حروب السودان اليوم: هل هي فعلا ثورة الريف السوداني؟..

لم يتم ربط مدينة الدلنج ، و بعض من مدن جنوب كردفان بالشبكة القومية للكهرباء في السودان..و لكن الخط الناقل تجاوز الدلنج الى مدن اخرى مثل مدينة ابوزبد في غرب كردفان ..و المشروع مستمر غربا لغاية مدن الفولة..و بابنوسة الخ..!
و الكهرباء مهمة في حياة المجتمع البشرى..و هي واحدة من مشاريع البنية التحتية المهمة التي تشارك في تأسيس مشاريع اخرى مثل الصناعة و الري..و بالتالي تحقيق انتاج اعلا..!
لم يتم ربط مدينة الدلنج بالشبكة القومية للكهرباء.. لأن السبب الظاهر للجميع هو وجود حرب تدور في جنوب كردفان..و بالطبع الحرب هي سبب اساسي لتوقف أي مشروع لبنية تحتية..!
و الحروب السودانية.. هي واحدة من اخفاقات النخبة السودانية.. سواءا كانت في سدة الحكم..او في معارضة الحكم..فالنخبة السودانية تدأب دوما لأرتكاب الأخطاء القاتلة..و تصنع الحرب و تدعو المواطن ليتحمل اثارها..و ذلك في سبيل تحقيق انتصارات مرحلية تهم النخبة وحدها..!


كبر

النظام الحاكم يسوق للحرب بانها ضد مصالح شعوب السودان..و بالتالي يدعو الناس للوقوف معه.. الحركات المسلحة في الجانب الآخر.. تسوق للحرب بنفس السبب و انها تخوض حروب لتحقيق مصالح شعوب السودان و تدعو الناس للوقوف معها..و ما بين المبررين.. تضيع شعوب السودان سواءا بالمحو المباشر عبر القتل و الإبادة أو بتدمير المقدرات و البنيات التحتية التي يمكن ان يستفيد منها المواطن..!

و حتى تستعر نيران الحرب.. طفق البعض يتحدث عن ثورة الأرياف السودانية..تلك التي تنطلق من ارياف السودان و تتوجه نحو المركز في الخرطوم حتى تحدث التغيير..غض النظر عما هو هذا التغيير الذي يشكل هدفا غامض لا يستطيع ان يقنع مواطن او مواطنة في مدينة الدلنج مثلا لماذا لم تربط مدينته بالشبكة القومية لكهرباء السودان..؟ او لماذا لم تقم مصانع توفر العائد و فرص العمل و بالتالي تساهم في رفاهية ذلك المواطن و استمراره في الحياة..و ازدهار مجتمعه المحلي؟..
فحروب الريف المزعومة بانها ثورة ريف سوداني ، لم تشمل الريف السوداني كله..و انما تشمل ارياف دون الأخرى.. فهي الأخرى لها عنصريتها الخاصة في اختيار مسارح حروبها..!

كبر

و طالما نحن من ريف اكتوى باخطاء الحروب السودانية ، ولازال يدفع الثمن ، نتساءل: هل فعلا حروب الريف السودانية هي ثورة الريف السوداني؟.. هل الحرب يفهم اهل الريف في الشرق و الشمال و الوسط بانها فعلا ثورة ريف سوداني؟..هل يفكر اهل تلك الحروب بنقلها الى ارياف اخرى حتى يتساوي الجميع في التدمير و الخراب ليكون البناء المستقبلي يبدأ من الصفر؟..
و حينما ينتصر اهل الحروب الريفية تلك ، هل سيظل الحال في حاله؟ بمعنى اخر.. هل سيتم ربط الدلنج بالشبكة القومية للكهرباء؟.. هل يتم تعويض انسان الدلنج ماديا و معنويا بصبره على تلك الحروب؟..

كبر

ياكبر...حمدالله على سلامة الرجوع...متابع بوستاتك ومداخلاتك بأنتباه ألف...أى عالى... ويبدو أن الناس العاديين كانو مصدر خصب ووواسع لترانا بصوره أشمل...

لاأخفى عليك أن ثمة قلق خفيف ينتابنى على تلك الرؤى النقدية التى تبزلها هنا بموضوعية ثاقبة...فمازال هناك من يقف على أطراف الظاهرة السياسية فرحاً بما أتاه الله من (كيبورد)

Quote: لاأخفى عليك أن ثمة قلق خفيف ينتابنى على تلك الرؤى النقدية التى تبزلها هنا بموضوعية ثاقبة...فمازال هناك من يقف على أطراف الظاهرة السياسية فرحاً بما أتاه الله من (كيبورد)

حاتم..حبابك يا صديق

كتر خيرك على المرور من هنا..

كل الذي نود ان نقول.. انو يدوا المواطن فرقة شوية..و تكون اللعبة ثلاثية: نخبة حاكمة..و نخبة معارضة..و مواطن..!
سودان 1999 لحظة خروجنا ليس هو سودان اليوم في 2012.. هناك شوية حاجات حصلت..و اكيد بتغير في فهم الواقع..

الخمسة سنين يا حاتم (هدنة الحرب يين النخبة الحاكمة و النخبة المتوحشة)..احدثت فرق طفيف لأنسان تلك الأرياف المنكوبة..و المواطن وصلته بعض الحاجات..و الليلة بيستغرب كيف يعني زول يطالب بتدمير تلك الحاجات عشان نفس الزول يمشى يقعد في قصر غردون باشا..مثلما قعد من قبل..!
دواس النخبة ملأ عيونا بالغبار..و من عجب تقول ليك ثورة ريف..!
و اهلنا بيقولوا ابو القدح بيعرف وين محل يعضي اخوهو..و ناس الجباه الثورية قبل ده عضوا اخوتهم في الجباه الأخرى في الخرتوم..و اكلوا سوا و رقصوا سوا.. اليمنع شنو تاني يعملوا الحركة دي..و يدوا المواطن فرقة يرتاح شوية..ياخي ده نفسو انقطع من مساسقة الحروب الغامضة دي..!

كلام كتير في الراس يا صديقي..و مافي طريقة الإ نقولوا.. كن ترضى النخبة و كن تابا.. قلبنا ابى الحروب الغامضة بالله واحد..

و دمت يا حاتم..

كبر

Quote: هل فعلا حروب الريف السودانية هي ثورة الريف السوداني؟.

سؤال عقلاني و(قامد أوي )على قول جيرانا المصاورة ..
ويمكن يكون تحفيري لو بقى على شاكلة :
هل فعلا يشارك إنسان الريف المقيم مشاركة فاعلة بغية التغيير أو حتى تمت تهيئته لخوض غمارها ؟
أم أنه ترك الحبل على غارب بعض المثقفين والمهنيين والسياسيين لابتداع وقيادة ثورة التغيير باسمه؟
بعبارة أخرى هل يشعر إنسان الهامش الآن بحاجته الملحة للقيام بتغير أوضاعه السياسية والاقتصادية ؟
أم
أنه ما زال يستسهل اتباّع الطرف الذي يفرض هيمنته عليه ؟
بالتأكيد كمثقف أو سياسي سوف أهرب من الإجابة ..
لأنها سوف تكشف ضعف قدرتي الاستراتيجية ..
وفشلها في إقناع معظم إن لم يكن مجمل إنسان الهامش بضرورة التغيير.

ول أبا كبر

كيف حالك يا صديق.......

Quote: حروب السودان اليوم: هل هي فعلا ثورة الريف السوداني؟..

بالنســبة للســـؤال أعلاه فالاجابة قطعاً لا
لا لأن الريف نفسه منقسم على نفسه وغير متحد
المركز متحد حول مصالحه يمينه ويساره سنته وشيعته مدنييه وعساكره
كلهم متحدون حول مصالح مناطقهم وتنميتها عكس اهل الهامش
الذين يقدمون مصالهم ومصالحهم فقط
دخلت البوست وكنت أظنك ستغوص في تحليل هذا الأمر
ولكنني وجدتك تربط ثورة الريف بفذلكات المركز التي يدعي فيها
أن سبب عدم التنمية في الريف هو الحروب وعدم الاستقرار
الكهرباء والشبكة القومية وما الى ذلك هي بمثابة ترفيه لا أكثر
توفير الماء والغذاء والعلاج وتعبيد الطرق والأمن
أولى بكثير وأهم بالنسبة للريف من الكهرباء

Quote: لأن السبب الظاهر للجميع هو وجود حرب تدور في جنوب كردفان..و بالطبع الحرب هي سبب اساسي لتوقف أي مشروع لبنية تحتية..!

هذه دعوة الباطل للمركز والتي أريد بها حق وهو يرددها دوماً
يا ول ابا سعر تذكرة سفر بالطائرة الى الفاشر او نيالا او الجنينة
يقارب أو يفوق سعر تذكرة السفر الى السعودية او دول الخليج
بينما أي واحد من أهل المركز بامكانه الوصول الى قريته بمبلغ زهيد لا يتعدى ال 30 جنيه
فتأمل!
إذا لم تكن من المستطعين فعليك تحمل رهق السفر ومخاطر النهب المسلح
لكي تصل الى قريتك ...
الظلم والتهميش موجود وهو ما يولد الغبن لدى الريف او الهامش
ولكن كل زول مغبـــون بطريقته ويحارب من أجل قضيته
طريق الانقاذ الغربي له ما يقارب ال 23 سنة وهو يراوح مكانه
بينما تعمر الارض في الوسط والشمال فانظر الى الطرق والجسور والسدود
التي شـــيدت خلال هذه الفترة وهي الشاهد على الظلم والتهميش
وهي الوقود الدائم لحروب الهامش
وفي ذات الوقت لا يجب تحميل المركز كل اللوم فأهل الريف هم جزء من المشكل
تجار الحروب في المركز والهامش يتحملون جزءاً كبيرا من المسؤولية

برجع ليك كان الله هون

Quote: ويمكن يكون تحفيري لو بقى على شاكلة : هل فعلا يشارك إنسان الريف المقيم مشاركة فاعلة بغية التغيير أو حتى تمت تهيئته لخوض غمارها ؟ أم أنه ترك الحبل على غارب بعض المثقفين والمهنيين والسياسيين لابتداع وقيادة ثورة التغيير باسمه؟ بعبارة أخرى هل يشعر إنسان الهامش الآن بحاجته الملحة للقيام بتغير أوضاعه السياسية والاقتصادية ؟ أم أنه ما زال يستسهل اتباّع الطرف الذي يفرض هيمنته عليه ؟ بالتأكيد كمثقف أو سياسي سوف أهرب من الإجابة .. لأنها سوف تكشف ضعف قدرتي الاستراتيجية .. وفشلها في إقناع معظم إن لم يكن مجمل إنسان الهامش بضرورة التغيير.

ا

صديقي محمد على طه الملك..حبابك
كتر خيرك على المرور من هنا..و بعد..
ابدا يا صديقي الهروب لا يجدي..و انما يعني ان يترك الأمر لإجتهادات النخبة وحدها..خصوصا تلك التي تظن انها تملك حق الهي لا يقبل المساءلة في سبيل ممارسة وصايتها على الناس..و مثلما قلت لصديقنا حاتم اعلاه يجب ان تكون اللعبة ثلاثية الأبعاد..و يدخل المواطن طرفا فيها..بمعنى ان تم اتخاذ قرار الحرب سواءا من قبل السلطة الحاكمة او من قبل من يعارضها.. يجب ان تكون هناك فرصة للمواطن ليقول رأيه في الحرب لأنه هو وحده من ينكوي بنيرانها المباشرة..هناك ضرورة يا محمد لسماع حديث المواطن..و مثل هذا الحديث هو اللبنة الأولى لتكوين الأستراتيجية و التفكير في حل المعضلات الإجتماعية و السياسية و الإقتصادية..و هكذا يمكن ان نشكل المواطنة الفعالة التي تساءل الأمور ولا تقبل بها على علاتها..

التغيير يا صديقي يتميز بملامح محددة و معروفة.. انه حتمى ولابد من حدوثه ، و انه غالبا ما يكون مخطط له و لكن في معظم الأحيان يأتي تلقائيا ، و انه مثير للجدل ، و ان بعض التغييرات اهم من التغييرات الأخرى..و في نفس الوقت له اسبابه و دوافعه.. منها الصراع الإجتماعي بين مراكز الهيمنة ، و الأفكار المؤثرة ، و حراك التركيبة الديموغرافية للمجتمع ، و نشوء الحركات الإجتماعية التي ترغب في احداث التغيير وفقا لأجندتها الخاصة..مثل هذه الأمور يعي انسان الريف بعض منها ، و البعض الأخر لم يعرف عنه بعد..انسان الريف يا محمد (اتحدث فقط عن جانب الريف الذي رأيته و اعرفه جيدا) بالطبع مهيئ للتغيير و المشاركة الفاعلة فيه ، و لكن السؤال أي تغيير المقصود؟..فانسان جنوب كردفان لا تعنيه اجندة البعض مثل ازالة النظام الحاكم ، بقدر ما تعنيه فسحة يستجمع فيها انفاسه و يتابع اموره مثل بقية اهل السودان و يتفرغ للإنتاج و بناء الحياة.. نقول بذلك أن هذا الإنسان خرج من حرب طويلة الأمد و قبل ان يجمع انفاسه و يشم هواء العملية السلمية اجبر على الدخول في حرب اخرى..و حينما نقول الدخول ليس بالضرورة ان يحمل هذا الإنسان البندقية ، و انما بالضرورة ان يكون المستقبل الأول لأثار الحرب: عدم استقرار اجتماعي ، غياب بناء بنيات تحتية ، غياب الأمن و السلامة ، تغيير التركيبة الديموغرافية بالنزوح ، ارتفاع اسعار المعيشة ، الندرة في اسباب المعيشة بسبب الغلاء الطاحن..هذه المكونات لم يتم التهيئة لها و ذلك بخلق البدائل التي تجعل من الحرب عادلة حتى على مستواها المباشر..الحرب الأخيرة يا محمد.. بعض من عضوية الحركة الشعبية في الدلنج وجدت نفسها عارية و مكشوفة الظهر و تعرضت للإعتقال و التعذيب و التشريد..و كل ذلك لأنها لم تكن تعرف ان تنظيمها اتخذ قرار الحرب و المواجهة..العسكرية مع النظام..اما المواطن العادي فهذا غايب تماما عن الصورة..فانسان الريف لم يشارك حتى اللحظة في اتخاذ قرار الحرب حتى تسمى هي ثورة ريف..و لو سئل هذا الإنسان لقال الإجابات المقنعة عن فهمه للتغيير و كيفية احداثه بالصورة التي لا تؤثر على المكسب الضئيل الموجود و انما تسعى لزيادته..!

و هذا يقود الى تقرير نتيجة مفادها أن ما يسمى بحرب التغيير الدائرة الآن في السودان ابتدعتها النخبة السودانية في اطار تصفيات امورها الخاصة فيما بينها..النخبة وحدها من قرر ان تكون هناك حرب..و النخبة وحدها من قرر ضرورة الحرب و اخذت تستخرج لها التبريرات..و ذكر المواطن لم يأتي الإ من باب ذر الرماد في العيون و تغبيش الرؤي..ومواطن الريف يتساءل اليوم عن جدوى هذه الحروب الغامضة و اهدافها الحقيقية..و مثل هذا المواطن اهم له ان تدخل مدينته في دائرة الشبكة القومية للكهرباء اكثر من ان يتم تغيير الحكام في الخرطوم.. لأنه ببساطة يعرف ان النخبة السودانية نالت حظوظها و فرصها الكثيرة و لم تكتفي.. مواطن يسال يا صديقي: هل يعقل و منذ ذهاب المستعمر لم تتمكن النخبة السودانية من صياغة دستور تتفق عليه او نظام حكم تتفق عليه او نظام توزيع ثروة تتفق عليه؟..فالمواطن هنا ، ويحق له ، يرى ان النخبة السودانية نخبة غير جادة و انها تعيش في ابراج تجاوزها حراك الواقع اليومي..!

