي شناتو دي نحن عندنا العسل كلللللللو

يعني بس معقولة رونالدينهو ده يطلع بي شناتو دي وما بيعرف كورة ?!!!! والله كان اتصيع صيعة وماف زولة ترضى بيهو إلا زولة مجبورة عليهو زي بت خالتو ولا بت عمتو ..

الغريبة وبي مناسبة الوجاهة دي فالمعروف للجميع إنو اجمل لاعبي كرة القدم هم لاعبو المنتخب الإيطالي ودوماً ما يكون في استقبال المنتخب الايطالي في اي جولة له في المطار كل بنات الدولة المضيفة ..يعني جكس بالهبل ..
بالله شوفو ناس نيستا وبوفون و مالديني وباجيو ..وفي اخر مسابقة لأجمل لاعبي كرة القدم كان نيستا في المركز الأول وطبعاً زولكم بيكون جا الطيش...

تم التعديل بسبب التكرار

Quote: وأنحنا كمان بندعو ليك يابكري ، وبعد دا عاد تعبت معانا ، عرفنا الدرب وأخونا ناصر حالف مايرد لينا طلب وطلبه عندك عزيز وغالي ،،

ابشر بالحيل
واتدلل زي ما داير وانت كل الافاضل الموجودين هنا

.................
للامانة يا شباب الواحد ما قادر يجاريكم في البوست ده خاصة واني بقيت غير متابع لكرة القدم مما فارقت السعودية وجيت امريكا والاسباب كثيرة اولها فورقات الوقت الرهيبة .
لكن الحمدلله قدرت احضر المونديال الاخير 2006 لاني كنت في اجازة بارض الوطن ومن خلال تواجدي هناك تقريبا حضرت كل المباريات وكنت مشجع فرنسا لكن الله غالب ودقت في العراضة
المهم ما زلت مستمتع جدا بالتحليلات الرياضية الخطيرة منكم جميعا وادهشني عمر الفاروق لاني بشوفو شايت ضفاري طوالي مع ناس السياسة ولكن هنا لاعب بطريقة السهل الممتنع يللا يا شباب واصلوا الابداع ده وبدون نهاية

ودي واحترامي
ناصر موسى

Quote: كان عندنا في الحلة بت شديدة شدة السنين وتقطع المصارين .. وعندنا برضو واحد شين شديد لكن مرطب رطوبة مبااااااالغة والقروش عندهم زي التراب وهو ابن شخصية معروفة .. زولنا قام رسل أختو للبت الشديدة دي عشان قال عايز يحبها وكده .. فما كان جواب البت الشديدة لي أخته : هههااااااااي .. قولي لي اخوك انتو كان عندكم الMoney نحن عندنا ال Honey

والبت دى هسه وين يا عمر

عايز اشوفها لى أخوى الصغير

بس المشكلة أنا ما عندى أخو

لا صغير ولا كبير

Just Kidding

والله زى ما قال عصام ناس الريال ديل "ريالاتن" محرقه روحن ساى

أقول ليكم حاجه، بس ما تقومو فينى قومة رجل واحد

أنا والله لو فى مكان "كالديرون"

والله نستلروى ده لا بجيبه ولا شى

سيبك من مالو وعيبو شنو

تفتكر لو كان فيهو لسه باقى "رَقَشَه" كان فان باستن اداهو كرت أحمر

ناس الريال بموتو فى الأسامى اللامعة، حتى لو بقت فاضية من جوه

عاد ده ما فريق الملك

Quote: سيبك من مالو وعيبو شنو تفتكر لو كان فيهو لسه باقى "رَقَشَه" كان فان باستن اداهو كرت أحمر

