الحِـرة .. (حكـــاوي) من الزمن السمح .

Quote: بوي واعمامي رحمة الله علي من مات ومن هو حي. كانوا يِدَّلوا البحر لي زراعتن ومرات يتشكلو يختوه قرض وبالليل كل زول يجيب عشاهو في الديوان وياكلو مع بعض زي الماحصلت حاجة. عندهن بابور فوق البحر شركة بيناتن ـ يوم البابور عاوز تصليح جابو المكنيكي والناس ملمومة راجية البنطون ـ الوالد الله يرحمه اتدخل في شغل المكنيكي قام عمي نهرو وقالُّو ات شن عَرّفك بالبوابير ـ ابوي انسحب براحة واختفي من المكان ـ بعد شوية جات بت عمي ـ (الـ نَّهَر ابوي) شايلة الفطور لي ابوها واعمامها,, ابوها قال لها روحي شوفي عمك احمد خليهو يجي للفطور ـ البت تتلفت لمحت عمها قاعد في راس الجزيرة مشت عليهو لقتو ماسكلو حجر اخرش من حجارة راس الجزيرة ويدعك فيهو بي ايدينو اللِّتنين نامن جابن الدم ويبكي ـ البت قاتْلو سجمي ياعمي مالك؟ قال لها أنا يازهرة ابوك ينهرني قدام الرجال ـ انا جيت اتفشا في الحجر ده عشان ما اعوِّقو ونبقي سِيرة البلد.