اول ما صحيت من النوم و عرفت إن النهارده عدي أربع ايام من العيد وكلها اقل من ساعتين هيبقوا خمس أيام .. قولت : سبحانك يا رب .. الأيام بتجري، و إفتكرت طفولتي .. ايام إبتدإئي لما واحد قريبي جه عندنا وإداني انا وأخويا كل واحد ٥ جنيه عيديه .. ووعدنا إن كُل عيد هيدينا عيديه .. فرحنا جدًا ورستكنا حالنا وعشمنا نفسنا إن مصروف العيد من السنادي زاد ٥ جنيه .. " يا أحلي يوم ف عُمري ؛D .. تمر الايام ويجي العيد اللي بعده .. قريبنا يجي بيتنا يعيد علينا .. وأقعد جنبه، وهو ولا هِنا .. مدانيش ولا جنيه .. يجي العيد اللي بعده واللي بعده، اول وتاني وتالت ورابع يوم العيد يجي، وبرضه ميدنيش حاجه ! وانا عشمان لآخر لحظه إنه يديني ال ٥ جنيه خصوصًا إنه حاله من فضل ربنا ميسور .. لحد ما خلصت الابتدائي والاعدادي، لكنه مكررهاش ! وانا نفسي فقدت الشغف واللهفه علي ال ٥ جنيه بتاعته ومبقتش استناها .. - الخُلاصه خليك ديمًا قد كلامك أو خلي كلامك علي قدك ! .. متطلعش حد لدرجه وسقف مُعين وتنزله بعدها الأرض .. تهتم ف البدايات وتهمل تدريجيًا . - متوعدش بوعد في وقت صفا تشعبط بيه قلب شاف إن وعدك هو خيط الامل الوحيد بالنسباله، وتقطعه لما متنفذوش ! علي رأي خالتي " قلل من الندر وإوفي " والجُمله دي بتفسر حديث النبي : خير الاعمال أدومها وإن قَل " - يبقي متلعبش بمشاعر حد و تغير حاله بـ كلمه، وعد، إهتمام، نظره " وتختفي بعدها .. او تتغير عليه او حتي تنفذ كلامك بس بعد فوات الاوان ! زكاة الفطر قدامك فُرصه تطلعتها لحد آخر يوم رمضان وهتتحسبلك زكاه إنما لو طلعتها اول يوم العيد تبقي صدقه لأن رمضان خلص ! ربنا ما يجعلني ولا يجعل كل شخص بيقرأ دلوقت ينشغل باله ويقول : ياتري أحمل هم اللي بتمناه وعشمان فيه ولا احمل هم إن اللي بتمناه ده هيجي في وقته ولا بعد ما افقد اللهفه والشغف عليه ! #العشم_بزياده .. #احمد_ايمن .. ^^
10-02-2017, 10:23 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
كنتي بتحبي واحد بس للاسف بعد ما عشمك بالجواز متقدمش ! كسر خاطرك وقلبك.. فعلاً : الحُب للاقوياء فقط " ! ولأن ربنا ارحم من إنه ياخد منك الجميل في نظرك غير لما يبدلك بالأجمل .. بعدها بأقل من شهرين اتقدملك عريس بن ناس .. مُحترم و بيحبك .. بس إنتي للاسف مبتحبهوش، وبسبب ضغط اهلك ولأنها سُنة الحياه، وافقتي .. طول خطوبتكم مبينساش مُناسبه تهمك .. بيودك ويتعامل معاكي بالحُسني .. اتجوزتوا : فبقي يخاف عليكي من الهوا الطاير زي ما بيقولوا .. تتعبي: يسهر جنبك، وميرتاحش إلا لما يشوف ضحتك .. بيحب اهلك وبيحترمك .. كريم وبيصونك .. تحسي قد ايه انه مكانش يستاهل إنك متحبهوش ! وتقولي فعلاً " وعسي أن تكرهوا شيء وهو خير لكم " كنت كرهاه لكن دلوقت لو اطول أعيشله عُمرين علي عُمري مُش هتأخر .. فعلاً مفيش اعظم من عوض ربنا وإختياره . - صدقني أكيد راح تتعدل .. وهتضحك من تاني الايام .. مهو ديمًا لما بتتقندل .. بيقرب فرج المولي قوام ! - من شويه قريت إن سنة ١٩٧٥ حصل شيء عجيب في بلد ما في الصين .. الكلاب البريه اللي عايشه جوا الغابات القريبه من البلد خرجت بعدد كبير، وهجموا علي البلد، وبدأوا ينبحوا بعلو صوتهم بشكل غريب ومن غير انقطاع ! اصواتهم بتعلي وبيرزعوا في ابواب البيوت ! الناس اترعبت .. الاطفال اتفزعوا .. الستات حضنوا عيالهم وعيطوا .. عدد الكلاب كبير بشكل مُخيف ! قرروا يسيبوا