أسرة كبيرة مكونة من 8 أشخاص بينهم أب مثالي وام بالدنيا
اتدرجت حياتهم المادية من الجيدة للمتوسطة وللمستورة لحدي ما وصلت للعدم بحلول عام 2010
كنت أنا كبير البيت وقتها بعمر ال 15 وعشت مع أخواني تفاصيل مؤلمة ما هي المهمة في القصة بقدر ما الخلتو في نفسي وقدرت تخلق شخصية مغايرة
بين 2010 و 2013 كانت فترة أغلبها شعور حوجة وقلة حيلة وبين إني اتم الدراسة الكنت فيها متفوق جداً وبين اني اكوس الشغل واساعد ابوي بشكل أكبر
اشتغلت فيها نقاش وكاشير ومسكت محلات العاب وحتى كنت بستفيد من خطي الكويس وبكتب للناس بالقروش
على قدر الكان بجي كان بساعد بي وجبة ممكن نعيش عليها لمدة يومين
2013
خشيت الجامعة كلية الهندسة بقميصين وبنطلون وجزمة قديمة
وقتها ابوي اتعين كأستاذ في واحدة من المدارس الخاصة وبقى في اليجيب حق اللقمة وتبقى الوجبة منتظمة
لكن لأكتر من كدا ما كان في..
لمن جبت نسبة كبيرة في الشهادة كان حبوبتي وعدتني انها تجيب لي لاب توب عشان القراية في الجامعة وكدا
وممكن تقول اللاب توب دا هو كان مفتاح أي حاجه في حياتي
كنت من صغير الزول الما برضى بأقل حاجه لو مادياً أو معنوياً .. بحب أكون ظاهر دايماً .. طموحاتي كان كلها إني اكون حاجة كبيرة بس في شنو بالضبط؟ كان دي الحاجة المفقودة فكنت ذي ماشي في رحلة طويلة إني اكتشف الحاجة دي
حسيت انو اللاب توب دا حيخليني افتش كويس.. والإنترنت الوقت داك كان بي خيرو
خشيت النت وكتبت في قوقل "مهن يمكنك تعلمها بدون شهادة"
جاتني حاجات كتيرة وكنت بمسك واحدة واحدة افتش كيف حتعملها وكانت اغلبها محتاجة حاجات غير اللاب توب ما كان عندي امكانيات اشتريها
كنت بفتش عن حاجة ممكن اشتغلها باللاب توب وتوصلني سريع سريع إني اكسب قروش
لفت انتباهي مجال تصميم الجرافيكس والوالد كان خريج فنون جميلة فأصلاً كان زارع فينا ميول التنسيق والألوان والرسم والخط العربي
حسيت إنو دا مجال قريب مني وممكن ابرز فيها وما محتاج غير اللاب توب العندي
نزلت كل برامج التصميم الممكنة ونزلت معاها كل الملحقات الححتاجها ونزلت أكتر من 100 فيديو بوروك كيف تتعلم التصميم لحدي ما تبقى محترف
وطبعاً بي حماس المبتدئين داك كنت بقعد يوم كامل قصاد اللاب توب عشان انفذ لي حركة جديدة في الفوتوشوب وكنت خاشي قروبات مع عراقيين ومصريين وعرب وبنزل ليهم التصاميم هناك لحدي ما شوية شوية اشتهرت في واحد من القروبات وبقت تجيني طلبات بي قروش من سودانيين هنا
القروب ما كان بتاع تصميم كان بتاع مغنين راب
فكنت بشتغل تصاميم بوسترات للأغاني حقتهم وقتها كنت بشيل 30 جنيه في البوستر والفرحة ما كانت سايعاني كان المبلغ بعمل وجبة محترمة للبيت او حتى بشتري شيتات الجامعة
اشتغلت كدا لمدة سنة واكتر
2014
كان عندي تقليد جميل بعملو مع نفسي في عيد ميلادها
بقعد بجيب ورقة وقلم واكتب وارجع السنة الفاتت واخت خطة للسنة الجاية وكيف حيكون النظام فيها
في عيلاد ميلادي في السنة ديك جاتني فكرة إني اعمل برنامج في الإذاعة الكان عندي فيها رغبة من زمان
من زمن الأساس والدورات المدرسية وكم طلعة في تلفزيون السودان في جنة الأطفال الكان بفضل استاذنا في المدرسة ومخرج جنة الأطفال عوض ابراهيم الله يطراهو بالخير
حسيت انو دي وظيفة ممكن امشي فيها بالساهل وكان عندي روح الارتجال والحوار
