الأسطورة في كلام الحبوبات : في الفروع الخدر

راودتني فكرة هذا البوست أثناء ونسة مع عزيز كان يشكو من صحته
وعندما اتت سيرة الموت قلت له ( برية في الفروع الخدر )
سـألني عن معناها
واندحت اتداعى عن كلام الحبوبات وحضور الأساطير وبديع القصص الشعبي فيه

***

يقال ان جميع الخلق مسجلة اسمائهم / ن على أوراق شجرة على العرش
كلما يولد شخص تنبت ورقة جديدة
وعندما يقرب اجل المرء تبدأ الأفرع التي بها ورقته / ها في الاصفرار

فتقول الحبوبات في الدعاء بطول العمر
برية في الفروع الخدر

ومنها الدعوة على الشخص
يرمي ورقتك
أي تسقط من تلك الشجر ائذاناً بموتك

وبرية كلكن / م في الفروع الخدر إن شاء الله

لكن ما رأيكم / ن بان ننبش هذا الأمر ونتداوله هنا ؟
يبدو لي مادة بحث خفيف ظل وعميقة ايضاً

وشكراً لذاك العزيز لاهدائه لي هذه الفكرة
كل الاماني بالصحة وطول العمر والسعادة

استاذه اماني

فكرة جميلة اول من يقرا واول من يرفع البوست ...ساعود

محمد عبد الرحمن

شكراً ليك على القراءة والرفع
وبانتظار عودتك
لكن عليك الله اعفيني من استاذة دي
اماني بس كويسة خالصة ومريحة جداً

الجندرية...

تحياتى نديات

فعلا الحبوبات مؤسسات تنتج حكما

تداعى الى ذاكرتى الآن صور عديدة

لحبوبات نابهات ومتحدثات بارعات

ساسعى جاهدا لإثراء هذا البوست

الذى يشى منذ الآن بفرادته...


لك الود من قبل ومن بعد....


عبد الرحمن قوى...

العزيز قوي

وشكراً لمرورك وبانتظار العودة الموعودة

العزيزة اماني

كل موضوعاتك هادفه

انا بجمع لي شوية كلام حبوبات وبرجع ليك

عبد الله بابكر
شكراً ليك وفي رجاء كلام الحبوبات
ما تطول علينا

ده كلام اخدر وتريان يا جندرية
جزء كبير من تراث السودان الشمالى وفنونو عنده علاقة بالموية والشجر والخدار. المثل يقول عن الشخص المعطاء، ضراعو أخدر. و ( ربّنا يخضّر ضراعك )

دا يكون من شنو يا الجندرية؟

سحلية؟

ولاّ شنو؟

عادل عثمان
وانت الصادق
يكون حربوية
لوووووووووول

اها عرفنا دخول النيل والخدار والشدر في اساطيرنا وقصصنا الشعبي
طيب
مش مسلمي /ات السودان مصنفين/ات سنة كلهم/ن كدا
مافي شيعي واحد حايم بهناك ؟
اها فسر لي دي ؟
لمن تجي مسافر
ويجن يودعنك
مش بقولن ليك
ودعناك تسعة وتسعين نبي
اولهم محمد واخرهم علي ؟!!!
تعرف يبدو لي الموضوع دا مبحث كبير خااااااااااالص

شكرا يا جندريه

انا من النوع البحب كلام الحبوبات عشان كده لما لقيت في كلام حبوبات طوالي

دخلت البوست

العزيزة سلوى صيام
مرحب بيك
شفتي ريحة الحبوبات
بتلم الحنان كلهم / ن
ياهلا

الجندريه سلام
كلامك سمح لكن الناس الدخلوا ديل كلهم بيقولوا نمشى ونجى تانى ولا واحد فيهم قال حاجه انا شخصيا عجبنى العنوان وقلت البيجى من السمح كلو سمح . اها الجمله الاخيره دى رأيك فيها شنو كلام حبوبات ولا لا
غايتو انا عندى حبوبتى رحمها الله عندها دعاء جميل بتقوا اضانى فى العتق الغزال لما تسمع ليها كلاما ما ياهو ومثل هذه الاقاويل اندثرت اليوم . بعدين الحبوبات يقولن ليك الوليد ودوهو التمنه يعنى نقطة البوليس . وانا برضو لى عوده
ام الاء