اللي وراهم واللي قدامهم ويهربوا ! خدوا اللي قدروا عليه، و كل واحد ومراته شالوا عيالهم وجريوا .. عزلوا من البلد بحالها .. الناس خرجت بالآلاف وهما بيتلفتوا حواليهم و مرعوبين .. بعد خرجوهم بأقل من ١٢ ساعه حصل زلزال دمر البيوت .. نسفها .. جاب عليها واطيها زي ما بيقولوا .. مبقاش في البلد كلها علي بعضها بيت سليم !! اهل البلد وقتها عرفوا ان الكلاب كانت بتبح بشكل مُخيف وبعدد كبير لان الحيوان هو المخلوق الوحيد اللي بيشعر بالزلازل قبل وقوعها فكانوا بينبهوا اهل البلد عن طريق النبح المُستمر ان في هزه ارضيه هتدمرهم ! - زي ما بيقولوا " بُكره الكويس اللي راح هتقول بعدها عنه كويس إنه راح " ربنا اسمه " الحكيم والرحيم " ياخد منك شيء بتحبه بحكمته علشان يعوضك بأشياء تعشقها برحمته .. مُستحيل يترزع في وشك باب إلا لما ربنا يفتحلك في المقابل أبواب .. متيأسيش من رحمة ربنا هتُفرج من وسع .. القلم لما يتقصف بتبريه فيطلعله سِن أحسن وأجمل .. فلما يتقصفلك حلم ايًا كان بقي " حُب .. دراسه .. شُغل .. صاحب " تأكد إن ربنا هيبريلك حلم جديد وأحسن واجمل من اللي إنتهي بالنسبالك، وهيشوف النور ويعيش لأنه إختيار رباني وربنا لما يختار شيء لابد يهيأ جميع الاسباب اللي تحفظهولك، فديمًا قول يارب إخترلي وراضيني باللي تختارهولي وعوضني ! وزي ما اللي قبلنا قالوا : لو كان خيرًا لبقي، وفعلاً : الخيره فيما إختاره الله .. ☝️❤️ #عوضني_يارب 👐 : )) #أحمد_أيمن ..
10-02-2017, 10:24 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
متستغناش عن الشخص اللي : - لو اتصورت علي موبايله يبعتلك الصوره في نفس اليوم من غير ما ينشف ريقك . - ميحلاش لُه قعده او خروجه وسفر إلا معاك . - بياخد رايك في لبسه وكُل تفصيله من تفاصيل حياته . - لما يشوف فيديو او بوست يلفت نظره بيعملك مينشن . - اللي لما تقع في الحُب يتحمل رغيك وكلامك المتكرر عن اللي حبيته . - اللي بيرد علي رسايلك بسرعه، ولما تحتاجله تلاقيه في ضهرك وبيقويك . - لو فيك عيوب الدُنيا برضه باقي عليك وعُمره ما يعايرك ولا بيشوف فيك غلطه ! - لما يعرف نكته لازم تكون اول واحد تسمعها . - لو شافك واقف مع حد مبتحبهوش بيخلعك من الوقفه بشياكه . - لو قصرت في السؤال عنه وقابلته بيتعامل عادي وبنفس الود وكأن مفيش حاجه حصلت . - بيعاتب عتاب ميحرجكش ويخليك تتهرب من مواجته لأنه هيكسفك . - تدخل مطعم يدوس معاك ! تشرب حاجه يقولك هشرب ! بيشجعك و مبيقفلش الطلعه . - اللي الخروجه معاه مبتبقاش عباره عن اكل وبس ! بالعكس بتتفسحوا وتشموا هوا وتستمتعوا بوقتكم وف وسط خروجتكم : تجوعوا فتاكلوا ! - اللي بيوحشك حتي ولو شايفه من ٥ دقايق وبيبقي بالنسابلك عامل زي البطاطس مبتعرفش تشبع منه . - بيقدر وبيتفهم إنك اوقات مبيبقاش عندك القُدره ترد علي تليفونات او تتكلم مع حد وبتحتاج تبقي مع نفسك وتعتزل كل حاجه . - ممكن ميبقاش من دمك ومُختلفين ف وزنكم.. طولكم .. شكلكم .. لكن شيء رباني ربنا زرعه في قلوبكم فطرح حُب وأخوه وحنين خلاكم دم واحد وروح واحده محطوطه في جسدين . - الشخص ده هو اللي لقيت ولو سطر يشبهله وإنت بتقرأ الكلام ده و جه علي بالك دلوقت ! - قال رسول الله صلي الله عليه وسلم إذا أحب أحدكم أحدًا فليُخبره : )) قوله إنك بتحبه .. قوله إنك مهما قصرت في معاه .. مفيش أغلي علي قلبك مِنه ❤️ :)) ! #حبيبي_يابو_الصُحاب 😄✌️ #احمد_ايمن ..
