كتير من المحبة والتحيات لأهلي..اسرتي..اصدقائي..صديقاتي..والمدن المليانة بالمحنة والأشواق التي تنتظر ان تكتب..!
حاجة محبطة..مش؟.. ربما بعضنا ينتظر نقة وجعير وشكوى..ولكن..!
سلام الي استاذي وصديقي بليا..هو كما هو لم تغيره السنين ومشقتها..يتوكأ ابداعا..يبسم ابداعا.. سلاما الى دلنج التصابي..وهي الأخرى لم تشيخ بعد..! سلاما الي سيد منوفل..احمد ابوهم..نزار..معلا..سليمان..زحل..خالدة..سبأ بت اللذين..منال..ومنال الأخرى..استاذنا الهادي جمعة ..ثم
الى صديقتي الأستاذة سميرة ابراهيم احمد..التي تنتظر ان نكتب رواية (عيشة بهاء قمر)..وهي الأخرى مثل استاذنا بليا..هي كما هي..تضحك لأن صوت الدانة اصبح جزء من ريتم الخاطرة..والأغرب تكتب الخاطرة وتمشي في حالها..لتصنع زنجبيل المساء الذي يبقى بالخواطر طويلا..!
سلاما لناس امسودان..!
كبر
Post: #2 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 02:02 AM Parent: #1
(1)
تيسرت لي في اغسطس 2015 فرصة قصيرة لزيارة امسودان ، وهي الزيارة الثانية منذ خروجي في 1999 ، وكغير العادة ، وجدت نفسي اكتب هذه الخواطر عن امسودان..ليس لإكتشاف الأشياء ولكن للتعبير عن القرب منها..مسالة قاسية ان تكون ضيفا على البلد التي ولدت فيها..وانت تتخاطر معها كمجرد ذكريات..والأقسى ان تشعر فيها بالغربة وعدم الرغبة في البقاء فيها لأطول فترة ممكنة..هذا الإحساس جعلني افكر كثيرا لماذا نحن نهرب من امسودان؟..هل لأنها فعلا بلد قاسية ؟ هل لأنها بلد لا يمكن التعايش معها؟..ام نحن لا يعجبنا العجب ولا الصيام في رجب؟..
قضيت فترة قصيرة ، وهي مدة شهر بالتقريب..ولكن هل هذا يكفي للحكم على الأشياء؟..وهل هي فترة كافية للإحاطة باشياء كثيرة فيها؟..ما الذي افتقدته في امسودان؟..ما الذي اتمنى ان اراه في امسودان؟..ما الذي يضايق في امسودان؟..ما الذي يشرح النفس في امسودان؟ قبل التحرك من مدينة كالقري..وجدتني استشير فكي قوقل..أي والله.. اسأل عن افضل الأقطار الأفريقية..وقوقل يشيل ويسكب المعلومات..افضل عشرة اقطار افريقية آمنة..او متطورة..او منتجة أو غنية..وللأسف لم اجد امسودان بينها..وانا في قرارة نفسي مقتنع انها بلد غنية للغاية..ثم كانت الخطوة الثانية.. اسوأ عشرة اقطار افريقية..وكان السودان في القائمة..من حيث السلامة الشخصية..من حيث التعامل..محزن شديد يااااااااااخ..!
وكنت اسأل نفسي لماذا يا ترى؟..المعايير التي حددت امسودان في قائمة اسوء الأقطار الأفريقية اشارت الى ان عدم الإستقرار يرجع للحروب الدموية والنزاعات المستمرة..وقلت في نفسي الحمد لله السبب بأيدينا وليس بايدي عمر ولا اي كان اسمو..! في الرحلة الأولي (2012) كنت متوتر للغاية..فغياب طلاطاشر سنة ليس بالأمر اليسير..كنت مسكون بذاكرة القهر التي اجبرتني ان اختار الرحيل..في هذه المرة..حدث التوازن..ربما عامل السن..وربما..الخبرة..خبرة السفر لأمسودان..!!!!
شعور خافت ..لامبالاة..مافيش شفقة..وبالطبع كثير من الشوق..!
كبر
Post: #3 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 02:06 AM Parent: #2
(2) رحلتي كانت على الخطوط الجوية السعودية..وهي خطوط لم تكن تخطر علي بالي مطلقا.. فكنت افضل الخطوط الهولندية..الألمانية..البريطانية..ولكن حسرة..!! تلك خطوط اصبحت لا تذهب الى امسودان..ليه؟..
اصغر عضوا سنا في اسرتنا الصغيرة هي الآنسة شروق (12 سنة)..لمن قلنا ليها السفر بالخطوط السعودية..اول تساؤل ليها: الى أي حد هي آمنة؟..ناهيك عن النقة بتاعة اسامة بن لادن ، وداعش والقاعدة ، وشنو كده ما عارف..! على عكس التوقعات..الخطوط السعودية كانت خطوط جيدة الى حد ما..وبرضك استشرت عنها فكي قوقل..ووجدت خواطر المسافرين السابقين في تقييم الخطوط السعودية..وهو تقييم مش ولابد..!
عموما ، كانت هي اختيار املته ظروف التوقيت ..فهي كانت اقرب خيار..
كبر
Post: #4 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 02:10 AM Parent: #3
(3)
كنت مترددا من اعلان الرحلة في سودانيز اونلاين..وطننا الصغير..وتشاءمت اكتر..لأن البورد كان داخل في وعكة..!
في الفيس بووك..لقيت مجموعة بورداب سودانيز اونلاين..وكدت ان اعلن..لأني كنت حقيقة ارغب في مقابلة اعضاء البورد على الطبيعة..عشان واحد يختبر قدرتو في التعرف على الناس..ناهيك عن حكايات المقارنات..وتأثيرها..خصوصا اراء بعض الصديقات والأصدقاء الذين توصلوا الى ان البورد..او الكلمة المكتوبة..لا تعبر عن حقيقة شخصية الناس البتكتب..!
ما اخافني حقا من الإعلان..الخوف انو الناس تخيب توقعاتها في شخصنا الضعيف..!
لم اعلن في صفحة دلنج سودان ، لأني موقنا سألتقي اصدقائي وصديقاتي..فكان الأفضل تلقاهم قدامك..فكرة لذيذة ياااااااااااااخ.. يكون صديق او صديقة ماشي في الشارع ويلقاك في وشو..ياخي حكاية كل مخترعات الديجتال ما تقدر تقبضها..!!
في الرحلة السابقة..دخلت مغامرة..اخطار صديقة في هولندا..وكنت بالجد داير اشوفها واسلم عليها..ضحكت هي ضحكة عاتية خلاص وقالت لي: ياخي سنين كندا دي كلها ما مسحت منك فكرة الراعي الجواك؟..قلت ليها : كيف يعني؟..قالت لي: انت ح تكون في مطار امستردام زي الحاجة المعلبة في بترينة قزاز..شوفك ساكت مافي طريقة ليهو..!
وبالرغم من كل ذلك..كدت ان اخطر الأصدقاء حرسم..علي عبد الوهاب.. باني سامر بمطار جدة..مين عارف..يمكن مطارات هناك (بتاعة المسلمين) فيها شوية فرقة..!
كبر
Post: #5 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 02:14 AM Parent: #4
(4)..
وصلنا جدة صباحا..ولمن شفت الغيم والسحاب.. قلت يااااخ..بلد شكلها طقسها طيب وبارد ..ومش بعيد من طقس كندا..ولكن..! ياخي بلد شواية عديييييييييييييييل..احزنتني بان كشفت لي انو الواحد شكلو بقى حنكوش..!
السويعات كانت تمر ببطء للغاية..وكتر خير ناس المطار ..ختونا في صالة باردة شوية..وانوارها باهتة..يعني مافي طريقة غير تنوم..!
طبعا الذ حاجة الأخوة السعوديين..نوهائي ما دايرين يقبلوا حكاية انك اجنبي..طبعا الواحد جاهو احساس ان يخستك بيهم..اشيل واتكلم معاهم بالإنجليزي..ويشيلوا ينادوا لي خبير وطني يعرف يرطن بالإنجليزي..! وكالعادة..طيبة ناس امسودان..تووشك دخل فيني شمال..صديق مسافر..طلعنا جينا في نفس السفرية..هو من فانكوفر وانا من كالقري..حق الله بق الله سلامات..وونسات..! واحد سعودي ..جاني طاير..ما تقول من الصبح يا اخي انك سوداني؟.. قلت ليهو: بتفرق شنو يعني؟.. قال لي: على الأقل نحكي معاك من غير وسيط..! والرجال ما قصر معانا..ربما يكون اطمأن اكتر.. أو ربما حسم حكاية الطنقعة بتاعتنا..!
السعوديين ادوني احساس انو الكائن السوداني عندهم مميز عن بقية خلق الله..والتحية لأهلنا هناك..ومؤكد تعاملهم..خلق سمعة طيبة..
كبر
Post: #6 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 02:16 AM Parent: #5
معليش يا شباب..
عندنا مشكلة في رفع الصور..
شكلو ح يكون حكي بالتيمم ساكت..
ونواصل لاحقا..
كبر
Post: #7 Title: Re: امســـودان: عن اناقة الغيم والقونقليز وال Author: Basamat Alsheikh Date: 09-07-2015, 04:20 AM Parent: #6
استاذنا محمد النور كبر وعرفنا اسمك بالكامل من الاستاذة نور حكي طاعم والله زي موية الاتبراوي وياريت تواصل ذكرياتك في السودان بالتفاصيل عشان نستمتع بهذه الحكايات الرائعة البتذكرنا بحكاوي ود بلة في حوش اميرة بت السيد وكمان في حاجة محيرانا..ليه سميت السودان. امسودان ودمت بالف خير وصحة وعافية
Post: #8 Title: Re: امســـودان: عن اناقة الغيم والقونقليز وال Author: بريمة محمد Date: 09-07-2015, 05:53 AM Parent: #7
ول أبا كبر، حمد الله علي السلامة .. وجيداً جيت.
بريمة
Post: #9 Title: Re: امســـودان: عن اناقة الغيم والقونقليز وال Author: Haytham Ghaly Date: 09-07-2015, 07:20 AM Parent: #8
Quote: مسالة قاسية ان تكون ضيفا على البلد التي ولدت فيها..وانت تتخاطر معها كمجرد ذكريات..والأقسى ان تشعر فيها بالغربة وعدم الرغبة في البقاء فيها لأطول فترة ممكنة..هذا الإحساس جعلني افكر كثيرا لماذا نحن نهرب من امسودان؟..هل لأنها فعلا بلد قاسية ؟ هل لأنها بلد لا يمكن التعايش معها؟
يا سلااااااااام يا كبر ياخ عبرت عن الكثيرين هنا
والله حديثك شوقنا ليك
يللا قولنا أي حديث نسمعو
في انتظارك ولا تكتر غيابك
Post: #10 Title: Re: امســـودان: عن اناقة الغيم والقونقليز وال Author: عبدالحفيظ ابوسن Date: 09-07-2015, 07:35 AM Parent: #9
تحياتي كبر متابع بشغف وبرضو نحن عندنا ذات تساؤلك بشكل مقلوب لامن يجينا واحد مهاجر من برة
Post: #11 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 08:39 AM Parent: #10
بت ابا بسمات..حبابك يا صديقتي كتر خيرك على المرور من هنا..والمطايبة.. التحية عبرك لبنات ابا نور واميرة السيد.. غايتو هي حكاوي زول ساكت..وكنا دايرين نطعهمها بالصور وكده..لكن الصور لسه حردانة..
انت قلت:
Quote: وكمان في حاجة محيرانا..ليه سميت السودان. امسودان
طريقة التسمية ، هناك لهجات في اللغة العربية موغلة في القدم منها حاجات زي الكشكشة والكسكسة والعنعنة والفخفخة و التلتلة والعجعجة والإستنطاء والطمطمانية..وكل واحدة عندها تعريف والمجال لا يسع هنا لذكرها كلها.. ما يهمنا هي لهجات الطمطمانية والإستنطاء..
الطمطمانية هي قلب لام التعريف ميما..مثلا السودان تصير امسودان..وهي لهجة حمير وبقية عرب الجنوب..وهي منتشرة في ثقافات البقارة في غرب امسودان..فيقولون ايضا امجزائر بدلا عن الجزائر..
الإستنطاء من لهجات هذيل..وهو ابدال العين الساكنة نونا اذا جاورتها الطاء..مثلا اعطيني تصير انطيني..فاهلنا هناك عادي جدا بيقولوا (ان انطيناك الكوثر) بدلا عن (ان اعطيناك الكوثر).. يقولون انط بدلا عن الفعل اعط (اعطي)..
ودمت.. كبر
Post: #12 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 08:41 AM Parent: #11
كبر ول ابا بريمة..حبابك يا صديقي جود حالك يا بريمة..
وكتر خيرك على العبور والمطايبة..
وزي ما بيقولوا اهلنا (الليد ياتوا في الجراب)..
كبر
Post: #13 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 08:43 AM Parent: #12
ول ابا هيثم..حبابك يا صديق كتر خيرك على المرور.. ان شاء الله الغيبة تكون خفيفة المرة دي..! سنوات والواحد ما انقطع من المنبر..وفي امسودان الواحد كان بعيد شوية عن المنبر.. حكاوية يار يتها تسعد النفس شوية..شايف البلنجات في المنبر خفت شوية..وياريت يستمر الحال هكذا..! ودمت.. كبر
Post: #14 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 08:45 AM Parent: #13
ول ابا عبد الحفيظ..حبابك يا صديقي كتر خيرك على المرور..
واسمك ظاهر في الحكاوي..وكنت متمني الاقيك..وكلما عدينا بكوستي نذكرك.. ذكرتني حكوة طريفة عن حكاية السؤال المقلوب..واحدة شابة سودانية ناس الحيكومة سفروها بعثة لأمريكا..لأنها مهتمة بكرة القدم الأمريكية..اها بكل حسن نية كملت الدورة وجات راجعة..في المطار قام اخوها ظبطها ليك كف ساموطي وقال ليها: راجعة ليه..!!
لو داير نبدل معاك شوية..فما عندك مشكلة تب..!
ونشوفك.. كبر
Post: #15 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 09:04 AM Parent: #14
(5)
(أ)
مطار الخرتوم: الكعوبية بالكوم ، والدُقـــة بلاش..!!
وصلت مطار الخرطوم..عصرا..طبعا نسيت اقول اني مسافر براي..لأن الحيكومة..سافرت قبالنا ومعاها الشابات شهد وشروق..!
مطار الخرطوم محتاج مراجعة في جاجات كتيرة خلاص..مش من ناحية العمران..فهذه مفروغ من امرها ..لأنو مطار اتأسس قبل عشرات السنين..ومؤكد سعتو اصبحت لا تواكب التطور والعشم في سرعة اكمال المطار الجديد..ولكن الناس..الناس بتاعين المطار..هم من يحتاج المراجعة والضبط والربط..بالجد هناك ظواهر مافي داعي ليها نوهائي..ظواهر ما بتشبه كائن امسودان المضياف..ولا اظن ان كائن امسودان محتاج لشهادة في البشاشة والكرم والتعامل الطيب مع الضيوف..ياخي ده كائن بيعزم على المافيش..وبشوش في استقبال الضيوف..كل القيم دي مفقودة تماما في مطار الخرطوم..بيديك احساس انو الناس الشغالة هناك ما عندها فكرة عن قيم امسودان نوهائي..!
وعشان ما نظلم البعض.. فاول ظاهرة..انو الناس الشغالين في المطار صعب تفرق بينهم..صعب تعرف منو عامل النضافة ومنو الموظف ومنوالعتالي ومنو بتاع الأمن..مافي ازياء مختلفة..مافي اماكن محددة لكل موظف على حدة..اللهم الإ ناس الجوازات..معروفين بزيهم..وعارفين شغلهم شنو بالضبط..وعندهم محلات معروفة..وما قاعدين يكتروا معاك النقة..اللهم الإ اذا اكتشفوا حاجة بتستحق المراجعة..التحية ليهم نساءا ورجالا..فهم الإشراقة الوحيدة في المطار..الباقي اسكت ساكت خليهم..!!
في الزيارة السابقة..جينا عن طريق الخطوط الهولندية..وكنا قليلي العدد..او ربما التعامل وقتها كان مختلف للغاية..فهناك لافتة كبيرة مكتوب عليها ( الأجانب).. مشينا وقفنا في الصف..تعامل راقي للغاية..عسكري الجوازات..يبتسم في وشك ويقول ليك مرحب بيك في امسودان (بانجليزية طلقة)..بالرغم من انو في جواهو عارف انك سوداني حتى النخاع لكن بيحترم اختيارك..ويوجهك تمشي وين..أو الخطوة التانية شنو بالضبط..! وقتها ، خلصنا من اجراء ختم الدخول في اقل من ثلاثة دقايق..لاحظ في ذاك الوقت لم نجازف بالبحث عن معلومات عن اسوء او افضل المطارات في التعامل..!
المحنة وقتها ، كانت في طريقة استلام العفش..من ناحية اجراءات..كانت ساهلة للغاية.. سير مكنة ماشي قدامك..وتشيل عفشك وتتخارج..لكن المشكلة كانت في اشكال من الناس بتحتكر عربات التسوق (كارت)..الواحد فيهم يجي يلقط شنطك ويخطها في العربية..ويقول ليك تدفع لي..ولأننا كنا في شوق للبلد في تلك الزيارة..فلم نكن نلتفت لمثل تلك ألأمور..وبندفع عادي (ياخي اديت لي عمك واحد خمسين دولار لغاية الليلة زعلان عليها..خصوصا في طريقة التسول بتاعو)..!
كبر
Post: #16 Title: Re: امســـودان: عن اناقة الغيم والقونقليز وال Author: ابو جهينة Date: 09-07-2015, 09:08 AM Parent: #15
تحياتي كبر
واصل السرد هذا ذي النكهات متابعون
Post: #17 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 09:09 AM Parent: #15
(5)
(ب)
في هذه الزيارة..نفس الظواهر موجودة..وبصورة اسوء..اقل ما توصف بها انها فضيحة عدييييييييل..!
وقفت في الصالة..ونفس العبارة كانت في وشي (قسم الأجانب)..ولكن لا يوجد فيها موظف او عسكري..وانما هناك شبابيك اخرى..وفيها زحمة اسكت ساكت خليها..لأنو الطيارة السعودية كانت مليانة ..سودانيين طبعا..!
ولأننا في المطارات الأخرى..تعودنا ان نسأل الموظفين والعامليين..ياخي في مطار تورنتو..حتى عامل/ة النضافة ممكن يوجهك التوجيه السليم..ولو ما عارف ممكن يمشي معاك لأقرب تربيزة معلومات..ويقيف جنبك لغاية ما يتأكد انك عرفت المعلومة الصحيحة..ثم يبتسم ويودعك ويتمني ليك رحلة طيبة..!..في مطار كالقري..هناك مجموعة من المتطوعين والمتطوعات..وهم من كبار السن..واقفين مخصوص للأجابة والمساعدة..مع انو الحاجات واضحة وما بتحتاج..!!
في مطار الخرتوم.. ما بتعرف منو الشغال..من العامل..من الموظف..منو بتاع الجمارك..ومن المسافر..!
وقفت..وصديقي الكندي يشيل ويقارن ..بصوت عالي..كيف المطارات في كندا بتعامل الإنسان كأنسان..وهنا بتعاملك كمجرد كتلة عفش.. يدردقوها شمال يمين من غير ما تفهم الحاصل..! واحد مسافر ، سألني: كيف تكون اجنبي وانت بتتكلم سوداني زي الطلقة؟.. رفعت ليهو الجواز وقلت ليها: نحن يا صديقي ، هنا مجرد بطاقات وورق..!
اقتربت مني موظفة سودانية اخرى..كانت لابسة توب..وقالت لي: جيب جوازك نختم ليك..! طبعا اتكيفت شديد..و اديتها الجواز..خصوصا والواحد مقضى قرابة العشرين ساعة طيران..يعني داير يتخارج بسرعة..! في اقل من تلاتة دقايق..رجعت ومعاها الجواز..وبكل وضوح قالت لي: يللا اتصلح معانا وادينا أيتها حاجة..! قلت ليها: ياخي الختم مجانا..وكان ممكن انتظر في الصف عادي..يفتح الله..!
ومشيت..!
طبعا لا شالت مني اورنيك (وصول مواطن) ولا يحزنون..واحتمال كبير الواحد اسمو ما يكون نزل في قائمة الوصول..وكان ممكن عادي جدا يسمط ليهو فعل ارهابي من النوع ابو كديس..وما يلقوا اسمك دخلت متين وووين..هذا اذا كان اسمك غير مسجل في السستم..ومؤكد بيكون مسجل.. اما اذا كان حكاية تدفع ويختموا ليك من غير اسمك يخش السستم فهذه والله عوجة كبيرة خلاص..!
كبر
Post: #18 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 09:20 AM Parent: #17
ول ابا ابو جهينة..حبابك يا صديقي
كتر خيرك على المرور والمطايبة..
هي حكاوي..عابر طريق ..وريتها تفيد..
اكتبها و في خاطري ناس كتيرة ، مش عنصرية وكده ، في نورث امريكا واوربا..واستراليا ..و منتظراهم مثل هذه التجارب..
الناس ديل هنا اتعود على النظام وسهولة الأشياء..وعشان ما ينصدموا نكتب بعض الحاجات..
اهم حاجة .. البلد لسه انسانها العادي طيب..وبشوش..وبيعرف الواجب..وكريم..حتى ولو على مسغبة..!
ودمت..
كبر
Post: #19 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 09:25 AM Parent: #18
(5)
(ج)
في طريقي ، وانا اودع اصحابي ناس الصف بعد نيل حظوة الختم ابو سريع.. واحد..قاعد في شباك..وقفني وسألني من الجواز..وسلمتو الجواز..فحص الجواز..وضربو على التربيزة بتزمر واضح للغاية..! قلت ليهو: ده جواز دولة بتحترم انسانها..ولو زعلان منها قول لينا عشان تاني ما نعتب عليك (طبعا بالإنجليزي)..! الأغرب..الرجل اعتذر..وبحسن نية سألتو: العفش الجاي بالطيارة السعودية وين؟.. وصف لي موقع العفش..وشكرتو ومشيت بعدلي.. وقفت زي ربع ساعة ما شفت عفشي في السير..سألت مسافر جنبي: مش ده العفش الجاي بالخطوط السعودية..؟.. قال صديقي المسافر: وين ياااااخ ده العفش الجاي بالأمارتية..امشي هناك..اخر الصالة..! يعني الموظف السوداني مروحني زي الترتيب..عشان ما دفعت حق تسهيل الإجراءات..وهي شن الإجراءات :ختم الدخول..!!! مشيت سير العفش الجاي من السعودية..واشوف ليك شنطتي حايمة في السير..وشلتها..وانا منتظر الباقي...والسير اصبح خفيف ..وخالي تماما...ياخي دي محنة شنو دي؟.. ولأني في اللحظة القصيرة دي اتعلمت ما اسأل موظف/ة ولا حتى عامل /ة من ناس مطار الخرتوم..فسألت مسافر اخر: ده كل العفش؟.. وكتر خيرو..اجابني: في عفش نزولوه بره السير في الناحية الثانية..! ومشيت الناحية الثانية..ولقيت مجموعة من الحقائب من بينها بقية حقائبي..وتوشك شلتها..واذا بها يسألني واحد: شنو يا اخ..ماشي بالشنط دي وين؟..
طبعا استغربت..ووريتو الورق وتذاكر العفش..وكان مستاء للغاية..مستاء جدا جدا..!
هل يا ترى الفكرة شبكة وناس بتشتغل مع بعضها البعض وبتعرف منو الإتصلح معاهم ودفع ليهم ومنو لأ؟..ان بعض الظن اثم يااااااااااااخ..!
كبر
Post: #20 Title: Re: امســـودان: عن اناقة الغيم والقونقليز وال Author: محمد حيدر المشرف Date: 09-07-2015, 09:42 AM Parent: #19
*
Post: #21 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 09:44 AM Parent: #19
(5)
(د)
بالتأكيد مافي طريقة تسأل ناس مطار الخرتوم عن هويتهم..ومافي طريقة تسأل ده منو ولا هو شنو..ولا وظيفتو شنو..العامل/الموظف/بتاع الأمن..غالبية ناس المطار متسلطين وعندهم جبروت رايح ليهم..طبعا ما عدا عساكر الجوازات..فهم الطف الناس في التعامل..سواءا كانوا رجال أو نساء.. جنود أو ضباط..!
في المطارات الأخرى..معروف انو كل زول بيشيل عفشو..والمطار بيوفر ليك عربات تسوق(كارت) عشان تشيل فيها عفشك وتمشي..المعلومات متوفرة مجانا..بالرغم من بعض المطارات كبيرة للغاية وتمشي لمن تفتر..لكن نوهائي ما بتتوه ولا بتتأخر عن سفريتك..ومافي زعيط ولا معيط بيقول ليك اتصلح معانا..!!!
وسؤالي: الناس البتحتكر عربات التسوق (الدرداقات) في مطار الخرتوم..هل هم من يملك هذه العربات؟..ومافي مانع ممكن ادارة المطار تضع قيمة رمزية لكل عربة تسوق.. ان شاء الله من باب المحافظة عليها او زيادتها..وممكن تضعها في مكان معين..وكل مسافر يستخدم ما يحتاج منها.. شيلان عفشك ده معروف انو خدمة ذاتية (سيلف سيرفس)..وما محتاج عتالة ولا يحزنون..!!!
اهل امسودان هاجروا كثيرا..بعضهم بالإختيار..وبعضهم بالقهر..وكلهم عندهم نية العودة للوطن..زيارة..او بقاء نهائي..بعضهم باسر وبعضهم افراد..والناس دي لمن تسافر في مطارات العالم..وتتجول..وتجي تشوف ظواهر مطار الخرتوم..اكيد ح تجيها غصة..!
محزن يا خي تدفع ليك قروش..وطفلتك او طفلك واقف جنبك وبكل حسن نية يقول ليك ليه ما شلت ريسيت..!!..المرة السابقة كضبت على بنياتي (الآنسات شهد وشروق) وقلت ليهن ورق مكنة الطباعة انتهي وهنا التعامل بالثقة (لاحظ حتى الآن وبعد تلات سنين ما ح اقدر اقول ليهن دفعت رشوة..!!!)..
وهي فكرة المطارات شنو؟..مش خدمة لراحة المسافر..ليه الخدمات غير منظمة في المطار؟..
تحديدا حكاية عربات التسوق؟..ياخي دي في كل العالم هي خدمة مجانية..والغريبة المولات كترت في امسودان..وفيها عربات تسوق مجانية..اشمعنا يعني مطار الخرتوم مختلف..! اتساءل: الناس الكتار ديل شنو؟..هل هم عمال؟..ولو عمال هم عمال شنو بالضبط؟..
ياخي اكعب حاجة قصة التسول العلني..والمقاولات والمفاوضات في خدمات هي مجانية تماما..مافي مطار في الدنيا بتجيك ناس وبتقول ليك ادينا قروش عشان نمرق ليك شنطتك ..ولا زول يقبقب شنطتك ويقول ليك الإ تدفع لي..كل الرسوم بيتم تحصيلها بطرق معروفة وواضحة..!!
ورغم كل الكعوبية بالكوم ،
برضك.. التحية لناس جوازات مطار الخرتوم..لسع بيأكدوا ليك صورة السوداني البشوش الطيب..والأهم بيدوك احساس انهم المجموعة الوحيدة العارفة شغلها..عندهم مهنية عالية شديد..وظريفين يااااااااااخ..
غايتو اهلنا ناس بره..خصوصا الناس الإنطباعية..نوصيهم من ناس مطار الخرتوم..وديل فيهم ناس بيدوك انطباع انو ما ترجع البلد نوهائي..!
نسيت اقول..لمن استشرت فكي قوقل..عن اسوء عشرة مطارات في افريقيا.. كان مطار الخرتوم نمبر ون..في السوء طبعا..!
صحيح الأمكانيات ممكن تكون تعبانة شديد.. لكن المكان انسان..خصوص انسان بشوش ممكن ينسيك تعب السفر..وما يتخيل لي الإنسان محتاج امكانيات عشان نصلحوا.. توجيهات بسيطة..والأمور بتمشي..والأهم انو بعض ناس مطار الخرتوم مفروض يتذكروا انهم عنوان البلد..ووشها ..والوش ، حتى لو وش كائن فقير..حتة ابتسامة ممكن تعمل فرق كبير..اما اظهار الجبروت والتسول..ما بيخدم تب..!
عشرين ساعة طيران..بتخليك تكب النقة دي كلها..واكتر كمان..!!!
كبر
Post: #22 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 09:56 AM Parent: #21
صديقي محمد حيدر..حبابك
كتر خيرك على المرور..وربنا يجمع بصديقنا الغائب شهاب كرار..!
كبر
Post: #23 Title: Re: امســـودان: عن اناقة الغيم والقونقليز وال Author: Kabar Date: 09-07-2015, 09:59 AM Parent: #22
نواصل لاحقا..
كل سنة والجميع بخير وعافية..
