|
|
 اللووووول لوووول يا لووولية
|
قدر ما فتشت لمرجعية
loooool
والتي تطلق في وسط الكلام لازمة الضحكة او التعبير عن البهجة,,, في كتابات المنابر,, لم اجد لها سوي تفسير واحد,,, وبما اني مقتنع ان الخواجات (ديل),,,ماكلين تاريخنا قلع,, وصلت لانه الكلمة دي مردودة لاغنية الظار الشهيرة ,,اللول لول يا لولية بسحروك يا لولي الحبشية
يقال والعهدة علي التاج الكضاب ,,:ان في الزمن الغابر كانت هناك سوداني هاجر الي الحبشة,, واستقر هناك وتزوج من احدي حسانها,, ورزق ببنت ( شرط للارض) اسماها لولي ,,ولكن مرضت زوجته مرضا عضالا وانتقلت الي جوار ربه,,,ا فحزن عليها الرجل حزنا شديدا,, وعندما لم يستطع العيش في ديارها علي زكراها,, قرر الرجوع الي السودان رجع ومعه ابنته لولي,,, نشأت البنت في كنف ابوها
قيل ان لولي الحبشية,, والتي اطلق عليها الاسم نسبة لامها الحفتية المتوفية,,, كانت اية في الجمال فهي تحمل جزر شعبين,, فخطفت اللونين ,,وكان الحبشة والسودان تعانقا وانجبا تلك التحفة,, اخذت من كل الشعبين جمالهما اشتهرت بخفة الروح والمرح فاضحت تنشر البهجة في اي جمع تحل به,,, كانت كالزهرة الفواحة تنشر عبيرها وعبقها,,,في ذلك الزمان كان المفتش الانجليزي الشاب في عهد الاستعمار يحكم تلك النواحي التي تعيش فيها لولي,,, قيل ان المفتش احبها حد العشق والوله ,,ولانه كان متزوجا زواجا كاثولكيا مقيدا,, لم يستطع شيئا سوي ان ( يبكي بس)وان يقش الدموع بالدس عين قطرة وعين مس ,,اشتهر هيامه بتلك الغيداء,, رجع بعدها الي موطنه بعد انتهاء ماموريته ,,ولكنه ظل اسير تلك الولي,, لم يفارقه خيالها ابدا,, وقيل انه في قمة لحظات فرحه ومرحه,, فجاءة كان يزكرها ويتاوه بآهة عاليةآآآه لوووووولي ,,,وسط اصدقاءه ما ان يضحك الا وياتيه زكراها فيقول آهته الشهيرة لووووولي ,,,بدا يتداولها اصدقائه كلازمة للضحك والمرح في غير ما اراده لها المفتش ( المكسر) ومنها انتشرت بين الخواجات,,,, فصارت من حينها لازمة للمرح ,,,وبما ان لسانهم اعجمي,, استغنوا عن الياء في الاسم لولي ,,وصارت لوول
الان صرنا نقلدهم في ما هو ملك لنا,, او كما قال التاج مكنة
واللول لول يا لولية بسحروك يا لولي الحبشية
فتل
هاهاهاهاها ( لوووول) بعد التاصيل
|
|
 
|
|
|
|
|
|
|
|
Re: اللووووول لوووول يا لووولية (Re: اساسي)
|
القصة حلوة برغم أنى غير متأكد من أنها خرافة أو واقعية
على كل لوول هنا هى اختصار للجملة الإنجليزية
Laugh Out Loudly
فيختصرونها
LOL
والظاهر أنك قاعد تضحك علينا كلنا من زمان ونحن ما جايبين خبر
LOL
| |
|
|
|
|
|
|
|
|
 Re: اللووووول لوووول يا لووولية (Re: يازولyazoalيازول)
|
يازول العزيز
القصة شهدتها اروقة الكيبورد حقي دا زاتو
تعرف انا ما بكذب عليكم من زمان لكن زي ما قال سجيمان
المبدعين ديل ما فايتننا بي فهم ولا قراية بس قوة عين
اها يا صدقي قوي عينك وابعد من سودانت وحرم بتبقي مبدع
تحصلني عديل كدا
اما تفسيرك بتاع لووول فدا حنك خواجات انا قريته وما اقتنعت بيهو اصلا
واللول اللول يا لولية
| |
|
|
|
|
|
|
|
|
|