10-02-2017, 10:25 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
صديقي تامر عبده امين كان عندي في البيت من كام يوم .. فخرجت اوصله للموقف علشان يروح اسكندريه .. كان الجو يومها حر قوي .. قولت اجيبله ازازتين ميه يبل بيهم ريقه .. المُهم ركب جنب السواق ف عربيه " بيجو " ٧ راكب ، بيقولي إنه إدي للسواق إزازه من الازازتين يشرب منها .. السواق واضح إنه كان عطشان لدرجة إنه تقريبًا شرب الازازه كلها ! تامر كان حاطط الشنطتين بتوعه في شنطة العربيه من ورا " واحده فيها اللاب توب والتانيه فيها لبس والذي منه " وصل اسكندريه و نزل وركب تاكسي يوصله للبيت، و ف نص الطريق افتكر انه نسي الشنطتين بتوعه في العربيه البيجو ! فقال لسواق التاكسي : الله يباركلك ياسطي إرجع الموقف بسرعه نسيت الشنطتين بتوعي ! السواق رجع وفضلوا يدورا علي العربيات اللي لسه واصله الموقف من ساعه تقريبًا .. لف هو وسواق التاكسي علي الراجل صاحب العربيه البيجو لحد لما لمحوه فجريوا عليه سواق التاكسي قال لصاحب العربيه البيجو : الاستاذ اللي واقف هناك ده نسي الشنطتين بتوعه معاك في العربيه .. رد وقال : في الحفظ والصون انا واقف مستنيه وعارف انه هيجي يدور عليهم ومكنتش همشي حتي ولو كان جه عليا الدور أحمل .. قاله ليه يعني ؟! قاله لأن الاستاذ صاحب الشنتطين بل ريقي بإزازة ميه في عز عطشي .. فقولت اكيد دلوقت ريقه ناشف بسبب الشنتطين اللي نسيهم فلازم استناه لحد لما يجي وأبل ريقه وأرد روحه زي ما رد روحي . - جبر الخاطر والمعروف اللي بتعمله لحد حتي ولو حاجه قليله في نظرك .. يشبه للكوره الجلد .. تحدفها لازم تترد فيك وترجعلك من جديد .. كلنا متشعبطين في كلمه حلوه .. متعشمين في جبر خاطر .. ربنا بيقول : هل جزاء الاحسان إلا الاحسان ؟! يستحيل تزرع مانجه وتطرح جميز ! واللي هتزرعه في اللي حواليك لازم هيطرح، وتجني منه .. جبر الخواطر زي الدايره المقفوله بيلف يلف ويرجعلك .. اعرف واحد قال للبنت اللي بيحبها وهو رايح يخطبها " انا محتفظ بيكي في قلبي من ٣ سنين " بعد سنه من خطوبتهم وتاني يوم جوازهم لقي في شنطه في اوضتهم بيفتحها لقي فيها ورق شيكولاته وكانزات فاضيه وورق هدايا وهكذا " قالتله لما جيت تخطبني وقولتلي انك احتفظت بحبي في قلبك ٣ سنين انا من وقتها قررت احتفظ بكل حاجه من ريحتك وجايه من ناحيتك ! .. علي راي المثل " اللي بيقدم السبت بيلاقي الحد " .. حبيبي يا رسول الله فعلاً صدقت لما قولت : ما عُبد الله بشيء أفضل من جبر الخواطر " ✋ #إعمل_معروف .. #إجبر_خاطر : )) #احمد_ايمن ..
10-02-2017, 10:25 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
ليلة العُمر .. والله كبرت وبقيت عريس .. مبروك يامعلم .. ربنا يسعدك يا عروسه .. ;D - بسم الله الرحمن الرحيم " وجعلنا بينكم مودة ورحمه " ربنا يولف قلوبكم علي بعض ويرمي فيها المحبه من غير حساب 👐 بما إننا في فتره أغلبها جوزات .. حبيت اتكلم بإختصار عن ليلة العُمر .. الفرح خِلص وخلاص رايحين علي شقتكم .. الله يهدي سركم يا رب . - أخيرًا إتقفل عليكم باب واحد ! ربنا سُبحانه وتعالي بيقول في القرآن " وقدموا لأنفسكم " ! لو أمك عاوزه فلوس من ابوك وقالتله هات ١٠٠ جنيه ممكن يديها من غير نفس لاما يقولها ممعايش ! لكن لو قالتله ديمًا مش حارمني من حاجه الله يبارك فيك وف صحتك يا اصيل كُنت محتاجه ١٠٠ جنيه .. حتي ولو مش معاه هيقولها والله يا ام العيال مفيش دلوقت لاما هيديها بطيب خاطر .. يبقي علي راي المثل كُله بالحنيه بيفُك ! لازم تقدم لنفسك الحنيه والاحتواء .. اول لما تدخلوا .. خليك هادي .. فرجها علي الشقه .. اتكلم في اي موضوع .. قولها شعر او أي كلمتين حلوين حتي ولو هتقول مثلاً " الشوق الشوق .. مشتاق مشتاق .. الحضن الحضن " ;D فرفش كده وفُٰك وخليها تطمنلك .. ! - حسسها إنها كل حاجه بالنسبالك .. الدُنيا ومافيها وطنك ودارك .. كلمها قد ايه حسيت بالامان بوجودها جنبك .. طبطب عليها .. بوس راسها .. الراجل لما يبوس راس مراته