ايام الزمن الجميل

مرحبا Guest
اخر زيارك لك: 03-19-2024, 11:30 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف للعام 2016-2017م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
03-06-2017, 06:50 AM

عباس الدسيس
<aعباس الدسيس
تاريخ التسجيل: 10-11-2012
مجموع المشاركات: 3403

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
ايام الزمن الجميل

    05:50 AM March, 06 2017

    سودانيز اون لاين
    عباس الدسيس-Saudia
    مكتبتى
    رابط مختصر

    ايام الزمن الجميل بعد فترة المراهقة دخول السينما والبحث عن البارتيات والحفلات واحنا راجعين علي البيت بنعاين في السماء مع الضلمه بنشوف النور الكثير وين بنمشي عليهو
    ومن فراستنا بنحدد بيت بكا و ل بارتي او حفلة لو لقيت الغبار ملخبت مع النور معناها الجماعه حاتينو حت والنور الصافي تختاهو بيت بكا.
    في خبر شايلو النسيم واحد صاحبنا جاب لينا اخباريه حفلة في قرية قريبه من مدني حسي بقت داخل حدود مدني بنور الجيلاني يوم الخميس
    وبقينا في المشية كيف اتوكلنا علي الله مشينا كبري البوليس ربك رب الخير لمينا لينا في لوري قصب سكر شالنا ملح والدنيا كانت برد لمينا ليك في القصب البنلقاها ما حلوة بنرميها في محلها
    لما وصلنا كل زول صاري قدومو نص كم المعافره مع البرد شققت الخشم ياخ لو جاء عادل امام اعمل لينا حركات قرديه ما نقدر نضحك.
    اها سألنا الخبير الجابنا الدخول كيف للناس ديل وما بنعرفهم ؟؟؟
    قال مافي طريقه غير نزازي بالشجر لما نسمع بص السيرة وننقطع معاهو طلع من جيبو كيس فيهو فازلين لزوم الوجاهات مع البرد لقينا حيطه صغيره ختا فيها الكيس عشان نتمسح
    بالله نط فيهو كلب من الخلعه كل زول جري باتجاه الخبير قال موضوع الفازلين انسوهو نشوف لينا مزيره نغسل فيها وشنا قلت ليهو اخير لينا الكلب من المويه البارده في السقط.
    سمعنا الزغاريد وبص السيرة وجري علي اتجاه النور الكثير وتوش دخلنا مع اهل العريس بالجد ناس العروس كانو كريمين العشاء ضلع والتحلية رز بلبن بكاستر
    اكلنا لما شبعنا وكمان طلبنا زيادة ضلعه الناس اتوجهت لصيوان الحفلة عشان نستمتع بالنور الجيلاني قعدنا جمب المسرح من حظنا السيرة جات من منطقه بعيده الناس ما بتعرف بعض والعريس كان مغترب
    جاء واحد من اهل العروس وقف جمب المسرح وقال لينا يا شباب ما فيكم واحد عندو شجاعه ادبية يقدم لينا الفنان نط الخبير وعايز اظهر قدام الجكس مشي مسك المكرفون باحترافيه
    تست تستتست ون تو ثري يلا مسك ليك في عز الليل شعريا الراجل حافظها كلها من المعجبين بالنور الجيلاني ....في عز الليل ساعة النسمة ترتاح ....... وعيييك الخ ...كما يقال في كتاب المطالعه
    الراجل نزل من المسرح منتشي كان نشوف ليك الفنانيين جايين شايلين الرق بتاعهم والدربكه لا حولاااااااااا الفنان طلع زول ساكت ما النور الجيلاني قمة الاحباط وحفلة ما تستاهل مخاطره
    وكان علي رؤسنا الطير اتبكمنا والقال راجع وزولنا اشتغل معانا بالتصبيره يا شباب شنو الحكاية اكيد دا بكون فنان لصقه بعدو بجي نور الجيلاني انا الزول الجاب لي المعلومة ما بكذب.
    عصرنا علي روحنا واستحملنا غبار العرضه ومخاطرة العكاكيز الطايره فوق السماء الفنان انتهي من الفاصل بعد فتر من الغناء وساد الهدؤ
    بعد شويه نشوف ليك الزول الجاء اول قال عايز مقدم للحفلة جانا تاني راسو عدل علينا اها صاحبنا قال ما قلت ليكم داك فنان لصقه حسي اقول لي قدم نور الجيلاني !!!!
    الراجل قال لينا يا شباب فترة الفاصل عايزين واحد ظريف اقول نكت عشان الناس ما تمل
    صاحبنا عشان اطلع من الحرج معانا نط وجري علي المسرح مسك المايك خت ليهو كرسي ورفع فيهو رجلو وعامل فيها لما اقول النكته ادور علي الجمهور يمين وشمال
    النكات بتاعتو عينة ((واحد دخل في صندوق ادوهو الصرفه الاولي)) الناس ميته من الضحك مع انو النكات بايخه صاحبنا لما نزل كان مبسوط ارفع في بنطلونو
    بادرنا بسؤال اخوكم كيف مسك الجو ؟؟؟
    قلت ليهو جو شنو المسكتو الناس بتضحك في بنطلونك الناصل وجعباتك قاعدات في السهله.
                  

