* الطفل المعجزة *
حبابكم يا أهلنا يا المنكم طولنا الدور على الطفل المعجزة مصطفى إسماعيل جاي داخل يتدبأ لي مكتب الريس وبالرااحة قعد في كرسيه نعم يا ريس,, طلباتك اوامر البشير: نعم يا ريس ؟؟ كمان طلباتي اوامر؟ انت خليت فيها طلبات ولا أوامر ، ولا خليت لينا وش نطلب ونتأمر بيهو تاني؟ الزول السماك الطفل المعجزة ده قدل معاي بي بنبقاية, ما قصر معاي كلو كلو ولا مع الشعب الشتمتوا وبهدلتوا قدام خلق الله,, نط مصطفى اسماعيل يغرود في عويناتو يستدر عطف الريس، انا يا ريسنا؟ مالي عملت شنو ؟؟؟ الريس: ما تغرود لي في عويناتك ديل زي الشافع البسنن ,, آآي إنت لحقت تنسا كمان ؟؟عملتك الماسكنها لينا زلة الخلق كلها، حتى الصحافة العربية ما رحمتنا, نسيت لامن شتمت السودانيين ووصفتهم بالشحادين؟؟ نحن زااااتنا مادين قرعتنا 22 سنة لا خلينا الخليج ولا خلينا باقي الدول التانية . 22 سنة مادين قرعتنا ونشحد جهارا نهارا , نشحد صباح ومساء ونبلع في كروشنا المتندلة دي, تجي إنت بي بجاحة تقول على الشعب السوداني شحاد؟؟ وإنت ده البنرسلك لي شحدتنا!!! إنت ده البتشيل القرعة تحوم بيها البلود . تقوم تجي تقوي عينك وتشتم غيرك ؟؟؟مادي قرعتك وتشتم في غيرك؟ انت ماك عارف السوداني وطبعه ؟ قايلهم كلهم زينا كده؟ السوداني كللل شيء ولا كرامته؟ ماك عارفهم ؟ تمش تهابشهم في كرامتهم وعزة نفسهم ؟؟ يرد مصطفي إسماعيل بي خجلة,,, لكن يا ريس انا ما قلت شحادين عديل, بعدين انا ما داير ادافع عن الإنقاذ وعشانك, يقاطعو الريس قلت ’’ قلت شحاديــــــــن عديل , كمان بتدور تنكر ؟ كلكم شبهينا واتلاقينا متفقين في الكضب وفي النكران والزوغان, تعملوها وتكبوا الزوغة، وتقع في راسي انا, ما خليتوا لي صفحة ارقد عليها,, هسة انت لحقت متين تنكرها؟ ما قلت بي قديديمك ده الحكومة لما جات الشعب كان زي الشحادين و جيعانين ، وقلت الناس كانت تقوم من صلاة الصبح تقيف في الصفوف عشان جالون بنزين، و تقيف في الصفوف عشان الرغيف ومرات ياكلوها عصيدة؟ تأكل الأكلتوا حبوبتي. وقلت سكر مافي الناس كانوا بيشربوا الشاي بالجكة,, تجك عريان عادم الدلقان, يا مصطفى التغيان. الجنا خلااااااااااس بدور يدافع عني وعن الإنقاذ,, اها يا الفالح الإنقاذ سوت شنو ؟ تكلت شواويل السكر قدام بيوتهم ؟ ولا فتحت الطوابين وشتت الرغيف في السهلة؟؟ المعيشة بقت سكر ورغيف؟ كدي قولي انا وانت هسة برانا ما معانا زول ينقل القوالة لي الشعب ولا الإعلام, قول لي قبال الفخك بي نعالي دي , المرض الهسة حايم في الناس زمان كان في؟ ملاريا ما قدرنا نعالجا، حقن الملاريا في تلتلة، وزير الصحة اب حلقوم يتبوجح ويقول الجنوبي بعد الإنفصال ما بنديهو حقنة في مستشفايتنا. يديهو الكود التقول عالج اهل الشمال كلهم لامن بدور يبخل على ناس الجنوب!!! ناس الجنوب بي علاجهم وبي خيراتهم,,ما هم محتاجين لينا يا دووووووب الناس تفكر لينا بعد الإنفصال ويشوفونا بنسوي شنو !! وبرضو يا الفالح التعليم نسيتو؟ في زمن مرا على السودان التعليم وصل ما وصل من بلادة وتدني زي زمنا نحن ده؟ اها الهجرة نسيتها ؟ الناس البرة البلد اكتر من الجوة, وكلهم ناجحين وبي شهاداتهم, كلو منكم خليتوني ابراكم زي الكديسة الساكة جناها, خربتوا البلد وجبتولي المهانة , جكتك الوصفت بيها الناس وقلت بشربوا بيها الشاي دي قاطعها من نافوخك المصوفن ده، جبت لي الفقر والمنابزة في صمة خشمي، خليت الماشي والغاشي رافع عصايتو في نافوخي، والشارع السوداني كلو جوة وبرة البلد مولع نار من عملتك الما سبقك عليها زول دي،,, تعملوها إنتو وتقع فيني انا ده , 22 سنة الشعب صابر علينا ومتحمل مصايبنا ، و22 سنة انا صابر عليكم إنتو وعلى مصايبكم البليتوني بيها بتدوروا تشلوني , كل ما اتخارج لي من مصيبة زمان , تجيني مصيبة من النعافات الزيك. ماني عارف جيتوني من وين؟ اتعزلتوا لي واتحكرتوا لي فوق راسي زي القوب , بتعرف القوب آآآ ود العمارات؟ القوب ده مرض ، وحبوب وعوار ماااكن بقوم في الراس,, اها ديل انتو , خسوسا انت وعبد الرحيم الهنبول والمو نافع داك , ياكم القوب القايملي فوق راسي ،كل ما افجخ لي حبة تقوم غيرها . راسي بقى كلو كراضم وعواوير, الله يكرضمكم ويشيلكم من وشي بركة جاه النبي,,, الشعب السوداني كان عارف الباقي علي منكم ومن بلاويكم كان رحمني ، وحن في حالي، لكن مو عارف مو عارف المغايس الجاياني من تالاكم . شايفني برقص وبتهوزز مع الغنا ومع المديح قايلني فرحان وطربان . علي بالطلاق انا رقيصي ده بدور افش بيهو مغايسي وغبايني وحرقتي الكاتمة في بطني منكم ومن عمايلكم, إن ما سويت كده وتميت الباقي كضب وحليف وجزيمة , كان زمااااااان مشيت ام فكو في شارع الله والرسول وبدل ما يقبضني اوكامبو ، اقعد انا اقابض في الجراد و القبور في الخور ، ويقابضوني شفع الشارع. ويتبروا مني وينكروني ناس حوش بانقا بعدما غنيتهم و وريتهم البندر ، وسكنتهم العمارات وركبتهم العربات. ملكتهم كافوري بعدما كانوا بلعبوا الدافوري,,, والسبب كلو انت والتلايف المعاك . اشكيكم على منو ؟ واسوي فيكم شنو ؟ مرضتوني وهردتوا مرارتي وفشفاشي انا هسة كان بي مرادي ارجع تاني حوش بانقا والعب حرينا وشدت مع رفايقي , وانوم في حوشنا ، لا مزازة ولا زرزرة من اوكامبو والشعب الكارهني. كارهني بي سببكم ، ومن عمايلكم ، الله بلاني بيكم , حظي زي وشي ده, حظ رماني في ناس ابو العفين واب إضنين ، وباقي العولاق التانيين النعمنو ملقط لي عولاق زيكم باقين لي ازية صبركم علي بقبل عليكم قريب وبمدد كل واحد في عنقريب ، وشوقكم تاني للهمبريب .. والليلة بي قوش قشينا الحوش والكلام ليك يا المنطط عينيك نواصل إن شاء الله الدعاء على الأكلوا البلد وقسموها نصين.. يا الله الكريم تلم فيهم جضمارة من الأكلوهو والنهبوهو في بطونهم وتخليهم يتحرقصوا ليل نهار , وتلحقهم امات طه النبي قولوا آمين ودعتكم الله مشاققة اها يا ناس الهكر باروني هنا واهكروا الهواء الطائر ربي يهكركم ويريحنا منكم

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]

*** الطفل المعجزة ***

* الطفل المعجزة *