معناها إنه بيحترمها . - آخر حاجه ممكن توصلهالها إنها شهوه بالنسبالك لأن الليله دي بتلزق في القلب زي طابع البوسطه .. حسسها إنها إنسانه ليها كيان وقيمه كبيره جواك .. - فرجتها علي الشقه .. قعدت كلمتها كلمتين حلوين .. هزرت وضحكت .. إبدأ حياتك برضا ربنا سُبحانه وتعالي .. خليها تتوضي وصلي بيها ركعتين لله .. اللي حياته تبدأ بطاعه بتفضل طول العُمر حياه سالكه زي السكينه في الحلاوه . - خُش خدلك دُش واغسل سنانك وكل نعناع وظبط حالك .. الصحابه قبل لما يدخلوا علي زوجاتهم كانوا يحطوا ريحه وينظفوا ثيابهم ولما إتسأل واحد منهم ليه بتعمل كده ؟! المفروض هي اللي تتزين ! كان يرد ويقول " و إني لأتزين لها كما تتزين لي " - إستني .. في حاجه لازم تكون عارفها .. ربنا بيقول " فأتوهن من حيث امركم الله " اكيد إنت فاهمني .. وتأكد تمامًا إن اللي نهي عنه ربنا سُبحانه وتعالي اكيد شيء في صالحكم . - قبل لما يحصل بينكم حاجه استعيذوا بالله من الشيطان الرجيم وياريت تنفض السرير بإيدك ٣ مرات وتقول : اللهم آتني خيرها وإكفني شرها .. قول الدعاء ٣ مرات، وانتي كمان قوليه " اللهم آتني خيره وإكفني شره " بإذن الله هيباركلكم في ليلتكم و حياتكم - أهم شيء في اي علاقه هي التودد .. ربنا خلق الحيوان شهوه بدون عقل وخلق الملائكه عقل بدون شهوه وخلق الانسان شهوه وعقل علشان العقل يتحكم في الشهوه، واحاديث كتيره بتتكلم عن النبي إنه كان يقبل زوجاته ويتودد ليهم قبل لما يجامعهم .. اتقرب من زوجتك وتعامل بالحُسني خليها تتونس وترتاح بيك .. رحم الله كل هين لين سهل ! . - اكتر حاجه تجرح الست ياصديقي هي ان بعد ما تنتهي العلاقه بينكم تقوم وتسيبها ! اوعي تعمل كده .. هتكسرها .. هتحس انها ملهاش لازمه .. لكن إحضنها وقولها: ربنا مايحرمنيش منك .. إدعيلها وامدحها، وقتها هتحس بإرتياح .. اصل الست لما ترتاحلك تعشقك، وتحلي ايامك بُسكر عشقها . - ديمًا بعد علاقتك بيها إحمد ربنا علي نعمة الصحه وانه بفضله قدرك علي القرب منها .. وانه رزقك بإنسانه سابت ابوها وامها واهلها واصحابها وآمنت علي نفسها معاك .. وزي ما قال النبي الدُنيا متاع وخير متاع الدُنيا " الزوجه الصالحه " الله يصلح احوالكم ويرزقكم بالذريه الصالحه .. 👐 #صباحيه_مُباركه ..☺️❤️ #احمد_ايمن ..
10-02-2017, 10:26 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
نقول تاني : لما بتنزل تحت الدش، وتقف تستحمي فتره طويله .. بتلاقى صوابع ايدك ورجلك كرمشت .. جسمك تحس انه بيبوش بالظبط زي الصوره دي .. سيدنا يونس وهو فى بطن الحوت فضل 3 ايام جوه بطنه والحوت طلعه من بقه ورماه ع الشط .. جسم سيدنا يونس بايش تمامًا زى صوابع رجلك وايدك وانت بتاخد دش، واكتر !! شوف كمية الحنان اللي فى الآيه ؛.ربنا بيقول : وأنبتنا عليه شجرة من يقطين " تخيل كده : الشجره وهى بتطلع جنب سيدنا يونس عشان تضلل عليه لأن الشمس لو لمسته وهو بالشكل ده هياخد ضربة شمس او الحشرات هتتلم وتإذيه لحد الموت !! ربنا قال فى كتابه الكريم " وانبتنا عليه شجره " .. مقالش " وكانت بجواره شجره " ! .. لا .. دى شجره طلعتله مخصوص، واليقطين ده : يعني شجرة ورقها تخين .. الورقة حجمها حجم ودن الفيل . ! بحيث تكون ضله وتحاوطه تمامًا وتحميه من شعاع الشمس لحد ما يفوق وجسمه ينشف وترجع قوته من جديد .. وفعلاً إستعاد قوته من جديد وربنا نجاه بقدرته وعظمته .. ربنا طيب .. هيضل عليك، ويحميك .. مهما تبوشك الصعوبات ربنا هيطلعلك الخير من حُضن الأزمه .. حتى لو انت شايف الخير بعيد، وحل معادلة حُزنك مُستحيل يتفك !! صدقنى : هتلاقى الحلول طلعتلك فجأه من حيث لا تدرى زى شجره يونس اللي لا يُمكن كان يتوقع وجودها .. ربنا بيدهش وبيبهر بعطاؤه .. إتسند على ربنا واستقوى بيه لانه عظيم هيقويك، وهيخليك تستعيد طاقتك وعزيمتك .. ولما تحس بإنكسار وإنها قفلت في وشك زي الضُمنه السيده خديجه لما قالت للنبي وقت لما حس برُعب وخوف : كلا والله لا يُخزيك الله أبدًا ! #هتتعدل : )) #احمد_ايمن ..