كتلو عريف اهله فى الريف
بجى احكى قصتها يااستاذه الجندريه
ووقعتى لى فى جرح بحب كلام الحبوبات ومبارياهم من السودان ومصر وحسه حبوبات بتسبرج

رويه
ما ظااااهر عليك تربية حبوبات
قايلها بتدسى
اها ما اكتل ليك الدش بتاع قصة العريف الاهله في الريف
بس ماتتأخري
بعدين اختي لي استاذة دي
والله الصق ليك واحدة هسي ولا ادتكترك
تاني كان دسترتي ما تنزل منك

العزيزة ام آلاء
مافي عوجة
حبابهم /ن متى ما يجوا/ ن
ترانا قاعدين / ات
وحبل المهلة يربط ويفضل

تسمح ليك الدنيا مع وليداتك يا يمه
غايتو اضاني في العتق الغزال دي تمشي تتقصي وتجيبي لينا قصتها
نحن بقولن
اضاني طرشة وواطاتي خرشة
وله اضان الحامل طرشة ما تسمع الشينة
اها في رجا عودتك حت اتي
بس نحاول نجيب جذر المقولات
يعني نقصها ونشوفها جاية من وين
اتفقنا ؟

شكراً ليك وقدمك لابو ابراهيم

امانى الحبيبة
ليك السلام كيمان
كان تقولى ليه
برية انت شرك مقسم على الدقشم
وودعتك لأمين الوداعة
ولى عودة حتما للمواصلة
ولك الود
ام وضاح

العزيزة ام وضاح

شكراً للزيارتين
برضو طبعاً ما قنعانين/ ات منك
راجين/ ات التالتة

شرك مقسم على الدقشم

اتخيل سايده عند اهل غرب السودان
تعال راجعه
وقعديها لينا
كويس ؟

جندوره انا جيت تانى
اضانى فى العتق الغزال يعنى اضانى فى النبى صلى الله عليه وسلم لانو هو عتق الغزال لكن ما عارفه القصه بالضبط .
ام الاء

جيتكم راجعة الجندرية وضيوفها
عاوزة اصحح المثل بتاع تيتا
هو مش اضانى وراء العتق الغزال هو كما تقول حبوبة انا واقعة وراء العتق الغزال شفيع الامة .
وقصة الغزال العتقها الرسول ( ص ) معروفة لدينا الغزالة اسرها اليهود وبكت لانها عندها صغار يرضعون وضعتهم لتوها ورفضوا واخذوها معهم وفى الطريق رأت الغزال الرسول ( ص ) وخاطبته ودموعها تسيل من وجهها فدهش اليهود عندما عتقها الرسول ( ص ) مقابل مجموعة من الاسرى اليهود لديه .
ومن يومها يستجير المسلمون وراء العتق الغزال محمد عليه الصلاة والسلام .
ولكم التحايا

ام وضاح

الأخت العزيزة... السلام عليكم ورحمة الله وبركاته والحضور الكريم أجمل تحية
طبعا لايمكن أن نغيب الفكر الشيعي عنا نحن السودانيين وبرغم إننا نصنف أنفسنا كسنة... ولكن توجد كثير من الأفكار والمعتقدات التي نتعامل معها بشكل مسلم به وهي أصلا للمذهب الشيعي ولا نري فيها اي ضرر وحرج.. وهي كذلك ...إما حكاية شيعة وسنة ده موضوع طويل كانت للدسائس والفتن والإطماع نصيبا وافرا في تأجيج الخلافات وتوسيع الهوة بين المذهبين... طبعا دخل الإسلام السودان وانتشر بواسطة الطرق الصوفية وشيوخها الإجلاء الذين اتي اغلبهم من بلاد العراق وفارس...و كثير من المعتقدات والممارسات التي نمارسها في يرجع أصلها للشيعة ومن ضمنها فكرة المهدي والمهدي المنتظر ... والاحتفال بالمولد النبوي .. وأذكار الصوفية الرائعة...والكثير والمثير..... ومن أهم ما في الأمر أن الشيعي والسني سيان في بلاد السودان .. وليس كما ينظر للأمر عند الوهابيين مثلا.....

