|
|
 Re: سارة رحمة (Re: Haytham Ghaly)
|
لكم التحية اخوتي الاعزاء .
الشئ البستغرب ليهو وبذات زي مداخلة حبيبنا ود البشري !
المهم القصص دي توضّح مدى هشاشة الوعي السايبري السوداني و براءته
و الاستعداد للتصديق و المشي في ركاب اي سراب دون ادنى وقفة للتحقق
هل يخلو عالم الوهم والخيال من اشباح ؟؟؟؟؟؟؟
يا ناس انتوا في عالم مجهووووووووول فكيف ما دايرين
تمر عليكم مواقف زي دي ؟ اسه انا بتعامل مع كل الناس
ديل كاشباح مباي طريقة هم دايرنها وفي النهاية ما يهموني
كتير شبح ولا غيره . دايرة منو شنو ؟
طيب وقت بديتو السك سكوا لي فرانكلي ابو الاشباح الكبيير
وفدوي الشريف .
| |
 
|
|
|
|
|
|
|
 Re: سارة رحمة (Re: عبدالحفيظ ابوسن)
|
لا نصير ل علاء الدين سوي اصدقاؤه
خيرة اصحابه الذين لم يرو فيه سوي الصداقة
الصداقة الحقة الخالية من الغرض
صداقات امتدت لسنوات طويلة لم يشاهدوا عليه الا
ادب وتهذيبا وثقافة ولباقة في الحديث واناقة في المظهر
ما يجمعهم فقط صداقة
مدفوعين ايضا بقيمة الصداقة والشهامة فلا يمكنهم تصديق الا ادلة مادية قوية متينة راكنين لمعرفتهم نافين عن ذاتهم الغفلة
اما نحن الذين لا نعرفه فلا عاصم له منها سوي الاحداث الحالية والقصص منه ومن غيره وتقيمها ببرود وحياد
الصورة التي اراها اسردها في المداخلة التالية
| |
|
|
|
|
|
|
|
|
|
Re: سارة رحمة (Re: عبدالحفيظ ابوسن)
|
قبل اقول داير أؤكد السبب الرئيسي للغفلة
بعضنا غير مستوعب انه يوجد عمل اسفيري ضخم وبخبرات اجنبية
وله ميزانية ضخمة
واجهزة قل ان تتوفر سوي لمؤسسة غنية
وعقول في غاية الذكاء والدهاء والتفرغ الكامل
وحق لهم الغفلة
لايمكن ان تتوقع من دولة تمارس مثل هذا العمل ضد مواطنيها
| |
|
|
|
|
|
|
|
|
|
Re: سارة رحمة (Re: عبدالحفيظ ابوسن)
|
الشخصية التي وصلتني ذهنيا من خلال متابعة عشرات الافادات لأشخاص بعضهم اعرفه معرفة شخصية . وبعضهم حقيقي بالنسبة لي لمعرفة آخرين اعرفهم معرفة حقيقية
من خلال ذلك استبعد الغفلة والسذاجة . بل هو فعل تم بكامل الارادة والوعي منه
صنع شخصيته الاجتماعية بصبر دؤوب من خلال اشخاص محترمين . ولهم سمعة جيدة وسط مجتمعهم . اشخاص لا يتسرب اليهم الشك
توثقت تلك الصلة فبادلوه محبة بمحبة
اخفي تماما صلته بالسفارة اولا . وبل بدأ مشككا في نواياها . واعلن ذلك بإستشارة اصحابه مبينا تخوفه حتي اقنعوه بالعمل
كان شخصية مثالية للثوري المنضبط
سهل له ذلك التعرف علي آخرين وسهل له مساندة الشخصية التي اخترعها لتسويقها لآخرين
هذه صورة ذهنية قد تكون خاطئة لأنها مبنية علي تفحص عدة شهادة يمكن ان يتسرب لها الشك نفسه
ادارة الشخصيات بكفاءة عالية ودقة ينفي عنه العمل بمفرده
| |
|
|
|
|
|
|
|
|
|
Re: سارة رحمة (Re: عبدالحفيظ ابوسن)
|
مابين علاء سارة ..و بنات مهيرة
وشهيدة سبتمبر
_أنشأت هذه الصفحة في الفيس بعد ان اغتيلت شقيقتي الشهيدة سارة عبدالباقي بالرصاص أمامي علي يد قاتل يتبع (لحكومة الإنقاذ) ووضعت صورتها في البروفايل ولن ارفعها الا بعد القصاص بإذن الله ، وكان التزاما مع نفسي ان تكون هذه الصفحة لقضية أختي حتي ينال القتلة جزاءهم.
