|
|
 Re: شكراً للحرامي ..!! بقلم الطاهر ساتي (Re: الطاهر ساتي)
|
صدقاً لكلام أخونا الطاهر ساتي ..
لي هسه أنا ماقادر أعرف كمية الاهتمام بالسرقة دي سببها شنو !! ..
هل عشان الدهب كان كتير ..
ولاّ عشان البوليس تم خداعه واللعب به ..
بواسطة اللصوص وبيحاولو يتداركوا الخطأ الفادح ده ..
ولاّ عشان الاشاعة القالوا فيها ان المحل ده مملوك لاحد رموز النظام ..
ولاّ عشان البوليس عايز يعمل ( شو ) لنفسه ..
ولاّ عشان شنو الهيصة دي ..
غايتو للآن أنا ما قادر استوعب الزيطة والزمبريطة دي لزومها شنو !! ..
غايتو الشيء الأنا متاكد منه إنه الحالة الامنية في البلد مش ولابد ..
والى الآن رغم إمكانيات الشرطة المهولة والمخصصات الكبيرة لافرادها ..
قياساً ببوليس زمان .. مافي أي تطور في عمل الشرطة .. بل انخفض أداؤها كثيراً ..
والدليل واضح ويلمسه المواطن ويحسه ..
فالكثير من الأحياء والشوارع في العاصمة ليلاً تنعدم فيها سيطرة الشرطة تماماً ..
ده غير الفشل التام للشرطة في تفعيل شغل السواري والدوريات الليلية ..
لحراسة الاحياء بالعاصمة كما كان حاصل زمان ..
والى الآن حرامية الاحياء لازالوا بيسرقوا بيوت الناس وبيروعوا الآمنين ..
ولازالت العصابات والمجرمين المتفلتين يعيثوا في أحياء الخرطوم الفساد والرعب
وبلا أي خوف أو وجل من الأجهزة الشرطية لعلمهم بانه البوليس بالنهار بس ..
بالليل مافي بوليس .. وده هو الاهم .. لأنه النهار له عينين ..
وكل زول قادر يتدارك وبحفظ أمن نفسه ..
فحقو الشرطة تهتم بالدوريات الليلة ..
وتزيد حرصها على ضبط الامن في العاصمة ..
ووسط الأحياء الطرفية على وجه الخصوص ليلاً ..
لأنه شغل النهار ده هين .. التقيل شغل الليل ..
وكمان كان ضبطت الامن في الأطراف لابد لوسط البلد ان ينعم بالأمن
وكمان على الاقل عشان المواطن ده يستشعر جهود الشرطة على أرض الواقع المعاش ..
مش يعكسوا الجهود دي قسراً عبر أحتفالات بجهود ماليها أي سند واقعي يدعمها ..
لانه لازالت العاصمة الخرطوم ليلاً بلا أي وجود امني وشرطي يذكر ..
دي الحقيقة المرة و الجلية والواضحة للمواطن فغايتو كان هاصوا ولاّ احتفلوا ..
لازال امام الأجهزة الشرطية الكثير لتعيد لنفسها بعض ألق وضبط وحزم وحسم بوليس زمان ..
حينها يمكن للشرطة أن تحتفل وتملأ الدنيا صخباً ..
لكن الحاصل هسه ده يعتبر بمثابة زر الرماد على العيون ..
ليس إلا ..وجعجعة بلا طحن ..
فشرطة لاوجود لها ليلاً لتحرس المواطن وماله وعرضه ..
شن الفايدة منها نصة نهار ..
اللهم إلا كان نتأمل في جمال البوليس ....
يأخ زمان بوليس واااحد كان ظهر في أول الشارع الناس كلها بتعمل حسابها ..
لأن البوليس كان لحق قبضك وبقيت مذنب والله تكوس لللتمرقك منه ماتلقاها ..
هسه كان جابوا أورطة بواليس مافي زوول بيشتغل بيها ..
ليه ..
لأن الأحكام غير رادعة ..
حرامي يقبضوهو يدوهو كم شهر ويجيك راجع تاني ..
متحرش وهاتك للاعراض .. يدفعوهو غرامة وكم شهر ..
وترجع حليمة لي قديما ..
أنا بشوف أنه القضاء كمان يتحمل وزر الانفلات الأمني الحاصل ده ..
لأنه متساهل في أحكامه بطريقة تدعو للسخرية والضحك والتهكم ..
وكأنه القاضي ده ما من البلد ولا عايش فيها ..
وكانوا جايبنوا لينا من بلد تاني ولاعلاقة له بتاتاً بالحاصل في البلد ..
لأنه بيحكم وفق حيثيات ماليها أي علاقة بالواقع المعاش الحاصل في المجتمع و الشارع السوداني ..
يمين تسمع حكم القاضي شدة ماهو متساهل ومتهاون لامن تدي ربك العجب ..
الله يصلح حال البلد غايتو ..
فالوضع الامني الحاصل ده لايرضي عدو ولا صديق .
|
|
 
|
|
|
|
جمال ود القوز
فيس بوك
تويتر
انستقرام
يوتيوب
بنتيريست