انسان الريف يا محمد ذكي و يفهم جيدا أن التغيير مسالة حتمية..و يعرف ان امور كثيرة تغيرت من حوله..و اليوم يفهم جيدا أن أي تغيير يحدث لابد ان يزيد على ما عنده من مكاسب او يأتي بافضل منها درجات..انسان جنوب كردفان مثلا.. حينما يلتفت حوله يجد الجامعة قد وصلت الى اقليمه في مدن مثل الدلنج و الفولة و بابنوسة..و يرى ان الطرق البينية سلكت في مناطق الإنتاج و بالتالي ربطه بالأسواق..و يرى ان الإتصال قد تيسر و سهل..فالمنتج يمكن متابعته بمكالمة تلفونية..و مكالمة تلفونية ممكن تحدد وضع الأسواق و هل تحتاج منتج معين ام هي مليئة بالمنتج..حينما خرجت من جنوب كردفان يا محمد يمكن ان احسب لك كل السيارات الموجودة في الولاية..و حينما عدت اليها في اكتوبر/نوفمبر الماضي..لا استطيع حساب عدد السيارات الموجودة في حي واحد (و انت ادرى ماذا يعني ان تمتلك الناس عربات)..المدينة لم تكن فيها فرص عمل في السابق..و اليوم معظم الشباب يجد صرفة لتكوين دخل بسيط يمشي به اموره..هل هذا تغيير ام لأ؟..

انسان يفكر في توطين زراعة تدر العائد النقدي.. مثل زراعة اشجار البن و الشاي ..و صناعة ترتبط بواقعه المحلي و تستفيد من الخام المتوفر فيها..فهل باقي انسان مثل هذا لا يعرف ما يحتاجه من تغيير حتى تجي النخبة السودانية و تقول له لابد من اشعال الحرب في دارك لإزالة النظام الحاكم و تأسيس التحول الديموقراطي في الخرطوم؟..و هو الذي يتساءل بخبث : هي الخرطوم دي ذاتها وين؟..

اما فيما يخص السياسي.. انسان الريف في جنوب كردفان عرف ان هناك حاجة اسمها فيدرالية..و ان الفيدرالية تتيح له ان يشارك عبر التمثيل المحلي..و غض النظر عما حدث و يحدث في السودان ، فانسان جنوب كردفان يعرف ان برلمانه الولائي في جنوب كردفان لم تسيطر عليه فئات مصدرة من خارج الولاية..و انما فيه ابناء و بنات الولاية..و ان المسئول الحكومي من مستوى المحليات و المدن لغاية المستوى الولائي هم من ابناء و بنات المنطقة..و الناس انخرطت في المشاركة السياسية..و هم لا ينظرون للناس بانهم مؤتمر وطني او حركة شعبية..و انما ينظرون اليهم انهم ابناءهم و بناتهم يديرون شئون ولايتهم.. فهنا المواطن في ذاك الريف يسأل: هل البندقية ستأتي باختراع جديد غير المشاركة في التمثيل؟..

و فوق ذلك.ز مواطن الريف في جنوب كردفان يعرف جيدا اداء بعض مكونات الجبهة الثورية التي تهيأت لها الظروف و حكمت الولاية في سنوات السلام الخمس..و هو اداء اقل ما يوصف بانه كان محزن للغاية..و اهل الريف يقولون جربناهم و من حقنا نقارنهم بغيرهم حتى لو خسر اهل الجبهة الثورية المقارنة..اليس هذا تغيير يا محمد.؟..و اليس هذا مواطن فاعل يفهم البيهو و العليهو؟..

ثورة الريف المزعومة..ليس لها خطاب متماسك تتوجه به الى كافة الأرياف السودانية..و ليس لها اداء و سلوك مقنع يرسل رسالة مفادها ان الحرب ضرورة للتغيير الذي يشمل كل السودان..انسان جنوب كردفان يعرف انه شارك في الحرب السابقة و ان ارياف اخرى حصدت الثمار سواءا بتوطين بنيات تحتية أو بتكوين دول مستقلة عدييل..و اليوم يقول: هل المطلوب ان اضحي في سبيل رخاء اخرين؟..

و دمت..

كبر

Quote: بالنســبة للســـؤال أعلاه فالاجابة قطعاً لا لا لأن الريف نفسه منقسم على نفسه وغير متحد المركز متحد حول مصالحه يمينه ويساره سنته وشيعته مدنييه وعساكره كلهم متحدون حول مصالح مناطقهم وتنميتها عكس اهل الهامش الذين يقدمون مصالهم ومصالحهم فقط دخلت البوست وكنت أظنك ستغوص في تحليل هذا الأمر ولكنني وجدتك تربط ثورة الريف بفذلكات المركز التي يدعي فيها أن سبب عدم التنمية في الريف هو الحروب وعدم الاستقرار الكهرباء والشبكة القومية وما الى ذلك هي بمثابة ترفيه لا أكثر توفير الماء والغذاء والعلاج وتعبيد الطرق والأمن أولى بكثير وأهم بالنسبة للريف من الكهرباء

ا


ول ابا امين..حبابك
كتر خيرك على المرور من هنا..

و يبقى السؤال لماذا اهل المركز متحدين حول مصالحهم و تنمية مناطقهم ، بينما اهل الهامش مختلفيين و ساكين مصالحهم؟..و ان كان الأمر مثلما قلت تغليب للمصالح الذاتية فوق المصالح العامة الولائية.. فهل تحقيق مثل تلك المصالح يحتاج كل هذه التكاليف الباهظة..؟..

بالنسبة لفذلكات المركز و تبريراته.. فلتكن هي كذلك..و لكن ماذا يقول الواقع يا امين؟.. الم تكن الحرب مستمرة في الريف مثل جنوب كردفان لمدة تفوق ربع القرن و اليوم لازالت مستمرة؟.. الم تكن الحرب في دارفور مستمرة لما يقارب العشرة سنوات ولازالت تستمر؟..

الحرب يا امين رسالة محددة و ذات غرض محدد..و يمكن أن تؤتي اكله من دون حاجة لإنتصار نهائي.. اللهم الإ ان كان الغرض منها ثأرات شخصية..اكتلوا فلان واكتلوا علان..!
اليوم يا امين اسألك (مثلما سألوني ناس الدلنج).. هل من يحكم في درافور هم خارج اهل دارفور؟.. هل نواب دارفور في البرلمان القومي هم من خارج ناس دارفور؟..

ابدا يا صديقي الكهرباء ليست مجرد ترفيه و توليع لمبات و تلفزيونات و شمعدانات.. الكهرباء يا امين بنية تحتية يحتاجها أي مجتمع يسعى لتطوير قدراته..الشوارع في الدلنج يا صديقي لم تنتظر الشبكة القومية..و عبقرية اهل المنطقة استفادت من الطاقة الشمسية وولعت الشارع ..ده لو كان توليع الشوارع ترفيه..و يمكن ان تسخر الناس هذه الطاقة بصورة اكبر..و التسخير الأول حدث في فرصة خمسة سنوات سلام..فتخيل لو انسان جنوب كردفان لي لقى ليهو عشرين سنة سلام؟..

الماء و الغذاء و الدواء..و تعبيد الطرق.. و هذه ترى اهميتها تفوق اهمية الكهرباء..و هو كلام جيد يا حبيب..و لكن؟..

مثل هذا الكلام سيضحك اهل الريف كثيرا..خصوصا ريف جنوب كردفان..عندهم مشكلة موية يا امين..موية مش موية شراب و بس و انما موية يحتاجون اليها في امور كثيرة..و قد شهدوا بحفر الحفائر العديدة..و مشاريع السدود التي تهدف الى توطين الماء لأغراض زراعية.. اما الطرق..فالولاية صغيرة الحجم نسبيا..و الطرق فيها سالكة .. زمان يا امين.. بنسافر من الدلنج الى لقاوة في يوم و نص..و اليوم تمانية ساعة فقط و انت تصل الدلنج.. ابوزبد كنا نحتاج الى ثمانية ساعات للوصول اليها..و اليوم ساعة و ربع انت بتصل ابوزبد ..و انسان المنطقة لا يفهم ان الطرق يسرت الأمر للمسافرين فقط..و انما يفهم انو لو عندك شوال طماطم ساكت ممكن تتصل ياتو سوق الكاشف: الدبيبات ولا ابوزبد؟..و تقوم تقنطع ليك في عربية اوتس انت و شوالك و تمشي تبيع عشان تعمل ليك فايض ربح بسيط؟..بالنسبة لينا نحن الشفنا البلد في 1999 و رجعنا ليها تاني ..بالنسبة لينا ده تغيير..و تغيير مهم للغاية..و بنسال التغيير المنشود ح يعمل لينا شنو بالضبط زيادة على ما عندنا من غير ما يدمر ما عندنا الآن؟..عشان الناس تكون على بينة من امرها و تهيئ نفسها لتغيير ايجابي..

يتبع..
كبر

Quote: هذه دعوة الباطل للمركز والتي أريد بها حق وهو يرددها دوماً يا ول ابا سعر تذكرة سفر بالطائرة الى الفاشر او نيالا او الجنينة يقارب أو يفوق سعر تذكرة السفر الى السعودية او دول الخليج بينما أي واحد من أهل المركز بامكانه الوصول الى قريته بمبلغ زهيد لا يتعدى ال 30 جنيه فتأمل! إذا لم تكن من المستطعين فعليك تحمل رهق السفر ومخاطر النهب المسلح لكي تصل الى قريتك ... الظلم والتهميش موجود وهو ما يولد الغبن لدى الريف او الهامش ولكن كل زول مغبـــون بطريقته ويحارب من أجل قضيته طريق الانقاذ الغربي له ما يقارب ال 23 سنة وهو يراوح مكانه بينما تعمر الارض في الوسط والشمال فانظر الى الطرق والجسور والسدود التي شـــيدت خلال هذه الفترة وهي الشاهد على الظلم والتهميش وهي الوقود الدائم لحروب الهامش وفي ذات الوقت لا يجب تحميل المركز كل اللوم فأهل الريف هم جزء من المشكل تجار الحروب في المركز والهامش يتحملون جزءاً كبيرا من المسؤولية

ا

كلامك عن تذاكر الطيرن معقول يا امين..و لكن السؤال كم من الوقت تحتاج انت و عيالك و عيال عيالك لتنتظر حرب ثورة الريف* لكي تؤسس لك صناعة طيران تيسر الأمور؟..و انت قلتها بنفسك ان ما يجبرك على الصرف الباهظ هو اختيار طريق السلامة و الأمن الشخصي..و هذه امور لو لم تكن هناك حروب دائرة في السودان لما احتجت لها..هل لو انتصرت الجبهة الثورية مثلا.. ستبدأ بتأسيس طرق معبدة و صناعة طيران واصلة في غرب السودان عامة و دارفور خاصة؟..مش لمن الحرب تنتهي ح نفضل قاعدين ورا مثلما كنا قبل الحرب؟..

نعم يا امين الظلم و التهميش حقائق موجودة و لن ينكرها الإ مكابر..و لكن لكي تكون هناك ثورة ريف ناجحة لابد أن يفهم انسان الريف في المقام الأول ان التغيير يحتاج وسائل محددة و لابد ان يكون هو شريك في اختيار الوسائل و تطبيقها..اما الوسائل المفروضة بفعل الوصاية النخبوية فلن تخلق حرب تحرير و ثورة ريف ناجحة..!

الإنسان في الأرض يا امين يفهم جيدا أن الوسط و الشمال فيها بنيات تحتية متطورة..و يفهم جيدا ان ثروته تسرق منه و تنهب لبناء و تنمية مناطق اخرى..و لكنه يتساءل ماهي الوسائل الفعالة ذات الجدوى لتحقيق التوازن؟.. بالطبع لن يكون من بينها حروب الريف الحالية.. لأن هذه نتيجتها معروفة و خلاصتها القصوى استقلال ريف جنوب السودان مكونا دولته الذاتية..و لو لم تكن الحروب كانت تخاض بخطاب واضح ينتهي بتأسيس دولة لما تجاوب معها انسان الجنوب و صبر عليها.. فهل حروب السودان اليوم تسعى لنفس الخلاصة؟.. هل حروب الريف السوداني اليوم تسعى لينال اهل دارفور حق تقرير المصير تمهيدا لمفارقة السودان مستقبلا؟.. هل حروب السودان اليوم تسعى لينال انسان النيل الأزرق و جنوب كردفان و الشرق استقلال بدولهم الخاصة؟..ام الحروب تدور لأهداف و غايات غامضة لا يفهم المقصود منها بالضبط؟..

بالضبط يا امين.. اهل الريف.. خصوصا النخبة التي خرجت من صلب الريف.. تحتاج الى ممارسة نقد ذاتي لأدائها و لخطاباتها.. حتى لا تكون في موقف الشجرة التي تنبت جذورها في الهواء..و هنا يا صديقي نحتاج كثيرا ان نعيد حساب الربح و الخسارة..بقدر ما المركز ظلم اهل الريف و سبب لهم الخسائر المتتالية.. بقدرما نخبة الريف فعلت اكثر من خسائر المركز و ذلك بافتعالها للحرب و العنف و تدمير الإنسان و المقدرات..كان المثقفاتية يتندرون من مقولات الجبهة الإسلامية التي تحكي انهم سوف يفعلون كل ما وسعهم ليحيا ربع الشعب السوداني حياة رفاهية..و كان المثقافتية (و نحن منهم ) يقولون أن الربع المقصود هم اهل الجبهة الإسلامية نفسها..و السؤال هل تريد نخب الريف المتحاربة في الأحراش ان تسوق السودان لنفس الفهم؟.. بمعنى اخر.. كم من اهل الريف سيحيون حتى يستمتعوا بانتصار حروب الريف؟..

اهل الريف يا امين.. كان المركز يسومهم الظلم و غياب التنمية المتوازنة..و اليوم بفعل النخب الحردانة.. اصبح الأمر يشمل الظلم و غياب التنمية اضافة لآفات مثل جرائم الإبادة و الجرائم ضد الإنسانية و جرائم الحرب..و من عجب هذه الآفات كانت تحدث في حق بعض من اهل الريف السوداني..و بعض من فصائل الجبهة الثورية كانت ترفل في الدعة و الدمقس و حرير السلطة و ترقص و تطرب و تاكل مع ناس السلطة.. فهل هذه مجموعات يمكن ان يثق فيها انسان الريف؟..
نجاح أي خطاب سياسي ينشد التغيير يجب أن يكون واقعيا يتحدث عن واقع يعرفه و يعرف ملامحه.. و هذا ما نفقده الآن في خطاب النخبة الحايمة في الأحراش..!

و انتظر عودتك يا صديقي..


كبر



ـــــــــــــــــــــ
* معروف موقف صديقنا امين البشاري من الجبهة الثورية و خيارها المسلح..و نفهم ان امين يقف مثلنا ضد العنف..و استغلينا اسمه كمثال للتوضيح.. يعني ممكن يكونوا عيالي او عيال غيرنا من اهل الريف ، الذين تسرق اسمائهم في حروب الريف الغامضة..و هذا ما لزم توضيحه..

تحية يا كبر
بي تقع هنا في مغالطتين يسمحو ليك بتمرير ما تريد أن تقوله
1- تصوير المركز كأنه كتلة صماء متحدة، ودا ما صاح، دايماً المركز فيه صراع بين عدةرؤي.
2- تصويرك للهامش كأنه موحد، و:و: وكأن ليست هناك مجموعات كبيرة إرتبطت بجماعات في المركز
ومصالحهم إرتبطت بهم.