03-06-2017, 07:58 AM

ياسر السر
<aياسر السر
تاريخ التسجيل: 08-06-2010
مجموع المشاركات: 3204

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ايام الزمن الجميل (Re: عباس الدسيس)

    يا عبس الحمد لله انو الزمن داك كنا بنغني في العيلفون فقط لا غير ههههههههههههههه والا كان الواحد وقع فيك وكان نقيت شعيرو ..
    لكن فعلا يا عبس كان زمن جميل ويا ليتو يعود الكان ولى وما اظنو يعود الكان ولى ...
    مرينا للسلام يا حبيب وعلك طيبة ،،

    تحياتي : ياسر العيلفون .....
                  

03-06-2017, 08:46 AM

حيدر حسن ميرغني
<aحيدر حسن ميرغني
تاريخ التسجيل: 04-19-2005
مجموع المشاركات: 24567

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ايام الزمن الجميل (Re: ياسر السر)

    ياعبس
    زمنكم داك صوت المندلين بتاع صديق سرحان يجيب راسكم في الضلام
                  

03-06-2017, 08:47 AM

عباس الدسيس
<aعباس الدسيس
تاريخ التسجيل: 10-11-2012
مجموع المشاركات: 3403

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ايام الزمن الجميل (Re: ياسر السر)

    Quote:
    يا عبس الحمد لله انو الزمن داك كنا بنغني في العيلفون فقط لا غير ههههههههههههههه والا كان الواحد وقع فيك وكان نقيت شعيرو .. لكن فعلا يا عبس كان زمن جميل ويا ليتو يعود الكان ولى وما اظنو يعود الكان ولى ... مرينا للسلام يا حبيب وعلك طيبة ،، تحياتي : ياسر العيلفون .....

    حبيبنا ياسر اخبارك والاسرة الكريمة
    انت زول فنان وراقي ومجامل غير كدا ما عندنا ليك وصف
    تحياتي وتقدير
                  

03-06-2017, 09:03 AM

عبدالله ود البوش
<aعبدالله ود البوش
تاريخ التسجيل: 08-12-2009
مجموع المشاركات: 6700

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ايام الزمن الجميل (Re: عباس الدسيس)

    زمنكم داك صوت المندلين بتاع صديق سرحان يجيب راسكم في الضلام
    ---------------------------------------------------
    اخخخخخخخخخخخخخخخ
    خليني اشرب الشاهي القدامي دا واخت لي سفة وارجع ليك
    وقعتوا معاي
                  

03-06-2017, 09:46 AM

ANWAR SAYED IBRAHIM
<aANWAR SAYED IBRAHIM
تاريخ التسجيل: 12-02-2014
مجموع المشاركات: 899

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ايام الزمن الجميل (Re: عبدالله ود البوش)


    قلت ليهو اخير لينا الكلب من المويه البارده في السقط.

    حبيبنا عباس

    كيفك

    جميل ...جميل... جميل

    تعرف يا عبس .. لو اللى بتكتبو بتحتفظ به على اوراق بالجد بكرة تعمل منّو كتاب .. يقرأونه عيال عيالك ؟ !!!

    قصصك وحكاويك رائعة .. وعلى قول اخونا ود البوش .. الواحد يشرب شاى ( بس ما قاعد أسف ) ههههه

    متابعك يا ورد ..

    كامل الود
                  

03-06-2017, 09:12 AM

عباس الدسيس
<aعباس الدسيس
تاريخ التسجيل: 10-11-2012
مجموع المشاركات: 3403

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ايام الزمن الجميل (Re: عباس الدسيس)

    Quote:
    ياعبس زمنكم داك صوت المندلين بتاع صديق سرحان يجيب راسكم في الضلام



    حيدر اخبارك
    صديق سرحان ومتولي
    كان عندنا عادة نمشي للفنان في الغرفة بتاعتو
    اها صديق دا بنشبكو ليك يا استاذ ابدعت
    ونعمل مكسرين في غناهو نختمها ليهو بالله يا استاذ الليلة لاقيتو بتاعت الكاشف
    وصاحبنا مصدق
                  

03-06-2017, 09:15 AM

عباس الدسيس
<aعباس الدسيس
تاريخ التسجيل: 10-11-2012
مجموع المشاركات: 3403

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ايام الزمن الجميل (Re: عباس الدسيس)

