إلى حسين ملاسي : ليس اغراقاً ولكن ...

طبعاً في ناس كتار حيجبهم / ن الشمار وريحة الشكلة الفي العنوان

لوووووووووووووول

بس لانه ملاسي عنده حساسية من الاغراق ، ولاني قبل كدا اتفهمت غلط في حكاية الاغراق دي
فبقول ليكم / ن كلكم / ن الاسبوع الجاي بوستاتي حتقدكم / ن في الصفحة الاولى ، والحكاية مااغراق لكنها خطة التشطيب قبل الارشفة فلا احب ان تذهب بوستاتي للارشيف ولم ارد على المتداخلين / ات الذين اللواتي اقدر مداخلاتهم جداً .

محبة واحترام للجميع
وكل عام والمنبر عامر بيكم/ ن كلكم / ن

وحاتك وبي حالتي دي حاكم في بي عافية شويه كده.. جيت ووقفت.. قلت كان ملاسي طلع القرجه بتاعته.. أبكييييييييييييييييييي .. واقول يا حليلك يا بت جيرانا.. ...

عسل والله يا الجندرية.. اغرقينا عليك الله بذوقك وعلمك ..

ماما بتسلم عليك (حسي يقولوا حناكيش)
بنت الحسين

حكمة اليوم:

لا تؤجل عمل اليوم الى الغد.

مريومة الغالية
برية سلامتك
يعني انوم قفا ، اتقين ان لي بواكيا
سلم علي ( ماما ) كتير
بعدين انت قايلهم لسه ما قالوا ؟
بكون زمااااااان طلعوك حنكوشة
الله يقطع احكام القيمة محل ما تقبل

****
ملاسي
لكن هو اليوم دا يحوق في النت ولا في شغل المكتب ولا في مراجعة واجبات الشفع
ولا في زيارة الجيران ولا في استقبال الضيوف ولا في .. ولافي
لما اجي السودان في الاجازة حاجيب ليك معاي كتاب ( الوردية الثانية في حياة المرأة العاملة ) هدية وابقى فالح ما تخليني الم في حرمكم المصون

الحبيبة ست الحبايب:


بس عشان تعرفى انك التيلباثى البيناتنا وما يجيك احساس سلبى، انا قررت نفس القرار وكنت عايزة اكتب بوست اسمو يوم الرد العالمى، عايزة اكمل ردودى على كل البوستات المفتوحة سابقا ولم تقفل.....

ده يسموهو شنو؟؟

ممكن اعمل كده طالما انتى اتقدمت بالفكرة قبلى بدون حرج وشعور "سلبى"؟؟

ويمكن يكون الاستئذان ده يستبطن الاحترام الكبير البكنه ليك ولقرائك الافاضل..فارجو التفهم..

وانا برضو يا ملاسى ارجو منك عدم الانغراق ...زى الجندرية دى

حبى....


"مرات بحس بى يتم شديد جدا فى البوردده، اغلب الاعزاء رحلوا أومشوا أوطبلوهم برةونحن دافرين، بنفس او غير نفس تغيب ونظهر، بطعم ومن غير طعم المهم ندفر مش كده عليكم الله؟"


بوستاتك غرة صباح البورد يا جندرية...ومواصلتك..... حياة

حبيبة قساي انا
شفت كيف ؟
حتى قالوا صوتنا زي بعض وكمان في زول زادها انو صورتي الاخيرة دي فيها شبه منك
شفت الريدة شن بتسوي !
حابقى شبهك عديل وجد لي امي عاد

Quote: ممكن اعمل كده طالما انتى اتقدمت بالفكرة قبلى بدون حرج وشعور "سلبى"؟؟ ويمكن يكون الاستئذان ده يستبطن الاحترام الكبير البكنه ليك ولقرائك الافاضل..فارجو التفهم..

يا ستي الفكرة وستها تحت امرك ولو لزم الامر نسحب البوست دا خالص عشان تتقدمي انت بالفكرة بدون شعور ( سلبي )
واحترامي إليك
وطبعاً محبتي

Dear Genderia
good idea
I will try to do the same
nada

نسبة لمكانة الاخوات؛ الجندرية؛ تماضر و ندى؛ الكبيرة لديّ و لدى الجميع؛

فانه يسرني ان اعلن عن تعليق قوانين الحد من الإغراق؛ و ذلك حتى العشرين

من شهر مايو الجاري؛ على ان تفعّل - مباشرة - بعد هذا التاريخ.

Quote: لما اجي السودان في الاجازة حاجيب ليك معاي كتاب ( الوردية الثانية في حياة المرأة العاملة ) هدية وابقى فالح ما تخليني الم في حرمكم المصون

تعرفي يا الجندرية؛

اخشى ان تكون حرمنا المصون هي من قامت بتأليف هذا الكتاب.

التحية للجندريات والجِن زيرسالم ،،

وبدون أيِّ Personality Stereotype .. يا أختنا الجندرية ، ذات الحساسية التنميطية والكاتبة والصائغة لموضوع التنميط ؛ لا أدري لمَ ذكَّرني هذا البوست الجميل ، سيرة الزِّرِّيعة ! ومعاملات تجفيف وفندكة بعض المواد الغذائية و ال " قَدَيد " ؟!!لزوم العيد والمناسبات السعيدة وللمستقبل القريب والبعيد لأجل عيون التوفير المادي واختصارات الوقت في إعادة الروتين المنزلي !!؟ أهيَ صِنعة جندرية منذ قصة "مريم الصَّناعْ " في بُخلاء الجاحظ ؟ أم هجرٌ لعمل اليوم للغد الآتي ؟ لدواعي الورديّة الثانية للمرأة العاملة ؟؟

لقد طلع توقُّعنا " الشماري " على فشوش ! حينما تحكّر إسم "ملاسي" عنوان البوست ! ولكن ، سيكون من بدائع هذا البوست ، أن " صانع ألعاب الإغراق الكبير " قد أقرّ بكونه مُغرقاً للبورد في قَعَـرْ زير في سبيل ماعندو نقّاع ! ؛ وقد تعهّد بتعليقه قوانين الإغراق للأجل المحتوم في 20مايو ؛ فهل نطمع ان تُعطى الفرصة للجندريات لنشر عبق بوستاتهنّ على الصفحةالأولي ، أم أنّ في تعليق نفاذ القوانين ما يتيح للمُغرق الذي شرِبَ خريف العازّة وبت ام ساق في الإغراق ؟ أن يسحب الأنظار مجدّدا لسبائله بكيزانها المعلّقة ! ؟

يُحكى انّ : أحد إخواننا الجنوبيين ، حاصرته يوماً ، روائح " الحلومر " النفّاذة فقال :
الجندريات ديل قاموا على جنّهم بتاع السنة الفاتت ؟؟ ولآ شــــنو ؟؟!


سنكون بانتظار إغراق الصفحة الأولي ،، وفي انفسنا شيئٌ من " ولآ شـــنو ؟ "


مع صادق المودة ،،

Quote: ولو لزم الامر نسحب البوست دا خالص عشان تتقدمي انت بالفكرة بدون شعور ( سلبي )

لأ لأ لأ لاآآآآآ

امض فى سعيك وسامضى فى سعييى والله غالب..

والغرتو لى صرتو دى انا..."والبادى اظلم" ههههههه


يا مشرّفة....

العزيزة ندى
يلا شهلي الحكاية قرب باقي خمسة يوم بس
محبتي

*****
ملاسي
تشكر على تعليق قانون الحد الادنى من الاغراق
وخلاص الكتاب نغيره ب " كيف تسعدين زوجك " رأيك شنو ؟
تصدق مرة تراث مشى معرض الكتاب وجاء بس شايل الكتاب دا
لووووووووووول

*****

محمد أبو جودة
والله عاد عيني باردة قدرتك على الربط والتحليل الجندري ما شاء الله .
يبدو لي دا فعلاً سلوك جندري متوارث ، لكن هو ما هروب من عمل باكر ، هو استشعار عالي للمسئوليات وبالتالي الاستعداد ليها ، وحس تخطيطي ايضاً ، النساء ديل بتجاربن المتوارثة في امور التخطيط المستقبلية دي لو مسكوهن وزارة التخطيط يأمن ليك مستقبل البلد زي ما بأمنن فطور رمضان من عصيدتو لي عصيرو
واكبر لوووووووووول@ جندرة النكتة
تشكر يا سيدي
واديني بنغرق استحملونا بس

****

تماضر الحبيبة

Quote: وسامضى

امضي طوالي وورينا ، اهي فرصة عشان نعرف نزوروا ونسحب لينا شيك شيكين لسفرة السودان
لوووووووووول

***

الجندرية
قشة ما تعتر ليك أغرقي ولا خصاك
وأنا أصلو غارق في العسل لكن مرة مرة كدة بفتح الحنفية لآخر حد ونغرقو سوا ، سوا سوا يا جميل

يا ابو البنيات
باقي لي الخلاك قطعت الطلة كدي دا غذاء الملكة راسو عديل
تتهنى يا صاحبي وتحياتي للملكة
لكن لماتفيق من مطيق العسل ، تلقى العدة اتغسلت ودخلت الدولاب
الحكاية باقي فيها ايام
ثم انه حسين ملاسي علق قوانين الاغراق لحدي يوم 19 بس قدامك تلاتة يوم
اخد اجازة واتفرغ للاغراق

يا جندرية
مش في شاعر قال : ما أشقى في الأرض من حال محب على حال التلاقي والفراق
أظنو كان قاصدني
بس ما أختزنته في عروقي من عسل حا يكفيني حتى الشتاء القادم موسم أوبة النحل لمروجنا

أبو ساندرا
الجرسة ما عندكم لكن
دا حار ودا حار ودا ما بنكوي بيه ؟

ربنا يجمع الشمل يارب

وتتهني ياصاحبي بالعسل الخزنتو

فوق
للتوضيح وكدا