|
الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة)
|
الزواج.. توافق.. واتفاق.. وقبول... بين اتنين رضو انهم يكونو زوجين.... وزمن البت لازمن يعرسها ود أعمها ولى... وبقت البت تختار زيها وزي الولد واحد... البيعجبها تعرسو... وان طلع كعب بعدين تاكل نارا...لكن بعض المجتمعات ما زالت تفرض الزوج على الزوجة بطريقة او باخرى...مرة بالترغيب ومرات كتيرة بالترهيب..
قرأت في احدى الصحف السعودية انه في الاحساء في السعودية..... يوم الزفاف... دخلت العروس الي منصة الزفاف... وهي لابسة كفن... كفن راسو عديل كما ذكرت االصحيفة السعودية... دخلت وهي تمشي الهوينا زيها وزي اي زول ميت ! والكفن يسوي "فطق فطق".... وزيادة في النكد... وبدل اغاني الزفاف وادلع يا عريسنا عروستك نايلون...شغلت العروس في الميكرفون قران كريم... واية(هذه جنهم التي كنتم توعدون)....بصوت مقرئ سعودي معروف هو الشيخ خالد القحطاني.. والشيخ يقرا ويبكي كمان..... والعريس بعد ما كان فرحان فتح خشمو من الخلعة والناس الفي الصالة كلهم اتخلعو واتهجمو وإتبهطو.... وبعد شوية العريس صحا من الهجيمة دي ما كضب و طلق العروس وهي في كفنها داك تلاتة طلقات.. بطول حسو.. ولملم بعضو وشال اهلو....العروس قالت عملت كدا عشان العريس ما عاجبها.... لانو بيشرب سجائر وبيسهر... بيشرب سجائر ولبست لو كفن يوم العرس....طيب دا لو بيشرب عرقي كان لبست شنو يوم العرس؟...والله غايتو جنس محن... زول خسران وتعبان وفرحان تجيهو عروسو لابسة كفن وتشغل ليهو اية( هذه جهنم التي كنتم توعدون)؟...العروس قالت قدر ما فهمّت العريس قبال العرس انها ما دايراهو ويا ود الناس اختاني ما دايراك... ما دايراك... هو لاصق فيها وحلف ما يخليها واستغل اهلها وضغطوها... اها اليضوق تراها لبست لو الكفن ووعدتو بجهنم.... والله الواحد خائف من الموضوات الما معروفة شنو دي تلم فينا هنا... ونسمع بي واحد... ماخد شاكوش من واحدة... وتكون اتزوجت واحد مرطب...ويجي صاحب الشاكوش.. ويدخل الصالة الفيها يوم العرس بتاع صاحبتو التي شوكشته..... براحة ويلبد ورا الاجهزة بتاعت الغنا ديك... واول ما العريس والعروس يجو داخلين بالزفة والزغاريت والهيلمانة فجأة يوقف الغنا..... يشغلهم سورة( تبت يدا ابي لهب وتب * ما اغنى عنه ماله وما كسب* سيصلى نارا ذات لهب* وامرأته حمالة الحطب* في جيدها حبل من مسد)...وبعد صدق الله العظيم.. يمسك الميكرفون ويقول ليهم( أها... بس!)
عش الزوجية.. الدايراهو عروس الجن السعودية دي
|
|
|
|
|
|
|
العنوان |
الكاتب |
Date |
الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | سجيمان | 10-04-10, 10:28 AM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | سجيمان | 10-04-10, 10:32 AM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | فدوى الشريف | 10-04-10, 11:29 AM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | سجيمان | 10-04-10, 05:23 PM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | سجيمان | 10-04-10, 07:46 PM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | المر | 10-04-10, 12:17 PM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | علاء الدين حيموره | 10-04-10, 12:33 PM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | جمال محمود | 10-04-10, 02:44 PM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | cantona_1 | 10-04-10, 03:34 PM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | المر | 10-04-10, 03:38 PM |
Re: الطـلاق بالثـلاث لعــروس لبســت «الـكفن» بـدلاً من فسـتان الزفاف(توجد صورة) | المر | 10-04-10, 03:25 PM |
|
|
|