سوزان جاها عريس - كتابات عجيبة !#

مرحبا Guest
اخر زيارك لك: 04-20-2024, 03:35 AM الصفحة الرئيسية

منتديات سودانيزاونلاين

مكتبة الفساد

ابحث

مدخل أرشيف اراء حرة و مقالات

News and Press Releases

اتصل بنا

Articles and Views

English Forum

ناس الزقازيق

مدخل أرشيف للعام 2016-2017م

نسخة قابلة للطباعة من الموضوع ارسل الموضوع لصديق اقرا المشاركات فى شكل سلسلة

« | »
اقرا احدث مداخلة فى هذا الموضوع »

01-06-2017, 11:25 AM

زهير عثمان حمد

زهير عثمان حمد
تاريخ التسجيل: 08-07-2006
مجموع المشاركات: 8273

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

سوزان جاها عريس - كتابات عجيبة !#
10:25 AM January, 06 2017 سودانيز اون لاين زهير عثمان حمد-السودان الخرطوم مكتبتى رابط مختصر مهند .. سوزان جاها عريس سجمنا 😨 متين ! امس يخ وده منو الشفت العزال دة ؟ العريس شغال معاهم يخ وشفقان شفقة دة كلام طبي جدا جدا 😊 و الله يا دنمه لي اسي راسي مشطوب و ماعارف ابدا من وين زاتو .. اسمع اخوك خبير استراتيجي و عندي تلات اخوات مرقن وعندي كتاب اسمو مهند و الشتات في فن تزويج الاخوات.. عرس البت يا سمادح حاجة بطالة جدا و محتاج عمق على مستوى القعدة .. المهم العريس الحق يقال عميق هو صح شفقان و مستعجل بس عميق وب و العروس ابوها مغترب ليه تسع الف سنة وسبعة شهور و ياداااب جاي يسوي كدي 👋👋... الامور باسطة انتهت الترتيبات كوووولهاااا وجاء يوم البكرة العزومة و العرس و الهيلمانة المغرب جاء الدفار فيه تور ..🐃 توووووور .. ما عجل يعني معضل كدة و مفتل و عريض المنكعين مشرئب العنق النوع اب سنكيتة داك .. نزلو تلاتة من الدفار بكل حذر و حيطة دلو التافه ده من الدفار متزكر وقعوه وقيع لانو كرعينو اي اتنين مربطات مع بعض .. الاتنين القدام مربوطات و الوراء مربطات ربيط كويس .. هو ماكويس خاااالص يعني ما مزرودات بس .. المهم ربطو في عمود الكهرباء بتاع الصبة داك جاني واحد من النزلو التور قال لي طبعا انحنا بنضبح وكدة .. قلت ليه تمام يا معلم اها بتضبح بي كم ؟ اداني سعر كدة متزكر خلاني افكر اغير الكارير حقي لي ضباح .. قلت ليه يازول كلامك دة بعيد شديد قال لي نحن شغلنا نضيف و بعدين عاين البابور دة قدر كيف و هو مأشر على التور ... الحق يقال هو بابور بابور يعني ... الشي غليد خلاس . ما اتفقنا .. الراجل طلع حاقد حاقد حاقد .. بالجابس كدة مشى فكة كرعين التور الورا و خلا القدام مربطات على ربطة الحبل الفي عمود الكهربا ... و شتتو !! نسيت الموضوع على اساس انو في الحلة قالو في زول بيضبح اساسا التور كان راقد .. و انا هناااك قاعد في كرسي بلاستيك بشرب في كباية شاي بي لبن مقنن صاموتي .. ظابطاه الاء اخت العروس شخسيا.. الشفع من بعيد بعاينو للتور و يشاغلو فيه التور وقف .. قوم يا الحبل المربوط بيه في عمود الكهربا انقطع .. الشفع كوركو وجرو هو بقا ينطط لما لقا انو كرعينو الورا فاكات .. طبعا انا عامل فيها هيركليس كالعادة اقسم بالله انا شليق و ما عندي موضوع بس.. عامل فيها الاسد النتر وانا لا اسد نتر و لا حاجة و ما عارف انو التيران ما بهظرو معاها ... بعدين ده اول كلاش لي مع تور يعني !! المهم جاني احساس انو زي الخروف امسك الحبل اربطو في العمود و خلاص !!! ما عارف الاحساس العبيط دة جاني من وين !! قوووم ياهنو من كرسيك بكل ثقة ماشي على التور .. متزززكر عندهم قريبهم جاي من دنقلا كرت قال لي انتي ماشة وين ؟ من انتي ماشة دي عرفتو على الزيرو .. قلت ماشي ماااااشي انا ضكر اوكي ضكر انا وما تخاف ح اربط التور و اجي ... ماااتروه دي تور .. انتي مجنونة ؟ تااااني !!! مصر يخاطبني بي ضمير المؤنث قلت ليه شايف الشنب ده ؟ ما شايفو ! ؟؟ طيب الحس التخين دة ؟ ما اشتغل بي طبعا ! طيب عمرك سمعت ليك تور عضة زول ؟ المعفن قال لي امشي روه و انتي تأرف ... هو صح ماف تور بعضي بس و حاط الله التور اتاري بعمل حاجات تانية و انا ما كلموني .. المهم اتقدل طول و عرض علي التور و فارد صدري لزوم الود معضل وكدة لما قربت منو شديد رفع راسو عاين لي هي كانت نظرة استنكار كدة .. 😨 بكون في سرو قال دة ؟ عبيط دة ! وماشي عليه ..قلت ليه : ترترة لزوم الود دمو خفيف و بدلع في التور.. ترترة .. ترتوري هل تسمعني ؟ معاك نقيب امن وطني شرطة قوات مسلحة مهند اسماعيل .. طلس و حركات تيران و تفنجط لينا ما بنفع الكلام دة ... فاهم ؟ وانا ومدنقر داير ارفع الحبل شان اربطو في العمود فجاة الواطة غيمت اتاري هو استعدل لي كده و اب سنكيتة حجب الضوء وجاني صوت من هناااااك موهناااااااااااااد الليلة جاك .. انا بي امانة قايل الشفع بهظرو بي حركة درامتيكية هنديه كدة اتلفت مع وقفة بالجنبة سريعة على الشفع عشان انهرهم اكان اشوف ليك حيطة سوداااااء .. لللللب للللب دي وين ! بالظبط تلات سنت متر من ضهري اوووغسسسم كان شلاني شلاني اتاري رحمة الله نزلت و حركتي الدراماتيكية القمت بيها بالجنبة دي هي المرقتني من التور .. يعني لو كان قمتة عادي كان كتلك كتلك .. ربطة كرعينو مع النطحة الجلت خلتو اتكشح قدامي .. بقا كرعينو بي ورا بي ضنبهن في وشي كدة 😨 بقيت اعاين ليه و بحاول استوعب في شنو !!! اثناء ما انا بحاول استوعب هو كان وقف و استعدل لي ... و قال لي هاك دة طبعا مفروض تكونو عرفتوني كويس .. اي اي جريت زي الترتيب زمااااان كلمتكم مما تكتم انا عااااااادي بجري شان ما تشبكني تجري و بتاع ااااي انا بجريييي عااادي دة تور انتو بتهظرو ولا شنو ؟ وشحمااااااان طيب ثانية انا ح اديكم سر لكن بيني و بينكم .. العريس قريب عمك و عمك منو ماف زول يسألني وانا ما جبت سيرة حوش بانقا و لا جبت سيرة كافوري اما العروس الي هي اخت صاحبي الانتيم قريبة نائب عمك 😊😊 و للمرة التانية انا ما جبت سير حفير مشوووو شان ما تقولوني حاجة ما قلتها يعني حديد .. لاقى حديد واتخيلو التور ده قدر كيفن بعد ما جريت طبعا اكتشفت انو ود البقرة اجرى مني ..!! وبقياس سرعة الزمن و العجلة و كتلة جسم التافة مع سرعة القصور الزاتي عرفتة انو حيجيبني حيجيبني طوالي عمود الكهربا جاك زول ... تراااااخ ضرب ليك العمود انا لما شفت شرار قرونو مع عمود الكهربا ... 😨😨😨 ديشااااااااااااك اغسمبلاي دة جادي .. طوالي رفعت راسي للسماء ودعيت .. يا الله طبعا انت عارف انا ابوي متوفي يعني التور دة لو هبشني بلحق ابوي بلحق ابوي ...و امي دي بجيها سكري و دغت و عادي ممكن هي تلحقنا انا و ابوي و براااااك شايفها 24 ساعة في المصلاية و زولة عميقة و انت رحمتك اكبر من الانا بعمل فيه دة وانا متززززكر كنت عامل شنو كوييييس فياربي ياسيدي يا مولاي تمرقني من العواليق دة ... انا تاني مابمشي نمرة تلاتة كولو كولو ... اتخيلو بس مش لحظة روحانية زي دي و عبد يناجي ربه بكل خشوع ؟ العواليق دة جاني ليك بالجنبة شان تعرفوه تافة و كافر كيف !! بس بقا لافي ليك وراي حول العمود .. يمين يجي يمين شمال يجي شمال و انا حاضن ليك العمود اتزاوغ ليك منو و هو روووووو يضرب العمود المشكلة كل ما يخبت راسو يزعل مني انا ؟؟؟ و انا بقول ليه مالك ياخ ؟ سألتك انا ؟ ولا شغال بي ! لب لب وانا اتزاوغ ياخ انت لو كلمة ترترة او ترتوري دي زعلتك انا اسف الغبار ما يديكم درب انا و هو بس لافين في العمود اسمع انا لاضابط امن وطني ولاشي انا منتحل شخصية ساي .. اسأل نادر بشير انا و الله كضاب بعدين انا بكره الحكومة دي زاتو قلت اخش لي بي طلس جديد احتمال يكون عندو توجه سياسي ضد النظام لا سمح الله طلع ما عندو اي ميول سياسي .. بس خلى اي شي و انا بس العندو معاي مشكلة .. المعفن لافي و هو لافي وراي بعدين الرمة فيه مروة تهد جبل و انا ما عندي لياقة و الشفع يضحكو و ناس الشارع يعاينو و الغسال دموعو وصلت اباطو من الضحك .. شكلي كان ... تافه تااافه تااافه اسمع يا اخينا .. انا و الله تعبت اهجس شوية 😧 طيب صلي على النبي ! انت عندك معاي مشكلة شخصية ؟ عاين خلقتي دي شفتها قبل كدة ؟ ما شغال بي الشغلة بس راسو وستين الف سيف الا ينطحني يلحقني امات طه ياخي اسمع انا هنا عند مكانة اجتماعية انت بتشتت في كرامتي قدام امه لا اله الله و انت تور محترم يخ .. ياخي عيب عيب لب لب لسه انا لافي من الجنبة دي للجنبة دي وماف زول منكم يقول لي كان تجري .. اغسم بالله اجري يجيبني زي الترتيب و بي زعلتو دي لالا متخيلين حينطحني او يضربني او يبرك فيني ... ؟؟ لا لا المعفن ده انا شايف في عيونو نية تحرش النقاش متوااااصل اسمع انت من زمن العضل و الضرب و حات ديني خلوه .. في لغة نقاش و حوار ما شغال بي طبعا و مباريني و انا اتزاوغ زعلت انا بي امانة لانو شكلي كان زبالة و الناس بتعاين لي .. وفي شافع عمر تمنية تسعة بضحك ضحكة طعمية حامضة حامضة وشايل ليه تلفون بصور فيني اتخيلو ! كرامتك يا مهند اتبعترت خلاص و الله لو ما التور ده كان رشيت الشافع دة كف و الله زعلني اكتر من التور و الساقية لسه مدورة .. انا اكتشفت انو رحمة ربنا واسعة جدا لانو كرعينو القدام مربطات و هو الشحمان ما بعرف يلف سريع ماا بيقدر ياكل الملف سريع يعني ده لو كان كلب كان زماااااان انا صرتي ورمت من الحقن .. اي اي بي مناسبة الكلب دي زكروني احكي ليكم لما كنت مجكس علياء ام رموش ... كلب ناس فتحية الداية يوم كابسنا ليك في زقاق ورا الحلة الورانا ديك نص النهار ... شفنا شعاع ... و انا و الكلب مااااا بنتفق اصلا .. انا بي امانة عملت العلي علوية بتعرفي تجري ؟؟ اجري وين يا مهند ؟ و الكلب قرررب كررتة ليها السواااال عليااااااااء بتعععععرفي تجررري ؟؟؟ قالت لا بس بس انا بعرف و فووووووو جريت خليتها زي التريب .. اخدت ليها كجمة كجمتين غايتو و الكلب طلع نبيل حسه بي عفانة الحركة العملتها و جاء ليك ورااااي وكيلك الله ما لامني منو الا الطربيزة الفيها الميزان بتاع دكان هارون الفوراوي تحت مع صفيحة الجبنة .. متزكر كان في جقر بس بس ما خفتة منو .. بعدين انا اساسا ما بخاف من شي الا رب العباد اقسم بالله انا الاسد النتر .. هيييع احنا كحلونا بالشطة بس الحقنة و الكلب و الضب وزيدو ليهم التور مااااا هناي مختلفين ايدوليجيا .. صحي التور 😨 انا بحكي في قصة التور دة شنو الانصرافية دي ؟؟ 😎 نرجع نرجع يا اخوانا ما تشتتو افكارنا يخ اتعمقو شوية اسي انا كنت واقف وين زاتو ايوااااااا اثناء ما صاحب السعادة ود البقرة لافي وراي و بحاول بقدر المستطاع بي يوقعني عشان يعمل الفنشنج بتاع جون سينا داك بس انا مفتح طبعا ... ما مفتح خاااااالص يعني لانو مع زوغاتي ديك دقست خليتو قرب مني شوية .. انا بي امانة كنت مركز مع القرون و نسيت الضلوف جب عفصني ليك زي ثانيتين كدة الدنيا ضلمت مع انو متزكر كان في كشافة باقة فيني .. بس اثر العفصة عمل ضلام .. احيييييي اسي اتزكرتها اي صوفة فيني وقفت عاينو عاينو لو سمعتو فلان نطحو تور !! عااااادي صدقوني .. اما لو سمعتو فلان (((( عفصو تور دي )))) معناها الموضوع خطير .. و الله جد طوالي افقدوه و حمدلو ليه السلامة يعني عفصة عفصة انا كنت في قلب الحدث و ما شفتة بي عيني لالا انا شفتة بي كراي اليمين .. المهم بعد الكم ثانية الضلمت فيني من هول ثقل ود الحرام دة .. الالم فوقني وكلمتو وبشكل جاد جددددا .. اسمع هنا : شيل كراعك من ضولفي دة ... طنشني !! مع اني كنت جادي خلاس و فجأتن قرر انو يقيف .. ليو ربع ساعة بترتر وراي ما وقف بس فجاة حلت ليه الوقفة في كراعي .. الواطي التافة انا بي امانة غلبني و بقا لي حار بديت اعرق ما نفع دمعتة ما نفع بنطلوني نصل !! برضو ما نفع ! المشكلة انا كنت لابس سفنجة يخ و المصيبة انو عافصني بي ضولف واحد بس و دي الوجعتني 😢 ياخي طيب اوزن العفصة دي انت كدة ماكل يمين و الكارثة انو ما عارف انو عافصني زاتو و لسه واقف اتخيلو !! وانا اي مفصل فيني اتحلى بقيت اترقط قربت اتقنقن في الارض و ابكي زي بنات سنة خامسة بفكر بيني وبين نفسي ياربي اكورك ؟؟ العفصة حاااااارة يخ اكيد حيقدرو ظرفي اعاين اشوف ليك النسوان و الشفع و العربات كووولهم بعاينو في الفلم دة ما انا اساسا بقيت فوووووورجة لالا برفع كراعو اسي ما رفعها طبعا بكل زوق و ادب قلت ليه لو تكرمتة ارفع كراعك لانو ده هظار سخيف احرجني وما هببو لي المشكلة انو الناس دي ما عارفين انو عافصني و قريب ناس لورد الدونقلاوي داك البأنث و بزكر داك من بعيد قال لي : انت ما تتكلمي معاو كدة راه يزأءل زيادة . عاينت ليه كدة قلت ليه ما اتكلم اكتب ليه يعني؟؟ عاينتة للتور و قلت ليه بي صريح العبارة .. قلت ليه انا ح اجر كراعي و ما ح اجري ح امشي و الله يقدرك تتعابط شان اطلع ميتين ابو زريبتك زاتو شان من الصباح بهظر معاك داير تتعولق ؟ وبديت اسحب كراعي بالفن كدة التافة عاين تحت اكتشف انو عافصني احييييييي رفع راسو عاين لي .. لما شفتو اشر لي .. شافني شفتو حمر لي .. كتمت كتمت .. زنقت زنقت .. و سييييييييخ عرف انو قبضني اقسوووووم ابتسم لي طلع مفتح عرف انو لو رفع ضولفو انا ح اكبرها بقا يحرك كراعو بي تحت تحت وهو عافصني كراعو ما رفععا اتخيلو !!! و انا اسمع كرك كررر كرك كررر دي عضامي طبعا 😢 و قرصني ليك زيادة ... انا هنا بي امانة الادرالينين انكشح فيني و تااخ طبزتو ليك في عينو ود ام زقدة انا عارف نفسي لما اقوم كعب و حذرتو بس هو تور و ما بفهم اصلو ربنا ما خاتي على التيران خلانا نضبحهم .. لانو عارف انو في نوع زي دة تافه و دمو بقري ... و انا اقووووول دمووو بقري دي اتاري المهم طبزة زول ممغووووس ختيت اصبعي جوووة عينووو ططططظ كدة حتى رفع رجلو يرفعو البلا الا بالرجالة يعني ؟ بقا هو مخلوع و ما قادر يحك عينو .. انا بي عرجتي فكيت العمود ومشيت على الناس .. براحة براحة و الله في الاول ما جريت .. المطبوز الساعة القبل ليك علي ... حرقتو الطبظة ... احينا ما عامل لي فيها تور و بتاع المهم مما استعدل علي عرفتو ما ناوي على خير كولو كولو طافي عين و مفتح عين .. و قال لي هاك دة .. عاينت ليه و انا متجه علي الناس هب علي بي نطة كدة .. بس مسافة اتلفت و اجري بي عرجتي على بيت العرس و الناس و الهيلمانة و امه لا اله الل الله .. لقيت ماف اي زول جرو هههههههههههههه طبعا في اللحظة دي انا بضحك جد جد و انا بكتب هههههه ما كنتو بتضحكو فيني تجرو ؟؟ و اول زول جرا الكان بيانث و يزكر داك جلابيتو في خشمو ما شايف الا سفنجاتو من وراء .. و الشفع جرو و النسوان لفحن تيابهن و جرن و مصعب سيد الدكان قفل دكانو و الغسال الكان بتعمج فيني خشا تحت الطشت .. دة كلو مسافة اتلفت بس ... انا لما اكتشفت انو امة لاااا اله الا الله دي جرت .. بقت علي انا يعني ؟ بكل بطولة غيرت اتجاهي نحو الخور .. حتى اتفادى انو يعوق زول من ناس العرس .. انا عارف نفسي بطل و كان ممكن عادي اخلي يضايرهم لانو نشاءت صداقة و عفيص و حركات بيناتنا بس ما هان علي عرس سوزان يبوظ .. جريت على الخور و الخور كبير .. و التافة جاري وراي .. انا بس اساسا هو ما بعرف غيري و ما دايرو مع غيري انا بس تقول راجل امو ؟ ك فيزيائي متمرس عرفت انو مسافة عرض الخور مش لو ساكيني تور لو ساكيني الشيطان الرجيم ما ح اقدر انطو دة خور كبير يخ .. بعدين انا جريتي دي كوووولها بي رجل وحدة الرجل التانية كانت ديسايبل .. اعمل شنو انا تطير عيشتي لو وقعت اسي حيعفص الباقي كلو و لو نطيت الخور ح اقع و ح اكون معفوص و الخور فيو موية عفنة يعني ح اكون مبلول و جاري من تور و بي زعلتو دي عااااادي ممكن يخش معاي جوة ... و لو خشينا جوة .. اتخيل لي كلكم عارفين حيعمل شنو . المهم وصلت الخور واذا اشعر اني احلق كما الطير في السماء .. اقسم بالله طرتة عدييييل ما نطيت و لا شي حتى و اثناء ما انا محلق في حمام جا طاير جنبي .. تحليق تحليق يعني ما ونسة وصلت بهناك ... كيف ما عارف .. و عملت لاندنج وصلت الارض بهناك و ماوقفت نفس العرجة واصلت غسيل لي نص الميدان .. اتلفت لقيتو ما نطة وراي .. غلبو ود الكلب هو اي زول بنط نطة زي دي قالو ليك ياود البقرة ؟ وجيتو ليك راجع من الضفة التانية .. ما تجي ؟ مالك غلبك و صاري ليه تعال نط شان اوريك العفص التور منو تافه وفي حركة عملتها ليه بس ما داير اكتبها ساي شان انا مهذب .. وهي حركة خطأ وما صح اعملها بس اغسمبلاي فشتني فشة .. المهم في اللحظة الانا بنبز في التور .. جا ود حلتهم الضباح معاو عدتو و سكانينو و التور مفكوك .. حكمة الله الضباح ما كبير في العمر و لا تخين زي الجزارين و ماشي على التور .. و انا من الضفة الاخرى شابكو يا معلم يا معلم طلع ميتينو زاتو بس اعمل حسابك ما يعفصك و الضباح مااااااشي التور اتلفت على الضباح .. و عمل حركة بي قرونو كدة الضباح فجاة جرى ...!! على وين ؟ متخيلين من التور صح ؟ لالالا انتو قايلنو مهند ولا شنو دة جرى على التور شخصياااااا ... و تراااااااااح شبك ليك التور كف من امو .. التور لما اتخلع ..و في لمحة عين نزل ربط كرعين التور التحت الورا المفكوكات و التور لسه مخلوع ... وسريع وقف و نطح التور في بطنو ... التور التافه اتكشح زيو زي اي جردل موية و النسوانين قامو يزغردو عاينت للنساوين و في سري قلت و الله لو ما انا تعبت التور و سليت روحو مايقدر يعمل عمليتو دي .. انا مابزغردو لي مالي ؟ 😡 المهم التور وقع ..و في مكانو سل سكينو و كبر داير يضبحو قلت ليه اوووووووعك دقاااااايق انا عندي كلام مع الزفت دة ما تضبحو .. وقف جيت للتور و هو راقد زي المرة النفسة قلت ليهم ادوني بمبر جابو لي البمبر ختيتو قصاد راس التور و خلفت كراعي ... انا ؟ انا مهند اسماعيل تمرمرطني كدة ؟ انا ؟ انا تعفصني ؟ انا ؟ انا تشمت فيني الناس دي كووولها و بجضم فيه انا تسل روحي كدة ؟ لنفرض ياخي انو انت عندك مشكلة مع البني ادم الكان بحلب الحجة بتاعتك و يبيع اللبن بالرطل .. تتفشى فيني انا ؟؟ انا ياخي كنت بجي بيت ناس محمد عبد القادر دة و دارع طبنجتي بنزل من عربيتي الناس دي كولها تعمل لي حساب ... تجي انت تتضحك فيني الشفع ؟ و مادي ليه كراعي المسكينة الاتهرست كدة بوري في اثار العدوان الغاشم عليها .. دي عملية انسانية منك ؟ رشيتو ليكم كف لمن امن زاتو و قلت ليه لو عارف الكفيت بجيب راسك قسما بالله كان جضومك لحقتهن جضوم اخلاص ... اخلاص دي طبعا خلقة الله كدة جضومها حممممممر و الغريبة هي زرقا ما علينا ما علينا عاين لي من تحت كدة .. نظرة اصلو ما بنساها .. معناها كاااان راجل و ابوك راجل فكني ... سألت الضباح الشغل دة مربوط كويس ؟؟ قال لي اي اي تاح تاني رشيتو ليك كفين ورا بعض ... و الكلام الح اكتبو دة قلتو ليه في اضانو سمعناه انا و هو و الله عز وجل فقط ... بي همس كدة و بكل حقد الدنيا قلت ليه : ليك علي ح اكلك ضلع و كبدة و لحم و شايف ضلفك العفصتني بي دة ... ح اكلم بطة تظبطو لي كوارع ام وش ديك و صمغ صمغ ديك بالدكوة ... و ح اشربها شوربة و اكلن الاتنين شان تاني تعفصني يا اهبل نسيت و ح اكل منك ام فتففت بي كبدتك بالبصل اي اي حركات هند بنت عتبة زااااااتها شان تاني تعرف حدودك وين نحن ما بنهظر انتهيت من التور ... بفتش للشافع الصورني داك حتت غتس مالقيتو ... المهم اذا جاكم تسجيل فيديو لي شاب طوييييل كدة اخدراني و فيه قامة عاجباكم لابس بطلون جنز و فنيلة رمادية وجيه كدة زاريه تور جمب عمود كهربا ... دة ما انا اوكي ... دة شنوووو ؟؟؟ دة ماااااا انااااااا مهند اسماعيل ما بخاف و ما بعرف يجري زاتو فاصل اخير يا اخواتي البنات ... الجري دة مااااا حقي .. حقي شنو كدة ما عارف و المدفع اب سكلي خلاس يخ انا نعستا زاتو مهند اسماعيل ههههه (عدل بواسطة زهير عثمان حمد on 01-06-2017, 11:28 AM)

