|
|
|
 Re: ســيناريو البحث عن يابسه و زكريات المعهد العالي للموسيقي و المسرح (Re: khider)
|
خدر ..
من العوالم التي تمنيت دخولها والفرجه عليها والاحتكاك بها,
كان ذلك المعهد العالي للموسيقى والمسرح .. لكن للأسف اشتد
عودي بعد أن كان قد أصابه ذلك التجريف والهدم على يد السيد
أحمد عبد العال ..
وكنت أرى إلى الأمر أن في السودان أماكن شديدة النفاذ الى
الى أرواح مرتاديها : المعهد, كلية الفنون,الحزب الشيوعي..
أماكن لها القدره على الاحتواء والمد بشكل أكبر من قدراتها
الأصليه,وفيها ذلك السحر الذي لا ينتهي مادمت حيا ..
سأنتظر يا خدر حكاويكم عن هذا المكان المستحيل بشغف .
حكاوي قد تجعلني أستلطف الخرطوم قليلا.
و..
شكرا مقدما ..
...
طلال
| |
 
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: khider)
|
العزيز جداً خدر
شكراً ليك يا جميل بالاحتفاء مرة تانية بتجربة سيناريو اليابسة الإذاعية وشكراً مجدداً لعاطف خيرى ولكل المشاركين فى عملى الإذاعى الوحيد.
وشكراً لزملاء الخشبة السايبر طلال عفيفى، محمد أشرف وبيان ولكل الذين مروا من هنا. وزى ما قلت يا خدر تحتاج هذة الفترة العاصفة من تأريخ المعهد، فترة الأحداث والتحولات الكبيرة فيه لمساحة أكبر للكتابه عنها وبكل وجهات النظر المختلفة. وأنا أقترح تحديدها من منتصف العام 89 أى قبيل تولى د. الطاهر حسين مهام العمادة بقليل وحتى إكتمال إجرآت إنضمام المعهد لجامعة السودان.
وقبل ما نمشى فى الونسة والتوثيق لهذه الفترة أود أن أوضح شئ لبيان وهو إن تقدير الإمتياز المذكور تحصلت عليه فى عرض التخرج يعنى فى مادة الإخراج العملى والتقدير العام جيد جداً يعنى التانية العليا، وياريت لو سؤالك يا بيان كان دُغــرى لخدر أو لى ودون الحوجة لمقارنتنا بناس موسيقى وتتكبدى كل هذه اللّفة الطويلة، علاوة على أن خدر فتح البوست حسب فهمى للونسة وتوثيق تلك الفترة من تأريخ المعهد المجيدQuote: من اسع الفرق بينا وبينكم ما كان فى زول بيتخرج بالاولى كلو كلو
اعلى حاجة الثانية العليا ودى بعد كد وجهد جهيد ونادرة جدا.. |
وحسب علمى هناك الكثير من خريجى مسرح تحصلوا على الثانية العليا وهى ليست نادرة كما ذكرتى، أما بخصوص الأولى أعرف حالتين تحصلتا على الأولى فى قسم المسرح- إخراج وتمثيل - وفى دفعة واحدة وهما حسب الرسول كمال الدين (الآن مخرج بإذاعة أمدرمان) والمرحوم عيسى تيراب العام 89 .. ونسمع منك يا بيان ومنكم يا شباب .. سلام
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: منعمشوف)
|
الاخ الكريم منعم
لا ادى مالذى جعلك تعتقد ما تعتقده فى مداخلة عادية
لم اقصد بها اى شئ وان شاء الله ساسحبها ولن اتداخل فى هذا البوست مرة اخرى.. اذ انه يبدو ان اسمى صار يرتبط باشياء غريبة فى اذهانكم
....وانا لا احتاج لان الف او ادور لاقول ما اقول.. وقد كانت ملاحظة عادية من سنة 1974 الى سنة 1985 لم يتخرج ولا طالب واحد بامتياز
او الاولى من قسم الاخراج و التمثيل و تخرج الاستاذ هاشم صديق و المرحوم حسب الرسول بالاولى من شعبة النقد.. هذه للتأريخ
سنة 1985 هى آخر عهدى بالمعهد ..
وأعتذر لك اذا فهمت ما اردت ان اقوله خطأ... والعفو والعافية
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: إيمان أحمد)
|
وليد يوسف الفنان
إزيك وعلّك طيب وهناء والوليدات
والله دايماً فى البال والغريبة يا وليد كنت فى سيرتك
النهار ده مع خطاب حسن أحمد وهو يسأل عن أخبار الصديق أمفريب
شفت التخاطر ده كيف  منتظرين جيتك والوليدات والجميلة أمهم
بالمناسبة هل تابعت موضوع أضبط أعلاه ؟!!
