ملاح الويكاب

اندهشت غاية الدهشة عندما جات سيرة ملاح الويكاب وطلع جلسائي / جليساتي لا يعرفونه

معقول في زول / ة ما بعرف ملاح الويكاب؟!!!!!!!!!!!!!!!!!!!

يا ما سبينا نحن بنات الجزيرة لمكتشفه
ونحن جلوس نغسل في العدة ونرجئ قدر الامكان غسيل حلة ملاح الويكاب

ولكنه لذييييييييذ
ولا تجيد طهيه من كانت مثلي

طيب

المكونات :


لبن
ويكاب
عطرون
ويكة

او
بصل
لوبا
ويكاب
ويكة

اها الطريقة دي الا يجي تمبس يوريكم / ن ليها
لوووووووووووووول

ــــــــــــــــــــــــــــــــــــــــــــــــــــــــــــــــــــــــــــ



* الويكاب : جاء في قاموس اللهجة العامية لبروف عون الشريف قاسم ، أن الويكاب " رماد القصب المحروق يعمل منقوعاً بالماء مع اللبن أو الماء وكلاهما يضاف له البامية الناشفة مسحوقة او اللوبياء فيصير إداماً . وهي مكونة من مقطعين ويكة والمقطع البجاوي آب الدال على المفعولية . قال العبدلابي : ويكابو في السوايب مكمد ". قاموس اللهجة العامية في السودان ، ص 1065.

الجندرية
سلام عليك
جبت ليك مدخلات الانتاج. يللا ورينا همتك!!
انا ما حصل شفت ملاح ويكاب فى حياتى. تصدقى؟

ياحليلك يا حبوبتى التاية ....

عادل عثمان

انت عاد ما ناس البنادر زي جماعتي ديل

شن خبركم بملاح الويكاب

لكن اقول ليك سر؟
فاتك الكتير

وحاول شوف ليك طريقة تحصل

اما عن مدخلات الانتاج دي فما بتشبه ملاح الويكاب
هسي جك اللبن الجعيص دا بجي جنب ملاح الويكاب
كان تجيب لي قرعة في مشلعيب وكدا

اما موضوع همتي دي
فقد انكشف المستور
وقلنا ليكم اخير تشوفوا تمبس في الحكاية دي ؟

***
تماضر حبيبة القسا
يا حليل حبوباتنا كلهن
تكون حبوبة التاية بتعمل ملاح ويكاب زي حق خالتي زينب مش ؟

مالكم يا جندرية وتماضر عايزين تتبروا منو ؟
اها قلتو كدي باكر من دغش بجيب لكم الريسبي
كاملة من زولة فاضلة معانا هنا...اويكب من
ويكابها ما ضقت تب...

الويكاب اسعلوا منو ناس المسلمية ...والعجب كان فيكم زول جعان

Quote: ويكابو في السوايب مكمد ".

ياجندرية ..

سلام ..

الصراحة كدا علاقتى بى (الاخ) دا ضعيفة جدا ..
(مانى) ودبنادر ..والويكاب ماغريب فى بيتنا ..
بس ماحصل استلطاف بينا ..
عجبتنى العبارة الفوق دى ..مع انو ماعارفها بتعنى شنو
..لكن شكلها كدا(شكرة) ..بالله ساعدينا بالشرح ياامانى ..


ودى

محمد عبد الرحمن
صباح الخير

قت لي مافي استلطاف ؟
لشنو لكن ؟ اوعى تكون من العينة البيغُرها الشكل

انت اتجاوز عقبة الشكل دي
وخش في المضمون طوالي
الاستلطاف بحصل اكيد


كلام العبدلابي شكله شكرة فعلاً

والشرح دايرلو مختصين / ات لكن نحاول ولينا اجر الاجتهاد
باقي باب الاجتهاد الايام دي مفتوح على مصرعيه، حتى الناس الزمان كانوا عاملين فيها شايلين مفتاحو ، خلوه ساااااااااااكت سهلة

ما علينا
نرجع لكلام العبدلابي
1) شرح المفردات :
ويكابو : نسبة الويكاب لاحدهم ، يعني ويكاب شخص ما والويكاب من الرماد.
السوايب : جمع سائب ، والشئ السائب يعني الهامل ، الذي لا صاحب له ، والسيبة تعني ايضاً الضياع والهلاك فنقول ويا حليل فلان ادانا السيبة والهملة ، ونقول ركبي سابت ، وغنم سايبات ، وهكذا.

مكمد : من المصدر كمد أي ادخل الشئ في شئ اخر ، ويقولون كمدوه بالضريرة يعني كبوها في راسو

2) قراءة دلالات العبارة

وعليه ومن الشرح السابق فإن هذه العبارة يمكن ان تؤول على النحو التالي
ان هذا الفارس الذي لا يشق له غبار ، لا محالة مهلك ومضيع لمقاتليه وكايل ليهم الرماد فوق رسينهم ، ومأكلم نيم
ولووووووووووووول يا محمد
غايتو كمدت لي قشرتي بملاح الويكاب
وخليت خشم ملح ملح بالزنقة دي

اقول ليك احسن شئ
نشيل الكلام دا ونمشي نفتش اخونا شنتير أو نمشى حلقة محسن خالد ديك

نزار يا دفعة

انا غايتو ما بتبرأ منه ابداً
بعدين اتبرأ منو كيفن وانا متربيه بيه

لكن النصيحة ما قدرت اعمله خالص

وهسي خلاص قنعنا من تمبس وقفلنا عليك وعلى خبيرتك
وفي رجاك ورجاها

رفاعة رافع الطهطاوي في قصيدته الشهيرة التي هجا فيها السودان والسودانيين يصف ملاح الويكاب دون ذكر اسمه :طبخوا نخاع العظم بمنقوع الرمادـ وكأنه يقول أن قوما يأكلون شيئا كهذا لا يمكن أن يكونوا الا من الهمج. الغريبة أنه لم يذكر أم فتفت.

اخونا محمد عثمان الحاج

ازيك

يا ود امي الله يغفر لي من حق الطهطاوي دا
من قريت قصيدته الكريهة دي وانا كل ما جات سيرتو
وبدون ما اشعر بدعي عليه واقول يرفعه فلقة

بعدين الاكل دا ما ثقافة .. والاستعلاء الما عندو معنى دا زمنو انتهى خلاص
ما ترا اهلنا المصريين ديل ياكلو في الفسيخ ني
والفرنسيين ياكلو في القعونج
كل زول / ة ياكل عجبو ما يوجعو راسنا ساكت

Quote: كان تجيب لي قرعة في مشلعيب وكدا

والله يا أماني بالغت
عادل عثمان قال ليك ما بعرف ملاح الويكاب
تقولي ليهو ( مشلعيب ) ؟؟

هناك بعض الروايات ( لا أدري مدى صدقيتها)
تقول أن اسم ويكاب مأخوذ من الكلمة الإنجليزية
Wake up
وذلك لمفعوله المنشط

( عليك الله ما تقولي لى المصدر شنو )

عاطف عمر

سلامات وشوق كتير


عادل عثمان كان ما عرف المشلعيب تبقى عوجة السواد

بعدين ما حاسألك من المصدر لانه اخونا ثابت عضدد كلامك تحت
وبقيتو ناقلين عدلين
لوووووووووول
شكراً لطلتك يا عاطف
بالجد بتفرح يا ريحة الحبايب كلهم

تتخيلو أمس اتت اختي من السودان محملة بدقيق الدخن و الويكاب و دقيق الذرة و البصلة المحمرة و الشرموط المدقوق و نحن مافي زينا الايام دي و الله اليوم الصباح فطرتا بي ملاح ويكاب و كسرة دخن ابوظبي كلها مافي زي
تقول انا قاعد في حلتنا ابوفروع
هو لكن ما ملاح و هي لكن ما كسرة
تعرفو واحد صاحبي اتزوج قريب . المدام جاية من قري الجزيرة كرت ابعد مكان شافتها كلية التربية جامعة الخرطوم . اها من حفلة العرس لي ابوظبي اول مرة تركب الطيارة لكنها في مسالة الكسرة و الملاحات بتاعتنا بتاعة الجزيرة فنانة درجة اولي و الله التقول ربتها حبوبتها
المهم بعد اسبوع من قدومها الميمون العريس عزمنا غداء و ماخلي ليهو كنتاكي و مشي سوق السمك جاب المحمر و مجمر العروس عاست ليك كسرة ما اظن ابوظبي كلها في زول عندو كسؤة زيها كسرة ساكوبيس بس و داك يا ملاح الويكاب المو هملة المهم نحن اهل العوض لمين ليك في الكسرة و ملاح الويكاب خلينا الصحن زي الجايي من المصنع .
بالواضح زول اشتغل بي السمك و الجداد مافي
اها اختنا عاينت لي صحن الكسرة الفاضي و صحانة السمك و الجداد الميلانة . قامت خاطبت صحن الكسرة بي قولها
(و الله يا الكسرة القيتها في ابوظبي ما اظنك تلقيها تاني في السودان ولا في اي مكان)