10-02-2017, 10:28 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
قبل ظهور نتيجة الثانويه ب ٤٨ ساعه " نرمين " جارتي، وف نفس الوقت تبقي أُخت صديقي " احمد محمود " توفت بعد تعب ميتعداش الشهرين .. كانت في ثانويه عامه السنادي، ماتت قبل حتي ما تعرف نتيجة مجهودها، وإن مجموعها في التسعينات، ويمكن ده السبب اللي خلاني مكتبش بوستات الايام اللي فاتت لان حزني عليها ارهقني نفسيًا، وهو نفس السبب اللي خلاني مش عارف ابارك للناس اللي نجحت او اهون علي الناس اللي متوفقوش في المجموع .. الاعمار بيد الله .. بس محدش ضامن نفسه ! ممكن في لحظة حزن علي مجموعك تجيبلك انهيار عصبي يجيب اجلك ! انا شخصيًا مؤمن ان مفيش كليات قمه لكن في قمم في الكليات، ومش شرط يكون دخلك ورزقك مقتصر علي مجال دراستك .. عندك اغني اغنياء العالم مكملوش تعليمهم " مارك .. ستيف جوبز، وغيرهم .. اعلم اهل الارض كانوا بيتقال عنهم اغبياء في الدراسه ومنهم " ايديسون وأينشتاين " ! بلاش تحجم نفسك وتقول خلاص مستقبلك مات ! مع ان ربنا إسمه الحي، سبحانه قادر يحيي احلام جديده جواك " حاشاه يحيي جواك امل وحلم فيه الخير ويقتله ! .. هقولكم حاجه يمكن اول مره اقولها انا مكنتش ثانويه عامه انا كُنت " ثانوي صناعي " وبعدها اجتهدت وطلعت من الاوائل ع المدرسه، ودخلت حاسبات .. مش مهم إنت ايه دلوقت المهم إنت فين بعدين ؟!، وزي ما بتحط في عربيتك فردة كاوتش إستبن بحيث لو الكاوتش فرقع تلاقي فردة تانيه مكانها .. اذًا حُط في دماغك حلمين او تلاته وخطط بديله لكل حلم .. لو مجبتش طب بشري هدخل تجاره واعمل مكتب مُحاسبه .. متحطش كُل البيض بتاعك في طبق واحد عشان لو وقع واتشدش متخسرش كُل حاجه ! لكن نوع احلامك .. انا خريج حاسبات اهو وحلمي ابقي داعيه وكاتب، و لو موصلتش لقدر الله يبقي عامل خطه بديله اني اشتغل في مجال الحاسبات مثلاً ،وهكذا .. بس احاول واعمل اللي عليا وصلت خير موصلتش برده خير البنت ماتت في يوم وليله ! مش نهاية الدنيا يعني .. هتموتوا نفسكم ؟! ربنا بيعوض وبيرزق ! واللي بيحصل كله خير جبت مجموع كبير " مبروك عليك واكيد خير .. جبت مجموع صغير برضه مبروك عليك واكيد فيه الخير .. وعسي ان تكرهوا شيء وهو خير لكم ! .. وياريت تخلي مقولة سيدنا عُمر ديمًا في بالك وتؤمن بيها لانه فعلاً صدق لما قال: مَا أُبَالِي عَلَى أَيِّ حَالٍ أَصبَحتُ ، عَلَى مَا أُحِبُّ أَوْ عَلَى مَا أَكْرَهُ ، وَذَلِكَ لأَنِّي لا أَدرِي الْخَيرَ فِيمَا أُحِب أَو فيما ما أكره ! #لعله_خير 💪 copied
10-02-2017, 10:28 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
مُشكلتي إني محتاج الشخص اللي : - يقولي إنه مُش هيخرج إلا ورجله علي رجلي والخروجه من غيري هيبقي ملهاش طعم ! . - لو زعلت يتحايل عليا اقول مالي وميسينيش الا لما افضفض . - ياخد رايي في لبسه ويشاركني في تفاصيل حياته ؛ بمعني اصح : يقدرني . - لو لقي فيا عيب ينصحني وينورني ويساعدني اعالجه من غير ما يقطمني . - ميسوقش فيها ويعمل اللي يضايقني، وميفتكرش إني حنين غصب عني مُش بمزاجي ! - احكيله اسراري وينساها واتكلم بُكل حريه من غير ما اخاف من معايرته او يمسك عليا ذله ! - مينقليش اخبار تكئبني ويحاول يبعدني عن اي جو تعب وعكننه . - لو عملت ذنب يقولي خاف ربنا ويقولي توب رحمة ربنا واسعه . - لو قولتله سلام وهقفل مايقفلش ويصمم ميسبنيش لوحدي مهما حصل . - لو قصرت في حقه يعذرني ويقول اكيد عندي سبب في التقصير . - لو اتقابلنا بعد غياب ميعاتبنيش عتاب يوجع ويسامحني ويعاملني كأن مفيش حاجه حصلت . - يقدر إن كل انسان بيحتاج يكون لوحده فُمش لازم نتكلم كُل شويه وإني بحتاج وقت اختلي بنفسي وانعزل عن الناس فيه . - لو غلطت غلطه وعاتبني عليها ميعاتبنيش عليها تاني ميقلبش في القديم والجديد .. يعاتبني اول بأول وينسي ميشلش مني وميسبش فرصه للتراكمات تدمر عشرتنا . - يقربني من ربنا ده لو بيحبني لان اللي بيحب حد بيشده لطريق الله . - ميجاملنيش وف نفس الوقت ميبقاش وقح ! - يهتم بيا بس مايخنقنيش! ويعاتبني عتاب ميخلينيش اتهرب من الكلام معاه ! يتعامل بالهداوه . - يفهمني من نظره ويقدر ظروفي وميطلبش مني طلبات فوق طاقتي . - يحس ويجي بسرعه في حياتي لاني فعلاً قربت اقتنع إن ده مُش هلاقيه غير في الجنه ان شاء الله ! #وحشتني 😄❤️ #احمد_ايمن ..
