كرهنا الغربة

Quote: أستاذ / عباس يديك العافسة ويكفيك شر العين الطافية لأنو مرات كدة الكمبيوتر بعمل عمايلو من كثرت التركيز فيهو عارف يادسيس البوست بتاعك دا طلعنى من حالة شبه نفسية تجبنى لساعات كدة لحدى ماأوزع المرتب كلو عمرك ياعباس سمعت زول يجيهو( مغص ) بوم الراتب عنوان البوست الظريف دا مامفروض يكون (كرهنا الغربة) لأنو بصراحة كدة فى أخوان لينا بتمنوا غربتنا دى الماهنتنا لا والله هنتنا وهنتنا الليلة عاد إتحمل كلامى لأنى منكرب فى الرياض دى لسنين عددا والحمدلله القريشات القليلة البنلقاها طوالى (نلبعها )وننتظر الراتب الجاى والحمدلله الحال ماشى رغم العثرات والبلاوى البتظهر ليك (فجعة) ياخى دى ما فجأة دى مزمنة الطلبات فى إزدياد والراتب ثابت والعواصف من حواليه هههه ياجبل مايهزك ريح على قول أخوانا الفلسطينيين المهم ياعبس أخير لينا الغربة من الحال البنسمع فيهو فى السودان كل شىء متوفر إلا الكاش ( الكنجالات ) والأسعار فوق فوق يادسيس يخيل لى العلة فى النفوس وليست فى الفلوس صحيح بعضنا تلاقى مظهره ماشاء الله على سنجة عشرة وساكن فى أفخم عمارة وراكب حاجة كدة إسمها عربية والحمدلله وشانق الكرفتة والبدلة عبدالواحد والحمدلله وفى نص الشهر (يمد قرعتو ) لأمين الصندوق فى الشركة نظام( دينى حاول حس بي ) بعدما تقطع فيهو قصيدةمن عينة أنت رجل والرجال كثير وإنت ياقائل العثرات ولولاك كنا شحاتين فى المساجد ودا كلو عشان خمسمياية تقرضها أم العيال فى أقل من ساعتين فى أسواق العثيم وبعد دا نحمد الله ونشكره الأمور ماشة والديون زايدة وربك فراج صحيح ربما نكون كرهنا الوضع دا من الضغوط الزائدة بس مابنكره العربة وإلا الحكاية حاتجوط جوطة شديدة مافى حل ياأستاذ سوى الصبر وحبل الصبر طويل ربك يفرجها زمان كنت لقول بس تمتحن البنية للجامعة ونتخارج كلنا للسودان سبحان الله السنين فى البلد دى ماشاء الله تبارك الله سريعة الظاهر شكلى أنا أبدأ قراية وأشوف لى مدرسة أدخالها عشان نتصبر بيها شوية عن الصلاة أخوى عباس بتفق معاك فى تسارع الأوقات لكن لولا الصلاة دى كان الواحد جن عديل والحمدلله على نعمة أداء الفريضة أهى دى بالذات أحلى وأجمل حاجة فى غربتنا دى إنك تؤدى فريضتك بإطمئنان وخشوع دا غير العمرة والحج والزيارة وديل براهم بالدنيا أستاذ عباس أخير لينا نتصالح مع غربتنا دى ولك ودى وتقديرى