_ صمت طيلة الايام الماضية لاستيعاب حقيقة الخذلان والاذي الذي سببه لي (صديق) ، رغم مااصابني من سهام ناشتني مما يسمي (قروب مهيرة ) حول معرفتي لعلاء سنهوري وسارة رحمة ، ولأن الأمر لم يعد شخصي وانما له علاقة بقضية الشهيدة سأوضح الآتي باختصار :
_ اولا طالتني اتهامات وتشكيك في (وطنيتي) من قروب (مهيرة) بإسمي وتم استخدام 3 صور خاصة بي نقلت من صفحتي ، صورتي مع مقرر حقوق الانسان ، واخري مع الاستاذ ابوعركي ، وثالثة وانا احمل علم السودان تضامنا مع تظاهرة يناير 2018 ، وكانت صاحبة البوست تدعي عزة الحسن وبقية الاسماء في الاسكرين مرفق مع البوست.
_ وبرغم انني لست مجبرة علي اثبات وطنيتي لأحد لكن ما يهمني أن ماقيل فيه مساس بقضيتي لذا لا يمكن تجاوزه ، وقد ردت الصديقة رميساء السر عني ( غيبتي ) لاني لست عضوة فيه وطلبت من الادموند اضافتي وبدوري فعلت لكن تجاهلتنا وسارعت بمسح كل الداتا الخاصة بي بمافيها الصور
_ معرفتي لعلاء سنهوري بإختصار ، بدأت منذ سنيين عرفنا عليه أحد اصدقاءنا وكنا مجموعة من الاصحاب .
_وفي احدي لقاءتنا عرفني علاء مع الباقين علي زولة كانت برفقته اسمها سارة .
_ بعد سفر علاء بسنوات اتصل نهاية العام قبل الماضي وزكرني بي سارة وانها ثقة وهي حاليا برا السودان وحتتواصل معاي لانو في شبكة معارضة للنظام وحتشرح لي الاهداف والتفاصيل باعتبار اني ملمة بملف سبتمبر ، وفعلا إتواصلت معاي بالماسنجر سارة رحمة وبعد السلام والتعارف المتداول اتزكرنا لقاءنا القبل سنيين (عملت اسكرين لجزء لانو في اسماء ناس ماعاوزة اقحمهم) المهم رحبت بيها شديد ، بقينا متواصلين عن طريق الماسنجر و الرسايل وطبعا اتحمستا للفكرة ، وضافوني (للشبكة واكدوا علي السرية) هنا التواصل بينا اصبح مستمر لفترة طويلة رسلت لي تعريف باهداف الشبكة وخططهم ( في الاسكرين). وعلاء حزرني المفروض ما احكي لا ي انسان عن العمل دا وهم ضافوني لاني اخت الشهيدة ، وبعداك علاء شرح لي باتصال تلفوني انو معانا سودانيين من كل دول العالم بس مافي واحد بعرف التاني (حسب الخطة) وانو انا مفروض ما اعرف غيرو وسارة والتعامل يكون عن طريقهم عشان اذا اتكشفنا مافي واحد يقدر يبلغ عن الباقين ، وهم مهامهم متسلسلة وشاغلين وحيصلو للهدف ، ونبهوني ما افتح القروب قدام اي انسان واحاول ارشح ناس من دائرة الثقة الحولي ،( الكويس انو مارشحت أهو علي الاقل اتحمل نتيجة الثقة الزايدة في الناس براي) ، وبعداك في اتصال طويل من علاء سألني كتير عن نشاطي في احداث سبتمبر وانو هل عندي معلومات قلت ليهو عندي وقال طيب ممكن تملكينا ليها ، لكن رفضت وقلت ليه لسة ما جمعتها في كمبيوتير وحارسلها ليك .