فكتبت تصور لي برنامج اذاعي اسمو "هدوء" برنامج اجتماعي بناقش قضايا الشباب بي لغتهم وبحاول يوصل صوتهم ومعاهو حلقة زيرو كنموذج للبرنامج
وهااك ياا مشي على أكبر اذاعات البلد وبقول ليهم اني احسن زول ممكن يعمل الحاجه دي ومستعد اشتغل بي أي مبلغ لكن للأسف 19 سنة ما كانت كافية لي إنو اطلع في واحدة منها. ولا حتى إنو يعملو لي اختبار صوت "لحدي اسي ما عملتو"
الزعل الزعلتو وقتها كان كبير شديد وهز ثقتي في نفسي وحسسني إنو الطموح ما كفاية
لكن في نفس الوقت الزعل ومع حماقتي خلتني اقرر اعمل حاجه ما معمولة اساساً .. قلت ليهم حذيع البرنامج غصباً عن اي زول وان شاء الله اسمعو براي
احتكاكي بي مجتمع الراب خلاني اعرف منهم طريقة رفع الأغاني في النت فقلت ليه ما انزل الحلقات ذيهم.. في النت
وعرفت كيف بسجلو الاغاني في غرفة وبي معدات بسيطة
لكن كنت محتاج اتعلم هندسة الصوت وكيف تخلي الصوت نضيف وما فيهو اصوات بتاع الخدار والكلب البجي في نص تسجيلك
والنت ما قصر معاي
خشيت واتعلمت كل الأساسيات ونزلت البرامج المحتاجها
بعدها جبت اللاب توب وطرحة واحدة من اخواتي استخدمتها كفلتر للصوت وسجلت الحلقة في بيت صحبي عشان هادي ومقفل
وعلى نهاية شهر 8 كانت أول حلقة من هدوء نزلت الفيس بوك
سمعتها أنا و 40 نفر العملت ليهم تاق وصحبي عشان الحلقة كانت في بيتهم
كنت بنزل كل اسبوع حلقة وناس دفعتنا بشيرو لي لحدي ما جات الحلقة السادسة كان اسمها "كيف اتلاقينا" كانت بتتكلم عن الأصحاب وتفاصيلهم
الحلقة دي لحدي يوم الليلة بسمعها في أماكن ما كنت قايلها ممكن توصلها.. في رقشة سمعتها وفي ترحيل سمعتها
الحلقة انتشرت بصورة مبالغ فيها لدرجة كانت بتصلني وبقولو لي هاك اسمع الزول دا
وللأسف وقتها ما كنت بقول اسمي في نهاية الحلقة ولا بحفظ حقوقي عليها
2015
بديت اتعلم حاجات مختلفة في الفوتوشوب ذي تصميم الشعارات والبوسترات بتاعة البزنس وبديت اكسب قروش اكتر وعملاء اكتر لكن من مرة لي مرة والشغل ما ثابت
وفي المقابل قدر البجي بقى يمشي جزو كبير منو للحلقات بتاعة هدوء.. الانترنت الكتير الكان بتصرف عليها ووقتها بدا موضوع الانترنت المحدود تزيد تكاليفو
بعد الشهرة بدت تزيد بقت تتقدم لي دعوات في فعاليات او جامعات عشان اكون ضيف او القي كلمة او اقدم حلقات مباشرة ودا كان على نهاية السنة
كنت بتهرب بسبب انو ما عندي هدوم لأماكن ذي دي
فاقترح علي واحد من اصحابي انو ما امشي مجان لي فعاليات معمولة بقروش وانو هو حيمسك لي الموضوع دا وفعلاً وفرت جاكيت وتيشيرت وجزمة وبديت اطلع في استيجات بقروش رمزية بتغطي بس حق الملابس والمواصلات وهنا اصحابي ما كان بقصرو من ناحية عربية توديني وتجيبني
الناس مرات بتكون راسمة ليك شكل معين لازم تكون عليهو
فوتشوب + فعاليات كانت الماديات بتتحسن شوية
2016
اكتشفت انو البعمل فيهو دا ما حيقدمني مادياً ولا حيساعد الأسرة كمان لكن بقى في جمهور بتابع للبرنامج ما حيرضى بأي حال من الأحوال إنو البرنامج يقيف وما حقدر اقول لي زوول اني وقفتو عشان المنصرفات
فكان الخيار الوحيد إنو اقدر اوفر حاجه اكبر يا من البرنامج ويبقى في اذاعة وتدفع لي مصاريفو يا من موضوع الكتابة في حد ذاتو واقدر بطريقة ما اخليهو مهنة
مشيت تاني لي اذاعة كنت خاتيها في بالي وكنت شايفها الأفضل وجوها مناسب جداً لي وللبرنامج لكن للأسف اتزحلقت مرة تانية وبطريقة ظريفة كدا علقوني ..