كبر
Post: #24 Title: Re: امســـودان: عن اناقة الغيم والقونقليز وال Author: عبدالكريم الاحمر Date: 09-07-2015, 11:10 AM Parent: #23
ول ابا سلام جاك ياخي مش معقول طولت الغيبة خلاص لاكين غيبتك فيها فايده طالما انت جيت من بلد بعيد ومن ناس حنان الشوق شختورا صادف رجل وكلامك حلو بلحيل ومقرنصين راجينك
Post: #25 Title: Re: امســـودان: عن اناقة الغيم والقونقليز وال Author: عبدالحفيظ ابوسن Date: 09-07-2015, 11:53 AM Parent: #24
كبر يا صاحب هو مقلوب سؤال لكن ما مقلوب مراية مستوية ! تعرف ولي من الاصدقاء من هو مثلك هاجر نحو بلاد لم تصادفنا الا في اطلس سادسة ابتدائي ومن بلادفستك حتي سيبريا .. سافروا وسافروا حتي تسربوا من ثقوب الذاكرة وغامت ملامحهم وعادوا بغتة زمان لا نت ! إلا تلاقي زول يقلدك ويطايبك وملامحو تغيب منك وتجيك الزول دة بعرفو ! لكن يا ربي بعرفو من وين ثم ندخل في سلام سوداني عامر .. ونخش سيناريو سوداني قح عرفتني والله عرفتك والاسم رايح لي وكدي انقر وزيادة في جهجهتك يسألك اسئلة شخصية جدا .. ومن معارف واخوانك والوالد لسة في دكانو داك الوالد اتوفي قبل سنتين والله وتكتسي ملامحه حزن حقيقي وحرج ويشيل معاك الفاتحة نهايتو يكلمك وتعرفو لاحولاااااا ياخ اتغيرت شديد لكن والله .. عملت ليك صلعة وكرش وو وسبحان الله كل من رآني عرفني وذات التعليق تخيل انت ما اتغيرت كلو كلو بس كبرت حبة وتعود نحوك في اضطراد ذكريات الصبا او الطفولة .. ويصير ذلك الاشيب الاصلع ذو الكرشة طفلا صغيرا امامك .. وتتدافع نحوك كمية من المواقف والقصص والحكايات ويبدأ السؤال داخلك يلح عليك يا ربي دة زولي زاتو ولا اتغير سأعود إن .. ف الحديث يجر بعضه بعضا
كل ما أقرأ سطر تجيني صور الشخصيات الانت بتحكي عنها
فضفض ولا تتوقف
Post: #27 Title: Re: امســـودان: عن اناقة الغيم والقونقليز وال Author: محمد عبد الله حرسم Date: 09-07-2015, 05:25 PM Parent: #25
كثيرا ما الفت النظر الى ان التجول فى الوجوه والملامح القاسية والراضية والمهتمة والتى يبدو عليها الهزال والتى شحمت وجوه راضية ووجوه مكفهرة تبدأ احاينا من المطار عندما تقع فى الجهة السفلى من الساحة هناك جهة (الله لا وراك) كما اسلفت ول ابا كبر - لا تستطيع ان تميز بين من هو فى الامن وبين من هو حمال وبين من هو موظف لكنهم فجأة يمكن ان يتحولو من هذه النظرة الصارمة فى اللاشىء الى نحوك مباشرة عند صدور اى تأفف منك او ضجر او يحس بتحد ما فى كلام عادى يمكن ان يصدر فى ثانية ثم يغيب من ذاكرتك الامنه فنه يعاقبك على حتى ابتسامة يمكن ان تلقيها تخية يحسها استهزاء تغيرات وتغيرات ومتغيرات وكما (داعش) لايمكن ان تتوقع متى واين يقع الانفجار حولك بينما يكون همك كله انك مشتاق الى هناك وقلبك يخفق لمن تحبهم وتريد ان تراهم ان اول ما يقع عليه عيناك هو مشهد صالة بها اناس كانهم يصطادونك وكل صياد له هدف منهم من يريد ان يجرك الى المعتقل ومنهم من يريد ان يقلع منك ومنهم من يريدك ان تعطيه لكنهم متفقون فى انهم صيادون ومهرة من كتر تعودهم على مهنتهم هذه اصبحوا يعرفون فريستهم جيدا دعنى انتقل الى هناك حيث الارض والخضرة والغيم وبعض التفتح وقلوب تعيش حياها كان الامر لا يعنيها كانك ترى شىء غير الذى كنت تراه او تسمعه هم هم يغنون ويرقصون ويبكون ويحزنون ويموتون ويدفنون موتاهم ويتالمون ويشترون ويبيعون ويتزوجون ويلدون ويدرسون ويصلون ويمشون ويلعبون ويتونسون هم هم كانكلم تفاقهم الا قليلا وانت الوقت لا يسعفك لتقرأ كل تلك الوجوه وتسال نفسم من الذى تغير هم ام انت انت ام عيناك ام عقلك ام وعيك او تفكيرك
حمدالله ع السلامة وبركة الاطمئنينا عليك وكب لينا عيونك وذاكرتك فى الشهر دا هنا
اها مصنقرين ليك بى جد
على حنبة: داير اشتكى ليك عبد الحفيظ من يوم داك ما جا بى هناك تانى
ابوسن يا اجمل الناس مشتاقين ياخ
Post: #28 Title: Re: امســـودان: عن اناقة الغيم والقونقليز وال Author: الجنيد حمد Date: 09-07-2015, 08:10 PM Parent: #27
الزول السمح أستاذنا كبر عودا حميدا
السودان سمح بناسوا زي ما بقولوا وقفت في حتة تصنيف قوقل دي ولما نقارن بلدنا ببقية البلدان الفرق كبير بالحيل والقصة تختصر في سوء إدارة لا غير .
الزول الجوة البلد بكون اتكيف مع الوضع وممشي اموروا بس يطلع بتظهر البلاوي وربنا يصلح الحال
كدي اسمع النكتة دي
واحد مرتوا نايمة منكوشة واليد فى بلد والكراع فى بلد والريالة سايلة والحال بالبلاء صورها وهو طالع على الشغل وقال أرسلها ليها وأتس أب لما يصل المكتب عشان يماتوا اها فى المكتب سرح ورسلها غلط فى قروب دفعتوا زمن الجامعه اصحابوا اتخلعوا وبدوا يسألوا فيهو دى منو رد ليهم: دى ضحية للإهمال الطبى بمستشفى الخرطوم التعليمى بالله دى بلد دى ملعون ابو بلد يحكمها الكيزان ثورة ثورة حتى النصر
Post: #29 Title: Re: امســـودان: عن اناقة الغيم والقونقليز وال Author: Kabar Date: 09-09-2015, 03:36 AM Parent: #28
ول ابا عبد الكريم الأحمر..حبابك يا صديقي كتر خيرك على المطايبة..
هي فرقة كانت صغيرة يا صديقي..وشفنا العجايب في بلاد امسودان.. الدلنج ، برغم الزنقة..ندية ويعانقها الغيم..والناس طيبين.. ازدحمت شوية..و لكنها هي هي تحتوي الناس بكل حنية..
كتر خيرك
Post: #30 Title: Re: امســـودان: عن اناقة الغيم والقونقليز وال Author: Kabar Date: 09-09-2015, 03:44 AM Parent: #29
صديقي عبد الحفيظ..حبابك
السناريو موجود..بنفس الملامح..مع شوية تغيير بسيط.. الواحد شكلو اتمرن شوية قبال الذهاب..وعمل تعديلات بسيطة..عشان كده الفكرة كانت طريفة للغاية.. في الدلنج ، تاني يوم ..كنت مع شقيقي الأصغر..دكتور معلا..وهو زول بيني بينو فرقة كبيرة في العمر..وصادفنا احد زملاء الدراسة..سلم علينا..وقال لمعلا: ياخي الزول ده بيشبهم كتير خلاص..ولأن الرجل صار استاذ تاريخ قديم.. توشك سأل شقيقي : وين محمد ياخي..؟ طبعا ضحكنا نحن الإتنين..وقلت ليهو بالإسم: يا فلان..انت شكلك خرفت..! اتحرج الرجل..و شقيقي قال ليهو: القدامك ده محمد..! الفكرة ، هو كان متوقع زول ماهل في الصحة شوية..لأن المفهوم انو ناس بره ديل كلهم كروش وصلع وشنو كده ما عارف..! اخونا تاني.. كان مع مجموعة..وهم مارين بالبيت..و قال ليهم: ياخي نمشي نسلم على ناس معلا ، قالوا اخوهم الصغير جا من بلاد بره..! نعم السنين بتجري وبتحدث التغييرات في الناس.. بعضهم اصبح ساهي..و بعضها اصبح شكلو مشغول للغاية..و القليل..القليل.. لسع قاعد محل اخر لحظة اتلاقيتو..حب المقالب الطريفة..المشاكسات..التفاصيل..و النوع ده بيديك احساس انو بيقاوم بطريقة خاصة للغاية..!
كتر خيرك..
Post: #31 Title: Re: امســـودان: عن اناقة الغيم والقونقليز وال Author: Kabar Date: 09-09-2015, 03:46 AM Parent: #30
درديري..حبابك يا صديق كتر خيرك على المرور..
وصدفة جميلة تكون مريت بنفس الوجوه..و صدقني ديل زي الديناصورات..ح يكونوا قاعدين تاني وتالت..و بنفس الحاجات العجيبة..!
فترة شهر هي بسيطة للغاية..و يتخيل لي لو الواحد اتقاطع مع ناس الحيكومة كتير.. اكيد ح يعرف حاجات اكتر واكتر..!
عجبتني كتير..تفاصيل الناس العادية..و همومها الصغيرة..احلامها..خوفها..واطمئنانها..!
كتر خيرك..
Post: #32 Title: Re: امســـودان: عن اناقة الغيم والقونقليز وال Author: Kabar Date: 09-09-2015, 03:48 AM Parent: #31
ول حرسم..حبابك يا صديقي
كتر خيرك على المطايبة..وانا الأسعد اني اشوف الناس واطايبها.. بالضبط يا صديقي..اود ان احكي الناس التحت..وشكل تفاصيلهم.. المسافة بعيدة يا صاحب بين واقع فكرة وواقع حقيقة يمشى بين الناس..! هناك اشياء مرعبة ، والرعب فيها انها خارج حسابات النخبة ، خصوصا نخبة الإستنارة الباحثة عن تغيير..اشياء يا صديقي.. اصبحت جزء من تفصيلات الناس التحت..فالهموم تغيرت تماما..والرؤية للأشياء انفتلت كتير خلاص..المسافات تباعدت تباعدت كتير يا صاحب..
كتر خيرك
Post: #33 Title: Re: امســـودان: عن اناقة الغيم والقونقليز وال Author: Kabar Date: 09-09-2015, 03:50 AM Parent: #32
الجنيد..حبابك يا صديقي كتر خيرك على المرور والمطايبة.. بالضبط يا صديقي الإنسان دايما بصير بحاجاتو..وعندو قدرة متجددة على التكيف..وطيلة وجودي هناك..في أي ملم قاعد اذكر الناس بانو السودان في الخارج ولخلق كتيرة بيعني حاجات لو فطن انسان امسودان لربعها.. لصارت الحاجات مختلفة شديد.. الرعب الحقيقي يا صديقي..انو الناس بقت جزر معزولة..مافي زول بيحس بمواطن متلو في البلد..لكن عندو احساس يتكرم بالإحساس بناس خارج الحدود..هم ذاتهم ما حاسين بقوة رابطة العاطفة معاهم..ومش بعيد يسألوا: ليه الحب السوداني ده كلو..! كتر خيرك على النكتة..وهي واقعة..و مثلها وقائع كتيرة.. نقراها بصورة مختلفة.. ياخي الواحد قرب يقول ان تكنولوجيا التواصل دخلت غلط او على الأقل في زمن غلط..! النكتة ذكرتني واقعة محزنة كنا نتحدث عنها مع بعض الأصدقاء في اخر اسبوع قبل الذهاب للسودان..وهي فكرة نشرها واحد في الوسائط مفادها عمل حوار مع دكتور احلام حسب الله..وانو المحاور مشى قابلها في مستشفى التجاني الماحي وسألها عن رأيها بضرورة عودة الإنجليز ليحكموا امسودان من تاني..! المفارقة.. ناس معانا في كندا ، اتضايقوا شديد لمن قلنا ليهم دي شخصية روائية اخترعها اخونا شاهين شاهين..و اتنشرت منذ سنوات..!! المحزن كل الناس بيقولوا ليك يعني نكضب ناس الفيس بوك والواتساب ونصدقكم انتو؟ الوسائط يا صديقي.. بقت سهلة التعامل والتناول..لكن توظيفها فهو المحنة الحقيقية..وهي جزء من النقة لي قدام.. كتر خيرك
Post: #34 Title: Re: امســـودان: عن اناقة الغيم والقونقليز وال Author: Kabar Date: 09-09-2015, 04:01 AM Parent: #33
صديقنا من الفيس بووك..علي العلي..حبابك كتر خيرك المطايبة.. واهلنا بيقولوا: الزول الداخل السوق لازم يجيب خبرو..ونحن دخلنا ونحاول نجيب الخبر..
Post: #35 Title: Re: امســـودان: عن اناقة الغيم والقونقليز وال Author: Kabar Date: 09-09-2015, 04:16 AM Parent: #34
ول ابا احمد محمد (من الفيس بووك)..حبابك يا صديقي كتر خيرك على المطايبة.. امطرقا عراض ساكت..ياخي ده صنقور التراب في ذات نفسو..بلد بعيدة خلاص.. اخونا خليفة كبر.. جانا في الدلنج..مع اسرتو..وصل الساعة اتنين ضهرا..اها بعد السلام والكلام..راحت المداخل..اها سألتو: قمتو متين من لقاوة؟.. قال لي : الساعة اطناشر ظهرا..! ياخي الواحد قرب يقع من طولو..لقاوة دي زمان كانت مختر عدييل ودايرا ليها زوادة وكده..! فكرت اصلها ..لكن الزمن ما اسعفنا..ياخي الواحد لغاية الليلة مشتاق للقردود الطويل وجبيل كاكادا و وادي شلنقو والكرناك ..! الآنسات.. المرة دي قعدن كتير شوية (45 يوم)..واتكيفن شديد ..عجبتهن حكاية الزحمة..وطريقة سلام الناس..والمرقة الجماعية..! غايتو الأيام الأولى..زولة تقول لواحدة فيهن ناوليني الحاجة ديك..تقوم تناولها وتنتظرها..وفي الأيام الأخيرة.. الناس بقت عادي تقول ليك شكرا على المناولة..! الشغلانة قلبت..الناس بقت تجدع ليها كلمة كلمتين بالإنجليزية..وقلت ليهن بقيتن زي حكاية ود البله مع الخواجة..وقالن لي: ازول ها.. ان قعدنا شوية ..الناس ديل نعلمها انجليزي زي الترتيب..! كتر خيرك
Post: #36 Title: Re: امســـودان: عن اناقة الغيم والقونقليز وال Author: Kabar Date: 09-09-2015, 04:23 AM Parent: #35
(6)
قضيت في الخرتوم ، قبل وصول الدلنج، ..خمس ايام..حرصت فيها..ان ابحث عن حاجات اصبحت اثرية..وبقت غايبة في حسابات انسان امسودان..كنت بفتش لي عن راديو..لأني كنت داير اسمع الإذاعة السودانية..كل زول/ة اسألو يضحك..ويقول لي ياخي انت قديم خلاص.. فالعالم هنا اصبحت ناس موبايلات ساكت..الساعة في الموبايل..الراديو (مع انو مافي زول شغال بيهو) في الموبايل.. المزيكا..والنغمات..والأهم التباهي بشكل الموبايل.. فموبايلك هو عنوانك ، بالتحديد عنوان شخصيتك و البرستيج بتاعك..ونوع الموبايل ممكن يحدد كيف الناس بتعاين ليك..وربما تتعامل معاك..!
عثرت علي راديو قديم..وبديت اسمع..طبعا اصبحت اذاعات سودانية كتيرة..سألت احد الأصدقاء عن عددها..وقال لي كتيرة وسكت..!
ناس راديو القوات المسلحة..ديل عندهم فقرة صباحية عجيبة..زي حكاية البورصة.. يذكروا ليك اسعار السلع في غالبية مدن امسودان.. مثلا شوال البطاطس سعرو كم في بورتسودان ، الأبيض ، عطبرة ، كسلا.. نيالا..الدويم..الفاشر.. كوستي ..الجنينة..وهكذا..! يعني من الصبح..لو انت بتاع سوق بتكون عارف حركة السوق ماشة وين..ودي فكرة لذيذة خلاص..يعني مافي طريقة تمشى السوق وتتفاجأ بالأسعار..!
راديو عافية دارفور..كلو عن حاجات دارفور..والإذاعة دي بالذات ادتني انطباع ما لذيذ كلو كلو.. ذكرتني باذاعة راديو جوبا.. ثم ذهبت جوبا لحالها..وبعض من اهلنا ناس دارفور سلوكهم وتفكيرهم بقى يشبه سلوك وتفكير ناس الجنوب قبال يفرزوا عيشتهم..!
هناك اذاعة..شكلها خاصة بجامعة معينة..الإذاعة دي امرها عجيب خلاص..سمعتها لمدة تقارب الطمنطاشر ساعة..عندها حاجتين..الأولانية لقاء مع الشاعرة الشابة نضال حسن..والتاني مع الفنان وليد زاكي الدين..ياخي قربت اقول الإذاعة دي حقتهم الإتنين وبس..!
بالطبع راديو الرابعة..اظرف اذاعة..و شكلها محبوبة شديد..لأنو سمعتها في المواصلات..في الركشات..وفي بعض العربات الخاصة..يعني الناس بتحرص تسمعها..موادها خفيفة وظريفة..وشبابية ومواكبة شديد..التحية لناس راديو الرابعة..!
القنوات التلفزيونية السودانية.. برضك صا رت مجموعة..بس عيبها ما بتقدر تتفرج فيها لمدة ساعة..دمها تقيل..تقيل شديد خلاس..باهتة..ناسها ما عندهم حضور يجذبك..النقة كتيرة..و تكرار للحاجات..يعني واحد ضيف..يكرر نفسو مليون مرة..ناهيك عن طريقة المذيعين والمذيعات.. يعني بتحس انو الناس مهتمة بالكاميرا اكتر من اهتمامها بالمادة المقدمة..!
في احد الصباحات..كنت بتفرج في قناة امدرمان التلفزيونية..والبرنامج كان عن موضوع مكرر اسمو المواعيد السودانية..وليه شكلها سودانية..ونعمل شنو..الأخ مقدم البرنامج يشيل ويذكر الناس بالتلفون للإتصال..وحسيت باني داير اشارك.. توشك اتصلت بالرقم المكتوب..والإجابة : هذا الرقم مغلق..!..كررت الشغلانة تلاتة مرات..وبرضك نفس الإجابة..ليه؟..
اتفرجت في قناة المزيكا..وهي قناة متخصصة..يعني غنا وبس..غايتو قناة متغربة بشكل ما عادي..وبالتحديد..بتقوم تعرض ليك فيديو كليبات سودانية..لفنانين شباب..تحس بالكليبات كأنها دعايات لدهانات..كريمات..تفصيلات ملابس..الخ..التصوير فيها كويس للغاية..وشكل الشباب القاعدين يعملوا الفيديوهات دي عندهم فكرة عن عملهم..بس عيبها انها اشبه بالثابتة.. يعني يصوروا ليك الفنان او الفنانة كم صور..ويعملوا ليك اسلايد شو..مافيش حركة..مافيش مناظر خارجية..والأغرب طريقة المزيكا في عضمها..ياخي مزيكا مفروض تسمعها اخر الليل (ريلاكس ميوزك) ويعرضوها ليك الساعة الثانية ظهرا..والأظرط الإصرار على استخدام الكيبورد ، كأنما امسودان وانسانها لم يخترع الآت مزيكا..طبعا قربت اتصل عليهم واقول ليهم اعملوا ليكم فرقة تقوم تشتغل ليكم بدل الشغل الإلكتروني..! وبالطبع مافي طريقة تجازف تحفظ اسماء الفنانين ..رجال ونساء..وموضوعات الغناء والمزيكا في عضمها شكلها متشابهة ومتقاربة ..بتحسسك انو واحد اكتشف ليهو لحن وقام قعد ينوع فيهو شمال ويمين..اما مضامين الغناء..باهتة شديد..مافي كلمة بتخليك تقيف دقيقة عشان تتأمل الغنية .. في المساء..القناة شكلها اتغير شوية..وبقت تبث اعمال الكبار (محمد الأمين ، عثمان حسين ، الكابلي..الخ)..
حضرت حلقة لدكتور عبد الله شمو..وعندو برنامج اسمو (قصور النغم)..والمدهش استغراب الدكتور وهو يتحدث عن ظواهر في المزيكا اسماها ظواهر دخيلة..وهي حكاية الآولاد القاعدين يغنوا غنا البنات..وطريقة رقص بعضهم..وكيف انو اتفرج في شريط فيديو منشور في اليوتوب.. لراقص في البداية افتكرو راقصة..!
وجود الخيارات ..جعل المشاهد في امسودان يتجنب القنوات السودانية..لأنها ما بتقدر تنافس..مش من ناحية امكانيات..لكن من ناحية موضوعات..المشاهد ما بيلقى فيها روحو او حاجة تجذبو ليها..الأغرب الناس مستعدة تشاهد مسلسل هندي مدبلج..في قناة غير سودانية..وما تشاهد حاجات سودانية..!
عني..قضيت معظم الأيام ، ما عاطل ومرتاح عاد ، اتفرج في نايل كوميدي وموجة كوميدي..وهي قنوات مصرية شغلها مكرب شديد..وبتحس فيهو بالمهنية شوية شوية..!
نواصل لاحقا..
كبر
Post: #37 Title: Re: امســـودان: عن اناقة الغيم والقونقليز وال Author: قسم الفضيل مضوي محمد Date: 09-09-2015, 04:52 AM Parent: #36
Quote: شغلها مكرب شديد..!
الكلام دا بينطبق على بوستك دا يا راجل يا ... كتّاب .
بالجد كتابة بنكهة القونقليز ...
واصل يا اخونا كبر ...
Post: #38 Title: Re: امســـودان: عن اناقة الغيم والقونقليز وال Author: اميرة السيد Date: 09-09-2015, 06:05 AM Parent: #37
يا كبر ياخي ما ساهرت بينا بحكاويك الرائعة دي.. وتاني نحن قررنا ما نسافر السودان ونوفر حق التذاكر عشان لمن نقرا ذكرياتك جي وكاننا قاعدين وسط اهلنا في السودان. والمهم بسمات اول خصة ليها باكر الصباح ولهسع منصنقرة بتقرا في حكاويك السمحة دي واذا نامت اثناء المحاضرة وطردها الاستاذ فحتكون انت السبب... لكن هي بتقول انها بتستفيد. من كلامك اكثر من المحاضر نفسه فواصل بالله وما تقيف... انت زولا كتاب زي ما قال قسم الفضيل والله يديك الصحة والعافية
الأستاذ محمد النور كبر وصدقا لما كتبته اميرة بت السيد، فقد علقت في بوست ود الفاضلاب المعنون: رد الشايقية على الشيعية" بانني استفيد من المقالات التي تكتب عن الثقافات والحضارات وتفاعلها مع بعضها البعض وقلت بانني آخذ امثلة من الكتابات التي يكتبها الاستاذ كبر واستفيد منها في الدراسات التي ادرسها في الجامعة هنا.. وعشان كده ما تسمع كلام بت مصطفى وواصل في حكاويك الرائعة الانيقة والمفيدة لاني حأجيب نسبة فوق التسعين في مادة الاددب المقارن... ودمت بالف خير وصحة وعافية
حضور ومتابعة.. طبعا بسمات وأميرة السيد حيحسدونى... لما يعرفوا أنه الصور الانت بترسمها هنا دى.. أنا بسرح معاها بالاسكوب والتصوير الملون.. بينما هم بتجيهم الصورة ابيض واسود.. عشان كدا.. وبشهادة صاحب هذا البوست وضيوفه الكرام.. أنا بقدم دعوة خاصة لبسمات وأميرة السيد.. بزيارة الجبال فى شهر تسعة من أى سنة يختارون.. ونفّسحهم زى ما دايرين.. وكل شئ على نفقتى الخاصة.. بس بعد ما يغور البشير.. عشان نقدر نتجول بدون أمن ودانات وقيامة رابطة.. قلتن شنو ؟ العزومة دى جد وما عزومة مراكبية..
Post: #42 Title: Re: امســـودان: عن اناقة الغيم والقونقليز وال Author: اميرة السيد Date: 09-10-2015, 04:53 AM Parent: #41
ونحن قبلنا الدعوة يا استاذة نور بكل ترحاب... واذا انتي شفتي جبل مرة فعلا تكوني محظوظة ونحسدك.. لاننا قرينا عن جبل مرة وما شفناها ولكن لمن نقرا وصف المناظر الطبيعية فوق سطح الجبل بنستغرب كيف يكون في قتال وحرب في مثل هذه المناطق الجميلة الخلابة..(والله يجازي الكان السبب) ونرجو ان لا يطول موعد الدعوة عشان بالطريقة الشايفنها دي وضعف المعارضة نظام الانقاذ ده حيحكم سنوات قبل يجينا سيسي جديد ونحن برضه حندعوك زيارة منطقة جميلة حنوريك ليها بكرة والله يديكي الصحة والعافية
Post: #43 Title: Re: امســـودان: عن اناقة الغيم والقونقليز وال Author: Haytham Ghaly Date: 09-10-2015, 05:30 AM Parent: #42
تحية للجميع
كلمونا الكثير من الأصدقاء والجيران الذين كانو اخوة لنا عن جبال النوبة وجمالها في فصل الخريف وفي غيره
اتحفونا بالكثير من الحكايات وعكسوا لنا جمال تلك المناطق وجمال انسانها الذي كان يظهر فيهم وفي حسن خلقهم
ومن هنا اترحم على روح الصديق (محمد أبو عوة) توفى تقريباً قبل سنتين كان دمث الخلق وطيب المعشر
شهم وكريم وصاحب اخلاق عالية واخو اخوان . حسب ما سمعت كان اماماً لاحد المساجد في كادقلي .
وانا بتمنى من جوة قلبي ان ازور الجبال وحا اعزم نفسي يا بت تاور في رحلتكم دي وحررررم تخليها علي حسابي
زرت كثيراً من المناطق في السودان منها الجنوب زمان قبل الانفصال وكانت اجمل فترة قضيتها في حياتي
الجنوب كان جنة الله في الأرض حزنت كثيراً لانفصاله . وزرت الأبيض وفعلاً هي عروس الرمال ولكني لم امكث بها
كثيراً لذلك لم أتمكن من معرفتها جيداً .. وشرقاً الى بورتسودان وكسلا .. كسلا دي حكاية برااااها .. مدينة جميلة وأهلها طيبين وجميلين
هذه المدينة تكتم سراً ما لابد انه سيظهر في يوم من الأيام.. في الشمال وصلت الى دنقلا وبعض قرى المحس
حيث النخيل والنيل يتدفق بحنية على ساكنيه بالضفتين ما اجمل السودان وبالذات المناطق الريفية
يا ربي يا الله ترجع لينا السودان زي ما كان وتزيل هؤلاء الشياطين من فوق رقابنا
Post: #46 Title: Re: امســـودان: عن اناقة الغيم والقونقليز وال Author: A.Razek Althalib Date: 09-10-2015, 06:10 AM Parent: #43
حبابك أزرق كحل الشيخات ول أبا كبر على أن تأتي متأخراً خيراً من أن لا تأتي فكثيرنا يستهوى قراءة الكتابة في جدران كل الأروقة ... فأنت صاحب قلم معبر لكثير من عشاق خواطر المذكرات المنسية..
واصل مثل هذا النزف في وقته ولا تأخر عمل اليوم إلى الوقت..
ما ألذ عصير الدوم رغم قساوة ثمرته..
Post: #44 Title: Re: امســـودان: عن اناقة الغيم والقونقليز وال Author: Kabar Date: 09-10-2015, 06:06 AM Parent: #42
Post: #45 Title: Re: امســـودان: عن اناقة الغيم والقونقليز وال Author: Kabar Date: 09-10-2015, 06:09 AM Parent: #44
قسم الفضيل..حبابك يا صديقي كتر خيرك على المرور والمطايبة هنا.. ياخي القونقليز اتغبا فينا العرفة عدييل كده.. شكلو بقى عجيب ..والناس لو شافتو ..خصوصا الناس الطولت من امسودان ، ح تقول ليك ياخي دي حاجة تانية..! وربنا يقدرنا نواصل.. لغاية العودة لمطار تورنتو..ثم كالقري.. بالجد الحقيبة فيها تفاصيل وتفاصيل.. كبر
Post: #47 Title: Re: امســـودان: عن اناقة الغيم والقونقليز وال Author: Kabar Date: 09-10-2015, 06:12 AM Parent: #45
بت ابا اميرة..حبابك كتر خيرك كتير على المطايبة.. ابدا يا اميرة ..لازمي ترجعي لأمسودان ولو لمرة مدة اسبوع..لأنو حاجاتو اجمل ما فيها انك تعيشها وتشوفها قدامك..ياخي بلد عندها قدرة على تجديد التفاصيل (سلبا أو ايجابا) بصورة عجيبة خلاص..! الشباب والشابات طوالي بيسألوا..ودايرين مقارنة..فكنت بقول ليهم الفرق بين بلدنا الجينا منها وامسودان ، انو الحاجات عندنا رتيبة وثابتة ومستقرة.. يعني داير تخطط ليوم او شهر او سنة او سنتين ..ايقاع الأمور مستقر وممكن تخطط..اما امسودان ، ما بتكون عارف بكرة ح يحصل شنو..! بالرغم من انو كل زول/ة مسافر بتكون عندو اجندة ثابتة..بتاعة انك تلاقي الناس..و تقضي مشاوير المجاملات.. فهناك حاجات صغيرة ممكن الناس تخطها في بالها وتكتشف التفاصيل العجيبة.. بت ابا بسمات..ما دايرين ليها الطرد من الحصة..والحكاوي قاعدة..اطفي ليها النور وخليها تقرا في الويك اند..
كتر خيرك يا اميرة..مرات يتخيل لي جودة الكتابة بتكون من قوة التجربة.. صحيح حكاية انك تسافر وترجع هي مسألة عادية..لكن الشوف بيختلف من زول/ة للتاني..والمرة دي الواحد ، رغما عن كونو ما كان داير السفرة في الوكت ده ، لكن شكلو كان مصحصح..عشان كده قدرنا نتفرج شوية..!
كتر خيرك
Post: #48 Title: Re: امســـودان: عن اناقة الغيم والقونقليز وال Author: Kabar Date: 09-10-2015, 06:15 AM Parent: #47
بت ابا بسمات..حبابك يا صديقتي.. كتر خيرك على المطايبة والثقة في ما نكتب.. واحدة من الحاجات الزول زعلان عليها.. انو امسودان العادي.. بتاع تفاصيل الناس التحت..ما مكتوب ولا كان جزء من خاطرة التخطيط التعليمي .. وكنا بنستغرب ونحن قضينا كم طاشر سنة في التعليم النظامي في امسودان وما قاعدين نشوف تفاصيل الإنسان العادي في امسودان.. ياخي الواحد زعلان لمن كان بيفرضوا عليك تقرا عن الدولة العباسية واستهبال حكامها وحكاوي قصورهم..وفي نفس الوكت ما تقرأ عن حاجات امسودان..!
جزء من اهتماماتي الخاصة حكاية الثقافات المقارنة..ودي بتديني احساس انو حاجات امسودان لو اتكتبت صاح ..ح تكون مدهشة كتير خلاس.. زمان ايام الدراسة يا بسمات..كانت عندنا حاجة اسمها (سوسيولوجيا العقوبة/جزء من علم الإجرام)..اها مقارنة الثقافات كانوا الخواجات بيعانوا لتجربة وسط الأطفال في اليابان..واكتشفوا انهم هناك وقفوا العقاب بتاع الجلد والحرمان ..واستبدلوهو بثقافة العيب..! ياخي ضحكت جنس ضحك..ونحن في امسودان..منذ الصغر ، كل ما تسوي ليك حاجة غلط يقولوا ليك (عيب ياخي) ، ناهيك عن مفاهيم زي (ياخي احرى العيب )..ياخي ما بتخاف من الفضيحة.. مفاهيم ثقافية زي دي عندنا بنعتبرها حاجات عادية..و الأكاديميا السودانية بتتأفف من دراسة تفاصيل زي دي..!
برضك نفس الفكرة بتاعة مقارنة الثقافات..خصوصا حاجات ناس امسودان المدهشة.. مرة كنا بناقش عقوبة الجلد..والخواجيات يشيلوا ويتحسروا لمن اكتشفوا ان الجلد عقوبة واردة في اكثر من عشرين جريمة في القانون في امسودان..و لغاية هنا الحكاية عادية جدا..المدهش..مرة كنت بتفرج في فيديو فيهو ثقافة جلد البطان (وهو عادة موجودة في مناطق الجعليين والبطاحين في الشمال والوسط ، ووسط الأبالة في كردفان)..الجماعة الخواجات والخواجيات في البداية انطباعهم طوالي دايرين يشوتوا ليك حاجات من شاكلة (ندين ونستنكر ، و ياناس حقوق الإنسان افزعونا..وكده)..واستغربوا لمن اكتشفوا انو الجلد ده بيتم بارادة الناس..و انو بتكون مشكلة لو خفت او زغت..والأظرف لمن عرفوا انو الموضوع بيكون موضوع مواجبة ومجاملة اجتماعية.. تنجلد في مناسبتي عشان بعدين لمن تكون عندك مناسبة ، اواجبك وانجلد من باب رد الجميل وكده.. شفتي شعب امسودان ده لذيذ كيف..! واحدة زميلتنا مستهبلة قالت عبارة مفارقة شديد ..و سألتني: طيب وكت الجلد ثقافة عندكم وعادية للغاية.. باقي ليك كيف تنفع كردع وعقاب؟.. قلت ليها: مندري ، واسألي ناس الحيكومة في امسودان..!
امنياتي ليك بالتوفيق في الدراسة..