اخونا domdom

حمد لله على سلامة اختك
وبالهنا الاكلتوه

الكسرة فعلاً طعمها مختلفة برة السودان
الناس شوق ساكت بتأكلها
غايتو الله يجمع شمل الجميع ويبرد جوفهم

لكن ما ترسلو للجيران حقهم ، ناس لنا مهدى اختي ديل الجار الجنب عديل كدا

شكراً لطلتك

تعالوا نسمع الغنية دى لحدى ما الفطور يجهز

عادل عثمان
والله عاد الفريد في عصرك مبالغة
دي طبعاً من اغاني الحقيبة العصماء
وصوت ترباس التريان ( التقول ما اكل ملاح ويكاب خالص ) اداها نكهة تانية

بس كان خليتها لينا بعد ما نضرب الويكاب دا
كان قمنا وكتحنا الشبابيل شمال ويمين
والبسألنا نقول ليه الويكاب بعمل بعبعة

عشان احفظها مشت ليها في مكانها في موقع طابت
لو قدرت تخت اللنك عدييييييل كدا
اكيد مع ملاح الويكاب دا شلة ناس صديق الموج البوست دا ما بفوتهم

تسلم على الذوق السليم يا عادل ولا عدمناك

Quote: الصباح فطرتا بي ملاح ويكاب و كسرة دخن ابوظبي كلها مافي زي

يعني نحنا إدارياً تبعكم يا أبو ظبي ..خيانة!!!

Quote: تقول انا قاعد في حلتنا ابوفروع

بتعرف الحبيب مجذوب عمر عبدالعزيز؟

Quote: هو لكن ما ملاح و هي لكن ما كسرة

خيانة 2
الجندرية الحبيبة
يا ريت لو نفسح المجال برضو لملحات الكول و المرس
محبتي

الغالية لنا مهدي

دخلتك تشرح القلب الحزين

شفتيني اتوسطت ليك غايتو ( اريتها تنفع ) عشان يرسلو ليك نصيبك من حاجات السودان

وياريت اهل الاختصاص في المرس والكول يدونا طلة ويفيدونا
بالمناسبة ياتو فيهم البعالجوا بيه اليرقان ( التهاب الكبد الفيروسي ) ؟؟؟

الأخت الكريمة الجندرية

هذا (الملاح) بشع الطعم شنيع الشكل ، تصنعه الوالدة أحياناً للوالد (أطال الله عمرهما) فيتلذذ بأكله دون مشاركة أحد من أفراد الأٍسرة وكانت جدتنا رحمها الله تنعته ب (ملاح الشياطين) لأنه يصنع من الرماد

مطرح مايسري يمري

وتقبلي والإخوة الكرام خالص التحية والتقدير

الجندرية كامل الاجلال لك

اكيد لكل واحد فينا بيت شعر يخصه اوغنية تلهمه او موسيقى تاخذه

او فلم يعالج دواخله او رواية تشكل عوالمه او شخص يخصه

او موقف يردده او نكته تضحكه او معلم يسترشد به او لحن يجسد احلامه او0000000

ولكنى ورغم ان وظيفتى التى تجعلنى متواجد بشكل شبه مستمر فى الفنادق الخمسة نجوم

واقولها صادق مع نفسى أن ملاح الويكاب يشكل عندى كل تلك العوالم هل لاننى من الجزيرة

وهل لان ملاح الويكاب المجسد الحقيقى لهجين سكان الجزيرة رعاه ومزارعين ويكه ولبن

ولحد كبير اعتبر ملاح الويكاب من خصوصياتى التى لا افهمها

بدر الدين الامير

حبابك عشرة بلا كشرة

قت لي الويكاب طلع واحد من المفاتيح السرية ؟؟؟

يعني هسي الزول ممكن يعزمك فطور بويكاب ويدين منك كدا الف دولار
لووووووووووووول
تسلم على الطلة

الازهري التاني

حبابك الف

لكن يا ود امي امانة ما اتلومت معانا
نحن نقول لذيييييذ
وانت تقول لينا

Quote: هذا (الملاح) بشع الطعم شنيع الشكل

فعلاً حب الناس مذاهب

وربنا يدي الوالد والوالدة العافية ويجمعنا معاهم في ساعة خير
ونشاركهم اكل ملاح الشواطين
لوووووووووول
غابتو حبوبتك بالغت في الاسم

الجندرية ســـلام
أعلم أنَّ ديم لطفي لا يتبع للمنشية ولا قصور حي الرياض
كيف تسنى لك أن تتجاهلي أهم مكونات ملاح الويكاب ؟؟
ملعقـــة ســكر
وكيف لك إضافة عنصـر غير موجود وهو البصل
ملاح الويكاب لا يدخل البصل في مكوناته بتاتاً

راجعي معلوماتك وشاوري من تبقي من عجائز ديم لطفي
أو القيام بزيارة سوق الشمس يومي الخميس والإثنين
وللعلم فقد نقله عنا الفرنجة وسموه ( Wake Up ) بدلاً من ويكاااب
انا مستعد لتحضيره هنا بالطريقة التقليدية وبطعم الصباح
بس تمبس يسمح لي

خوالص المودة

اخونا ثابت

مليون سلام

يا ود امي رياض شنو طايف شنو ؟
ربنا يستر الفقر بالعافية بس

ويعلم الله لم ادعى حنكشة في هذا المقام

لكن كان ما اخاف الكضب اقول المكونات دي اداني ليها تمبس قبل ما يكشح الحلة التالتة
واظنه قد ذكر البصل
واغفل معلقة السكر
فالعتب اذن على المصدر قبل اكتسابه الخبرات المطلوبة

شايفاك اتفقت مع ود بلدنا عاطف في سلبطة الخواجات في ملاح الويكاب

لكن يبدو لي انها دي سلبطة منكم انتو ساي في ( Wake Up ) الخواجات

والله أنا مبسوط شديد يا أماني إنو ملاح الويكاب دا خلاك تاني تكتبي بالحيوية دي ..
أها أقول ليك سر قبل يومين كنا متعشيين أنا وتمبس بي ملاح ويكااااب كارب ..
تصدقي أنا لي زمن طويل ما أكلته .. وكان ملاح ويكاب بي أيدي مدربه ..
تقول انتي فكي ونحن ما عارفين ..




بجيك تاني لما الحلة تنجض ..

معتصم
سلامات

Quote: تصدقي أنا لي زمن طويل ما أكلته

انت اجازتك دي غشيتنا وقت مشيت السودان مشيت وين ؟


اما حكاية الفكي دي
فتهمة لاننكرها وشرف لا ندعيه
لكن يبدو لي الرادارات الايام دي شغالة صاح
ربنا ينور بصيرتنا كلنا يارب

رماد!
عظام!!!!!

معقولة!





اعتذار كبير لاكالين الميلوحة،،
فكنت اظنها اصعب شي ياكو زول،، S:

سوميتة بنات جيلها

ازيك ياالحبيبة
وكل سنة وانت طيبة

اسمعي امي انا
انت المكونات دي ما تخوفك ساي

بعدين العظام دي بهتنا بيها ساكت رفاعة الطهطاوي
العظام مابتدخل في شغل الويكاب
وممكن بوصفة اشراقة حيمورة والخالة سكينة الكارب لويكاب اللوبياء يكون من الاكلات البتدخل في المنيو لمطاعم النباتين / ات
اها شفت كيف ؟
وبعد شوية كدا يبقى اكلة عالمية
ونفتح ديك يا مطاعم الويكاب الاخطر واشهر من حقت عمنا الامريكي داك بتاع الجداد
خاصة بعد انفلونزا الطيور و جنون البقر والحمى القلاعية والمابعرفه شنو حمانا الله واياكم

الجزيراب واكلي الويكاب

طبعا غير ناس الجزيرة وزل بياكل الويكاب مافي ولا انا غلطان

ولانو جزيراوي خالص يعني اهل عوض

العجب لو كان بي لقمه حاره ومعاهو شطه حمراء قبانيت

وعليه معلقة سمن بلدي

ومن الصباح والجو يكون مطر

وتعالو جيبو كنتاكي جنبو بس

الواحد داخل البوست ده

يتمطق سااااااااااكت





الجندريه
ازيك
لكن شركك ده قوي خلاص
والواحد ياكل ليكم ويكابكم الحار ده
والشغل يغلبو وبعدين اترفد
لكن ضلكم بارد وويكابكم خطير
ويا عباس كدي جيب السمن ده

اشراقه حيموره وينها يا جماعه



طمطق جنس ده ما شفناهو

احمد العربي
حبابك الف

شركي والله عاد لما الحبان
علا لسه ناقصني عروباً كدي من تالانا
ناس اهل العوض وشنتير وكتيرين غيرهم / ن
ربي يدحر عوارضهم / ن ويلمنا بيهم ، في ساعة خير