    Quote:
    اخخخخخخخخخخخخخخخ خليني اشرب الشاهي القدامي دا واخت لي سفة وارجع ليك وقعتوا معاي


    ود البوش اخبارك يا عمده
    انت زول في طيات السحاب
    عينة البلولحو راسهم معاها ولمان ياخد ليهو تبه لي فوق
                  

03-06-2017, 09:21 AM

عبدالله ود البوش
<aعبدالله ود البوش
تاريخ التسجيل: 08-12-2009
مجموع المشاركات: 6700

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ايام الزمن الجميل (Re: عباس الدسيس)

    عينة البلولحو راسهم معاها ولمان ياخد ليهو تبه لي فوق
    --------------------------------------------------------
    لا لا ما كدا
    انا داير اتكلم ليك عن الحفلات ما قبل ميلاد المكرفون والكهرباء
    وزمن صديق سرحان كان بغني في صقيعة سلامة مجان ساهي قبل اجيكم في مدني
    وصديق سرحان ذاتو اتعلم الغنى من مبارك ود الصالح
    ولمن اطور عمل ليهو مكرفون ابيض ابو الحجار داك ياخ
    وفي تلك الليلة غنن البنات
    جابو المكرفون وعلو السكسفون ( مجازا ساهي ) مافي سكسفون
    لكن لاجل القافية
    جابوا المكرفون وعلوا السكسفون وينو الليلة
    الجنا الحسيس ود عم العريس وينو الليلة
    .
    .
    وبعد الحلفة مباشرة بنحضر القيلة
    قال انوار كاشحة قال
    يا جنا هوووووووووووي يا حيدر اثرت مكامن الشجن
    تحياتي يا عبس يا جميل
                  

03-06-2017, 01:43 PM

عباس الدسيس
<aعباس الدسيس
تاريخ التسجيل: 10-11-2012
مجموع المشاركات: 3403

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ايام الزمن الجميل (Re: عبدالله ود البوش)