كتر خيرك
Post: #49 Title: Re: امســـودان: عن اناقة الغيم والقونقليز وال Author: Kabar Date: 09-10-2015, 06:18 AM Parent: #48
بت ابا نور تاور..حبابك كتر خيرك على المرور من هنا..وكل سنة وانتي طيبة.. زمان يا نور..في برنامج (اسماء في حياتنا) الأستاذ عمر الجزلي استضاف ابونا المرحوم فليب عباس غبوش (الحلقة عندي في دي في دي)..واذكر قال عبارة عجيبة ومتأكد ناس كتيرة مرت بيها مرور الكرام ، وهي قوله (الجبال دي زي سويسرا..!!)..! اكيد اجمل حاجة هي الطبيعة والمناظر التي لا تستطيع كل منتجات الديجتال من التقاطها..ياخي بلد نعمة..بس ربنا يهدي النفوس وتتطايب شوية..!
معاي صور كتيرة..واحاول انزل منها جزء..
وانا معاك في دعوة الصديقات بنات ابا اميرة وبسمات.زاضافة لأصدقاء اخرين..في كل جبل او قرية ..نتبرع بتور الكرامة.. ناهيك عن الكركر والدليب وام كرمدودا..طبعا ناس قونقليز وقضيم دي بيكونوا مروا بيها..! ياخي لغاية اليوم الواحد في ذاكرتو لمن البلد كانت امنة..شفنا طلبة خواجات كتار كانوا بيقضوا اجازاتهم في جنوب كردفان..راكبين المواتر واللاندروفر..و متجدعين في البلد بالطول والعرض.. ليتها ترجع تلك الأيام..لأنو انسان المنطقة عندو حاجات كتيرة ح تدهش العالم..!
كتر خيرك..
Post: #50 Title: Re: امســـودان: عن اناقة الغيم والقونقليز وال Author: Kabar Date: 09-10-2015, 06:25 AM Parent: #49
طارق..حبابك يا صديق كتر خيرك على المرور والمطايبة.. مافي مشكلة يا طارق..هي تفاصيل صغيرة..عسى ولعل تذكرنا بحاجاتنا العادية..وهي نفس الحاجات في الثقافات الأخرى بيعلموها كبيرة خلاس.. كتر خيرك..
Post: #51 Title: Re: امســـودان: عن اناقة الغيم والقونقليز وال Author: Kabar Date: 09-10-2015, 06:30 AM Parent: #50
بت ابا اميرة..حبابك يا صديقتي.. حبابك في كردفان ودارفور..ياخي دي مناطق فيها تفاصيل عجيبة ومدهشة..والمحزن انو الناس القاعدة فيها ما قاعدة تعاين كتير للحاجات دي..وانما مشغولة بامور غريبة وعجيبة..
جبل مرة وجبال النوبة.. اتكتبت عنها خواطر كتيرة ..والأغرب من اجانب..اما في امسودان قليل جدا المكتوب عنها..ودي محنتنا في امسودان..الناس ما بتعرف حاجات بعضها البعض..والحيكومات حريصة على انو انسان امسودان العادي نوهائي ما يعرف عن حاجاتو..! غايتو ، لو من ناس المعارضة اعمل منفستو موازي للمنفستو السياسي..و تكون فيهو شوية معلومات ثقافية وسياحية..من كل انحاء امسودان..لأنو العالم ماهو سياسة وبس..وانما الإنسان العادي في العالم..ممكن نخلق منو رصيد ايجابي..! اتخيلي يا اميرة كيف يكون الحال..لو كل زول/ة في المنبر ده قدم دعوة لزيارة منطقة معينة..والناس استطاعت تصل المناطق دي؟..ياخي ح نضحك على روحنا زمن طويل..لمن نكتشف جمال امسودان..!
في الدلنج ، اميرة، كان في خاطري خيط صديقنا الحبوب النصري (انت للضرس عرديب) وحكاوي الشدر المدهشة..اها قمت اصور ليك في الشدر..عرد..هجليج..تبلدي..امديكة.. مخيت..بشم..ياخي حتى الضريسة والكول ..صورتها..اها قريبتي واحدة مسافرة الحج..و شافت الصور..وبكل طيبة قالت لي: الشدر ده هناك مافي بلدكم ولا شنو؟..قلت ليها مافي.. ضحكت وقالت لي: طيب ما تجينا في الفريق هناك عشان تشوف شدر اكتر وتصور كمان..!
لغاية ما المعارضة والحيكومة يرسوا على بر آمن..نحن نحكي وندعو الناس عشان تحكي..فالحاجات العادية..تفاصيل انسان امسودان التحت..هي الأهم..و هي القاعدة رغم المحن والإحن..!
كتر خيرك
Post: #52 Title: Re: امســـودان: عن اناقة الغيم والقونقليز وال Author: Kabar Date: 09-10-2015, 07:15 AM Parent: #51
ول ابا هيثم ..حبابك يا صديقي كتر خيرك على المرور.. حبابك يا صديقي والبيت بيتك..نظبط ليك نقاقير زي الترتيب..فالناس هناك المهرجانات عندهم جزء من الحياة..بتحب تفرح بطرائقها الخاصة..وهي طرائق مدهشة..!
عارف يا هيثم.. فكرة التجوال في امسودان فكرة مهمة..خصوصا في زمن الديجتال ..وده بيديك فرصة تلتقط الصور والفيديو..ولو كل زول/ة اتيسرت ليهو فرصت توثيق الحاجات بالصور.. ح نكتشف انو امسودان ده حاجة تانية خالص..! الجنوب يا صديقي.. ما فضل لينا غير الأمنيات الطيبات..ونقول الله يدرا بحالو..لأنو بلد ما بستاهل الحاصل تب..لكن منو البيقنع الديك..!
كتر خيرك
Post: #53 Title: Re: امســـودان: عن اناقة الغيم والقونقليز وال Author: Kabar Date: 09-10-2015, 07:18 AM Parent: #52
ول ابا عبد الرازق..حبابك يا صديقي كتر خيرك على المرور والمطايبة.. هي بعض من تذكرة يا صديقي..عسى ولعل نشوف حاجات الناس التحت.. المضابحة شكلها بقت ما جايبة همها تب..والسلام خيار لابد يكون..سواءا رضت النخبة عنا او لم ترضى..فترنا ياخي من الدموم الهاملة دي..! يكفي انها بلد..فيها المطر بيخرق حظر التجول وخطوط النار والرصاص وبيكب في أي حتة تعجبو..رغم انف الجعير السياسي الما جايب همو..! وصيتي ليك.. المثل قال: الجمل ماشي ..و الكـــلـــب ينبح..فدعهم يا صديقي.. فالكائنات التي لا تملك ذاكرة ثقافية وجمالية.. بتحس صغر كينونتها امام جحافل الحضور والمعرفة والمطايبة ، عندها ازمة..عشان كده بتعبر عن نفسها بالمشاترة و دق ام جاعورة..! ام جاعورة ما بتكتل زول يا ول ابا..خليهم يجوعروا ساكت..لمن الضحك يشرطهم..! كتر خيرك يا عبد الرازق.. كبر
Post: #54 Title: Re: امســـودان: عن اناقة الغيم والقونقليز وال Author: ismeil abbas Date: 09-10-2015, 09:59 AM Parent: #53
كتابة معبرة وجميلة......قريت البوست لأخر مداخلة وعرفت الكثير عم أرض بلادى التى لم أزرها ونفسى أن أصلها...
الدلنج/ وحكاويها الجميلة...إنتقل لها أخى عباس وعمل فىها لمدة خمس سنوات إلى ألا ن أهلها بجاملونا من حسن عشرتهم وبصلونا فى أم درمان ناس طيبة وصافية النية
Quote: زمان يا نور..في برنامج (اسماء في حياتنا) الأستاذ عمر الجزلي استضاف ابونا المرحوم فليب عباس غبوش (الحلقة عندي في دي في دي)..واذكر قال عبارة عجيبة ومتأكد ناس كتيرة مرت بيها مرور الكرام ، وهي قوله (الجبال دي زي سويسرا..!!)..!
أولاد السيد فيليب كانوا أصحابنا وهم فى البوستة أسحق وزكريا وأيام فريق السلة..ونحن فى العباسية.....وإبن خالتهم نعيم جون...زكريات جميلة وعطرة....واصل فى سردك مع العلم بأنى زرت جبال سويسرا ولم أزر جبل مرة وجبال النوبة ويا أسفى على ذلك...نسأل الله أن يعيد السلام فى الوطن ونزورها .
Post: #55 Title: Re: امســـودان: عن اناقة الغيم والقونقليز وال Author: اميرة السيد Date: 09-10-2015, 04:05 PM Parent: #54
عزيزتي الاستاذة نور تحية طيبة مرة ثانية شكرا على الدعوة .. وسنلبيها قريبا باذن الله.. وعاوزة هنا اوجه ليكي دعوة تزوري معانا منطقتين واحدة داخل السودان والثانية خارج السودان
المنطقة داخل السودان هي كسلا وضواحيها: انا ما من كسلا لكن في السنة من السنوات زرت كسلا لزيارة اقربائي هناك ووجدت مناظر عجيبة جدا .. وخاصة جبال التاكا .. وكنت محظوظة مشيت في فصل الخريف.. واستغربت كيف ناس وزارة السياحة ما عاملين دعاية للمنطقة دي .. والله الخواجات كان عرفو جمال المنطقة دي كانوا براهم حيبنوا مطار حديث في كسلا وكنتي حتلقي السياح بالآلاف في المنطقة والفنادق كانت حتتملي وكان حيكون في انعاش اقتصادي هناك... ووظائف جديدة ومشكلة العطالة كانت حتتحل ,,, بس نحن ما بنعرف جمال منطقتنا وما بنعرف نسوق روائع بلدنا...وفي اول زيارة لينا للسودان حنوجه ليكي الدعوة تزوري معانا كسلا - ده اذا كنتي لسع ما شفتي جبال التاكا والمناطق المحيطة بيها..
- المنطقة الثانية خارج السودان وهي في الولايات المتحدة الأمريكية وفي ولاية نيويورك . والمنطقة اسمها منطقة الالف جزيرة تخيلي يا نور ان هناك منطقة رائعة جدا في شمال ولاية نيويورك وفيها 1860 جزيرة .. ولكن سموها منطقة الأالف جزيرة بس عشان الاسم الموسيقي للسياح.. هذه المنطقة من اجمل مناطق العالم .. والجزر صغيرة جدا واكبر جزيرة مساحتها 40 ميل واصغر جزيرة بها شجرة واحدة وساكن فيها زول واحد وجزء من هذه الجزر توجد في ولاية اونتاريو في كندا ولكن معظم الجزر داخل ولاية نيويورك.. وذهبنا مرة في رحلة لهذه المنطقة ووجدنا حاجات عجيبة جدا وحتشعري وكأنك في جزر الاحلام من روعة المناظر الخلابة .. وساحاول انزل صور من هذه الجزر - اذا استطعت- وبما انك صحفية معروفة فمن السهولة الحصول على تاشيرة الدخول لامريكا( كافة المنصرفات على بسمات) - هي غنية وبرجوازية لكني مسكينة) ( وجه ضاحك).. والدعوة ما دعوة مراكبية).. واذا ما ادوكي التأشيرة فعدنا وسائل اخرى للحصول عليها.. منطقة تستحق الزيارة.. وياريتي تكلمينا شوية عن جبل مرة.. وهل المناظر التي قرأنا عنها تغيرت وهل هناك الآن سياح يزرورن المنطقة ام ان الحروبات لا زالت دائرة هناك والله يديك الصحة والعافية
Post: #56 Title: Re: امســـودان: عن اناقة الغيم والقونقليز وال Author: اميرة السيد Date: 09-10-2015, 08:07 PM Parent: #55
هذا السودان الواسع المترامي الاطراف لم أر فيه غير اقصى شمال السودان، ومدينة كوستي ، ومدينة مدني ومدينة بركات ومدينة كسلا والقضارف وبورتسودان والحصاحيصا وطبعا الخرطوم ، والتي لا بد ان نمر بها اجباريا، ,, واتذكر انني وفي زيارة لي لمدينة كوستي لزيارة ابنة خالتي اصرت على ان اذهب معها في رحلة مدرسية إلى قرية ام دبيكرات لزيارة قبر الخليفة عبد الله التعايشي.. وطبعا استأذنت من الاستاذ مشرف الرحلة المدرسية ، وسافرنا ، وحتى بعد رجوعنا من الرحلة كنت متخيلة ان قرية ام دبيكرات تابعة لولاية كردفان على اساس ان معركة ام بيكرات ضد الانجليز وقعت في كردفان.. وعندما وصلنا قرية ام دبيكرات شرح لنا شخص ملم بتاريخ المنطقة ان الخليفة عبد الله التعايشي قتل يوم الجمعة الموافق 24 نوفمبر 1899م في هذه القرية بل انه حدد لنا مكان الشجرة التي كان يجلس تحتها الخليفة عبد الله التعايشي وقائد جنود ه احمد فضيل.. وان عبد الله التعايشي عندما عرف انه سيقتل لا محالة فرش فروته التي كان يصلي عليها وانتظر الموت وجاء جند من الانجليز بقيادة ونجت وقائد جنوده الضابط وندهام.. واطلق الجنود النار على الخليفة وعلى قائد جنده احمد فضيل ونفر من اتباعه الذين كانوا يرافقونه .. واستشهد الخليفة ولكنه مات ميتة الابطال دون خوف ووجل من الموت واعترف بشجاعته الأعداء حيث ان اللورد كتشنر وقف امام جثمانه وأدى التحية العسكرية لجثمان الخليفة وهو يقول:" ما هزمناهم ولكن قتلناهم"" اما الجنوال ونجت الذي كان يقود الحملة العسكرية ضد الخليفة عبد الله التعايشي فقد قال عندما سأله الضابط وندهام وهو يشاهد انزال جثمان الخليفة عبد الله في قبره :- هل مؤدي التحية العسكرية لهذا الخصم اللدود؟ فقال له الجنرال ونجت:" نعم فانت لا تعرف عظمة من ندفن اليوم".. وعندما رجعت من ام دبيكرات قلت لابنة خالتي كويس شفنا جزء من ولاية كردفان . وتراها ولاية كردفان قريبة كدي.. فقالت ام دبيكرات تابعة لولاية النيل الابيض زيها وزي كوستي... ( معليش استاذ كبر قلبنا ليك الحصة تاريخ .. ولكن اتذكرت ام دبيكرات اليوم عشان كنت مفتكراها في كردفان... وبعدها قرأت شيئا عن شجاعة الحليفة عبد الله التعايشي ورفاقه وهم ينتظرون الموت .. فهؤلاء الرجال الاشاوس الابطال ضربوا لنا مثلا جيدا للشجاعة والبطولة وكانوا فعلا مثالا لبسالة السوداني وطهروا بدمائهم ارض السودان .. والله يديكم الصحة والعافية
Post: #57 Title: Re: امســـودان: عن اناقة الغيم والقونقليز وال Author: حاتم إبراهيم Date: 09-10-2015, 08:29 PM Parent: #1
سلام، مجرد رأي
"امسودان" دي ما كفاها يا أخ كبر؟
Post: #58 Title: Re: امســـودان: عن اناقة الغيم والقونقليز وال Author: Kabar Date: 09-11-2015, 00:22 AM Parent: #57
ول ابا اسماعيل..حبابك يا صديقي كتر خيرك على المرور والمطايبة..والتحية لشقيقك..ونتمنى يعود يوما ما لمدينة الدلنج.. ويا ريت الناس تحكي امسودان زي ما شافت العيون..بعيدا عن الأجندة الماجايبه همها..! السلام اصبح ضرورة ملحة يا صديقي..والحرب مافي زول طايقها لا في عضمها ولا في اجندتها..اجندة الحرب اصبحت واضحة للناس العادية.. عشان كده مافيش رصيد ايجابي لأخوانا ناس البندقية.. سواءا كانوا معارضة أو حكومة..! التحية للإخوة ابناء ابونا فيلب اينما كانوا وكيفما كانوا..! مريت مخصوص بحي البوستة..وتحديدا كنت ناوي اتجدع شوية في ميدان البوستة..واتفرج في الكتب القديمة..لكن شكلي ما فهمت التكتح..والحاجات المعروضة شكلها بقى مختلف للغاية..اللمحة الوحيدة هي سوق امدرمان ولسع فيهو باقي ملامح من زمان..! كتر خيرك
Post: #59 Title: Re: امســـودان: عن اناقة الغيم والقونقليز وال Author: Kabar Date: 09-11-2015, 00:24 AM Parent: #58
بت ابا اميرة السيد..حبابك كتر خيرك على المرور .. ابدا يا اميرة..مافيش داعي للتعضر.. فكرة الخواطر هنا انها مفتوحة..و ياريت كل زول/ة يجيب لينا خاطرة عن رحلة.. شرطا تكون داخل امسودان..! المرة الجاية نعزمك لأرض معركة شيكان..و المتحف في مدينة الأبيض..! كتر خيرك..
Post: #60 Title: Re: امســـودان: عن اناقة الغيم والقونقليز وال Author: Kabar Date: 09-11-2015, 00:26 AM Parent: #59
حاتم..حبابك يا صديق كتر خيرك على المرور.. حق ابداء الرأي محفوظ يا صديق ما فهمت القصد؟.. نوقف الحكي ولا استخدام المفردة امسودان؟..يا ريت توضيح اكتر شوية..
Post: #61 Title: Re: امســـودان: عن اناقة الغيم والقونقليز وال Author: Kabar Date: 09-11-2015, 00:28 AM Parent: #60
كتب هشام الدرديري (من الفيس بووك):
Quote: ابداااااااااااااااااااااااااااااااع يسلم يراعك كبر وربنا يبديك الصحة والعافية ويمتعك بي كل رقعة بامسودان وربنا يديك قدر مايرضيك
هشام..حبابك يا صديق كتر خيرك على المطايبة..والأمنيات الطيبة..وابادلك مثلها..
Post: #62 Title: Re: امســـودان: عن اناقة الغيم والقونقليز وال Author: Kabar Date: 09-11-2015, 00:29 AM Parent: #61
ول ابا قاسم الأنصاري (من الفيس بوك)..حبابك يا صديقي كتر خيرك على المطايبة والمتابعة.. وربنا يقدرنا نكتب الفي راسنا وبس..! وربنا يلاقينا تاني يا صديقي..شكلنا هرمنا شديد يا عم..! كبر
Post: #63 Title: Re: امســـودان: عن اناقة الغيم والقونقليز وال Author: Kabar Date: 09-11-2015, 00:34 AM Parent: #62
زرت الأصدقاء منال الله جابو واستاذنا الهادي جمعة (الهادي ساورا)..ومنال كتر خيرها ، وكانت سايقة ،اخدت رحلة طويلة شوية لغاية وصولنا لمنزلهم في الجريف شرق..عشان تدينا فرصة نتفرج في الحاجات..!
اهدتني الصديقة منال روايتين..وهي توصيني بضرورة القراءة والتعليق.. لأنها شكلها حست ان بعض القراء والقارئات لم يتفاعل أو يندهش بالروايتين..الرواية الأولانية..بعنوان (بعض من هذا القرنفل) للروائي السوداني الصادق نور الدين..و الثانية بعنوان (عطر نسائي) لصديقنا عضو المنبر الروائي عماد براكة..قريت الروايتين ..و اعدت قراءة فصول كتيرة منهما..ونحكي عنهما لاحقا..
ثم حزمت حقائيبي في طريقي الى مدينة الدلنج..والسفر بالبصات..ودي فيها حاجة عجيبة للغاية..طبعا البصات بقت لكل انحاء امسودان.. ناهيك عن حكاية الوصول الى القاهرة في مصر المؤمنة..!!
الطرق ، كبنية تحتية اساسية ، متواجدة ..وقربت المسافات كتير خلاص.. بس المشكلة مافي تجمع نقابات عشان يفتح نفاج للجماعة واحدين ويشبكونا ليك..نضال البرولتياريا وشنو كده ما عارف..!!..
انطباعي عن سفر البصات..انها افضل كثيرا من الطيران (طبعا في الرجعة لكندا الطيارة السعودية من الخرتوم اتأخرت قرابة الخمس ساعات من غير ما نفهم الحاصل شنو)..
في السوق الشعبي امدرمان..بصات كتيرة..الفاشر ..كادقلي..الأبيض..الدلنج..الخ..والفاشر الكانت زمان محتاجة ليها اسبوع عشان تصلها ، واحتمال يطبوا عليك الجماعة واحدين الهسع عاملين فيها مناضلين في حركات دارفور..اما الآن.. فالأمر اتغير كتير..و الفاشر بقت فركة كعب..والسكة آمنة..!!!
كبر
Post: #64 Title: Re: امســـودان: عن اناقة الغيم والقونقليز وال Author: Kabar Date: 09-11-2015, 00:40 AM Parent: #63
(7)
(ب)
في البصات.. المواعيد مظبوطة للغاية..الحضور الساعة السادسة صباحا..التحرك السابعة..مافيش تأخير او كركبة..الساعة السابعة البص في السكة..!
التحية لناس بصات (دواء) وبصات (عرجون )..الأول في رحلة الذهاب والثاني في رحلة الإياب..!
البصات نضيفة.. ستائر تهفهف وكده.. تكييف زي الترتيب..مافيش زحمة..مافيش شماعة..اغرب حاجة الناس بتكون واقفة في الصف عشان تركب البص..زي نظام كندا بالضبط..!!
لاحظت الصمت..الناس شكلها فقدت القدرة على الثرثرة..مافيش زول قاعد يتونس في البص..لأنو العالم كلها مشغولة بالموبايل..يا اما بتسمع مزيكا..ويا اما..بتابع الواتساب..
البصات بتقدم خدمة تلفزيونية..عشان تقلل ملل الرحلة..طبعا البداية بيشغلوا قرآن..ثم خطبة دينية..ثم مزيكا..ثم فقرات درامية..مافيش ملل.. اضافة لمناظر الطبيعة في النيل الأبيض وكردفان..والغيم الأنيق..! الكراسي في البصات مريحة للغاية..ولأننا نحب المقارنة..فالبصات في امسودان افضل من البصات في كندا..والله صحي..!
البص بيقدم وجبة خفيفة.. ثم مشروبات (مرتين في الرحلة)..ناهيك عن المياه المثلجة المتاحة في أي لحظة..والكمساري صار يعرف بالمضيف..يعني لمن تقول كمساري ، الناس بتعاين ليك وفي عيونها سؤال: انتا جاي من وين يا اخينا..!
على طول الطريق..يتواجد ناس المرور السريع..طوالي عندهم عريبة جاهزة للمطاردة..طبعا لم نسأل عن الرسوم التي يتحصلون عليها..لكنها شكلها مجزية تقريبا..بدليل كثرة البزنس بتاع البصات السفرية..! ايضا..ناس المرور السريع عندهم اجهزة مراقبة..ودي بخصوص السرعة وكده..وهذه افضل حاجة تعملها الحيكومة..او ربما كترة شركات التأمين..ومعروف ان الشركات دي لمن تكون كتيرة بتكون ما دايرة تخسر نوهائي..عشان كده بتحرص على قواعد السلامة..عشان ما تضطر تدفع تعويضات في قضايا التأمين وكده..!
لاحظت غياب ظاهرة التسول (طيلة الشهر في امسودان ، وانا حايم في اماكن كتيرة شفت شحادين اتنين فقط..واحد شاب معاق في احد المحطات في طريق امدرمان الدلنج ، واخرى امرأة في الخطوط السعودية بالسوق العربي..!!)..وكدت اقول..معقولة امسودان بقي خالي من الشحادين والشحادات..!
في مدينة كوستي ..توقفنا..برهة..وانا اذكر اخونا وصديقنا عبد الحفيظ ابو سن..الطريفة دخلت شابة انيقة..وهي توزع تذاكر للتبرع لمعهد الصم والبكم..والتحية ليهم الشباب ديل..ويا ريت الناس تقدر تدعمهم..فهم بالجد يستحقون الدعم..بلغهم تحياتي يا عبد الحفيظ لو لاقيتهم..
طبعا الموسم موسم خريف..والجو اتصلح معانا للغاية..في النيل الأبيض..لغاية وصولنا الى كردفان..!
البصات..انستنا قليلا قبح مطار الخرتوم..!!
اهدتنا احترام وتعامل راقي خلاس..اندهشنا كثيرا ان يكون في امسودان التي نعرف..!
الملاحظة المهمة..هي غياب الوعي البيئ..خصوصا فكرة الريسايكل..وياريت تقوم شركة ريسايكل تجمع القناني الفارغة..خصوصا وانها مصنوعة من البلاستيك..والتحية لناس مدينة الدبيبات..فهناك اطفال يحرصون على جمع القوارير البلاستيكية..ولا ادري بفهم..ام شغل عشوائي ساكت..!!
وصلنا الدلنج ، في نفس اليوم عصرا ..في مواعيدنا بالضبط..!
برضك عندنا مشكلة في انزال الصور..خصوصا من رحلتنا المعنية..
الى غاية ان نستطيع فعل ذلك..
للدنيا والزمان.. نهديكم مادتين من اليوتوب..والمواد صاحبها صديقنا واحد من اعضاء المنبر..و هو افترع تجربة جميلة بان قام برحلات في معظم مدن امسودان..ووثق الرحلات في سلسلة سودان فيديو.. التحية لصديقنا الجميل (قبل سنة اشترط الأ نذكر اسمه ، وليته يدينا الإذن ، فما فعله تجربة رائدة بحق وحقيقة وتستحق المناقشة خصوصا اخوانا ناس منهج التحليل الثقافي..ويبدو انو الثقافة عندنا الإ تكون مكتوبة بصرامة الأكاديميا حتى تسترعي الإنتباه)..
الفيديو الأول.. هو مدخل الدلنج من الناحية الشمالية (وانت جاي من الأبيض أو الدبيبات).. الفيديو الثاني..وهو مدخل المدينة الجنوبي (وانت جاي من كادقلي )..و ناس الفيديو وثقوا اللمحات وهم مارقين من الدلنج في اتجاههم الى كادقلي..! ناس الدلنج عندهم موقع محبب ، وهو قمة جبل جنديل (الدش) ، بيطلعوا هناك وبياخدوا صور للمدينة من اعلا..ودي الحتة القاعدين يبثوها لناس امسودان ، لأنو بتديك ابعاد سمحة شديد..!
الدلنج ، اغرب مدينة على وجه الأرض ، فهي مدينة تقوم حول اربعة جبيلات صغيرة..عكس كادقلي ، التي تحيط بها الجبال..وهو ملمح في كثير من مدن العالم الجبلية..و البعض الآخر بيكون في الجبل نفسو (زي بعض مدن سيراليون)..
التحية مرة تانية لناس سودان فيديو.. فهم عملوا ظاهرة ثقافية ، لو كنت املك امر على الأكاديميا في امسودان ، لجعلتها مقرر داري لطلاب و طالبات الأنثروبولوجيا الثقافية (شفتا كيف يا صديقي انتا زول مهم؟)..
الفيديو الأول:
الفيديو الثاني:
الفيديو الثاني ، التقطه صديقنا واخونا احمد رحال ، اضاف اليه اغنية (مندي) وهي الأميرة مندي بنت السلطان عجبنا الذي قاد ثورة ضد المستعمر الإنجليزي ، وبعد اعتقاله ، قادت مندي النضال..ومن الأساطير التي تحكي عنها انها قطعت ثديها حتى لا تتعرض لظاهرة رضاعة اطفال ينشأون تحت سيطرة المستعمر..!! التقاط احمد رحال ، فيهو ابداع ، وهو تكملة لفكرة الفيديو الأساسية التي انتجها صديقنا عضو المنبر..ونضيف هنا.. لتأكيد ملح كيف تتحاول الأشياء..
ولد أبا كبر طمنتنا يا برمكي يا حريف ... الفديوهات جميله شديد وتمنيت لو حوت لقطه واحده لمعهد المعلمين بالدلنج الذى سمعنا عنه كثيرا ..... ما طالبك حليفه بعرف الجماعه ركابين حمير الضفان بشتنو الدنيا بقوها مجرد اطلال .....كمان في لقطه تانيه ما شفتها في هذه الفديوهات وخاصه مارى بالمحطات الصغير من كوستى وانت ماشى ... الوساع والله كريم وتندلتى وام روابه والرهد ابودكنه وأبو زبد والسنوط والحمادى وعلوبه وأبو حراز والدبيبات ... هذه المسافه ما لاقيتو فيها القطر
Post: #71 Title: Re: امســـودان: عن اناقة الغيم والقونقليز وال Author: Kabar Date: 09-13-2015, 03:32 AM Parent: #70
ول ابا رحمه..حبابك يا صديقي كتر خيرك المطايبة.. عندي صور كتيرة وشوية فيديوهات من داخل المعهد (جامعة الدلنج الآن)..لكن مشكلتنا لسع قائمة في اضافتها هنا..!
في الفيديو الأول ..تقريبا في الدقيقة 4:22 بتلاحظ سور ابيض وانيق وطويل..و هو سور الجامعة او المعهد سابقا..في الداخل حدثت اضافات كتيرة..قاعات..مكتبات..مكاتب..داخليات الطلبة (ودي بيتم اضاءتها بالطاقة الشمسية..كتر خيرهم اخيرا استفادوا من هذه الطاقة)..اضافة لداخليات الطالبات..ومطبعة الجامعة..معظم بيوت المعهد التي بناها الإنجليز لسع قاعدة..لكنها شاخت شوية..مسرح المعهد القديم اصبح تبع ناس الدراما في الجامعة وقاعدين يعملوا فيهو البروفات.. تبلدية الشاعر جعفر عثمان..لسع قاعدة..كبرت شوية..!! الظلط يا صديقي سحب البساط من طيبة الذكر سكك حديد امسودان..والشارع موازي لسكة القطر القديمة..البصات فكرتها اصبحت فكرة مرور سريع..وما قاعدة تقيف في المدن..مرينا بالوساع ، امكويكة ، ام تندلتي ، ود عشانا ، الغبشا ، الرهد اب دكنة..وهنا الشارع بيمشي شمال بعيد من السكة حديد لغاية مشارف الأبيض..ويواصل نحو الدلنج..مرينا بكازقيل ، الحمادي ، الدبيبات..وفيها شفنا عربات القطر بتاعة البضاعة واقفة..!
كنت فعلا حريص اشوف لي قطر..و شفتو في حتة عجيبة..في الخرطوم ، ونحن في طريقنا للخرطوم اتنين..وكان قطر بضاعة.. دخاخيين اسكت ساكت خليها.. وشكلو قطر شاخ شديد..والغريبة الناس وهي بتسب لأنو كان بطئ..شديد..! قطر الركاب اصبح مجرد ذكريات..ولو كنت املك امر كنت رجعتو بفكرة سياحية بحتة..للناس الدايرة تشوف البلد بمهلة..!! الظريفة شفتا اللواري في منطقة الحاجز وصورتها..وانا اتذكر امجاد اللوري الغابرة.. لم تسعفني الظروف لزيارة غرب كردفان ..ابوزبد ، السنوط..الفولة..بابنوسة..!!
كتر خيرك
كبر
Post: #72 Title: Re: امســـودان: عن اناقة الغيم والقونقليز وال Author: Kabar Date: 09-13-2015, 03:37 AM Parent: #71
(8)
المدينة صارت مربوطة بالطرق ..كادقلي ، لقاوة ، ابوزبد ، الدبيبات..والحركة فيها دايبة..
هناك حظر تجول ضمني ، من السادسة مساءا على العربات الداخلة المدينة سواءا من الشمال (ناحية الأبيض) أو من الجنوب (ناحية كادقلي ) ، عشان كده بتلقى الناس بسرعة بتحاول تصل المدينة..
اول جلسة انس كانت مع الوالد الحاج النور ، و بالطبع لم ينسى يسرد لي كل الديات المطلوبة..فالعرف هناك أن اي فرد لابد يشارك في دفع التعويضات.. مع انك بتدفع عن ناس انت لا شفتهم ولا هم شافوك..لكنه العرف..