الجندريه

سلام مشكل .. جبة درويش


وا شوووووووقى يا الويكاب

Quote: الويكاب اسعلوا منو ناس المسلمية ...والعجب كان فيكم زول جعان

انا من تلك البلد الباهيه الزاهيه المسلمية
ابصم باصابعى العشرة كلام نزار دا كلام راجل ذواق

عشان كدا كان الويكاب فى بروفايلى علامة مميزة


اكلات مفضلة: ملاح ويكاب ...... موليتة

اخونا دورنقاس

حباب سلامك البشرح

Quote: وا شوووووووقى يا الويكاب

النبي يا ابوي كان ماعفيت لينا من الشحتفة

المسليمة اهلنا وناسنا حبابن الف
لكن انا زي اشعب الاكول لا احكم الا بعد التذوق
وبعد كلامك انت ونزار دفعتي
اول ما اصل رفاعة جري على بيت عمك جيب الله دفع الله
ونشوف امات اولادنا ناس المسلمية ديل
ثم نحكم ايهما الذ
ويكاب ناس الخرتوم بوصفة اشراقة حيمورة
ام ويكاب ناس حنتوب بوصفة خالتنا ام اسامة
ام ويكاب ناس المسلمية
ولا كمان كلامك انت ونزار وقع واضة ساكت

عباس ود جيرانا

كيفنك والبنية وامها؟

Quote: العجب لو كان بي لقمه حاره ومعاهو شطه حمراء قبانيت وعليه معلقة سمن بلدي ومن الصباح والجو يكون مطر

ات قايل الخلانا نجيب سيرتو شنو بلا المطر المتوالينا الايام دي

كلامك عن انه الويكاب خاص بناس الجزيرة
اشراقة حيمورة طلعتو هناي ساكت
لووووووووووول

الاخت الجندريـة

Quote: قال العبدلابي: ويكابو في السوائب مكمـد

في اعتقادي قصد البروفيسور عـون الشريف قاسم عليه رحمة الله أن يورد مقالة العبدلابي في شكر المشكور في شطر البيت أعلاه,

والعبدلابي يشكر الرجل ذاك وينعته بالكرم,

الويكاب : معروف هـو لب القصب المحروق

السوائب : قصـد بها جمع سـويبـة وهي المطمورة الأصغر وتتخذ قرب البيوت بخلاف مطامير خزن العيوش وتتخذ خارج القرى, وهي حفر مليسـة الجوانب كبيرة النطاق يطمر فيها محصول الذرة حتى العام القادم.

مكمـد: يقصـد بها مخزون على الكثرة ويعني ان الويكاب من الكثرة بمكان بحيث أن كبه على السويبة يجعله يزيد لولم يكمد (يضغـط) لاسفل ضغطا حتى يتسنى قفل السويبة.


شطر هذا البيت للعبدلابي في غاية البلاغة والفصاحة في وصـف كرم الموصوف وهو لا شـك من بهاليل شيوخ العرب ,

والكرم ظاهر في هذا الشطر المختصر من وجوه عديدة,

أولاً: الويكاب لا يتخذ في الغالب بهذه الكثرة بحيث يوضع في سويبة إلا إذا كان كثيراُ جداُ وهو ما يعني أن رب هذا البيت يتوقع من الضيفان العدد الكثير والنزول المستمر كالذي يقيم على طريق سابلة. والويكاب الكثير دليل ايضاً على وفرة صـاحب الدار لان زراعته تجلب القصب الكثير وأراضيه التي يزرعها شاسعة والايدي العاملة على الزراعة عنده وافرة.

ثانياُ: الويكاب يحفظ بعد الحرق لانه لا يصلح أن يحفظ قبل الحرق وإلا استهدفته دواب الأرض ودائما يقل حجمه عند الحرق و لكن ويكاب هذا الكريم وافر لدرجة ان السويبة لا تستوعبه إلا بصعوبه.

ثالثاً لم يجعل منها سويبة واحدة وإنما (سـوائـب), وهـذا ما يصـور الوفرة والاتساع في المعاش,


لكم التحية ولكل الاهـل بالجزيرة موئل الكرم والكرماء



أحمـد الشايقي

اخونا احمد الشايقي

سلام

طبعاً جبت الرايحة تب
وكفيتنا مؤونة الجري والفتيش لاخونا شنتير ولا محسن خالد
ما كتبه عن كلام العبلابي جميل جداً بحق
واول مرة اعرف معنى السويبة

مأجور يا سيدي باذن الله


بعدين يا ابوي انت راجي الويكاب يكمل مالك عشان تسوي النعيمية
الصينية بتشيل مية (صنف )

تسلم ابوي على طلاتك كلهن

ملاح الويكاب يا جندرية ...
كما قال أحد المتداخلين ملاح الويكاب لا يدخل فيه البصل ...
والويكاب في الأصل هو سائل يتم تجميعه بإضافة الماء إلى رماد القصب ، وأفضل الأنواع هو القصب الفتريتة ، يليه المايو ...
يوضع الرماد في ( كورية قديمة ) مخرّمة من أسفلها وتسمى ( النقّاط ) ، ويرش بالماء ويترك لفترة ليتخمّر ... ثم يضاف إليه الماء بكمية أكبر ، ويوضع النقاط فوق إناء آخر لينزل فيه السائل ، ولونه يميل إلى الصفار .. وهذا الماء الأصفر هو الويكاب ، وإن تذوقته فستجد به درجة من الحموضة .. والآن يوجد بالأسواق ويكاب جاهز في شكل كرات ..

يتم غلي اللبن فوق النار ، ثم يضاف إليه الويكاب السائل أو الجاهز هذا الذي أشرنا إليه .. فيبدأ لون اللبن في التغير نحو الصفرة ، ثم يضاف إليه الملح ، والعطرون ، والبعض يضيف إليه شطة حمراء حسب الطلب ، وبعد أن يغلي الخليط الجديد يتم تخفيض درجة الحرارة ، ثم تضاف الويكة مع التحريك المستمر إلى أن ينضج الخليط الجديد ، وعلامة نضجه هي الغليان المستمر ، وذوبان الويكة ..
يؤكل الويكاب مع العصيدة ، والبعض يأكله مع الكسرة ،،،
ملاح الويكاب لا يحتاج أي نوع من البهارات ، ويمكن أن يبقى ليومين بدون تبريد دون أن يتغير طعمه ..
وبالهناء والشفاء ...

Quote: اما موضوع همتي دي فقد انكشف المستور وقلنا ليكم اخير تشوفوا تمبس في الحكاية دي ؟

.
.
يا اماني :
تعرفي اول مرة اعملوا .. انا مكشح مقدار ، تلاتة ( حلات ) متوسطة الحجم..
وقرربت أحلف ( طلاق عذابي ) غليظ .. وطلاق العذابة دا كمان حاجة تانية .. بيكون دائما باين بينونة كبرى .. وقوي جدا .. لانو الطلقة الواحدة بتساوي تلاتة بي الطلاق العادي بتاع الناس
اها بعد تلاتة ( طناجر ) حتين بعداك بقيت احس باني بعد كدا ممكن ابقى خبره وأقوم اعزم لي زول بسرعة كدا .. علشان اجرب فيهو المسالة دي ..
.
.
يعني الواحد يموت براهو ..
.
.
بعدين يكون في العلم أنو بعد الخلطة دي نجحت اخدت ( عينة ) وعملت ليها فحص في معامل الشركة ..
الدكتور الامريكي قال لي كلمة واحدة ونطط عيونو
يورانيوم؟

وبعد كم يوم .. بقى يجيب البيتزا .. يغمس بيها في ويكابنا المسكين دا..
..

تمبس
صباحك زين

شوق شديد والله

عاين طلعت خبراتك اي كلام
اول شئ ما وريتني معلقة السكر دي
تاني شئ البصل طلع من مكونات ملاح الويكاب

ولا ياربي اديتني الوصفة قبل ما تكشح الطنجرة التالتة

قت لي الامريكي بقى يغمس البيتزا بالويكاب
دي بقى عايزة نفرد ليها بوست براه
بيتزا الويكاب دي
عشان الناس دي ما تجي تقول لينا اكل اهل عوض واهل حسنين
اهو طلعت بتنفع مع اهل التوم زاتهم

لكن غايتو بالغت في حكاية اليورانيم دي
زكرتني عمر اخوي الله يطراه بالخير
جنو يحكي عن السوداني القبضوه في واحد من المطارات الاوربية شايل ويكة
ولما ودوها المعمل جات نتيجة التحليل
" مواد خشبية لا فائدة منها ولا ضرر "

ياالجندرية
كلامكم عن الويكاب خلانا نتمطق ،، ورونا الموليته كييييييييييييييف خاصة مع مرضى السكري والملايا.

الاخ عبد الرحمن

سلام

عليك الله هسي الويكاب براه الخلانا نتمطق
الحكاية بقى فيها سلج ولوبا واشياء اخر

الموليتة في بوست زمان اعتقد عملته دومة او شاركت فيه بتميز
المهم يا سيدي حارجع للارشيف واجيبو هنا لو لقيت وقت

تسلم لطلتك

ود قاسم
سلامات

Quote: كما قال أحد المتداخلين ملاح الويكاب لا يدخل فيه البصل ...