Re: اللووووول لوووول يا لووولية (Re: اساسي)
|
ولله دي بالغت فيها عدييييييل وفت فيها أبو حراز
يا أخي دي أصعب أنواع الكتابة
سهل جدا أن تثير دموع من يقرأ حزنا وصعب أن تجعله يبتسم دعك من تقتله من الضحك
لووووووووول
| |
|
|
|
|
|
|
|
|
|
Re: اللووووول لوووول يا لووولية (Re: عاطف عبدالله)
|
العزيز ابو قوتة
يقال والعهدة علي الشمشار ان اساسي من يومها ترك الشكل وضلعو انكسر وبقي بكاي ودموعو جارية اكثر من مراة بتحش في بصل
لووول
تعرف انت ضايرتني في البوست حقي وبصراحة استلمته عديل بوضع اليد ولا وضع البحر ما عارف لكن تعال يا زول يعني قفلت الشعر الجاي كله علي ال بيتكم الما شرفوا لسع
لكن ما تخاف حفيدي في ذلك الزمن حيكون من شعراء الهجاء وبما ان جده كان خفيف ولفيف وبتكسر سرعة فاسمعه يقول حينها وهو مسكر في
حفيدتكم الميمونة
حبيبتي سفروتة
الرقشة ما بتفوته
عندها سافوتة
جابتها من وين؟
ما جدها ابو قوتة
ولووووووووووول
| |
|
|
|
|
|
|
|
|
|
Re: اللووووول لوووول يا لووولية (Re: عاطف عبدالله)
|
الاستاذ عاطف عبداللاااا او كما ناداكم ابكر
لي الشرف في ان اجعل اصداغك ترجع وفلجتك تظهر وام درمانية كان حريفة ممكن تطلع منك بتوب ولا طقم عشاء بعد ان هيأت لها مزاجك ضاحكا ومبتسما تعرف نسوان كتاب البورد كان حريفات وعاوزين يحنكوا رجالهم عشان يشتروا ليهم ويجيبوا طلباتهم؟يرسلوا لي ناس سجيمان وابو حراز يظبطوا بوستات من النوع ابو كديس بس عشان يرجعوا الجماعة ديل من مزاج الغربة العكر لمزاج مرح تسهل فيه اجابة الطلبات
ياخي انا طلعت بالموضوع خارج تصنيف البوست
تسلم يا استاذنا للطلة وبها تنتفخ اوداجنا الاصلها معفصة
لوووووووووووووول
| |
|
|
|
|
|
|
|
|
|
Re: اللووووول لوووول يا لووولية (Re: اساسي)
|
أساسي
الليلة ماااالك؟؟؟؟
شهادة دكاترة .. ومحيص لوللات
غايتو بوست دمو خفيفة
أنا حا ادفع ليك بكاشيش انت وأبو جهينة
والله طلعتوني من قرفة كاربة جدا
الله يديكم العافية
الرحمابي
| |
|
|
|
|
|
|
|
|
|
Re: اللووووول لوووول يا لووولية (Re: AlRa7mabi)
|
العزيز الرحمابي
قتها صاح؟
طبعا بحساب ان الدنيا فيها كم رطل انطلقت كاتبا لهذا البوست والذي استقيته بعد مهاتفة للسودان بالامس فسالت عن خالة فلانة صحتها كيف فقالوا انها مدورة ظار طبعا جريت لوووول طويلة وانا استحضر حفلات الظار التي كنا نحضرها صغارا وتزكرت اغنية اللول لول يا لولية بسحروك يا لولي الحبشية
والباقي تميتو موية
واضحك الله سنك ويديم لينا بهجتك ولولك
| |
|
|
|
|
|
|
|
|
|
Re: اللووووول لوووول يا لووولية (Re: اساسي)
|
أخي أساسي
إن اللول هذه كلمة محيرة فعلا وربما تكون فعل لازم أو متعدى والأخيرة أقرب للواقع ، وكلمة لول سواء كتبت بالعربية أو الإنجليزية أو الأردية أو حتى الأمهرية الفصحى يمكن قراءتها إقبالا وإدبارا وتعطي ذات المعني مثل توت وكلمة تيت التي تذكر في أغنية تيت تيت تايوتا وباب وغاغ وهو صوت الغراب قبل أن يسف التراب بحسب ما جاء في الأساطير والأحاجي أيضا شيش وهو أحد القطع الموجودة في لعبة الدومينو والقئمة تطول.