سمعت انغام تتراءى من جهة مسرح الجامعة الجديد..صوت مكبر الصوت العالي وهو يبث اغاني وكلمات التهاني..وكانت هي بداية موسم حفلات التخريج في الجامعة..ووهي فكرة عجيبة خلاص..واستمرت الحفلات لغاية ما غادرت الدلنج (قرابة الأسبوعيين حفلات)..المدهش الحفلات دي بتبدا من السابعة صباحا وبتستمر لغاية الساعة السادسة مساء..! في الميدان الكبير جنوب الجامعة (داخل حدودها) تنصب الخيام الكبيرة التي تشبه خيام عيد المولد..وتقسم في شكل غرف..ولكل خريج/ة غرفة خاصة يتلقى فيها التهاني بالتخريج..! لاحظت الخريجين (اولاد بنات) تكسو الحنة اياديهم..يعني الناس بتتحنن زي حفلة العرس..! زفة الخريجين تبدا من قلب المدينة.. بمصاحبة فرقة موسيقى اشبه بفرق البوليس / الجيش زمان..و الزفة بتكون ماشة في شارع الظلط من السوق لغاية الجامعة..!
الروابط الأقليمية هي التي تقوم بعمل حفلات التخريج..والأجمل انها بتقدم رقصات شعبية ..يعني كل ناس منطقة بيقدموا فنونهم التراثية الخاصة بيهم..ودي حتة التنوع القاعدين نتحدث عنها وضرورة التعبير عنها بكل حرية دون شروط مسبقة..!
من الطرائف..شهدت اغرب زفة ..وكانت لخريجة ..ويقال انها شاعرة تقول الشعر باللغة المحلية (يعني نظام حكامة وكده)..الزولة دي اخوها ظابط مع ناس الدعم السريع..اها قام اهداها زفة خاصة..حيث دخلت الجامعة في رتل من السيارات..عربية قدام عليها مدفع دوشكا..ثم عربية في النص فيها الخريجة ..ثم عربية تالتة فيها مدفع دوشكا..!!
زرت الميدان ، ميدان حفلات التخريج اكثر من ثلاث مرات..المدهش ان معظم الرقصات يقدمها طلاب وطالبات الجامعة بصورة مفتوحة..يعني ممكن تقيف في رقصة الكرنق ، المردوم ، وبقية الرقصات من مختلف انحاء امسودان..اضافة لصالة غناء مفتوحة يقدم فيها غناء البندر..بالات ومغنيين ومغنيات..!
الجامعة لا تتدخل بصورة رسمية في حفلات التخريج..ولا وجود لها ، اللهم الإ حكاية توفير المساحة..الميدان..والمسالة دي بترجع الى انو التخريج بيكون قبل الأمتحانات..ودي مشكلة حقيقية.. يعني ممكن طالب/ة يعزم اسرتو ومعارفو لحفل تخريجو..و يمتحن واحتمال ما يتوفق في التخرج (يعني جايز يرسب في مادة أو مادتين)..!
التكاليف بتاعة حفلات التخريج بتكون على الطلبة والطالبات..و بيدفعوا بسخاء لمثل هذه الحفلات..!!
عرفت لاحقا ، ان ظاهرة التخريج اصبحت ظاهرة في غالبية الجامعات في امسودان..!
نواصل..
كبر
Post: #73 Title: Re: امســـودان: عن اناقة الغيم والقونقليز وال Author: Kabar Date: 09-14-2015, 04:58 AM Parent: #72
(9)
حاولت التجول بمفردي في المدينة..الملامح اتغيرت شديد..والواحد قرب يتوه..! اول زيارة لي كانت لمركز الجندر..و اسمو الرسمي (مركز النوع وبناء قدرات السلام)..ومديره صديقنا واخونا الأستاذ عبد الله محمد عبد الله سلمان (عبد الله الليمون)..وحرصت ان تكون مفاجأة..يعني من غير اعلان ..! دخلت المركز..و سألت..وين الليمون؟.. بعض ناس المركز (شباب وشابات) كانوا مستغربين شديد..وبعد شوية واحدة موظفة قالت لي: موجود.. اقول ليهو منو؟.. قلت ليها: تصدقي نسيت اسمي..قول ليهو ضيف..! اندهشت صاحبتنا ومشت ، وحدثت اخونا عبد الله..! لحظة كانت عجيبة خلاص..!
في مكتب اخونا عبد الله..اتعامل معاي نظام زول نورث امريكا وكده..وعرض علي خيارات كتيرة للمشروبات (كركدي ، شاي اخضر ، حرجل ، )..طبعا عبد الله استغرب ..لمن لقاني امسك بكل صندوق واتفرج..يعني زمان كركدي..بتكون فلت..و يغلوها ليك في براد..و تجغم..الآن اصبحت انيقة في شكل عبوة (كيس)..وكذا الحرجل.. اما الشاي الأخضر فلم نراه من قبل في الدلنج..! سالتو: انتو قاعدين تسوا شنو بالضبط؟.. وحكي لي تجربتهم كمنظمة عمل مدني..!
لاحظت معظم المنظمات المدنية (مركز النوع) ، (مركز بادية) ، (مركز دراسات السلام)..كلها بتعمل على ثيمة السلام..وهو امر مقدر.. فظروف الحرب الطويلة في المنطقة جعلت انسانها خلاق وبيعرف كيف يحدد اولوياتو الوجودية والحياتية..! ناس مركز الجندر..واحدة من مشاريعهم انهم كانوا في تجربة تأهيل المسرحين (سواءا من الجيش الشعبي أو الدفاع الشعبي)..وبيشتغلوا بناء قدرات..وتأسيس مشروعات دخل صغيرة لمساعدة المسرحين..يعني يدوك شوية قروش ، كارو.. جوالات عيش..عشان تبدا بيها.. اضافة لبرامج تدريب.. منها مبادي الكمبيوتر..!
برضك عندهم مجال اخر .. وهو استهداف شريحة معينة في المجتمع..و هي شريحة الحكامات..وبيقوموا يجيبوا الحكامات ديل وبيعملوا ليهن تدريب..اضافة للتبرع ليهن بعربة كارو..وقروش ..! واحدة من التجارب مع الحكامات.. انو المركز جاب مجموعة منهن ..و وزع ليهن شتول اشجار.. والشتول تم زرعها حول الشارع الرئيس في المدينة (يعني نظام تشجير شارع عام)..وعملوا ليهن مسابقة.. بان افضل شجرة ستنال صاحبتها جائزة مالية كبيرة..!! عربات الكارو بتاعة الحكامات ..ادوهن معاهن براميل لجلب المياه..و الأتفاق.. ان يتم ري الشجرة..وباقي اليوم ممكن الكارو يشتغل لصالح صاحبته..! الفكرة تغيير فكرة وعي الحكامة وتوجيه اهتمامها لحاجات اكتر ايجابية.. فالحكامة هناك لسع عندها مكانة وبتلعب دور مهم في الحياة الإجتماعية في مجتمعها الصغير..وممكن تؤثر في اقرار السلام اذا تم توجيهها بصورة ايجابية..! ناس مركز الجندر ، برضك عندهم تجربة اخرى..وعملوا نادي المرأة..والفكرة الوصول لشرائح المجتمع..وعمل تدريبات للمرأة ..خصوصا ربات البيوت..! ضحكت ، لمن عرفت انو سكان بعض الأحياء..قاموا هاجموا فكرة نادي المرأة..وكيف ما يكون في نادي للرجل..!
واحدة من مشاريع ناس المركز انهم ساهموا في عمل لافتات عن السلامة في الطرق..ودي تقريبا بمشاركة مجموعة من الأطفال..واللافتات منتشرة على طول طريق الظلط في المدينة..وده شغل مفروض يكون بتاع ناس الحركة وشركات التأمين..لكن الدلنج يبدو انها لسع ما واقع ليها انها بقت مدينة فيها عربات كتيرة..! في واحدة من الليالي الأخيرة..وانا ماشي في قلب المدينة.. رأيت مجموعة من متطوعي ومتطوعات مركز النوع ..و هم منخرطين في واحد من برامجهم التي تستهدف مجموعة الأطفال المشردين..وكانوا منظمين..ولابسين شعار المركز..! مثل هذه التجربة لم تكن موجودة من قبل..و نحن عشنا اعنف لحظات الحرب في جنوب كردفان..ففي السابق كل الجهود بتكون محدودة ولحظية.. سواءا كانت جهود رسمية او غير رسمية.. لكن الآن الخيارات تعددت وتجددت..فمثل هذه المنظمات اصبحت تلعب دور مهم وتغطي الفرقة..!
المركز برضك عندو تعاون مع مدارس الأساس..و بيشارك في برامج محاضرات في موضوعات يومية..اضافة لتدريبات لبعض التلاميذ والتلميذات..! ناس المركز عزموني احضر معاهم محاضرة في قاعة المؤتمرات الكبرى في جامعة الدلنج..ولم اتمكن من الحضور.. ببساطة..الواحد داير يبعد عن الرسميات وكده..!
نواصل..
كبر
Post: #74 Title: Re: امســـودان: عن اناقة الغيم والقونقليز وال Author: الفاتح ميرغني Date: 09-14-2015, 07:04 AM Parent: #73
Quote: اصغر عضوا سنا في اسرتنا الصغيرة هي الآنسة شروق (12 سنة)..لمن قلنا ليها السفر بالخطوط السعودية..اول تساؤل ليها: الى أي حد هي آمنة؟..ناهيك عن النقة بتاعة اسامة بن لادن ، وداعش والقاعدة ، وشنو كده ما عارف..!
ول ابا كبر ياخ ده حكي طاعم لمن بي غادي.! سرد ممتع حد الدهشة تابعته منذ أن بدأت الجنيات طرح الأسئلة الفوق دي.
البمنع الكلام ده يتحول لكتاب شنو؟ إن كان أهم ما ميز حكايات كانتربري أنها جمعت بين صدق الوصف ورحابة الخيال، فامسودان جمعت ما بين بساطة اللغة وسلاسة السرد وابهار الواقعية.
محبتي
Post: #75 Title: Re: امســـودان: عن اناقة الغيم والقونقليز وال Author: Kabar Date: 09-15-2015, 00:12 AM Parent: #74
ول ابا الفاتح..حبابك يا صديقي كتر خيرك على المرور والمطايبة.. حرصنا يا صاحب انو الأنسات ديل يشوفوا الحاجات بانفسهم.. كتر خيرك على الثقة يا صديقي..وحاجات كتيرة محتاجة تتحول لكتب..! الإنسان العادي في امسودان هو ما يجب ان نكتب تجربته كما شهدناها عيانا بيانا..و صدق التجارب العالمية نابع من انو الناس الكتبوها بيكتبوها باحساس متجرد من اجندة الخوف..و ليتنا نكون هكذا..! كتر خيرك كبر
Post: #76 Title: Re: امســـودان: عن اناقة الغيم والقونقليز وال Author: Kabar Date: 09-15-2015, 00:17 AM Parent: #75
(10)..
نفس اليوم عصرا ، بعد رجوعي من زيارة مركز النوع.. زارني صديقي الأستاذ احمد ابوهم العشا..وهو المسئول عن مركز (بادية)..تفاكرنا واعدنا ذكريات التسكع في المدينة.. فاحمد كان رفيقنا في الأيام الخوالي..وكل ماذكر واقعة يضحك ..ويقول لي ياخي البلد اتغيرت شديد يا عم..!
في اليوم الثاني زرت مركز بادية..ونفس الملامح بتاعة اناقة الحرجل والقونقليز والكركدي..!
قدم لي الصديق احمد ابوهم بعض الكتب ، مطبوعات مركز بادية.. منها كتاب استاذنا دكتور حامد البشير عن تاريخ الأحلاف واليات فض النزاع في جنوب كردفان ، وكتاب اخونا اسماعيل زكريا اسماعيل (مراسم السبر بجبال النوبة) ، وكتاب د. امنة احمد رحمه (الإنتخابات والديموقراطية: مفاهيم اساسية) ، وكتاب اخر لدكتور حامد البشير (العنصرية المفاهيم الأساسية والجدليات واستراتيجيات المكافحة) ، وكتاب الأستاذة بخيتة محمد عثمان (قطار السلام من كوكادام الى نيفاشا) ، وهو كتاب اطفال ، يستهدف شريحة الأطفال..! مركز (بادية) واسمو الرسمي (مركز بادية لخدمات التنمية المتكاملة) يعمل على مستوى جنوب كردفان وغرب كردفان..وعندو فروع في ابوجبيهة شرقا ، والفولة غربا ، وكادقلي جنوب ، اضافة للدلنج شمالا..!
واحدة من مشاريعهم..مشروع اندية الإستماع ، ودي مستهدفين بيها ناس غرب كردفان ، وتحديدا بعد النزاعات الدموية التي حدثت في السنوات القليلة الماضية..والفكرة ان يخلق ربط بين الناس والإذاعة.. عبر توفير اجهزة للإستماع الجماعي (كاريوكي)..ومرات بتكون المواد برامج توعية منتقاة من بعض الأعمال الأذاعية..!!
مرة ونحن في مركز بادية..صابتنا مطرة شديدة خلاص..والملاحظ المراكز دي ابوابها فاتحة..وتوشك كمية من الجماهير دخلت عشان تتمطر..و المركز يشيل ويوزع في الشاي.. فكباية الشاي الدافئة افضل ما تناله في تلك البرداية العجيبة..! صحيح من قبل كانت هناك منظمات اجنبية.. مثل (كير) ..ومنظمة التنمية..وسيف جلدرن..لكن والحق يقال..ما كنا نفكر حتى نزور المنظمات دي ونسألها هم منو وقاعدين يسوا شنو..لأنها كانت بالنسبة لينا حاجات شبه حكومية ورسمية للغاية.. بالرغم ان البعض منها كان يعمل فيه اصحابنا وصحاباتنا..ولم نفكر نعتب عليهم.. ناهيك ان تسألهم عن فكرة التطوع معاهم.. يعني نظام حاجز خوف منها..الآن ..و مثل هذه التجارب ..الفكرة تغيرت شديد..ربما لأن المكون اصبح من ناس المدينة..وهم ناس بتعرفهم وبتلاقيهم في الشارع في البيوت ..في المواقع الرسمية..!
نواصل لاحقا..
كبر
Post: #77 Title: Re: امســـودان: عن اناقة الغيم والقونقليز وال Author: معاوية الزبير Date: 09-15-2015, 03:40 AM Parent: #76
قصة المراكز والكتب دي يا كبر أعجبتني والله وذكرتني أيامنا العاملين مع منظمة (كونسيرن) في النصف التاني من التمانينات موجات النزوح كانت كبيرة ولأسباب مختلفة من مجاعة لي حروب الشاهد إنو كنا نؤمن ونحلم ببرنامج شامل يتجاوز مسألة توزيع الغذاء والكساء والغطاء إلى التعليم والقراءة تصدق كنا نلاقي العراقيل حتى من حكومات الديمقراطية المبكيُ عليها كانت وزيرة الشؤون الاجتماعية تابعة لحزب الأمة أظن اسمها رشيدة كنت أتوسط (بلا جدوى كبيرة) بينها وبين مديرتي (شارون) مسؤولة البرنامج التربوي بالمنظمة وهي صاحبة المقولة الشهيرة عندما سألتها في نهاية خدمتها عن رأيها في بلدي: good people in a bad country الضبان والبعوض والنمتي والحكومات جنّنوها ياخ
Post: #78 Title: Re: امســـودان: عن اناقة الغيم والقونقليز وال Author: معاوية الزبير Date: 09-15-2015, 04:05 AM Parent: #77
هسي أولاد النازحين ديل بكونوا وين يا ربي ! أوعك ironically يكونوا شايلين السلاح وقاعدين بِدورِهم ينزّحوا في أطفال زملاهم ديلاك ؟!
Post: #79 Title: Re: امســـودان: عن اناقة الغيم والقونقليز وال Author: Abdalla Gaafar Date: 09-15-2015, 08:54 AM Parent: #78
العزيز كبر كالعادة بوست موزون ... قهوة صباحية ودعاش
تسجيل حضور واعجاب سلام يا صاحب
عبد الله جعفر
Post: #80 Title: Re: امســـودان: عن اناقة الغيم والقونقليز وال Author: Kabar Date: 09-16-2015, 08:24 AM Parent: #79
ول ابا معاوية..حبابك يا صديقي كتر خيرك يا معاوية.. ياخي كل ما الزول يشوف اسمك بيتذكر روايات واسيني الأعرج، الطاهر وطار ، سليم بركات ، خصوصا _كيوثاء (بزوغ اللون)..وبقايا الذاكرة في حوافي اضحت غريبة..غريبة.. لا يرتادها الإ الغرباء امثالنا ، وطوبى للغرباء ياااااااااااخ..(عسى ولعل المستنير ابوبكر عباس يرعوي قليلا..!!)..
اللطيفة يا معاوية ، كونسيرن دي الواحد قام سكاها (خستكة لله ورسولو).. عشان يشتغل معاهم.. وكان فيها ، الوكت داكـ ، شباب وشابات زي الورد وعاصرونا في الجامعة.. اها صديقنا واحد قال لي: انت جاي كايس شغل ولا جاي عشان تكون جنب (العيون التي في طرفها شنو كده ما عارف..؟!!!).. قلت ليهو: فيها شنو يعني؟.. اقعد ليكم جنب العيون ، واسوي ليكم شغلكم..!! قال لي: يفتح الله ، ياخي انتا ح تقوم تخرب علينا الرصة وكل يوم تطلع لينا بي قصيدة (وقتها كنت متهم بكتابة الشعر وكده..!!).. في تلك الأيام اعدت قراية رواية (اللاز)..و لأول مرة قريت (نوار اللوز) لصديقنا واسيني الأعرج..!!
المراكز يا صديقي ، هي تجربة جديدة في مدينة الدلنج..و كما قلنا سابقا انسان امسودان دايما بصير بامورو.. الشباب والشابات القايمين على امرها عندهم فلسفة عميقة ، وهي ان تجربة الحرب في جنوب كردفان ممكن عادي الإنسان يتعامل معاها بايجابية وتحدي..! مرة قلت لشابة في احد المراكز: يعني ناس الحيكومة (حركة شعبية ومؤتمر وطني) يدوروا الحروبات وانتو عشمانين تصلحوا..؟.. قالت: ما عندنا مشكلة ، وح يجي يوم يفهموا انو العوة دي ما عندها معنى البتة..!
الناس هناك دايرة تخلق ثقافة سلام باي شكل كان ، والغريبة الإستجابة ليها اكتر بكتير من حكاية الإستجابة للبندقية..!
اكيد يا صديقي ، لو اولاد النازحين الكنتو شغالين معاهم من الجنوب ، هسع بيكونوا وقود لحروب لا يدركون اجندتها الحقيقية..اما اذا كان من بقية امسودان الفضل ، فديل بيكون دخلوا السستم من زمان..!
كتر خيرك..
Post: #81 Title: Re: امســـودان: عن اناقة الغيم والقونقليز وال Author: Kabar Date: 09-16-2015, 08:28 AM Parent: #80
صديقي واستاذي عبد اهكع جعفر..حبابك كتر خيرك على المرور..
ياااااااااااااااه..!!
اسمح لي ، من عبرك ، بتحية اهالي وصناع الزمن الأنيق في سودانيز اونلاين.. الرحمابي ، استاذنا دكتور بشرى سليمان ، دكتور ابراهيم كوجان ، عالية عوض الكريم ، اسماء الجنيد ، رقية وراق..طيفور العصفور ، صلاح شتات..ابكر ادم ..استاذنا يحي فضل الله..وليم اندريا ..ود عازة..المــُلا عمر..و اخرين واخريات كثر..!!
ليتك يا صديقي ، يهبك الزمان سانحة لزيارة الدلنج.. فهي مدينة صبية..بعد مية سنة من الآن..ستجدها هي كما هي..حبلى بالدهشة والغيم وظلال الجبال الوريفة..!!
كتر خيرك يا صديقي.. كبر
Post: #82 Title: Re: امســـودان: عن اناقة الغيم والقونقليز وال Author: Kabar Date: 09-16-2015, 08:36 AM Parent: #81
الأغنية دي سمعتها كتير وانا في امسودان ، المدهش تعدد وتنوع المواقع.. ففي موسم التخريج في جامعة الدلنج ، كانت تغنى كأداء حي في الحفلات وكتسجيل كاسيت ، في حفلات الأعراس في امدرمان ، في البصات السفرية ، في الرقشات ، في الحافلات..في العربات الخاصة.. ياخي حتى طابور الصباح في بعض المدارس..!!!!!
وكانما حال ناس المعاردة يجوعرون (بي وين السكة يا انتا..!!!)
اما بقية الشعب بتاع امسودان ، قاعدين تحنيس في الراجل..
عدي بينا يا ريس.. يا ريس المركب ، خلي الشباب يركب.. خلي الشباب يركب.. اصلو المكان ارحب..!!
التحية الى الليجند النور الجيلاني..!
كبر
Post: #83 Title: Re: امســـودان: عن اناقة الغيم والقونقليز وال Author: Kabar Date: 09-16-2015, 09:01 AM Parent: #82
(11)
واحدة من المفارقات الطريفة..حكاية السواقة في العاصمة..والعاصمة مرات بتديك احساس انو الزحمة بتتخلق في اوقات معينة واماكن معينة..! الناس عندها مفهومين تجاه استخدام العربات هناك، خصوصا العربات الخاصة.. فالفكرة في امسودان انو الحكاية عشان تظهر البرستيج بتاعك وكده..يعني قشرة..اما ناس الخلا الزينا بتاعين ناس كندا وكده ، فالفكرة انو العربية ضرورة من ضروريات الحياة..و المشاوير لو لقيت وسيلة تانية ممكن عادي تنسى فكرة العربية..! طبعا ناس بره برضك عندهم هوس اخر..وهو.. To show what you have got ولكن..!!
صديقتنا الحيكومة تبعنا (المدام) كانت عندها تنظيرات عجيبة خلاص..فكانت مفتكرة ح تسوق هناك..وكنا بنقول ليها اخير تخطي الفكرة دي..و بعد ماشافت الحال عيانا بيانا..كانت في وضع لا تحسد عليهو..ونحن نقرقر و نضحك من شاكلة عجبني للمرقوت..! اول بالتبادي..الحيكومة اكتشفت انو العربات هناك معظمها استاندرد..ودي دايرة منها ترجع تدخل مدرسة السواقة من سنة اولى..! تاني التبادي..حكاية الناس السايقة واستخدامها للطريق.. أي زول بديك احساس انو مستعجل والزوغانات والتخريمات ..مافيش قواعد وزوق وانتظر..و السايقة واصلة..كل زول طاير بسراع.. يخرم بأي فرقة تفتح..يمين شمال.. مش مهم ..المهم تتخطى وتتجاوز..!
الآنسات شهد وشروق..دايما بتوترن شديد من حكاية البوري..طبعا في كندا مافي زول بيستخدم بوري الإ في حالات نادرة..واستخدام البوري في كندا هو شتيمة.. اي والله.. يعني لو زعلان ليك من سواق بتقوم تضرب بوري عشان تسب ليهو وكده..! في امسودان..الشوارع كلها ..تيت..تيت..مرات بتحس كأنوا الناس تتباهي بالحكاية دي..! ونحن نشيل ونبرر ونشرح.. انو الموضوع لا شتيمة ولا يحزنون..وانما تنبيه..! شروق مرة قالت لي: اشمعنا يعني كل الشارع داير ينبه بعضو البعض..؟..فالفكرة عندها انو الشارع موجود وفيهو اشارات..وعلامات..ليه الناس متضايقة كده..!!
من الطرايف ، مرة كنا ماشين على الخرتوم ، تحديدا بالقرب من مدينة المهندسين..و الحيكومة شافت ليها زولة سايقة ودايرة تدخل الشارع..واختنا المسكينة تشيل وترازي، والعالم كلها قايمة صوف ومافي زول داير يديها فرقة تدخل..الحيكومة عملت حركة عجيبة.. قالت لصاحبنا السايقنا جنب..اها نزلت..و مشت وقفت في نص الشارع ، توقف ليك في العربات.. عشان تفتح سكة للمواطنة المسكينة تدخل بعربيتها.. اها الزولة كانت ماشة على الفيتحاب..دخلت الشارع في اتجاه الفيتحاب..وبعد ما ضمنت شارعها ، قامت جنبت ونزلت وجات ساكة ليك الحيكومة.. وسوس وسوس.. اتقالدن وضحكن واتوادعن..ونحن الفضول كتلنا..!
الحيكومة قالت ، بعربي الخرتوم ، دي واحدة جاية من .. Somewhere in Europe
اما انا فكنت سارح مع فكرة مدينة المهندسين..غايتو الخيال سرح بي بعيد خلاص..بعد عودة مني اركوى مناوي ايام ابوجا..كان ساكن فيها.. اها النخبة المتوحشة بتاعتو..قامت دورت بلنجات..وعينك ما تشوف الإ النور..!!..غالبية ساكنيها عزولوا منها..و رحلوا..و ده ما المهم..! مدينة المهندسين.. اسمها غير الرسمي (مدينة العودة)..ووالعودة دي ان لم تخني الذاكرة كانت تخليد لواحدة من جاكات سيدنا جعفر النميري (طيب الله ثراه)..وبعد احد الإنقلابات.. قام نجرها..واذكر قرأت ديوان شعر بعنوان (مع رياح العودة) للدكتور الزين عباس عمارة..وهو شاعر ليهو اعمال كتيرة منها ، ان لم تخني الذاكرة (الضياء والحريق) ، (مايو والأطفال) ، (نقوش على البحر)..و الأهم الأهم في ذاكرة شعوب امسودان ، رائعة عثمان حسين (اوعديني بكلمة منك) ، ورايعة عبد العزيز محمد داوود (من زمان)..! العودة التي غناها استاذنا الشاعر دكتور الزين عباس عمارة ، ياها الجات منها تسمية مدينة المهندسين بتاعة امدرمان ، وهو حي في بدايتو كان خاص بمتقاعدي ضباط قوة دفاع امسودان (القوات المسلحة السودانية)..!! يعني في داعي يا الحيكومة تقيفي في الحتة دي..!!!
واحدة من ذات المرامير اياها (على قول استاذنا الشاعر العظيم دكتور سيد احمد الحردلو)..قامت هفت لي فكرة تجسير المسافات الثقافية بينا والأجيال الجديدة (بنياتي الأنسات شهد وشروق).. اها نجرت لي مشوار بكارو حصان (داخل امبدة طبعا)..وكنت فرحان انو الموضوع فلكور وكده..والبنيات ، تحديدا الآنسة شهد ..كانن مضايقات و متزمرات شديد خلاص..اها اخر اليوم.. سالتهن: الكارو كيف..!
شروق عملت نايمة..و شهد بتزمر واضح قالت لي: I didn’t like it قلت ليها : ليه؟.. ياخي دي فكرة لذيذة و فلكلور وحاجات زمان..!!
ياخي البنية الساعة المطت قدومها ، قربت تديني بنية في وشي وقالت لي بضيق شديد:
Dude, this animal abuse
قعدت اطنطن لبت ام روحي..و قلت في ذات نفسي: بت اللذينا ، حقو الواحد يوديك الفريق ويركبك تور عشاني تآمني ذاتو..! قالت لي: ؟What did you say
قلت ليها:
Nothing, nothing at all
وهي تعني: الروب الروب..!
كبر
Post: #84 Title: Re: امســـودان: عن اناقة الغيم والقونقليز وال Author: Haytham Ghaly Date: 09-16-2015, 09:26 AM Parent: #83
Quote: حكاية السواقة في العاصمة
كبر سلامات وعوافي
طبعاً يا كبر مسألة السواقة في الخرطوم دي بصراحة كارثة ومشكلة كبيرة جداً جداً
أولا لا يخفى على الجميع رداءة الطرق وضيقها ولكن الافظع هو سلوك السادة السايقين في الطرق ديل
يدوك إحساس انو اهم قاعدة عند الشخص السايق في الطريق انو هدفو الأول انو يعرقلك عشان يمشي هو نوع من الانانية المفرطة
وكمان عندهم حركة عجيبة خلاص وهي تكون ماشي في مسارك ومنتبه للشارع فجأة يقوم صاحب العربية الماشة بالمسار اليمين يمد يدو
من الشباك ويروح داخل قدامك على طول ويخليك انت تجقلب وتحاول تتصرف وتتفادي انك تصدم مؤخرة عربيتو وتتفادى تصدم الترتوار العااااالي شديد .
بصراحة مافي أي زوق ولا أي ثقافة تخص القيادة في الشوارع العامة في الخرطوم دا غير الضلام المبالغ فيهو بالليل يا زول بالليل مافي أي اضاءة في الطرق
وكل العربات الماشة في الشارع مولعين النور الطويل يعني بصراحة نسبة الحادث اكتر من نسبة السلامة.
عندي شقيقي برضو جا إجازة للبلد ساق يوم واحد وجا قال لي (مافي أي قانون للسواقة هنا القانون الوحيد الممكن تعتمد عليه هو انو ما تخلي زول يصدمك وما تصدم زول)
تحياتي وتقديري
Post: #85 Title: Re: امســـودان: عن اناقة الغيم والقونقليز وال Author: Kabar Date: 09-16-2015, 09:45 AM Parent: #84
الي غاية ما نرجع تاني..نواصل في الحكاوي من امسودان..
حاجتين ادهشني في مدينة الدلنج..
الأولانية.. تكون قاعد تضرب ليك في صحن شية ابل ، والناس تطرى احد عضوية سودانيز اونلاين.. بالإسم..وكان هو صديقنا عضو المنبر شيخ عماد حسين (طروة كانت بكل الخير يا عماد..!!)..
التانية..بعض من صديقاتي واصدقائي.. كانوا حريصيين يسمعوني مزيكا مفارقة..وكانت هي مزيكا امو سنغراي.. وبعض من اعمال مجموعة (صوغا) من النيجر..و المجموعة دي بعض الناس ذكرت انها كانت بتسمع اغانيها في الخلاء (ضواحي الفولة وانتا ماشي)..وحافظينها باسم (اغاني اهلنا امبررو)..!!!!!!!!
ده غير حكاية موضة حلقات الأذن الكبيرة..و لبسة (كدينكا) زي النساء الأفريقي ذي الألوان اليانعة الفرايحية الناضحة بحب الحياة وجمالها..و هو لبس اهلنا في غرب افريقيا..!!!
بعض صديقاتي في الدلنج.. معجبات بامو سنغراي.. بانها بتشتغل على ايقات سودانية مثل ايقاع (الكرنق) وايقاع (الدليب).. ناهيك عن حكاية (الكورا)..و ناس كتير هناك بتفتكر انها بت عم الة العود الواحد ده.. اضافة لتوظيف القرع (باركيشن) في مزيكا امو وغيرها..وهو الخامة التي تقوم عليها تجربة استاذنا عبد الرحمن بليا...وتوظيف القرع فنيا وجماليا..وديل شابات معظمهن اشتغلن اعمال قرع في الدلنج.. المفارقة الربط بين قرع التشكيل وقرع المزيكا..!!!
اليهن ، اليهم..جميعا.. واليكم..
ويظل يا صديقتي..حوار ..النقاقير والأوتار (جيتار البيز: الصولو..).. هو بعض من حوار وجودي عتيق.. لا يخلو شبه من حوار الضوء المتساقط على شفة يكسوها روج وردي خفيف..!!
نحن نحتفي بالكلمة المارقة من ضواحي الروج ، اما سيدنا ول ابا ابوبكر عباس..خليهو يحتفي باي حاجة يختارها ياااااااااااااااااااااااااااااخ...!!!!!
اندهشت انا ارى مثل هذه المزيكا في الدلنج...!
