عزيز نا محمد أبوالريش سلامات وبارك الله فيك ياخ عان جاي يا اخوي . اخوك زول ضهاري ساكت . زي واحد سمع بي كلمة ( الكاونتر بوينت ) سمع بيها في المنبر ده قام بعد ما سمع بي سعر الطوب من صاحب كمينة الطوب . قالو . يازول ( الكاونتر بوينت ) التقد نعالك . تحياتي
عثمان، عاين، لامن محمد أبوالريش يتكلم عن الساكسفون ما تسكسك معاهو لأنو محمد لايتحدث من منازلهم فهو يجيد العزف على عدد من الآلات الموسيقيه و كل (عِدة الجمكسين) ومن ضمنها الساكسفون حبيب ألبي، محمد وشقيقه الأصغر السني بتاعين ساكس لايقلون في أدائهم عن الشفوت ناس فوستو بابيتي والشاب ناداف هبر والعجوز غيتاشو ميكورا بطل البارتون ساكس الجضَّم عزه في هواك زي ما كتبوها. لكن أنا المسغربني زول زيك يلفت نظرو المسرح وينسى فستان فكرياديس كيف؟ القماش دا يا عسمان زمان كان بنات العاصمه الماجدات، جيل كتائب مايو ، بيفصِّلن زيو فستان (ماكس) للسهرات والقماش إسمو الخرطوم بالليل ، قبل ما تبقى الخرطوم بالدكوه. لازم يكون (ماكس) وبدون أكمام لإظهار آثار التطعيم ضد الكوليرا والمتسولين، وفستان زي دا لامن يصادف (القوام اللادن والحشا المبروم ) طوالي الصباح تفتح الرادي وتسمع مارشات عسكريه وبيان رقم واحد ولامن يفشل كلنا نمشي الدِروه. نقطه.. كاونتر بوينت جديد.
08-04-2017, 09:21 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
اخضر العقل والقلب واللسان حبيبنا( المتحوبش) مولانا ود المرتضي صاحب البيان.. كلنا مثلك مسكونون ب( بشير يوسي) مذ كنا اطفالا بين خالاتنا وعماتنا وهن مسكونات ب( الظار) بل لازالت موسيقانا لاطعم لها بلا صولات الاحباش وكذلك اكتافنا وصدورنا لاتطرب في الرقص من غير هزات الاحباش...وكذلك ساستنا لايحسنون معارضتهم الخارجية الا حينما يتجهون شرقا نحو الهضاب النجاشية الخضراء وهم يتمنون الا تسقط سيئة الذكر حتى لاتسقط قلوبهم وتسقط الحياة وكذلك اتجه اليها جدنا المك نمر ولم يعد حتى اليوم لانه قد وجد الحياة و( فتح) للسودان والاعداء ...وقبله خرج اول لاجئين باسم الاسلام من مكة الجافة صيفا وشتاء وربيعا ولم يعودوا اليها لانهم وجدوا فيها كتابيا حلو المعشر و(ركلسوا هناك ) .....تشكر يا جميل على الهدية الجميلة و( الفيك انعرفت) ايها النجاشي الجديد هههههههه
زمان يا عثمان عندهم مكان إسمه كارمارا ، الكارامارا دا بيشتغل بين 6 مساء إلى 11 ليلا، مشيد على نمط تقليدي من القصب ويشبه المسرح الفي الفيديو أعلاه وفيهو بنابر وكنبات في شكل نصف دائره وتقدم على مسرحه عروض موسيقاهم ورقصهم الشعبي ويقدمون فيه الزغني والأنجيرا والزلزل والتبسي والقهوه. في إحدى زياراتي فاجأتنا مغنية حسناء بأغنية الراحله بيزونيش بيكيلي Hizib Le Hizib (الناس بالناس) وهي أغنية صافحت آذاننا منذ الصبا في سبعينيات القرن المنصرم حين غناها الرائع عبدالله دينق في فرقة جاز المدرعات لامن كان في السودان جاز ومدرعات، عبدالله دينق يترجمها على أنها أغنية (المانسونا) وكان عازفا ماهرا للساكس ويقدم صولات على أيقاع التمتم المُسكِر لكافة شعوب القرن الأفريقي وبلاد كوش ومن أزرى بهم الدهر في غفلة من التاريخ، أعادتني تلك الفتاة الجميلة إلى أيام بنكهة حلومر قيد العواسه في عصريات ما قبل رمضان ونحن بين الأهل لاشايلين هم لا عارفين بكرا الجايينا.. بكيت...
08-05-2017, 07:09 PM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
أهلا بالناظر هباني، الذين تقدموا بطلبات اللجوء السياسي إلى النجاشي (سِمعت تِحت تِحت إنه سوداني)* ما كان عندهم خيار غير (يركلسوا) هناك، وعاد منهم إلى جزيرة العرب بعض القادة لنصرة الدعوه، لكنهم لم يكونوا وحدهم فكثير ممن أنعشهم دعاش الهضبه (كسروا ركبه) هناك يمنيين وطليان وتجار من أمدرمان ولي أصهار تزوجوا من هناك وكانوا ناس قيافه واتلموا على ناس قيافه فتلاقت قمم يا مرحى. بالله ياعمده ما تجرجرني في الإندياح ، انا نزلت أغنيه لفكرياديس نيقيتيب لاغير .
-
* باقي السالفه يكملها ليك حبيبنا د. أحمد طراوه فهو مهتم ب علم الفايلوجيناتكس والأنساب وحايطلِّع لينا ساره نورو بت عم شيقوق لَزَم.
08-06-2017, 12:58 PM
ياسر السر ياسر السر
تاريخ التسجيل: 08-06-2010
مجموع المشاركات: 3204
(وهكذا تنال اجر إخراج صحبك هشام هباني من وعثاء حالة الركود و الجذر الضارب حركة الجماهير و المعارضة ، الي رحاب الكون دا كلو .. )
الناظر من يوم عرفتو ياهو حالو، زي سيدني بواتييه في دور جون كين بفيلم ( الأخ جون) ..يغتس سنين ويرجع في الوقت الحاسم.. وأحد الأقارب يحتضر.. في بوست سابق قلنا ليهو الباقي ما كتير..تعال، وأهو شغال معانا كده لثلاثة عقود وتزيد.. بس الكويس يا طراوه مسارو عندي .. الله يديهو العافيه وانت معاهو يا أحمد
أبوالعزايم، شوف (عزه في هواك) عند قيتاشو كيف.. هو والدموع جيران..
08-07-2017, 11:34 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
مثلك يا عباس، علاقتي بلغة الأمهره (أعني المكتوبه والمنطوقه) كعلاقتي باللغه السنسكريتيه، أو كعلاقة حكامنا بقضايانا وهمومنا، لكن بقية لغاتهم أفهمها جيدا، جيدا جدا، سيما في المساءات مع الرذاذ ، وتحديدا الشهقة الشهيره المحفزه على الإستمراريه في الكلام.. تلك الشهقه قصيرة الموجه المحظوره دوليا ..
08-08-2017, 07:15 AM
abas abas
تاريخ التسجيل: 07-27-2002
مجموع المشاركات: 6254
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد المرتضى حامد
محمد محمد قاضي
Osman Musa
محمد أبوالعزائم أبوالريش
هشام هباني
أحمد طراوه
abas
ياسر السر
فيس بوك
تويتر
انستقرام
يوتيوب
بنتيريست