10-02-2017, 10:29 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
لما تكوني بتحبي جوزك وعاوزه تلفتي نظره .. بتتزوقي، وتحطي مكياج، وتلبسي لبس حلو، وتستقبليه أحسن استقبال ;D .. تلاقيه يدخل عليكي مبرق ومصدوم ويحط ايده علي راسك ويقولك : مالك مش عوايدك إنتي عيانه ولا ايه ؟! ;D ايه الجمال ده ؟! ;D .. تقومي قيلالُه : بحبك ونفسي ترضي عني .. يقولك: قلبي راضي عنك ويبوس راسك .. لما تكوني عاوزه ترضي جوزك؛ بتعملي اللي بيحبه فيرضي عنك ولو عاوزه عنيه هيديهالك .. ولله المثل الاعلي طبعًا .. لما تبقي نفسك ترضي ربنا بحيث : - يحقق احلامك - يريح بالك .. - يهدي سرك ويريح قلبك ويكفيك كُل شر .. تعمل إيه ؟! افضل الحاجات اللي تعملها ليلة الجُمعه إنك تصلي علي النبي صلي الله عليه وسلم .. لان ده يوم فيه ساعه مُستجاب فيها الدعوات، والصلوات علي الرسول بتوصل شخصيًا بإسمك للنبي صلي الله عليه وسلم ! .. فلو عاوز تحسن صورتك وتزينها في عين الله بحيث يرضي عنك، وتراضيه؛ بدون تردد تقول دلوقت : " اللهم صل علي النبي "، ولو غيرك قالها بسببك الرضا عنك والقبول عند ربنا هيزيد ويكتر.. لأن مُفتاح باب رضا ربنا : " الصلاه علي النبي " .. فالله يرزقني ويرزقكم رضاه .. مهو وقت لما يرضي هيعطينا اللي احنا عاوزينه من غير حتي ما نطلب ! #اللهم_صلِّ_علي_النبي .. ☝️❤️ #أحمد_أيمن ..
10-02-2017, 10:30 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
* بوست يهمك وهيفرق معاك * . - الناس اللي علاقتهم مع زوجاتهم او الشخص اللي مخطوباله متوتره، وبيتلككوا لبعض .. - واللي عندهم قلة توفيق في دراستهم وإمتحاناتهم . - الاغلبيه اللي مفيش فرحه او خطوه ايجابيه في حياتهم بتكمل .. - الكتير مننا بيوتهم بتقلب خناق ومحدش طايق التاني . - اللي تعبانين نفسيًا وجسديًا وعندهم كسل و ضيق مستمر وإكتئاب وقرف من كل شيء .. في إحتمالين للي بيحصلكوا : الاول ☝️ و التقليدي إنكم بتعملوا ذنوب .. فزي ما المزيل بيمحي العرق ويقضي عليه كذلك مُزيل ذنوبك هو الاستغفار بُخ بخة إستغفار يومي تضيع بيه روايح ذنبك اللي مسيطره علي قلبك لحد ما تدلدق علي شخصيتك اللي بقت مليانه مشاكل وظروف مقندله، وبكده كُل حاجه تتسلك مهما كانت متلعبكه بإذن الله . أما الاحتمال التاني ✌️واللي انا شخصيًا برجحه .. إنكم محسودين .. علي رأي المثل " العين فلقت الحجر " وفي واحد من الصحابه مات بسبب نظرة حسد .. ممكن تحسد نفسك وتحسد اللي حواليك وإنت مُش داري ! اي حاجه تشوفها قول ماشاء الله دي جميله .. ماشاء الله ديمًا ملازمه لسانك .. الناس المحسوده محتاجه حل يخلصها من اللي هي فيه .. يكفيها شر عنين الناس اللي زي السكاكين بتدبح اي فرحه ومتخليهاش تعيش للآخر .. حتي ليلة العيد تلاقي فيها نكد وخناق ! .. اي مناسبه تقلب بغم .. بتعمل اللي عليك والجوازه مبتكملش ! مبتتوفش في شغلك .. ده الحسد ياجماعه .. النبي صلي الله عليه وسلم قال " إن كُل ذي نعمه محسود " اي حد ربنا رزقه بعيال بجمال بصحه بزوجه صالحه بأي نعمه مهما كانت معرض للحسد .. الحسد عامل زي النار والمحسود لو محاوطش نفسه النار هتشبط فيها ! .. في الشتا بتلبس جاكت عشان تحمي نفسك من السقعه .. طب أعمل ايه عشان احمي نفسي من الحسد وأخلص من اللي انا فيه ؟! .. إستمر علي قراءة المعوذتين " قل اعوذ برب الفلق .. قل اعوذ برب الناس " إقراها كتير .. إبني حصن منيع يمنع عنك عيون الناس وحقدهم وحسدهم .. كل لما تقرأ كل لما السور يعلي وتحتمي أكتر وتدفي بالستر اكتر والارتياح وهدوء الاعصاب والاوضاع يزيد .. و لو عاوز السد يبقي منيع؛ خلي غيرك يقرأهم