عشان يكون في تغيير حقيقي في السودان المفروض نعمل في إتجاه ربط من يعمل من أجل التغيير في الهامش
ومن يعمل للتغيير في المركز عشان رؤاهم تكون متسقة تجاه ماهو السودان الذي نريده

تحية لي ود الملك وود البشاري

Quote: تحية يا كبر بي تقع هنا في مغالطتين يسمحو ليك بتمرير ما تريد أن تقوله 1- تصوير المركز كأنه كتلة صماء متحدة، ودا ما صاح، دايماً المركز فيه صراع بين عدةرؤي. 2- تصويرك للهامش كأنه موحد، و:و: وكأن ليست هناك مجموعات كبيرة إرتبطت بجماعات في المركز ومصالحهم إرتبطت بهم. عشان يكون في تغيير حقيقي في السودان المفروض نعمل في إتجاه ربط من يعمل من أجل التغيير في الهامش ومن يعمل للتغيير في المركز عشان رؤاهم تكون متسقة تجاه ماهو السودان الذي نريده

ا


صديقي عيدروس..حبابك
و كتر خيرك على المرور من هنا..
و بعد..
بكل احترام اسمح لي اختلف معك في هذه الخلاصة..فانا لم اتحدث عن مركز او هامش..و انما صديقنا امين هو الذي افاد بان المركز موحد و الهامش غير موحد..و امين له حرية التعقيب على التوضيح..
مداخلاتي لأمين.. بدأت بسؤاله (باعتبار فرضية ان المركز موحد و الهامش غير ذلك)..و سألته لماذا..
بالنسبة لي مفاهيم مثل المركز و الهامش..لم اذكرها في موضوعي الأساسي.. و هي مفاهيم غامضة تماما..و اميل لفهمها وفقا لما قاموا بالتنظير لها (محمد جلال هاشم/ابكر ادم) و اعتقد ان رسالتهم وصلت..للحد الذي تم فيه تسويف المفاهيم و استغلالها بصورة افرغتها من مضامينها تماما..!

تساؤلي هنا يقوم على فرضية رفض الحرب.. و خيارات العنف الباهظة التكاليف..و اقول ان بعض من الريف السوداني دفع اثمان هذه الحروب الغامضة.. اكثر من غيره من ارياف السودان الكثيرة..!
الربط يا عيدروس هو مسئولية النخبة السودانية.. سواءا كانت في سدة الحكم أو تعمل لكي تصل الى الحكم..و هذا لا يعنيني كمواطن في أي شئ..لأن النخبة التي تحمل السلاح الآن.. قبل سنتين فقط كانت مشاركة في الحكم في الخرطوم..لذلك لا اثق فيها مطلقا بانها يمكن ان تحدث تغيير سواءا كان حقيقي او فالصو.. كل الذي اطلبه ابتداع وسائل جديدة ليس من بينها الحرب التي تدور في ترابي المحلي..!

و يبقى السؤال يا صديقي: هل النخبة السودانية التي تنشد التغيير لها القدرة على اقناع انسان الريف بجدوى التغيير وفقا لوسائلها الخاصة المتبعة حاليا؟.. أم الواقع تجاوزها و بالتالي تحتاج بعض الإجتهاد لتقديم خطاب مقنع؟..

و دمت..
كبر

العزيز كبر

تحياتي والف حمداً لله على سلامتك وجيداً جيت صادي . سؤالك محاولة مقدرة للخروج من النفق المظلم الذي يسلكه السودان بجهاته الفضلت وكذا جهد لإخراج من دفعته الظروف أن يلج النفق مبكراً ويصرخ لأجل ذلك كما الغريق أو المودر يفتح خشم البقرة يا كبر. صيحي كما تفضل إخوة أن ليس كل المركز كتلة واحدة لكن الكتلة الأكبر تسوق الأصغر بوعي أو دونه وبرضا أو عكسه نحو غاياته بغض النظر عن الوسيلة لتلك الغايات ومدى معقوليتها ومناسبتها لأن تحقق التوازن بين مكونات الوطن الواحد عدلاً ومنهجاً وبالتالي أملاً في الإحساس بالمواطنة الكاملة غير المنقوصة والمغبونة . وعلى الجانب الآخر فإن الهامش ( برغم تحفظ البعض ) لم يستوي على كتلة واحدة ويتساوى عطاءها وأخذها فيما هو متاح لها أو مطلوب منها بل ينبل منها ما قد يتمسكن أو يتصالح مع كتلة المركز طوعاً وكرهاً في السير على نهج كتله المركز المؤثرة سلباً ويحدث صراع الوعول كما أشرت لذلك سابقاً يا كبر أو تشتغل مسافات الالإبتعاد ما بين الحقوق والواجبات وميل كل الكفة نحو العطاء دون الأخذ أو الأخذ الضئيل فتوجه حالة الغبن البيّن لخلق ساحة حرب بأدوات مركزية لتحقق من خلالها تسويات بمباركة كتلة المركز وقد تأخذ صفة القومية الإحتفالية كحالة دكتور تجاني سيسي ومجموعته ويكون التخدير الموضعي قد أنجز.

* عليك الله يا كبر تعال شوف هذا الخبر الوارد في صحيفة المجهر وقارنه بما يدور بالسودان من مفارقات .

بحيراوي

Quote: قافلة شعبية سودانية لغزة والاتحاد العام للطلاب يناشد الحكومة دعمها 22 ساعات 53 دقائق منذ حجم الخط: حسن عثمان رزق الخرطوم - طلال إسماعيل دعا نائب الأمين العام للحركة الإسلامية السابق "حسن عثمان رزق" بعد أداء المئات من المصلين بمسجد الخرطوم الكبير أمس (الجمعة) لصلاة الغائب على أرواح شهداء غزة، دعا التجار إلى تقديم الدعم للمقاومة الفلسطينية بتهريب السلاح عبر الأنفاق إلى داخل قطاع غزة لرد العدوان الإسرائيلي. وأضاف رزق: (المسرح يعد لنهاية الصهاينة بعد أن تهاوت كل الأصنام وتحطمت وزال الطغاة الذين يحكمون الدول المجاورة لفلسطين وتوحدت القلوب للتحرير وصار السودان في قلب المعركة مع إسرائيل). وأشار "رزق" إلى أن أهل السودان موجودون في غزة بدمائهم ومالهم وسلاحهم. من جانبه عزز رئيس الاتحاد العام للطلاب السودانيين "محمد صلاح" دعوة "رزق"، ودعا الحكومة إلى إرسال السلاح إلى قطاع عزة رداً على العدوان الإسرائيلي على مجمع اليرموك بالخرطوم ودعماً للقضية الفلسطينية. وناشد "محمد" قطاع الطلاب التبرع بالدماء والأموال. وكانت حملة " معاً من أجل غزة " قد وجهت نداءً للمسلمين بالتبرع من أجل فلسطين ونظمت صلاة الغائب على أرواح الشهداء بمشاركة جهات فلسطنية وسودانية. وفي كلمة المراقب العام لجماعة الأخوان المسلمين بالسودان "علي جاويش" تنبأ بتحطيم إسرائيل على يد المقاومة وإخراجها من الأرض المباركة . وأشاد ممثل الجالية الفلسطينية بالسودان "خالد عائش" بدعم الشعب السوداني للقضية الفلسطينية، وقال:(نشكر وزراء الخارجية العرب ومن بينهم الوزير السوداني "علي كرتي" على موقفهم ودعمهم، هذه الجولة لن تكون الأخيرة ونستعد للجولات القادمة لتكون في ساحة المسجد الأقصى بالقدس) ووجهت حملة " معاً من أجل غزة " نداءً للمنظمات للمشاركة في القافلة الشعبية السودانية المتوجهة إلى غزة في مطلع ديسمبر القادم دعماً للفلسطينيين.

Quote: بالنســبة للســـؤال أعلاه فالاجابة قطعاً لا لا لأن الريف نفسه منقسم على نفسه وغير متحد المركز متحد حول مصالحه يمينه ويساره سنته وشيعته مدنييه وعساكره كلهم متحدون حول مصالح مناطقهم وتنميتها عكس اهل الهامش الذين يقدمون مصالهم ومصالحهم فقط

الزميل الامين :
اتفق معك بخصوص عدم توحد الريف في السودان وهو فيما اعتقد ناجم من اسباب وظروف كثيرة ، لكني الاحظ ان الثورة ارتبطت بالعنصر الافريقي او الريف الريف الافريقي اكثر من ارتباطها بالريف بشكل عام ، غالبية القبائل العربية في مناطق النزاع لم تثور ضد الحكومة .. لكني اختلف معك في ان نخب المركز تهتم بتنمية مناطقها ، ابدا .. هي نفسها منغمسة في مصالحها الشخصية سواء على المستوى المادي او الكسب السياسي ، لا توجد اي تنمية على الاطلاق في المركز .. على العكس ..

Quote: يا ول ابا سعر تذكرة سفر بالطائرة الى الفاشر او نيالا او الجنينة يقارب أو يفوق سعر تذكرة السفر الى السعودية او دول الخليج بينما أي واحد من أهل المركز بامكانه الوصول الى قريته بمبلغ زهيد لا يتعدى ال 30 جنيه فتأمل!

هذه الجزئية تختص بالتأمين والمخاطر والجغرافيا .. شركات التأمين ترفع قيمة البوليصة كلما زادت المخاطر الى درجة ان تمتنع تماما عن تأمين الطائرات في حال وصول المخاطر لدرجة معينة ، من ناحية اخرى الطبيعي انه كلما كنت قريبا من منطقة ما ، تكون تكلفة وصولك لها اسهل ، لكن السؤال الحقيقي هو لماذا يأتي المواطن من اقصى السودان الى الوسط حتى يتكبد كل هذه المصاريف ؟ وهنا بالطبع تبرز القضية الاساسية وهي التهميش وانعدام الخدمات وفرص العمل ..

تحياتي كبر والامين والجميع

up

صديقي البحيراوي..حبابك
وكتر خيرك على المرور من هنا..

مثلما قلت للصديق عيدروس سابقا.. لم تكن من ضمن فكرتي الأساسية في هذا الخيط أن اناقش وحدة المركز او وحدة الهامش.. فكل هذه امور نخبة تعبنا من المساسقة خلقها..سؤالي محدد الى النخبة التي تخوض الحرب في الريف السوداني و تقول انها تعمل من اجل انسان السودان.. و السؤال هل انسان السودان فقط في ريف جنوب كردفان و دافور و النيل الأزرق.. اما هناك ارياف اخرى مظلومة مثل بقية ارياف السودان المذكورة..؟..
واقع السودان اليوم اخرج النخبة تماما من مشاغله و كوابيسه..فنخبة الحكم مشتتة على نفسها (و دونك الأحداث الأخيرة)..و نخبة المعارضة السلمية لا تستطيع ان تخطو ثلاثة خطوات على اتفاق..و نخبة المعارضة المسلحة لا تستطيع ان تتفق مع نخبة العمل السلمي.. باقي ليك يا صديق كم من العمر تبقى حتى نضيعه في خزعبلات النخبة الفاشية هذى؟..

الإستمالات و التدجين.. تحدث لأن نخبة السودان تتميز بالنفاق تجاه نفسها و تجاه مواطنها لذلك تحدث مثل تلك المآسي..و نحن يا صديقي لم يتبقى لنا من عمر لننفقه في سرد الأحزان..!
موقف حسن رزق.. يا البحيراوي مثله و مثل مواقفه حينما كان واليا على غرب كردفان.. دوما يحدث الضجيج ليؤكد انه موجود..و سوق المواقف اليومين ديل ياها واقعة اليرموك تلك.. كل يمتطيها.. من كبير السدنة ول ابا دكتور الحاج يوسف ادم..و رايته حينما كنت في الخرطوم في التلفزيون يجعر جعير التقول حبوبتو فلسطينية..لغاية جعير والي الخرطوم اليوم الذي يقول بانه سيبني عشرة مصانع يرموك..و لا ينسى ان يمرر اهم مافي الأمر نقل المصانع العسكرية بعيدا عن المواقع السكنية..و ده لب الكلام يا صديقي حينما تحدث المواطن و هو يبين مواطن الخلل..ولآن نخبة سيدنا الخضر لا تستطيع ان تصرح بالخطأ.. فانها تغلف التصريح ضمنيا..!
اعرف يا صديقي مدى حزنك على المسئول السوداني الذي يتفاعل مع مشاكل غزة ولا يتفاعل مع مشكل السودان..و هذه هي الحقيقة التي دفعتنا لإثارة السؤال المركزي هنا..فحروب الريف التي تدور اليوم لا يحس بها الريف السوداني..و خطاب دعاتها خطاب خافت للغاية..يستهدف تحنيس السلطة اكتر من خلق وعي جمعى في اوساط اهل السودان..!

لا تحزن على سيدنا رزق يا البحيراوي.. لأن السؤال البسيط من هو الذي يستمع الى خطاب رزق؟.. أليس هو كادر المؤتمر الوطني الذي يتم تجييشه بالدعاية الخرقاء؟..
بكرة لو ناس النخبة المتوحشة لقوا ليهم فرقة ميكروفانات.. برضك ح يسوا البدع..مثلهم و مثل سابقيهم.. نخبة السودان امينة تجاه الأجنبي اكثر من امانتها تجاه نفسها و مواطنها؟؟؟
امثال حسن رزق و غيرهم.. مثل الرقيق الذي يسعى لنيل الإعتراف به و باي شكل كان.. فلذلك تجده مجتهدا.. يعمل بيديهو و كرعيهو.. عشان السادة في المركز الصاح يقوموا يجودوا عليه بفتات الإعتراف..عشان كده طوالي مصدق اخوة الإسلام اياها..و بيعمل بجد يحسد عليه في سبيل اظهارها.. باقي دي نخبة الشعب السوداني داير منها خير؟..

ودمت يا صديقي العزيز..

كبر

عبد الله ادريس..حبابك يا صديق
كتر خيرك على المرور هنا..
و اشكرك كتير على اثارة حكاية شركات التأمين دي.. لأنها كانت في بالي..,و خفت اقولها..و يقوم اخونا امين يقول لي: خلاص قمنا على استهبال ناس القانون..!!

سعيد بمرورك يا صديق..و ما تنقطع..

كبر

رؤيتي الطرحتها أكتر من مرة هي يا بر الآتي:

مشكلة السودان الورثناها من الإستعمار هي:
شمال ووسط تسود فيه الثقافة العربية الإسلامية والعلاقات الرأسمالية ولا (قبيلة هناك) وإنما تحولت القبيلة
لهوية ثقافة بينما تم إستبدال مؤسسات القبيلة بمؤسسات الدولة.
باقي البلد تسود فيه القبلية وشبه الإقطاع وعلاقات ما قبل(الحضر)، كانت هذه العلاقات في الريف منسجمة وتؤدي دورها
في الحفاظ علي السلم والأمن لمواطني الريف ولكن:
أدت هجمة الدولة (منذ الإستعمار) لنشر العلاقات الرأسمالية والثقافة العربية الإسلامية (في محاولة شكلية لتوحيد البلد)
بجعلهاتنطق بثقافة واحدة وعلاقات إقتصادية /إجتماعية موحدة الي تمزيق المجتمعات الريفية، وهذه الهجمة في إتجاهين
أحدهما بتبني الحضر/المركز/الحكومة/الدولة لمجموعات دون أخري في الهامش (وهذا الهامش لا يشمل الريف الشمالي ولا في الوسط)
والثانية بنهب موارد وتقتيل أهل الهامش.

أدي هذا الي تمزق نسيج العلاقات القبلية وعلاقات شبه الإقطاع وتحول الهامش الي مجموعات تحارب بعضها بأسم الدين وأسم العروبة
هذا مع بقاء حرب نخبة المركز ضد الهامش مرفوعة الراية تساند هؤلاء وتقتل الآخرين.

وهذا هو السبب يا كبر في عدم قيام حروبات في باقي الريف السوداني، لأن الريف في الشمال والوسط تسوده علاقات وثقافة الحضر
بل هو جزء من الحضر.