وهاهو فان باستن دفع الثمن غالياً نتيجة الخلافات والاخطاء التي ارتكبها ...
نعم فان باستن لاعب كان ربما سيكون اسطورة القرن الحالي لولا الاصابة التي اوقفته وهو في ال28 من العمر ..
ونعم فان باستن كان هو الااعب والفتى الطائر والكل يتذكر له هدفه الطائر في الاتحاد السوفيتي في نهائيات 1988...
لكن فان باستن قدم لنا اسوأ اداء لمنتخب الطواحين والذي كنا قد اقتنعنا بأنهم اصحاب المدرسة الشاملة والاداء الجميل وكم كنا نزعل ونحرد لخروجهم من كأس العالم ..
فان باستن اخفق في اختيار التشكيل المناسب لهذا العام فتجاهل اهم لاعبي الوسط الخبرة امثال سيدروف وديفدز وان كان الاخير تراجع ولكنه في المنتخب غير..
فان باستن يخطئ مثل ريكارد باشراك فان بومان كلاعب متوسط ...
وفان باستن يشرك لاعبين انانيين يحتفظون بالكرة كما فان بيرسي و روبن ..
وفان باستن يشرك مهاجم ليفربول كيوت كلاعب اساسي وهو لاعب قليل الخبرة ويصر على عدم ادخال فان نيستلروي حتى يدرك التعادل على الاقل في مباراة كان يلعب فيها زائداً ..
نعم نيستلروي لاعب غير مهاري ولاعب عنصري اشتبك مع ديفدز كثيراً بعنصرية لكنه لاعب قناص يحرز الاهداف الصعبة ويجيد التمركز الجيد كما لاعب إيطاليا فليبو إنزاقي الذي قال عنه يوهان كرويف إنه لاعباً ليس لديه علاقة بكرة القدم لكنه افضل لاعب في العالم يعرف كيف يقيف داخل الميدان !!!
المنتخب الهولندي دوماً يكون الفريق الأكثر إكتمالاً وحضوراً من حراسة المرمى وحتى الهجوم بل والإحتياط ولكن لديهم مشكلة تدريب ..
وحتى في اليوم الذي كانوا فيه الاقرب فازت عليهم البرازيل بركلات الترجيح في مباراة وصفت بأنها مباراة القرن والتي انتهت يومها بالتعادل بهدف رونالدو وكلويفرت ..
بالمناسبة كل الفرق العالمية والمنتخبات لديها مشكلات في تغيير المدربين ولكن على الجميع ان يأخذ العبرة من المنتخب الالماني الذي لم يمر على تدريبه طيلة ال70 عاماً الماضية اكثر من ثمانية مدربين فقط ..
وربما هي اكثر فترة يتغير فيها المدربون الالمان هي اخر 8 سنوات بمرور فوجتس وفولر واخيراً كلينسمان والذين يستغيلون بأنفسهم لظروف خاصة وليس لأسباب تدريبية ..

لكزة بس

فووووووووووووووق

عوافى يا فاروق

تعرف الجماعة قالو لى شنو

قالو لى عليك الله عمر الفاروق ده كاويهو وزعلو كمان

لأنه "متى وضع عمامة عمامة التحفز" تعرفونه

كنزا لا ينتهى من المعلومات الثرة والجميلة

والله يا عمر كان لقينا لينا ود حلال وصل كلامك ده لى فان باستن

عسى ولعل يسمع ولو جزء منه، هو أولردى سمع الحتة بتاعة "سيدورف" قريبنا اللعاب ورجعه المنتخب تانى

اكتر لاعب "ممهول" فى الدنيا كلها ولعبه مرات يحرق الروح لكين لعب نضيف وحريف

ديفز "اب نضارة مش" لعاب لكين عنده شوية رواشه

غايتو قلت النصيحة يا عمر لى روبن، فعلا كان ليهو مراد يمشى هو يشوت ضربة المرمى ويجرى يستناها فى الدائرة ويباصيها فى الجناح الشمال، محل خانته يغنى، يباصيها هو برضو

ويحاور المساكين وناس النص والباقين كلهم ويشوت الكورة وتخبط فى الشبك الجانى ويمشى هو يجيبها من الآوت الخ الخ

زول حاوار وسريع لكين ما بلعب مع الناس عشان كده أهدافه شويه والضائع اكتر من الإتسجل

ولا شنو بالله

تعرف فان باستن عمل تيم ممتاز جدا بس مشكلته رف الكبار أو الخلاهم قعدو تلقاهم قاعدين فى الكنبة، حاول يخل فريق جديد كليا وأعتقد إنه نجح

شفت مباريات التصفيات للمودنيال كيف، هولندا اتاهلت بى وضع ممتاز

وهم والتشيك والبرتغال والله أنا كنت مرشحهم يكونو فى المربع

لكين لسه فيهم رجا

بس ما يرجعو نستلروى تانى

تعرف يابو امنة..