زعلتي التانية خلتني احلف انو ما اشتغل في اي اذاعة مهما كانت ومهما كانت في حوجة ليها وحكون مع الناس القدرت صوتي على السوشيل ميديا
فبقى في خيار واحد إني اقدر احول الكتابة لي مهنة
خشيت النت كالعادة وفتشت عن حاجات ممكن تفيدني
لقيت إنو في حاجه اسمها كاتب محتوى وفي منها شغل اونلاين
خشيت اخدت كورسات على مواقع مجانية بتعلمك الأساسيات والطريقة المهنية للكتابة وكيف تكرس الكلمات في خدمة المدونات او المواقع او المجلات والكتب وغيرها
اخدت لي شهر قراية عن الموضوع ودرستو من كل زواياهو وقلت حخش في سوق العمل
خشيت سجلت في مواقع عربية للشغل الاونلاين " مستقل" و "خمسات"
بشتغل 5 صفحات محتوى بي 5 دولارات أو مراجعة 10 صفحات بي نفس السعر
المنافسة كانت صعبة وسط عرب متمكنين واعمار فايتاني بي كتير
بس الشغل على قلتو علمني الاحترافية في التعامل مع العميل على الإنترنت .. علمني كيف اقدر اتعامل مع الفيزا والبايبال ووسائل الدفع الاونلاين كلها وكنت بسحب القروش عبر ناس هنا عندهم فيزا بره البلد وبدوني المقابل سوداني
بدت الأحوال تتحسن جداً وبقت معرفتي تتطور ورغبتي في الهندسة تقل لدرجة كنت مفكر فيها اوقف الجامعة واعيد واقرا برمجة فجأة هفت لي من جلسة قعدت فيها مع زول
وكالعادة لقيت انو ممكن اتعلمها في البيت من النت
وفعلاً اتعلمت تكويد المواقع البسيطة والساكنة وضفتها لقائمة شغلي وبدت ترفع لي دخلي اكتر لأنو الموقع كان بتصمم ب 70 دولار
بقيت بعرف اصمم
واهندس الصوت
وابرمج المواقع
وكل ديل خدموني في البرنامج بتاع هدوء برضو.. فكنت بصمم لي نفسي الكفرات لصفحة الفيس بوك وبنتج الحلقات واهندسها وعملت موقع خاص للبرنامج في النت وبرفع فيهو الحلقات
على نهاية السنة خلتني الشهرة اطلع في فعالية بتخص السوشيل ميديا والمحتوى فيها وجابوني كواحد من الناس العندهم صفحات كبيرة على الفيس بوك وكيف قدرو يصلو للعددية دي من المتابعين
كان فيها ضيف شرف شخصية سعودية
ما كان مفروض اكون متحدث لكن فجأة لقيت نفسي قدام المايك وبحكي تجربتي.. بعدها صفقو لي الناس كتير ونزلت سلم علي السعودي واشاد بي وقال لي تجربتك جميلة ومحتواك بهم الشباب جداً فواصل وكدا
2017
ركود في سوق الشغل اذا كان للتصميم او تكويد المواقع
خلتني احاول افتش عن شغل مسائي ثابت مع الجامعة فأعلنت في حسابي الشخصي إني كايس شغل ثابت ومهاراتي كدا وكدا وكدا حتلقو صورة المنشور مع المقال دا
كان دا كل البعرفو في الدنيا وكنت عايز اكتب معاهم اني بطبخ كويس من شدة ما بالجد كنت عايز اشتغل اي حاجه
جاني عرض لإني اشتغل كاتب محتوى ومبرمج مواقع
وين؟
في الشركة بتاعة السعودي اللاقيتو في الفعالية داك
بعد ما قررو يفتحو مكتب هنا في السودان
كنت حوافق اشتغل بأي مبلغ وما اتوقعت انو اكون باخد 4000 جنيه وقتها .. طرت من الفرح وحسيت انو حقدر اغطي بيهو احتياجات كتيرة خصوصاً انو مبلغ ثابت
خشيت الشغل من اول يوم وكنت اصغر زول في الشركة وزول ما اتخرجت اساساً
بدون ما افهم اي حاجه لقيت كمية من المشاريع فوق راسي وكلها متأخرة والوقت كان رمضان
فكنت بصحى الساعة 12 ضهر امشي الشركة وارجع منها الفجر .. بنفطر ونتعشى هناك او في بيت مدير الفرع
كان في قصور في بعض الحاجات الما بتخص شغلي ذي التصاميم مثلاً فرسلت للمدير اني بعرف اصمم وممكن اساعد في التصاميم المتأخرة
وفعلاً بقيت اشتغل اي شي في مشاريع الشركة حتى غير مهامي
ودا الخلاني بتواصل بشكل مباشر مع مدير الشركة في السعودية وبديني أي حاجة محتاجة ضغطة في الوقت او عايزة انقاذ سريع