سلاما في السمحين يا الدلنج يا اميرة..!
و يلا.. يلا.. يلا..
كبر
Post: #86 Title: Re: امســـودان: عن اناقة الغيم والقونقليز وال Author: Kabar Date: 09-16-2015, 10:27 AM Parent: #85
ول ابا هيثم..حبابك ياصديقي..
والأظرط التذمر والنقة..!
في بعض الشوارع بتكون هناك شكل متاريس (نظام مصدة بيعملوها فوق الشارع)..اها بعض السواقين يسب لسلفيل الحكومة عشان عملت المصدات دي..!
مرة دورت لي نقة مع سواق حافلة..و قلت ليهو: الحكاية دي عملوها ليك ولباقي السواقين عشان تهدئ السرعة شوية..!
عمك صر خلقتو وقال لي: انتا جاي من وين يا عمك؟..
قلت: ليهو جاي من لقاوة..!
ضحك وقال لي: نحن هنا نظامنا كده..!!!
مافي توعية مرورية.. الشوية الموجودة..بتكون في وسائل اعلام الناس ما شغالة بيها كتير ..!
ناس شركات التأمين ما قاعدين يساعدوا في عمل علامات ويافطات تقول للناس عن ضرورة السواقة بأدب..!
زمان كان بيقولوا: العفش داخل البص على مسئولية صاحبه..!
هسع بقت: الراكب في داخل البص على مسئولية بت ام روحو..!!
شقيقك محق..!
غايتو نحن الواحد ما اظن يسوق في امسودان ، سواءا في العاصمة ولا في الأرياف..لأن الفكرة هناك بتقوم تلخبط عليك مزاجك ساكت..!!
كبر يا حبيب يتهيأ لي ح أكون اسعد انسان لو قابلتك في مكان بعيد ما فيهو ناس كتير انت تعرفهم زي ناس الدلنج ... عارف ليه ؟ عشان اتعلل معاك طول الليل و واقيل طول النهار وانت ذاكرتك اسم الله عليها .... الحوازمة قالو لو داير تختر او تسافر اختر مع مسيري لانو المسيرية يجيدون الحكي الطاعم وانا لو ما بخاف الكضب الدكتور عبدالوهاب المسيري بتاع الصهيونية و النازية ونهاية التاريخ مسيري هارب من دينقا ام الديار ... الدلنج يالحبيب مدينة لها سحر غريب على من سكنها او حتى من قضي فيها بعض الوقت ، ولو واحد ما حالفه الحظ وزار هذه المدينة وخالط أهلها من الصعب عليهو تفسير هذا الحب ، اتهيا لي أيضا انو ناس بيتكم الفي الدلنج زعلانين منك لانك الظاهر ما قعدت معاهم زاتو لانو الناس القابلتهم انت ديل انا ما حصل قابلت ربعهم في أي إجازة .... انت ياكبر تسعد بالناس كما الناس تسعد بك
Post: #88 Title: Re: امســـودان: عن اناقة الغيم والقونقليز وال Author: عمر عثمان Date: 09-16-2015, 04:48 PM Parent: #87
كبر الله يكبر مقامك قول آمين
Post: #89 Title: Re: امســـودان: عن اناقة الغيم والقونقليز وال Author: اميرة السيد Date: 09-16-2015, 05:34 PM Parent: #88
كبر الله يكبر مقامك قول آمين
ونحن كمان بنردد كلام عمر عثمان الله يكبر مقامك .. بنقرأ حكاياتك وكأننا لافين معاك في ربوع الوطن ومتابعين بشغف وانصات كلي والله يديك الصحة والعافية
سلام ياكبر ,, وان شاء الله جبنتنا عجبتك ياخ بصراحة انا قبل ما اكتب بوست الجبنة ده كل يوم بجى مارِّى فى امسودان دى وعقلى يودى ويجيب ماعرِفْتلا وترة عشان كدى ماداير ادخل وبعد دخلت برضو مَخْوَلت مخِّى ,, ذكَّرتنى ولد جيران خالى فى الثورة ,, كنا بنتلم فى بيت خالى ونكشتِن اها فى كلام مكتوب بالطباشير فى الحيطة فوق حلق الباب مباشرة والكلام عربى بس اظن الزول الكتبو اظن كان بِدُك حصة الاملاء ,, كتابة زى الاردو ولد جيرانا ده كل يوم بكون راقد فوق السرير المقابل الكتابة دى واتاريهو كل يوم بحاول يفك طلاسم الكلام المكتوب ده ,, يوم روحو حَرَّقتو قام فَنْتَرب خفس من السرير وشبَّ فوق كرسى ومسح الكتابة ,, بس انا ماعندى كرسى اشِب فوقه فى ديوان بكرى ده. ماتطَّوِّل قدر مانفسك تهفَّك على فنجان جبنة تعال لنا بى غادى حتى كان دايرا بى حرجل البنيات بسونَّها ليك.
Post: #91 Title: Re: امســـودان: عن اناقة الغيم والقونقليز وال Author: dardiri satti Date: 09-17-2015, 06:54 AM Parent: #90
Quote: (ان انطيناك الكوثر) بدلا عن (ان اعطيناك الكوثر).. يقولون انط بدلا عن الفعل اعط (اعطي)..
كبار ....ن ما أمتع هذا الحكي البديع !!
ذكرتني...(ان انطيناك الكوثر) بدلا عن (ان اعطيناك الكوثر).. يقولون انط بدلا عن الفعل اعط (اعطي).. كنت حينها بالمدرسة الوسطى وفي طريق عودتي من كسلا باللواري كان لابد من صلاة المغرب في الطريق فقرأ إمامنا (ان انطيناك الكوثر) ـ كتمت ضحكتي لحظتها وعند دخولي البيت كان ذلك أول ما حكيت لأبي ، عليه السلام ، عما لاقيت في رحلتي تلك من عجائب!!ّ! ضحك ، عليه السلام ، وقال لي نفس ما قلت انت العجيب أن بني عطية أو من يعرفون بالعطوات بمنطقة تبوك وما حولها بالسعودية يقولونها هكذ: أنطاني ، وانطيني ، وأنطسته وهكذا..
تحياتي
Post: #92 Title: Re: امســـودان: عن اناقة الغيم والقونقليز وال Author: Haytham Ghaly Date: 09-17-2015, 10:28 AM Parent: #91
سلامات وعوافي يا كبر
رغبتنا شديد في زيارة الدلنج
لو ربنا مد في الأيام ورفع القدم تاني ومشيت السودان
باذن الله حا تكون زيارة الدلنج من ضمن الاجندة الرئيسية
كان عندنا جيرانا زمان من نواحي الدلنج
اسم العلي : علي عثمان ( ما بتاع الحكومة )
عندو ابناءه حسن وعبدالرحمن
واحدى بناته تسمى حنان وكانت من النوابغ في زماننا
ربنا يطراهم بالخير فقد كنا مثل العائلة الواحدة
أتمنى من الله ان يكونو في افضل حال
كما أتمنى لك ولهم دوام الصحة والعافية
Post: #93 Title: Re: امســـودان: عن اناقة الغيم والقونقليز وال Author: حيدر حسن ميرغني Date: 09-17-2015, 11:08 AM Parent: #92
كلام " البوس " بتاعتك ذكرني روبرت فيسك الصحفي البريطاني المعروف. قيل أنه زار السودان لتغطية الإنتفاضة وأُعجب ببسالة الشعب السوداني. وعاد للسودان بعد سقوط نظام الرئيس نميري، فوجد الصراع السياسي على اشده حول وزارة التجارة و بـ "شروحاتها وتوضيحاتها" ديك الحطمتنا ليوم الليلة.! فكتب مقالة طويلة عريضة واختتمها بقوله :"الشعب السوداني مدهش في انجازاته وكذلك في اخفاقاته". معليش صديقنا كبر ما عاوزين نطلع عن مسار البوست، لكن معاوية الزبير ده زول " دون تشعر تحبه". والكلام الجابو ده هبش وتر في الوجدان.
ول ابا عبد الكريم..حبابك يا صديقي كتر خيرك على المرور.. ضحكتني شديد بحكاية المختر..لأنو زمان بعض اصدقائنا وصديقاتنا.. لمن تعمل ليك حاجة يقوموا تووش يرصوا ليك حكاية (الجاب ليهو مسيري يبلى بيهو).. الونسة طولة عمر يا صديقي..وزمان حبوبتي زينب حرير..عندها نظرية انو لمن تمشي بكان لازم تعاين وتسأل وتستفسر..عشان تجيب اخبار نجيضة..!
دكتور عبد الوهاب..اكيد بيكون من عندنا..واذكر عنو طرفة زماااااااان..ايام اخر ديموقراطية..اصحابنا البعثيين مشوا الفرقان حملة انتخابية لواحد نازل في كيلك..اها بدل ميشيل عفلق وشبلي العيسمى..الجماعة قاموا رصوا ليك اسم عبد الوهاب المسيري في النص..وعينك ما تشوف الإ النور.. البقارة كل واحد بيعاين ليهو شدرة ويشيل ويشخط:ما دايرين تجار الدين ، نحن ندين تجار الدين..الخ..
في رحلتي لي مصر المؤمنة ايام الخروج من امسودان..ركبت القطر من اسوان للقاهرة..ولاقيت لي واحد صعيدي..ياخي التقول جاي من الفريق..نفس مخارج الحروف وطريقة التفكير بتاع البقارة..و الزول كان شكلوا متضايق انو الناس بتتريق علي طريقة كلامو..وقمت دخلت فيهو شمال..ياخي عمك قرب يوقف القطر ويضبح لي..!
الدلنج يا صديقي مدينة حنينة خلاس..و عندها تفاصيل بتعرفها براها..!
يمكن الواحد كان ذهنو خالي شوية ومع سبق الإصرار والترصد كان حريص انو يعاين..وعامل ترتيب للحاجات.. لأنو بتكون البرامج واقعة ليك.. اتونست مع الحجاج بعض الوكت..و ضحكتهم ليك جنس ضحك..والغريبة يقولوا ليك انت لسه متذكر الحاجات دي..!
ناس كتيرة برضك كنت متمنى الاقيهم..و عملت معاهم مواعيد..وربنا ما وفق..!
بت ابا اميرة..حبابك يا صديقتي.. كتر خيرك على المطايبة.. اهلنا هناك يا اميرة شعب لذيذ للغاية..وعندهم تفاصيل حميمة وسمحة..و الأطرف الناس بتصنع التفاصيل وبتكون ما جايبة خبر انها بتصنع في لمحة من الجمال..
ول ابا الفاضلابي..حبابك يا صديقي كتر خيرك على المرور.. في زول بيابا الجبنة يا صديقي؟.. اكيد ح نمر بهناك..و الخيط داك نفعني في حاجات كويسة (ان شاء كظم الغيظ ساكت)..! صديقتنا واحدة متابعة البورد..و ما عندها عضوية..قالت لي والله صحي مشية السودان دي نفعت معاك؟.. قلت ليها كيف؟.. قالت: زمان اي كتاحة ، بتكتل خلقك امقعير وتتشمر وتغطس فيها.. اهسع بقيت زول طيب ومسالم..! قربت اسب ليها..! قريبك بتاع الأوردو..الغريبة انا قاعد اعمل نفس الحركة لكن في حاجات تانية..بتعجبني كتير حكاية تفرفر الحجبات القاعد يكتبها الفكي.. عشان تشوف الناس بتكتب شنو..ياخي جنس خوته..لمن الواحد قرا ناس (شمس المعارف الكبرى) عشان يعرف الناس ديل جايين من وين..!
من ناحية تانية..هي مجرد خواطر زول واحد فقط..وشوف واحد..و اكيد ما ح يعمل فرق كبير..!
كتر خيرك..وح اجي بهناك ببعض السؤالات والمفارقات..واكيد اللمه..ماشة كويس..
ول ابا هيثم..حبابك يا صديقي كتر خيرك على المرور والمطايبة والمثابرة..
ومرحب بيك في الدلنج..
التحية لجيرانكم..ونراجع الذاكرة احتمال واحد يتذكرهم او يتذكر اهلهم في الدلنج.. و صدقني لو قعدت في الدلنج سنتين ح تلقى روحك عارف امسودان كلها..! في ناس حكايين شديد ، وعندهم القدرة على التقاط التفاصيل والمفارقة.. ويا ريت تلقى فرصة تلاقيهم هناك..لأنو ح يقلبوا ليك فكرة امسودان (كمخيال اجتماعي) راس على عقب بتخريجاتهم وفهمهم للحاجات..!
الغريبة يا هيثم علي عثمان (بتاع الحيكومة) بدأ حياتو العملية في القضائية في الدلنج..ولأنو ناس الدلنج ناس حنين .. بتذكروا عن الزول ده حاجات طيبة..وانو ساهم في وقف واحدة من العادات السالبة في ضواحي المنطقة..!
من اغرب الحقايق يا هيثم..حاجة جربتها..انو عندي قناعة..أي حتة في العالم لقيت فيها لمة سودانيين..احتمال تلقى زول بيعرف الدلنج او زول من ناس الدلنج..!
لاقيت لي نفرين ، معانا هنا في المدينة القاعدين فيها الآن ، واحد من دارفور والتاني من ناس بحر ابيض (القطينة).. وما بيعرفوا بعض الإ في مناسبات عامة..اها النفرين ديل .. بس مجرد حكاوي الدلنج.. الإتنين اتفقوا على معرفة شخصية واحدة من الدلنج وهو استاذنا وصديقنا المرحوم مصطفى الشفيع (تشكيلي).. لاحظ الونسات مع كل واحد كانت في زمن مختلف ومكان مختلف..اخونا بتاع دارفور جاب سيرة مصطفى الشفيع سنة 2008 ، وبتاع بحر ابيض جاب سيرتو في 2013.. حاجة غريبة مش..؟؟!!.. وكليهما مستغربين انو الواحد يعرف الزول ده ويحكي عنو طرايف..اخونا بتاع بحر ابيض قال لي: ياخي هي الدلنج دي قدر شنو؟.. طبعا ختاها في اجندتو لزيارتها لمن الحال يستعدل (وفقا لرؤيتو للإستعدال في حال امسودان)..!!
كتر خيرك على المرور..و توثيق مشاركة اصدقائنا من الفيس بووك..!
ياخي اربعة محاولات لإنزال الصور..وكلما امشى الفرن..الاقي وش مادي لسانو ويقول لي بانجليزي راندوك.. OOOOOOOOOOppppps You got lost اها اخيرا جمع معاي..ودخلت في نقة تانية..انو الصور حجمها كبير..وربنا يقدرنا نلقى فرقة و نشتغل فيها (ترزي) ننقص ونزيد..!
كتر خيرك على المرور..و توثيق مشاركة اصدقائنا من الفيس بووك..!
ياخي اربعة محاولات لإنزال الصور..وكلما امشى الفرن..الاقي وش مادي لسانو ويقول لي بانجليزي راندوك.. OOOOOOOOOOppppps You got lost اها اخيرا جمع معاي..ودخلت في نقة تانية..انو الصور حجمها كبير..وربنا يقدرنا نلقى فرقة و نشتغل فيها (ترزي) ننقص ونزيد..!
صديقي واستاذي عبد الله..حبابك كتر خيرك على المطايبة..! دي جديدة تب يا عبد اهنو..! ياخي ما كان تقول لينا (البليلة بي حجارها) أو بلغة ناس البندر (الحوض فيهو حمام)..! سعيد جدا انك تكون عبرت بي هناك.. التحية ليك ولأصدقاءك من الدلنج..و ما ح نكون طماعيين ونقول ليك اهدينا طرفة او لمحة من خواطر عن المدينة الحنينة دي..!
ول ابا الفاتح..حبابك يا صديقي كتر خيرك على المرور..
ابدا مافي مشكلة يا صاحب..فهكذا (تتداعى الأشياء) ويجب ان تتداعى..لأنو امسودان ده من ايتها تفصيلة بتلقى عندو معنى عجيب ومدهش..! ايام الكلية.. كان واحد من سنايرنا احمد الصومالي..اها شكلو مخضرم حضر منعطف بين زمنين غريبين في امسودان..فكان حضر اخر ايام الديموقراطية.. و المظاهرات بتاعة الدقيق والسكر وشنو كده ما عارف.. اها الجماعة واحدين طبوا في الشغلانة على ضهر دبابة صهباء.. وبرضك الراجل شاف المظاهرات بتاعة ناس ( الطاغية الأمريكان ليكم تسلحنا ) ..الراجل راسو شطب.. وتساءل:ياخي حيرتونا..امبارح تكوركوا جيعانين ، والليلة تكوركوا متشمرين لأمريكا..!! فاحمد الصومالي اتلخبط في حكاية ترتيب الأولويات..والصدق في التعبير عنها بحماس كان بيشوفوا غريب..!
كتر خيرك
Post: #106 Title: Re: امســـودان: عن اناقة الغيم والقونقليز وال Author: Kabar Date: 09-19-2015, 07:07 AM Parent: #105
12
بنفس الطريقة التي فاجأت بها صديقنا عبد الله في مركز النوع..ذهبنا لزيارة صديقنا الأستاذ سيد منوفل..و سيد رجل فنان شامل (يكتب الشعر ، يرسم اللوحات ، يعزف الكمان)..وكان في مشغله الصغير في حوافي سوق المدينة..! ايضا كانت هي لحظة لم تستطع تكنولوجيا الديجتال تسجيلها بدقة..!
لاحظت اضافة لمشغل صديقنا سيد ، مشاغل اخرى ..تعمل على انتاج لوحات من الخشب او القماش.. يعني بقت صنعة رايجة حكاية..الـــ Wood crafts في السابق..كانت هي مسألة هواية اكثر من كونها حرفة ليها جماهيرها وعشاقها..معظم الأعمال مربوطة بحركة الطلبة في الجامعة..والجمهور الأخر هم زوار المدينة الذين يرغبون في شراء هدايا صغيرة..
في الدلنج ، رايت الدكاكين الأنيقة..انواع من البزنس لم يكن موجود من قبل..خصوصا الإلكترونيات..ويبدو ان حركة التجارة تزدهر اكثر وفقا لحاجات الناس.. فوجود التلفونات الذكية ، الكمبيوتر.. كلها خلقت سوقها الجديد..وهو سوق اصبح مثل سوق قفة الملاح..!! وكنا سابقا ، نتسابق نحول صيدليتين فقط..الآن في كل مطب صيدلية..و البزنس شغال..يعني القوى الشرائية متوفرة..اما قيمة الأدوية الحقيقية..فبعضها كويس..و البعض الآخر مجرد سلع ساكت..!
كبر
Post: #107 Title: Re: امســـودان: عن اناقة الغيم والقونقليز وال Author: Kabar Date: 09-19-2015, 07:21 AM Parent: #106
13
صديقنا واستاذنا التشكيلي العالمي عبد الرحمن حامد جمعة (بليا)..واحد م ملامح مدينة الدلنج التي يحرص زوار المدينة من الإنجمام في بيته..و هو مركز فيه يعرض لوحاته واعماله الفنية..اضافة لفصول دراسة لطلاب وطالبات واخرون لهم اهتمام بالفن والتشكيل والجمال..! ولازال حلمه مستمرا ان ينشأ المركز بصورة متكاملة..جانب للفن ، جانب للموسيقى ، جانب للشعر ..جانب للدراما..جانب للنقد الفني والأدبي..!
حينما نشأت رابطة اصدقاء بليا في بداية التسعينات..كان يرجى منها ان تساهم في التجربة بمجملها..و لقد كانت الرابطة في بداياتها ، رغم التضييق غير المبرر من السلطات ، تحرص على وجود نشاط بنوع او اخر في المركز..وكانت تضم افراد من مختلف المشارب الفكرية و العقائد السياسية المختلفة..وكانت لها مبادرات تجاه المجتمع.. ففكرة بليا الأساسية ان الفن له علاقة وثيقة بقضايا المجتمع..!
زرت بيت استاذنا بليا ، وهو صوفي نقي يصوم الإثنين والخميس ، وفي نفس الأيام مرت به الأخت تابيتا بطرس حين زيارتها لجامعة الدلنج ..وقد قام هو بعمل معرض صغير بالجامعة..! التقيته ، وادهشتني اول مفاكرة معاهو.. فلقد سألني ، مباغتا: مالك ما داير تنشر الروايات يا كبر؟.. عقدت حواجب الدهشة وانا اقول: ما مستعد انشر؟.. قال: ليه؟..اديني باقي الكراسات وانا ح انشر..!! و ظننت اني متهربا ، قلت: ما لاقي لي ناشر..!! هبش جيوبه ، وقلت: بتفتش لي شنو؟.. قال: تلفون نور الهدي ، وهسع ده نتكلم معاهو..!! حسيت اني داير اركض..اركض ..اركض..!!
البيت يزدان بهاء بابداعات استاذنا وصديقنا بليا ، والأهم روح بليا الشفيفة وهي تظلل البيت بهاءا وجمالا..قمت بتصويرات كتيرة في البيت..واستوقفتني تجربة طريفة..فهناك بيت نمل.. أي والله بيت نمل (لم ارى في حياتي انسانا متوحد مع الطبيعة والكائنات مثلما هوبليا..!!)..تم صنع غطاء لبيت النمل هذا ، بصورة تحميه من اقدام الزوار والعبور..والغطاء عبارة عن قطية صغيرة مصنوعة من رقايق شجرة القنا..التقطت بعض من الصور..لأنها تجربة طريفة ومفارقة للغاية..و حدثتني صديقتنا عبير (وهي احد التلميذات التي تعمل في مجال القرع وتصنع منه مزهريات ، شمعدانات ، دليات حلوى ..الخ)..ان فكرة قطية بيت النمل هي واحدة من افكار تلاميذ الأستاذ بليا..!! في مدخل البيت هناك شجرة امديكا Wild cherry وكانت مثمرة..وبليا يحرص على هذه الشجرة كأنها طفلته المدللة..وامديكا هي واحدة من الأشجار المثمرة في جنوب كردفان..ولينا معاها حكاوي..ولكني حينما رأيتها في بيت الأستاذ بليا ، شعرت بها كائنا اخر.. كانما هي لوحة من لوحات الجمال.. فيا بليا : اشمعنا امديكا من دون بقية الخلق؟..
في اخر الأيام ، كانت جلسة ، وهي طقس حفل صغير يحرص صديقنا بليا من اقامته لكل ابناء وبنات المدينة الذين هدتهم اغبرة الغربة اللعينة..و تيسرت لهم الظروف بالعودة حتى ولو كانت عودة خاطفة..مثلما يجسد هو تلك العودة بلوحته الحنينة (عودة السمبر/عودة الطيور المهاجرة)..جمعني الحفل بكوكبة من الأصدقاء..واندهشت ان كان من بينهم من هو في اقصى اليمين (ناس الجبهة الإسلامية) ومن هم في اقصى اليسار ، وما بينهم من انتماءات ومشارب فكرية..وكلهم جمعتهم المحبة الخاصة للأستاذ بليا والدلنج وامسودان (فامسودان كل منا يحبها على طريقته الخاصة ، ويكفي ان نسمى ذلك حب..فلا حب يفوق الأخر..!!)..
التحية للشبيبة في غرفة (دلنج سودان) وتحية خصوصية للشاب عبد الرحمن عزاز الإمام ، و هو كائن مسكون بالدلنج مثل الكثيرين والكثيرات ، ولكنه يملك القدرة على التعبير عن لعنة السكون بطريقته الخاصة..وهم الشباب الذين قاموا بتجميع مادة الفيديو المنشور هنا.. صديقنا ، ول ابا استاذنا الطيب رحمة قريمان ، لو عبر وشاهد الفيديو..مين يعرف ..عسى ولعل يحدثنا عن الكائن الظاهر في الدقيقة (1:08)..وانتا ماشي..!!
تحية لأهلنا في الدلنج..والحكاوي عنهم لا تخلص البتة..!
كبر
Post: #108 Title: Re: امســـودان: عن اناقة الغيم والقونقليز وال Author: Kabar Date: 09-19-2015, 07:58 AM Parent: #107
التحية مرة اخرى ، وليست هي الأخيرة ن لصديقنا عضو المنبر مبتدع فكرة سودان فيديو..! يا الصادق اسماعيل .. دي ياها نظرية المؤتمرجية بتاعة زمان انو ناس امسودان ناقصاهم العرفة ببعضهم البعض ، وقاموا المؤتمرجية قضوها رحلات..لغاية لحقت جداد حلة اخونا ابكر ادم اسماعين..!!!
احد الأصدقاء ، ناكفني ، وهو يسال: شنو قادينا الدلنج ..مافي حاجة وراء الدلنج ؟..
ماوراء الدلنج.. اقرب حاجة ممكن نقدمها لناس امسودان..طريق الدلنج كادقلي..
ده الطريق الكنا بنسافر فيهو ايام المرحلة الثانوية..ولسع قاعد كما هو ..الجبال امينة بتخضر في موسمها..والفيافي ، التي كنا نسمى بعضا منها البراري السودانية تيمنا ببراي سسكتشوان (طبعا قبال ما نشوف سسكتشوان)..وكنا نسميها البراري الأمريكية ..تشبها براري امريكا ، مع انو حقتنا اسمح بمراحل..لكن منو البيقنع الديك..!!
هذه هي الأرض الطيبة التي نتمنى تراها اكبر كمية من ناس امسودان..!
في احد المنعرجات بين تلك الجبال ، تقبع قرية انيقة ..ولد على ارضها اخونا ادم جمال ، واخونا عبد الرحمن عزاز ..واخونا منير شيخ الدين..!!!! حاجة غريبة مش؟.. التلاتة ديل اتولد في نفس القرية..!!
كتر خير اخونا صاحب تجربة سودان فيديو..و كتر خير اخونا احمد رحال القام بالمكساج (اضافة انغام الربابة)..!!
هذي امسودان لا تشبه رطين النخبة..و ليتها تبقى انيقة هكذا..!!
شكرا ولد أبا كبر.... الفيديوهات وقعت معنا في جرح .... طفنا بامسودان وصاحبنا أهلها وعدنا الى بلاد العم سام بعد هنيهة ....يا سيدى كدقلى والدلنج مدن لها تاريخ حرصت عاى متابعة البوست في كل صغيره وكبيره و لدى رغبه ولهفة في التعرف على هذه البقعه المهمه من بلادى .......لوحات الفنان التي ظهرت على الفديو تذكرنى اساتذه اجلاء لازالت صورهم محفوره في دواخلنا ومنهم صديق شلنقو حفيد شلنقو صاحب الاسم والبله عبدالله وعبدالله عبد الرحيم الملقب بجامايكه ومصطفى دقل وكلهم من أبناء النوبه وكذلك تتلمذت على ايدى الشاعر محمد حامد ادم ....
Post: #110 Title: Re: امســـودان: عن اناقة الغيم والقونقليز وال Author: Kabar Date: 09-20-2015, 07:45 AM Parent: #109
ول ابا رحمه..حبابك يا صديقي كتر خيرك على المرور والمطايبة..
هي مدن حميمة يا صديقي..ولو لقت فرقة ..ما فاضية لمدن كتيرة في العالم..! هناك تصاوير كتيرة ..وحية من مدينة الدلنج..وحايمة في الفيس بووك..وغالبية الناس وقعت ليها فكرة توظيف تكنولوجيا التواصل بصورة ايجابية.. والمضحك يا ول ابا شفت لي تصاوير لمدينة بابنوسة.. استغربت..لولا الأرض الرملية الواحد ما كان اتعرف عليها.. ومؤكد كتير من مدن امسودان..لو الناس سخت وعملت ليها تصاوير ممكن تربط الناس البعيدين مع بعض..! التحية للكوكبة التي ذكرتها ، والشاعر الأستاذ محمد حامد ادم..عمل بمدينة الدلنج لسنوات..وغادرها نهايات الثمانينات..!
كتر خيرك
Post: #111 Title: Re: امســـودان: عن اناقة الغيم والقونقليز وال Author: Kabar Date: 09-20-2015, 07:51 AM Parent: #110
(14)
في الليلة الثالثة لي ، وانا في مدينة الدلنج ، سمعت صوت غريب ومرعب..دانات انطلقت من الحامية..و كانت بالعدد ثلاثة..وتسمع صوت الواحدة كانما تهتز له الأرجاء..ناس البيت كلهم كانوا منتظرين رد فعلي..و سألت..العالم انفقعت بالضحك المتواطئ..واحد اشقائي قال..لي.. مش زمان لمن يجي ضيف كبير الناس بتضرب؟..قلت .. ضرب خرطوش ايوه نعم.. لكن دانات عديييل؟!!
في اليوم الثاني كنت اتحسس الأخبار..خسائر..حلة اتحرقت..ناس ماتت..ولم يحدث..ليس هناك أي خبر عن خسائر..الناس ماشة في حياتها عادي للغاية..!
تكررت حكايات الدانات كذا مرة..ولاحظت مرات بتكون بعد هطول المطرة..احد ظرفاء المدينة قال لي: اعمامك العساكر بيكونوا قاعدين في الحامية..اها بيقوم واحد من الجبال القريبة (ناحية سلارا)..يشاغلهم ببطارية..وبتقوم الدانات بتدور..! صوت الدانات اصبح جزء من حياة ناس المدينة..ومافي زول شغال بيهو الشغلة..باعتبار انو ده شغل ناس الديش..وهم عندهم مبررات لذلك..!
الناس متضايقة من حكاية الحرب..باعتبار انها عطلت كتير من المشاريع الممكن تقوم في المنطقة..التضامن مع الحركة الشعبية تضاءل لدرجة تقارب الصفر تقريبا..والنظرة ليها بقت انو مجموعة سياسيين حردانيين وبيحاولوا يلفتوا نظر النظام عشان يتعامل معاهم..!! الموقف الذي احارني في جنوب كردفان هي رؤيتهم لحركات دارفور المسلحة التي تواجدت في المنطقة بموجب اتفاق الجبهة الثورية..ومعظم البسطاء بيفتكر انو ناس الحركات دي ساطوا دارفور..و دايرين يسوطوا جنوب كردفان..!
واحد من الأصوات (زولة مثقفة وفاهمة)..عندها حسبة غريبة.. قالت..الإنتخابات الفاتتة..ثلث الدوائر في جنوب كردفان كان مغلق بسبب الحرب..و هي ثمانية دواير..في حين ان كل ولايات دارفور عدد الدوائر المغلقة كان اتنين فقط..و في النيل الأزرق دايرة واحدة.. (لاحظ الدواير الولائية في كل ولايات السودان متساوية العدد 24 دايرة لكل ولاية)..!!..بمعنى ادق ..ليه جنوب كردفان مزعزعة ودارفور ، برغم الجوطة ..اهدأ قليلا..وكذا النيل الأزرق؟..!!
الحركات المسلحة..تقريبا بتشتغل بشغل المقاولات..يعني مثلا الأحداث في السنة السابقة..والتي كانت بالقرب من الدلنج (شمالا)..معظم الناس عارفة انو ده شغل قام على اكتاف بعض الناس من المنطقة..وما عندهم علاقة تنظيمية مع مكونات الجبهة الثورية..لكنهم نفذوا الشغل وقبضوا واتفرقوا في سبيل حالهم..!
في الخرطوم ، الناس اصبحت بعيدة عن الثرثرة السياسية..والقليل الموجود..عندو رؤى غريبة بعض الشئ..معظم من تحدثت معهم.. تشتم في احاديثهم الشماتة تجاه ما يحدث في دولة جنوب السودان..وهم يرون ان لا داعي لعودة الوحدة..و ان كان ذلك خيار لابد ان يحدث استفتاء في السودان..على الوحدة ام لأ.. باعتبار ان الجنوبيين المرة الفاتتة اخدوا فرصتهم الكاملة..!