_التواصل دا ليهو قريب السنتين والقروب سارة بتنزل فيه أهداف الشبكة واتوقع يكون في ناس غيري بس مابعرفهم حاليا مصير القروب السري ماعارفة لانو بصراحة مافتشت ، الاتصال بينا انقطع الفترة الأخيرة لحدي ماسمعت بمرضها واتاثرت جداا (بحكم انسانيتها الكانت مع كل أصدقائها في الفيس) وحصل نفس الشئ لمن عرفتا انها ماتت .
_ بعدا اتفاجأ بالكلام عن انو سارة شخصية مختلقة ووهمية وصنعها علاء سنهوري لاسباب ماعارفاها المهم ماصدقت ودافعت عن علاء للناس السالوني في الماسنجر وأكدت انو فعلا عرفني علي واحدة اسمها سارة قبل سنين وصحبتي في الفيس ومتواصلين ..وحتي في النعي كتبت آخر رسالة رسلتا لي في الماسنجر عن الشهداء.
_علي المستوي الشخصي مامستعدة اسامح الاستاذ علاء الدين سنهوري لانو خدعني باسم قضية حساسة هي قضية شهداء سبتمبر والتي لا اقبل فيها التلاعب او المتاجرة من اي جهة كانت .
_ما انا الزول البدلي باي تحليل (نفسي) او (أمني) او (سياسي) للحصل كل زول فيكم يحلل حسب رؤيتوا .
_اخيرا مستمرة بإذن الله في المطالبة بالعدالة في قضية الشهيدة سارة وماحأستمع للاصوات النشاز .
إيمان عبدالباقي
| |
|
|
|
|
|
|
|
|
|
Re: سارة رحمة (Re: عبدالحفيظ ابوسن)
|
من اشهر الشخصيات الوهمية في زمنا
نادية عابد
وكانت تكتب في صباح الخير عمود راتب اسمه شئ ما
حصدت الاعجاب والتواصل
شخصية متحررة . ومتقدمة فكريا
ناقشت قضايا حساسة جدا تخص الفتاة
من اشهر قضاياها التي استغربت لها كشفت الضوء علي تحرش كبار السن من الاسرة علي البنات الاطفال . من خلال سرد مجموعة من المواقف
وقصص عن المتحرش جدو
المهم ما كان لي استيعاب ذلك في تلك السن المبكرة جدا
لكنها بالتأكيد ناقشت امر هام جدا واكيد استفاد منه الكثيرين
ثم كشف مفيد فوزي عن انه مخترع الشخصية
ولم يصاب احد بضرر
لا اسرار لديها سوي مشاركات قراء وقارئات تقوم بإختيار بعضها
والآن بعد النضج اجدني متقبل لمفيد اختراعه الفتاة
لقد ادت دورا تنويريا وثوريا في سبيل نهضة وتحرر المرأة
ماهو الدور الذي قامت به سارة رحمة ؟
| |
|
|
|
|
|
|
|
|
|
Re: سارة رحمة (Re: عبدالحفيظ ابوسن)
|
والله يا حفيظ بعد شهادة إيمان عبد الباقي،
اتضح أنه هدف تكوين سارة رحمة هو سياسي بحت،
ويركز على شهداء سبتمبر.
الغربية أنه أحد أقرباء السنهوري اغتيل معهم،
لأي جهة ينتمي علاء؟!
ومعروف عن عائلة السنهوري العريقة في السودان
بأنهم أشد المعارضين للإنقاذ، وأشهرهم
عزيزنا وزميل المنبر سعادة العميد محمد احمد الريح السنهوري،
| |
|
|
|
|
|
|
|
 Re: سارة رحمة (Re: النذير حجازي)
|
.
..
.
نفس الدور الكان قايم بيه قريمان ونفس السواقة للمناتلين واهدار طاقتهم وزمنهم مع اختلاف طفيف في (الميك اب) والتكتيك ...
.
..