كلامكم دا بعد ما جو اهل الخبرة الاصليين ( اشراقة ، والخالة سكنية ) خلاص الا تشطبوه
لووووووووول

تشكر كتير على تنويرنا بكيفية تحضير الويكاب من الرماد
اول مرة اعرف حكاية النقاط دي ، ولما بديت اقرأ اتوقعت انه القاعد جو الكورية هو الويكاب
يعني زي طريقة عمل الصلصلة البلدية او المش لما يحبو يكون متماسك فيربطوه في كيس قماش ويخلو الموية الفيه تنقط ، لكن طلع العكس صحيح
انت قلت

Quote: وهذا الماء الأصفر هو الويكاب ، وإن تذوقته فستجد به درجة من الحموضة .. والآن يوجد بالأسواق ويكاب جاهز في شكل كرات ..

بس ما شرحت لينا الكرات الويكاب دي سوها من الموية الصفراء دي كيفين
كدي تعال النبي تم الحكاية دي

ومشكور كتير يا ابو طلال

جندرية
صباحاتك عصيدة في ضل الضحى مع الأمهات ...
بإصرار شديد أقول : ملاح الويكاب لا يدخل فيه البصل . والملاح الذي تتحدث عنه إشراقة حيمورة ليس هو ملاح الويكاب ، بل هو ملاح لوبيا ونسميها( لوبة )، وهي أنواع ، منها العدسي وهو الذي يستخدم كبليلة وخاصة في رمضان ، واللوبيا العفن وهو أساسا يزرع كغذاء للمواشي ، واللوبيا البيضاء وهي التي يعمل من أوراقها ( ملاح الورق ) ,,, وملاح اللوبيا عموما يحتاج للبصل ، ويمكن أن تضاف إليه الصلصة ، وكل أنواع اللوبيا البلدي تدرش ، ثم تطبخ وتذوّب بالفرك .. وهناك مرحلة من عمل ملاح اللوبيا تسمى ( الفُدّارة ) ، وهي إضافة ويكاب ، أو لبن ، أو شرموط ، وهذه المرحلة يراد بها تعديل طعم اللوبيا وكسر حدّته ... وبعض الناس يسمي ملاح اللوبيا المٌفدّر بالويكاب ملاح ويكاب ، وهذا مجرد تجاوز ، لكن الأصل في الويكاب هو الذي شرحته في مداخلتي السابقة ...

ود قاسم
لا لا انت طلعت مرجع خطير
الفدارة ؟
اول مرة اسمع بالحكاية
طيب لو سمحت تعال كمل حكاية كرات الويكاب دي
وافرد لينا بوست خصوصي عن الفدارة دي

أنا غايتو ما تملَّحي لي

Quote: وهسي خلاص قنعنا من تمبس وقفلنا عليك وعلى خبيرتك وفي رجاك ورجاها

.
.
غايتو الما عارف يقول ويكاب ..
نزار ودعمي دا بتاع .. القطر قام .. النوع البيكب الحاجات كلها مع بعض
يعني عادي جدا تغرفي ليك .. جردل يا طشت من جوه الحلة
ولا بيهمو حاجة
.
.
احسن ليك ما تقنعي .. بعدما بقيت خبره بوريك طريقتين سريعات جدا

وبصلتك القطعتيها دي ..ياكيشة
اديها الشمش .. رمضان علي الابواب

بوستكم طعمو مر كدي ليه ....
ما تجيبي لينا ملاح ثلج ولا ورق (ما يطلعو الاتنين واحد )
لكن الملاح دا كنت بكرهه لما امشي مدني لحبوبتي.



يا اهل الاختصاص سوعال بالله الملاح البعملهو بالمصارين المجففة( بدل اللحمة) اسمو شنو??

تمبس ريحة الملاح جابتك.... لو عارفين كدة كنا طبخناه من زمان وكشحناه قدام الباب عشان تجي (وبرضو عشان نحنا ما خبرة وما حيتاكل)




بت عجاج

يا بت عجــاج ..
..
.
مشتاقين والله
شوفي ..اول حاجة عايزه تدخلي معانا هنا لازم تجيبي خلو طرف
من اي حاجة ..
الملاح الطلع الجندرية دا ما ملاح (عادي) ..
انا القدامك دا .. في الايام الأولى .. لما بعمل في التجربة
كنت بعلن حالة الطواري
وبعمل خط مفتوح .. بين الرياض وامدرمان واحيانا .. ولايات السودان المختلفة
المسالة ما بالسهولة دي

يا بت عجاج

بوستنا شن قدر طعمه على المرار بعد طلتكم دي
والله انتو تطعموا معمل ويكاب كامل

قت لي سرقتي الكول واكلتيه اسكتو
بركة الما غمرتي
لووووووووووووووووول

عايني ما وريتنا البعالجو بيه اليرقان شنو
الكول اعتقد صاح ؟

تسلمي على مرورك

Quote: والله يا أماني بالغت عادل عثمان قال ليك ما بعرف ملاح الويكاب تقولي ليهو ( مشلعيب ) ؟؟

هههههههههههه
يا عاطف عمر
انت قايلنى حنكوش ولا ايه؟
انا من بحرى. وبحرى فى زمنا ما كان فيها ويكاب.
فيها سلج. اها بتعرفوا ملاح السلج يا ناس الجزيرة؟

Quote: يا عاطف عمر انت قايلنى حنكوش ولا ايه؟ انا من بحرى. وبحرى فى زمنا ما كان فيها ويكاب. فيها سلج. اها بتعرفوا ملاح السلج يا ناس الجزيرة؟

ازيك يا عادل

ما حاأقول حنكوش ياسيدي
لأنك طلعت نسيبنا ( زوجتي من بحري- حلة حمد )
لكن صدقني الويكاب دا اتوجد قبل ما بحري ذاتا ما تكون
أما السلج فهو يحتاج لبوست كامل

تحياتي اماني العزيزة

يا عادل عثمان

سلام
نحن السلج
من الجرف وللفرك

شايفة الجماعة ما قصرو في الرد
نحن المصدر يا سيدي

الجندرية وضيوفها على الويكاب
أنا أكلت الويكاب مرة واحدة وما بكررها تاني.
وما عارف هل الطباخة ما كانت ماهرة أم ان الويكاب أصلا بذاك الطعم؟؟؟
من خلال البوست أتضح أن الويكاب أكلة لذيذة بس لازم نعيد التجربة مع ناس عندهم خبرة في طبخ الويكاب
ولو أخوي تمبس عزمني يكون أحسن حسب شهادتك يا الجندرية وما يطلع مقلب.

ياحبيب بلــــــــدو
كيفك ؟؟
تعرف علاقتك مع الويكاب .. كانت زي علاقتي مع التركين .. كنت ملاوز جدا طبعا
رمضان الفــات دا
كنا فاطرين ومعاي الشلة في افطار جماعي .. لي الرابطة بتاعت جماعتكم
قام عزمنا ابو النسب حمزاوي ..
.
الاطباق مختلفة الاشكال والالوان .. سمعت ليك صديق الموج بيكورك وخالق فوضى شديدة جدا ، وانا ماشايفو لانو رمضان كان دخل العضم .. صحت علي صديق من بعيد ـ عمل لي اشارة وقال لي ستة بوصات
استخدمت الساتر واتوكلت علي الله ودخلت شمال طوالي ..

ياخي دا كان اول واخطر تركين في حياتي اضوقو
وكان ما خجلت من بلدياتكم كان قلت ليهم (النص) الباقي دا كبوهو لي في ( كيس )

نعمل تبادل خبرات يازول ما عندك مشكلة
اعتبر نفسك معزوم من حسع دي


بس كمان ( تركينا).. لازم تكتروا ليهو البصل والشطة الخدرا

ومال ايه . نحن ناس خبره ..




يااماني
والله الليلة اخدتي فينا الحق والزايد..

حسع الحندكة دي بتستفيدي منها شنو

حبيب بلدو
شايفة تمبس طلع ليك الحكاية ليها علاقة بالمرة الاولى
كدي جرب مع علاء المرة تانية وتعال قول لينا رايك

تسلم على طلتك يابا

تمبس الغالي

وبصلتك القطعتيها دي ..ياكيشة
اديها الشمش .. رمضان علي الابواب

اديها الشمش لشنو

ما بجيب اللوبا وافدرها ليك بالويكاب ديك ياالفدارة الما خمج

انت قايل كورسات ابو طلال وخالتي سكينة واشراقة دي وقعت واضة ؟

بدر الدين حلا
الكواريك من الاسم دي صيغة منتهى الجرسة
وانت كدا حتتمقلب ، الاسم دا اكتر من الهم في القلب في الاغاني السودانية
يعني تحرم على نفسك سماع الاغاني ضمة؟ ولا كيفن الشورة ؟
بعدين الاجازة ما قربت تبرد ناركم شوية ؟

Quote: إتخيلي لقيتو قاصد ملاح (الأسود) أنا أخاف من الويكاب يطلعلي أسود

لكن المصقع ما هو ملاح الأسود دا براه ودا براه
اظنك زي ابو يسار ، محرم علينا هنا ملاح الاسود الا مصقع بس
وانا عاد برييييد المشاترة
القرع الكل الناس مكجناه دا ..روحي ونفسي
ملاح الأسود (البراطيش ) يا سلااااااااااام
والعجب لو كانت عاملة زهرة بت خالتي فتحية
يا سلام

عزيزتنا الجندرية

انا جيت اسلم بس عليك لانه غيبتك طالت

لكن جنى وجن ملاح الويكاب ده وما بدور سيرته

تصدقى عمرى ما ختيته فى لسانى

بس عشان خاطرك اتلغوست هسع فيه

ده السلج.. يا ناس الجزيرة..