    ايام حفلات سرحان كانت عدنا واحده في الفريق سمحة سماحه قاطعه الحي كلو مكسر فيها مشكلتها لئيمة وامها نجاضه زولة بتاعت شبك ومشاكل بضارب عديل دا المخوف الناس من البنيه
    في الفترة ديك الشباب بنسجو القصص من الخيال في العواطف خاصة لو زولة محبوبه من كل الفريق
    مرة مرسلني الدكان اجيب فول جات وقفت جمبي وبما انو قدرة الفول خارج الدكان عملت معاها ظريف قلت لبتاع الدكان انا خليني مشي الحلوة دي
    بالله قامت فيني زي اللبوة ...حلوة يا صعلوق المو فيك كـــلاب ما تلقي البحلك منهم قرف اقرفك.
    .. خشمي علي سكت... بعد مشيت من الدكان الشله قاعدين تحت العامود شايفين من بعيد واقف جمبها بعد رجعته ليهم كلهم بسوط واحد شنو يا ابو الشباب الزولة كانت معاك في الدكان ؟؟؟؟
    انشرحت فيهم ....
    سلمت علي في يدي بالله يدها زي حلاوة قطن قلت لي بتاع الدكان اديها اول قالت لي انت كلك زوق وادب يا ود الشريف
    طبعا بعد فترة بتاع الدكان بتاع شمشره فضحني في الحي كلو
    من حاجات الخيال واحد من الشلة بحكي قال جاء ماشي جمب يبتهم وهي طالعه شايله جردل غسيل العده كشحتو فيهو بدون ما تشوفو زعلت وتاسفت ودخلتو جوه البيت وادوهو جلابية ابوهم وغسلو ليهو هدومو
    وكمان امها قالت ليهو يا سلام يا ولدي ادب تتمناك كل البنات انشاءلله عريس بتي.... دا جابها قوية ....
    اها مشينا اطقسنا قالو لما دفقت المويه فيهو قالت ليهو كرهتونا الفريق مالين الدكان والشوارع وتحت العامود كمان جيتنا تتلبت زي الغنماية تحت الحيط يلا من هنا يا وسخ.
    اها عندنا صديق في الشله عبيط عباطه ماسك الاول من قولت تيت ما فكاها وشكلو وسيم مافي بيت لو قال ليها بحبك تقول لا مشكلتو خجول البنات بشيلو منو كراس التلخيص
    احنا قاعدين تحت العامود جات علينا عديل ونادتو باسمو زولنا عشان اقوم من الحجر اترتح ثلاثة مرات شحدتو كراس قمنا شبكنا ليك الشرك قبض البت بتحبك اكتب ليها جواب
    الراجل قام فتا لينا قال والله انا من شدة ما مكسر فيها قلبي مطافي ما تطفي الحريقه الفيهو بديها الكراس اول عربون محبة بعدين بديها الجواب عشان ما تقول شفقان
    بعد رجعت الكراس الزول دا عمل ليهو وردة ومعاها قلب وسهم اتقول من مطبعه ومعاها كم بيت شعر ساهر اليالي عشان انقيهم بقينا كيف اصلها الخطاب
    زمان كان حاجة زي دي بتاجر ليها شافع وتقيف بعيد خوفا من النيران وتديهو قرش الشافع الاجرناهو بدل اديهو ليها في يدها رماهو جمب كرعينها الناس عارفين امها شرانيه وقام جاري
    دنقرت رفعت الورق بيديها الاثنين شرطتها حته حته وقبلت علينا فكتها في الهواء ومعاها بصقه طويله تفووووووووووووووووو عليكم والناس زاغت من العامود جري.
    تاني يوم بدون ما نشعر قاعدين تحت العامود ما تسمع الا طاخ طراخ في الضهر امها جات شايله فرع من شجرة نيم انا اول زول بدت بي قلت الحيطه الجمب العامود وقعت فيني وجاتني كتمه في صدري
    المراة يدها فيهو شيطان تدق وتكورك لمت الفريق كلو هجمتها بهطت الناس القاعد في الواطه قلبتو القومه
    واحد مننا قال ليها والله شوفي عرس بتك يوم الخميس جايبه فيهو سرحان والله كان تعمليهو في راس بيتكم ... قالت انتو رجال انشوف واحد اعتب علي عرسنا.
    لما العرس قرب قعدنا نتشاور نفرتق الحفلة كيف !!!!!
    البقول نشيل لينا صفيحةرماد وبالصيوان بفوق نكبها محل قاعده البت وامها ..... واحد قال نشتري شطه نكشحه فيهم بوراء الصيوان
    واحد جاب فكرة عجيبه الزمن داك كان في العيفونه ((الالطا)) قال نجيب جردل نكشحو ليهم بتحت الصيوان.
    قلت ليهم يا جماعه البتقولو فيهو دا مخاطر بعرفونا وبتبقي مشكله كبيرة احنا نخطط وكون بعيدين بطريقة الافلام الهنديه البعملوها الخيانه انا عندي ليكم اقتراح وجيه.....
    كان عندنا واحد اي حفلة بجوطا وبفرتقا زول عاطل في الحي بتاع مرايس.... نمشي لي اجوطا نقول ليهو بنديك حق المريسه بشرط تفرتق لينا الحفلة.
    الفكرة بقت جهنمية العندو قرشين و ل ثلاثة و ل خمسة اجيبهم مشينا لي اجواطه نفتش فيهو في البيت اخوهو قال مافي امكن اكون مع ناس المريسه مشينا ليهو
    عرضنا الفكره عليهو وافق نجيب ليهو جردلين مريسه دخل فيهم كوارع حاولنا في الكوارع اتنازل رفض التلكفة الكلية للعملية طرادة ((خمسة وعشرين قرش))
    واحد قال المشكله اتحلت امي عندها طرادها غشاها بيها سيد اللبن كل نمره من بلد وامي كل يوم تطلع الطراده ودعي وتنبذ في سيد اللبن فلقتنا بيها فلقة
    انا بشيلها من الكباية في الدولاب نديها بجوطا واعتبروني مساهم بعشرة قروش انتو لمو خمسطاشر قرش اصلو اجوطا داقس وست المريسه داقسه بشيلوها
    بالله اجوطا جبنا ليهو الطراده كان سكران فل شالها وكحل ليك الارقام قال لينا انتو فارات قايلين داقس احنا الخرمنا التعريفه تدوني طراده نمرها كل فرده من بلد يا طراده جديده يا مافي فرتيق حفلة
    مشينا فزعنا لمينا ليهو القروش اديناها ليهو.
    يوم الحفلة منتظرين الشماته واقفين بعيد منتظرين الكراسي تتطاير الفاصل الاول انتهي اجوطا ما ظهر الفاصل التاني اجوطا ما ظهر نص التالت قلبنا اكلنا مشينا نفتش فيهو
    عليك امان الله لقينا سكران فل في بيت المريسه ونايم في العنقريب كرعينو مدلدلات في الوطه
    يا اجوطه قوم .... اجوطه قوم... اجوطه قوم ولا شغال بينا جبنا مويه كبيناها فيهو اتقلب بي المحلة التانية سكرة المريسه ما عبيطه
    سمعت الاصوات ست المريسه اسمها ((الشيء منقا)) يا ولاد في شنو واحد حكي ليها الحكاية.
    سجمي سجمي انا اقول اجوطا لقي القروش وين هي يا اولادي اجوطا ما بعمل مشاكل وافرتق الحفلات الا هو واعي وما عندو قروش وزهجان انتو اديتوهو القروش ومنتظرين افرتق ليكم الحفلة خمو وصرو.
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de