|
|
 Re: مدايد نورين .. (Re: محمد عبدالله مختار)
|
العام 2002 , وبعد الكثير من التحديات والايام الصعبه و الفلس, انتهت السنه الدراسيه الثانيه في قسم الهندسه الكهربائيه جامعة الخرطوم انتهت بعد ما تراجعت الجامعه اخيرا وبواسطة الاعتصام القوي من طلاب كلية الهندسه عن قرار التجميد, والحمدلله كان امتحنا مع ناس دفعتنا و عدينا.
في الإجازه بين سنه تانيه و تالته ماكان عندي خطه معينه في راسي لكن كنت مقتنع انو أنا ماممكن أنزل سنه تالته بـنفس الوضع المادي ده . لازم أعمل حاجه لكن ماعارف شنو , كان فكرت في كل الحاجات الإشتغلتها قبل كده , طلبه , مكيفات , دجاج , كل الخيارات دي جربتها قبل كده و عندي فيها خبره كويسه لكن كل واحده من الحاجات دي كان عندها سلبيات بتخليني أشوف انو دي ماالخيار المناسب .فالطلبه مثلا قروشها شويه و ماممكن اشتغلها أيام الجامعه , المكيفات علي حسب الموسم و مامتأكد إذا حاقدر أواصل فيها ايام الجامعه , الدجاج كويس لكن عاوز راس مال و راس مال تكون قنعان منو(إذا متذكر دجاجاتي الماتو في مدايد النورين 1) .
يوم كنا أنا و محمد عمر ود عمتي في بحري المحطه الوسطى , شفنا محل بتاع مدايد و كانت المديده موضه اليومين ديك , قلنا كدي نجرب الحاجه الجديده دي , قعدنا اتونسنا واستمتعنا بالمديده , قمنا في الاخر قلنا طيب الشغل ده عجيب , لكن إذا الواحد عاوز مديده إلا يجي لييي بحري عشان يضرب ليه كوريه, بتذكر كويس اللحظه القام محمد عمر قالي طيب رايك شنو نعمل محل مدايد في الكدرو , فجأة حسيت انو مشاكلي كلها اتحلت , أنا كنت عارف تماما في اللحظه ديك انو أنا و محمد عمر زي مابيقولو الجماعه ده تلطخ بيه ده , كنا عارفين انو ماعندنا راس مال (الصفر المطلق), كنا عارفين انو الوقت دااك الواحد فينا إذا اتجدع ممكن يعمل ليه بيض بالطوه خلي مديده , وبعدين ممكن عادي تقشر بيه يومين(الله يرحم بثينه عمتي أم محمد و يدي أمي العافيه) , كنا عارفين انو ماعندنا أي خبره في موضوع الاكل والمطاعم كنا عارفين انو ماعندنا محل نبيع فيه , ماعندنا تلاجه ماعندنا خلاطه مافي كراسي ولا ترابيز. ممكن اديكم 100 سبب منطقي كان يخلينا نخلي الفكره دي قبلها مع كوريتين المديده الفاضيااات, لكن لسبب ما كنا الإتنين بنعاين لي بعض و حاسين انو خلاص لقينا الحل, وشلنا الفكره معانا .
بعد يومين من قعدتنا ديك مشينا لي بثينة عمتي (ربنا يرحمها و يجعلها من أصحاب اليمين ) في أمدرمان , وريناها قبل يومين قلنا ليها جاينك تدينا كورس مديده , والله قعدنا أنا و محمد عمر زي الطلبه و بثينه عمتي ماسكه المفراكه زي الأستاذ و تشرح لينا تركيز شديد و كتابه عشان ماننسى خطوه , المهم كملنا حصة المديده وقعدنا قبلنا استمتعنا بالمديده وبعد اليوم داك رجعنا الكدرو و لي مدة كم يوم كنا كل يوم بنظبط مديده دخن لي ناس البيت(تمارين) , يوم تطلع نيه يوم تطلع ملحها كتير يوم تطلع خفيييفه شديد, وطبعا معانا عماتنا في الكدرو برضو ماقصرو كل واحده تديك نظريه جديده , لكن أكتر واحده مفيده العلمتني مسكة المفراكه, هيي يا ولد المفراكه دي امسكها كويس ماسكها كده مالك , امسكها كيف , كده كده , ايوا والله كده اريح . طبعا لانو انت بتكون بتفرك بإستمرار لمده طويله , فـموضوع الكفاءه ده بيفرق كتير . بعد فتره من التمرين حسينا انو بقينا مابطالين في موضوع المدايد ده و كده حلينا واحده من مشاكلنا السهله .