ده ملاح السلج جاهز للاكل او التصدير!!

السلج ياالحبيب بنزرعو وبنصدرو ليكم والفى الصورة دا اظهر سلج انابيب او بيوت محمية
وعندنا الورق بنفس الطعم

عمدتنا الغالي قرشو

تسلم من كل بلية ابوي
كتر خيرك كتر

Quote: تصدقى عمرى ما ختيته فى لسانى بس عشان خاطرك اتلغوست هسع فيه

شايفاااااااك استحليت اللغوسة
والله حبابك الف

بعد دا ما تضقو عديل

الاصحاب و الصاحبات
سلام جاكم
الحاجة والدتنا بتتكيف منى (غير انى الحتالة ) بتقول عصام بياكل معاى "اللغاويس" كلها بدءا بالمرارة و ام فتفت انتهاء بالفسيخ و التركين و الميلوحة ....

اما الويكاب يا امانى فحديثه مليان شجن و مطيق
نحن ناس صعيد (ضمن اشياء أخر) و الويكاب تخصصنا

اولاد امدرمان ما يتصلبطو ساكت ... امشو شوفو ليكم داندرمة و لا باسطرمة

بمناسبة الويكاب مين من غير ناس النيل الازرق مناطق سنجة بعرف ام كرم كرم

لى بعدين

Quote: اولاد امدرمان ما يتصلبطو ساكت ... امشو شوفو ليكم داندرمة و لا باسطرمة

ياعصام
الشوق مطر اول حاجة:
تعرف ؟؟
مرة معاي دكتور قريبنا ماشين في حتة بعد الدمازين بي ساعات انا وهو راس .. قامت العربية اتكسرت بينا ..
حظنا الحلو اتكسرت بينا جمب حلة عرب والدنيا خريف .. وفي العربية غير ( الكواميد ) ما عندنا حاجة

اصطادونا العرب بي حفاوة شديدة .. ونحن جعانين..
والجوع كافر طبعا ..
بعد دقايق جابو لينا ملاح خاطف لونين .. ابيض شديد وما ابيض خالص ..
وعصيدة
الحاجة دي تمت في خمسة دقايق بس .. ختو العضه دي .. وانا طوالي دخلته معاهم عاينت لي قريبي لقتيو ( محمبك ) .. وقال ما عايز ..
قلت ليهو خلاص الجماعة ديل طالبين ليك .. بيرقر

بعد الاستفسار عرفت أنو الملاح اسمو ( ام صقعو )


والله ياعصام تضرب ام صقعو دا .. إلا يخموك مكنكش ..
تقول لي اولاد امدرمان وحناكيش

بعدين اي ملاح تجيبوهو هنا في البوست دا .. انا بجربو طوالي

سلامات يا الجندرية،

ملاح الويكاب سويتو مرة وسميتو Sudanese Wake Up Soup لمُّو فيهو اندونيسيين قرطعوهو الجاري عليهو ما حصَّلو باين بقى ليهم زي لغاويسهم البسووها من الـCoconut Milk والله أعلم.

Quote: بمناسبة الويكاب مين من غير ناس النيل الازرق مناطق سنجة بعرف ام كرم كرم

أم كرم كرم؟!، تعرف يا عصام أنا دافنها ليك من يوم قُلتَ لي كان سلام الله ما يكون بيناتنا، تقوم تجيب ليها أم كرم كرم؟!. أها، أم كرم كرم دي (وألا دا) كانت من ضمن السيرفينقز في نادي الماليين او نادي بنك السودان وألا دار سونا لما ردَّ محمد اسماعيل للقال ليهو الكوارع بالشيء الفلاني: ليييه، مسوينها من كرعين...أكيد عارف وأكان ناسي المسنجر في.

للمعلومة: ينصح بتغذية من يعانون مما يسمى Lactose Intolerance بالبامية (وقيل الويكة) لتعويض نقص الكالسيوم وناسنا (في الكورة وفي غيرها) يقولو ليك: قوم..مروكب كدا من لايووق الويكة البتلغف فيهو دا. أعتقد أن الورق والسلج، لأنهما من عائلة السبانخ ولأنَّ من مكونات صنعهما الويكة، مفيدين أيضاً في هذه الحالة. أمانة آللغاويس ما ليك حوبة!

تحياتي

اخونا علي البدوي

اكبر لوووووووووول @ Sudanese Wake Up Soup

والاندونسيين الشربوا ديل شربوه كيف ؟
واحد بشرب والتاني واقف ليه بالمقص
غايتو ضحكت ضحك في شراب الويكاب دا

تسلم يا سيدي على المعلومات القيمة عن اللغاويس
وفعلاً امانة ما ليها حوبة

يا عصام
النبي شفت اللغاويس دي لذيذة كيفن
ربنا يدي الحاجة العمر ونتاكل كلنا معاها من صينة اللغاويس

عاين ام كرم كرم ما عرفتها

بعد الارشفة اعمل ليها بوست

أماني ...
سلام

Quote: رماد! عظام!!!!! معقولة! اعتذار كبير لاكالين الميلوحة،، فكنت اظنها اصعب شي ياكو زول،، S:

حلاتي دي يا أخواننا ..

يعني أنتي و تمبس تقعدو تجخمسو في اللواييق بتاعتكم دي .. و تخلو ناس سوميته يعملونا حديقة حيوان .. كدة كويس ؟؟

ويكاب !!!!
( غايتو الزول السوا الحاجة ديه ما ظريف ) ..

تحياتي يا ... ديناصورات

اخونا عماد

Quote: ويكاب !!!! ( غايتو الزول السوا الحاجة ديه ما ظريف ) ..

اريتو يا يمة ظرافة الجنيات هسي كان لمينا في طلتك دي وين ؟
على فكرة دي اول مرة تزور لينا بوست
وعشان كدا معزة الويكاب زادت قيراط

Quote: عشان كدا كان الويكاب فى بروفايلى علامة مميزة

عشان كدا حأديكم وصفة للويكاب ما بتقع واطه

Quote: طبعا غير ناس الجزيرة وزل بياكل الويكاب مافي ولا انا غلطان

منو القال ليك؟؟؟
والله أناما من الجزيرة لكن أظبط ليك واحد ويكاب لمن تآمن

Quote: اشراقه حيموره وينها يا جماعه

يا عربي انا من ما شفت البوست دا عرفتك بتجي ناطي وتتذكر ويكابي
بالمناسبة يا ناس الشارقة لو عايزين الويكاب بس أقعوا دوار الساعة

Quote: وكيف لك إضافة عنصـر غير موجود وهو البصل ملاح الويكاب لا يدخل البصل في مكوناته بتاتاً

منو القال ليك؟؟؟ البصل من العناصر المهمة جدا في الويكاب

الويكاب 3 أنواع
2 منها باللبن
واحد فيهم بدون بصل ولا طماطم
ودا يتميز باللون الأصفر شديد الصفرة - دا اختصاص أهل الجزيرة- عشان ويكابو من القصب المنقع

النوع الثاني بي اللبن برضو بس بيدخل فيه البصل والطماطم
ولونه بيكون داكن شوية ودا ويكابو حجري

النوع الثالث ما فيه لبن والعنصر الأساسي فيه اللوبيا المدروشة

اها رايكم شنو يا ناس الجزيرة ؟؟؟؟؟؟؟؟؟؟
خبرات خرطومية بحتة

Quote: منو القال ليك؟؟؟ البصل من العناصر المهمة جدا في الويكاب الويكاب 3 أنواع 2 منها باللبن واحد فيهم بدون بصل ولا طماطم ودا يتميز باللون الأصفر شديد الصفرة - دا اختصاص أهل الجزيرة- النوع الثاني بي اللبن برضو بس بيدخل فيه البصل والطماطم ولونه بيكون داكن شوية النوع الثالث ما فيه لبن والعنصر الأساسي فيه اللوبيا المدروشة اها رايكم شنو يا ناس الجزيرة ؟؟؟؟؟؟؟؟؟؟ خبرات خرطومية بحتة

