هذا الصباح اتصلت والدتى تتطالب ببعض البيزات بلغة هنا و الكنجالات بلغة السودان امى تقول انها تمر بظروف صعبة و يجب ارسال البيزات فورا ومافى مفاهمة لا اريد ان اصرح بما نرسله شهريا لكى يستطيع اعضاء المنزل القلائل( الفضلوا) أن يأكلو ويشربو و يدفعوا حق الكهرباء والموية وما إلا ذلك من متطلبات المعيشة فى السودان انها عدة ملايين يا جماعة عدة ملايين المفترض تكفى للعيش بدون مشاكل وللعلم نحنا عندنا بيت و ما مؤجرين !!!!!!!!!!!!!!!!!!!!!!!!!!!!!!! تكلl الناس هنا عن الخرطوم و كيف انها أغلى مدينة فى العالم نحن بنصرخ وبنرسل لأهالينا نحن ابناء الطبقة التى كانت سابقا تسمى الطبقة الوسطى تم دحرجة المكان الذى كنا نشغله المجرم قصد لنا اختفاءا قسريا معدلات الفقر ترتفع بصورة مخيفة كل يوم ينضم للركب آلاف من الفقراء إذا كنا نحن نحمى أهلنا من الوقوع فى دوامة الفقر المتسعة من يحمى من ليس لهم ابناء مغتربين او مهاجرين من يحمى ملايين السودان الثلاثين الذين جرفتهم فعلا دوامة الفقر؟ !!!!!!!!!!!!!!!!!!!!!!!!!!!!!!!!! بلغت الروح الحلقوم الحقو السودان يا ناس
09-25-2007, 10:04 AM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
يامجمر شايف واحد من المكنكشين فى الحكم بتكلم فى النيل الازرق امس العصر ,,فى برنامج اوارق.. د. منو كدا عمر ,الزول المكعوج البشيه راج كومار,,الموضوع عن انتقاضادات الترابى قال ان المنتظر الانقاذ تمشى انتظاره سوف يطول قال نحن حزب مثلنا مثل الامة والدمقراطى ,,والشعارات لسنا مطالبين بها والله كلام يغيظ.... يامجمر ما كنا نعيم ابو الهل فاز وابو الهل هزم المصارة
09-25-2007, 10:30 AM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
طبعا رسالتك واضحة من اول سطر هو انك بتحكى عن السودان والناس التعبانة اللى انا بنتمى ليهم من زمان ولحسع وعارفة معنى انو الزول يكون فقران وماقادر يحقق ابسط احلامه
ومع ذلك ربنا يخدر ضراعك وضراع كل الهمهم على الناس
وتصوم وتفطر على خير
09-25-2007, 10:52 AM
doma doma
تاريخ التسجيل: 02-04-2002
مجموع المشاركات: 15970
بلدكم ياتا يا هشام ؟ دي ؟؟؟ .. ما مشينا خليناها تسأل الناس إلحافاً أنْ : يا بو مروّة .. و لا في كان أبو مروة زمانئذ و لا أبو النوم .. طنشناها .. عملنا نايمين .. و قعدنا ننبح بس بخطاباتنا القديمة و حراباتنا السقيمة .. و ترهاتنا المستديمة .. ( و لسه بننبح ) .. يا نضال يا برتكاني و يا نضال يا أخدراني و يا نضال يا فرتكاني .. لغاية ما بقت مطلوقة .. و ركبوها العربات .. و دخلوها البيوت الباخرة .. و عنكشوها شوارع بيش و كهارب بيش و ذمم بيش و أسامي أبيش .. ومواقف بيش .. و جلاليب و نيون و بترول و شركات و بخرات و لافتات و عربات و ناس مقلوعة العيون مخلوعة القلب .. و كلو بيش .. ثم .. رضعت من ثدي الحرة الضباع .
كلام فاينال : دي بقت ما بلدكم .. بلدكم ديك راحت شمار في مرقة .. الهسع دي حاجة تانية .. سميها شكلوتة ( و هي نوع من المسخ أو البعاتي ) .. و ممكن تتلولو معاها تعضيك تسممك .