الجندريه انت تتعلي ما تتدلي
حبيت اسلم عليك... وشكرا علي بوست الحبوبات والله انا بريدم ريده...
قريب دا عزمونا ختوبه و مشيت انا و امي.. دخلتنا بيت العيزومه كدي عيني و قعت علي مره حبوبة حلاة الدنيا فوقا... لابسه التوب الساكوبيس البرتقالي و الشلوخ لي ورا... قلتا لااااازم اشوف لي طريقه اتونس معاها... يا زوله انا الليل كلو بتونس معاها هي زاته تكون استغربت...الذ شي قامو قالو لي قومي ارقصي... لمن شافتني ابيت اقوم قالت يا بت خير ليك قومي التقله الزمن دا ما بتنفع... اكان لقيتيلك شي امسكي فوقو قووي....

الله يطراها بلخير ريحتني بي ونسته البسيطه..

العزيزة المبدعة المجدلية
او الجندرية

ربما تؤسسين بهذا الاقتراح بواقعيةاسطورية سودانية جديدة
على غرار الواقعية الاسطورية الاتينواميريكية

فالحكاوى السودانية
و احاجى الحبوبات

ذاخرة بالمشهدالاسطورى
تفاعلا مع الحدث الواقعى

لكى كل المحبة و الود

up

استاذتى الجندريه
هل لك مع الادهاش عهد؟
سابدا لك مع الحبوبه منذ الطفوله الباكره و ساواصل ما تلاها
بعد الوداع الصباحى و استلام ما تيسر من يدها، يبدا (قص الدرب) و تتبع آثارى على الارض و كانت تنشد
اقص دربك البغادى
شان تبرا و تجينى ًصّّادى
و حين الرجوع تسال كيف صرفت النقود فاحكى بصدق
لا تودر قروشك فى الجنيات خساره
مافى زولا بريدك
يريدك نخر(بفتح النون و كسر الخاء) ايدك ( اى ما تجود به يداك)

ساواصل

برضو يا الجندريه يا استاذة
من كلام الحبوبات الحجا والالغاز

اها هاكي
راقدة على قفاها ويحرقو في حشاها

كان شالو ما بنشال وكان خلو سكن الدار

امك تنط وابوك يرصعا

احمر بلو في امك غزو

احمر مدلوك في جعب ابوك


ادونا الحل بسرعة

سلام يا الجندريه
كتلو عريف اهله فى الريف تقال حينما يتم قتل ثعبان او اى من الهوام . والفكره انه حين قتل الثعبان فان انثاه ستأتى للانتقام من قاتله ليلا لذلك يجب وفى لحظه قتله ان نقول كتله عريف اهله فى الريف لكى(نجهجه)المنتقمه فلا تعثر على قاتل رجلهاولا تعرف من هو -لى حبوبه غضبت جدا حينما قتل ابنها ثعبان وقالت قولتها هذه فاصر ابنهاوكان صغيرا ان يقول(كتلو سليمان اهله فى امدرمان) وباتت ليلتها ساهره خوفا عليه.

اما بالنسبه لتربيه الحبوبات فأنا تربيه حبوبات اصيله لى اربعه بدل اتنين لا انسى حبوبه (غاليه) رحمها الله التى كانت متعتى المفضله فى ان تأخذنى فى حجرها لالعب بشعرها الناعم ذو الالوان الثلاثه وامرر يدى فى تجاعيد وجهها ويديها و اعطن وجهى فى توب الزراق ذو الرائحه التى لا انساهاوتحكى لى احاجى اهلها البقاره ...لا انسى لهجتها الحلوة... كانت مربيتى رحمها الله

اما بالنسبه لاستاذه حبيت اشاغلك وبرجع ليك تانى احكى ليك عنها

هى عريانة وتكسى فى جيرانها
الحل يا شباب
بت القبايل

العزيزة الجندرية تحياتي وكثيف احترامي

ياسلاااااام عليك الدرر دي من وين بتطلعوا فيها مزيد من الدرر الغوالي بنكهة الحبوبات وجلساتهم العصرية وقهوة الضحوية وقعدة في بنبر كده تحت ضل ‏شجرة نيم وعنقريب هبابي

