|
|
 Re: *** اهل القبيله *** (Re: Badri)
|
سلام يا اهل
كل عام وانت جميعا بالف خير..
الشوق ليكم محكر فى الدواخل
سعدت كثيرا باطلالتكم الجميله
وخجلانه منكم ..لانه انطبق على المثل البقول
البيت محروس وستو تكوس.
لكن ياها حال العيد ومطايبة الاهل ..كنت فى جوله عيديه
فلكم العذر وحبابكم من تانى .. واسمحوا لى ازور كل واحد فى داره السمحه زيو..
ساره حمزه ..حباب باول طله يا بت الفريق والحله..
سعدت بقدومك .. وتسلمى يا رقيقه .. وعيدك افراح .. ربنا يحقق كل امانيك..
***
البطحانى الاصيل .. ود قبايل النيل
يلام يا سميتيكو ..
تسلم كتير وكل سنه وانت طيب .. والامنيات ليك انت خابرها براك
..ان شاء الله البندورو ليك يجيك يا العشا..
سمباتيكو شكرا مراح ..
***
اخوى الحنين ..ود عطا المنان
سلالة الناس الحنان
ما تفقدك شينه يابا ..
انت يا الدخرى
يا سند ضهرى
يا ضينا من بدرى
يا نيلا دافق بجرى
شوقك محنه
وسلامك وصلنا
التحيه ليك مكنونه
والشكر ليك ملون بكل الوان الاحترام والود
تسلم كتير والعيد مبارك عليك والعفو لله والرسول
****
د/ سجيمان .. سلام يا يابا
العيد مبارك عليك .. علينا وعليك يتبارك والعفو لله والرسول..
ان شاء الله القابله حاج ..قول آميــــــــــــــن .. وام الخير معاك
ان شاء الله انت كمان طيب وام الخير وعيالكم
سجيمان سلامى ليك بالكيمان
والشكر اطنان ..اطنان ..
تسلم يا عشا الضيفان ..
*****
اخوى بدرى
السلام ليك بجرى
والتحيه ليك قدر طيبتك يا حنين
عيدك سعيد وايامك سمحه يا رب
ان شاء الله ديمه نحن فى ظلال السلام والمحبه فى وطنا العامر بى اهلنا الحنان
شكرا بلا حدود على طلتك الجميله ..وكلامك البسر القلب ويبهج النفوس ..
سعدت للغايه بكل حرف سطرته ..
الف تحيه ليك ولى كل اخوانا بورداب الرياض ..وكل عام وانت جميعا بالف خير
واتمنى انى كنت ضيفه خفيفه عليكم فى تلكم السهره ولاول مره من خلال الشاشه الفضيه ..
بينى وبينك يا بدرى يا خوى الرجفه كانت حاصله لانه التسجيل كان مفاجىء ..والحمد لله ماقصروا معاى ود الجنيد واخوى مصطفى السنى واسرة البرنامج ..ربنا يديهم الصحه ويديكم كمان بى تشجيعكم ووقفتكم يا اهل بحجم الوطن
اخى بدرى الشكر نيلين..
*****
اخى معتصم دفع الله ..
حبابك يا الحنين .. كل سنه وانت طيب ان شاء الله
ربنا يجعل ايامك كلها اعياد وافراح يا رب ..
وربنا يسمع منك بدعوتك الجميله ويعم السلام كل ربوعنا الحبيبه
اخوى معتصم ..شكرا خدار ...
****
استاذنا المبدع الموصلى .. كل سنه وانت طيب .. وطلتك عيديه ..واحلا عيديه يا مرهف
نحن فى انتظار طلتك بالدرب فى مسقط .. ان شاء الله ربنا يسهلها ليك ونلتقى باذن المولى
استاذ موصلى الشكر ليك
دعوات اهل فى ايام العيد السمحه
والتحيه ليك ابتسامه بنيه منشرحه
****
ليون يا غاليه من عمق البلد
كل سنه وانتى طيبه
وكل يوم وانت ليون الزهره النديه
والبسمه جوه القلب مطويه
طلتك فرحة قبيله
بى زولا طال غيابو وطل فى يوم صباحيه
ليون شكرا قدر فرحى بيك
وعيدك امنياتك الحلوه ..
****
اخى فاضل
وكل سنه وانت طيب يا رب
ربنا يجعل ايامك كلها اعياد ان شاء الله ويحقق كل امنياتك
والف شكر على الطله
شكرا بحرنا..
لؤى ..حباب الضى
كل سنه وانت طيب ..ربنا يسعدك ويحقق امنياتك يا حنين
وينك يا خدار الجروف ..ويا بحر القيوف
نحن راجنك فى مسقط وفاتحين الكفوف
تسلم لؤى .. وشكرا لمة اهل
***
احبتى جميعا الشكر ليكم معطر بى كل الرياحين
والتحيه ليكم مجرتقه بالعديل والزين
وربنا يجعل ايامكم كلها اعياد
|
|
 
|
|
|
|
|
| العنوان |
الكاتب |
Date |
| *** اهل القبيله *** | soma | 01-18-05, 01:52 PM |
| Re: *** اهل القبيله *** | سارة حمزة | 01-18-05, 01:58 PM |
| Re: *** اهل القبيله *** | sympatico | 01-18-05, 03:23 PM |
| Re: *** اهل القبيله *** | خضر عطا المنان | 01-18-05, 03:47 PM |
| Re: *** اهل القبيله *** | سجيمان | 01-18-05, 11:37 PM |
| Re: *** اهل القبيله *** | Badri | 01-19-05, 10:01 AM |
 Re: *** اهل القبيله *** | معتصم دفع الله | 01-19-05, 10:35 AM |
| Re: *** اهل القبيله *** | Elmosley | 01-20-05, 05:43 AM |
| Re: *** اهل القبيله *** | layon | 01-20-05, 11:13 AM |
| Re: *** اهل القبيله *** | Fadel Alhillo | 01-21-05, 03:35 AM |
| Re: *** اهل القبيله *** | لؤى | 01-21-05, 03:47 AM |
| Re: *** اهل القبيله *** | Badri | 01-23-05, 11:16 AM |
| Re: *** اهل القبيله *** | soma | 01-24-05, 09:44 AM |
| Re: *** اهل القبيله *** | 3bdo | 01-25-05, 01:25 AM |
| Re: *** اهل القبيله *** | soma | 01-25-05, 03:42 AM |
| Re: *** اهل القبيله *** | ابو جهينة | 01-25-05, 03:49 AM |
| Re: *** اهل القبيله *** | ايهاب | 01-25-05, 03:49 AM |
|
| |
فيس بوك
تويتر
انستقرام
يوتيوب
بنتيريست