الحل في رأيي لأبناء الهامش هو ذو شقين:
الشق الاول العمل علي توحيد أهل الهامش وتبديل فرقتهم وحروباتهم بالإصفاف والوحدة في مواجهة حروبات المركز.
الشق الثاني الإلتقاء مع من يعارضون دولة التراتبية والإمتيازات ودولة العنصر العرقي الواحد والثقافة والرؤية الدينية
الإقصائية.
وذلك لصالح دولة التنوع والحقوق والحريات.

Quote: و السؤال هل انسان السودان فقط في ريف جنوب كردفان و دافور و النيل الأزرق.. اما هناك ارياف اخرى مظلومة مثل بقية ارياف السودان المذكورة..

العزيز كبر

تحياتي - لعل الإجابة تبدو واضحة يا كبر بأن أمر الغبن والظلم موجودة في جهات السودان الأربع وبدرجات متفاوته وبالتالي حتى تجلياتها في تلك الجهات مسألة متفاوتة ونسبية ودرجة معالجتها والتعبير عنها تبدو متفاوتة أيضاً . وقد تبدو قضية شرق السودان ملموسة لنا جميعأً بتشابهها بدرجة كبيرة مع مثيلاتها في الغرب والجنوب من حيث بروز البندقية في المطالبة بمعالجتها أو التذكير بفداحتها وقد تقادمت بها السنين دون أن تجد التبشير المناسب إلا على يد نخب من تلك التي تتعامل معها بمنطق غالبية نخب الهامش الآخر وعبر حقب مختلفة . وحالياً هناك حلول يتم تجريبها في الشرق ولا أملك حقائق كافية حول جدواها ومصداقيتها ونجاعتها!!
بالنسبة لجنوب كردفان والنيل الأزرق ودار فور أيضا تندرج تحت النسبية التي ذكرتها سابقاً وبالتالي تنسحب عليها خصوصية جغرافية وأثنية وأبعاد تاريخية جعلت منها الأنسب لأن يتشكل حولها صوت أقوى وفي مرات كثيرة ممزوج بنار يكون إشعالها أسرع وتغذيتها كذلك لعوامل الجغرافيا والطبيعة الخاصة والنأي البعيد عن المركز بعوامل إنعدام وسائل الوصول من وإلي !! لكنها مع ذلك تظل حديقة خلفية تشكل مساحة في مثلث تكوين الدولة السودانية من أرض وشعب حتى لو كان بالمسمى وخرائط الجغرافيا .
ولا يعني ذلك إنعدام عوامل الغبن والتظليم لدي جهات السودان الأخرى لكن يكون هناك إستغلال لهذه العوامل بشكل سلبي من طرفي النخبة المركزية حيث يتم تسخير نخب الهامش بشكل أقوى مما هو عليه من هوامش خرى ولعل مثال الدكتور الحاج آدم وكأن حبوبته فلسطينية حين الأسي على ضحايا الحرب خير دليل ولا يسأل نفسة كيف تُوفى العشرة ألف مواطف في دار فور دا لو أخذنا كلام الحكومة فقط يا كبر!! وهناك أيضاً سلسلة طويلة من التعاطي البخبوي مع مظالم الهوامش التي ذكرناها وحملها كقضايا جوهرية نحوالمركز ثم وضعها في ثلاجته والتفرغ للقضايا الشخصية والمركزية الأخرى حين تتبدل الأولويات بالمركز مع بقاء تلك التي بالهوامش في مكانها القديم . ولك أن تتفحص في تاريخ العالقة بين المركز والهامش منذ ما قبل الإستقلال وحتى اليوم !

بحيراوي

الصديق العزيز كبر
عاش من شافك والله مشتاقين اكتر
الكلام ده انا قلتو زمان انا قلتو مليون مرة و هقول تاني

الظلم الاجتماعي والتهمبش السياسي والاقتصادي الذي مارسته الأنظمة الحاكمة عبر الإخوان والعسكر فى السودان والذى يحدث اليوم من صراعات قبلية هو نتاج طبيعى كانت الجبهة الإسلامية السبب الرئيسي فى تهميش المناطق أن المدن السودانية لاتقدم أي خدمات تنموية للريف والمناطق الداخلية بل أن أغلب المدينة فى السودان ليست بوحدة انتاجية بل نبت سرطانى استهلاكى فان تشوه وتورم المدينة قد طال الريف الذى هجره أهله كما قاد إلى مجاعات لم يعرفها السودان من قبل ولهذا فان أزمات الحكم وسياسة التهميش واهمال الاقتصاد الزراعى قد قادت جميعها ألى اضطراب اجتماعى وقد حمل هذا الوضع بالضرورة الحكومة لأن تمارس المزيد من الاجراءت التعممية للسيطرة على ثورات الجياع وهذه المأساه التى وصل إليها السودان اليوم تقودونا إلى السؤال الذى يطرح نفسه أو يتسأل عنه البعض ماذا يتوقع البعض من المهمشين فى أقصى الشمال وأقصى الغرب وأقصى الجنوب وأقصى الشرق سوى البحث عن الحرية والحقوق الضائعة والمنتهكة من قبل المركز ماذا يتوقع الجميع سوى حمل السلاح كان يدور نفس السؤال فى السابق لماذا حملت الحركة الشعبية السلاح واليوم انضمت إلى هذا الركب قوى جديدة من أبناء الشمال والشرق والغرب بحثآ عن الحرية والديموقراطية بسبب هيمنت المركز والحكومات الدكتاتورية المتعاقبة على الحكم فى السودان

صديقي عيدروس..حبابك
كتر خيرك على الحضور و المساهمة هنا..
مشكل الدولة السودانية معروف..و كل يجتهد في تقديم التشخيص..و الكل مصيب في تصوره بما ذكرته انت من تصور هنا..
و للمرة الثانية لم نتساءل عن عدم قيام حروبات في باقي الريف السوداني..و انما سؤالنا: لماذا لا تنقل الحروبات من الريف الذي اكتوى لعشرات السنين من الحرب الى مكان اخر ..؟ هذا بالطبع اذا كان فعلا خطاب اهل الحروبات يتحدث عن ريف كل السودان.. هذه واحدة..
الثانية.. اهل الريف لم يبدأوا التفكير في تغيير انظمة الحكم مع بداية هذه الحروب..و انما كانت هناك اجيال سابقة..لها اجتهاداتها في الخرطوم..و اعتقد كانت هي اجتهادات اذكى..لسبينين:
الأول: ان من قام بمثل تلك الإجتهادات كانوا يدركون أن لا تغيير حقيقي يحدث في السودان مالم يكون في الخرطوم مكان القرار السياسي..
الثاني: كانوا يدركون أنه لكي يكون هناك ضغط سياسي و تغيير دستوري و تحقيق دولة مواطنة.. لابد ان يكون الحراك محسوب و باقل الخسائر الممكنة.. و لقد خسر ذلك النفر ارواحه في الخرطوم و الرسالة وصلت مليون مرة دون الحاجة لخوض حروب في الريف لتدمير الريف بطريقة غير مباشرة...
فلابد من الخرطوم و لو طال السفر..
في نهاية مداخلتك يا عيدروس ، تحدثت عن دولة التنوع و الحقوق..و نحن نتساءل: لماذا يشمل التنوع الدمار نفسه؟.زبمعنى أن من يقود حرب في الريف لتغيير نظام في الخرطوم و يتحدث باسم السودان و ظلم اهل السودان.. فلماذا لا يطبق هذا المبدأ في تنوع الحرب المكاني؟.. لماذا الحرب تدور في ريف بعينه فقط و لعشرات السنين؟..

كبر

ورد الخبر التالي في صحيفة الشرق الأوسط..و نقلته صحيفة الراكوبة..و ننقله هنا..

Quote: قوش هو مخترع بيوت الأشباح،فكيف يتم قبوله بديلا للبشير ونظامه؟،، الجبهة الثورية تتوعد بنقل معاركها إلى داخل الخرطوم. حتى إن نجح صلاح قوش في قلب نظام الحكم فإنه من مجرمي الحرب 11-26-2012 03:28 AM لندن: مصطفى سري توعدت الجبهة الثورية المعارضة بنقل معركتها المفصلية مع الحكومة السودانية إلى داخل الخرطوم. وشددت على أن هدفها الاستراتيجي إسقاط نظام الرئيس عمر البشير. في وقت أعلنت فيه حركة تحرير السودان، فصيل عبد الواحد محمد نور، عن سيطرتها على معسكر تابع للقوات الحكومية في ولاية شمال دارفور. ويتحالف هذا الفصيل مع حركات مسلحة أخرى ضمن الجبهة الثورية التي تقود معارك ضارية في مناطق جنوب كردفان والنيل الأزرق ودارفور ضد القوات الحكومية. وقد تصاعدت العمليات الحربية خلال الأشهر الثلاثة الأخير بصورة غير مسبوقة. وقال جبريل بلال، المتحدث الرسمي لحركة العدل والمساواة، أحد فصائل الجبهة الثورية، لـ«الشرق الأوسط»، إن موقف تحالف الجبهة هو نقل المعركة الفاصلة مع النظام السوداني في الخرطوم وليس الفاشر في شمال دارفور أو كادوقلي عاصمة ولاية جنوب كردفان التي تشهد حربا من أكثر من عام مع الحركة الشعبية الشمالية، مقللا من المحاولة الانقلابية الفاشلة التي أعلنتها الخرطوم الخميس الماضي واعتقلت على أثرها 13 من الضباط العسكريين والأمنيين أبرزهم رئيس جهاز الأمن والمخابرات الوطني صلاح عبد الله قوش. وقال «ليس هناك فرق بين صلاح قوش والبشير، كلاهما ارتكب جرائم حرب وجرائم ضد الإنسانية في مناطق كثيرة من السودان». وأضاف «قوش هو مخترع بيوت الأشباح التي تم تعذيب كثير من السودانيين فيها، فكيف يتم قبوله بديلا للبشير ونظامه؟!»، وقال «نحن لا ننتظر أن يقوم قوش بالتغيير في الخرطوم، وحتى إن نجح في قلب نظام الحكم فإنه من مجرمي الحرب». الشرق الاوسط

حاجتين:
اولا: التوعد براهو ما كفاية يا ناس النخبة المتوحشة..دايرين بيان بالعمل (نون الضمير ياهو ناس الريف المنكوب اياه)..
ثانيا: الريف لا يهمه فقط اسقاط نظام البشير..و انما تهمه اشياء اخرى..و التراب البديتو منو الحرب بيطالب بحقو..ان شاء الله ايجار سنين الحرب و ما تبعها من لوزام..ساعدونا بالخطاب يا امة ها..

كبر

Quote: الإجابة تبدو واضحة يا كبر بأن أمر الغبن والظلم موجودة في جهات السودان الأربع وبدرجات متفاوته وبالتالي حتى تجلياتها في تلك الجهات مسألة متفاوتة ونسبية ودرجة معالجتها والتعبير عنها تبدو متفاوتة أيضاً

ا

صديقي البيحيراوي.. خبابك..
كتر خيرك على المفاكرة هنا..و كلام سمح تب يا اخوي..و لكن..!

نحن قدام خيارين يا صديقي: يا اما الريف السوداني تقيل الفهم مما يتطلب كل هذه السنين (الحرب في جنوب كردفان بدأت سنة 1983)..و يا اما الريف عندو راي راقد عليهو.. بمعنى الكلام فايت اضنيهو..
لا يمكن يا البحيرواي حرب تدور في عهد حعفر نميري بحثا عن الأفضل لكل الريف السودان..و تستمر في عهد الديموقراطية بنفس الدعوى..و تستمر في عهد الجبهة الإسلامية الأولاني (قبل المفاصلة)..و الوسطاني.. (اتفاقية نيفاشا) و الأخراني (بعد اتسقلال الجنوب)..وفي كل الوكت الحرب في ريف دون الآخر..و نحن لسع المطلوب مننا نتظر حتى يستوعب الريف الباقي القصة من اولها..؟..
سقطت النخبة في انتاج خطاب الحرب..و سقطت في ادارة الحرب..و كل الذي نطلب.. فلتذهب بحروبها الى مكان اخر..

كبر

سلامات يا كبر
وشكراً علي الرد

طبعاً متفق معاك إنو إذا كان في طريقة للتغيير بدون تكلفة بشرية وهدر للموارد الطبيعية والمجتمعات دا الحل الأمثل
لكن كيف.. ودا هو السؤال؟

المهم عندي ليك أسئلة ياخ علاقتها بالبوست ما مباشرة لكن في رأيي أسئلة مهمة:
1- هل خليل إبراهيم وعبدالواحد محمد نور ومناوي والحلو من أسر لها مكانة ونفوذ في مناطقهم قبل تزعمهم للحركات المسلحة؟
2- هل بذلت أنت أوأي فرد أو مجموعة من هذه المناطق جهود لمحاولة إثناء (الرزيقات والفور والزغاوة) أو (المسيرية والنوبة)
من محاربة بعضهم البعض؟ إذا كانت الإجابة نعم فهل من الممكن شرح هذه الجهود والصعوبات التي قابلتها وما توصلت له؟

ولك جزيل الشكر

صديقي ..يحي..حبابك
و بالأكتر يا يحي..
كتر خيرك على المرور من هنا..
و بعد..
ما قلته يا صديقي هو التشخيص.. لكن العلاج شنو؟..
ممكن تقول لي واحدة من الخيارات تصعيد العمل المسلح (اذا اقتضت الضرورة)..و اقول نعم اتفق معك فالتصعيد العسكري.. خيار مثله و مثل بقية الخيارات..ولكن الذي يعنيني ان التصعيد العسكري يحتاج ارض..و الأرض المتاحة هي ارض الريف السوداني..و السؤال لماذا الحرب متواجدة في ريف لفترة تصل ربع القرن و في نفس الريف.ز دون حدوثها في ريف اخر..؟..
الحركة الشعبية استغلت جهود ناس جبال النوبة و النيل الأزرق و كونت دولتها الخاصة بيها.. ثم قالت لناس الجبال الموضوع كان نفير و انتهي..!
و اهلنا بيقولوا (الضاق عضة الدبيب بيخاف من مجر الحبل) يبقى ليك يا صديقي نققعد نضيع القدامنا و الورانا.ز عشان باكر يغشونا بخطاب رنانة من شاكلة نشكر وطني جنوب كردفان و دورهم في تحرير السودان من عمر البشير؟!!!
و يظل السؤال قائم: هي فعلا ثورة ريف؟..و ان كانت الإجابة نعم.. فلماذا لا تنقل حروبها الى ارياف اخرى؟..

كبر

عيدروس..حبابك يا صديقي..
كتر خيرك على المرور من هنا..

Quote: طبعاً متفق معاك إنو إذا كان في طريقة للتغيير بدون تكلفة بشرية وهدر للموارد الطبيعية والمجتمعات دا الحل الأمثل لكن كيف.. ودا هو السؤال؟

اربعة شواهد:
اولا: الجبهة الإسلامية قادت حركتها و وصلت السلطة من غير تكلفة تضر بالريف..
ثانيا: الشعب السوداني قاد تغيير في اكتوبر 1964 و في 1985..و لم تكلف الريف أيتها خسارة تذكر..و حدث التغيير..
ثالثا: انظمة كتيرة سقطت من حولنا و لم تحتاج الى حروب اهليه تطول بالسنوات..لأن الشعب كان متماسك تجاه خطاب واضح للغاية..
رابعا: أي حراك جاد للتغيير في السودان لابد أن يكون في العاصمة المثلثة.. سواءا كان حراك سلمي كما حدث في التجربتين السابقتين.. او حراك مسلح مثلما تفعل النخبة المتوحشة الآن في ارياف السودان المنكوبة..

Quote: المهم عندي ليك أسئلة ياخ علاقتها بالبوست ما مباشرة لكن في رأيي أسئلة مهمة: 1- هل خليل إبراهيم وعبدالواحد محمد نور ومناوي والحلو من أسر لها مكانة ونفوذ في مناطقهم قبل تزعمهم للحركات المسلحة؟

الإجابة لأ.. لم يكن لهم نفوذ في مناطقهم .. مثلهم و مثل عمر البشير و على عثمان محمد طه و نافع على نافع و صلاح عبد الله قوش..