رسل المصاريف للحاجة .. و مرة مرة كده أذكر حسنات قتلاك - كان قدرت - ..
الكلام ده نهائي .
09-25-2007, 02:59 PM
Elawad Eltayeb Elawad Eltayeb
تاريخ التسجيل: 09-01-2004
مجموع المشاركات: 5318
رجـعت لك تاني عشان أقول لك اني زعلان منك جـدآ عشان بتشـوه صـورة "الانقاذي الـحضاري" ... "الشافو كلو قام جاري!!!".
مالـهاحـالة البلاد?.. وشـنو الماعجـبك فيها?،
اولآ، الحكومة قـدرت تتخلص من عصابات" و" مافيـا غسيل الأموال" وجرجرت للمحاكم بعض المتهميـن ب "غسيل الأموال".... وصـحيح انو المتهميين طلعوا براءة بعـد ماسـحب الوزير القضية من قـدام المحكمةوهـذامايدل علي عـدالة محاكمنا،ونزاهـة مسـؤولينا!!.
ثانيآ: كـذبآ كاذب كلامك حـول الخـبـز "الـمسـرطن"!!!!، والصـحيح انو الـموية هي "الـمسرطنة" بسـبب اختلاطـها بمياة "السـيفونات" ولكن "الأنقاذ"عـالجت هـذه القضـية وأنشـئت مسـشفيات خـاصـة بتمـويل بنوك إسـلامية لعمليات "الكلي"ورغـم ان الأطـباء يؤكدون انه ويـوميآ تزداد حالات الاصـابات بامراض السرطان والكلي الا ان الوزارة الصـحة لن تتقاعـس عـن مهامها في محاربة الامـراض ب "الادويـة الفاسـدة و الـمنتهية الاجـل !!" وسـتقضـي علـي مـرض التيـفويـد والسـحائي والسـرطان تـمامآ كما قضـت عـلي مـرض الأيـدز ، وكانت الأحـصائيات القـديـمة بعـدد الأصابات بالايـدز في السـودان قـد وصـلت الي مليون و100 الف مـصـاب والان عـد المصابيين مليون مصاب فـقـط وال100 الفالاخـريـن توفـوا الي رحـمه اللـه!!.
ثالثآ: "الأنقاذ" الـحـضاري طورت العلـم في البلاد وخـرجـت اطـباء مابعرفـو يكتبوا "الروشـتة!!"، والقـصـد من عـدم تعليـم الطلاب بتاعيـن الطب في الجامعات الحكومية والخاصـةاهـمية كتابة "الروشـتة.... انو اصـلآ ماعنـدها فائـدة لانو الـمرضـي ماحـيقدروا يشـتروا الأدوية!!!.
رابعآ: "الأنقاذ" ابتكرت اساليب جـديـدة للتآديب والتعـذيب و" حـقوق الاختراع محـفوظةلـوزارة الداخليـة". اي واحـد يقل ادبـو علي الحـكومة يقـوموا ناس وزارة الداخلية يـعتقلوا والـدة الـمتهـم ويـجردوها من كل ملابسـها قـدام ابنها الـمتهـم وبالطريقة دي كل احـد حـيخاف علي امـه ويبطل مشاكسـة النظام!!!!، اول ناس اخـترعوا الاسـلوب ده الـمخابرات الايـرانية وحـصلت حالات اغـتصابات للمعتقليـن بلا فـرز!!!واللـه يسـتـر من تطـوير الفكرة انقاذيآ!!!.
خامسآ: صـحـيح انو الغـلاء ضـرب البلاد لـدرجة انو بعـض الأسـر إضـطرت لـدفن مـوتاهـا ب "الـجـلابيب" بـدلآ عـن الكفن الذي اصـبح شـراؤه مـحـنه ولاتقـدر عليه الأسـر الـمدقعة في الفقـر، وهناك ايضـآ نساء ورن الثـري بـ" تيابهـن "!!. ولكن "الأنقاذ" ومـحاربة منها رخـصـت اسـعار "البطـيخ والجـرجـير".