كنت أحسب أن لول هذه هي من إفرازات العولمة ودواعي وضرورات الفلهمة ولم يكن يدر بخلدي أنها حدثت في عهد الإستعمار الإنجليزي للسودان وأن قائلها خواجة وأن الحق الأدبي يجب أن يحفظ له حتى لو قالها في لولي أو غيرها من الحسان.
لكن ما علاقة نساء الزار الشمطاوات بلولي الحبشية
| |
|
|
|
|
|
|
|
|
|
Re: اللووووول لوووول يا لووولية (Re: اساسي)
|
أخي أساسي
سوف أتجاوز عن إشادتك بي ووصفك لي بالمبدع لسببين أولهما أنني بسر وما أبرئي نفسي وأن النفس أمارة بالسؤ وأن العين إمارة والفجيرة إمارة وكذلك أم القوين وموناكو ، والسبب الأخير هو أن مباراتي للشكر والإشادة جمباً إلى جمب والرد عليكم بأحسن منها سوف يجهجه الموضوع ويفسد المقصد ويخرج بنا من لوليلة إلى شكرية ربما.
---
حبذا أخي لو إجتهدت قليلا وقمت بحصر السرقات الأدبية والتعدي البين على لغتنا العربية والرطانية من قبل حفنة الخواجات اللصوص الذين غزوا بلادنا في زمان غابر من أجل الذهب والرجال بحسب زعمهم ونسوا أو تناسوا عن عمد أن من بين أسباب فتح السودان هو السرقات الأدبية وأن شكسبيرهم هذا بأدبه وشهرته لم يكن في الأصل أكثر من شيخ الزبير ، وأن الذي سرق لول و واو و ياي وأخواتها ربما يكون سرق أشياء أخرى مفيدة وهي العبارة التي يختتم بها دقاش الدلال أعلاناته في الصحف عن المزادات الكبرى رغم أن جل ما يباع فيها خرده وكان فيهو خير ما كان رماهو الطير.
| |
|
|
|
|
|
|
|
|
|
Re: اللووووول لوووول يا لووولية (Re: almulaomar)
|
الملا عمر
في راي ان السرقات الادبية والاستعارية التي طالت ( كل حاجاتنا ) من قبل اعمامنا سابقا الخواجات لم تترك مكانا في الوطن الا وهبشته ( هبشك الماضراك)من دخولهم حلفا بواسطة السكة حديد وهم يهبشون في حاجاتنا هبيشا وقلعا
دخلوا مدينة عطبرة ليلا وكان هناك موسم التبرعات للمهدية لتجهيز الحملة المضادة للانجليز فوجدوا منادي الامير النجومي يسيرون في طرقات عطبرة وهم ينادون اتبرع اتبرع اتبرع ولان الخواجات ما عندهم حرف العين كانت تقع الكلمة في اذانهم اتبرا اتبرا اتبرا ومنها اطلقوا الاسم علي مدينة اتبرا والتي اصر سكانها علي استعادة حرف العين الضائع منها وجعله اولها فصارت عطبرة وهذا باب كبير اذا قدر الله لنا متابعة سرقة الخواجات حنواصل بعد الفواصل
| |
|
|
|
|
|
|
|
|
|
Re: اللووووول لوووول يا لووولية (Re: أبوالزفت)
|
أساسي
سلام يا زول يا زين
تعرف ناس واي ولوووول والحاجات دي أخوك ما بيقدر عليها ووالله أسه باقية لي صعبة في الكتابة ونحن علي الأقل في الظاهر نتروجل كده لمن نفسنا ينقطع ولما جيت البورد في البدية الجماعة يكتبو لي لووول يا أبا قلت ديل بكونوا شلة الحناكيش يا زول خليك بعيد من اللولوة دي وشوية شوية أشوف ليك الجماعة الشينين بيقولوها وما تقول لي ديل منو
لكن نحن الشاقية مشهورين بإننا حنان والجعليين ما مريحننا في غنانا قالو كلو ووب ووب وطبعا هم في الرجالة يعجبوك حتي في غناهم الواحد يركز ويغني (دخلوها وطيرها حام ) دحين يا إبن عمي مش كان قالوها الخواجات كان بقت دوا ملاريا ماني قايلها
وإنت الأيام دي معزور ما في زول بلومك لولي ساكت
| |
|
|
|
|
|
|
|
|
|
Re: اللووووول لوووول يا لووولية (Re: aba)
|
الحبيب ابا
دعنا لا نذهب بعيدا وبما ان اسمك يطلق علي جزيرة المهدية المشهورة هي الجزيرة ابا فانها لم تخلو من نصب الخواجات اتزكر الفرقة الغنائية الشهيرة ابا المكونة من مرتين وراجلين واذا تزكر برنامج سينما سينما كان شعاره غانية الفرقة دي عشان ما اطول عليك انحنا الخواجات ديل ما ريحونا ابدا حتي اسمك وقت نعاين ليهو الان بنلقاهو حنكشة اما اذا رجعنا الي اصله فالحكاية ماصلة وبتختلف