Quote: 2- هل بذلت أنت أوأي فرد أو مجموعة من هذه المناطق جهود لمحاولة إثناء (الرزيقات والفور والزغاوة) أو (المسيرية والنوبة) من محاربة بعضهم البعض؟ إذا كانت الإجابة نعم فهل من الممكن شرح هذه الجهود والصعوبات التي قابلتها وما توصلت له؟

رهاننا يا عيدروس.. اننا دوما نتحدث عما نعرف عن تجربة و مشاهدة مباشرة..لذلك نحدثك عن الريف الذي نعرف و هو ريف جنوب كردفان..بالنسبة لناس دارفور.. اول ما الحرب بدات حدثناهم عن الخطأ الذي حدث في جنوب كردفان و ان ما يسمى بالقبائل العربية وجدت نفسها تخوض حروب وكالة قذرة..و ناس دارفور ما سمعوا الكلام الإ مؤخرا جدا..

بالنسبة لجنوب كردفان.. قدمنا لهم قليلا من الوعي..و شرحنا لهم انهم جميعا في الهوا سوا..و المسيرية تحديدا عرفوا ان دورهم في الحروب السابقة لم يكن موفق..و تبدلت لهجة خطابهم..اما اليوم فالأمر اختلف..و نحو الإيجابي.. حتى الآن المسيرية و الحوازمة في جنوب كردفان.. بنسبة (75%).. يلتزمون الحياد تجاه الجيش الشعبي قطاع جبال النوبة..و هذا مكسب كبير بالنسبة للجبهة الثورية..لكن الخطر.. ان الكل مسلح..صحيح ديل بيقولوا ليك ما بنخوض حرب لصالح الجبهة الإسلامية.. لكن ما بنقبل بالحقارة و الإعتداء علينا..و موقف الحياد مشهد موجود على الأرض..و الجيش الشعبي قطاع جبال النوبة استوعب هذا الموقف و بادله باحسن منه.. و اصبحت عملياته الخاطفة.. خصوصا خارج المدن تستهدف الجيش و الياته..ولا تستهدف اي مواطن (على الأقل حتى اللحظة)..!

الوعي الذي يسود جنوب كردفان الآن (نوبة و بقارة).. مقتنعين تماما ان البيموتوا هم اولادهم..و ان ولايتهم هي اغنى ولاية في السودان بعد ذهاب الجنوب..و ان صفوة قطاع الشمال قاعدة تسرق جهود اولادهم و توظفها في غايات غامضة..الناس التحت هناك يا عيدورس (على الجانبين من شخيط الحرب ) متفق و بتقول ليك نغير نظام عشان حناكيش الخرطوم يجونا من تاني انا جدي فلتكان و انا ود اسر و الذي منو..!!!!

اتمنى ان اكون وفقت في الإجابة على اسئلتك يا صديقي..

و دمت..
كبر

سلامات يا كبر ..

أعتقد المدن التي ذكرتها .. نسبة لوقوعها على الخط الحديدي .. يعني التنمية أصلا المقصود بيها مناطق
النفط المستخرج .. ولا علاقة لها بتنمية الريف ولا الحروب .. تقدر تقول التيبون فيها خدمات أو حتى مدينة الضعين ؟

لك التحية بعد نقرأ جوه جوه.

Quote: و بالطبع الحرب هي سبب اساسي لتوقف أي مشروع لبنية تحتية..! و الحروب السودانية.. هي واحدة من اخفاقات النخبة السودانية.. سواءا كانت في سدة الحكم..او في معارضة الحكم. فالنخبة السودانية تدأب دوما لأرتكاب الأخطاء القاتلة.. و تصنع الحرب و تدعو المواطن ليتحمل اثارها. و ذلك في سبيل تحقيق انتصارات مرحلية تهم النخبة وحدها..!

الله أكبر يا كبر!
قد أصبت كبد الحقيقة!
وأشكرك لمجرد طرح السؤال العقلاني،
في محيط يحلم فيه الناس بالثورة،
ولا يجتهدون في توفير شروطها الأساسية،
وأولاها: أن تكون ثورة واعية!
والسؤال المهم: هل أهلنا في الريف يريدون هذه الحرب أصلاً؟
لقد شافهت أخاً عزيزاً جاء لتوّه من نيالا:
بقدر ما كان يشعر بالأسى بسبب ما رآه من مظالم الإنقاذ هناك،
كذلك يشعر بالأسف العميق لأن هذه الحركات المسلحة لم تقدم شيئاً،
سوى أن زادت معاناة المواطن!
ولكن ماذا تقول في نخبة أدمنت الفشل!
أجدد لك شكري، وأتمنى أن أجد فسحة من الزمن للمشاركة الفاعلة
في هذا البوست ذي الأهمية الفائقة!

Quote: بالنسبة لجنوب كردفان.. قدمنا لهم قليلا من الوعي..و شرحنا لهم انهم جميعا في الهوا سوا..و المسيرية تحديدا عرفوا ان دورهم في الحروب السابقة لم يكن موفق..و تبدلت لهجة خطابهم..اما اليوم فالأمر اختلف..و نحو الإيجابي.. حتى الآن المسيرية و الحوازمة في جنوب كردفان.. بنسبة (75%).. يلتزمون الحياد تجاه الجيش الشعبي قطاع جبال النوبة..و هذا مكسب كبير بالنسبة للجبهة الثورية..لكن الخطر.. ان الكل مسلح..صحيح ديل بيقولوا ليك ما بنخوض حرب لصالح الجبهة الإسلامية.. لكن ما بنقبل بالحقارة و الإعتداء علينا..و موقف الحياد مشهد موجود على الأرض..و الجيش الشعبي قطاع جبال النوبة استوعب هذا الموقف و بادله باحسن منه.. و اصبحت عملياته الخاطفة.. خصوصا خارج المدن تستهدف الجيش و الياته..ولا تستهدف اي مواطن (على الأقل حتى اللحظة)..!

دا كلام جميل

بالنسبة لقيـادات الحركات إنتا قلتا إنو أسرهم أسر عادية وما عندها نفوذ قبل بداية الحروبات في الهامش.
طيب تفسر بي شنو تسلمهم لقيادة هذه الحركات؟

وتانياً : معلوماتي إنو الحركات الإصطفاف فيها قبلي، يعني مثلاً حركة التحرير (عبدالواحد) فور
جركة التحرير(مناوي) زغاوة، العدل والمساواة (زغاوة)، الحركة الشعبية (نوبة والإنقسنا)
هل معلوماتي دي صحيحة؟

العزيز كبّر
تحياتي يا حبيب
نعم حروب السودان اليوم هي ثورة جزء كبير من الريف السوداني
لكنها ليست ثورة كامل الريف السووداني
والسؤال هو:
أيهما الأجدى ؟ أن تثور بقية الريف فتكتمل الحلقة الثورية للريف
أم يستسلم الذين ثاروا فتصبح بالنسبة لهم ميتة وخراب ديار؟
هذا السؤال ألحائر اطلقته قبل عامين
ثم قلت : ليت الثورة ما قامت (وأعني بها ثورة الهامش هذه)
لكنني رددت على نفسي بسؤال آخر: من إبتل بالماء ، لماذا لا يعوم؟
ومن إنتصف النهر ، لماذا يعود إلى الضفة التى إنطلق منها ، مادام قد تبقت أمامه نفس المسافة ؟
واليوم أضيف سؤالاً أخر:
وهل تنجيه العودة؟

Quote: أعتقد المدن التي ذكرتها .. نسبة لوقوعها على الخط الحديدي .. يعني التنمية أصلا المقصود بيها مناطق النفط المستخرج .. ولا علاقة لها بتنمية الريف ولا الحروب .. تقدر تقول التيبون فيها خدمات أو حتى مدينة الضعين ؟

ا


صديقي عبد المنعم.. حبابك
كتر خيرك على المرور من هنا..
و بعد..
اول بالتبادي يا صديقي..و بكل صراحة التبون و الضعين ما شفتهم..و كذلك كسلا و القضارف و كركوج و سنجة و سنار و شندي و الدامر..و كثيرا ما قلنا ان مشكلة اهل السودان في بعض من جوانبها عدم العرفة..و السوداني لا يتحدث عن قراه و مدنه الصغيرة الإ بالقدر الذي يحتاجه النقاش و حجته..و للأسف دوما ما يوظف الحديث لأغراض محددة ليس من بينها السيوسيولوجيا الشعبية التي تبين بنيات المجتمعات الصغيرة و التغيرات التي حدثت فيها سواءا كانت سلبية أو ايجابية..
بالنسبة لعضم الكلام يا منعم..و اثرت مسألة مهمة للغاية.. لأن كل من يركب مركب التغيير في السودان سواءا كان على مستوى الكلام (لخلق قضية رأي عام بدعوى التفاعل أو التجاوب معها) أو على مستوى الفعل حتى و لو كان فعل تدميري مثل الحرب.. اقول كل من يركب المركب اياه يبدأ حديثه و ينهيه بالمفهوم المفتاحي (التنمية)..و يبقى السؤال: ما هي التنمية بالضبط؟..و هل هي فعل فجائي يمكن أن يحدث بين يوم و ليلة أم هي فعل تدريجي يحتاج الى زمن ؟..

بالنسبة للمدن التي ذكرناها.. لم تكن مدن تذكر الإ بعد دخول خط السكة حديد..و بمنطقك يا منعم ممكن نقول المستعمر جاب خط السكة حديد لخدمة اغراضه..و لتسهيل نقل جيوشه و حركتها..و لكن ماذا عن التغيير المصاحب لذلك في المجتمعات الصغيرة التي مر بها خط السكة حديد؟..اقول حدث التغيير التدريجي..و تلك المدن كانت قرى.. ثم تحولت لمشاريع مدن صغيرة.. بمعنى غيرت في الواقع المحلي و حولت بعض من اهله من نمط الرعي الى نمط مديني صغير..و هذا التغيير جاب معاهو بنيات التعليم الصغيرة.. فتواجدت المدارس مثلا..و اتوجد السوق الذي يرتبط بالإنتاج المحلي..و منها تغير نمط حياة الناس بعض الشئ..
الفولة و ابوزبد يا منعم .. لغاية يوم 29يونيو1989..مافيها مدارس ثانوية..و اقصى مرحلة تعليمية هي المدراس الوسطى (ثانوي عام زمن نميري..ثم مدارس متوسطة في اواخر زمن نميري و ما بعد)..اليوم اقصى مرحلة تعليمية في ابوزبد هي وجود بعض من كليات جامعة غرب كردفان..و ايضا البعض منها موجود في بابنوسة.. و اليوم دخل المنطقة تعليم جديد و مختلف..الطلاب هناك عندهم خيارات يتعلموا علوم تمريض..صحة عامة..مختبرات طبية..مساعدين صيدلة..قابلة فنية ..قابلة تقليدية..تجسير ممرضين..معاونين صحييين..و هذه المسائل كانت الناس بتسافر بالأيام و الليالي عشان تمشي تقراها في الأبيض أو الخرطوم..!

فالتنمية يمكن ان يكون طبقا لكلامك مقصود بيها النفط عشان يمشي لجيوب الحرامية في الخرطوم..و لكنها تحدث اثار جانبية مهمة للغاية في حياة الأرياف و المجتمعات الصغيرة التي تمر بها الشوارع المذكورة..و ضربت مثال سابقا..و قلت قبل خروجي من السودان يمكن ان احسب عدد العربات الموجودة في كل جنوب كردفان (ذلك لقلتها طبعا)..و اليوم لا استطيع ان احسب عدد العربات الموجودة في حي واحد في الدلنج..تفتكر ليه؟..مش ياهو اثر البترول القاعدين يسرقوه حرامية الخرطوم؟..و عشان في عربات كتيرة.. بالضرورة تتم سفلتتة الطرق.. ممكن واحد يقول لي الناس بتعبد الطرق عشان تسهل حركتها..و لكن من الأثار المهمة أنو الطرق دي صدف انها في مناطق انتاج..و بالتالي يسرت ربط مناطق الإنتاج بالسوق.. ذكرت حكاية شوال الطماطم و الأوتس..و الناس طبعا ح تضحك من غرابة المثال..و لكن بالنسبة لينا انو المنتج المسكين بقت عندو خيارات يوصل انتاجو لمحل السوق بالسرعة المطلوبة.. و في نفس الوكت عندو شبكة اتصالات..بتسهل ليهو المفاهمة مع أي سوق موجود عشان يقدر يبيع المنتج و يحقق الربح..!

حلتنا كلها يا منعم .. لمن فارقتها (كان اسمها حي المعهد في الدلنج)..مافيها تلفزيون واحد..و اليوم بقت حي الجامعة.. عادت ليها شبكة الموية الكانت واقفة في عهدنا..و معظم البيوت التي زرتها في المدينة..كل اسرة عندها جهاز تلفزيون..و غالبية الأسر اشترت ليها ركشات..منها مواصلات و منها توفير دخل لبعض الأسر..يبقى هل هذا تغيير؟..و هل البلد القضيت فيها زمن مراهقتي و شبابي الأول..و الذي كنت احتاج فيه عشان امشى مدينة الدويم للعمل كطلبة مونة (لعدم وجود سوق عمل محلي).. هل هي نفس البلد البيلقى فيها شاب في نفس عمري فرصة انو يسوق ركشة ابوهو او اخوه و يشتغل فيها وكت الإجازات و الفراغ 0توفير سقو عمل صغير)؟..هل حدث تغيير اما لأ..؟..
الفكرة يا صديقي.. التغيير لا يأتي بالتصورات الفوقية التي تحتاج ارتكاب اخطاء فادحة مثل الحرب.. و انما بالضرورة يستوعب واقع الزول العادي..و الزول العادي يا منعم اذكى من النخبة الخائبة التي تجوعر بشعارات فارغة مثل الكرامة و الحرية و اسقاط نظام عمر البشير..فهل يكون ثمن ذلك استمرار الحرب في الريف بدعوى انها ثورة كل اهل السودان؟..و ماذا يحدث بعد انتصار الثورة؟..كم من الزمن يحتاج انسان الريف حتى يلحق بركب المدنية؟..

كبر

الأصدقاء..
صلاح..
عيدروس..
احمد ابكر..
كتر خيركم على المرور و سوف اعود بالتفصيل لكل النقاط التي تفضلتم باثارتها..
سعيد بمروركم يا شباب..

كبر

كبر سلامات

Quote: هل يفكر اهل تلك الحروب بنقلها الى ارياف اخرى حتى يتساوي الجميع في التدمير و الخراب ليكون البناء المستقبلي يبدأ من الصفر؟

حروب الريف يا كبر دفع ويدفع تكلفتها أرياف محددة، الجفرافيا لعبت دورها في إنطلاقة هذه الحروب من تلك المناطق المحددة، لوكان للريف في الشمال والجزيرة تماس وخطوط إمداد ملائمة لكانت الحروب في أي مكان..
الهامش العريض يا كبر يستوعب الجميع، ويدخل في عباءته حتى المركز ذاته بهوامشه، لو نظرنا للمركز بعين فاحصة نجده أفراد. والتهميش ذاته درجات، المهمش الذي ينام ويصحى -وقد لا يصحى- تحت وابل الرصاص، ليس كالمهمش الذي يعاني الحرمان فقط مثل سائر المهمشين، لذلك على جميع المهمشين في كل مكان، في الشمال وفي الوسط وفي المركز أن لا يتركوا الهامش في الغرب وجبال النوبة والنيل الأزرق وشرق السودان بان يدفعوا فاتورة التغيير وحدهم، والدعم أبوابه كثيرة، حمل البندقية، الدعم الإنساني - إغاثة-، والتظاهر، والرأي .. إلخ

Quote: لم يتم ربط مدينة الدلنج بالشبكة القومية للكهرباء.. لأن السبب الظاهر للجميع هو وجود حرب تدور في جنوب كردفان..و بالطبع الحرب هي سبب اساسي لتوقف أي مشروع لبنية تحتية..! و الحروب السودانية.. هي واحدة من اخفاقات النخبة السودانية.. سواءا كانت في سدة الحكم..او في معارضة الحكم..فالنخبة السودانية تدأب دوما لأرتكاب الأخطاء القاتلة..و تصنع الحرب و تدعو المواطن ليتحمل اثارها..و ذلك في سبيل تحقيق انتصارات مرحلية تهم النخبة وحدها..!