رغـم صـعوبة حـصـول التلامـيذ عـلي كراريس الـمدرسـة والاقلام المساطر في المناطق المـهمشـة وبضـواحـي الـمدن الا ان الـدولة قـد سـهلت لكل مواطن فرصـة اغـتناء "هـانـدي" مع الزام البنوك الأسـلامية التي اسـتوردتها وان تـملأ السـوق بالبطاقات والكـروت!!.
ده حال البلـد.... حـتـي بيان عسكـري" رقـم واحـد" قادم قـريب!!!.
أخي هاشم والأخوة/ت الكرام .. ألحقوا السودان ياناس صرخة قديمة قدم ثورة الإنقاذ ومشروعها الحضاري .. الآن أدركوا النفوس فهي هالكة هالكة ... ومايجي محمد فرح يقول الإنقاذ راح تدخل الصرف الصحي في أمدرمان أو الضرائب اصبحت 15% أو الموية في كل الخرطوم بعد كم قرن ... مودتي الشفيع إبراهيم
ونجحت الانقاذ ايضا فى افقار المغترب وذلك بتخليها عن مجانية التعليم ومجانية العلاج ليقوم المغترب بذلك وبذلك يستوى المواطن والمغترب! جالنا يذكرنى بالمرحوم خالد الكد: يظل المغترب يكدح السنين الطوال ليبنى بيتا! لا ليسكنه! ولكن ليشيع منه! سلام يا صديقى جنى
09-26-2007, 10:18 AM
هشام المجمر هشام المجمر
تاريخ التسجيل: 12-04-2004
مجموع المشاركات: 9533
Quote: ي هاشم والأخوة/ت الكرام .. ألحقوا السودان ياناس صرخة قديمة قدم ثورة الإنقاذ ومشروعها الحضاري .. الآن أدركوا النفوس فهي هالكة هالكة ... ومايجي محمد فرح يقول الإنقاذ راح تدخل الصرف الصحي في أمدرمان أو الضرائب اصبحت 15% أو الموية في كل الخرطوم بعد كم قرن ... مودتي
الشفيع إبراهيم سلامى
محمد فرح عايش فى نعيم الانقاذ بيشوف الفقراء وين
09-26-2007, 10:46 AM
هشام المجمر هشام المجمر
تاريخ التسجيل: 12-04-2004
مجموع المشاركات: 9533
Quote: من يحمى ملايين السودان الثلاثين الذين جرفتهم فعلا دوامة الفقر؟
القال ليك منو السودان فيهو تلاتين مليون
في اتنين مليون ماتوا في حرب الجنوب
واتنين مليون مشردين في تشاد
وميتين الف ماتو في دارفور
وتلاتة مليون قاعديت في القاهرة
وتلاته مليون موزعين في جغرافية العالم اوربا ...امريكا وكندا ....الخليج...وباقي الدنيا
كل يوم السودان بيموت فيهو زي الف زول ...امراض (ملاريات....تايفويد...امهات اثناء الولادة...اطفال حديثي ولادة ).....وبالحروب ...وبي حوادث مرور.... وبي موت الله سااااي....
حي يجي يوم الرئيس يصحي الصباح يلقي نفسوا قاعد براااااه في البلد.....الله ورقبتو...
مهندس /هشام سلام تحية لك وانت تفتح اماكن الوجع فينا
Quote: لغاية ما بقت مطلوقة .. و ركبوها العربات .. و دخلوها البيوت الباخرة .. و عنكشوها شوارع بيش و كهارب بيش و ذمم بيش و أسامي أبيش .. ومواقف بيش .. و جلاليب و نيون و بترول و شركات و بخرات و لافتات و عربات و ناس مقلوعة العيون مخلوعة القلب .. و كلو بيش .. ثم .. رضعت من ثدي الحرة الضباع .