عن طريقك ويحصن نفسه لانك هتاخد ثوابه فترتاح بسرعه .. الصقر بيبني عشه بعيد قمم الصعب حد يطوله ويهدمه .. خليك زي الصقر .. ابعد عن عيون الناس ومرض نفوسهم .. بالمعوذتين، ويبقوا يقابلونا لو حاجه اثرت فيك .. عيونهم زي الطوب وإنت زي السما عمر طوب حسد عيونهم ما يوصل لسما شخصيتك وحياتك، ولا يأثر فيك ! .. بس طبعًا ناخد بالاسباب؛ مينفعش اقعد ومذاكرش واقول انا محسود .. مدورش علي شغل واقول أنا محسود ! متمرغ في الذنوب واقول تعبي بسبب إني محسود .. ميبقاش الحسد شماعه بعلق عليها كُل حاجه ! وهكذا بقي علي كل حاجه ، وتأكد تمامًا إنك عظيم .. ناجح .. فيك حاجه حلوه حتي ولو ماكنتش شايفها .. علي أي الشيخ الشعراوي " إذا لم تجد لك حاقد فإعلم أنك فاشل " . #الحسد .. #احمد_ايمن ..
10-02-2017, 10:30 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
كلمتين ع الماشي : - إنك ترتبط متأخر بالشخص الصح؛ أحسن بكتير من إرتباطك بدري بالشخص الغلط . - قطر حلمك اللي فاتك هتحمد ربنا إنك ملحقتوش لأن آخر سِكته توهان . - البنت اللي تعرف إمته تهزر، وإمته تبقي جد .. إمته تبقي ست، و إمته تبقي بـ ١٠٠ راجل .. دي تآمنها علي نفسك وإنت مطمن . - الخروجه مش أكل بس .. الخروجه انك تشم هوا، و تعمل اللي نفسك فيه، وفي وسط خروجتك تجوع فتدخل اي مطعم تاكل .. لكن تخرج علشان تاكل بس ! ده اسمه كسل وقلة حيله .. إستمتع بحياتك " - تعرف إن الشخص اللي معاك بيعشقك لما تكون مليان عيوب وكلاكيع، ومع ذلك باقي عليك وميقدرش يستغني عنك .. تبقي عبيط لو قصرت ف حقه . - لما تلاقي الدُنيا معقده والابتلائات نازله ترِف عليك إعرف إن ربنا بيحبك لأنه لما بيحب عبد بيبتليه. - قريت عن النبي فيما معناه " إنك لو سلفت حد ١٠٠ جنيه مثلاً وقتها ربنا بيكتبلك في ميزان حسناتك إنك بتتصدق كُل يوم بـ ١٠٠ جنيه لحد لما تتردلك ! ولو أجل ميعاد السداد ربنا بيكتبلك إنك بتطلع ٢٠٠ جنيه صدقه يوميًا لحد لما يرجعهالك . - الناس اللي خسرتهم ربنا هكسبك اللي أحن وأطيب منهم . - غالبًا الشهاده مجرد مرحله من حياتك والرزق مُش مقتصر عليها سلمها لله واللي يجيبه ربنا كويس . - إنت الوحيد اللي بتحس إن جزمتك ضيقه او الكوتش اللي إنت لابسه .. معني ذلك إن محدش هيقدر اللي إنت فيه غيرك، ومحدش هيحس بيك قدك، ومحدش هيساعدك في الوصول لحلمك زيك . - عاوز تبقي سعيد في حياتك الزوجيه .. صاحب مراتك .. الحياه مع زوج او زوجه بدون صحوبيه ! مقرفه وممله . - كلنا بناخد من الرزق ١٠٠٪ .. فمتحقدش او تحسد حد علي نِعمه عنده لأنك متعرفش هو فقد إيه في حياته . - مهما بلغت من ذنوب وعيوب لو قولت وإنت بتقرأ " أستغفر الله " مبروك عليك كل ذنوبك بإذن ربنا هتتمحي المهم تكون واثق في رحمة ربنا . - بتعمل أي ذنب لكن بتصلي ؟! متبطلش صلاه .. صلاتك عامله زي الحبل اللي بيشدك بعيد عن الذنب لورا ومسيرها هتبعدك عنه . - أول لما تحس إنك مليت وتعبت من الدُعاء .. إعرف دعوتك قربت تستجاب بس الشيطان بيلهيك عشان تبطل تدعي ! - ملعون اي " شُغل .. حُب .. عيشه " تيجي علي كرامتك، وتتعب نفسيتك . - تبقي بين حيطان اوضتك وحضناك أهون بكتير من إنك تبقي بين درعات حد حاضنك، ومبيحسش بيك . - هعمل لايك عشان ميزعلوش .. مُش هعاتب عشان ميزعلوش .. مش هفارق وأقطع العلاقه اللي مُش طايقها عشان ميزعلوش ! كل حاجه عشان ميزعلوش ! وإنت تتفلق يعني ! " إن لبدنك عليك حق " جسمك بقلبك بنفسيتك ليهم حق عليك إنك تريحهم من اي ضغط تاعبهم مهما كانت النتياج ! لو هتبيع حاجه عشان تشتري نفسك إعرف إنه " ربح البيع " ! : )) #خلصانه_بشياكه . ✋ #احمد_ايمن ..