الناس لا تعرف ما هي مكونات مجموعة الإجماع الوطني..ما هي مضامين نداء السودان..ماهي مضامين وثيقة الفجر الجديد..ماذا تريد حركات دارفور المسلحة بالضبط.. ماذا تريد الجبهة الثورية..والأغرب لا رغبة للناس ان تعرف عن هذه الأشياء..! هناك اتفاق (على مستوى من تحدثت معهم ، وهم بسطاء لا علاقة له بالنخبة ، سواءا حاكمة ام معارضة)..على ان فكرة المعارضة واحزابها مسألة باهتة ولا تعني الكثير لهم..والبعض يعتقد ان خطاب المعارضة لا علاقة له البتة بقضايا المواطن العادي..و بعيد عن الهموم اليومية..!!
ما ادهشني ، بعض ممن كانوا يحسبون على النظام والحركة الإسلامية.. فهم اكثر الناقمين على الأوضاع..وحينما تسألهم عن امكانية مشاركتهم في فعل حقيقي لإحداث التغيير.. فيتغير موقفهم..و ترى تمسكهم بمشروع الدولة.. الفئة دي ادتني انطباع انو في مسرحية مستمرة..وهي ان يقوم البعض بلعب مثل هذا الدور..!
فئة ناس الحركة الإسلامية تلك..تحس في احاديثهم..بعض من الإعتراف بالأخطاء..والغريبة ، نفس الفئة هذى ، تتحدث عن وجود طبقة جديدة اسمها (اولاد الكبار)..سألتهم عن الفساد الموجود في البلد..ورايهم شنو بالضبط؟..البعض اعترف بوجود حاجات كتيرة غلط..و البعش الآخر اكتفى بابتسامة خبيثة من شاكلة: ما تسوي البساط احمدي للآخر..!
بعض من صحابي البعثيين والبعثيات..كنت حريص الاقيهم واسمع منهم رؤيتهم تجاه الحاجات..ومن التقيتهم..كانت عندهم رؤية عجيبة.. تتحدث عن كون السودان دولة محاصرة لمدة ربع قرن..!
كبر
Post: #113 Title: Re: امســـودان: عن اناقة الغيم والقونقليز وال Author: Kabar Date: 09-20-2015, 07:55 AM Parent: #111
مجموعة (صوغا) الموسيقية من جمهورية النيجر.. وهذا العمل بالذات..اسمعني له بعض الأصدقاء ..وهم يحاولون اشراكي في مزيكا مختلفة..
التحية ليهم جميعا.. ونوعدهم الإستمرار في التفاعل مع مزيكا غرب افريقيا..وكل مزيكا افريقيا التي تحتاج ان تعرف عنها شعوب امسودان..
كبر
Post: #112 Title: Re: امســـودان: عن اناقة الغيم والقونقليز وال Author: Dahab Telbo Date: 09-20-2015, 07:54 AM Parent: #110
العم والاستاذ الجليل كبّر سلام ومودة
شكرا للحبل الممتع دا متابعو والله من اول يوم بديت تفتل فيهو قلنا نداخلك لكن اتعظنا بقول عمنا ودالفكي " كِن حضر العالم ما بوعظوا أمهاجرين" فقلنا نتقل شوية ونجي ناخد البركة في الاخير ،يبدو اننا استعجلنا ولكن قالوا السايقة لابد من تصل على العموم مرحب بيك وجيدا جيد والاناقة هنا ليست الغيم والقنقوليز الاناقة اناقة حاجات كتيرة في الوطن السمنوح دا ماشة تندثر بل كثير منها اندثر والسلام فأحكي لينا عن الضحاري باقي منحبها قاسي وخصوصا مع بعض الخفشات الفنية والنقاقير والكمنجات
دمت ياخ تلبو
Post: #114 Title: Re: امســـودان: عن اناقة الغيم والقونقليز وال Author: Kabar Date: 09-20-2015, 08:09 AM Parent: #112
ول ابا دهب..حبابك يا صديقي كتر خيرك على المرور والمناغمة.. ياخي الواحد كان داير يلاقيك..وعاصم الحزين..و ناس ريحة البن..لكن التفاصيل استغرقتنا كتير..وما تيسر لينا نلاقي ناس الثقافة والأدب والفنون..والجايات اكتر من الرايحات..! ضهاري اكتر من كده يا ولد ابا؟.. مشيت الفرقان..لأنو الضعاين عندنا جات القوز..وكانت رحلة ليوم واحد فقط..الواحد شرب البركيب وجا غافل..! لدي بعض المواد..و هي على الطبيعة..رقصات عجيبة..ولكن امكانيات المنبر ما بتستوعبها..لأنو يبدو الأحجام كبيرة شوية..! الحكي خلاص قرب يكمل..لكن ان شاء اهأم ..نجيب حاجات حتى ولو قديمة شوية..!
كتر خيرك
Post: #115 Title: Re: امســـودان: عن اناقة الغيم والقونقليز وال Author: Kabar Date: 09-20-2015, 08:16 AM Parent: #114
(15)
حينما دخلت امسودان ، كنت مسكون بكثير من الخطاب بتاع ناس المعارضة..خصوصا الضايقة المعيشية..والحكاية دي استقرت في دماغي وانا اقرأ بعض تصريحات ناس الحكومة وهم يعترفون ضمنينا بوجود ضايقة معيشية..وارتفاع الأسعار في بعض السلع..! فكرة غريبة بالنسبة لي..! كنت اتوقع ان ارى ندرة في السلع الأساسية..وهذا لم يحدث..!
ما اضحكني حقا حكاية حساب القروش في الحياة اليومية..الناس بتحب المبالغة وتضخيم الأشياء..لدرجة انو حتى الآن عندها تصورين للعملة السودانية..مثلا..حاجة بتسعين جنيه..طوالي يقولوا تسعين الف..حاجة بالف جنيه ..طوالي يقولوا ليك مليون جنيه..كباية الشاي (عند معظم ستات الشاي) سعرها جنيهين.. يقولوا ليك ميتين جنيه..!
جارنا في الحلة عندو دكان..وكنت بتونس معاهو طوالي..ورجل نكتة ويحب الإستفسار عن الأشياء.. فسالني.. عن مقارنة بين الأسعار في السودان الغالي والأسعار في كندا الرخيصة..!
ضحكت وقلت ليهو..اخير ليك خليك في سودانك الغالي ده..!
قال: حاجاتكم رخيصة مش؟.. قلت ليهو: امسك عندك انا قاعد اشتري منك سجائر..علبة البرنجي بعشرة جنيه..تلاتة علب بتلاتين جنيه..يعني تلاتة دولارات..نفس كمية السجائر (علبتين ونص= 25 سجارة)..بي دولارين ونص..في كندا انا بشتريها بي طلاطاشر دولار..! طبعا الناس القاعدة تدخن..هناك خيارات سجائر اخرى..و العلبة (10 سجارات) بخمس جنيه يعني نص دولار..والخمس وعشرين سجارة من النوع ده بدولار ونص..!!
ضحك الرجل..و قال : لي ياخي نحن قلنا السجائر غالي وغير مهم وحقو تبطلو..! قلت ليهو: انت بتبيع الدقيق بالكيلو..يعني سبعة جنيه..للكيلو..يعني دولار الإ ربع..الكيلو في كندا اربعة دولار..يعني اربعين جنيه للكيلو الواحد..!
ضحك صاحبنا وقال لي: ياخي حقو واحد يفتح ليهو دكان في كندا..!!! التذكرة من امدرمان الدلنج وبالعكس.. سعرها ثابت 140 جنيه..يعني اربعطاشر دولار بسعر كندا..!!!
المواصلات الداخلية (في العاصمة مثلا)..جنيهين.. يعني عشرين سنت..في مدينة كالقري..تذكرة المواصلات الداخلية (بص او قطر/مترو) تلاتة دولار وربع..يعني اتنين وتلاتين جنيه وربع الجنيه بالسوداني..!!!
لم يصدق صاحبي ما اقوله..و ظن انها حكاوي مساطيل ساكت..! مشيت حديقة عامة..جنب كبري الفيتحاب..المكان حميم ومشجر وانيق..و معظم مرتادية شكلهم طلاب وطالبات..شربت جبنة .. سعرها اربعة واربعين جنيه (كباية القهوة..في كالقري اكس لارش بتلاتة دولارت..!!)..طبعا معاها قزازتين موية..!!..هل الجبنة دي غالية؟..بالطبع.. لكن ليه غالية؟..
بعض الصديقات والأصدقاء عزمونا في بعض الأماكن..مطاعم في الخرتوم اتنين..كافيهات في شاطي النيل الأزرق (السعيد)..وفي الشاطي ده (حتة كده واقعة بين كبري كوبر وكبري المنشية..و فيها كافيهات صغيرة وانيقة )..جلسنا في حاجة عايمة كده بتذكرني كتيرا مسرح احداث رواية نجيب محفوظ (ثرثرة فوق النيل)..النادلات حبشيات..لطيفات..لكن الحاجات غالية..يعني كباية عصير اربعطاشر جنيه..(دولار ونص)..!
هل هي فعلا حاجات غالية.. ام نحن قاعدين ننسى نحسب سعر الخدمات (مكان ، عمال ، كهرباء ، موية..الخ)..؟..
الجرايد سعرها جنيهين..يعني عشرين سنت للجريدة..!
ولأني ما كنت سايق عربية ولا كنت راغب في السواقة هناك..لكني سألت من سعر البنزين..الجالون سبعة جنيهات..يعني خمس وسبعين سنت..طبعا عندنا في كندا (الرخيصة شديد) اللتر (مش الجالون) ..تمانين سنت..!
طبعا ناس كتيرة كانت بتضايق من فكرة المقارنة دي..ومؤكد في ناس متابعين هنا ح يتضايقوا اكتر..لكن يظل السؤال : أين الخلل بالضبط؟..
الناس ممكن تفط وجبة..لكن ما بتستحمل انو ما يكون عندها رصيد في الموبايل..!!
مافي زول في امسودان قاعد يدفع فواتير لخدمة التلفزيون (كيبل)..!!
الكهربا .. فواتيرها بقت .. Pay to go يعني تشتريها بسعر محدد لزمن محدد..زي خدمة الموبايل..وقبل ما تخلص بتلحق التانية..وهكذا..!!
الطلبة والطالبات..خصوصا فكرة حفلات التخريج..الواحد بيدفع بمعدل تمانمئة الى الف جنيه تكاليف الحفلة دي..!!
يعني زول عايش في نورث امريكا او اوربا مثلا..هل ممكن يقدر يقنع الناس بانو الأسعار في السودان غالية؟..وزول زي ده كيف يقدر يتكلم عن ضايقة معيشية وهو عايش في بلدان مستوى المعيشة فيها مرتفع والأسعار غالية مقارنة بالسودان؟..مش شكل الخطاب ده مفروض يتراجع؟..
نواصل لاحقا..
كبر
Post: #116 Title: Re: امســـودان: عن اناقة الغيم والقونقليز وال Author: عبدالكريم الاحمر Date: 09-20-2015, 10:15 AM Parent: #115
فظيع ياكبر دا بوست مهرجان عديل وفرقة Songha بهدلتنا بهدله
سلام يا كبر .... ظاهرة الحكي الطاعم و السرد الجميل اظنها مرتبطة بانسان الجبل .... عرفتها في صديقي عبدالعظيم جودة و انت الان تثبت الفكرة ...
واصل يا مبدع
Post: #118 Title: Re: امســـودان: عن اناقة الغيم والقونقليز وال Author: محمد الأمين موسى Date: 09-20-2015, 12:42 PM Parent: #116
أخي الفاضل محمد نور كبر... مقارنات الأسعار لا تكون دالة إلا إذا ربطناها بالدخل. عندما تصبح تعبئة خزان الوقود تساوي ربع راتب الموظف عندها تصبح البلد غالية حتى ولو كان المبلغ يعادل نصف أو ربع التكلفة في بلد غربي، لأن الأمر هناك - في الغرب - لا يصل إلى مستوى ربع الراتب.
Post: #119 Title: Re: امســـودان: عن اناقة الغيم والقونقليز وال Author: اميرة السيد Date: 09-20-2015, 02:26 PM Parent: #118
طبعا يا استاذ كبر نحن لما نزور السودان بنشوف الاسعار رخيصة جدا وكانها مجانا مقارنة باسعار امريكا ولكن زي ما قال محمد الامين فان المشكلة للناس القاعدين هناك....كيف واحد مرتبه ٨٠٠ جنيه يقدر ياكل 3وجبات وياجر بيت ب٤٠٠ جنيه. وما تنسى مصاريف الاولاد والمواصلات... وبعدين اود في هذه العجالة ان ازجي لك الشكر مرة ثانية وثالثة ورابعة فعن طريق هذه الحكاوي الانيقة الجاذبة عرفنا الكثير عن كردفان ..والتي لم نزرها حتى الان بل نحن لا نعرف عن السودان غير ولايتين او ثلاثة.. ودائما هنا في الجامعة في زميلة امريكية بتسالنا نحكيها ليها عن السودان ..قلنا ليها نحن ما بنعرف غير ولاية واحدة او اثنين في السودان..قالت صدقوني ان معظم الامريكيين ما بيعرفوا غير المدينة البيعيشوا فيها وحتى ولايتهم ما بيعرفوا عنها اي شئ لانهم ما بيطلعوا من مدينتهم شبر واحد لغاية ما يموتوا.. قلت ليها هسع انتي من نيويورك دي بتمرقي تمشي وين.....اذا كانت المدينة براها قدر دولة من دول من دول الخليج.....ونحن ما قاعجين نحكي ليها الا عن الخرطوم والشمالية والمسنوحة بسمات ما عندها سيرة غير الاتبراوي واتبرة...لغاية ما الامريكية بقت تعرف ان عطبرة كان فيها اكبر محطة سكة حديد في العالم..على حسب قول بسمات.. مع اننا بنشوف ان محطة قطارات محلية في نيويورك اسمها قراند سنترال اكبر من حي كامل في الخرطوم واحتمال تكون مساحتها تحت الواطة قدر نص عطبرة والله يديكم الصحة والعافية
Post: #120 Title: Re: امســـودان: عن اناقة الغيم والقونقليز وال Author: Kabar Date: 09-23-2015, 07:54 AM Parent: #119
ول ابا الفاروق..حبابك يا صديق كل سنة وانت طيب.. كتر خيرك على المرور والمطايبة.. والتحية لصديقك عبد العظيم..
الجبل كائن حميم بيعلمك خصلة التأمل ومعاينة الحاجات بصورة مختلفة..خصوصا التفاصيل.. هناك يا صديقي ، الجبال في حد ذاتها لوحة..خصوصا مع شفق المغيب..صورة مافي حاجة بتقدر توثقها غير العين المجردة والإحساس المباشر بيها..!
زمان يا الفاروق..كنا مهووسين بنفس المشروع الثقافي البسيط بتاعنا..و البيقوم على تجسير المسافات بين اهالي امسودان..اها ونحن طلبة ايام الجامعة..كانت الأسرة ممتدة لغاية بحر ابيض (ربك ، المرابيع ، الجزيرة ابا..)..وقمت سقت لي مجموعة (بنات واولاد) من اهلنا ديل وعزمتهم يمشوا معاي كردفان..طفنا في كم حتة..و اخر المطاف كان الدلنج..! طبعا ديل ناس ، زي ما قال لي واحد منهم.. يعيشوا ويعرسوا وينجبوا ويبقوا في حق الله..وما يشوفوا جبل..ولا حتى يخطر ببالهم شكل الجبل ده كيف..! وكنا ، ولازلنا ، نحن ناس الدلنج..أي ضيف بنقوم نعمل ليهو جولة في المدينة..رحلة صعود الجبل ورحلة لخور ابو حبل..وده فيهو غابات مهوقني اسكت ساكت خليها..منسقة وجميلة للغاية..!
وكل زول/ة بيسال..لكن اطرف سؤال كان من اختنا واحدة.. وكان في شكل استغراب.. انو كيف الناس بتسكن تحت الجبل..يعني هسع لو قامت صخرة هفت ليها وجات متدحرجة..!! ضحكنا من المفارقة..و قلنا ليه: الغريبة الحكاية دي مافي زول بيفكر فيها..!
في السابق ، ولازال ، الجبل عند انسان المنطقة هو الحامي للإنسان من آفات اخيه الإنسان..وفي نفس الوكت هو الحافز على التأمل..!!
كتر خيرك..
Post: #121 Title: Re: امســـودان: عن اناقة الغيم والقونقليز وال Author: Kabar Date: 09-23-2015, 07:56 AM Parent: #120
ول ابا محمد الأمين موسى..حبابك يا صديقي كل سنة وانت طيب.. كتر خيرك على المرور والمناغمة..
نعم اتفق معاك في حكاية ضرورة ربط الأمور بالدخل الفردي.. وازيد البلد في حالة تضخم..خصوصا بعد ذهاب الجنوب..والعوامل كتيرة اهمها عدم الإستقرار والحروب والصرف على الحروب (من الطرفين ، كن حكومة او معارضة)..والأهم الحصار المضروب على البلد لمدة تفوق ربع القرن (حسب نظرية صديقاتي واصدقائي البعثيين القابلتهم)..مثل هذه العوامل كلها يجب ان تكون في الحسبان..عشان كده الواحد بيستغرب في توفر كل العوامل السلبية دي..و البلد فيها وفرة في السلع..وفيها مشاريع ماشة بنيات تحتية (التعليم ، الصحة ، صناعة الإتصالات..صناعة البترول)..!!
في اعتقادي ، لو كان ناس امسودان حريصين على بسطة الحياة والمعيشة.. كانوا حافظوا على السنوات الخمس بتاعة سلام نيفاشا وخلوهو سلام دايم.. لأنو في السنوات دي..الأمور انقلبت راس على عقب..و لغاية الليلة المراقبيين الدوليين مستغربين انو بلد في سنوات قليلة حاجاتها تتغير..!
لمن اقارن الحاجات في فترة السلام..و الآن ، وما قبل السلام.. بيجيني احساس كعب خلاص.. انو نحن شعب ما بنحتمل الرفاهية تب..!!
كتر خيرك..
Post: #122 Title: Re: امســـودان: عن اناقة الغيم والقونقليز وال Author: Kabar Date: 09-23-2015, 08:02 AM Parent: #121
بت ابا اميرة..حبابك يا صديقتي كل سنة وانت طيبة..وعيد الحول ما يغضب زول.. كتر خيرك كتير..
وانا برضك متفق مع مقاربة اخونا محمد الأمين..و اكيد ح تمري على ردي ليهو.. باقي الإقتصاد ده الواحد مكجنو كجنة السنين..لكن لازم الزول يعرف عنو ولو شوية.. الظروف ما معروفة يمكن يوم الواحد تهف ليهو ويمسك امسودان..!! عارفة يا اميرة.. كائن امسودان الذ الكائنات..و عندو قدرة على الإدهاش بصورة ما عادية..بس مشكلتنا انو دايما بنشوف حاجاتنا عادية..!
اتذكرت بسمات ، وانا بقرا طرفة رماها صديقنا يحي قباني في احد البوستات..وكان بتكلم في حاجة فيها ذكرى محطة القطر في الخرتوم.. فقال عن حتة معينة انو دي كانت حتة بيلموا فيها (صعاليك المحطة)..وطبعا يحي قال داير زول عجوز يشرح للناس المفهوم..ياخي ضحكت جنس ضحك.. قلت يا ريت بسمات تعدي بي هنا..و تشلضم يحي في حكايات صعاليك المحطة..و دي حاجة ما بيعرفوها الإ الناس العاشوا قريب من القطر..!
الخرتوم ذاتها ما ساهلة يا اميرة..وهي امسودان مصغر.. بتشوف فيهو سحنات الناس وتفاصيلهم وثقافاتههم..وممكن اديك فيديو هدية ومن ناس قاعدة في الخرطوم..!
فعلا ناس هنا..نورث امريكا مثلا..طرش..و الواحد بيكون عارف المدينة القاعد فيها..مرة لمن كنت في ريجاينا سيتي (سسكتشوان)..معاي صاحبي في الشغل اسمو راندي..اها كل ويك اند اقول ليهو مسافر..يوم قام اتحكحك وقال لي انت بتسافر كتير ليه؟..قلت ليهو عشان اعرف البلد وازور بعض الأصدقاء.. ! قال لي ياخي انا ناس بيتنا في حلة تبعد عشرين دقيقة ، ولي طمنطاشر سنة ما زرتهم..! المهم قمنا عاديناهو بحكاية السفر ، وقام وضب عربيتو..و مشى زار اهلو..وكان حاجة مختلفة..و قال لي ياخي انتو الأفارقة حنين خلاس..!
كل الناس البتكتب هنا يا اميرة.. لو كل زول/ة قعد ربع ساعة مع نفسو..و اتذكر تفاصيل الحي ، القرية ، الدروب ، الشوارع.. المواقف.. الملامح..ياخي ح تقري كتب ما انزل اهل بها من سلطان..!
هدية ليك صغنونة..وممكن تونسي بيها صاحبتك النيويوركية..رقصة الكمبلا..والأداء ده في العاصمة.. القرون دي يا اميرة ، ياها ذاتها المنقوشة في حفريات ناس كوش..والجماعة ديل في زمنهم ، خلي بالك ، كانوا بقارة..!
معليش الصوت تعبان ، لكن الأصل.. انو الرقصة مصحوبة بترانيم بيتم غناءها بصورة كورالية (ودي الحتة الجاية منها فكرة كورال ناس الجبهة الديموقراطية في الجامعات)..والأصوات بتكون موزونة..وتبادل بين اصوات نسائية ورجالية..و في مرحلة بيكونوا الإتنين مع بعض..!
الرقصة هي بتاعة اهلنا ناس ميري..ودي الحتة المنها الفكي على الميراوي..واستاذنا يوسف كوه عليهما الرحمة..!
الأهم.. منطقة ميري دي فيها مناجم يورانيوم يكفي الكرة الأرضية وما جاورها من كواكب..وهو من اجود انواع اليوارنيوم التي عرفها الإنسان.. بس الحتة دي ما تقوليها لصاحبتك الأمريكية..!
كتر خيرك..وكل سنة وانت طيبة..
Post: #123 Title: Re: امســـودان: عن اناقة الغيم والقونقليز وال Author: Kabar Date: 09-23-2015, 08:53 AM Parent: #122
ول ابا عبد الكريم..حبابك يا صديقي كل سنة وانت طيب..عيد الحول ما يغضب زول ، زايدين ماني ناقصين.. كتر خيرك على المرور..
المجموعة دي عبد الكريم ، قاعد اسمع ليها طوالي..وهي معاها الأخريات.. مجموعات بتونسك في ليالي الغربة الطويلة.. ياخي مرات صمت اسكت ساكت.. لمن خشمك يعفن..!
دوبك وقع لي كلام اخونا واستاذنا عباس عبدو ..و نظريتو انو اغاني التراث في امسودان ما مفروض يدخلوا فيها اوركسترا.. ومفروض يقدموها على طبيعتها..و متذكر برضك في الدلنج زمان ، تجربة اخونا الأستاذ جمعة عبد الله وكان بيشتغل اغاني بلغة النمانج في الحفلات..الحاجات ديك قريبة من شغل ناس صوغا ..بس ناس صوغا سدوا الفرق بالتصوير في مواقع مرتبطة بمعاني النص..والثقافة المنطلق منها..و دي حركة لو ناس امسودان عملوها ح تدهش العالم كتير..
ده واحد من اعمال ناس صوغا..والناس ديل يا عبد الكريم بيذكروني الفرشاية (الله يطراها بالخير)..
الموقع في بداية الفيديو ..اشبه كثيرا بمدخل الفرشاية..الخور ..الأرض الرملية.. البيوت البعيدة في الصيف..!
بالرغم من حاجز اللغة وكده ، لكن لو عاينت للتفاصيل.. ممكن تتفاعل مع الغنية..!
النقرابي ، وكان زمان نوعين ..نقرابي درب الطير ، ونقرابي مطيرق..و الظاهر هنا مطيرق..!
الترنيمة بتبدا ، برفع اليدين ( يا الله هو يا كريم..!!).. ثم الشكوى..! الورورا بالأصبع..! والأهم دقة الفندك (الدقيقة 1:05)..!!!!! ثم حكاية التحذير الشديد..وانا مالي بعد داك مخيرين..!! واشارات (شغل دماغك/افتح عينك كويس)..! ثم الترميز لفكرة (عقد القــُران)..!!
الغنية هي بلغة الهوسا في النيجر ، وهي غنية حب وتحذير للبنيات الصغار من الشباب الخطرين.. لأنو أي دقسة بجيب شريعة ودقة سريعة (الزولة المغنية بتقول: شريعة لب لب لب..!!!!!!)..
اها شغل زي ده ناس الدلنج ممكن يعملوا متلو واجود..نصوص متل (حوالي الساعة خمسة) ، و (جاني جواب من الزريقة محمد) ، و (القردود)..فيها دراما كتيرة ممكن تتجسد كصورة..!
بت ابا شادن حسين.. بدت الفكرة..ولو اتفرجت على غنيتها (عمتي)..بتلقى نفس الروح بتاعة ناس صوغا.. بس عندنا في امسودان الناس بتحب الإلكترونيات كتير..كيبورد مثلا..فلو لقوا فرقة ودخلوا الات محلية.. الفرق بيظهر كتير..!
كتر خيرك..وعندنا حاجات محتفظين بيها للختام (وهو قرب خلاس)..وح نعمل ليها مقاربات وتجسير مسافات..فانسان امسودان يملك الكتير المثير المدهش..لكن حاقر بي ذاتو ساكت..!
شكرا اخي كبر أيها الرجل الجميل ......... ناس غرب افريقيا الموسيقى اخدوها من عندنا , او نحن اخدناها من عندهم كلها روايات مقبوله .........هذه الفيديوهات فسرت لى لماذا كان وردى فنان افريقيا الأول.......قبائل التماس اوالقبائل المشتركه لديها حضور قوى وهذا يؤكذ تذوقهم للفن الراقي واصيل ...... مثال محمد وردى وعبد الرحمن عبدالله وعثمان حسين
Post: #126 Title: Re: امســـودان: عن اناقة الغيم والقونقليز وال Author: خالد حامد الجزولي Date: 09-28-2015, 10:23 AM Parent: #100
تحياتي استاذ كبر كل عام وأنتم بخير والاسرتين الكبيرة والصغيرة بألف خير مرور للمعايدة والمطايبة وكمان وجدت بيننا صديق مشترك وهو الاخ محمد عبد الله حرسم تحياتي
Post: #127 Title: Re: امســـودان: عن اناقة الغيم والقونقليز وال Author: احمد الامين احمد Date: 09-28-2015, 03:26 PM Parent: #126
كتب كبر من وحى زيارته للدلنج : صديقنا واستاذنا التشكيلي العالمي عبد الرحمن حامد جمعة (بليا)..واحد م ملامح مدينة الدلنج التي يحرص زوار المدينة من الإنجمام في بيته..و هو مركز فيه يعرض لوحاته واعماله الفنية..اضافة لفصول دراسة لطلاب وطالبات واخرون لهم اهتمام بالفن والتشكيل والجمال..! إنتهى . أول مرة رايت فيها صديقك واستاذك التشكيلى عبدالرحمن (بليا ) كان فى نجيلة كلية القانون جامعة الخرطوم ربما قبل دخول كبر إليها بنحو عام او عامين حيث شارك الفنان المبدع هذا فى معرض سنوى لجمعية القانون صدح فيه كابلى ومحمد اللمين فى ليلتين مختلفتين لفت إنتباهى فى الفنان (بليا ) فى ذاك الإسبوع الثقافى توظيفه المدهش لخامة القرع فى تنفيذ مادته وكان يجلس وسط مشغولاته على ذات النجيلة ولم يضعها على مناضد بل وضعها على أرضية النجيلة و جلس هو كذلك على العشب الطرى وكان يعمل فى ذات الوقت على تنفيذ أعمال حية وسط متابعة الجمهور له و كان يمتاز بروح إنسانية وخفة دم حين يتناقش مع الجمهور المتابع له . لاحقا رايت (دكان ) يحمل إسمه على شارع الاربعين بأم در به مشغولات لذات الفنان الكبير جدا الذى لاذ بمسقط راسه الدلنج مواصلا الإبداع وسط بيئه الملهمة جدا خاصة أن الدلنج وما حولها من جبال وغابات وبشر من أجمل مناطق السودان القديم وأكثرها إحتشادا بالطقس والسحر والسبر عبر دورة حياة الإنسان والمحصول والطبيعة عموما . الدلنج فى ذات الوقت قديما من محاضن صهر السودانيين فى بوتقة واحدة شأن مريدى السحة ، شندى فوق ، الأبيض ، ود مدنى السنى وام درمان تحديدا و والدويم هى المدن التى كان بها معاهد التعليم وكليات المعلمات التى تستقبل دراسين ودراسات من كافة جهات السودان وتعدهم لتعليم الناشئه فى كافة الوطن دون التقييد بحدود ولائية وعبر هذا النسق ألهمت الدلنج أحد منسوبى معهد المعلمين بها من غير أبنائها وهو الشاعر الراحل جعفر محمد عثمان قصيدة (تبلدية ) التى وقفنا عليها كثيرا فى المنهج المدرسى المرسوم بثانويات السودان القديم وعبرها تعرفنا بقوة على إسم الدلنج . تحية وتقدير كبر وحبذا لو طالت رحلتك تلك ووصلت حتى رجل الفولة وبابنوسة كى نشم ريحة (دينقا ) المجلد عبر حديثك و كاميرتك وذاكرتك وقريحتك . أخيرا من أجمل مواد البوست الفيديو الذى يصور بعض إبداع الفنان الصوفى الصايم القايم بليا وزاده جمالا الخلفية الصوتية المصاحبة لأغنية إيلياء أبى ماضى واحمد المصطفى ( وطن النجوم ) خاصة صوت أحمد و روعة العزف المصاحب له .
Post: #128 Title: Re: امســـودان: عن اناقة الغيم والقونقليز وال Author: Kabar Date: 09-30-2015, 09:27 AM Parent: #127
كتبت بسمات الشيخ:
Quote: يا ها دي بنسميها القراية بمتعة.. ثقافة وعلم ومعارف واستمتاع...
بت ابا بسمات..حبابك يا صديقتي.. كل سنة وانتي طيبة.. كتر خيرك على المرور ، والملاحظات العجيبة..!
سعيد بقرايتك للحاجات هنا.. لكن..!
اسمحي لي اهديك طرفة عن قراية ناس امسودان للحاجات (وانتي بره الموضوع ده)..!
اخونا منصور المفتاح ، عندو خيط طويل وعريض ..والخيط ده موضوعو مراسلات بين نفرين ليهم شأن في دنيا التثاقف في مشهد امسودان ، الأولاني صديقنا واستاذنا عادل القصاص ، والتاني ، استاذنا ، اخر فليسوف في امسودان ، دكتور محمد خلف الله عبد الله..!
في ونساتهم تلك ، محمد خلف ، تعرض لكتاب عجيب ومهم للغاية..و ترجمتي لإسم الكتاب هي ( الزين وتصليح المواتر*).. الكتاب لفيلسوف امريكاني اسمو روبرت مينارد بيرسيج..وفيهو حكاية لرحلة زول وولدو من شرق امريكا لغاية غربها..!!
ولو بتسمعي مزيكا اهلنا امزرقة ناس اميركا (الراب/الهب هوب..الخ)..عندهم معسكرين (شرق/غرب)..ودي جاية من فكرة ول ابا روبرت هذا..!!
مثقف امسودان ، في كثير من الأحايين ، بيكون مشغول بفكرة عمنا غاستون باشلارد..خصوصا فكرتو عن (جماليات المكان)..!!