اخونا عماد ازيك ،والله ما قلت الا الحق "فقر الاخلاق" هل له من علاج ؟؟؟؟؟؟؟؟؟ زي ما قالوا هلنا دوام الحال من المحال والدنيا دوارة وفي كل يعنون الفقر المادي كل فقر وان طال الزمان يزول الا فقر النفس والايمان والاخلاق. صفية
مدِّر مدِّر يا رواسي نحن بعاد لحقنا القيفة انت مدبج ونحن نقاسي برد ام شير والموج والزيفة مركبك الماليها مطارق تمشي .. تقيف .. تسرح بي كيفا مرة مغارب ومرة مشارق وانت تخاف الريح وحفيفا سوّها زينة وفوقها بيارق وانت مدبج توب وقطيفة فيها المات والضاربو الفالج والسالمين في حالة مخيفة
كل الناس ترزح في كفة وانت وناسك فوق الدفّة الدايشين والراسهم لفّ والشاخصين في المدى للضفة صوت أطبالك فوقهم ألفى جوه الموية وريقهم جفّ من العطش النص اتوفى وباقي النص الفضّل جيفة
ضاقوا المر والحال استعصى الشغال واللاحق الحصة الواصال للرحم اتقصّ والهاداي مو لاقي الفرصة الرساي سافر ما وصى خل مُحمد وأحمد و حفصة الأطفال العرفو القِصّة سدت جوّ حلوقهم غُصّة من الجوع الدم اتمصّ واصبح كل الحلم رغيفة
كل الراكب شاف أحلامو دون احساس ماتت قدامو فنّ كتابو وكسر أقلامو للوالدين لا جال مالامو ناس الحلة القعدوا وقاموا أصرّ وألحّ يمشي كلامو هزموه اخوانه البيجوع ناموا وكم خريج مالاقي وظيفة
يالفكيتها وقلتّ لها سيري وعارف انو الدنيا دميرة لا في ضفاف لا شفنا جزيرة لا في الحيرة ولا في الطيرة كسرت جناحها وقلتّ لها طيري واتملكت الكانت ميري يالسودت الناصع جيرة إيد الحق صابونة وليفة
قبلك كم متعلم وقاري عكس الريح فكّولو الصاري مشدوهين متعشي وحاري ريسها شلته والبحّاري كم سنوات علامّها الباري واقفة وهم شيايفنها جاريي بقينا هلاك والقيف متضاري لا حجّار لا دوحة وريفة
حسِّك عينك ما تتمادى وتنسى الراكب عندو إرادة الأهوال الشافها وخاضها كان في مدرسة ولا عيادة شفنا الإيد الكان أجوادة يا مبتورة ويا شحادة وياما رقاب كانت سدادة علّمت الله من التعريفة
يا ريسنا قدر مدّيرك فك الدّفة وأدّها غيرك أحفظ نفسك ترضي ضميرك وقّف أوعى تواصل سيرك كان طاوعتنا شن بيضيرك عرض أكتافك وفك البيرك لاهنا شكرا وكتّر خيرك وكل انسان في الأرض خليفة
09-27-2007, 06:35 AM
هشام المجمر هشام المجمر
تاريخ التسجيل: 12-04-2004
مجموع المشاركات: 9533
Quote: من بكره سعر الخبر يمكن يضاعف لأن اليوم حدثت زيادة جنونية لسعر الدقيق في السودان بنسبة 33% ..غايتو الله يكون في عون الشعب السوداني..
قبل شهر ونصف كتبت بوستا متوقعا فيه زيادة اسعار الخبز نسبة لزيادة اسعار القمح عالميا وقلت ان الحكومة لن تتبرع بأى دعم بل بالعكس هى تريد ان تربح على حساب المواطن.