سلام يا كبر

لو أصلو الثورة أُختزلت في توصيل كهرباء و العيش بهدوء مثل هدوء القبور .... طردتوا الإنجليز و المصريين لييييه؟
ألم يبني الإنجليز السدود التي أنتجت الكهرباء و نفذوا مشاريع ري وضعت السودان في مقدمة الدول الافريقية إقتصاديا و إجتماعيا و إستقرارا؟؟
ألم ينشئ الإنجليز أكبر هيئة للسكة حديد في أفريقيا؟
ألم يبدأ الإنجليز أعظم شركة طيران في أفريقيا ؟
ألم يبني الإنجليز ميناء بورتسودان و أدخلوا خدمات التلفون و التلغراف بينما كانت معظم دول أفريقيا ترزح في التخلف؟
ألم ينشئ الإنجليز جامعة في السودان كانت من أولي الجامعات المصنفة عالميا؟
حتي السبعينيات كان المصريون يتزاحمون للهجرة الي السودان و العمل فيه (المدرسون).


الحروب لم يبدأها أهل الدلنج ليدمروا بلداتهم ....
الحروب هي النتيجة الحتمية عندما تمنع أبسط الحقوق ( العدالة و الحرية و المساواة) عن أي إنسان ....
اليوم الجنوب دولة مستقلة .. بمواطنيها و مواردها .... بعد أن خاضوا حروب التحرير .

لا أدري لماذا تظل أنت تغلف نفس أفكارك المثبطة للهامش المظلوم كل مرّة في أوعية جديدة فضفاضة .... و نفس المحتوي هو هو ..





ء

Quote: سلامات يا كبر .. أعتقد المدن التي ذكرتها .. نسبة لوقوعها على الخط الحديدي .. يعني التنمية أصلا المقصود بيها مناطق النفط المستخرج .. ولا علاقة لها بتنمية الريف ولا الحروب .. تقدر تقول التيبون فيها خدمات أو حتى مدينة الضعين ؟

تحية الأستاذ كبر
الكتابة عن مشاكل السودان بهذا المنبر تفيد كثير فى معرفة مشكلة السودان والحكم فيه
كتب :عبدالمنعم إبراهيم الحاج ( علمت من مداخلة لك ببوست اخر انه تولى منصب وزير ولائى بسودان نيفاشا )
المقتبس اعلاه يعلل وجود السكة حديد بالمدن التى ذكرتها انت كسبب لمرور تيار الكهرباء لأجل النفط المستخرج
وتساءل عن وجود خدمات بالتبون والضعين بصورة توحى عدم وجود خط حديدى بهما !!!!!
يفترض لأى سياسى أن يضع خريطة السودان فى ذهنه حين يتكلم ....
التبون و الضعين بهما خط حديدى ( نيالا -بابنوسة ) و يتأثران بصورة مباشرة بوجود النفط فى منطقة ( أبوجابرة ) تحديدا ولاتبعد كثيرا عنهما ...
من ادبيات الحركة الشعبية قديما كتاب عشارى عن مذبحة الضعين وإذا قرأ عبدالمنعم (وزير الحركة الشعبية -نيفاشا ) ذاك المؤلف لعشارى
لوجد أن الدينكا قد تم حرقهم بمحطة سكة حديد الضعين !!!!فكيف لايدرى هذا السياسى وجود خط حديدى بالضعين ويدرك كذلك اهميتها الخلفية لحقل أبوجابره وشارف النفطين !!!!!
هل يا أستاذ كبر جهل الساسة بجغرافيا السودان ( تحديدا الهامش الذى يتاجرون به )هو سبب هذه الهرجلة التى نعيش فيها...

Quote: علمت من مداخلة لك ببوست اخر انه تولى منصب وزير ولائى بسودان نيفاشا

ا

صديقنا و استاذنا احمد الأمين احمد..حبابك
كتر خيرك على المرور هنا..
تنبيه بسيط يا صديقي.. ان كنت تقصد بعبارتك اعلاها ان صديقنا عبد المعنم ابراهيم الحاج قد تولى وزارة في سودان نيفاشا.. فاعتفد انك خلطت بينه و بين الأخ انور الحاج..و هو ممثل الحركة الشعبية في الولايات المتحدة..و قد كان وزير الحكم الولائي في ولاية الجزيرة عن الحركة الشعبية..
اما الصديق عبد المنعم .. لم يحتقب وزارة..و هو و معه صديقنا ياسر طيفور..و شباب اخرون كثر.. من الذين اختار النضال المسلح ذات يوم..و عملوا في صفوفه..و تخلوا عنه.. ليشكلوا واحدة من اكثر فقرات المشهد السوداني اثارة للفضول..فلقد اختاروا الأمر وقتها بصدق و شفافية..و لكنil يرفضون التحدث عن تلك الفترة..و انت اعلم يا صديقي خوة و رفاقة السلاح مرات زي الزواج عن حب.. مهما الناس اختلفت و اتفارقت.. الإ انها تتكتم على تفاصيلها..!
منعم يا صديقي واحد من اطيب شباب السودان.. لكن ما بتدي حريف..و هذا ما لزم توضحيه في هذه العجالة..
بالمناسبة يا احمد ناس عبد المنعم ديل و قبل تلاثين سنة تقريبا.. ياهم الناس الإكتشفوا انو مشكلة السودان الأساسية انو الناس ما بتعرف بعضها البعض بالقدر الكافي لتأسيس حاجات متسقة و ماشة لي قدام..

و دمت طيبا يا احمد..
كبر

Quote: في محيط يحلم فيه الناس بالثورة، ولا يجتهدون في توفير شروطها الأساسية، وأولاها: أن تكون ثورة واعية! والسؤال المهم: هل أهلنا في الريف يريدون هذه الحرب أصلاً؟

ا

صلاح.. حبابك يا صديق
و كتر خيرك على المرور من هنا..

نعم أي ثورة ناجحة في تاريخ البشرية.. اول مرتكز لها ان تخلق وعيها الثوري الخاص.. و تبشر به عبر خطاب و سلوك متسق.. بمعنى تربط النظري بالعملي حتى يتوفر لها التجاوب من كل الريف الذي انطلقت منه..و هذا الشرط غير متوفر في حروب السودان الحالية.. احتمال يكون اتوفر في الحرب التي ادت الى استقلال الجنوب..لأنها خلقت وعيها الكافي و قاتلت من اجل فكرة محددة هي تحقيق الإستقلال..و قد انتصرت..اما حروب السودان اليوم ، و ان كان اهلها يقولون انها ثورة ريف سوداني و يهربون حتى من تقديم الحجج المقعنة ، فانها شهدت انقطاع ثوري..و ذلك بتوقيع الحركة الشعبية اتفاقية نيفاشا و جلوسها مع الكابوس و تقاسمها السلطة معه..وايضا توقيع فصيل مني اركوى مناوي اتفاقية سلام خاصة بموجبها دخل قصر الكابوس و تقاسم معه السلطة..و الكتلتين تشكلان مفاصل اساسية في الجبهة الثورية..فمثل هذا السلوك فيه التخبط..و بالتالي فقدان الثقة في من يظن انه يقود ثورة..

بالنسبة لأهل الريف..لا يريدون الحرب مطلقا.. لأنهم يدركون جيدا انهم اول من يدفع ثمن الحرب في نفسه و في مقدراته..و هم اذكياء و لهم خياراتهم التي يمكن ان تحسم الأمور نحو الأفضل و باقل الخسائر..مافي ثائر من ثوار اليوم شاور اهل الريف يا صديقي..و انما الأمور تتم في زوايا معتمة وفق غبائن شخصية للغاية ثم تفرض على الناس انها امر يخصهم جميعا..

فاهل تلك الحروب عجزوا تماما عن اقناع البعض الآخر من الريف السوداني انهم امناء على قضاياه و اموره.. لذلك ظلت حروبهم حبيسة الأطراف..و استمرت لعشرات السنين و لم تحدث اثرا..و يمكن ان تستمر الى عشرات السنين في المستقبل و لن تحدث اثرا..

و دمت..

كبر

نعم حروب السودان اليوم هي ثورة جزء كبير من الريف السوداني
لكنها ليست ثورة كامل الريف السووداني
والسؤال هو:
أيهما الأجدى ؟ أن تثور بقية الريف فتكتمل الحلقة الثورية للريف
أم يستسلم الذين ثاروا فتصبح بالنسبة لهم ميتة وخراب ديار؟
هذا السؤال ألحائر اطلقته قبل عامين
ثم قلت : ليت الثورة ما قامت (وأعني بها ثورة الهامش هذه)
لكنني رددت على نفسي بسؤال آخر: من إبتل بالماء ، لماذا لا يعوم؟
ومن إنتصف النهر ، لماذا يعود إلى الضفة التى إنطلق منها ، مادام قد تبقت أمامه نفس المسافة ؟
واليوم أضيف سؤالاً أخر:
وهل تنجيه العودة؟


ا

صديقي احمد ابكر.. حبابك
كتر خيرك على المرور من هنا..
و اشكرك اول من قدم اجابة واضحة.. باعتبار انها ثورة جزء من الريف..المهم..
بالضبط يا صديقي ، ضروري جدا ان يثور باقي الريف حتى تكتمل العملية..و يمكن اقناع ما تبقى من ريف ان خيار التصعيد العسكري هو الطريق الوحيد لحل مشكل السودان مرة واحدة و الى الأبد..و لكن هل النخبة المتوحشة الحالية تملك التأهيل الكافي و الأخلاقي عشان تقوم بهذا الدور؟..

حينما استسلم قطاع الشمال (وفق اتفاقية نيفاشا) لم يهلك الريف..و لم تكن هي ميتة و خراب ديار كما تصورها انت هنا..و حينما استسلمت حركة تحرير السودان (فصيل مناوي) وفقا لإتفاقية نيفاشا.. لم تحدث الميتة و خراب الديار..و حينما استسلمت فصائل كتيرة بموجب اتفاقية الدوحة.. لم تحدث ميتة و خراب ديار كما تصورها.. شفت كيف النخبة دي قاعدة عريانة يا صديقي؟!!!...تدخل السلطة على كيفها..و مافي زول شغال بيها..و ترجع الغابة تاني على كيفها و برضك مافي زول شغال بيها غير الحيكومة..!!!

لم نقل لهم استسلموا..و انما نقول لهم ليكون مبدئيين و لو مرة واحدة: ان كانت ثورتهم فعلا هي ثورة ريف فلينقلوا الحروب الى ريف اخر حتى نتساوى في الخراب و الدمار و نبدأ تاني من الصفر.. لأ لو الأمر عندهم مجرد اسقاط النظام.. فالأفضل يمشوا يشوف النظام ده قاعدين وين و يسقطوا حجرو..!

و دمت..

كبر

Quote: حروب الريف يا كبر دفع ويدفع تكلفتها أرياف محددة، الجفرافيا لعبت دورها في إنطلاقة هذه الحروب من تلك المناطق المحددة، لوكان للريف في الشمال والجزيرة تماس وخطوط إمداد ملائمة لكانت الحروب في أي مكان.. الهامش العريض يا كبر يستوعب الجميع، ويدخل في عباءته حتى المركز ذاته بهوامشه، لو نظرنا للمركز بعين فاحصة نجده أفراد. والتهميش ذاته درجات، المهمش الذي ينام ويصحى -وقد لا يصحى- تحت وابل الرصاص، ليس كالمهمش الذي يعاني الحرمان فقط مثل سائر المهمشين، لذلك على جميع المهمشين في كل مكان، في الشمال وفي الوسط وفي المركز أن لا يتركوا الهامش في الغرب وجبال النوبة والنيل الأزرق وشرق السودان بان يدفعوا فاتورة التغيير وحدهم، والدعم أبوابه كثيرة، حمل البندقية، الدعم الإنساني - إغاثة-، والتظاهر، والرأي .. إلخ

ا

صديقي ياسر..حبابك
كتر خيرك على المرور من هنا..
و تشكر على الكلمات الثاقبات..و هي بالتأكيد نابعة من تجربة معايشة للريف..و اشكرك على الإتفاق معي في ان بعض الأرياف دفعت تكلفة اكثر..

و ، بكل احترام ، اختلف معك في مسألة الجغرافيا ..و هنا كأن امر الحرب في بعض من ارياف السودان هو مسألة قدرية (عندي فرضية كنت زمان بحاول اقنع بيها الناس..و هي افتراض ان الإستعمار لمن دخل كان دخل عن طريق الجنوب او الغرب ماذا كان سيحدث؟..واحدة صديقة قالت لي شكلك سايقنا لي انو نقبل التهميش و الظلم بدعوى انها قدر..!..و تركت الفرضية..و استشهد الآن بالنتيجة..و هي لحسن الحظ ليست عضو في أي منبر نقاش سوداني..!!)..الخلاصة يا صديقي أي حراك سياسي..و لمدة الستين سنة في السودان غايته هي اسقاط حكم و تركيب حكم جديد.. يعني كلها خزعبلات نخبة..و النخبة غيرت الحكم في السودان عشرات السنين و لم تحتاج الى حروب في الريف..حرب الريف الوحيدة الناجحة هي التي ادت الى استقلال الجنوب.. فهل نطمح في الحروب الحالية استقلال جزء اخر كغاية من غاياتها النهائية؟..

نظريا يا صديقي الريف السوداني كلو مهمش.. لكن ما واعي بالمسألة دي الوعي الكافي (و التقصير يرجع للنخبة المتنطقعة اياها).. يعني مواطن دارو تخرب في طرف السودان..و هو ذاتو يتمسح من الوجود..و يكون في مواطن تاني ماشغال بيهو؟..دي مسالة صعبة و قاسية..و من عجب النخبة تدعي انها حاسة بيها.. لكن مشكلتها ما قادرة تعالجها..!

ابادة جبال النوبة في زمن الحرب الأول يا صديقي.. لو كان في ضمير جمعي عندو اخلاق.. كانت غيرت وجه السودان الى الأبد دون الحاجة الى تكرارها للمرة الثانية في الألفية الثالثة..و ايضا ما حدث في دارفور من ابادة.. كان يكفي لتغيير وجه السودان..و لكن اسباب الحرب و طريقة ادارتها.. سحبت بساط الثقة من مواطن كان بشوية توعية ممكن يفهم الحاصل شنو..!

و هذا ما نقوله هنا يا صديقي.. ان كانت الناس على قلب التغيير بصورة واحدة.ز فعلينا ان نتحمل تكاليف التغيير بالتساوي.. زي ما بندفع في كشف المواجبة.. حتى نحس فعلا انها ثورة الريف السوداني كله..!
و يبقى السؤال: هل من تجرأ و جلس مع الكابوس في ابهة السلطة..باقي ليك حريص على ازالة الكابوس؟..و لماذا لا يرجع لقديمه و يترك لأهل الريف فرصة يتنفسوا و يشموا هواء؟..

و دمت..
كبر

Quote: الحروب هي النتيجة الحتمية عندما تمنع أبسط الحقوق ( العدالة و الحرية و المساواة) عن أي إنسان .... اليوم الجنوب دولة مستقلة .. بمواطنيها و مواردها .... بعد أن خاضوا حروب التحرير .

ا

محمد سيلمان.. حبابك يا صديق
كتر خيرك على المرور من هنا..