مش هنالك قصائد...بكتبها الشاعر ثم بجى رسام ويبدع فى نحته... مثلا زى بدوى ابو صلاح راسم قصائد ابوه كلها...فريع ياسمين متكى فى رمالو وبدور القلعة...وترسم ليك خواجية شايلة لها فرع فى ايدها..وتقول دى خواجية التى داعبت الغصن الرطيب..

اها انت عملت الصورة العكسية...
الساحر رينالديو رسم ذلك الابداع الكروى العجيب..وان كنت لم ارى رينو مئذ كاس العالم
اى كان غائب تماما فى كل مبارياته..حتى ظننت ان ابداعه كان تبعا للساحر الاسمر ايتو..
لانه كان يترجم كوره لاهداف..وصار يبحث طول غياب الاسمر لبديل..فوجده فى الصغير ميسى
بس كمان الاخير تعطل...فالدراويش ناس جولى..واخوته ينقصهم الكثير...برشلونة اخطاء فى فك
الاسمر السويدى ..لارسون..هو الوحيد الذى يمكن ان ينوب عن ايتو ويفهم رينو...

شكرا ليك على الابداع والحكى....تنجح معلق رياضى لكن صوتك كيف... مش زمان بقولو ليك الشاطر فى الرياضيات ممكن يكون شاطر فى كل المواد اها انت الليلة اثبت لينا ان المبدع مبدع فى كل شىء...الان لا يخالجنى شك..بانك ان ممكن ان تقل بالكرة مثل عمر الفروق...وتعمل دبل كييك بس مش مهم يجى قووووون بس ما تسمع كلامى دا وتمشى تعلب وتخلى الشعر...لووووووووووووووول
ايداع ابداع ايداع

وينكم يا شياب
عمر الفاروق اظهر وبان
ابوذر
عبداللطيف
وكل الناس الحلوين الهنا
يللا واصلوا سعيكم

ودي واحترامي
ناصر وموسى

حبيبنا ناصر

عوافى وسلام يا زول يا ناضر

يوم الخميس ده ياخى هو اليوم "البننجما" فيهو من مكابسة الشاشات والكيبوردات
عشان كده الواحد بلبد شويه

لكين قاعدين ومواصلين فى "المعسكر الرونالدينو" الجميل

تحياتى ليك ولكل الأعزاء هنا

إزيك يا ابوقوتة

أحييك يا ابوحميد وزارنا الأنس بى جيتك والله

رونالدينو زول مبدع عشان كده هو جدير بالإعجاب والتقدير

هسه نحن ما سوينا حاجة غير إنه نقلنا إبداعاته، وهى كتيرة جدا طبعا

وكلامك صحيح عنه هو وإيتو، تعرف الجوز ده خلق تفاهم عجيب وكل واحد بقى عارف التانى بفكر كيف، عشان كده بقو ثنائى مرعب جدا

الغريب إنه بعد الإصابة بتاعة إيتو، رونالدينو بقى هو الهداف ومع إنه طوالى هو البصنع الفرص للمهاجمين الصريحين، لكين ولا واحد منهم قدر يستوعب طريقته بشكل صحيح زى إيتو

هنريك لارسون السويدى ما قصر تب معانا وعمل العليهو وأكتر، وفعلا كان بجيب أهداف ما بقدر عليها إلا هو، بس عاد العمر وأحكامه وإنت عارف كرة القدم عندها سقف عمرى محدد إلا ما ندر وفى خالات خاصة طبعا اللاعب ممكن يقدم نفس العطاء بعد سن كم وتلاتين

أما عن صوتى فهو بالجد كده "صوط عنج" عديل، ما ينفع أبدا

زمان فى الجامعة كنت بهرب لما يقولو لى تعالى أقرأ ليك قصيدة أو كلمة، صوتى كعب جدا وما ينفع فى الإلقاء، والمزعلنى كمان إنه حافظ ليك أى أغنية سمحة فى الدنيا دى وأعزفها ليك بالعود، بس مجرد ما أفتح خشمى وأقول أغنى، أبوظ الدنيا كلها