هشام حقيقى المسأة هى مأساة الناس الغلابة السودان اصبح من اغلى بلاد الدنيا الاسبوع الماضى عدت من رحلة خارجية ذهبت لشراء بعض الاغراض من البقالة خمسة اصناف فقط كانت تكلفتها نصف مصاريف شهر كامل من حيث اتيت ما بالك بمصاريف العلاج اذا مرض احد الاطفال الله يكون فى عون الشعب السودانى الفضل
09-27-2007, 09:26 PM
Walid Safwat Walid Safwat
تاريخ التسجيل: 01-15-2003
مجموع المشاركات: 1227
Quote: بلدكم ياتا يا هشام ؟ دي ؟؟؟ .. ما مشينا خليناها تسأل الناس إلحافاً أنْ : يا بو مروّة .. و لا في كان أبو مروة زمانئذ و لا أبو النوم .. طنشناها .. عملنا نايمين .. و قعدنا ننبح بس بخطاباتنا القديمة و حراباتنا السقيمة .. و ترهاتنا المستديمة .. ( و لسه بننبح ) .. يا نضال يا برتكاني و يا نضال يا أخدراني و يا نضال يا فرتكاني .. لغاية ما بقت مطلوقة .. و ركبوها العربات .. و دخلوها البيوت الباخرة .. و عنكشوها شوارع بيش و كهارب بيش و ذمم بيش و أسامي أبيش .. ومواقف بيش .. و جلاليب و نيون و بترول و شركات و بخرات و لافتات و عربات و ناس مقلوعة العيون مخلوعة القلب .. و كلو بيش .. ثم .. رضعت من ثدي الحرة الضباع .
كلام فاينال : دي بقت ما بلدكم .. بلدكم ديك راحت شمار في مرقة .. الهسع دي حاجة تانية .. سميها شكلوتة ( و هي نوع من المسخ أو البعاتي ) .. و ممكن تتلولو معاها تعضيك تسممك .
ماقاليك فاينال ياباشمهندس بلدكم ديك رااااحت والهسع دي مشروعهم الحضاري ورقصني ياجدع اخير النرقص يمكن نفلت من الرضاعة ...
09-27-2007, 10:00 PM
Al-Shaygi Al-Shaygi
تاريخ التسجيل: 11-16-2002
مجموع المشاركات: 7904
Quote: الاسبوع الماضى عدت من رحلة خارجية ذهبت لشراء بعض الاغراض من البقالة خمسة اصناف فقط كانت تكلفتها نصف مصاريف شهر كامل من حيث اتيت ما بالك بمصاريف العلاج اذا مرض احد الاطفال الله يكون فى عون الشعب السودانى الفضل
لازما فى حل
09-29-2007, 09:44 PM
أشرف البنا أشرف البنا
تاريخ التسجيل: 08-16-2007
مجموع المشاركات: 928
هشام المجمر خالص التحايا... أتعجب ممن يدعونني كل إجازة للعودة إلى ( هناك ) أعود كي أصبح سفاحاً يمص دماء الآخرين أو ضحية تمتص دماؤها أما أولئك الذين ليس له مغترب يطعمهم سنوات عمره التي تفترسها الغربة فقد باعوا اللحم البشري بكافة أنواعه ... و شروا اللقمة بكرامتهم ... و شروها بشرفهم ... ترى هل يرى أحدكم الضؤ في آخر النفق ؟؟؟ لنا الله ...
09-29-2007, 09:56 PM
هشام المجمر هشام المجمر
تاريخ التسجيل: 12-04-2004
مجموع المشاركات: 9533
Quote: أما أولئك الذين ليس له مغترب يطعمهم سنوات عمره التي تفترسها الغربة فقد باعوا اللحم البشري بكافة أنواعه ... و شروا اللقمة بكرامتهم ... و شروها بشرفهم ... ترى هل يرى أحدكم الضؤ في آخر النفق ؟؟؟
كلامك صادق يا اشرف و من شدة صدقه ينزل فى الجوف كالسكين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
هشام المجمر
Ishraga Mustafa
نصار
اسعد الريفى
abuguta
doma
Abuobeida Ali Abdullah
Emad Abdulla
Elawad Eltayeb
omar ali
jini
عاصم ابوبكر حامد
omar altom
Safia Mohamed
Omer Abdalla
Walid Safwat
Al-Shaygi
أشرف البنا
فيس بوك
تويتر
انستقرام
يوتيوب
بنتيريست