نعم حرب الريف في الجنوب كانت حرب واعية و عارفة انها ماشة وين.. ما كان ابدا في حساباتها اسقاط نظام و استبدالو بنظام.. عشان كده الريف الجنوبي اتجاوب معاها لغاية اخر شوط فيها (الإستفتاء كان انجح مقياس لهذه التجربة ووضح ان الريف الجنوبي كلو واقف ورا هدف واحد هو الإستقلال)..و ان كان دعاة الحروب اليوم فعلا يعملون لأن تكون ثورة كل الريف السوداني.. فعليهم ان يقعدوا مع الريف في التراب..و يشرحوا ليهو عشان يتجاوب معاهم..!
ابدا الحروب ليست نتائج حتمية عندما تمنع ابسط الحقوق..و انما هناك خيارات انجع و افيد من الحرب حينما يتحقق المواطن من الظلم الذي يطاله..!

فهل نطمح منك اجابة واضحة لسؤالنا المركزي..
و دمت..
كبر

Quote: بالنسبة لقيـادات الحركات إنتا قلتا إنو أسرهم أسر عادية وما عندها نفوذ قبل بداية الحروبات في الهامش. طيب تفسر بي شنو تسلمهم لقيادة هذه الحركات؟ وتانياً : معلوماتي إنو الحركات الإصطفاف فيها قبلي، يعني مثلاً حركة التحرير (عبدالواحد) فور جركة التحرير(مناوي) زغاوة، العدل والمساواة (زغاوة)، الحركة الشعبية (نوبة والإنقسنا) هل معلوماتي دي صحيحة؟

ا


صديقي عيدروس..حبابك

و ليه خليت باقي الكلام؟.ز ما قلنا ليك برضك عمر البشير و على عثمان محمد طه و نافع على نافع و صلاح قوش برضك مارقين من اسر عادية..لا سيد يشير بالإشارة..ولا مال يشتروا بيهو الناس..!
تفسير امر القيادة.. بيحتاج شغل بتاع سيكولوجيا اجتماعية تشرح حال المجموعات و المجتمع المحيط بيها و المعطيات المتوفرة و الممكنة التي ادت الى افراز قيادة بعينها..و ده شغل البوست ده ما قدرو ولا بيحتملو..ممكن في جكة تانية منفصلة نتفاوض و نتفاهم فيهو..!

بالنسبة للمكون لجيوش الحركات التي ذكرتها.. لا استطيع ان اقول لك معلوماتك صحيحة مية المية..و لكن انبهك بان الأشاعة و البروبوقاندا المضادة ليها اثر كبير في طريقة تكون رأي الناس حول ظاهرة محددة..و لكني اقول لك بما اعرف وما رأيت: اولاد اعمامي لزم (مسيرية)..و عندهم فصائل شايلة السلاح.. بعض منهم في حركة العدل و المساواة..و البعض الأخر في الجيش الشعبي قطاع الشمال..لكن شايلين سلاح بياتو فهم.. اعفيني عن الإجابة..!

و دمت..

كبر

Quote: عمر البشير و على عثمان محمد طه و نافع على نافع و صلاح قوش

مفهوم طبعاً يا كبر إنو ديل جو عبر إنقلاب عسكري يدعمهم تنظيم حزبي موجود في الساحة
وعشان كدا ما سألتك منهم، طيب أنا قلتا ليك ديل زعامات الحركات (وتنظيماتهم المسلحة ترافق تكوينها مع زعامتهم)
شنو الرافعة الرفعتهم لقيادة هذه الحركات.
وقلتا يا كبر:
(بالنسبة للمكون لجيوش الحركات التي ذكرتها.. لا استطيع ان اقول لك معلوماتك صحيحة مية المية..و لكن انبهك بان الأشاعة و البروبوقاندا المضادة ليها اثر كبير في طريقة تكون رأي الناس حول ظاهرة محددة..و لكني اقول لك بما اعرف وما رأيت: اولاد اعمامي لزم (مسيرية)..و عندهم فصائل شايلة السلاح.. بعض منهم في حركة العدل و المساواة..و البعض الأخر في الجيش الشعبي قطاع الشمال..لكن شايلين سلاح بياتو فهم.. اعفيني عن الإجابة..!)

بالعكس أنا أسالتي وأفتكر البوست المفروض هي في إتجاه فهم مكونات حركات الهامش وتحالفاتها
وأفكارها عن التغيير، عشان كدا إجباتك ضرورية. الحاجة التانية شايفك برضو ما جاوبت بوضوح علي أسئلتي
ماهي القبائل الرئيسية في الحركات؟ وولاد عمك شايلين السلاح بأياتو فهم؟

Quote: صديقنا و استاذنا احمد الأمين احمد..حبابك كتر خيرك على المرور هنا.. تنبيه بسيط يا صديقي.. ان كنت تقصد بعبارتك اعلاها ان صديقنا عبد المعنم ابراهيم الحاج قد تولى وزارة في سودان نيفاشا.. فاعتفد انك خلطت بينه و بين الأخ انور الحاج..و هو ممثل الحركة الشعبية في الولايات المتحدة..و قد كان وزير الحكم الولائي في ولاية الجزيرة عن الحركة الشعبية.. اما الصديق عبد المنعم .. لم يحتقب وزارة..و هو و معه صديقنا ياسر طيفور..و شباب اخرون كثر.. من الذين اختار النضال المسلح ذات يوم..و عملوا في صفوفه..و تخلوا عنه.. ليشكلوا واحدة من اكثر فقرات المشهد السوداني اثارة للفضول..فلقد اختاروا الأمر وقتها بصدق و شفافية..و لكنil يرفضون التحدث عن تلك الفترة..و انت اعلم يا صديقي خوة و رفاقة السلاح مرات زي الزواج عن حب.. مهما الناس اختلفت و اتفارقت.. الإ انها تتكتم على تفاصيلها..! منعم يا صديقي واحد من اطيب شباب السودان.. لكن ما بتدي حريف..و هذا ما لزم توضحيه في هذه العجالة.. بالمناسبة يا احمد ناس عبد المنعم ديل و قبل تلاثين سنة تقريبا.. ياهم الناس الإكتشفوا انو مشكلة السودان الأساسية انو الناس ما بتعرف بعضها البعض بالقدر الكافي لتأسيس حاجات متسقة و ماشة لي قدام.. و دمت طيبا يا احمد.. كبر

شكر وتحية كبر على الرد .
إعتذر بشدة للأخ عبدالمنعم إبراهيم الحاج فى الخلط بينه والأخ أنور الحاج ..وتحية للجميع

اتفق معك بأن مشكلة السودان هي مشكلة نخب فاسد ، وحاجيك راجع لكن ....

Quote: بالمناسبة يا احمد ناس عبد المنعم ديل و قبل تلاثين سنة تقريبا.. ياهم الناس الإكتشفوا انو مشكلة السودان الأساسية انو الناس ما بتعرف بعضها البعض بالقدر الكافي لتأسيس حاجات متسقة و ماشة لي قدام..

الحتة دي بالمناسبة مهمة جدا كملاحظة او حتى كفكرة ..
فعلا احيانا يبدو السودان كأنه مقسم لدول او كانتونات لا علاقة بينها .. زمان ايام حرب الجنوب مافي اي زول او منظمة او اي جهة حتى الاحزاب في عهود الدكتاتوريات العسكرية ، لم يتظاهر اي احد من اجل الجنوبيين لا في الهامش ولا في المركز ولا في اي حتة ، لماذا ياترى ؟ هل هبطت علينا القيم الانسانية فجأة بعد نيفاشا ؟ نفس الشيء حدث في ازمة دارفور وكأن دارفور تتبع لتشاد او افريقيا الوسطى ، الدارفوريين انفسهم الموجودين في المركز وهم ملايين ربما ، وقبلهم كان في المركز ملايين الجنوبيين وكأن الامر لا يعنيهم ؟ اتساءل هل هذا سلوك بشري معتاد أم اننا ،كما قال من حدثت عنهم ، لا نعرف بعضنا جيدا ؟

تحياتي

عزيزي كبّر
شكراً على التعقيب

Quote: بالضبط يا صديقي ، ضروري جدا ان يثور باقي الريف حتى تكتمل العملية..

تمام .. إتفقنا

Quote: و لكن هل النخبة المتوحشة الحالية تملك التأهيل الكافي و الأخلاقي عشان تقوم بهذا الدور؟..

إختلفنا بعض الشيئ حول هذا السؤال التقريري،،
فليست النخبة بكاملها متوحشة ، فمنهم شفيف الضمير والرؤي ويعمل جاهداً
لأن يقف الهامش على رجلٍ واحدة
لكن صحيح أيضاً أن هناك قطاع آخر من النخبة هم نخبة متوحشة نافرة جافلة عن بعضها
دافعهم في هذا النفور ليس مفهوماً ، ربما بسبب طغيان عقلية السودان القديم عليهم
وعدم مقدرتهم على الإنفكاك عن التبعية للأسياد
وربما بسبب عنصرية مستبطنة ومستحكمة فيهم
وربما - في المقابل - بسبب السلوك الإنطوائي للمجموعة ذات الهمة العالية التي بادرت وقادت الثورة
ربما وربما ...

Quote: حينما استسلم قطاع الشمال (وفق اتفاقية نيفاشا) لم يهلك الريف..و لم تكن هي ميتة و خراب ديار كما تصورها انت هنا..و حينما استسلمت حركة تحرير السودان (فصيل مناوي) وفقا لإتفاقية نيفاشا.. لم تحدث الميتة و خراب الديار..و حينما استسلمت فصائل كتيرة بموجب اتفاقية الدوحة.. لم تحدث ميتة و خراب ديار كما تصورها.. شفت كيف النخبة دي قاعدة عريانة يا صديقي؟!!!...تدخل السلطة على كيفها..و مافي زول شغال بيها..و ترجع الغابة تاني على كيفها و برضك مافي زول شغال بيها غير الحيكومة..!!!

إختلفنا تماماً
فعندما رأيت أن الإستسلام للحكومة هو بمثابة ميتة وخراب ديار ، عنيت أن الثمن أو التكلفة أو الخسارة التي تكبدتها
مناطق الهامش جراء نشاط الثورة هناك كانت كبيرة ، وبعد كل ذلك إذا تم الإستسلام وهجر الثورة فتكون الخسارة مضاعفة
فتصبح حال تلك المناطق وأهلها كحال المنبت الذي لا أرضاً قطع ولا ظهراً أبقى ، وهي فعلاً ميتة وخراب ديار

الأصدقاء..
عيدروس..
عبد الله..
احمد..
حبابكم..و كتر خيركم على المرور من هنا..
وسوف اعود بالتفصيل..

كبر

up

عيدروس كتب:

Quote: مفهوم طبعاً يا كبر إنو ديل جو عبر إنقلاب عسكري يدعمهم تنظيم حزبي موجود في الساحة وعشان كدا ما سألتك منهم، طيب أنا قلتا ليك ديل زعامات الحركات (وتنظيماتهم المسلحة ترافق تكوينها مع زعامتهم) شنو الرافعة الرفعتهم لقيادة هذه الحركات.

أ

صديقي عيدروس..حبابك
كتر خيرك على اثارة هذه النقاط..و قد انطوت على ما يفيد الجميع لتأمل حال المشهد السوداني و هو مشهد منكوب بطبعه..فنحن يا صديقي كنا في زمن نقرر فيه الوقائع الإجتماعية ثم نتركها دون تأمل و نمضي لما هو بعدها.. و لكن اليوم ارى ان هناك ضرورة للتأمل عسى و لعل نستطيع فهم الظواهر على حقيقتها ثم العمل على معالجتها..

ما يهم هنا يا صديقي ذكرك لفكرة الإنقلاب العسكري المسنود بتنظيم سياسي..و السند لقادة الحركات المسلحة الذي يقف مبرر لقيادة افراد بعينها لتلك الحركات..و اعتقد ان مجرد الإقرار وحده بالظواهر لا يكفي.. يعني ليس كافي ان تقول لي دي مجموعة جات عبر انقلاب عسكري مسنود بدعم حزب سياسي..ولايكفي ايضا ان تقول دي مجموعات قيادات لحركات مسلحة جاءت عن طريق سند..

المشكلة يا صديقي هي مشكلة نخبة سودانية لا تدري ما يحيط بها من واقع.. فالإنقلاب العسكري ..صحيح هو تغيير سياسي يسعى لتأسيس تغيير اجتماعي يؤثر في كل السودان..و لكن تظل هناك حقيقة ثابتة.. أن التغيير عن طريق الإنقلاب العسكري المسنود بدعم حزب سياسي (مثلما حدث في نوفمبر 1958 ، مايو1969 ، يونيو1989) مثل هذا السلوك في جوهره سلوك اقلية محدودة و هي صناعة نخبة سودانية..و بالتالي مثل هذا السلوك ليس له اجماع وطني يسنده و انما تسنده اقلية حزبية و بالتالي تفرض الأمر على كل اهل السودان..بنفس القدر.. الحركات المسلحة هي واجهات لإحداث التغيير..و هي الأخرى صنعة اقلية من النخبة السودانية..و تحاول مثل الأقلية الأخرى (ناس الإنقلابات العسكرية) ان تفرض وجودها بالقهر على الناس..!

النقطة التي اريد ان اركز عليها هنا.. هي تبيان فضيحة النخبة السودانية التي لا تستطيع أن تحدث تغييرا ايجابيا الإ عن طريق العنف سواءا كان عنف انقلاب عسكري أو عنف حركات مسلحة..و هذا طريق بائس يا صديقي لأنه يخلق الحلقة الشريرة..بمعنى أنه يعطي مبرر لكل سوداني بان العنف هو الطريق الوحيد لإحداث التغيير..!
و حينما قلت لك أن قيادة الحركات تحتاج دراسة منفصلة.. فأنا اعني ذلك..و اقصد أن القيادة التي تتخذ طريق العنف (انقلاب أو تمرد مسلح) ليس لها سند جماهيرى يجلس عبر مؤسسات و يختار طريق العنف كوسيلة لإحداث التغيير..و انما الأمر هو امر اقليات نخبة عاجزة تريد أن تفر ض الأمر و تصوره انه جاء عن طريق اجماع و اغلبية اجتماعية..!
فهنا ما يحتاج الدراسة حقيقة هو لماذا تختلق النخبة اخطائها الخاصة (مثل الإنقلابات العسكرية و الحرب في الريف) و تروج لها بانها مساءل قومية تهم الجميع؟.. الإنقلاب العسكري سلوك اقلية..و قيادة الحركات المسلحة سلوك اقلية..و هذا ما ندعو الناس ان تضعه في الإعتبار..!

يبقى يا صديقي لم اهرب عن اجابة اسئلتك.. عن المكونات القبلية للحركات المسلحة لأن هذا الأمر بالضرورة يقود لمكون قبلي لما يسمى بالإنقلابات العسكرية..لأن الصورة بالنسبة لي طالما دخل مكون القبيلة في الأمر.. فهذا لا يعني ان نحصره في مجموعة دون الأخرى.. فالإنقلاب العسكري في خلاصته ليس مجرد افكار للتغيير و التحالفات المرحلية..و انما افراد ينحدرون من قبائل..فهذا ما اراه انه موضوع يحتاج دراسة منفصلة و نقاش منفصل..
بالنسبة لأولاد عمي..فقد رأيت يا صديقي الأمر عن قرب..و سالت وناقشت..و يظل الفهم الذي على اساسه يحملون السلاح.. يحتاج لتأمل منفصل ايضا..و سأكتب عنه .زفقط ليس في هذا الخيط..

