|
|
 جوله قصيره فى أزقة ولاية منهوبه ورسائل مشفره لمولانا هارون ..... الأُبيض ... ياسر قطيه
|
موسم سقوط الأقنعه
وعلى وقع سرديات مؤتمر صحفى حافل
جوله قصيره فى أزقة ولاية منهوبه ورسائل مشفره لمولانا هارون .....
الأُبيض ... ياسر قطيه
لما حرصنا على التأكيد وإعادة السرد طوال مقالاتنا السابقه وإصرارنا على إلقاء الضوء لنبين جزء يسير للغايه من الكسب الفكرى والعلمى والتحصيل الأكاديمى والقدره المهوله على الإرتجال والسرد المرتب المترابط والقدره الفائقه على الإستطراد والذهن الإنطباعى الذى يعمل على طريقة ( الكوبى بيست ) .... ذلك الذى يحوز عليه مولانا أحمد محمد هارون والى ولاية شمال وخيار الشعب أهرقنا كل ذلك الحبر الكثيف ودلقنا أنهار من المداد لغرض أن نطلق صيحة تحذير داويه نطلقها عبر هذا الفضاء الرقمى الفسيح عسى ولعل أن أن تصل الى أذهان بعض الحبرتجيه من ناس قريعتى راحت الذين يبيعون ويشترون ويسوقون دائماً وابداً أنفسهم فى سوق نخاسة السياسه معتمدين تماماً على ( الحنك ) والغرض من ذلك السرد الطويل أيضاً أن نؤكد لهؤلاء الهتيفه وأرزقية المواقف عاطلى الموهبه وفقراء التحصيل الأكاديمى إن هذا ( الحنك ) ( م بياكل عيش مع الزول أبو مسدسات ده ! ) وبالتجربه والدليل والبرهان ثبت وبما لا يدع أي مجال للشك إن ( عمك ده ملك الحنك ذاتو !! ) يعنى بالواضح وأليك الامر من الأخر وبإختصار عليك أن تفهم إن مولانا هارون الرجل القاضى والذى يحكم هذه الولايه بخيار ومحبة أهلها ( زول شفت ومقرم وبلعب بالبيضه والحجر ! ) وإنى أقولها لكم أحبتى القراء وأنا صادقٌ إن العبد لله محسوبكم أبوالقطاطى كاتب هذه الأسطر ... ( عمرى ما عملته حيطه من بنى أدم إلا من الزول أبومسدسات ده ) !! وطوال حياتى المهنيه الممتده عبر مسيرة خمسة وعشرون عاماً منها ستة عشر عاماً متصله قضيتها فى خارج السودان وعملت متجولاً فى مهنة البحث عن المصائب هذه صحفياً وملحقاً ثقافياً وإعلامياً وأحياناً ملحقاً ( صعلوكياً !! ) فى أكثر من إثنين وعشرين بلداً ودوله حول العالم صادفت فيها الكثير والمثير وقابلت سفراء وقناصل ورؤساء دول وبلطجيه ولصوص و########ين وقتله وفتيات ليل وتجار مخدرات وفنانين ولاعبى كرة قدم من مشاهير اللعبه فى العالم لكننى لم ألتقى على الإطلاق بوالى أو حاكم مقاطعه أو ولايه ( غتيت ) بمثل غتاتة هذا الرجل القاضى الذى يحكم هذه الولايه !!
غتيت ... للدرجه التى يسمى فيها أحدهم فى منصب دستورى ويذيعه عبر وسائل الإعلام المختلفه ويصدر بذلك مرسوماً ولائياً قضى فيه بتشكيل حكومته ( الرشيقه ) ليُفاجأ كل شعب الولايه بإن أحدهم وهو رجل مسكين تصرف بشهامه فى تقديرى وحلقات مسلسله المكسيكى العاطفى المشوق تابعها بمتعه كبيره هذا الشعب الذى تخالونه أهبل وغشيم ليتفاجأ الساده المشاهدون إن هذا الرجل بطل المسلسل قد تم تعيينه وتسميته ليتولى مهام وزراه ولا محليه أيهما أصح ونحن لا ندرى حقيقةً ولا ندعى إننا ندرى فأهل بارا أدرى بشعابها !! .... يعين مولانا هذا الرجل ويذيعه على الملأ لتعود قصته المشوقه وتحتل من جديد صدارة عناوين مجالس شمارات المدينه وتطفوا على السطح مره أخرى بعد موتها إكلينكياً ويجلس مولانا وهو خالف رجل على رجل منتظراً أن يأتى هذا الرجل ليؤدى القسم أمامه !! أيواااااااااااااااااااااا ( إنشا الله جاك بالله ) ؟؟ لا خلاص ( م قال بجى .... مالو ما جا ؟ ) .... بالله يا أخوانا فى غتاته أكتر من كده ؟ عرفتوا الكيزان ديل ممشين البلد كيف ؟ الراجل يا عمك قال ليك ( إنى حلجت منهم نفساً وأخاف ربى أن يحلجون !! ) برضوا تقول ليهوا يا أيها ( الحلجته بغم ..... قد عمدناك فقم !! ؟ ) ...... غايتوا دى ما سبقك عليها زول يامولانا والزول ده كان شفتوا تانى ساكت قاطع قدامك أدي ناس محلية دعارستان ديل طلقه فى راسهم ! قال يجى يأدى القسم قال !!