يعني يا بسمات..واحد سايق ولدو في رحلة ويسميها عدييل (الزين وتصليح المواتر)..وعمنا باشلارد يكتب عن جماليات المكان..ومعظم امسودان ، النخبة تحديدا ، تقرا للناس ديل باستمتاع..ولمن يجي واحد مسكين زينا يتكلم عن (جماليات المكان) ورحلة فيها تصليح مواتر تمرق لغاية الدلنج..تجابهنا المعارك المفتعلة ، من شاكلة ، ليه امسودان دون السودان.. ومالها حوة الزغاوية..!!!!
شفتي نحن ورا قدر شنو..!!!!!!!!!!!!!
ليك يا صديقتي ، وبقية سمار الصفا (بنات واولاد) ممن يقرأنا بصدق..نكتب...ونكتب..!!
كتر خيرك يا بسمات..
كبر __________________
* Zen and the Art of Motorcycle Maintenance: An Inquiry into Values by: Robert M. Pirsig
Post: #129 Title: Re: امســـودان: عن اناقة الغيم والقونقليز وال Author: Kabar Date: 09-30-2015, 09:35 AM Parent: #128
ول ابا رحمه عجك..حبابك يا صديقي
كل سنة وانت طيب ، وعيد الحول ما يغضب زول..
اهلك ديل يا ول ابا عندهم هوايل عجيبة ياااااااااااااااااااخ..!
وصلتني قبل ايام هدية لطيفة وهي وعبارة عن ديوان شعر..والمحنة مش في الشعر وجمالو...لكن المحنة في قريبك/قريبي الكاتب الشعر..وهو من مواليد كجيرة..!! شاعر (ح اتكلم عنو باستفاضة في خيط قادم)..ساهم في تشكيل وجداننا ووجدان كتير من اهالي امسودان ، ومن عجب ما كنا جايبين ليهو خبر..!!!
بالنسبة للتأثرات المتبادلة ، فهذا الحزام يشغلني ولسنوات عديدة..من جيبوتي لغاية الصحراء الغربية والسنغال ، مرورا بمالي والنيجر والسنغال و بوركينا فاسو..امسودان ، اثيوبيا ، الصومال..الخ! مرة يا رحمه ، كنت بتفرج لي في مادة غنائية من تشاد ، وناس تشاد طبعا بيحبوا الفرنسي شديد خلاس..اها كاتبين العنوان (رقصة المسيرية رووج..!!!).. وانا اشيل واستشير في البنيات (لأنهن ماخدات كورسات فرنسي وكده).. اها الروج طلع (رقصة المسيرية الحــُمر)..!!!
نفس الملامح يا صديقي ، اللبس ، الريتم ، حوار الرقص..!!!
التأثرات موجودة..وناس غرب افريقيا بيستمتعوا بمزيكا الليجند محمد عثمان وردي لأسباب قد لا تعجبنا نحن ناس امسودان ، فوردي عندهم بقايا كوش..والشغلانة دي حتى ناس جاميكا في الكاريبي مفتنونين بيها..!!!
اهديك هذا العمل...وهو رقصة اهلك المسيرية في تشاد..النقارة قد يكون ريتمها غريب عليك شوية..لكن لو دققت السمع ممكن تلقى العلاقة بينها وبين نقارة (ام بقو) في غرب كردفان..!
المهم يا صديقي ، طريقة المشاط ، ده ياهو مشاط حبوباتنا زمان (تلاتة فرادل: قرنين وفردل وراني)..بالنسبة للنساء ، اما الرجال فكانت شعراية (فردل) واحد طويل يتدلي على الأكتاف من خلف (زي حكاية الهنود الحمر في نورث امريكا)..!!!
المنــُخر عديلة يا ول ابا ، والناس هناك لسع مع عرفت مخترعات الحداثة بتاعة الباروكة وما ادراك ما الباروكة (شعر طبيعي ، لله ورسولو..!!)..
التوب على الجنبة ، ووطريقة لبس التوب دي بالتحدد ، اهلنا بيسموها (ام شقيق) وهي تشبه كثيرا لفة اللآوا بتاع اهلنا الشلك (الله يطراهم بالخير)..!!
اخر ملاحظة: في غرب كردفان ، بيكون المغني المصاحب للنقارة رجل ، وطريقة الشعر دي بنسميها الجرداق ، اما عند اهلنا في تشاد ، فبتكون المغنية امرأة (حكامة)..!!
والحكامة هنا ، للطرافة ، لسع منتظرة دكتور خليل..!!!!!
سلام لأخونا احمد حسين ادم (بتاع العدل والمساواة).. سلام لأخونا محمد بحر حمدين (بتاع العدل والمساواة)..
كلوة..!
دنيا فرندقس ، والزمان درفيس ، دردقي بشيش..!!!!!!! او كما قال بعض اهلنا..طبيعة الدنيا زي الموج ، تجيب وتودي ، ما تهتموا للأيام ،ظروف وبتعدي.. (وهذا لا يعني اتفاقنا مع فكرة ناس العدل والمساواة..!!!!!!)
المهم ، على قول ول ابا تبارك..!!!
كبر
Post: #130 Title: Re: امســـودان: عن اناقة الغيم والقونقليز وال Author: Kabar Date: 09-30-2015, 09:39 AM Parent: #129
صديقي ، كابتن خالد الجزولي..حبابك
كل سنة وانت طيب يا خالد..
كتر خيرك على المرور هنا..
كل الأمنيات الطيبات ليك وللأسرة..
سعيد ان يكون بيننا صديق مشترك (طبعا اضافة على صديقنا الجميل دكتور عبد الباقي ، الله يطراهو بالخير)..
وعبرك التحية لصديقنا محمد عبد الله حرسم..!
ودمت طيبا يا خالد..
كبر
Post: #131 Title: Re: امســـودان: عن اناقة الغيم والقونقليز وال Author: Kabar Date: 09-30-2015, 09:41 AM Parent: #130
صديقي واستاذي احمد الأمين..حبابك يا ول ابا
كل سنة وانت طيب..
كتر خيرك على المرور هنا..
وسعيد لهذه الذكريات الطيبات ، فامثال بليا ، يا صديقي ، بالرغم من ضخامة تجربته ، لازالت التجربة مجرد خواطر يحكيها الأصفياء (طبعا بالتأكيد هناك بعض الأفلام الوثائقية عنه ونشكر من قام بها)..!
هو رجل طيب ونقي لحد مدهش للغاية..وليهو اهتمامات بيعرفها براهو..فهو لا زال يبحث عن البروف عمر هرون الخليفة ، وليهو بعض الصور التذكارية معه..!
تجربته الفنية ، حاجة كبيرة للغاية..ومحتاجة بحث وتنقيب...ونحن نعرف عنها لماما..منها توظيفه لخامة القرع التي خرجت به الى مراقي العالمية..فهو الكائن الوحيد الذي وظف ، بوعي كامل ، خامة القرع كحقل للتشكيل والتجريب والفن الجميل..!!
اقارب هذه الفكرة ، ببعض من اعمال المزيكا في مالي ، حيث ان خامة القرع هناك توظف كجزء من المشروع الموسيقي لغالبية فناني وفنانات مالي..!!
المدهش يا احمد ، بليا ، هو نفسه بنفس الملامح الشفتها انت قبال كذا و تلاتين سنة..و كنت بشاغلو وبقول ليهو: كويس انو الواحد يغيب من البلد لعشرات السنين ، ويرجع يلقي ليهو زول بيعرفو..بنفس الملامح ذاتا..!!
عندو عصاية ، في حد ذاتها لوحة ، محتاجة تفاكير كتيرة خلاص..و من بهاءها وجمالها..ما قدرنا نسألو عنها..!!!
ان شاء الله في رحلة قادمة نصل الفولة ، كجيرة ، بابنوسة ، ودينقا..!!..زي ما بيقولوا اهلنا: العين بصيرة..!!!!
كتر خيرك يا احمد..
كبر
Post: #132 Title: Re: امســـودان: عن اناقة الغيم والقونقليز وال Author: Kabar Date: 09-30-2015, 10:12 AM Parent: #131
الزمن ممحوق شديد خلاس..ويبدو حصتنا هنا شارفت على النهاية..لغاية معاودة باقي الحكي..
بعد اذن ، قارئات وقراء هذا الخيط..
اهداء خاص ، لا علاقة ليهو بالخيط وفكرتو ، اللهم الإ فلسفة جماليات المكان والمعنى..!
اهداء الى الشباب..شهاب كرار..عبد الرحمن عزاز..ابكر ادم..!
فالمعنى الأكبر لا يموت ،لا يغيب..لا يسجن ..ولا يفصل حتى..سيظل هو هو..حاضر..وهل الحضور شيئا غير المعني الذي لا يموت..!!
مسجد عمره يفوق الألف وخمسمئة سنة ، في ردهاته يرتل القرآن ، وفي عرصاته تصدح تراينم الجيتارات الحنينة وهي تؤدي صلواتها الخاصة..ومافيش حد بيحرد ولا يقول بغم..!!
نفس الهيجان ، الذي ينتاب الراقصات والراقصين ، نفسه هو الذي ينتاب الدروايش...فهكذا كانت الثقافات الأصيلة وستظل.. متسامحة..واسعة تتسع للفكرة والفكرة الأخرى..!!!
المعنى لا يموت..سيظل هو هو..!!
كبر
Post: #133 Title: Re: امســـودان: عن اناقة الغيم والقونقليز وال Author: محمد عبد الله حرسم Date: 09-30-2015, 10:19 AM Parent: #132
Post: #134 Title: Re: امســـودان: عن اناقة الغيم والقونقليز وال Author: محمد عبد الله حرسم Date: 09-30-2015, 10:27 AM Parent: #133
ان ترى الاشياء كما هى انك ترى الحقيقة بام عينك ان ترى خيالك وما (حشوو( به عينك ووعيك وعقلك بالالغام وب كم هائل من الاحباطات هو انهم يريدون ان يجعلوك ترى ما يرون لكنك حقيقة ترى ما تراه لا ما يعتقدونه ولا ما يصورونه ان الحياة اجمل بكثير مما يظنون حينما نراه كما يجب ولا نراه كما يجب الا من خلال تصوير من خلال كاميرا عيون وقلوب المحبين ان الثقافة شىء ملىء بالحياة لا بدفن الرؤوس وسط غابات من المعلومات فى العقول ان حركة المعلومة الصحيحة هى من اقدام تمشى الى الحقل والى السوق تضحك وتغنى وتسمع الدانات ولا تعبأ وترى الجمال تحبه وتفتش عن فروقات بالكاد تراها انهم سعداء بمعيشتهم ن العيون البعيدة هى التى تصور الاشياء كما ترغب لا كما هى
الصورة فى المرآة لا تبدو كما هى فى الواقع
شكرا ول ابا كبر
شكرا الحبيب خالد الجزولى
شكرا بت ابا اميرة السيد بسمات
سعيد انى هنا بينكم
Post: #135 Title: Re: امســـودان: عن اناقة الغيم والقونقليز وال Author: Kabar Date: 09-30-2015, 10:31 AM Parent: #133
(16)
فكرة العباية..!!
لاحظت كتير من نساء امسودان ، بليبسن عبايات..وده مافيهو مشكلة بالنسبة لي ، لأنو الفكرة عندي هي خيارات شخصية.. تلبس عباية ، تلبس جلابية.. مش مهم..ولكن..!
بنياتي ، الآنسات (شهد وشروق) ، برضك دخلن الموجة العامة..واختارن يلبسن عبايات لبعض الوقت.. بعد داك فرنبن شوية..الحيكومة (امهن) كانت ممتعضة شديد خلاص من حكاية البنات ما يلبسن عبايات..و قلت ليها : خليهن يلبسن تياب (لاحظ ديل دوبك طفلات ، واحدة خمسطاشر سنة والتانية تلاطاشر سنة..!!).. الحيكومة قالت: التياب غالية..!!!!!
طبعا ، لأني في اجازة ، وفاضي وما عندي موضوع ، فقلت ادير حوار مع الشابات ديل..
فكرتهن انو فعلا العباية..مناسبة ..! Convience لكن عندهن بعض التحفظات..!
الإتنين كانن متحفظات على حكاية اللون الأسود..لأنو كل العبايات في امسودان لونهن اسود وبس..!
في سري قلت يا ساتر..ان شاء الله ناس بشاشا ما يسمعوا بالنقة دي..!!
قلت ليهن: مالو اللون الأسود ؟..وكدت أن اجوعر بخطبة عصماء من شاكلة ( لولا سواد الليل لما طلعت الشمس..!!)..
وسألتهن: مالو اللون الأسود . .؟..
شروق قالت لي:
It is a matter of science dude..
قلت ليها: سينس في عينك يا بت اللذينا.. السينس علاقتو شنو بالعباية ولونها؟..
قامت شهد قالت لي (بالإنجليزي طبعا): البلد مدارية ، وتقع في خط الإستواء ، اللون الأسود والشمش ساطعة طوالي ، اللون الأسود ، معروف علميا ، انو بيمتص اشعة الشمس ، وبيزيد الحرارة على الجسم..!!!!!..
يعني كون لون العباية اسود ، فده علميا وصحيا فيهو مليون تحفظ..!!
قطعتها في حناني..و سكت..!
النقاش ده كلفني ، اراجع واعيد..خصوصا كتابات ونقاشات فكرية وفلسفية ، كنت مؤمن بيها ، واحتمال لغاية الآن..!!
الآنسة شهد ، وعشان تكمل لي الكلام للأخر.. ذكرت ملاحظة عجيبة خلاص.. وقالت لي: ليه الرجال في امسودان بيلبسوا جلالايب ، عراريق لونها ابيض..؟..
ولأن الملاحظة ، فهمتها انها كمين ابن كلب وستين كلب ، فعملت نايم ، وقلت ليها: تفتكري ليه؟..
طبعا انسب حاجة انك تزنق ليك زول/ة ترجع ليهو بضاعتو بتاعة السؤال ، وهو/هي مخير بعد داك يشوف ليهو مخارجة..!
ولأن البنية كندية ، وكندا فيها بلاوي اسكت ساكت خليها..!!
قالت لي (بالإنجليزي ، طبعا): الثقافة السايدة في امسودان ثقافة ذكورية بالدرجة الأولى ، الرجال هنا فيهم انانية وحب ذات..!
قاطعتها ، وانا اقول: انانية في عينك..!
واصلت: العنصرية تجاه النسوان ، بتظهر في انو الراجل في امسودان ، بيلبس هدوم لونها ابيض ، يعني عارف انو البلد مدارية ، واللون الأبيض بيعكس اشعة الشمش ، لكن في نفس الوكت ، بيفرض على المرأة انها تلبس عباية لونها اسود..!!
قاطعتها ، وانا اقول: ياخي يمكن الحكاية وما فيها انو واحد تاجر اسمارت..جاب عبايات لونها اسود وداير يخارجها في السوق..!
بت اللذينا قالت لي: مش انت الكنت بتقول شعر في تمجيد اللون الأسود ؟..
طبعا يا جماعة انا لا قلت شعر ولا يحزنون ، لكن ، ذات مرة من المرارمير على قول استاذنا الشاعر دكتور سيد احمد الحردلو ،و تضامنا مع الحيكومة (المدام ، والله انا ما قاعد اهرش من الزولة دي..!!)..
مرة قلت للبنيات انو في شاعر زمان كان بيمجد اللون الأسود في العباية وقال(قل للمليحة في الخمار الأسود ، ماذا فعلت بقلب راهب متبتل متعبد..!!)..
قطعتها في حناني للمرة المليون ذاتو ، وعملت نايم..!!
كبر
Post: #136 Title: Re: امســـودان: عن اناقة الغيم والقونقليز وال Author: Kabar Date: 09-30-2015, 10:36 AM Parent: #135
(17)
فكرة العباية السوداء بالتحديد ، وحوارات البنيات عنها ، مرقتني من امسودان ونيلها وغاباتها وصحراءها وجبالها ومعافرة ناسها ودواسهم والدموم السايبة بلا معنى ، والأهم اجازتي القصيرة ، وودتني الى غاية ليبيا..!! اي والله ليبيا الواحدة دي..وعلى قول البقاري (الله يدرى بحالها يااااااااخ)..!
في كل تجربتي البسيطة في الدنيا الدنية دي ، كتر خير ليبيا اهدتني نفرين..ما بقدر اتجاوزهم تب.. الأولاني الروائي العظيم ابراهيم الكوني ، والثاني ، المعلق الثقافي/الفلسفي الصادق النيهوم..!!
وانا بتناقش مع البينات في حكاية العباية ولونها الأسود (ياخي العباية ان شاء الله تطير ذاتو..!)..اتذكرت مقال للصادق النيهوم ، وكان منشور في مجلة روز اليوسف..وكان بيتحدث عن فكرة البرقع ، و (يضربن بخمرهن)..وليه اللون اسود بالتحديد..!! في ذاك المقال (فتشت المجلة في اضابيري الخاصة ، وما عترت عليها ، لكنها قاعدة وموجودة)..النيهوم ذهب الى انو حكاية لون العباية الأسود ده اصلا عادة قديمة قبال الإسلام ذاتو..وكتر خير البنيات خلوني اخش الموود العجيب ده.. فالنيهوم عندو حاجات كتيرة ومهمة للغاية ، وفيها تأسيس لرؤية مغايرة تماما لواقع الرؤى الفلسفية للناس البتقرا بالعربي..ورجعت واعدت قراية كتاب مهم ليهو اسمو ( الحديث عن المرأة الديانات)..وهو سفر قاعد استغرب ليه الناس ما قاعدة تعتب عليهو..خصوصا اخواتنا وصديقاتنا ناس الجندر وكده..!!.. فكتابة النيهوم هي كتابة متجاوزة لعصرها وزمانها ، تحديدا فيما يسمى في عالم اليوم بتفسير علاقات الجندر..!!
في الكتاب المذكور.. الرجل ، كتر خيرو ، راجع الشغلانة على مدار تاريخ يقارب الثلاثة الف سنة..والأدهي ، انو بوضح لينا كقراء ، ان كثير من الحاجات السايدة في ثقافاتنا..هي تقاليد وعادات، ليها الآف السنين (يعني قبال ظهور الإسلام ذاتو..!!!)..فهو رصد ، و بالإثبات ، انو عادات مثل المهر ، ولاية الأب ، عقوبة الرجم (خاصة في حق النساء) ، فكرة الإحتفال بليلة الزفاف (فض البكارة) ، عملية الوشم (القامت ظهرت مؤخر في مظهر الميك اب واحمر الشفاه) ، تغطية وجه المرأة (البرقع) ، فكرة سجن المرأة (سواءا في حوش نسوان ، او عباية أو برقع..الخ)..كل هذه الأشياء هي عادات قديمة ووافدة على النص القرآني في ذات نفسو..!!! وألأدهى والأمر ، انو الثقافة السايدة ، ثقافة الرجل على قول صديقتنا شهد ، هي التي تحرص على استمرار هذه العادات العجيبة (طبعا النيهوم سماها عادات قبيحة..!!!)..
حسيت بالحزن ، مش عشان اتذكرت كتابة فيلسوف ومعلق ثقافي مثل الصادق النيهوم ، وانما من باب كل يبكي ليلاه..!
مالو القطن يا اخوانا؟.. يعني حكومة امسودان ما لقت ليها شغلة غير توقف مشروع الجزيرة؟..ياخي شغلوهو ، خلوهو ينتج قطن ، وسوا العبايات لونها ابيض ، زي الفردة بتاعة حبوباتنا ديك..!! فيها حاجة يعني؟.. خلوا النسوان يلبسن ابيض ، تراث و تقاليد ، والأهم علميا وصحيا الشغلانة دي مفيدة وبتناسب طقسنا القسمو لينا ربنا ، وخلوا المنتج الوطني يلقى ليهو قرش قرشين..يعني عشان ناس الجبهة الإسلامية يقنعونا باسلامهم لازم يستوردوا عبايات حرير سوداء من ايران او السعودية أو الأمارات؟..
كبر
Post: #137 Title: Re: امســـودان: عن اناقة الغيم والقونقليز وال Author: أبوبكر عباس Date: 09-30-2015, 11:20 AM Parent: #136
هسع يا كبر، لو ختفتا رجلك وسقت الآنسة شهد وديتا الثورة حضرت ليها جلسة انشاد للجمهوريين، كانت شافت التوب الابيض بتاع الجمهوريات ممزوج مع جلاليبم البيضا، وعلي الأقل تشوف النسخة المتحضرة من الاسلام الخالية من الجندر والجندرية، ويكون ليها باك أب في المستقبل لو يوم في كندا تاورها جن الهوية الثقافية هناك
كلما اشوف تماثيل الغربيين في مدنهم، أتخيل تمثال أبيض كامل في مدخل أم درمان للاستاذ متلفح بالتوب الدبلان وجمبو اخلاص همد بتنشد ولابسه توبها الأبيض الناصع يا أخي، فكرة تمثال زي دا هل ممكن تقل لتمثال المسيح ومعاهو مريمين، امو والمجدلية؟؟
سلام للعسل وأبو العسل
Post: #138 Title: Re: امســـودان: عن اناقة الغيم والقونقليز وال Author: عمر مصطفى مضوي Date: 09-30-2015, 12:13 PM Parent: #137
اخونا وحبيبنا كبر حمد لله على السلامة ،،، دايما ما ا قول إنو الوطن منطقة ما في خيال أى زول واي واحد وحسن ظنو وخيالو في وطنو ،، اعجبني والله سردك وعشقك لهذا التراب النضيف الوطن البكر الذي شوهته الايدي الأثمة ،، ودائما ما اقول ان هناك مسافة شاسعة بين السياسي والانساني في هذا الوطن المكلوم . المدن السودانية انهار من المودة والعافية والتسامح عكس كل مدن الدنيا ،،،، والدلنج مدينة رسخت كثيرا في الذاكرة ، عثمان حياتي عليه رحمة الله من الناس الشفيفين القلائل الذين مروا على هذه الدنيا ، عمل معلما بالدلنج الثانوية ولانه كان رهيفا اميرا ومحبوبا في البلد تم نقله دون ان يعلم لمسقط راسه لم أرى حزنا على مدينة فارقها احد كما رايت حزن عثمان حياتي على فراق الدلنج وظل يذكرها ويتغنى بها حتى فارق الفانية ،،،التحية لكل التفاصيل الجميلة والحميمة في بلادي ،،ولك ايضا
Post: #139 Title: Re: امســـودان: عن اناقة الغيم والقونقليز وال Author: عمر مصطفى مضوي Date: 09-30-2015, 12:13 PM Parent: #137
اخونا وحبيبنا كبر حمد لله على السلامة ،،، دايما ما ا قول إنو الوطن منطقة ما في خيال أى زول واي واحد وحسن ظنو وخيالو في وطنو ،، اعجبني والله سردك وعشقك لهذا التراب النضيف الوطن البكر الذي شوهته الايدي الأثمة ،، ودائما ما اقول ان هناك مسافة شاسعة بين السياسي والانساني في هذا الوطن المكلوم . المدن السودانية انهار من المودة والعافية والتسامح عكس كل مدن الدنيا ،،،، والدلنج مدينة رسخت كثيرا في الذاكرة ، عثمان حياتي عليه رحمة الله من الناس الشفيفين القلائل الذين مروا على هذه الدنيا ، عمل معلما بالدلنج الثانوية ولانه كان رهيفا اميرا ومحبوبا في البلد تم نقله دون ان يعلم لمسقط راسه لم أرى حزنا على مدينة فارقها احد كما رايت حزن عثمان حياتي على فراق الدلنج وظل يذكرها ويتغنى بها حتى فارق الفانية ،،،التحية لكل التفاصيل الجميلة والحميمة في بلادي ،،ولك ايضا
Post: #140 Title: Re: امســـودان: عن اناقة الغيم والقونقليز وال Author: Kabar Date: 10-01-2015, 08:38 AM Parent: #139
ول ابا حرسم..حبابك يا صديقي
كل سنة وانت طيب..
كتر خيرك على المرور ..
الحقيقة يا صديقي صعب قبضها من تلابيبها ، والإنسان دوما يلبسها ما يشاء من تصوراته الخاصة..
هذه الزيارة ، خلافا لزيارتي السابقة ، انها كانت بلا اجندة..حاولت قدر المستطاع ان اتحدى نفسي وامسح اجندتي الخاصة..من شاكلة موقف تجاه السلطة ، وتجاه السياسة ..وتجاه الإقتصاد وتجاه الحرب في ذات نفسها ، والمدهش..علقت الزيارة بذاكرتي لدرجة انها اجبرتني ان اكتب هذه الخواطر..
مسافة بعيدة يا صديقي بين ما نقرأ ونحشو به اذهاننا ، وبين ما يمشي في الواقع.. فالواقع هناك تجاوز حكاية اجترار معارف الأخرين التي قامت على تجاربهم الثقافية والإجتماعية الخاصة ..والتي نتلقفها نحن ونحاول تلبيسها عنوة على واقعنا..!
انسان جنوب كردفان ، انسان مبدع وخلاق..ويعي تماما انه كان تحت ظل الحرب لقرابة الأربعين سنة (طبعا مبالغة ولكنه واقع ..اتنين وتلاتين سنة بالتحديد تخللتها سنوات سلام نيفاشا الخمسة.. يعني سبع و عشرين سنة حرب..!!)..ولكنه يملك كيف يصنع جماله الخاص وعلاقته مع الأشياء..
رغم زعيق الرصاص والدانات..فهم ، هناك ، يا صديقي يكتبون الحياة..يصنعون الحياة..والأهم يخلقون التصالح مع الذات والأشياء..و منها يبتدعون معنى للثقافة لم تعرفه الكتب والنظريات بعد..!
المجد لهم..!
كتر خيرك..
كبر
Post: #141 Title: Re: امســـودان: عن اناقة الغيم والقونقليز وال Author: Kabar Date: 10-01-2015, 08:40 AM Parent: #140
ول ابا عمر مضوي..حبابك يا صديقي
كل سنة وانت طيب..
والتحية عبرك لروح الأستاذ عثمان.. كتر خيرك يا عمر..والتراب يا صديقي اقدم من الحكومات العابرة والأنظمة..فهذه عوارض تأتي ثم تمضى ..ويظل التراب هو التراب..!
حسن الظن بالأشياء مهم للغاية يا صاحب..والإنساني في امسودان خارج حسابات النخبة تماما..لأنو دي قدر قدرتها في قراية الحاجات دايما مسكونة بهاجس السياسة..و سنينا ضاعت هدرا وطاقات كتيرة ضاعت هدرا..لا سياسة مغايرة ومفارقة انتجنا ، ولا العندنا طورناها..!
تلك المدن يا صاحب فيها حاجات مدهشة للغاية..وانسانها بيعرف كيف يبدع الحاجات..!
قلتها لكثير من اصدقائي وصديقاتي.. انو امسودان في عيون الآخرين (الآخر الحضاري والثقافي) حاجة مختلفة ومهمة وليها شأن..ما عدا نحن الما قادرين نشوف كويس..ليه؟..لأنو مسكونين بالسياسي اكتر من الحضاري والثقافي..!
كتر خيرك يا عمر..
كبر
Post: #142 Title: Re: امســـودان: عن اناقة الغيم والقونقليز وال Author: Kabar Date: 10-01-2015, 08:43 AM Parent: #141
(18)
ول ابا ابوبكر عباس..حبابك يا صديقي.. كل سنة وانت طيب.. كتر خيرك على المرور..
وزي ما بيقولوا اهلك البقارة (ما تشكر لي الراكوبة في الخريف)..!!
اتقاطعت مع فكرة الجمهوريين في امسودان ، بطريقة عجيبة خلاص..!
زمان يا صديقي الواحد كان بكل حسن نية بيدافع عن ملتين في امسودان:الشيوعيين والجمهورين..ودايما بنشيل وش القباحة مع الجماهير عشان نقول للناس ..ديل شباب كويسين وعندهم حاجات بتنفع..لكن..! تاني مافي طريقة الواحد يتضامن تضامن ساكت..وربنا يعدل طريقهم..!
حكاية اللبس الأبيض..فعلا الشابات شافنو هناك..لكن لخبطت ليهن الفي راسهن..فزمان مفتكرات انو حكاية التوب الأبيض دي ماركة مسجلة للأخوات الجمهوريات..اها قامن شافن ليك نسوان كتار بتياب بيضا..طوالي افتكرهن جمهوريات..ونحن نشيل ونشرح انو التوب الأبيض هنا هو الزي الرسمي للموظفات (طبعا الغالبية مدرسات وكده)..!
بعد داك القصة اتخلبطت اكتر بتساؤلات من شاكلة.. هل الجمهوريين ديل.. Religious Cult Or Religious Sect
طبعا نحن زغنا..العاصرنا شنو على التفسير..خلي الجمهوريين يفسروا ويشرحوا..!
الموقف الطريف..في الدلنج..اها الجماعة طوالي شابكننا ليك ياخي ما عندك صور لناسكم المعاكم في كالقري..؟..العالم مفتكرة انو لمن تمشي كالقري الناس بتقوم ليها قرون ولا اضناب ولا شنو ما عارف..!
قريبتي واحدة ..اتكيفت لمن شافت ليها زولة في الصورة بتوب ابيض في نص مجموعة من السودانيات في مناسبة (كانت هي اختنا الجمهورية بثينة تروس)..اها طوالي خشت شمال: الموظفات عندكم برضو بيلبسن تياب بيضا؟..قلت ليها: يفتح اهل ..دي اختنا واحدة جمهورية..!
قريبتي قالت لي: والجمهورين ديل شنو؟ قبيلة ولا خشم بيت؟..
والله صحي يا ابوبكر..!
واحترت اقول ليها شنو بالضبط..!
قطعتها في حناني واتناسيت زعلي القديم شوية..و بديت اشرح ليها..!
قالت لي : يطرشني..عمري ما سمعت بيهم (طبعا زولة لمن كتلة محمود محمد طه كان دوبك عمرها تلاتة سنين..!!!)..
ثم واصلت..اها الناس ديل سنة ولا شيعة؟..
زهجت من كتر السؤالات..و قلت ليها يا خي خلي نتصل واسأليهم..!!
فكرة صورة الإسلام المتحضر..هي تيهؤات ساكت يا قريبي..فاول ما تقول (اسلام) فهنا بتنتفي الحساسية الجندرية تماما..لا بينفع جمهوريين ولا انصار سنة ولا داعش ولا حشاشين ولا اسماعليين ولا بهائيين..كلهم ام الكــــــلــــب بعشوم..!
كبر
Post: #143 Title: Re: امســـودان: عن اناقة الغيم والقونقليز وال Author: علي عبدالوهاب عثمان Date: 10-01-2015, 09:39 AM Parent: #142
أستاذنا كبر التحية .. متابع الحلقات من البداية .. ولكني أجزم لك أيها الجميل .. أن هذا أمسودان رغم إختلاف الجغرافيا متشابه بل متطابق مع بعضه .. نفس الاخت والام والحبوبة والجد ... إلخ . أقرأ تفاصيل سردك الجميل .. وكأني بين أهلي في اصقاع النوبة في الشمال .. نفس الشخصيات ونفس الرموز وطريقة التفكير .. هؤلاء الانقياء لا يحتاجون إلى نظريات أو أفكار لممارسة حياتهم ( الاقتصادية والاجتماعية وحتى العقدية ) هم أبناء الأرض والبيئة التي من حولهم هم يشكلونها وهي تقوم بتشكيل كل تفاصيل حياتهم .. لديكم جبال وخضرة وأمطار ووديان .. ولدينا نيل ونخيل وسواقي .. ( والأرض هي الأم في الديانة المسيحية ) ( لا شيعة ولا سنة ولا جمهوري ولا ديمقراطي ولا ديكتاتوري ... الخ ) هؤلاء هم من يستطيعون الابتكار وإيجاد الحلول لكل معضلات حياتهم بكل حكمة وروية .. بدون تجاوز للحدود الانسانية وتحت ومظلة ( العيب ) الحاكم الأوحد لسلوكهم ..