فأنقذت الشركة في كم مشروع
لكن للأسف ما كان كفاية الحاجه دي بالنسبة للشركة
اتقفل الفرع بعد شهر واحد من الشغل !!! 💔💔
وفي الإيميل بتاع اشعار التقفيل كان اسمي موجود "قررنا اغلاق مكتب السودان كاملاً وإعفاء جميع موظفيه إلا الموظف عمار كمال الدين الذي اثبت جدارته في العمل"
ما تتخيلو الشعور وقتها كان عامل كيف.. أكبر شعور تقدير حسيت بيهو لي مجهود كنت شايفو عادي
كنت زعلان على زملائي بس كنت عارف انهم حيلقو شغل سريع لأنهم كانو فعلاً مميزين
حسيت إنو دا تدبير إلهي كامل وانو رزق اخواني حيستمر
فإنتقلت للعمل مع الشركة اونلاين بنفس الراتب وبوفرو لي النت والجهاز وبرسلو لي المرتب كل شهر
طوال شهور السنة ديك كنت بمسك شغل لمؤسسات سعودية ضخمة جداً "ارامكو" "سبماكو الدوائية" "مسك" وغيرها من العملاء الممكن يعملو لي السجل بتاعك قفزات كبيرة
وصلت لمرحلة في الشغل بقت تجيني المهام الما فيها هظار والبكون فيها العميل واحد من الكبار جداً وفي المشاريع الكبيرة او المستعجلة
فزرع فيني مدير الشركة ثقة كبيرة جداً جداً خلتني احس انو الشركة دي حقتي انا والشغل لازم يطلع في افضل صورة
والحمدلله كنت موفق جداً في كل مشروع بقدم فيهو حاجة
وكل ما موظف من الشركة يراسلني بالإيميل لأول مرة يقول لي والله بنسمع عنك كتير لدرجة بنتلهف متين يلمنى شغل معاك وقالو انت عمرك 21 سنة وما شاء الله عليك هائل في الشغل .. كل الكلمات دي كانت بتديني دوافع اني اتعلم حاجات جديدة واعرف وسائل اكتر للشغل واخدت كورسات زيادة مع خوف شديد اني اخزل نفسي او اخزل الشركة
2018
يوم اتصل علي مدير الشركة اتصال روتيني بخص الشغل ومن ضمنو قال لي رايك شنو نرجع نفتح مكتب السودان؟
قلت ليهو والله ماف مشكلة وانا اخير لي اكون مقيد بدوام
قال لي خلاص اتوكل؟
قلت ليهو اتوكل شنو؟ قال لي اتوكل جهز لينا موضوع المكتب وعايزو يكون مختص بالمحتوى بتاع الشركة بشكل عام وحتديرو انت
قلت ليهو يا مدير انت عارف انو عمري 22 ؟ وانو انا ما اتخرجت؟ وانو ما عندي اي شهادة لا في ادارة ولا في اعلام؟
قال لي انا ما قلت الحاجه دي ساي وانا الشغل الكنت بديك تشتغلو ما حيغلبك بعدو موضوع مكتب وادارة وفريق
وانا ذي الصبت فيني مطرة من خوف المسؤولية
على نهاية شهر واحد بديت أأسس للمكتب من الصفر
جريت ورا ايجار واثاث واجهزة وموظفين وديكور ومعطت الناس معط بالمنشورات "عايز الشي الفلاني وعايز مكان
الحاجه الفلانية او وصفو لي الزول الفلاني"
لحدي ما اكتمل كل شي
5 شهور وصلناها الليلة
وصل الفريق بتاعي ل 9 اشخاص جميلين شديد وقدمنا شغل ممتاز للشركة ولعملائها وكل يوم بنتعلم اكتر واكتر
دي خلاصة تجربتي مع التعليم اونلاين ومع المعافرة والحماقة
ما وصلت لحاجة كبيرة لسه بس واثق اني حصلها بإذن الله
حاولت اختصر حاجات كتيرة قد تكون مهمة لكن بنفرد ليها مساحات تانية ان شاء الله
وللناس العايزة تخش في مجال صناعة المحتوى او ال copywriting
أنا مستعد اخدمكم في الحاجة دي وحبدا اكتب مقالات عن كيف تبدا؟
وكقاعدة عامة لو عايزين تتعلموها او تتعلمو غيرها فالنت موجود فيهو كل شيء والعالم ماشي لإنو يستغنى عن الشهادات البتكون ورقة ساي، الفيصل والمنافسة بالأداء والإنجاز
حاولو كرسو حبكم كمهنة مهما كان بعيد عن مسار دراستكم
لمن تجيك الفرص اغتنمها .. حاول اثبت لنفسك انك وين ما تتخت حتقدر تعافر وتعرف وتنجح
الشغف ممكن يطلع طاقة ما عادية انت ما متخيل نفسك بتمتلكها
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست