|
|
 Re: الحزب الجمهوري في السودان (Re: Ro3ah)
|
والله لكن ماشاء الله...غايتو روعة جابت لينا موضوع حي جنس حياة..ربنا يجزيها خير...دا دلالة برضو على أن نفسها تعتمل بالخير..مواضيع جادة...زموش الجدية ديك البي تطفش .. إنما الجدية البي تساعد الناس على البحث والتنقيب، وترانا هنا نسوق المسائل مبسطة..شوية شوية ..وبي لغة بلدنا لهجة الغبش...لأنو كان محمود أغبش بي يحب الغبش...
................
شكراً لى حيدر على كلماتو الطيبات والموصلي كمان رقيق الإحساس وياسر.. وود الجعلي..والباقين كمان شايفهم كلهم بمستوي المسؤولية
.........................
تعرفي ياروعة..ما رديتي على سؤالي.. الزول دا البي يخليهو يصر على أفكارو كدة شنو لغاية الموت...وبعدين ياروعة دا ما تقصير مننا...زول يصر على أفكارو حتي الموت...ونحن ما نكلف نفسنا نمشي نقرأ افكارو على أقل تقدير..وين ضريبة الشعب اللى علمنا ليها وصرف من قوتو الضروري عشان نتعلم ونقرأ ونكتب..وكمان نمشي لأعلي مستوي التعليم فى الجامعات..مو ضروري نقرأ لى محمود براهو..المهم نقرأ اي حاجة..ونشوفه..الليلة القراية ما صعبة..زمان زي الجمهوريين ديل..كان بيشيلوا الكتب يحوموا بيها في الشوارع..ويمشوا مدن السودان وقراهو... مرات الزول يكون داير يقرأ...لكن يصادف ما يكون عندو حق الكتاب...الليلة القراية بقت ساهلة..موقع في الشبكة فيهو معظم ما قال محمود وكل يوم السعي الى الأمام بأن يكتب كل ما قال محمود...لأنو دي أمانة....ما عليك إلا أن تعملي كلك بالماوس.. وتجدي قدامك كل شي..لا سعر كتاب ولا غيرو.....لمان ياسر الشريف المليح جاب ليك المواقع..قلتي ليهو أنا دايرة نقاش..كل مرة تحيلوني على المواقع المواقع.... المواقع دي ما فيها كل شي داير يقولوا ليكي ياسر... وبعدين ممكن تتخيلي زي سؤالك دا وزي كتابتك دي سألوها عشرات الناس ..كل مرة الواحد يذكرها جايز الواحد ينسي شي... وأحسن شي أنو الواحد يقرأ كتابات الزول نفسو الذي تقدم الي الموت باسم....بعدين هنا وهناك أكيد رد ياسر راح يجيك وغيرو وغيرو..
....................................
بعدين إنتي يا روعة ..جبتي شوية طوائف وشعب وفرق دينية قلتي محمود أخد من دي.. وحاجات تانية... هل ياروعة الزول بي جرة قلم ينسي حصاد وعرق وتعب البشرية العملوهو الناس.. الشي العملتو البشرية وقطعتو البشرية لابد أنو يكون فيهو شي صالح ويرموا الطالح..حتي الأنبياء...يجو يلقوا عادات يحثوا عليها ويلقوا عادات ضارة يزيلوها..المجتمع ماهو رجس من عمل الشيطان كلو... الأنبياء زي المزارعين يجو يلقوا الأرض النبات فيها قايم فيها القمح وفيها الحشائش... بالمنجل ينضفوا الحشائش ويخلوا القمح يقوم... وهكذا محمود كل زول عندو حاجة جميلة في المجتمع القبلو ذكرا فى كتبوا..من شعراء ومصلحين وساسة ..وأنبياء.. وحكماء لكن لدي النهي من فكرته الشي الجابوا من الجدة بمكان بحيث اصبح به بين أهله كالغريب....هذه الغربة مدعاة للبحث يا روعة والله شنو......بعدين في حاجة تحير يا روعة..الزول دا عمرو ما استعمل العنف.. ولا حصل شال مجرد عصاية على كتفو...يجي يقول كلامو والناس يسمعوا وبس حتي أتباعو رباهم على عدم العنف.. وألا كان ايام الأحداث ديكي أتباعو كان على أقل تقدير ممكن ينتقموا.. وكان فيهم الرتب الكبيرة فى الجيش.. وفيه الرتب الكبيرة في الشرطة.. والرتب الكبيرة في كل مرافق الحياة ...ببساطة كان ممكن يكون منهم ميليشيا تحتاط لنفسها وتحرس حقها بقوة السلاح حين يغيب الحق.....وهم قادرون على ذلك....لكن الزول دا ضد مبدأ العنف تماما..حتي يقول لأتباعه..العندو رائحة عنف حقو يراجع مسألتو.... يبقي زول زي دا..نقتلو... ونصل لغاية مصادرة حياتو.. والله نمهد ليهو كل أمر عشان الناس يعرفوا العندو..طالما هو زول لا بيضربنا ولا بيشتمنا...خايفين ليه نحنا لغاية ما نصل درجة مصادرة حياتو..وفي أواخر القرن العشرين..دا كلام دا بالله...بالله دا قرن نعيش فيهو.... طيب الناس واحدين يقولوا ليك خايفنو يفسد الشباب.. الشباب ديل هن إمعة.. حاجة بتاعة عقل..صدقا صدقا..ما صدقا ينصرف الي بيتهم موفور..محمود ماراح يرغموا ولا راح يقولوا حاجة.. نحن نخاف من ناس جون قرنق.. وهم يحاربونا..نوفر لهم فرص التفاوض والنقاش وموائد تقوم وموائد تنفض...ليه..عشان حاربنا يعني..نعمل هذا وناس تانيين نعدم حياتهم مرة واحدة..عشان فقط خايفين من كلامهم..مجرد الكلام....يبقي دا عدل دا.....