اما حالتي فخليها ساي
| |
|
|
|
|
|
|
|
|
|
Re: اللووووول لوووول يا لووولية (Re: أبوالزفت)
|
ابو الزفت
وحاتك اخوك صنديد وبلاوي الحديد
لكن بمناسبة صنديد دي قالوا صنديد دا حصان عنتر بن شداد وهنا نتزكر السرقات العربية القريبة قريبة لما هو سوداني فالمعروف ان عنترة بن شداد هو سوداني اصيل والما مصدقني يسال كمال شداد رئيس الاتحاد العام للكرة فهو تؤام جده لزم واخو حبوبته في الرضاعة وقد ذهب الي الجزيرة العربية في رحلة حج وزوغة حينها كانت عبلة شغالة في سوق عكاظ قسم سوق الناقة حين كانت تبيع الشية وام فتفت والمرارة ولان عنتر قلبه حار فقد احب ام فتفت التي تقدمها له عبلة ومن لحظتها وقع في حبها وذهب الي ابوها ليخطبها منه فدقسه ابوها وقال له لازم تحارب معنا حرب البسوس فهي مهر عبلة ولانه عنتر كانت عضلاته تبش عروق عجور راس صهريج شعر سلوك قميص زنكي وزراير طبل وبزاغ موية نار لم يتواني ابدا في الدخول معهم في معارك البسوس وايضا لانه قلبه حار وعينه حمرة وشرار وعندما اثبت عنترة باسا وصلابة في تلك الحروب وكان يلقط الخيانة بتاعين العرب زي لقيط القطن استكثروا عليه ان لا يكون منهم عربيا اصيلا بالرغم من ان امه رطانية فاعطوه التابعية ومن لحظتها فتح للسودان ونسي حنانو القديم وفتح مؤسسة للتعقيب والمراجعة العامة
| |
|
|
|
|
|
|
|
|
|
Re: اللووووول لوووول يا لووولية (Re: sentimental)
|
سنتمنتال
وبما انه كلام يازول يعتبر في مجال العادي الا انه تتضح شمارات التلفون في مداخلتك وهذا ما نحسب حسابه عند الردود لذا ابشرك باننا لم نعهد خبثا رديا علي يازول فاننا نتعامل معه بتلقائية وضوح الكلمات اما ما تقراه صدقيي خلف العبارات فهو يعد عندنا من عدم الشجاعة والواضح ما فاضح او كما نفعل
| |
|
|
|
|
|
|
|
|
|
Re: اللووووول لوووول يا لووولية (Re: اساسي)
|
اساسى
امتعتنا الى درجه انى نسيت سندوشه الاقاشى حتى برد
والاقاشى الايام دى طالع فى الكفر تلقوه فى كل مكان فى ام دفسو وزقلونا والثوره و كمان الخرطوم اتنين هو اكله حبشيه على ما اعتقد
الظاهر على مرقت من الموضوع وخشيت فى موضوع تانى
معليش وبجى راحع تانى يا اساسى
ودعقاب
| |
|
|
|
|
|
|
|
|
|
Re: اللووووول لوووول يا لووولية (Re: ود عقاب)
|
العزيز ودعقاب
اولا طلعت زول مسطح في العضة الاقاشي من وجبات اخواننا الفلاتة والهوسا المشهور وهو لحم وشحم بدق دق العيش وتخلط بالدكوة الناشفة او الفول السودان الني وتمردغ فيه جيدا وبعد ذلك تغز في سلك وحبزا لو كان سلك عجلة رالي تمانية وعشرين وينزل النار ككباب فلاتي نمرة واحد اما بخصوص اخوتنا الافارقة وسرقة ما هو سوداني فسنتطرق له في حيز اخر
| |
|
|
|
|
|
|
|
|
|
Re: اللووووول لوووول يا لووولية (Re: doma)
|
الخالة دوما
وبما ان الخواجات لبط وقطاعين طرق لذا كان لابد لنا من وقفة ضروس في وجهم
انظري من اين اتي اسم خواجة اذا رددنا الاسم لاصله في العربية نجد ان الخواجة هو عندهم الخوجة الذي يقود الكارو اي بالدارجي السوداني العربجي نسبة لانهم جاءوا ليغزو بلادنا وهم يحملون المدافع علي ظهور الكارو اذا اتت غضبتنا علي اخذ العربجية لمقدراتنا ونسبها اليهم
| |
|
|
|
|
|
|
|
|
|
Re: اللووووول لوووول يا لووولية (Re: Maged)
|
وبما ان اسم ماجد قد تم تحويره في السودان الي مجدي لان ماجد عبد الله قد ذهب الي جزيرة العرب كما فعل اسلافه عنترة لكن ليلعب الكرة ولكنوجري خلف تفاح البلاد العربية ..املا في انف صغير وقامة افقية وراسية.