و دمت..
كبر

عبد الله ادريس كتب:

Quote: فعلا احيانا يبدو السودان كأنه مقسم لدول او كانتونات لا علاقة بينها .. زمان ايام حرب الجنوب مافي اي زول او منظمة او اي جهة حتى الاحزاب في عهود الدكتاتوريات العسكرية ، لم يتظاهر اي احد من اجل الجنوبيين لا في الهامش ولا في المركز ولا في اي حتة ، لماذا ياترى ؟ هل هبطت علينا القيم الانسانية فجأة بعد نيفاشا ؟ نفس الشيء حدث في ازمة دارفور وكأن دارفور تتبع لتشاد او افريقيا الوسطى ، الدارفوريين انفسهم الموجودين في المركز وهم ملايين ربما ، وقبلهم كان في المركز ملايين الجنوبيين وكأن الامر لا يعنيهم ؟ اتساءل هل هذا سلوك بشري معتاد أم اننا ،كما قال من حدثت عنهم ، لا نعرف بعضنا جيدا ؟

أ


عبد الله..حبابك يا صديقي
كتر خيرك على اثارة هذه النقاط..
و ان الآوان يا صديقي ان يتحدث المواطن و يساءل سلوك هذه النخب الفاسدة..و هذا جهد يحتاج مشاركة جميع المواطنين..وان لم يكن جميعهم.. على الأقل اغلبيتهم عبر صوت متكامل يقول للنخب كفاية..!

الواقع السوداني لا يبدو فقط اشبه بالكانتونات..و انما هو حقيقة جزر معزولة عن بعضها البعض..و هذا يرجع لأسباب عديدة.. منها نظام التعليم السوداني الذي لا يستوعب الواقع على حقيقته.. هذه الأيام ارى البعض يتحدث عن منهج جغرافية قديم اسمه (سبل كسب العيش في السودان)..و حينما زرت السودان من كل ما املكه من كتب لم اجد ما يستحق ان احمله في عودتي سوى كتب قليلة (اربعة فقط) من بينها كتاب الجغرافيا هذا..و جوهر الكتاب يحاول أن يربط التلميذ السوداني بجغرافية السودان و اقاليمه و طرق كسب العيش و الظروف الإجتماعية التي تحيط بكل مجموعة اجتماعية معينة..و خلاصته تسعى لأن تمنح التلميذ في مرحلة التنشئة مداخل للمعرفة تربطه بمن حوله..فالتلميذ في ريرة أو بربر أو ود سلفاب.. يخرج بمعرفة تقول له أن الوجود المحلي ليس قريته فقط و انما هناك وجود من حوله و تجمعه معه روابط كثيرة لابد من استيعابها و تعميقها..و لو استمر هذا النهج حتى اليوم.. لما شعرنا بأننا لا نعرف بعضنا..و لشعرنا اكثر كيف يعيش انسان الجنوب أو جنوب كردفان أو دارفور أ و النيل الأزرق في ظروف الحرب..

هذا النهج التعليمي تغير حينما ارتكبت النخبة السودانية اخطاءها تعمدا و مع سبق الإصرار و الترصد..و ذلك حينما ارتكبت الأحزاب خطأ مساندة الجيش و سولت له باحداث الإنقلابات.. فجاءت نظم عسكرية مؤدلجة (مثل نظام مايو)..و هو النظام الذي الغى جغرافية المعرفة و استبدلها بجغرافية الأيدولوجيا..و اصبحنا بدل أن نعرف عن منقو زمبيزي في يامبيو .. أو محمد ود فضل في بابنوسة.. اصبح مطلوب منا ان نعرف الوحدة بين مصر و ليبيا و السودان..و اصبح مطلوب منا ان نغيير علمنا السوداني لأن القومية العربية نجرت ليها علم محدد (في الحقيقة نجر ت ألون العلم و اصبحت كل دولة تجعل علمها متضمنا لتلك الألوان)..و لم يتوقف الأمر هناك في انقلاب نظام مايو.. انما جاء انقلاب نظام يونيو (الجبهة الإسلامية)..و هو الأخر افرغ ايدولوجيته في النظام التعليمي بدعوى التأصيل و ربط المجتمع السوداني بمنظومة اسلامية..فاصبحنا بدلا ان ندرس و نعرف عن واقعنا المحلي.. اصبحنا نعيش حالة تغريب كبيرة..مرة بايدولوجيا القومية العربية..و مرة بايدولوجيا الأمة الإسلامية..!

لذلك يا صديقي .. لا استغرب حينما يتدافع بعض السودانيين باخلاص ما بعده اخلاص لمساندة شعب فلسطين..امبارح و الليلة.. لأن السؤال من هم الذين يقومون بذلك الآن؟.. بعضهم نتاج تربية نظام نميرى (مرتبط بالقومية العربية)..و بعضهم نتاج نظام الإنقاذ (مرتبط بالأيدولوجيا الأممية الإسلامية)..فمثل هؤلاء هم ضحايا لنظام تعليمي سعى و يسعى لتغريبهم عن واقعهم.. لذلك كانت النتيجة.. لا نحس ببعضنا البعض.. لا نحس بالحرب في الجنوب سابقا..و جنوب كردفان و النيل الأزرق و دارفور اليوم.. لأننا لا نعرف بعضنا البعض..و انما يمكن بعضنا يعرف العرب و المسلمين الأخرين و يتفاعل معهم و مع قضاياه دون ان يعرف عن السوداني الذي يعيش معه في نفس القطر..!

و هنا دور المواطن.. خصوصا في ظل ثورة التواصل..ضروري و مهم للغاية.. لأن الأمر يحتاج ان يتحدث المواطن مع صديقه المواطن..و يخبره عن السودان و ماهو بالضبط..و حينما تحدث المعرفة.. يمكن أن تشكل ضغط على النخبة و كل من يفكر في التغيير..و يطلب منه ان يستوعب هذا الواقع..!

ودمت..

كبر

كتب احمد ابكر:

Quote: فليست النخبة بكاملها متوحشة

أ


صديقي احمد..حبابك
كتر خيرك على اثارة هذه النقاط..و بعد..
توضيح بسيط عن مفهوم أو مصطلح النخبة المتوحشة (و هو مصطلح اجترحناه في نقاشاتنا في هذا المنبر)..و نقصد به النخبة المعارضة (مسلحة أو غير مسلحة).. باعتبار انها متوحشة عن صحن دار السلطة..وزغنا من وضع العنف كمعيار محدد لترسيخ المفهوم.. لأننا لو فعلنا ذلك سندخل نفسنا في حيص بيص و تطلع كل النخبة السودانية في الأربعين سنة الماضية هي متوحشة .. لأنها اختارت العنف كطريق للتغيير (انقلاب أو حركات مسلحة)..و هذا ما اقتضى التنويه..

Quote: انت قلت: فعندما رأيت أن الإستسلام للحكومة هو بمثابة ميتة وخراب ديار ، عنيت أن الثمن أو التكلفة أو الخسارة التي تكبدتها مناطق الهامش جراء نشاط الثورة هناك كانت كبيرة ، وبعد كل ذلك إذا تم الإستسلام وهجر الثورة فتكون الخسارة مضاعفة فتصبح حال تلك المناطق وأهلها كحال المنبت الذي لا أرضاً قطع ولا ظهراً أبقى ، وهي فعلاً ميتة وخراب ديار

هنا يا صديقي وقعت في التباس (على الأقل سبب لي استشكال في الرؤية) مثلما وقع صديقنا عيدروس.. فعيدروس تبرع بتقرير عن ناس الإنقلابات انهم جاءوا عن طريق سند حزبي و اكتفى بذلك..و نحن نقول أن التقرير وحده لا يكفي و انما بالضرورة ان نذهب ابعد من ذلك..!

بالنسبة لموقفك.. ان تتحدث عن استسلام مفترض و تبني عليه خلاصاتك..و لكنا نتحدث عن استلام وقع فعلا و شكل حقيقة اجتماعية و سياسية ولابد من مساءلتها.. فالجبهة الثورية اليوم يا احمد.. تتكون من عدة فصائل من بينها فصيل الحركة الشعبية (قطاع الشمال)..و حركة تحرير السودان (قطاع مني اركوى مناوي)..و هي فصائل اساسية و فاعلة في الجبهة الثورية..الأول شارك في السلطة الحالية بموجب اتفاقية نيفاشا (2005)..و الثاني شارك في السلطة الحالية بموجب اتفاقية ابوجا (2006)..و مثل هذه المشاركة لم تجعل الهامش في حالة ميتة و خراب ديار..و انما منحته فرصة للتنفس من لهيب الحرب ولو مؤقتا..و الإنقطاع حدث في العملية الثورية نفسها..و هذا ما داعانا لفتح هذا الخيط و هو صدى لمقولات صديقنا و استاذنا فضيلي جماع في بوسته عن رفع التمام.. لأنه اخذ يحدثنا عن ثورات الريف في كل انحاء العالم التي نجحت و حققت اهدافها..و حجتنا عليه أن ثورة السودان الحالية لا يمكن ان تسميتها ثورة ريف لأن الحراك المسلح فيها انقطع بموجب اتفاقيات سلام..و نفس المناضلين الذين كان الريف (على الأقل في بعضه) يؤمل عليهم كمخرج خلاص.. باعوا تلك الثقة و ذهبوا الى تقاسم السلطة..و اليوم يمكن ان يعودوا في صفقات جديدة ولن يشتغل بيهم فرد من الريف..!

نقطة مركزية اخرى يا احمد.. الحرب التي تدور حاليا حرب اقلية من النخبة و تحاول ان تفرضها على اهل السودان باعتبارها امر له سند جماهيري.. و هذا سلوك يشبه سلوك النخبة حينما تختار العنف كطريق لإحداث التغيير و ترتكب فعل الإنقلاب العسكري.. ثم تجتهد لتبرره بانه امر قومي يخص كل اهل السودان..الحقيقة يا صديقي ليست هناك مؤسسات تمثل الشعب و الأهالي في الريف..ووضع امامها استفتاء لإختيار العنف (حرب أو انقلاب) و بالتالي فتحت لها ابواب المشاركة في اختيار طريق العنف..!

الميتة و خراب الديار هي مسالة استمرار الحروب العبثية ذات الغايات الغامضة..و بعض الريف السوداني بيقول للنخبة الروووب..و كفاية حروب.. اتفقوا مثلما اتفقتم من قبل..و ادونا فرقة نشم الهواء شوية..أو انقلوا الحروب لكل ارياف السودان عشان الشعب كلو يتخنق بدخان الحرب..عسى و لعل نعجل بحدوث الإنهيار الكامل النهائي لنبدأ كلنا من الصفر..!

و دمت

كبر

Quote: هنا يا صديقي وقعت في التباس

Quote: .. انت تتحدث عن استسلام مفترض و تبني عليه خلاصاتك و لكنا نتحدث عن استلام وقع فعلا و شكل حقيقة اجتماعية و سياسية ولابد من مساءلتها.. فالجبهة الثورية اليوم يا احمد.. تتكون من عدة فصائل من بينها فصيل الحركة الشعبية (قطاع الشمال)..و حركة تحرير السودان (قطاع مني اركوى مناوي)..و هي فصائل اساسية و فاعلة في الجبهة الثورية..الأول شارك في السلطة الحالية بموجب اتفاقية نيفاشا (2005)..و الثاني شارك في السلطة الحالية بموجب اتفاقية ابوجا (2006)..و مثل هذه المشاركة لم تجعل الهامش في حالة ميتة و خراب ديار..و انما منحته فرصة للتنفس من لهيب الحرب ولو مؤقتا.

كبر يا صديقي
ما تزال هذه اللمحة لم تلتقطها كما يجب
لم أقع في إلتباس ولم أقربه حتى
أعني ما اقول تماماً .. كما أنني لا أتحدث عن إستسلام مفترض
بل كنت أشير إلي الفئتين ذاتهما والتين ضربت أنت بهما المثل : حركة مناوي والحركة الشعبية
أما الأولي - حركة مناوي- فقد دخلت مع الحكومة في إتفاقية توظيف تخص ناشطيها فقط ، مقابل إستسلامها
أماالمواطنون العُزّل فلم يتوقف تقتيلهم ولو للحظة بعد توقيع وثيقة الإستسلام تلك ،
وأما الديار التي كانت قد خربت فلم تعمر ولا واحدة منها،
بل إن دُوراً إضافية قد طالها الخراب
ألأ يجدر بنا إذاً - والحال كذلك - أن نطلق على وثائق الإستسلام تلك وصف ميتة وخراب ديار
إذا كان الإستسلام لا يجلب الأمان ولا يعمّر الديار فلِم التوقف وفي الحساب إحتمالٌ للنصر ولو ضئيل؟
فما بالك لو كان كبيراً !
أما الحركة الشعبية الممثلة لجبال النوبة والنيل الأزرق فلم تكن ضمن المعادلة أصلاً
تم إيقاف نضالها لسنواتٍ ست ثمناً لقيام دولة الجنوب ، وما أن تحقق الهدف حتى وجدوا أنفسهم خاوي الوفاض
وعادوا بلا ثمرة من شجرة نضال ظلوا يتعهدونها بالرعاية لمدة ربع قرن ، ودفعوا لأجل ذلك نفوسهم للموت وبيوتهم للخراب
وعندما هبّوا يطالبون بالثمار فإذا بآلة الموت تُعمِلُ فيهم مِعوله
والمقصود لهم هو إما أن يتناسوا تلك التضحيات ليضمنوا حياةً ذليلة ، أو إستمرار الموت والخراب
وهنا ينهض نفس السؤال: لم التوقف والذل أثقل من الموت؟
وأي ذل؟ ذلٌ بعد فقدان الأحبة والأقراب والأعراض والأملاك
عسى المعنى أن يكون قد أتضح
تحياتي

صديقي احمد..حبابك
كتر خيرك على التوضيح..و فهمت المعنى جيدا..
توقف الحرب يا احمد مهما كان اكيد بيحدث فرق..و اقول بما نعرف.. جنوب كردفان تنفست قليلا في سنوات التوقف من الحرب..
دارفور كانت منكوبة.. لأن بعض الرفاق ذهب للسلام..و البعض الآخر فضل الإستمرار في القتال..و كنا نتوقع ان يفعلوا مثل ما فعل ناس الجنوب و يستمروا في القتال حتى يكون الأمر عل بينة لأن لم يتبقى ما تخسره الأهالي..و لكن الحسابات الخاطئة هي التي عقدت الموضوع.. و آن الأوان الناس تعمل جرد الحساب و تحمل كل طرف مسئوليته..و نشوف البيحصل لي قدام شنو..
بالنسبة لثمار ناس جبال النوبة.. فقد سرقها رفاق الخندق معهم..و الحقوق كانت تخرج من الخرطوم و تمرقها في حوبا ثم ترجع تاني لجبال النوبة بعد ما يكون نقصت كتير بسبب حق الطريق..و حينما استقل الجنوب قالها اهله صراحة أن الأمر كان مجرد نفير و النفير لا يرتب حقوق ولا مسئولية تجاه من قام بادائها و انما يستحق المجاملة من شاكلة (شكرا)..

بالنسبة لتكييف الأمور.. فنحن يا صديقي و منذ زمن بعيد نعرف و نفهم أن الجيش الشعبي قطاع جبال النوبة حينما قام قام لأن اهله يحسون بالظلم الماحق الذي يحيط باهله و منطقتهم..و اليوم نفهم أن الناس البتكاتل في الطرفين (مع الجبهة الثورية أو مع الحكومة) هم اهالي المنطقة..و هذا خسران كبير..و حينما نقول ان جهود ثوار النوبة سرقت المرة الأولي من قبل أهل الجنوب و هاهي تسرق للمرة الثانية من قبل الأخرين.. الناس بترفض الكلام ده..!
و حتى الآن لا نحجر على الناس خياراتها.. من اراد النضال المسلح هو مخير..و لكن يجب ان ينقل هذا النضال الى كل انحاء السودان..و هذا لا يكلف كثيرا..و انما بخطوات بسيطة ممكن يحدث..و لكن بيني بينك.. من يقومون على امر القيادة لديهم حسابات مختلفة للغاية..مما يجعل المواطن العادي يفقد فيهم الثقة..ناهيك من المتكلمين و المتكلمات ممن اوكل لهم امر التبشير بالفكرة و الدفاع عنها في منابر النقاش السودانية.. فادائهم اضر و يضر بالقضية اكثر مما يفعل النظام.. نلقاها من منو ولا منو يا قريبي؟..


و دمت..
كبر