شكرا كتير ليك يا زول يا أخضر

تحياتى يا معاوية وكيف أحوالك

آنست وشرفت وأسعدت بحضورك الطيب

وشكر كتير على الصورة

ما قدرت أشوفها لأنه الجهاز عندى البيت تعبان شوية

بكره إن شاء الله حاشوفها أكيد فى المكتب

ونتلاقى

مع حالص المودة والتقدير

الأخ أبو ذر

تحياتي

رباطابي شاف هدف رونالدينو دا قال : (علي الطلاق الواحد يركبو ليهو مرايات ما يجيب قون زي دا)


الحاج حمد

تحياتى يا حاج أحمد

قل هو الله أحد

الرباطابى عايز "يلجن" لينا الود ده ولا شنو؟

نحن هسه خائفين من "الرباطابى" الهنا معانا ده

كمان عايز يجينا رباطابى "من منازلهم"

أنقر الرباطابى الهنا منو؟

أسهل ليك السؤال

أول حرف منه

عمر الفا

يوم الثلاثاء عندنا أهم مباراة يمكن فى تاريخ برشلونة كله

وموقفنا عصيب جدا جدا جدا

فيدر بريمن الألمانى يكفيه التعادل عشان يمشى الدور التانى

المشكلة مش هنا، المشكلة إنه برشلونة لو ما فاز حيطلع عديل كده من المنافسة

وما تنسى إنه هو حامل اللقب

لكين نحن ياخى "كترة النِقة" بتخلينا

عوك عوك عيك عيك، عالم عيونها زى السم

غايتو ربك يستر بس

وشكرا ليك يا حاج على القفشة اللطيفة

والله يا معاوية بالغت عديل

تعرف المعلم رونالدينو بالعمة والشال ديل

بس تقول جاى ليهو من فاتحة أو عقد

مش قلت ليك الزول ده قريبنا

شوف الخِلقه كيف، والله كمان لو "ختيت ليهو سفه"

تكون كملت الناقصة

شكرا ليك يا زول يا وجيه

وما وريتنا أخبار حبيبنا عاطف

بي مناسبة لارسون دي يا ابو ذر:
مان يونايتد وقع مع لارسون عقد على سبيل الإعارة اسسسسسسسسة ..
وده مكسب كبير جداً للمان بالرغم من عامل السن إلا إنو لارسون لاعب ما ساهل ابدا..
ريكارد بكى عدييييييييييييييييييييل عشان يقعد الراجل ده وكذلك رئيس النادي إلا إنو لارسون كان قد قرر إنو ينهي مسيرتو في السويد...
لارسون لاعب مكنة أهداف وفي أي مباراة عندو كورتين في العراضة اقل شي..

الخبر التاني جماعتك ناس البرشا (إنبرشو) لي مسي وقالوا ليهو نديك 50 مليون دولار عشان تمديد العقد لي 8 سنوات ..

وده كلللللللللو ما بيحلهم من الملكية ...

الهدف كان بالفعل في غاية الجمال والسحر ... روعة لامتناهية وغير مستغربة من هذا المبدع
أتوقع أن يسجل كواحد من الأهداف التاريخية لهذا الاعب ولهذه الرياضة ... ولكن بالمناسبة فكرة الهدف تتشارك في الجمال مع هدف اللاعب إدميلسون البرازيلي في مرمى كوستاريكا في كأس العالم 2002 في كوريا واليابان الفكرة قريبة في التنفيذ ولكن أتوقع أن سرعة بديهة أدميلسون في تلك اللحظة تفوقت على رونالدينو هنا لأن إدميلسون تمكن من تغيير اتجاه الكرة في الهواء مباشرة ودون ايقافها ... هنا يتميز رونالدينو بدقة تصويب ووزنة الكرة في المكان الصحيح

لكن ياجماعة ده كلوا كوم واللي بيحرقني كوم لمن يجي واحد من السودانييين الفلاسفة الكبار في دنيا كرة القدم ويقول ليك انو رونالدينيو لايسوى شيئاً أمام ماردونا .... في حين أن ماردونا نفسه اعترف بأنه لم يكن يتوقع أن يرى في ملاعب كرة القدم لاعب كـ رونالدينيو على مدى تاريخ الكرة المستديرة!!! وبالفعل فـ رونالدينو لديه القدرة بأن يلعب بالكرة بقدمه بطريقة يصعب عليك حتى مجرد تخيلها بعقلك أو إعادتها مرة أخرى في الذاكرة بدون حدوث تشويش يؤثر على فكرتك البسيطة عن هذه البلاستيكية "المدورة" على قولة آولئك الفلاسفة....

