|
|
 الي الحوت في عليائه بقلم د.صيدلي/جعفر محمد عمر حسب الله
|
17/1/2015
في الزكري الثانية لصاحب الصوت الشجيّ،والمبدع الإنسان محمود عبدالعزيز(الحوت)، إليه ينساب مدادي حروفا" تتشكل كلمات لتحاكي دوذنة ألحانه .........
صباح الخير...
سلامات...
إزيك ومشتاقين...
علي فين ياراجل؟؟؟
علي فين؟؟؟؟؟؟؟؟؟
يا مالي العين...
*****************
شقيش ماتفوت...
الناس راجياك...
راجياك ياحوت...
لي جلسة سماع...
لي حفلة وداع...
لي رحلة لطيفة...
لي نكتة ظريفة...
لي كلمة تطيب خاطر...
لي ناس حاباك...
لي ناس شايلاك...
الليلة وبكرة وباكر...
*********************
يا مدي الدنيا قفاك...!!!
لا مال!! لاحب الناس غشاك...!!
أبسط من كل الناس...
ألطف من كل الناس...
يا وسط الناس...
يا سديد الرأي...
يا فول...
يا قهوة وشاي...
يا سهرة جنان...
يا رائع...
يا مدهش...
يا إنسان...
****************
دائما" قدام...
في الشارع...
في النوبة...
في أفراح الناس...
في الحوبة...
***********************
الإعجاب يا حبيبنا جنون...
الريدة جنون...
كل الأحباب...
ملايين .. ملايين...
من كل الألوان...
من كل الأديان..
رافعنك فوق...
خاتنك فوق...
شايلنك فوق...
في ود العين...
رافعنك راية...
هتاف...
بطاقة...
أسم وكتاب...
دافننك في القلب هنا...
راسمنك في اليد هنا...
رابطنك في الوسط حجاب...
**************************
معقولة تفوت...؟؟؟
معقول يا حوت...؟؟؟
لا جيت بي جاي...
لا تقول باي باي...
قصدك توترنا...
ولا بتهظر ساي...؟؟؟
*************************
الشارع غيم..إتلملم...
ما ضلم...
نور...
قدامو الحوت...
شقيش ما تفوت...
ملايين..ملايين...
موكب ممتد...
ما عندو نهاية...
غلابة وناس طيبين...
حافظين الدين...
*******************
يا ماشي .. وجاي...
الناس .. إتنين...
حيين .. ميتين...
ميتين .. حيين...
الدنيا.. كدة...
ونحن .. وحاتك...
منتظرنك...
إنت بذاتك...
أيوة بذاتك...
منتظرنك...
منتظرنك...
منتظرنك...
الخرطوم 2014م
مكتبة حيدر احمد خيرالله
|
|
 
|
|
|
|
جعفر محمد عمر حسب الله
فيس بوك
تويتر
انستقرام
يوتيوب
بنتيريست