الونسة البتكون تحت الراكوبة دي بين اهلي وأنا صغير كنت بحبها جدا... كنت بحس إنه بيناتهم في محنة وحاجات حلوة كتيرة.. رغم الفقر والضنك الكان حاصل وكتها لكن كان في محنة ومحبة كدة حدها السماء ما عارف كان بيجيبوها من وين رغم الظروف المحيطة الصعبة جدا جدا.. كنت بسمع أمي لمن يقولوا ليها مثلا فلان عيان أو عنده مشكلة.. كانت عندها لازمة في الحاجات الزي دي: يا يابا تبكي علي... لمن تقول جملتها دي كانت بتدي ايحاء انها ما مصدقة الكلام الاتقال ليها وإنه الزول الوصلها خبره دة زول هي بتحبه شديد.. قُرب بيتنا من محطة السكة حديد وقتها كان قبلة لكل أهل القرية الجايين الخرطوم لي علاج أو «غرض» عايزين يقضوهوا في الخرتوم.. ما كان شرط إنه يكون في صلة دم بيناتنا عشان ينزلوا عندنا... كنت بحس إنه أمي فرحانة جدا جدا رغم انه بتكون مقابلة الصاج و«الدوكي» 24 ساعة بس من جواها كانت مبسوطة شديد وبتحس بيها جات الخرطوم من «شبا» (البركل) مرغمة أو ما مرتاحة.. في الضهرية بتذكر ضيوفنا وأحبابنا كانوا بيتلموا في الراكوبة الجمب التُكل دي.. كانوا كأنهم بيستعيدوا ذكرياتهم في البلد.. الونسة بتحسها طالعة من القلب والضحكة من جوة الجوف.. وكان الزول البيكون جايي من البلد دة عبارة عن وكالة أنباء متحركة بيعرفوا بيهو أخبار البلد كلها وأخبار أهلهم وأحبابهم هناك.. في نفس الوقت الزول دة بيكون مرسال لي ناس الخرطوم من أحبابهم في «شبا».. أول من يجي زول من سكة حديد الخرطوم والتاكسي اللصفر داك يقيف قدام بيتنا مليان طرود «تمُر ومنقة وفول وجُروم وقرقوش».. بعرف طوالي إنه الايام الجاية دي حا يكون في ازدهار اقتصادي حا يحصل في البيت و«صينية اللكل» حا تتصلح احتفاء بالضيف دة والخيرات البتجي معاهو من «بت بغداد» أو «الفردوس» حبوباتي في «شبا».. أها الراكوبة دي في الغالب كانت بتكون مكان للمحنة.. فيها ثلاثة عناقريب قصار كدة واصغر شوية من بقية العناقريب الفي البيت وفي الغالب ما بيكون فيهم لحافات باستثناء مخدة في راس العنقريب.. في الضهرية لمن تسمع الرادي المعلق في «شِعبة» الراكوبة يقول: كيف قيلتوا.. الأحباب ديل كان بيتلموا في الراكوبة دي وامي بتكون خاتة ليها كانون صغير كدة بتسوي فيه الجبنة وبتكون جمبها علبة حلويات ريرة فيها بُن وشرقرق وجبنة وفناجين.. أها بيقعدوا يشربوا الجبنة ويتونسوا ويضحكوا ويتذكروا حكاوي البلد وحاجاتها اللذيذة.. أمي كانت بتكون دايما خاتة ليها طرحة في راسها ولو الزول كان بعيد شديد بتكون لابسة توب الجارات داك.. أنا كانت بكون ماسك في يدها وقاعد وغالبا شايل لي «جُلة» ولا «بلية» ولا «فريدة» ولا «تعريفة» أو «قرش» أو «شلن» أداني ليه واحد من الضيوف.. ومرات كتيرة بلقى نفسي نومت واتكلت فيها وكانت بتشيلني تختني في حجرها.. أها لمن أشم ريحتها دي بقوم أنوم زيادة.. الأم دي عندها ريحة عجيبة ياخ.... الراكوبة دي كان مقياس للمحبة عجيب ياخ.. الزول البيجي يقعد فيها ويتونس الضهرية دة بيكون اسهمه عالية جدا في بورصة الأسرة.. حتى الزول المسافر وراجع البلد بتكون الوصايا في الراكوبة دي ( أمي كانت بترسل سكر للبلد دايما وتلقاهو عندها طردين واحد لي أمها وواحد لي حبوبتي أم أبوي)... الناس كانت بتسيل الوصايا دي بأريحية كبيرة جدا... بتذكر لمن كنا نمشي الشمالية ونحن صغار كنت بنقنق شديد في الطرود البتشيلهم أمي من الناس لأنه كنت بحس إنها في رحلة القطر من كريمة للخرطوم ما بتنوم ودايما تقعد تحسب الطرود وتخت علامة في كل طرد: دة طرد ناس حسين شنان ودة طرد احمد عوض السيد كنيش ودة طرد ناس القووت ودة طرد ناس الزهرة بت جعفر.. المكان دة ذاته بيكون فيه مزيرة وفيه جدادة «راكضة» وفي الركن بيكون فيه شوال قمح متكول وحطب عواسة الكسرة والقراريص.. ياخ الراكوبة دي كانت حياة براااااااااها... أولاد أهلنا الكانوا بيدرسوا في جامعة الخرطوم لمن يجوا من «البركس» يوم الخميس في الصباح لمن يتلموا فيها كان مسمنها «راكوبة المين».. إنا لله ياخ ــــــــــــــــــــــــــ الصورة للمبدع عباس حبيب الله من مجموعة صور عن الحياة في السودان
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
طارق جبريل
فيس بوك
تويتر
انستقرام
يوتيوب
بنتيريست