01-06-2017, 11:30 AM

زهير عثمان حمد

زهير عثمان حمد
تاريخ التسجيل: 08-07-2006
مجموع المشاركات: 8273

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: سوزان جاها عريس - كتابات عجيبة !# (Re: زهير عثمان حمد)
اقسم بالله انا زول عميق و محترم جددددا .. صح ماااخالص يعني لكن و الله بمشي الحال.. والقصة الح احكيها دي شان اشرح للناس الكانت في كرامة كابتن صافي الدين الملاباسات الحصلت .. اتهمتوني زورا و بهتانا ساي .. للناس الطاشة الحصل ... انا طشمتة طشمة السواد !! اي اي .. وقفت شبط .. وقفت نن .. الحقيقة وقفتة ككو عدييييل !! بس قبل تقرو اسمعو الكلام دة كويس .. اقسم بالله العظيم و كتابه الكريم انا لا اشرب الحرام بتاتا و بخاف ربنا .. و انا مولانا الا ربع كدة #جوكليت الحصل : كابتن الصافي رجع من انجلترا بعد عملية جراحية ناجحة و الحمد لله شالو ليه البروستاتا و شوية حاجات تانية قالو ما نافعة ... وصلتو دبي ضرب لي يامهند انا جيت وعامل كرامة لازم تجي و ممكن تجيب معاك زول واحد .. قفلت الخط الدرايكلين جاك زول .. عندي جلابية بخليها للمصايب الكبيرة بس. و عمة وشال سويسريات اصلياااات عنيفات عنيفات .. وصندل ابيض فيه زييك دهبي كدة وساعة رولكس هي صح ما اصلية بس هاي كوبي .. المهم .. الكموبنيشن الفوق دة انا لما اخش فيه يادنيا مافيك الا اتنين ... أنا و أنا بس ... افترااااا شديد بعدين صدقوني الجلابية مع الطول بتعمل شغل ظابط ظوباط شديد ... بحس اني كسااااار المووووههههم .. بقيت في اسوق معاي منو !!! دة كابتن صافي الدين يعني ما اي زول اوكي ؟ كرامة حتجيب صفوة صفوة دبي و باقي الامارات ... دة بدرس الطيران للبريطانيين في بلدهم زاتو يعني فخر الجالية السودانية هنا .. د. سامح صديقي العزيز ههههه النبي اعفي لي بعد تقرأ القصة دي ههههه سمحنو وده لقبو .. مكسرررر ومدشدش و منبرش في وحدة من بنات اخت كابتن الصافي .. و شافها مرة وحدة بس في عرس بت محجوب و لا اتكلم معاها لا عندو رقمها لا فيس بوك لا يحزنون .. البت بي امانة عميقة .. عميقة اي .. عميقة شديد .. و عندها وحمة في جوضمها .. وحمة كبيرة كدة .وجواز انجليزي و قارية في سويسرا . وبعد دة كووولو محجبة هههه الصلاة على النبي ... يا كابتن لو قريت القصة دي دكتور سامح دة و الله العظيم ود ناس و مافيه كلام .. النبي اتعمق ليه فيها .. و غض النظر عن الدراما السخيفة العملناها دي نرجع نرجع كلمت سامح يا عمك كابتن الصافي عامل كرامة.. قال لي ارح اسي دي ياود الكرامة بكرة .. لا بكرة بعيدة ارح اسي دي بس هههه بكرة جات و القشرة الما خمج جاني لابس توكسيدو و بي بيونه و حركات هههههه و مؤجر عربية BMW دي ما حقتنا يا اخوانا دي اجار لزوم البرستيج وكدة وصلنا بيت كابتن الصافي قاشرين و مريحن و نسوي كدي 👋👋 هو بيت نصاح !! قصر ماشاء الله جنس شي !! نفسياااااااات طبعا لو قعدتة اردح لي بكرة شان اوصف بيتو دة ما بدي حقو ف احسن انطما و اكلها في حناني .. و ربنا يوعدنا بي بيت زيو كدة الموووهههم مما خشيت لقيت في وشي مانيلا ... طيار فاشل ياخ دة اكبر سوداني رمة .. عواليق .. بعدين هو ما سوداني هو نص سوداني ابوه دنقلاوي وامو فلبينية .. و العربي بتاعو ... حبشي بس ... دة افشل طيار في الدنيا و الله طيارة رش ما مفروض يسوقها .. هلاس ، عربيد ، زنديق ، بقش من طرف .. امسك لي و اقطع ليك ولا يتوانى عن فعل اي منكر ممكن يتعمل .. .. متزكرين الحلو مر و القونقليز و الكركدي الرسلتهم امي في رمضان ؟؟؟ ده السرقهم .. مشيت يومين ابوظبي لما جيت راجع بيتي لقيت تلات مضيفات من الاثيوبية سكرنات واقفات ككو !! و حضرة سعادتو قاشر بالعراقي الهبابي حقي انا !!! .... مهند مهند اوعاااا تفهم غلط التلاتة ديل اخواتي وبغض النظر انو المضيفات قيامة رابطة .. كرشتهم التلاتة و هو رابعهم و العراقي حقي خامسهم زي الترتيب يعني زول كدة عبارة عن مصيبة متحركة اللون و الشعر المسبسب و الشكل البرئ ده اكبر طلس في الدنيا ... ياخي كعب كعب مانيلا المووووهم لقيتو في وشي اوووووو جلاليبك ياهنو .. جامد يا حامد .. بالعمة و الهناي مانيلا اختاني انا مما اشوف خلقتك دي لازم تحصل مصيبة .. وقد كان .. الكرامة انتهت و الناس اتغدت وطلعنا خلاس .. اي زول على عربيتو سامح طلع علبة السجاير الولاعة حتت غتست مالقاها ... مانيلااااا ... عندك ولعة ؟ اي اي في العربية و من هنااااك فتح لي سامح العربية سامح فتح الباب و بكابس يفتش في الولاعة لقاها و مد راسو بي شكل عبيط كدة هنوووووو في علبة شكلاتة هنا ظاااابطة و شكلها غاااالية ... نتسدى فيه ؟؟ ... جيب امها زاتو اساسا هو مكرهنا حاجاتنا الليلة كيتا فيه نلحقها امات طه .. انا بي امانة بحب الشكلاتة جددددداااااا صندق كبيييير بلاستك فخخخم ومن فوق قزاز و تعبية فخمة جد جوة تسع شكلاتات بس !!! وماااا اتفتح يعني علبة شكلاته جدييييدة فكيت الكيس انا لقيت البرايس ليبل مكتوب فيه 180 $ تسع قطع شكلاتة بي 180 دولار !!!!!!! دة مااااااا عز الطلب زاتو الليلة بهرد حشاااااو لانو حيكون موديها هدية لي بت من اللبش البعرفو ده .. طيب طيب ... الشغلانية طلعت ما شكلاتة بس .. لالا دي تسع انواع من اقوى انواع الكحول الخاااااااام ... يعني النوع الاصلي واحنا ما عارفين ... لانو من الصربعة ماقرينا مكتوب شنو زاتو ههههه اتاري مكتوب فبها بالفرنسي كان انت راجل و امك راجل اكل اكتر من قطعة ... شان تعرف الطفا النور منو ... أنا شخسيا ... اتعمقتة في اتنين زي السم و متزكر انهم شكلاتة بس طعمهم زبالة ... انا هين .. سامح خشا في اربعة عدييييل يعني اثبت ليهم انو راجل و ابوه راجل و امو راجل و حبوبتو راجل .. المصيبة الكبيرة وانا شايل الشكلاتة بروفسيور فلان بدون ذكر اسامي بدرس في اعرق جامعات الخليج جاء شال وحدة براااااااو قال السكري منخفض هههعهعع الحمد لله كانت سايقة مرتو هههه ومشو طوالي هنا الدراما بدت مانيلا واقف هنااااااك رفعت ليه العلبة كدة مادي ليه لساني .. كان بتكلم مع زول فووو جا جاري من هناك شاف العلبة لقا باقي اتنين نطط عيونو و لقاني بتمطق و امرر لساني في سنوني و اغيز فيه .. قلت ليه شوفها حارة كيف اكلت كم يا مهند ؟ بي طريقة جادة كدة اتنين و الباقي ؟ سامح اكل اربعة غايتو السايق منو جيب مفتاح العربية بي نهرة كدة السايق سامح يا اخوي مالك بتنهر اسي و ربطة وش ككو انا جادي ... طبعا انا للحظة دي واعي .. تنهرني عشان شكلاتة ...؟ مهند دي ما .تييييت شكلاتة اتس ف ... واين دقيقة دقيقة دي شنو يا خوي ؟ خمرة خمرة يا مهند انتو بتاكلو ساي ! خمرة ، ضفرة ، دلكة ، صندلية ، عروكة احنا دوسناها يا معلم .. ماهو انا قدامك نصيح عليك الله يا مانيلا بطل طلس مهند دي كحول و ازفت نوع و قطعة وحدة بتنتهي منك فما تسوق و لاشي انا بوديكم البيت بس ادوني مفتاح عربيتكم مع دكتور سامح يخ هو السايق .. اتلفت على سامح لقيت سامح منزل البنطلون تحت وطابي القميص فوق بي حنكو مع سدرو و شغال شررررررررر يلبي نداء الطبيعة في كبوت العربية المؤجرنها !! عطن ليك العربية عطنة السواد و يغني .. حسي حسي يا ام العروس حسي وزعي الببسي ..!!! شششششششت وقسم بالله دخل فيني خلعة .. الشارع الناس سامح بعمل BB في كبوت العربية !!! نططتة عيوني و حيلي برد سامح .. يا سامح دة شنو دة !!!!! عاين لي كده بالحركة البطيئة مالك يازول ؟ !! مانيلا قال لي شايف شايف مش قلت ليك الصنف دة كععععب ... اها ده بال قبل ما تربط معاو زي الناس زاتو .. و الاتنين الانت اكلتهم ديل لو ما لابس بامبرس اقع الكبوت الوراء القدام دة اتملا خلاس يلا خمو وصرو شان تان تاني تاكلو ساي و زاغ مني بقيت اناديه مانيل مانيلا تعال مشى بي وشو ... اعاين لي سامح القا بجازف برفع في البنطلون و يتلوح سكران سكران و لسانو تقيل و بطنطن و بلغلغ و ررررب وقع ... انا بدت تربط معاي ... و انا واقف مكاني الحاجات بدت تتحرك .. بحاول اقبض في شي مااااف و الحركة زادت و حسيت صنقوري بقا تقييييييل و التوازن راح و بقيت ابزغ و بنبز في سامح ! و سامح قعد القعدة الما عميقة ديك و البنطلون غلبو يرجعو مكانو فبقا شكلو زبالة زبالة الزول ده بال فممكن يتم الناقصة عادي .. سامح سامح لا لا اوعا يا سامح يا سامح لا عيب و لساني تقيل و ماشي عليه و ترتحة السواد .. قوم يا الشبشب الابيض اتقلع من كراعي .. عشان البس الشبشب ربع ساعة انا بعافر الكراع حلفت بالتكسر اصابعينها ماتخش ! تشيل تجلي يا اما اما الشبشب بتزاوغ مني و الناس طالعة و تعاين في المنظر ... انا بترتح و داك مصنقر اتفه صنقيرة في الوجود و منتظرني ... و انا الشبشب ابا لي .. في الاخر قعدت في الارض و ناديت واحد جنبي ابو الشباب... يا ابو الشباب عليك دينك لبسني التيت دة هههههه كتر خيرو جا لبسني ليه هههه مرتو ما عجبها الحنك انا ما عارفها غايتو كان مرتو كان اختو المهم بقت تنقنق و تبرطم ... سكارى حيارى و هي تخينة تخينة بطاح بس .. و تنبز فينا ... سالتها يا مره هوي مالك بي تقلة لسان كدة وانا متفن في الارض .. قالت لي ملالة تشق حنكك ماشايفن منظركم ؟ نصيحة ليكم اوعا اوعا تستفذ زول سكران .. خصوصا زي وضعنا دة و اول سكرة ... لانو حتسمع درر نرجع نرجع منظرنا مالو يا بقرة ؟ منظرنا خليه انت شايفة منظرك ؟ ثانية ثانية القصة دي لو وصلت المره دي انا بحب اعتذر ليها و الله .. بالجد انا اسف ده ما انا و الله نحن محترمين ... انا زول عميق جدا و في ناس كتار بعرفوني و المتفن التاني دة طبيب جراح كبير و زول محترم بس ما كنا واعين فسألتك بالله لو بتقري في كلامي ده أعفي لينا ... نرجع منظري ماليك دخل بيه يا سكران يا حيران .. مليتو البلد ... ارجعو السودان اعملو فيه عمايلكم دي ... سامح من هنااااااك : المرة الماعندها رقبة دي مااااالها بتنبح ؟ انا : سامح نحن اولاد ناس و أسر محترمة ما حنرد على التيت .. توت .... تاخ تاخ تاخ دي ... ما خليت للمرة جنبة تقبل عليها ... و انا ما عارف علاقة السكر مع النبز شنو في رابط مشترك غايتو .. و انا اقوووول حرموها ليه ههه المهم .. كلامي جارح يعني ... و انا متفن في الارض غالباني القومة و قاعد اردح للمرة الشحمانة ... و سامح مقنقن في الارض و البنطلون ناصل هناااك مع الجزمة و لابس ليه طرزان فيه سبونج بوب 😂😂😂😂 و مكنكش في صدام عربية لانو راسو لافي و مما يقوم للللب يجي داقي الدلجة ... و يكووورك يا علوياااااا يا علوياااااا الحقيني .. علوية منو ياخ ... دي امي يا مهند ومعاها بزغتين بالجمبة لانو من اللعلعة ريقو نشف هههه الى عناية الخالة علوية ... الحقي ولدك الدكتور البتفخري بيه سكران سكرة العدو في شوارع دبي ههههه مهند .. مهند ..موووهااااااند اقسم بالله انا اتشليت .. سامح سامح استهدا بالله انت سكران يا ولدي و انا لاحقك كيف سكراااان و البكا و المخاخيت ما تديك درب و الاتنين راقدين في الارض وفي عز سكرتنا ديك حبيبة سامح ام وحمة كبيرة ديك المدشدش فيها جات مارقة ... و هو صنه و انا بلغلغ .. يا حليلو بنطلونو ناصل و شكلو زبالة و بقول مهند مهند اسكت ... و انا لسه مستلم المرة الشحمانة ديك ... وهي مشت زاتو و انا لسه اردح مهند عليك دين ام ابوك وحات النبي اسكت ... ماااا بسكت بقا ياشر لي بي رقبتو كده على البت لزوم القطر فيه مفتش .. عاينتة ليها عرفتها ... صرفت ليها هي زاتها ههههههه مع انها ما سالتني زاتو و انا برضو احب اعتذر ليها يخ ههههه سيحت لي سامح طبعا و فتيت ليها الشمار زاتو احنا بي امانة كترناه ففي راجل كده قال اضربو للشرطة ... شرطة ؟؟ اضرب للجيش زاتو احناااا مااا بنخاف اضرب للحرس الوطني و الدفاع المدني .. سامح من هناك جيب عمر البشير زاتو ... سامح سامح يا سكران نحن في دبي عمر البشير يجيبو من وين ؟؟ و انا جادي جيب الشرطة مالك ؟ هرشت يا عجل ؟؟ ربك رب الخير جات عربية اسعاف بالصدفة بس و انا قايل الشرطة جات ... وكيلك الله السكرة حتت غتست ما عرفت فتف فت فت قمت و جريت زي الترتيب و اقرب عربية قدامي لقيت نفسي جوة في كرسي بيبي في النص قعدت جنبو ... احلى شي لقيت سامح قاعد بهناك هههههه السكران دة انا اسي خليتو قابض صدام عربية بهناك جا كيف ما عارف يعني انا بي جاي الشافع في نصنا و سامح بهناك هههه مهند الطارة كبست حيغرفونااا و واتطاتنا حتصبح هس هس ما شايفننا خليهم يمشو و دنقر دنقر راسك الابو و الام قاعدين قدااام بعاينو لينا و احنا عاملين فها مدسين من الشرطة هههه الراجل عرفني طبعا و الله العظيم انا ما عرفتو منو قال لي مهند اسماعيل ما عهدناك هكذا ... قلت ليه بتعرفني معناها الله يسالك انا كدة ؟؟ اسي انا كان قلت ليك انا سكران بي شكلاتة بتصدقني ؟ كتر خيرو عارف انا ساكن وين و انا للحظة دي ما عرفتو منو و حابي اشكرو لانو وصلنا البيت و تكلنا الاتنين انا خاشي البناية عندنا جارنا يهودي راس السنة الفات جاب لي قزازة خمرة و العياذ بالله هدية و من اجل رتق ما انفتق من علاقات و زفيتو ليك زفة السواد ... انا ما بسكر و انا مسلم و احرجتو احراج عمييييق شافني ليك متكل و سكران طينة و وقف صفق لي و بالانجليزي قال .. ماي لوفلي نيبر يو ار توتالي ويستد ؟؟ وات كاين اوف شيد يو درنك ؟ و انا اعجبكم طبعا : اتس نوت يور ف... بزنس اند قيت دي هيل آراهير بفور اي كيك يور قاد ديمن جويش اس .. عرفني واقف ككو خشا طوالي ... الماغسني و شاقي حشاي .. جاري التاني رجل كبييير هندي شغال في طيران الامارات مسلم صلاة الصبح معاي و المغرب و العشاء و بقرا ليه القران و بترجم ليه و بصلي بيهم و عامل ليهم فيها مهند بن الخطاب و علامة صلاة و دعاء و مقتنع انو انا حيلقاني يوم القيامة في صف الجنة . واي شي متعلق بالاسلام بسألني انا بس .. مع اللغلغة و الجقلبة فتح باب بيتو لقاني متكل .. عاين لي نظرة كدة لما قلبي وجعني .. ما بعرف يقول مهند بقول لي هنن .. ار يو اوكيه ؟ بلغة عربية سودانية رديت ليه و هو يخربو في العربي .. عليك الله اسي ده شكل زول اوكيه ؟ بعدين انت حبكت تطلع اسي يعني ؟ ياخ مالك طالع زاتو ؟ خش خش بيتك ياخ .. خشيت خليتو واقف و النومة الياها .. 24 ساعة انا برة التغطية و سامح يومين ما قام .. المشكلة .. البروف الشال قطعة وحدة و قال السكر بتاعو منخفض .. لما وصلو بيتهم .. ابا ينزل من العربية و قال لي مرتو شيليني !! و اللسان تقيل .. المرة قالت انجلط .. و اساسا كان عندو ماسف دي في تي .. و المرة و ولدها خمو المستشفى راس .. ردموه هيبرين و وارفرين لما امن زاتو .. في الاخر الدكتور قال ليهم الزول دة ملطط ساي !! و المرة بتعرف راجلها ما بسكر .. و نتيجة فحص الدم ... كحووول السواد .. بروف النبي اعفي لي انا زاتي ضحية زيك و مسكت نار لكل الناس الحضرت المنظر الزبالة دة ... دي شكلااااااتة يا اخوانا .. و حاط الله شكلاتة .

01-07-2017, 07:36 AM

أبوبكر عباس

أبوبكر عباس
تاريخ التسجيل: 03-04-2014
مجموع المشاركات: 3445

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: سوزان جاها عريس - كتابات عجيبة !# (Re: زهير عثمان حمد)
إنتي يا زهير، بتجيبي الكلام السمه (السمح) دي من وين؟ يا أخي، مهند دي، لو بتعرفيهو أو بتلاقيهو، بلغيهو مني السلام وقولي ليهو: لينا زمن طويل ما قدر زول ينتزع مننا بسمة، تجي إتي ترمينا في الواطة من الضحك!! الله يعرس ليك يا زهير ود آمنة

01-07-2017, 04:34 PM

زهير عثمان حمد

زهير عثمان حمد
تاريخ التسجيل: 08-07-2006
مجموع المشاركات: 8273

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: سوزان جاها عريس - كتابات عجيبة !# (Re: أبوبكر عباس)
أخونا أبوبكر عباس تحياتي وكل سنة وانت طيب يا خي مالك علي التأنيث المقصود منو شنو في الخطاب المهم عادي أخير التأنيث من النبز وقصة العرس ممكن تتحسم خلال هذا العام يا صديقي وأدعوا لي بالتوفيق وح أبلغ سلامك للعزيز مهند أنشالله لك كل الود

01-10-2017, 01:31 PM

Yousuf Taha

Yousuf Taha
تاريخ التسجيل: 05-03-2013
مجموع المشاركات: 1034

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: سوزان جاها عريس - كتابات عجيبة !# (Re: زهير عثمان حمد)
يابو الزوز عنده قصة تشرطك ضحك بتاعت زول ممسوس بيت معاهو في الشقة في دبي

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]