لمحة بسيطة .... رونالدينيو نشأ من عائلة برازيلية فقيرة جداً ومنذ السادسة من عمره كان يداعب كل أنواع الكرات التي لم يصل مجموع أسعارها في تلك الفترة من حياتها إلى سعر خيط واحد من هذه الكرات التي يلعب بها الآن في الملاعب الدولية ... كان (مع والده) يحلمان بأن يضع قدمه أمام أنظار العالم وبالفعل وصل بإصراره وعزيمته وعشقه لتلك الكرة دون أن يتمكن من شراء فانلة تحمل اسمه لاعبه المفضل في أحد أيام حياته (لسوء ظروفه المادية) بل لبس إسمه خلف ظهره كأول محبٍ لنفسه .... وفي زماننا هذا يأتي مجموعة (أعتبرهم) من "أسوأ" من لمس الكرة في تاريخها ليعلقوا فشلهم اللامبرر والذريع وبلا خجل وفي كل المحافل الدولية على إمكانات السودان .... ممجدين تاريخم بمن سبقوهم ومتلقين هتافاتٍ ممن لايزيدوهم إلا استكباراً على استكبارهم ... تزيد أعمارهم عن أعمار أجدادنا الذين ماتو (متحسرين) على مستقبل الرياضة في بلادنا وعلى صوت هتافات جمهور يدفن الصغار الناشئين تمجيداً لعجائز أكل عليهم الدهر وشرب حتى تسمم بهم.....

ولكن لي رجاء بسيط لكل عشاق الكرة ... إن كانو في الرياض (السعودية) أو كانو زائرين لها فليزوروا مدرسة أمل السودان الرياضية والتي تضم مجموعة من الشباب الموهوبين على مستوى دولي ومشرف لكل السودان بشكلٍ عام (والتي أفخر بأنني أحد أبناءها منذ أول يوم في تأسيسها) وليشاهدوا عظمة هؤلاء الشباب الذين يصعب عليك متابعة وإيجاد الكرة في الملاعب أثناء لعبهم لشدة مهارتهم وسرعتهم...... ولكن أين المسؤولين منهم ... بكل تأكيد يشاهدون مبارة القمة بين الهلال والمريخ على التلفزيون ويهتفون لهم ..... وهذا زمانك يامهازل فأمرحي ...

أترككم مع هدف ادميلسون وأترك لكم التعليق واختيار الأجمل فيما بينهم ....

لكم أجمل التحية،،،


إضغط هنا لمشاهدة هدف إدميلسون



وبانتظار آرائكم ........

الهدف رائع لكن زيزووووو اروع

أبوذر والإخوه المتداخلين ,
يا شباب صدقونى ده هدف عادى
جداً عندنا زمان.. فى الكوره
السودانيه !!! والماشاف جكسا
والدحيش وسانتو وبشاره ما شاف
كوره, وكان لى االلعبه دى أنا
المسكين ده الما معروف لى زول
فيكم عملتها ! وراجع ليكم !!!
مامون

تحياتى يا ابا الطيب

Quote: ده هدف عادى جداً عندنا زمان..

خلاص يا سيدى، عادى عادى، ما دام إنت شايف كده

نحن قبيل طبعا قلنا إنه الموضوع مش مجرد كورة دخلت المرمى، المهم الفكرة فى حد ذاتها
الإستلام وتحديد الزاوية وعدم ال "شخطك بختك" المعتاد فى اللعبات الزى دى، يعنى اللاعب يغمض ويصوب، جات جات ما جات ما جات

جكسا ما سعدنا بى شوفته والله يا مأمون، لكين الدحيش وسانتو وبشارة وكمال عبد الوهاب وعلى قاقارين شفناهم طبعا، وما فى شك ابدا إنهم ناس موهوبين وخلقو أمجاد للكورة فى السودان، وفعلا الزول بيستمتع وهو بشوف لعبهم

وهم تقريبا كانو آخر الجواهر الفريدة وبعد داك، فحدث ولا حرج

شكرا ليك ياخى على الزيارة السمحة

زيزو رائع

لكين ناصر أروع

كيف الأحوال

تحياتى يا نادر وكيف الحال

Quote: أتوقع أن يسجل كواحد من الأهداف التاريخية لهذا الاعب ولهذه الرياضة ...