تحياتي لهؤلاء الانقياء ..
هنالك حيث الحكمة .. فنحن عندما نشعر بكدر الحياة وتعقيداتها .. فقط تذكرة إلى الخرطوم ومن المطار إلى دنقلا حيث نولد من جديد .. وتنعيد برمجة الذات ونعيد تعبئة الشرائح الفارغة بكل قيم العزة والانتماء ..
تحياتي .. واصل مع مودتي بلا حدود ..
Post: #144 Title: Re: امســـودان: عن اناقة الغيم والقونقليز وال Author: Kabar Date: 10-02-2015, 11:21 AM Parent: #143
ول ابا علي عبد الوهاب..حبابك يا صديقي كل سنة وانت طيب.. كتر خيرك على المرور ..والمفاكرة..
زمان يا علي.. المرحوم اروك طون اروك..لمن رجع من الغابة.. عملوا معاهو حوار في اذاعة هنا امدرمان.. اها سألوهو: هل قاعدين تسمعوا غنوا في الغابة؟.. ضحك اروك ضحكة عجيبة وقال: بالحيل..وانا فناني المفضل هو صلاح ابن البادية..واكاد اكون حافظ معظم اغنياتو..!!! طبعا ناس البندر ختوا الخمسة في الإتنين واندهشوا..طيب الزول ده متمرد في شان شنو؟.. فاتت عليهم حتة صغيرة المحتوى وكبيرة الدلالة..وهي حتة القدرة على التسامح..!
انسان اهلنا في جنوب كردفان/جبال النوبة.. انسان متسامح بصورة مدهشة للغاية..واهديك العمل التالي البيوضح جزء من التسامح ده..!
فرقة اسكو لقوري..كتبنا عنها لمن كانت بتغني في حواري امبدة الحارة اربعطاشر..والحمد لله اليوم بقت بتغني في مهرجانات محضورة (لاحظ لا شلنا بندقية ولا قلنا عييك ولا عاااااااك ذاتو)..
الكونسيرت ده يا علي ، ناس فرقة اسكو لقوري..بدوا باغنيات عظيمة..تحديدا اول اغنية هي غنية عن امنا الجميلة الليجند المناضلة مندي بت السلطان عجبنا (من اهلنا النوبة النمانج/ يعني من الدلنج)..ثم اغنيات بلغات مختلفة من جبال النوبة..ولم ينسى ناس الفرقة فكرة التسامح..ومراعاة لشعور جمهورهم قاموا باداء واحدة من اجمل اغنيات الليجند ابراهيم عوض..!
الغريبة يا علي..الفرقة دي في التسعينات كان عمادها فنان عظيم من ناس جبال النوبة اسمو قساس كليبو..وهو اعمي..والأطرف (لو متذكر حكاية اروك طون اروك) انو اول شريط كاسيت لقساس ده اشرف عليهو استاذنا الفنان صلاح بن البادية..شفت امسودان التحت دي الماكنيزم بتاعها مدهش كيف؟..
قساس كنا بنحضر حفلاتو ..بنفس الفرقة القدامك دي في ليالي امبدة..وكنا بنشاغلو وبنقول ليهويا اونكوي غناك قديم بيجيب الحاجات الكبار..وكان بيضحك وبيقول: يا عيالي الشدر الكبار فيهو الصمغ..!
اهديك صديقاتنا واصدقاءنا ناس فرقة اسكو لقوري..حصل يا علي سمعت اغاني ابراهيم عوض بالربابة؟..
لو لقيت فرقة تابعة اغنيات الكونسيرت ده وهي مرقمة..في واحدة من الأعمال هي رقصة الكرنق وشوف اشكال الناس البترقص مع الراقصين بتاعين الفرقة..!!
اهو ده امسودان البنعرفو يا صديقي ، ولن نرضى عنه بديلا تب..!!
كتر خيرك..
كبر
Post: #145 Title: Re: امســـودان: عن اناقة الغيم والقونقليز وال Author: أبوبكر عباس Date: 10-02-2015, 01:40 PM Parent: #144
Quote: هل الجمهوريين ديل.. Religious Cult Or Religious Sect
هن (بناتك) يبرن ويستبرن من يكونن سألنك السؤال دا!! ولو حصل وسألن؛ الإجابة بسيطة: تقول ليهن: دول "شيعة" الأستاذ وكلمة "شيعة" بتغطي Cult و Sect
نرجع للأستاذ: يا أخي، "أمسودان" وأمتشاد، وأم لحدي الأطلسي بهناك وأم لحدي جبال تورا بورا بهناك التانية كل الأمات ديل، ما ولدن ليهن زول بعظمة الأستاذ كلما أتفكر في حال روحي قاعد ألقى إتنين بس سمحوا لي أشوف الدنيا دي بمناظير مختلفة هم كتشنر والأستاذ يا أخي، سطوة الدين دا لو لا مدفع المكسيم والفكرة كان إتحشرنا في "طيز وزّة"
Post: #146 Title: Re: امســـودان: عن اناقة الغيم والقونقليز وال Author: Kabar Date: 10-03-2015, 07:18 AM Parent: #145
ول ابا ابوبكر عباس..حبابك يا صديقي..
البنيات سألن يا ابوبكر..وديل شفع نورث امريكا ..لمن تقعد هنا شوية ح تعرف حاجة وحاجات كمان..!! لا احتاج لتزيف رؤية الناس ..خصوصا لو كانوا من صلبك ياااااااخ..!
باقي نضميك ، على قول صديقنا ول ابا كباشي الصافي ، العديل رأي والأعوج برضك رأي..
وعلى قول خطاب ثقافة البندر..حب الناس مذاهب..
وعلى قول ثقافة ناس الخلا.. القرد في عين امو غزال..!!!
ناس تشاد وتورا بورا..و شنو كده ما عارف.. ما بيلزمهم ولادة ناس الحنك العاضي..!!
والله صحي..!!
اهم حاجة ، أنا ما زعلان يا عمك..فشنو..
Cut the crap
كبر
Post: #147 Title: Re: امســـودان: عن اناقة الغيم والقونقليز وال Author: Kabar Date: 10-03-2015, 07:23 AM Parent: #146
(19)
Quote: قضيت فترة قصيرة ، وهي مدة شهر بالتقريب..ولكن هل هذا يكفي للحكم على الأشياء؟..وهل هي فترة كافية للإحاطة باشياء كثيرة فيها؟..ما الذي افتقدته في امسودان؟..ما الذي اتمنى ان اراه في امسودان؟..ما الذي يضايق في امسودان؟..ما الذي يشرح النفس في امسودان؟
بالطبع هي فترة قصيرة وغير كافية للحكم على الأشياء بصورة دقيقة ومحكمة..ولكنها تظل مجرد تواصل مع الأشياء والناس والمكان بصورة منفردة..
من مشاهداتي القصيرة..افتقدت في امسودان بعض الأشياء..و بالطبع اهمها غياب السلام..وحضور الحرب..ونتائج الحرب الثانوية المصاحبة ليها..الحكومة اصبحت محصورة في الخرطوم فقط..وأي حادث امني بسيط..كسرقة مثلا..او نهب أو أي حادث جنائي ..خصوصا في الأطراف .. فالحيكومة ما عندها شغلة بالحاجات دي..حتى الناس اللابسة زي رسمي (جيش ، بوليس..الخ).. الواحد يهز اكتافو بلا مبالاة..ده غير انو المواطن لو داير حاجاتو تتعالج يدفع ويدفع..
الشفافية اصبحت عملة نادرة في امسودان ، خصوصا فيما يتعلق بالتواصل مع الحيكومة..احد اعمامي كان يناقشني عن فكرة الإستثمار في امسودان (طبعا عندهم تصور انو أي زول في نورث امريكا مفروض يكون حنفولي وكده..)..نصيحتو لي اشوف لي زول غليد في الحكومة وادفع ليهو عشان الأمور تتسهل وتتسلك..والمسألة دي كنت بسأل روحي جاية من وين؟.. فامسودان ما عندها تقاليد مؤسسية وقانون وضبط وربط..والموظف في الحكومة يتعامل كأنه اله صغير..وطوالي ناس الحكومة فاتحين خشومهم ومنتظرين يخمشوا من المواطن.. طبعا فكرت في فكرة رومانسية انو الناس عشان تعالج امر الفساد تقاطع التعامل مع الحكومة..و كان الرد انو مصالحنا ح تتعطل..يعني نحن البنعلم الحكومة وموظفيها الجسارة والتشطر على المواطن..وكيف عامل الحيكومة يفسد ويفسد ويفسد..!
افتقدت اليقين بامسودان ، كوجود حضاري وتأريخي وعندو امكانيات عالية للغاية..و انو الغريب بيعرف امكانيات امسودان اكتر من اهلو.. الناس بقت كائنات كانها تعمل بالريموت كنترول..ما عندها تصور لمستقبل جمعي..كل البتحرص عليهو الناس شغل على المستوى الفردي..!
افتقدت برضك خصلة القراية..زمان لمن تركب ليك وسيلة مواصلة عامة.. بتشوف ناس بتقرا كتب.. جرايد.. مجلات..حتى لمن تكون في البيت ..الحلة..الناس بتتبادل الكتب والمجلات ..يعني ناس حريصة على الإطلاع على معارف اخرى عشان تزيد معارفها وتلقى ليها خبرات جديدة..سألت كم شاب وشابة.. عن اهتمامتهم بالقراءة ونوعية القراية او المجالات التي يفضلون التبحر فيها..وكانت الإجابة نظرات اندهاش من شاكلة يا زول انتا جاي من وين..!!!..ولا ادري السبب.. هل وجود الموبايل الذي سحب البساط من تحت اقدام الراديو والتلفزيون ، برضك وصل يسحب البساط من تحت الكتاب؟..
افتقدت مظهر الثرثرة العامة..خصوصا في السياسية..زمان في اي حتة..ومن طرف بتدور ليك نقاش.. هسع الناس بقت صموتة..وما بتتكلم الإ مع زول بتعرفو..!!..هل هو شيوع ثقافة الخوف؟..هل الناس مقتعنة بالحال وما دايرة تتكلم؟..
شكل المزيكا ، قنوات التلفزيون ..حسيت انها بعيدة للغاية عن خبرات وتجارب امسودان ، او ربما يكون عندنا تصور انو كان مفروض تعمل حاجات معينة..
وبالطبع افتقدت سنين العمر..و شباب اصدقائي وصديقاتي..السنين زحفت علينا جميعا..و الأغرب لسع احساسنا بانو دايرين نتعامل مع بعض بتصوراتنا بتاعة الشباب..و بعضهم بيحرص انو التعامل يكون بنفس الطريقة بتاعة زمان..لأنهم بيفتكروا حاجات محتاجين يعيدوا تذكرها وذكرياتها..!
افتقدت اهلنا ناس الجنوب..!!
افتقدت سنما الدلنج..!!
كبر
Post: #148 Title: Re: امســـودان: عن اناقة الغيم والقونقليز وال Author: Kabar Date: 10-03-2015, 07:26 AM Parent: #147
(20)..
حاجات كتيرة كنت اتمنى ان اراها في امسودان..دولة المؤسسات التي تضبط موظفها قبل ان تضبط مواطنها..احترام القانون..استقرار البلد..الذي يسمح لإنسان امسودان العادي يفكر لحاجات على مستوى عشرة سنوات دون الخوف من تقلبات الأشياء..!
اتمنيت وجود شركات ريسايكل..فالبلد فيها منتجات كتيرة بتتعامل بالبلاستيك ..سواءا كانت قوارير موية.. مشروبات غازية.. صناديق حلويات..الخ..لكن مافيش وعي بفكرة الريسايكل..و للمرة التانية الشكر لناس مدينة الدبيبات في جنوب كردفان.. فهناك ظاهرة اطفال هميمة بتجي موقف البصات وبتسأل الناس عن القوارير الفاضية..وبتلمها..ولو ادارة مدينة الدبيبات محتاجة لتطوير الفكرة.. فمافي مشكلة ممكن نتفاهم معاهم..و نعملها تجربة ممكن كل امسودان تستفيد منها..ان شاء الله العايد يرجع لدعم مشاريع عامة..!!
كنت اتمنى وجود وعي بيئ مواكب مع آفة الإستهلاك التي انتابت امسودان..خصوصا البلاستيك..الزيت الراجع..الموية الراكدة..و بالطبع وساخة العاصمة القومية..وبقية المدن..في الدلنج كنت براقب ناس بيتنا وتصرفاتهم مع القاربش..زوجة شقيقي الأصغر تعبانة تعب شديد خلاص.. فهي المهتمة بالموضوع ده..بتقوم بتلم الحاجات وبعد يومين تلاتة بتحرقها جميعا..ومعاها باقي الأخوات في الحلة..يعني مافي بلدية..بتتولى الأمر ده..والأغرب الناس عندها استعداد تدفع رسوم لو البلدية شافت شغلها.. عشان كده بتمنى وجود صناديق قمامة في أي مدينة في امسودان..!
حاجة كنت اتمناها في امسودان ، خصوصا في جنوب كردفان.. انو تكون البستنة هي النشاط الأساسي..ومنها نزرع الشاي والبن والموالح (برتكان ، يوسفي ، قريب فروت..تفاح)..صديقي وجاري في الحي ..دكتور حسن صالح فنداما..عميد كلية الزراعة في جامعة الدلنج..عندو رؤية طريفة وخلاقة حول ضرورة استقرار البقارة الرحل ..واتمنى اراها.. فصديقنا حسن بيرى انو لو ناس جنوب كردفان ، خصوصا العرب الرحل.. اتجهوا لفكرة البستنة ..و زراعة محاصيل مثل الشاي والبن والفواكه..ان شاء الله ليمون ساكت.. فالحتة دي ممكن تساعدهم في الإستقرار..وكان بيقول ببساطة.. الزول البيزرع الحاجات بيكون انيق وسمين وصحتو موفورة..بدل التعب والشقاوة في مطاردة البقر صيف وخريف..وايضا اتفقنا في فكرة اخرى هي فكرة المزارع المختلطة.. يعني الراعي ممكن يحافظ على ثقافة الرعي (ودي بتلبي ليهو حاجات ثقافية وروحية..)..وفي نفس الوكت ممكن يكون قوة اقتصادية خلاقة تفيد نفسو وتفيد الإقتصاد العام..!!
دكتور فنداما ، من اهلنا النوبة والي..وزول بيفكر لكل الإنسان هناك..وده الجمال في امسودان..في ناس عندها القدرة تتسامى على الأوهام وكده..التحية لدكتور فنداما..
كبر
Post: #149 Title: Re: امســـودان: عن اناقة الغيم والقونقليز وال Author: Kabar Date: 10-03-2015, 07:28 AM Parent: #148
(21)
حاجات كتيرة بتضايق في امسودان.. الحكومة ثم الحكومة ، قال ثم من ؟..قال الحكومة.. عمال الحكومة..ناس الحيكومة على المستوى الأدني يتصرفون كأنهم الهة صغيرة..طوالي دايرين الناس تدفع ليهم عشان امورهم تمشي..وبالتأكيد هم شغالين بحكاية الناس على دين ملوكها.. يعني لو الحكاية ما كانت جايطة من فوق ، اكيد الزول التحت ما كان لقي الجسارة..!!
من الحاجات البتضايق في امسودان ، حكاية تعامل الناس التحت مع مكونات تكنولوجيا التواصل.. !! صحيح الموبايل فكرة عبقرية ..واتبنت على اساس دراسة سيكولوجيا الشعب في امسودان..ولكن..!
الموبايل ، تحديدا فكرة التصوير للحاجات.. الشغلانة دي يا ناس امسودان ، فلسفتها الأساسية انها تكون رقابة على انتهاكات الحكومات في افريقيا ، خصوصا انتهاكات حقوق الإنسان.. عشان كده لمن فكروا يعملوها ويدربوا الناس على استخدامها..كان الغرض ان يكون استخدامها بصورة مضبوطة.. بمعنى ادق.. لمن تشوف ليك حادثة انتهاك حقوق انسان..وتقوم تصورها وتنشرها للعامة.. فالفكرة بتخدم غرضين متلازمين: اول بالتبادي تنبه الحيكومة انو في حاجة غــــلط حصلت في مكان ما..و بعد داك هي مخيرة كيف تتعامل..تاني التبادي.. انو توري الحيكومة (كمواطن) انك اكبر منها وممكن عادي تنشر الحادثة على اكبر نطاق ممكن وتكشف فضايح الحيكومة..!!..دي فكرة النشر التي نتصورها ونعرفها..! في امسودان ، الفكرة مختلفة شديد خلاص..ومافي وعي للنشر.. الأهم مافي مراعاة لحرمات الناس وخصوصيتهم..!
واحد من الحاجات الشفتها متداولة في الواتساب مثلا.. نشر لحادث حركة في طريق الخرتوم مدني.. والمتوفي في الحادث ، كان رجل شرطة (برتبة فريق ، تقريبا كان رئيس شرطة الأحتياطي المركزي)..طريقة نشر صور الحادث كان فيها حاجات ما تفهمها بالضبط المغزى منها شنو بالضبط؟.. يعني شنو تنشر ليك عربية مكسرة ، جثة واقعة ، بشر في اضعف حالاتها الإنسانية (واحدة من بنات المرحوم بتبكي ، واحد من عساكرو بيبكي..!!)..هل هو تشفي في ناس الحيكومة وشماتة عليهم؟.. هل هو عدم وعي بي شنو مفروض اتنشر وشنو لا؟..هل هو عدم وعي بتنكلوجيا النشر والتواصل؟.. ما عرفت الفكرة شنو بالضبط..!..وين القيم السودانية بتاعة انو عدوك ، لو افترضنا ان النشر الفيديو بتعامل بحكاية العدو ، لو كان في اضعف حالتو ، فان القيم السودانية الأصيلة بتفرض عليك انو تعاملو باحترام..؟؟؟!
فيديو تاني ، وبرضك منشور في الواتساب ، لشابة لابسة ليها كمية من الدهب (ياخي لمن حنيت عليها انو كيف تقدر تتحرك بكمية وزن المعادن اللابساها)..الفيديو ده قالوا انو لبت عبد الرحيم محمد حسين ، والغرض منو انو يوضح انها لابسة ليها دهب بقيمة تلاتة وعشرين مليار (طبعا السعر الرسمي تلاتة وعشرين مليون ، لكن ناس امسودان عندهم جن بيعرفوهو براهم.. لمن يكونوا زهجانين من الحيكومة بيلجأوا للمبالغة ، ولمن يكون عندهم غرض بيكونوا واقعيين ، يعني التلاتة وعشرين دي ، لو في مصلحتهم هي تلاثة وعشرين مليون ، ولو ضد مصلحتهم فهي تلاتة وعشرين مليار..!!!)..المدهش مافي زول/ة بيقدر يؤكد ليك ، مما لا يدعي مجالا للشك (على قول سخرية صديقنا المفكر ابكر ادم)..انودي فعلا بت عبد الرحيم محمد حسين..!
صديقنا ، عضو المنبر ، ابوبكر صالح ..ذكر حقيقة طريفة مهمة..انو قام عمل غرفة لأسرتهم في الواتساب وحرص على توجيهها بنشر حاجات بتتعلق بتثقيف الأطفال..والحيكومة تبعنا (المدام) عملت غرفة قبل سنة لأسرتهم.. الغرض من التوظيف هنا.. التواصل وربط الناس ببعضها البعض..ودي الفكرة المهمة في الواتساب.. الناس تكون مربوطة ببعضها البعض (في الدلنج ـ اتكلم معاي واحد قريبي ، راعي ساكت ، قاعد في السعودية.. استخدم الواتساب كتلفون..!!!)..
من الحاجات البتضايق في امسودان ، فكرة انتشار البنقو والمخدرات في امسودان ، خصوصا وسط الشباب والشابات..!!
ما عندنا مشكلة انو الناس تصلح مزاجها ، لكن لمن تبقى ظاهرة منفلتة.. فهنا العتب على الحكومة..ومن حقنا ان نقول عليها هي قاصدة بكامل وعيها وارادتها ان تضيع الشباب ديل عشان تقعد لأطول زمن في السلطة..!! ظاهرة المخدرات لم تعد قاصرة فقط على مجتمعات المدن الكبرى ، وانما وصلت لغاية القرى والحلال والفرقان..والأغرب انو الناس هناك بتقول ليك دي بضاعة الكبار..!!!!
ظاهرة تانية ، هي حكاية عيال وبنات الكبار ، سواءا رضت نخبة الجبهة الإسلامية ام لم ترضى ، فهذه هي اهم واوضح مظاهر الفساد واساءة استخدام السلطة في ابهى تجلياتها..!
فهناك ظاهرة ناس بتستغل السلطة للآخر..وبتعاملوا على اساس انهم ولاد كبار وانهم فوق القانون..!!.. صفقة السكر الجابت مشكلة لناس جمعية حماية المستهلك.. سببها عيال الكبار الجابوا سكر فاسد من البرازيل..!!!..
كبر
Post: #150 Title: Re: امســـودان: عن اناقة الغيم والقونقليز وال Author: محمد عبد الله حرسم Date: 10-03-2015, 07:35 AM Parent: #149
Quote: افتقدت اليقين بامسودان ، كوجود حضاري وتأريخي وعندو امكانيات عالية للغاية..و انو الغريب بيعرف امكانيات امسودان اكتر من اهلو.. الناس بقت كائنات كانها تعمل بالريموت كنترول..ما عندها تصور لمستقبل جمعي..كل البتحرص عليهو الناس شغل على المستوى الفردي..!
ول ابا كبر
ياخى ما فضل كلام يتقال تانى
Post: #151 Title: Re: امســـودان: عن اناقة الغيم والقونقليز وال Author: Kabar Date: 10-03-2015, 07:43 AM Parent: #150
ول ابا حرسم..حبابك يا صديقي كتر خيرك على المرور.. وكتر خيرك على التوقف في النقاط الحارقة/الكاوية/المتساءلة فلسفيا ووجوديا..!
للأسف هي الحقيقة ، كما تراءت لنا ،.. وعلى قول الشاعر تاج السر عباس ( اغالط نفسي في اصرار..!!)
الشباب و الشابات يا صديقي ، رايح ليهم درب حبل اليقين ، ودي مهمة ناس كتيرة خلاس...لكن كيف يكون التواصل ، فهنا المحك/التحدي..!!
كتر خيرك كتير يا صديقي..
كبر
Post: #152 Title: Re: امســـودان: عن اناقة الغيم والقونقليز وال Author: Kabar Date: 10-03-2015, 07:49 AM Parent: #151
(22)
طبعا امسودان التحت ، هي اكتر ما يشرح النفس في امسودان..!
طيبة الناس ، الحرص على الواجب والمجاملة.. الناس بقت لو ما قدرت تصل ، بتضرب تلفون...ومتواصلة مع بعض زي الترتيب..!
ما يشرح النفس في امسودان ، صناعة الإتصالات المتطورة للغاية ، وهي تعتبر اول واهم صناعة راكزة ، مش في امسودان ، وانما افريقيا..!
هناك شوية بنيات تحتية ماشة بصورة مستمرة..التعليم ، كل اقليم بقى عندو على الأقل جامعة ، الشوارع المسفلتة.. بقت تربط اقاليم امسودان ببعضها البعض..كنت زمان باخد يومين عشان اصل الخرطوم من الدلنج.. اليوم الرحلة بتاخد تمانية ساعات فقط..لاحظ دي ممكن تكون رحلة اقتصادية تربط مناطق الإنتاج بمناطق الإستهلاك..!!
ما يشرح النفس..انو صديقاتي وصديقاتي..لسع قاعدين بنفس الأمانة الوجدانية..وبيحرصوا انو يرجعوك لسنوات وسنوات (وهي سنوات الشباب والعنفوان)..!!!
لم اكن اصدق ان اجد بعض من اهل امسودان بتفاعل مع مزيكا مالي...!!!
كبر
Post: #153 Title: Re: امســـودان: عن اناقة الغيم والقونقليز وال Author: Kabar Date: 10-03-2015, 08:54 AM Parent: #152
(23)..
كتر خير جميع الشابات والشباب ..ممن تواصلوا مع هذا الخيط سواءا تفاعل مباشر ، او غير مباشر عبر المتابعة والإندهاش والرغبة في التواصل مع صاحب الخيط..!!! امسودان ، بلد عادي ، فيهو الحاجات السمحة ، وفيهو الحاجات الكعبة ، والأكعب الحيكومة وناسها..!!
تحياتي لشابات وشباب شرطة جوازات مطار الخرتوم..ديل الفئة الوحيدة البتشيل العين من الحيكومة..و يا وزير داخلية امسودان ، عليك الله الناس ديل اصرف ليهم بونص..لله ورسولو!!
في المرة الفاتت ، سنة 2012..كنت داير امارس دوري كمواطن صالح..امشى اقبض عمر البشير..وعمك مرقها في الحج..! المرة دي ، مشيت بنفس الفكرة ، عمك مرقها في الصين..!!! ويمكن الشغلانة كانت لذيذة.. انو صاحبنا عمر البشير اتخارج..!!!
تحياتي للجميع ..و نشوفكم في خيوط قادمة كن الله هو..!
يا عمر البشير ، عليك الله ياخي ، ادي ناس جوازات المطار بونص..ياخي ديل احسن حاجة في امسودان الرسمي ، الباقي اديهم جلدة على ظهورهم.. حرامية ، مرتشيين ، فاسدين..وشنو كده ما عارف..!!
خالص محبتي للجميع ، ماعدا ناس حيكومة امسودان..!!
كبر
Post: #154 Title: Re: امســـودان: عن اناقة الغيم والقونقليز وال Author: Kabar Date: 10-03-2015, 08:59 AM Parent: #153
لكل الناس البتحبك لأنك ذات.. انسان..خوف..حنين ، اشواق..و امينات كتيرة مؤجلة..!
كتر خيرهم ممن جعلوها .زيارة..رحلة/فكرة/خواطر/عذابات/حنين..!
استاذي النبيل عبد الرحمن حامد جمعة (بليا).. استاذي وصديقي سيد منوفل.. صديقي عبد الله محمد عبد الله سلمان..صديقي احمد ابوهم العشا (شكرا يا صاحب على توفير الدابة ، والحنين ، وتوفير اللحظات الممكنة ، لتضع الإنسان امام تجربته الخاصة والإختبار)..صديقي الشاعر الأديب اسماعين زمام ..صديقي دكتور نزار محمد ماشا..اشقائي دكتور معلا النور كبر ، الأستاذ الفنان سليمان النور كبر..ابن عمي الوسيم النبيل .. مهندس خليفة ابكر كبر ، الذي يرى في محمد النور كبر حاجات ، صاحبنا ، كبر ، ذاتو ما عارفها عن نفسو..كتر خيرك..يا خليفة..و انت بتعتقد جزما انو مدينة كالقري مفروض تكون جنة من جنان عدن..ناهيك عن احتمال المزيكا والأنغام والمشاترات..!
عمكم وعمنا وعم الجميع ، الحاج النور كبر و قدرته على اختلاق النكتة والمفارقة واستراق الضحكة النبيلة (ياخي عمك ..عرض علي قايمة عشرين واحدة للعرس ، عشان مفتكر ، بحسن نية انو ناقصني ولد..!!!..احبك يا عم..انت النبل في ذات نفسو ياخي..لكن مافي طريقة عرس تاني..!!!!..عارفك ح تعقد حواجب الدهشة وتقول: أفو..!!!!)..
امي النبيلة..الحاجة حوة بت نصر الدويد..وهي كل همها انها توصل ليك فكرة واحدة..فكرة طريفة وعجيبة.. حريصة تقنعني انها عافية لي دنيا واخرى..!!..كتر خيرك يا زولة يا سمحة..!!!
اخواتي ريم اسماعين..حواء احمد جبارة..وبنياتي وابنائي..سارة سليمان ، سجى سليمان ، نور الدين سليمان ، محمد سليمان ، زهرة معلا ، احمد معلا..وفردتي الظريفة ترتيل معلا (اصغر زولة في اسرتنا ، دوبك بتحبى..وقضيت معاها وكت كتير..ترتيل اكتر زول استمتعت بمصاقرتي ليها اثناء فترة الزيارة...!!)
اخي وصديقي الوجيه كمال شرة مراد (شقيق الفنان التشكيلي الطاهر بشرى)..الوجيهة الفصيحة الآنسة منة كمال شره (عمرها خمس سنين)..اخي وصديقي كابتن على شره مراد..ابن اختي..محمد ميرغني نايل.. ابن اختي اسعد عنتر.. بنات اخواتي..اميرة ميرغني ، الجنينة الحنونة النبيلة اماني ميرغني ، فاطنة باشا. ،بهجة علي شره ..وظريفات الظريفات الأنسة وداد علي شره.صديقتي الجميلة سعاد باشا..الفرد اللذاذ..محمد علي شره ، اشرف عنتر ..اخونا الهميم الفاتح..اخونا الأستاذ المحامي هاشم تمساح..جارنا صاحب الدكان عم ادم..!!
اختى وامي الوسيمة ، عشة شره مراد ، وانا جاي بغباري من مطار الخرطوم ، ظابطة ليها صينة كسرة بملاح بامية مفروكة (اجمل وجبة اتناولتها في امسودان..!!)..
اصدقائي من ناس الخرتوم..انور مصطفى ، مجدي ، هاشم عمر ، علي سعيد ، هويدا ، ايمان جلال..!
صديقتي الأستاذة منال الله جابو .. وبنياتي (و الله يا منال خرطتينا ساكت ، نسوي شنو الله غالب ياااااااااخ)..الآنسة ترتيل الفاضل ، الآنسة توسل الفاضل..و ابوهن الفاضل (ياخي ده ظبط لينا سمك ما بيعرفو الإ زول بحر بحق وحقيقة..تحياتي يا الفاضل ليك ولناس الدويم جملة).. استاذنا وصديقنا الفنان الجميل الهادي جمعة جابر (الهادي ساورا)..واليوم يا الهادي لاقيت صديقنا عمر منصور وبلغتو تحياتك وباقي تحاياك الى صديقنا الفنان عبد اللطيف ..!
صديقي النبيل وشقيق الروح ، الأديب الروائي ، الأستاذ محجوب على عثمان ، صديقي الإعلامي عادل اسماعيل محمد حسين..وبالطبع التحايا عبركم لأصدقاءنا ابراهيم فضل الله (صاحب الفخامة ) وابراهيم فضل الله (مخترع نكتة مستر بيم)..لو كانوا هناك..ح يكونوا ملوا الساحة بسخريتهم الواصلة..!!
كتر خيرهم ممن جعلوها .زيارة..رحلة/فكرة/خواطر/عذابات/حنين..!)QUOTE >>>> <<<< >>>>> استاذنا Kabar نحن جعلنا هذا السفر الفريد والممتع زيارة ورحلة وفكرة وخواطر وعذابات وحنين.. وامتلأت جوانحنا بالنستالجيا.. .. وشكرا من الاعماق توأم روحي اميرة بت مصطفى السيد .. فقد وضعت في طريقنا كاتبا نحريرا له جزالة العبارة ونهلنا من مخزونه الثقافي الكثير والمفيد وتوغلنا في ثقافات السودان طولا وعرضا..
ونحن حين نسافر شرقا وغربا وفي بلاد تكون اللغة العربية غريبة عن اهلها وبعيدة عن لسانهم ، فان قلوبنا تخفق طربا وفرحا حين نطالع لافتة باللغة العربية.. وقد وجدنا في سفرك الجميل هذا الكثير من مواطنتنا ووجدنا هويتنا الثقافية ، ومهما اختلفت ثقافات المناطق المختلفة في السودان ولكنها تنبع من شجرة واحدة .. فالسودان جسد واحد وروح واحد ... وشكرا كثيرا ودمت بالف خير وصحة وعافية