.
| |
|
|
|
|
|
|
|
|
|
Re: سارة رحمة (Re: Khalid Abbas)
|
الآنسات و السيدات ضحايا علاء الدين/ سارة
اتمنى تكونوا ابلغتوا إدارة الفيسبوك و جمعتوا الأدلة و بديتوا إجراءات
قانونية ضد المعتدي حتى يصبح عبرة لغيره من المنحرفين.
* معلومات مفيدة :
-- صرح السيد زوكربرغ بأن الذكاء الإصطناعي سيقوم قريباً بكشف كل الحسابات المزيفة. علماً بأن الفيس مرتع لأعداد من المنحرفين.
-- 70% من مستخدمي الفيسبوك من النساء.
-- علاء الدين سنهوري أول سوداني يحتال على مئات النساء المتعلمات في الفيس.
| |
|
|
|
|
|
|
|
|
|
Re: سارة رحمة (Re: نعمات عماد)
|
.
..
.
Quote:
يعني طلع الموضوع امن وحكومة وكدا ! و انبسطنا ونمنا مرتاحين !
ياخي تخ |
.
.
.
.
كتب البشرى مخاطبا فرانكلي في بوست when you go low, we go low :
Quote:
اوكي يا فرانك دا رايك مشكور على الادلاء به
و ليس بالضرورة ان اتفق معه او اراه صحيحا
|
.
.
تخ.خخخخخخخ ...
| |
|
|
|
|
|
|
|
|
|
Re: سارة رحمة (Re: عبدالحفيظ ابوسن)
|
يا قريبك الوصول لخلاصة زي دي اشبه بتقييد القضية ضد مجهول و قفلها وخلاص الناس ترتاح وكدا
هل وفاء الجاسم التي اخترعها هشام آدم شغل حكومة وامن برضك, الدرويشة. شروق / هنادي, رودا مردا, الكنج (لاير) , سودان عجل التي تخفى خلفها الواطي خضر الطيب, والعديد من الشخصيات الاسفيرية الوهمية!
المسالة دي ما جديدة وقديمة قدم معرفتنا بالسايبر وهناك العشرات من الحوادث منها ما كشف ومنها اللسة
تلييس اي حاجة في الأمن و الحكومة فيه نوع من الكسل و محاولة قفل الملفات و الركون لتفسير التقصير بوقوف القوة القاهرة - الامن و الحكومة - خلفه مما يريح الضمير و و يعفي من محاسبة النفس على الاهمال و الانسياق ببراءة خلف الاكاذيب
حتى لو فرضنا جدلا ان الموضوع وراءه الامن لا يعفي هذا من الاهمال
لكن قبل ذلك كدي نشوف الامن نزريا ح يستفيد شنو من اختلاق ضخصية وهمة وخلق علاقات مع الناس و التركيز على تسويق شخصية علاء الحقيقية !
كدي اديني رايك في الحتة دي لربما تكون شايف ما فات علي
| |
|
|
|
|
|
|
|
|
|
Re: سارة رحمة (Re: محمد البشرى الخضر)
|
يا ودو دي ما تقود له الحقائق المبذولة . وليس تكهن
يعني ليس رجما بالغيب
كسل ذهني وين ياخ . دي كمية من الافادات والشهادات والربط بينها .
بالمناسبة اكتشافه كشخصية وهمية تم من داخل القروب النسائي
لا اعلم عن الاسماء التي ذكرتها
وان وجدت هل بذات التنسيق والاتصال بناشطين وناشطات وتعتيم
هل بذات الدقة والسرية حتي يتم اكتشافها بعد سنوات ؟
اتفق معك في ضعف التأمين الشخصي . ولكن هكذا السودان التواصل بالتعارف من خلال اخرين
تم خلق الشخصية بذكاء شديد . بناء علاقات متينة مع شخصيات معروفة وعدم ادخالها في الهدف .