لم لا تبعث بمبارك شمو عاملاً لديك فى تلك الأمصار ؟ لم لا تعمده على القوم الجبارين ؟ فمبارك شمو وفضلاً عن سمو أخلاقه وتواضع نفسه وحب الأخرين له وتفانيه وصدقه وأمانته ونقاء سريرته هو رجلٌ ليس له أي قضيه ( بالحلج ) فهو لا بيحلج زول ولا بخلى حلجة الله تنزل . زول ساكت ... زول الله ساكت بالإضافه لكونه أكتر كوز فى الدنيا دى بيعمل مليون حيطه من المدام . واحسن زول بيجيب مصاريف البيت من قرع ومنقرع ولوبيا وحتى أنواع الخضار صار فيها الرجل شمو مرجعيه من كترة المراسيل . وأحسن زوج بغسل عِده . الله وكيلك الساعه عشره مساء دى لما تجى صحبى مبارك شمو ده بكون قبيييييييييل غسل أخر صحن وملأ قزاز التلاجه مويه وساوا المقشاشه ثم قدم طلب إسترحام مشفوع بكل الذرائع عشان ياخد ( أمر تحرك ) لعشرة ونسه مع غندره ! ودى شمو بارا ودخل غندره المجلس التشريعى الولائى وكان تميت جميلك وجبته لينا معاو حسن طوسطه إحتمال كبير ربنا يدخلك الجنه . أغرب مجلس تشريعى فى التاريخ .... الأعمى شايل المكسر ومن كل بلد فرده ... تجار ومصدرين ومستهلكين وباعه وأرباب عمل ومعاشيين ونقابيين ، موالين ، ومعارضين وكضابين وما أكل السبع ومتمردين ... ده مجلس تشريعى ده يا مولانا ولا أبوجا 3 ... ؟ لما الشغله كده يا مولانا شد وأركب م تركبنا معاكم سرج مركب عل الله دى ؟ إنشا الله ممثل للجنجويد ؟ وبرضوا ما تنسى أخونا المشوطن تالت ركن الكمرونى أب راساً مربع ده .... ود أب كر النفر المضر ونحنا الأتنين ولو دايرين تزكيه ولا ورقه بتاعت ( معروف لدينا ) الهفيتوا بيها البلد دى بنجيبا ليك من كفيلنا وولى أمرنا الضامن / سعاتو شريف الفاضل وشريف الفاضل أتى بما لم يستطعه الأوائل ... حول الكمرونى أب راساً مربع من تور/ بورا متقاعد ... لـ تور / نفير !! مش قال الكلام ده قدامك يوم السبت الفات ده يا مولانا ؟ .... نحنا الإتنين تيران ودأب كر تورنفير وأنا تورغفير .... حدد لينا بس متين نجى نأدى القسم نحنا جاهزين . ..... . وعشان التقشف وكده ويومداك صحبى حافظ حبابكو إشتكى لى من العدس نحنا حنجى بعدسنا جاهز وأي زول فينا يجيب مصحفوا معاو ..... لزوم تقشف وكده .