10-02-2017, 10:31 PM
سيف اليزل برعي البدوي سيف اليزل برعي البدوي
تاريخ التسجيل: 04-30-2009
مجموع المشاركات: 18425
بما إننا في موسم التزاوج ;D ف انا قاعد دلوقت في حنه مع واحد صاحبي .. متجوز .. وبما إني ناوي اتجوز قريب بأذن الله فحبيت اسأله ايه رايك في الجواز ؟! قالي كُل حاجه بتفرق .. الجواز مرتبط بالتفاهم وإن محدش يدخل بينكم .. يعني انا مثلاً واعد مراتي بعد نص ساعه من دلوقت اخدها اعشيها بره واعزمها علي كريب .. قولتله هتاخدها بره عشان كريب ؟! قالي الستات دول بأبسط حاجه تطلعم سابع سما وابسط حاجه تنكد عليهم .. اهم شيء بالنسبالها تكون معايا واوفي بوعدي .. عندك إمبارح مثلاً لقيتها قاعده علي السرير مكشره وربنا ما يوريك قلبت وش الستات في ليلة مفترجه .. سألتها مالك يابنتي ؟! قالت مفيش .. من هنا لهنا حلفت تقول مالها .. لقيتها بتقولي : انت اديت اختك وبنت اختك عيديه ومدتنيش ! قولت : يابنتي ما الفلوس في المحفظه ع الكمودينو هو انا عمري حوشت عنك حاجه ! قالت: لا انا كنت عاوزه عيديه تديهالي إنت مش انا اللي آخدها بنفسي ! قولت : طب ما تزعليش ياستي .. وقومت ضارب ايدي في المحفظه ومطلع ١٠٠ جنيه وبوست راسها وقولت : كُل سنه وإنتي طيبه .. لقيتها ضحكت وفرحت وقالت : ايوه كده .. بيقولي الغريبه إنها بعد ما خدت ال ١٠٠ جنيه فتحت المحفظه وحطتها فيها تاني !! .. ده يثبتلك إن المسأله بتفرق، وإنها عمليه تقديريه مش اكتر .. فإوعي تحسسها إنها مجرد حاله بتعيشها .. بإيدك تخلي علاقتكم انجح علاقه، وبإيدك تخليها العكس .. البنات كلهم عجينه واحده .. بيفرق معاهم التفاصيل، ومش البنات بس معظم الناس عامةً بيفرق معاهم ادق التفاصيل - افتكر إنه من ٤ سنين كنت مع واحد صاحبي وروحنا لاخوه الصغير مدرسة الابتدائي .. وكان واخد معاه علبة شيكولاته وكرمله .. وإستأذن من مدرس الفصل ودخل وزع الشيكولاته علي زمايل اخوه كلهم .. سألته عن السبب .. قال اخويا العيال بيغلسوا عليه ويضربوه فحبيت اجيبلهم شيكولاته ترقق قلوبهم تجاهه وفعلاً والله تجنبوه تمامًا وبقوا يحترموه ! .. - مراتك تتحمل اي حاجه من اللي حواليها لو إنت كويس معاها وبتهتم بالاوقات والحاجات اللي تخصها .. - بنتك او إبنك يقدر ياكل الكُتب أكل لو طبطبت عليه وقولتله ميهمكش إعمل اللي عليك واللي يجيبه ربنا كويس .. - تكسب حُب حد لو وسعتله في قعده او عديت وسلمت عليه أو جبتله هديه ! - بتفرق في طريقة النصيحه .. في اسلوب الكلام . - بتفرق جدًا لما توفي بوعدك .. لما تهتم بإهتمامات اللي حواليك .. مهما كانت طريقة تفكيره .. ممكن ساعتها يشيلك زي التاج علي راسه .. إهتموا باللي يخصوكوا يا جدعان .. قدروهم .. الحاجات التافهه في نظرنا دي هي اللي بتزيد العلاقه صلابه وتسندها علي راي المثل " نوايه بتسند الزير " الاوضه شكلها ممكن يحلو لو حطيت فيها برواز مثلاً ! اللمسات البسيطه هي اللي بتعمل بصمه وطابع مُلفت ميروحش من القلوب .. البوسه علي الراس بتنسي الشقي وتمسحه بأستكيه .. يهدينا ربنا جميعًا ويحنن قلوبنا علي اللي مالهمش غيرنا . #اصلها_بتفرق ! #احمد_ايمن ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سيف اليزل برعي البدوي
فيس بوك
تويتر
انستقرام
يوتيوب
بنتيريست