الامر الذي اعتقده ان الشخصية تم بناؤها من السودان
ومصر معقل للناشطين
| |
|
|
|
|
|
|
|
|
|
Re: سارة رحمة (Re: محمد البشرى الخضر)
|
ماعندي سكة اسمعو هسة
في كلام اتقال عن انو دعاية ليهو كفنان
حتي الفيديو ادانة ليهو فالمشهور عنه رقة الحال والفقر
ياودو ما تتخيل رغبتي انو الامر يكون فقط شخصي
وقلتها في بداية البوست
تصرف نزق ومشاغب من شخص لاهداف شخصية جدا
ولكن ما قرأته لاحقا من افادات بعضهن جعلني اشك في الامر
حتي الان
عشان قيم وتراث سوداني جميل اتمني ان يكون هو وحده من قام بذلك
| |
|
|
|
|
|
|
|
|
|
Re: سارة رحمة (Re: عبدالحفيظ ابوسن)
|
عارف يا قريبك عندنا السودانيين حركة "واهو داك هلال تاني" وكمان قصة موت اجماعة عرس, مع الحصل دا كثيرين وكثيرات عايزين يدخلوا عودهم و يحكوا قصص تزد في تثبيت الجريمة و خلق اضرار قد وقد لاتكون حدثت لتبرير الحنق عليه والهجوم
اسي قولة بنات مشوا معاينات وتم التحرش بهم كلنا سمعتاها فلانة عن علانة عن فلانة! هل قريت او بتعرف زول قرا من احد المتحرش بهن مباشرة؟
وهل موضوع التحرش دا اثير في وقته حتى مع الشخصية الدعتهن للمعاينات ام سكتن و مرق هسي بعد انكشف الاحتيال
يا حبة علّمتنا الاسافير السودانية ما نشتري كل المعروض قبل على الأقل فحصه و التفكير و اعادة التفكير
الناس دي بقت تجخ و تلفح وتكضب زي شراب الموية
| |
|
|
|
|
|
|
|
|
|
Re: سارة رحمة (Re: محمد البشرى الخضر)
|
عارف يا ود البشرى
صاحبنا ود ابسن دا حأوقعها ليه بي قصة
في الحلة وفي الجامعة وفي البيت وفي الشارع وفي المسرح (وخصوصاً المسرح دي عندي في راسي زول ممثل بيستعمل الاسلوب الحاقوله هسع)
في المحلات دي بتلقى دايماً دون جوان سوداني بتاع بنات وود حبيب (بالشدة) وبتاع (جكس وشوق ولَقّ,و ومزز إلى آخر الألقاب التي تشير للخلط وماشابه)
أها الميزة الأساسية للنوع دا هو مقدرته الفائقة على (كب المكنات). في واحد منهم في أحسن بحث عملته (كواحد من الأبحاث الفارغة وعدم الشغلة مني) إنه
كيف بيقنع البنات.
الزول دا أداني نوتة صغيرة قال لي أفتح أي صفحة عشوائياً وأقرأ المكتوب.
لقيت مكتوب : تاريخ ومكان واسم ووصف لملابس نسائية والحذاء.
قال لى دي واحدة من الأسلحة المفيدة. إذا شفتا جكسوية لأول مرة، ركز مع لبسها كله وسجل ليك جملتين من كلامها، وأهم شيء تغادر بأسرع ما يمكن وتعمل فيها ما مهتم
وتحاول تخلق ليك صدفة بعد كم يوم إنك قابلتها صدفة، وأحسن حاجة تعرف وقت هي مارقة مثلاً من بعيد وتمشي تنقشط في الحافلة وراءها وتعمل
إنه الموضوع مجرد صدفة وتنزل في محطتها وتسلم بأدب
ونظام اتخيل إني شفتك، وين؟ اليوم الفلاني الساعة الفلانية (وكان ما أخاف الطضب كنتي لابسة جيبا (حبذا لوكانت فوشية مثلاً ههه)، أها ودا مدخل من عدة مداخل.
واحدة من المداخل لعلاء سنهوري بحكم المجال الإجتماعي الهو شغال فيهو الناشطات
، فلو فرضنا جدلاً (ودي الفريضة الأقرب للتصديق) إنه بيفتش في معجبات
فمدخله للبت دي هو نشاطها في شهداء سبتمبر
فكونك تعمل ليها قروبات وهمية وكدا دا بجيب ليك مجموعة تانية وبتربطها بيك
لحين انتهائء المرحومة الاسفيرية سارة رحمة من اكمال انتاج الفيدو كليب مثلاً. أو تحقق الإنتشار النهائي له.