عصام عبدالحفيظ الواحد ده، إزيك يا زول يا زين وعلّك طيب
من يوم 08-08 وعدد بوستات 134 وأكلات مفضلة سمك، ويا كافى البلا
وحايد المحن مافى ود حلال يرحب الترحيب الشحمان الذى تستحقه وأكتر.وخدر الشين دا قاعد يسوى فى شينو، يا خـــــدورى
والله قصرنا معاك تب يا ابو يس. كدى يا جميل خلينا من نارنا المولعة دى،تعال ونسنا انت عن المعهد الآن، يا ربى بتمشى تتفقد الوليدات ديل كما كنت تفعل أيامنا، تحياتنا للجميع بطرفكم ونسمع منك
إيمان أحمد سيدة البوستات المجيدة فى بيتنا. إزيك وكيفنك، هذا الإطراء الأنيق محول للولد المسكون بالجمال عاطف خيرى والشباب الذين أدوا الأدوار بحب شديد وصبر طويل، شكراً ليك مجدداً
وعن معهد النصف الأول من التسعينات سنحكى ليكم، لكن فى الأول خلونى احكى ليكم عن ناس الموسيقى الشحمانين الذين صعدوا الخشبات ودخلوا الإستديوهات متعاونين غير مقيمين  فى مشاريع تخرجنا بقسم المسرح، شباب زى الورد، عاطف صالح، حسن مبارك، شمت محمد نور، محمد صلاح، جحا وطارق أبوعبيدة المالك الرسمى لهذا البوست .. وكونوا معنا
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: khider)
|
العزيز طارق
وراك والزمن طوييييييييل كيفك وكيف المدام تحياتنا ليها شديد يا راجل يا صنديد
منعم توارد المشاعر سابق لي توارد الخواطر.وصل تحيانا لي خطاب وقول ليهو امفريب كويس جدا وهو في احسن ظروف خاصة بعد حصوله علي مقعد في جامعة كوتبس لتحضير رسالة الماجستير في التراث الانساني لك منه التحيات وسأقوم بربطكم به انشاء الله.
نجاة محمد علي التحيات القلبيه لك ولاسرتك وكل ناس باريس خاصة هبه خدر ومحمد الحسن وليك تحيات هناء شكرا
وليد يوسف
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: khider)
|
| Quote: انا احد كومبارسه بعد تحانيس شديده جدا من جانبي بأن ابداء مشواري المسرحي معه |
خدر: بديت و لا لسه؟؟؟؟
منعم
شايفك مصر على الصوره دى، لاخفاء الصورة الحقيقيه وكيف جر الزمان كلاكله (كلاكله دى عاجبانى جدآ رغم انى ما عارف معناها بالضبط وشكلها حاجه تقيله جاره بالواطه وبتقول كرررررر )
فرسان الرمال من الاعمال التى سحرتنى فى صبا شيوعيتى، للاسف الاسماء اختفت، بقى فقط ذى الرجل اللينه، تفوقت عليها من امادو "قابرييلا ...قرنفل وقرفه" .... ساسعى للحصول عليهما مجددآ لارى فارق القراءه وانا فى شيخوختى هذه.
هل يمكن انزال نص سيناريو البحث عن يابسه؟؟
اوعى تبارى الايورو شديد، بغتس حجر مسرحك، لكم اشواق و رغبة فى استباحة منزلكم العامر مره اخرى مع ملك السربعه والخيال ميسره
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: منعمشوف)
|
العزيز جداً تماضر
تشكرى يا جميلة، لكن ما لاحظتى شى
ليس هناك موسيقى بالآلات، الموسيفى عبر الأصوات البشرية فقط
الإنتقال من مسمع لآخر كان كورالياً ونمَّات المدهش شمت محمد نور شكلت الخلفية والمؤثرات، والمقاطع التى لحنها وغناها أضافت بعداً سحرياً وغرائبياً أكثر على سحر وغرائبيه لغة عاطف خيرى، محمد المجتبى موسى وبقية الشباب أخرجوا بقدراتهم الكبيرة الأصوات الدرامية التى تضج بها القصيدة. شكراً مجدداً للإضافات وقنبى طولا للونسة.