بس عائز اعرف كلام الحبوبات لمن يقولن ليك يالكباشي يانبي نوح وبالذات بالليل أو لمن يشوفو ليهم عقارب أو ثعابين دي يكون شنو‏

بت القبائل حلاً لسؤالك دي مش الأبرة ‏
هاكي دي
حبوبتي في ديوانا تأكل في مصرانه ‏
دي البعرفها ليهو جائزة

الأستاذة الجندرية

نبي الله الخضر
صلاح مصطفي
حزب الخضر
كلها لاحت بخيالي عندما توقفت عند هذا العنوان
ليه؟ لا أدري؟

سمعت جدتي شينة أم المليح
تقول عندما تقدم لها هدية
(خضر زراعك)
كيف يعني

وبالمناسبة جدتي ليست شينة كما كما تكنى
بل في زمانها ( وام جركم ما بتأكل درتين) كانت جدي
وخوف عليها من عين الحاسدين أطلق عليها لغب شينة
بدلاً من سمحة أو جميلة

الاخ الفاضل ابراهيم على ماتزعل العنقريب وشكرا للاجابة تحياتى لجندرية بت القبايل

شكرا جندرية الحل: الرتينة
هاك ديل:
1 ) شاده راسا بلا وجع و لازة كرشا بلا شبع
2) قطع البحر بلا عضم ضهر
3) تويري توير ريف ىسقىلو حوضين ويقيف
4) دخل العيش بلا كشكيش
معليش يا جندرية الغلوتيات برضو تخصص حبوبات

الاخت الجندرية
تحية طيبة
طالما الحديث عن الحبوبات..اقدم لك فقط هذه الاسطورة السودانية بعد توظيفها سياسيا..وهى تركيب لاكثر من قصة شعبية فى السودان..وارجو ان تكون في سياغ الموضوع


الطيب والشرير والقبيح

الاخت الجندرية
سلام بطعم سر الرحيق

اختك تربية حبوبات مية مية
كمان ماركة امدرمانية

طيب احسبي
لمن الحبوبة تكون رضيانة عنك بتناديك تقول ليك
تعالي "يا حبيبة الليل الطويل"

ولمن تكون زعلانة من زول
* شكيتك لي بيدن قوية
* شكيتك لي لا نام ولا اكل الطعام

او تقول ليك يابت هوي "ارعي بي قيدك"
أو تقول ليك البت دي خليها "قائمة بي جهله"
أو خليها كدي لمن تجيب ليها "مصيبة ضقلة يكركب"

والله يا الجندرية الموضوع عايز بحث فعلا لأن كلام الحبوبات مليئ بالحكم والأمثال التي تعكس الواقع وتجليه رغم إرتباطه في بعض الأحيان بالأسطورة وحتى الأساطير ربما كان الهدف من تداول أدبياتها توجيه وتقييم المجتمع أو رموز من المجتمع والرمزية تنشط في عهود الدكتاتوريات والظلم من قبل الحكام والسلاطين والملوك على مر العصور
والامثلة كثيرة كأساطير كليلة ودمنة وقصص ألف ليلة وليلة والشاطر حسن وأبوزيد الهلالي أما في أدبياتنا الشعبية المحلية الامثال كثيرة وتضرب في مناسباتها
أها يا الجندرية حبوباتي الاثنين محسيات وأدبنا النوبي مليئ بالحكمة والامثال المعبرة وكذلك الاساطير الشعبية وكتاب الأحاجي للأديب الراحل الطيب صالح مليئ بالأحاجي ذات الجذور النوبية
أكتفي الآن ولي عودة بإذن الله ومعي بعض من كلام الحبوبات وساعدوني في الترجمة من الرطانة للغة العربية

واحد أب عشان خاطر الحبوبات ومن أجل طرافة الموضوع
وعشان خاطر عيون الجندرية

الله يخضر دروبك

علي فكره

أنا

عايز اعرف لي معني مثل كده اسمو

( السبت اّخَدر) -ياجناي- لكن ما متاكد يا جناي دي مع المتل

ولا مع حبوبتي





احب اماني وهبو وهبوبتي

ٍسلام مربع

وااادي قعدة يا رصينه

الأستاذة الجندرية ..