اهاااااااااااااااااااا

اشراقه حيموره دي زحو ليها بعييييييييييييييد

بتجيه ليكم البوست ده تمتم والعجب كان جبتو ليها الروابي

دي خبيره بالدرجه الممتازه شفتوها فصلت القصه كيف

الجندريه شفتي الجندره دي كيف؟

بس انتي اديها المفراكه واتفرجي

وجنس تمطق

موده بي طعم الويكاب

سلامات يا عربي

Quote: الجندريه شفتي الجندره دي كيف؟ بس انتي اديها المفراكه واتفرجي

ادينها المفراكة وزحينا بعيييييييييييييد
وجبنا الدفتر وشفيناكان ينفع

تسلم وتسلم بت حيمورة

اشراقه حيمورة

اظنوا يا اختي راجلك من الجزيرة ولا مناسبين ناس الجزيرة قال ويكاب خرطومي قال


لكن لو بتعرفي تظبطيه كلها ساعه ونص بكون عندك اديني خبر بس

يا اهلنا
اسمحوا لي ارد على اشراقة حيمورة دي وارجع ليكم تاني

عاد يا اشراقة تنجبري
لانه مرقتيني من شناف الرجال ديل

انا كان طااااااقشة اضاني حكاية البصل دي
لكن لاني كيشة زي ما قال تمبس ما كنت متأكدة وما غالطت كتير في الحكاية دي

غايتو
بعد الخبرات المبهرة دي
اقدم طلب رسمي عليه تلاتة دمغات
راجية موافقتك لتقبل الاستشارات
والحساب يجمع يا بت امي
وعشان السوق ما يبور
رسلي لي الطريقة في المسنجر
تسلمي كتير على الطلة المؤسسة

العزيزه امانى

تحياتى .. فى داعى تمطقينا وتجوعينا كده .. بعدين البوست ده شايفو مفلفل شديد خلاص قلت نلحق يمكن الناس لامه ليها فى قدح عصيده كبير ..ادخل ايدى معاهم قبال يلحسوهو..

اذا عندكم delevery الحقونا..

اخونا ضحية
سلامات
لامه ليها فى قدح عصيده كبير ..ادخل ايدى معاهم قبال يلحسوهو..

اها شفت اللمة والدفسة والملاحقة قبل الماعون ما يتلحس دي النكهة السرية
عشان كدا delevery ما بخارج معها

ربنا يجمنا جميعاً على قدح عصيدة بالجد وكل زول/ة يـ تملح طلبها

بعد الويكاب ياناس رفاعة عايزين السؤال من السينات الخالة ربنا يرحمها كنا بننتظرها تجيب خيرات سوق رفاعة والسينات احسنها
جوعتينا

الأخ احمد سيد
السينات دا بقى داير ليه بوست براه
خلينا نشطب بوست الويكاب دا وبجيك للسينات في النص الجاي

بت عجاج

Quote: يا اهل الاختصاص سوعال بالله الملاح البعملهو بالمصارين المجففة( بدل اللحمة) اسمو شنو??

يا بتى ده اسمو ملاح المِرس ( بكسر الميم ) وده اجارك الله اعفن منه إلا ملاح الكول ...

أوع تكونى ما اكلتى ملاح كول كمان ؟؟؟

Quote: أوع تكونى ما اكلتى ملاح كول كمان ؟؟؟

احكي دي:
في الدورة المدرسية 93-94 كنت بمثل ولاية الخرطوم وكانت في كردفان عروس الرمال...آآها قاموا مسكوني المعرض بتاع الخرطوم وجيرانا طوالي ناس دارفور اتصاحبنا...نجي من الصباح بدري نرتب المعرض وبعداك نتوس وانا من بدري سامعه عن الكول ونفسي اضقو....موجود في المعرض النبات بس ما الملاح.... الساعة يوم كدة غفلت الجماعة وسرقت حتة منو وطوالي في خشمي....وعينك حتي النور ما بتشوفو....

لكن سفرتي لنيالا اكلتو اكل مع عصيدة الدخن ... وخاصة لما القطر وقف في رجلة الفولة....حلو لمن تأكل اصابعنك ورا...

المرس اعفن وتاني نهائي ما حأكلو... بيني وبينك كدا انا كنت فاكره ملاح الويكاب البعملهو بالمصران وقاشره بيه قدام اترابي نظام البت مثقفة بتراث بلدي...خلتو خشمي كول كول لكن

Quote: اشراقه حيمورة اظنوا يا اختي راجلك من الجزيرة ولا مناسبين ناس الجزيرة قال ويكاب خرطومي قال

عباس
كضبا كاضب ............... والله خرطومي 100%

Quote: لكن لو بتعرفي تظبطيه كلها ساعه ونص بكون عندك اديني خبر بس

يا مرحب بيك تشرف وحبابك ألف ومعاك كل البورداب

نرجع للوصفة يا جندرية يا اختي وما تخافي على السوق (ويكابنا يسع الجميع)

1- تقطعي البصل وتحمريه تحميرة خفيفة وتطفيه بالطماطم المقطعة صغار
2- تضيفي اللبن وإنتي شغالة فيه تقليب بالمفراكة لمن اللبن يغلي
3- تضيفي الويكاب وفي المرحلة دي تخلي بالك عشان ما يتدفق ويطفي ليك النار - لازم اللبن يكون في مستوى أكتر من النص شوية
4- بعد دقيقتين تضيفي الويكاب وبعده الملح وتديه زي دقيقتين بعدين تبدي بإضافة الويكة
5- تخليه على النار لحدي الويكة ما تنضج وتنزليه - هنا يكون جميل لو لحقتيه بي ملعقة سمن-
وبالهناء والشفاء

العزيزة اشراقه الخرطوميه الويكابية

خلاص اول لقاء لبورداب الامارات

بكلمك تعملي حلة ويكاب فاهمة وتجي نتلحوسه انا وانتي بس

Hôtels Israël
Vous visitez Israël? Comparez prix & critiques d'hôtels
www.TripAdvisor.fr


Annonces Goooooogle Votre publicité ici


ياناس شايفين الدعاية الفوق لمن تفتحو البوست ولادا عندى بس

يعني كيف الدعاية دا في البوست دا براه من دون البوستات التانية ؟!!
انا غايتو ما شايفة حاجة

ماتزعلى يابنت الناس

أظهر كمبيوترى فية مشكلة لكن الجاب اسرائيل هنا شنو

الزعل الله يخزي شيطانو
دا ما زعل يا اخوي
دا استغراب زيك كدا
الجاب اسرائيل هنا
الله يكفينا شر محن السيابر والاسافير

أماني ..
قبل شوية صلاح شتات حكى لي نكتة عن الويكاب دا ..
عندنا عمنا في الجزيرة اسمو فرح ..
وكان عندو شغلانة كدا شغالين فيها عمال ما من الجزيرة وما عندهم أي فكرة عن الويكاب ..
ولما جات مواعيد الفطور جاب ليهم ملاح ويكاب لونو زي لون البورد دا وطعمو مر .. لالوب بس ..
واحد من الجماعة ضاق الملاح كدة لقاهو حكاية مرة جدا .. قال ليهو يا عم فرح دا ملاح لالوب .. عم فرح قال ليهو دا ملاح ويكاب .. وقام شرح ليهو بيعملوهو كيف .. وانهم بيجيبوا القصب ويحرقوه وبعدين يكبوا موية في رماد القصب ويصفوها .. وهكذا ..
بعد الفطور .. الراجل طلع برة البيت لقى جنب البيت زريبة فيها زي لوري أو لورين قصب ..
قام نادى عم فرح .. قال ليهو (يا عم فرح دا كلو عايزين تعملوا ملاح ويكاب !!!!!!!!!!!!!!!!!!!!!!!!!)

سلام يا الجندريه واكلي الويكاب .
غايتو انا ما من ناسو تب لبن فطير ملايق بي ويكه .
النبي ما اخير اللبن دا ترمو ليهو فطير حار وعليه معيلقه سكر .
لكين ملحات ناس الغرب اريتها في حشاء البريدو.

من ام اسامه ... سكينه الخليل....

ابنتي الغاليه الجندريه....

كما يقال لا يفتي ومالك في المدينه....


بخصوص ملاح الويكاب....

فهو من خصوصياتنا نحن ناس الشرق عامه... وال الكارب خاصه....

لذلك انا اولي بالفتوي فيه......


الويكاب نوعان
أ ويكاب اللوبيا ب- ويكاب اللبن

الماده المشتركه هي ماده الويكاب..... واحسنه الطري المائل للخضره....

الردئ هو اليابس مثل الجردقه


الان طريقه عمله


ويكاب اللوبيا.... دائما يعد في المناسبات الغير سعيده مع الاسف...

وهذا لايمنع عمله في الايام العاديه ....

تعد اللوبيا مثل اعداد شوربه العدس

تضاف الويكه الناشفه (تلايق)

ثم يضاف الويكاب (الذائب في حوالي ربع فنجان صغير مويه)....

قبل ذلك طبعا ملح بسيط ومكن شويه كزبره ثم فنجان السمن البلدي

علي الوجه....

سر المهنه في ضبط كميه الويكاب ....لا مر ولا مسيخ ودي لايمكن تدريسها....