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: منعمشوف)
|
عصام جبرالله لووووولز
الصورة شايفا مضايقاك شديد ومزعجاك
مش اخير من الزول يعمل ليهو كركاسا مغبرة
لكن تخيل ما جرَّ الزمن كلاكلة لكن جرَّ الزمن أمستردام
الكلاكلة بالنسبة لأمستردام الباردة دى city of angels لووولز
تخيل انا بقرا فى شنو اليومين ديل .. تيريزا باتيستا
واحده أيضاً من أجمل روايات جورجى أمادو .. الزول ده عجيب مش ؟
نحنا لاقينكم وين انتا والولد المعبأ بالضحكات الورقية ميسو
أنزل ليكم صوركم الشينة ديك إبان عرس خدر وخدرة ولا يفتح الله
هو اليورو حيغتس حجر مسرحى لسه؟ هو ما لحقوا أمات طه وإنتهى
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: منعمشوف)
|
اها وبما انو البوست ده بتاع سربعه واندياح اها انا
حتنى عندى حكى عن المسرح؟
هو اولا بى التبادى المعهد ده متين كان عندو صليح؟؟
الله ارحمك يا الازهرى جاب الفكره وفكاها لى ناس زعيط ومعيط؟؟
وقوم يا ودنميرى قلبو زى ما عاوز اها من ديك ما ضاق عافيه؟
الامن اجتهادات ونضالات طلابه اذ كانت دبلوم المسرح مطلع الثمانينات قبله كل عشاق الحريه الحريه واياها اعنى؟
وتختم عروض الدبلوم بى حفل مدنكل من النوع البى ابو عركى؟
وتمرد من زمرة الكفنجيه بقيادة يحيى فضل الله جلال بلال عبد الحميد حسن
حاتم محمد صالح وجمهره من عشاق السديم
اها ات عارف يا طارق ومنعم انا وجمال عبد الرحمن دخلنا السدبم وقبلة عضويتنا فى يوم واحد وكانت نظره كبيره ان يكون هناك موسيقى فى فرقه مسرحيه طليعيه تقدم مسرح حر متقدم لدرجة مسرح العبث؟ وهارولد بنتر وصمويل بكت؟
فقدمنا مطر الليل لمحمد محى الدين وطفنا بها الاقاليم من القضارف ونادى المصارف الى مسرح عروس الرمال بالابيض
ويا حليل عبد الله الشماسى والسمانى لوال ارو؟
وفى انتظار جودو
كان هذا الانتاج وهذه الحركه فى ظل التعسف والكراهه واى اى حاجه بايخه؟؟ ولكن الفنان من له قدرة على ابتكار ونقل المجتمع من ظلم الى افاق نور والله شنو؟
اها وبعداك فى حاجات بالجنبه كده زى اركان الفرع وياسر عرمان وعلى ابكر
ورحلتى انا وساميه معرابز من ريفى المحيريبه الى العمارات شارع 57 و61 و59 حيث دار الاتحاد تجاور منزل ماجده حمدنا الله واه انا من الزمن داك وكمان برضو كمال ترباس؟؟
وبرجع اقول العارفو؟؟
انور
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: anwar abu gaidaa)
|
| Quote: كلاكله دى عاجبانى جدآ رغم انى ما عارف معناها بالضبط وشكلها حاجه تقيله جاره بالواطه وبتقول كرررررر |
اسه انا تاني بقدر اقول للناس عصام ده صاحبي !!
الله يحرجك ..
تعال احكي لينا انت ذاتك عن المعهد
مابتعرفو كويييييييييييييييس
Quote: وسلم ا ا طارق على نسوانك كلهن امك ومرتك الاخدتها
كمان اقومو اقولو ده شنو ترانى شرحت ليك؟؟ |
نوره
والله الليله كان ماشرحت
كنت جيت من الورديه لقيتي لحقت امات طه
انت طه ده منو !!