المهم في الأمر سوف نتناقش معك ياروعة حته حته..وياريت الناس يرجعوا لى كتبوا ..كلها موجودة في الموقع..يرجعوا ويقروا...الزول دا حياتو كانت عامرة بالحيل ..وافكارو موش افكار تهويمية.زوإنما كلها مربوطة بالواقع.لإخصاب حياة الناس.. ولجعل الحياة حلوة وتستحق أن تعاش.. وكل عملوا في إسعاد الناس.. ياريت الناس يلتفتوا ويقروا ليهو..عشان يعرفوا الحاصل بي نفسهم..لأنوا في غبار كثيف جداً في الماضي أثير حول الرجل بأطماع وأغراض وهوي نفوس..وسخائم...لكن أقول ليكم حاجة وأنا متأكد منهاتماماً.زإنو موضوع محمود محمد طه دا ماراح ينتهي ابداً بل وسرمداً..وكل مرة يبتق من جديد الي أن يصل الي غرضو..مهما كانت العوائق..
............والله ياروعة أنا لا أملك إلا أن أشكرك
على هذه الحيوية وربنا يتمم الناقص..والسلام عليكم ورحمة الله تعالي وبركاته
|
|
 
|
|
|
|
|
| العنوان |
الكاتب |
Date |
| الحزب الجمهوري في السودان | Ro3ah | 06-20-03, 10:32 AM |
| Re: الحزب الجمهوري في السودان | Yasir Elsharif | 06-20-03, 12:24 PM |
| Re: الحزب الجمهوري في السودان | Ro3ah | 06-20-03, 01:27 PM |
| Re: الحزب الجمهوري في السودان | Elmosley | 06-20-03, 12:54 PM |
| Re: الحزب الجمهوري في السودان | sympatico | 06-20-03, 01:06 PM |
| Re: الحزب الجمهوري في السودان | Ro3ah | 06-20-03, 01:35 PM |
| Re: الحزب الجمهوري في السودان | Ro3ah | 06-20-03, 01:30 PM |
| Re: الحزب الجمهوري في السودان | Elmosley | 06-20-03, 01:46 PM |
| Re: الحزب الجمهوري في السودان | Ro3ah | 06-20-03, 01:58 PM |
| Re: الحزب الجمهوري في السودان | obay_uk | 06-20-03, 01:04 PM |
| Re: الحزب الجمهوري في السودان | Ro3ah | 06-20-03, 01:22 PM |
| Re: الحزب الجمهوري في السودان | Haydar Badawi Sadig | 06-20-03, 03:44 PM |
 Re: الحزب الجمهوري في السودان | Yasir Elsharif | 06-20-03, 06:56 PM |
| Re: الحزب الجمهوري في السودان | Ro3ah | 06-21-03, 01:45 AM |
| Re: الحزب الجمهوري في السودان | سودانوبس | 06-20-03, 04:41 PM |
| Re: الحزب الجمهوري في السودان | Haydar Badawi Sadig | 06-20-03, 06:01 PM |
| Re: الحزب الجمهوري في السودان | WAD ELGAALI#4 | 06-20-03, 06:12 PM |
| Re: الحزب الجمهوري في السودان | Ro3ah | 06-21-03, 02:55 AM |
| Re: الحزب الجمهوري في السودان | Yasir Elsharif | 06-20-03, 07:14 PM |
| Re: الحزب الجمهوري في السودان | سودانوبس | 06-20-03, 09:06 PM |
| Re: الحزب الجمهوري في السودان | safrajat | 06-20-03, 10:37 PM |
| Re: الحزب الجمهوري في السودان | Ro3ah | 06-21-03, 02:05 AM |
| Re: الحزب الجمهوري في السودان | Ro3ah | 06-21-03, 02:22 AM |
| Re: الحزب الجمهوري في السودان | Abu Eltayeb | 06-21-03, 03:03 AM |
| Re: الحزب الجمهوري في السودان | Ro3ah | 06-21-03, 03:59 AM |
| Re: الحزب الجمهوري في السودان | Ro3ah | 06-21-03, 04:06 AM |
| Re: الحزب الجمهوري في السودان | Yasir Elsharif | 06-21-03, 09:00 AM |
|
| |
فيس بوك
تويتر
انستقرام
يوتيوب
بنتيريست