هاجر وولي واستبدل الهادي ادم بعبد المجيد عبدالله
لذا فاننا انكرنا الاسم جملة وتفصيلا مع سبق الاصرار والترصد
| |
|
|
|
|
|
|
|
|
|
Re: اللووووول لوووول يا لووولية (Re: Maged)
|
نواصل بعد الفواصل
الخواجات في تعديهم علي مقدراتنا اللغوية لم يتركو شيئا الا هبشوه
قيل والعهدة علي الدرويش انه في زمن السيدان الكبيران للسودان زار السودان رجلا يعمل بالسلك الدبلوماسي الانجليزي وكان الرجل قريب من الاسلام اي من المستشرقين وذو ميول صوفيه في زيارته قابل السيدان وكان ان تاثر ودخل الاسلام اكثر ما لفت نظره هو مخاطبة الحوارين للسيدين فلا يقول اي حوار حين يعني السيدي سوي ( سي دي )فلان وسيدي علان بعد ان عاد الخواجة الي دياره وامتنانا منه لطريقته الصوفية التي دخلها وشيخها كان ان استلم منصبا كبيرا في وزارة خارجية بلاده وهو الذي اطلق الاختصار الشهير لل ( سي دي ) للسلك الدبلوماسي واليوم نري في كل سيارات الهيئا الدبلوماسية فنظن انها الاختصار للكلمتين الانجليزيتبن
corpus diplomacy
ولكنها في الاصل تعني سيدي المهدي او سيدي الميرغني
بعد وفاة هذا الدبلوماسي لم ينشأ ولده في نفس مجاله بل نشأ في حب الكمبيوتر ولانه ورث من ابوه الطريقة وبعثه ابوه الي الشكينيبة فاخز الطريقة من سيدي المكاشفي وعندما عاد الي دياره وعرفانا منه مثل ابوه لشيخه كان ان اخترع القرص الصلب لجهاز الكمبيوتر فاطلق عليه نفس الاسم سي دي وهو عرفانا منه لشيخه المكاشفي شيخ الطريقة المكاشفية في الشكينيبة
ولا تنظروا ل_ سي دي رووم ) علي انها مكان وضع القرص الصلب فقط في الجهاز بل هو يعني بها في الاصل غرفة سيدي المكاشفي
ما قلت ليكم الناس ديل ماكلننا حنك
ونواصل
| |
|
|
|
|
|
|
|
|
|
Re: اللووووول لوووول يا لووولية (Re: اساسي)
|
سودانية مفلهمة سافرت الي زوجها في خمسينيات القرن الماضي الي لندن ولانها اهل عوضاية كل الذي خرجت به من الغربة في زخيرتها اللغوية هو كلمة
why
لان جارتها الخواجية كانت عاملاها موضوع وكل ما تشوف حاجاته الغريبة زي المشاط والحنة والدخان تسالي
why
يعني لشنو دا
اها السودانية لما رجعت هي وزوججها الي السودان لم يستطع الزوج تحمل الابتعاد عن الغربة فسافر الي جدة وطال سفره بالسنين وفي لحظة حنينها الي زوجها كانت تنشد وتقول
واي واي واي خلاني براي المسافر جدة خلاني براي
طبعا معظم السودانين فهموها بمعني واي التي تقال عند الالم للنسوان
ولكن الاصل هي
ليه ليه تخليني براي يا المسافر جدة
والعهدة علي حواء الطقطاقة
| |
|
|
|
|
|
|
| |
اساسي
abuguta
يازولyazoalيازول
عاطف عبدالله
AlRa7mabi
almulaomar
أبوالزفت
aba
doma
فيس بوك
تويتر
انستقرام
يوتيوب
بنتيريست