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: khider)
|
الحبيب الغالي جزء من طارق
| Quote: و اخراجه بتقدير امتياز مع جائزه التفوق |
أها شفت دي نوع الحاجات البتفرحني أنا وبتخليني أفخر بي منعمشوف وبي اليوم العرفني بيهو ذاتو
المعهد نحنا بديناهو في العمارات شارع 57 وإنتقلنا إلى المقرن وتخرجنا في قصر الشباب والأطفال في العام 1988 علماً بأننا دخلناهو سنة 79 - 80 فكان المعهد زي الفاصل المداري كل يوم في محل يعني لازم تشوف النشرة الجوية كل يوم عشان تعرف المعهد بكرة وين؟؟؟
أخي منعمشوف
أنا قريت مداخلة د. بيان وما لاحظت فيها أي لف ولا دوران بل ويقيني أنها كانت مداخلة عادية وكان ممكن تضيف لهذا البوست الكثير الكثير ويشهد الله أنا وقبل سنتين أو أكثر طرحت علي فكرة أن نفتح بوست بهذه الفكرة عن المعهد والزمن الجميل ولكني تكاسلت ولم أشجعها لأن في ذلك الوقت كان السيرفر عندي ضعيف ولم أستطع التداخل في البورد بالصورة الجيدة فأرجو يا أخي منعمشوف أن تشوف مداخلة د. بيان بالعين الثانية ولك شكري وتقديري
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: طلال عفيفي)
|
سناري
انت هبشت اللحم الحي
لمن يعلن مكتب القبول قبولك بالمعهد و تنجح في امتحان المهارات الفنيه و تصبح طالب تكون عندها امام خيار واحد فقط
ان تعقد اجتماع سريع مع نفسك لتقرير انضمامك لمجتمع واضح و مباشر
فالفنون يا صديقي تعطيك الفرصه التاريخيه للوضوح مع نفسك و مع الاخرين
انت تمتلك شنو و ناقصك شنو ( ده علي الصعيد الانساني الاجتماعي )
الخطوه التانيه هي ابراز قدراتك الايجابيه و تطويرها و في نفس الوقت الاعتراف بعجزك في جوانب اخري و محاوله معالجتها او التصالح معهاباعتبارها واقع يجب ان لا تخجل منه ففي كل الحالات انت لا تستطيع ان تكون وسيما و شجاعا و كريما و عاشقا في نفس الوقت .. لابد ان تسقط منك بعضا من هذه الصفات النبيله كمنطق طبيعي .. فانت لا تمتلكها حقا و تحل محلها بعض الصفات الانسانيه الاخري
يعني لازم تساعدها بي شويه بخل و رطلين كذب و شويه شناه
و في كل يجب ان يكون كل هذا امام نفسك و الاخرين وليس لديك خيار اخر
علي الصعيد الاخر
علاقتك بالانثي ستاخد بالتاكيد وفق المنحي السابق معايير ايجابيه و مختلفه (اعني واضحه )
تكون النتيجه حينها انو منعمشوف و انور ودبتول اتغيرو بعد ما دخلو معهد المزيكه .. بقو مجانين
و تعرف .. دي ورطه كبيره جدا في مجتمع زي السودان
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: anwar abu gaidaa)
|
الاعزاء خدر - منعمشوف
التحية غليده كما يحلو لشوف أن يبعثها
ياااااااااااااه زمان الناس هداوة بال ونحن كلما ذكرنا المعهد أنقلب الحال من حال الى حال
الفكره رائعة للبوست والذكريات تمدت لعشرة سنوات منذ أن تقدمت دفعتنا لمكتب القبول وحتى التخرج يعنى ضعف الزمن الواجب للدارسة بالمعهد ..
سنهورى قلت مالم يقوله مالك فى الخمر!! العلاقات فى المعهد
كانت لنا زميله وهى دفعة الاخ منعمشوف فى المسرح كانت فى كل يوم عندما يقف بص المعهد لكى تنزل بعد إنتهاء اليوم الدراسى أقول لها نجى اليوم نشرب شاى المغرب مع أبوك؟؟؟؟ كانت تضحك وتقول لا فهى كانت أخت مع بقية الزميلات ربما ما بيننا أكثر مابيننا وشقيقاتنا أما علاقتنا كزملاء شباب فهى أعمق من أن تفصل بأسم مثلا أن تكون فى الداخلية واحد الاصدقاء بمنزلكم ينام فى سريرك ويعامل كما تعامل انت واكثر ..
إذا رجع بى العمر للوراء لتمنيت أن يقف فى تلك الفترة من العمر..
شوف يادفعة .. طبعا طالب الموسيقى له دفعتان بالدراما دفعة تدخل معه وتتخرج قبله بعام ودفعة ثانية تتخرج معه ومنعمشوف من الدفعة الثانية لنا حيث تخرجنا سويا ولكن سبقناهم بثلاث سنوات سنتان ضائعتان بين التقديم والقبول وبدء الدراسة وسنة أولى ..
وصدق الحبيب بدر السماء السمح عندما قال طالب المعهد كان عليه أن يشاهد نشرة الاحوال الجوية ليعرف موقع المعهد فى اليوم التالى ..
