|
|
 هيـــصة....و...زيـــطة....و...زمبريــــطة
|
الخرف.... مرحلة ..ختامية لحياة البني ادم...والخرف يعني زول يصوط النضم والفعل فوق تحت....حبوبتي التاية خرفت قبال تموت بخمستاشر سنة.... عجاف..... ضوقتنا فيها المراير...كانت في كامل قواها الجسدية....لكن مخرفة....وحوامة.... اليوم كلو الناس كايسة للتاية....الحوامة كوم والنسيان كوم......تنسى اي شي.... باللوال كان الفترة بين كل نسية ونسية طويله... عقبان في الايام اللخيرة.. بقت تنسى كل خمسة سواني.....
مرة جيت بالليل..وكنت ماني لبابة.....لقيت حبوتي التاية...تصلي في العشاء كانت ساجدة.... رقدت في عنقريب قصادا....وكل ما ارفع راسي..القاها ساجدة...يمكن ساعتين..علي الحالة دي...كوركت لي امي..... قلت لها الحقي امك...ماتت وهي ساجدة بين يدين الله....جات امي وكفتا علي ضهرا.... علا واشوف حبوبتي التاية وقفت فنتروب وكبرت ودايرة تصلي تاني..... علا امي حلفت عليها تاني ما تصلي كفاها...
برضو تاني يوم نفس الفلم..... لكن المرة دي كانت في وضعية الجلوس.. بين سجدتين وكانت نست تسوي شنو تاني؟...وانا برضو ما كنت لبابة....ساعتين حبوبتي التاية مصنقرة..وانا ارفع راسي والقاها مصنقرة....واتعجبت واتحيرت حبوبتي التاية دي اتعلمت "اليوقا" وين؟
ايامي العريس... يوم الحنة علي شقاوتي..حبوبتنا التاية قاعدة جنبي في عنقريب الحنة....وكل مرة تنسى الحاصل شنو...وتمسك اقرب زول تسعلو......لا اصبري يا دي...... الهيصة والزيطة والزمبريطة..دي شنو؟....البت تجاوبا تقولها....دا ما عرس سجيمان يا حبوبة؟...... كدي؟ اكنو الليلة هو عرسو؟.... سجيمان وينو ابارك لو.....البت تقول لها..تراهو جنبك..حبوبتي التاية تقبل علي وتشعبط فوقي وتشعلق في رقبتي....وتنسى انها مشعلقة في رقبتي...ويا الله ويا امين يفكفكوها من رقبتي...وبرضو تاني تاخد لها خنسا و تسعل... لا اصبري يا دي.... الهيصة والزيطة والزمبريطة ..دي شنو؟.. والبت تجاوبا......وحبوبتي التاية تشعبط وتشعلق في رقبتي ...وتنسى انها مشعلقة في رقبتي ونقعد نفكفك فيها....نان الحنة انا شوفت لها شي؟...الليل كلو حبوبتي التاية تسعل من الهيصة والزيطة والزمبريطة..وتشعلق في رقبتي ويفرتقوها........
جات مرة من السهلة.....المغرب...ووفنتروب قعدت في عنقريب..العنقريب كانت فيهو عقرب وهي تقعد فوق العقرب والعقرب قصرتا.....وتسرخ.... وتكورك العقرب قرصتني.....وقت الناس اتلمو....حبوبتي التاية تنسى العقرب قرصتا وين..؟!؟!؟!؟!؟...؟...مرة تقول لهم في راسي ومرة تقولهم في كراعي.....اهتدو لي فكرة في اعتقادي الشخصي انها جيدة.... اتنين من النسوان ملصو حبوبتي التاية... وعملو مسح لي جسما من فوق لي تحت....واحدة من الراس نازلا...والتانية من اصابع الكرعين صاعدا...وبالتناوب....وكل مرة واحدة تقولها هنا؟....وهي تقول لا....وماشات كل واحدة في اتجاها المحدد....لحدي ما تلاقن في النص....واحدة قالت هنا؟؟؟حبوبتي التاية...كوركت وقال لها اهااااااااااااتك.... بس هنا.....وحددو مكان قرصة العقرب بعد مسح دام التلات ساعات صادفته كثير من العقبات.....المصيبة انها كانت في اثناء المسح تنسى النسوان ديل بيسون في شنو...وتقبل عليهن وتنهرن.... يا بنوت هوووووووي بطلن المسخرة... كايسات لي شنو؟.......
ماتت حبوبتي التاية....قبل خمسة سنوات....لكن انا لي حسي ماني مطمن وخايف تكون نست انها ماتت
|
|
 
|
|
|
|
|
| العنوان |
الكاتب |
Date |
| هيـــصة....و...زيـــطة....و...زمبريــــطة | سجيمان | 10-10-04, 07:37 AM |
| Re: هيـــصة....و...زيـــطة....و...زمبريــــطة | abdalla BABIKER | 10-10-04, 07:39 AM |
| Re: هيـــصة....و...زيـــطة....و...زمبريــــطة | Dr. Moiz Bakhiet | 10-10-04, 11:13 AM |
| Re: هيـــصة....و...زيـــطة....و...زمبريــــطة | خضر عطا المنان | 10-10-04, 12:13 PM |
| Re: هيـــصة....و...زيـــطة....و...زمبريــــطة | سجيمان | 10-11-04, 08:16 AM |
| Re: هيـــصة....و...زيـــطة....و...زمبريــــطة | سجيمان | 10-11-04, 01:36 AM |
 Re: هيـــصة....و...زيـــطة....و...زمبريــــطة | abas | 10-10-04, 08:05 PM |
| Re: هيـــصة....و...زيـــطة....و...زمبريــــطة | سجيمان | 10-11-04, 10:35 AM |
| Re: هيـــصة....و...زيـــطة....و...زمبريــــطة | nasiradin | 10-10-04, 10:47 PM |
| Re: هيـــصة....و...زيـــطة....و...زمبريــــطة | شمهروش | 10-11-04, 02:21 AM |
| Re: هيـــصة....و...زيـــطة....و...زمبريــــطة | سجيمان | 10-12-04, 01:10 AM |
| Re: هيـــصة....و...زيـــطة....و...زمبريــــطة | سجيمان | 10-11-04, 08:07 PM |
| Re: هيـــصة....و...زيـــطة....و...زمبريــــطة | سجيمان | 10-13-04, 09:43 AM |
|
| |
سجيمان
فيس بوك
تويتر
انستقرام
يوتيوب
بنتيريست