*** حج بنو جكة ***

Quote: حبابكم كلكم يا اهلنا ’’ وجمعة مباركة على الجميع إن شاء الله موضوع مجسم الكعبة الجابت خبروا الزميلة إيزابيلا جزاها الله ألف خير ,, بالحيل متور نفسي ومحرق روحي والعجب لامن شفت التصاوير جابها اخوي يحي ود عمي ابنعوف الله يباركو إن شاء الله , وحات الله متحيرة وبحلقت عيني في التصاوير لامن برقن إتو الناس ديل بي صحهم ؟؟ بنولنا الكعبة ما قصرو تـــــــــب , اها في طوافهم ده بجبرونا نشكرهم ولا على كيفنا نداعيهم لامن نسقط حجرهم .. الله يستر ما يقولونا بعد الحجة بتدخلوا الجنة ,, ما بتغلبهم تب , والله صحي كدي شوفوا كلكم فكرتي اللجبتها ليهم لي باقي المناسك مي فكرة سمحة ؟؟ وحات الله ما قصرت معاهم ,, وكلو لله في الله ساااي ,, والله صحي اها قالوا بدورو يعلموا اهلنا الطواف في الكعبة البنوها في الساحة الخضراء يا اخوانا زول يجيب لي التصاوير ,, تصاوير الكعبى ومقام سيدنا إبراهيم ,, شكيناهم على الله الله يستر ما يسموا المقامات بي إسمهم , ما بغلبهم , واحد فيهم بنالوا عمارة وسماها ذات العماد ,, والله صحي شاحده الله عامود نور يقع في نص نافوخك يسقط اجلك ,, قولوا آمين اها نجي لي حجهم ناس بنو جكة نشوف باقي الشعائر يعملوها وين ؟ هم ما قالوا دايرين يعملوا لي الناس تدريب وبروفات ,, عليكم الله ده حج ولا مسرحية حا تمثل في المسرح ؟؟ عارفين عندي ليكم فكرة متبرعة ليكم بيها ساي لله في الله ,, طالما إنه العمل ده في سبيل الله , خلوني النساعدكم و أتم ليكم باقي حجكم ده.. اولا بالتبادي الحج ده بدور ليه شيطان يرجموا . تحمدوا سيدكم عندكم كتاااار وروسينهم ماكنة وعويناتها مبرقة متل البوم ,, نسعل الله السلامة ,, دحين إن طبقتوا فكرتي دي , انا اول زول بي قبيلتي كلها بنحج معاكم , شفتوا كيفن ! وبضمن ليكم كل اهلي الغبش وباقي المهمشين والمطحونيين من الشعب الفضل ,,,لكن شرطنا ما تعلمونا الطواف بس. الطواف ده سااااهل ,, نحن بندور لينا شياطين نرجمها , الحجر مرات بجلي من اول مرة , لازم نتعلم الرجم كم إسبوع كده , وبعدين نجي للطواف , وبما إنه الحج حجنا وفي بلدنا , يبقى لازما الجديع يبقى بالطوب اللحمر واللخدر ,, آي نرصع ونفلع من مواردنا المحلية وبما إنه المغايس كتيرة , الرجم براهو مو كفاية . ناس يرجموا , وناس بعد الرجم يتلبوا فوق رقابكم يقصوها وناس شلاليت ساي في الضهور لامن تقولوا الروب ,, نكون خلصنا حقنا ولبينا ليكم النداء, يعني عصفورين بي فد جدعة . حسب طلبكم ,,,, والحج مدام بقى في الساحة الخضراء , الحج يكون لعموم اهل السودان . مو بقى ساااااااهل يحمدو سيدهم لا فيزا لا تذاكر سفر,, الله ريحهم اهلنا من البعثات وسرقتها ولفحيها لي حق الغلابة , كتر خيركم وبارك الله فيكم بتدوروا تسهلوا لي المواطن اصعب شيء,, ما قصرتو معاه كلو كلو آي نعم غليتوا الحاجات كلها وكتلتوا الناس بالمرض والجوع والحروب ,, لكن اها بنيتو لينا كعبة عديييل مافي رئيسا قبالكم سواها ,, فتوا ابرهة بي غادي بي مليون سنة ضوئية اها يقوموا يجوا اهلنا الممغوسين ديل من جموع اهل السودان ,, عشان يحجوا ويطوفوا ويفلعوا شيطانيكم ويفشوا غباينهم. مدام الشعب ده مو داير يمرق ولا إنتو مدنو فرصة يظاهر ويعبر عن قرفو . خلوا اليجي يفلع في كعبتكم البنيتوها من دمه ورزقه , والفليع تلاتة يوم ,, تترصوا لينا إنتو يا ناس الإنقاذ , ما الفكرة فكرتكم .. عاد نجيب ليكم شياطين من وين نفلعها ؟ والشيطان إنتو عارفنو مااااكن وكرشو ملانة من السحت وراسو ملان إجرام ؟ عاد ده مو ياهو منكم وفيكم ؟؟؟ اها نجي للهدي ,, الهدي ده الرسول فوقكم ودوهو لينا مدني .. الدباغة راس .. عاد الجلود دي نوديها وين .. ده إختصار للنقل والترحيل ....