ثم أننا حنشتغل بلاش فى المجلس التشريعى . حنكتفى بالشهره وجيبوا إسماءنا فى كشف المرتبات مافى مشكله فى كده .... نحنا والمفقودين والمهاجرين فى سبيل الله الى كندا والمعوقين وأصحاب الإحتياجات الخاصه ومن دقنك وأفتلوا و الذين قضوا نحبهم وهم فى اضابير وكشوفات الفصل الأول مسجلين !! فى المحليه ووزارة الصحه والتأمين الصحى والإتحاد المحلى لكرة الهبت السياسيه فى شمال كردفان والأراضى والأوقاف وسوق عبدالله بن مسعود والرقيبه وعيييييييييييييك وهم أحياء عند مسؤوليها ومدراءها العامين يرزقون . الفصل الأول ده فى الولايه المخرومه دى يا مولانا بقى إتحاد معلمين !! فى ناس من زمن الإنجليز ولحدى هسى ما مشوا سنه تانيه ! قاعدييييييييين شغالين ( أعد ) بس ودافنين دقن فى سنه أولى مرتبات دى الغريبه أحفادهم يدرسون الأن فى أرقى جامعات القبول الخاص فى الخرطوم بالليل . البت الراكبه أخر موديل والولد الراكب همر والسكن الكامل المواصفات فى أرقى فلل العاصمه القوميه أكبر مركز لغسيل أموال الولايات فى شرق ووسط إفريقيا ..... تشوفهم بتمسكنوا قدامك كده وكاتلين حيلهم ولابسين ليهم جلاليب قديمه عشان إنته تقول والله الناس ديل مساكين ! على بالطلاق داير تعرف التِجدع الصاح أمشى شوفهم فى الخرطوم ... أخر بدل وأخر مولات وأخر أمواج وعاملين ليك فيها هنا بفطروا وبتغدوا وبتعشوا معاك عدس ! عدس مين يا مولانا ؟ إنته مصدق الكلام ده ؟ ديل بتوع ###### حار ساااااااااكت ، على باليمين أقل حاجه بياكلوها هى البيتزا ! ، بيتزا ونقانق وفطير مشلتت وكلاب حاره أشكال وألوان وبيجيبوا لبناتهم عصير أبومصاصه ! على بالطلاق تدى ود أب كر ده عصير أبومصاصه وإتنين ###### حار بكره تلقى بيهتف هى لله ولو تميت ليهوا المقصر ببيتزا ولا بيرقر ساكت كان ما بايع المؤتمر الوطنى وبقى كوز أدى ( جوبلز إعلام الولايه ده طلقه فى راسو ) .....
و ( جوبلز إعلام الولايه ) الذى أعد ( قائمة شندلر ) والذى كان يجلس هكذا والذى كان يعتقد إنه كان يتراس الجلسه .... طلع زول مسكين ساكت .... صحيح إنه من الرعيل الأول المؤسس لمحفل بنى فصيل ( الفصل الأول مرتبات ) وعضو مجلس إداره فيه ويشغل حالياً منصب أستاذ كرسى فى معهد وكليات جامعة الهبت الدوليه ونائب الأمين العام لتجمع ( ش ك أ 69 مظلله ) الناطق الرسمى بإسم تنظيمات الهبر الموحده إلا إنه وبالقارنه مع أباطرة أراضى التعويضات الزراعيه ( كابا ) نموذجاً وأحد عشر كوكباً فى محلية دعارستان يعملون فى ملفات أراضى أحد عشر قريةً وحِلة فرج الله وحى السكه رأيتهما لى ساجدين يعتبر حوبلز أعلام الولايه هذا زول لقيط ساكت والتحيه للضابط الإدارى الرفيع إبن الولايه البار جنابو بكرى إسماعيل الذى رفض التوقيع على مئتين قطعة أرض كانت ستذهب مباشرةً بذلك التوقيع الى أحضان ( بابلو أوسكبار ) الشهير بالِلِكه إمبراطور التكويش على حيازات وأراضى الولايه والذى تقدر ثروته فى هذا المضمار بأرقام ملياريه فلكيه .... تعظيم سلام للضابط الإدارى بكرى الرجل الذى أوقف من فور رفضه التوقيع وإُنهى إنتدابه لدى محلية دعارستان ..... هذا الرجل لا يجب أن يعود لمزاولة عمله إعتباراً من اليوم فحسب بل الأمر يستوجب أن يستميحنا عذراً فى إلتماس الجلوس إليه لننقل لكم سيداتى أنساتى سادتى مشاهدينا ومتابعينا الأفاضل أكبر عملية إحتيال تمت فى هذه الولاية الموبوءه ونوثق ذلك صوت وصوره لكى يكون إولئك اللصوص عظه وعبره لمن لا يعتبر حينما يرى ذلك ويسمعه شعب وجماهير ولاية شمال كردفان والله أكبر ولا نامت أعين الخونه والمارقين واللصوص .... ولنا عوده
[email protected]
|
|
 
|
|
|
|
ياسر قطيه
فيس بوك
تويتر
انستقرام
يوتيوب
بنتيريست