شوف (الكلكات) الحصلت والشير الحصل لفيديو المحطات البعيدة دا كان الهدف النهائي.
أهتمامك كورة أني لعبت في التحرير وأخوي هداف العاصمة، زول سياسة (أنقلاب رمضان خطته ختوها في بيتنا)
زول أمدرمان، جدنا أول من فتح صاج سمك في الموردة، والقماير دي كان اسمها الكبجاب وهكذا.
الزول كايس الشهرة.
جون هنكلي حاول اغتيال ريغان عشان جودي فوستر لا أكثر لا أقل بهذه البساطة
علاء السنهوري خلق سارة رحمة للإنتشار والشهرة لا أكثر لا أقل.
كل الفي النص كان جزء من عدة الشغل زي (دون جوانا المذكور أعلاه)
وجهة نظر قابلة للتنفيد وحتى السخرية منها بقلب رحب
وأوعدكم بعدم الشماتة فيكم لو طلع كلامي صاح
هههههههههههههههه
| |
|
|
|
|
|
|
|
|
|
Re: سارة رحمة (Re: الصادق اسماعيل)
|
أنا يا الصادق مايل لي تفسيرك دا و شاهدي انو اول زول تعاطف مع سنهوري وفهمه كمان هشام آدم وكتب في صفحته عن تفهمه لدوافعه و اشار لقصة وفاء الجاسم - ههه حكمة الله بعرفوا بعض
الناس الموهومين بالشهرة و احساس انهم ما لقوا التقدير المناسب معاهم مفهوم جدا خلقهم لشخصيات وهمية تديهم التقدير الما لقوه من الناس الحقيقيين وياهو مثال وفاء الجاسم وفي البال كمان الدرويشة خخخخخ.
لكن البقنع ليك ناس : حكومة حكومة! أمن أمن ديل منو :)
| |
|
|
|
|
|
|
|
|
|
Re: سارة رحمة (Re: محمد البشرى الخضر)
|
معظمنا يا ود البشرى بنرتكب أخطاء وأحياناً هفوات كذبات (بيضاء ولا صفراء)، ولا أبريء نفسي
أنا ما لاقني زول يتنفس صدقاً غير محسن خالد. لكن أهو مرات أهلنا بيقولوا (جابها كبيرة) هههه
| |
|
|
|
|
|
|
|
|
|
Re: سارة رحمة (Re: محمد البشرى الخضر)
|
كيفكم يا اب سن والشباب
شنو البمنع انو سارة دي تكون بت حقيقية باسم غير سارة
هل اعتراف علاء كافي كي يمنع فرضية زي دي
وهل اعلان موت سارة بنفي حياة البت الحقيقية دي
الناس لما سألت في المنظمات سألت عن سارة رحمة وهي اصلا ما موجودة
ليه ما وسعوا البحث شوية وسألوا عن السودانيات ككل في منظمات الدول المعنية دي
| |
|
|
|
|
|
|
|
|
|
Re: سارة رحمة (Re: muntasir)
|
سلام للجميع
في تقديري ان سنهوري خلق شخصية سارة رحمة ليستفلها في الترويج عن سنهوري الفنان بخلق علاقات مباشرة مع الناس ولفت انتبائهم لسنهوري الفنان و بمرور الزمن اصبحت سارة شخصية لها عالمها الخاص بها
وحظيت بمكانة ومحبة كبيرة في قلوب جمهور سنهوري الفنان بحكم احتكاكها المباشر بهم ..واصبحت تقاسمه الاهتمام بل تفوقت عليه احيانا حتى تملكته الغيرة فقتلها .
...................
لحد ما تشبه علاقة البشير بالترابي ...لكن هنا مات الترابي وعاشت سارة رحمه
تحياتي
| |
|
|
|
|
|
|
| |
مني عمسيب
Ahmed Yassin
MOHAMMED ELSHEIKH
عبدالحفيظ ابوسن
محمد جبره
النذير حجازي
قسم الفضيل مضوي محمد
محمد البشرى الخضر
نعمات عماد
الصادق اسماعيل
حمد عبد الغفار عمر
فيس بوك
تويتر
انستقرام
يوتيوب
بنتيريست