ثانيا: ويكاب اللبن

لبن حليب.... يلايق بالويكه وهو بارد...

ثم اضافه قليل من الشطه والملح...

ثم يوضع علي النار.... بمجرد اول فوره يضاف الويكاب المذاب في قليل الماء

( قدر ملعقه كبيره).... هنا يتغير لون الحليب الي الاصفر الفاتح كلون مديده

الحلبه.....

ثم تضاف ملعقه سكر...

ملحوظه: ضبط طعم الويكاب مهم جدا....

ثم يضاف فنجان السمن البلدي علي الوجه...


وكلاهما يؤكلان بالعصيده (اللقمه)


و بالهنا والشفا .....

مرجعكم الاساسي ام اسامه سكينه الخليل

وشكرا....



كتب بلا تصرف بواسطه يارا

سلام...ياناس

وتحية الجندرية..

الويكاب من الذ الملاحات..بالذات لو كانت(الضرابة)..او الويكة ويكة (سارا)..واللبن

ضروري يكون(فرش)...


استطيع ان اقول بكل فخر ان حبوبتي الله يرحمها كانت احسن زول يمكن يعمل (ملاح ويكاب)

علي مستوي العالم..ياخي داك ويكاب رهيب. مقادير موزونة وهنالك تناسب بين نسبة اللبن

مع كمية الويكة..وفي النهاية بطلع حاجة كده ما حصلت..وبالذات لو لقيت معاه شوية

(كول)..وفنجان فنجانيين بتاعت سمن..والعصيدة ضروري تكون (دامرقا)..اي الدخن المخمر!!!

ياخ جوعتونا..ياخي

تصدفوا كنت قايله الويكاب دا حق ناس اهل العوض وعرب البطاحين لبن فطير ملايق بي ويكه ومضاف اليه الويكاب و يؤكل باللقمه , كما وصفته بت الخليل.
الا ويكاب الطماطم والبصله المقليه دا اول مره اسمع بيه
بعدين اول مره اعرف انه الكول يؤكل مع الويكاب بتاع اللبن الفطير!!!!

عبد الكريم حبابك الف

Quote: ياخ جوعتونا..ياخي

هسي الجوع التاني منو
القال ليك جيب لينا سيرة الدامرقا منو هسي
غايتو البوست دا ان شاء الله ما تدخل فيه وحمانة ونشيل ذنبها

شكراً لاثراء قاموسنا بمفردات جديدة اول مرة اسمع بالويكة ( سارا ) دي
يعني كيف ؟

تشكر يا سيدي بالجد على عبورك من هنا

حذف ، غلطنا في العنوان

الخالة الغالية سكينة
سلام ليك وليارا ولاسامة ورؤى واولادهم

طبعاً يا خالة لا يفتى ومالك في المدينة
تسلم الايدين
وصفتك طلعت ظااااااااااابطة جداً

اول مرة اعرف انه ويكاب اللوبا حق المناسبات الحزينة
بنعرف الابري بعد الدفن ، لكن ما كنت فاكرة انه في اكلات كمان خاصة للمناسبات دي

تسلمي يا خالة كتير ، نورتينا بالجد

ويا يارا انت قايلانا ما راجين بص اللبن لسه ؟
سلام وشوق كتير

دوما الغالية
والله زمان

ياحليلك والله

قتي لي ما من ناسو
كنت ساكت بتجاملي في جاراتك ؟
لكن هسي امانة عليك وصف الخالة ام اسامة ووصف اشراقة مع البصل دا ما خلاك تشتهيهو ؟

تسلمي يا الحبيبة على دخلاتك البجيب الخير كلهن

Quote: (يا عم فرح دا كلو عايزين تعملوا ملاح ويكاب )

لووووووووووول يا معتصم

الزول دا دخلتو خوفة رسمي

سلام واشواق لصلاح شتات

عندنا زوج خالتنا مستهبل.. مسمي الملاح ده ملاح الwake up.. عشان بنفخ البطن وبحمي النوم...
أهل حبوبة ستنا بنت المكي ود حاج الصديق (والدة الوالد) من قرية صغيرة قرب رفاعة اسمها "عِد الخدر"... غايته بقولوا والقول للوالد، إنه عِد الخدر المنتج والمصدّر الأكبر للويكاب.. انا من ناحيتي بحبه شديد جداً... بس الوالد ما برتاح ليهو ... غايته يا الجندرية، حأمشي أزنق الحاجة في ملاح ويكاب.. دخّلتيهو لي في نفسي...

بنت الحسين

مريومة الغالية
بركة الشفانك طيبة يمة

انتو يا ناس رفاعة عملوا ليكم تعميم على حكاية الwake up..؟
شايفة في كم زول / ة من هناك اتفقوا عليها

قت لي دكتورنا بقول انه

Quote: عِد الخدر المنتج والمصدّر الأكبر للويكاب..

والله ما بعيد لكن ابو مهيار ممكن يغالطو ويقول ليه العوايدة
باقي عنده تجربة مريرة كانت مع الويكاب في العوايدة
تسلمي يا مريومة على طلتك
وسلام للدكتور وعلوية كتير

Quote: الا ويكاب الطماطم والبصله المقليه دا اول مره اسمع بيه بعدين اول مره اعرف انه الكول يؤكل مع الويكاب بتاع اللبن الفطير!!!!

تقولى شنو يادومه فى الحنكشة لكن ؟؟؟

أماني (وووووب علي أنا من الإسم دا)
سلام ليك ولي تراث ومحمد وإخوته

إنت عارفة زماااااان وأنا صغير كنت معزوم نوم مع ودأهلنا وجابو العشاء وكان ملاح ويكاب فقلت ليهم أنا ما باكل ملاح الويكاب فقام ابو الولد سخر مني وبي زعل قال لي ما بتاكل ملاح الويكاب؟؟؟ يعني نعشيك بي مصقَّع؟؟؟ وكأن المصقَّع دا لبن الطير في إستحالة الحصول عليه
أها اليوم التاني بديت أسأل من المصقَّع دا شنو؟؟؟
إتخيلي لقيتو قاصد ملاح (الأسود) أنا أخاف من الويكاب يطلعلي أسود

عندك فرصة 48 ساعة رديتي رديتي ما رديتي بستخدم الإستيكة وبمسح وكان ما مصدقاني أسعلي منى خوجلي

الود الوقور للجميع

معليش للتاخير في الرد
الاخوات الكرام
انا اقبل كلام الجندرية و الاخت لنا ما محتاجة واسطة يكفي انها انصارية بت انصار و الاخت لنا معزومة معانا حاجات كتيرة الايام دي
شي ملاح ويكاب شي نعيمية لحمها ناشف من السودان بصلتها محمرة من السودان
دقيق الذرة من السودان
الدخن من السودان
و الله ما فاضل الا نجيب الحطب يعوسو بيهو
تمام التمام
لنا مهدي تلفونك كم نخلي المدام تعزمك
طبعا برضو في فسيخ .
و دكوة
اها نشوفك بس ادينا التلفون

الاخ domdom

تسلم ابوي ، الكرم هيلك ، ولنا فعلاً ما محتاجة واسطة

فرحتني مشاركتك التانية بتاعت الفتح الويكابي دي
ربنا يجعلنا قدم خير دايماً
وتتهنى يابا
القروش بجن بلا بوست مني

الجندرية ..
وكل الناس الهنا ..

والله ونستكم عن الويكاب دي ألذ من الويكاب ذات نفسو ..
أنا طبعاً من الشمالية (ناس تركين وكدا)
يعني ماعندنا معاهو أي علاقة
لكن دا ما بيمنع إنو أكون أكلت الويكاب ..
مشيت رفاعة زيارة وأكرموني بيهو في فريق القبتاب ..
كشئ جديد ما استسغتو لأول مرة , لكن كلامكم دا خلاني أغير رأيي
وأفكر أجربو تاني ..


*الجندرية البوست الجاي أعمليهو عن كبدة الإبل

الجندرية العسللى

Quote: أن الويكاب " رماد القصب المحروق يعمل منقوعاً بالماء مع اللبن أو الماء

ويكة ولبن تساوى ويكاب ؟!!

ويكة ولبن مع بعض؟!!

ممكن اخت فيهم حبة كريم كارميل ؟!


حاجة تجنن ياخ !!

ال ويكاب ال !!


جيت اعملو الويكاب ده وغلبنى !!!

اول مره انا اضوق الويكاب دا كان مع عرب من البطاحين المسلميه و انا بت بندر وكدا ومع اني ما حنكوشه باكل النعيميه والكراره وام تكشوا والسبروق ,الورق وحتي الكداد ممكن اكله وبموت في التركين والفسيخ والمرس والويكات بانواعها ام رقيقه .ام شعيفه ,التقيله , ام بربر . اها لما جابن ملاح الويكاب دا ودخلت يدي والله بقيت ابلع فيه ومعدتي تجي مخمومه لي فوق. النصيحه لي الله ما عجبني تب. لكين طبعا هو تقريبا فطور شبه ثابت عند جاراتي المهم بعد فتره بقيت اكله لكين من فارقتهن ما اشتهيتو .
ويا عجوجه والله ملاح المرس دا حلو شديد والعجب كان ظبتتوا ليك و زوله غرابيه تاكلي اصابعك وراه متل التركين برضو بحبه موووووووووووووووووووت.