موضوع المحل الحنبيع فيه كان موضوع صعب و ماعندنا أي فكرة حنحلو كيف , بتذكر أنا و محمد كنا متفقين انو نحنا مستحيل نأجر لانو بـبساطه ماعندنا قروش ايجار , ياخي مش كده بس ماكان عندنا أي قروش لي أي حاجه . طيب نعمل شنو , قلنا خلينا نشوف محل في السوق يكون مقفل و ماشغال و نمشي نتكلم مع سيدو ونقنعو انو يخلي لينا الايجار بتاع أول شهر لي اخر الشهر , بالفعل دي الحاجه العلملناها , مشينا لقينا محل صغير بتاع خالنا (ود عم أمي) في الشارع مقفل, مشينا و اتكلمنا معاه و بتذكر قالينا, اصلا المحل مقفل امشو افتحوهو و جربو شهرين تلاته , إذا مشى معاكم بعد داك بشيل منكم ايجار(شكرا كتير), و كده انتهينا من اكبر مشكلة , مشكلة محل الإيجار .
بلنسبه للكراسي ممكن نشيل كراسي من البيت , ترابيز دي مافي داعي ليها في البدايه , انبوبة الغاز, الدفار, الحلل, الكمش, الملاعق الجرادل ده كلو ممكن نشيلو من أمي , أها بلنسبه للخلاطه, لقينا مكنة خلاطه قديمه في البيت لكن ماعندها جك , طيب دي حاجه مفروض نشتريها.
بالنسبه للتلاجه , كان مستحيل نلقى ليها حل عشان كده ماحليناها, قلنا نبدا من غير تلاجه , محل مدايد من غير تلاجه ؟؟ صددددقني ماكان عندنا خيار تاني. اتفقنا انو نبرد المديده واللبن في البيت , و نشيلها في حفاظات للمحل و بعدين نخت تلج تحت الحاجات عشان ماتفقد البروده بتاعتها .
طيب محتاجين راس مال شويه كده , نشتري بيه شوية الحاجات الناقصه دي ., حسبنا كده كنا محتاجين زي 100 جنيه, دي نشتري بيها جك خلاطه و كواري ونشتري بوهيه و حاجات ننضف المحل شويه ونشتري اللبن والدخن بتاع أول أيام وحبة مصاريف, المهم محمد عمراتصرف اتدين لينا القروش دي . و كده مشكلة القريشات الأولى انتهت .
بتذكر كويس أول يوم فتحنا فيه, شلنا كراسي من البيت و تربيزه كبيره و نضفنا المحل و اتفقنا في اليوم داك انو نوزع المدايد مجاني , عملنا زي 50 كوريه و كلمنا ناس السوق انو اليوم داك العشا علينا وادينا أي زول جانا في المحل نص كوريه كنوع من الدعايه و كده.
تاني يوم بعنا 7 كوريات , بعد كم يوم كده وصلنا 15 كوريه في اليوم و ووقفت الزياده , عدينا فتره طويله و نحنا بنبيع 15 كوريه قول زي شهر كده , طبعا في الفتره دي ماكان في أي ارباح لكن ماكنا بنخسر , لأنو نحنا عارفين بنبيع كم فبنعمل كميه محدوده , وطبعا مابنقدر نشيل أي مصاريف ولا أي حاجه , المهم بتذكر زي بعد تلاته شهور كده وصلنا 25 كوريه و بقينا بـنطلع حبة مصاريف كده , حبه حبه يعني ممكن نقدر نتعشى بـارباح اليوم و خلاص .