أبوغيدا سكنا سويا لعام بالداخلية هو فى عامه الاخير وانا فى الاول وفيها نوادر كثيره .. نحكى؟؟
ساعود بشوق وشقف لاسرد بعض من روائع ذلك الزمن..
شكرا جزيلا اخى خدر على هذا البوست
ورائع دوما منعشوف ولم أنسى يوم عرضك الجميل والتصفيق الذى مازالت يداى محمره حتى حينه
ومرحب أخوتى وليد وهناء وكل المتداخلين
لكم التحية والحب
عبدالعزيز خطاب
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: khider)
|
| Quote: كان هذا الانتاج وهذه الحركه فى ظل التعسف والكراهه واى اى حاجه بايخه؟؟ ولكن الفنان من له قدرة على ابتكار ونقل المجتمع من ظلم الى افاق نور والله شنو؟ |
انور .. والله انت لخصت جوهر الموضوع ودي ممكن تكون بدايه لي حكي الانجازات بعد سرد كل الاحباطات
انتو مشيتو ويين يا ناس معهد المزيكه
انور ع الرحمن .. حمزه سليمان .. منعمشوف .. وليد يوسف ..عصام ع حفيظ !!
اسه انا قلت انو الفاتح الطاهر فصل الطلبه !!
ولا
قلت انو احمد عبدالعال في الاجتماع الشهير بطلبه مزيكه قال انو الطالب لازم يتعلم يخاف !!
ولا
قلت انو احمد عبدالعال كان بتجسس علي الطلاب في غرف الالات في زيارات مفاجئه زي كشات النظام العام !!
اسه انا قلت احمد عبد العال عمل شنو في معهد المزيكه !!
اسه انا قلت حاجه عن امنا كلنا مقبوله ,, ست الشاي !!
اسه انا قلت حاجه عن توتو !!
اسه انا قلت حاجه عن طلاب المعهد الهرشو بتاعيين الامن في البوابه!!
اسه انا قلت انو انا نطيت الحيطه و اصريت انو اتمرن بيانو لمن العميد منع التمارين بعد الساعه 5 في المعهد !!
اسه انا قلت منو الاحرج العميد في عروض الدبلوم بعد اطفاء النور في يوم الافتتحاح و بحضور الزبير ولا الطيب سيخه ما متزكر و وزع بيانات تفضح سياسه الاداره الجديده !!
اسه انا قلت حاجه !!!
سأعود للتفاصيل
| |
|
|
|
|
|
|
|
|
|
الدنيا ظار (Re: khider)
|
الدنيا ظار
الدنيا ظار
الدنيا ظااااااااار
طبعا اصلا انا مندهشه جدا بسيناريو اليابسه وكتابه عاطف خيري
والان
استولت جيوش الدهشه علي تماما وقام اثنين من الجنود بفغر الفاه
وحفظ الاندهاش
طبعا انا عندي اعتقاد جازم انو النص المسموع بفتح نفاج مفاجئ مع الاحساس اكتر
بتبالغ يا منعم شوف
والزول القال جمله (مرقت علي عجل ده )
وشمت والنم
يا سلاااااااام
مش في حاجات كده بتكون نفسك بس تكون جواها وتتحشر كده وبس تبقي سيدها ..بس النص ده
والله يا خدر ما خاتي كان حنستو
عليك الله يا منعم شوف كان ما اخرجت ليك حاجه تاني وانا حنستك
حنستك شدييد عشان اشتغل معاك فيها
وبجديه شديده ..ليه ما فكرت تخرج اي عمل اذاعي تاني؟؟
بالذات مع التكنلوجيا الحاصله دي
يعني مثلا ترسل نص لتماضر الخطيره دي تنجزو ليك صوت وترسلو ليك
في فايل
وخدر ده بغني ليك جنس غنا
وانا بشتغل ليك كومبارس ان شاء الله
والله بعرف ما تشوفني مسكينه كده
بره الموضوع
انت يا خدر وينو الغناء داك ؟
| |
|
|
|
|
|
|
|
|
|
Re: الدنيا ظار (Re: توما)
|
الأعزاء جداً جداً
بدرالدين شنا
عصام عبد الحفيظ
Sinnary
طلال عفيفي
khider
anwar abu gaidaa
عزيز
توما
آسف للغياب الطويل ، وأسى برضو والله غالبنى القعاد، والرد ليكم زول زول، لأنو والله هادى الدخلة، وعلىَّ أن أرتب نفسى ليوم الغد.
بجيكم صادى
| |
|
|
|
|
|
|
|
|
|
Re: الدنيا ظار (Re: منعمشوف)
|
عصام عبدالحفيظ سلامات يازول وعلَّك طيب
مسعول من الخير، إنت بتسخن فى بحر المالح ؟
نجيك فى بوست أرخى .. تفتح لينا توووووووش
تجينا فى بوست خدر ده .. تطنشنا عدييييييل
شنو يا زول سمعتو ولا جابو ليك
ولا شوف عينك دى
| |
|
|
|
|
|
|
|
|
|
Re: الدنيا ظار (Re: منعمشوف)
|
وجات قوافل نوح محملها
بالملوك مرقتنا من حلبة
رقيص
ورتنا كيف صلبو المسيح
ورتنا كيف كتلو الحسين
وبكينا اكتر منها
ساقتنا في الاخر عبيد
حبينا نمر من هنا ساكت ونسلم
لكم ودي
معتصم سيد احمد
| |
|
|
|
|
|
|
|
|
|
Re: الدنيا ظار (Re: معتصم ود الجمام)
|
والدنيا ظاروبتاع محمد ود هلة (رحمة الله عليه)ويا منعم انا مشتاق لكم ومليان بالحوار (الشحمان) على قولك,
الايام دى انا داخل فىتفاصيل اولها الاعداد لمعرض جماعى بكمبالا 11ديسمبر,وتجارب فى صيغ بصرية مختلفة لاغلفة الكتب تحديدا,وهذا يتتطلب منى فى البدايةبحث بصرى (وكترة شوف), كما نعد لعرض تشكيل مع نصوص موسيقية,ايقاعات,وهذا ايضا تحدد له ديسمبر.واحاول اكمال مونتاج معرض( صرخة لازووم) وحالما يكتمل ستكون لك نسختكم لنتواصل ونشيل كل اللوم ونخته(تحت تربيزة القعدة)وعندى لسه كلام كتييير قادم
سلام
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: منعمشوف)
|
الســـــــــــــــــــــــــــــلام عليكم..........
عجورة .. محمدأشرف..الآخرون
حبيبي منعم
وهذا السيناريو الذي لم يكتمل..
سعيد جدا بميلادي على سودانيزاون لاين بهذا الرهط من الأصدقاء
بداية أنا مشتاق ليكم كلكم العن (أحيييي)....
أما عن الود منعم ده ..
عبد المنعم ابراهيم ... (خاص بمنعم وحده " الليلة كنت في مطار الخرطوم ولاقيت صلاح).
عبد المنعم ازيك
يا ناس سودانيز أون لاين هوي .. احكي ليكم
كنا جماعة بنحب حاجات كتيرة المسرح والشعر والحب والبلد
انا ما بتذكر لا قيتهم كيف لكن كنا بنحب بعض برضو
الحنون وعاطف ومنعم وعجورة ده ذاتو وناس كتار
الود منعم ده كان براهو ..
بجيكم راجع يمكن بعد شوية
| |
|
|
|
|
|
|
|
|
|
Re: ســيناريو البحث عن يابسه و زكريات المعهد العالي للموسيقي و المسرح (Re: محمد امين كانكان)
|
العزيز جداً محمد امين كانكان
أزيك آزول وعلّك طيب ، لا حولا، آزول قلعتا من وين
قبل فترة شفتك فى حتا، كان فيديو ولا تلفزيون ما عارف
ونقشتك كدة على الطائر، طبعا ناس المنافى ديل كلهم وانا اولهم بقوا مهوِّمين
وتركيزهم زيروا، ولمن ننقش نقشة سريعة زى دى بترفع من معنوياتنا وبتأكد
إنو الذاكرة مازالت بخير او قول نص مكنة .. سعيد والله بدخولك هذه الخشبة السايبر
وآسف جداً للرد المتأخر جداً .. تحياتى لروحك السمحة وللجميع بطرفكم.
وابقى تعال صادى وجيب معاك محمد أشرف ده وطلال عفيفى
| |
|
|
|
|
|
|
| |
khider
طلال عفيفي
محمد اشرف
bayan
!!!
منعمشوف
عصام عبد الحفيظ
إيمان أحمد
Nagat Mohamed Ali
Tumadir
بدرالدين شنا
Sinnary
عزيز
توما
معتصم ود الجمام
فيصل عباس
فيس بوك
تويتر
انستقرام
يوتيوب
بنتيريست