Quote: غايتو الما عارف يقول ويكاب .. نزار ودعمي دا بتاع .. القطر قام .. النوع البيكب الحاجات كلها مع بعض يعني عادي جدا تغرفي ليك .. جردل يا طشت من جوه الحلة ولا بيهمو حاجة

يا تمبس والله جبت الحكاية من آخرها...يا راجل انا لي تلتاشر سنة
باكل في المطاعم...القطر ان قام هسي دي تلقاني قاعد جنب ست الطعمية...
والقطر يقوم ويتدفق ويتحتحت حتة حتة...لامن حديدو يتلصق في الفلنكات
حتين اجي من جملة الجماعة الطفائين...غايتو اكيش مني الله ما خلق
لكن النصيحة لي الله جارتنا هنا ملكة الويكاب...لكن بس في رمضان

يا اهلنا معليش
استثناء تاني

ما شايفين بدر الدين حلا دا قاعد يومي لي باستيكتو الكبيرة دي ؟

طلبتك بالرسول يا البدري زيد لي مهلة الاربعة وعشرين ساعة شوية
برد ليك بعدين لما ارجع من الشغل

Quote: طلبتك بالرسول يا البدري زيد لي مهلة الاربعة وعشرين ساعة شوية

الرسول عزيز وكريم

الجندرية إزيك

أنا لي تلااااااااتة يوم بقرا عنوان البوست ده وأزوغ منو !!! ما عشان ما باكلو لكن بس منتظر الملاح يمرق والكسرة تكون بقت بايتة ومجهز شطتي الخدرا الما خمج.

الواحد جاي من برا خشمو يمطق ، هسع التقول عاصرين ليمونة في خشمنا!!! الله لينا نحنا العزابة

نقول ملاح الويكاب نلقاها مرقت في السلج ... وفي الأم كرم كرم تخصصنا نحنا ناس سنجة وناس النيل الأزرق زي ما قال أخونا عصام جبرالله. وأخونا الفوق ما قصر في الفهم والقعدة وجو المطرة والسمنة وااااااااااااااااااع... غايتو ما عارف لكن إنشاء الله باكر دي أنا صابح شبعااااااااااااااااااااان كده ملاحات (والفاتنا في البوست ما بفوتنا في حلمنا) والحمد لله مقدماً .

سلام يا جندرية

Quote: ونحن جلوس نغسل في العدة ونرجئ قدر الامكان غسيل حلة ملاح الويكاب

هذا ما يسمى بالموكأ , وهوما كثرت ويكته وكانت في كامل لياقتها ولم تكن عاولة
والله ده اجمل إرجاء سمعته منذ زمن بعيد

الجندرية سلام
ملاح الويكاب هو أول ملاح كيماوي في العالم. وأنا شاهدت أماكن تصنيعه زي ما قالت بت الحسين في قرية(عد الخضر) بالقرب من رفاعة وهي مصانع أشبه بالمفاعلات النوويةبس المصيبة يقوموا يضربوها صواريخ.

جندريتنا إزيك...
يقول ليك فلان ده(عربي جزيرة ساكت) ليه ماتراهو عشان الحاجات دي..قصب ورماد.. وإنت ماك بعيدة من هذه المركب..
...........
لكن اقول ليك حاجة؟ جربتو والله.. بجد يستحق إفراد بوست.. وفعلاً غسيل عدتو يكره الحياة زي ما لاحظتي إنت ملاحظتك الدقيقة خاصة الحلة العملوهو فيها... وغسيل العدة هذا الشهر على أنا..حسب القائمة المطبخية الجديدة ومشاركة ومؤازرة في الحياة.. وجربناه هذا ال.. ويكه..اب.. شكري

السلام للجندريه....البنيه الفنجريه

Quote: والويكاب من الرماد

ناس البندر بخموا الرماد وإنتو هناك بتاكلوه؟؟..طيب دا برضو بتاكلوه قبل رمضان بيوم؟؟
خم الرماد معروف حرام..بس أكله داير ليهو فتوى...ودي مابقدر ليها إلا الشيخ بدر الدين شنا
تحياتي

الزاكي

أنا بصراحة منتظر متين ينتهي بوست ملاح الويكاب



عشان نبدأ موضوع

مـــلاح النعيميـة,



يسـوى كتير ملاح النعيميـة,


يلا سلام


أحمـد

شكرا للجندرية ...
اخيرا الواحد لقى common ground تفتح النفس

الويكاب ياسادة هو ملك اللايوق بدون منازع
Wake up is the king of lay oooooogh
وسمى الويكاب..لان انواعه العديدة تنتمى لقبيلة الويكة..وهى القبيلة المسيطرة على مائدة اهل السودان
وافضل انواعه ويكاب الدخن ..يعنى المعمول من قصب الدخن.والويكاب من غير سمن بلدى زى المكشن بلا بصل
الويكاب رفيق العصيدة الازلى...الاستثناء الوحيد ..هو الرهيفة الجاية حارة من الصاج...
وطوبى لمحبى اللايوق فلهم فى الويكاب مثلا اعلا....

Quote: * الويكاب : جاء في قاموس اللهجة العامية لبروف عون الشريف قاسم ، أن الويكاب " رماد القصب المحروق يعمل منقوعاً بالماء مع اللبن أو الماء وكلاهما يضاف له البامية الناشفة مسحوقة او اللوبياء فيصير إداماً . وهي مكونة من مقطعين ويكة والمقطع البجاوي آب الدال على المفعولية . قال العبدلابي : ويكابو في السوايب مكمد ". قاموس اللهجة العامية في السودان ، ص 1065.

انتظرهــا كل عام.....تاتى الينــا تحمــل خيرات بلادى...و تقول "جبته ليكم معاى دقيق كسرة" بالرغم من أننى الح على أخوانى" رجاءاً... لا أريد أى شىء من السودان أى حاجة متوفرة هــنا" بالرغم من ذلك تاتى الينــا محملة بالخيرات , أفاجــأ فى أول "جمعــة" من حضورهــا بأن الفطور جـــاهز الساعة 8 بالضبط يزينه الويكــاب...فهى تعرف باننى أحبه كمــا احبهــا...ربنــا أمد فى ايامك واديك العافية يا أعظم والدة......

شكراً الجاندرية على المعلومة...كنت أظنه حجراً مجهول الهويـــة...

صديق-الدوحــة

الجندرية
سلام عليكم
شوفي يا بت الناس مما فتحت البوست بتاع الويكاب ده انا حصل لي فتح ويكابي
يعني لو ما فطرت بي ويكاب اتعشي بيهو
عليك الله افتحي ليك بوست بتاع قروش كتيرة و لا بيوت فخمة نقوم نشارك فيهو يحصل لينا فتح نملا جيوبنا و لا نسوي لينا ضظل لي ولديتنا
اها رايك شنو و شيخك منو
سلام

الجندريه

الويكاب اكل الشيوخ عندنا في السودان

اخر مره اكلت الويكاب مع شيخ عبدالرحيم البرعي عليه رحمة الله
في المانيا قدمه لنا الشيخ عفيف الشيخ المبارك من ابناء مدينة طابت

بس لم اكل ويكاب مضاف الي مكوناته بصل

اسة يا الجندرية يعني ملاح الويكاب ده ملاح رماد؟؟
أسة أنا أقول بسم الله وأقوم آكل لي ملاح رماد؟؟

بشهد الله ما في اي استعلاء طعامي نحنا من مناطق مهمشة لكن سمعت بيهو لي سنة وأنا أقدم من الكسرة المرة
وبعد داك اتمنيت من باب السودانوية اضوقوا واتعرف على الأخ
يطلع ملاح رماد؟؟

الأخت/ أماني وضيوف ملاح الويكاب الكرام
السلام جاكم

جابتنا ريحة الويكابة قلنا ندخل. أتمني ان تواصلي ايها الجندرية في تعريف الحناكيش و الحنكوشات بثقافة الملحات (بكسر الميم) التي تعج بها مناطق وسط السودان بصفة عامة والجزيرة بصفة خاصة.

هناك أيضا ملاح التمليكة وملاح البصارة من الملحات التي تحتاج شيئا من الوصف ومن ثم اضافتها الي قواميسنا العامية ان لم تكن مضافة.

Quote: وبعد داك اتمنيت من باب السودانوية اضوقوا واتعرف على الأخ يطلع ملاح رماد؟؟

الأخت شادية الشي مو كلو رماد، الرماد يعني لزوم الطعم وتحديق الملاح. وبعدين ما تنسي انو رماد مصفي ومنقي بعناية فائقة.

أرجو ان يستثني هذا البوست الظريف من الأرشفة.

تحياتي

عماد خليفة