المهم واصلنا علي الحاله دي زمن طويل, أيام كانت صعبه , بنصحى الصباح بدري كل يوم عشان نحصل اللبن , نمشي نجيب اللبن نفورو , نمشي الطاحونه نشتري الدخن و نطحنو(خليني اديك نصيحه خبير , الدخن لازم تطحنو قبل ماتعوسو طوالي لانودقيق الدخن بيبقى مر مع الزمن). المهم نجيب الدخن و نعوسو وبعدين نعبيه في القوالب . و ننتظرو لما يبرد وبعدين ندخلو هو واللبن في التلاجه بتاعة البيت ,نغسل عدة الدكان و كده بنكون خلاص جهزنا لي بعدين المساء , العصريات كده بنشيل الحاجات من تلاجة البيت نختها في حفاظات ونخت تحتها تلج و نتوكل علي الدكان نفتح و نبيع , مره مره كده الكهرباء تقطع تعطلنا , غايتو اليوم البتقطع فيه الكهرباء ده ناس البيت بيشبعو مدايد لأنو ماكنا بنشتغل بـي حاجه بايته, مره مره كده تصب مطره تنقص الشغل شديد . غايتو الفتره دي كانت درشه شديده , دي المرحله البلجد كل يوم كنا بنقرب نستسلم , و كل يوم نتناقش في انو نقيف ولا نواصل.
بعد زي 5 شهور من مابدينا , فكرنا في انو نحنا لازم نعمل حاجه مختلفه , نغير حاجه و زي ماقالو اينشتاين قال انو الجنون هو انك تعمل نفس الشيء بنفس الطريقه بتاعة المره الفاتت و تتوقع نتيجه مختلفه . عملنا تغيير بسيط زدنا بيه حجم الطلب و تقلناه زياده شويه . والتغيير ده كان بـانو زدنا كمية الدخن في الطلب والحاجه دي مااثرت علي التكلفه كتير لأنو الدخن ماغالي, اللبن هو الغالي .
7 شهور من مافتحنا المحل , بدت المبيعات تزيد بطريقه خرافيه و بدينا نعمل ارباح كويسه جدا , عملنا بلاط قدام المحل عشان نخفف الضغط علي المحل شويه والمبيعات مشت زايده, عملنا يافطه للمحل والشغل مشى زايد, اشترينا كراسي, و اخيرا اشترينا تلاجه وريحنا أمي من الزحمه في تلاجة البيت , وبعد شويه المحل بقى زحمه شديده و كنا محتاجين توسعه , كان في حته ورا المحل وسعنا فيها شويه , و الشغل بقى كتير علينا جبنا معانا عامل و ارتحنا شويه , بعد شويه الشغل زاد وجبنا تاني عامل , والواحد خلاص حس بمتعة الإستقلال المادي من البيت .
الحمدلله أموري الماديه مشت كويس لحدي سنه خامسه و ماحصلت لي تاني مشكلة في رسوم التسجيل في الجامعه ولا المصاريف و نفس القائمه بتاعة الوجبات في الكافتريا الكنت مابحتاج اعاين ليها لانو أنا عارف وبتاع الكافترياكان بيكون عارف انو أنا حاشتري سندوتشين طعميه, نفس القائمه كان ممكن اشتريها كلها بالمصاريف البجي شايلها في جيبي .
السمستر التاني في السنه الثالثه في قسم الهندسه الكهربائيه جامعة الخرطوم , اشترينا عربيه , أي نعم كانت عربيه هكر, لكن كانت عربيه .
رغم كل التعب والضغوطات في سنتي الثانيه الجامعيه وبدايات السنه الثالثه , أكتب اليوم هذه القصه و أنا أحمد الله حمدا كثيرا طيبا مباركا يليق بجلال وجهه على كل التحديات التي اختار لي ان اخوضها , فانا اليوم اعلم تماما انه لولا هذه التحديات لما استطعت ان أحقق بعضا من احلامي فقد كانت هذه التحديات خير معلم . واعتذر اليك ربي عن كل لحظه يأس شككت في حكمة تقديراتك البالغه فيها .
صديقي محمد عمر , دخلنا مدرسة الحياة من اوسع أبوابهـا , و اختارت لنا الأقدار ان تكون احدى اروع مراحلنا الدراسيه في مدايد النورين .
“You can dance in the storm. Don't wait for the rain to be over before because it might take too long. You can can do it now. Wherever you are, right now, you can start, right now; this very moment.”
― Israelmore Ayivor
محمد نورين ,
تكساس , الولايات المتحده ,
9-2-2017
|
|
 
|
|
|
|
محمد عبدالله مختار
فيس بوك
تويتر
انستقرام
يوتيوب
بنتيريست