واللحم الكتير ده صدروه بي غادي بي بورتسودان , المسافة بقت في النص .. اتبرعوا بيهو لي ناس جدة , ناس جدة ديل يخربهم معلمين الله فقرانين وفلسانين .زي المصريين اللحقتوهم بي كم مراح بقر , , إنتو ماكم كريمين واجوادين على الأغراب , وناسكم إن شاء الله يسفوا التراب ,, والله صحي .. اها نواصل حجنا , مزدلفة ومنى ديل ما بتغلبوا فيهم حيلة تب ,, الثورات راااااقدات عندكم من الثورة الأولي لي الحارة مية والكلاكلات . شوفولكم زولا بدور يربح وقسموا عليهو باقي المناسك. وإحرام الحجاج اقترح ليكم يكون لبس الصاعقة , عشان القماش راقد عندكم ويبقى زيتكم في بيتكم , واهم شيء عندنا بير زمزم ,, احفروا لينا بير زمزم في جياد آآي جياد دي محلتها سمحة وفيها المترة ,, ما عليكم إلا تغرقوا لينا المطامير وجيبوا لينا حناطير تنقل موية الله المارقة من جوف البير والمطامير وبيعوها لينا موية زمزم بنصدقكم والله , عاد إنتو بنيتو الكعبة بندور نكضبكم في زمزم الموية الزرقاء دي ؟ وطبعا شهداء احد وبدر راااااااااااااااااااقدين عندكم ولا محتاجين تقتلوا ناس تانية عشان تعبروا لينا عن جهادكم . دار فور براها الإعترف بيها بشيركم قال 10 ألف وما خفي اعظم يعني اكتر من المسلمين الماتوا في زمن الرسول عليه الصلاة والسلام !!! والله لكن الحج والشهداء عندكم تحمدوا وتشكروا فضلو , الشفيع والبقيع , اقترح عليكم تودوهو سوبا والباقير , برضو قريب لي محل كعبتكم الإفتراضية وكلها فركة كعب ,. نزلوا ليكم باصات تمصوا بيها الفضل من فتات المطحونيين وبرضو إسم سياحي ليكم ,, وشعائر الحج ما محتاجين تشيلوها من الكتب . رااااااقده عندكم , هي لله هي لله ,ولا للسلطة ولا للجاه ,, وجبل عرفات زي ما قلت ليكم , جبال الفاو , اولا بالتبادي كتيرة , وعالية ما يقدر يتشعبط فيها زول غير القرود , التمشي الناس دي تتشعلق وتشكيكم لي الله ,, ما الحكاية كلها بقت محلية ,, بعدين عشان الزحمة وكده , ابدوا حججوا في الناس من هسع ,, وما تنسوا الكرامات ,, انكتولنا كم كرامة من شيخ فلان والدجال علان متل كرامات شهداء جهادكم الإنقلبوا بي قدرة قادر لي فطايس,, الناس الشميتو ريحة مسكهم , وسبحان الله فيهم من رجع اهله تاني وما مات زاتو يعني المسك ده ما بعرفوا يكون شميتوه من وين ؟ يا ربي تكون كولنيا ولا ريحة الصابون ؟ مخيــــــــــــــــــــــــــر الله المهم قولوا ليهم الناس السنة دي عندنا حج محلي ومستورد . اهلنا الغبش بجوكم تـــب , فش مغيسة ساي بجوكم لي فليعكم ورجمكم ,,وناسكم اليسافروا السعودية تاني فضل شنو ,؟ اختوا لينا الجبايات في طرف الساحة الخدراء ,, عشان الناس تجيكم منبهلة .. لكن والله يا جماعة الخير اكتر شيء وجعني تعقيب وزير الأوقاف وكلامو الغريب وعجيب ادناه ,, النبي شوفوا الزول ده قال شنو !!!! (وحذر وزير التوجيه والاوقاف عثمان الكباشي أمس، من وصفهم بـ»المتنطعين وانصاف المتفقهين « من استصدار الفتاوي المضللة للحجيج ،ودعا امراء الافواج لجلب الحجاج الى المجسم للتعرف على كيفية اداء المناسك ) .عليكم الله المطنقعين وانصاف المتفقهين والمضللين الناس منو ؟؟؟ الناس ديل ما مبدعيين وخطيرين لدرجة قف تأمل!!!! واحد بدور يبقى نبي ويصلي العصر في بني قريظة بي كتيبته السماها جماعة التكفير والتهكير والتاني بنى لينا كعبة في الساحة الخضراء ويدعو لي تعليم الحج في العام 2011 لي اهلنا البدوا الحج بالإبل , التالت غايتو بحول بيت المقدس في مول عفراء و الحج بقى في الساحة الخضراء والمحلي داخل عطبرة ,, أنعم وأكرم .... يا اهلنا الناس ديل إن ما قوموا ليكم القيامة قبال يومها بقوموا لي كل زولا فيكم كوكة في نص راسو بي محنهم دي !!! والله صحي ,,, ربي يقوم ليهم في روسينهم قمل وقراد ينتفهم ويمص دمهم زي ما مصوا دم الشعب المسكين يمهل ولا يهمل ودعتكم الله اسماء الجنيد