أكيد طبعا يا نادر، لازم يتخت فى راس القائمة كمان

Quote: في حين أن ماردونا نفسه اعترف بأنه لم يكن يتوقع أن يرى في ملاعب كرة القدم لاعب كـ رونالدينيو على مدى تاريخ الكرة المستديرة!!! وبالفعل فـ رونالدينو لديه القدرة بأن يلعب بالكرة بقدمه بطريقة يصعب عليك حتى مجرد تخيلها بعقلك أو إعادتها مرة أخرى في الذاكرة بدون حدوث تشويش يؤثر على فكرتك البسيطة عن هذه البلاستيكية "المدورة" على قولة آولئك الفلاسفة....

مش كده بالله

لكين البقنع لينا العكاليت الهنا ديل شنو

شكرا ياخى على هدف ادميلسون الجميل، وهو ولدنا طبعا، وأمس والله فى مباراة برشلونة مع ليفانتى، زهجنى زهج شديد، ريكارد لاعب بالإحتياطى وكلهم ما جاهزين، المسكين عامل حساب الألمان، يسوى شنو يعنى، يتقطع، زول خط هجومه كله مصاب ونص خط الدفاع برضو

هدف ادميلسون أجمل حاجة فيهو النقلات السريعة وبداية الهجمة من الخطير ريفالدو

طبعا هو "باك ورد" عادية أو تقليدية، لكين صناعته كانت أجمل منه

وتانى شكر كتير ليك يا نادر

Quote: مان يونايتد وقع مع لارسون عقد على سبيل الإعارة اسسسسسسسسة .. وده مكسب كبير جداً للمان بالرغم من عامل السن إلا إنو لارسون لاعب ما ساهل ابدا..

والله حالتكم بقت تحنن يا ناس المان

وصلتو مرحلة زى دى بالله

تعرف لارسون ده أكيد "فلّس" وداير ليهو شوية قريشات

على بالإيمان لو فتح خشمه ساى، كنا نحن سوينا ليهو "كشف" وكاتالونيا كلها كان ممكن تتبرع

أنا على ناس "ودراوة"

بخيت عليكم، على الأقل كده الواحد ممكن يشوف ماتشات اليونيتد

50 مليون بس؟

ياخى قول 500 مليون، وبرضها شويه

هو يعنى ميسى ده أساسا عنده تمن؟

بالله لما نقول ليكم البارسا فريق اللاعب الواحد صدقونا ،،
رايكارد متفلسف أكتر من اللازم ، والله شايف ليكم ساكت من لوبيز كارو

إزيك يا عبد اللطيف

أكيد طبعا "الريالاب" كلهم مبسوطين للتعادل الأمس ده

يعنى عشان "كارو" ده زولكم ولا شنو؟ هو فلاحته دى كانت وين لما كان مع الريال

قالو ليهو يا زول هوى إنت مستواك ما مستوانا، إتكل على الله

أها لا هو نفع ولا الجو بعده ولا حاج كابيلو ذاتو حيسوى ليكم حاجة

المثل بقول شنو يا عبد اللطيف

لا يصلح العطار شنو؟

بعدين الحكاية ظاهرة وواضحة

ريكارد لاعب أمس وعينو على البريمن يوم الثلاثاء، لو ما كده بالله بلعب سلفينيو وادميلسون وبيليتى وكلهم مصابين، زول لا عنده خط هجوم وحتى الدفاع أمس كان رواكيب بس، بويول المعتمدين عليهو ربك ستر منه أمس، بعدين أنا زمان قلت ليهم يا اخوانا "تورام" ده خلاص

هيز فاليديتى هاداولريدى اكسبيريد

كدى بس مره واحدة بس بيضو النية و أدعو معانا نتجاوز المشكلة الكبيرة بتاعة يوم التلاتاء دى

شغلانة حتكون صعبة جدا جدا، لكين ما دام رونالدينو معانا ما همانا وأكيد حيعملو المعجزة

أمس كان تدريب بس عبد اللطيف

ولو اسبانيول اتجدعن شويه وهزم لينا اشبيليه أو إتعادل معاهم برضو حنكون فى الصدارة

إنتو بس بيضو النية، عاملين فنايلكم البيضا دى