لما تجيبي موية لحبوبة من الحبوبات بتقول ليك: يرويك نداك..


ياااااااااا

انا كنت بس اقعد أرجى حبوبة تعطش..

قصتها شنو ما عارفة.. لكن وقعها علي مريييييييييييييح..

وبجيك راجعة .. والله ما غشة يا أم آلاء..

بعد تأكيدنا كلنا على عشق الحبوبات و كلامهن هاكن/م الرصه دى
الحبوبه متباهيه و متعوجبه:
ابزق فى الرز الابو الخلفه و العدس الابو الطلبه
نمل السكر فى بيتنا يترهرج

الحبوبه زعلانه:
انتى انتى تلديك الخصيمه لى ديمه
انتى تقعدى كببه
تضحكى؟؟ تضحكى بلاهن يعجبنى خلاهن
خليتك للاقوى منى و منك

الحبوبه مستهكمه:
أضحكن يا ركبى سننونى عجزانه
دق الباب و اخنق العتبه

و ح اواصل يا جندريه لانو الموضوع شيق و عشان قربت اكون منهن و باقى لى اخير استعد

العزيزة جندرية تحايا بالكوم
هناك مابيننا توارد خواطر عجيب انا هذين اليومين مسكونة بااغاني الحبوبات وبدات بالكتابة عن هذا ولكن وجدت نفسي انداح في مساحات خواطر ذاتية جدآحول عذابات المرْأة والاسي الذي الذي يلف مسيرتها علي العموم شكرا لك لتصحيةالخاطر وسااكتب واستكتبك في هذا .

اتذكر الان في كتابة توثيقية عن احاجي الحبوبات والاغراق في الاسطورة والخرافة والمتامل لادب الحبوبات ان جازت التسمية هو ادب ذو نزوع واضح نحو الخرافة وفي راي ان علة ذلك في محدودية محيطها مما يدفعها لخلق فضاءآتها الخاصة والتحليق فيها ومن ثم استدعاء رصيدها من الخيال لتضفي عليها اتساعا واتساقا وذلك في حد ذاته فن صعب ويحتاج لدربة وحنكة ....تخيلي لوان هذه الحبوبة في زمانها تمتعت بقليل من حرية الحركة والتجوال والسفر مانوع الادب الذي كانت ستنتجه ربما سيكون اكثر تعقيدا من واقعية ماركيز السحرية .

في البال الان هذا الدعاء الملفوف بروح الاسطورة كثيرا ماكانت ترددهامي وهي في اقصي حالات الرضي عني

(يسعدك سعد بت المني الابوها دفعها والمولي رفعها)

ويسعدك ياجندرية

الهام

العزيزة أماني
هل سمعت المقولة التي تقول :
( الروائيون آخر جدات العالم )
إنها تصف كتاب الرواية بأنهم حبوبات .. وهذا يدل على مافي كلام أولئك الحبوبات من سرد شفاهي وأساطير عظيمة ..
تحية لك لنبش هذا الموضوع .

في مداخلة للأخت زولة في احد البوستات
عن كيفية معاملة زوار / ات بوستاتك
انتبهت لقلة ذوقي
فعذراً لكل الأكارم والكريمات اللذين / اللواتي مروا من هنا
وساعود لهم / ن فردا فرداً

شكراً زولة
انشاء الله ما تتراجعي عن فكرة بوستك بتاعت أداب المنتديات
عشان الطقش الروش زينا ديل ينتبهوا / ن

الجندريه يا اختى سلام

الظاهر بوستك ده كان قريفه ساكت
تعالى ّصاده والا
حق الحبوبات بلحقك

احمد بشير
والمشاركين / ات

والله ما جفاء ولا حفاء ولا قريفة
كنت راغبة فعلاً في مناقشة الموضوع لكن
الله عالم بالمشغوليات المسكتني من الرد عليكم /ن ومن المواصلة في الموضوع
المهم الف شكراً على مشاركاتكم / ن واثراءكم / ن للبوست